الغضب

بعد أزمة ألمت بظهرى حولتنى الطبيبة المعالجة الى جلسات علاج طبيعى .. وجدت كل مجموعة العلاج الطبيعى من النساء .. أو بالأصح من الفتيات اليانعات الفاتنات .. أخذت أتردد على جلساتى تحت مخالب إحداهن فى سن إبنتى .. فارعة فاتنة ولكن إبنتى أجمل ..

ذهبت اليوم خطأ نصف ساعة قبل الوقت .. فأنا أذهب كل يوم ثلاثاء الساعة الرابعة ظهرآ .. وكل جمعة الساعة الثالثة والنصف .. تفاجأن بحضورى المبكر .. لأن هنا إحترام الوقت ليس فقط عدم التأخير كما لدينا .. هذا إذا كنا نحترم الوقت أصلآ ..

إعتذرت وههمت بالإنصراف .. قالت لى مطببتى الحسناء "زميلتى لديها وقت بدلآ أن تعود بعد نصف ساعة" .. وافقت على الفور خاصة نصف الساعة لا تعود بى الى منزلى فلقد حضرت راجلآ .. ومن ناحية أخرى اليوم حره قائظ .. درجة الحرارة تعدت الثلاثون .. ربما أضحكت مقولتى أهل السودان .. ولكن أجسادنا تشبعت بصقيع لا أتمناه لهم ..

ذهبت الى الغرفة وأتت لى حسناء فى منتصف العمر .. ولكنها فتية مثل عشرينات بلادى .. بأدب جم حيتنى .. أخذت تتحسس فقرات ظهرى بهدوء وروية وأنا أقف على أرجلى بعد أن طلبت منى خلع قميصى وجذائى .. جعلتنى أستلقى على ظهرى .. ودست كفيها خلف ظهرى .. لم تقبض بقوة .. بل همدت يداها بدغدغة خفيفة أصابتنى بنشوة .. وفى هذه اللحظات عم صمت لم أسمع فيه سوى أنفاسى وأنفاسها من خلفى .. همست فى أذنى "لماذا أنت غاضب" .. فجعت وقلت كأنى أدافع عن نفسى "لست غاضبآ" .. لم تعقب .. بعد قليل تجمعت نفسى وسألتها لماذا طرحت علىّ هذا السؤال .. قالت "أنفاسك القصيرة أنبأتنى .. وتشنجات جسدك أيضآ" .. قلت "قد أكون غاضبآ ولكن ليس منك" .. إبتسمت و قالت "أعلم ذلك" ..

نعم هناك ما يغضبنى وغل كبير فى صدرى .. ولى أسبابى .. ولكنى أخبيه حتى على نفسى .. ولا يظهر فى تصرفاتى ولاكلماتى .. علمت به بعد ذلك الحوار المقتضب ..
ذهبت الى قدماى وسحبتهما بدون عنف .. وعادت وجلست خلفى ووضعت كفيها تحت رأسى .. بدرجات بطيئة جدآ صارت تحركهما .. تارة الى الداخل حتى عنقى وتسحبهما الى الخارج حتى يكون حمل رأسى على أناملها .. نعم أناملها وتلك الدغدغات التى أشبه بالنبض ..

صابنى دوار وخدر وشعرت كأن روحى تنسل منى بألم أتلذذ له .. وعندما تركت رأسى ومدت يدها مودعة مؤذنة بنهاية الجلسة .. كنت كمن إستيقظ من حلم تمنيت أن لا ينتهى ..


هل الغضب شيئ مادى يمكن إقتلاعه من النفس البشرية .. ولو الى لحظات ؟؟

الغضب
كما ذكرت يتملكنى غضب لم أشعر بكنههه ولا أحس بأنى غاضب .. حتى جلسة "الهنود الحمر" السابقة .. لا أخبئ بأن الأمر أقلقنى وأنا "زول ضغط" .. بحثت فى النت عن الغضب .. وجدت موضوعآ دسمآ أحاول ترجمته لكم .. وأعتقد واثقآ أننا كلنا يتحكم فى تصرفاتنا وكتاباتنا غضب كامن داخلنا لا ندرى به ..
أتمنى أن يشاركنا أصحاب الإختصاص لتصويبا..

