Post: #1
Title: نذهب الى الحرب ولكن على مضض (صلاح كوة كافي)*
Author: DKEEN
Date: 11-10-2014, 02:12 PM
Parent: #0
عرضت الفديو الخاص بي صلاح كوة على جماعة الاصدقاء في قروب الواتس آب... فقالت وفاء.. وقبل ان اورد ماقالته وفاء، وفاء زميلة دراسة، تخرجنا من القانون قبل سنين خلت، لاتزال في نسخة الانسان الاولى ..النسخة الطازجة للبني ادم السوي، نسخته التي ترى الاشياء بعين حقيقتها دون اعتبارات لغوائل الظن والتخمين والراي الناتجة من معالجات بيئة المجتمع الرقيب.. لم تتعرض بعد للتشويه بفعل الايام والانصات والريبة.. كانت كذلك قبل تسعطاشر عام، وفوجئت بعد خمسطاشر عام انها لاتزال على هيئة الطبع الاول.. ايامئذ ادهشتنا في سبتمبر وكنا مارقين من الاكزام هول وهي تبكي من فرط الامتحان، بعدها بدقائق جعجع الرصاص واقتحم الكجر الحرم الجامعي في تشكيلات بعد ان فلق الطلبة موكب الطيب سيخة وكان ايامها وزير الداخلية .. ونحن نلملم اطرافنا للجري قنا نلمم القوارير وجرينا عليها سريع وهي قاعدة تبكي تحت شجرة مهوقني.." ياوفاء يلا نتخارج من الجامعة سريع، ، البوليس كسح الجامعة ولازم نتخارج بي جهة كلية الاقتصاد هسي يلا سريع...الطلبة ضربوا وزير الداخلية" قامت على مهل على حيلها وهي تقول من بين دموعها وقد رفعت راسها ( داخلية الاولاد ولا البنات؟؟)
قالت وفاء بعد ان ارسلت الفديو عبر القروب، وبعد ان راته يترنح في خطوات متعثرة، نحيفاً كود البلد، فاحماً كمثلنا، لاتستبين له نوايا، ولاتجزم بقصدة، ولايستطيع الناظر له ان يحدد له مطلباً محدداً.. قالت بعد ان راته كحالته تلك بين اصوات الجباخة وقد علت وتضاجت، فمنها ماكان قاب قوسين وادني، ومنها ما استقر في حبل الوريد، فجلس ولم يسقط، ثم اضجع، ثم انقطع الفديو تاركا الاسى.
قالت: (ياحليلو..ده مهاجم؟؟)
والله ضحكت لمن راح همي..
الذين كنت احسبهم ابعد الناس عن عجاج المدينة وساكينها، قد اوفوا الرجل حق قدره.. وإذ يُعز علينا في زمان الناس هذا ان نجد وجداناً سليماً.. وإذ تتغشانا الظنون من اقوال الناس في زمنٍ تكاثرت فيه الاقاويل وتغشت الناس ظلاماتٌ .. وإذ الناس كسيحون، متخبطون، غافلون عن غاياتهم، منذورين للايام السود والسنين العجاف.. وإذ كل ذلك.. تمت تبرئته صلاح كوة من وجدان سليم معافى بكلمتان لطيفتان في اللسان عظيمتان في عموم المعانِ.. وردة على قبر صلاح القتها وفاء.. "ياحليلو..ده مهاجم؟"
كانت مروته نفسها لاتحمله.. ولو ان احدهم كورك فيهو ساي لربما خر صريعا من اثر الصوت.. ياخ ده باي قياس قسته ماممكن يكون مهاجم.. لغويا ساي ما ممكن ياخ، وجاء في معجم المعاني.. (هاجمَ يهاجم ، مُهاجمةً ، فهو مُهاجِم ، والمفعول مُهاجَم :- • هاجم العدوَّ هجَم عليه ؛ اندفع نحوه فجأةً دون ترقُّب :- هاجم اللاّعبُ حارسَ المرمى ، - يهاجم الذئبُ بأنيابه والثور بقرنيه [ مثل أجنبيّ ]: يماثله في المعنى المثل العربيّ : كلٌّ يستعين بما يتوافر له من سلاح . ) انتهى كلام المعجم تاني تمشي ساي جنب عسكري يخموك بي اربجي ويقول الناس بعدها كان (مهاجم).. كتلوك وشوهوا سمعتك ياصلاح..كلٌ لاكها بالقدر الذي اتيح له من خَلَعَة الدنيا وحب الـ show في التقاط الخبر واعلانه.. هذا وقد ذاع بيان مقتلك في تلزيون السودان صبيٌ يافع ليس له من حظ الاذاعةِ شي، قرا الخبر من على هاتفه الجوال في التلزيون الرسمي ذي البذيع في اسعار الخضر والفواكه في الملجا.. محاولاً قدر الامكان اكساب الامر اهمية المارش العسكري ليكتسب بعدها شهرة ذائع بيان هجوم القصر.. استخسر التلزيون في حركتك ياصلاح المسلحة دي مجرد بيان، وانت الوحيد الذي خرجت مطالبا بكيلك في وطن يكتال فيه الناس ويسرقون.. ولربما هي من هنات القائمين على امر التلزيون، ان يذيع غرير بيان الحركة المسلحة التي قدتها وحدك لاشريك.. عشتا حياة طويلة جدا كزول عادي حتى اول امس، تعسكر مع من يعسكرون وتسير في طوابير البيادة وتخدم الجيش السوداني كنوباوي ضليع في الاقدام والافعال العسكرية، فتغير كل تاريخك الى عته وجنون في فد يوم.. فسبحان الواحد خاتم الاعمال.. كان ممكن تموت في بيتكم ويذاع خبر وفاتك في نشرة ستة: توفى بامدرمان صلاح كافي كوه، شقيق كل من فلان كافي كوة،وفلانه كافي كوة بالسلاح الطبي يقام الماتم في الفتيحاب جنوب طرمبة الجموعية.. لاهله وذويه الصبر والسلوان وحسن المآب.
في اسف بليغ وود شديد اترحم على ذلك اول رجل يقود حركة مسلحة وحيدا،منفردا، ثائراً، متعثرا،جائعا، طارقا الحق عند ابواب السلطان الجائر..
مات وقد بارته الظنون والشائعات والاوصاف، ماظهر منها ومابطن.. اردوه بزخاتٍ رصاص توالت..مات وقد تبعته الشائعات وسيرة عسكرية في الجندية السودانية... قال العريف فخر الدين في جبل اولياء في شتاء 94 ( الرصاصة دي الحاجة الوحيدة المافيها (كما كنت)..لو مرقت تاني خلاص) مرقت رصاصات الحرس الجمهوري شخصياً لترديك قتيلا وانت زول اقل مايمكن ان يُقال عنك- من فرض هذالك- (ياحليلو) موت اخر في بلد الرصاص فيها مارق ساي، وداخل ساي..
نفساً ذكيةً من عامة الشعب جات بالباب ضحى، كحامل اورنيك المرض الصباحي، كتلوه عند عتبات قصر الشعب؟ "فاذا لاقاك بالباب بشوشاَ وحفي بضمير ككتاب الله طاهر انشبي الاظفار في أكتافه واختطفي.." بلاي ده هسي زول تحرشوا فيهو الحرس الجمهوري؟ أ لمثل هذا القتل خلق الحرس الجمهوري؟ حرسك ديل الا يقدرون ماهية رد العدوان.. اليس ثمة بيادة بتاعة تقدير لي جماعتك ديل؟ الا يستبين الناظر من خطوات صلاح ان القوة الكافية لرد عدوانه كانت يمكن ان تكون اقل من كمية الجبخانة دي.. الم يكن مبيناً انو صلاح كان بعافية اقل كتير من عافية الرصاص ياخ لو ماف قدرة للتقدير.. الاتخشون قدرة الله عليكم..
او كما قال مروان العبادي عن كتب الاثر عن ابو ذر الغفاري غالباً (عجبت لمن جاع كيف لايخرج للناس شاهرا سيفه) لقد تجلد الرجل نيف وعشرون عاما ثم خرج للناس شاهرا سيفه فرقد اطراف النيل عند طرف النهار..
اللهم ارحمه وتقبل رحمة الاصحاب قبولا طيبا..
