النذر اليسـير عن ( حـوش بكـري ) و ( سـودان البشـير )

تمّ ذِكر حوش بكري قبل سودان البشير
لتستقيم القافية مع النذر اليسير
.
.

ونعود

عفــواً
قد يكون هناك تكسير تلج كتيير للسيد بكري ابوبكر
ليس تملقاً ولكن من حقــه

مايجي واحد يقول لي كده وكده

هل الإدارة في الحالتين تتبع أسلوب
الرجــل الأوحــد ؟؟

بكري أبوبكر أنشأ الحوش من حُـر ماله
يعني ملك حُـر

البشير إستولى على السودان بالدبابة
رجالة عدييييييل يعني غصباً عننا

المنبــر العـام = وسط العاصمة
زحمة وجوطة
سلام وحرب
حب وكراهية

المكتبات الخاصة = أطراف العاصمة الجميلة
المنشية والرياض كافوري ومدينة النيل

لكن والله يابكري الخور ده غلبني عدييل
يكون شنو ياارب ؟؟

Quote: لكن والله يابكري الخور ده غلبني عدييل يكون شنو ياارب ؟؟

اولا تم تغير اسم الخور من منبر غير صالح للنشر الى منبر خاص باعضاء/ات المنبر العام

Quote: يكون شنو ياارب ؟؟

طالعنى الخلا
الانداية
ظهر التور
العامود
الراكوبة
انتنيه
العجل
فريق وراء.....وهلمجرا

منبر خاص باعضاء/ات المنبر العام او الخور هو
منبر للمواضيع الغير مرغوب فيها أو غير صالحة للنقاش او محزوفة او التى طلب اصحابها تحويلها الى هنا او مخالفة لقوانيين المنبر...الخ ..هذا المنبر يطلع عليه اعضاء/ات المنبر العام المسجلين فقط و غير مرئ لزوارنا الكرام

بكــري أبو شخص بكرياً ؟؟

يا للهنــا
يازول كنت تكلمنا نضبح ليك لوري .. والله جد
مرحب بك أخي أبوبكر صاحب الحوش والجود والكرم
جعل الله دارك عامرة دائماً

Quote: طالعنى الخلا الانداية ظهر التور العامود الراكوبة انتنيه العجل فريق وراء.....وهلمجرا

يعني يابكري إسمو : وريني رجالتك هنا .. مش ؟؟

يازول أحسن خليهم يتداوسو بي هناك وبرجعو أصحاب
أصلو السودانيين كده لو حجزوهم مابقيفو
والمنبر العام يكون للنقاش الثر والإبداع والجمال
مليون شكر لإستضافتنا رغم ما نسببه لك من متاعب وهدر للمال والوقت
تعمل شنو ؟؟ ده قدرك ولازم ترضى بيهو ..

ربنا يوفقك والجميع

المحكوم في الحالتين الشعب السوداني
بس بكري محظـوظ شوية
على الأقل ما محتاج لمحـو أميّة *

أميّة = فك الخط فقط

الحوش صــورة مصــغرة للسـودان بكل تناقضاته
كل صــوره
كل تراكيبه
طريقة التعامل متطابقة مع واقعنا
طريقة التفكير
طريقة الحب والكراهية
طُرق إختلاق المشاكل وطرق حلها ( الجودية )

فلو نجح بكري في إدارة الحوش بصورة تُرضي 70% من سكانه
فإنني
أرشـحه مسـتشاراً للرئيس عمر البشير
أو أن يترشح في أقرب إنتخابات رئاسية إذا أراد

بكري أبوبكر : أنشأ مملكتــه
عمر البشـير : إمتلك منشآتنا

عـمرالبشير
شغلتو الأساسية رئيس وبقبض راتب ومخصصات
عندو خدم وحشم وطبالين وإعلام

بكري أبوبكر
عندو عائلة وعندو هموم وبدفع من جيبو عشان الموقع
وبقطع من وقتو وقت أسرتو

التعبان منو فيهم ؟؟

الحبيب الرائع ثابت محمد
شكرا للمقارنة الظريفة
ومن كلامك استنتج انك تعمل فى مجال النت و تعرف معاناة صاحب موقع بحجم سودانيزاونلاين دوت كم ماليا,وقتيا و فنباو اسريا موقع يستهلك اكثر من 1400 GB من الباندوث شهريا ............ليت البقية يعرفون من يصفونى بالدكتاتورية و و و و....
شكرا مرة اخرى و تسلم يا حبيب و اصل..........

