حمـام الوالي يا راحـل ( تاااني ) ..

Post: #1
Title: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 07:13 AM

زمان ونحن صغار خالس خالس ..
مافي واحد يجي ناطي يقول لي صغار كيف ..
لما يكون في مناسبة عرس في الحلة ..
أهلنا برسلونا نكلم الناس للضبيحة ..
ضبيحة في البرد دا ..
نمشي للواحد نقول ليهو أبوي ولا عمي فلان قال ليك الليلة الضبيحة وبكره العرس ..
المره دي الضبيحة قالوا حمام مستورد من دول الجوار ..
واحد عكليته في الحلة يباري ليك الضبيحة دي وين ما كانت ..
زول يحب ليك الزلابية وخسوساً زلابية يوم الضبيحة ..
أها قام صاحبنا العكليتة دا إكتشف ليك الحكاية ..
يعني المره دي مافي زلابية ..
زلابية في عينك ..
صاحبنا دا من مساء بدري جاء حرس ليك الضبيحة الوهم ..
البيت كله نور وبهرجة وألوان والزينة مالية المكان ..
إن شاء الله يقطعوا ليهم كهربة الحلة كلها حد خسران حاجة ..
والدلوكة بي هناك شغالة ..
ناس تغني وناس تبارك ..
بس صاحبنا العكليتة دا الموضوع كله ما واقع ليهو في رأسه ..
البهرجة دي كلها والضبيحة حمام ..
يعني اليوم زلابية مافي ..
الزلابية تطير عيشته ..
حد يقنع لينا الزول دا إنو الحمام شال الزلابية وطااار ..

شماتة ..
جمال الوالي قال بطولة سيكافا دي إعداد لفريق المريخ حد يقنع جمهور المريخ ..
جمهور المريخ يجدّع بالحجارة كيف فريقه ينظم البطولة وما ينال كأسها يالصفورة خلاس راحت عليكم ..
أمس شفنا ليك كرومي ( متكوم ) والكورة جوه القون دي دخلت بي وين يا كرومي ..
الناس السلمت كأس سيكافا يوم أمس بما فيهم جمال الوالي ما عارفهم فرحانين كده ليه ..
الميداليات الفضية باللون الأزرق ما قلنا ليكم تمشوا مننا وين ..

قوموا لفوا ..
قال إعداد قال ..

تعالوا بدري ..

Post: #2
Title: Re: حمـام الوالي يا راحـل ( تاااني ) ..
Author: abuguta
Date: 07-13-2009, 07:35 AM
Parent: #1

عالم جمجاره
ساكنة برا الحاره
بتفلقك بالحجارة
فى سوق النصارى

دا كلو من اب عمه

Post: #3
Title: Re: حمـام الوالي يا راحـل ( تاااني ) ..
Author: جمال السنوسي
Date: 07-13-2009, 07:51 AM
Parent: #2

معتصم

الجميل

ارتاكو ديل ما عندهم ادب

ياخي ضيافة وسياحة كلو على حساب الوصيف منظم البطولة

ويقلعوا منه الكاس

جوه الاستاد

دي قلة ادب كروية

ما ناس اتراكو ديل تكاسة

لافين في الشوارع

من شارع لي شارع

يفتوشو في الزباين

اها لمن لقو ليهم زبون جيبو ملان

وحمام ساكت

شالو حق المشوار غالي

اتخيل مشوار زي ده

بمليون ومائتي الف دولار

ياخي قروش زي دي

انا بشتري بيها كل التكاسي الحايمة في رواندا

بس نقول الحق

تكاسة نضاف

يعني ما بشيلوا غير حق المشوار

قدر ما سالوهم ياخدو كم

قالوا ما كتير

بس الكاس

وخلاص

Post: #9
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 08:42 AM
Parent: #3

جمال السنوسي ازيك يا حبيب ..

ياخي الناس ديل ما عندهم أدب خالس خالس ..
ناس أول يوم جوا داخلين البلد دي أخدوا ليهم ستة علقات زي السم ..
أها قاموا دفنوا ليك الحاجة دي ..
راقدين ليهم فوق رأي ..
عندهم حمام كده ما كان في القفص ..
القفص عيشته تطير ..
قاموا رسلوا ليهم تاكسي يجيب الحمام دا ..
حمامنا قام قال حمام الناس دي حمام ميت ساي 10 دقائق بنشويهو ليك ..
قوم يا حمام ودالناس أشوي حمامنا المشوي اصلاً ..
بس التوزيع كان بالتاكسي حسب الطلب ..
ياخي شفت حمام ودالناس دا حاقد كيف ..

