الهتـاويل

انا ليه تجيني الموية حفيانة
ادنقر البسا في شبط اخدر ..
ابيت مبلول اصلح في الرباط..
ان ليه شبابيك البيوت الواجمة والناس البساط..
انا ليه بيرجاني النخل في السكة..
يفتح قلبي خمارة وخلاوي وبيت بكاء..
*عاطف خيري




في تلافيف الذاكرة ثمة شتاءُ ُ يورق مضجعي..
* رودريغو ليخاندروس – من كتابه حياة الرعاة




في العام 1994 كنت من مرتادي The British council library لم اكن محبا للثقافات الاخرى بقدر ما كنت مبهورا بالمكان وبملمس ورق الجرايد الانجليزي وبالتفتيش الشخصي الذي يمارس على الداخلين من الاعضاء وغيرهم.
اعتبرت حينها ذلك التفتيش نوعا من الاهتمام..
جعلو مني شخصا مهما يستحق ان تفرغ جيوبه وان تمرر اجهزة الكترونية- ظننتها بالغة التعقيد آنئذ- على جسدة بغية التاكد من انه آمن وغير ُمضر...
انا ود الحلة النكرة اقضى سحابة نهاري في عمود طرف الشارع في مشاغلات وبلا شغل ولا مشغلة..
وفي نهارات اخرى يتم تفتيشي بواسطة الثقافات البريطانية..

فيما بعد وجدت سببا اخر للانبهار بذلك المكان
في السنة ديك كنتا ممتحن شهادة ثانوية..
كانت برضو ممتحنة هي واختها (على اغلب الظن هي اختها للشبه الشديد) وكانو من الذين اعتادوا ذلك المكان ..
جميلات بيضاوات مسبسبات الشعور هادئات زي الاضاءة بتاعة المكتبة..
سودانيات بس ينتمون إلى منظمة السودانيين المنحدرين من اصول تركية او يونانية او بوسنية او أي شي اخر فائق الجمال ..(اظن من اليوم ظلت تلح فيني عقدة اللون الفاتح)
طبعا من شدة انبهاري وقذارتي ما حاولت حتى اعاين ليهم بي صورة مستقيمة..
كنتا دايما بعاين ليهم بالجنبة او بشكل ملتوي..(فيما بعد وبعد اعوام عديدة صرت معتادا على النظر إلى الاشياء بشكل ملتوي)
كنتا بسال نفسي ياربي البتين ديل هسي بكونوا ساكانات وين؟؟
وبتقوم تجيني صور البيوت الارضية بيضاء اللون في الخرطوم شرق اطراف شارع المك نمر وشارع البلدية ..
و الشرفات الخالية ذات الازهار في شارع واحد في العمارات..
كما ظلت ُتلح على ايامها صور البيوت الهادئة خلف عيادة المرحوم حسبو سليمان جوار النقل المكانيكي في حي الاملاك على يسار القادم من كبري الحديد..
واحيانا البيوت المبنية من الطوب الاحمر القديم فيما بين شارع الحرية وشارع علي عبد اللطيف...
وهكذا، من فرط اعجابي بهم وزعتهم بعناية على مناطق كانت بالنسبة لي مثيرة للشجن والشتاء...
البتين والحق يقال كانتا في الحقيقة تمثلان اكثر من مجرد بتين جميلات في مكان معتبر في عاصمة مغبرة ..
ومن الواضح انهم كانو بمثلو بالنسبة لي سلالات انسانية راقية، تبادلت الرقي والجمال كابرٍ عن كابر..
آخر المنحدرين من ال نعوم شقير وحفدة الخديوية والعائلات التي ظلت عجائز النساء فيها لايتحرجن من ذكر عبارات جنسية وتفاصيل محرجة في الزيارات العائلية للاقارب.
عائلات حياتها تسير على مهل في بيوت حفتها نباتات الزينة واعتلت ابوابها المنقوشة بعناية ازهار الجهنميات مختلفة الالوان..
وربما كانوا من بقايا البعثة المصرية الذين يعيشون في بيوت لاحيشان فيها وانما يفتح باب الشارع إلى صالات خافتة الاضاءة ومقاعد بيجية وبنية اللون من اخشاب الخيزران ومناضد عليها مزهريات زجاجية ..
او من بقايا الاغاريق الذين عاشوا اواخر ايام خرطوم حسن عطية الهادئة ..
الذين راسهم من راهم وتغنى بهم من تغنى ومن ثم اغلقوا نوافذ بيوتهم عليهم في خرطوم تتبدل..
العائلات التي ربما سُـطرت على صفحات حياتها مآسي كبيرة ومذهلة ..
كأن يكون رب الاسرة مُـقعدا اومصابا بالربو او بداء الهجرة الى بلاد يكلف الوصول اليها كثيرا..
تلك المآسي التي لا قبل لنا نحن الفقراء بها ..
فنحن بلايانا كانت تُـقدر لنا بقدر طاقاتنا...
فكانت ابتلاءاتنا من شاكلةِ المطر والحر والبعوض والملاريا..
وهكذا وكما ترون
كنت انا القادم من الضواحي وبيوت الجواليص وشارع القيامة .
كنت اسقط على البتين كل ماهو غير جالوصي وغير قيامي..
في واقع الامر ماحظيت كثيرا برؤيتهما..
وفي مطالعة خاطفة لمحتوى الدفتر بين يديهم كانت هناك رسوم لخلاياء وامبياء وخرز منضوم في مساحة خضراء واشياء من هذا القبيل .. بس بالانجليزي ..
خمنت فيما بعد وانا راكب بص جبلىاوليا متجهـاً نحو فقري انهم ربما يدرسون بسستر سكول ..

