Post: #1
Title: احــوال الليل..
Author: DKEEN
Date: 08-02-2007, 11:25 PM
Parent: #0
نظرتُ الى لستك العربية قبل صلاة المغرب بقليل..
اللستك مدور وليس مربع..وليس مثلث وليس اي شكل اخر غير هذا الشكل المحتال على الجاذبية..
العربية ميكنتها وفق الجاذبية الارضية..
حبي الطفل برضو وفق الجاذبية الارضية
عضلات البالغ مناهضة للجاذبية الارضية..
حركة الحيوان..حركة الماء ..
سقوط الثمار على الارض ومن ثم نموها الى اعلى نكاية في الجاذبية الارضية..
الطرابيذ الفي البيوت مهيكلة على ان تحتال على الجاذبية الارضية..
رفوف الدولايب رصت عشان الجاذبية الارضية..
كرعين الكرسي الانتا هسي قاعد فيهو ده متحملة وزر وزنك تجاه الجاذبية الارضية..
حركة السفن والبوارج التجارية والاساطيل ..انظمة اطلاق الصواريخ في ناسا وكيب كنفيرال..
حركة حفارات البترول من اعلى الى اسفل والعكس وفق الجاذبية..
الارهاق الذي يصيبك وانت تضاجع زوجتك متحركا من اعلى الى اسفل سببه الجاذبية الارضية..
فإذا ماكنت على سطح زحل فاغلب الظن كنتا حتكون مواصل لي الفجر ..
ثم انه لافجر في زحل ..يعني كان حتكون مواصل الى ان تقول بس..
وحيث ان كلمة بس مفردة ارضية تم نجرها وفق حاجات تعاطي المعاني على ظهر الارض كان حتكون مواصل الى مالانهاية ..
فيابخت من تزوجت على زحل..
الجاذبية بصراحة يخوانا هي جن هذا الكون وقلقة ..
الحركة بالجملة كده على وجه الارض الجاذبية هي التي تتحكم فيها..
ياخي اللباس ده مصنوع وفق الجاذبية..
يعني لو اللستك ماقوي فاللباس مصيرة للارض ..
الارض سر هذة الدنيا ومستودع الخلق الاخير..
الارض ..
عصارة المعارف الانسانية كلها والمكتسبات المعلومة والظنية تمت داخل غلاف الارض الجوي ..
حياتنا برمتها تدور على الارض التي جربناها وليست في سماوات غير مجربة..
الارض جربت الحجر ونحنا ماجربنا غير هذه الارض
الاستثنائات التافهة التي نفذ بها الانسان خارج قوس الغلاف الجوي ليست تجربة حياة وانما استثناء..
لذلك نبقى تافهين جدا جدا اذا ما نظرنا في ليلة لاضوء فيها الى ماخلف النجوم..
فجأة كده تكتشف انو كل شي امامك وخلفك وبين يديك
ماقراته ومالم تقراه ..
ما خبروك به ومالم تُـخبره
الحروب ..العشق ..المحبوبة ..الاصدقاء..التجربة الابوية ..الحنان..
الدين ..الكوارث ..العواصف ..المطر .. الالات المكانيكية..الموت والميلاد
الكنبة الفي الصالون ..برنامج اسماء في حياتنا..العوازيم والمعازيم
الاعراس والطقوس..القبر والمحافير
المدير ..الرزق..مفاهيم الجمال..فكرة الغربة ..تجارب الاشواق...
السفر.. تذاكر الطائرات..المدرسة..الاغنيات الخالدة..نشيد العلم
منسوب النيل الازرق..محطة ود الماحي..الانتظار ..
النظريات الانسانية العميقة..الفلاسفة ..ديكارت وارسطو سبنوزا وبن حيان وبن عربي..المغنين ..
انشتاين ونسبيته..بتهوفن وسمفونياتو..طرشو وعماهو..
الحر ..البرد ..الشمس ..الضل ..الجيش
نظام بناء المنازل ..الرياح الجنوبية الرطبة..
الاوض..الفتحات الشبابيك ..الطاقات..الامريكان..المجاعات
القطاطي..التكنلوجيا والتواصل ..
الشجر..حلة حمد ..شمبات..سان بطرسبيرغ ..الكي بورد ..علامات اللغة والقواعد..قيامنا وقعادنا..
