وقع لينا ولو ماعايز توقع لينا وقع لينا على انك ماعايز توقع لينا..

وقع لينا ولو ماعايز توقع لينا وقع لينا على انك ماعايز توقع لينا..


01-26-2016, 12:34 PM


  » http://sudaneseonline.com/cgi-bin/sdb/2bb.cgi?seq=msg&board=232&msg=1475563542&rn=0


Post: #1
Title: وقع لينا ولو ماعايز توقع لينا وقع لينا على انك ماعايز توقع لينا..
Author: DKEEN
Date: 01-26-2016, 12:34 PM

11:34 AM Jan, 26 2016

سودانيز اون لاين
DKEEN-
مكتبتى
رابط مختصر

بالامس وبينما انا نايم..
رايت نفسي متربعاً على عرش من غمامِ النوم الداكن..
الغمام الذي يراه الناس عادة في منامهم..
ورايت الاحلام في تزاحمها نحو دورها في منامي تنفج فجاةً يمنةً ويسرة ..
الاحلام الضالة، والاحلام الآملة، وتلك الاحلام التي تختلط فيها المواقف والشخصيات والاماكن دون ترتيب ودون هدفٍ واضح، الاحلام التي لامعنى لها..
رايتها جميعا تنفج هنا وهناك وكانها تزيج الطريق لارهاصاتٍ حلمٍ قويٍ اتٍ..
وانا في كل ذلك من موقعي من عرش المنام متربعاً على غمام يتشكل تخيلت مبتسماً ان بت ابليس لاشك قادمة، ولذا يفج بغاث الاحلام درب الاحلام..
لم احرك ساكناً فعادة بت ابليس لاتحتاج الى كشف الحال، فحالك ظاهر بين يديها..
وانتظرت مترقبا عن الشخصية التي ستتمثل بها دون اي امنيات من طرفي، فكلو خير والفحل ماعواف..
وبينما انا في ذلك الترقب اذا بالقادم الجديد يسفر عن نفسه واذا به ليس بت ابليس ولا اي شي..
واذا بي ارى نور الهدى الجيلاني صديقي القديم رث الثياب، زلق الخطوات، فتران ومغبر كمن تولى في زحف..
وبكفه ليمونة يمصها بين حين واخر كأن به طمام، وفي كفه الاخرى بقايا من اشياء ممزقة استبنتُ من بينها صورة لراس وحيد قرن على غلاف ورق مقوى وتقرير قديم عن منسوب النيل صادر من محطة ودا الماحي..
استغربت من حضوره في منامي في مواقيت بت ابليس، وقبل ان اساله عن ذلك التداخل الميقاتي اللعين، وعن سر وجوده في هذا المقام غير اللعين، اذا بشخص اخر يطل من خلفه رث الثياب بيده مقدمة نفس التقرير عن محطة ود الماحي، وهو يطنطن بعبارات لاتكاد يستنبينها السامع ولو اصغى، وفي مقام الاحلام لا سمع ولا اصغاء وانما ادراك..
حتى اذا اقترب الشخص إذ وجدته (انا) احمل قلم حبر سهم يخرُ حبراً ازرق ، وتبينت الصوت واضحاً، واذا هو بقية لحوار، وإذ انا اقول للنور - في إلحاح يالنور، ايا رفيق الصبا:
اتخيل نفسك بكرة في ماكدونالد وكنتاكي وبيتزا هت في شارع المعونة وانتا بتعضي مع حبيبتك وتقش خشمك..
اتخيل نفسك مع اصحابك راكبين فورد وقاشين طريق الرهد الدبيبات وكل زول ماسك علبة هانيكان..
اتخيل نفسك براك قاعد تقرا النيويورك تايمز في ستار بكس في صباح صيفي جميل عند مقرن النيلين وانت تتامل في مؤخرات البنات لابسات الجنز ال Lee الاصلي..
اتخيل ووقع ساي آالنور..
مايهمك انو العباس اخو البشير مثلا حيكون وكيل الفورد فالعباس ليس اهم من حبيبتك ..
ومايهمك انو قروش البيتزا نصها رايحة لي المتعافي، فالاكلو المتعافي ماشوية عشان تبكي على مطعم لن ياكل منه سوى ابناء المتعافي وابناء البرلمانيين وشرزمة النظام..
مايهمك انو الفرانشايز بتاع ستار بكس داخل جيب جمال الوالي، فوجود النيويورك تايمز قد يوقظ حس الحريات لدى غالب الامة، وجيمي ممكن يشتري ستار بكس في تكساس ذاتا..
وتذكر انه سيكون ثمة متسع لتلك المؤخرات مع وجود منتجات Pfizer كوربريشن بسعر التراب..
اتخيل ووقع آآالنور:
فعمر النظام ليس اهم من عمرك..
وعمرك راح في زمن الانقاذ..وماتبقى إلا اللمم
فالحق بذاك اللمم..
هؤلاء المناضلين الذين تراهم، يجلسون الان في "الهارد روك كافي" عند كل صباح مع قطع الكيك المحلاة بي الشكولا يطقطقون كي بورداتهم طالبين منك عدم التوقيع..
ويشربون الهانيكان البارد من ذات المحلات عند المساء يطلبون منك عدم التوقيع..
يتصفحون الحريات في النيويورك تايمز ويتحسرون على ايام "كافتيرا الصخور" في "اتنيه" ثم يصطحبون حبيباتهم الى مخادع يضج فيها بخور التيمان ويطلبون منك عدم التوقيع..
يقولون انهم يشتاقون الى هجير السودان ولكن صورهم في الفيس بوك وهم يرتدون فراء الدببة القطبية ويلتقطون صور للجليد تُشي بالبهجة..ومن ثم ينزلون استيتوص يطلبون منك عدم التوقيع..
تراهم في روباتهم يتخرجون من جامعات النصارى، وانت ابنك قاعد في هنغر زنكي في صقيعة لاتقربها الذئاب حتى، وبالقرب من الهنغر لافتة مكتوب فيها "كلية الشريعة/ رومي البكري".. ويطلبون منك عدم التوقيع..