بس أنا المحيرني شارع بلة جابر دا سفلتوهو ولا كان مسفلت أصلو ..
بعدين الباك الشمال دا شال ليك مقاسات كرومي زي العجب ..
في حد جاب سيرة العجب هسي ..
الزول دا ياخي وقع ليك إتكوم تكومة أنا قلت تاني ما يتم الشية أقصد المباراة ..

يا حمام الإيكِ ( سبعة ) ..
أسأل الله يدوك علقة ..

Post: #8
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 08:11 AM
Parent: #2

يا أبوقوتة ..
الجمجرة قالوا بتدخل النار ..
هسي مالك علينا عايز تشوشونا في صمة خشمنا ..

جماعتك أمس قالوا ليك طلعوا من الإستاد لقوا الشوارع كلها تكاسي ..
تقول نحن في رواندا ..
رواندا في البرد دا ..
ناس حاقدة خلاس ..

Post: #4
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 07:54 AM
Parent: #1

المريخ بمن حضر ..
إيداهور الضرب بالدور ..
جنود الملك والسلطان ..
هذه اللغة التي يكتب بها مزمت أبوالقاسم ..
تخدير لجمهور المريخ وللأسف مصدقين الكلام ..
قاموا لموا الحمام وعملوا بطولة الحمام ..
طلع كلو حمام في حمام ..
ياخي قوموا لفوا ..

تعالوا بدري ..

Post: #5
Title: Re: حمـام الوالي يا راحـل ( تاااني ) ..
Author: عمران حسن صالح
Date: 07-13-2009, 07:55 AM
Parent: #1

Post: #6
Title: Re: حمـام الوالي يا راحـل ( تاااني ) ..
Author: tmbis
Date: 07-13-2009, 08:03 AM
Parent: #5

تتخيل يا معتصم ..
المساكين كلهم المبنعرفهم .. عملت اعادة ارسال للرسالة بتاعتك وحددت الاسماء .. وزززوط عملت ارسال ..
قلت اعمل ليهم فرش متاع ليلي كدا لحدت الصباح ..
تخيل الخمسة واللا الستة رسائل جاتني راجعه فوق عبي ..
عالم جبانات بشكــل ..
مقفلين جوالاتم .. الرجم دا ما بقدروا عليهو ..

Post: #13
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 09:21 AM
Parent: #6

أنا ذاتي خفت عليك يا تامبا ..
قلت صاحبي دا يقرأ الرسالة دي يقول الزول دا قلب ولا شنو ..
دا كلو من عمران ..
ياخي رسالة تخلي الحمام يطير فرررررر ..
إنت يا تامبا دحين زمان ما كنت ساعي ليك حمام وعامل ليك برج من كم طابق كده ..
تخيل بعد ما تربي الحمام دا يقوم يفر منك ..
أوصف لينا الحالة دي بالله ..
معك صحيفة الصدا

ياخي أنا أمبارح ولا شغال ليك بالموضوع ..
قمت عملت ليك الحلة عااادي بس ما بي حمام ..
الحمام عيشته تطير فرررررر ..
قوم كده يا الدقيقة 15 تجي ..
أنا ياخي الدقيقة 15 دي أصلو ما برتاح ليها ..
طوالي قاعده تدخلنا في أضافرينا ..
الغريبة كان معاي رازي ودا رشاشة حاقد ..
ناداني ليك في صمة خشمي الجماعة جابوا قوون ..
الجماعة منو ياخي إلا تحددهم بالحمام عشان الواحد يفرز ..
قال لي تاكسي الحمام ..
على وزن تاكسي الغرام ..
لا حولاااااااااا..
قلت ليهو ياخي القوون دا بخلي الحمام يفرفر ..
وأنا جني وجن الفرفرة ..
فرفرة تقوم ليك في رأسك ..
هسي الفرفرة الجابه شنو ..
يا زول واصلت ليك في حلتي الما حمام عااادي ..
فجأة كده لقيته ليك الدقيقة كم وتلاتين والحمام لسه يفرفر ..
الليلة الفرفرة تطير عيشته ..
قوم كده يا الحكم زيد الكورة خمسة دقائق تاني ..
لزوم الزول عمل الواجب وما قصر معانا ..
ياخي فيك الخير ..
ناس وارغو ديل القون فاضي ما قادرين يدخلوها ..
الزول دا جابوهو يضيع القينان ولا شنو ..
وأنا لسه كل شويه أمشي لي حلتي الما حمام أشوف الحاصل فيها شنو ..
قام رازي قال لي ياخي انت زارع وخايف من المطر ولا شنو ..
مطر في عينك ..
أها حلتي الما حمام انتهت والكورة زاتو إنتهت ..
وبس ..