كلها اشياء ومسميات ونظريات وافكار تمت على ظهر الارض ووفق قوانين الارض وليست على ظهر اي شي اخر..
حصيلة المعارف المدونة ..
معارفنا دي كلها بي كل قوانينها..التي بها سارت الامور وتناقلتها السير والاخبار والاثار وكتب التاريخ والمعاجم والموسوعات حتى يوم الناس هذا.. نبلها ونشرب مويتها على بعد خمسين الف قدم فقط من سطح الارض..
بلاي شفتو لي ياتو درجة نحنا مواهيم..
الدواس ده كلو في حتة سغمبروتة لقينا نفسنا فيها..
الغريبة الارض دي مدورة زي اللستك بتاع عربتي..
والاغرب اني عربية ذاتو ماعندي..
تصبحو على خير..
فهذه ليست ليلتي ولاحلم حياتي..
انا بس حنيت لي بت، ونظرت نظرةً في النجوم..
|
Post: #2
Title: Re: احــوال الليل..
Author: ثابت محمد
Date: 08-03-2007, 06:43 AM
Parent: #1
فووووووق
عكس الجاذبية
كيفك يااااا وغد 
|
Post: #3
Title: Re: احــوال الليل..
Author: حيدر حسن ميرغني
Date: 08-03-2007, 02:06 PM
Parent: #2
| Quote: حركة الحيوان..حركة الماء .. |
وأنا أقول الكدايس دي ليه بتطلع رأس البيت دائما ... في الليل
وتحمينا النوم
|
Post: #4
Title: Re: احــوال الليل..
Author: محمد على طه الملك
Date: 08-03-2007, 03:24 PM
Parent: #3
دكين ..
ما تنسى قلبنا ذاتو إتخلق عشان يقاوم الجاذبيه !
|
Post: #5
Title: Re: احــوال الليل..
Author: وليد محمد المبارك
Date: 08-03-2007, 03:45 PM
Parent: #4
وانت زول جذاب
وكتابتك جذابة
عشان كده تجدنا منساقين خلف بوستاتك لانو متعودين على الجذب من زمن الحبيان او قبليه من زمن الجماع الصدف وجابنا .. او ما صدف وجابنا
|
Post: #14
Title: Re: احــوال الليل..
Author: DKEEN
Date: 08-03-2007, 11:05 PM
Parent: #5
وليد الحبوب
تخيل لو ماالسرير الواحد كان اصطدم بالارض ليلا ..
كيف تنام وانت مجذوب للاسفل؟؟!!
السرير ده بالمناسبة في توتر دائم لانو حسب نيوتن
هو بتحرك نحو الاسفل بسرعةقدرها 32 حاجة كده..
كرعين السرير بتتحمل وزر السرعة المذكورة عنك..
وتخيل على العليهو ده يجي زول مشلهت يحركو من الخلف الى الامام او العكس في وقت فيه الكائنات نيام..
وجاء في الامثال:
(حليل الرجال البكسرو العناقريب)
وكان المقصود اصلا
حليل العناقريب البكسروهم الرجال
في اشار الى معاناة العنقريب من الرجال ومن الجاذبية..
|
Post: #13
Title: Re: احــوال الليل..
Author: DKEEN
Date: 08-03-2007, 10:55 PM
Parent: #4
| Quote: ما تنسى قلبنا ذاتو إتخلق عشان يقاوم الجاذبيه |
محمد
جاذبية (ص)اتت على القلب فانجذبت نحوها وسقطتُ على شفتاي ..
ولايزال طعم السقطة كمشتار عسلٍ في فمي..
|
Post: #6
Title: Re: احــوال الليل..
Author: DKEEN
Date: 08-03-2007, 08:27 PM
Parent: #1
ثلامات ياثابت
استاذ غبي في الثانوي قال لينا انو في مجال ينعدم فيه الهواء فان سرعة هبوط الريشة والكيلو واحد...
اذ لايمكن ابدا تخيل مجال ينعدم فيه الهواء ..
عشان انتا تجي ترمي فيهو ريشة وكيلو في نفس الوكت..
المجالات التي ينعدم فيها الهواء هي بالكتير قنينة في مختبر ..
استثناء لايتجاوز محيطة عشرة سنت ربع في كرة ارضية تبلغ (1141190322782000000000) متر مربع
|
Post: #7
Title: Re: احــوال الليل..