وقع ياخينا انتا اصلا شن عرفك بالهارد روك...
الانقاذ دي لو ماشلتها انتا بي مروتك وضراعك، ما حتشيلا ليك العقوبات الامريكية..
ان الانقاد لن يهمها ان يموت اخوك بادوية عاضة منتهية الصلاحية، فهي ببساطة يمكن ان تقتل اخوك عادي دون اي مرض سمبلة ساي..
اهل الانقاذ لاتؤثر فيهم العقوبات، فهم كما الاجنة في بطون امهاتهم، كده كده بياخدوا مغازيهم كاملة من المشيمة..
اما سمعتا بقانون التظاهر الجديد وقد اجازه المجلس الوطني؟
اما سمعتا بي تور الدبة في مستودع العدل؟
الفوق ديل موجودين عشان الجنين ياخد حقو دون شخشخة..
إلى متى تظل في نضالك العقيم..
الى متى تظل تجاهر بمطلبك من الحرية وانتا في سجم رمادك ينؤ بحملك جبل "مُندرا" اكل الله والرسول ده في تلتلة ذي كانك واقع من الفصل الثاني من كتاب عن غزوة ود النجومي..
كيفن تجيب عيال تاني ان قتلوهم في تظاهرة جديدة وانت كل يومٍ تخصيك الانقاذ حتى البروستات..
تركبك الانقاذ كل يوم بكل جديد..
تالله تفتأ تذكرني وتذكر اخوانك في الخليج تطلب الإعانة والغوث حتى تكون حرضاً أو تكون من الهالكين..
دبر حالك ياخينا فالوقت قد ازف..
ان هى إلا بضع مشارقٍ وبضع مغاربٍ اخرى وتلقى نفسك ياعيان بما لايحمد عقباه، ياكمان عند مليكٍ مقتدر، إن سألك عن الدنيا ماحريت الاجابة، وإن سالك عن حالك واحوالك تجر نفس من وعثائها، وتقول وانت تضع سبابتك امام وجهك - كالدناقلة في معرض الدهش: ( اشهدوا الايلاه الا الللللله)..
وان سألك عن حصاد اعمالك، قلت وانت تتحسس عماك، شغلتنا المسغبة والمعيشة الضنكى..
ياخينا..
من العبث ان تراهن على الحياة الدنيا وانتا الحياة الدنيا ماخبرتها..
Out of time

