وكأنَّنا في حاجة لحرب أهلية ثالثة !

حسب ما علمت فإن الإجواء في الخرطوم والجزيرة وأجزاء من وسط السودان .. أجواء خريفية رائعة .. غيوم ورزاز ومطر .. ومزاج نديان .. كأن السماء أشفقت على هذا البلد .. فأرادت أن تمنح بعضاً من أهله شيئاً من ابتسام .. ولكن هذه الأجواء الطيبة لا يفسدها الآن إلا الحرب المعلنة بين مقاتلي الهلال والمريخ .. هذه الحرب التي يشعل لهيبها مجموعة من النفعيين والانتهازيين في الميديا الرياضية ومجموعة من المراهقين على الشرائط الغبية المنسابة في أسفل القنوات السودانية .. وينساق خلفها بكل أسف كثير من الأخوة والأصدقاء هنا .. كأننا في حاجة إلى حرب.. كأننا في حاجة لنزرع مزيد من مشاعر الحقد والكراهية والبغضاء .. هل هي الروح العدائية التي استوطنت مشاعر السودانيين بسبب الصراعات السياسية فأصبحت الرياضة وسيلة لتفجير براكين الكبت السياسي والاجتماعي ؟ هل أنحطَّّ الوعي الوطني؟ هل من رشيد يضع حداً لهذه الحرب الأهلية الجديدة ؟ أقول ومعظم النار من مستصغر الشرر إن أي شأن كان .. أدبي .. فني .. رياضي يتم تناوله بدون حس واعي ومسئولية يمكن أن يصبح كارثة في مآلاته الأخيرة ..


أنظر إلى اللغة المستخدمة .. "الحرب" .. "المعركة" .. "يوم الرجال" .. "مذبحة السبت" ..
اللعنة على الهلال والمريخ وعلى هذا السذاجة العبيطة .. يا سادتي الرياضة ألفة .. محبة .. وحدة .. تضامن .. إبداع .. إسهام إنساني راقي .. ولست في حاجة للتذكير بالبديهيات .. ماذا يعني أن يفوز المريخ أو الهلال ويخسر هذا البلد الجريح .. يخسر بمزيد من الاحتقان .. بمزيد من العنف اللفظي والجسدي .. بمزيد من الطاقات المهدرة في الصراعات الوهمية .. كم فاز الهلال .. وكم وكم فاز المريخ .. نتعارك في الدافوري المحلي .. وأذا قدم إلينا شبين الكوم من مصر أو ضمد من السعودية يمكن أن يهزم السودان من حلفا إلى نمولي .. لا تصدقوا دوري المجموعات ودوري الخمستاشر دي فرقعة فاضية لا تسترعورة مستوانا الهزيل ..

السيد كمال شداد .. قائد الدفة .. وخبير الرياضة .. دكتور الفلسفة بجامعة الخرطوم .. في محاضرة بفندق القصر الأبيض بالرياض .. أرغى وأزبد .. وهدد وتوعد .. ورجم الحاضرين بقنابل من الألفاظ المهينة .. وقال لا يوجد ما يسمي بالكرة السودانية والعصر الذهبي .. وقال الإعلامي عدواني .. والحكم ضعيف .. والمشجع ساذج .. واللاعب السوداني هش إذا تعرض لجرعات تدريبية عالية بتجيهو ملاريا ودسنتاريا .. .. دا الخبير والقائد وحامي الحمي .. تاني العوة في شنو يا أهل الله ..

حقاً .. إذا صار جِدٌ الناس هزلاً .. وصار هزلهم جدا فأقِم عليهم مأتماً وعويلا ..

أستغرب ماذا أصاب هذا الإنسان ؟ .. ماذا أصاب هذا السودان ؟ الأرض صارت ساحة للقتال السياسي والفني والرياضي .. السياسة صارت مصالح شخصية .. الوطن صار عبارة للنفاق .. العلاقات الاجتماعية غدت بضائع تجارية ... أليس هناك ما يوقف هذا الطوفان المدمر .. هذا البلد التعيس يحتاج لمن يؤسس لمبادي المحبة والتماسك والسلام .. لا لمن ينفخ مكامن الغضب والانفعال واللجاج القبيح .. هذا البلد يحتاج لمن يعمل لقيم الحق والخير والجمال .. لا لمن يعمل على تشويه التاريخ والمكان والزمان .. دعوها من فتنة .. وارحمونا الله يرحمكم ..


وآسف يا ناس الكورة لو عكرت عليكم مزاجكم الشرير ..
أنا برضو بتاع كورة

Quote: أنظر إلى اللغة المستخدمة .. "الحرب" .. "المعركة" .. "يوم الرجال" .. "مذبحة السبت" ..