Author: DKEEN
Date: 08-03-2007, 08:37 PM
Parent: #1
العزيز حيدر حسن
خليك من الكدسة..
قريت زمان في مجلة ميكي انو سرعة الفهد الصياد تبلغ 122 كلم/ساعة
استغرب كيف يتم قياس سرعة الفهد الصياد بهذه الطريقةالمتخلفة
يجي يقول ليكي بي كل بساطة سرعته 122 كلم في الساعة..
حصل في زول شاف ليهو فهد جاري لمدة ساعة كاملة؟؟
ساعة كاملة يقاوم فيها الجاذبية؟؟
فهد ياتو مكان ده؟؟
والله لو مربنو في معبد الشمس مايعملا..
إلا يكون فهد الله البضرع..
اكتر من دقيقتين مابقدر يجري متواصل فكيف تقاس سرعته على اساس الساعة فيتم تضليل القاري..
اصلا الفهد ده ليس من هواياته الركض عبثاً..
يعني بجري فقط وراء الطريدة..
فلامن تتخيل انو بجري ساعة كاملة ورا طريدة ..
وتتخيل عدد الفهود في السافناالفقيرة
حتلقى انو لو في مية فهد around ,انو بجري ورا الصيد ساعة كاملة وانو لكل فهد حدود صيد ..
حيكون بين كل مساحة واخرى 122 كيلو ..
على كده معناتا تلاتة فهود حيجو قاشين الطريق السريع بتاع الرهد الدبيبات على راس كل ساعة..
ده غير انو محتاج مثانة نصف قطرها 5 متر عشان يحدد الكيلو المذكور يعني زي صهريج حي الوابورات..
فهد مثانتو قدر صهريج حي الوابورات
والحدوت حقو 122 كيلو متر
ده زيو وزي والي الولاية..
ياخي خبر بتي المعاك شنو؟؟
|
Post: #8
Title: Re: احــوال الليل..
Author: عزاز شامي
Date: 08-03-2007, 09:35 PM
Parent: #7
مشكلتك تهرطق دوما بما لا ينبغي، لا لخطأ في الهرطقة، ولكنه جهد أهرق عبثا (وجده) قبلك مهرطقون أوائل...
إليك بألغاز جاذبية أخرى....
موازية للأرض
تربط بين شخوص مجذوبين جدلا للأسفل...
حل لي دي لو تقدر!
|
Post: #9
Title: Re: احــوال الليل..
Author: Emad Abdulla
Date: 08-03-2007, 09:46 PM
Parent: #8
Quote: فهد مثانتو قدر صهريج حي الوابورات
والحدوت حقو 122 كيلو متر
ده زيو وزي والي الولاية.. |
أحوال الليل غريبة ياخ .
|
Post: #17
Title: Re: احــوال الليل..
Author: DKEEN
Date: 08-03-2007, 11:21 PM
Parent: #9
عمدة
تضحك ليها شنو
انا قتا مثانتو ماقتا حاجة تانية..
انا عارف بالك مشى وين ياوغد..
|
Post: #16
Title: Re: احــوال الليل..
Author: DKEEN
Date: 08-03-2007, 11:12 PM
Parent: #8
Quote: موازية للأرض
تربط بين شخوص مجذوبين جدلا للأسفل... |
ده العنقريب..
|
Post: #10
Title: Re: احــوال الليل..
Author: فيصل نوبي
Date: 08-03-2007, 09:52 PM
Parent: #1
يا وغد
سلامات اولا .. و مشتاقين .. دي ما عارفها مع الجاذبية ولا لا ..
Quote: الارهاق الذي يصيبك وانت تضاجع زوجتك متحركا من اعلى الى اسفل سببه الجاذبية الارضية..
فإذا ماكنت على سطح زحل فاغلب الظن كنتا حتكون مواصل لي الفجر ..
ثم انه لافجر في زحل ..يعني كان حتكون مواصل الى ان تقول بس..
وحيث ان كلمة بس مفردة ارضية تم نجرها وفق حاجات تعاطي المعاني على ظهر الارض كان حتكون مواصل الى مالانهاية ..
فيابخت من تزوجت على زحل.. |
من كل الهطرقات الجميلة وقفتني دي ..
التعب بسبب الجاذبية!!!
طيب في حالة انعدامها
ح يكون عندك مجهود النازل بدل الطالع ؟؟ ولا ما كده !!