زي ماقال سيف عثمان لغفير المعهد ..
اسال عنها "كن" ماشفتها..
اسالني اوريك..
العالم ده اجمل من مكانك الذي انت فيه..
الدنيا دي ضاجة يازول..
سعيدة وبخيتة..
اقراني في "المتبعون وحدهم يعرفون الاستجمام" تجدني..وتجد ضالتك..
اقراهم في قراهم الريفية في ضهاري تكساس تجدهم، وتجد ضالتك..
اقرى ياخي، اما انت بقاريء؟
شن طعمك وانتا في مسغبتك الدايمة تمرق من كل غنايم الدنيا بخفي حنين..بل انت الخفين ذاتم..
جرب وقع..
جرب ضوق حياة العالم الاول، طعم الاسبرسو بالحليب والدوناتس بالكستر..
جرب شم ريحة حبر الواشنطن بوست..
جرب العلاج بالادوية النضيفة، اما اتخمتك اعشاب العطارين واعشاب النيل الابيض؟!
الكي بالنار لا متين آآالنور ؟
جرب نفس الحياة الامريكية..
هذه فرصتك، فالرياح شمالية شرقية باردة..
ويمكن ذاتو يجيبنا التلج ونعمل تماثيل، ونركب جزرة في انف الجليد..
اشجار الميلاد المضيئة تنور حياوتنا.. ويزورنا البابا نويل..
والبابا بسل العيش الله بسلا..
والبابا خدمة الديش الله بسلا...
والبابا القول بى شويش الله بسلا..
ياعيون ود الضكير عماك فى حقك ديه.. لى زمنا مو جهدية ..

وقع ياخي وماتباري الدجاج..
فانت already في الكوش..

Post: #2
Title: Re: وقع لينا ولو ماعايز توقع لينا وقع لينا على
Author: محمد البشرى الخضر
Date: 01-26-2016, 01:09 PM
Parent: #1

مدهش كالعادة يا دكين
دخلت بينا بي بت ابليس ومحطة ودالماحي لتمرقنا في عريضة المطالبة برفع العقوبات الأمريكية و ما بينهما من سحر البيان
لكن يا عزيز لو المقصود من رفع العقوبات التمتع بستار بكس و ماكدونالد وبيتزا هت إن شا الله عنها ما اترفعت
عايزينها تترفع عشان الأجهزة الطبية و الأدوية و اسبيرات تراكتر الكاتلبرلر و الجون دير

Post: #3
Title: Re: وقع لينا ولو ماعايز توقع لينا وقع لينا على
Author: أيمن الطيب
Date: 01-26-2016, 01:09 PM
Parent: #1




Post: #4
Title: Re: وقع لينا ولو ماعايز توقع لينا وقع لينا على
Author: خالد عبد الله محمود
Date: 01-26-2016, 02:36 PM
Parent: #3



حمد الله على السلامة يا دكين



رجعتنا لي أيام البورد الحلوة ياخ .. الله يديكـ العافية

Post: #5
Title: Re: وقع لينا ولو ماعايز توقع لينا وقع لينا على
Author: Salah Zubeir
Date: 01-26-2016, 02:50 PM
Parent: #1

كاتبنا المفضل ,,,,,, عبدالعزيز

التحية لك

Quote: وقع ياخي وماتباري الدجاج..


وقعنا ياخى لكن الدجاج البري ياهندا كتير ماشي قدامنا

Quote: فانت already في الكوش..


و بفتش فى الخلايا الميته أزعمطا

كن بخير

Post: #6
Title: Re: وقع لينا ولو ماعايز توقع لينا وقع لينا على
Author: عمر السلمة
Date: 01-26-2016, 02:59 PM
Parent: #1

ياخ كلام جميييييييل شديد والله


Post: #7
Title: Re: وقع لينا ولو ماعايز توقع لينا وقع لينا على
Author: الطاهر الطاهر
Date: 01-26-2016, 04:03 PM
Parent: #6

ياوغد
لم تزل في غيك القديم، تكتب على رمل شاطئك البعيد أحرف ، لا يفك طلاسمها سواك
وترسم تارةً شمسا ً تُعريها من زيفها ،،
وتارة ً ، تدنو من الوهم،
وهم آخر
لكي تتراءى لك النجوم التي ، غرقت في البحر على هيئة الحلم .

مرور مصحوب بالبهجة ..



Post: #8
Title: Re: وقع لينا ولو ماعايز توقع لينا وقع لينا على
Author: ابراهيم حموده
Date: 01-26-2016, 04:08 PM
Parent: #7

