بتعرف تقتل "ضــــب" ؟!!!

عدت الي المنزل عصرا بعد نهار عمل متعب ذهنيا ..
استلقيت بحثا عن الراحه لسويعات قليله تفصلني عن المغرب
وكعادتي التحديق في فراغ سقف الغرفه والسرحان قبل اغماض عيني والاستسلام للغفوه,
قطع لي شرود أفكاري عينان صغيرتان تطالعانني بفضول فوق رأسي مباشره من علي سقف الغرفه,
"ضب" أبيض اللون, متوسط العمر والحجم, له ذيل طويل وحركه سريعه خفيفه,
يبدو أن تعطل التكييف في غرفتي أخرجه من مخبأ ما فخرج طلبا للهواء بالقرب من المروحه "فوق رأسي"
ويشهد الله أني في شهور اقامتي في هذه الغرفه البالغه شهرين كاملين لم أسمع له صوتا ولم أري له أثرا,
مما يجعلني أرجح أنه قد "فقد المنطق" ونسي الحذر والاختباء عن ناظري بعد حرارة ذلك النهار القاتله حتي للبشر ..
وبما أني يصيبني خوف حد الرعب من كل الكائنات التي تمشي علي أربع أرجل فما فوق,
وخصوصا عائلة هذا الشريك الجديد في غرفتي وعائلة الصراصير,
حتي أني أتجمد من الرعب وأفقد القدره علي الحركه والكلام بمجرد رؤيتهم ..
فلازلت لا أدري كيف خرجت من الغرفه ذلك اليوم,
فقد وجدت نفسي حافيه في منتصف المنزل في أجزاء قليله من الثانيه بعد رؤيتي للعينين الصغيرتين الفضوليتين,
حتي أني الان أصدق كل روايات أدهم صبري التي طالما قرأتها ولم أكن أصدق فيها خرافة أجزاء الثانيه القليله التي كان فيها رجل المستحيل يطير بها في الهواء
ليطبع لكمه قويه علي فك أحد أعضاء الموساد,
يبدو أن للأدرينالين فعل السحر فعلا, ويبدو أن الاشارات التحذيريه وصلت الي عقلي المتثاؤب نعاسا,
لتدب سرعة غير معهوده في جسدي للهروب من احتمال سقوط افتراضي لصاحب العينين
علي وجهي مباشره,

يتبع ,,

ولأني لا أحب القتل حتي مع النمل والبعوض,
فقد اثرت الجلوس خارج الغرفه لبعض الوقت أملا في استدراك "صاحب العينين الصغيرتين" للخطأ الفظيع الذي وقع فيه بخروجه الي العلن,
وأملا في هروبه عبر شباك الغرفه المفتوح الي خارج المنزل,
ولكنه لاحياة لمن تنادي,
فبدلا عن ذلك قام العدو باحتلال الغرفه, وأخذ يصول ويجول جيئة وذهابا في سقف الغرفه بالقرب من "المروحه",
يبدو أن خطة العدو كانت الاستيلاء علي الغرفه واقصائي الي خارجها, وما أن تحقق له ذلك حتي أخذ يرقص رقصة الانتصار علي السقف دون خشيه,

جلست خارج الغرفه أرقبه من علي البعد بصبر فارغ ورغبه ملحه في النوم والراحه,
كل ذلك كان تجنبا للخطه "ب" وهي شن الحرب عليه بدون رحمه,

يتبع ,,

Quote: بتعرف تقتل "ضــــب" ؟!!!

يا أماني ضب بشري وللا ضب أصلي؟
___
رشي الضب يا أماني، بلاش دلع بنات معاك..

الاخت اماني تحياتي

(في بيتنا ضب) عنوان لفيلم اكشن اشاهده باستمرار بطولة زوجتي والاطفال والخائن طبعا الضب المسكين ؟؟ يا اماني ........ لي يوم


الليلة ماشفت لي ضب عض ليهو زول والا وقع ليهو في رأس زول ....... خلي الضب يحوم حوامته وعوجة ما بتجيك تب.

جنابو عمر:

Quote: الليلة ماشفت لي ضب عض ليهو زول والا وقع ليهو في رأس زول

طبعا الكلام ده بتكون بتقولوا لناس بيتكم طوالي,
طيب أقرأ تحت, قالوا ليك وقع في غرفة العمليات جوه بطن زول مفتوحه,
لو سمحت أمشي وصل الكلام ده للمدام والعيال,

عشان تاني يحموك النوم ههههههه’

هاهاها
سرد جميل يا أماني
لكن سيرتو بتقرفني عدييييييييييل
طبعا اتخيلت المنظر
ربنا يهون ليك ود حلال يهشوليك كده ولا كده



رشي الضب
برشو كيف وبشنويا ياسر

Quote: برشو كيف وبشنويا ياسر

يا وجن رش الضببة ده تخصص محمد عبدالماجد الصائم aka حمودي..
___
وإحتمال كبير الضب يكون ضحكنجي..

ياسر طيفور
وود الصايم

ازيكم ومنورين البوست,
لكن والله القصه دي حقيقيه وغير رمزيه,
والعدو ضب حقيقي وعندو ضنب كمان,

ياريت لو صورتو قبل المعركه يمكن كان تصدقوني :)

بعد الانتظار حتي قرابة الساعه العاشره مساءا,
ليجد عدوي مخرجا لنفسه من الغرفه,
ولقيامه عوضا عن ذلك باحتلال المكان و القيام برقصة النصر,
قررت بغضب اللجوء الي الخطه البديله وهي دحر العدو الي الخارج حيا أو ميتا,
ذلك لايعني بأي حال قيامي بذلك شخصيا فقد أقضي نحبي بالسكته القلبيه اذا مر بالقرب مني فقط,
لجأت الي أخي الذي يكبرني بعام واحد,
أخي شاب في عنفوان شبابه ذكي جدا ومفكر, يحترف العمل بالكومبيوتر ويتعلم العزف علي الجيتار,
بمعني اخر مرهف وحساس وغير دموي البته,

المهم كان أملي كبيرا في قضاءه علي عدوي لأنعم بالنوم في ليلتي تلك في الغرفه,
ولكنه بدلا عن ذلك أخذ يناقشني طويلا علي مرمي ومسمع من العدو عن كيفية قيامه بذلك,
اذ لم يسبق له مطلقا قتل أي كائن كان,
وضعنا خطه برشه بالماء "النصيحه كانت من والدتي" حتي يسقط عن السقف ثم يقوم أخي بقتله شر قتله,
كنا أنا وأخي نقف خارج الغرفه قرب الباب استعدادا للهروب في أي لحظه ,
وقمنا بتنفيذ الجزء الأول من الخطه وسقط العدو ونفذت مايليني من الخطه بالهروب حين سقوط العدو,
ولم يحرك أخي ساكنا لقتله !!
ففشلت الخطه ورجع العدو الي معقله في السقف سالما دون أن يعاني سوي من دوخه أحسبها في رأسه من أثر السقوط,

وصرخات فزع مكتومه أطلقتها حين سقط العدو ذهبت هباءا حين عودته سالما الي عرينه دون أن يمسه أذي !!

يتبع,

يا أماني
لوما كنت في الصين!
كان ضربتي 911 وللا شنو؟؟؟
__
عاملي الضب معاملَّة صينيَّة، أعملي منو شوربة ضب وللا مشوي وللا محمَّر..