*العنوان: من مقال لمنير العكش
|
Post: #2
Title: Re: نذهب الى الحرب ولكن على مضض (صلاح كوة كافي)*
Author: حيدر حسن ميرغني
Date: 11-10-2014, 02:32 PM
Parent: #1
اوفيت يادكين " رقبتي بالموت محنية لاني لم احنها حية" احسبه هكذا تمتم وهو يموت
- وحشتنا ياخ
|
Post: #3
Title: Re: نذهب الى الحرب ولكن على مضض (صلاح كوة كافي)*
Author: معاوية الزبير
Date: 11-10-2014, 03:05 PM
Parent: #2
الحدث ذاته المتداول، عندما يكتبه دكين يتخذ شكلا آخر ربما لأنه يأنسنه فقط دون حزبية ولا عنصرية ولا هيجان ربما يكتب دكين وهو يتأمل فقط دون غضب وهذا طبع المفكرين بستان ورد لأسرة كوة كافي
|
Post: #16
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-11-2014, 07:46 AM
Parent: #3
سلام يامعاوية وعسى ايامك طيبة
سريع سريع يحاول اعلام الجماعة ديل ان يجعلوا من حادثة صلاح مسالة جنون وعته..
يعني تخيل زول نوباوي جاي من الجبال او من ضهاري الخرطوم (كيفما كان) ..قاطع ليهو كم مية كيلومتر او قاطع ليهو كمية من الحلال والناس اكيد مر بي عةالم من ناس وباعة متجولين وعساكر ساي وبشر زاحة لحدي ماوصل القصر.. ايعقل ان يفوت كل الخلائف دي ويجي القصر يكابس الحرس ونجي في الاخير نقول (معتوه) العته ده غيروهوا..
|
Post: #4
Title: Re: نذهب الى الحرب ولكن على مضض (صلاح كوة كافي)*
Author: معاوية الزبير
Date: 11-10-2014, 03:05 PM
Parent: #2
مكرر
|
Post: #5
Title: Re: نذهب الى الحرب ولكن على مضض (صلاح كوة كافي)*
Author: ALWALEED ALSHEIKH
Date: 11-10-2014, 03:15 PM
Parent: #4
Quote: الحدث ذاته المتداول، عندما يكتبه دكين يتخذ شكلا آخر ربما لأنه يأنسنه فقط دون حزبية ولا عنصرية ولا هيجان ربما يكتب دكين وهو يتأمل فقط دون غضب وهذا طبع المفكرين |
دخلت فقط لأرى ماذا كتب دكين فهو من الناس الذين يضيفون لك كثيراً عندما يكتبون. و ليتك تدري أخي دكين كم هو مفرح للكثيرين عندما يقرأون اسمك كاتباً لبوست ما. و شكراً أستاذ معاوية فقد عبرت عن الكثيرين. و التحية لكما و وافر الاحترام
|
Post: #6
Title: Re: نذهب الى الحرب ولكن على مضض (صلاح كوة كافي)*
Author: Hadeer Alzain
Date: 11-10-2014, 04:01 PM
Parent: #5
صلاح كوة كافي الرجل الشجاع دحر الخوف (الساكن جووانا) وذهب ليموت ميتة الشرفاء
لنا الصدر دون العالمين أو القبر*
رحل صلاح وترك رسالة قوية قالها بوقوفه القوي أمام الموت :
أحمل روحي على راحتي .. وألقي بها في مهاوي الردى** فإما حياةٌ تسر الصديق .. وإما ممات يغيظ العدا ونفس الشـريف لها غـايتان .. ورود المنـايا ونيـلُ المنى لعمـرك إنـي أرى مصرعي .. ولكـن أَغُـذُّ إليـه الخطى أرى مقتلي دون حقي السليب .. ودون بلادي هـو المُبتـغى يَلَذُّ لأذني سماع الصليل .. يُهيجُ نَفْسِي مَسِـيلُ الدِّمـا وجسـمٌ تَجَدَّلَ فوق الهضـاب .. تُنَأوِشُـه جَـارِحات الفَـلا فمنـه نصيـبٌ لِأُسْـِد السَّما .. ومنه نصيب لأسـد الشَّرَى كسـا دَمُه الأرضَ بالأُرجُوان .. وأثقل بالعطر رِيـحَ الصَّـبا وعَفَّـر منـه بَهِـيَّ الجَـِبين .. ولكن عُفـارًا يـزيـد البَـها وبَانَ علـى شَفَتَـْيه ابْتـسام .. مَعـانِيْهِ هُـزْءٌ بِهـذِي الدُّنـا ونام لِيَحْـلُمَ حُلْـمَ الخـُـلودِ .. ويَهْنَـَأ فيـه بِـأحْلَى الرُّؤى لَعَمْرُكَ هذا ممـات الرجـال .. ومن رَامَ موتـًا شـريفًا فَذَا
فليتقبله الله في عليين.
وبشر الظالم بالخذلان في الدنيا والآخرة
شكرآ عزيزنا الغائب الحاضر دكين
_ أبو فراس الحمداني* قصيدة الشهيد: عبد الرحيم محمود**
.
|
Post: #7
Title: Re: نذهب الى الحرب ولكن على مضض (صلاح كوة كافي)*
Author: محمد البشرى الخضر
Date: 11-10-2014, 07:53 PM
Parent: #6
سلام وشوق يا دكين و تحية على الكتابة الباذخة كعادتك لكن للتنبيه الفيديو المتداول للشخص الأعزل من السلاح و بادي عليه الهزال و التعب و أثار تعليق وفاء ليس لحادثة المرحوم صلاح كوكو وما قيل عن الحادثة أن صلاح "قلع" سلاح احد الجنود و حدث تبادل لإطلاق النار كان نتيجته قتيلين من افراد الحرس بالإضافة لصلاح رحمهم الله جميعا
|
Post: #8
Title: Re: نذهب الى الحرب ولكن على مضض (صلاح كوة كافي)*
Author: وليد عكاشة
Date: 11-11-2014, 01:21 AM
Parent: #7
صحيح يا ود البشرى .. حسب ما هو متداول الفيديو موجود على الإنترنت من 2013
عمك دكين مسك ضنب الككو و إنداح .. دخل بى وفاء و مرق بى كوة ..
|
Post: #9
Title: Re: نذهب الى الحرب ولكن على مضض (صلاح كوة كافي)*
Author: صلاح عباس فقير
Date: 11-11-2014, 03:20 AM
Parent: #8
وبالنظر إلى سياق الحدث ودوافعه: تبقى هذه الكتابة المبدعة محتفظة بكل صدقها وتألُّقها!
|
Post: #10
Title: Re: نذهب الى الحرب ولكن على مضض (صلاح كوة كافي)*
Author: بريمة محمد
Date: 11-11-2014, 03:46 AM
Parent: #9
دكين مسك ضنب الككو ..
بريمة
|
Post: #11
Title: Re: نذهب الى الحرب ولكن على مضض (صلاح كوة كافي)*
Author: حمد عبد الغفار عمر
Date: 11-11-2014, 05:35 AM
Parent: #10
تحياتي يا دكين
ضنب ككو شنو يا جماعة الشبكتو بيها دكين دي
هسه الحصل دا داير ليهو شريط فيديو ؟
كتابة دكين دي ما فيديو كتابي ساري على 30 مليون مواطن صالح حايمين في السودان دا وتقريبا كلهم يا حليلم
الزول دا لو خلوهو قابل عمر البشير كحالة استثنائية بس كان حيحصل شنو ؟
أو لو قابلو مدير المراسم فيها شنو
أو لو طيبو خاطرو ساي كدا ما كان رجع وخل ليهم القصر بما فيهو
|
Post: #12
Title: Re: نذهب الى الحرب ولكن على مضض (صلاح كوة كافي)*
Author: محمد حيدر المشرف
Date: 11-11-2014, 06:39 AM
Parent: #11
هسع دي كتابة زول ماسك ضنب ككو ؟!!
|
Post: #13
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-11-2014, 07:19 AM
Parent: #11
هناك قصة مروية عن الشيخ خوجلي ابو الجاز والزبالعة في جزيرة توتي... وجدتها في الكتاب الذاخر الذي اجتهدت فيهو الاستاذة محاسن زين العابدين عن جماعة الزبالعة والأخيرة فئة نسبت للباطنية ومجونها من خلطة للنساء بالرجال. وحاربتها سلطنة الفونج والشيخ فرح ود تكتوك. واعتزل أبو الجاز هذه الخصومة ونأى بنفسه عن لجاجها. فشكاه الشيخ حمد ود أم مريوم إلى السلطان عبد الله ود عجيب شيخ العبدلاب في قري. قال حمد لود عجيب إن الزبالعة دخلوا توتي ولم يقاومهم أبو الجاز... فاستفسر ود عجيب خوجلي ابوالجاز. فكان رده: "تسألني عن الزبالعة ودخولهم توتي. عيني ما شافت. أضاني ما سمعت. أحمد ولدي كان إزبلع (صار من الزبالعة) ما خصاني. وحمد (ود أم مريوم) أخونا ما بكضب".