للبشير التحية
ولبكرى ابوبكر التحية
ولك اخى ثابت التحية
الاول قاد نصف قارة
والثانى قاد بورد مشكل الاطياف صعب المراس
اى سودان مصغر والاول مكبر
الثالث فى طريقه لقيادة بوست قد يدخله
من يحب الاول والثانى والثالث مثلى كده
وقد يدخله واحد يكره الاول ويحب الثانى
وما عندو قضية مع الثالث.......
وقد يدخله واحد يبغض الثانى ويحب الاول وكل
ذلك بسبب الديكتاتورية
هنالك تشابه بين الاول والثانى فى طريقة الحكم
الاول فى بداية الحكم كان عادل كذلك الثانى
الاول الايام دى اتصلح والتانى يمكن يكون فى
الطريق
بتوقف هنا ولو الكلام ما جاب لى هوا ساخن بواصل

الأخ ثابت وبكري
نتابع
سؤال فني للأخ بكري هل يمكن تقسم المنبر إلى أبواب بحيث كل من له اهتمام في موضوع معين يدلف من هذا أو ذاك الباب ؟؟
الأخ وليد500
البشير يقود نصف قارة مرة واحدة كدا ؟؟ كدي عاين كويس شوف الطرف الشرقي والغربي والجنوبي من نصف القارة وين محله في الإعراب مفعول به أم نائب فاعل أم مجرد خبر أو اسم (إنَّ) ؟؟!!

لا تظلموا بكري ابوبكر ، لأن المقارنة غير واردة أصلا.

سودانيز أونلاين جمعت فأوعت. كل قادم إليها يجد الترحاب. الكل يقول ما يشاء - يتساوى في هذا دعاة "الحرية لنا ولسوانا" إلى جانب من يتقاضون رواتب وحواقز من الدولة لإسكات صوت الآخر. حوش بكري ساوى بين المرأة والرجل في كل حقوق النشر والتعبير بأرقي وسيلة حضارية - الكلمة! بينما عشنا لنرى في السودان نساء طردن من مصدر رزقهن وهن يقمن بإعالة يتامى لمجرد أن حظ الواحدة منهن أنها جاءت إلى هذه الحياة "أنثى" لا ذكر .. في بلد إسمه السودان ، في زمن إسم من يحكم البلد شخص إسمه عمر حسن احمد البشير!!

حوش بكري أعطى السودانيين والسودانيات حق الإختلاف (الرأي والرأي الآخر) في كل قضية دون أن يحول إبداؤك رأيك في تهميشك أومعاملتك كإنسان من الدرجة الثانية.

وأخيرا فإن الحرب في حوش بكري تستخدم الكلمة وسيلة لإيصال الفكرة إلى الخصم، بينما نجد وسيلة الإقناع في سودان البشير وعلى مدى 16 عاما هي القمع..أضيفت إليه وسائل أخرى تزكم الأنوف -حماكم الله: شراء الذمم لمن هم أصلا للبيع !!

سيذكر التاريخ كلا من حوش بكري وسودان البشير ،لأن التاريخ نهر من الذهب والزبالة ، يحمل في جوفه كل شيْء: الصالح والطالح. لكننا على ثقة من أن التاريخ سوف ينصف فتى حلفاية الملوك الذي دفع من قوت أولاده ليمنح أبناء وبنات هذا الوطن في حقبة من أكثر حقب البلاد إظلاما فرصة أن يروا بلادهم عارية من كل زيف ، وأن يتنفس كل منهم/ن الصعداء ويجلس ليحكي ما يشاء ، وفي أي وقت.. ودون خوف!

Quote: لكننا على ثقة من أن التاريخ سوف ينصف فتى حلفاية الملوك الذي دفع من قوت أولاده ليمنح أبناء وبنات هذا الوطن في حقبة من أكثر حقب البلاد إظلاما فرصة أن يروا بلادهم عارية من كل زيف ، وأن يتنفس كل منهم/ن الصعداء ويجلس ليحكي ما يشاء ، وفي أي وقت.. ودون خوف!