اماني سلام
دايرة تكتلي ضب .. اول حاجة كاتلاهو مالك? ما سمعتي بي عيش وخلي الخلق يعيش? علي الاقل حيخلصك من الحشرات يعني ممكن تعتبريهو صديق للبيئة المنزلية..
اما اذا كان لا بد ان تقتليه فعليك بالسنارة زي السمك تختي ليهو فيها طعم وتجي تلقيهو معلق زي الشرموط .. بعد داك كان دايرة تكتليهو كان دايرة تربيهو ..
وللتخلص من وجود الضب في البيت (يقال) ان ريش الطاؤوس يجعله يهرب ويختفي

من مذكرات صايع

لالا يا ياسر مالك ناكت لينا الجقور(وش مكشم سنونو)

أماني انت بتبالغي الضب دا مابقدر عليو أخوك كنتي تنادي بابا
أوعى بس هو كمان يكون إحساسو عالى (وجه مبتسم)


كاتلاهو مالك?
الضب لازم نكتلو وسمعت لو كمان قتلتو بيدك (وع ) بتكسب حسنات لانو عدو الله فتن
الرسول صلى الله عليه وسلم عندما كان في الغار

الأُستاذة / أماني الأمين .
عساكِ بخير .

Quote: وكعادتي التحديق في فراغ سقف الغرفه والسرحان قبل اغماض عيني والاستسلام للغفوه,

أكَّان سمِعْتي نصيحة أخوك ، أصلو ما كان تعايني لي فوق ، وكان تغفِّي طَوَّالي .

أختنا / أماني .
أُتابعُ معكِ هذا الْخَيْطَ الْجميل ، وأشكرُكِ كثيرًا على هذا التَّداعي .

تقديري .

الأخ محمد زين:

Quote: أختنا / أماني . أُتابعُ معكِ هذا الْخَيْطَ الْجميل ، وأشكرُكِ كثيرًا على هذا التَّداعي .

عارف بقيت كل ما أجي داخله الغرفه أول حاجه بعاين للسقف والحيطان عشان أطمئن هههههه

شكرا علي متابعتك,

يا أمانى،

من ما شفت العنوان،
و أنا بقول إنشالله الفى بالى ما يطلع صاح،
والله ما أتمنيتها ليكى،،،

أنا طبعا المخلوق دة بسمع سيرتو ساكت،
جسمى كلو بضرب كهرباء،،،،

كان عندى حكاية (شهيرة) فى منبر الهندسة،
إسمها "سارة و الضب"،
بس طارت مع الهكر (الله يجازيه)،
و أنا حردت و ابيت أكتبها تانى،،،،

Quote: بعد الانتظار حتي قرابة الساعه العاشره مساءا,

لقيتك بالك طويل لكن،،،



غايتو عندى حكايات كتيرة مع المذكور أعلاه،
بجيكى أحكى ليكى منها شوية،
بس طمنينا عليكى فى الاول،،،






________________________________

Quote: بتعرف تقتل "ضــــب" ؟!!!

أنا مرة رشيته بفباف،،،،

الأعزاء المرور,
معذره علي الانقطاع عن البوست وذلك لظروف العمل,
سأعود للتعقيب عليكم واحد واحد,

بعد ساعه كامله من النقاش المستفيض عن كيفية قتل الضب بيني وبين أخي,
وعدونا يسمع وأشعر به يبتسم في تحدي , أعلن أخي عدم معرفته للتعامل مع مواقف بهذا الشكل !!
وأنه لم يسبق له التعرض لأي مخلوق بشّر, ثم مهد لي بأن علي التأقلم مع وجود العدو في الغرفه,
وذلك بقوله تشبه مقولة جنابو عمر أعلاه "عموما الضب ما بيعضي" ..

كدت أن أفقد صوابي وطلبت منه حراسة الضب الي حين عودتي,
فسألني: يعني أحرسه كيف؟
فأجبت: يعني ما تخليهو يطلع بالشباك .. "التحدي مع العدو أصبح شخصي الان والمطلوب سقوطه ميتا بدون رحمه"
قال: طيب "بعدم اقتناع" وملل فقد كان يود العوده الي مشغولياته التي أعطله عنها ..

ثم ذهبت الي أخي الأكبر, ورويت عليه القصه وطلبت حضوره للغوث,

يتبع ,,

أخي الأكبر يستحق أن تغني فيه وعنه كل أغاني الحماس علي مر الزمان,
فقد أتي بمنتهي البساطه ودخل الي الغرفه ووقف في منتصفها وحمل عصا طويله
قام بها بضرب العدو,
الذي ألجمته الدهشه فبعد سماعه لحوارنا المستفيض أنا وأخي الاخر ظن أن لاضرر يرجي من هذه الأسره,
ولكنه سرعان ما فوجئ بالضربه القاضيه من أخي الأكبر ,
فسقط مغشيا عليه !!
وما لبث أن وجد نفسه مطاردا بضراوه علي الأرض: معركة رجل لضب :)
كلما حاول الاختباء خلف الأثاث كان يأتي به أخي مدحورا قبل أن يرتد اليه طرفه,
وكنت أنا أصرخ صرخاتي المكتومه بهلع وأقف أعلي الكنبه خارج الغرفه أرقب المعركه برعب,
وأخي الاخر يقف خارج الغرفه وبيده سلاح اخر لا أظنه كان سيستعمله في حال خروج العدو اليه ..

المهم بعد معركه صغيرة الأمد أردي أخي الأكبر العدو قتيلا بعد محاصره تامه من داخل أرض المعركه,
وبشجاعه وددت بعدها أن أكبّر فرحا لسقوط عدوي قتيلا واخلاءه لغرفتي التي استولي عليها بوضع اليد ,

ونمت يومها قريرة العين داخل الغرفه محل النزاع,

وقبل النوم, وأنا أحدق في سقف الغرفه بشرود أدركت ضرورة سؤال زوج المستقبل سؤالا في غاية الأهميه,

وهو:

بتعرف تقتل ضب ؟

انتهي ,,

يا أمانى معليش،
لكن الخطط الحربية لقتل الضبوب
تحتم الاتى:

Quote: ولكنه سرعان ما فوجئ بالضربه القاضيه من أخي الأكبر , فسقط مغشيا عليه !!

هل حاصرتوا العدو بما فيه الكفاية،
حتى تأمنوا مكان السقوط،،
يعنى حسه لو كان سقط ليكى فوق الفرش،
و لا فى تربيزة المكتب مثلا،
كنتى بتستعمليهم تانى؟؟؟

Quote: ونمت يومها قريرة العين داخل الغرفه محل النزاع,

نمتى وين بالظبط،
و كمان قريرة العين!!! (عينى باردة)،
أوعى يكون فى أرض المعركة،
لقيتك قلبك قوى لكن،،

طيب يا ستى قصتك دى محتاجة بعض التفاصيل الاساسية،
زى عملية (التطهير) التى تمت،،،
و اداة الجريمة (العصا) هل يتم إستخدامها بعد ذلك؟؟؟
و...


معذرة يا جماعة،
الموضوع دة ما هين أبدا،
بعرفه المجربو بس،،

سرد ممتع و شيق جداً ..
غايتو إنتهيتي من أخوكـ الفنان و عظمتي المصارع الأكبر .





_
طيب الفار كيف ؟ و خاصة ( الجِقِر) ..

ما كان تدينا مسنجر!
كان قضينا ليكـ الشغلة زماااان!

