ِجيفة المساء

ِجيفة المساء


03-20-2004, 11:57 AM


  » http://sudaneseonline.com/cgi-bin/sdb/2bb.cgi?seq=msg&board=232&msg=1475563230&rn=30


Post: #1
Title: ِجيفة المساء
Author: DKEEN
Date: 03-20-2004, 11:57 AM
Parent: #0

قلتا ليها انتي لامن تجي هنا يوم الخميس حتمشي وين ؟؟انتي هنا ما عندك اهل تقولي لي وديني عندهم .........
قاطعتني : عزيز انتا اهلي.. انتا أي حاجة .. وانا الخميس ذاتو ما مارقة ..
نزلت التلفون ودفعتا واحد وتسعين ريال لي بتاع الكابينة .
اتكلم معها من الملز ووتتكلم معي من اطراف النشيشيبة ...
اتذكرها بوافر الصبر والسلوان ..واراعي فروق الوقت في ذكراها حين تحين الصلوات في تلفزيون السودان ..
انا من مشاهديهم خارج الولايات كلها ..
وهي بالضبط في فروق الوقت تصنع الشاي لصديق اخيها تحت شجرة الجهنمية وتشرح المولارية لاختها الممتحنة ..
وحبيبتي عند فروق الوقت يتحول شوقي اليها إلى كائن حي مجاور ينظر بكل حميمية إلى سلك الرسيفر الذي يحمل فروق وقت الغالية ..
سلك الرسيفر اقدس ما لدي حين تلك اللحظة .. ولو جعلو تلك الاسلاك بدل الاهلة في مآذن المساجد ما رايت في الامر غرابة ..
مساء الجمعة 19 مارس 2004 نمتُ وحدي وامتد المساء طويلا .. واول امس ايضا نمت وحدي والمساء كان ممتداً طويلا .. والامس الذي قبله وكذا الذي قبل الذي قبله ..انامُ وحدي والمساءاتُ طويلةً قد إمتدت ..
والحقُ يقال انني دوما انام وحدي ..
مذ اتيتُ إلى هنا ألف وثمانين مساء امتدَ بي وحدي !!!
ليه بس ؟؟؟
اصلو كم من المساءات في هذا العمر قد تبقت حتى ينفق هكذا ؟؟
ـــــــــــــــــــــــــــــــــــــــــــــــــــــــــــ

وفقا لما هو حادث فان مساءات عشرة اعوام قادمات سيكون مساءا للوحدة والامتداد ..
أن استمر الحال هكذا سبعة أعوام أخرى فليس من داعي حينها لان اشغل مساءاتي بما ليس ينفعني في اخرتي ..
الله أولى بالليل أقيمه له. .

اصلا بعد داك ما بكون في حيل ذاتو ..
بعد داك ساكون ليها كما قالت : اهل ..
مجرد اهل والمساء بها سيمتد ..


ُترى من سيخبرها عني ويقول لها : دبري نفسك من النشيشيبة ..
دبري نفسك فان من تراهنين عليه لن يكون سوى فطيسة..
فطيسة المساء الذي امتد مع فروق الوقت ...

Post: #2
Title: Re: ِجيفة المساء
Author: shiry
Date: 03-20-2004, 12:36 PM
Parent: #1

الجميل دائما

دكين

طيب لماذا لا تقد عين المساء والشيطان في معيته
وتلحق ظهرك بحقيبتك . .
تلعن كفيلك لعناً شديد الباس
تدخل للسفير شرر كثير في عينك
حتما سيخاف وان تدفر له الباب مثل كابويات القرن الماحق
لا تخف وانت تمد جواز سفرك لضباط الرز والكبسه
اخرج من المطار في بلد تسمي خطأ بلاد الديموقراطيه بعين قوية
اخرج .. اخرج ، لا تلوي على شيء
هنالك ارمي بمساءاتك
كلها ..كلها
لا توفر منها شيئا
في حضن قمرها الداجن
واطلب يدها قدام الله وخلقو
لا تتردد ان تدخلت امها تطلب كثير مهرها
في ترمي في وجههها بالف مساء مخيب للامال
كان لك ..
وان نقنق ابوها وزهج في وشك
الحقه ايضا بماتبقي في حقيبتك من مساءات
للهزائم والحرائق
اخرج بها .. اخرج .. اسرع
لا تلوي على شيء
وحده الماذون .. سيرمم خطل مساءاتك ويوقف
نزيف فروق الوقت

