بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين و النـّاوين

و في الخاطر بوست قديم للأخ عبد الله عقيد
و قبله بوست للغائب Luai
أودأن اكتب عن تجربتي في الهجرة العكسية باعتبار أنها "قـد" تفيد البعض

* التجربة لن تفيد الإخوة الكرام الذين غادروا السودان لأسباب سياسية، و نتمنى أن تزول أسباب قسرهم على البعد عن الوطـن، و نرى كل مهاجر ينعم بالعيش بين أهله.

* التجربة لن تفيد الإخوة الكرام الذين يرون أن سهولة الخدمات في بلاد الغربة أمر لا يمكن الإستغناء عنه، و أن دقـّـة النظام أو الـ System أصبحت جزء من برنامجهم لا يسعهم التنازل عنه..نقول لهم "بخيت و سعيد"..و المقال/ البوسـت لن يفيدكم في شيء.

* التجربة لن تفيد الإخوة الكرام الذين فرضت عليهم ظروف أبنائهم الإرتباط بدار البعد و الغربة، فمثلآ تزوجت البنت أو أصبح الإبن موفقآ في عمل محدد لا يمكن توافره بالسودان..أو شيء من هذا القبيل.


**** لكن التجربة، بتقديري، تفيد قطاع كبير من الإخوة تتشابه ظروفهم و يمكنهم العودة و العمل بالسودان و الإستمتاع بالعيش وسط الأهل..فلهؤلاء أقول ..أحسبوها تاني..

و..نواصــل..

الطيب بشير..بركة الجيت

وين إنت يا زول..
فقدت رقم هاتفك..

بالله أدينا واحد ألو..
تحياتى للأسرة..
أزهرى

كلنا اذان صاغية يا الطيب..
--------
تحياتي لك ولاسرتك في طابت والخرطوم..
البركة فيكم في جدك الشيخ الفاتح..

الاخ الطيب بركة الطلة القلمية
السودان الشقيق لقيتو كيف بالله؟

حمدا لله على السلامة أن عدت سالما
غانما تكتب

إن بقت طابت وجات عديل
تمشي زي ما كانت قبيـل

ماني متردد لكين أتعودت على الغربة
وأدروب ولوف وحاجات تانية حاميني

مرحبتين حبيبنا محمد عبد الجليل
و ألف شكر ليك..
و الله لقيت البلد، برغم العاديات، بخير الحمد لله

Quote: ماني متردد لكين أتعودت على الغربة وأدروب ولوف وحاجات تانية حاميني

أي نعم
هذا قطاع عريض..
لكن نتمنى أن (تحسبوها تاني) و تشوفوا تجارب الإستقرار..
عاوزينكم هنا مع ناس السوق العربي..
المنتديات..
الفاتحة..
عوازيم الأعراس..

السودان السمح

أما الحاجات التانية الحامياك فلها التقدير طالما أبقيتها في حكم الركعة الثالثة من المغرب.

.

أهلين أزهري صديق الصبا..فضلآ راجع الماسنجر

و ألف أهلآ بالأستاذة حليمة ..و تقبل الله شيخ الفاتح و أستاذ بدر المعارف و البركة فينا و فيكم في الحاجة هجرة الأمين الشيخ زوجة عمنا النور ودّ المقدّم سليمان فضل الله خوجلي..و هذه يمكن أن تكون مدخلآ لمزايا الإستقرار من المنظور الإجتماعي..لأني سمعت الخبر في مقر عملي بالخرطوم و حضـرت "الدّافـنـة" في طابت "بي أولادي" ..

و بجيكم اسي
.

الطيب بشير

وينك يا زول ..

يا اخوي انا راجيك بي فارغ الصبر...


باقي عندي النية .. ومتردد ...


اها ... ادينا شوية ضؤ


عشان نركز ... ومانمشي مغمضين

في انتظار تجربتك في السودان الشقيق باقي عقيد ما طمنا ابداً

العزيز الطيب أخبارك يا راجل ؟

Quote: لكن التجربة، بتقديري، تفيد قطاع كبير من الإخوة تتشابه ظروفهم و يمكنهم العودة و العمل بالسودان و الإستمتاع بالعيش وسط الأهل..فلهؤلاء أقول ..أحسبوها تاني..

والله كلام جميل وطبعا كما تفضلت كل الناس دي نفسها ترجع وتقعد في الوطن ، وهم منتظرين منك
تجربتك ، وكلنا آذان صاغية ، بس الجملة الاخيرة أحسبوها تاني دي حيرتني ، يعني نفكر نجي وإلا لا ؟

والتحية للاسرة الكريمة

ياربى الطيب دا بيكون رجع فتح ليهو نقطة بوليص ؟

Quote: ياربى الطيب دا بيكون رجع فتح ليهو نقطة بوليص ؟

ولي عمل جمارك خاصة؟

سلام يا على محمد على بشير

أكرر ليك رد سابق

Quote: أنا تجربتي ما ارتكزت على البوليص في جانب الإستقرار المعني لكن بدون حبايبي في البوليص ما كان ممكن أستقر

ابو بشير يا دفعة تحيات وشوق
انا عضو جديد لنج واحدة من مبررات الاستعجال في الانضمام ، بوست سابق تعرض فيه صاحبه لشخصك
وما كان في استطاعة ساعتها لنشر حقائق ومعرفة بسيطة ببحر صفاتك الواسع تسهم في تكذيب الافتراءات .. عموما كلو خير .
خلينا نبدأ من هنا .. ونعثر على افادات تسهم في العودة لكن رجاء حاول ان تجد فرصة للسياسيين وايضا اصحاب السيستم ..
سلام ونلتقي قريبا في يونيو انشاء الله

ابو بشير....

تحياتى و مشتاقة ليكم كتير البركة فيكم
مشتاقة لسوما و البنية الحلوة محية
باقى لى السودان عجبكم شديد عقبال لينا اتمنى ان يطيب ليكم المقام

تعليق هشام و لدى عن السودان غير مفاهيم كتيرة فى راى

المهم رجاء ارسال رقم تلفونك

سلامى الشديد للحببة سوما

مراحب و شوق كتير يا هدى
ليك و للعائلة الكريمة..و لوس انجليس و شجرة الجوافة
و انتو مراسلكم في السودان ممكن يفيدكم برضو
تحياتي لهشام و الجميع
سوما و موحى و بشير بألف خير

الماجستير بتاعك كيف؟؟

Quote: **** لكن التجربة، بتقديري، تفيد قطاع كبير من الإخوة تتشابه ظروفهم و يمكنهم العودة و العمل بالسودان و الإستمتاع بالعيش وسط الأهل..فلهؤلاء أقول ..أحسبوها تاني..

يا ابا البشير...طابت ايامكم والاسرة بكل خير...يا اخي انت اصلك وجه خير
ومثال وقدوة حقيقية بالنسبة لي شخصيا...تعرفت عليك وجها لوجه وانت عابر
الي مستقرك بالسودان الشقيق كما قلت...وكنت علي يقين من انك اينما يممت
وجهك لشطر منه ستنجح باذن الله...لاسباب عدة نفتقر نحن مجملها ولكننا عازمون
باذنه تعالي لذلك المستقر...وللاذواق والطعم والطمأنينة وراحة البال
الذي نعرفه حتي في شيل الفاتحة...في عزيز كأسوأ ما يلاقيك من الاقدار...

رفعت رأسي عدة مرات وحزمت حقائبي الا ان للقدم رافع....وسنلتقيك باذنه تعالي
والكائنة التكون...يا الطيب تصدق حتي هوايتي المحببة جدا...(الموسيقي..
ما عدت امارسها...والعود ملقي علي بطنه فوق الدولاب...حتي بانت فيه امضاء
الحشرات...وغبار السنين...جاري فوق دار ابو منو ما عارف؟

يبدأ صباح...ونمشي للشغل كبلع حبات الكينا المرة...ونرجع...لنلقي الليل
أرخي سدوله...ونفتح لينا عليبة ساردين نأكلها وننوم...(لا فول...لا طعمية
لا زولا تقولو اتفضل...لا زولا تضحك معاه من القلب!!! لا قروشا تنسيك الحاجات
دي...دحين باقي ليك في داعي تاني..؟؟؟

انا غايتو جائي راجع...وبشيل عودي وبمشي عديل لي صلاح ادريس...بعد ما اديه
الفاتحة في ابوه...بقول ليه .....انا حا اشتغل معاك مساعد عود...

Aud Assistant

باقي ليك بكون في زول صبقني علي الوظيفة دي؟

الليلة البوسـت دة جاب زول مختلف طــب
الفنان نزار حسين...شِيخ العرب
و الله حبااااابك ألف
ليك وحشة يا راجل
ياخ إنتا بالذات سمك..يطلع من الموية يموت
عشان كدة خليك من قصة "خليج" و "بحرين" و هي في حقيقتها ترعة في شارعين
و تعال إلى رحاب البطانة
و بعد ما ننتهي من وصفة العود الأحمد ممكن تريـّـحك من مساعد عود دي
أخونا في الهلال صلاح ادريس دة انا ما اتعرفت عليهو لسع
و زي عاوز أخلي الفكرة دي مؤجلة لما بعد تمانين سنة كدة
لكن في وسطكم الفني العامر له أصدقاء كثر
ياخ هو المفروض يشيل ليك بيت العود
لكن الزمن أشتر

تسلم

.

العزيز / الطيب بشير

سلام
كلامك وقع لناس كتار في جرح

نتمنى أن نكون متشابهين معاك ، حتى نطبق النظرية بضبانته .


ودي القعدة عشان نستفيد

دمت والجميع بألف خير

مرحب أخي سيف بخيت موسي

و شايفك جيت تحت تعلق على انشغال الناس في السودان
و دة صحيح..
أنا كنت معزوم غداء كاااااارب في المايقوما مع السادة البطاحين أولاد الشيخ البكري

Quote: كلامك وقع لناس كتار في جرح

و ع شان كدة عاوزين نتابع معاهم
قدر الممكن يرجعوا..مرحب بيهم

و ليك تقديري الأكـيد

.

أخي الطيب... سؤال بسيط لو تكرمت:
ما هي إمكانية أن يعيش المرء حياة آمنة ومستقرة - يكد ويجتهد وينجح - دون أن يرشي أو يرتشي؟ ودون أن يخلط المال الحلال بالمال الحرام؟
اعتقد أن هذا الأمر يقود إلى التهلكة ولربما يدفع الإنسان للتخلي نهائيا عن وطنه والبحث عن ملاذ لا يدفع المرء للتناقض مع عقيدته.

جدآ يا أخ محمد الأمين موسى

هو سؤال غير بسيط، بالمرّة، لكن نجاوب

أي نعم..ممكن..أن يعيش المرء حياة آمنة ومستقرة - يكد ويجتهد وينجح - دون أن يرشي أو يرتشي

ودون أن يخلط المال الحلال بالمال الحرام..

بس يبتعد عن وظائف الحكومة و الإستثمار..يعني يعيش موظف..ياخد راتب محترم و يصرفو في احتياجاتو..

لمن تبقى على الأوراق و المستندات بتاعة الوزارات و البوليص و غيرو..تفاديآ للرشوة تشوف واحد صاحبك يساعدك..أو تركب الصف يومين لكل إجراء..يعني طريق صعب لكن حلال و ممكن..و بعدين انت ما بتحتاج ليهو غير مرة في السنة للترخيص و مرة كل عدة سنين للجواز و البطاقة و ما إليه..

.

سعادتو الطيب..
نحنا منتظرين تجربتك.. خصوصاً أن عودتك كانت من أمريكا..
بلد الحريات والديمقراطية النظيفة التي وصل بموجبها أوباما
إلى رئاسة الدولة الأولى في العالم..
بعد أن كان أبوه مجرد مهاجر ينتمي إلى إحدى العائلات الفقيرة في كينيا..
نأمل أن تقارن بين الحقوق الأساسية للإنسان السوداني..
في العمل والتوظيف وحرية المعتقد..
لا ننتظر مقارنة في مجال الخدمات ورفاهية الحياة
والامكانيات التي تجعلك تسدد فواتيرك وأنت مستلق على ظهرك
في داخل منزلك.. أو تقوم باجراءات بنكية وانت داخل مكتبك..
سؤالي ياجنابو: كيف استطعت التأقلم مع نمط الحياة في السودان..
وأنت قادم من أكبر الدولا تحضراً وتقدماً في مجال العلوم
والتكنولوجيا والبحث العلمي والحوسبة..
هل استغنيت عن جوازك الأمريكي.. أم أنك تركت كوة مفتوحة للرجوع وقت ما تشاء..

Quote: نأمل أن تقارن بين الحقوق الأساسية للإنسان السوداني.. في العمل والتوظيف وحرية المعتقد..

تعرف يا أيمن دياب كدة إنت صـعـّـبتها شديد..إذ لا توجد مقارنة يا أخي الكريم

الهامش المتاح من الحرية و الذي انتزعه المناضلون الكرام لا يتيح للصحفي كتابة مقال دون أن يمر بجماعة الرقابة القبلية، لا يمكن أن تقارن هذا باللافتة الشهيرة أمام البيت الأبيض و التي كتب عليها رافعها
Bush lied...My son died
ع شان كدة مقارنة الحريات بين البلدين ليست من صميم فكرة البوســت

Quote: سؤالي ياجنابو: كيف استطعت التأقلم مع نمط الحياة في السودان.. وأنت قادم من أكبر الدولا تحضراً وتقدماً في مجال العلوم والتكنولوجيا والبحث العلمي والحوسبة.. هل استغنيت عن جوازك الأمريكي.. أم أنك تركت كوة مفتوحة للرجوع وقت ما تشاء..

أما التأقلم التام فلم يحدث بعد!!
نمط الحياة في السودان فيه تناقض و ظلم كبيرين..
الناس ما مقتنعين بفكرة (الطابور) أو الصف..جايطين..
لكن لازم تضحي بي حاجة ع شان تلقى حاجات..
مجال البحث برضو زي مرتبط بالتقدم التقني..يعني برغم الجهد الكبير بتاع ناس دار الوثائق المركزية ما تزال زيارتها و البحث في أضابيرها، و كثير من مكتبات الجامعات، رحلة متعبة..
جوازي الأمريكي الحبيب لا يزال بحوزتي و قد قمت بتجديد جواز بشير إبني قبل أيام استعدادآ لزيارة (البلد) التاني لعطلة شهر أو تقل قليلآ,,أو ممكن بلد أوروبي طاااااعم كدة قريبات دي..
لا تفكير في العودة مغتربآ على الإطلاق
إلا مضطرآ..
الله لا جاب الاضطرار

.

الموضوع سيتناول سبع محاور

أولها ..

أيام المغترب الأولى

و بعدها مباشرة .. العمل.. السكن..التعليم للأطفال..السواقة في الخرطوم..الصحة للجميع..البرنامج الإجتماعي..

طبعآ كل محور فيه نقاط ذات تفصيل ممل..فمثلآ السواقة في الخرطوم وحدها كانت سببآ في زعزعة إستقرار أخينا عبد الله عقيد لأنها تشمل ناس المرور و حملاتهم الفوضوية..و تشمل ناس الركشات و مفهوم لفح الشارع و قلب الاتجاه و كسر النور الأحمر و ما إليه...

نبدأ بأيام المغترب الأولى

و في كل مجتمع يلمع شخص (المترجم)..و هو أحد أقرباء المغترب..يقوم بمرافقته و شرح برامج العزاءات و المناسبات و يقوم بإستئجار السيارة و تحويل النقد الأجنبي و شراء الفطور في شارع مدني..و ما إليه..
المترجم شخص قريب من المغترب
إما صديق جارت عليه الأيام فأصبح بلا عمل
أو قريب من الدرجة المحرجة
أو صهر أو صديق العائلة..
المهم بيكون زول من الدائرة الداخلية..
هؤلاء المترجمون..فيهم منافع للمغترب ..و إثمهم أكبر من نفعهم..
بيتعاملوا معاك على إنو إنتا أبو الريش ذاتو، و تعني ثري ثراء فاحش، و بالتالي يزينون لك العربات الفارهة و برامج الترفيه التي تشابه إجازة مغترب، و في الواقع أنت هنا لتبقى، إذن لا بـدّ من التفريق بينك و بين من "يتجدّع" شهر و يعود ليعمل عامين آخرين لتوفير حق العطلة القادمة..
لا تدعهم يزينوا لك "الفارغة"..و لا نوصي أحدآ بالحرص و البخل البتـّـة..فقط وسطية ديننا الحنيف..
و طالما الأمر تجربة ذاتية..فأبدأ بالسيارة الرهيبة التي استأجرها لي مترجمي العزيز و دفع من حـُـرّ فقره إيجار اليوم الأول مائة و عشرين ألف جنيه بالقديم..و هي قبل عامين أجاءتنا إلى جذع كوريلا موديل العام ذاته..و تعشـيقـتها أوتوماتيكية و بها كل أزرار الراحة بلا تفصيل..
الذي حدث أنني دفعت إيجار يومين آخرين فقط، كأقل حد يمكن بعده إرجاعها، و أتيت بدلآ عنها بآتوس حمراء فاقع لوناه لا تسرّ الناظرين كثيرآ، إستأجرتها بخمسة و ثلاثين ألف جنيه لليوم، ظلـّـت مثار تندّر قريبي لزمان ليس بالهيـّـن..
دي بقى أولى الإشارات الواقعية للمترجم..بعد يومي المجاملة و الراحة..
العربية الحمراء، براها، أرسلت إشارات تعبر عن فلسفة الإنفاق لدى "الزول" الراكبها..

و نواصل..

Quote: الموضوع سيتناول سبع محاور أولها .. أيام المغترب الأولى و بعدها مباشرة .. العمل.. السكن..التعليم للأطفال..السواقة في الخرطوم..الصحة للجميع..البرنامج الإجتماعي..

طبعآ حصلت بعض التعديلات على الهواء و ظهر محور (الجريمة) أو المضايقات اللي ممكن تحصل للمغترب العائد و سنسترسل فيه..كذلك ضمن البرنامج الإجتماعي أضفنا تفصيلة عن المطاعم و الأكل خارج البيت

.

يا سلااااااام ياخ
الصحفي الموهوب الدارس راشد أحمد فضل
و الله ليك وحشة ياخ
ألف أهلآ بك في المنبر يا صديق
و أشكر لك الحميـّـة الإنســانية..و دع عنك ذلك الظل الذي هاجمني
فهو غارق في السذاجة إلى أذنيه
المهم، جـدّآ، أنك الآن هنا

Quote: افادات تسهم في العودة لكن رجاء حاول ان تجد فرصة للسياسيين وايضا اصحاب السيستم ..

تعرف يا راشد السياسيين ديل ما بقدر ألقى ليهم فرصة لأنو أولوياتهم مختلفة، و مقدّرة، و ظروف "عملهم" في السودان مختلفة..ما بقدر أضمن ليك يعكشوهم ناس تقطيع الأوصال ديل في أي لحظة..ع شان كدة خلينا نبدا بي ناي المعايش..
بالنسبة لأصحاب السيستم هم الاختاروا انهم عاوزين رفاهية و ترف..لكن لو "باركوها" حباااابهم ألف..

تقديري يا الحبيب

.

يا مراحب مليكنا المفدّى ترهاقا
كيف حالك يا راجل
و توصل تحاياك للأسرة

Quote: بس الجملة الاخيرة أحسبوها تاني دي حيرتني ، يعني نفكر نجي وإلا لا ؟

لا يا حبيب أنا أعتذر عن عدم الوضوح
المقصود تحسبوا الغربة تاني..
القعدة برة البلد..أحسبوها تاني

و نتمنى نشوفكم هنا

.

أهلين شـبـكــة

و ألف مرحب بزياراتك للبوســت

عبدالله عقيد زهج من ناس المرور..

Quote: ولي عمل جمارك خاصة؟

أنا تجربتي ما ارتكزت على البوليص في جانب الإستقرار المعني

لكن بدون حبايبي في البوليص ما كان ممكن أستقر

.

.

أهلين العزيز أحمد حنين

و الله الدار ترحب بيكم

Quote: باقي عندي النية .. ومتردد ...

أدرس تفاصيل تجربتي دي يا ابو حميد و بو ممكن تعمل كوبي بيست..ما تتأخر..

.

بوست جاني في جرح ...

في انتظار المزيد يا اخ الطيب

Quote: بوست جاني في جرح ...

بطلى حركات يا عزاز .. الرياض ما بتتفات

الاتوس الحمراء ركبناها معاك في امان الله وشوهد صديقك الفنان ابوبكر سيد احمد يحتضن عودو فرحا بجوارك عقب حفلة الالمان ، وذات صباح وقفتها بجوار الافروايشن وسافرت مع د. مرتضى الغالي لعزاء والدة هاشم كرار .. لحد هنا كويسين معاك يا صديق .. لكن هل هنالك قياسات وفقا للبلد الذي يعود منه المغترب .. يعني القادم من امريكا وكندا مثله كالقادم من الخليج او افريقيا

الأخ الطيب...

سلامات وليك مدة ما باين..

بوست في جرح كل المنفيين والمهاجرين والمغتربين. أتمنى أن تدلف
للموضوع مباشرة وبعد ذلك ترد على المتداخلين...

لا أطيق صبرا حتى تأتينا باليقين..

وربنا يديك العافية...

الزوول العملي عبدالأله زمراوي
مرحبتين و شكرآ ليك على اقتراح المضي قدمآ

Quote: بوست في جرح كل المنفيين والمهاجرين والمغتربين.

و الله أمتى إنو الناس تستفيد من التجربة الشخصية دي و تعمل (رجعنا لك)..
البلد دي حلوة جد..باسطة بس

.

الاخ الطيب البشير ....

واصل ...تجربة جديرة بالمتابعة حتي نستفيد ....

وان تكون دافع للقرار الصعب ..بالعودة


سيف الدين

أهلين سيف الدين عوض
و شكرأ لمرورك الجميل

Quote: تجربة جديرة بالمتابعة حتي نستفيد .... وان تكون دافع للقرار الصعب ..بالعودة

و الله تشرفوا ياخ...البلد بلدكم
و القرار صعب ..نعم...لكنو ممكن

.

Quote: هل هنالك قياسات وفقا للبلد الذي يعود منه المغترب .. يعني القادم من امريكا وكندا مثله كالقادم من الخليج او افريقيا

الله يخلييييييك..
بالحيل..
بلا تحيز..ناس أمريكا و كندا أقرب للدردحة..و ناسكم أقرب للسحسحة..لوووول...دة كلام بيجيب الدرشة..
نحن بنتحاوم بالجينز..و قميص قصير الأكمام..و انتو عنكم عمامة المقيم..و عطر الموش عارف ايه..
نحن أخدنا من الخواجة الجانب العملي..و انتو إتبينوا فيكم العرب بالقيافة و القشرات
طبعآ لا يمكن أن نقول خطأ أو صح
كلو اختلاف في طرق الحياة أو الـ...لايف استايل..
بس نمط حياتكم مصاريفو أكتر..و الله أعلم
المهاجر في أمريكا/أوروبا أوفر حظآ في التوظيف..الشهرة بتاعة (بلاد برة)...زائد طريقة التحدث باللغة الإنكليزية أقرب لأهلها زي بتعجب ناس الموارد البشرية فبيبقى جزء من المعاينة هو ذاتو عاوز يثبت ذاتو..و طوالي بيحس بوهم تفوقك عليه و بيبقى مجتهد في استعراض إمكاناتو اللغوية و لا يركز على خدعات الامتحانات الصعبة..دة طبعآ للزول المسؤول لمن يكون عربي..هندي..سوداني..و ليس خواجة..

.

و الله يا اخوي بتتفات زي الترتيب ...
بس كدي نشوف التنوير ده،
احتمال نبل ابري رمضان حاضر في الخرطوم ..

Quote: أتمنى أن تدلف للموضوع مباشرة وبعد ذلك ترد على المتداخلين...

شكرآ للنصح الموفـّـق

و أعتذر عن تاجيل الردود على الحبايب إلى أن نكتب فقرتين تلاتة في الموضوع..

نواصل المحور الأول

إنت بتكون راجع البلد بي قرشين كويسات..

النسق الإجتماعي بتاعنا، بتعقيداته المحـيـّـرة، و المتفاوتة من مجتمع لآخر، بيقرض عليك "إلتزامات" و أهم ما فيها هو ما يسمى في البوليص بالـ"سلطة التقديرية"..و انت هنا مهم جدآ تتريـّـث في اتخاذ القرار.. تساهم مع الناس..نعم..لكن بفكرة انك واحد منهم و عاوز تستقر..موش راجع بعد العطلة لبلاد خم القروش بالساهل، أو ما يزيـّـنه بعضنا عن دار الغربة، بالتالي يبقى صرفك محدود و معقول و تقبل فكرة الشيرينق بلا عنتريات..و قدر الإمكان تعمل Budget و تجتهد في الالتزام بها..و ما تفك الدولارات طوااااالي كدة..
هم راح يلعبوا معاك بي خطة..
و أنا هنا بديك ردود ديبلوماسية، ع شان تفكـّـر قبل ما تدفع، و هي تتراوح بين (ما معاي صرف) و (طيب نتلاقى بعدين في النادي)..الخ..المهم لحظة هو طلب القروش ما تشيلك هاشمية و تدفع الخمسين الخدرا طواااالي..لأن أحد معارفي أنفق على علاج مشاكل الجميع، ربنا يعوضو، فأفلس في شهرين و لم يبق له حق تذكرة العودة للسعودية!! فعمل حمـّـالآ ليجمع ثمن تذكرة باعبود للملاحة..و خرج و لم يعد حتى الآن!!
الأيام الأولى..تفادى الصرف البذخي..
هو إستايل موجود قديمآ..ألوم عليه مغتربي الخليج، النمط الإستهلاكي السائد في بلاد العربان، و بالضبط تصرّف مثل الموجودين بالبلد، لأن الفكرة أنك هنا لتبقى واحدآ منهم...
بالمناسبة الحـتـّـة دي شاااائكة..و قد تبدو مثل دعوة للتضييق على الخلق
لا و الله...
بس إنت ألقى النقطة بتاعة الوسطية دي..و هي نسبية و تختلف من قرية لأخرى..
و لا تتحرج من الإعتذار للمستهبلين..
لكن الزول البيستاهل لو طلب خمسين أطبقن ليهو تلاتة..أنا ما خايف عليك من ديل ..المستهبلين هم المصيبة..و..trust me القروش البتتشاف شوية دي..it adds up
طبعآ المهم إنو إنت تتماسك ماديآ في الفترة الأولى
فترة ما قبل التوظيف لأنها ستؤثر تأثيرآ مباشرآ في قرارك..
لو فلـّـســت راح تزهج
و تشعر بالحرج
تلوم السودان و تفكـّـر بالعودة
يبقى DO NOT keep all your money accessable
بس ع شان تعمل ميزانيتك
و تتخارج من المستهبلين

و الباقي سااااهل

.