Quote: هل حاصرتوا العدو بما فيه الكفاية، حتى تأمنوا مكان السقوط،، يعنى حسه لو كان سقط ليكى فوق الفرش، و لا فى تربيزة المكتب مثلا، كنتى بتستعمليهم تانى؟؟؟

إبنةأختي طبيبة كانت تعمل بمستشفى عطبرة,
حكت لي أنها كانت داخل غرفة العمليات مع
تيم من الدكاترة والممرضين, يقومون بإجراء
عملية لمريض, وفي أثناء العملية, والمريض
راقد فوق طاولة العمليات تحت تأثير البنج
وبطنه مفتوحة ومشدودة بعدة مقصات, أذا بضب
يقع من السقف على بطن المريض, وما كان من
التيم الا أن تركوا المريض, وقاموا بمحاصرة
الضب والقضاء عليه, ليعاودوا العملية في
جو خالي من الضوضاء...

قلت لبنت أختي: أسع اكان الضب ده إنقطع
في بطن المريض ده كان حا تعملوا شنو؟؟؟

والله ضحكت جنس ضحك, وشر البلية ما يضحك...

اها يا هالة رايك في دي شنو؟؟؟

سلام يا أماني...

ازيكم جميعا,
وسعيده بمروركم,
المشكله اني في الشغل وما عارفه أرد عليكم بمزاج,
لكن خلوني أبدأ بهاله لأنها سألت سؤال استراتيجي,

Quote: طيب يا ستى قصتك دى محتاجة بعض التفاصيل الاساسية، زى عملية (التطهير) التى تمت،،، و اداة الجريمة (العصا) هل يتم إستخدامها بعد ذلك؟؟؟

هاله بالجد لقيتك خبيره في المجال ده,
فعلا القصه ناقصه لبعض التفاصيل وده كله لأني شغاله هسي,
خليني أحكي ليك:
طبعا ما قدرت ألملم الغرفه قبل المعركه لأني هربت في جزء من الثانيه زي ما قلت ليك,
لكن تم اعدام ما يمكن اعدامه,
أول حاجه الجثمان بتاع القتيل وأدوات المعركه ,
تم التخلص منهم من قبل أخي الفنان "ياقول نوبي" وذلك بعد التأكد من موته :)
ولم أدخل الغرفه قبل ذلك,
ثم قمت بالتخلص من جميع الملايات والفرش الي الغساله والقيام بعملية نظافه ليليه طويلة الأمد,
والدتي سألتني: بتعملي كده ليه هو وقع في السرير؟
جاوبتها: لأ ياماما لكن لما رشوهو بالمويه المويه جات راجعه في الأوضه كلها ورشتها :)
طبعا يا هاله كان ممكن يقع في السرير, (وقتها كنت حأهضرب بيهو الليل كله),
وكان ممكن يقع لأخوي القتلو ده في راسه لأنو ضربه وهو واقف تحته مباشره,
شفتي الشجاعه دي كيف؟
ومن شدت ما وترتو بصرخاتي المكتومه طردني من الحته كلها وقال لي أمشي بعيد,
قمت نزلت من الكرسي ومشيت طلعت في الكنبه هناااك, وبرضو قعدت أصرّخ :)

بصراحه المعركه كانت عنيفه والعدو كان متمسك بالحياه شديد,
لكن المعركه كانت شخصيه :) والشجاعه غلبت الضب :)

بالله ذكريني ياهاله لو في تفاصيل نسيتها حسب خبرتك :)

عندي شغل وبجيكم بعدين ,

يا أمانى،
طبعا خبيرة،
عندى معاهو صولات و جولات (من وراء حجاب)،،

Quote: وكان ممكن يقع لأخوي القتلو ده في راسه لأنو ضربه وهو واقف تحته مباشره, شفتي الشجاعه دي كيف؟

ماشاء الله على أخوكى،
راجل و لا كل الرجالة،،
لكن كان كان وقع فى راسو،
راس أخوكى دة زاااتو تانى ما تمسكيه،،،
:D :D :D




بجيكى تانى لللتفاصيل،،،

Quote: وما كان من التيم الا أن تركوا المريض, وقاموا بمحاصرة الضب والقضاء عليه, ليعاودوا العملية في جو خالي من الضوضاء...

عاينوا جنس المصايب دى،
يا معاوية المدير،
حاصرو و قضوا عليه وين بالظبط؟؟

أوعى يكون جوة بطن المريض!!

و بعدين المريض (عفشته) غسلوها ليه و لا لأ؟؟

أقل من ليفة و صابونة ( و بعدين يرموها) ما ينفع،،،






______________
قلت لى رجعوا للعملية (من غير تعقيم)؟؟؟
إنا لله،،،،

سلامات Amany Elamin
يا اخى انتى حكاية حكى شديد ....
انا ذيك ..بخاف من كل الكائنات الحيه ما عدا الانسان
اما قصص الضبون اللى سبتا ليها غرف و بيوت كاملة ما بتتحسب
بعدين يا اختى معرفه قتل ضب دى ما هينه...امريكا و العالم كلو وقفوا على رجل واحده لما اوباما قتل ذبابة...اتخيلى كان حصل شنو لو قتل ضب!!!
اخوك الكبير ده (رجل من عصر الفرسان)
_______________________________________________________
Have I ever mentioned that I like you and your posts? I will be in Khartoum later this year; I hope we can meet then.

خالص التحايا
العزيزة
Amany Elamin
انا شخصيا اتفق معكِ جملة وتفصيلا، في مسالة الهواجس من الضبوب دي...
لانو كنت حاكون في نفس موقفك منو ؛اي حتاج الى من يقتل ضباً..
فقط المفارقة بيني وبينك انو حوجتك لشخص مساعد في عملية القتل انتى ناجمة عن خوف وانا ناجمه عن اشمئزاز..
وفي راي مافي مخلوق ممكن الواحد يقشعر منو زي الضب..
تصدقي الضفدعة جميلة..

التحايا النواضر..

اماني الامين تحياتي

انت بتخافي من الضب وفي ناس بياكلو الضب
انا اقترح عليك تاخد معاهم كورس هنا في السعودية
عشان تاني ان ظهر ليك تقرضيه قرض غرائب الابل
رغم ان الضب الذي ظهر لك يساوي واحد في الالف من ذلك الضب

الأخ الشامي:
مرحب بيك ونورتنا,

Quote: انت بتخافي من الضب وفي ناس بياكلو الضب انا اقترح عليك تاخد معاهم كورس هنا في السعودية عشان تاني ان ظهر ليك تقرضيه قرض غرائب الابل رغم ان الضب الذي ظهر لك يساوي واحد في الالف من ذلك الضب

أيوه سمعت عن الضب الصحراوي البياكلوهو ناس السعوديه,
البيئه الصحراويه القاسيه علمت الناس ديل سلوكيات غذائيه صعبه,
بالضبط زي الصينيين,
ظروفهم الاقتصاديه السيئه زمان خلتهم يجربوا أنواع بتاعت طعام مدهشه,
وفضلوا بيتناولوها حتي بعد القفزه الهائله الاقتصاديه اللي حصلت ليهم,
الموضوع بقي في جيناتهم وما قدروا يغيروهو,

تحياتي,

هالة ،،

Quote: عاينوا جنس المصايب دى، يا معاوية المدير، حاصرو و قضوا عليه وين بالظبط؟؟ أوعى يكون جوة بطن المريض!! و بعدين المريض (عفشته) غسلوها ليه و لا لأ؟؟ أقل من ليفة و صابونة ( و بعدين يرموها) ما ينفع،،،

اتخيلي منظر سارة ،،
إذا كان الضب وقع في فستانها ساكت ،،
حردت اللكشر والجامعة ،،
وفستانها زاتو تاني ما لبسته ..