Post: #3
Title: Re: ِجيفة المساء
Author: Ahlalawad
Date: 03-20-2004, 12:37 PM
Parent: #1

دكين
ياخوي إنت موجوع خلاس ...
كلامك هذا خليط من الأدب والأنين والصدق ..
منذ الآن يجب ألا تبعزق أدبك وأنينك وحنينك ..
عشنا هذه الآف من الليالي .. لم نلمس سوادا حالكا كالذي ذكرت
الحياة ليست بهذا السواد
الضياء قادم
الضياء موجود
الضياء كائن مختبيء
فقط ابحث عنه
ستجده في انتظار
وفي لحظة اللقاء
صدقني
حايقول ليك ..

يا ابن ...
كنت ويييييين

Post: #4
Title: Re: ِجيفة المساء
Author: ابو جهينة
Date: 03-20-2004, 12:44 PM
Parent: #3

دكين الحبيب
تحية عارمة

أولا يوم الخميس فتشنا ليك أنا و ساطور ،، عرفنا إنك معزوم في عرس. صاح ؟

تانيا : ما تتزاوغ من البنية ،، و الله مكنكشة فيك ( سيك سيك معلقة فيك ) ،، ما تجيب أعذار ساكت ،، راجياك و يلاك الصيفية دي و أعمل العليك يا زول.
أرقد عافية

Post: #6
Title: Re: ِجيفة المساء
Author: شتات
Date: 03-20-2004, 04:17 PM
Parent: #4

دكين ..
حرم تركز ..
وعلى الطلاق ما تتلجلج ..
ولازم تبقى ظل ما بتبقى رقراق ..
..
وبعدين يا حبة ..
انت هنا في حضرة الغالية حمل وديع زي عمر بن ربيعة
وهناك تأبط شرا .. ليه؟ ما تفهمنا حاجة ..
بس حا نسامحك عشان الادب الرائع دا ..

مع أطيب تحياتي
وخلينا نشوفك يا نمرود .. نقبض ابليس ما نقبضك

صلاح / شتات

Post: #5
Title: Re: ِجيفة المساء
Author: walid taha
Date: 03-20-2004, 03:45 PM
Parent: #1

الجميل دائما

بالله فى دينك وايمانك هل كان هنالك جيفا ذلك المساء الذى سبق كلماتك هذه؟؟؟؟!!!
لكن كما عهدتك ساخطاماكلا العشاء مهججا جاحدا للنعمة
اذا كان هنالك ما يذكرك بتلك النشيشيبة فهو حتما ذلك الجبل المشطور كفؤادك.

تسعون ريال ايها الرعديد؟! اما كان بالاجدر ان ترد لى اربعون من الدراهم كنت قد استعرتها منى؟!
لا بارك الله لك فى نشيشيبتك ولا ام دقرسيك

ولا دمت

Post: #7
Title: Re: ِجيفة المساء
Author: اساسي
Date: 03-20-2004, 04:29 PM
Parent: #5

والله العظيم بله الكان في القصة دي امس اتصل علي وقال عقدوا ليهو خلاص يا دكين

يعني بعد كدا مافي داعي للفضايح

شد حيلك يا اخوي ما فضلت الا انت ديك الجن والاتنين الله اعلم

Post: #8
Title: Re: ِجيفة المساء
Author: DKEEN
Date: 03-20-2004, 10:39 PM
Parent: #1

شيري
صحي والله حقو امشي مدني واقول ليهم ادوني بتكم .. وانا مقطع ماعندي قرش احمر ..
اديهم احساس بانها بت حرام ..
ابوها يفكني بي عفريتة اللاندكرزر بتاعم وامها ترسل وراي سكينة المطبخ ..


شكرا يا منقة ..الليل اولى به الله ...