وقع،
فإن رفعت العقوبات فسيشتري أهل الإنقاذ لشعبهم الدواء والخبز والحبر والورق..
سيعيدون فتح ما أغلقوا من مستشفيات ومراكز صحية.. وسيبذلون العلاج للفقراء والضعفاء الذين لا يجدون موطأ قدم في فاخر مشافيهم. سيتعففون عن شراء الذخيرة العنقودية فهم يعرفون الأصول برضو، قال ناطقهم مستنكرا: كيف نستخدم القنابل العنقودية ونحن نحارب شعبنا؟
وقع، فسيتسابق أهل الاحسان لإدراك هذا الشعب بإرسال المعونات المعونات الانسانية وعلى رأسها الأدوية المنقذة للحياة وسيمنعهم الحياء من أكل هذه الاغاثة، وهم الذين نسب لهم الفاجر في العداوة، زورا، أكل أموال ضيوف الرحمن.
قال دبلوماسي هولندي متقاعد إن الدبلوماسية تملي عليهم التعامل مع أفظع حكام يمكن تخيلهم، مستشهدا ببول بوت وصلاح الدين بوكاسا، طالما كان الحاكم يسكن في عاصمته ويحرس حدود بلاده (في اشارة لممارسة السيادة)، فيا ليتهم كانوا كذلك.
هل أدلكم على ما هو أنفع وأنجع: وقعوا لزوال هذا النظام الكابوس.
-------
عزيزي دكين، أكاد لا أفوت لك نصا في هذا المنبر، وأعلم نبل مقاصدك فيما تكتب، ولكن جزئية رفع العقوبات أصبحت ما فارقة كتير. لا تقدم ولا تؤخر في مآل الحال، والحمد لله من قبل ومن بعد.

Post: #9
Title: Re: وقع لينا ولو ماعايز توقع لينا وقع لينا على
Author: معتصم الطاهر
Date: 01-26-2016, 06:41 PM
Parent: #8



و ما زلت ترقى بالبيان و الفكرة

Post: #10
Title: Re: وقع لينا ولو ماعايز توقع لينا وقع لينا على
Author: جمال ود القوز
Date: 01-26-2016, 07:15 PM
Parent: #9

وقع واللي كان كان ..

Post: #11
Title: Re: وقع لينا ولو ماعايز توقع لينا وقع لينا على
Author: الصادق اسماعيل
Date: 01-26-2016, 07:33 PM
Parent: #10

أحسنت يا دكين
وصنعت لي باقي يومي هذا

Post: #12
Title: Re: وقع لينا ولو ماعايز توقع لينا وقع لينا على
Author: الصادق اسماعيل
Date: 01-26-2016, 07:49 PM
Parent: #11

والقول ما قاله ود المرتضي حينما قرأ (المتعبون وحدهم يعرفون الاستجمام)
قال حينها (رضي الله عن قلمه):
(أتحاشى قراءة أي حاجه يأتي بها دكين لأنها ستصل إلى نهاية وبعدها ما تعرف تسوي شنو)

Post: #13
Title: Re: وقع لينا ولو ماعايز توقع لينا وقع لينا على
Author: Kabar
Date: 01-27-2016, 05:40 AM
Parent: #12


دكين..حبابك يا صديق

كتر خيرك على هذه اللوحة السمحة..


رأيان يا صديقي ، لفتا انتباهي في معمعمة التواقيع : رأي البروف امين سليمان (رد الله غربته) ، و رايك هنا..
عارف يا دكين وانا بقرا الحجج بتاعة الفرحة بوجود هذه العقوبات.. فكرت فكرة عجيبة وقلت حقو الواحد يعمل ليهو حركة مسلحة ويقوم يقطع شديرات الهشاب في كردفان ويحرقها ويكومها ، نصها حطب دخان والنص التاني فحم ساكت..!

السعودية يا صديقي خلت العالم الهنا بارك وكاسر ركبة ، عشان فتحت البلف..!
ونحن البلف بتاعنا ياهو الصمغ العربي.. نقفلوا سنة واحدة ، وعينك ما تشوف الإ النور: يرفعوا العقوبات ، ويقولوا الروب ذاتو..!


كتر خيرك على انسنة الفواجع يا صاحب..!
كبر

Post: #14
Title: Re: وقع لينا ولو ماعايز توقع لينا وقع لينا على
Author: نجم الدين سعدابى
Date: 01-27-2016, 07:24 AM
Parent: #1

Quote: شن طعمك وانتا في مسغبتك الدايمة تمرق من كل غنايم الدنيا بخفي حنين..بل انت الخفين ذاتم..
جرب وقع..
جرب ضوق حياة العالم الاول، طعم الاسبرسو بالحليب والدوناتس بالكستر..


جيب النوقع نحنا زاتو معاهو ياخ

ديكو تحياتي لقد وقعت لي علي اجمل كورية مديدة صباحية بنكهة الحلبة المحروقة

دمت وما تطول الغيبة

Post: #15
Title: Re: وقع لينا ولو ماعايز توقع لينا وقع لينا على
Author: ناصر احمد الامين
Date: 01-27-2016, 08:24 AM
Parent: #14

كالعادة .. مدهشه كتاباتك ياخ
شكرا دكين.