يقوم ده يقع جوة بطن المريض

غايتو سارة قطع شك كانت اتخلصت من العفشة ..

Quote: يا معاوية المدير، حاصرو و قضوا عليه وين بالظبط؟؟ أوعى يكون جوة بطن المريض!!

طبعا خارج بطن المريض, لانو غادر بسرعة,
ودارت المعركة فوق بلاط غرفة العمليات
( على وزن بلاط الملك ) مما جعله يترك
بصمات أرجله على البلاط ملطخة بالدماء...

مسالة غسيل العفشة دي والله ما متاكد منها.

تعقيم شنو يا بت أخوي؟؟؟
إنا لله...

الأخ معتز تروتسكي:
شكرا لأنك الشجاع الوحيد هنا,
اللي اعترف انه ما بقدر يقتل ضب لأنه بيشمئز منه,
ودي حاجه لاعيب ولا غلط لأنه شعور انساني طبيعي وفطري,

Quote: تصدقي الضفدعة جميلة.

حرام عليك هههههه

..
.
والله
الحكوة تخليك تتابع بنهم عشان النهاية دى ..

Quote: وما لبث أن وجد نفسه مطاردا بضراوه علي الأرض: معركة رجل لضب :)

والعجب التوصر الخيالى لجميع افراد المنزل فى دحر العدو
عارفه يا امانى
دى اسكتش عديل لناس الهيلاهوب

________

والله يو ريلى ميد ماى دى

سانكيوووووو :)

تبلدينا ازيك:

Quote: والله الحكوة تخليك تتابع بنهم

لو شفت القصه دي كانت دراميه كيف ما حتصدق,
أنا زاتي لما عاينت للمنظر وأنا واقفه بالشبشب فوق الكنبه,
وأخواني واحد شايل عصايه وواقف في نص الأوضه والتاني شايل عصايه صغيره وواقف جنب الباب,
قربت أضحك, بس كانوا حيجوني بعكاكيزهم دي أنا ههههههه

شكرا لمرورك,

Quote: طيب الفار كيف ؟ و خاصة ( الجِقِر) ..

اماني وفيصل ..

طبعا دا تخصصي ..

ما عارفة فجأة كدة لقيت نفسي متخصص في قتل الفيران وحرافة كدة أحرف من الفار نفسه ..

لي قصص عديدة مع السيد الفار ..

في يوم في (جقر) كبير جاء قاطع الحوش ونحن قاعدين .. بس راقبته ليك اشوفوا بخش وين !!

لقيته دخل في (سبورة) معلقة في الحيطة اولاد اختي لما يجوا بدرسوا فيها عاملها ليهم ابوي كبيرة وبعدين السبورة مفرغة من الداخل عشان ابوي عامل ليها (سدايب) هههههه

المهم

جري مشيت ليك للسبورة وضغطتها على الحيطة .. وناديت ليك ابوي يا ابوي يا ابوي تعال ساعدني ..

ابوي جاء .. قلت ليهو انت امسك لي السبورة وانا بقوم باللازم ..

مشيت جبت لي عصاية كاربة كدة ..

اتفقت مع ابوي قلت ليه في اللحظة الاقول ليك هوى السبورة من الحيطة تعمل كدة وبي 1 2 3

بس قلنا مع بعض (لقيت ليك ابوي لذيذ وهو بنفذ في اوامري لاول مرة) هههه

1 2 3

الفار جاء ناطي (الذ شي تاني ابوي نط معاي) هههههههههه

وانا اديته ليك واحد شويتها كانوا بلعب (سكج بكج) هههههههههه

الفار طار هناك ووقع ميت لا حراك فيه ..

دي واحدة من اروع 100 قصة فار لي ..


ههههههههه

------

مع تحياتي لناهد بشير الطيب ههههههههه

كامل تضامني مع الأخت أماني الأمين في خلعتها ..

الضب أو الوزغ مخلوق كريه المنظر ..

ومسم .. الله ستر .. لو بصق في العين ممكن يسبب العمى أو ضرر بليغ .. لأن بصاقه سام ..