الموضوع بعنوان: تحكم فى الغضب .. قبل أن يتحكم فيك

العناوين البارزة فى الموضوع:

ماهيةالغضب
كيفية التحكم فى الغضب (ضبط النفس)
إستراجية الحفاظ على حدود الغضب
هل تريد إستشارة (مساعدة) ؟

المصدر: Controlling Anger -- Before It Controls You
.

الجميل رأفت سلام

واصل متابعين رغم اننا ما من ذوي الاختصاص بس لانو الموضوع بهمني بشكل شخصي جدا

الصور الصور يا عمك

حبيبنا سفيان ود أهلنا ناس نابرى
شوق كبير

Quote: الصور الصور يا عمك

ياتو صور يا عمك .. كان صور الغضب إلا أنزل ليك صورتى .. وكان صور صاحبة الأنامل السحرية لازم ترسل لى شهادة من القمسيون الطبى بتوقيع شاهدين راشدين تؤكد عطب ظهرك .. وحماك الله من الوجع

محبتى

سلامات يا حافظ

Quote: واصل متابعين رغم اننا ما من ذوي الاختصاص بس لانو الموضوع بهمني بشكل شخصي جدا

والله يا حافظ بعد أن أنزلت هذا الموضوع .. قرأت موضوعك .. اوجاع مبعثرة صدقنى سخرت من نفسى وأسباب غضبى ..
سأواصل وأنا يدى فى الماء البارد .. يا ليت الله ينزل عليكم بردآ وسلام من عنده على طاقة الجحيم المفتوحة لديكم بفعل فاعل والله منها براء ..

محبتى

الأخ الـحـبـيـب الـحـبـوب،

رأفت ميلاد،
تـحـية الود والأعـزاز،
والسـلام العـطـر الحار لك وللعائلة الكريـمة... متمنيآ من اللـه تعالـي ان يـمن عليك بالصـحـة الوافرة ودوام العافية.- لـم اتـصـل بك فـي الفتـرة الأخيـرة لانني مازلت بموسكو ودفتـر التلفونات فـي الـمانيا.

*** - لـما قريت بوسـتك الـحالـي ضـحـكت كما لـم اضـحك من قبل!!!، ياأخـي انت قبل كتبت لنا يومـيـن عـن " الكـدندار " ومـسـحـوق الخفايش ومادارك مامـسـحوق الخفافيـش!!!!... وفـجـأة مابيـن غـمـضـة عيـن وانتباهـتها تكتب لنا عن حسناوات مسـتشـفي التدليك والـمساج!!

*** - بصـراحـة يارأفت، بـتـمني لك الصـحـة التامـة، ......لكن مابتـمنـي لك تطلع من الاسـتبالية دي!!!

" وجـه حاسـدك شـديييييد!!!"

لكم مودتي.

يا رافت يا اخوى خلينى من الغضب. اخوك عندو الام ظهرى تضايقنى اها يا ابلع (كافينول)

وده مافى ولا اجى عيادتكم دى اها رتب لى مواعيد ....

اسع تفتكرنى بهظر وتطلع الموضوع شمار فلى مرقه...

سلام وكبف حالك واحوالك عساك والاسره بخير

انا كنت مفكر امشى لى (بت بتى) لكن ما عارفه حيه ولا لا ...


تحياتى

ود سعد حبابك ألف[

Quote: B]يا رافت يا اخوى خلينى من الغضب. اخوك عندو الام ظهرى تضايقنى اها يا ابلع (كافينول)

أيوة كافنول بريحك .. سيبك من المداقرة .. وجعتنا دى لازم يكون عندك عيال بى أمهم أقل حاجة 20 سنة عشان يُنظر فى أمرك .. قايلا فيزا وطيارة ..

Quote: انا كنت مفكر امشى لى (بت بتى) لكن ما عارفه حيه ولا لا ...

بت بتى الله يرحمها ياخ .. ديك بتخلعك وتطير الرحمن من قلبك .. يوم شكلة فى سوق الشهداء أخوك عامل كلاى كتفو إنقلع .. ودونى ليها .. شبكتم جيبوا الطوبة وعملت ليها غلبة وهمية مع واحد من أحفادا .. نسيت كتفى وإنشغلت مع الزول المتلكع ده .. غدرتنى ورجعت كتفى .. قولة آآآى قطعتا فى خشمى .. ياخ ديل تكتيكاتم ما فيها حنية .. خلينا فى الطراوة دى أخير ..