اها ياود البشرى في بلد لاتكاد تفرز فيهو الحقيقة من الوهم.. وفي بلد بتلقي فيهو عوجات نفسية واغراض تتم لاغراض اخرى .. وسوق باذخ تكال فيه الغبائن كيلاً.. في بلد لاتزال حادثة وقعت قبل اقل من 42 وقتل فيها عشرات الضباط لحدي هسي ماعارفين منو القتلهم.. وتتضاربت الاقاويل وتشتتت فيهادماءالعساكر في بين احزاب السودان واهواء المجندين.. حادثة يادوب ليها اقل من خمسين سنة تتغبش فيهاالحقيقة، بينماالناس تدري كيف مات سقراط وكميةالسم في الكاس كانت قدر شنو منو الكان معاه؟!! اكبر ثورة يتفاخر بها مثقفين البلاد لايزالون يبحثون عن من كان ورائهاالى ان ختم احد المسلمين القول في لقاء وقال (المخابرات الامريكية) يعني مجرد ان يقوم بريمة مثلا بمداخلة لتكذيب الخبر ..يجعلني اميل نحو تصديقه ولو كذب.. مانحنا كمان مجربين وفينا من عته الشعب وسوء ظنه وضبابيته نصيب..
في بلد ذي دي وفي حادثة زي دي ومع ناس ذينا وفي موقع زي موقع القصر ده دوما ستظل الاحداث فيها مثار لغط وغلاط وستنعدم فيها الشفافية لن نعرف يوما من قتل غردون في سلالم القصر.. ولن نعرف يوما من قتل الضباط الاطناشر.. ولن نعرف ملابسات مقتل كوة طالما ان ثمة كوة اخر يسقط واصوات رصاص تعلو..
في بلد عليها كل ماسبق من غباش يجب ان تركن الى الفطرة الاولى وان ترى الاشياء كما تراها لا كما يُظن انها كذلك.. عاين ليها ذي ما وفاء عاينت ليها... وانظر لها كما نظر اليها ابو الجاز انا عيني شافت الزول بقع ..وشافت كشك القصر الزبالة وشجر المهوقني..وعسكري الحرس..واضاني سمعت صوت الرصاص..
عيني شافت ..اضاني سمعت ووفاء اختى لاتنطق إلا كانسانة.. لننتظر ان يتم تكذيب الخبر ده كمايجب والى الحد الذي يقنع ذوي البصائر السليمة.. لنحذف بعدها من ذاكرتناالفديو ونبقي على حقيقة ان كوة قتله الحرس الجمهوري.. وان كوة قادعملا مسلحا منفردا نحو القصر الرئاسي.. وان كوة مضى الىهم محاربا كنوباوي ضليع في شؤون الحرب ولكنه مضى اليهاعلى مضض..
كان بقى المرحوم صلاح كوة فقدصدقت وفاء حين استفهمت مستنكرة..كونه لم يكون مهاجما وكان مابقى المرحوم صلاح كوة فقد صدقت وفاء حين استنكرت مستفهمة..كونه لن يكون مهاجما
ارايت كيف ان الذين عتقوا من ظلمة الظن والتخمين لا يخطئون..
|
Post: #15
Title: Re: نذهب الى الحرب ولكن على مضض (صلاح كوة كافي)*
Author: محمد حيدر المشرف
Date: 11-11-2014, 07:39 AM
Parent: #13
Quote: وكان مابقى المرحوم صلاح كوة فقد صدقت وفاء حين استنكرت مستفهمة..كونه لن يكون مهاجما |
والإحتمالات,عدا ضنب الككو, كثيرة .. ودكين لا يكذب وكان ما بقى المرحوم صلاح كوة, فذلك لا ينفي أن قوات الحرس الجمهوري قتلت صلاح كوة, أليس كذلك؟!! هناك, حتما, جثة مثقوبة بالرصاص.. تلك هي الحقيقة التي لا يراها الذين تستغرقهم تفاصيل الطريق عن غاياته.. ترى ما كانت غاية الكتابة ؟! لا أظنها وفاء بأي حال من الأحوال, ولا ذلك الفيديو الذي قيضت له الصدفة تأريخاً لا يكذب ووثقت الكاميرا تفاصيل مشهده الإنساني الفادح. تتعدد المقاربات نحو الجوهر الواحد, أنى ولجته يكون!
هو الفرق ما بين الاستقراء والتحليل .. تماما كما وصف التشكيلى كاظم العراقى
( هذا انا .. هذا جسدى اراه فى الرؤيا من الداخل ... كما كنت اراه وانا فاقد الوعى .... انا استقرئ ولا احلل .. هى الرؤيا تركتها لحالها فانطلقت حرة مثلما رأيتها ...)
|
Post: #19
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-11-2014, 09:21 AM
Parent: #6
مرحلة التحرر من الخوف حدها ان تفقد مايمكن ان تخاف عليه ياحيدر الزين ليست بعيدة على هذا الشعب.. الناس الان في السودان فقدت كل شي.. لم يعد متبقيا سوى بقايا من مقررات دراسية لشكل الوطن الجغرافي..
قريبا سينجلي الامر عن امر اخر..
خير شر ماتقدر تعرف.. قريبا لن ترى الذين دعموا هذا النظام يخجلون او يتوارون، فذلك دأب كل دابة لاتعقل.. عليهم الف لعنة تغشاهم ومن والاهم..
|
Post: #14
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-11-2014, 07:31 AM
Parent: #2
سلامات ياحيدر
لن نتوقع شيئا اخر غير الرصاص لي زول قعد 25 سنة لم يزد فيها سوى ان افقر الناس.. ماكمان الشعب ده فيهو المجازف الذي لايملك مايخسره.. وفيهو الذي يتم افقاره الى الحد الذي لايملك فيها مايمكن ان يخسره فلا يبقى له سوى الرصاص..
|
Post: #17
Title: Re: نذهب الى الحرب ولكن على مضض (صلاح كوة كافي)*
Author: محمد البشرى الخضر
Date: 11-11-2014, 08:57 AM
Parent: #14
بالحيل يا دكين نركن إلى فطرتنا كما فعلت وفاء لكن كمان نساعدها بالمعطيات المتوفرة ولا نغفلها, غير التاريخ القديم للفيديو المتواجد في النت من 2013, لا نغفل حقيقة ان هناك شابين قتلا, أعني جنديي الحرس الجمهوري, المنطق يقول انهم قتلا على يد صلاح الذي أتى مهاجما بسيف و قلع السلاح من أحد الجنود نعم ظهرت رواية اخرى تتحدث عن انه لم يطلق النار و هناك "طرف ثالث" قتل الجميع, على غرابة و افتقار هذه الرواية للمنطق, تبقى حقيقة أن هناك قتيلين - غير صلاح- لا ذنب لهما إلاّ تأدية واجبهما رحمة الله عليهم أجمعين.
________________________________
سعيد بالقراءة لك مرة أخرى رغم حزن المناسبة
|
Post: #18
Title: Re: نذهب الى الحرب ولكن على مضض (صلاح كوة كافي)*
Author: khaleel
Date: 11-11-2014, 09:07 AM
Parent: #17
بتسمت المذيعة العربية وهي تنسب حادثة القتل والرعب في القصر الرئاسي لـ(معتوه)، واتسعت الابتسامة وهي تُشير إلى أن سلاح الاقتحام كان (سيفاً).. وهي -فعلاً- مادة خبرية مُضحكة، ومثيرة للسخرية، وكذلك تُعيد العقول إلى عهد غردون باشا وما كان يفعله سحر السيوف في هذا القصر الرئاسي في ذاك العهد.. سلاح الاقتحام لم يتطور، فالسيف كان يحمله المعتوه حسب لسان إعلام الدولة، وكذلك الحماية كما السلاح في محطة عهد غردون، أو هكذا تقريباً كان شكل البلد في مخيلة تلك (المذيعة العربية)
هكذا تكلم الطاهر ساتي
السلام يغشي روح كوة
والتحيات دكين
|
Post: #20
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-11-2014, 09:34 AM
Parent: #17
سلام يامحمد البشرى وانشالله ياخ امورك طيبة.. سوري في غمرة الرد نسيت التحية.. فتحيتي تغشاك وتفوتك لي عيالك ومن بطرفك..
بالطبع السوداني وبالدارج من عاداتنا اترحم على كل الغلابة الذين ساقتهم ارزاقهم الى حراسة عمر الذي حكم فماعدل وما وجد ُبداً من ان يحرسه نفس الذين يقتلهم فيما بعد..