Quote: في القاموس : الوَزَغَةُ ، مُحرَّكةً‏:‏ سامُّ ابْرَصَ ، سُمِّيَتْ بها لِخِفَّتِها وسُرْعَةِ حَرَكَتِها، في الحديث : عن عامر بن سعد عن أبيه رضي الله عنه قال ( أن النبي صلى الله عليه وسلم أمر بقتل الوزغ، وسمَّاه فُويسقاً ) رواه مسلم وعن أبي هريرة رضي الله عنه قال : قال رسول الله صلى الله عليه وسلم : (مَن قتلَ وزغةً في أوّل ضربةٍ، فله كذا وكذا حسنةً ، ومن قتلها في الضربة الثانية فله كذا وكذا حسنة ؛ لِدونِ الحسنة الأولى ، ومن قتلها في الضربة الثالثة ، فله كذا وكذا حسنةً؛ لدون الثانية ). رواه مسلم وأبو داود والترمذي وابن ماجه وعن عائشة ان رسول اللّه صلى اللّه عليه وسلم قال‏:‏ ‏(‏ان ابراهيم حين القي في النار لم يكن في الارض دابة الا تطفئ النار غير الوزغ فانه كان ينفخ على ابراهيم‏ )‏، ( فامرنا رسول اللّه صلى اللّه عليه وسلم بقتله ‏) اخرجه ابن ابي حاتم وفي بعض الروايات ان امراة دخلت على عائشة فوجدت عندها رمحاً فقالت‏:‏ ما تصنعين بهذا الرمح ؟ ‏ فقالت‏:‏ نقتل به الاوزاغ ، وذكرت الحديث‏ وهذه فتاوي للشيخ ابن عثيمين رحمه الله تعالى السؤال: جزاكم الله خيرا يقول رَغَّبَ الرسول صلى الله عليه وسلم في قتل الوزغ وبأن أن الذي يقتله من أول مرة يكون له مائة حسنة ما حكم قتل الوزغ وما حكم قتل الضفادع؟ الجواب : الشيخ: أما قتل الوزغ فإنه سنة وفيه أجر عظيم قد أخبر النبي صلى الله عليه وعلى آله وسلم أنه كان ينفخ النار على إبراهيم حين ألقي فيها ، ثم أن فيه مضرة وأذى وأصواتا قبيحة مكروهة وأما الضفادع فلا تقتل إلا إذا آذت فإن آذت فلا بأس بقتلها لأن كل مؤذٍ يقتل كما قال الفقهاء رحمهم الله يسن قتل كل مؤذٍ السؤال : حفظكم الله يقول هذا السائل ما الثواب المترتب على قتل الوزغ يا فضيلة الشيخ؟ الجواب : الشيخ :الوزغ أمر النبي صلى الله عليه وسلم بقتله وأخبر أنه كان ينفخ النار على إبراهيم وقتله بأول مرة ثوابه مائة حسنة وفي الثانية أظنها سبعين ووجه ذلك أنه إذا قتله في أول مرة دل ذلك على صدق بغضه له ومحبة هلاكه وإذا تأخر صار ضربه إياه سهلاً. يقول الشيخ المنجد قتل الوزغ مشروع بأدلة كثيرة وذلك بآلة ونحوها وليس في شيء من الروايات تخصيص اليد أو الندب إلى قتله باليد المباشرة ولا أظن ذلك صحيحاً ولا وارداً فمثل هذا بعيد عن هدي الإسلام ومعالي الأخلاق . وكان عند عائشة رمح مخصص لقتل الوزغ وزيادة الحسنات بقتله من اول ضربة للحث على قتله فتوى للشيخ سامي بن عبد العزيز الماجد عضو هيئة التدريس بجامعة الإمام محمد بن سعود الإسلامية السؤال : قرأت فتوى عن قتل الوزغ، وفيها جاء المفتي بتعليل غريب يبرر قتل الوزغ، وهو أنه كان ينفخ في النار التي أعدت لحرق نبي الله إبراهيم عليه الصلاة والسلام. وهذه الفتوى تشعرني بالإحباط؛ لأنها تجعل الإسلام يبدو بربرياً ومستهجناً في عيون الكفار ومثل هذه الفتاوى لا تخدم الدعوة إلى الإسلام. فالوزغ حيوان صغير لا يؤثر في نفخ النار، وحتى لو صح ذلك: فلماذا يقتل كل وزغ في الأرض، كما قد يقال بأنه يجب قتل كل الناس بسبب قتل شخص لآخر؟ أرجو التوضيح. الجواب : وعليكم السلام ورحمة الله الحمد لله والصلاة والسلام على رسول الله، وبعد فإن الأمر بقتل الوزغ لا يختلف عن الأمر بقتل العقرب والحية والفأرة والكلب العقور، وهو الكلب المفترس الذي يعدو على الناس. وقد صح الحديث بالأمر بقتل الفواسق الخمس في الحل والحرم، وهي الحية والعقرب والكلب العقور والفأرة والحدأة وهي طائر من الجوارح وانظر صحيح البخاري وصحيح مسلم . فالأمر بقتل الوزغ هو للعلة نفسها التي أمر لأجلها أمر بقتل الفواسق الخمس وهي الإيذاء فكل مؤذٍ يشرع قتله، فليس قتل الوزغ لأجل أنه كان ينفخ على إبراهيم عليه السلام في النار فحسب، بل أمر بقتله لأنه مؤذٍ فهو سامّ، ولذا تسميه العرب سامّ أبرص، والإخبار بأنه كان ينفخ بالنار على إبراهيم عليه الصلاة والسلام بيان لخبثه وعظم إيذائه، فجنسه خبيث. وأما الجواب عن قول السائل: ما ذنب الوزغ في عصرنا حتى تؤخذ جميع الوزغات بجريرة وزغة كانت تنفخ في النار على إبراهيم عليه الصلاة والسلام ؟ فإن قتلها ليس لأجل جريرة واحد منها في عهد غابر، وإنما لأجل أنها مؤذية بطبعها تفسد الطعام وتسم الإنسان، فاقتضى ذلك قتلها، وما ذكره النبي صلى الله عليه وسلم من كون الوزغ ينفخ بالنار على إبراهيم عليه الصلاة والسلام ، كاشف عن خبث طبيعة هذه الدويبة . والله أعلم . وصلي اللهم وسلم وبارك على نبينا محمد وعلى اله وصحبه اجمعين .[/

B]


تحياتي،،

جاد

الأخ جاد:

Quote: كامل تضامني مع الأخت أماني الأمين في خلعتها ..

شكرا علي تضامنك,
وعلي ايراد النص المفصل,
معناتها أخوي ده طلع من المعركه بحسنات كمان,

شكرا للمرور,

انعام حيموره :

Quote: الفار طار هناك ووقع ميت لا حراك فيه .. دي واحدة من اروع 100 قصة فار لي ..

ضحكتيني بالجد,
الله يخليك لناس بيتكم,
عايني لو لقينا لينا واحد في البيت حنناديك ليهو,
عشان تكتبي كتاب تسميهو أروع 101 قصة فار لي هههههههه

سمارت العسل:

Quote: أخوك الكبير ده (رجل من عصر الفرسان)

صاح والله يا سمارت,
هو كده في كل حاجه,
طباعه فعلا طباع جدودنا الزمان في كرمه وشهامته وشجاعته,

Quote: Have I ever mentioned that I like you and your posts? I will be in Khartoum later this year; I hope we can meet then

وأنا كمان والله ياسمارت,
من زمان بيعجبني اسلوبك وروحك اللطيفه,
وحأتشرف كتير لو قابلتك في الاجازه بتاعتك,
بس أديني خبر بمواعيد وصولك أو ما تحدديها عن طريق الماسنجر,

اتفقنا؟

الأخ معاويه المدير:

Quote: أذا بضب يقع من السقف على بطن المريض

أول حاجه ما ممكن تتخيل كمية ال Parasites اللي بتعيش في جسم الضب !!
يعني المريض ده الله مرقو من ال Contamination
عندي صحبتي دارسه علوم عملت بحث التخرج بتاعها في الموضوع ده,
ولقت نتائج انو في عدد مهول من الطفيليات بتعيش داخل جسم الضب علي فكره,
يعني ما تشوفو أبيض كده تفتكره نضيف ههههه

بعدين عاوزه أسأل بت أختك بعد ما فاق المريض من البنج كلموهو بالحصل ده وللا لأ,
غايتو أنا لو في محله برفع قضيه علي ادارة المستشفي طوالي,
ودي قضيه ناجحه بكل المقاييس ,

هلا يانوبي:

Quote: غايتو إنتهيتي من أخوكـ الفنان و عظمتي المصارع الأكبر .

أبدا والله,
بس الناس طباعها بتختلف,
التقزز ده شعور انساني ممكن يكون عند الرجال بس بنسبه أقل,
يعني الفنان ده ما كان حيسيب الأوضه زيي لو لقي ضب,
وما حيقوم جاري منو,
لكن كمان ما لدرجة يقتله هههههههه

Quote: طيب الفار كيف ؟ و خاصة ( الجِقِر) ..

فار .. ضب كله بيخوف بس الضب أثقل,
لأنه دمه تقيل وبيتلايق في الحيطه, يعني ما بيجري بسرعه زي الفار ويطلع من الأوضه ههههه

البت اللذيذه وجن:
حسيت بيك انفعلت مع القصه شديد,
شفت البنات احساسهم واحد كيف,
بيخافو ويتقززوا ويقرفوا,
طبعا دي حاجات ربنا رفعها عن غالبية الرجال ههههههه
عشان كده لو ما متزوجه لازم تسألي العريس المتقدم ليك "بتعرف تقتل الضب؟"

عشان بعدين يا تقوموا تستنجدوا بالجيران ولا تجيبوا شركة مكافحة الافات :)

الأخ الفاضل عبد اللطيف:

Quote: علي الاقل حيخلصك من الحشرات يعني ممكن تعتبريهو صديق للبيئة المنزلية..

يعني Environment friendly?
هو الضب ده غير البعوض والذباب تاني بياكل شنو؟
لا لا لا أنا أحسن لي أرش البعوض بي بفباف من اني أعيش مع الضب في حته واحده عشان يتخلص لي من البعوض !!

شكرا علي النصائح وحأوفرها للمره الجايه هههههه

الاستاذة امانى

و افوووووووووو يا امانى ...

و الله قايلك متلنا نحن ناس القيقر...