يا أبو البشير سلام عليك وحمداً لله على سلامة عودتك للـ"ديار"

لعلّك تذكرني وأنا أحاول الاجابة على تكفينك (ما صوّرنا لك أنّه) مَيْتة العودة الطوعيّة للديار السودانية بما تروم من الحياة بدولارات كان عشمك أن تكسبها من "جرَّاء" العمل في كنف المنظَّمات! أذكِّرك:

Quote: منو البضمن ليك آخوي، وسط ضبابية السودان دي، إنو ما يلم فيهن بشير وألا مشير يطردهن عن بكرة مانحيهن ويخلي كنفهن كنيفاً ضبانو ينوني.

Re: الكهرباء..والكتاحة ..والملاريا ..ونقص العلاج ..وتدن...عودة مغتربي الخارج ؟

شنو ليك بالله؟ أنفع أشتغل خبيز بمصلحة الارصاد الجوعيّة؟

ورغماً عن ذلك فإنّه يهمنا أن نطّلع على الوضع الراهن لما ذكرنا من أمر "الضبابية" كما وإنّ سؤال أخينا محمّد الأمين موسى القاعد (السؤال، يعني) يحدر ليك من فوق دا أنا راجي اجابتو زيي زيّو (محمّد، يعني) فرجاءً، إذا كانت الاجابة ليست "لا امكانيّة البتّة"، أن تنوّرنا عن نسبة من يفلح إلى تلك الامكانية من العدد المتاح (وركّز لَـيْ على المتاح دي وأديها واحد "بنزاهة" بالله) من الوظائف.

أما رفع الفاتحة وتلقّي العزاء في رحيل هذا "الوطن" فإنّني أجد القيام بذلك اسفيرياً أقلّ أسىً (ولو إلى حين) من تكبّد المشاق لحضور دافنة فقيدنا العزيز.

مع أطيب الأمنيات بأن يطيب لك ولأسرتك المقام.

الطيب

يا اخوي ما تخاف علينا من المستهبلين

خاف علينا من المرور والشرطة .. والجهاز


اما بخصوص الصرف البذخي الأستهلاكي للمغتربين ... الحاجة دي قلت

خلاص .. ويمكن تكون انتهت ..

لأنو المغتربين زاتم فلسو...

بعدين يا الطيب.. انا ماشي بي اوفر كويس ... ومن اول يوم

المرتب ماشي .. يلا نورنا في الباقي

المدارس.. الإجتماعيات .. العلاج ... الشلهتة

..
.
انت بالذات يا حنين
ما بتقدر على السودان دا ..
السودان داير غبش مش حناكيش

_________

لو كنت بتقدر كنت جيت معاى من 4 سنوات
او مع ود قاسم من 3 سنوات ..
اقعد احرس اخوانك ناس تمبس ومعتصم وبقية
شلة الرياض ..

Quote: بعدين يا الطيب.. انا ماشي بي اوفر كويس ... ومن اول يوم المرتب ماشي .. يلا نورنا في الباقي المدارس.. الإجتماعيات .. العلاج ... الشلهتة

و الله يا أحمد حنين مبروك مقدمآ..و لـــــــــــــــــن تندم

طالما الـoffer كويس ما تتأخر

المدرسة بتاعة كيبس بين الساحة الخضراء و القسم الشرقي الخرطوم بتاع البوليص..بالمهلة برسل ليك في الخاص تلفون المدير..و المفروض تفتح الأسبوع القادم لكن تم تأجيل كل المدارس في الخرطوم بقرار هذا الصباح لحدي يوم واحد و عشرين!! طبعآ دي من الجوطات الما بتقدر تقراها من بدري بس بتحصل كدة..يعني أنا مثلآ لو كنت عارف إنو الاجازة بتاعة ولدي ح يمدوها كان جهـّـزت لرحلة في العرض بتاع الطيران التركي بتاع الهبرو ملو الجابوهو الأسبوع الفات..لكن دة الجانب المظلم من السودان .. قرارات ما بعد شاي الصباح للوزراء النصاح..
لكن بتتعود يا حنين..ما تخاف

برجع ليك بالمهلة يا صاحب العودة للبلد..

.

Quote: تقبل الله شيخ الفاتح و أستاذ بدر المعارف و البركة فينا و فيكم في الحاجة هجرة الأمين الشيخ زوجة عمنا النور ودّ المقدّم سليمان فضل الله خوجلي..

ياه يا الطيب دي فاتت علي كيف؟
تغمدهم الله بواسع رحمته..رحم الله الاخت هجرة الامين الشيخ احمد حسن.. العزاء موصول لاسرتها وابنائها واخص الاخوة عادل وحنان وباقي اخوتهم ولاخوانها السماني واحمد وعبد الله وحسن وموسى وسيف وليلي ووالدتها الخالة امنة.. وجميع ال الشيخ احمد حسن وحسن احمد حسن وال حسن بطابت ومدني وال الفكي الطيب احمد حسن بجبل اولياء وود حسن..وجميع ال المقدم سليمان..
بدر المعارف دا مات متين يا الطيب؟ هل والدته هي حليمة محمد حجاج؟
لا حول ولا قوة الا بالله.. لهم الرحمة جميعا..
عزائي موصول لاسرة محمد سرور وعامة الطيبية

العزيزة حليمة

كيف حالك يا قريبتي

Quote: بدر المعارف دا مات متين يا الطيب؟ هل والدته هي حليمة محمد حجاج؟

و الله يا حليمة وفاة مفاجئة جدآ، كان في زيارة بنتو د/ رجاء في كندا

صلى العشاء ..أمسك المسبحة..ثم أسلم الروح لبارئها

يرحمه الله..

و نعم أمه هي حليمة...


.

مرحبتين حبيبنا عادل البدوي

تقديري لمداخلاتك الثمينة و السمينة

أنا متذكـّـرك، طبعآ، كيف لا و أنت تكتب بكل هذه الرفعة و الحرص على حق اللغة و مستحقها..و أنا برضو كاتلني الدارج السوداني البليغ..ع شان كدة متذكـّـر مداخلتك..و أفادني الرجوع للبوست/الحق بتاع لؤي عن الكتاحة و الملاريا..و استفدت كثير جدآ...

Quote: شنو ليك بالله؟ أنفع أشتغل خبيز بمصلحة الارصاد الجوعيّة؟

و الله لقيت قرايتك تخـوّف..لكن عمك لمن طرد المنظمات أبقى على كبيرهم الذي علـّـمهم كل شيء و بالتالي لم تتأثر وظيفتنا في الأمم المتحدة بتلك الهـبـّـة..

Quote: تنوّرنا عن نسبة من يفلح إلى تلك الامكانية من العدد المتاح (وركّز لَـيْ على المتاح دي وأديها واحد "بنزاهة" بالله) من الوظائف.

سألتني يا عادل و بورّيـك..
لو قمت كدة بالصلاة على النبي و غضـّـيت البصر عن وظائف الحكومة و شركاتها و شركات شركائها، و همو كثر، ما بتجيك غبينة..خليهم هم يعينوا من يشاؤوا كيف شاؤوا، لحين تداول السلطة السلمي، و ركـّـز معاي بالحيل في الفئات المذكورة أعلاه، ناس المنظمات و دال و الجزء الأجنبي من شركات البترول.. و عن نفسي أنا قريت إعلان وظيفة (مدير إعلام) في مجموعة دال..قريتها في جريدة الراي العام ..و قدّمت عااااادي و لم أكـّ أعرف أي شخص يمكن أن يدفع بتعييني للأمام، حتى شقيقي الذي تركها بخلاف نصحني ألا أذكر إسمه، و أخدت الوظيفة بالدرب العدييييييييل... و كذلك العمل الحالي قرأت إعلانه في النت و من الويب سايت للمعاينة بالهاتف ...لمعاينة المكتب.. للـjob offer

* أظنني أستطيع الزعم بأن هناك نسبة معتبرة من الوظائف بالسودان لا تحتاج لجعلي/ شايقي/إنتهازي/ حركة شعبية/ دينكاوي/كوز..لا لا لا..بل يمكن لكل من هـبّ واقفآ لمبادئه و دبّ ساعيآ للرزق أن يحصل عليها..

ألا هل طـمـّـنـت؟؟


.

الحركة و السواقة في الأيام الأولى بتكون مشكلة..و تحديدآ لي زول طووووووول من السواقة في الخرطوم..دة جزء من المحور بتاع السواقة متداخل مع تحركاتك لأجل المجاملة و البحث عن عمل ..عشن كدة جبناهو بدري شوية..
حاول ما تسوق لفترة من الزمن
هناك خيارات جميلة تتراوح بين المواصلات العامة اللي اتحسـنت كتير..الركشات..الأمجاد..في ظل بوار و عدم مواكبة التاكسي القديم، يوجد بالطبع تاكسي سياحي و انا لم أرتكبه أبدآ لكنه متاح لمن أراد أن يتبختر أو أراد ظهورا..ننصح بالأمجاد لو معاك العيال..أو مشوارك بعيد..لكن الركشة ممكن للتقاطعات بتاعة مربعين تلاتة..شارع و التاني..و كدة..طبعآ ممنوعة من عبور الكباري..و لو الجو جميل الناس ممكن تتمشى لأنو المفروض دي أكتر أيام عندك فيها زمن..إنت مافي إجازة..إنت قاااااعد و بتفتش لي شغل..
الـBudgetting بيفيدك في إطالة فترة الصمود بلا عمل..و سنامك بيصمد لأطول فترة..

نجي لخيارات العمل الأفضل في سودان العز!!

* شركات البترول

* شركات الإتصال

* شركات دال (تحديدآ)

* المنظمات الأجنبية و السفارات الغربية

* الإستثمار البسيط (و حاول تخليهو خيارك الأخير) لمزالقه الغريبة!

لقد صار ممكنآ جدآ الآن في السودان أن تقرأ إعلانآ في الصحف لوظيفة شديدة الإغراء و تدخل المنافسة و تفوز بالوظيفة دون تدخـّـل من متنفـّـذين أو غيره، أعني القطاعات أعلاه بالطبع، و ليس أي عمل له علاقة بالحيكومة، أصبح هناك "خواجات" يديرون الHuman Resources و يجرون المعاينات باللغة الإنكليزية..
عنيت أن حكاية (الولاء قبل الكفاءة) إنحصرت في وظائف الحكومة و هي أصلآ لا تغري عائدآ من الغربة...سيجد المهاجر المؤهـّـل عملآ يوازي أو يفوق عملهم في دار البعد و الغربة..و لو تحيـّـزنا للعائدين من الغرب فإن إجادة اللغة الإنكليزية، وحدها، تكفي لضمان وظيفة مريحة و مربحة...بس يكون عندك إستعداد للعمل تمامآ مثلما نعمل في بلاد برة..يعني الحرس في المنظمة بياخد راتب تمنماية دولار..و السواق بياخد أكتر..بتاعين الإستقبال بيضمنوا بداية لدخول السيستم..المترجمين، طلاب الجامعات المعانا، بياخدو ألف و خمسماية دولار...قارن ذلك بالريال..تعمل أكثر من أربعة ألف ريال في المتوسط..مرتب بعض المترددين في قرار العودة...مع المكسب بتاع انك في السودان..
راتب ألفين/تلاتة الف دولار للموظف المتفرغ..ليس خبرآ في القطاعات التي ذكرت..كدة عملنا تمانية/ تسعة ألف ريال في المقارنة..رواتب ناس ممكن ترجع..و هذا يمكن أن يكون مدخلآ طيبآ للبعض..هناك شركات و منظمات تدفع أربعة إلى خمسة ألف دولار لسودانيين ليسوا خبراء نادرين أو نحو ذلك ..بل هو ماجستير الله و الرسول دة..و في كل الحالات هناك package بتاع علاج ..و بعض الشركات بيدوك عربية و موبايل بخط مفتوح و لاب توب..مثل شركة دال المعروفة ببسط الكاش الشامل..
بعض الـpart time jobs أصبحت تدر دخولآ هائلة..مثل التدريس بالجامعات الكتيرة و مسيخة دي، و مراكز العمل الطوعي، و هو بالماجستير نفسو، و الكتابة للصحف، و هي لا تتطلب تفرغآ، و التعاون مع الإذاعات، إعدادآ و تقديمآ..
أنا ملاحظ إنو الأمثلة من مجالي، لأنها تجربة ذاتية في مجال العمل، لكن الإستقرار عمومآ سيأتي بأمثلة عامة.

Quote: بل هو ماجستير الله و الرسول دة..

برضو متابعين



-----------------
إنت عارف واحدة من مشاكل السودان الظاهرة في البوست بتاعك دا
ما لقي زمن تفك العندك بيسر ، لو كنت بره منو كان درسك دا كمل زمان

الاخ الطيب بشير
متابعين باهتمام

و تحاياناعبرك للبلد

Quote: متابعين باهتمام و تحاياناعبرك للبلد

أهلآ بالأخ ثروت سوار الدهب

شكرآ لمتبعتك

و

توصل تحاياك للبلد

.

Quote: إنت عارف واحدة من مشاكل السودان الظاهرة في البوست بتاعك دا ما لقي زمن تفك العندك بيسر ، لو كنت بره منو كان درسك دا كمل زمان

مرحبا الأخ الكريم سيف بخيت موسي

طبعآ السودان ما ممكن يوفـّـر ليك النـت زي ما هو متوفر برة

يعني الكيبل بتاع ميامي داك وحشني فعلآ

لكن ناس سوداتل ما بطـّـالين

تابع يا سيف

و النـّـشوف آخرتا مع السودان دة

.

Quote: احتمال نبل ابري رمضان حاضر في الخرطوم ..

و الله يا ريت يا عزاز

أنا الأسبوع الفات إشتريت (حاجات) الآبري الأحمر

و لي هسع الزرّيعة ممكن تكون "بـتـّـقـت"..

عاوزة ترجمة؟؟

.

أهلين الأخت الكريمة عزاز شامي

و سعيد أنا بناس الرياض، من الجمهور المستهدف بالبوست، و كتير من ناس الخليج

خبرات ممكن تلقى حظ في البلد

و صابرين على تخفيض رواتب ..و تضييق في الإمتيازات

Quote: بوست جاني في جرح ... في انتظار المزيد يا اخ الطيب

سيأتيك المزيد و التفصيل ان شاء الله

تقديري

.

Brother Taib Bashier:
Greetings from your brother Ismail wad Hussein from the POST ROAD, if you remember that please with wulad abulazaga. This post hit me in the right time . Taib you bypassed Minnesota and you did not satisfy the promise to stop by my home, however, since you have returned and settled
in Sudan I forgive you
Brother Taib I have done with my schooling and now licensed to practice law here in Minnesota.
But, you know it is hard to start up this kind of practice and most of your client are either new comers to the states or from your community.I think you understand what I mean between the lines.Taib your statement about jobs propspectives in Saudan is very promising.
I have no political hurdles not come to Sudan and the system does not entices me that musch.We just people of bread and butter"Kisra and Mulah"". Keep going in this very encouraging post and my greetings to the family.

Ismail Hussein, Minnesota

Sorry I do not have an Arabic key board.

الاخ الطيب البشير..

بوست ماتع وبه نصائح جميلة وصدق في الطرح .. وربنا يوفقك وما تضطر لاستعمال الـblue passport في القريب العاجل..

تعرف يا الطيب "لو تسمح لي ان اقولها من غير القاب" معضلة الاستقرار في السودان لها جوانب كثيرة ولكن كلها يمكن ان تُجابه

و تحل الا واحدة وقد ذكرتها ضمن الخمس معضلات موضوع النقاش وهي

Quote: الصحة للجميع

لانها معضلة لا تحل بشكل فردي والجانب المادي لا يلعب دور كبير في مجابهتها - اذ ان النظام او بالحرى اللانظام المعمول به

في السودان يضع موضوع العلاج في خانة الحظ - فيجب ان تكون محظوظ لتجد المشفى المناسب والممرض المؤهل والطبيب موجود

والاجهزة تعمل والمواد الطبيبة متوفرة وبعد دا كلوا تجد الدواء في الصيدليات - اذا تمت هذه الاشياء بهذا الترتيب فتاكد انك ولي من

اولياء الله الصالحين..

و متابعين..

Quote: اذا تمت هذه الاشياء بهذا الترتيب فتاكد انك ولي من اولياء الله الصالحين..

العزيز حسين نوباتيا، بلا ألقاب، و هذا أقرب للود

تعرف من الصعب في السودان تحسب الحاجات و تنتظر النتائج المنطقية بالدقـّـة المفترضة!!

لكن في موضوع الصحة دة هناك خيارات، حقيقية، و هناك الصحة بالوقاية قبل التداوي ..يعني مثلآ أنا في أحلك ظروف الــbudgetting لازم أطلـّـع ميزانية موية الصحة..و هي قارورة أبو تسعطاشر ليتر تقلبها في المبرّد و تصبح زير البيت..سعرها ستة ألف جنيه بالقديم شامل توصيل القوارير للشقة..بتقضي أكثر من يوم لأسرة فيها أربع أشخاص..فاتورة الموية في الشهر حوالي سبعين دولار تقل و لا تزيد..و تصرف عنك سوء المغص و أمراض الموية الكتيرة..
النوم في الغرف يقيك من البعوض..و في الحوش/البلكونة بالناموسية المشبـّـعة..كدة مزّقنا إحتمال الملاريا و آلام البطن..و هذه أكثر أمراضنا إنتشارآ و احتياجآ للمشافي..

التقيلة كان جات بنمشي ليها لمستوصفات أكثر دقـّـة و تفصيلها بيجي لاحقآ...

.

يا هلا بصديقي الدكتور اسماعيل حسين

و الله ليكم وحشة يا ناس مينيسوتا..البلد الباااارد

كيف حال الأسرة الكريمة و الأصدقاء في البوست روود؟؟

ألف مبروك البار يا إبن السودان البار..

أنا مذنب بالفعل، مفروض أوصلكم و ألاقي الناس كلهم..لكن زمن الزيارات عادة شديد الضيق..

نخليها في العطلة القادمة قريبآ ان شاء الله..

بالنسبة لحالتك، أنا مبسوط إنك ما مغرم بالسيستم لدرجة تقـعـّــدك في السقطيبة بتاعة ريفي كندا دي..و طبعآ أنا عارفك ما زول سياسة..يبقى ممكن جدآ تجد موطيء قدم في البلد الحبيب بمتابعة اللينكات و البحث عن الوظائف بالتركيز على السودان..أنا من جانبي لو لقيت حاجة مقاسك بناضمك على طول..


.

.

يا صديقي الدكتور اسماعيل حسين

أين أنت يا رجل

لم نرك مرة أخرى

.

طيب يا جماعة نعتذر تاني عن الردود ع شان نرجع نكتب شوية في المحاور

نمسك الســكــن..

طبعآ لو عندك بيت/شـقة..فهذا خيارك..و بالتالي دي ما مشكلة ليك

لو لأ..أقول ليك

السكن ممكن برضو يكرّهك البلد و يرجـّـعك الغربة..

* كل زقاق عملو فيهو شارع زلط..و هو يغري بتاع الركشات بالتخريمة..أيواااا....نهاااائي ما تستأجر شقة في عمارة فاتحة على شارع زلط..أنا رحلت قبل شهر و دة كان السبب الأساسي..لا يمكن أن تتخيل مستوى الإزعاج..إلا بعد أن تعيشه..

* لازم تختار منطقة كويسة و تشوف باركينج للعربية في حوش أو جوار بقالة أو بسط أمن شامل أو كدة..لأنو لو صاحب العمارة قال ليك ندخل عرباتنا ورا بعض في الحوش السغيروني دة مقلب..جاري كان بيحب السهر..و بينووووووم ..أنا بدخل عربيتي قبلو و يجي متأخر يقفلني..و تاني يوم أضرب ليهو تلفون..قافل الجرس..تدق الباب نومو تقيل..تتكلم معاهو يقول ليك هي متين أصبحت..

* نحن زي ما اتعودنا على فكرة العيش الرأسي دة لسع..أهلنا الجايين من الأقاليم ما قادرين يلقوا حدود الـcommon areas
فمسألة أكياس القمامة في طريق العربية..و تأخير ناس النفايات تلاتة أربعة يوم ممكن تتعبك..و دة بيختلف من حي لآخر..

* هناك ظاهرة جديدة ..سخيفة..و هي إنتشار عربات الكارو بتاع الحمار في كل أحياء الخرطوم أو معظمها، الصافية، شمبات، الفردوس، الجريف غرب، جبرة...الخ..و بعدين ديل ما شاء الله أسياد الشارع...مضايقات و أوساخ و صوت الحمير..

* السمسار و صاحب العقار ممكن يمقلبوك في النسبة اللي بتزيد سنويآ و هي عشرة في المية في الغالب..لكن البعض بيقول عشرين في المية ع شان تقبل بخمسطاشر..لازم تفتش شقق كتيرة جدآ قبل ما توقـّـع العقد..لأنو فرق دواليب المطبخ ممكن يوفر ليك مليون..

* إتأكد إنو عندك access لي موتور الموية..لأنو حكاية (أنا بملا ليك الصهريج مع أذان الصبح) دة كلام ما قبل قبض المقدم...و أنا حصل عملتflushing للحمام بي موية صحة!!..ما تضحكوا أعمل شنو؟؟...الموية قطعت..الراجل مافي..الموتور في بيتو..حمام واحد ما نضيف يعني ريحة الشقة كلها باظت..عندنا قارورة التسعة عشر لتر تشبه صفيحة الزيت قلبناها في التواليت و احتسبنا تمانية ألف جنيه قديم!!

* تجنب جدآ أن يكون تحت السكن بقالة أو حلاّق أو مطعم..زرت صاحبي و قتلتنا رائحة الشواء في الطابق الأرضي و نحن في بلكونته نتأهب لشاي مغرب و قراءات شعرية..بالطبع أي حاجة جاطت..

تصبحو على خير لحد كدة

أشوف وشكم بكرة ان شاء الله

.

طيب يا حبايب
نكتب في محور التعليم للعيال
أولآ تستبعد، نهاااااائي، فكرة المدارس الحكومية!
ع شان أولاد الإغتراب ديل ما راح يستحملوا ليك قصة الحيطة وقعت بي علينا..و الثعبان كائن أليف ..و ما إليه..
الخيارات بتاعة المدارس الخاصة متاحة..و ما غالية..نسبيآ
طبعآ لازم تعمل بحث قبل ما تسجل الشافع..بعض المدارس دي شكلو جميل و مستواهو تعبان
و على العكس بعضها في مظهر متواضع و بها إستاف كارب..
الموضوع بيعتمد على موقع السكن..لكن الأسماء الأكثر لمعانآ هي (القبس) و (العالمية) و لها أفرع كثيرة و تراحيل ممتازة، و لا علم لي بمدارس المجلس الإفريقي برغم سبقها في المجال..هناك مدرسة تزوروها فقط و هي شعرآ لا رقبة لأكثرنا له، و هي مدرسة أسامة داؤود و اسمها (كيكس)Khartoum International Community School ذلك لأن سعرها غالي جدآ..أذكر أنها كانت بعد التخفيض لمنسوبي دال، حيث كنت أعمل، كانت رسومها أكثر من أربع الف دولار للسنة!! لكن للأمانة أقول هي أجمل من المدارس الأمريكية التي درس فيها إبني بشير على الإطلاق..سواء في مينيسوتا الثرية أو ميامي المشهورة!! فيها موظفين خواجات ناهيك عن المعلمين ..و بها مكتبة هائلة و حوضي سباحة موش واحد و إستاد بيتمرنوا فيهو ناس المريخ و مسرح ممتاز..لكن دي يا جماعة للعلم فقط...غالية جد..

* تجربتي الشخصية بعد كثير بحث..

قمت بتسجيل بشير الطيب في (كيبس) Khartoum International Preparetory School في القسم العالمي، و هي مدرسة عريقة جدآ، قبل الإستقلال، و فيها إستاف ممتاز و مباني ممتازة..و ملاعب متواضعة لكنها تكفي لنطيط الشفع..تاريخ المدرسة خلـّـى عندها مجلس آباء و تقاليد و اهتمام بالمنافسة و النجاح..التراحيل بتاعتهم فيها ضبط..طبعآ بعض المدارس فيها إغتصاب أطفال في الترحيل و دة لغياب الإدارة عن عمليات المتابعة و المعاينات للسواقين و الإشراف و كدة.
الرسوم حوالي ألفين دولار للعام..تدفع على ثلاث أقساط..معظم المدارس الخاصة بتعمل حكاية التقسيط دي..و للقادمين من الغرب نقول إن متوسط أستاذ العربي أقل من مائة دولار للشهر ليأتي ثلاث مرات في الأسبوع ..و راس مع ولدك ممكن في ستة شهور فقط ينقلو من ألف باء تاء ثاء..إلى الإعراب!! طبعآ مع فروق طفيفة في إستيعاب الطلاب و اختلاف مواهب المعلمين..لكن دة كلام عام.
بالنسبة لناس الأقسام المحلية، أو القراية بالعربي، أرخص شوية..أظنها بتوفر ليك ألف دولار أو نحوه..مع اختلاف ذلك من مدرسة لأخرى..ننصح بالقسم الإنكليزي لكل طفل مبتديء من العيال..لأنو الإنكليزي في السودان منتهي..على الأقل بتصمن إنو البيدرس كل المواد بالإنكليزي يحتك مع العيال الجايين من ماليزيا و أوروبا و أمريكا و ياخد اللكنة الأقرب للأصل و على المدى الطويل يكونemployable أكتر من القرا مدارس بالعربي..
برضو شايف لافتات كثيرة مدارس قرآنية، لا أعرف عنها الكثير، لكن قيل إنها خلوة بلا سـوط عنج!!

* التعليم دة عاوز رجعة بتفصيل أكتر عن الثانوي و الجامعات


.

متابعة باهتمام

Quote: متابعة باهتمام

و انا سعيد، جدآ، بالمتابعة

تقديري

.

الجنرال الطيب بشير..
انت بتتكلم عن السودان ولا أمريكا..
الامور اتلخطبت علينا..
هل المدارس دي موجودة في كل حي وحارة..
لو بيتي في امدرمان ولدي يدرس في أركويت ولا كيف..

الطيب

سلامات

Quote: قمت بتسجيل بشير الطيب في (كيبس) Khartoum International Preparetory School في القسم العالمي، و هي مدرسة عريقة جدآ، قبل الإستقلال، و فيها إستاف ممتاز و مباني ممتازة..و ملاعب متواضعة لكنها تكفي لنطيط الشفع..تاريخ المدرسة خلـّـى عندها مجلس آباء و تقاليد و اهتمام بالمنافسة و النجاح..التراحيل بتاعتهم فيها ضبط

يا اخوي ورينا ال كيبس دي موقعها وين؟

والعام الدراسي بتاعهم ببدأ متين ؟


تخريمة

يا تبلدينا سلامات

شفتا ليك واحد فراعي ومن بربر بكون حنكوش !!

.
أيمن دياب
كيف حالك

Quote: هل المدارس دي موجودة في كل حي وحارة.. لو بيتي في امدرمان ولدي يدرس في أركويت ولا كيف..

الموضوع فعلآ عاوز تركيز

زي ما قلت بعض المدارس أفضل ، بكثير، من مدارس أمريكا
لكن القبس و كيبس و أخريات عندهم ترحيل لكثير من الحواري
و كثير من الناس ساكنين بحري و أم درمان بيمشوا مدارس الخرطوم

.