في لاحق الايام بقو مايظهرو وانا ذاتي من شدة قذراتي واستحقار امين المكتبة لي وكان عندو نضارات قبيحة بطلتا اجي..
وانشغلت عن المكتبة البريطانية بحضور الكيتات في الفتيحاب وبموسيقى سلاح السجون في كوبر..
من ديك ولم اعد اراهم ..
ظلو – ولفرط جمالهم وبؤسي- في ذاكرتي خلال الاطناشر سنة المنصرمة يطلون نتفاً نتفًا..


هسي ولان هذا موقع عام ويرتاده الكثيرين بلاي لو في زول شافهم معاي او عارف ليهم خبر يورينا..
عشان انسف هذه الهتاويل التي تعج براسي منذ سنين..
واحد من اتنين ياخوانا:
ياواحد يجي يقول لي انا بعرفهم وتعال نعرس ليك واحد منهم ...
يا واحد يجي يقول لي انا بعرفهم وديل بنات عاديات جدا من الثورة الحارة الفلانية ..
او من الصحافات او من قلع النحل ذاتو..
لاارضا قطعوا ولا ظهرا ابقو..
لااغاريغ ولا طليان ولا حيشان ولا زهر ولا شذى زهر..












للسادة غير البورداب [email protected]

الرؤيا كانت في العام 1994 البرتش كانسل
لا اسامي...
لا عناوين..
لا اوصاف...
كل المتوفر انهم يمكن يكونوا اخوات ..بيضاوات مسبسبات عليهن نبلُ ُ ظاهر..
لافارعات الطول لابائنات القصر..
اعتمد في هذا الامر على الله ..وانتشار الموقع ..وفراغ اهله والمطلعين عليه ..وضيق هذه الدنيا...













* ليس ثمة من ُيدعى رودريغو ليخاندروس

DKEEN
بالرغم من انى عندى رائ فيك . ( ما تسالنى شنو ). وبالرغم من انى بكره التتطبيل . و ما بحب اقول لزول (فى البورد ده ) عن اى حاجه (قصيده او قصه )انها حلوه . ما عن حساده ,لكن لاسباب اخرى , لكن ....................
و الله انت مشروع كاتب . القطعه او القصه او النثر whatever بتسميه , جميل و عجبنى جدا جدا


و بالمناسبه البنات ديل ساكنيين - معليش (كانوا ساكنيين)- فى الصافيه ,ابوهم احد االاستاذه فى جامعه سودانيه (عريقه). وللاسف ما فى اى طريقه نعرس ليك واحده منهم

Quote: بالمناسبه البنات ديل ساكنيين - معليش (كانوا ساكنيين)- فى الصافيه ,ابوهم احد االاستاذه فى جامعه سودانيه (عريقه). وللاسف ما فى اى طريقه نعرس ليك واحده منهم

أعجب لساكني بحري اللذين لا يفرقون بين المغتربين و الصافية!

____

Hussein Mallasi

Quote: أعجب لساكني بحري اللذين لا يفرقون بين المغتربين و الصافية!