طيب في حالة تانية برضو اذا انعكس الحال و صارت الاوضاع مقلوبة*!! الارهاق من وين ؟؟
آبدول ياخي دي ما ظابطة .. كدي راجعها تاني ..
___
* كان غلبتكـ قول
|
Post: #11
Title: Re: احــوال الليل..
Author: DKEEN
Date: 08-03-2007, 10:49 PM
Parent: #10
| Quote: ح يكون عندك مجهود النازل بدل الطالع ؟؟ ولا ما كده !! |
ماكدة ..
وماتكون غبي..
مافي مجهود في النوازل..
النظرية بتقول انو وزن الريشة ووزن الكيلو واحد في حالةانعدام الوزن..
| Quote: اذا انعكس الحال و صارت الاوضاع مقلوبة*!! الارهاق من وين ؟؟ |
مع عدم وجود الجاذبية اي ارهاق في هذا الشأن هو محض خيابة ليس إلا..
|
Post: #12
Title: Re: احــوال الليل..
Author: فيصل نوبي
Date: 08-03-2007, 10:52 PM
Parent: #11
آبدول
اذا اقتنعنا بالنظرية ..
| Quote: مع عدم وجود الجاذبية اي ارهاق في هذا الشأن هو محض خيابة ليس إلا.. |
طيب في حالة وجود الجاذبية تفسرها كيف ؟؟
|
Post: #15
Title: Re: احــوال الليل..
Author: DKEEN
Date: 08-03-2007, 11:07 PM
Parent: #12
| Quote: طيب في حالة وجود الجاذبية تفسرها كيف ؟؟ |
لايعدو الامر غير ان يكون محض جاذبية...
|
Post: #18
Title: Re: احــوال الليل..
Author: الجيلى أحمد
Date: 08-03-2007, 11:30 PM
Parent: #15
| Quote: وفق الجاذبية الارضية.. |
| Quote: مناهضة للجاذبية الارضية |
منو القاليك إنو مافى جاذبية فى القمر??
إنتا مشيت القمر وإتحققتا..???
|
Post: #23
Title: Re: احــوال الليل..
Author: DKEEN
Date: 08-04-2007, 11:22 AM
Parent: #18
Quote: منو القاليك إنو مافى جاذبية فى القمر??
إنتا مشيت القمر وإتحققتا..??? |
هسي الجاب سيرة القمر منو؟؟
ـــــــــــــــــــــــــــــــ
بالمناسبة دي رسالة خاصة لي القمر:
كيفنو المافي منو؟؟
|
Post: #19
Title: Re: احــوال الليل..
Author: غباشي
Date: 08-03-2007, 11:31 PM
Parent: #1
سـلامات ..... دكين الحنين
دي من باب التحية
|
Post: #20
Title: Re: احــوال الليل..
Author: Emad Abdulla
Date: 08-04-2007, 01:53 AM
Parent: #19
و الله ما فعلت ..
قالت الحلب : ( يحسد القرد على .. حَمَار جحا ) .
لكنني لما رأيتك باسطٌ لليل حالك الحالِك .. على حاله القطران ..
توجست .. فهو إبن الـ ..... لم يعد يعودني منذ زمان ..
قلت خلاني و راح ليك .. ببناته الزي الورد و الحكايات الحكايات ..
( و انا شيخٌ قليل الحيلة يا عز ياخي ) ..
فشرّكت ليهو الليلة .. قلت لعل ..
اعرفه حنين - ليل الغربة الغرائي هذا -
و جوادٌ حين لا يصادفه مثلك من قطاع طرق الشوق ..
و كائنات الليل التي تحلبه حتى يتيبس منه الضرع ..
قلت ذلك مستدعيا - يا ذاكرة السجم - جحافل صبايا عبرنني حين مقدرة ..
فما نفعني حال الليل الصعلوك زمانئذٍ , و كان حال الحنك أضرط ..
و مثل ذلك حال الدراهم و الخلقة ..
فمرقن يا عز ياخي ..
مرقن السميحات مني كما تمرق السبيبة من ود العين ..
و والله .. ما منعني إلا الشديد القوي ( الله لا كسّبه ) ..
( أنت سيد الجرسات , فأنت تعرف أن ليس شديدا و قويا على الشحط منكم إلا شح الرندوك و البنطلون المن غير جيوب ) ..