Post: #16
Title: Re: وقع لينا ولو ماعايز توقع لينا وقع لينا على
Author: tabaldy
Date: 01-27-2016, 08:53 AM
Parent: #14

تم التوقيع



سؤال: الهانيكان دا شنو؟

Post: #17
Title: Re: وقع لينا ولو ماعايز توقع لينا وقع لينا على
Author: DKEEN
Date: 01-27-2016, 12:47 PM
Parent: #16

حدثني نور الهدى ملتاعاً – نجروه في يومين ياصحبي، الله يسالك انتا عنقريب بتنجرو في يومين؟

المشهد الثاني من حلم الليلة الاولى

دخل الى الاستديو الذي يعرض الحلقة على الهواء مباشرة في التلزيون الرسمي، دخل يرتدي بدلة عسكرية كتلك التي ارتداها رئيس البرلمان الوطني ابان دخول خليل ابراهيم وجماعته، البدلة نص كُم وتظهر عليها اثر المكوة .
دخل وهو يحمل عدة اوراق A 4 غير منتظمة من بينها، كراسة داكنة اللون زينت بغلاف ورق مقوى عليه صورة لنفس وحيد القرن بتاع نور الهدى الجيلاني ومكتوب عليه محضر مداولات.
دخل في عنفوانٍ بخطواتٍ ملؤها الثقةِ المفرطة، وكان عضوه الذكري يترنح يُمنة ويسرة في وضوح تام امام الكاميرا، فالداخل لم يكن يرتدي اي شي اخر غير البدلة آنفة الذكر وسايد كاب عليه براند النيويروك يانكييز.
تضايرت المذيعة ام توب، ووضعت يدها على خشمها، وظهرت في مشهد الشاشة تركض منحنية في اتجاه الجهة التي دخل منها الرجل ابو بدلة نص كُم.
الرجل ابو نص كم الذي دخل (تيوب لس) عبر بخطوات واثقة المساحة بين ركن الشاشة اليمين والطربيذة الفيها سيرمس احمر، ثم جلس تماما عند المقعد الخالي من المذيعة التي جرت، مواجهاً الكاميرا التي ما انحنت، وقد اختفى جزءً من عضوه الذكري بين ظلال اطرف البدلة الميري والمقعد الوثير الذي هبط بصاحب العضو الذكري عدة سنتمرات كانت كفيلة باختفاء العضو، بينما بانت خصيتاه بشكل لامع كونها انضغطت من طرفها الجنوبي فلمعَ الشمالي، لا ادري لماذا خُيل لي ان ذلك هو الطرف الجنوبي، وعادة في الاحلام لاتثار تساؤلات وانما تقبل كل المفارقات في رضى وقبول..
رفع مجموعة الاوراق، ومباشرة قرا مامفادة انهم اجازوا قانوناً لقمع التظاهر والمتظاهرين الذين يبدر منهم الشغب في زمن وجيز و يعتبر انجازا من انجازات الدولة، وانو البلقوهو في تظاهرة إن نجى من الرصاص المجاني بتاع القناصة، فقد لايتمكن من النجاة من تعريف مفردة الشغب، وبالتالي فمستودعه ومستقره السجن خمس سنين عجاف..واضاف في لامبالاة ودون اي تحيز وقال: وحيمرق ويلاقينا قاعدين برضك.
قام على حيلو وحك عضوه بصورة غير مقصودة مواجهاً الكميرا ونفض موخرته بصوت مسموع ولا يمكن القول بان الحركتين لم تكونا تلقائيتين وانهما كانتا على سبيل اي اهانة، ومن ثم ونهب الرجل ذو العضو طريقه الى الخارج..