معقوله بس؟؟؟
الصافيه حدودها الجغرافيه كمايلى:
جنوبا :خور شمبات الفاصل بين المذاد و الصافيه
شمالا: شارع نقطة الصافيه (نقطه بوليس)و الشارع بيفصل بين الصافيه و شمبات , لكن اهل تلك المنطقه بيحبوا يقولوا عليها (الصافيه شمال)
شرقا:شارع الانقاذ
غربا: شارع المعونه
اما انا فاعجب لسكان بحرى و اللى ما عارفين سكان بحرى كويس و ببيختلط عليهم دكاتره الكليات المختلفه!!!

صاحب البوست DKEEN
ح تصدق منو ؟ انا و لا Hussein Mallasi ؟؟؟

بالمناسه , انا سحبت كلامى فى البدايه . انا ما عندى اى رائ فيك

smart_ana2001

حدود الصافية لو سألنا نصر الدين السيد
- الله يرحمو - ما حيقدر يحددها أحسن منك.

____
دكين سيفضل ان يصدقني
.. و الله أعلم.

Hussein Mallasi

Quote: حدود الصافية لو سألنا نصر الدين السيد - الله يرحمو - ما حيقدر يحددها أحسن منك.

ربنا يرحمه و يحسن اليه
اعمل شنو ؟ دى عشرة ( بضم العين ) 20 سنه مع الصافيه. و ياتو حى فى الخرطوم احلى من الصافيه؟؟

Quote: و ياتو حى فى الخرطوم احلى من الصافيه؟؟

دا الكلام البيجنن ناس امدرمان و بيجننا معاهم!!
____

smart_ana2001

Quote: بالمناسبه البنات ديل ساكنيين - معليش (كانوا ساكنيين)- فى الصافيه ,ابوهم احد االاستاذه فى جامعه سودانيه (عريقه). وللاسف ما فى اى طريقه نعرس ليك واحده منهم

اصلو ماتستبعد انهم يكونو فعلا من هناك..
في خريف العام المنصرم مريت بالصافية عقب مطرة وكنتا جاي بي طريق الانقاذ..
لامن نزلتا من الحافلة متجه غربا لي جوه الحلة كانت المطرة وقفت دوبها..
تخيل يا سمارت ريحة الارض المبلبة المخلوط بي الرملة الحمرة من باقي البيوت وصفق الشجر المبلول ذكرني البتين ديل..


طبعا لقيتك جاهز واصلا لاينقص هذا الشجن غير انك تقول لي ابوهم استاذ في جامعة الخرطوم..
وكان بدرس اقتصاد وعلوم سياسية..
وامهم دكتورة في كلية الزراعة شمبات..

لو بتعرفهم يا سمارت بعرس ليك التانية..
بس بوح ..

ملاسي
شفتا كافتيريا الباشا في الحلفايا يا ملاسي؟؟
اها انا يوم بلاقيك هناك وبنشوف الموضوع ده جادين ..
ياحددنا التارقت يا كمان مشينا شربنا شاي المغرب مع ناس سمارت..


عموما يا ملس
انا واثق انو البتين بطريقة او باخرى عندهم علاقة بيك ..
ياقرابة يا معرفة يا شي من هذا القبيل..
لذا انا من زمان وانا بريدك..

بس سمارت دي كمان ما بتتكضب..

Quote: تخيل يا سمارت

Quote: طبعا لقيتك جاهز

Quote: لو بتعرفهم يا سمارت بعرس ليك التانية..

لوووووووووووووووووووووووووووووووووووووووووووووول

دكين يا مطشش
هووووووووووووووي أمشي أشرب ليك موية و أخد ليك دش و تعال
سمارت دي أنثي
تعرس ليها واحده فيهن كيف








دكين انت غاتس وين بتمرق بيهن جوز جوز
فك لي اخوك فردة يا حبة

كثيرا يا وغد .. ما حذرت من مُطالعة غوركي و قوقوول و كلاسيكيي الادب الروسي و حدثتكـ
ان هذه العوالم التي تخترعها مخيلتكـ الممعنه في التفاصيل ستوردكـ موارد الحرمان
الجنسي و المعنوي لان مُخيلتكـ أماره بالجمال و بأكثر مما تحتمل شرايين و اورده عقلكـ
الجميل .. انت تحتاج ان تخرج قليلا من صومعتكـ البائسه هنالكـ و تغني