على حد المشاهدات وبعض سوء الظن الذي احسبه نصيبي من تركة الوطن كما اسلفت، فالذين قيل انهم ماتو مارايناهم وقد راينا جثمان جاثم قيل انه لصلاح كوه وابواق النظام غير محايدة وكلانا يعلم انهم لصوص ويمكن ان ياكلو مال النبي..
عليهم الرحمة اجمعين والله يعلم وانت ونحن نعلم الذين ظلموا واي منقلب سينقلبون..
|
Post: #26
Title: Re: نذهب الى الحرب ولكن على مضض (صلاح كوة كافي)*
Author: سامى عبد المطلب
Date: 11-11-2014, 12:06 PM
Parent: #20
الرحمة والمغفرة لصلاح كوة
|
Post: #23
Title: Re: نذهب الى الحرب ولكن على مضض (صلاح كوة كافي)*
Author: Haytham Ghaly
Date: 11-11-2014, 11:17 AM
Parent: #17
Quote: أعني جنديي الحرس الجمهوري, المنطق يقول انهم قتلا على يد صلاح الذي أتى مهاجما بسيف و قلع السلاح من أحد الجنود |
الاخ دكين
تحية وسلامات
وشكراً جزيلاً على الكلمات الانيقة والراقية والوافية في حق الشهيد كوة كافي
وشكراً ايضاً للاخت وفاء في التعبير المعبر جداً (يا حليلو) وفعلاً يا وفاء يا حليلو
ويا حليلنا نحنا زاتنا ويا حليل البلد كلها فالهزال قد عم كل شيئ حتى الارض انتقصت من جنوبها
وهي الان تنتقص من شمالها وايضاً لم يسلم شرقها فيا حليلا.
يا ود البشرى سلامات
يدهشني جداً انك غير مصدق رواية الراوي بان الرصاص انطلق من شخص اخر غير الثلاثة وارداهم ثلاثتهم
ولكنك تصدق رواية ان الشهيد كوة قد هاجم بسيف !!!! سيف عدييييل كدا ومعلوم ان السيف طويل ومن المستحيل
ان يستطيع احد ان يخبأه بين اضابير ثياب اعته معتوه خليك من الشهيد صلاح المفترى عليه بالعته.
اوليس من الغريب يا ود البشرى ان ذلك الجندي الذي قتل بالسيف وهو يحمل مدفعه الرشاش ان ينتظر ذلك المعتوه
الذي امتشق حسامه مهاجماً ينتظر حتى يرديه قتيلاً . هل يستوى هذا يا ود البشرى ؟؟؟
يقتله ثم يستولى على السلاح الناري ويطلق الرصاص ويردي اخر ثم بعد ذلك كله يطلق عليه الرصاص ويردونه قتيل!!!
هل هذه الرواية ممكن تكون هي الحقيقة.. ؟؟ اذا كانت هي الحقيقة فهذا يعني ان القصر ليس به حراسة البتة ويمكن
مداهمته من مجموعة معاتيه بالسيوف والاستيلاء عليه بكل بساطة.
عموماً انا ارى ان الرواية الثانية هي اقرب وبالذات في ظل عساكر الانقاذ المدربين على كل فنون العسكرية
لمدة 45 يوم فقط فبالتأكيد ليس جميعهم يجيدون استخدام الاسلحة ولا يجيدون شيئ سوى حماية سادتهم رقم فداحة الخسائر
ولكم جميعاً تحياتي
|
Post: #21
Title: Re: نذهب الى الحرب ولكن على مضض (صلاح كوة كافي)*
Author: نادر
Date: 11-11-2014, 09:55 AM
Parent: #2
Quote: لقد تجلد الرجل نيف وعشرون عاما ثم خرج للناس شاهرا سيفه فرقد اطراف النيل عند طرف النهار.. اللهم ارحمه وتقبل رحمة الاصحاب قبولا طيبا.. |
سلام يا صاحب
|
Post: #22
Title: Re: نذهب الى الحرب ولكن على مضض (صلاح كوة كافي)*
Author: عاطف عمر
Date: 11-11-2014, 10:56 AM
Parent: #1
تحياتي وسلامات يا دكين
Quote: "ياحليلو..ده مهاجم؟"
كانت مروته نفسها لاتحمله.. ولو ان احدهم كورك فيهو ساي لربما خر صريعا من اثر الصوت.. ياخ ده باي قياس قسته ماممكن يكون مهاجم.. |
Quote: بلاي ده هسي زول تحرشوا فيهو الحرس الجمهوري؟ أ لمثل هذا القتل خلق الحرس الجمهوري؟ حرسك ديل الا يقدرون ماهية رد العدوان.. اليس ثمة بيادة بتاعة تقدير لي جماعتك ديل؟ الا يستبين الناظر من خطوات صلاح ان القوة الكافية لرد عدوانه كانت يمكن ان تكون اقل من كمية الجبخانة دي.. الم يكن مبيناً انو صلاح كان بعافية اقل كتير من عافية الرصاص ياخ لو ماف قدرة للتقدير.. الاتخشون قدرة الله عليكم.. |
هذا كلام قوي ولكن ...... ورغم كل المآخذ المعددة .... فإن ( إنعدام المهنية ) قد تجلى في أوضح صوره ففي مثل حالة صلاح فإن القوات النظامية المحترفة لا يكون ( صلاح كوة ) هو أسمى أهدافها وغاية أمنياتها - دونما تقليل من مكانته - يكون هدفها الأسمى هو معرفة من يقف خلف صلاح كوة لذلك تحاول هى - أى القوات النظامية - للتعامل المحترف معه بتجريده من سلاحه وربما تعطيله لكنها في ذات الوقت تحافظ على حياته لحين الحصول منه على كل المعلومات ....
|
Post: #24
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-11-2014, 11:17 AM
Parent: #22
سلام يابو محمود.. سعيدين بان لاتزال حيا ياصاحب..
عاطف عمر
ديل ناس امسح اكنس ماتجيبو حي.. والبصل المعفن ريحتو واحدة
في نكتة قديمة احسبك سمعتها وغالب البورد ده يكون سمعها بس اظنها حين قيلت كانت بدايات عدم المهنية ولذلك لامناص من ايرادها: قالو في واحد ماشي في شارع القصر فجاة لقى الناس دي جارية وبتكورك، قام هو ذاتو جرى معاهم في معنى "البجري الخلق دي اكيد بجريني انا ذاتي".. اها وهو جاري قام سال اقرب زول جاري جنبو: في شنو الجري والسكليبة في شنو؟ الزول ردا : والله الكجر بقبضوااي زول عندو تلاتة بيضات بقوموا يقطعو منو بيضة.. عمك قام وقف وشال نفسو: وقال ياخي انا كان كده مامفروض اجري ..انا عندي اتنين بس. اخونا الجاري ردا عليهو وهو لسع جاري: ياخي اسكت واجري ..الناس دي بتقطع بعدين بتعد..
في بلادي عندنا تلاتة مشاكل اساسية تعطل كل شي.. شخصنة الامور الانقاذ الطقس
حقيقة مسالة الانقاذ ذاتا مرجعيتا مسالة شخصية..لبشير اخدالموضوع بيرسونال شديد..بل اخد السودان كلو بصورة شخصية..
لذلك هي مشكلتين على حد علمي شخصنة الامور ودي مسالة حلها صعب.. والطقس ودي حلها القيامة..
والحمد لله رب العالمين
|
Post: #25
Title: Re: نذهب الى الحرب ولكن على مضض (صلاح كوة كافي)*
Author: معاوية الزبير
Date: 11-11-2014, 11:37 AM
Parent: #24
Quote: مرحلة التحرر من الخوف حدها ان تفقد مايمكن ان تخاف عليه ياحيدر الزينQUOTE] طالما الناس ماسكة في الشكل دون المضمون: الزوله دي هدير الزين مش؟ بعدين أظهر ياخ
|
Post: #27
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-11-2014, 12:06 PM
Parent: #25
يامعاوية ياخ السماح
الغريبة انا اكاد اجزم بي اني شفتا الرصاصة بي غبارا تحت قدمي عمك الذي يمشي الهوينى في الفديو.. تشوف رصاصة على بعد فديو مصور على بعد ويغلبك تشوف اسم البت بصورة كويسة.. الواحد زمان كان حساس تجاه البنات.. هسي بقينا حساسين تجاه الرصاص..