يا الطيب اخوي...نحن طموحاتنا اقل من كدة بي كتير...

يا راجل انا خايف اجي اجوع في حلقي دا واجوع وليداتي تقول لي مدارس كيكس وكيبس

كدي احكي لي انا دا واكيد بكون معاي ناس كتار زي كدي علا خجلانين ...
احكي لي اجيب حق الملاح من وين؟ بعد ما تنقطع قروشي...

صاحبي ...خواجة امريكي...ترك السعودية وجاء البحرين
يفتش في شغل...قال لي فتش لي ارخص فندق...اول فندق
رخيص مشيت ليه....سألهم كم سؤال ...وطلب منهم آلة حاسبة
بدأ يحسب...وقال لي "ليت اس قو" مشيت لي واحد تاني اتفه
وأرخص...برضو حسب حسبتو...وقال لي "آي ويل تيك ات"

وأجابني دون ان أسأله عن سر الآلة الحاسبة شنو بجملة

Now I have money- good for 200 days

وانت عارف الترجمة الحرفية لهذه العبارة لا تصلح في السودان
لأنو في حاجات كتيرة الخواجة ما بضربها....ونحن بضربها معانا
القدر...فلان جاتو كذا وكذا...والمدرسة وقعت...والمستشفي..والنفايات
والمتعافي وعيييييييييييك...اها ديل نسوي ليهم شنو؟

نجي نعيش بعقلية الخواجة...ام نخوج السودانيين والقدر؟؟؟

ديل ياهن مشاكلي مع الرجعة للبيت القديم...
وحا اتابع بوستك...مع اني شفتك وضعت بعض الحلول...واتعشم بمزيد منها...

وتسلم يا حبيب...

شكرا الطيب

انا رجعت قبلك (عام 2004) ولدي تجربة مماثلة تقريبا

انت لخصت الفكرة كلها من أول سطر وبلغة حريفة وراقية: الناس العايشا كويس ما يجوا لان الحياة هنا مختلفة ولن تكون أبدا مثلما في (بلادهم)

أما الناس الكاتلها الحنين للبلد ومستعدين يدفعوا شويييية ثمن مقابل ذلك فمرحبا بهم

مرحبتين أخي الصاوي

و أنا مبسوط إنك قاعد في البلد

لازم نتقابل ان شاء الله

Quote: الناس العايشا كويس ما يجوا لان الحياة هنا مختلفة ولن تكون أبدا مثلما في (بلادهم)

إنت عارف الزول لازم يتنازل عن الرفاهية المطلقة الفي بلاد الغربة

و يستمتع ببعض عكننات السودان دي

كهربا قطعت ..كتاحة دوّرت..موية كيف كيف

خليهم يجو عايدين

شكرآ لمداخلتك

.

سلامات يا الطيب
بالله انت مستقر ليك سنتين؟

Quote: الحركة و السواقة في الأيام الأولى بتكون مشكلة

في الايام الأولى السواقة في الخرطوم مشكلة فعلا لكن بمرور الوقت بتبقى عادية..
مرة انا سايق في الخرطوم في شارع ضيق واتجاهين والعربات صافة على الجانبين وزحمة موت ..
وكان واضح علي متردد ومربوك اضافة الى انوالعربية لوحاتها اجنبية .
واحد من الناس الماشين في الشارع جاء جنب الزول الراكب معاي وقاللو: ( لومني زولك البرجف ده كان ساق في الخرتوم دي تاني)

سيب ده كلو يا الطيب ..

ال UN دي يشتغلوا فيها كيف ؟؟؟

عشان لو أنا بقيت يو إن ، السكن
والعيشة بتبقي ساهلةعشان الماهية
المدلورة ما تديك الدرب !!

وبعدين يقول ليك الوظيفة السمحة دي لل
Expatriate Staff
والوظيفة الشينة دي لل
Local Staff, National Staff

وحتى الوظائق الشينة أعلاه مافي ليها
طريقة بأخوي و أخوك ..

لكن ده كلو كوم و زمن إيان برونكو كوم ..
قالوا الراجل العجوز كانت عينه طاااايرة ..

تلبس (استايل) .. قصدي (تلبسي) ..
وهاك يا الامتيازات و نطيط الاسكيلات ..
وحاتك في ناس اداهم عربات يو إن فواره
يربطوها جنب البيت ..

أها نحن الخشنين ديل ما رحنا فيها ..

بعدين سمعنا تحت تحت إنه السودانين الفي
اليو إن ممكن يساعدوا الاجانب، بس يعادوا
المواطنين ... صحي يا الطيب ؟؟!!!

Quote: بعـد عامـين مـن الإسـتـقرار بالسـودان "الشـقـيـق"..تجـربـتـي مـُهـداة للمتردّدين و النـّاوين

الطيب أخوي الحبيب
عنوان البوست خلاني ألاوز
وعارفاك دقيق -كإعلامي- في اختيار مفردات تعبر عن مقصدك..
كلمة (الشقيق) دي ما أعتقدك ختيتها عفو الخاطر فقط لأن الدول الأخرى تطلق على بلدنا (السودان الشقيق)..هل دة جزء من إحساس غربوي راودك (ولو أحايين بسيطة)في خلال فترة الرجعة؟

..
.
الاخ الطيب ..
تحياتى .. مع عائدين الاربع

بالجد ملاحظة الاميرة دى .. ليها يومين ماكلانى
طبعا نهائيا ما ختيتيها الشقيق ( الاخ ) غايتو
شكلتها وسكت بيها ..

برجع ليك غايتو للقليل من عودة مغترب وكيفية
العيش داخل شوارع وغلاء وحرارة وطيبة السودان

_________

ابوحريرة صدق الزول
الظاهر عليك اجرت ليك سواق

Quote: * التجربة لن تفيد الإخوة الكرام الذين غادروا السودان لأسباب سياسية، و نتمنى أن تزول أسباب قسرهم على البعد عن الوطـن، و نرى كل مهاجر ينعم بالعيش بين أهله. * التجربة لن تفيد الإخوة الكرام الذين يرون أن سهولة الخدمات في بلاد الغربة أمر لا يمكن الإستغناء عنه، و أن دقـّـة النظام أو الـ System أصبحت جزء من برنامجهم لا يسعهم التنازل عنه..نقول لهم "بخيت و سعيد"..و المقال/ البوسـت لن يفيدكم في شيء. * التجربة لن تفيد الإخوة الكرام الذين فرضت عليهم ظروف أبنائهم الإرتباط بدار البعد و الغربة، فمثلآ تزوجت البنت أو أصبح الإبن موفقآ في عمل محدد لا يمكن توافره بالسودان..أو شيء من هذا القبيل.

* التجربة لن تفيد ، أيضا ، الأخوة الكرام الذين كتب الله عليهم أن يكونوا متواجدين الآن بالسودان وهم في حالة "عذاب ضمير وجودي عميق " لأنهم كتبوا على أحفادهم أن يكونوا حاملين لواء الانتماء لهكذا بلد ، يا الطيب يا خوي البلد دي ما عندها "مستغبل" وانا وانت بقينا عارفين كدا "بعمغ"شديد وما في داعي لارتكاب خطايا التفاؤل والتطمين

وانا اسا راجي اقرب فرصة لاي خروج نهائي لاي من القبل الـ360

Quote: باقي ليك بكون في زول صبقني علي الوظيفة دي؟

اسه بعد كتبتها هنا يا نزار اكيد بيكون..

تجربه قويه بالقطع..
فشتان مابين الغرب و,ماهو جغرافيا في الشرق..
يعني اعادة التأقلم من جديد شيء ما ساهل علي انسان تعود النظام وتوفر الخدمات والمساحة الانسانيه من الحرية..
اعتقد انها تجربه تستحق أن يتبعها "كل من يأنس في نفسه الكفاءه" ليس فقط في شيل الفاتحات ومشاركة الأفراح ..
بل ايضا في اساس العمل ونوعه ودخله والي آخره من متطلبات الحياة الأساسيه..
وفي كل هذا قدرته علي مواجهة الصعاب..


مبروك الاستقرار يا الطيب بشير وعقبالنا فقطعا ليس هناك أجمل من حضن الوطن..

تحياتي..

العزيز الغالي الطيب بشير

طابت كل ايامك يا ود طابت

ليك وحشة - ما تفتكر العدد الانيق دا من المتداخلين فقط عشان الاستفاده من تجربتك

انا بفتكر بل اؤكد بأن تقديرهم وحبهم لك كان في المقام الاول

بعد ذلك استخدامك لأسلوبك السلس في سرد تجربتك في الهجرة العكسية للسودان تفيد بشكل كبير

العازمين علي الرجوع للسودان وان شاء الله قريب نحن ح نكون في ارض الخير السودان

استحلفك بالله يا ود بشير تمشي التلفزيون وتدرس امكانية العودة للعمل الاعلامي خاصة انك صاحب صورة وصوت وامكانيات مهولة

لك تحياتي مقرونه بسلامي للعزيزه سوما وبنيتها حفظهم الله

شكراً عزيزي الطيب بشير على هذه المعلومات الوافرة والسرد الممتع...
ضحكت بشدة في كتير من منعطفات البوست...



توجد وظائف متنوعة في هذا الرابط على موقع رُماة الحدق
http://www.alhadag.com/jobs.php

الشكر الجزيل للعزيز محمد النور على الوصلة

أنور
 

الأخ الطيب والأخوة المتداخلين

تحية طيبة....

البوست جميل ومفيد جدا وممتع..

وانا عندي تجربة حديثة وثرة عن العودة للسودان

فقد أتت جهةمعينة وتعاقدت معي خارج السودان

وقد كان ال Offer كبير جدا بالإضافة للسكن الراقي والسيارة والموبايل العالمي .. الخ

وأدخلت ابني مدرسة عالمية وقلنا خلاااااص الواحد حقق حلمه في وطنه وكده !!!!!

وأصطدمت بكل ما ذكرته انت من منقصات الحياة في السودان ...

لم استطيع التعامل مع ال System نهااااائيا

رغم المغريات ديك كلها... حملت حقائبي واسرتي ورحلت عن السودان


مودتي

الجنرال الطيب بشير
سلام ...

بوست مميز ..
ومادام تميت سنتين مابتجيك عوجة تب ...
بخصوص المويه القاعد تشتريها بستة دولارات عندي ليك حل وتعال لي في الخاص
بخصوص وظائف ال UNعندي صديقي شغال معاهم براتب مغري ودخل الوظيفة بمعاينات
عادية وامتحانات ...
.
.
.
.
.
تعريجة للأخ أحمد حنين : من الدكة ولا المنيدرة ...


=========================

الغريب عن وطنه مهما طال غيابه مصيره يرجع تاني لي أهله وصحابه


خالص تحياتي لكم وللمتداخلين

الماجستير بتاعك كيف؟؟


خلاص الحمداللة كل المواد التقيلة خلصتة منها مع نهاية شهر 9 بكون اتخارجتة


ياربى ما بلاقى شغل فى السودان انشاء اللة سفيرة محبة

حبى و اشواقى لثومة و الاولاد شديد

.

Quote: ياربى ما بلاقى شغل فى السودان انشاء اللة سفيرة محبة

العزيزة هـُـدى عبد المنعم

مرحبتين حبابك..و اليوم السعيد الليلة جابك

إنتي أصلآ سفيرة النوايا الحســنـة و المحـبـّـة الما خمج

البلد ترحـّـب بيك بكل تأكــيد

لكن بعد البيت و الشغل بتقدري تفارقي لوس أنجيليس؟؟

.

يا سعادتك ليك وحشة والله ومشتاقين كتير


تمنيت من عمق قلبي رؤيتك وجها لوجه إبان زيارتي الاخيرة للسودان في ملتقي الاعلاميين عشان نكمل

حكاية بوستنا القديم واستراحة المحاربين وبقايا مداد الوان لكن الله مااراد وقد سألت عنك مرارا

صديقك القديم المتجدد ابا مروان الذي دخل في معمعة الحرة بعد تجربة الحياة القاسية


بوستك ده سمين خلاص وليه عنقرة وكرش مبهولة ويدغدغ مشاعر الاف المغتربين خاصة عندنا في السعودية

بس العبرة بالخواتيم واتخاذ القرارات الفورية وعدم التردد

وارجو ان تاخد الاجربهذا البوست وتنقذاسرا كثيرة تريد العودة وتحرمها مكيفات الفيريون من فراق

الفول والتميس والدجاج المقطن.

الطيب الطيب

انا بقرا و ببكى

عارف ببكى لى
لانى نفسى ارجع اعيش فى السودان و سط اهلى و احبابى
لكن الكلام القلتة دة صعب شديد
معقول يالطيب انا و اولادى بندرس مجانى امشى ادفع لوئام و سام الاف الدولارات ما استغفر اللة و ارضى بالواقع و صاحب بالين كذاب
المدارس الخاصة فى السودان بتعمل المستحيل علشان تكون او تصل نفس المستوى الاكاديمى للمدارس الامريكية
ايمكن انت ظروفك احسن عندك اثنين لكن العندهم 3 و اربعة يعملوا شنوا
المدارس فى امريكا مجانى و بوفروا وجبتين خلال اليوم الدراسى و snack
لبعدالمدرسة after school program
و بعد دة كلوا اى تلميذ ممكن يستلف laptop
لو عندة project
صحيح بنحب السودان و بنتمنى نرجع و نستقر
But, is not about money is not about us is about Children

الطيب

اين انت

الكهرباء قاطعة

Quote: الكهرباء قاطعة

و معاها كتـّــاحة

و موية قاطعة

.

Quote: معقول يالطيب انا و اولادى بندرس مجانى امشى ادفع لوئام و سام الاف الدولارات ما استغفر الله و ارضى بالواقع و صاحب بالين كذاب ..المدارس الخاصة فى السودان بتعمل المستحيل علشان تكون او تصل نفس المستوى الاكاديمى للمدارس الامريكية..يمكن انت ظروفك احسن عندك اثنين لكن العندهم 3 و اربعة يعملوا شنوا ..المدارس فى امريكا مجانى و بوفروا وجبتين خلال اليوم الدراسى

طبعآ يا هدى كدة رجعنا لمدخل البوســت..إنو بعض الناس لا يناسبهم هذا البوســت، لأنو ظروفهم مرتبطة بالغربة..و المقارنة معدومة بين أمريكا و السودان..لكن في المقابل الأولاد لو في إمكانية إنو يتربـّـوا في السودان دة بيبقى أفضل ليهم حتى من مصر القرييييبة دي و من السعودية الفيها بيت الله و الرســول..ليييييه؟؟...لأنهم ببساطة ح يطلعوا سودانيين..زيي و زيك ..الـSocialization دة شغل معقـّـد جدآ و ما بيتأتى بمدارس الجاليات و لا زيارات نهاية الأسبوع..إما تتحزّم و تقعد ليهو في السودان..أو ترضى بالغربة وطنآ بديلآ لأنها توفـّـرالمستوى الاكاديمى و وجبتين خلال اليوم الدراسى و باقي المقارنات الواقعية دي..

طبعآالزول العندو تلاتة أربعة أطفال في سن التعليم ممكن زوجتو تعمل بالتدريس في المدرسة و يقبلوا ليها الأطفال مجانآ..أو بتخفيض كبير

كل عقدة و ليها حلاّل يا هدى
كدي إنتي في الأول تعالي عطلة

تحياتي للبيه الدي جي

.

.
كيفك ياود السيدح

الحـرّة أخدت مني صاحبي ياخ..بيشتغل ساعات كتيرة

لكن ان شا الله ربنا يوفقو

Quote: العبرة بالخواتيم واتخاذ القرارات الفورية وعدم التردد

فعلآ يا عبد اللطيف نتمنى أن يحسم الناس أمرهم لصالح البلد

و أي زول في السعودية أو الخليج أو أوروبا أمورو ما ماشة..أحسن ليهو يجي البلد

نحن عشمانين حتى في الوظائفهم كويسة و مرتاحين هناك يلقوا حاجة هنا أفضل

قول يا رب

.

.
أهلين يا رضــا يا حـبـّـــوب
و ليك شكري الأكـيد على ما في الخاص..مزيدآ من كنوز معرفة الرجال

Quote: بوست مميز .. ومادام تميت سنتين مابتجيك عوجة تب ...

شكرآ يا حبيب لرايك في البوســت
و كلامك صاح... أنا اتعوّدت على البلد لدرجة إني ما عاوز أسمع سيرة مرقة تاني

قول يا لطيف

.

.

Quote: الغريب عن وطنه مهما طال غيابه مصيره يرجع تاني لي أهله وصحابه

A-MEN

.

.

د.أحمد أمين مرحب بيك كتير..و شكرآ ليك على رايك في البوســت
و شكرآ تاني لوضع مساهمتك الصادقة في هذا البوســت
و هي صورة مغايرة لما أكتب عنه أنا..لذا فهي تعطي بعدآ واقعيآ للموضوع

Quote: أصطدمت بكل ما ذكرته انت من منقصات الحياة في السودان ... لم استطيع التعامل مع ال System نهااااائيا رغم المغريات ديك كلها... حملت حقائبي واسرتي ورحلت عن السودان

أنا حزين أن التجربة لم تنته لصالح السودان
لكن كلامك واقعي، بأسى حقيقي، و لا نملك إلا أن نحترم قرارك
درجة التحمـّـل بتختلف من زول للتاني
و كل تجربة بتكون فيها عوامل مختلفة
ساهـًـمت في حالتك في الخروج من البلد
و في حالتي في الإستمساك به

.

.
شكرآ أنور كينج على الرابط
و أنا سعيد لقيت حاجة تضحكك في البوست

Quote: توجد وظائف متنوعة في هذا الرابط على موقع رُماة الحدق

و بالمناسبة دي دعوة لكل زوار البوسـت أن يتفضلوا بوضع لينكات التوظيف بالسودان
أنا برضك عندي تلاتة أربعة لينكات سمحات راح أجيبهم

.

.
ألف أهـلآ و مرحبا إحسان عبدالمتعال أحمد
اشكر لطفك البائن في كلمات التشجيع و الإطراء
و أحيي معك ضيوف هذا البوسـت و زواره مع أطيب التمنيات لهم و للجميع بتحقيق الأمنيات
كنت قبل يومين مستمتع باللقاء بتاعك في (الراي العام)
و الله ليك وحشة..

Quote: ان شاء الله قريب نحن ح نكون في ارض الخير السودان

يا سلاااام..دة طبعآ خبر بالدنيا
نشوفكم هنا..طالما عـزّ اللقاء
و أكيد أكيد ح نتقابل

Quote: استحلفك بالله يا ود بشير تمشي التلفزيون وتدرس امكانية العودة للعمل الاعلامي خاصة انك صاحب صورة وصوت وامكانيات مهولة

ألله يخليك يا إحسان
و الله جدآ ع شان كلامك اللطيف دة
نتمنى أن تكون السـكـّـة ملأى بزملاء مثلك يتذكـّـرون حق الزمالة

لك تقديري و محبتي

.

Quote: مبروك الاستقرار يا الطيب بشير وعقبالنا فقطعا ليس هناك أجمل من حضن الوطن..

الله يبارك فيييييييك يا منى خوجلي

و بالحـيل..ليس هناك أجمل من حضن الوطن

نتمنى نشوفكم هنا، متى كان ذلك ممكنآ، مع تقديري العميق

.

Quote: يا الطيب يا خوي البلد دي ما عندها "مستغبل" وانا وانت بقينا عارفين كدا "بعمغ"شديد وما في داعي لارتكاب خطايا التفاؤل والتطمين

صديقي فتحي البحيري
طبعآ الجوّة عاوز يطلع و البرّة عاوز يدخل..دي نظرية تصدق على أشياء كثيرة
تنطبق على السودان و الزواج و العسكرية
و كلها (أشياء) فيها ضبط و ربط و فوضى خـلاّقـة
لكن يا فتحي، و إنت سيد العارفين، البلد دي عندها (مستغبل مشرغ) و إنت بنتناضل ع شانو مع شروق كل شمس، طلبآ للشروق اليلوح في أفق عودة هؤلاء المهاجرين..أنا بطمـّـنـهم بحذر..و قد أفضـت في موضوع السواقة..و لسـّـة الصحـة جاية بكرة ان شاء الله..يعني عكس للواقع بمصداقية..و تأكـيد لإمكانية أن المغترب يمكن أن يعود و يعيش بـ(غليل) من المعاناة.

محبتي

.

Quote: بالجد ملاحظة الاميرة دى .. ليها يومين ماكلانى طبعا نهائيا ما ختيتيها الشقيق ( الاخ ) غايتو شكلتها وسكت بيها ..

إيه الحكاية يا تبلدينا؟؟..عملتها الشقيق من الصداع النصفي؟؟

أنا شرحت للأميرة بالتفصيل..لكني قصدت الشقيق الأخ بصراحة

لمن جيت جديد ناس النيل الأزرق عملوا معاي حوار جميل عن فكرة الوطـن الآخر..زول فنـّـان حدّ الجنون إسمو حاتم..كان المخرج، أظنو خطفوهو ناس قناة الشروق، الفكرة إنو أنا سوداني/أمريكي..و قاموا سألوني عن الولاء المتنازع و الحنين و الإنتماء..و كلام جميل خالص عن السودان الشقيق دة ذاااتو..كانت المذيعة تسابيح..و معاها شاب آخر نسيت اسمو..

تبلدينا أظهر يا مواطن

.

الأميرة الكنانية ..لنا مهدي..المهرة الرابحة

كيف حالك و الحبيب يعقوب و ولي العهد؟؟

Quote: كلمة (الشقيق) دي ما أعتقدك ختيتها عفو الخاطر فقط لأن الدول الأخرى تطلق على بلدنا (السودان الشقيق)..هل دة جزء من إحساس غربوي راودك (ولو أحايين بسيطة)في خلال فترة الرجعة؟

كنتُ واثقآ أنها لن تفوت على ذكائك، و آخرين، و أسعدني السؤال المباشر..

كيف لا أشعر بالغربة يا لنا و أنا أجد صعوبة في دخول مباني التلفزيون!! ناهيك عن العمل فيه!

كيف لا يملؤني الإحساس بالغربة و أنا أدخل وزارة الداخلية بإذن من زملائي في الخدمة!

هذا جزء من الوطن فقدناه و إلى الأبد..الوطــن الرسمي..و هو الآن مختطف..لم يطالبوا بفدية لإرجاعه و لم يفاوضونا حول مطالبهم .. فقط حبسوه عنـّـا و حبسوناعنه..رغم العودة..لكن وطننا يـُـشعرنا بالغربة كثيرآ جدآ..و العزاء أن الوطـن في بهائه الإجتماعي لم ينقص جماله مثقال حبـّـة من خردل..ياهو السودان..يملؤنا حدّ الإكتفاء من كل ما فقدناه..

السودان (الشقيق) يا لنا..(الشقيق) جدآ

.

.

يا هلا محمد ابراهيم قرض

وينك يا راجل

Quote: ال UN دي يشتغلوا فيها كيف ؟؟؟

بس شفت تصاقر الويب سايت بتاعهم دة و بتلقى العروض

بالنسبة لحال السودانيين في المنظمة، لا يختلف عن حالهم في أي موقع آخر، تجد العاطل عن الموهبة دائمآ ينافس بالمحلسة و الدحلسة و تجهيز البنات و القعدات..وجدتهم في كل موقع عملت به في السودان..و المؤسف أن المدير أو الرئيس المعني لا يحترم أمثال هؤلاء..

ربنا يسـلـّـمنا من شرورهم

.

أهلين صديقي أحمد يوسف أبوحريرة

Quote: بالله انت مستقر ليك سنتين؟

هو داب إستقرار؟؟..أنا في عقر دارك يا مان!!

زرت أبو دليق مرة للعزاء في دفعتي الراحل عثمان البطحاني..

و ألتقي صديقي الأديب المتصوف إبراهيم البكري، حفيد الشيخ طه البطحاني و الشيخ إبراهيم الكباشي، بانتظام..و هو لا حديث له سواكم..عائلتكم و عائلة سمية الحسن طلحة..و قابلت في مناسباتهم و دعواتهم رجال مميزين في البلد..

إنت لما ترجع بالسلامة...أنا بسوق ليك..ما ترجف..

تقديري

.

حبيبنا نزار حسين..شيخ العرب..حبااابك ألف..في البوســت و السودان

ممكن في البلد دي تجوع..وارد..ع شان كدة ..الضمان أمان

يعني تجتهد في وظيفة زي بتاعة أخوك أحمد حنين..أو تجي زي جيـّـة أخوك الطيب بشير..

كيف؟؟...

أناحزمت حقائبي و أمري و قطعت تذكرة ســــــــــــنــــة...أهم حاجة فيها إنو لو بقينا على الرجعة لأمريكا ما يكون عندي مشكلة تذاكر لي و لأولادي!! و قلت لأم بشير أنا عندي إن شاء الله ستة شهور معاكم في السودان لمحاولة الإستقرار..و بعدها ستة شهور في الخليج، منفردآ، للبحث عن بلد أفضل من الغربة البعيدة دي..و لو تذكر حين زرنا بيتك في ساعات الكونـّـكشــن وعدتـُـك بعودة للبحرين..كانت و الله plan B لكن حكمة الله plan A لفقت من أول شهرين..و بصراحة أنا ساعدتها بصبر بالغ و رغبة جامحة في أنmake it happen و الطريقة الإنتحارية بتاعة تسخير كل الـnetwork للبحث عن عمل..و بالجد الموضوع أسفر عن إغراءات كثيرة..حتى إعلانات الصحف و الانترنت لا تقلّ إغراء عن هواتف الحبايب..

يبقى إنت تجي بفكرة بتاعة زول عندو خط رجعة..و أنا ضــــــــــد فكرة حرق المراكــب..

و إن شااااء الله تلفق..

.

Quote: يبقى إنت تجي بفكرة بتاعة زول عندو خط رجعة..و أنا ضــــــــــد فكرة حرق المراكــب..

صعبتها علي يا الطيب اخوي...انا كنت عايز اكسر المجاديف مرة واحدة
وما باقية لي ان جيت راجع اقيف في صف المغتربين تاني لي تأشيرة..


عموما حا نتلاقي...عديل...وحينها سنعرف منك بالتفصيل اكثر
والي ذلك الحين سأظل مراقبا لهذا البوست...وهو بوست العام
بدون منازع...مخاليق الله دي كلها عايزة الرجعة بمن فيهم
هدي عبدالمنعم (ويبقي لي بتكون قريبة نهلة عبد المنعم)

Quote: صعبتها علي يا الطيب اخوي...انا كنت عايز اكسر المجاديف مرة واحدة وما باقية لي ان جيت راجع اقيف في صف المغتربين تاني لي تأشيرة..

و الله يا نزار أنا mainly ما داير ليك الشلهتة ..و تانيآ أنا عاوز أشرح ليك تجربتي بكل الـfactors..أنا يا نزار لو الخرطوم ما نفعت معاي يوم الخميس بصبح في ميامي يوم الجمعة!! بدون صف التأشيرة البتقول عليهو دة ذاااتو..ع شان كدة خط الرجعة مقوّي قلبي..أنا عاوزك تعمل للسلام بالإستعداد للحرب زي ما بقولوا العساكر..تجي البلد بأطول خروج و عودة يمكنك الحصول عليه..يعني عطلة شهرين ما كفاية..خليها خروج ستة شهور مثلآ..و تعال رازق..و قبلها الويب سايتس الكتيرة دي..و ان شاااااء الله كل خير..