املي صدركـ بي هواء البلد البعيده

لايوجد من هم في مخيلتكـ الان يا صديقي .. هن بعض جميلات فاتنات .. حين يرفلن امامكـ
بتلكـ الفساتين البهيه الباهظة الثمن يكون هنالكـ ثمة حوار جانبي قاس بين (سوتيان ) مُطبق
علي نهد احداهن .. تكون الغلبه في الحوار دائما للـ (سوتيان ) فلعبة السوق تفرض ان يكون
المقاس و اللون عادة في تضاد صُدفوي لكل ماهو سوداني .. و تكون صاحبه الورطة هذه في
وضع لايسمح لها سوي ان تذيد من إتساع رقعة ابتسامتها امام العيون العطشي .. إمعانا
منها في تضليل الجماهير من امثالي /كـ عن خبر (السوتيان) العنيد
و الـ (سوتيان ) ساعتئذ لا يحفل بكل هذا فهو سلسل آلـ هارودز .. جلبه احدي المغامرين في
رغبه اكيده منه لنيل قلب اخت / حبيبه مزعومة/ خطيبه حافظة لماركات البضائع المستورده
ولا تحفل كثيرا لشأن المقاطهة التي تملاء القنوات ذاتها التي تشاهدها كل يوم في كسل
و عباطة .. لا تُسيئ فهمي انا لست ضد الجميلات ولا ضد كسلهن المُحفز للغرائز الخاملة .. انا
هنا اقرر حقيقه
عطفا علي ماسبق .. هذه الجميله نفسها ليست سليلة اي آلـ .. و هذا اللون الذي يقلق احلامكـ
الجميله هو نتاج هجرات عربيه قديمة و تحفظ بعض القبائل علي قضايا مثل النسب و توزيع الثروه
او
ربما كان نتيجة الانفتاح المحدود لبعض القبائل التي آثرت السلامه علي قضايا تتعلق بما يبثه
التلفزيون آنذاكـ حول الاجنبي و ضرورة التصدي له إبان حملة طويل العمر الدفتردار

سأعود يا صديقي الوغد .. انتظرني
ذات مساء سبت صيفي بأمستردام


__________

لو كان قلبي معي ما اخترت غيركمُ
ولا رضيت سواكم في الهوي بدلا
لكنه رغب فيمن يعذبه
وليس يقبل لا لوماً ولا عدلا

طروق

لقد تركت خلفي عالما جميلا لوتعلم..
لقد رايت الشتاء في كافتيرا اقتصاد شجياممغربا يشير الى حي الوابورات في بحري..
قد رايت اعراس صديقاتي في ليل الخرطوم والمطر يغور بكل شي..
لقد راينا ايامئذ خير الصبايا وخير الاصدقاء..
غار بهم الزمان الى اصقاع الارض واتجاهات الدنيا الاربعة..
كنا جماعة تستلذ المغارب وتقدس غروب الشمس في ملتقى النيلين..
عرفوا ان يوما سياتي يؤرقنا فيه الشجن
فحرصو على كل شي ايامئذ ..
ووثقوا كل شي في صور وخطابات ورسائل ومواثيق مرعية..
حددت مواقيت لقاءات في ازمان مختلفات ..
ووسائل اتصال بديلة ووضعت عناوين عغشوائية محتملة وغير محتملة..
ووضعت بدائل للشجن الغلاب .. البعض من شدة اشجانة لايزال وفيا لاماكن اللقاءات
ولايزال يرتادها في خريف السودان وشتاءاته..
كانت مودتنا شديدة فحبس الناس انفسهم في ليل الاسيى وزمان الذكرى..
من شدة المحبات صار كل ماياتي من طرف الذاكرة يؤرق الواقع..

الان ما تبقى لنا إلا ذكرانا في تلك المغارب والعصريات..


ياخدر
انا من راي مالا يرى
انا من راى في ساعة الميلاد صحراء فامسك حفنة العشب الاخيرة..
او كما قال محمود درويش

شكرا على النغم الجميل

Quote: في تلافيف الذاكرة ثمة شتاءُ ُ يورق مضجعي.. * رودريغو ليخاندروس – من كتابه حياة الرعاة

قلت لنفسي عندما قرأتها
اذن
هو سر الابداع الكتابي المقيم ،
القدرة علي تذكر تفاصيل القراءات ،
إركامها في زوايا الذاكرة ،
و اعادة انتاجها بالخصوصية الدكينية ، او ما يسمي في ادبكم بـ
( خصوصية ود الحلة ) .