ابو جهينة

والله رفقة خميس معاك انتا وساطور ما في زيها تب وما بتتكرر.. انا عارف ساطور ده
عشان الواحد يلم فيهو داير ليهو اذن من السفارة ..
بس العرس ده كان في زول ُمشرك ليهو من اسبوع ..ووحاتك لا بعرف اسم العريس ولا العروس ..
علاقتي بيهم زي علاقتي بي بالبورداب ديل ..
تخيل لقيت متعهد الاعراس الكاردينال ( محمد الشيخ ) بدبدب هناك ..
ابو جهينة بي جاه النبي وعزشيوخ المحس تدبر لي اخوك طريقة خميس ساطوري كده ...



اهل العوض
بركة الليل الجابك لينا ..
يا خوي اخوك عذاباتو كترت ..

بس ما قتا لي انتا كنتا وين مدتك دي كلها..
عساك سويتا؟؟


شتات
الخميس الجاي رايك شنو نمشي لي ابو السواطير ونسوق معانا ابو جهينة وتبلدينا
وبقية الهالكين ..

شكرا يا منقة على جيتك في هذا المساء


وليد طه
صديقي في المسرات
استعرتها ؟؟
افتكرتك اديتني ليها هبة ..
في زول بجيب لي زول قروش لحدي عندو في البيت ويقول ليهو هاك دي سلفية ؟؟
انتا اول مرة تسلف ولا كيف؟؟

بعدين حفلتك ضاربة زيك ..
تصدق وتامن احلى حاجة في الحفلة كلها كانت كرفتتك ..
تاني ما تجيني وتقول لي عندي ليك حفلة دمار ..

ساكت مرقتنا من ساطور ..

Post: #9
Title: Re: ِجيفة المساء
Author: DKEEN
Date: 03-20-2004, 11:19 PM
Parent: #1

اساسي


انعل ابو الفلس البخلي الواحد يعيش في ظروف غريبة

Post: #10
Title: Re: ِجيفة المساء
Author: bayan
Date: 03-21-2004, 00:19 AM
Parent: #9

يا سلام يا ولد يا دكين

انت زول كتاب
احسن ليك تبقى كاتب حتكون مبسوط وغنيان

لما تصفى وتسخى مافى ذيك

Post: #11
Title: Re: ِجيفة المساء
Author: معتصم دفع الله
Date: 03-21-2004, 00:56 AM
Parent: #10

دكين يا فردة

والله حيرتنا معاك ..
مره نلقاك في مقابر أحمد شرفي ..
ومره ساكي ليك ديك ..
أها المره دي شايفنك عايز العرس عديييييييك كده ..
كدي أرسى ليك على بر ..
وبطل الجرسة بتاعتك دي ..
وما تخوف معاك بت الناس ..

ونحن جمهور المتهالكين ..
نقول ليك موافقين على يوم الخميس ..
مع ساطور وأبوجهينة والبقية ..

Post: #12
Title: Re: ِجيفة المساء
Author: Munir
Date: 03-21-2004, 01:05 AM
Parent: #1

دكين يا جرسة ـ اركز يا زول ـ ياما هناك شباب سهرانين ، شايلين الليل بكاء و انين ـ اركز ـ
نشيشيبة شنو البيشوفو فيها الدبارة؟ ـ ما هم كلهم ياخوي برضو بيمرقوا فطايس ـ
اسأل فطيس ـ

اساسي: ياخي ما حكيتها شديد واحرجت الجمهور ـ

Post: #13
Title: دكين البوردابي
Author: توما
Date: 03-21-2004, 02:30 AM
Parent: #1

دكين البوردابي

ممكن ادلي بدلوي

اي اتفضلي يا هنايه

فلس وحب شنو البتلاقو
وعرس وحب شنو البتلاقو
وفلس وعرس شنو البتلاقو
غايتو انت وهي امكن تتلاقو
يمكن
قول يا الله
وحبها ساااااااااااي
يمكن



ثقيله مش??
عارفه
ومفلسه كمان
ومتقاعده حبا
وشكرااا

ضيفه لبط جات ناس توما

Post: #14
Title: Re: ِجيفة المساء
Author: توما
Date: 03-21-2004, 03:48 AM
Parent: #1