لا تحرق المراكــب..اسمع كلامي..

.

*

يا بنَ مايكي الأثيري الآسر ،
سلام .
متابع أنا هذا البوست المدر لكامل " نوستلجيا " العودة للوطن !
واصل الكيفية ، والمضبات !!
وهل لنا من مساحةٍ " مايكية " في هذا الاستقرار ؟

متابعة الحجل بالرجل

تحياتي أبو بشير

.
أهلآ أبوجهينة جلال

Quote: متابعة الحجل بالرجل

شرف عظيم يا صديق

خليك قريييب

.

كن الطيب بشير ... جنابو سابقاً .. الصحفي حالياً ... صديق صديقي .. الصدوق محمد صديق ... وسأكون أسعد البشر الليلة ..

فرحات ....

Quote: كن الطيب بشير ... جنابو سابقاً .. الصحفي حالياً ... صديق صديقي .. الصدوق محمد صديق ... وسأكون أسعد البشر الليلة .. فرحات ....

يا فرحات يا صاحــب كيفك

بل أنا الأســعـد، رغم أني لم أجد ردّك كل هذا الوقــت، و برضو مبسوط إنك هنا

جميل أن يجمعنا شخص شفـّـاف زي محمد صديق..

و بما أنو الكلام عن السودان خليني أحكي ليك قصة ما تحته خــط..أصبحت كلمة (الأســعد)، بي قـُـدرة قادر، من كلمات المشاغلة البذيئة!! ذلك أن مستثمرآ عربيآ أقام مصنعآ للحديد و الصـُـلب بالخرطوم و يقول إعلانه (الأسـعـد... صـُـلب عالِ الجودة)!! فاحترس من إستخدام المفردة بحضور مواليد الإنقاذ..

خليتك بي ألف خير

.

يا الطيب \\اخوى بخيت وسعيد عليك نادوس ومن كل قلبى اتمنى لك التوفيق ولاهل السودان كلهم من دون فرز
علا جنى اخوك ما بقدر على تلفزيون وجرايد وراديو بتكلم فيه الجماعة ديل
النافع
المتعافى
سبدرات
امين حسن عمر
ابراهيم حسن عمر
محمد على الامام
الطيب مصطفى
الكارورى بتاع جامع الشهيد
عبدالله مسار
ود البشيــــــــــــــــــــــــــــــــــــــــــــر

مالى جنيت ولا عضانى كلب!!جنى

جنابو الطيب..
تعرف المغتربين لما يمشو في الاجازات.. الواحد لو وقف في البقالة واشترى صابونة.. طوالي وفي نفس اللحظة وبسرعة خاطفة جداً، بعمل مقارنة بين سعر الصابون في السودان والسعودية.. والمؤسف إنو بلقى السفر مضاعف خمسة مرات..
ولو وقف في الطرمبة عشان يكب ليهو بنزين.. دي المصيبة ذااااااتا.. اللتر في السودان 1450 جنيه.. وفي السعودية 45 هللة.. يعني أقل من 300 جنيه.. تمشي السوبر ماركت تقول تبحبحا شوية على العيال وتشتري ليك اتنين كيلو فراخ.. تلقى الحساب 26 جنيه سوداني.. ما يعادل 40 ريال سعودي.. ودي بتجيب ليك خمسة كيلو بارتياح.. ولو عايز المجمد بدوك سبعة كيلو..
عشان كده مافي زول برجع ياجنابو.. إلا للشديد القوي.. يفقد شغلو مثلاً.. أو ظروف أسرية قاهرة جداً تفرض عليهو يرجع السودان.. وغير كده الله أعلم يكون في عودة واستقرار في السودان..
بعرف واحدة من أخواتنا هنا في السعودية.. من شدة ما قرفانة من السودان.. قالت على نفسها: و(يقام المأتم بالرياض)..
عشان الشفع بمرضو ليها شديد في الاجازات.. وحتى الموية دي بتغير معاهم.. والكشف والعلاج عند الدكاترة محتاج ميزانية عديل كده.. (500) ريال ما بتحلها لو مرض ليها شافع أو شافعين..
باختصار شديد ياجنابك.. الساعة البيولوجية للمغتربين مبرمجة على سيستم معين.. في ناس استمر معاهم السيستم ده حوالي عشرين سنة.. ومن الصعب إعادة البرمجة على نظام فيهو فوضى وعدم انضباط..
وأختم ليك باتصال وصلني امبارح من واحد اسمو النور.. الراجل ده مشي بصفة نهائية قبل سنة، وفتح بقالة رأسمالها حوالي 80 مليون جنيه.. فوجئت به بالامس يتصل بي ويقول عايز سكن في شمال الرياض، غرفة عزابي بأي سعر.. لو رجع بفيزا جديدة.. وانضرب في السوق وخسر ثلاثة أرباع رأسماله.. زي النور ده كتل فينا كل حاجة وكل أمل للرجوع والاستقرار..

Ya Kumondan slaaam

Quote: يبقى DO NOT keep all your money accessable

Welcome to the bigest Casino in the world
___
Halal and guilt feeling free

Quote: Welcome to the bigest Casino in the world

ياسر طيفور يا بركة كيفك؟

قلت لي بدل فكرة الإحتمالات عملتها قمار عديييل..

في السودان دة كل شيء وارد..و الناس بتحب الكاش...شيك لأ..

.

.

أيمن دياب ياخي حبابك آلاف..إنت عارف أنا مبسوط جدآ من ظهور تجارب أخرى، دة بيؤكـّـد حقيقية ما نحن بصدده..و دي يا أيمن الحياة..فيها النجاح و فيها الفشل..و كل تجربه، كما تقدم، لها ظروف تختلف..

Quote: عشان كده مافي زول برجع ياجنابو.. إلا للشديد القوي.. يفقد شغلو مثلاً.. أو ظروف أسرية قاهرة جداً تفرض عليهو يرجع السودان.. وغير كده الله أعلم يكون في عودة واستقرار في السودان..

الجملة الأخيرة دي ما صاح..ع شان كدة أنا عملت ليك خط تحت الجزء العندي عليهو تحفـّـظ
في ناس كتيرين جابهم عقد عمل أفضل
و في ناس جو عطلات و ما رجعوا
و في ناس ما اتوفـّـقت هناك و جو البلد دي مطرودين و نجحوا جدآ
ع شان كدة التعميم ما دقيق..كدي راجع النقطة دي تاني

Quote: باختصار شديد ياجنابك.. الساعة البيولوجية للمغتربين مبرمجة على سيستم معين.. في ناس استمر معاهم السيستم ده حوالي عشرين سنة.. ومن الصعب إعادة البرمجة على نظام فيهو فوضى وعدم انضباط..

ناس العشرين سنة ديل هم الفئة المستهدفة بالبوســت..
بالمصري كدة سارقاهم السكينة..
و أرجع يا أيمن لقرارات حياتك الأساسية..بتلقى الخيار السهل داااائمآ أقرب للخطأ..و القرار الصعب الفيهو مجهود هو الصاح..يعني أنا و إنتا في فصل دراسي واحد..إنت تسهر تقرا..و أنا أنوووووم و أشخر..معقول نتائجنا تكون زي بعض؟؟..النوم قرار سهل..لا تضحية فيه..علي أنا يقع وباله فيما تنعم أنت بالتقدير الممتاز لأنك ضحيت بساعتي نوم و أجهدت نفسك..الجماعة الحابين السيستم ديل ح يفضلوا برة لوقت طويل..لأنو الوتيرة اللي ماشة بيها خطى الإصلاح في السودان ضعيفة و عشوائية و بطيئة..لكنها (ماشة) على أقل تقدير..

Quote: زي النور ده كتل فينا كل حاجة وكل أمل للرجوع والاستقرار..

النور تجربتو مريرة
و لو رجعت لمدخل البوســت أنا قلت إنو الإستثمار مزالقو كثيرة
أنا بضمن ليك راتبي دة يوم ستة و عشرين بينزل في بنك الخرطوم إن شاء الله..لكن ناس البيزنيس و الضرائب و الموظفين بتاعين الإستثمار ديل ما ليهم ضمان و أنا ماااا عندي معرفة بي شغلهم..

أتمنى إنو تجربة النور ما تحبطك..أدرس الموضوع بزاوية مختلفة

دة البلد ياخ

لذيذ و طاعم

.

.

طيب يا الحبايب..نستأذن الضيوف الأعزاء في تكملة ردّ التعليم و نرجع بعدو للردود التفصيلية..مع تقديري الأكـيد و محبـّـتي للجميع..

**التعليم بتلقى فيهو غير حكاية موقع المدرسـة وين... (ألجوباك) بتاع إنو المدرسة فيها ناس أولى إبتدائي، خمسة سنة، بيقروا مع ناس ثامنة، و هم بالغين غير راشدين..المراقبة في المدرسة لا تشبه بأي حال ما تعودنا عليه في الغربة..ع شان كدة ولدك المعاهو قريشات للبيبسي و البيرغر ممكن يتجلد مرتين تلاتة لو ما تابعت متابعة دقيقة مع المدرسة و لو ما فتحت معاهو خط بتاع ونسة صريحة يحكي فيها مشاكل المدرسة بوضوح كبير...و بصراحة ناس المدرسة لو شعروا إنك متابع ولدك بيهتموا بيهو أكتر...و برضو لأنو ناس شرطة المجتمع و تلفون 9696 بيحكوا لينا عن المجتمع السوداني (الفاضل) حكاوي تشيب لها الولدان..

** ناس الثانوي/الجامعة عندهم حكاوي أكثر خطورة و هي نوع الأصحاب في السودان..و تاني بنرجع لفكرة إنو الولد المعاهو قروش هدف للشلة..و ممكن جدآ يكتسب مظاهر سلوكية جديدة في ظل غفلتك عن متابعة الجرعة بتاعة الشارع...القصة بتاعة المخدرات محدودة الخطر، لكنها موجووووودة،..الشيشة و التفحيط بالعربات هي الأكثر إنتشارآ بين أولاد المغتربين..طبعآ الشيشة للبنات بتقود طوالي للزواج العرفي و الجنس أو القداديم المجانية و الجماعة هنا بتكلمو عن كافتريات يتم تبادل القبلات في سلالمها..و أن عمالها يراقبون القادم لتنبيه (العملاء)!!

** الجامعات طبعآ مصيبة من مصائب السودان!! بعضها بيدرّس بالإنكليزية و بتضمن خريج قادر على مواجهة معاينات باللغة ذاتها..لكن ناس جامعات شنو و منو ديك مافي زول يضيع فيها وكت..لأنو قبل يومين زارتنا خواجية لمناسبة في البيت، زوجة صديق سوداني، و لاحظنا في الونسة أن عدد مقدّر من بناتنا (الخريجات) إنسحبوا خجلآ و جهلآ..فيما تحدّث معها ناس كلية نصر الدين و مأمون حمـّـيدة و كدة..يبقى الجامعات الكانت فرندات فطور لحدي قريبات دي ما تدخلوا فيها أولادكم..

دي جرعة توضيحية عن التعليم..ع شان ننتقل لمحور آخر...

.

الســواقة في الخرطوم..و دي بتنقسم لمصيبتين..السواقين..و ناس الحركة..


* بتاع الحركة يساهم في العرقلة بنسبة عشرة في المية..تقريبآ

كيف؟؟..

الحملات بتاعة المرور..و التوقيف المفاجيء للأهداف المتحركة يؤدي لعرقلة المرور..طبعآ الشارع ضيـّق بالأساس..و هو عاوز يوقـّـف المخالفين، ع شان يغرّمهم، ح يوقفهم ويييين؟؟...في باقي الشارع الإنت متشاكل فيهو مع ناس كثيرين..و لو وقفوا ليهم عشر عربات تأكـّـد إنو ح تحصل خنقة في المرور بطـّـالة..أما لو كنت أنت الضحية و بدأ معاك السخف بتاع لابس شبشب و أطفي النور الورا و ولـّـع النور الطويل..فراح تطلع منو زهجااااان و سيؤثر على أدائك في السواقة و العمل و ربما البيت لو كنت (قوة ضاربة) و لا عزاء للقوات المسالمة..
ناس الحركة ما بيعملوا توعية..بيعملوا كشـّــة!!..و عرفت إنو عندهم نسبة من القروش..ع شان كدة بتلاحظ من كلامو معاك تعبيرات هجومية و تجريمية..و لااااااازم تدفع..زي ناس الضرائب عندهم ربط مقدّر..هذا غير القصـّـة التي كتبها هنا صديقنا عبدالله عقيد عن (بعض) رجال المرور يطلبون الرشوة قبل أن تعمل مخالفة، زي الضربات الإستباقية بتاعة جورج بوش، قال بيقولوا لناس الأمجاد (جيب رُقـعـة) يعني يومنا مقدود و عاوزين حق الفطور..و الرقعة لا تشبه الغرامة لأن الرقعة خمسة جنيه و الغرامة ثلاثين ..لكن الراقع يجد تعاملآ لطيفآ فيما يلقى الرافض للترقيع تعاملآ عدوانيآ يؤدي في النهاية لوقوعه في شرك الغرامة بطريقة عشان تآمـن...

* السواقين بتاعين الحافلات عمومآ و الهايس خصوصآ..يساهمون في العرقلة بنسبة عشرة في المية..تقريبآ

أيوااا ديل أنا عندي معاهم مشاكل كتييييرة جدآ..

أولآ بيقيفوا في التقاطعات مباشرة..و هي أكثر المناطق زحمة بالعربات و الناس..و طبعآ الخرطوم لم يعد فيها (موقف بص)..رحم الله أبو رجيلة و نظامو..البيحصل إنو بتاع الحافلة بيقيف فجأة أول ما يلوّح ليهو أي راكب في الأرض..و بيقيف بذات المفاجأة لو عندو حـدّ نازل..إنت لو سايق وراهو يبقى إنت و حرفنتك في سرعة الوقوف..لأنو غالبآ بيقيف في شارع الزلط ع شان يرجع تاني بدون ما يحتاج لي إشارة لدخول الشارع أو يتأخر عن زملانو الجاريين معاهو في الشارع..
أضف لكل ذلك أن بتاع الهايس سرييييييييع لدرجة مرعبة و قد أعجبني جدآ كاريكاتير يصوّر الهايس و هي خارجة من ماسورة بندقية في إشارة لمـّـاحة لسرعتها الفائقة و الخطرة، بل القاتلة، في نفس الوقــت..لا علاج مع بتاع الهايس سوى أن تترك له الطريق إلى حين أن يصطدم بحدّ غيرك!!

* السائق المستهتر، و كثير مـّـا هم، يساهم في العرقلة بنسبة عشرة في المية..تقريبآ

طبعآ عاااادي تلقى زول سايق في الإتجاه الخطأ!! الشارع مقسوم لاتجاهين..و إنت ماشي أو سايق في الإتجاه الصاح تلقى واحد (قالب الشارع)..و هي ممارسة في منتهى الخطورة و الفوضوية ..لكنه الكسل الذي نهرب من وصمنا به..الواحد يكون ما عاوز يمشي نهاية الشارع و يلف في الفتحة أو الإشارة بتاعة المرور أو الـ U turn..

* أنوار الزينون..أو الأضواء الكاشفة..خطرة جدآ..لـًـمـُـن يولـّـعها ليك كدة..قلاش بس..و تعميك أو تكاد..قلة ذوق..

* بتاع الكارو..بالتشارك مع المشاة يساهمون في العرقلة بنسبة عشرة في المية..تقريبآ

طبعآ ديل لا حل سوى أن تفسح لهم الطريق أو تتخطاهم لو الشارع فاضي..أعني لا مجال لأن تنتظره يتصرف صاح..لأن معظمهم سنة أولى خرطوم و لا معرفة لهم بـ(تقدير سرعة اللحاق)..فيقوم يقدل لمن يشوفك جايي من هناك و يتفاجأ بوصولك..ع شان كدة لمـّـا تشوف (كارو حمار) لا مؤاخذة..خـد نفس و هدّيء السرعة..هو راح يقطع الشارع قدامك..و ممكن يلف فيهو يقلبو و تتفاجأ بي إنو جايي عليك..المهم إنت تتفاداهو لأنو ما عندو حماية و أي حادث معاهو بيكسر رقبتو لأنو هي التصادم بتاعو..

* بتاعين العربات الكبيرة (الشاحنات) يساهمون في العرقلة بنسبة عشرة في المية..تقريبآ

ديل (سـغيلين) جدآ..و بياخدوا الشارع بي ضراعاتهم..و في شارع مدني تحديدآ أنا شفتهم في التخطّـي ..الناس بتطلع تفـك ليهم الشارع..بس ع شان ما يموتو!! و التخطي طبعآ لأنو الشارع إتجاهين في مسارين..يكون سايق فيهو بسرعة تسعين أو ميـّـة كيلو..و يلقى ليهو لوري أو بوكسي مواصلات لقرى الزلط و هو يقود بسرعة أربعين خمسين!!..يقوم يتخطاهو بي غضب دون حساب مسافة الناس أصحاب المسار..يضطرهم للنزول في التراب!! بس ع شان عربيتو كبيرة..
أنا نزلت منهم كتييير..

* بتاع الركـشـة، وهم السبب الوحيد الذي "قد" يدفعني للقيام بقلب نظام الحكم بالخرطوم، يساهم في العرقلة بنسبة
خمسين في المية..على أقل تقدير

الركشة أول مشاكلها إنو معظم السواقين أطفال!! يعني ناس خمسطاشر لي عشرين ديل الفئة الغالبة أو الظالمة..طبعآ دة لا عندو رخصة لا وصل تمرين و لا غيرو..واحد ضرب عربيتي قدام بيتي..و هي واقفة و أنا بفتح في الباب ع شان أدخلها..جيتو طالع لقيتو بيبكي..أها دة تعمل ليهو شنو..يعني أكبر من بشير ولدي بي شوية كدة..أربعطاشر خمسطاشر..حاجة زي دي..و أول حاجة قالها لي (أبوي ح يشاكلني)!!..أها ديل كتااااار جدآ..
و نسبة مقدّرة من الأجانب، تحديدآ الحبش و الأفارقة البتشابهوا ديلاك..بلا ترخيص و لا أوراق إقامة..الأمن في السودان مشغول بالمعارضين و تارك هؤلاء هم و ذوقهم معانا!!
يقلب الشارع
يقطع إشارة حمرا
يقوم بتوزيع الخمور المحلية
يستخدم في السرقات
(توصيل البنات) للإستعمال غير اللائق
بتاع الركشة ممكن يخلق مسار غير قانوني في النص ..و يقعد يتراجف..أي (مداخلة) معاهو ممكن يعمل حادث..و ناس المرور قالوا في جهاز الإتصال لمن يجي خبر حادث بيسألو: ركشــة و شــنو؟؟!!
* المصيبة الأكبر في الركشة ريحة العادم، لأنهم بيخلطوا،قصدآ، الزيت و البنزين..و صوت العادم و الإزعاج مما جميعو...

تفاصيل أوفى حسب الردود..

.

السلام عليكم
الطيب الطيب
إنقطاع عن المشاركة بالمنبر قارب السنة
ومتابعة شحيحة كادت أن تقود لإنقطاع أيضاً
وقرار بالعودة رأينا تدشينة بأسمن وأثمن مافي المنبر
ولم يطل بحثنا
فتجاهل الزبد الذي يطفح به وجه المنبر سيذهب بك مباشرة نحو ما ينفع الناس من غير عناء كثير
..........
أخي الطيب الطيب
مشكلة صعوبة التجانس بين من يسكنون السودان "الشقيق" وبين المترددين والناوين والزائرين في اعتقادي ترجع لسببين
كلاهما بسبب اختلاف المقاييس
أولاهما والذي أسلفت الإشارة اليه هو اختلاف مقاييس ومفاهيم ومسلمات (وربما أخلاق) القادم من الخارج مع ما هو سائد بالسودان
والذي اختصرتم تسميته بالسيستم المختلف .. ولن أطيل فيه
ولكن المشكلة الأخرى الذي يجب أن ننتبه لها جيداً هي اختلاف المقاييس المالية
ويمكن أن نختصرها بمعادلة
كسب المال في بلاد الدنيا كلها (خليج أو أمريكا أو غيرها) صعب جداً
فهو غالباً يعتمد على مصدر ثابت (ماهية) لا يزيد إلا نادرا (أوفرتايم) لذا لا سبيل لزيادة الرصيد البنكي إلا بتقليل النفقات وبند الصرف بكل الطرق الممكنة كالتقتير على النفس والجري خلف التخفيضات ...الخ ويساعدهم على ذلك أن للمال قيمته .. فبقليل من المال يمكنك شراء ما تريد كما إن الأسعار تكاد أن تكون ثابتة .
إذن الحصول على المال صعب يقابله قيمة عظيمة للمال
أما في السودان
الحصول على المال سهل جداً لمن يتحكمون في أسعار الأشياء ..يقابله سهولة فائقة في صرفها وبدون قيمة تذكر
ويحضرني مثال :
ذات مرة ذهبنا لأحد السماسرة لشراء قطعة أرض
طالب أولاً ب165 مليون ثمناً لها
بقليل من الونسة ولأن أخوه (أخو السمسار) طلع جار قريبي الكان بيفاوض فيه
طلب لنا شاي وفات لينا 60 مليون
أي والله ...60 مليون بس عشان أخوه طلع جار قريبي
أها باقيلك زي ده كسبان كم ؟
وتتوقع زول زي ده لما يمشي يشتري حا يقعد يحسبها زي المغترب داك
إذن باختصار
المعادلتين..
مغتربين يكسبوا قروشم بصعوبة ولكنها في مكانها عندها قيمة وبتكفيهم
سودانيين يكسبوا قروشم بسهولة وبنفس السهولة يصرفوها ولا يهمهم
وتختل المعادلة فعلا
لما زولنا البيكسب القروش بصعوبة داك وأعني به الزول الجايي من بره
يجي السودان ويكبها بسهولة ويقعد يحسب فيها ويحولها لريالات ودولارات.


..........

.
الزووووووول ياخ
و الله ألف أهلآ و مرحبا
كيفك يا ملك (القتادة)..لسع أنا متذكر مقلبك لخالد الحاج
كيف أمورك...

Quote: إنقطاع عن المشاركة بالمنبر قارب السنة ومتابعة شحيحة كادت أن تقود لإنقطاع أيضاً وقرار بالعودة رأينا تدشينة بأسمن وأثمن مافي المنبر ولم يطل بحثنا فتجاهل الزبد الذي يطفح به وجه المنبر سيذهب بك مباشرة نحو ما ينفع الناس من غير عناء كثير

ياخي شكرآ ليك و كلك ذوق..قبيل نزار حسين برضو قال بوســت الموســم..أنا و الله شاكر ليكم جدآ
و بالنســبة لكلامك عن القروش البيكسبوها في السودان بسهولة
يا مان؟؟..الكلام دة وين؟؟
إنت بتتكلم عن السماسرة بس..البلد دي فيها ناس مرتباتها حوالي مائة دولار، بكل أسف، و بيتعبوا جدآ ع شان يطلـّـعوها
السمسار بتاعك دة أمثاله كثر
لكنهم ليسوا أغلبية، بأي حال، وسط هذا الشعب المغلوب.

Quote: إذن الحصول على المال صعب يقابله قيمة عظيمة للمال

الحقيقة الأسعار في السودان ما واقعية
و دة لأنو لا توجد منافســة
يعني أنا مثلآ نزلت في فندق هيلتون ميامي مرتين..ليس لأني ثري..لكن لأني أتابع إعلانات تخفيضاته في الصحف اليومية.. و مواسم بواره و بنزل يوم الإثنين و الثلاثاء و الأربعاء مثلآ فبيكون فيه غرف كثيرة فاضية..هم بيأجروها بأسعار زهيدة ع شان ما تفضل فاضية..نحن في السودان فهم زي دة ما عندنا..

لكن بيجي

شوية شوية يا الزوول

يا غتيت

ياخ مرحب بيك تاني


.

العريس منوت

حباااابك و الله

منوّر البوســت

Quote: يا بنَ مايكي الأثيري الآسر ، سلام . متابع أنا هذا البوست المدر لكامل " نوستلجيا " العودة للوطن ! واصل الكيفية ، والمضبات !! وهل لنا من مساحةٍ " مايكية " في هذا الاستقرار ؟

شكرآ لرزيم حنينك يا رقيق

و المضبات ستترى

أما مساحات المايك فكثير من الإذاعات تتشرف بانضمامكم

إنت لاقيينك وين؟

تقديري العميق

.

الطيب، يا صديقي،
مشتاقين والله، ياخي،
لقاءنا في جوبا لم يشف غليلي.

أتابعك باهتمام منذ بداية الخيط. شكراً على جهدك المقدر في إهدائنا تجربتك ورؤيتك البصيرة.

أود المشاركة، ولكن رأيي في الوقت الحاضر "تلفان!"
أرغب في العودة للسودان "الشقيق"....ولـــــــــــــــــــكن!
لاحظت أنك لم تتطرق لموضوع المقررات في المدارس. بالإضافة إلى المقررات الأكاديمية، أطفالنا هنا يتعلمون فنون الموسيقى والمسرح، وتنمية الحس الناقد، وقيم الأمانة والصدق والتطوع والعطاء وحقوق المواطنة، وغير ذلك من القيم. أرجو أن تحدثنا عن هذا الجانب، بخاصة في المدارس الخاصة، مع الاستدلال، إن أمكن، بتجربتكم مع بشير، الطيب إبن الطيبّ.

حيرتنا، يا خوي! الباب دا كلو ما نقول نسدو، الموضوع ينقلب لضدو!

السد السد، صعب بالجد!

.
أخي في المحبـّـة و بسط الودّ الشـامل ..الدكتور الصادق جدآ حيدر بدوي

و الله ليك وحشــة..و لي هواتفنا المطوّلة في الولايات المتحدة..و لأحاديثنا المتعمـّـقة أيام جوبا الجميلة، و قد حال عليها الحول، و لم ندفع زكاتها ببوستات تكفي التجربة الجميلة و روعة الإنشاد في ضريح قرنق..وسط دهشة الحرس و أصحاب التفسير الأحادي للدين السمح..

Quote: لاحظت أنك لم تتطرق لموضوع المقررات في المدارس. بالإضافة إلى المقررات الأكاديمية، أطفالنا هنا يتعلمون فنون الموسيقى والمسرح، وتنمية الحس الناقد، وقيم الأمانة والصدق والتطوع والعطاء وحقوق المواطنة، وغير ذلك من القيم. أرجو أن تحدثنا عن هذا الجانب، بخاصة في المدارس الخاصة، مع الاستدلال، إن أمكن، بتجربتكم مع بشير، الطيب إبن الطيبّ.