قالت أفكاري ( يا مصاقر الليل البخيل .. قوم شوف شغلة أقضيها بلا فقر معاك ) ..
فحمدت الله .. و أثنيت على حال الليل ..
قامت أفكاري التانية قالت : ما لي أنا و الشجون الصبيات .. و الليل الذي فارق ..
فليكن الشعر و الخيل و الويل و الجليس الذي لا خصر عنده و لا هو كاعب ..
ولا يرمي بلحظٍ يجهجه حنانك , لا شفاه عنده .. ولا شيتاً يبل الشوق .
فعلينا جاي يا قريبي ..
عندنا من الليل شعراً المعتق , من غير سوس , و لا تلسع الجغمة منه ولا يعمل بكرة صداع ولا شيتين ..
بكرٌ راضع لبن أمه .. و فيهو عزاء تمام التمام ..
يفك حيرتي .. و يتبتب حال تسكعك يتيماً كل ما الليل فلل ..
ياخي ندّمتها النجوم الهاملة في سما سيدها دي .. تبحلق فيها كل ليل ..
و تشيلها همك المقنطرو لكل بت متينة الحسن .. كاحلة الهدب .. تطلع ميتين أبو أهلك ..
و تصرف لهن من التوحوح مثنى و ثلاث و بتاع .
شوف يا خينا .. كلام فاينال ..
كتر من الكلام السمح البيقوم ضُل فوق راسك أب سخانة ده ..
بيبرد حشاك و ييقنك إلى حين ..
حيث لا يخضع الكلام لقباحة و سماحة جاذبياتك ( القباحة بزاويتها .. و السماحة برضو زاوية تانية , بس إنت كيف تنشن و تديها ) ..
كلام سمح و بس .. لا يطلع لا ينزل ( جاذبية بتاع مين يا سيد ) ..
يقعد كده تكاية لروحك السكرانة و حيرانة ( لا تفاح الشام تلم فيهو .. ولا بلح اليمن ) ..
تقعد مدلدل و طيبان كده و حلو , و تحن تحن تحن تحن زي الترتيب .. لامن تعرف الله واحد .
أسمع ..
قالت الأعراب في جنس حالتي التي حننتها حالتك ..
( برضو زي ما إنت عارف , أكذب الناس هم الشعراء بني يعرب .. بائعي الوهم لي بت أم روحهم دي ) :
وعانقتُها حتى تقطّع عقدها ..... وحتى فصوص الطوق من جيدها انفصلْ
كأن فصوص الطوقٍ لمّا تناثرتْ ..... ضياءُ مصابيحٍ تطايرنَ عن شَعَلْ
وآخر قولي مثل ما قلت أولاً ..... لمن طللٍ بين الجدية والجبلْ
خليك مطلطل كده .. و تقابض .
و بعدين ياخي الواطـه ليل ..
و الليل كائنٌ عقور ..
إنعل عكاريتك .. غفر الله لك .
|
Post: #29
Title: Re: احــوال الليل..
Author: DKEEN
Date: 08-04-2007, 04:37 PM
Parent: #20
من اجمل ماقيل في استهلال مشاريع القوالات ..
يجمعني وهذا العماد الجميل حب الحلب..
وقوالات الحلب ..
الدناقلة عموما بينهم وبين الحلب عِـشرة والف ومودة..
وبيني وعماد وبين الحلب مودة لامدسوسة ولا بتدسى..
ايا صديقي..افلا اطارحك بعض جاذبيتهم
ان من اجمل مافي دنقلا حديث الحلب ..
طريقة الكلام عندهم ذات جرسًٍ جميل..
اقوام طيبون ..
وياااااااااااااااالحلاوتهم..
في 95 مشيت ارقو المركز
واخدتا خمسة يوم عند ناس جيرانا..
..كرم وضيافات وحلا مبالغة
الفلاليح ياعماد مشروع زواج جميل بصراحة..
تجي نعرس فلاليح؟
ده لو رضو بينا..
شوف ياخينا كلام حدوت..
تعال نتلاقى في دنقلا بعد الضحية..
نمشي البان جديد ومنها نعرج على ارقوالمركز..
صحبة النت دي مابتشبهنا..
|
Post: #24
Title: Re: احــوال الليل..
Author: DKEEN
Date: 08-04-2007, 11:24 AM
Parent: #19
غباشي
سلاموز
|
Post: #21
Title: Re: احــوال الليل..