تطير عيشتكم إنتو يا الرشاشات ..
يا حاقدين

Post: #7
Title: Re: حمـام الوالي يا راحـل ( تاااني ) ..
Author: خالد عبد الله محمود
Date: 07-13-2009, 08:04 AM
Parent: #5

سيكافا انتهت و التاكسي قام سداري

الوالي الحزين سالت دموعو مجاري

وينك يا سفاري القالو سمك هاري ؟

وينكم يا حمر ما قلتو تيمكم ناري ؟؟

Post: #10
Title: Re: حمـام الوالي يا راحـل ( تاااني ) ..
Author: عبدالله كع
Date: 07-13-2009, 08:56 AM
Parent: #7

معتصم العريس .. ازيك
اول مرة اشوف لي تكاسه بيكلو زلابيه .. !
ناس ارتاكو كانو لابسين ابيض موش كدا ...؟
ايووووووووووه ده ما اللون القعدة زااااااااتووووووو

لولوه ساااااااااكت
ـــــــــــــ
دخلو نفسهم في حته بااااااااايخه (( مسمار ))

Post: #12
Title: Re: حمـام الوالي يا راحـل ( تاااني ) ..
Author: محمد عثمان
Date: 07-13-2009, 09:00 AM
Parent: #10

معتصم...

سلااام ياخى..

بشيش على الجماعة ديل..

Post: #18
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 03:53 PM
Parent: #12

محمد عثمان يا فنان ..
كيفك يا حبيب ..

ياخي بالغت في صورة الحمام الديمه زعلان ..
إن شاء الله يتكرر المشهد دا يوم 18 يوليو ..

قال الغناي ..
يا الحمام الديمة نافر ..
انت قايل قلبي ليك في كل خسارة غافر ..
قالوا دريم تيم ..
وقالوا فريقنا بي أي زول حاضر ..
خاب ظنهم وأنا حالي بقى مكشوف وظاهر ..

Post: #16
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 10:09 AM
Parent: #10

الزلابية بتاعت زولك العكليته داك يا كع ..
ديل بتاعين حمام بس ..
حمام في البرد دا ..
الزول دا قالوا بشتري الزلابية بالكوتات ..
إن شاء الله ما حدش حوش ..
في حب للزلابية أكتر من كده ..

الحمام القلبي رادو ..
قام طار فرررر ..

Post: #14
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 09:49 AM
Parent: #7

وين يا القالوا المريخ بمن حضر ..
قالوا الضباح ..
وقالوا البطاح ..
وقالوا الأسد النتر ..
الكلام سمح وأمس جابوا الخبر ..
الحمام طلع ميت وقالوا طار فررر ..

الله يجازي محنك يا خالد ..

Post: #11
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 08:59 AM
Parent: #5

يا عمران ..
ياخي الله بحاسبك ويدخلك النار ..
هسي الزول دا فالقو في نص راسو مالك ..
الضرب على الميت حرام أقصد الحمام ..

غايتو عالم حاقدة بشكل

Post: #15
Title: Re: حمـام الوالي يا راحـل ( تاااني ) ..
Author: عزالدين آدم علي
Date: 07-13-2009, 10:08 AM
Parent: #1

الأخ معتصم ألف سلام
عندما يتغلب الهلال
من نادي خارجي
أنني أتألم كثير
بالرغم من أنني مريخابي!
هل تصدق أن الشعر الذي أتعامل معه
هوالأخ الفاضل / الواثق عبدالرحمن
وهو هلالابي!!!!!!!!!!!!!!!