زينوبة كر من حالى كر
قاعد لى فوق كيمان جمر
غربة وكمان حالاً فقر
عذبني قبل اصل القبر
الشوق متل شوك الكتر
طعن الجسم لمن خدر
والله لو ما بنقبل
ما كان بفارقك بي شبر
زينوبة دنيا الاغتراب
خلتني زي ورق الشدر
انحت من عدم الشراب
عم الاراضى وانتشر
الغربة اصلوا طعيمة مر
لكني بعقد بالجبر
لمن سنين الهم تمر
يا ربي الهمني الصبر...............حميد

توما شخصيا مع الاعتزار لثقاله ضيفتنا

Post: #15
Title: Re: ِجيفة المساء
Author: AlRa7mabi
Date: 03-21-2004, 07:05 AM
Parent: #1

بعض الناس تتمنى لهم دائما ( عكننت ) المزاج
حتى تفرخ ( قريحتهم ) ما يبهرك ويجعلك في حالة صمتٍ صوفي

ما بين طرفي( حبل ) الوجد الملح واليأس ( القنوط )
تتنزل ( نقاط ) الإبداع نقطة .. نفقطة .. فنقطة

يا جماعة الزول دا أنا ممكن احل ليهو مشكلتو
لكن خليهو ادينا من زي دا شوية

دكين .. لك في حنايا القلب مسكن ( مفروش ) كمان

مدني عذبت صاحباً لي ( زميل بورد )
لي يوم الليلة كان شاف أبو اللمين يغني قلبو يقول تح

وانت ما سمعت المطر ( أبو ذر ) قال شنو:
أن، سبع ضحكات وضيئة
تطفئ سبع آهات عجاف
ونجتاز المهالك

تسلم يا الحبيب

رحمابي

Post: #16
Title: Re: ِجيفة المساء
Author: mohamed elshiekh
Date: 03-21-2004, 09:23 AM
Parent: #15



دكين الدجال

ياجماعه الزول ده دجال دجل شديد وخلونى احكى ليكم قصتو كلها
لانو الكلام القالو ده كلو حصل من يوم الخميس بعد مالهط ليهو
صحنين بتاعت كوكتيل وخته التالت فى كيس وشارب ليهو ذى جردل بتاع
بيبسى وسفن .
بعد ما ضرب كويس مشى وقف فى نص الحفله الجايها ضهب وما عارف فيها اى زول لغاية ما انقذتو انا وقدمتو للناس .بعد داك عمل الحفله[/B] حقتو شئ بشير مع العريس وشئ قعيد للناس ,عمل فيها سيد العرس وانا اراقب فى الزول ده..... ياجماعه الزول ده كان بلعب على ولا شنو يكون
دكين الجن ده من ناس العرس ودقسنى ولاشنو , لكن الحمدلله كان معاه الشاب الرزين وليد والانيق مروان وقالو لى خليهو ده اصلو كده من ما يشوف ليهو صبايا متل النار وعصافير بتحصل ليهو تحولات غريبه , بس المشكله ياود الشيخ ما فى كده وبس الزول ده ما يتحمل الكلام ده ونحن خايفين لانو بعد ما يرجع اكيد حاتجيهو حمى وطوالى بتطلع ليهو فى راسو ودى المشكله ويبدأ فى الهذيان , لكن اول جوعه بتجيبو ليك واطه وبفيق .الحمد لله كان بقت على الجوعه ساهله انا عرفو ما بتحمل الجوع وجنو عضه , ما بتتذكريوم السمك فى الصالون الانيق ,...هذا هو نص الحوار الدار بينو وبين احمد سعيد
: يا دكين مستعجلين مالكم اقعدوا اتعشوا معانا
رده دكين الدجال: والله نحن ضاربين اسى فى هرفى ضرب شديد
يعنى مستفين قالها احمد سعيد
آى والله رده دكين
طبعاقايل العشاء فول ولا فته بتاعت عدس ,بالله الزول ده لما جبنا السمك المتبلو الزول الحلو الانيق الطاعم فى كل شئ تمبس , الدجال اعصابو باظت وريالتو سالت واتلعثم واتحول فجأة الى تمساح وبلع السمك ده جنس تبلع
يادكين الشئ ده فيهو شوك يازول ما تودينا انصاص اليالى نكوس وفى المستشفيات براحه براحه يازول.... بالله فى ثوانى معدوده السمك اتحول اشلاء متناثره ماتعرفو دةكان سمك ولا كان شرقانيه ولا تراب مغنطيس .
ما خله حاجه غير العيون وليه انا ماعرف ..
بعد داك بدأ الهذيان وعينكم ماتشوفش الا النور واخر هذيانو الشفتوه مع بت النجومى المسكينه دخلت البورد وانفتح ليك فيها
بس الحمد لله يابت النجومى الزول ده جاع لو ما جاع عيييييييييك.