ضج الناس بعدها في البيوت والمقاهي..
غضب كل من وقعت عيناه على المشهد السريع الذي يشي بثقة مفرطة، ومن بينهم فحول الامة، ورجال الدين، ومديري مراكز البوليس، وقيادات الطرق الصوفية، وزعماء عشاير معروفة وغير معروفة، وسائقي البصات السفرية الذي تركوا زوجاتهن لشهور عديدة دون لقاء..
كما انزعج سفراء الدول الاجانب ورؤساء البعثات الاجنية الذين كانوا يتابعون كل شي بدق تامة..
استشاط اولاد الحلة غضبا لمراى صورة العضو الذكري يترنح امام حبيباتهم اللواتي لم يتوانين على الضحك الخافت، وطفقن ينتظرن تعليقات صويحباتهن بالواتس آب.. بينما واصل اولاد الحلة غضبهم الضارم وهم جلوس عند نفس طربيذة الويست بعد ان شد احدهم مصلحاً طرف البطانية التي انزلقت على اثر حركة الغضب التي دارت رحاها في الطربيذة، ورمى كرت دو اسود وقال: اتو ..
اساتذة الجامعات اغضبهم الامر في نادي الاستاذة وطفقوا في صياغة بيان يدين التصرف دون ان ينسوا ان يكملوا شاي المغرب في المنضدة المتسخة بينما ظل استاذ قسم الفيزياء يتذكر في سهوم الحركة البندولية للعضو ودار في ذهنه ان ذلك قد يدلل على قانون الجاذبية وفرضية جاليلو جلال.
سيد البيت وهو يشاهد الحلقة مع زوجته رفع راسه واحتج في حدة قائلا: ابوكم وابو اهلكم ياعيال الكلب، ياهو ده الفضل.. وشال الريموت من المرة وقلب القناة الى القناة التي تليها ورمى الريموت ليستمع الى ماقد تبقى من اغنية الحوت في قناة انغام..
شرعت الاحزاب الطائفية في نسج بيانات لشجب التصرف غير اللائق ودعت الى مزيد من التحلي بالصبر خشية ان تكون فتنة لاينتهى بعدها امر البلاد الى خير..
بينما بدا بعض المحلليين السياسين في استهلال اعمدتهم الصحفية بالكتابة حول تاريخ الازياء وكيف طفق الانسان منذ الخليقة يخصف علي عورته من صفق الشجر وحتى ثمر الشجر وقد تحول الى نسجٍ طويل التيلة..
بعض منظمات المجتمع المدني تداعت الى ندوة عامة واكدت على سكرتيريها ان يحرصوا على ضرورة الحصول على الاذن اللازم من المحلية لاقامة الندوة.
نسوة البلاد غضبن واستشطن وطفقن بالمشاط بينهن ولاسيرة لهن غير ان الاختلاف في حجم العضو الذكري الذي عرض وبين اعضاء ازواجهن لايفسد للود قضية..
ضحك شابان لطيفان في مكان ما وكتب احدهم في الفيس بوك معلقا على صورة الرجل ذو العضو: you made my day
احتج من احتج وشجب من شجب، وتواصلت الحياة وزار الناس بعضهم بعضا وبتاع الفول ظل يبيع نفس الفول في نفس الدكان حتى اذا اتى اخر الليل باع موية الفول للقادمين من الدور التاني لسينما الحلفايا..وعادت الحياة سيرتها الاولى من الصباح الذي تلى بيان الرجل ذو العضو..
بينما دعا رئيس البرلمان بعد تلاتة يوم مدير التلفزيون ومهندسي الاقمار الصناعية في ابوحراز ومديري عدد من القنوات الاجنبية ونجاري الاثاث المنزلي في شاطي ابروف والسيد الامين العام لجهاز المغتربين للتباحث معهم حول امكانية فك "عنقريب" من شاشة التلزيون على كل بيوت الشعب خارج وداخل البلاد.

والحمد لله رب العالمين الذي لايحمد على مكروه سواه..

Post: #18
Title: Re: وقع لينا ولو ماعايز توقع لينا وقع لينا على
Author: حمد عبد الغفار عمر
Date: 01-27-2016, 01:00 PM
Parent: #17

السأل دكين من الهنكان دا غلطان وألف غلطان

دكين دا عايز ليهو سبب اعملوا حسابكم كلمة فيها حرف النون والكاف ديل سوا ما تجيبوها هنا

واصل يا دكين قبل ما توقع

Post: #22
Title: Re: وقع لينا ولو ماعايز توقع لينا وقع لينا على
Author: DKEEN
Date: 01-28-2016, 09:09 AM
Parent: #18

حمدانتا بس جاري لي الهناي..روق منقة الشتاء القام بيك ده، البوست ده اتوقع تكون فيهو مداخلات بنات..نشرح كلامك ده بي يات لغة لو سُئلت حمد قاصد شنو؟..

Post: #19
Title: Re: وقع لينا ولو ماعايز توقع لينا وقع لينا على
Author: Munir
Date: 01-27-2016, 01:27 PM
Parent: #17

هههههههه ..

غايتو الدخلت في الناس من أعضاء المؤتمر الوطنى ما مرقت ..
أعضاء المؤتمر قاعدين يتلولحوا قدامكم حتى فى المنام ؟؟ !!

.. قال you made my day قال .. الزبون ده الظاهر عليهو ماكويس .. !!