بلاهي دي رباية دي على قول عماد عبدالله :)
وياخ اظهر انتا..نحنا ياما ضربنا المشاوي في حضرة الحوش الماهل..
|
Post: #28
Title: Re: نذهب الى الحرب ولكن على مضض (صلاح كوة كافي)*
Author: حامد بدري
Date: 11-11-2014, 12:19 PM
Parent: #27
مسا الخير ومسكاقجرو عليكم جميعا قبري مفتوح ولكني اقاوم وظهري للمدينه وسيدنا عمر ولا على بالو بس بالكتابه الزي دي يادكين بنهزم الدبابه
|
Post: #29
Title: Re: نذهب الى الحرب ولكن على مضض (صلاح كوة كافي)*
Author: Hadeer Alzain
Date: 11-11-2014, 12:51 PM
Parent: #25
الأخ الموقر معاوية دكين رضي الله عنه إنقطع عن الكتابة الراتبة لمن جينا المنبر .. ولهذا ! ولكن كنت أقراهو بإنتظام من مقاعد المتفرجين ..
أتمنى أن يعود للكتابة الذكية الراقية المليانة حياة عشان يفرق علينا ما نموت بالمغسة زي ناس كتيرين في المنبر وخارجه . في أناس كثر لا تحتمل الظلم الفادح. بتموت!
عشان كدا أتمنى يرجع يكتب وكل الجميلين أصحاب الضمائر الحية لتدب الحياة في أوصالنا وفي أوصال المنبر ولنتناسى هذا الظلم الفادح حولنا ,,,!
لك ولدكين التحية
___________
|
Post: #30
Title: Re: نذهب الى الحرب ولكن على مضض (صلاح كوة كافي)*
Author: وليد عكاشة
Date: 11-11-2014, 07:03 PM
Parent: #29
الناس فى السودان بتموت موت الضان .. لأسباب كتيرة جداً .. قلة العلاج و إرتفاع أسعارو و نوعيته الرديئة تقتل من السودانيين يوميا ما يفوق ضحايا الحروب .. غير الغبينة و دى كمان نسأل الله اللطف بالعباد ..
لكن يا دكين .. الزول المات فى القصر الجمهورى دا منهم و فيهم .. كان معاهم و قاتل فى صفوفهم .. شخصياً لا أحمل له أى نوع من التعاطف ..
كتابتك من حيث المبداء ما عليها غبار و بالتأكيد ما محتاج شهادة منى أو من غيرى إنك راجل كويس و كتاب ..
لكن تعودنا و شاهدنا كثيراً أنصار الحكومة بيتخذو الثغرات الزى دى عشان يكوجنو الشغلانة ...
هسى إنت بنيت كلامك السمح دا كلو على فيديو ما عندو علاقة بالحصل .. فيديو قديم .. كلام نبيل لكن مبنى على وقائع مختلفة و دى ثغرة ..
تعرف الكيزان و الناس البناصرو الحكومة دى عينهم بيضا خلاص .. و الزول بزعل لمن يلقو فرصة ينفسو قضية عادلة عشان ثغرات زى دى ..
أتمنى الفهم يكون وصل .. و بحكم معرفتى بود البشرى أنا متأكد دى منطلقاتو برضو لما كتب كلامو الأول ..
|
Post: #31
Title: Re: نذهب الى الحرب ولكن على مضض (صلاح كوة كافي)*
Author: ناصر احمد الامين
Date: 11-11-2014, 08:58 PM
Parent: #29
الرحمة لصلاح كوه .. بغض النظر عن الروايات و الفيديو و من بركاتو انو دكين جاء كتب هنا بعد غياب كتاباتك بقت شحيحة ياخ .. لكين لك العذر و لامثالك كلهم بعد ان اعتلي المنبر مطاريد الضباع و اشبال الارزقية و الوهم و العكاليت و الطرابيد و بعض الطحالب و العهن. شكرا علي الكلام الخدار و الحكي الطاعم لك كل الود و امنيات التوفيق يا صديق _____________________ هي الارض سلة المهملات و هم باعو و يبيعون فأدرك سماءك يا خالقي قبل ذاك المزاد .. بعد هذا الجرس .... عاطف خيري
|
Post: #32
Title: Re: نذهب الى الحرب ولكن على مضض (صلاح كوة كافي)*
Author: محمد البشرى الخضر
Date: 11-11-2014, 10:02 PM
Parent: #31
Quote: يا ود البشرى سلامات يدهشني جداً انك غير مصدق رواية الراوي بان الرصاص انطلق من شخص اخر غير الثلاثة وارداهم ثلاثتهم ولكنك تصدق رواية ان الشهيد كوة قد هاجم بسيف !!!! سيف عدييييل كدا ومعلوم ان السيف طويل ومن المستحيل ان يستطيع احد ان يخبأه بين اضابير ثياب اعته معتوه خليك من الشهيد صلاح المفترى عليه بالعته. اوليس من الغريب يا ود البشرى ان ذلك الجندي الذي قتل بالسيف وهو يحمل مدفعه الرشاش ان ينتظر ذلك المعتوه الذي امتشق حسامه مهاجماً ينتظر حتى يرديه قتيلاً . هل يستوى هذا يا ود البشرى ؟؟؟ يقتله ثم يستولى على السلاح الناري ويطلق الرصاص ويردي اخر ثم بعد ذلك كله يطلق عليه الرصاص ويردونه قتيل!!! هل هذه الرواية ممكن تكون هي الحقيقة.. ؟؟ اذا كانت هي الحقيقة فهذا يعني ان القصر ليس به حراسة البتة ويمكن مداهمته من مجموعة معاتيه بالسيوف والاستيلاء عليه بكل بساطة. عموماً انا ارى ان الرواية الثانية هي اقرب وبالذات في ظل عساكر الانقاذ المدربين على كل فنون العسكرية لمدة 45 يوم فقط فبالتأكيد ليس جميعهم يجيدون استخدام الاسلحة ولا يجيدون شيئ سوى حماية سادتهم رقم فداحة الخسائر ولكم جميعاً تحياتي |
وعليكم السلام هيثم لم الدهشة يا عزيزي و انت اسميتهن "روايات" و العهدة على الراوي أيًّا كان بمشاعره و قرائته للحدث و زاويته التي يرى منها و بالطبع مويته البزيدها كيفما اتفق سواء كان ابن عم القتيل أو حانق على الحكومة أو حزين على فقد زملائه وطالما المسألة روايات مختلفة ولا توجد احداها معتمدة من مصدر لا يرقى الشك لمصداقيته فمسالة التصديق و الإقتناع بإحداها بتبقى تقديرات شخصية و تختلف من واحد للتاني و كيفية التعاطي مع المؤشرات و تستصحب أيضا الإنطباعات المسبقة الحاجة الوحيدة التي لا خلاف عليها هي النتيجة: ثلاث قتلى عليهم الرحمة جميعا إثنان منهما كانا يؤديان واجبهما و الثالث إمّا قتلهما أو تسبب في ذلك
|
Post: #33
Title: Re: نذهب الى الحرب ولكن على مضض (صلاح كوة كافي)*
Author: Haytham Ghaly
Date: 11-12-2014, 05:42 AM
Parent: #32
ود البشرى
سلام من الله عليك
Quote: وطالما المسألة روايات مختلفة ولا توجد احداها معتمدة من مصدر لا يرقى الشك لمصداقيته فمسالة التصديق و الإقتناع بإحداها بتبقى تقديرات شخصية و تختلف من واحد للتاني و كيفية التعاطي مع المؤشرات و تستصحب أيضا الإنطباعات المسبقة الحاجة الوحيدة التي لا خلاف عليها هي النتيجة: ثلاث قتلى عليهم الرحمة جميعا إثنان منهما كانا يؤديان واجبهما و الثالث إمّا قتلهما أو تسبب في ذلك |
عشان كدا انا كتبت الجملة التحت دي
Quote: عموماً انا ارى ان الرواية الثانية هي اقرب |
في اعتقادي ان فرضية السيف يتبعها كثير من الخيال
فاذا افترضنا ان الشهيد كوة رحمة الله عليه معتوه او يظهر بمظهر المعتوة
ويحمل سيفاً في وضح النهار وامام القصر الجمهوري . فما الذي يجعل الجندي
الحارس ينتظر ذلك المعتوه حتى يقترب منه لدرجة تمكنه من طعنه وارداءه قتيلاً
ما اظن يا ود البشرى.
ياخي ديل العربية الامجاد ما بخلوها تجي مارة بي هناك تقول لي معتوه وشايل سيف عديييل كدا
ولكن كما تفضلت فان الامر روايات تخضع منطقيتها لزوايا مختلفة في تفكير كل فرد على حدة.
ولك الود
|
Post: #34
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-12-2014, 09:17 AM
Parent: #33
هدير اسم مليان وسمح وحاة الله.. لك العتبى كوني لم ادقق في تفاصيل الحروف..