وبعدين اسمع يا دجال مدنى دى ابعد منها ومابتخشها الا بتأشيرة منى انا او احمد سعيد سامع.
بعدين نصيحه ليك لو ما بتقدر على الصبايا والعصافير ديل احسن ليك تقعد مع مروان وليد وخلى وليد يعلمك حاجه فى الجيتار الشايلو تشرك بيهو للعضه وتتصور معاه ,او تعال لينا فى الصالون الانيق نونسك ونسمعك غنا نضيف وتتعشى وتمشى تندفس تنوم .

قال هو فطيسه ...فطيسه بس ...يااخى انت فطيسه طارشه كلب و......
الباقى بتمو ليك .


برضو بحبك

Post: #17
Title: Re: ِجيفة المساء
Author: الصادق خليفة
Date: 03-21-2004, 11:13 AM
Parent: #16

الاخ / ديكو

و الله حالتك تحنن و لو عاوز نصيحتي قيام الليل ده احسن منو مافي لحدي ما يقضي الله امرا كان مفعولا اما زواج او موت (بعد عمر مديد) و في الحالتين انت الكسبان ( مش عاوز اقول ليك في الحالتين انت الضايع لان الزواج و الموت راحة ) .
بعدين يا اخوي يا ديكو ود الشيخ ده مالو مياكل لحمك و ساكيك كده ، ما تقول ليك خليني اضري عيشي في هبوب البورد ده ما كل الناس قاعده تضري عيشوه (كيف دي عيشوه جمع عيش ) .
و اخيرا وعدتني تجينا في الناصرية انا وراق لكن ما شفناك لحدي الان .

اخيرا اقعد عافية و بطل نواح و امسك في درب الله عديل لحدي ما تلق ليك حلال .
تحياتي بلون البنفسج / صادق

Post: #18
Title: Re: ِجيفة المساء
Author: walid taha
Date: 03-21-2004, 11:23 AM
Parent: #16

ود الشيخ تربت يداك ولله درك......وكم حاجة من النوع ده
ما خليت ليهو شى عافى منك
تمبس التافه عزمتو قال لى "تعزمنى حفلة بين جبلين ؟ دى حفلة ولا غزوة؟!!!
توبة يا حبوبة


ود الشيخ ارقد عافية

Post: #19
Title: Re: ِجيفة المساء
Author: walid taha
Date: 03-21-2004, 11:23 AM
Parent: #16

ود الشيخ تربت يداك ولله درك......وكم حاجة من النوع ده
ما خليت ليهو شى عافى منك
تمبس التافه عزمتو قال لى "تعزمنى حفلة بين جبلين ؟ دى حفلة ولا غزوة؟!!!
توبة يا حبوبة


ود الشيخ ارقد عافية

Post: #20
Title: Re: ِجيفة المساء
Author: Tabaldina
Date: 03-21-2004, 12:02 PM
Parent: #1

..
.
دكين
ود الشيخ
وليد
يعنى كدا طلعتو كلكم مظليين وجيتو الحفلة ضهب !!؟؟
والله فى الشقق تحننوا وفى الحفلات تجننوا
يا دكين بالله بطل البشتنة ورقاد الواطه دا
ولملم خليقاتك فى شنطة الحديد واطووى لحافك وفلسع من هنا
الواحد لمن قلبو رهيف وما بقدر على الهبباي
مالو سايب حبكانتو وامو وجاي للتعب والاكل الكعب
وبدل ما تضيع منك البنية وشبابك احسن تفقد واحد وترجع ليها مقطع
ومفلس وهكذا تكون فى الحالتين انت ضايع كما قال
لا قربك بريحنى
ولا بعدك بفرحنى
يفرح قلبي فى ذكراك
تاني الشوق يرجعني
واتعب واشقي معاك
الخ مقولات المتجهج المغتربي
وقال شنو عند صلة مع سلك الرسيفر !!
الحميمية بمع الرسيفير والديجتال ما منك من العليك