المهم في الأمر المريخ هو النادي
السوداني الوحيد الذي قارع الكبار
وهو النادي الوحيد الذي نال شرف
كاسات سيكافا وغيرها وهذا مالم يحققه
أي نادٍ سوداني آخر، ولنا لقاء قريباً

Post: #17
Title: Re: حمـام الوالي يا راحـل ( تاااني ) ..
Author: خالد عبد الله محمود
Date: 07-13-2009, 10:21 AM
Parent: #15

Quote: المهم في الأمر المريخ هو النادي
السوداني الوحيد الذي قارع الكبار

* يحول للسيد معتصم لإجراء اللازم

Post: #20
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 04:44 PM
Parent: #17

يا خالد ..
ياخي عصرت عليّ شديد ..
الزول دا فنان ومريخابي جميل ..

يوم السبت 18 يوليو عازمك تحضر معاي الكورة ..
ما تقول لا عليك الله ..

في إنتظارك ..

Post: #24
Title: Re: حمـام الوالي يا راحـل ( تاااني ) ..
Author: خالد عبد الله محمود
Date: 07-14-2009, 10:32 AM
Parent: #20

Quote: يوم السبت 18 يوليو عازمك تحضر معاي الكورة ..
ما تقول لا عليك الله ..

أبشر يا عمكـ
بس إنشاء الله نلقي أعصاب نحضر بيها ..

Post: #19
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-13-2009, 04:22 PM
Parent: #15

عزالدين صاحبي ..
كيفك يا حبيب ..
معليش هاردلكم ياهو حال كرة القدم ..
الشماتة ما حبابه ..
ونحن ما من ناسه ..
لكن ناسكم زودوها قلنا نديهم جرعة بسيطة كده لزوم قرصة ..
التحية عبرك للزول الجميل الواثق عبدالرحمن ( أبوهبة ) ..

Post: #21
Title: Re: حمـام الوالي يا راحـل ( تاااني ) ..
Author: محمد بابكر
Date: 07-13-2009, 10:38 PM
Parent: #19

ازيك يا موو

انتو الواحد فيكم مادام هلالابي .. ما يكتب عن الهلال ولعيبة الهلال واعدادو الضعيف لدوري المجموعات ...
لكن ح تفضل فيكم عقدة المريخ ولعيبة المريخ ومباريات المريخ و(استاد المريخ) وإعلام المريخ .. إلخ
اهتمو ياخي بهلالكم وشكل اعدادو الواضح انو كان في حواري المدن المصرية ومع فرق الدوري بتاعم خلص من زماااااااان
ولعيبتو في الاجازات وحمى التسجيلات ...

ملحوظة : لما فريق سوداني يكون لاعب مع فريق اجنبي الواجب نشجعو

Post: #22
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-14-2009, 08:18 AM
Parent: #21

إزيك يا خال ..
مشتاقين كتير ..
معليش الجاتكم في سيكافتكم سامحتكم ..
Quote: انتو الواحد فيكم مادام هلالابي .. ما يكتب عن الهلال ولعيبة الهلال واعدادو الضعيف لدوري المجموعات ...
لكن ح تفضل فيكم عقدة المريخ ولعيبة المريخ ومباريات المريخ و(استاد المريخ) وإعلام المريخ .. إلخ
الكلام دا زمان قلناهو لي ناسكم ما سمعوا كلامنا ..
فضلوا شغالين لينا وجرائدكم ما بتتباع إلا تجيبوا سيرة الهلال ..
وفي المنبر هنا ما خلوا لينا جهة نقبل عليها يظهر إنك ما متابع في الفترة الأخيرة ..
ومزمت بتاعكم دا مبارياتنا الإعدادية كلها بقى يشبهها باللخوية يبقى الشغال بالتاني منو ..
الحمد لله نحن ما عندنا عقدة والوصيفاب ديل ما شغالين بيهم إن شاء الله إستادكم دا يصل الطابق العشرين برضو ما ح تنقّص من سيد البلد ..
Quote: اهتمو ياخي بهلالكم وشكل اعدادو الواضح انو كان في حواري المدن المصرية ومع فرق الدوري بتاعم خلص من زماااااااان
ولعيبتو في الاجازات وحمى التسجيلات ...
المصيبة يا خال نسمع كلام جمال الوالي نمشي نلقاهو في عمود مزمت أبوالقاسم ..
نقرأ عمود مزمت نمشي نلقاهو في كلام جمال الوالي ..
ما تقروا الصدا تاني
Quote: ملحوظة : لما فريق سوداني يكون لاعب مع فريق اجنبي الواجب نشجعو
كلامك سمح يا خال وما بناباهو ..
بس طبقوهو ونحن وراكم طوالي ..