المقررات غاية في الضعف، حقيقة، و هنا يتجلـّـى دور الأسرة و المكتبة المنزلية و الـQuality time اللي مفروض نمضيه مع العيال..هناك مراكز ثقافية في منتهى الروعة..و خدمات الإنترنت بالبيت يمكن أن تغطـّـي، مع الإشراف، جزء كبير من ضعف المقرّر..
الموسيقى و المسرح و الرياضة موجودة بكثرة في المدارس الخاصـّـة، و قد رأيت نماذج أعجبتني في الإحتفالات، لكن لا وجود لما تحته خــط، بصراحة، لأنها أنماط تفكير غير منسجمة مع واضعي المنهج الحالي و لا القبالو في السودان و إفريقيا و الوطـن العربي عمومآ، المقارنة طبعآ معدومة، و قد تذكـّـرت حـصـّـة حضرتها مع بشير ولدي في ميامي في مدرسـة عامة، ليست الأفضل في البلد، كان عنوان الحصـّـة Critical thinking و قد كان الشافع في منتصف تانية ابتدائي!!يعني بتاع سبع سنين..أنا بالفلاتي كدة (فهمت حاجة)..و قلت لي ولدي، أنا والله المفردة بتاعة Critical في حـدّ ذاتها لاقتني في الجامعة..و إنت الله يوفقك..
طبعآ يا صديقي لا بـُـدّ من التضحية بأشياء لكي ننال غيرها..
سيفقد الولد ميزات كثيرة، لا شـك، لكن بيطلع سوداني..
و في أمريكا سينال الطفل تعليمآ لائقآ "مع كامل الباقة التعليمية" و لا يمكن أن يكون سوداني..ربما كان في مضمار الإنسانية أسبق من كثير من السودانيين، أنا لستُ مخدوعآ بأنموذج (تقول لي منو و تقول لي شنو) ..فقط أعقد المقارنة بين من هو سوداني و من هو غير سوداني، و ليس بالضرورة مقارنة بين ما هو صحيح و ما هو خطأ...

تقديري العميق ..و بيننا إتصال ان شاء الله..

.

الأخ الـحـبـيـب الـحـبوب،
الطـيب بشـيـر،
تـحـياتي ومـودتـي،

*** - البوسـت رائع.... رغـم انه لا يـخـصـنـي من قريب او بعيـد.... لاننا من ناس قبيلة (مامفكرين نرجع للسودان)، وهـي قبيلة قوامـها نحـو 4 مليون سوداني بالخارج لاعنـدهم في السودان بيت او راكوبة او حتـي ضل شـجـرة نقعـد فيه!!!

*** - مـررت للتحيـة والـمجاملة،

***- بالمـناسـبة انا لي 24 سـنة مازرت السودان ولاحـتـي ترانزيت ولاعتـبت افريقيا!!! ،قـمت سألت واحـد من ناس اهلي داخل السودان وقلت له تنصـحـني بشنو لو زرت السودان?،.... كان رده... " بس تعاين الناس بتعمل في شنو وماتعلق باي تعليق او كلام وتبقي ساكت صامي خشـمك لحد ماترجع لبلدك التاني!!".

*** - مـما زاد من اقتناعـي باستحالة العودة للسودان .............................................. البوست بتاعـك!!

*** - لك مودتي.

سيد البوست.....بوست رائع


لكن شكرا بكري الصائغ

Quote: البوسـت رائع.... رغـم انه لا يـخـصـنـي من قريب او بعيـد.... لاننا من ناس قبيلة (مامفكرين نرجع للسودان)، وهـي قبيلة قوامـها نحـو 4 مليون سوداني بالخارج لاعنـدهم في السودان بيت او راكوبة او حتـي ضل شـجـرة نقعـد فيه!!!

فقد عبرت بالنيابة عن الاربعه مليون سوداني خير تعبير

Quote: هذا جزء من الوطن فقدناه و إلى الأبد..الوطــن الرسمي..و هو الآن مختطف..لم يطالبوا بفدية لإرجاعه و لم يفاوضونا حول مطالبهم .. فقط حبسوه عنـّـا و حبسوناعنه..رغم العودة..لكن وطننا يـُـشعرنا بالغربة كثيرآ جدآ..و العزاء أن الوطـن في بهائه الإجتماعي لم ينقص جماله مثقال حبـّـة من خردل..ياهو السودان..يملؤنا حدّ الإكتفاء من كل ما فقدناه.. السودان (الشقيق) يا لنا..(الشقيق) جدآ

لللبنانين مثل لم اشعر بوطاته إلا الأن:الفقر في الوطن غربة و الغنى في الغربة وطن. ومعناه اشمل من الحالة المادية.

الله يسامحك يا طيب بشير، ترورقت عيناني

و متابعك، بالفؤاد مرمى الوطن.

و تحاياي عبرك للوطن

الطيب بشير
تحياتي
والله البوست ده وقع لي في جرح


عموما سوف التقيك في يوليو القادم

قبل ده ارسل التلفون فورا


انا حزمت شنطي والباقي علي الله



فرحات

طبعا بتكون قدلت في الدروشاب

عليك الله تحياتي ليهم كلهم حاصه بت الشيخ واولادها

الطيب البشير
سلامات
بوستك دا شبعان لامن عمل ليهو جضوم.
اذا كان العمل الخاص اخر شى ممكن الواحد يفكر فيهو
على حسب رايك.
ما اظن كل الناس عندهم المؤهلات للعمل فى وظائف
تكفل للواحد واسرته العيش الكريم.
والاعمال الخاصة مع عدم الضمانات الموجوده
فى البلد بتبقى المساله معقده شويه لى البعض.
اتمنى انك توضح بعض الاشياء عن العلاج
ومدى الاهتمام والرعايه فى المجال الطبى
وزى ما انت عارف فى كتير من المشاكل
وعدم رضا للعلاج فى البلد

الاخ الطيب

اشكرك كتير علي فتح هزا البوست
ومداخلتي ستكون في مجال التعليم
اود ان اقول ما كل مدرسة غاية معناها انها
ممتازة ولايغرك المدارس الفندقية في السودان
فهناك الكثير من المدارس الخاصه الممتازة وباسعار في متناول اليد
تتراوح مابين 750 الي 1000 دولار في العام وبالتقسيط
كمان , والاستطاف الزي يعمل بها من خيرة الكوادر التعليمية
في البلد وعلي سبيل المثال لا الحصر مدارس النٌٌُخبة في الخرطوم

بكل اسف حتي التعليم في السودان اصبح فيه فشخرة في البلد
فالناس البتودي ابناءها للمدارس الغالية فيهم كتير من اجل
الفشخرة وده ما تقليل للمدارس دي ولكن طالما هي غالية فهناك كتير من الخيارات الفي متناول اليد

مشكلة التعليم حاليا في السودان هي المقررات والمناهج التي تدرس , فهي بكل صراحة
مقررات ضعيفة جدا وبها حشو كتير جدا والبركة في ده لناس وزارة التربية وجل المعلمين يعلمون زلك
ولكن المدارس لا تستطيع الخروج من مقرر الوزارة في الاخير.

اخوي الطيب هناك مفهوم عندنا في السودان " انه الشئ الغالي دائما سمح" وده ماصاح في بلدنا.

بقية النقاط الاتحدثت عنها , تظل عندي تجربة شخصية , ولا يمكن تعميمها بمعني
انه ممكن يكون هناك شخص بنفس مؤهلاتك ولا يجد ما وجدته انت من وظيفة ووضع.
نصحيتي لكل مغترب وقبل التفكير في ارجوع للسودان ان تكون حريصا علي بناء منزل
فازا لم تستطع فعله فلا تفكر ابدا في الرجوع , فستكون الحياة فعلا صعبة ,
فستظر للايجار سواء كان شقة او منزل وهو مبلغ مرهق ماديا

اماالمعيشه فهي علي الله وكل شخص وتوفيقه واجتهاده.

تقديري لك

.

مرحب أخي بخاف و أنا سعيد بالمداخلة الثالثة لمعارض للعودة
الآراء غير المتفقة تثري النقاش و تصحـّـح الفكرة، لذا و لغير ذا هي محل ترحيب أكيد دائمآ

Quote: ما كل مدرسة غاية معناها انها ممتازة ولايغرك المدارس الفندقية في السودان فهناك الكثير من المدارس الخاصه الممتازة وباسعار في متناول اليد تتراوح مابين 750 الي 1000 دولار في العام وبالتقسيط

لو راجعت كلامي أنا قلت إنو الواحد لازم يعمل بحث.
و أجيب ليك كلامي..

Quote: الخيارات بتاعة المدارس الخاصة متاحة..و ما غالية..نسبيآ طبعآ لازم تعمل بحث قبل ما تسجل الشافع..بعض المدارس دي شكلو جميل و مستواهو تعبان و على العكس بعضها في مظهر متواضع و بها إستاف كارب..

و قلت تحديدآ القسم العربي بيوفر ليك ألف دولار من ألفين، يعني بيطلع بألف دولار تمامآ زي ما إنت اتفضلت هنا..و ممكن بمزيد من البحث الناس تلقى مدارس أفضل و (أشطر)..المجهود قبل التسجيل مهم جدآ...

Quote: نصحيتي لكل مغترب وقبل التفكير في ارجوع للسودان ان تكون حريصا علي بناء منزل فازا لم تستطع فعله فلا تفكر ابدا في الرجوع , فستكون الحياة فعلا صعبة

البيت مهم..
لكن أنا بختلف معاك في حاجة..
ما هو المغترب دة هنا مستأجر..و هناك مستأجر..يعني لو بياخد نفس راتبو في السودان برضو كسبان ..
و إنت قاعد في السودان، بي شغل كويس و مستقر، بنيان البيت بيبقى أسهل من لما تكون طاشي برة الشبكة..

شكرآ لإثرائك البوســت

.

.

أخي أحمد خـدر
مرحبتين حبابك

Quote: اذا كان العمل الخاص اخر شى ممكن الواحد يفكر فيهو على حسب رايك. ما اظن كل الناس عندهم المؤهلات للعمل فى وظائف تكفل للواحد واسرته العيش الكريم.

لديك سؤال عن العمل الخاص و آخر عن الصحة و العلاج..سنؤجل الأخير قليلآ لأنه محور بذاته و في الترتيب الكتابة عنه بعد قليل..لكن لا بأس من الإستطراد في العمل الخاص و لماذا ورد في بداية البوســت تحذيري من الإنخراط فيه..
طيب يا أحمد..
الدولة السودانية الآن ليس بها نظام بالمعنى المعروف!! يعني مجموعة الموظفين بتوع الإستثمار ليس لديهم شيء واضح..يقولوا ليك إستيراد الشاحنات مسموح به بدون جمارك..تجيب شاحنات كتاااار و تجي..تلقى واحد يقول ليك 0(لأ)..و هذه الـ لأ..لا رااااادّ لها..زي القدر..يفصح بعد قوله لأ و يقول إنو هم (قاصدين) بالشاحنة الرأس فقط و عليك أن تدفع للمقطورة الشيء الفلاني..و هو يفوق قيمة الجمارك العادية..
دة مقلب وااااحد قابل واحد صاحبنا راجع من أمريكا..
طبعآ المقلب التاني ناس الضرائب و الزكاة و الولاية و المحافظة و المحلية و دعم الجريح و الشهيد و أم أيمن و ما إليه..كمية من الدمغات ما أنزل الله بها من سلطان..و دة في البداية بيرهق رأس المال و بيخلـّـي الربح صعب!! بعدين حسـب سمعنا من المغامرين المسألة ما فيها سيستم..يعني الضرائب معروفة في أمريكا بين ستة و سبعة في المية و بتختلف من ولاية للتانية و لا توجد ضرائب باهظة إلا على التبغ و الخمور..نحن بقى عندنا حاجة إسمها (الربط المقدر)..و هو أن المسؤول يصحى من الصباح و يشوف ميزانيتو فارقة كم و يوزعها على الأسواق و القطاعات المنتجة و خلاث..يطلع نصيبك كم..الله أعلم..
أنا بدفع للحيكومة ضريبة دخل شخصي أكثر من خمسة و عشرين بالمائة من راتبي!! في ظلم يا اخوانـّـا أكثر من كدة؟؟!!
المزالق بتاعة البيزنيس الخاص في إنو بتاع الضرائب ممكن يقفل ليك المحل..بتاع المحلية ممكن يقفل ليك المحل..بتاع الأمن ممكن يقفل ليك المحل..بتاع اللجنة الشعبية ممكن يحرك واحد من ديل و برضو يقفل ليك المحل..أها البتاعين الكتاااااار ديل إنتا ما بتضمن رضاهم كلهم..و دة بلد ما شي بالــlike and dislike يبقى الأفضل زي ما ابتعدناعن وظائف الحكومة نبتعد عن الإستثمار قدر الإمكان..و من أضطرّ غير باغ و لاعاد فلا إثم عليه.

تقديري

.

.

مرحبتين يا فرحات
و الله حبابك في البلد
على الأقـل قـدلة الدروشــاب دي نســعـد بيها مع بعض

Quote: انا حزمت شنطي والباقي علي الله

بداية موفقة و الحمد لله
أنا و الله جيت زي جيتك دي
و الحمد لله البلد رحـّـبت بينا و ان شاء الله ترحـب بيك

نشوفك هنا يا مان

.

.

العزيز ثروت سوار الدهب
مرحب بيك

Quote: الله يسامحك يا طيب بشير، ترورقت عيناني

تبكي بس ..عين قطرة و عين مـس..

أو كما قال الشباب في زمان مضى

.

.
أهلين ياســر عبدالقادر

و ألف شكر لزيارتك و رأيك

Quote: سيد البوست.....بوست رائع لكن شكرا بكري الصائغ

يبدو أن كلام الأخ بكري الصايغ وقع ليك في جرح

إنتو يا الأربعة مليون، إخوتي في الغربة، و سنعمل على ضـمـّـكم بالحق للسودان الشقيق قريبآ إن شاء الله، و لمن إختار منكم دار البعد و الغربة..نقول..الما بتجيبو المحـبـّـة..بتجيبو الضـبــّــة..

.

.
الأخ الحبيب بكري الصايغ
مرحب بيك و شكرآ ليك
أنا مبسـوط و شاكر لإنو البوســت أعجبك
و نتمنى أن يعود كل الأربعة ملايين اللي برة

Quote: بالمـناسـبة انا لي 24 سـنة مازرت السودان ولاحـتـي ترانزيت ولاعتـبت افريقيا!!! ،قـمت سألت واحـد من ناس اهلي داخل السودان وقلت له تنصـحـني بشنو لو زرت السودان?،.... كان رده... " بس تعاين الناس بتعمل في شنو وماتعلق باي تعليق او كلام وتبقي ساكت صامي خشـمك لحد ماترجع لبلدك التاني!!".

كلام قريبك صاح
لمـّـا ترجع بالسلامة، و ترجع أيامنا الجميلة، لا يمكنك أن تفهم الحاصل لفترة طوييييلة
سيضحك الناس في تعليقات لــن تبدو لك طرافتها..و سيتصرّفون بخلاف ما تفعل
المجتمعات يا صديقي لا تنتظر الغائب
حتى اللغة تتطوّر..و سيكون حالك مثل الذي عاد من نيويورك بعد ثلاثين سنة غربة و قال لبنت في الشارع:
(ســنة يا أنا)!!

محبـّـتي يا بكري

.

الطيب الحبيب ياااااااخ

كدا كدا الناس جايين يابا..

قلت لي :

Quote: Accessable

أقعد سنتين تاني...لو ما كتبتها

aksisople

تضحك علي أنا... مع إنه الصحيح

Accessible

غايتو لو شافها بشير ياهو القايل ليك:

Dad, let's GO HOME

أنا غايتو كدي كدي إن شاء الله في الإجازة دي بالقوة حا أقابلك

اعتباراً من 20 يوليو والأيام التالية.. والزارعها الله في الحجر "تبتِّق"..



محبتي التي تعرف...وتحياتي لك بلا انقطاع تغشاك وللمعاك هنا وهناااااااك في الضهاري..

.

يا محمود صباحاااااتك ياخ
و الله ليك وحشـة
قلت لي السودان هو سبب الخطأ في الإسبيلينق...كضبآ كاضـب..my bad..و هذه من ألطف عبارات السود في أمريكا..تعني (غلطان أنا) أو إعتذار غير مباشر..و الغريبة، و الجميلة، يا محمود إنو بشير أكثرنا حماسآ للسودان، و للضهاري بالذات!! و الله كل ما يتذكـّـر الحاجات السمحة في البلد داك بيقول لي نمشي زيارة بس..
أبقى تعال راجع..
و بعد نتشاوف ممكن نفكر في إغوائك بالبلد الحلوة دي..

محبة فوق محبتك تبراك..و الحق الأدبي محفوظ للراقية عالية عوض الكريم و لسيدنا عيسى ابن مريم

.

.
الصـحـّــة لجميع أفراد الأســرة..

طبعآ دة من أهم المحاور..

لكن بتقديري قبل ما تمشي المستشفى إنت محتاج للوقاية..و قد سبق أن تحدثنا عن أهمية موية الصحة و الناموسية في الوقاية من أشهر المشاكل، الملاريا و إضطرابات البطن، و نضيف لها أن الحرص على موية الصحة يشمل أن تكون صارمآ في تطبيق البرنامج و تتجنب كل (مصادفات) موية الزير/ الثلاجة/ الماسورة و التي تحدث كثيرآ، و سيكون الأمر محرجآ في البداية..زي لمن تكون معزوم في بيت واحد من الأهل أو الأصدقاء و ما يكونوا مجهزين موية صحة..بصراحة لازم يكون عندك موية صحة في العربية...أو تتحمل العطش..أو تشرب نص جغيمة و تنتظر الشاي..المهم ما تعمل فيها ظريف و تشرب طوالي..الثمن في النهاية غالي جدآ..جدآ..
و الأدهى و الأمـرّ هو موضوع الأطفال..ع شان كدة لازم تتعوّد تطلع من غيرهم لفترة طوييييلة..و بالنسبة لزيارة أقرب الناس حاول خليها، ما أمكن، بصحبة قوارير الموية اللعينة، أو الناس تشتريها من أقرب بقالة، لأنو الحرج اللي بتشعر بيهو أهون من السهر و الإستفراغ بتاع الشافع تلاتة صباحآ و أنا (والله) جرّبتهم الإتنين، الحرج و السهر مع بشير، و الأسهل الحرج...بس غفلنا منو شوية قام شرب من مزيرة بعد الدافوري، مع العيال، أها نحن ما نمنا اليوم داك..

** المفروض ناس الشغل يدفعوا ليك العلاج..لكن نقوم نعمل تنوير سريع..

** العلاج بينقسم لقسمين لا ثالث لهما..المستشفيات و التأمين الصحي و بطاقات العلاج بتاعة الموظفين بالسودان أو التكافل و الإنتظار و الصف الطويل و الطبيب العمومي الزهجااااان..و الإختصاصي اللي بتشوفو بعد مواعيد بتاعة شهرين تلاتة..

** القسم الثاني..العيادات المكلـّـفة، نوعآما، و الأطباء اللي بتتراوح عياداتهم بين عشرين دولار للنساء و الباطنية و كدة..لحدي خمسين دولار دكتور إبن عوف للأطفال..و ناس الأعصاب و المخ ممكن تعمل سبعين دولار بالراحة..الأشعة عشرين دولار..الرنين المغناطيسي كشف مكلـّـف جدآ بأكثر من مائة و عشرين دولار..ناس الأسنان و العيون في حدود الثلاثين دولار..و المقابلة التانية دائمآ حوالي نصف القيمة أو تزيد قليلآ..

** المستشفيات يا جماعة غير العيادات..لمن زول يرقد لعملية أو كدة التكلفة بتكون كبيرة..اليوم بتاع المستشفى بيختلف حسب نوع المستشفى و شهرتو و تخصصو..العملية عندها سعر براها و السرير، أو اليوم بتاع المتابعة، عندو سعر براهو..و الأسعار كلما تزيد بتظهر معاها خدمات إضافية..يعني لمن كان الوالد، ربنا يديهو الصحة و العافية، راقد في مستشفى فضيل..أنا إتصلت بالإستقبال و قلت ليهم يحوّلوني للغرفة رقم كذا..قالت لي معاي منو لو سمحت؟؟.. قمت هجت فيها و قلت ليها طالما أنا عارف رقم الغرفة واسم المريض مافي داعي تعرفي معاك منو..
أولآ يا جماعة البنية اعتذرت، و هذا جديد، و قالت لي:
بس لأنو حاج بشير دة قال عاوز ينوم و ما يصحـّـوهو إلا إذا اتصـل أولادو من أمريكا..
يبدو لي دة سببو الأساسي القروش اللي إنتا بتدفعها ع شان يعينوا بيها زول ظريف زي دة بدل الممرضات الغلااااااد و مسيخاااات الزمان ديك..
الأرقام بتاعة المستشفيات دي كلها ملايين، أي آلاف الدولارات، و هو حدث لا يتكرر لك شهريآ، لذا لا تجفل من الرقم، و طبعآ العلاج مكلف داخل و خارج السودان ..ع شان كدة كل الشركات و المنظمات التي أعرف..تتكفل بعلاج منسوبيها..

** نقطة هاااااامة ينبغي الصـدح بها..

و هي أن الفوضى قد تكلفك حياتك و حياة من تحب!!

قصة التخدير و عدم معرفتنا بيهو..الجرعات اللي بيدبلوها جهلآ..و ما إليه من سمات السبهللية و الإهمال لا زالت موجودة و لا يمكن لأحمق أن يتولى الدفاع عنها..في السودان و في أمريكا بيحصل الخطأ الطبي..بس الـمـُـساءلة بتختلف..الطبيب السوداني اللي استأصل الكلية السليمة و ترك البطالة قالوا سحبوا رخصتو.. لكن لم يحاسبوا أحدآ غيره..في أمريكا سمعت أن خطأ طبيآ أدى لإغلاق المستشفى بأسرها!!

** النقطة بتاعة الإهمال في الحقل الطبي ..لا يمكن أن أتساهل في الحديث عنها..

تابعوا، مع غيري، أبعادها...

تقديري..

.

يُعاد إلى الصفحة الأولى

أو

يُعاد قطار الطيب بشير إلى الورشة عطبرة

حتى يتم إجراء التعديلات اللازمة لجميع قمرات الركاب

ومقطورات العفش..ويكتب على جنبات القطار بخط عريض:

رحلتنا يا سيدي انقضت..لازم نعود..


قطاراً يسع الجميع...صاح مرات النفق مظلم وفيهو كتاحة وسخانة ألف..

لكن على قول صاحب قطار العودة: "طاااااااااعم ولذيذ"..


محمود العربي

الاخ الطيبب بشير

شوقنا بحر

ياخ انا اول مرة ارجع البلد

بعد عشرة سنين ما قدرت اقطع الزلط

الا قطعونى زى الشافع

لكن ناويين الرجعة

رايك شنو فى مشروع قسم شرطة خاص

ولا خليها نقطة مرور

قالوا نقاطة وما بتخسر

.
سعادتو ياسر عبدالكريم محمد

ياخ مرحبتين و الله

كيفك و العيال و ناس ملواكي..المسجد..الكوتشينة..تلاوة السبت..اللقيمات..الكورة الطائرة..مشويات الرحلات..البوســتة..تاكسي مايك في حربه مع الأصفر..بقالة العرب..مشروع الجالية المتعثـّـر..ودّ الجـنـّــي..و أجيال المهاجرين الجدد و شـلـّـة الأطباء..
ملواكي صارت جزء هام من تاريخنا..
تحياتي للجميع..

Quote: رايك شنو فى مشروع قسم شرطة خاص ولا خليها نقطة مرور قالوا نقاطة وما بتخسر

أما بخصوص العودة فيعتبر مشروع نقطة خاصة من أنجح المشاريع

و حتى الآن لا يوجد سوى بضعة شركات أشهرها الهدف

لكن البلد محتاج للزيادة

يبقى التصديق و الحكومة والــAccounts و كدة..

تقديري

.

سعادتو الطيب..
هناك قضية هامة جداً وموجعة للحد البعيد.. وهي ظاهرة استشراء الجشع في العديد من أماكن تقديم الخدمات في السودان.. ولدي تجربة مريرة جدا في هذا الجانب..
والقاعدة الآن في السودان تقول: احصل على أعلى الأرباح.. بخدمة متدنية وضعيفة وغير مناسبة..
ينطبق هذا على محلات الحلاقة.. التي تستكثر على زبائنها حتى مناديل الكلينكس.. والشقق المفروشة.. وبعض المطاعم العادية، التي لو طلبت منها زيادة رغيفة سيتم احتساب قيمتها عند خروجك..
لا توجد عناية بخدمات ما بعد البيع.. في بعض المنتجات والسلع التي تشتريها لمنزلك..
هذه الأشياء لا يحس بها ولا يحسب حسابها إلا من أتاحت له الظروف العيش والعمل خارج السودان..
لأن المقارنة ستكون حاضرة في كل خطواتك وبرامجك وتفكيرك وردة فعلك تجاه كل ما يقابلك..

.
العزيز أيمن
مرحب بيك تاني و تالت
تعرف مفهوم الـCustomer Service لا يزال حديثآ في البلد
و يحتاج زمن لترسيخه
نحن ياخ اللي بيجينا النادل في المطعم (السياحي) و يقول لينا:
أهـا دايرين شــنو؟؟

Quote: لا توجد عناية بخدمات ما بعد البيع.. في بعض المنتجات والسلع التي تشتريها لمنزلك..

لكن بصراحة بدأت تظهر
و تحتاج أنت فرضها على صاحب الخدمة
يعني مثلآ الزوول البيجيب لي موية الصحة في الشقة فوق..قلت ليهو أسمع يا ابو الشباب نحن أربع أُســر..ستتواصل طلباتنا في الشتاء حين يكون منتوجك بائرآ..و كلنا متفقين إما أن تخدمنا باهتمام أو تفقدنا جميعآ..و كان أن اختار الحرص على خدمتنا..و الله يا أيمن المدير بي نفسو بيطلع السلالم شايل القوارير لمن يكون مافي زول غيرو!!

دة جديد صاح؟؟

شوية شوية كمان..

.

Quote: يُعاد قطار الطيب بشير إلى الورشة عطبرة حتى يتم إجراء التعديلات اللازمة لجميع قمرات الركاب ومقطورات العفش..ويكتب على جنبات القطار بخط عريض: رحلتنا يا سيدي انقضت..لازم نعود..

يا محمود قطرنا فات ..و مصطفى سيداحمد مات..و الله كيف؟

يبدو لي قرار العودة ليهو علاقة سيكولوجية بالعمر!!

و ليهو علاقة بعودة القطار للورشــة!

الإنفلات و (الإنطلاقة) ليها ســن محدّدة..بعدها البلد أولى بالزول

لكن كمان إجراءات التعديلات اللازمة دي بتخلي الزول يفكر يلعب في (التانية)..لول

تقول لي رحلتنا انتهت أقول ليك لأ

لكن..خلينا نقول

لازم نعود..

.

لازم نعود

I wish to go back
The Q what I'm going to do with Amreican people that I live with them
(my kids)
Unfortunately most Sudanese culture is afraid of change
they are not used to take any risk
it would be hard for us to changes the palce or the society that we live in
that why we avoid any risk it may effect in our life


Any way good luck in new life

.

Quote: it would be hard for us to changes the palce or the society that we live in

hard yes
but possible
CHANGE is the magic word that took OBAMA to victory
wish you the best

.