سلام

Post: #21
Title: Re: ِجيفة المساء
Author: walid taha
Date: 03-21-2004, 12:56 PM
Parent: #20

تبلدينا الاصيل ..ازيك

اول مرة اعمل مداخلة معاك وكنت اتمنى انو يكون فى مكان تانى بعيداً عن الجيف ..لكن حكمتو بالغة واعذرنى

المهم يا سيدى انا وود الشيخ اسياد بيت وفرد العريس وصاحب الجيفة ده جا مع الفنان ...يعنى ضهب فى زمن العزومات الانيقة الشديدة
بالمناسبة الشخصيات البتكلم عنها كلها وهمــية ما تتعبو نفسكم ساكت
والله يمكن الحقيقية منها الا انا وود الشيخ وواحد اسمو مروان.

اها الفى يكلم المافى

ما تغيب
ودمت

Post: #22
Title: Re: ِجيفة المساء
Author: alsngaq
Date: 03-21-2004, 01:13 PM
Parent: #1



دكين

الحالة صعبة تعرف اوعك تفكر مرتين
حالتك دي ما بتتحمل ولو ما عملتها فى لحظتك
دي تاني لمن تموت ما ح تعملها، قالوا أي مغترب
فى لحظة زي بتاعتك دي بتجيهو مره فى العمر
واذا ما كرب شنيطو وشتت يكون حكم على نفسو
بالمؤبد فى جنس البلاد دي

الحق نفسك يا اخووووي


Post: #23
Title: Re: ِجيفة المساء
Author: mohamed elshiekh
Date: 03-21-2004, 01:59 PM
Parent: #22



Quote:





نزلت التلفون ودفعتا واحد وتسعين ريال لي بتاع الكابينة



يا دجااااااااااال

واحد وتسعين شنو... يادجال



ياوليد الزول ماتودوه لى شيخ ولا شوفو ليهو صرفه

Post: #24
Title: Re: ِجيفة المساء
Author: ali othman
Date: 03-21-2004, 02:03 PM
Parent: #1

كويس يادكين طلعتها للنشيشيبة ؟
اكان ماكلمت ليك ناس حلة حمد

Post: #25
Title: Re: ِجيفة المساء
Author: DKEEN
Date: 03-21-2004, 02:35 PM
Parent: #1

الاعزاء الذين قدمو هاهنا..
يا خوانا انتو فهمتونا غلط

النص اعلاه ليس للتعقيب
وانما للمواساة وتقبل العزاء..
انا لا انجر خيالا وابكي نفسي ..
انا اتكلم عن داكن ايام دكين ..عن واقع ليلي يوماتي ..انا والليل والبنسون سيرمس شاي هبهان ..وبلكونة تطل على صورة ثابتة لا تتغير ..

عزوني يستر الله لياليكم ..




رحمابي

تحلها لي ؟؟
تخيل انا من زمن راجيك تقولا لي ..وكل مرة انزل بوست اقول خلاص الرحمابي حيجي يقول لي تعال خد البت الكبيرة وامرنا لله منو العوض وعليهو الاتكال ..
شفتا كيف؟؟
ما عندك غير تديني بنيتك السمحة ديك ..وتفضي لينا مسكنك الفي حنايا القلب ده ..
وتكلم ام صفية تحتسب الاجر في بتها عند الله جل وعلا .

ولو ام صفية طردتك من البيت تعال جاورنا بي جاي ..

انا لله بريدك

مشكور يا حبوب علي جيتك
انتا زول سمح .



د.بيان المريحة

وكت عجبتك اقنعي لي صاحبتك دومة تقنع لي بتها تخش الاسلام ..