كان هذا في شأن ما تكتبون
اما في شان فتاتيك ...
فانت اعلم بقصر باعنا ، و قلة حيلتنا ، و ضحالة ثقافتنا .
لكن انت تعال هني ،
انت البنات ديل كلهن حتسوي بيهن شنو ؟
في النهاية حتعرس واحدة و لّا اتنين و لّا تلاتة
و لّا حتي اربعة منهن

و الباقيات ؟؟
حتعملن تركين لغاية ما يجي وكتن ؟

يا سلام عليك يا دكين..
دائما ""كزرزر"
يفور في الحلق ويطلع بالانف وتغمض العيون من رشاشو ويغسل الطمام.
ياخي انت زول مجنون ودي مدح بما يشبه الذم..

شكرا لك وربنا يلمك في الرايحة..

والله يادكين قريب ده ماقريت لى نص بالجمال ده واٍن كنت لايمك يأخى على عدم قبولك لدعوتى بمكتبى الفخيم العظيم وانتحالك لشخصية (بات مان) لحظتها..لكن الجايات أكتر ...
البنات ديل معانا فى الثوره وبزكر يوم دفعته فيهم لى واحده فى المواصلات يمين لى هسع متزكر شكل الكمسارى ,'hوطاقية السواق الحمره وكتابه فى المقعد الورى بخط تعبان بقلم شينيا(تزكار من التوم جوكس)
اها صدقنى بلم فيهن واحده فيهن أظنها أتزوجت أنصار سنه وبقت منقبه هسع والتانية على الهبشه بعد أكملت كل كورسات اللغات فى العالم أخرها كورس اللغة الصينية ومنتظره أول( دكشنرى) تتلم عليهو..ماقاعد أحب البرتش كاونسل ولاالمركز الثقافى الفرنسى ولاأى حته فيها خواجات وسودانيين دايرين يركبو مكنة خواجات لأنو فيها ناس بيعملوا فيها جاديين ومقطعين الثقافة وكما قال (رودريكو ابو فنله) لاهامش داخل الوطن الا الوطن

المهم ياصديق عمم هذا النداء العاطفى.... وشوف لى قطر حلفا 1990 نزلت فى الليل فى محطة العبيدية وحلفاوية كنقش الطيف فى الخاطر تبتسم مودعة والقطار يواصل مسيرته!!!




والله كتاب بالحيل يادكين

الاستاذ حاتم
اولا:
دعوتك لنا بمكتبك الفخيم كانت محل تقديرنا وامتناننا..
تعرفنا على نشاط السادة المحامين في تلك الايام ..كما وتاملنا في السمك والجمبري والزيتون الذي يتوسط موائدهم..
تعرف انا كنتا الويم داك ماسي النقابة اجدد البطاقة..
تخيل يا حبيب بعد المائدة المبسوطة ديك قتا ياخي المجددن ليها شنو؟؟
ثانيا:

Quote: البنات ديل معانا فى الثوره

للاسف انا امتاز بشجن عنصري غلاب يميز جدا بين بنات الحلة وحفدة الزهور..دي امشي عيد صياغتها تاني.. وخت دمغة محامين

ثالثا:

Quote: اها صدقنى بلم فيهن واحده فيهن أظنها أتزوجت أنصار سنه

تخيل انتا كده ريحتني شديد .. الواحد يمشي ينوم مرتاااااااااااح

Quote: والتانية على الهبشه

لووووووووووولوز دي قلبتا فيها هوبة ..
المظهر يا استاذ..

شكرا يا حبيب على هذا الحضور الجميل

دى الجابة شنو هنا.....

دكين


يا زميل المنبر وود حلتنا .. طبعا انا سنيرك

عليك الله يا معولق اكتب لينا عن (شارع القيامة ) .. وعماد دفدلى ومصطفى السمانى و(ابوداوؤد ) وعماد نيجيرى واولاد جبون وحلة حسين واصحابنا فى حلة العتارسة - ناس بدين - واطلع على البحر شوف لينا الروس - ناس الدباسيين

جمعه
انت درست في المقرن الثانويه فترة 83-86 ؟

خدر

83 ... يا زول مالك علينا (83 ) دى اخوك فى (الابتدائى ) الانتفاضة لمن قامت كنا يدوب خاشيين على سادسة يعنى ( نحن من مايو وفى مايو بعثنا من جديد ) نشيد ما قلناه

Quote: ان هذه العوالم التي تخترعها مخيلتكـ الممعنه في التفاصيل ستوردكـ موارد الحرمان الجنسي و المعنوي لان مُخيلتكـ أماره بالجمال و بأكثر مما تحتمل شرايين و اورده عقلكـ الجميل .. انت تحتاج ان تخرج قليلا من صومعتكـ البائسه هنالكـ و تغني املي صدركـ بي هواء البلد البعيده

وأضيييف يا ابن الإييييييييييييييييييييييييييييييييييييييييييييييييه

د.بيان

سعيد بهذه المؤازرة ..
انا الايام دي اثير شجن غلاب ..ياتيني مع بدايات الشتاء..