لازم نعود

I wish to go back
The Q what I'm going to do with Amreican people that I live with them
(my kids)
Unfortunately most Sudanese culture is afraid of change
they are not used to take any risk
it would be hard for us to changes the palce or the society that we live in
that why we avoid any risk it may effect in our life


Any way good luck in new life

جنابو أبو بشير..
أراك مهموماً للغاية بموضوع الصحة ومياه الشرب النقية.. لك كل الحق في ذلك..
وأهلنا في القضارف اليوم أصيبوا بإسهالات حادة وبالذات الأطفال..
جراء المياه غير الصحية المستخدمة في الشرب..
وأظنك رأيت صورة المظاهرات المنشورة في المنبر.. التي تطالب بحل مشكلة المياه..
لا أقول لك إن مسعاك هذا فيه نوع من الترف غير المبرر.. ولكن ما دام أن الميزانية عندك تسمح بذلك.. فمن الأفضل أن تشتري صحتك بفلوسك.. ما دام أن رصيدك من الدولارات لم ينضب بعد..
بالجد ياالطيب الواحد بكون محبط جدا جدا من تساهل القائمين بأمر الصحة في البلاد..
هل رأيت أخي الطيب الكافتيريات المنتشرة وسط الخرطوم وفي موقف جاكسون جوار الاستاد..
هل مررت بمكائن الشاورما في برندات السوق العربي.. وهي تجذب كل غبار المارة..
هل مررت بشارع السيد عبدالرحمن في قلب العاصمة حتى ترى المجرى الممتد من شارع القصر وحتى شارع الحرية، ومنظر الطحالب العجيب المخضر، بخلاف الرائحة النتنة المنبعثة..
مرارات وإحباطات عديدة ياجنابو..

.

الحبيب أيمن
مرحبآ بإثرائك لهذا الخيط بالعود الأحـمـد

Quote: أراك مهموماً للغاية بموضوع الصحة ومياه الشرب النقية.. لك كل الحق في ذلك.. وأهلنا في القضارف اليوم أصيبوا بإسهالات حادة وبالذات الأطفال.. جراء المياه غير الصحية المستخدمة في الشرب..

تعرف يا صاحـب..أنا سنة 1992 كنت مشارك في ندوة تثقيفية عن الإيدز، قامت بيها وزارة الصحة الإتحادية، و أجاءت إليها عديد من مدراء الإعلام و العلاقات العامة، و كان الطبيب اللبناني متحمسآ في الشرح، لكن جاري كان يتشاغل بورقة في يده بلا مبالاة فهمســتُ في أذنه:
ياخ ما تسمع الزول دة بقول في شــنو..
قال لي:
يا جنابو أنا دكتور في كلية الصحـة، و بفتكر إنو الإيدز ما هواش مشكلة تشغلنا قدر الموية القدامك دي!!
في تلك اللحظة كانت تترقرق أمامي قطرات المياه في كوب زجاجي بديع، و قد بان الندى في ظهره مغريآ بالشرب، فاستطرد الدكتور:
شـُـفت الكباية القدامك دي لو ختينا ليك مويتها تحت ميكريسكوب ما راح ترضى تغسل بيها يديك!!
و أسهب في أن المياه عندنا ملوثة و الدولة لا تريد أن تعترف لأن الحــل باهظ التكلفة..
قال لي الموية مفروض نغليها قبل ما نشربها..و طبعآ دة مكلـّـف و ما عملي..
وقتها كان المغتربون وقتها (يستوردون) موية صحة من بلاد برّة!!
إذا كانت مويتنا ضاربة سنة 1992 فما بالها اليوم يا ترى؟؟

Quote: لا أقول لك إن مسعاك هذا فيه نوع من الترف غير المبرر.. ولكن ما دام أن الميزانية عندك تسمح بذلك.. فمن الأفضل أن تشتري صحتك بفلوسك.. ما دام أن رصيدك من الدولارات لم ينضب بعد..

هي ليست ترف و الله..
بل ما وضعت لك تحته خــط..
الأفضل، بل الأرخـص، أن تشتري موية الصحة من أن تنفق في العلاج و السهر و الغياب من العمل, دة غير تجربة المرض نفسها، فما دام يمكن تفاديها بالمال ..أهلآ..و على فكرة، هي ليست باهظة التكلفة..يعني حوالي خمسين دولار في الشهر تقريبآ لأسرة صغيرة..و هو ليس مبلغآ مفزعآ لمن أراد أن يستقر بالسودان بخلفية مغترب عائد..
و نتمنى أن يكون في متناول الجميع يومآ ما لأن الموية مهمة و تصنيعها ما صعب..بس بالمنافســة الأسعار بتنزل شوية..

تقديري

.

Quote: The Q what I'm going to do with Amreican people that I live with them (my kids)

هدى يا أختي..كيف حالك

طبعآ الحبايب ديل هم بيت القصــيد نفســو

عاوزين نحوّلهم من Amreican people لي سودانيين يتمتعون بجوازات سفر أمريكية و شهادات غربية و إنجليزي يناطق الجــن..طبعآ هي محاولة لأكل الساندويتش و الإحتفاظ به في الآن ذاته، و ما ساهلة، لكنها ممكنة..و مجرّبــة و مضمونة النتائج بإذن الله و نعملها بطريقةYes we can

تقديري الأكــيد

.

الطيب slamat Ustaz
I have been keeping an eye on your very helpful post since day one. I see your point about the bottled water. My family back home in Sudan takes it seriously too, and water it is part of their budget. I also can get your points about health care, traffic, and the job market.
What I can’t understand is parents and their obsession with kids and their English language skills. One of my cousins sends his kids to KIPS “is that the right spelling?” and they also have a Quran and Arabic teacher at home. Come on!. They only reason that I am going back home to Sudan is that I want my Kids to be Sudanese and learn Arabic and Islam. And by the way, believe me; if your kids go to KIPS, you need a teacher for Arabic language. I have Sudanese friends in their late 20s and early 30s, who went to KIPS and now they can’t even read the Quran. I can do this in the US, send the kids to American schools (even private ones) and also get them a teacher for Arabic and Islam at home.
My husband and I (their parents) went to public schools in Sudan; I went to schools with classes that had more than 70 students, more than 50% of them wore flip flops to school. It was fine, I had fun and -I think- I was a very happy kid
So what is it that I don’t understand that makes parents go out of their ways to send the kids to American schools in Sudan?
I am going to Sudan for a vacation this October; I hope we can meet (if you have time), maybe I will understand <sigh>

هذا النفس الرائع .. هو بالفعل لصديقي المذهل الطيب بشير ... إلتقينا لسويعات بالخرطوم بمعية العسكري الجميل محمد صديق محمد أحمد ... مرت لجمالها سريعاً ... وأقامت إلى الأبد ...
لك منى التحية .. وحتى نتلاقى بي هنا أو هناك عبر الإيميل ... لييييييييييييييييييييييييييييييييييييك وحشششششششششششششششة.

فرحات

.

أهلين حبيبنا فرحات عباس
مرحب بيك في البوســت و السودان
تعرف يا صاحب ..محمد صديق دة ما عندو كلام غيرك..خطاباتك..كتاباتك..ونساتك
ذكرياتك أنت و مصطفى محمد الحســن تشغل حيزآ كبيرآ من ذاكرته
لذا كنت أعرفك قبل ذلك اللقاء السريع بزمان بعيد

ننتظر لقاءك الآتي بصبر نافـذ

تقديري


.

.

ألف أهـلآ و مرحبا بالأخت الكريمة سمارت - أنا 2001
و الله أنا سعيد جدآ بـطـلـّــتك بعد غيبة
و مبـســوووووط إنك متابعة البوست
طبعآ كلامك و اتفاقك معي في أمر موية الصحة يدعم مزاعمي بأنها ليست ترفآ بقدر ما هي ضرورة صحية لازمة..
بالنسـبة لمدارس كيبس، و قد كتبتها أنتِ صحيحة، فهي تنقسم لقسمين..ناس القسم العربي ما بيحتاجو معلم عربي في البيت لأنهم بيعرفوهو بالأصــل..أما ناس القسم العالمي فهم أبناء العائدين من أصقاع تستخدم الإنكليزية كوسيط لغوي، أمريكا، أستراليا، ماليزيا، أوروبا..إلخ..و هؤلاء لا يمكن أن يستغنوا عن معلم اللغة في البيت، لأن المدرســة لا تعطيهم ما يكفي..الناس مهووسة بانو أولادهم يتكلموا إنجليزي لأنو الوظائف المرموقة الآن للناطقين بها في المقام الأول..و بغيرها معها لمن أراد وضع افضل..
طبعآ لا مقارنة، إطلاقآ، بين المدارس العامة التي كنت فيها أنت..و بين مدارس الآن!!
الوضع متدحرج من قمة جبل ..من سيء إلى أســوأ..المباني..المعدّات..المعلم..كل شيء ..كل شيء..و المدارس الخاصة هي التي تسـدّ النقص..يعني مثلآ فصول المدارس العامة مكتظة و ضيقة و ليس بها تهوية كافية..و لا حتى مراوح..فيما يتمتع أطفال المدارس الخاصة بالتكييف و الفصول الصغيرة الحجم .. حيث لا يزيد العدد عن خمسة و عشرين في معظم الأحول..و يكون أقل من عشرين في بعضها..
هذا الوضع يغري الناس بتسجيل أولادهم بمكان لائق..
يسـرّني جدآ خبر عودتك للبلد..و سنكون بانتظاركم..

تقديري الأكــيد

.

.

سلام لجميع القراء و المتداخلين
المحور الأخير في هذا البوســت هو البرنامج الإجتماعي
طـيـّـب..
إنت كمغترب بتجي مشتاق جدآ للبلد..الناس..المنتديات..الغنا الجميل..ناس الكورة..الزيارات للحبايب و الأهل..

تعرف..دي ممكن تبقى مشكلة!!
كـيــيف؟؟..

** الناس بتتعود .. و إنت بعد شوية ما ح تقدر تواصــل بي نفس الروح..الأيام الأولى إنت ما شغال Full time و ممكن تفنجط زي ما عاوز..بعد تلتزم لعمل ثابت، و يمكن معاهو تعاون آخـر، بتبقى القصة صعبة.. ع شان كدة خليك واقعي..بعد ما تنتهي أيام العسل الأولى ما تدبرس..ع شان نحن بنحاول نحاصر إحتمالات زهجك من البلد و نزيد من فرص بقائك.

** العزاء بالهاتف، لحين وصولك في يوم آخر، صار مقبولآ جدآ لدى كثير من المجتمعات داخل السودان، رهق المعيشة ما عاد ممكن مع وطأتو يقوموا الناس يبطلوا الشغل كل شوية و يقفلوا دكاكينهم و يسافروا لعزاء فلان و فلتكان..القصة دي زي خـفـّــت شوية..طبعآ ناس العاصمة أصلآ بكاهم من زمان ما حار شديد..أهلنا في الأقاليم هم اللي بدأوا يتنازلوا شوية عن نمط حياتهم الدافيء بعد ضغوط الحياة!!

** في ظل غياب معظم أصحابك و أبناء فعتك في الغربة، صار ممكنآ جدآ (تبنـّـي) أصحاب مرحلة من الأجيال اللي وراك..لأنهم موجودين و إلى حد كبير مفيدين في أعمال (الترجمة) لأجل المواكبة..و إنت بالنسبة للكثيرين منهم أخ كبير، لازم تبادر بكسر الحاجز دة و تنهمك معهم في برامجهم الجميلة ع شان ما تبقى خارج الشبكة..

** ما تتفاجأ لما تكتشف إنو كثير من الشباب يتعامل مع الهمّ الثقافي على إنو (كلام فارغ)..بكل اسف، فما تنزعج لو سمعت عبارات زي (يا عـمـّــك روووق)..و لا تفقد حماسك إنهم جيل مظلوم و يفترض أن يكونوا هدف للتوعية، فلا يخرجوك من القرية..و ابحث وسطهم عن "فالح" و ستجده بكل تأكيد، لكن لكي لا نظلمهم ستجد فهمهم للموبايل و اسراره و اللاب توب و حلول معضلاتو يفوق دراية جيلنا بكثير، أعني عامة الناس في كلا الجيلين و ليس الدارسين، فهؤلاء الديجيتاليون يمكن أن يرفعوا جهلك في جوانب هامة..

** الدعوات لمواقع الشيشة تحتاج للإتصال بصديق، قبل أن توافق على الخروج مع شباب، لمكان يرونه لائقآ و قد يفاجؤك فيه تدخين البنات السمحات و قد يفاجؤك فيه ناسنا بتاعين البوليص..و تبقى في حيص بيص..بعض المحلات لطيف ..و اشتهر تلاتة أربعة مصاروة بإنهم فايتين الناس في الشغلانة بحكم التخصص و السبق..

** أهم ميزة في السودان أن العرض الواســع للناس الكويسين يغنيك عن أصدقاء الغربة الذين كنت (تضطر) لإختيارهم من بين المتاح..و هم في حقيقة الأمر لا يشبهون أصحابك الزمان و لا قريب منهم، لكن ياهو الموجود ..تعمل شنو..أها دي في السودان بتنتهي طــب..ح تلقى أروع ناس داخل شبكة أهلك و أصحابك و معارفك الإستراتيجيين الزمان..

كدة بتكون المعاي كملت

إلا من أسئلة و ردود تفصيلية


.

.

تحياتي للجميع

أدناه بعض اللينكات للقادمين علينا..

http://unjobs.org/vacancies


http://sudanjob.net

http://www.dalgroup.com/dalcareers/vacancies.aspx

الرجاء من الجميع وضع المزيد من اللينكات المهتمة بالتوظيف في السودان...

و البقية في العدد القادم




.

Quote: أهم ميزة في السودان أن العرض الواســع للناس الكويسين يغنيك عن أصدقاء الغربة الذين كنت (تضطر) لإختيارهم من بين المتاح..و هم في حقيقة الأمر لا يشبهون أصحابك الزمان و لا قريب منهم، لكن ياهو الموجود ..تعمل شنو..أها دي في السودان بتنتهي طــب..ح تلقى أروع ناس داخل شبكة أهلك و أصحابك و معارفك الإستراتيجيين الزمان..

ابو بشير...ازيك


غايتو دي بالغت فيها ايما مبالغة...

او كما قالت عمتي: (ها اجنا والله اقعد معاكم اكتر من كدي علا يكتلني السكوت)

ويا ونسات الناس البجوكم...يطريني اكل الحمير للقصب...

Quote: أهم ميزة في السودان أن العرض الواســع للناس الكويسين يغنيك عن أصدقاء الغربة الذين كنت (تضطر) لإختيارهم من بين المتاح..و هم في حقيقة الأمر لا يشبهون أصحابك الزمان و لا قريب منهم، لكن ياهو الموجود ..تعمل شنو..أها دي في السودان بتنتهي طــب..ح تلقى أروع ناس داخل شبكة أهلك و أصحابك و معارفك الإستراتيجيين الزمان..

سلامات استاذ الطيب و استاذnazar hussien

عارفين ...انابفكر فى الموضوع من زمن طويل و الكلام الفوق ده بالمناسبه صحيح 100 %...لكن للاسف انا لما رجعت السودان..حتى اصحابى الزمان...اتغيروا (و اكيد انا ذاتى اتغيرت)...و بسبب شويه سنيين غربه...فقدت اصحابى الزمان...و الان كبرت و بقيت ما بقدر اصاحب ناس جداد!
املى الوحيد انى لما ارجع السودان نهائى ...ربنا يفتح على ذى استاذ الطيب والاقى ناس من داخل شبكة الاهل.

.

أهلين الأخت العزيزة سمارت _أنا 2001

Quote: فقدت اصحابى الزمان...و الان كبرت و بقيت ما بقدر اصاحب ناس جداد!

يمكن لأنك جيتي البلد زيارة

لكن جرّبي أقعدي في البلد فترة أطول، لا علاقة للســن باكتساب أصدقاء جدد، و إلا فكيف أفلح فيها عمو الطيب بشير؟ ممكن أصحابك القدام يكونوا سافروا أو ظروفهم إختلفت ..لكن ح تقدري تعملي أصحابك الجديدين ..Trust me .. و شايف نزار برضـو مبسوط من التعليق بتاع ندرة الأصحاب الجد جد في دار البعد و الغربة..نسأل الله أن نراكما و سائر الأصدقاء في السودان...زيارة في الأول..و بعدين بورداب داخل..
OK?
.

.
الحبيب نزار..كيف حالك..

Quote: غايتو دي بالغت فيها ايما مبالغة...

أنا عاااارف وجعك يا نزار..لكن الكلام الزي دة ماااا بتقال..
الغربة بتفرض عليك (خيارات) تعيســة!! و تلقى ناس سبقوك للبلد و فرضوا برنامج و مزاج على المجموعة تدور فيه أنت بلا كبير تأثير، و تكتشف أن بعض (المقرّبين) لك في ديار الغربة لا يشبهو، بأي حال، حبايبك في السودان..
يـلا دي من أهم حسنات الرجعة..
ما مضطر لأي حاجة..
بس إنت أظبط برنامج الرجعة يا مان..

.

.

هل أهملت أنا موضوع الأمن و السلامة؟؟...أظنني فعلت..و ما ذكـّـرنيه إلا الحوادث التي انتشرت مؤخـّـرآ و تتضمـّـن نهب مسلح بالخرطوم، كان آخرها ما نشرته صحف اليوم عن تاجر بالشجرة يتبادل إطلاق النار مع عصابة مسلحة حاولت السطو على داره!!..و الغريب في الأمر أن تكرار حوادث النهب المسلح بالخرطوم لا يجد الإهتمام الذي يستحقه من الحكومة..يعني لا برلمان إجتمع..و لا وزارة الداخلية عملت إستعداد..هسع لو مظاهرات في الجامعة كان عملوا استعداد..أها بالنسبة للعائدين..لا بـدّ أن نضيء لهم هذا الجانب الهام.

.

Quote: كدة بتكون المعاي كملت إلا من أسئلة و ردود تفصيلية

تصدق وتأمن بالله
درس شببببببببع

شكراً ألـــــف

ومنتظرين جماعة الاسئلة يمكن يطلعوا منك باقي الصمغ

وللعزيز الطيب بشير سلام وود

أخي الفاضل الطيب... شكرا لك على ما تجود به من معرفة لا تقدر بثمن...
هل جربت شراء قطعة أرض؟؟؟ نريد بعض المناظر من هذا الفيلم! عايزين نخشو دور تاني الشهر القادم!

.
مرحبتين أخي الكريم محمد الأمين موسى
و لك تقديري على المساهمة و الإطراء

Quote: هل جربت شراء قطعة أرض؟؟؟ نريد بعض المناظر من هذا الفيلم! عايزين نخشو دور تاني الشهر القادم!

أي نعم..و شايف بوســت بعنون شراء الأراضي في الخرطوم..لكن ممكن أقول ليك كلام عام يتضمن تجربتي أيضآ

الأسعار اللي أنا متابعها هي أسعار الخرطوم جنوب..

** يعني الصحافات..بيت آيل للسقوط، باعتبارو قطعة أرض 370 متر يتراوح بين 160إلى 200 ألف جنيه جديد، مليون بالقديم، و هي بين 80 و100 ألف دولار..طبعآ سعر البيت بيختلف حسب قربو و بعدو من الزلط..تصنيف الجيران..موقعو من حيث شارع اللواء نجيب و شارع مدني كمناطق ممتازة..و كلما قربت من جبرة تقل الأسعار خشية البعوض..
منطقة الإمتداد 300 متر بنحو 130 ألف ج..قطعة أرض، بيت مهردم، و بعض البيوت جميلة بـ250 ألف جنيه و تزيد حسب نوع و شكل المباني..

** جبرة و الأسماء الجديدة اللي جنبها..ناس الدوحة و الشهيد طه الماحي و يثرب و منو و شنو،400 متر بنحو مائة ألف جنيه إلى مائة وثلاثين..الأزهري قفزت لرقم مشابه في العامين الماضيين بعد أن كانت أربعين ألف جنيه و خمسة و ثلاثين في بعض المواقع..المنطقة بتاعة شارع الستين..المعمورة..الجريف غرب..الفردوس 300 متر بحوالي 180 ألف إلى 200 بحسب الموقع برضو..و هي منطقة مبنية بشكل جميل ..عمارات و كدة..لكن تنتشر فيها بيوت الخفراء و فيهم من يصنع الخمور المحلية و فيهم من يتخذ بيت المغترب وكرآ للجريمة..لاحظ إنهم ممكن يكونوا جيرانك سبع سنين أو أكثر و تستمتع برائحة الخمور و زيارات البوليص بشكل يومي..ناهيك عن مشاكل الأطفال و ختف الأكل في الأعراس و كدة..
بعض المنازل في تعويضات الجريف غرب بمساحة 224 متر و اسمها المسح الإجتماعي، و أهلها بيقولوا المعمورة جنوب، سعرها بين تسعين و مائة و عشرة ألف جنيه..أفتكر أسعار كويسة باعتبار انك ح تبني لفوق غالبآ..

* إنتشرت ظاهرة البنوك و التمويل..و لاااااا ننصح بالخوض فيها باعتبار إنها بتنهش الزبون و تربح من مص دمو..لا من تقديم الخدمة بأسعار تنافس أو كدة..طبعآ بنك الحكومة (العقاري) بيعرض برة الدايرة..بيوتو تقع كل يومين و قروضو الحســنة ماشة للجماعة..أنا عن نفسي عندي فيهو حساب من مطلع التسعينات، لا يزال نشط بمعاش البوليص، لكن لم أستفد منهم أي شيء..

* كلام عام عن بحري و ام درمان..
في شمبات مثلآ..الأراضي أغلى من الحلة بشكل واضح..مثلآ 400 متر في الأراضي 180 إلى 200 ألف و قد\ تزيد..في شمبات الحلة ممكن تلقى 400 متر بـ 110 ألف..أو تقل..الحلفاية إشتهر فيها مؤخرآ مربع سبعة و هو شرق الحلفاية القديمة 400 متر بسعر 150ألف جنيه أو نحوه..
الحتانة فيها نوعين..البيوت اللي على شارع الوادي أرض 400 متر ممكن تلقاها بـ70 ألف..و لو دخلت جووووووة محل حمير اللبن بتشتري زيها بـ40 ألف بس..

دي كدة إستجابة أولية..و البقية تأتي..

.

.

Quote: تصدق وتأمن بالله درس شببببببببع شكراً ألـــــف

التحية ليك أخي الكريم سيف بخيت موسي

و هي مجموعة خواطر، لا ترقى لأن تكون درسآ، أنا بتبرّع بتجربتي ع شان الناس ما تكرّر أخطائي

تقديري لك

.

Quote: و هي مجموعة خواطر، لا ترقى لأن تكون درسآ، أنا بتبرّع بتجربتي ع شان الناس ما تكرّر أخطائي

بما أن العلم مجموع وتراكم تجارب
فمرحب بعلمك في البوست ، متمنياً من لديه المزيد
حذف أو إضافة ، الإدلاء بدلوه

ولك ألف عافية

أخي ود البشير... أسعدتني بمعلوماتك الثرة عن الأراضي والبيوت (ما أن تضيف لها عنوان، حتى تصبح مقالا دسما تتزين به صفحات الجرائد)...
في الواقع أنا مهتم بأراضي المعمورة ولكن قضية المرايس دي إلا الواحد يعمل زي بقية المغتربين يجيب ليه جماعة يسكنهم ويشترط عليهم ألا يكون منتوجهم أقل من عرقي العيش بأي حال من الأحوال! حتى يستطيعوا التصدي لجيرانهم! وهنا تكون العودة مشروطة: يا إما نرجع كلنا مع بعض ونضع حد للطشمة يا إما نظل نعمه في اغترابنا إلى أن يقضي الله أمرا كان معفولا...
أنا متخوف من السماسرة... هل يمكن الحصول على أرض دون العبور بسراط السماسرة؟ وإن كان الأمر حتمي، كيف يمكن التفاوض معهم والاستقواء عليهم؟ كذلك الخوف كل الخوف من الغش والتزوير في المستندات، خاصة لمن يكون على عجل مثلنا.
هل الدفع الكاش يعطي أفضلية في الأسعار؟ كم هو الحد الأدنى من الوقت اللازم لإكمال إجراءات شراء أرض وتسجيلها دون تفريط؟؟

سلامات استاذ الطيب....
يا اخى ربنا يديك العافيه..و الله حتة الارااضى دى..المعلومات براها بمليون جنيه!!!!
انا و زوجى جبنا الاله الحاسبه و قعدنا....
اغلب اصحابنا اللى مشو السودان قبل سنتين ثلاته اشتروا اراضى فى حته اسمها الحى الدبلماسى...اظن انه بعد سوبا...اها ده حكايته شنو؟؟و اسعاره كيف؟
سمعنا برضوا بحى نبته و الاراضى فى كافورى !!!! اى فكره الحاصل شنو فى الحتات دى

السلام عليكم
الأخ الكريم الطيب بشير

أولاُ أود أن أثني على هذا البوست لما فيه من معلومات ثرة تفيد كل من يرغب في العودة إلى الوطن الحبيب أيما فائدة. فشكراً لك
ثانياً أرغب في معرفة الإجارات للمنازل أو الشقق إذا كانت لديك فكرة في أنحاء العاصمة أمدرمان بحري أو الخرطوم

مع شكري الجزيل

Quote: .أها بالنسبة للعائدين..لا بـدّ أن نضيء لهم هذا الجانب الهام

استاذ الطيب ...
لي من السودان قريب ال 6 سنوات .....لي يوم الليلة ما رجعت لكن كل كم شهر بعمل لي تليبة سريعة للامارات و بجي راجع ماليزيا تاني ..لكن الحمد لله
الأسرة الكريمة طوالي في السودان .....
قبل فترة سألت واحد زميلنا هنا في ماليزيا .....عن حتة الأمان و السلامة و السرقات و الكلام دا .....

اتخيل قال لي شنو : تمشي سوق ليبيا يا عمك و تجيب اتخن مسدس ....و دا كان ردوا بكل بساطة .......

و بعدها بي فترة سألت مجموعة من زملائنا الشفاتة ..أكدو لي صحة المعلومة ....

أها كان بالطريقة دي حنبقى في هارلم ما في الخرطوم .....
و على ما أظن انك سمعت بي ضرب النار الحصل في الخرطوم قبل فترة بسيطة بين مجموعتين من الشباب (مافي داعي للتفاصيل)

اخي الطيب تحياتي

متابع معاك منذ لحظة فتح هذا البوست الراقي.

لدي تجربة غربة قصيرة نسبياً (5 سنوات) كنت اعمل في وظيفة جيدة وسكن .... الخ قررت بعدها العودة الى السودان.

وكان سؤال الاصدقاء التقليدي (ماشي السودان تعمل شنو ؟؟) وكان ردي (السؤال انا قاعد هنا بعمل في شنو ؟؟؟) .. فصمتوا

حزمت حقائبي وعدت وفي رأسي العديد من الافكار والوظائف المستهدفة .... كلها جلت !!! لكني والحمد لله حصلت على وظيفة

في شركة كبيرة لم اسمع بها من قبل وبالتالي لم تكن في حساباتي مطلقاً. قناعتي ان مكاننا الطبيعي هو وطننا السودان

بكل المشقة والصعوبات التى تقابلك فيه الامر فقط يحتاج الى عزيمة وقناعة والباقي على ربنا ........... مع الاخذ في

الاعتبار ان السودان وبرغم كل شيء ماشي للاحسن.