Post: #20
Title: Re: وقع لينا ولو ماعايز توقع لينا وقع لينا على
Author: DKEEN
Date: 01-28-2016, 08:59 AM
Parent: #19

ود البشري سلامات ياخ وعساك طيب..
نحنا عايزين نعيش موش نزرع..
اسبيرات الكاتربلر والاجهزة الطبية صدقني ليست في مايشغل بالي لاحوال صحبي نور الهدى..
الراجل زارع بي التركترات الصينية والكورية في امان الله..
وفي نفس امان الله يُجبى منه تلتين المحصول ويدي التلت لي البابور ..
الراجل عايز يشوف بضع ايام سمحة في ستار بكس قبل ان يؤول الى حتفه..
قصة الاسبير والزبير والطير دي لايعول عليها..


ابو يمن
شكرا انا عارفك وقعتا..


تشكراتنا ياخالد على المرور والكلمات الجميلات..


صلاح زبير
والله لايعجبني بقاء الانقاذ ولاسيرتهم في ارض السودان..
بس النور يتداعي نحو حتفه وقد يموت..

عمر
مشكور على المرور

الطاهر
ربنا يديم المحبة ..
ماتسلفنا طيب حاجة على حس المحبة دي..



الراهيم حمودة

انتا ماتوقع..لانك اظنك متوسم خيرا فيما لاخير يرجى من ورائهم.. :-)
اخشى عليك من الندامة..انا اوقع من اجل النور..
فاذا وقعت فوقع من اجل النور..
كلامك القتو ده ما


المهندس معتصم الطاهر

انا حاوقع وامشي اضرب فول مجاني عند متولي مالك على حس التوقيع.
:-)


ود القوز
تفتكر ممكن امرق لي بي خمشة كده من الجماعة ديل؟


الصادق..
ياخ ماتشوف لينا دبارة معاك في كلفورينا دي..
شن فايدة الصحبة والاعجاب ياصحبي..



اخونا كبر
انا من المعجبين بي بروفايلك ده..
البت السمحة الملامح وطوب الحيطة الاحمر والكرسي ابو مسند، تلك تفاصيل لها في الوجدان مكان..

فكرت في ربط التواقيع بالغاء قانون التظاهر الاخير..
وقتا نعمل حملة كبيرة نربط فيها التوقيع بالغاء القانون الاخير..
تلغي نوقع..
ماتلغي مانوقع..
قمتا اتذكرتا انو نحنا ما ممكن نتفق على شي كويس، ولذلك عدلت عن الفكرة




الصمغ ده اظنو البند الممشين بيهو دولاب ماتبقى من الدولة..
لو قطعتا الهشاب..والله إلا ندخن بيهو كلنا.. ونرجى الدفتردار



نجم الدين
شكرا على الكلام السمح يازول ياسمح


ناصر ياصحبي
يازول ولسع بكرة اجمل.. :-)


Post: #21
Title: Re: وقع لينا ولو ماعايز توقع لينا وقع لينا على
Author: DKEEN
Date: 01-28-2016, 09:01 AM
Parent: #20

تبلدي

انتا بس وقع
وخلي الهينكان على الانقاذ..



هسي انتا يعني عرفتا طريق الرهد الدبيبات؟؟

Post: #23
Title: Re: وقع لينا ولو ماعايز توقع لينا وقع لينا على
Author: DKEEN
Date: 01-28-2016, 09:10 AM
Parent: #19

منير الوجيه..
الشابان اللطيفان ليسا كما ظننت
واعتقد انهم ممكن يكونوا من من يرون ان العبث في المشهد السوداني ممكن يصل اقصى مراحلة قريبا دون ان يطرف لنا جفن..

Post: #24
Title: Re: وقع لينا ولو ماعايز توقع لينا وقع لينا على
Author: عثمان الأمام
Date: 01-28-2016, 10:01 AM
Parent: #23

كان وقعنا كان ما وقعنا كلو واحد

كتابة بنكهة الأسبريسو.

Post: #28
Title: Re: وقع لينا ولو ماعايز توقع لينا وقع لينا على
Author: Munir
Date: 01-28-2016, 10:35 AM
Parent: #23

تحياتى يادكين يا من دائماً تفاجئنا بمواضيع من حيث لا نحتسب .. :)

عبارتى عن الشاب بإعتبار المشهد وناسه من أضغاث الأحلام .. :) .. والعذر طبعاً للطيفين القلتهم حتى وإن كانوا من المنام ..

ولكنى طبعاً متفهِّم أن الحقيقة أصبحت وأضحت وأمست أسوأ من الكوابيس ..