أستاذنا فضيلي جمــاع
خوالص المــودة والتبجيل
لا أظن أنّ هناك أبلغ وأصوب مما ذكرته
ولا أظن أن هناك أسباب أقوى من تلك لتجعلنا جميعاً
نتشبث بهذا المنبر فهو المجال الوحيد لزفرة متظلّم
أو شهقة باحثٍ عن الحريـة
تلك الكوّة التي فتحها لنا بكري ابوبكر
رغم الهنات البسيطة ( والكمال لله ) هي كل مانملك الآن
لذا وجب علينا مساعدته ومساندته وشكره
لا إتهامه بالتقصير ونعته بالديكتاتورية

عبدالرحمـن الحـلاوي
خوالص المــودة

حسب ما أعرف أنّ تقسيم الموقع يحتاج لجهد كبير ووقت طويل
كل الأعضاء إعتادوا على سودانيز أونلاين بهذا الشكل
هل يسهُل تقبل موقع جديد بشكل وتقسيم جديدين ؟؟
هل تعتقد أن جميع الأقسام ستكون بنفس النشاط ؟؟
لا أظن ذلك
لكن هي وجهة نظر نتمنى دراستهاوعدم التّعجُـل في تطبيقها

Quote: وين محله في الإعراب مفعول به أم نائب فاعل أم مجرد خبر أو اسم (إنَّ) ؟؟!!

يالحــلاوي ده كلو ساهل
مانخشــااه .. أن يُصــبح خبـر ( كان )
لك المــودة الخالصة

Quote: الاول قاد نصف قارة والثانى قاد بورد مشكل الاطياف صعب المراس

وليد500
والله الأول نص القارة ده غلبو عديل لحدي ماقسم السلطة والثروة
ولسه في باقي حسابات في دارفور والشرق وأمم متحدة وقوات وعييييك
أما عن قيادة الثاني لبورد صعب المراس
هنا أبصم بالخمسة والخمسة التانية أرفعها تحية لبكري أبوبكر

Quote: هنالك تشابه بين الاول والثانى فى طريقة الحكم الاول فى بداية الحكم كان عادل كذلك الثانى الاول الايام دى اتصلح والتانى يمكن يكون فى الطريق

كدي أول حاجة نثبّت الأسماء عشان الدرب مايروح لينا
الأول = عمر البشير
الثاني = بكري أبو بكر
الثالث = شخصي الضعيف جداً
مش صاح كده ؟؟
طيب بناءً عليه قلت الأول ( كان ) عادل
والأيام دي إتصلح ؟؟ يعني من عادل بقى أكثر عدلاً ؟؟
أم أصبح إماماً عـادلاً .. أم عــادل إمام ؟؟
أما الثاني والله ما حضرتو زمان بس من ما جيت هنا وهو تمام
إلا كان حاجة تجينا باكر ولا بعدو ونلقى الموضوع في الخور

Quote: الثالث فى طريقه لقيادة بوست قد يدخله من يحب الاول والثانى والثالث مثلى كده

والثاث بحبك موووت ياوليد والله
لأنو عُمْر الإختلاف لا يُفسـد الود والمحبة
خليك عافية ومنتظرنك
لاتنحنــي لأي ريــح

الموضوع مُثّبت ؟؟
لالالا مابصدق والله ... دقيقة أشووف كويس

بس العنوان مالو كبير كده ممكن تصغرو يابكري ؟؟

بكري أبوبكر
ثابت يشـكرك على تثبيت الموضوع ويعدك بحقائق ثابتة
سوف يكون الموضوع بحجم هذا التمييز الذي شملته به
هذا وعد
مازال الموضوع في أوله والأفكار كثيرة

Quote: ومن كلامك استنتج انك تعمل فى مجال النت و تعرف معاناة صاحب موقع بحجم سودانيزاونلاين دوت كم ماليا