تحياتى للأسرة ولأختنا وأولادهاوزوجها ..

كيفك يا بكرى .. طبعآ موسكو هسة أجمل ربيعها .. ما شفته لكن ب يالمقارنة بحرايتنا ..

Quote: ياأخـي انت قبل كتبت لنا يومـيـن عـن " الكـدندار " ومـسـحـوق الخفايش ومادارك مامـسـحوق الخفافيـش!!!!... وفـجـأة مابيـن غـمـضـة عيـن وانتباهـتها تكتب لنا عن حسناوات مسـتشـفي التدليك والـمساج!!

ولسة المدد .. ماشى أتجلى لامن أجلى .. خليك قريب وأنت موسوعة فى كل الإتجاهات .. وبعدين أحرف ناس المساج فى العالم على الإطلاق فى موسكو .. "وش خبيث" ..

Quote: بصـراحـة يارأفت، بـتـمني لك الصـحـة التامـة، ......لكن مابتـمنـي لك تطلع من الاسـتبالية دي!!!

الحراية ما مريحانى .. كان بعد المساج يختو ليك حاجة لستك سخنة تحت الضهر .. إسمها فانقو" .. يدمدموك بيها زى اللحاف فى ضهر اللورى .. تنوم تعسل وإمكن تحلم .. وتطلع من عندهم ناسى ليك كم طاشر سنة كدة .. لكن مع الحر ده أبيتا آخر مرة ..

Quote: " وجـه حاسـدك شـديييييد!!!"

أها يعنى أتمنى ليك وجعة ضهر على خفيف كده ههههههه

تحياتى

الحمد اللة على سلامة ظهرك.

فى اعتقادى ان الغضب ينتج من نقطتين او فى حالتين هما

الاول: رد الفعل لتصرف ما من شخص او جماعة فى النظرية الاجتماعية التى تتحكم فى علاقة الفرد مع

المجتمع وعلاق الفرد مع الفرد, كل الديانات السماوية والكتب التى انزلت من اللة اتت


لتنظم سلوكيات البشر وتعطى الانسان حقة فى الحياة.

الثانى: الطبيعة ,كأن تشاهد منظرا جميلا يبعث فى نفسك مشاعر معينة تجعلك تنتحب ,او تمر نسمات

الليل تدغدغ وجدانك فى هدوء ونعومة.

او ان ترى كلبا اوحيوانا يفترس غنيمتة فيضقى شئيا من الغضب,او تشاهد موقفا ماساويا

فكل هذة تبعث فى النفس الاحساس بالغضب.

الدراسات الاجتماعية تدعو الفرد بان يراعى النقاط الاتية

1- ان لا ترفع صوتك عاليا فى الكلام مع شخص .

2- ان تشعر بالامان والطمانينة.

3- ان تجعل الابتسامة مفتاح كلامك وتحيتك,وان لا يكون وجهك غاضبا يعطى دلالات ما.

وهنالك الكثير من النقاط التى يجب مراعاتها فى علاقة الفرد مع الاخر.

موضوع المساج والتدليك او العلاج الطبيعى لة مواقف طريفة فى الوطن العربى

نشرت فى المجلات العربية .............

لك السلام رافت

سيف يا وجه الخير يومك تلقى فيه كل الخير

Quote: كل الديانات السماوية والكتب التى انزلت من اللة اتت لتنظم سلوكيات البشر وتعطى الانسان حقة فى الحياة.

صدقت والله .. السماء أعطتنا كل الخير والطمأنينة .. وعكرناها بأيادينا .. لم ننفد نقول قدر ولطف .. ولما نغرق نقول كله بأمره .. وهو بريئ منا ليوم الدين

Quote: او ان ترى كلبا اوحيوانا يفترس غنيمتة فيضقى شئيا من الغضب,او تشاهد موقفا ماساويا

تعرف يا سيف يا ريت بقت على حيوان .. ذكرتنى قصة ونحن بنتسامر بالنت .. واحد أخير منه أنا .. آخر مرة زار السودان فى التمنينات .. بحكى بحرارة قال: (نومنا فى بحرى تصوروا تانى يوم الصباح لقينا فى الكوشة القدامنا حمار ميت) نطت واحدة من السودان ردت عليه: (حمار شنو ياخ هسة عاااادى تلقى فيها طفل ميت) الرجل تم الشهادة وما فتح خشمه[/B

Quote: ] 1- ان لا ترفع صوتك عاليا فى الكلام مع شخص . 2- ان تشعر بالامان والطمانينة. 3- ان تجعل الابتسامة مفتاح كلامك وتحيتك,وان لا يكون وجهك غاضبا يعطى دلالات ما.