معليش يا خال الليلة ردمتك كلام كتير ..
بس الناس ما تجي تقول الولد وخاله مالهم الليلة
المسمار حااار ومعاهو شيلة كاس ..
ياخي دي ما بتتبعل عديل كده ..

إحترامي ..

Post: #23
Title: Re: حمـام الوالي يا راحـل ( تاااني ) ..
Author: محمد عبد الماجد الصايم
Date: 07-14-2009, 09:49 AM
Parent: #22

تعرف يا عمكـ
خليكـ من الوالي
أبو هريرة كان هنا في الرياض
يا معلم بتكلم معانا زي الكاس دا جايبو معاهو في الشنط بتاعتو!

الكورة لمن انتهت لقيناهو وصل الخرطوم!

Post: #25
Title: Re: حمـام الوالي يا راحـل ( تاااني ) ..
Author: بهاء بكري
Date: 07-14-2009, 10:35 AM
Parent: #23

معتصم يااخوي مسعول من الخير وين ولدنا امير الجمري؟

Post: #26
Title: Re: حمـام الوالي يا راحـل ( تاااني ) ..
Author: مزاحم الضوي
Date: 07-14-2009, 12:16 PM
Parent: #25

بامعتصم تفنكر صاروخ الزومه بتاع

الدقايق الاخيرة نزل ولا لسه

Post: #29
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-14-2009, 04:53 PM
Parent: #26

Quote: با معتصم تفنكر صاروخ الزومه بتاع الدقايق الاخيرة نزل ولا لسه
يا باشمهندس دا قالوا لسه لافي بالحلاّل أصلو عابر للقارات ..
دا صاروخ ولا حمام

Post: #28
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-14-2009, 04:43 PM
Parent: #25

بهاء ازيك ..
كيفك يا حبيب مشتاقين كتير ..
لي زمن طويل من أمير والله متلوم معاه بس ح أجيب ليك خبر منه ..

لك ولأمير كل التحية ..

Post: #27
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-14-2009, 03:19 PM
Parent: #23

يا عمك ..
الجماعة اليومين ديل كاتلين ملف كابين الزوغة عديل كده ..
Quote: الكورة لمن انتهت لقيناهو وصل الخرطوم!
قول ليهو تعال بدري

Post: #30
Title: Re: حمـام الوالي يا راحـل ( تاااني ) ..
Author: نزار كروم
Date: 07-14-2009, 09:07 PM
Parent: #27

Quote: الناس السلمت كأس سيكافا يوم أمس بما فيهم جمال الوالي ما عارفهم فرحانين كده ليه

هاك دي يا اخ معتصم من بوست اغاني للحمـام

Quote:
لكن عجبني جمال الوالي وهو مبتسم ورافع الكاس لمن نسى يسلمو لكابتن اتراكو زاتووووووو

ويا حمامـــــــي ما حفظت كرامتــــي هوووويا

تحياتي معتصم يا راجل يا فنان

Post: #31
Title: Re: حمـام الوالي يا راحـل ( تاااني ) ..
Author: Abd Alla Elhabib
Date: 07-15-2009, 10:28 AM
Parent: #30

الإهـــــــداء : للســـيدين مـعتصــم
وخـالــد وعـموم القبيلة الزرقاء ...
-------------------------
مـع تحيات التكاســـــــــــــة
الكـانو ســـبب التعـاســـــــة

Post: #33
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-15-2009, 03:36 PM
Parent: #31

الحبيب عبدالله الحبيب ..
ياخي الله يمتعك في الدنيا والآخرة ..
متعتني بالصورة دي ..
دا إسمو تاكسي الحمام ..
على وزن تاكسي الغرام

هلالاب نحبكم ..

Post: #32
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-15-2009, 03:06 PM
Parent: #30

نزار يا حبيب ..
جميل توارد الخواطر هذا ..
لا تأخذك شفقة بهذا الحمام ..
جاييك بي هناك نكمل السجع ..

أبقى طيب ..