إنت عارف يابكري وصدقاً لي كلامك
والله العظيم في مواقع 200 GB فقط وبتتقفل من عدم الدفع
مش كده وبس .. كمان سودانيز الحركة فيهو عالية والحركة مكلفة جداً
غايتو نقول ليك شنو ؟؟
إحترق حيث أنت
وتحمّـل
ويكفيك فخراً أنك صاحب موقع سودانيز أونلاين

Quote: سيذكر التاريخ كلا من حوش بكري وسودان البشير ،لأن التاريخ نهر من الذهب والزبالة ، يحمل في جوفه كل شيْء: الصالح والطالح. لكننا على ثقة من أن التاريخ سوف ينصف فتى حلفاية الملوك الذي دفع من قوت أولاده ليمنح أبناء وبنات هذا الوطن في حقبة من أكثر حقب البلاد إظلاما فرصة أن يروا بلادهم عارية من كل زيف ، وأن يتنفس كل منهم/ن الصعداء ويجلس ليحكي ما يشاء ، وفي أي وقت.. ودون خوف!

التحية لبكري أبو بكر وأسرته الكريمة لأنهم يتحملون في سبيل إسعاد الآخرين....

جعفر هاشم
المــودة الخالصة
شكراً على توثيق هذه الجزئية الهامة

لو نظرنا للأمـر من زاوية محايدة
سنكتشف أنّ بكري أبوبكر يُعاني الأمرّين
فهو يدفع من وقته وماله
والمشكلة أنو برضو ما عاجب البعض

دى برضه سانحة كويسه
عشان نجدد الشكر والإمتنان لبكرى

وبرضه ما حيكفى

وتحايا ليك يا ثابت

الجميــل أبوذر بابكــر
أنت أقوى إضاءات هذا الفضـاء
أنت تنسابُ فينا كما البُــرء في الروح العليلــة
أنت أكبر هدايــا بكري أبوبكــر لنا عبر هذا الحوش

نجــدد الشكر لبكري ونستمتع بهطــولك

أهديك كل الجمال

Quote: دى برضه سانحة كويسه عشان نجدد الشكر والإمتنان لبكرى وبرضه ما حيكفى وتحايا ليك يا ثابت

التحية أخ ثابت

شكري لك الباش مهندس بكري أبوبكر

مكرر ثابت

والتحية لكل كتاب سودانيزاونلاين
علي إختلاف منهاجهم

ود زبيدة

منتصـر حسـن محمد
كل الإحتــرام على مرورك

Quote: والتحية لكل كتاب سودانيزاونلاين علي إختلاف منهاجهم

والتحيـة لكل من يحفظ لصاحب الحوش جميله
ويشكره على إتاحة فرصـة التلاقي والتلاقح

خالص المـودة

ودعكر
فاقدنك ياراجل
ويين الحي بيك ؟؟

شاكرين مرورك وتوثيقك الإمتنان لصاحب الحوش بكري ابوبكر
والله بكري بستحق أكثر من الشكر والإمتنان

خالص المـودة

غايتو يا بكرى شايفك مبسوط للمقارنة

دى ذكرتنى لما عادل إمام قالوا ليهو
يا خرنق ..

[I strongly object to have Bakri Abu Bakr compared to Omer Elbasheer
Bakri always has his own decision while Omer Elbasheer never had his
own decision ,so this copmparative post is UNFAIR

I strongly object to have Bakri Abu Bakr compared to Omer Elbasheer
Bakri always has his own decision while Omer Elbasheer never had his
own decision ,so this copmparative post is UNFAIR

أحييك أخي ثابت وأحيي سِيد حوشنا دا الإتْسَيَّدو بي حمرة عين فكرو والله كريم على حوشنا داك الإتْسَيَّدو زول حوش بانَّقا بي حمرة عيناً تانية. وفي شأن السؤال الدايماً مسئول: الوطن، ما الوطن حقيقي أم افتراضي؟ واقعٌ، حلمٌ، همٌ أم محضُ ذكريات؟...أقول: أجيبوا أنتم أما أنا فأقول قولي هذا وأستنفر الشعر لي ولكم. أيًّها الناس، قال الشاعر*:

Quote: صاحبي قل ما ترى بين شعاب الأرخبيل؟ أرض ديك الجن أم قيس القتيل؟ أرض أوديب ولير أم متاهات عطيل؟ أرض سنغور عليها من نحاس البحر صهد لا يسيل؟ أم بخار البحر قد هيأ في البحر لنا مدناً طيفية؟ رؤيا جمال مستحيل؟ أم كهوف القاع ترتجُّ ظلالاً ورسوما حينما حرَّك وحش البحر فخذيه أيصحو من نعاسٍ صدفيٍّ أم يمجُّ النار والماء الحميما وبكيتُ ما بكيتُ: من ترى يمنحني طائـراً يحملني لمغانـي وطني عبر شمس الملح والريح العقيم لغة تسطع بالحب القديــم ثم لما امتلأ البحر بأسماك السمــاء واستفاق الجرس الدائم في اشراقة الماء سألتُ ما سألتُ: هل ترى أرجع يومـا لابساً صحوي حلما حاملاً حلمي همـا في دجى الذاكرة الأولى وأحلام القبيلة بين موتاي وأشكال أساطير الطفولة

* هامش: الشاعر هو محمد عبد الحي والشعر من النشيد الثاني "المدينة" من قصيدة "العودة إلى سنار" والقصيدة كُتِبَت قبل أكثر من ثلاثة عقود من أول يوم مرَّ أول طيور الانترنيت فوقنا**

** هامش في جوف هامش (التعبير مستلهم من وصف علي المك لمن نام فحَلِمَ أنَّه نائم بأنَّ تلك النومة "نومة في جوف نومة"): فلنتأمَّل في بديع قول عبد الحي وكأنِّي بالصور التي يصفها تنطبق على الانترنيت:

Quote: أبصر كيف مرَّ أول الطيور فوقنا، ودار دورتين قبـــل أن يغيب في عتمة النور وفي حديقة المغيب وكانت الشمس على المياه أمشاجاً من الفسفور واللهيب تغرب من قلب مياه الأفق الغربي حديقة وهمية الثمار جمالها الجني تمرٌ، ورمانٌ وتفاح بلا أشجار يولد بغتة لكي يغيب في الشرار*** ثم رأينا أول الهدايا: ظل وجود دون تحقيق، وأمشاج من أشنة البحر على الأجاج والليف من بقايا الشجر الميِّت حيث حشرات البحر في مرحها الأعمى مشغولة تنقش من ظلمتها ودون أن تهتما بصور الليل تمحى صور النهار أشكال أبجدية الحياة بين علق البحار وحمل الهواء، رائحة الأرض ولوناً غير لون هذه الهاوية الخضراء وحشرجات اللغة المالحة الأصداء

*** هامش في جوف هامش في جوف هامش: أيُّها الناس، كفانا الله وإيَّاكم الشَّرَار والشِّرَار...وأبحروا فإنَّكم اليومَ لا تبحرون.

Quote: غايتو يا بكرى شايفك مبسوط للمقارنة

الجميل وضّاح المُحيامعتصم الطاهر
دي مش مقارنة
دي فروقات وكم هي كبيرة وشاسعة
هذا كما ترى نذرٌ يســير وسنواصل المسـير
نتمنى عودتك هنا مرة أخرى

خوالص المــودة

الآن
والآن فقط
أظن أن بعضكم قد أدرك ما يعانيه بكري أبوبكر
الآن فقط سيعرف من يريد أن يعرف عِظم المسئولية المُلقاة على كاهله
لم تتركه الدنيا لحالِ سبيله .. يصبر الرجل في اليوم ألف مرة
مُطالب بمتابعة كل ما يكتب في المنبر ولا أظن أن أحدكم يستطيع ذلك بمفرده
مُطالب بإقصاء هذا وإضافة ذلك كعضوٍ جديد
مُطالب بدفع رسوم الموقع
مُطالب بنشر العدالة بين الجميع
مُطالب بالسهر والرَهق من أجل أن يلم شملنا
مُطالب أن يُرضي الجميع ورضاء الجميع مستحيل وهو بشر
.
.
ليس ذلك فقط
فهو الآن مُطــالب بدفع مليـاري جنية لكاشـا

لك الله يا بكري أبوبكر