غايتو التلاتة ديل يا سيف إلا يصرفوهم لينا كبسولات ..

سعيد كالعادة بطلتك

مداخلة مهمة عبر القارات فى قلب الغضب
كتبت د. حنينة

Quote: سلام رافت كنت مشغولة الايام الفاتت لطالما فكرت قبلاً كيف يمكن تفريغ شحنات الغضب قبل ان تدمرك؟ 1-بالتحدث لصديق وفي يفهمك و يحفظ سرك (لكنه كالغول و العنقاء يا رأفت) 2- التحدث الى متخصصين في هذا الشأن Professionals يرونك الطريق لكن لا يتعاطفون معك شخصياً It's their job, get on with it don't sympathise في الكورس الذي تحدثت لك عنه (تعرف البي هذه الأيام) الأوراق لا يمكن الوصول إليها للكن الذي أذكره أن المحاضرة ذكرت الآتي Every one can be a healer but be careful, keep negative charges out of your way أي إنسان يمكنه أن يكون معالجاً نفسياً لكن إحذري أن تصلك الشحنات السالبة عليك باليوقا يا رأفت و نفِّس غضبك إذهب لمكان فارغ من البشر ..بعيد إصرخ بأعلى صوتك و أغسل غضبك بدموع غزيرة و هي وسيلة رخيصة و فعالة لتنفيس الغضب!! __ لي صديقة عراقية عملت في قسم الأمراض النفسية قبل فترة وجدت عندها يوماً موبايل مصنوع من المطاط فسألتها عنه ردت.. إحدى شركات الأدوية توزعه لتنفيس الغضب عندما تشعر بالحنق و الشد العصبي عليك بالضغط عليه بشدة إعصره و أخنقه بدلاً من أن تخنق نفسك أو زمارة رقبة الأهل أو الجيران سلامتك من كل غضب always welcome سودان راى

رأفت إزيك !
الغضب والحزن ..
وجهان لمعول واحد هدنى !

سلامات ومفارة وانشاء الله الدست ايديها في ضهرك كفارة


تحياتي مروري للسلام والدعاء بالعافية لك ولمن تحب


.....................................................حجر.

سلامات يا حجر بزيارتك بيتنا نور

Quote: سلامات ومفارة وانشاء الله الدست ايديها في ضهرك كفارة تحياتي مروري للسلام والدعاء بالعافية لك ولمن تحب

الله يعافيك ياخ .. والدست يدها ما طلعت فاضية .. والله يا حجر زى قصص السحر .. ولا أخوك إتخلع ساكت ههههه ..

تحياتى للجميع طرفكم

مودتى

الصديق رافت ميلاد،،

تحية طيبة،،

اولا،
سلامة ضهرك،،،


اما عن الغضب، فأنا عندى نظرية:
1. نحن نغضب لاننا لا نفهم ما نريد (توقعاتنا مغايرة للواقع)،،،
2. نحن قوم غير متسامحون مع أنفسنا،،،




و بجيك راجعة،،،،

كيفك يا هالة

Quote: اولا، سلامة ضهرك،،،

الله يسلمك ويخليكى

Quote: اما عن الغضب، فأنا عندى نظرية: 1. نحن نغضب لاننا لا نفهم ما نريد (توقعاتنا مغايرة للواقع)،،، 2. نحن قوم غير متسامحون مع أنفسنا،،،

يا هالة نحن لن نفهم ما نريد .. وليس قصور
مننا .. نحن قوم مسيرون وغير مخيرون .. ويا ليتنا كنا مسيرون فى طريق معبد واحد .. تتغير القوانين صباح مساء .. وماتفعليه اليوم لا تستطيعى غدآ ..