Quote: قناعتي ان مكاننا الطبيعي هو وطننا السودان بكل المشقة والصعوبات التى تقابلك فيه الامر فقط يحتاج الى عزيمة وقناعة والباقي على ربنا ........... مع الاخذ في الاعتبار ان السودان وبرغم كل شيء ماشي للاحسن.

كلام سليم

.

جنابو الطيب

كدي أدينا تاني عشرة خمستاشر سنة كده ، على الخمستاشر القضيناها هنا
ونسوي لنا فيهن كم قرش كدي ، وبعدها نتوكل على الحي الذي لا يموت
وأمسك نصايحك دي واحدة واحدة وأطبقها بي حذافيرها
وتاني ما بنتغّش والله ..

ابوبشير ...ازيك...

شايف البوست بدأت فيه اسئلة تحتاج لكونسولتيشن فيز (هسي دي براها ممكن
تكون شغلانة) وبيني وبينك الزول السألك عن الحي الدبلوماسي دا كان
عملت ليه Charge عبر البي بال...وفتحت حساب في بورد بكري دا...
الواحد يومياتو ما بياخدها من ضحوة ويمشي علي جبنتو وونستو!!!!

اما ان سألت عن سر وصفي لك بالمبالغة بشأن اصحاب الغربة...فذلك
لأنك صرحت بالمسكوت عنه...والمقطعنو في حشانا ليس الا...

تحياتي لك كذلك يا اسمارت

Quote: الطيب \\اخوى بخيت وسعيد عليك نادوس ومن كل قلبى اتمنى لك التوفيق ولاهل السودان كلهم من دون فرز علا جنى اخوك ما بقدر على تلفزيون وجرايد وراديو بتكلم فيه الجماعة ديل النافع المتعافى سبدرات امين حسن عمر ابراهيم حسن عمر محمد على الامام الطيب مصطفى الكارورى بتاع جامع الشهيد عبدالله مسار ود البشيــــــــــــــــــــــــــــــــــــــــــــر

جنى....تحياتى
احسن حاجه تعمل ذى امى (ربنا يديها العافيه)...ما بتقرا جرايد نهائى...و ما عندها تلفزيون بيجيب تلفزيون السودان ...خالص. اخبارها من الجزيره و المنار (و دى كمان قصة طويله مع الوالده المعجبه جدا بحسن نصر الله)..لكن لو سالتها والى الخرطوم منو ? ما اظن تكون عارفه. ناس عايشين فى قلب الخرطوم لكن انا على بعد الاف الاميال بعرف اخبار السودان قبلهم.

Quote: الطيب \\اخوى بخيت وسعيد عليك نادوس ومن كل قلبى اتمنى لك التوفيق ولاهل السودان كلهم من دون فرز علا جنى اخوك ما بقدر على تلفزيون وجرايد وراديو بتكلم فيه الجماعة ديل النافع المتعافى سبدرات امين حسن عمر ابراهيم حسن عمر محمد على الامام الطيب مصطفى الكارورى بتاع جامع الشهيد عبدالله مسار ود البشيــــــــــــــــــــــــــــــــــــــــــــر

ألف مرحب بالعزيز جني العاوز يجنني

طبعآ كدة صـعـّـبتها شديد

الجماعة القلتهم ديل نجوم العشرين سنة الماضية و الخمسة شهور الجاية

ما فيك صبرآ يبل تصريحات (لن نسلمها إلا لعيسى؟)

تقديري

.

.

Quote: ناس عايشين فى قلب الخرطوم لكن انا على بعد الاف الاميال بعرف اخبار السودان قبلهم.

تعرفي يا سمارت-انا 2001 هناك عدد لا بأس به من الزاهدين في أخبار السودان و هم بداخله!!

ما عارف هل الناس زهدت في الأخبار لطغيان السياسة، المرتبطة عندي بالإخفاق، على مظاهر حياتنا الباقية؟؟..أم لأن النفاق المكرور في نشرات سونا، و التي يتم فرضها على جميع الميديا في السودان، جعلت الفرق ليس مشجعآ بالمتابعة؟؟..أم أن هناك سببآ آخر؟؟..

لكن الملاحظة واقعية بالجد..

تقديري

.

.

Quote: اما ان سألت عن سر وصفي لك بالمبالغة بشأن اصحاب الغربة...فذلك لأنك صرحت بالمسكوت عنه...والمقطعنو في حشانا ليس الا...

أهلين الحبيب نزار الفنان الراقي

و الله أنا بعتذر عن تأخير الرد بعد غياب تلاتة يوم في طابت..بهجة و فرح

تعرف الموضوع بتاع أصدقاء الغربة دة شاااائك و ممكن يجيب هوا

و بدل ما نتركو قابع في المسكوت عنو قلنا نكسر التابو بتاعو بالتعليق اللي اتقدم..

تمنياتي لك بأصدقاء يشبهوا نقاء ذاتك الشفافة يا جميل الروح

.

.

Quote: كدي أدينا تاني عشرة خمستاشر سنة كده ، على الخمستاشر القضيناها هنا ونسوي لنا فيهن كم قرش كدي ، وبعدها نتوكل

صلاح عبدالله يا اخوي..هو العمر فيهو كم خمستاشر أصــلآ؟؟

أنا مع الترتيبات للعودة لكن ما تتطوّل الغيبة..

إتوكـّــل و تعال..

.

.

Quote: كلام سليم

طبعآ يا بخاف إنت معترض على فكرة العودة

و زي دة يعجبك

برضــو راي

.

سعادتو عمر عثمان

كيف حالك

أنا سعيد بمتابعتك للبوســت، لأنو ما شايف ناس بوليص هنا، و لأنك محـنـّــك..

بالطبع مكاننا هو السودان، دي ما عاوزة كلام، و أكيد هو ماشي للأحســن، نختلف في وتيرة المشي، و نختلف في وقوده!! و قد حدث أن كان وقوده مـُـهج عزيزة..أنت و أنا يجمعنا رباط الشرطة، القاش، و هو، عندنا، رباط قدسي..رغم كل قيل و قال "الملكية"..

دم بألف خير

.

.
تعرف يا ساري الليل
الموضوع بتاع الأمن و السلامة دة شاااائك
يعني أنا بسمع عن الناس العندها سلاح
لكن عمري ما فكـّـرت أقتني واحد
القصة برضو ليها علاقة بمكان السكن
و مهم برضك تأمين البيت، طبعآ الشقق بتتفوق على البيوت في الجانب دة، و كلما كان الشقة في طابق أعلى باعدت بينها و بين اللصوص..

نسعل الله السلامة

.

.

أهلين الأخت الكريمة مشاعر أحمد
شكرآ لك على كلامك اللطيف عن البوســت ..و تحيا آراء الحبايب المشاركين في نجاحه..

Quote: أرغب في معرفة الإجارات للمنازل أو الشقق إذا كانت لديك فكرة في أنحاء العاصمة أمدرمان بحري أو الخرطوم

الإيجارات تتراوح بين 750 إلى 1300 في المتوســط..طبعآ ما كان أقل من ذلك بيكون تعبان جدآ أو في منطقة مهببة..و ما زاد على ذلك يكون غاليآ جدآ و لا داع للخوض في تفاصيله..لكن نحن بنتكلم عمومآ..
الشقق غرفتين و حمامين و مطبخ و (صالون/أو غرفة معيشة/أو هوول) بيكون في حدود ألف جنيه في مناطق الصافية، شمبات، أركويت، المعمورة، الفردوس، و ما إليه..بتزيد تلتماية جنيه بزيادة غرفة نوم ثالثة..البيوت الجديدة أغلى شوية مائة أو مائتين..البيوت القديمة أرخص..بالذات لو دخلت مثلآ لي جوة الجريف غرب..أو قطعت الكوبري الجديد للجريف شرق بتكون كسبت مائة أو مائتين لصالحك..
** الجماعة بتاعين الرياض و المنشية دخلوا في دور ناس العمارات و نمرة اتنين فأصبحوا يؤجرون للمنظمات و الأجانب و يفضلون المفروش لأنه يرفع السعر..و تجدهم دائمآ يتحدثون بالدولار..نفس الشقة بس مفروشة و في الرياض و ما جاورها بتكون بألف دولار!!

أم درمان أقـلّ نوعآ ما..لكن تفاصيلها ما معاي..برجع ليك بيها برضــو

.

.
أهلآ بصديقتي اسمارت-انا 2001
و كتـّـر ألف خيرك

Quote: اغلب اصحابنا اللى مشو السودان قبل سنتين ثلاته اشتروا اراضى فى حته اسمها الحى الدبلماسى...اظن انه بعد سوبا...اها ده حكايته شنو؟؟و اسعاره كيف؟

هو بعد سوبا (اللعوتة)..و ليس سوبا (الحـِـلـّّـة) ..أو سوبا (الأراضي)!!
و كلتا السوبتي بمحاذاة سوبا الحلة و تقعان غرب شارع مدني و شرق الشارع المزدوج الجديد و بجوار الأزهري..
هو ممكن يكون إمتداد كويس للخرطوم جنوب لكن عـيبو أن هناك قطعة أرض كبيييييرة تتبع لجامعة الخرطوم تقع بينو و بين سوبا (اللعوتة)..و تستخدم مكبـّـآ للنفايات و بها قدر من الأكياس الملونة اللاصقة منذ الخريف الفائت لا تسرّ الناظرين..و كانت قطعة الجامعة سكنآ عشوائيآ لعهد قريب و تمّ إخراج السكان منها قبل فترة وجيزة و قاموا بتسويرها باللساتك القديمة، منظر ما بتكون شفتيهو في أمريكا، و برضو فيها حفرة كبييييييرة جرّاء كثرة أخذ الناس للتراب من ذاك الموقع لبناء بيوت الجالوص..ممكن طبعآ تتردم بي حوالي ألف قلاّب..لكن أنا بنقل ليك صورة أولتمبارح..
أسعارو لازم أراجعها ليك ع شان تكون updated

Quote: سمعنا برضوا بحى نبته و الاراضى فى كافورى !!!! اى فكره الحاصل شنو فى الحتات دى

نبتة بعيدة شوية في طرف بحري من ناحية الحاج يوسـف و مايلة علي الدروشاب و تجاورها (بتاعات) غير مبشرة..
كافوري ..همممممit depends ..ياتو مربـّـع؟؟
بعضها مسكون و فيهو خدمات و شوارع و أسعارو فووووق..و بعضها مجوبك و شاقيهو خط الضغط الكهربائي العالي و أسعارو متواضعة و الناس ما راغباهو..لكن برضو أسعارو لازم أراجعها ليك ع شان تكون updated
و بجيك بالتفصيل بعد يومين ان شاء الله.
تقديري

.

.
مرحبا بالعزيز محمد الأمين موسى
و شكرآ لإطرائك على البوســت
و في الحقيقة التفاعل الذي تفضـّـل به الأعضاء هو ما جعل البوسـت حيـّـآ..

Quote: أنا متخوف من السماسرة... هل يمكن الحصول على أرض دون العبور بسراط السماسرة؟ وإن كان الأمر حتمي، كيف يمكن التفاوض معهم والاستقواء عليهم؟ كذلك الخوف كل الخوف من الغش والتزوير في المستندات، خاصة لمن يكون على عجل مثلنا.

و تخوّفــك من السماسرة في محلو..
العبور بسراط السماسرة ضروري، لأنهم يبيعون لك المعلومة النادرة، و يستحقون لقاء ذلك أجرآ، لكن الأهم هو ألا تفوت عليك خداعاتهم..فمثلآ (الكوبري) و هي لعبة زيادة سعر البيت أو العربة أو قطعة الأرض لصالح السمسار، و في ذلك ضرر للمشتري و البائع و يستفيد منها السمسار وحده لا شريك له..هناك أيضآ نظام (معاي سمسار تاني)..و هو اتفاق بين العطالة من السماسرة بأن تتم إضافتهم لكل عروض البيع و الشراء بحجة إنو هو اللي جاب العرض في الأصل، و لازم ياخد حقو، و هو في الأصل بيكون عاوز يخدم صاحبو ع شان بيتوقع خدمتو هو ذااااتو لاحقآ، و هذه يتم حسمها بالإتفاق من البداية، أنا مثلآ قلت للزول الجاب لي الشقة..(يا حبيب عندك 500 ألف ج بالقديم لن تزيد مليمآ و لو ظهر معك ألف سمسار)..و بالمصري كدة دة الشرط الأولاني البيجيب النور في الأخير..
يفيد في التفاوض أن تقوم بتحديد طلبك بنفسك و لا تقع فريسة (عندي ليك عرض خاص..و ما بديهو إلا للأخوان..و البايع عندو شيك طاير، يعني بيعة مضطر) ..دة كلو تهريج ع شان يقنعك بي إنو البيت دة أحسن من داك..الواقع إنو بتكون نسبتو فيهو أكبر..أو كوبريهو فيهو شديد..
إنت تحدّد..و تطالبو بي إنك عاوز تقعد راس مع صاحب البيت..دة مهم جدآ..
أي زول تطلب منو خدمة بياخد حقو..ما تقول لي قريبي و لا غيرو..بيكون متفق مع السمسار إنو يلبت قدامك و ياخد نصيبو لاحقآ..
أما الغش في المستندات و التزوير فهذا كثير جدآ..لا بدّ لك من محامي..أو زول خبرة في الأراضي..هناك أيضآ رسوم إجراءات الأراضي و دفع الحكر و هذه تؤثر في سعر البيت..يعني ممكن تعمل فرق بتاع عشرة خمسطاشر ألف ج..بالتالي لازم تسأل..
و يا صاحبي الناس المستعجلين و المغتربين إسمهم في عرف السمسار (رهينة) و يتم بيعهم و شراؤهم بالراس!!..يعني يقوم السمسار يتصل بي صاحبو يقول ليهو عندي ليك رهينة اسمو محمد الأمين موسى
يفرح و يقول ليهو ان شا الله يكون طيرة زي الطيب بشير و ما يتعبنا زي نزار حسين، لأنو داك طلع مفتح و ما كسبنا منو غير حاجة بسييييطة..
و تبدأ رحلة التفاوض على بيعك!!

قادر تتخيل شكل الناس ديل؟؟

أوع تدقس..إستعين بألف صديق

.

.
مرحباأخي الكريم سيف بخيت موسي

Quote: العلم مجموع وتراكم تجارب

و شكرآ لاعتبارك تجربتي المتواضعة ضمن ما يفيد الناس

تقديري

.

Quote: ما يتعبنا زي نزار حسين، لأنو داك طلع مفتح و ما كسبنا منو غير حاجة بسييييطة..

الطيب حبابك اخوي...

ابدا يا الطيب...السودان التفتيحة براها ما بتنفع علا يكون
عندك عدسات وقرون استشعار...قبل يومين فقط قلت لي اخي الصغير
امشي بيع العربية...وانا مشتريها بي قروش هو عارفها...
وقلت ليه ان جابت كذا بيعها...قلت اخسر فيها ولا اخسرهااو يضيع
بيها شافع ناس...لانو عرفت الفي كلو عندو نسخة مفتاح وبتعلم في السواقة
في الكركعوبة دي...اها اخوي عرضها وركبوا معاه تلاتة سماسرة..
وقالوا ليه عندنا مشتري في الكلاكلة...وضرب لي...قلت ليه خليهم
يمشوا يجيبوا المشتري...ويجوك في البيت...وهم فعلا كانوا صادقين
بس كذبوا في سعر العربية علي المشتري...وعملو فيها كبري ابن كلب..
حتي اصبح سعر العربية قبل تلاتة سنوات هو نفسو...بس باظت عليهم
الشغلانة في النهاية...والمشتري جاب قروشو في شنطة وركب اخوي
ونزل السماسرة قال ليهم طالعين تست وبنرجع ليكم...اها في الدرب
المشتري قال لي اخوي ياخ العربية دي بي (س) مليون غالية...
اها اخوي انهجم...وضرب لي والزول معاه ...قال لي اسمع..السعر
الاديتك ليه قبيل داك كان غلط العربية بي كذا...والمشتري ياهو
دا معاي...انقصوا مليون...قلت ليه نقصوا...واديه الاسبيرات كمان

البيعة تمت...واخوي قبض قروشو ورجع البيت لقي السماسرة مستنينو
قدام البيت...ضرب لي...قلت ليه...اديهم كل واحد مية الف..وكان
اتلولوا افتح فيهم بلاغ...وجيب المشتري...(عليك امان الله من جاب
فيها سيرة البلاغ...قبضوا ميتهم ويا الشارع جاك سمسار.

فالحكاية وما فيها...انا افترض ان كل سمسار حرامي حتي يثبت
العكس.

Quote: قلت ليه...اديهم كل واحد مية الف..وكان اتلولوا افتح فيهم بلاغ

يا نزار أخوي... إنت من الآن صاحبي رغم أنفك ورغم نطيطك الفي البروفايل! مش قال الخبير ود البشير استعينوا بصديق؟؟!

شكرا يا الطيب على هذا الكرم المعرفي... وأنت شخص تعتز بك قبيلة الإعلاميين.
ربنا يكفينا شر الكباري والاختطاف!

سعادة السفير الطيب بشير*

Quote: * إنتشرت ظاهرة البنوك و التمويل..و لاااااا ننصح بالخوض فيها باعتبار إنها بتنهش الزبون و تربح من مص دمو..لا من تقديم الخدمة بأسعار تنافس أو كدة..طبعآ بنك الحكومة (العقاري) بيعرض برة الدايرة..بيوتو تقع كل يومين و قروضو الحســنة ماشة للجماعة..أنا عن نفسي عندي فيهو حساب من مطلع التسعينات، لا يزال نشط بمعاش البوليص، لكن لم أستفد منهم أي شيء..

البورقراف دا داير شرح و إذهاب لو سمحت.

تحاياي


ـــــــــــــــ
سفير جمهورية الغربة

Quote: يا نزار أخوي... إنت من الآن صاحبي رغم أنفك ورغم نطيطك الفي البروفايل! مش قال الخبير ود البشير استعينوا بصديق؟؟!

وانا لاقي..!!! يا محمد اخوي...يشرفني ايما شرف ان اكون صاحبك

**

Quote: أهم ميزة في السودان أن العرض الواســع للناس الكويسين يغنيك عن أصدقاء الغربة الذين كنت (تضطر) لإختيارهم من بين المتاح.

العزيز/ الطيب بشير


و الله يا الطيب ما قصرت تب بحديث الطيب في هذا البوست و لكن الكلام اعلاه كان احسن تخليه... من باب العفو عند المقدرة... الله يديك العافية و ينور ليك طريقك... فأنت زول معدنك ... من المعادن النادرة ... اكرر اتمني لك التوفيق في كل خطوات حياتك ... و تعظيم سلام يا سعادتك... اسمح لنا بالانصراف.

.

Quote: و الله يا الطيب ما قصرت تب بحديث الطيب في هذا البوست و لكن الكلام اعلاه كان احسن تخليه... من باب العفو عند المقدرة... الله يديك العافية و ينور ليك طريقك... فأنت زول معدنك ... من المعادن النادرة ...

الأخ الكريم برير اسماعيل يوسف

شكرآ لحسن ظنك بأخيك، و قد أخجلني حديثك ..و نسال الله أن يوفقنا لما فيه الخير

أما حديثي عن الإخوة الأفاضل أصدقاء الغربة فقد كان من باب الترغيب في (خيرات) السودان .. و قد رأينا أن مركب الغربة تتميز بالجانب المادي على بلدنا الجميل فأردتّ أن أعيبها..و كان وراءهم مغتربون يفرضون أنفسهم على المجالس و أذواقهم على البرامج فأردنا أن يبدلهم ربهم بأصدقاء داخل البلد أقرب رحما و أعدل مزاجآ..
و لا نزكـّـي على الله أحدآ أبدآ..إنما هي محاولات الترويج للسودان..و الفصل الإجرائي بين البلد و الحكومة..

أجدني مـُـلزمآ بشكرك مرة أخرى على كلامك الفائق اللطف.

تقديري يا ملك

.

.
مراحب يا حبيبنا ثروت سوار الدهب

و الله حكاية سفير جمهورية الغربة دي حلوة

تخلي الواحد يصدّق إنو ممكن يكتب ما يفيد الناس

أشكرك، بعمق، و أتمنى أن نجد قاريء مهتم كلما كتبنا

Quote: البورقراف دا داير شرح و إذهاب لو سمحت.

أما الباراغراف البنتكلم عنو بإسـهاب و هو موضوع التمويل، فقد لاحظت أن القرض الحـسـن، و هو مافيهوش فوائد خالص، محصور على الكيزان، و مهما تعبت ما بتلقاهو، يبقى خيارك الوحيد التمويل العادي، و دة بياخدو فيهو أرباح طائلة و مقدّمات هائلة و أقساط باهظة..يعني بالمقارنة مع الحاصل في العالمين الغربي و العربي (تسديد على ثلاثين عامآ و نحوه) تجد الخمسة سنة بتاعة بنك السلام و حتى الخمسطاشر سنة بتاعة بنك الخرطوم مرهقة جدآ في السداد لأنها بترفع المقدّم بين عشرة في المائة أو خمسطاشر أو عشرين أحيانآ من ثمن العقار..و كذلك بترفع القسط الشهري...
و الأقساط اللي بتتراوح بين مليونين و أربعة للعقارات ما بيقدر عليها معظم الموظفين، اللي هم أساسآ شريحة مستهدفة بالتقسيط و فكرتو، يبقى ما معمولة ليهم..
البنك العقاري و بعض المصاروة..بنوا عمارات تسقط قبل أن ينتهي بناؤها!!
و بيوت البنك العقاري فيها غش كبير..و لاااااا ننصح بأي بنك

مهما بلغ حدّ الإغراء

شوف خياراتك الأخرى

.

.

Quote: شكرا يا الطيب على هذا الكرم المعرفي... وأنت شخص تعتز بك قبيلة الإعلاميين. ربنا يكفينا شر الكباري والاختطاف!

حباب العزيز محمد الأمين موسى

و الله دة كرم و لطف أكـيد منك، و يسـعدني أن رأيتني بعين الرضـا..

و حقيقي عاوزين دعوات من كباري السماسرة و بيعهم للرهائن

كـُـن بألف خير

.

.

Quote: انا افترض ان كل سمسار حرامي حتي يثبت العكس.

و تعرف يا نزار إنو نادر جدآ لما يثبت هذا العكس!!

إنت لازم تراقبهم كويـّـس..Or else لا تلومـنّ إلا نفســك



قفلة:

عجبتني تدقستك للسماسرة

.

سلام ياجنابو
سلام ياطيب القوم..

فى نية ياجنابو انو الواحد يعمل تجربة ,
المدارس ياالطيب بالنسبة لناس اليشيا وسميره بتبقى مسألة
صعبة , خاصة انو العربى بتاعهم تعبان شديد ,
هل هنالك مدارس او مدرسة ايطالية..??

________________


تحياتى للأسرة والأهل
وقول لى بشير ولدك, جمال ولدى قال ليك والله شغلنا طنبجات بس..

.

حباب جيلي القوم

ليك وحشــة يا أخي..إنت وين

ربنا يحفظ لك العيال الحلوين

بسأل ليك من مدارس الطليان، لم أسمع بها ..ربما لصغر الجالية

Quote: وقول لى بشير ولدك, جمال ولدى قال ليك والله شغلنا طنبجات بس..

الموضوع دة عمك عكود حسمو ليك زمان، و إنت عارف الأمريكان ديل بيستعملوا الإقناع..

طوّل بالك بس

.

.

حدث سخيف/طريف/غريب??

سأترك لكم التقييم...

جاءت زوجتي داخلة البيت مبوزة
قبل ما أسألها
دخل بشير صائحآ:
Dad your not gonna belive this
في شنو يا ولد?
Mom beat the hell out of a man
نظرت لها مبهوتآ
فأجابني بشير بعربي جوبا:
ما هو قبضني في محل البول بتاعي و قال لي هييع أب..........
وبس ماما لطـشـــتـو ليـك!!
بعد صـمـت نطـقت أم بشير
قالت إن الرجل بدأ بقلع عصير موحى و شرابه دفعة واحدة و التجشؤ بغرابة..فلم يسأله أحد..لاحظ أنهم في سعد قشرة في الضهر!!
قالت أم بشير إن الرجل نظر لبشير مرتين قبل أن يمد يده!! و لا يبدو عليه جنون .. ملابس نظيفة.. خطف العصير و لم يشرب من إبريق وضوء المصلين..يعني قادر على التمييز بين الأشياء..ع شان كدة أديتو كـف!!
بشير يتدخل:
كـف واحد??..يا ماما الراجل انخلع و انت ما وقفت من ضربو لمن جرا..

أها يا العائدين..الشارع السوداني عاوز مراقبة لصيقة

مان تو مان

.

يا الطيب... قلت لي حتى الجنون بقى عندكم فنون؟؟؟!!! غايتو بلدنا الله يكون في عونها.
يا ربي تكون دي الكاميرا الخفية؟!

.
مرحبا محمد الأمين موسى

Quote: يا ربي تكون دي الكاميرا الخفية؟!

NO
Not at all
و الله زي دة ممكـن يكون ما مجنون!!

يعني مسألة استدراج الأطفال أضحت تشـكل خطـورة بائنة

ربنا يوقيهم

.

سلامات استاذ الطيب....القصة دى عباره عن فلم رعب....
و دى من الحجات اللى بتخلينى افكر مرتين قبل رجعة السودان نهائى
رجعت السودان اجازه قبل 3 سنوات...و قبلها كنت بعيده عن السودان لمده 5 سنوات...
و شكلى فى الخمس سنوات دى نسيت انو (بعض ) الرجال فى السودان و خاصة الاسواق ما بيغضوا الطرف نهائى..الواحد يعاين ليك من راسك لرجليك بكل وقاحة الدنيا(معليش للغة)
امريكا بصراحة خربت طبعى..ما فى زول بعاين لزول فى الشارع....بالرغم من انى لابسه حجاب فى مدينه ما فيها مسلمين كتار..ومرات بكون حايمه بالتوب السودانى ..لكن ابدا ما فى يوم من الايام زول عاين لى ذى العييين اللى فى الاسواق فى السودان.
________________________________________________________
التحية لام بشير....وهى بتاخد حقها بيدها ........

.
أهلين العزيزة سمارت _أنا 2001

Quote: ....القصة دى عباره عن فلم رعب.... و دى من الحاجات اللى بتخلينى افكر مرتين قبل رجعة السودان نهائى........

كلامك صح
هي فعلآ تجربة في منتهى السخف
و التردّد في العودةة للبلد ليس هو الحل، برأيي، برغم مشروعيته في هكذا مواقف، لكن بمزيد من الحرص و متابعة عيالنا ممكن نتجاوز الظواهر السالبة دي..أنا (والله) بعمل معاينة لأكثر من سائق قبل أن أوافق على ترحيلهم لبشير إبني!! زمان أنا في ســن بشير دة مافي زول ذاتو كلمني عن الشر ..الدنيا كانت كلها صح..و المجتمع كان لطيف و متضامن..لكن هسع لأ..