من المؤكد انهن في مكان ما في الارض..
وربما خرج احدهم من مقهى عقب قراءاته لهذه الهتاويل غير عابي ..
ومرت احداهن في طريقة تحمل كتابا وخرزا منضوما ومالفت ذلك من انتباهه شي..


مودتي ياصديقة..

Quote: انت البنات ديل كلهن حتسوي بيهن شنو ؟

حمد امبس

دي مشكلتك يا حبيب ..
انك متخيل انو قلب الرجل يتسع لواحدة فقط..
هكذا اوهموك من سبقك في العمر ..وهكذا اكتسحتك الثقافات..

يا صديقي رأفه بهن فاني اقسم محبتي عليهن بالتساوي..
لو جعلت محباتي واشواقي ومحنتي في واحدة لما حملت سُـدس مابي ..
ولهلكت كحملٍ تحت وطء حمل بعير..
ياحمد
يا حمد
يا حمد
نحن من طينة رجال لو بسط الواحد منا درهما من محبته وشجونه لكفت من في الارض جميعاً..










ده من ناحية
من ناحية تانية

روديرغو ليخاندروس ده لو لقيتو بلاي اديني خبر..

دكين
سلام
اجمل مافي كتابتك دي إنها بتخلي الناس تطرب وتتسلطن
وتجي تقول كلام حلو..
شفت خدر وحاتم الياس، وآخرين؟
يتدهدهون طربا..
والدليل أهو.. خدر مشى بحت ليك أجمل صوت بشري.. فيروز
وهي تنشد على ثقيل الوسط.. يرافقها القانون..
لو كان قلبي معي ما اخترت غيركمُ
ولا رضيت سواكم في الهوي بدلا

هذا ويعتمد ما قاله حمد
في شأن المدعو
رودريغو ليخاندروس

ياخ انت زول مسكون .. وبتبالغ .. ومحسن خالد كان غلطان وكت قال ليك نفسك قصير في الكتابه ..

اكتب يا زول والله انت زول كتاااب للدين

كتابتك سلسه وساهلة .. زي الكانو الزول قاعد يتونس معاك.. ما قاعد يقراء ليك
يعني ما كلام مكتوب جامد
فيه حوار خفي ..
بسويه الزول مع روحو براه .. فجاه كده الواحد يتخيل نفسه دكين والكلام ده كاتبه هو .. ولمن يفوق ويتذكر انو ما دكين يقعد يرد على روحو وكت كان عامل فيها دكين .. ولا يتجاوب معاها بي تقطيبة جبين او ابسامه



متعنا يا حلو

فقد ملكت البيان
وعقبال قلوب الحسان

دكين هوي يا شيخي
ما تخمني بالكلام الكتير المسكر ده ...

هل هن ن مسلمات مؤمنات قانتات...قبل ان نحرق البخور او نخوض بحور الشوق الطويل سفرا اليهن...مدد ايها الجميل

يا وغد خايف اقول ليك البنتين ديل بعرفهن تقوم تتجنن علي ..
ممكن أديك أمارة عشان تصدق كلامي ..


كتابة حلوة وراقية يا دكين ..
إنتشلتني من كومة أحزان ..

محبتي ..

Quote: اعتمد في هذا الامر علي انتشار الموقع ..وفراغ اهله والمطلعين عليه

نصف الاجابة ..
انك تعرف تسأل وين ..
انشاء الله في ظرف اسبوع ..
بتجيك واحدة في ( الماسنجر ) ..
بتقول ليك .. انا كنت بمشي البرتش كانسل سنة 1994 ..
واعتقد من شدة بؤسك ستقبل بها ..
رغم انه شعرها ( قرقدي ) ..!!



نص جميل ..

Quote: وهكذا وكما ترون كنت انا القادم من الضواحي وبيوت الجواليص وشارع القيامة . كنت اسقط على البتين كل ماهو غير جالوصي وغير قيامي.. في واقع الامر ماحظيت كثيرا برؤيتهما..