يا زول ما مشكلة ..
بركة الجيت .. بركة الجيت

صلاح شتات ..
مرحبا بك في ارض الواقع .. كيف ناس عالم المظلات* بالله ..
انشاء الله ما اكلوا العجين ..

..
..

جاي تستنكر يا شتات .. يا مان و الله فتحت علي نفسك فتحة سد مروي ما يسدها ليك ..
خلي الكورة دي تنتهي .. و بجي انشاء الله نرجعك لثباتك الاسطوري ( نوم العوافي ) ..

..
..

احـي منك ياخي .. غظتني شديد ..
مثال حي للمثقف السوداني .. !!



---------------------------------------------------------------------------------------------------
* لمعرفة المزيد عن عالم المظلات الذي يعيش فيهو اخونا شتات .. افجخ هنا .. http://online.alarab.co.il/view.php?sel=00016011

ياااا حميدة
البسيخومتري دا شنو؟

Quote: أستغرب ماذا أصاب هذا الإنسان ؟ .. ماذا أصاب هذا السودان ؟ الأرض صارت ساحة للقتال السياسي والفني والرياضي .. السياسة صارت مصالح شخصية .. الوطن صار عبارة للنفاق .. العلاقات الاجتماعية غدت بضائع تجارية ... أليس هناك ما يوقف هذا الطوفان المدمر .. هذا البلد التعيس يحتاج لمن يؤسس لمبادي المحبة والتماسك والسلام .. لا لمن ينفخ مكامن الغضب والانفعال واللجاج القبيح .. هذا البلد يحتاج لمن يعمل لقيم الحق والخير والجمال .. لا لمن يعمل على تشويه التاريخ والمكان والزمان .. دعوها من فتنة .. وارحمونا الله يرحمكم

شتات - تحياتي

بركة الجيت يا ناظم الحرف الشفيف
واصل كتابة عن المدارات والشموس
والأهلة (مش الهلالاب) واوغل في
الفلسفة برفق

ونسأل الله أن يلهمنا حكمة تخرجنا
من الظلمات إلى النور .. آمين

كان بقت على الكورة هينة
تعال شوف البقت على الغناالكان كلو رومانسية وكلام حالم
هسي بقى كلو قنابل ورصاص وجبخانات



مراحب كتيرة بعودتك يا شتات ..

فرحانين برجوعك يا شتات..

حمدلله علي السلامة..

Quote: حسب ما علمت فإن الإجواء في الخرطوم والجزيرة وأجزاء من وسط السودان .. أجواء خريفية رائعة .. غيوم ورزاز ومطر .. ومزاج نديان .. كأن السماء أشفقت على هذا البلد .. فأرادت أن تمنح بعضاً من أهله شيئاً من ابتسام

يا شتــــــات يا جميل ...
الحكاية مناكفات وبس ..
والحمد لله استفزاكـ الموضوع ..
وعشان زعلكـ الصور دي طازة ، أخذت صباح أمس الجمعة بعد المطرة طوالي ..
فتشتها ولقيتة ليكـ في منتدى كورة والشكر للمصور الجميل ..

وروروووووووووووووك ..
الليلة يـوم الرجال ..


البرازيل تشجع الهلال ..
أهل البرازيل يقفون مع الهلال ..
أهل السودان يشجعون الهلال ..
تاني في منو ..
الحمام أها دا طرفنا منو ..

الفاضل/ شتات

اولا / حمد الله علي السلامة
صحيح كل شيء بقى عداوة وبغض
لقد ولى زمن الرومانسية والحلم والحب والقلوب البيضاء والسماحة
و لو مشيت في طريقك دا بترجع للقوقعة تاني عشان كدا

تفاءل ياخي واسمع كلام محمد عبد الجليل واكتب السمح والجميل
وانت من هنا واخر واخرى من هناك ويتكاثر العدد لهزيمة الكراهية واشاعة الحب

موضوع تشجيع الكورة في ظروف السودان الحالية محتاج ليه لدراسة نفسية عميقة
البلد منهوبة، و الاطفال يموتون من الجوع ، و الفقراء اصابهم الضنك الشديد، و الوضع السياسي ما معروف ماشي وين
الناس كلها بقت مجانين بالكورة و اخبار الكورة، هل لقمة العيش و الحريات العامة و الالتفات الي المظاليم اهم من الكورة و هذا الهوس الخرافي الذي نشاهده الان في السودان
لابد انه مخطط له من اعلي ، فالفرق الكبيرة يمتلكها جهاز الامن - كما يقال - عبر جوكية الوالي و صلاح ادريس
نعم يمكن ان نشجع الكورة، ولكن ليس بهذا الزخم المبالغ فيه
هنالك اولويات لاندياح العواظف، و اظهار الهمة (و الكواريك)
هل لنا ان نوفر هذه الطاقة الي يوم نطالب فيه بالعدل، انصافا لانفسنا و من اجل اطفالنا و مستقبلنا
و دمتم