ضوء -- لى يحى فضل الله

ضوء -- لى يحى فضل الله


07-27-2009, 10:02 AM


  » http://sudaneseonline.com/cgi-bin/sdb/2bb.cgi?seq=msg&board=240&msg=1248685362&rn=0


Post: #1
Title: ضوء -- لى يحى فضل الله
Author: أبوذر بابكر
Date: 07-27-2009, 10:02 AM

يا زول مليان بالضو
يا مارق من روح الطين
يا طالع من فكرة إنك
كائن ماهل
أقرب لون فى لوحة أرضك
قاعد فى هامات الجو
أصعب حاجة بتطلع منك
إنك ساهل

يا زول يا شاسع
أطعم من صلصال النيل
أكبر من كل الوجع الفينا الواسع
يا أعذب حجوات بالليل
يا ساكن فينا وفيهم
ونسة الحلة
نداوة الطلة
قمرا وكوراك وشليل
وسهم مرسوم
فى نص القلب القاعد
فى طرف المنديل

يا ضلنا

ضفر مساير قصتك
ورينا عن روح الفرح
كلمنا عن طعم الحريق
هبهب نسايمك عمنا

يا ضلنا

قسم بليلة فرحتك
خلينا نآكل كلنا
ورينا فرقات الطريق

يا ضلنا

شتت تميرات ضحكتك
كرامة لى للبلد المليح
انسج خرائط فكرتك
نشوانه بى عيون ملهمه
خط استوا النضم المريح
سافنا من خضرة بهاك
صحارى تنده فى السما
وديان حنين
مسقيه بى ريق الوئام
غيمات وريح

يا ضونا
افتح مسامات السكات
خت الكلام
ترياق يشيل وجع الأرض
فج عتمة الدرب الضهب
نور ضلام الأمنيات
واغرس تواريب البريق
شان خاطر البلد التعب
باكر تقوم
شلال غيوم
موكب نجوم
لا حر يجينا ولا سموم
باكر نقوم
يا ضلنا

Post: #2
Title: Re: ضوء -- لى يحى فضل الله
Author: محمد المرتضى حامد
Date: 07-27-2009, 12:07 PM
Parent: #1

الكلام الفوق دا يا أباذر ضوء لكل زول مبدع بسيط ساهل (صعب)،
يحيى ؟
يستاهل،
أتمنى أن تخرجه حروفك إلينا ليجدد فينا بيعة إبداعه،
تعرف يا أباذر ، كان يحيى يكثر من استخدام من كلمة (حميمية)
في كتاباته أيام جريدة الخرطوم والقاهرة والتي كانت تقدمه
إلينا ، ومن يومها مامررت بالكلمة إلا وقفز وجه يحيى بشَعره
الفوضوي ولحيته الساخرة وابتسامة مترددة ما فارقته في مصر
زمن إقامته فيها أو مسقط التي مر بها كالسحاب ، متمنيا ألا
تكون (جمّدتها) برودة أونتاريو.
سلامي ليحيى.

Quote: وسهم مرسوم
فى نص القلب القاعد
فى طرف المنديل

القلب هزمه الرغيف والتتار
والمنديل استسلم للكلينكس
وانطوت في الخاطر حسرة

Post: #3
Title: Re: ضوء -- لى يحى فضل الله
Author: أبوذر بابكر
Date: 07-27-2009, 01:30 PM
Parent: #2

كيفك يا مرتضى

السؤال يا محمد هو

ليه يحى فضل الله تحديدا وتعيينا وتخصيصا ؟

الناس المبدعة ومتفردة وبتخلق صنوف الجمال وتجمل الدنيا

كتار

والبلد مليانة ومحتشدة بيهم

اشمعنى يعنى يحى من دون الناس

يحى ده يا مرتضى زول ما عادى تب

غير كمية وحجم ونوع الخلق والإبداع الساكن جواه ومستعمر دواخله

عنده رؤى ونظر وبصيرة وفهم للأشياء ما عادية

والله بس لو البلد لقت ليها كم زول من نفس الطين بتاع يحى ده

أكيد حال حاجات كتيرة بنصلح ويستعدل وينعدل ويبقى أجمل

يحى ده يا مرتضى لو الناس تعرف، طالب البلد كتير، والخلق الحايمة دى كلها مديونة ليهو

هسه أنا من شدة ريدتى ليهو

ادينت عشان اسدد ليهو قليل من دينه علينا

سلمت وطبت وسعدت دائما يا محمد

وتحياتى وودى الكتير ليك

Post: #4
Title: Re: ضوء -- لى يحى فضل الله
Author: أبوذر بابكر
Date: 07-28-2009, 06:03 AM
Parent: #3

أسموه يحى

ليحيى بلاقع الإبداع بنمير الضوء الهطول

Post: #5
Title: Re: ضوء -- لى يحى فضل الله
Author: Ridhaa
Date: 07-28-2009, 06:16 AM
Parent: #4

الأخ العزيزأبوذر

سلام ...

سموه يحيى ليحيى .....
بلاغة من نوع جميل وهي مطابقة الكلام لمقتضى حال المخاطب ...

أين الأخ العزيز يحيى هل مازال في تلك الديار البعيدة ..أم رمى عصا الترحال

تحياتي ....

Post: #6
Title: Re: ضوء -- لى يحى فضل الله
Author: أبوذر بابكر
Date: 07-28-2009, 01:30 PM
Parent: #5

العزيز رضا

تحياتى والود

والله ما عارف بالضبط أستاذنا يحى وين حاليا

لكين أكيد حيثما كان وأمطر

سيأتى خراجه للناس

خريف سخى وخير وفير من كل نوع ولون وطعم

Post: #7
Title: Re: ضوء -- لى يحى فضل الله
Author: أبوذر بابكر
Date: 07-31-2009, 09:55 AM
Parent: #3

إحتفاء

بى يحى