بنقتل الضب و بنأكل الورل طبعا بعد مطارة و جرو من الجحر من ضنبه و ضبحه

و بعد السلخ و يا أمانى ما أحلى الشوربة Yamyyyyyyyyyyyyyy in my tamy

و كمان فاكرك بنت فحلة زى بناتنا فى النيل الابيض و أعالى النيل بتمسكى التمساح

و تعملى فيهو زى عملة الورل .

سؤالى : هل أكلت لحم القرنتى يا أمانى؟

او "سيد قشطة" كما يسميه المصريون

الطيب رحمه

أيوة يا أماني

(إجابة على السئوال موضوع البوست)

وليك وحشة ,, تحياتي للجميع ..

أهلا بملامح:

Quote: أيوة يا أماني (إجابة على السئوال موضوع البوست)

وشكرا علي المشاركه ونورتنا ..

تحية طيبة للجميع

Quote: معناتها أخوي ده طلع من المعركه بحسنات كمان

حسنات ساى ، ده بقى مجاهد كمان

و دى صورة لـ ضب فى طلعة ميدانية ، لتفقد الاحوال




لكن بالمناسبة ، اوع تسمعو كلام ياسر و ترشو الضب بالموية (الكلام ده للمبتدئين) فى قتل الضببه

لانو من ترش الضب بالموية ، ضنبو بينفصل عن جسمو ، و بيبقى الجسم ثابت و الضنب هو البيتحرك ، و دى

حركة الضب بدقس بيها (المهاجم) عشان هو يجرى، و ممكن تسبب هلع للمبتدئين و كده ، لكن المحترفين

برشو الضب بالمويه ، لانو بعد ما ترشو بالمويه الضنب بتحرك و الجسم بيكون واقف (نظام عايز يدقسك و يشغلك

بالضنب) ساعتها طوالى تعالجو بضربة محكمة بشكل طولى تجيب اجلو ( و يا حبذا بـ سفنجة) ، اهم حاجة يقع

فى منطقة غير مأهولة بالسكان ، لانو ممكن ينقل الامراض بعيد عنكم جميعا .

* اكتر ضب بـ تذكرو ، قتلتو من غير قصد ، الداقس كان محشور بين ضلفة الباب و الحيطة، و لمن قفلت الباب !!!!! مات

* و بهديكم الكليب ده بالمناسبة دى

http://www.youtube.com/watch?v=k6FULX0F7l8

الأخ محمد الأمين :
سعيدين بمشاركت خبرتك :)

Quote: و ممكن تسبب هلع للمبتدئين و كده ، لكن المحترفين برشو الضب بالمويه ، لانو بعد ما ترشو بالمويه الضنب بتحرك و الجسم بيكون واقف

والله ده الحصل فعلا, لما رشاه المبتدئ بالمويه اتخلعنا نحن, والضب ما جاتو أي حاجه ههههه

لكن الصوره لاوزت بي شديد,
عاينت ليها عين مغمضه وعين مفتحه,
ده صورتو وبعدين قتلته وللا رجع بيته سالم؟

تحياتي وسعيده بمرورك ..

Quote: وقبل النوم, وأنا أحدق في سقف الغرفه بشرود أدركت ضرورة سؤال زوج المستقبل سؤالا في غاية الأهميه, وهو: بتعرف تقتل ضب ؟

ايوة انا بعرف اقتل ضب

ألأخت/امانى...


السلام عليكم....

سرد رائع..وجميل...

Quote: وما لبث أن وجد نفسه مطاردا بضراوه علي الأرض: معركة رجل لضب :) كلما حاول الاختباء خلف الأثاث كان يأتي به أخي مدحورا قبل أن يرتد اليه طرفه, وكنت أنا أصرخ صرخاتي المكتومه بهلع وأقف أعلي الكنبه خارج الغرفه أرقب المعركه برعب, وأخي الاخر يقف خارج الغرفه وبيده سلاح اخر لا أظنه كان سيستعمله في حال خروج العدو اليه ..

ما قطعتى فى اخوك قصيدة...

أخوى الما بترعب..اخوى الكتل الضب...

أخوى الراجل ابشنب...أخوى ما خاف وإترعب...

شال عصايتو..وإنسلب....وختاها فوق راسو تب...

ومات موتة ..وما إنقلب....

مودتى...........إسماعيل محمد أحمد عباس....

ما بكرهه في حياتي شي زي الضب
لو لقيتو في حلم كان ما كتلتو ما برتاح



الغريب الضب يعتبر من المخلوقات النافعه
حيث يقوم بالقضاء علي الباعوض والحشرات الصغيره



لكن عجبتني حكاية متوسط العمر دي يا اماني .. قلبتي فيها الهوبه
سرد ضبابي ممتع ونتمني يظهر ليك تمساح عشان تكتبي اكتر واطول

النصيحة لله يا أماني الضب من الكائنات المقرفة خالص، السحليَّة قد تكون ألطّف منه درجة..
__
والغريبَّة قالوا الضب عندو بصاغ (بُزاق) سام جداً..

غايتو يا اماني اخوك ضمن مستقبلو ، ح يعرس طوالي ، بعد ( الخدمة الالزامية الضبية ) دي .

سلام يا أماني

سردك ممتع وضحكني شديد ، لكن انتي وأخوانك ما يسمع بيكم ود الريح (حساس محمد حساس) ، لانه رايه في الضب مختلف جدا وشوف عيني في التلفزيون شايل الضب في يده وأصبعه في خشم الضب وهو بيتكلم عن منافع الضب وأنه صديق للبيئة وما ضار ولا سام ولا حاجة بس ممكن الناس بتقرف منه عشان شكله . ومن سمعت كلام ود الريح ده تاني ما قتلت لي ضب وهسع في بيتي يمكن عايشين معاي اكتر من عشرين ضب وحايمات ساهي في البيت يوم واحد لا غلط عليهم لا غلطوا علي .

الأخ جاد لك التحية

هل ثبت أن الوزغ المذكور في الحديث هو الضب نفسه ، لان بعضهم يقول السحلية لانها أكثر ضررا وربما يكون كائنا آخر . المهم أرجو الافادة عشان من باكر يكون عندي معركة حاسمة مع كمية من الضبوب مشاركاني بيتي .. ودمت .

أبو قصي

أهلا بأبو قصي:

Quote: ود الريح (حساس محمد حساس) ، لانه رايه في الضب مختلف جدا وشوف عيني في التلفزيون شايل الضب في يده وأصبعه في خشم الضب وهو بيتكلم عن منافع الضب وأنه صديق للبيئة وما ضار ولا سام ولا حاجة بس ممكن الناس بتقرف منه عشان شكله

تحياتي واحترامي لدكتور الريح,
بس والله صحبتي عملت بحث في الضب لقتو مليان طفيليات,
أسمع كلامي والعشرين ضب الفي بيتكم أبدأ اتخلص منهم,
أنا أفهم انو يعيش في المزارع والأماكن الغير مأهوله,
في بيتكم بره في الحوش,
لكن جوووه الغرف دي حاجه متعبه نفسيا شديد,

تحياتي,,

كيفك يا أمانى،
و كيف أصبحتوا جميعا،،
صباح ممطر جميل،
و درجة الحرارة الان فى الخرطوم 22 (كما يقال)،،

ما يكدر صفوى الان،
و مع الصباح الباكر،
جا ضب حايم فى المكتب،
نادينا 2 بنغالة،
جوا مسلحين بالعكاكيز،
الضب جرا دخل وراء المكيف،
أنا فى اللحظة دى طبعا برة المكتب،
جونى مارقين خلاص مافى مشكل،،
ليه مشى وين؟؟
طلع فوق (السقف المستعار)،
قلت ليه يعنى يكون مشى الماركتينغ،
قال لى مشى الماركيتنغ،،،