Post: #34
Title: Re: حمـام الوالي يا راحـل ( تاااني ) ..
Author: علاء الدين يوسف علي محمد
Date: 07-15-2009, 03:41 PM
Parent: #32

الحبيب معتصم
تحياتي
مرور للسلام و تسجيل إعجاب بالعنوان الذكي اللي يصلُح براهو يكون موضوع كافي ووافي

التحايا عبرك لبورداب الرياض و تحية خاصة لشتات

Post: #37
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-15-2009, 04:16 PM
Parent: #34

كيفك يا علاء ..
ياخي مشتاقين عديل كده ..
وكيف أهلنا ناس القلقالة ..
قلت لي العنوان ريحك في حنانك ..
على فكرة العنوان دا رقم ( 2 ) كان في واحد شبيه ليهو ..
أضرب الحمام يا حبيب ..

ولك مثلها من التحايا ولكل المعاك ..

Post: #35
Title: Re: حمـام الوالي يا راحـل ( تاااني ) ..
Author: Elsheikh Mohd Aboidris
Date: 07-15-2009, 03:46 PM
Parent: #32

Post: #36
Title: Re: حمـام الوالي يا راحـل ( تاااني ) ..
Author: Elsheikh Mohd Aboidris
Date: 07-15-2009, 03:52 PM
Parent: #35

يا ناس أتراكو
كيف أعمل معاكو
إنشالله لي جناكو
ما نقعد حداكو

+ ++ +

جهزنا ليكم ورغنة
بشتنتونا بشتنة
لا طولنا و عرضنا
وقفوا لينا العكننة

+ + + +

زولكم لما لفة
وشات من تاني ضفة
كلتشي راسو لفة
وطوالي خت سفة

+ + + +

زعيم رئيس ووالي
حرق طارة البلالي
فلوسو الفي العلالي
ضيعها في الطبالي

+ + + +

الوالي قاعد يتمتم
والناس عديل بتشتم
فريقنا ما بيعشم
نسكت أخير نقطم

+ + + +
نجمة ونحن لمعة
ومقاسنا هو سبعة
فريقنا فيهو طبعة
بيقبل أي لبعة

+ + + +

قلنالكم نحن انتو
مكانكم هو الواصفة
والكبار قيافة
ما بيرحمو الوصافة

+ + + +

سكافة يا بطولة
شلتوه لعب وكرة
بالله يا تكسي ارحمونا حبه
واكلنا كله شطة

+++++

مزمزنا بكاء وجعر
مزمزنا بكاء وجعر
وتكسيكم لفه لفه
ونحنا نمشي اللفة
كلاكلة لفه لفه

+++++

أتراكو تاكسي أصفر
سواقتو كانت أخطر
جمهور شتم وجعر
لمن قطرنا صفر

Post: #38
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-15-2009, 04:50 PM
Parent: #36

الهلالابي الجميل الشيخ ..
الصورة الأولى موبااالغة ..
والكاركاتير خطير عديل كده ..

يقول الغناي ..

الحمام الطار بعيد ..
شال نومي وخلاني وحيد ..
السكلبة والجقلبة أيه من بعدك تفيد ..
.
.
التكاسة يوم جونا صيف ..
شالوا كأسنا وهدافنا بقى ضيف ..
أيه يفيد كأس اللعب النضيف ..
.
.
قالوا فريقنا خطير فريق الأحلام ..
مين غيركم ينظّم بطولة للحمام ..
يا حمام في حمام بلّغ الوالي السلام ..

Post: #39
Title: Re: حمـام الوالي يا راحـل ( تاااني ) ..
Author: ثابت محمد
Date: 07-15-2009, 05:20 PM
Parent: #38

معتصم الشفيف
ياااخ الشوق بحر

بالله لسه المريخ مسبب ليك هاجس ؟؟

البطولة دي مش حكمتوا عليها من البداية ؟
مش قلتو المريخ مستضيف وممول ومؤجر الفنادق والحكام ؟؟
مش قلتو الكاس كاس المريخ بقروشو ؟؟

طيب معناها لو شالوا المريخ مشتريهو والبطولة حمام ميت
ولو شالوا فريق تاني المريخ تعبان والبطولة مابعرفو شنو

والله غلبكم البتعملوهو

السبت قريب يا حبيب
وهزيمتكم يا معتصم بجلاجل
بس والله خايف نغلبكم تقولو الحكم ودخالة بت عم لاراش
أو تقولوا
الهلال حمام ميت هههههههههههههههههههه
أملصوا الجلابية الرواندية دي وتعالو القلعة

كيف حال كل الشلة ؟؟

التعديل لشطب نتيجه هلال مريخ عشان ما تجيك صدمة

Post: #40
Title: Re: حمـام الوالي يا راحـل ( تاااني ) ..
Author: yasir Abdelgadir
Date: 07-15-2009, 07:18 PM
Parent: #39

تحياتي ياحبيب

Post: #42
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-16-2009, 10:44 AM
Parent: #40

دكتور ياسر ازيك ..
مشتاقين كتير يعلم الله ..
وينك ؟
في الديار ولا خارجها ..