معاوية الزبير طلع ضليع في شؤون النظر،،نسال الله انو جماعتو في البيت مايكونوا لاحظوا لي دقتو دي.. ونسال الله ان حكومتنا تكون لاحظت لي عدم دقتي دي..علها تشفع لنا في مشاغلة عامة في مول عام ذات مساء..
|
Post: #35
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-12-2014, 09:43 AM
Parent: #34
ود البشرى سلام تاني
خسارة فادحة هو الموت ماف شك.. حرس التشريفات ديل ماممكن يكونوا من ناس ودالباوقة وعيال صلاح غريبة ودبابين المنبر ديل مثلا ؟؟ عشان الاسرة كلها تكاتل من اجل قضية الرئيس الجمهوري الذي يسكن بالحرس الجمهوري والذي يابى ان يترك الجمهورية.. الموت والاختفاء عن الحياة لمن هم على شاكلتنا من عديمي اليقين والايمان فقد كبير لشريحة هامة من مجتمتع بالكاد يتماسك.. محزن جدا ان تموت وانت بالكاد تعيل عيالك حياً.. ومحزن جدا ان يظل آكلي قوت عيالك احياء يبرطعون تحت مبررات الواجب الذي تسوقه.. فانظر في معاني الواجب ثم تعال - بعد عام- فانظر في مآلات اسر الجنود الذين راحوا وكيف انتهت ومآلات رجال القصر كيف انتهت.. المعايير ذي ماقتا very شخصية..
|
Post: #36
Title: Re: نذهب الى الحرب ولكن على مضض (صلاح كوة كافي)*
Author: معاوية الزبير
Date: 11-12-2014, 01:47 PM
Parent: #35
شكرا يا هدير على التوقير لكن اسمحي لي أرد على أخونا عزيز شلالي، غلبني أفوتها
Quote: لك العتبى كوني لم ادقق في تفاصيل الحروف.. معاوية الزبير طلع ضليع في شؤون النظر،،نسال الله انو جماعتو في البيت مايكونوا لاحظوا لي دقتو دي.. ونسال الله ان حكومتنا تكون لاحظت لي عدم دقتي دي..علها تشفع لنا في مشاغلة عامة في مول عام ذات مساء |
جماعة البيت ما بدخلوا هنا، المشكلة جماعة سودانيز
|
Post: #37
Title: Re: نذهب الى الحرب ولكن على مضض (صلاح كوة كافي)*
Author: حيدر حسن ميرغني
Date: 11-12-2014, 02:23 PM
Parent: #36
2 أبريل 1998- 2011: والذكري الرابعة عشر علي مجزرة العيلفون..
بكري الصايغ mailto:[email protected]@yahoo.de
1- ***- حتي لا ننسـي، ***- وحتي تعرف اجيالنا القادمة كيف كانت ترتكب المجازر والأغتيالات بدم بارد في زمن حكم الأنقاذ، ***- وحتي لايفر قتلة مجزرة معسكر (العيلفون)، الذين نذكرهم بان القصاص العادل قادمآ ولامحال طال الزمان او قصر، فمثل جريمة قتل العشرات من الطلاب لاتسقط بالتقادم، ***- وحتى تظل ذكرى هؤلاء الشباب حيّة ، وكي لا يطوي النسيان هذه الجرائم البشعة يجب المطالبة بمحاسبة الجناه اينما كانوا، ***- وأيضا كي نذكّر سلطات النظام التي كانت مسؤولة عن التجنيد القسري ومطاردة الشباب في الشوارع والطرقات وإرسالهم إلى محرقة الحرب (إبتداء من كبار ضباط هذه السلطات وموظفيها وصولاً إلى حراس معسكر العيلفون وغيره من معسكرات التجنيد القسرى) , جرائم الإبادة والقتل الجماعي لا تسقط بالتقادم ومرور الزمن .
***- نعيـد سيـرة ماوقع بمعسكر (العيلفون).... ---***----------***-------***-------- 2- --- (أ)- ***- في يوم 2 أبريل 1998، عشية عيد الأضحي، حصد الرصاص ارواح شباب غر في مقتبل العمر في معسكر (العيلفون) للتجنيد القسري، في جريمة أخري تضاف الي سجل جرائم القتل الجماعي التي ارتكبها نظام المشروع الحضاري ليحصدهم رصاص الجنود ويدفنوا بليل دون ابلاغ ذويهم!!
(ب)- معسكر العيلفون: ---------------- ***- يقع معسكر (العيلفون) علي بعد 40 كيلومترآ جنوب شرق الخرطوم، واقيم المعسكر اصلآ لتدريب المجندين قسرآ قبل ارسالهم لمناطق العمليات العسكرية في جنوب وشرق البلاد في ذلك الوقت،
(جـ)- ***- كان المجندون يتعرضون داخل هذا المعسكر، وغيره من معسكرات التجنيد القسري لأسوأ انواع المعاملة والقهر والأذلال، وكان يتعرض من يحاول الهرب منهم الي عقوبات اشد قسوة وعنفآ. وفيما يتعلق بالعلاج، فلم يكن ينقل للمستشفي اي مجند، وكل من يعاني من حالة تستوجب الرعاية الطبية كان يتهم بمحاولة الهرب.
3- كيـف وقعـت المجزرة? ---------------- (أ)- ***- طلب المجندون السماح لهم بعطلة ثلاثة أيام خلال مناسبة عيد الأضحى، التي تعتبر عطلة رسمية في مرافق الدولة كافة، بما في ذلك القوات النظامية (هذا إذا افترضنا أصلاً ان معسكرات تدريب المجندين قسراً تلك كانت لها صلة بالمؤسسة العسكرية الرسمية).
(ب)- ***- رفضت إدارة المعسكر طلب المجندين وهددتهم بإطلاق النار إذا حاولوا عصيان الأوامر. بدأ المجندون عقب ذلك التجمع في طرف المعسكر المقابل للنيل محاولين الهرب.
(جـ)- ***- حينذاك أصدر قائد المعسكر تعليماته بإطلاق الرصاص، فقتل في الحال ما يزيد على 100 مجند، فيما حاولت مجموعة كبيرة الهرب باتجاه النهر، وكانت هدفا سهلا لرصاص حراس المعسكر. مع تواصل إطلاق الرصاص على ظهورهم غرق ما يزيد على 100 آخرين، ولم يعرف مصير المفقودين حتى الآن.
(د)- ***- دفنت سلطات الأمن جثث القتلى التي تم العثور عليها تحت إشراف وزير الداخلية ومدير شرطة العاصمة بالإنابة وعدد من قيادات نظام الجبهة في مقابر الصحافة وفاروق والبكري واُم بدة. قُدر عدد الجثث التي دفنت بشكل جماعي 117 جثة، بينما سلمت 12 جثة إلى ذوي القتلى.
4- هوية المجندين: ------------- ***- لم تفصح السلطات، كعادتها في مثل هذه الجرائم، عن مجرد مؤشرات حول هوية المجندين الذين راحوا ضحية مذبحة معسكر العيلفون. إلا ان المعلومات التي وردت حينها تدل على أن غالبيتهم من أولئك الذين جرى اقتيادهم قسراً إثر الحملات الدورية التي كانت تشهدها شوارع العاصمة لاصطياد الشباب من الطرقات والشوارع وإرسالهم لمحرقة الحرب طبقا لشروط التجنيد القسري التي وضعها نظام الجبهة الإسلامية. لم تعلن سلطات نظام الجبهة الإسلامية أسماء الضحايا حتى هذه اللحظة، ولم تقدم أي من المسؤولين عن المجزرة لمحاكمة. لا تدعوا المسؤولين عن هذه الجريمة يفلتون من العدالة!
5- --- ***- الطلاب الذين نجوا من الموت قتلآ او بالغرق، يؤكدون وباصرار لايتزعزع، ان كمال حسن علي الذي يشغل حاليآ منصب سفير النظام بالقاهرة، هل الذي اصدر التوجيه باطلاق الرصاص علي المجندين الفارين ابان فترة حكمه للمعسكر، احدآ من هؤلاء الذين كتبت لهم حياة جديدة ويعيش حاليآ باحدي دول الخليج،انه علي استعداد تام للشهادة امام اي محكمة سودانية او اجنبية تنظر في موضوع تصفية المجندين جسديآ بمعسكر (العيلفون)، وانه مابقي علي قيد الحياة سينسي القائد العسكري كمال حسن،
***- كثرون من الكتاب بالمواقع الألكترونية التي تهتم بالشأن السوداني، ومنذ تاريخ وقوع المجزرة عام 1998 وحتي اليوم، يكيلون الهجوم الضاري علي كمال حسن دون غيره من الذين اشرفوا علي معسكر (العيلفون) وقتها، اشارت الاصابع نحوه بانه القاتل الذي صفي الشباب بكل دم بارد،
***- بعض المقالات التي بثت بالمواقع الألكترونية، اشارت الي ان الرئيس البشير تعمد ابعاده للقاهرة بعد الجريمة وليشغل منصب مدير مكتب حزب المؤتمر بالقاهرة، وبعدها سفيرآ للنظام بالقاهرة، ولكن هذا الابعاد لم يشكل عامل نسيان للناس، الذين مازالوا ومن اربعة عشر عامآ يتذكرون المجزررة الجزار!!