لكين ياخى الصورة الصورتها لينا بسبب هذا العضو الكاسى العارى ده يمكن المدخل الوحيد الذى يمكن أن يشعل إنتفاضة كاسحة زى العرضتها لينا دى .. الناس أصبحت لا يحركها جوع ولا غلاء ولا ظلم .. الشئ الوحيد الفضل لإشعال الثورة هو الحاجة الجبتها لينا من الحلم دى ..
كل شئ ولا الإستفزاز الجنس ده !! ..


Post: #30
Title: Re: وقع لينا ولو ماعايز توقع لينا وقع لينا على
Author: DKEEN
Date: 01-28-2016, 11:14 AM
Parent: #28

منير..
الجماعة شاهدوا الرجل يترنح بعضوه وتاني يوم استمرت الحياة كما العادة..
-----------------
وانا اراهن على انو لو يوم واحد سلا لينا البتاع في حلقة رسمية ووجهه الى الكاميرا ونظر هو نفسه الينا في تحدٍ لما تحداه احد..
ربما يختلف الامر اذا كان الامر قد تم بصورة شخصية ..اي تم الاستفزاز لشخص محدد في مواصلات مثلا، حينها يمكن للمُستفز ان يقلب الدفار ..
بس الخطاب الموجه للعامة لن يحرك ساكناً..
البلد لاوجيع لها..

Post: #25
Title: Re: وقع لينا ولو ماعايز توقع لينا وقع لينا على
Author: محمد مجيدو
Date: 01-28-2016, 10:06 AM
Parent: #1



دكين .. سلام ...

وما شاء الله عليك ...

سلامي الخاص للصديق .. اخوك عادل لو قابلتو ..

تحياتي ,,


Post: #26
Title: Re: وقع لينا ولو ماعايز توقع لينا وقع لينا على
Author: عبدالأله زمراوي
Date: 01-28-2016, 10:33 AM
Parent: #25

مياااخي والله العظيم ثلاثاً أنت يا جني مدهش مدهش حتى تستغيث الكلمة.


لا تغب عنا بالله.

Post: #27
Title: Re: وقع لينا ولو ماعايز توقع لينا وقع لينا على
Author: عبدالعظيم عثمان
Date: 01-28-2016, 10:34 AM
Parent: #25

سلامات يا دكيـن أب قلما سنين

كتابتك طاعمة بس توقيــع مافي

العقوبات دي خانقة تجار الإنقاذ خنقة قربت تطلع روحهم
بعدين حتي إذا تم رفع العقوبات المستفيد الأول من رفعها هم تجار المؤتمر الوطني
بيسلكو إعتماداتهم ويخموا السوق العالمي دا كله ويجيبوه السودانن ويضبحوا الناس تاني

عشان كدا ما فارقه اذا العقوبات إترفعت او ما إرتفعت في ظل إستمرار هذا النظام ومؤسساته

تحياتي

Post: #29
Title: Re: وقع لينا ولو ماعايز توقع لينا وقع لينا على
Author: ahmed haneen
Date: 01-28-2016, 11:00 AM
Parent: #25


كتب دكين

الصمغ ده اظنو البند الممشين بيهو دولاب ماتبقى من الدولة..
لو قطعتا الهشاب..والله إلا ندخن بيهو كلنا.. ونرجى الدفتردار



دا شنو يا مسخوت

تستاهلوا كلكم عشان ما سمعتو كلام حمد


تحياتي يا دوك


Post: #31
Title: Re: وقع لينا ولو ماعايز توقع لينا وقع لينا على
Author: ابو جهينة
Date: 01-28-2016, 11:34 AM
Parent: #29

إبن العم المكين دكين

غيباتك ما ساهلة ، تغيب وتغيب وتأتي بالعجب العجيب
شكرا لهذه السياحة الباذخة

تحياتي

Post: #32
Title: Re: وقع لينا ولو ماعايز توقع لينا وقع لينا على
Author: محمد حمزة الحسين
Date: 01-28-2016, 03:05 PM
Parent: #31

وعاااااد للبورد ألقه القديم بعودة الحرس القديم الرايع
وعادت لنا شهوة القراءة والاطلاع من جديد شكراً دكين
:
:
:
:
:
:
:
:
:
:
:
:
مع التحيات لله الزاكيات

Post: #33
Title: Re: وقع لينا ولو ماعايز توقع لينا وقع لينا على
Author: Munir
Date: 01-28-2016, 04:01 PM
Parent: #32

Quote: .. ونظر هو نفسه الينا في تحدٍ لما تحداه احد..
دكين ..
أكاد أجزم بأن صاحب هذا المشهد الذى عكّر صفو أحلامك قد تبسّم الآن ضاحكاً من قولك ومسح دقنه وهو يقول: ولاد الذين، تانى تجو؟ ..