الاخ دكين
هل تقصد تهاويل...
حقيقة هناك مسافة قصية بين الهمك وكلتوس وأرس ..وبين تلك الجميلات الأئي أشغلنك
ويبقى الشجن الأليم هو الإبداع الذي يجمع بينك وبين هذا الربيع الأخضر وتلك الفيافي ..

عمل جميل ....

Quote: كنتا بسال نفسي ياربي البتين ديل هسي بكونوا ساكانات وين؟؟

والأجمل انك عندما تمتطي دفار الكلاكلة تبدأ تسرح وانت معصور ما بين عجوز تحمل قفة وشايب يحاول بصق سفته فتقودك مخيلتك إلى بيتهن وتذهب بعيداً لتتخيل حتى شكل الحوش وهما حالياً تجلسان في الحوش والأغرب انك تتخيل حتى شكل الملابس المنزلية التي يرتدينها ودوماً ما يرتسم قميص البيت الوردي المطرز باللون الأبيض وسنفجة زرقاء مع أرجل لا تحتوي على (شقّيق)..
وتذهب لأبعد من ذلك فتنسج في مخيلتك حواراً ربما يدور الان عنك وكيف انهما تلحظانك بين الفينة والأخرى وكيف ان كل واحدة منهن كانت تحلم بفارس احلام يكون من طبقة الفقراء فهن بليدات وانت شاطر وهن تعيسات وانت سعيد في حياتك انت بسيط وهن يحببن البساطة ..
ترسم لنفسك ادوار بطولية تقوم بها في المكتبة فمثلاً إن عاكسهم شخص قمت انت وكنت مثالاً للمروءة وإن نسيا المال لأي سبب كنت انت المنقذ فتدفع عنهما أو ان يكون في الطريق اشواك أو زجاجة مكسورة فتذهب وتزيحها ..
تتقمص فجأة دور الشاب اللطيف الظريف وكيف انك ستحكي لهن نكات وترسم البسمة في شفاههن فهن بنات عزّ ولك اولاد العز دمهم تقيل فبالتالي هن محرومات ..
تقاطعك طقطقة الكمساري : يلا يا حبيب ..
تدفع له غير ابه بالباقي محاولاً العودة السريع لاخر لقطة رسمتها في في مخيلتك لتستلذ بمتعة الخيال وتلك الوجوه الجميلة ..
تتعب جداً لتذكر اخر حوار فتبدأ من نقطة الصفر وتواصل وتتضيف بعد الحوارات التي ربما لم تكن مسبوكة حينها في خيالك ..
تذهب لأبعد من ذلك للتخيل إن إحداهن وصلت في حد الإعجاب بك لدرجة انك قررت ان تصحبك لمنزلكم لتثبت لها كيف انك متصالح مع نفسك غير منكر لواقعك وكيف ستزداد هي إعجاباً بك وانت تقدم لها الموية بي جك البلاستيك الازرق وكباية النيكل ربما تأتي معه صفقة من النيمة التي تحتها الزير ..
نعم سيأتي ناس بيتكم ليسلموا عليها وكيف انها ستصبح صديقة لأختك الصغيرة وربما بعدها تزورهم حتى ولو لم تكن انت موجود ..
في طريقك لتقديمها للمحطة البعيدة من البيت توقفها لتسلم على كل الفرد تحت الشجرة وتتقبل دعاباتهم معها ومعك :" والله يا دكين لقيتا ... " ..
" يا زولة انتي البيحومك مع الكرور ده شنو ؟؟؟"
وربما تصادفكم احدى بنات الحلة وتستوقفك لتقول لك : " دكين حا تشرح لي الرياضيات بتين ؟؟ "..
وربما صادفتك حاجة السرة قائلة : " شكراً ليك يا ولدي التلفزيون الصلحتو لي امبارح شغال كويس " ..
حينها ستدرك انها إزدادت إعجاباً بك فأنت محبوب في كل الحلة ..
تصل معها المحطة وتصر ان تركب معها لتوصلها حتى السوق العربي لتعود انت ادراجك مرة اخرى وتواصل هي السير في طريق العودة لحيهم الهادئ..
فجأة يقطع حبل افكارك صوت :
: يا ولدي عليييك الله نزل لي معاك القفة دي ..!!"
لتكتشف بعدها انك في المحطة الاخيرة وانك فوّت البيت فتعود ادراجك ماشياً ولا يتحقق من رسم خيالك إلا اللوحة التي ستقابل فيها اولاد الحلة تحت الشجرة :
" دكين جيب سفة .." ..