Author: tabaldy
Date: 08-04-2007, 07:10 AM
Parent: #1
وأحوال التفاح ( قبل مسّه بواسطة وغد ) يظل واقفاً معانداً لتلك الجاذبية .
لم أتحقق كوغد
لكنو شوف العين
|
Post: #22
Title: Re: احــوال الليل..
Author: اساسي
Date: 08-04-2007, 08:08 AM
Parent: #21
كل ما كتب اعلاه محض كلام فاضي
ما دمت مفلسا مجدبا فإن الجاذبية والبشر وكل المخلوقات تعاكسك وتديك شلوت وقد تعاكس ضلك ايضا
ولكنها متى ما فتحت معاك وريحتك فان كل الامور مختلفة
حتي انك قد تصبح جاذبا حيث لا تقوى الجاذبية الا علي طاعتك
وتكتب عن البشرية والمخلوقات جذابا
وقد تصبح من مراكز الجذب القوي
ـــــــــــــــــ
الصحيح يا تبلدي ان تقول احوال البرتكان وليس التفاح
فللبرتقال صرة ومنها جاء عبد الحليم
وليس للتفاح الا القضم
|
Post: #25
Title: Re: احــوال الليل..
Author: Nadia Elsir
Date: 08-04-2007, 11:41 AM
Parent: #22
.........كمان قوليهو مع شوقى و ميولى عليهو فى تعذيبى برتاح ليهو!
دكين فى جاذبية اكتر من كدة؟
|
Post: #26
Title: Re: احــوال الليل..
Author: محمد على طه الملك
Date: 08-04-2007, 12:03 PM
Parent: #25
Quote: جاذبية (ص)اتت على القلب فانجذبت نحوها وسقطتُ على شفتاي ..
ولايزال طعم السقطة كمشتار عسلٍ في فمي.. |
ص = بنات أفكارك ..
وفي رواية أخرى للعمده
بنات إبن ال ..
|
Post: #27
Title: Re: احــوال الليل..
Author: حيدر حسن ميرغني
Date: 08-04-2007, 01:44 PM
Parent: #26
| Quote: ياخي خبر بتي المعاك شنو؟؟ |
قالت ليك...
إنجذب أكثر حتى تطير عصافيرك
أجيك وألقاك أباطك والسماء
وإستفرد بيك ..
هذا كل ما نفيدكم به حتى اللحظة
|
Post: #28
Title: Re: احــوال الليل..
Author: شرير والبرتقاله
Date: 08-04-2007, 03:45 PM
Parent: #27
ايها المحتال على اللغة ومفرداتها دع لها شوية مناص لتمارس فينا عبر ما تبقى لها من سطوة اغواءها الاخير ، قبل ان تسلم لك "روحها"
مخافة ان تحرق روحها وهي التي لا تقدر على نارك ..
ومارس مع بنات افكارك المعصرات بعيدا عن شهوات الليل المفتوح على كل الاحتمالات ..
هذه المغامرة الغير المحسوبة والتي تمارسها "قرفتك" ساعة حنين ، كثير من الاوغاد عرفوا كيف يتحايلوا على هكذا تحريض ، وليس هنالك من قوقل يمدك باجمل صورة فيداس نفسه سيشتهي ان يتلظى بشهوته ، ومن ثم سلم نفسك لحمام دافئ تتنازل من خلاله لحركات يديك ضد الجاذبية وفك عذرية هاتيك اليدين يمنة ويسرى ، وامرح ياسيدي مع مخيالك في سديم لا نهاية له ..
واريني بعدها ، الى اي مدى كانت يديك قادرة على الافتكاك من اهيلجية دوران الركبة وجاذبية رمانتين لا يقيهما من لمسك الا ان تفتح عينيك وترى الى درك ان ساقط ..
ياسيدي ، كلهن يتشابهن فيما يملكن ولا نملك ، وحتى تصل الى يقين شهوة اللوج التي ما ان تنتهي حتى توقد نار قصبتها من جديد ينقصك فقط ان تدخل على احداهن في حضرة شهود من قبلها او من قبلكما ايهما حدث لا حرج .. ساعتها سوف تعرف ان ما كان يعتريك مجرد "شرفة" ينقصها اناء تفض فيه داء شهوتك ..