الكاردينال ود الشيخ

محاولاتك انتا وولدي طه تشويه سمعة دكين مردودة عليكم

دكين لا يحتاج اصلا لمن يشوه صورته ..
صورتك البهية دي بتذكرني بي كتاب (جين اير) باع المتوسطة ..موش في كاردينالات كده بكونو في اغلفة الكتب الانجليزية التي تتحدث عن العهد الفكتوري ..بس كلما اشوفا اتذكر الكاردينال (ارخبيل )
كما والله يشهد بتذكرني بي مصطفي سعيد بتاع موسم الهجرة ..
عودا إلى بدء..
قتا ليك محاولاتك لجعل صورة دكين غباشء امام جماعة البورداباب لا مجدية..
فالصورة اصلا غبشاء وداكنة الملامح ..
وجودك في عرس في العمارية بي قميص ابيض والليل اسود مسالة تحتاج مراجعات ذي مسالة تسريحتك الفي الصورة دي ..
والحق يقال يا ود الشيخ الوجاهة التي تلازمك دوما تجعلنا لا شي في الحفلات ..لذا اتمنى اني تاني ما القاك في حفلة ..
لكن في قعدة عند ساطور عايزين نقوما عنوة واقتدارا رايك شنو تكون عراب الجلسة ؟



مع معزتي
دكين
رفيق الكارينال في حفلة العمارية


وليد بن طه
اسمع الخميس الجاي انا عندي جير وبوهية انسى اي مشروع كان قائم او قد يقوم ..
مالي ومالك نا اكوس ليك في العروسة..

بلا ضهب بلا نفسيات ..
قدرك انا؟؟








ـــــــــــــــــــــــــــــــــــــ
لولاء املي في احتضانها بطول ليل الشتاء هنا ، ولذة التامل في عين المحبوبة هناك ، والتهجد بكتاب الله في مسجد قريب الله ما باليت أن اكون عشبا في بطحاء نجد ..

Post: #26
Title: Re: ِجيفة المساء
Author: DKEEN
Date: 03-21-2004, 02:37 PM
Parent: #1

منير
رقم صفر

اساسي ود الذين قد بالغ فيما ذهب اليه ..

ولكن من يدري كيف تكون النهاية ؟؟

وبيني وبينك Who care ?



الذي ينشأ في الفقر يعتاد على الحرج

Post: #27
Title: Re: ِجيفة المساء
Author: ودقاسم
Date: 03-21-2004, 03:15 PM
Parent: #1

دكين
ما عندك موضوع
أيوة إنت كتّاب ، وكلامك حلو ، لكن موضوع مافيييييييييييييييييي
البنية عايزاك ، وإنت عايزا ، ومافي أي حاجة تمنع اللقاء ،
فقط كما قلت لك ، ما عندك موضوع ، والله الشاي ذاتو كتير عليك ، تاني أوعى تجيني .
ما عنك عزم ، ولا عندك حيلة ، قاعد تبكي وتتنيل على عينك !

Post: #28
Title: Re: ِجيفة المساء
Author: sentimental
Date: 03-21-2004, 03:39 PM
Parent: #1

اللعنة عليك يا دكين وكل مساءاتك. كدت تصرعنى يا رجل لو لا بقية من جلد تجلدنى تارة واجلدها اخرى...


لا املك رسيفر مثلك حتى لا يشغلنى عما اختلق من مشغوليات.. الوحيد الذى امتلكته رميته بعد ثلاثين يوما عبر البحر...

ان اردت ان احكى لك عن مساءاتى فهى كما الاتى:

أحلق ذقنى كل مساء فاللعينة تنبت كما الشيطان...خسرت نصف ثروتى فى معدات الحلاقة... أغتسل ثم أذهب فى جكة طويلة اما حول المكان او الزمان...
اقراء في جريدة الحنين ، بالمناسبة هذه الجريدة لا تكاد تنتهى...كم هى طويلة...!
اعود لكهفى - هكذا اسميه- متأخرا ومرهقا على أهنأ ببعض النوم ..لكن هيئات... هيهات حين يداهمك الشوق فى منتصف الليل فتنتفض من نومك مزعورا كأن بك مس عفريت شقى.. تنهض وتشد السلك وتنساب الريالات من جيبك الى جيب الحوجة ... أربع سنوات وجل ما اكسبه ادفعه لشركة الاتصالات... ولم أخسر...!!

هل قرأت كتاب الحنين? تلك اية أخرى ....



لك الله يا ولدى..