***- احيط السفير نفسه وراحت تلمع صورته وتحاول بقدر الامكان ان تلهي الناس عن ماحدث بالمعسكر المشئوم، ولكن بعضآ راحت تؤكد من القاهرة، ان اعضاء هذه البطانة هم الاصدقاء الذين عملوا مع كمال بالمعسكر!!
***- والشيئ الغريب في الموضوع، انه ومنذ 14 عامآ ماحاول هذا السفير حاليآ (الدبابي) سابقآ وان يدافع عن نفسه ولو بكلمة واحدة، ولا حاول ايضآ وان ينفي عن نفسه تهمة ارتكاب المجزرة!!
6- ***- غدآ الأثنين 2 أبريل 2012، تتوجه مئات الاسر للمقابر ، للعام الرابع عشر للترحم علي اولادهم الذين ماتوا غدرآ لالشئ الا لانهم طالبوا باجازة يقضونها مع أهاليهم وذويهم، بعض هذه الأسر ستقرأ الفاتحة مرة واحدة علي القبور، لانها لاتعرف اين دفنوا اولادهم!!
- اكيد في ناس بتصدق روايات الحكومة برضو في هذه الحادثة البشعة التي حكى بعضا منها شهود عيان ماعارف الفايدة من الغلبة شنو في حاجة واضحة سببها نظام ادمن ازهاق اراوح المواطنين بالعشرات اسأل الله الرحمة والمغفرة للشهداء والشهيدات وان يرينا سلطانه وجبروته في من دعته قدرته على ظلم العباد
|
Post: #38
Title: Re: نذهب الى الحرب ولكن على مضض (صلاح كوة كافي)*
Author: الصادق اسماعيل
Date: 11-12-2014, 05:58 PM
Parent: #37
الرؤيا هي الأهم
والشوف واجب وطني
ودكين زول بيحب "الشوف" والشوف برضه
وارواية باقية، ولو لم يكن هناك فديو من أساسه
والمشكلة إنه الزول دا لو "كتل" جميع من بالقصر
برضه دا ما مُهَاجِم
الزول دا مُهَاجَمْ، وقيل مَهْجوم في رواية "وفاء" الأخرى
ولو كتبه صحفي فسيراه خبر هجوم على قصر يتشابه مع الهجومات الأخريات
وسيفكر في الـ(Breaking News) ما ستطاع لذلك سبيلاً
وربما تمادى الخيال بذلك الصحفي (لقمع الغلاط في الحلة) بإعتبار أنه كان هناك.
وود البشرى في سودانيز سيرى الخبر ويبدأ في التأكد من مصداقيته من الإساس قبل أن يخط كيبورده بكلمة
فهو يرى الخبر "مجرد جرة حبل" يخافها كما يخاف "الدبابيب".
وبريمة همومه أُخْر، ليس من بينها هذا الصلاح كوة.
لذا يرحمنا الله بدكين "يُرِينا ما يَرى" ويتركنا أمام الرشاد وحدنا "نتبعه أو نضل سبيلا"
لا أنكر، سمعت الخبر وهضمته كخبر ممكن الحدوث في جمهورية صقر الجديان.
ولكني رأيته وفهمته حينما "أرَانِيَّه" دكين
فيا حليلنا وحليلو وحليلهن شكراً دكين
|
Post: #39
Title: Re: نذهب الى الحرب ولكن على مضض (صلاح كوة كافي)*
Author: محمد البشرى الخضر
Date: 11-12-2014, 10:33 PM
Parent: #38
وعليكم السلام يا دكين وحتى لو كان هؤلاء الحرس من الجماعة الذين ذكرت لا اعتقد ان هذا يصنع فارقا في قرائتي للحدث أعتقد أن التباين هنا جاي من انك يا دكين - وكثير من الأخوان - قارين الحدث تحت تاثير المكان الحصل فيه و القصر ورمزيته البتجيب خمسة وعشرين سنة من الظلم و الطغيان وشايفين في تصرف المرحوم صلاح بطولة و في موته ماساة اغريقية في حين نفس الحادث بنفس التفاصيل ممكن كان يتكرر في بوابة اي جهة حكومية تحمل لافتة ممنوع الإقتراب و التصوير طبعا تصريح "ماكينة اللحام" المعتاد الذي يعررف المسؤول الحصل شنو وإحساس أن الحكومة كالعادة تكذب وتخفي الحقيقة ساعد على فرض القراية دي أنا قرات الحادث مجردا وكما هو: شخص يقتحم مكان ممنوع الدخول فيه و حراس يؤدون الواجب تسبب ذلك غفي مقتله ومقتلهم .
تحياتي يا الصادق, القصة هنا ما مصداقية الخبر فا دي ما عليها خلاف, ولا حتى مسالة الفيديو المشابه الإختلاف في التقييم.
|
Post: #40
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-13-2014, 08:43 AM
Parent: #39
Quote: قارين الحدث تحت تاثير المكان الحصل فيه و القصر ورمزيته البتجيب خمسة وعشرين سنة من الظلم و الطغيان |
لذلك يظل اي عمل موجة مباشرة ناحية الراس هو عمل جدير بالنظر واولى من غيره..
Quote: وشايفين في تصرف المرحوم صلاح بطولة و في موته ماساة اغريقية |
ولان المرحوم كوة قصد مكان الرئيس فتلك بطولة ومآساة نوبية اخرى..
Quote: في حين نفس الحادث بنفس التفاصيل ممكن كان يتكرر في بوابة اي جهة حكومية تحمل لافتة ممنوع الإقتراب و التصوير |
لا اعتقد ان تشبيه اي مكان تاني بالقصر يمكن ان يكون تشبيه عادل من حيث نوعية الاثر المتروك..
من ناحية تانية، انا لحدي هسي اعتقد انو الفديو خاص بالمرحوم كوة، لعدةاعتبارات : 1- لم ارى هذا الفديو إلا مع هذه الاحداث 2- مكان الفديو هو ساحة القصر بالكونتير القبيح وشارع النيل.. 3- الرجل بقصفو فيهو بي رصاص..حتى انك تسمع في اخر المقطع ( ضربو في كراعو) بوضوح. كما ان حادثة ذي الفي الفديو دي لم اسمع بها برغم انها مفروض تكون مسالة منظورة ومعلوم عنه، على الاقل لانو ضرب النار ده لم يكن مثلا في بيت علي دينار.. وعلى " حد علمي" انو في 2013 ماكانت ثمة حادثة سمع بها الناس في سياق الفديو ده.. و"حد علمي" هو مناط كتابتي كما تعلم.. لذلك فان الخبر القائل بان الفديو قديم هو خبر اقل صدقية من الخبر بتاع انو الفديو ده حق صلاح... وجماعة محاربي الجهاد الالكتروني يسعدهم التضليل ونشر البلبة وتغبيش الحقايق.. ولايسعدني ابدا ان يكون هسي واحد فيهم قاعد بقول : ماقتا ليكم لو كضبنا الفديو القصة دي حتمشي ذي موضوع شــــرامـــيـط الواتس كما ولايخفى عليك ان بعض الشهادات هنا ليست شهادات ثقاة ويمكن ردها ووصفها- على اقل تقدير- بانها مغرضة ..اي صيغت لاغراض قاصدة سواء ان كانت سياسية او غيرها(حالة بريمة) وقد تتفق معي ان مجرد التشكيك في صدقها بدون مساكات مسالة المعيار فيها شخصي وبالضرورة ليس ملزما.. (كما في حالتك) لذلك فمن الصعب انو يجيني زول يقول لي ياعزيز الفديو ده قديم بدون اي دلائل اوبينات مقبولة..طوالي انا اقوم اصدقو لمجرد القول واكذب ظاهر الامر والبينات الظرفية المصاحبة.. وكما اسلفت فيما سبق، يظل الامر الظاهر هو الحقيقة التي يجب الاخذ بها الى ان يثبت للناس ان ثمة حقيقة اخرى..