وغرد يا بلبل اللغة الفصيح ، لتفض عذرية اللغة او حتى لتكسر دينها ذاتو من يبالي
|
Post: #35
Title: Re: احــوال الليل..
Author: DKEEN
Date: 08-04-2007, 05:13 PM
Parent: #27
حيدر العزيز..
ماتبقي انانية..
انا لو فكوني في زول واحد بيهلك..
من صالح عصافير معاليكم نو اتقسم حتة حتة ..وفي رواية اتقطع ..
اللهم إلا اذا كانت العصافير تُحب ان ُينتف ريشها وتتزعمط..
..
دكين
رئيس منظمة الاباط الفي السماء
|
Post: #33
Title: Re: احــوال الليل..
Author: DKEEN
Date: 08-04-2007, 05:02 PM
Parent: #26
محمد على طه
تخيل لو ماكان في جاذبية يامحمد
تاني ماكان في زول كلامو بقع واضة ..
|
Post: #32
Title: Re: احــوال الليل..
Author: DKEEN
Date: 08-04-2007, 05:00 PM
Parent: #25
نادية
هسي (الاغرب) العملتي ليها كوت دي يلقوها وين في البوست ده ..والقالا منو ذاتو؟؟
الفريم بتاعك ده من وين؟؟
|
Post: #31
Title: Re: احــوال الليل..
Author: DKEEN
Date: 08-04-2007, 04:56 PM
Parent: #22
اسئس..
انا قسمتي على الارض الفلس ..والشوق الى ماوجود له..
عايز امشي زحل ياخ..
|
Post: #30
Title: Re: احــوال الليل..
Author: DKEEN
Date: 08-04-2007, 04:54 PM
Parent: #21
Quote: لم أتحقق كوغد
لكنو شوف العين |
راجي الري؟؟
مشتاقين ياوغد..
|
Post: #34
Title: Re: احــوال الليل..
Author: salma subhi
Date: 08-04-2007, 05:05 PM
Parent: #30
دكييييين
سلام أولاً....أحوال الليل !!! والجاذبية !!!!...والكلام الفوق ده والخلاني مستغربة انت لميت الحاجات الفي الكرة الأرضية دي كلها متين وكتبتها!! لااااا في حاجة حاصلة ليك بالتأكيد ..الموضوع ما لستك عربية ولا تفاحة نيوتن !صاااح
كل التقدير
|
Post: #37
Title: Re: احــوال الليل..
Author: DKEEN
Date: 08-04-2007, 05:19 PM
Parent: #34
سلمى صبحي
انتي بالذات ماعارف ليه قلبي بياكلني معاك..
كنتا عايز اتمدد بس البروفايل بتاعك مابسمح لي ..
اخخخخخخخخ من عبث الزمن والجية البدري..
|
Post: #43
Title: Re: احــوال الليل..
Author: salma subhi
Date: 08-05-2007, 05:23 AM
Parent: #37
مايكون البوست ده بعد الباكستانية!
كل التقدير دكين
|
Post: #36
Title: Re: احــوال الليل..
Author: ثابت محمد
Date: 08-04-2007, 05:14 PM
Parent: #1
| Quote: والاغرب اني عربية ذاتو ماعندي.. |
دكين
دي الأغرب بتاعتك الجابو منها الكوتيشن
بس الأغرب بتاعة نادية
والأغرب كمان قول ليهو في تعذيبي برتااح ليهو
دي بتلقاها في حنجرة محمد ميرغني لما يصدح
أرجووووووك يانسيم روووح ليهو باشواااااقي صرح ليهو
عالم ماعندها جاذبية
ح تجينا متين يا دكنز ؟؟
|
Post: #38
Title: Re: احــوال الليل..
Author: DKEEN
Date: 08-04-2007, 05:21 PM
Parent: #36
ثابت
انتا اقعد بس باري لي كوتشينات البنات...
دي جابو من هنا وديك جابو ليها من هنا..
نادية
وصلتك التصريحات بتاعة محمد مرغني؟؟
|
Post: #39
Title: Re: احــوال الليل..
Author: ثابت محمد
Date: 08-04-2007, 05:26 PM
Parent: #38
Quote: ثابت
انتا اقعد بس باري لي كوتشينات البنات...
دي جابو من هنا وديك جابو ليها من هنا |
أحسن أباريك إنت مش ؟؟
.
.
.