Post: #29
Title: Re: ِجيفة المساء
Author: DKEEN
Date: 03-23-2004, 09:57 AM
Parent: #1

توما

الشوق متل شوك الكتر ..طعن الجسم لامن خدر اتزوج بارعة ونحنا قاعدين فطايس ساااااي ....
ومن الواضح اننا في الهمِ شرق ..
والفيكي يكاد يخرج م بين حديثك ..
الله المستعان ..
وشاكرين ومقدرين وافر تعازيكم لينا..

اسمعي لو انتي في السودان رايك شنو اوكلك تحلي لي مسالة القروش دي مع اهلها ..
والمثل بقول:
كان ربنا مرقك من الحب ما تحسد الناس وما تخلي غيرك يمرق

الصادق ود الخليفة
ياخي في زول بقول لي زول تعال لينا في الناصرية ويسكت..
الناصرية دي شقة واحدة ولاكيف؟؟

موش توصفو انتا ووراق تفاصيل بيت الثعلب القاعدين فيهو ده..






والعرس ده ما ياهو ذاتو درب الله ..
درب ام الحمام وشارع القيامة كان مسكتو ، تاني النشيشيبة كان زغردت عن بكرة ابيها ما بفكو .
نسال الله الستر والسلامة ..

السنجك

انتا قاعد في الرياض دي الله بسالك في زول بجي هنا وتاني بيرجع ؟؟
ياخي دي الرياض !!
رياض الصالحين وشارع الوشم وحديقة الفوطة وشارع الخزان وجبل ابو مخروم وحي معكال والديرة وشارع الريل وبيوت المرقب واسواق عتيقة ولطافة الهنود وسلام البنغالة قبل أن تسلم عليهم ..
صبايا السودانيين مثيرات الشجون حين تراهم في الاسواق من بين ثنايا البرقع ..رياض منفوحة وحراج بن قاسم واستاد الملز واستراحات الثمامة والفحص الدوري ..
رياض مكتبة الملك عبد العزيز واشتراكات الجمعية وخميس الاصدقاء ..
دي الرياض يا سنجك ما بتتفات ...
وين انتا قاعد ؟؟

سنتي منتال
بلاي انتا برضو بتضرب السودان ؟؟؟
والله انا قايل حدك الرياض يا منقة ..
تاريك طلعتا زي ما قالت بت الاحفاد لي العبد لله في بوست غير بعيد :
(رامي صنارتك في بحور العالم ..كان طشت واحدة التانية تجيب ليك الثمينة)
الثمينة الما قصيرة ..الرقيبة قزازة عصير
لوووووووووووول ما تضايق اخوك جنو هظار ..
وهظاري لا ينقص من حبي لك شيئا..



ود قاسم
الموضوع خليتو لي عرب النيل الابيض شرابين الروب ..

ياخي قدر ما نطور فيكم وندخل فيكم المدنية والعربات التي تجرها الخيول ومن بعد ذلك نركبكم شيفر ليت 2004 ونوريكم كيف تعقدو الكرفتة وكيف تضعون ايديكم عند افواهكم حين التثاؤب وكيف تعلقون اللوحات الجميلة في مداخل الشقق وتقدمون الكعك اولا ثم تتحدثون ثم كيف تنصتون حين يتحدث الاخرون ..
اخرجناكم من حواشات النيل الابيض واعشابها..لتكونوا مثلنا
قدر ما نعلمكم كيف تكون الحضارة برضو فايدة مافي...

اصلو انتو ثقافة إناث الحمير دي ما بتنسوها ؟؟

Post: #30
Title: Re: ِجيفة المساء
Author: اسامة الخاتم
Date: 03-23-2004, 10:18 AM
Parent: #1

Quote: تلعن كفيلك لعناً شديد الباس
تدخل للسفير شرر كثير في عينك

شيرى ما تحرشى الراجل ساى
تقوم تبقى فيه البقت فينا
لكن بينى و بينك مافى خسارة برضو
الزول بكسب نفسو... احيانا

Post: #31
Title: Re: ِجيفة المساء
Author: مراويد
Date: 03-23-2004, 10:35 AM
Parent: #1

beggers can not be choosers

Post: #32
Title: Re: ِجيفة المساء
Author: Rawia
Date: 06-17-2004, 03:36 PM
Parent: #31

`