فى يوم من الأيام فى نفس هذا السودان .. كانت مواعيد قهوة الصباح وشاى "العصر" تظبطين عليها الساعة .. ويمكن قضاء ثلاثة مهمات مبرمجة بين بحرى والخرطوم وأمدرمان ..
يجب أن تكون توقعاتنا مغايرة للواقع .. قبولنا بواقع مثل هذا هو بداية النهاية .. فيجب أن نكون "كسالى وحرامية وكذابين" لنكون جزء من هذا الواقع .. الذى قبل به الكثيرون .. فطوبى للغضبى والمجانين ..

نحن لسنا غير متسامحين .. نحن قرفانين .. ومحروقين .. وحانقين .. حتى ونحن نضحك ..

معليش فكيت فيك شوية زعل .. لكنه جزء من العلاج

Quote: و بجيك راجعة،،،،

مستنيكى

صلاح أبودية سلامات

Quote: الغضب والحزن .. وجهان لمعول واحد هدنى !

الغضب وليده الشرعى هو الحزن لك ولمن حولك .. عندما ينظّر المنظرون .. فهم يتحدثون عن غضب آخر مسئول عنه صاحبه وليس مفروض عليه كحالنا ..

سلامتك من الحزن ..

Quote: بت بتى الله يرحمها ياخ .. ديك بتخلعك وتطير الرحمن من قلبك .. يوم شكلة فى سوق الشهداء أخوك عامل كلاى كتفو إنقلع .. ودونى ليها .. شبكتم جيبوا الطوبة وعملت ليها غلبة وهمية مع واحد من أحفادا .. نسيت كتفى وإنشغلت مع الزول المتلكع ده .. غدرتنى ورجعت كتفى .. قولة آآآى قطعتا فى خشمى .. ياخ ديل تكتيكاتم ما فيها حنية .. خلينا فى الطراوة دى أخير

الطراوه دي ذاتها هي سبب وجع الظهر

حليل ايامك يا رأفت ايام كنت صحراوي

اسمع ما تشوف لينا واحدة من العشرينيات ديل لمعلم شمس كان تعالج ليه وجع الظهر المزمن بتاعو ده

تحياتي لك وللعائلة الكريمة

Quote: فى يوم من الأيام فى نفس هذا السودان .. كانت مواعيد قهوة الصباح وشاى "العصر" تظبطين عليها الساعة .. ويمكن قضاء ثلاثة مهمات مبرمجة بين بحرى والخرطوم وأمدرمان ..

بس يا رأفت..
كلامك الفوق ده ياهو سبب غضبك!

غايتو احتمال لما تمشي هناك وتلقي شمس الغضب ووجع الضهر يغادروا..

مشتاقين شديد شديد..

منى خوجلى .. أها زيارتك دى براها نزلت الضغط

Quote: غايتو احتمال لما تمشي هناك وتلقي شمس الغضب ووجع الضهر يغادروا..

بركة القدمتى كلمة إحتمال دى ..
يا منى بقينا على الهبشة .. فاشنه فى الخواجات ديل .. بى عنصريتهم بستحملونا .. أمبارح طلعت لقيت فى الشارع (كنترول) رخص عربات .. الراجل مشى 5 عربات ولما وصلته طلعنى من الصف للكنترول .. قلت أنت بتختار بشكل السواق ولا العربية .. عربيتى طالعة من الترخيص قبل أسبوع .. لونى ما مناسب معاها؟؟ الراجل ما رد .. طلب ورق العربية .. أديته الورق والرخصة والتأمين الصحى وكرت البنك وقلت ليه عندى تحليل بول بتحتاجه؟؟ .. رجع لى ورقى براااحة وإنصرف .. تقولى أمشى لشمس الغضب وووجع الضهر يفارق .. يا دوب الما بقى فينى بفعل فاعل ههههههه

السلام أمانة

ود أرباب يا حليلك

Quote: الطراوه دي ذاتها هي سبب وجع الظهر حليل ايامك يا رأفت ايام كنت صحراوي

(فى حاجة حزفتها هنا).. فى جدة يا محمد الشيخ كان عندنا واحد محشش إسمو "جربكس" .. سألو واحد "أنت يا جربكس كلاب جده ديل ما بهوهو ليه .. قال ليه من الرطوبة ههههههه

Quote: اسمع ما تشوف لينا واحدة من العشرينيات ديل لمعلم شمس كان تعالج ليه وجع الظهر المزمن بتاعو ده