يا باكستاااااني 
|
Post: #40
Title: Re: احــوال الليل..
Author: DKEEN
Date: 08-04-2007, 05:32 PM
Parent: #39
معليش يخوانا ثابت باين عليهو اتضايق شوية ..
|
Post: #41
Title: Re: احــوال الليل..
Author: فيصل نوبي
Date: 08-04-2007, 08:43 PM
Parent: #40
البوست ده ما يمشي الصفحة التانية نهائي...
كل يوم بالليل ح ارفعو ليكم
|
Post: #42
Title: Re: احــوال الليل..
Author: عزاز شامي
Date: 08-04-2007, 10:00 PM
Parent: #1
كتبت حضرتنا:
Quote: موازية للأرض
تربط بين شخوص مجذوبين جدلا للأسفل... |
وتفتق ذهن حضرتكم عن:
وما قصدته حضرتناهو: المحبة يا شفيف ... المحبة!
وقلت لي بتفكر؟
|
Post: #45
Title: Re: احــوال الليل..
Author: DKEEN
Date: 08-05-2007, 08:24 AM
Parent: #42
| Quote: المحبة يا شفيف ... المحبة |
الله يديم المحبة بيناتنا يا عزوز..
المحبة الطويلة الممتازة
|
Post: #44
Title: Re: احــوال الليل..
Author: walid taha
Date: 08-05-2007, 08:15 AM
Parent: #1
| Quote: وليس مربع..وليس مثلث |
نعم ..ولو كان كذلك لما إستطعنا توصيل البيض من المزرعة للسوق
منقول من مجلة ميكي
|
Post: #48
Title: Re: احــوال الليل..
Author: DKEEN
Date: 08-05-2007, 10:55 AM
Parent: #44
ابو رغد
الغريبة فيصل نوبي يتنقل عادي من المزرعة الى السوق وبالعكس انشالله
|
Post: #46
Title: Re: احــوال الليل..
Author: عزاز شامي
Date: 08-05-2007, 10:07 AM
Parent: #1
كتبت حضرتنا:
Quote: موازية للأرض
تربط بين شخوص مجذوبين جدلا للأسفل... |
وتفتق ذهن حضرتكم عن:
وما قصدته حضرتناهو: المحبة يا شفيف ... المحبة!
وقلت لي بتفكر؟
|
Post: #47
Title: Re: احــوال الليل..
Author: فيصل نوبي
Date: 08-05-2007, 10:38 AM
Parent: #46
يا عزاز عذبتيو عذاب الهدهد .. ويحكـ يا وغد .. وقعت في شر أعمالكــ
|
Post: #49
Title: Re: احــوال الليل..
Author: DKEEN
Date: 08-05-2007, 12:36 PM
Parent: #46
| Quote: قصدته حضرتناهو: المحبة يا شفيف ... المحبة! |
محبتنا وحاتك ياعزوز واصلة بس مافي زول بصدقني..
|
Post: #50
Title: Re: احــوال الليل..
Author: طارق جبريل
Date: 08-05-2007, 01:11 PM
Parent: #1
والله يا دكين الليل عندك عينة (كُتُور بالشايقي)
محبتي الاكيدة
|
Post: #51
Title: Re: احــوال الليل..
Author: DKEEN
Date: 08-05-2007, 05:28 PM
Parent: #50
طارق العزيز ..
انا محبتي ختيتا في رافت ميلاد وسلمى صبحي..
كدي شوف محبة عزاز
|
Post: #52
Title: Re: احــوال الليل..
Author: salma subhi
Date: 08-07-2007, 07:58 AM
Parent: #51
دكين
شكراً للمشاعر الجميلة ونكن لك نحن كل ود واحترام وتقدير.
|
Post: #53
Title: Re: احــوال الليل..
Author: DKEEN
Date: 08-07-2007, 12:44 PM
Parent: #52
مودة واجبة لا شكر عليها ياسلمى..
الله يديم المعروف..
|
Post: #54
Title: Re: احــوال الليل..
Author: Gafar Bashir
Date: 08-07-2007, 01:22 PM
Parent: #53
طيب لما كل المعرفة دي ما فايتة جيب السروال ما تشوف لينا احوال ما قبل القيامة.
الاسلامية والمسيحية والمهدية والاثني عشرية ...
-------
ولا شوف لينا يوم القيامة ذاتو ...
|
|