Quote: أنا قرات الحادث مجردا وكما هو: شخص يقتحم مكان ممنوع الدخول فيه و حراس يؤدون الواجب تسبب ذلك غفي مقتله ومقتلهم . |
كان عادي ماعارف!! عادي كيف ياخينا.. لايمكن ان تقر الخبر ده بشكل عادي ذي ماقتا، وإلا يكون مؤشر قراية الاخبار عندك مميل او فيهو اعتوار، لانو المكان ليس مكان عادي والظروف الانحنا فيها ليست عادية، ومافي شي اساسا بقى عادي.. يعني هسي ممكن تقراهو ذي كانك بتقرا في خبر هجوم مسلح من الحركات المسلحة على معسكر "كلمة" مثلا؟ دي مسالة ممكن تكون عادية لانو الارض هناك مصنفة ارض حرب..مقتل جنود اليوناميد عادي في منطقة فيها كوماج شديد متواتر..ولايامن المسافر في تلك النواحي في غالب الاحتمالات.. بس مسالة هجوم على القصر الجمهوري ليست عادية ولايمكن تصنيفها من قبيل الاخبار العادية فشارع النيل ليس منطقة عمليات حربية ويأمن الناس على اغنامهم في ذلك الشارع من الذئب..
Quote: وحتى لو كان هؤلاء الحرس من الجماعة الذين ذكرت لا اعتقد ان هذا يصنع فارقا في قرائتي للحدث |
الحتة دي مافهمتها..انتا قاصد انو حراسة البشير بواسطة الدبابين (ود الباوقة وغريبة ومن والاهم) مسالة يمكن مقارنتها بمسالة مقتل ديدبان في نقطة تفتيش في شلاتين مثلا؟؟ يعني قرايتك حتكون لسع قراية اداء واجب يستحق الترحم مثلا؟؟
|
Post: #41
Title: Re: نذهب الى الحرب ولكن على مضض (صلاح كوة كافي)*
Author: بدرالدين بابكر مصطفى
Date: 11-13-2014, 08:54 AM
Parent: #39
شكراً يا معلم
Quote: يعني مجرد ان يقوم بريمة مثلا بمداخلة لتكذيب الخبر ..يجعلني اميل نحو تصديقه ولو كذب.. |
أي والله صدقت
|
Post: #42
Title: Re: نذهب الى الحرب ولكن على مضض (صلاح كوة كافي)*
Author: أبوبكر عباس
Date: 11-13-2014, 10:03 AM
Parent: #41
سلام يا دكين، كتابتك جميلة، لكن الإصرار على جعل الأحداث التي بُنيت عليها حقيقية؛ يفسد هذه الكتابة.
صعب أنو الزول يتفق مع ود البشرى، لكن نسوي شنو؟!
|
Post: #43
Title: Re: نذهب الى الحرب ولكن على مضض (صلاح كوة كافي)*
Author: Haytham Ghaly
Date: 11-13-2014, 10:38 AM
Parent: #42
Quote: صعب أنو الزول يتفق مع ود البشرى، لكن نسوي شنو؟! |
![](http://www.sudaneseonline.com/db/attention/010_Smile.gif) ![](http://www.sudaneseonline.com/db/attention/010_Smile.gif) ![](http://www.sudaneseonline.com/db/attention/010_Smile.gif)
ابوبكر عباس سلامات ومحبة
بالعكس يا ابوبكر ود البشرى من اكثر الناس هنا ذكاءً
ودائماً مداخلاته تاتي في العمق متجهة مباشرة للهدف
وذلك هو ما دعاني للدهشة في رايه في هذا الموضوع او هذه الحادثة
وانا برضو زي دكين ما سمعت في 2013 عن حادثة اطلاق نار قرب القصر ودي اول مرة اشوف الفيديو
والمشكلة يا ابوبكر انو ودالبشرى يرى انو القصر الجمهوري زيو وزي اي مكان تاني او اي مبنى حكومي اخر
مع ان الجميع يعلمون انه القلعة الحصينة لرأس الافعى
وانه المكان الذي يجب ان يقصده كل صاحب حق ضائع
فقطعاً سالب الحق في هذه القلعة
وهكذا فعلها الشهيد كوة بكل شجاعة
اعزل ومكشوف الصدر
|
Post: #44
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-13-2014, 02:26 PM
Parent: #43
ههههههه ود البشرى أنا سبق واتفقتا معاه في كثير من المشتركات يا ابو بكر عباس..وهو يقرأ الأمور بصورة واضحة وله وجهة نظر محل اعتبار ولا أذكى عليه..بالإضافة إلى أن الود بيننا يمتد سهلا و احتفالات.. بس كمان القصة المقابلة ليس لها مايعضدها.. بالإضافة إلى انو الواحد لامن يلقى بريمة في الجوار طوالي الموضوع ببقى شخصي
:-)
|
Post: #45
Title: Re: نذهب الى الحرب ولكن على مضض (صلاح كوة كافي)*
Author: DKEEN
Date: 11-13-2014, 02:34 PM
ياهيثم سلام اجتهدتا على قدر ملكاتي لأجد في اليوتيوب الفديو القديم ده.. بصراحة لم أجد مايلغي عمك المسكين الذي نسف نسفا..
على أي حال اردت ان اقول انو الناس دي ما بالهين خشو الغابة وماهينا سلكوا درب الدواس.. ثمة موت وثمة سلاح أنهم يذهبون إلى الحرب على مضض
|
Post: #46
Title: Re: نذهب الى الحرب ولكن على مضض (صلاح كوة كافي)*
Author: خالد عبدالوهاب
Date: 11-13-2014, 07:03 PM
Parent: #45
Quote: ونسال الله ان حكومتنا تكون لاحظت لي عدم دقتي دي..علها تشفع لنا في مشاغلة عامة في مول عام ذات مساء.. |
ياحليلك انت ده والله
|
Post: #47
Title: Re: نذهب الى الحرب ولكن على مضض (صلاح كوة كافي)*
Author: محمد البشرى الخضر
Date: 11-13-2014, 07:48 PM
Parent: #45
و الله يا دكين حسسّتني بالذنب كوني ما جبت ليك البينة الواضحة من الأول الموضوع دا اثير في بوست الأخ علاء وجاب ذات الفيديو و نبهه ود ابراهيم لأن الفيديو قديم و جاب رابط الفيديو الأصلي المنشور من 2013 في البوست دا
مقطع فيديو لمهاجم القصر الجمهورى يوم أمس ...مقطع فيديو لمهاجم القصر الجمهورى يوم أمس ...
ودا http://www.youtube.com/watch?v=WdgJg0XATKUرابط الفيديو الفيديو هنا أوضح و المقطع أطول زمنا و راجع تاريخ النشر ح تلقاه مارس 2013
بصراحة انا ما كنت عايز أبيخ الكتابة الجميلة و الفكرة النبيلة ال بتحملها بقصة روابط ومصادر وغلاط وشنو ما عارف, لا سيّما أن الرجل في الفيديو الأصلي فعلا خايلة فيه الـ يا حليلو و يستحقّها وباينة في مشيته الوئيدة وهزاله البائن و بؤسه وضعفه حين امره العسكري بالجلوس على الأرض وكمان في نفس الوقت استخسرتها - اعني فكرة البوست - في حالة المرحوم صلاح الذي كان سببا بتصرفه في ازهاق ثلاثة أرواح عشان كدا نبّهتك لكن يبدو ما كان بطريقة واضحة وكافية لتزيل اللبس لديك
حاجة تانية, حسب رواية ضحية توتو المغايرة للرواية الرسمية انه كان يخدم في الجيش حتى قبل اربعة سنوات, وشارك في عدد من متحركات الجيش في مناطق العمليات بل وشارك متطوعا في معارك تحرير ابكرشولا و الحادث حصل لأنه طالب بحقوقه واراد مقابلة القائد - لاحظ مقابلة, لا جهاد لا نضال لا هجوم - في سبيل حقوق خدمته, الخدمة التي بها يؤديها الآن الحراس الذين قتلهما او تسبب في ذلك ذات الخدمة التي يؤديها أقرباء ود الباوقة أو غريبة أو بريمة !! عرفت ليه يا دكين انا لا أتعاطف معه او ارى فيه بطلا نوبيا. بعدين يا دكين حرس بوابة القصر - مش حرس البشير - في النهاية موظفين بسدّوا خدمة اليوم هنا و بكرة في الكبري أو السلاح الطبي او فرع الرياضة المرحوم صلاح نفسه كان أحد أفراد الحرس - حسب حديث ضحية وزامل هؤلاء
شكرا بكّور و هيثم
|
|
|