طبعا على مين؟؟
أضطريت إضطرارا أقعد فى المكتب،
وكل شوية أرفع راسى فوق و أفتش السقف،
ومن ما عرفت موضوع بصاقه بعمى العين ( و العياذ بالله)،
بقت عينى بتحرقنى،،،


الليلة غايتو ما ظنيت ح اعرف أشتغل حاجة،،،

Quote: عشان كده لو ما متزوجه لازم تسألي العريس المتقدم ليك "بتعرف تقتل الضب؟"

على رأيك يا أمانى،
أنا مرة كنت براى فى شقة،
و فجاءة ظهر سئ الذكر فى المطبخ،،
ما عرفت أحرد المطبخ و لا أسيب ليه الشقة،،

بعد فترة كدة، قررت إنو اتشجع و أمشى (أطرده) من المطبخ،
و ليه يعنى مطبخى أنا،،
شلت عصاية كدة،
وفتحت باب البلكونة و مشيت أحاصره،

غايتو اليوم دة قربت ابكى،

و يومها عرفت (فائدة الرجال)،،،

الأخ نوفل:

Quote: سرد ضبابي ممتع ونتمني يظهر ليك تمساح عشان تكتبي اكتر واطول

حراااام عليك,

شكرا لمرورك,

هاله شريكتي في البوست ده:
ازيك وصباحك خير,
سعيده بمؤازرتك ومساندتك لي ضد عدونا المشترك الضب,
وصباحك جميل زي اليوم الأوله مطر وخير ده انشاءالله,

وكويس انه الضب الليله محتل المكتب,
ده عذر كويس تاخدي Day off وتمشي تستمعي بالجو الجميل,
الليله لو ناس الشركه ما قتلوا الضب ما تدخلي المكتب خالص,

شفتي مرات الضب مفيد كيف؟ :)

تعالي أحكي لينا ذكرياتك بتاعة البوست "ساره والضب"

مستنينك ..

يا أمانى قبل ذكريات الحكاية إياها،
و بالمناسبة هى حكاية حقيقية حصلت ايام الكلية،
و بتورى مدى التأزم بتاع البنات من موضوع الضبوبة دة،
أرجعى لمداخلة إبراهيم محمد الحسن فوق،،،

بس كنت دايرة اديكى شوية هنتات كدة من الخبرة (ما حقتى طبعا)،
أنا برضو عندى أخوى الصغير ما من مبادئه يقتل الضب،
فبيقعد يغيظنا،
يعنى ح يعمل ليكم شنو،
و إحنا نصرخ،

لكن أخوى الكبير (ماشاء الله) خبرة فى قتل الضبوب (جمعتها على كيفى)، و مسك الفيران،
و الغريبة الفار ما بيقتله زى إنعام حيمورة،
بيشيله فى العربية و يوديه بعيد فى الخلا،
ليه ما فاهمة،،،

برجع للضب،
فعلا احسن سلاح (على ما أعتقد) هو (السفنجة)،
بس تحسنى الرمى،
المشكلة العاقبة بتكون وخيمة إذا الضربة قوية،،،

مرة كنا راحلين فى بيتنا جديد،
الناس كلهم قاعدين تحت يتفرجوا،
أنا سبتهم و طلعت فوق أتوضى أظن،
جيت أفتح النور،
حسيت بحاجة بتتحرك،
صرخت صرخة برئ،
الحالة ما هبشتها لكن أتهيأ لى كنت ح أهبشها،،
فى اقل من الثانية جا أخوى جارى السلم اربعة اربعة و شايل عصاية ،
من وين ما عارفة،،،،
و من وراه أبوى و أمى،،،
لقانى واقف ناشفة،
و بقول ليه الضببببببب،
أتلفت على و كان ح يدينى أنا بالعصاية،،،
بس ربنا ستر،،،،

هو كان فاكر فى حرامى،،
و من يومها إلا أحنس أبوى (رحمة الله عليه) أو أمى يكلموه يقوم بالواجب،،،

هاله ازيك:
ومعليش علي الغياب عن البوست, بس مشغوله كالعاده,

Quote: فعلا احسن سلاح (على ما أعتقد) هو (السفنجة)، بس تحسنى الرمى، المشكلة العاقبة بتكون وخيمة إذا الضربة قوية،،،

هاله ماتبالغي, وأنا قلت عليك خبره !!
السفنجه ما بتكتل الضب ولا حاجه,
بتجيبو ليك واقع بس,


---
ههههههه عليك الله دي مش ونسة مساطيل ههههههه

أهلا بيك يا أخ فلان:

Quote: غايتو يا اماني اخوك ضمن مستقبلو ، ح يعرس طوالي ، بعد ( الخدمة الالزامية الضبية ) دي .

طبعا تاني يوم بنات أختي الصغار حكت ليهم ماما الحصل,
مسكوا في الموضوع وما خلوا زول ما حكوا ليهو,
شالوا حس واحد وزي ماقلت روجوا للتاني شديد هههههه

ياسر طيفور:

Quote: النصيحة لله يا أماني الضب من الكائنات المقرفة خالص، السحليَّة قد تكون ألطّف منه درجة..

طيب وقت قلت النصيحه, قاعد تقتله ياياسر وللا بتنادي ليهو زول يقتلوا ليك؟

Quote: طيب وقت قلت النصيحه, قاعد تقتله ياياسر وللا بتنادي ليهو زول يقتلوا ليك؟

أكتلوا ساكت يا أماني، والله لو عارف ليهو عنوان، خليك من يجيني في أوضتي، أعملو كفتة عديل؛ بعد ما شفت بي عيني جهجهت الضب ليك، إتذكرت غزوَّة الضراع الطويل، لأنو ذكرو في ناس قاعدين في بيتهم في أمانتي الله، جاهم ضب جد جد، شايل ليهو كلاشنكوف، يا ربي الحصل ليهم شنو؟ إذا كان إنتي الجايَّة من بلاد الضب فيها وجبَّة دسمة، فما بال من يأتيه ضب بكامل عتاده..
___
البوست ممتِع يا اماني لكن الفيك إتعرفّت

الأخ اسماعيل عباس:
شكرا علي القصيده الرائعه,
والله عجبتني بشكل:

Quote: ما قطعتى فى اخوك قصيدة... أخوى الما بترعب..اخوى الكتل الضب... أخوى الراجل ابشنب...أخوى ما خاف وإترعب... شال عصايتو..وإنسلب....وختاها فوق راسو تب...]