ياخ شمس الدين تهبش ضهرو المنشى داك تجيها نفسيات .. ياخ هو أخبارو شنو ؟


تحياتى للأهل القراب والبعاد

Quote: .. همست فى أذنى "لماذا أنت غاضب"

كان تقول لها,, قاعد اقرأ سودانيز اون لاين على الريق.
انا عندى ليك علاج ,,
عليك باثنان من شعاع الشمس واثنان من شعاع القمر واخلطهما واخلط خليط الخليط فى هون بلا قعر تشفى بإذن الله ,,
وكان مانفع شوف ليك بدرة كبدة فار يتيم منقوعة فى سمن ساق بعوض.
عدل لاضافة العلاج.
سلامتك وفرانكلى كرامتك.

الفاضلابى يا عبد العزيز ..
كيف أحوالك .. وشايفك إتخصصت فى عمك أرنست ..

Quote: كان تقول لها,, قاعد اقرأ سودانيز اون لاين على الريق.

تعرف يا فاضلابى فى السودان كانت عندى قطيعة البتقطع النفس ديك متلحانى .. كنت بمشى لى خالتك واحدة نسيت إسمها عندنا فى الديم بتحجمنى وأرتاح لامن أتكيف .. قريبى د. فؤاد عبدالله بقطر .. الله يطراه بالخير ويواليه بالعافية .. قال يا عوير الحجة ما بتحلك .. يادوب بتنقل مركز الألم من مكان لى مكان .. وتتفك الزمة تعال أعالجك أنا .. ما سمعت كلامه وباريت البصيرة .. لامن جيت هنا قطعت بى والقطيعة قطعت نفسى .. أها سلمت أمرى لى الله ولى الدكاترة .. نخروا محل القطيعة وطلعوا ليك كيس دهنى قدر الليلة وبكرة .. والقطيعة الكمدة بالرمدة من يومها ..

دحين سودانيز أون لاين نقلت مركز الغضب .. موش برضوا فايدة ؟

Quote: عليك باثنان من شعاع الشمس واثنان من شعاع القمر واخلطهما واخلط خليط الخليط فى هون بلا قعر تشفى بإذن الله ,, وكان مانفع شوف ليك بدرة كبدة فار يتيم منقوعة فى سمن ساق بعوض. عدل لاضافة العلاج.

غايو خلطتك دى لا ضنب ضب من صحراء بيوضة ينفع ولا بدرة فارك كان لبستو كرفته .. ياهو شعاع الشمش الناقصنى معاه طرقة طمى من دميرة طاااازجة ..

Quote: سلامتك وفرانكلى كرامتك.

مالك مبخسنى كدة ..

رافت سلامتك والسودان كله كرامتك
انت تبرا من الالم
اكان انت بعد صور تك الضاحك فيها دي
وروحك الحلوه غضبان الناس
يعملو شنو

Quote: وشايفك إتخصصت فى عمك أرنست ..

ياخى الزول ده من زمان كنتو داسينو وين ,, نحن دايرين زول راقى زى ده
يختلف معاك لكن تحس انو اخوك الأكبر ماداير يأذيك ,, لكن زى ماشفت يا روفة ,, المنبر ده فيهو ناس مش تجيب ليك وجع ضهر فيهو ناس تجيب سكته قلبية ,, تحياتى لهذا السودانى العجوز الذى بقى عبقا فى تاريخ التعايش نستنشقه ليزول عنا الزكام الناتج عن عراكنا فى غير معترك ,,
الناس لوفهمت انو ربنا مانزل الدين عشان نختلف فيهو كان كل شئ بقا عال العال..

Quote: ياخى الزول ده من زمان كنتو داسينو وين ,, نحن دايرين زول راقى زى ده يختلف معاك لكن تحس انو اخوك الأكبر ماداير يأذيك ,, لكن زى ماشفت يا روفة ,, المنبر ده فيهو ناس مش تجيب ليك وجع ضهر فيهو ناس تجيب سكته قلبية ,, تحياتى لهذا السودانى العجوز الذى بقى عبقا فى تاريخ التعايش نستنشقه ليزول عنا الزكام الناتج عن عراكنا فى غير معترك ,, الناس لوفهمت انو ربنا مانزل الدين عشان نختلف فيهو كان كل شئ بقا عال العال..