دعواتك بالنصر لسيد البلد ..
أبقى طيب يا حبيب ..

Post: #41
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-16-2009, 10:16 AM
Parent: #39

إزيك يا ثابت ..
مشتاقين كتير وين الحي بيك ..
Quote: بالله لسه المريخ مسبب ليك هاجس ؟؟
هايس ولا تكسي ما مهم ..
آخر حاجة أشتغل بيها هي المريخ وإطلاقاً الحاجة دي ما مهجسه بي ..
بس انتو خلونا في حالنا ..
Quote: البطولة دي مش حكمتوا عليها من البداية ؟
مش قلتو المريخ مستضيف وممول ومؤجر الفنادق والحكام ؟؟
مش قلتو الكاس كاس المريخ بقروشو ؟؟
نحن كلامنا خليهو ..
إنتو قولكم شنو ؟
Quote: طيب معناها لو شالوا المريخ مشتريهو والبطولة حمام ميت
ولو شالوا فريق تاني المريخ تعبان والبطولة مابعرفو شنو
والله غلبكم البتعملوهو
والله لا غلبنا ولا حاجة يا ثابت ..
إدراتكم واعلامكم هو المضلل الوحيد لكم ..
حاولوا يصوروا سيكافا دي كأس العالم للأندية ..
وراعي الضان في الخلا ما كان بتخيل إنو الكاس دا ما تشيليهو ..
يعني كنتوا ضامنينو ونائمين قفا ..
اعلامكم ومزمل بالتحديد ظل يصور ليكم إنو المريخ دا فريق ما بتهزم ..
وقاعد يقول في كلام ما بدخل الدماغ ..
المريخ بمن حضر وفريق الأحلام وكلام كتير خارم بارم ..
في أول البطولة المريخ ظل يفوز بالستات ولكن المستوى كان هزيل ..
بس مين يقنع مزمل وجماعته بدل ما يقول الحقيقة يداري عليها ..
وجاء الفريق الغلبتوهو ستة أداكم مسمار في التنك صحاكم من التخديرة بتاعت مزمل ..
وشال منكم الكأس وخشمكم بقى ملح ملح ولا حمام حمام ما فارقه ..
يا ثابت يا صاحب ..
نحن عارفين الكورة غالب ومغلوب ويوم ليك ويوم عليك ..
وحباب المناكفة السمحة بين الجماهير وفي حدود الرياضة أخلاق ..
لكن ما يجي واحد يشبكنا الصفيراب ولخويات وكلام زي دا ..
ياهو دا كلام ناس مزمل والاعلام المضلل للاسف عشان كده نحن عمنا في عومهم ..
وبقينا لا نفرق بين الوطنية وفي تشجيع فريق البلد ..
بقينا نتمنى هزيمة الآخر بل نشجع ضده عشان يتهزم ..
Quote: السبت قريب يا حبيب
وهزيمتكم يا معتصم بجلاجل
بس والله خايف نغلبكم تقولو الحكم ودخالة بت عم لاراش
أو تقولوا
الهلال حمام ميت هههههههههههههههههههه
أملصوا الجلابية الرواندية دي وتعالو القلعة
يا زول حباب السبت ..
ونحن التحكيم القاعدين ترشوهو دا هو سبب أذانا ..
قال لاراش قال ..
والنتيحة الكتبتها دي وأنا ما شفتها خت عليها تاني 2 ..

الشلة كلها بخير تقبل تحياتهم ..

Post: #43
Title: Re: حمـام الوالي يا راحـل ( تاااني ) ..
Author: JAD
Date: 07-16-2009, 12:45 PM
Parent: #41

بالله كلم الطباخ بتاعكم يحجز لي كم كوب شوربة من الحمام دا .. بس الملح يكون موزن الله يخليك ولا بأس شوية خضار ..

بالله عليكم الله متين المريخ كان ند للهلال ..