لغاية مانلقي لينا فنان يغنيها,
خلينا نسمع دي :
http://www.youtube.com/watch?v=9j1Zlod6Uo8

الأخ جمال الباقر:

Quote: ايوة انا بعرف اقتل ضب

اتخيل لو من ضمن الشكر البشكروهو للعريس في الخطوبه يقولوا "كمان بيقتل الضب" هههههه
غايتو كده زوجة المستقبل بتكون مطمئنه شديد,

تحياتي,

أهلا بالأخ الطيب رحمه:

Quote: بنقتل الضب و بنأكل الورل طبعا بعد مطارة و جرو من الجحر من ضنبه و ضبحه

ماشاء الله عليك,
لكن هسي بعد الاغتراب كيف؟
احتمال ترجع تكاتل الورل عادي وللا التغيير وارد هههههه

بعد إذنك يا أمانى أرد على المحترم أبو قصى،

Quote: سردك ممتع وضحكني شديد ، لكن انتي وأخوانك ما يسمع بيكم ود الريح (حساس محمد حساس) ، لانه رايه في الضب مختلف جدا وشوف عيني في التلفزيون شايل الضب في يده وأصبعه في خشم الضب

يعنى جات على الضب يا أبو قصى،
يعنى ما د. محمد عبدالله الريح كان بيمسك الاصلة كمان و بيتكلم عنها،

و شوف عينى و عمرى ما أنسى،
مرة فى بيتنا الولد الشغال لقى ليه حفرة عجيبة فى الحوش تحت الحيطة،

طبعا على طول الوالدة الله يديهاالعافية عملت الإجراءات اللازمة،
قفلت الابواب و منعتنا نمشى نستكشف،
و أتصلت على الوالد (الله يرحمه) فى العمل،

جا الوالد جارى و معاه د. الريح (صديقه)،
فى اللحظة دى الوالدة ما قدرت تعمل كنترول،
و طلعنا الحوش،
و إذا به د. الريح مدخل إيد كلها (حتى الكتف) فى الحفرة،
عشان يعرف طبيعتها،

و فى الاخر افاد إنو دى ما حفرة ثعبان،،،
حفرة حاجة تانية ما متذكراها،

طبعا الاهم بالنسبة لى كان المنظر،،،،

Quote: فبدلا عن ذلك قام العدو باحتلال الغرفه, وأخذ يصول ويجول جيئة وذهابا في سقف الغرفه بالقرب من "المروحه", يبدو أن خطة العدو كانت الاستيلاء علي الغرفه واقصائي الي خارجها, وما أن تحقق له ذلك حتي أخذ يرقص رقصة الانتصار علي السقف دون خشيه

أنا كنت عايز أقول ليك يا أماني المفروض تطالبي السيد الضب دا بأيجار الغرفة وحق الكهرباء ومحتويات الغرفة من راحة وخلافه ..
لكن لقيتكم هنا ..

Quote: المهم بعد معركه صغيرة الأمد أردي أخي الأكبر العدو قتيلا بعد محاصره تامه من داخل أرض المعركه, وبشجاعه وددت بعدها أن أكبّر فرحا لسقوط عدوي قتيلا واخلاءه لغرفتي التي استولي عليها بوضع اليد ,

خلصتوا على السيد الضب المسكين ..
وعليه ما يجوكم ناس حقوق الضببة العالمية ويطلعوكم إرهابيين ..
وكان بقت على أهله هينّه لأنه أقلاها ح يقولوا ليكم عايزين الدية

أماني ازيك ..
السرد مشوق وجميل ..
طبعاً الموضوع دا ما ح ينتهي على كده ..
لأن عائلة المدعو الضب دا بتكون موجودة ولابدة ليك في الضلمة عشان تاخد بي تاره
عشان كده لازم تعملي تحصيناتك من هسي ..
مع تجنيد قوة دفاع لأمثال هؤلاء المعتدين ..
غايتو الضب دا إتلوم معاك جنس لوم ..


أبقي طيبة ..

أهلا يامعتصم:
ازيك ونشاء الله أمورك كلها تمام,
بتضحك فيني مالك؟
هسي أسأل المدام من شعورها تجاه الضب, وشوف ردها,
يعني عشان السعوديه ما فيها ضبوب وانت مرتاح من الدراما دي؟
طيب تعال السودان اجازه وشوف حترجع كاتل كم ضب؟

Quote: لأن عائلة المدعو الضب دا بتكون موجودة ولابدة ليك في الضلمة عشان تاخد بي تاره عشان كده لازم تعملي تحصيناتك من هسي ..

بعد ما سمعوا بأضانهم الحصل لي قريبهم ده !!
الاتكون عمليات انتحاريه هههههههه

الاخت اماني - احترامات

Quote: المهم بعد معركه صغيرة الأمد أردي أخي الأكبر العدو قتيلا بعد محاصره تامه من داخل أرض المعركه,وبشجاعه وددت بعدها أن أكبّر فرحا لسقوط عدوي قتيلا واخلاءه لغرفتي التي استولي عليها بوضع اليد ,

هنيئا لكم بهذا الانتصار المبارك .. ونحمد لله انه لم توجد اي خسائر ..

ولكن يقننامني ان هذا الضب (اثني ام ضكر ) هو صاحب اسرة تقيم داخل غرفتك . واظن ان هذا الاسرة لن تدعك تهنئي في في غرفتك بعد مقتل عائلهم اذا فترضانهو ضكرا - او امهم اذا كان هذا الصب من الجنس اللطيف . وامامك حل من اتنين :

1- لابد ان لاتدعي لمكيفك مجالا يتوقف ولو ثانيه . لانهم لن يرحلو من غرفتك مدي الحياة وانهم يتحينون الفرصه للانتقام منك ومن اخوك الاكبر -
2- اما تبيعو المنزل هربا الي منزل اخر من هذه الاسرة المتربصه بكم ... وسوف يقع المشتري لمنزلك في المطاردة من اسرة القتيل صاحب العينان الزرقاوان .


لكن . سؤالك لفتي الاحلام .. بتعرف تقتل الضب ؟؟
في هذا الذمن .... ياي مستحيل ........ حرام
واراكي .....قد ركبتي الشبوك

الأخ عبد الله كع:
كيف الحال؟

Quote: واظن ان هذا الاسرة لن تدعك تهنئي في في غرفتك بعد مقتل عائلهم اذا فترضانهو ضكرا - او امهم اذا كان هذا الصب من الجنس اللطيف

القتيل كان شاب يعني بكون ولدهم وللا بتهم كده ..

Quote: لابد ان لاتدعي لمكيفك مجالا يتوقف ولو ثانيه . لانهم لن يرحلو من غرفتك مدي الحياة

صلحتو خلاص المكيف ومشغلاهو 24 ساعه..
بعدين ديل بكونو رحلوا زمان من يوم المعركه,
لو قاعدين بكونوا شايفين ليك أخوي عشره عشره, أنا مالي؟ أنا قتلته ليهم زول؟ قصدي ضب؟

ألأخت/أمانى......................شكرآ على أغنية الفروسية الجميلة..

واخوك ايضآ فارس وما بنقدر..تسلمى ويسلم أخوك يا أخت.....

بوست مكمل الروعة....الفأر رأيك فيهو شنو يا أمانى؟؟؟؟؟


إسماعيل محمد أحمد عباس.....

المرة الجاية يا أماني اتصلي بقوات الدفاع (الضببي)، ودي مهمتها مكافحة كل العملاء
من الضببة الأجنبية والوطنية، ومن امكانياتهم انهم بيجيبوه ليك وضنبو فيهو، لأنه كما يقال أن من صفات الضب انه اذا انقطع ضنبو..الضنب يفرفر ويجري ويلبد في جحر لامن يقوم للضنب (ضب) جديد..شفتي كيفن؟؟

مونى

شوق الشوق


اها لو كان ميت ولقيتيه جنبك فى السرير كان حاتعملى شنو؟؟

لاحووووولا احساس ما بقدر اوصفه ليك موووت عديل كده

Quote: بتعرف تقتل ضــــب ؟!!!

يا بت ده سؤال تسأليه؟؟ قولى بتعرف تهش الضبانة؟





اخوى بعرف كيف معاك