تعرف يا عبد العزيز .. موضوع الخلاف فى المواضيع دى صعب جدآ .. عشان الأحكام المسّبقة .. ومهما كانت الروح جميلة يغلفها "الإنتقاد" .. والنقد بكون فى كل شيئ بكون بناء عدا العقيدة يتحول الى إهانة .. عشان كدة ناشدت أرنست أن يقرأ من الإنجيل بعيدآ عن المقارنة .. لكن ناس القوالب الجاهزة ما بريحوا ..

عشان كدة أخوك بعيد .. وزى ما بقول القرآن "انك لا تهتدى من تحب ولكن الله يهدى من يشاء" ومعلومة صغيرة مكتوبة فى الإنجيل .. إنه هناك أناس لم يحملوا "الناموس" وعملوا به فكُتب لهم الخلاص .. قريت الوصايا العشرة التى أنزلها الله على موسى يا فاضلابى ؟ .. ده مجمل الناموس وهى ملخص الأخلاق .. الكنكش فيها خارج روحه .. وبعدين يوم الفصل ما بخارجك إلا روحك .. ما بتحلك كان كنت مسلم ولا كنت يهودى ولا مسيحى .. عمايلك هى البتجيبك وا طة ولا تخارجك .. غايتو يوم ما عارف نزوغ منو كيف ..

غايتو الله فى ويهدى الجميع

حبابك بت أبو حريرة
تسلمى وتسلم أيامك .. يحفظ ليك الله الحفيدة المنورة البروفايل وأمها وأحمد وأبو أحمد
عاد بعد طلتك كان الزعل ما راح يبقى تلكك ساكت

ألف مرحب بيك وشكرآ لجميل كلماتك

يا رافت يا جدع,
قعدت اقرا المقدمة و وصلت لحتة مليص القميص و البنية الشابة و بدات الصدمة: What? Is he serious? و قلت ال ?!! midlife crisis و دى can't be?!! و بدا قلبى يدق دلدلدلدل و قلت اخونا has lost it big time.
اها الحكاية طلعت false alarm.
يا رافت لو الوطة سخنةهناك قوم اشترى لك اطناعشر هاينكين ساقطة. It helps cool you down.

طبعاً انا تلاتة يوم بقرا فى العنوان ... وخايف اخش اقرا ...

باقى "غضب" زول زى رأفت بكون مخيف شوية .... لأنو من النوع البيستبطن الغضب ....

كان لحق لامن سلّ غضبو دا فى خلق الله ...

على الأرض السلام!

لاكين اتكيفت من حنكة الـ Occupational therapist دى خالس خالس ...

(بالمناسبة؛ وين الصور؟)







... المهم ...

Quote: باقى "غضب" زول زى رأفت بكون مخيف شوية .... لأنو من النوع البيستبطن الغضب .... كان لحق لامن سلّ غضبو دا فى خلق الله ...

سلام يا تبارك
ياخ والله كان بقدر الزول يفشها برتاح .. كل ما الواحد يشمر يجيك ود حلال يرشك بموية باردة .. الوحد يكش زى الضب .. ويموت بى غله ..

جد يا تبارك كتابتنا كلها من غضب خارج الموضوع الحقيقى .. وكلمة المرأه طلعت نص الغضب وخلت الواحد قدام المراية .. ومافى طريقة تنصح الناس .. لأن اللحظات ديك تنسخ كل نصيحة ..

الحال ما بنصلح إلا بإصلاح عام .. يعنى إلا يلغو الدنيا دى ويعملوا لينا واحدة تانية فستا

تحياتى

Quote: قعدت اقرا المقدمة و وصلت لحتة مليص القميص و البنية الشابة و بدات الصدمة: What? Is he serious? و قلت ال ?!! midlife crisis و دى can't be?!! و بدا قلبى يدق دلدلدلدل و قلت اخونا has lost it big time. اها الحكاية طلعت false alarm. يا رافت لو الوطة سخنةهناك قوم اشترى لك اطناعشر هاينكين ساقطة. It helps cool you down.

غايتو يا زكريا قريت مع أخوى فى السعودية كلامك ده فى النت قطع مصارينا من الضحك .. ياخ نحن مابقينا على اللسان بس ..
غايتو الهاينكن أحسن وصفة وصلتنى لحدى هسة .. بس الوصفة بعد الجلسة ولا قبل الجلسة .. لكن للضمان بعد الجلسة بعيد بعيد
.