الحبيب معتصم دفع الله ..

كيفك يا عريس الموسم ؟

مشتاقين ..

بعدين ما فاتحين بوست بتاع عودة بي هناك ..

كيف أهل القلقالة ..

جاد

Post: #44
Title: Re: حمـام الوالي يا راحـل ( تاااني ) ..
Author: نزار كروم
Date: 07-16-2009, 02:33 PM
Parent: #43

فوق الحمــــــمام

Post: #46
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-17-2009, 11:12 AM
Parent: #44

يالماشي لي أم درمان جيب لي معاك حمام ..
يا حسرة التكاسة ضيعوهم وسط الزحام ..

الشية بكره يا نزار ..

جمعة مباركة ..

Post: #45
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-17-2009, 10:55 AM
Parent: #43

كيفك يا جمال ..
حمد لله على السلامة والبركة في الشوفه ..
أهل القلقالة كلهم بخير ..

الشوربة جاهزه يا حبيب جهز ماعونك للفرح الباكر ..
نقول شنو ناس يوغندنا قالوا المريخ دا ضلنا نحن تاني نقول شنو

أبقى طيب يا حبيب ..

Post: #47
Title: Re: حمـام الوالي يا راحـل ( تاااني ) ..
Author: ديامي
Date: 07-17-2009, 11:43 AM
Parent: #45

الأخوان معتصم والبقية

والله حرام عليكم

انتو ما سمعتو انو الضرب على الحمام الميت حرام

صورة جمال الوالي ريحتني على الأخر

شوفو لينا صورة للود مزمز

Post: #48
Title: Re: حمـام الوالي يا راحـل ( تاااني ) ..
Author: yasir Abdelgadir
Date: 07-17-2009, 04:53 PM
Parent: #47

متابع بإستمتاع من بعيييد

Post: #49
Title: Re: حمـام الوالي يا راحـل ( تاااني ) ..
Author: نزار كروم
Date: 07-17-2009, 07:59 PM
Parent: #48

معتصم

اباركو ليك التلاته قول امين يا رب العالمين

Post: #50
Title: Re: حمـام الوالي يا راحـل ( تاااني ) ..
Author: فتحي الصديق
Date: 07-17-2009, 10:03 PM
Parent: #49

Quote: طلع كلو حمام في حمام ..
ياخي قوموا لفوا ..

معتصم ازيك..
عارف.....أنا متأكد أنو الهلال حيتصدر مجموعتو في البطولة الجد جد..كيف ما عارف..لكن حيتصدر حيتصدر. والجماعة حيلفو لف .

Post: #54
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-18-2009, 10:49 AM
Parent: #50

كيفك يا فتحي سلام شديد ..
ديل ليهم زمن لافين ما عارفين يقيفوا كيف ..
أها نحن الليلة بنزيد ليهم اللف حبتين تلاتة ..
عالم لفافة بشكل ..

ربنا يسمع منك ويكون كأس البطولة من نصيبنا ..

أبقى طيب يا حبيب ..

Post: #53
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-18-2009, 10:29 AM
Parent: #49

من خشمك لباب السماء يا نزار ..
إن شاء الله اليوم منتصرين وفرحانين ..
أحب الهلال ..
وأحب أقماره ..

اليوم الحمام خليهو يطير فررررر ..
المقام مقام سيد البلد ولا شي غيره ..

تحياتي ومحبتي ..

Post: #52
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-18-2009, 10:15 AM
Parent: #48

ومتعة أجمل اليوم يا دكتور ياسر ..

وندعو معك بالنصر لهلال الملايين ..

Post: #51
Title: Re: حمـام الوالي يا راحـل ( تاااني ) ..
Author: معتصم دفع الله
Date: 07-18-2009, 10:06 AM
Parent: #47

ديامي الحبيب ..
كيف أحوالك يا زول يا زين ..
Quote: والله حرام عليكم
انتو ما سمعتو انو الضرب على الحمام الميت حرام
عشان كده نحن قاعدين نغني ليهو ..
Quote: صورة جمال الوالي ريحتني على الأخر
شوفو لينا صورة للود مزمز
ياخي صورة حبيب الحكومة دي ممتعة بشكل ..
دي متعت الجميع ..
أما مزمز صاحبك دا ليهو يوم ..

أبقى طيب يا حبيب ..

اللهم أنصر الهلال ..