Quote: ...(بعض ) الرجال فى السودان و خاصة الاسواق ما بيغضوا الطرف نهائى..الواحد يعاين ليك من راسك لرجليك بكل وقاحة الدنيا(معليش للغة) ........

و مرة تاني كلامك صح..
أظنها ثقافة عربية، و يزيد عليها في بلاد العربان التصريح بالغزل..يعني في مصر القريبة دي الواحد يطلع من الجامع..اللحية خالطها البياض.. و المسبحة تطرقع بين يديه..و يهتبل أول سانحة لأنثى في الشارع العام و يصيح (إيه النور دة..بسم الله ما شاء الله..يا أرض أحفظي ما عليك)..إلخ..إلخ..
و أظن أن هذا بقية من (كأن مشيتها من بيت جارتها..و ما إليه)..
المجتمع الشرقي فيهو فراغ و إيقاعو بطيء و ترفيهو كان المرأة فقط لزمن ليس بالهيـّـن..و كتبوا أشعارآ كثيرة في جزئية (التمتـّـع بالنظر)..و يبدو لي أن ما تعانيه أنت و أخوات كريمات أخريات في أسواقنا هو بقايا أدب تدنـّـى فأصبح قليلآ..فصار؟؟..

Quote: ....التحية لام بشير....وهى بتاخد حقها بيدها ........

طبعآ أنحن قعدنا عملنا (تقييم موقف)..
قلت لي أم بشير هسع الزوول دة لو بقى ماااانع و أدّاك بونية جاب وشـّـك كلو باليمين..تعملي إيه؟؟
قالت لي: أنا و الله ما حسبت أي حاجة..ما فكـّـرت في أي شيء..تصرّف لحظي لحماية إبني..
أنا معاك بحييها..لكن بصراحة قلـّـلـت طلعاتهم بدوني لحد كبير..الزمن أصبح مخيف
بس بقول للقادمين الجدد..أبقوا احترســوا ..و لا تتركوا الأطفال في الشارع بالثـقة القديمة في شارعنا


لك تقديري العميق

.

.

Quote: قلت لي أم بشير هسع الزوول دة لو بقى ماااانع و أدّاك بونية جاب وشـّـك كلو باليمين..تعملي إيه؟؟ قالت لي: أنا و الله ما حسبت أي حاجة..ما فكـّـرت في أي شيء..تصرّف لحظي لحماية إبني.. أنا معاك بحييها..لكن بصراحة قلـّـلـت طلعاتهم بدوني لحد كبير..الزمن أصبح مخيف بس بقول للقادمين الجدد..أبقوا احترســوا ..و لا تتركوا الأطفال في الشارع بالثـقة القديمة في شارعنا

يديها بونية؟ وفي مكان عام حتما فيه اخوان بنات؟ علا يبقي دا ما السودان البنعرفو!!!!
ما اظن يقدر هذا الرجل ان يرد علي كف أم بشير حتي ولو كان اعتي من ابي جهل...
لأنو لو الناس الفي السوق ديل ما اتلموا عليه وشرطوا ليه هدوموا من الكفوف
يبقي لازم في حاجة غلط كبيرة...حصلت بعدنا...

اها يا الطيب دي من نوع الحاجات البتخليني استنفر القبيلة...وادق السوق كلو
وبعدها اليحصل يحصل...

.
الحبيب نزار كيف حالك
أنا بنقل ليكم الصور أولآ بأول
و بالتفصيل..

Quote: يديها بونية؟ وفي مكان عام حتما فيه اخوان بنات؟ علا يبقي دا ما السودان البنعرفو!!!!

السودان، حتمآ، حدث فيه تغيير كبير
وين كانوا أخوان البنات لمن (المجنون) قام قلع عصير الطفلة؟؟..
و ين كانوا لمن هبش الشافع؟؟
و حتى لما أم بشير ناولتو كفين تلاتة..واقفين يعملوا شنو؟؟
حسب كلام بشير و أمو مافي أي زول تدخـّـل!!
و لا حتى بكلمة للرجل المعتدي

Quote: لأنو لو الناس الفي السوق ديل ما اتلموا عليه وشرطوا ليه هدوموا من الكفوف يبقي لازم في حاجة غلط كبيرة...حصلت بعدنا...

العوجة بايتة و مقيـّـلة يا نزار..و الغلط الحصل بعدكم بالحيل كبير
ع شان كدة أنا ذكرت إنو خروجهم بدوني قلّ كثيرآ..
لاحظ أن أم بشير كانت تقود سيارتها من منيابولس إلى ملواكي نحو ست ساعات غير الراحة و البنزين ع شان تزور شقيقاتي في مناسبات الحريم التي لم يك وقتي يسمح بتلبيتها كلها..بيكون معاها (المجني عليه) بشير ذاتو مع فارق أن عمره كان أربع سنين..و أنا بكون مطمئن عليها جدآ..
الآن هي لو خرجت السوق الشعبي أو سعد قشرة لتشتري له شنطة مدرسة أنا أكون في قلق!!
دحين دا السودان البنعرفو يا نزار؟؟!!

.

.
أهم حاجة نسيناها يا جماعة..الأكل برّة البيت كيف؟؟

يعني لازم كمان كل شوية تاخدو طلعة، موش؟؟

طيب بعض الأماكن و الأسعار بلمحة سريعة..و مؤكـّـد هناك خيارات تانية كتيرة

نبداها بالأغلى سعرآ و أجمل منظرآ...

** برج الفاتح..طبق المشوي بي مائة ألف جنيه قديم..لووول

** مطعم الساحة اللبناني..اللي هو جزء من بيت الشيخ مصطفى الأمين في بداية شارع إفريقيا و ما بعيد من السفارة الهندية و ترانزأرابيان زمان.."المهم"..الطلب بي خمسين ألف جنيه..الديكور بلدي سوداني و الخدمة رائعة..و فيهو شيشة..

** باقي الفنادق بين السعرين أعلاه و بالقرب منهما...

** أمواج في شارع المطار و سيدي بيه في محطة البلابل شارع عبيد ختم بيتنافسوا مع بعض ..المشويات بين تلاتة و عشرين ألف جنيه و خمسة و تلاتين..و لمن تطلبtake away بتفقد الشوربة و السلطة و القعدة الجميلة و بتكسب تلاتة أربعة ألف جنيه..

** شعيب بتاع السمك الفاتح على خور أبو عنجة ظهر ليهو منافس خطييييير و هو إبن عمه هاشم في مركز شباب الربيع، جوار بوليص النظام العام، و الاتنين ممتازين..سمكهم في حدود عشرة ألف للطلب، فيهو فطور زول أكـّـال أو اتنين مساكين، معاهو بصل و شطة، الغريبة العيش عليك..هاهاها..

** الكسرة بالبامية و القراصة بالرايب و التقلية و الفول المصلح بي عيشتين، شامل ثمن بروميد البوتاسيوم، و بمبر جديد أو كرسي مكسور بحسب الحال، لا زالت تراوح مكانها بين ألفين و نص إلى تلاتة ألف جنيه..البارد بين خمسماية و ألف و نص..

** أقل من كدة عيلا كيس المدمس بي ميتين و كوز موية بي تلتماية..تكون جهجهت الجوعة بنصف ألف جنيه..مين زيـّـك..إبتسم..أنت في السودان..ناس بتاكل في برج الفاتح و ناس بتشتري المدمس ..

.

Quote: العوجة بايتة و مقيـّـلة يا نزار..و الغلط الحصل بعدكم بالحيل كبير ع شان كدة أنا ذكرت إنو خروجهم بدوني قلّ كثيرآ.. لاحظ أن أم بشير كانت تقود سيارتها من منيابولس إلى ملواكي نحو ست ساعات غير الراحة و البنزين ع شان تزور شقيقاتي في مناسبات الحريم التي لم يك وقتي يسمح بتلبيتها كلها..بيكون معاها (المجني عليه) بشير ذاتو مع فارق أن عمره كان أربع سنين..و أنا بكون مطمئن عليها جدآ.. الآن هي لو خرجت السوق الشعبي أو سعد قشرة لتشتري له شنطة مدرسة أنا أكون في قلق!! دحين دا السودان البنعرفو يا نزار؟؟!!

ثق يا الطيب اخوي انني اصبت باحباط سيظل ملازمني الي ان نستعيد خاصية وشخصية
السوداني الذي اعرفه...(الفضول ساكت راح من الناس؟ الناس البشنكتو في الفارغة
والمليانة برضو اختفوا؟؟ شكيتكم شكية لا تتباطأ ولا تقع في الواطة يا ناس الانقاذ
معقول شغلتو الناس في عيشتم لامن عدمو طفاي النار والحجاز؟

اقول ليك حاجة يا الطيب...وانا جادي جدا...لما اجي السودان ...ممكن تمشوا
معاي بي ام بشير لي محل الكفوف دي؟ طبعا اكيد في اسياد محلات ثابتة هناك
وكانوا موجودين عايز اسألهم بس....يا ربي بكونوا سودانيين...
والله ناسا دخلو علينا وما كلموهم...وبعدين ليش ناس التلفزيون ما يمشوا
ويزوروا الاماكن التي انقطع فيها العشم من السودانية التي نعرفها؟؟؟
بدل كراسيهم الحمراء في الاستديوهات!!!
بي طبايعنا...غايتو المتأكد منو تماما...لو حصل ما حصل لبشير وام
بشير هذا التعدي في سوق شندي...لرأيت ود رزق وود الحارث أول المكفتين لهذا
المتعدي...

.
الحبيب الغالي نزار حسين
الله يخليك
أحييك و أنت تنتشل البوســت من وهدته كلما هوى في الصفحة الأخرى

Quote: ثق يا الطيب اخوي انني اصبت باحباط سيظل ملازمني الي ان نستعيد خاصية وشخصية السوداني الذي اعرفه...

بيوجعني إحباطك، بالحــيــــــــــــل، لكن أحســن (لي) من أكون سبب في تقديم معلومات مضللة عن البلد و رسم صورة وردية..التغيير الحصل جد كبير، و "المجنون" دة وقف جنبهم في الأول..قلع العصير من الشافعة..قرطعو..بحلق في بشير مرتين..حتى مـدّ يدو الآثمة من ثم و كأنه يتابع إن كان سيتدخل أحد أم أن هؤلاء الضعفاء all alone .. و حتى بعد أن قامت أم بشير بتكفيته مثنى و ثلاث و رباع..لم يتحرك (الشارع السوداني)!! و هذا تحديدآ ما جعلنا نحرص على تضييق خروجهم من دون حماية..

Quote: بي طبايعنا...غايتو المتأكد منو تماما...لو حصل ما حصل لبشير وام بشير هذا التعدي في سوق شندي...لرأيت ود رزق وود الحارث أول المكفتين لهذا المتعدي...

طبعآ أقاليمنا لا تزال محافظة، و ليس ذلك لخيابة أولاد العاصمة، لا و الله، لكن لأنو وتيرة التغيير في الخرطوم طايرة طيران غريب، و نحن في الأقاليم عندنا ثبات نسبي..يعني العمالة الأجنبية من الحبش زمان و انتهاء بالبنغالة و الصينيين الآن، كلهم في الخرطوم و معسكرات الإنتاج بالخارج، و قيل إن بعضهم جاءنا من السجون..
دي كلها عندها آثار سالبة

تقديري
.

العزيز الطيب، بوست مدنكل

نرجو أن تكلمنا عن الخدمة الإلزامية للعائدين، هل هناك استثناءات أو أعمار معينة معفية، وعن كيفية الأداء والخيارات. لأن المخدمين أول حاجة بيسألوك هل أديت الخدمة الوطنية، ونحن طلعنا من عمن أول.

ولك خالص الشكر

العوض الطيب

.
مرحبتين عزيزي العوض الطيب

شكرآ ليك كتير على المرور و المساهمة

Quote: هل أديت الخدمة الوطنية

البارح في النشرة جابوا لينا خبر إنو موضوع الخدمة الإلزامية دة ح يكون فيهو تخفيف كبير..بمعنى إنو الناس ممكن تستخرج الشهادات و تتوظف بمزاااااج و later on ناس الخدمة ينادوهم..لكن خليني أتأكـّـد ليك من الممارســة الفعلية لأنو الوالد مرة قال لبتاع الجباية في سوق طابت:
ياخ الرئيس قال أورنيك خمسطاشر بس هو المفروض تتجمع بيهو القروش
الموظـّـف قال ليهو:
ياخ "دة" بيتكلـّـم ساي!!
لكن قول لي يا العوض..هل أديت الخدمة الوطنية؟؟

لووول

.

.

ما أظني تعرّضـت لموضوع الإحتيال...

"تعال ياخينا..معاك الأمن"...لازم تسألو بطاقة و تبحلق فيها كويس..و ما تكتفي الـflashing البيعملو مخصوص لبطاقة صاحبو..أو بطاقة مسروقة أو لقاها واقعة..إلخ..الجرايم بتاعة الإحتيال كترت جدآ..و لازم الناس تفتح عيونها كويس..
معظم الـcases بتحكي عن أن المحتال بيعرف جزء من المعلومات عن الضحية..فإنت قبل ما تسلموا القروش ..أو مفتاح العربية أو حتى اللستك الإسبير لازم تسالو أسئلة كتيرة..و تحرجو عدييييل كدة..ع شان تتأكـّـد..و لو في أي إمكانية لإتصال بالزوول الهو بيتكلم عنو..ما تتردّد إنك تقوم بالإتصال..
زوجة العقيد...........قاعدة في البيت في أماااان الله وقف في بيتها البوكسي بتاع التعاون نزل ليها شوال سكر كالمعتاد و مشى..بعدها بربع ساعة قام عواطلي مراقب الحي إستأجر/شحت بوكسي و جا خبـّـط على الباب، بسـُـلطة و قوّة عين، و قال ليها:
يا مدام الشوال دة مشتركين فيهو ضابطين ع شان الكوتة جات ناقصة و جنابو قال يجيبوهو راجع سريييع ع شان يقسموهو..قالت ليهو خلاص جدآ، و بالمرة أرفع معاك الجنريتير دة و قول لي محمد إنت نيست إنو واقف من البارح..السخانة كتلتنا..
قال ليها:جدددددددآآآآآآآ

.

Quote: البارح في النشرة جابوا لينا خبر إنو موضوع الخدمة الإلزامية دة ح يكون فيهو تخفيف كبير..بمعنى إنو الناس ممكن تستخرج الشهادات و تتوظف بمزاااااج و later on ناس الخدمة ينادوهم..لكن خليني أتأكـّـد ليك من الممارســة الفعلية لأنو الوالد مرة قال لبتاع الجباية في سوق طابت: ياخ الرئيس قال أورنيك خمسطاشر بس هو المفروض تتجمع بيهو القروش الموظـّـف قال ليهو: ياخ "دة" بيتكلـّـم ساي!! لكن قول لي يا العوض..هل أديت الخدمة الوطنية؟؟ لووول

والله أنا مغترب من 94 ولا خدمة إلزامية ولا دفاع شعبي
لكن المزعلني عملت بطاقة إعفاء من جهاز المغتربين زي عشروميت مرة، وكل مرة يشيلوها في المطار ويقولوا لينا أعملوها تاني لما ترجعوا! بالله ده مش جزء من الخدمة الإلزامية المستمرة، حقو يحسبوهو لينا في الساعات المعتمدة.

بعدين الله بيسألك نحن جينا قلنا للعسكريين ديل تعالوا أدوا خدمة مدنية؟ ما براهم بيجوا يعملوا انقلاباتهم دي لما تغلبهم العسكرية في زول قال ليهم تعالوا أقلبوها؟. ياخ مالم ومالنا.

ده غير عندي رأي في المؤسسة العسكرية في ظل الأنظمة الديكتاتورية لأنها بتكون مستخدمة في أجندة لا تخدم وحدة الوطن.

لكن أبداً ما عندي رأي في الخدمة الوطنية بل نحن فداء للوطن (بس ما للكيزان).

Quote: بعدين الله بيسألك نحن جينا قلنا للعسكريين ديل تعالوا أدوا خدمة مدنية؟ ما براهم بيجوا يعملوا انقلاباتهم دي لما تغلبهم العسكرية في زول قال ليهم تعالوا أقلبوها؟. ياخ مالم ومالنا.

العوض يا حبيب كيفك

ذكـرتني بالزوول القاعد قدام بيتو بالليل أول أيام الإنقاذ..جاهو عسكري معاهو دورية..قال ليهو:
يا زول أدخـل بيتكم .. إنت موش عارف إنو في حظر تجول?
عمك ببرووود قال ليهم:
و الله يا أولادي إنتو المتجولين..أنا قااااعد قدام خشم بابي..

.

أخي الفاضل الطيب... ليتك تعطينا لمحات عن ممارسة العمل الإعلامي في السودان مع بعض المقارنات إذا سبق لك ممارسة مهنة إعلامية خارج السودان.

.

مرحبا أخي الكريم محمد الأمين موسى
تقدير أكيد لمتابعتك و الإسهام

Quote: ليتك تعطينا لمحات عن ممارسة العمل الإعلامي في السودان مع بعض المقارنات

لا أستطيع وصف زياراتي الأكاديمية/التدريبية المتباعدة و التعاون المتقطـّـع مع الإعلام في أمريكا بأنها ممارسة مهنة إعلامية خارج السودان كما تفضلـّـلت في سؤالك..لكنها، بشكل أو بآخر، أعطتني فكرة عن العمل بالخارج أزعم أنني أستطيع من خلالها المقارنة مع فترة عملي في الميديا بالسودان..

** التعيين..يقوم في السودان على الوااااااسطة، بنسبة كبيرة، و الشللية و مؤخـّـرآ نظرية (الولاء قبل الكفاءة)..و تبقى نسبة (من رحـِـم ربـّـي) موجودة لكنها ضئيلة!! و هم الموهوبون القلائل الذين عملوا بغير واسطة..
فيما يقوم التوظيف في معظم الميديا بأمريكا على الموهبة بالأساس..و التدريب من ثم..و قليل جدآ من الـnetworking الذي لا يدخل في الواسطة البجحة مثل التي نراها في السودان..

** ملكية الجهاز الإعلامي نفسو..و طبعآ بالولايات المتحدة لايحق للحكومة، قانونيآ، أن تبث داخل أمريكا!! لذا فإذاعة (صوت أمريكا) موجهة بعشرات اللغات للجمهور المستهدف Target audience و لا تستطيع إلتقاطها داخل أمريكا..و الإعلام الحر يبدأ بهذه الملكية اللعينة..طبعآ ليس هناك أحد حرّآ بنسبة مائة بالمائة، لأن ملاّك هذه الأجهزة يعانون من تدخـّـل الـsponsors في عملهم باعتبارهم هم من يدفع القروش..لكن ممارسة العمل الصحفي في حد ذاته فيها حرية كبيرة جدآ..ليس مثل الهامش الذي نصبو إليه هنا و يصادره وكيل عريف أمن!!

في السودان الإذاعة كانت واحدة و التلفزيون كان واحد، زي ملعقة بيت العزابة، يشار لها بالألف و اللام فيقال (وين الـــملعقة)...و بالمثل يقال الــإذاعة و الــتلفزيون.. .و ظهرت الآن بعض المحاولات الفردية الناجحة مثل هارموني و أخريات..و بعض إذاعات البث محدود المدى أو ما يعرف بإذاعات الإف إم..و كل هذه الإذاعات زائدآ الصحف السودانية، ذات الهامش الأفضل من الحريات، كلها تتقيد بنشرة وكالة سونا للأنباء و تنتظر الإجازة من ذات الوكيل عريف أمن الذي يراجع النسخة الســوفــت من المادة قبل نشرها/ إذاعتها!!
طبعآ كلام زي دة لو قلتو لصحفي أمريكي ممكن يموت من الغبن!!
نحن في إذاعة الأمم المتحدة بالخرطوم، كتجربة محايدة و مميزة داخل السودان، لا رقيب علينا إلا الضمير المهني..لذا تجد إذاعتنا مغضوب عليها من المؤتمر الوطني و الحركة الشعبية والحركات المسلحة ..و كثيرآ ما نسمع ألقاب مثل (جلابة) من البعض..و (عملاء) من البعض الآخر,,و الشباب هنا يضحكون فقط و لا يزيدهم إلا إصرارآ على المهنية و التجرّد..معانا ناس هنا تابعين للمؤتمر الوطني و كثيرين حركة شعبية و بعضنا يناصر الأحزاب الوسط و غيرهم أقرب لثوار دارفور..لكن صدّقني المحرر المسؤول هو الذي يحدّد خط النشرة لليوم المعني..و أهمية الخبر فقط هي التي تجعله خطآ رئيسيآ أو تفرض بقاءه للنشرة التالية أو تجديده بمزيد من المتابعة لو كان خبرآ متحركآ..

الإعلام عندنا مخنووووق بالسياسة و السلطة

و في العالم الحر..الإعلام هو الذي يخنق الساسة بالسلطة التي يخولها له الشعب و الممارسة المعافاة..

تقديري

.

Quote: التعيين..يقوم في السودان على الوااااااسطة، بنسبة كبيرة، و الشللية و مؤخـّـرآ نظرية (الولاء قبل الكفاءة)..و تبقى نسبة (من رحـِـم ربـّـي) موجودة لكنها ضئيلة!! و هم الموهوبون القلائل الذين عملوا بغير واسطة..

أخي الفاضل الطيب... هذا بالضبط ما يحول دون اتخاذ قرار العودة للسودان، إلا على أسنة الرماح (كأن تضيق الدنيا أو يتم ترحيل المرء)... اعتقد أن الهدف من العودة والعمل في الوطن هو التمتع بحقوق المواطنة كاملة غير منقوصة والالتزام بواجباتها... وعندما يتقدم الولاء الكفاءة، يصبح الوطن منفى وتصبح أرض الله الواسعة هي المقبرة... وتصبح النوستالجيا هي الطاقة السلبية التي تحرك الإنسان... ومن اعتاد على العمل في شتى بقاع المعمورة وفقا لكفاءته، سيصاب - بعد عودته للسودان - بجرح نرجسي لن يندمل.
والحمد لله على نعمة التفاؤل..
شكرا لك على التنوير.

الأستاذ الطيب بشير

لك التحية والتجلة

لقد اتحفتنا بهذا البوست الهام والذى كنا منذ امد ندفع الناس دفعا للحديث عنه وعن الحياة بعد الغربة هنالك لا سيما لمن طال امده فى الغربة وانقطع عن السودان حتى اصبح يحتاج لمترجم يرافقه فى حله وترحاله فى السودان ولم تخيب رجائى فقد وفيت وكفيت واتيت بكل ما على الخاطر والبال

ولكن

بكل صدق وبكل صراحة اراك تتحدث زى ناس الحكومة حينما يخاطبوا المغتربين

فهم وانت تستهدفون شريحة الصفوة من المتعلمين ودليلى قولك اعلاه بأنه يكفيك (ماجستير الله والرسول)

ولافتراضى انك تحدث الصفوة فسافترض انك لم تحتك بغيرهم من انصاف المتعلمين وهم أكثر من الصفوة بكثير الا اذا اعتبرتك مثل الحكومة تسقطهم من الحسابات وتستعوض الله فى عددهم الكبير والوفير بلا فائدة ....

ولكنها حقيقة يجب ان تواجه

وهى ان اكثر من ثلثى المغتربين لا سيما فى دول المهجر العربى ( كما استهدفتهم أنت ) هم من هذه الشريحة التى لم تحمل حتى دبلوم ناهيك عن بكالوريوس .....

ترى هل فعلا اسقطت هذه الشريحة من حساباتك وترى انه لا فائدة للوطن من عودتهم ؟؟؟

وليموتوا بأشواقهم خارج الحدود تحت وطأة البغض من اصحاب تلك البلاد؟؟؟

نعم هم لا يحملون مؤهلات علمية عالية ولكنهم يشاركونكم الشعور بحب الوطن والوجد الى ذكراه وشغف العودة ولو يعيشوا عيشة الكفاف ولكن مشاكلهم اكبر من مقدرة عودتهم وذلك حديث آخر والحديث ذو شجون..

عموما لا ابخسك بوستك فهو هادف وجميل ورائع للشريحة المستهدفة وبكل صدق جعلتنى مقهيا طوال الصفحات الثلاث وانا اقرأ ترف ابناء الوطن وبذخهم واكاد لا اصدق تلك الارقام التى تكتبها من مدارس عالمية ومصروفات لم نحلم بها حتى فى الغربة فكيف بها فى الوطن ولكنى عدت لعقلى وقلت هؤلاء ليس نحن انما اولئك طبقة اخرى أثرت وعاشت كما ينبغى لها ان تعيش واللهم لا حسد وهنئيا لكم بهذه الحياة المترفة فى سودان العز ....

أخي الفاضل قرشو... أشكرك على المداخلة، ودعني أتداخل في الاتهام (الودي) الذي وجهته للأخ الطيب... اعتقد أن تجربة الأخ الطيب في غاية الأهمية، لأنها تقول بصراحة: إن الحد الأدنى للعيش الكريم في السودان هو أن تكون من صفوة الصفوة، بمعنى أنه لا يكفي أن تكون من أصحاب الشهادات العليا - كالماجستير والدكتوراه - بل لابد من أن يحالفك الحظ بأن تعمل في جهات بعينها كالأمم المتحدة أو شركات الاتصال وغيرها من الجهات التي تعطي رواتب بالملايين التي تعادل آلاف الدولارات... الطبقة التي تتحدث عنها تم طردها نهائيا من السودان ولا أحد يرغب في عودتها وهي تعامل معاملة العدو... تفرض عليها الجزية فقد لكي تتمكن من زيارة أقاربها، وليس من حقها أي خدمات مقابلة... وأحيانا يساورني الشك في وجود فتوى خفية تبيع أكل أموالها من لدن الجميع!
يجب ألا نقارن أنفسنا بدول كمصر والمغرب التي تستثمر في مغتربيها.. تبحث لهم عن فرص الاغتراب وتسعى لحمايتهم في الغربة وتستقبلهم استقبال الفاتحين بشعار طلع البدر علينا لأنهم يأتون بالخيرات... في المغرب: الملك شخصيا ومؤسسة تابعة له تستقبل يوميا الآلاف من المهاجرين العائدين دون أية مضايقات، لا يطلب منهم أي شيء إذ ينظر إليهم كالغيث.

.

Quote: يجب ألا نقارن أنفسنا بدول كمصر والمغرب التي تستثمر في مغتربيها.. تبحث لهم عن فرص الاغتراب وتسعى لحمايتهم في الغربة وتستقبلهم استقبال الفاتحين بشعار طلع البدر علينا لأنهم يأتون بالخيرات... في المغرب: الملك شخصيا ومؤسسة تابعة له تستقبل يوميا الآلاف من المهاجرين العائدين دون أية مضايقات، لا يطلب منهم أي شيء إذ ينظر إليهم كالغيث.

الله يخليك أخي العزيز محمد الأمين موسى

أين نحن من قهم كهذا؟؟

شكرأ للحديث الضاف

.