Quote: ملاسي شفتا كافتيريا الباشا في الحلفايا يا ملاسي؟؟ اها انا يوم بلاقيك هناك وبنشوف الموضوع ده جادين .. ياحددنا التارقت يا كمان مشينا شربنا شاي المغرب مع ناس سمارت..

شاى مغرب عديل كده ؟؟
و الله يا اخى تتفضلوا طوااالى على العين و على الراس. و سلموا لى على ناس البيت . و قولوا ليهم انى مشتاااقه ليهم شديد
و سلموا لى على شارع المعونه . ما تنسوا تتعشوا فى استلا , و اقيفوا فى المؤسسة ,فى اكشاك المجلات اشترو لى اخر 5 اعداد من رجل المستحيل و مجلد ميكى و رسلوهم لى فى اخر الدنيا.

انت رائع ياديكو
ارجو ان تواصل الابداع
المنبر محتاج لمثل هذا الجمال
الله يديك العافية

Quote: عليك الله يا معولق اكتب لينا عن (شارع القيامة ) .. وعماد دفدلى ومصطفى السمانى و(ابوداوؤد ) وعماد نيجيرى واولاد جبون وحلة حسين واصحابنا فى حلة العتارسة - ناس بدين - واطلع على البحر شوف لينا الروس - ناس الدباسيين

العزيزمحمد حامد

لاازال اذكر نشاطك القويفي ثانويات المنطقة..

في الاجازةالفاتت في موقف جبره لاقيت حسين كرشة ..
كان بمثل لي رمز من رموز البطش في حلة جبون..
لطالما انفرد بي ذلك الوغد في كفيت شديد مفاجي ودون اي سبب..
اتجلدتا من ذلك الحسين كثيرا وحاولتا كذا مرة اخلي ليهو الشارع تلك الايام
للاسف كان بلم فيني في ميدان الكواكب الواسع حيث لا شارع لتم التخلي عنه..
لاقيتو في موقف جبره وكعادته كان يثير الفوضى ..
ضحك لذكرى الايام الغابرات..
وقال لي ان هسي شغال في شي كده عندو علاقة بالجسش
قتا ليهو يعني لسع ممكن تكفتنا يا حسين..

مريت على العزوزاب
وفي محاولة للبحث عن اثار شارع القيامة ..ماوجدت سوى جمعة العميان بتاع السجاير
14 سنة ببيع في خمسة علب سجاير في طبلية ناصية سارع القيامة..
لم يعد للشارع شكل القيامة ..فليس ثمة موت وليس ثمة ريحة مريسة وليس ثمة سكاكين ..
جمعة فقط بنضارته البوليس السوداء
يعرفك من وقع اقادمك ومن نحنحتك ..
يعرف عدد مرافقيك من انحباس الهواء عنه في اتجاه الريح..

لم يعد الشارع كما كان قبل 15 سنة وانتاماشي
من يوم جا العزيز محمد عب القادر بي اسرته ..
تغير كل شي
ووضع العرب ايديهم على املاكهم القديمة وذهب النوبة الى دار السلام..
لم يعد ثمة من يلعب المنقلة
ليس هناك بائعات ..ليس هناك ولف ..


في الدباسين سالتا تحديدا من هيثم النور ولا ادري لماذا
قال لي عماد انو ومن زمن بعيد اتخارج ..
المقابر اصبحت مستوية وليست ثمة موتى جدد..

كل شي ذهب الى زوال..
البركة فينا وفيك..

تعرف يا دكين

الوجه الحسن لو حتى عاينت ليهو بشكل ملتوي برضو بتنعكس ليك اللوحة عديلة .. ( مع مراعاة مقاييس الحسن عند مختلف ألناس ) ...

إتكاءة :

Quote: كنتا بسال نفسي ياربي البتين ديل هسي بكونوا ساكانات وين؟؟ وبتقوم تجيني صور البيوت الارضية بيضاء اللون في الخرطوم شرق اطراف شارع المك نمر وشارع البلدية .. و الشرفات الخالية ذات الازهار في شارع واحد في العمارات.. كما ظلت ُتلح على ايامها صور البيوت الهادئة خلف عيادة المرحوم حسبو سليمان جوار النقل المكانيكي في حي الاملاك على يسار القادم من كبري الحديد..

معانا واحد صيني في المكتب ..
كل يوم يفتح ال GoogleEarth و يقعد يتحاوم في شوارع شنغهاى ..
قلت ليهو إنت بتفتش في شنو ..
قال لي و إبتسامة صفراء كلونه ترقد على أطراف فمه : خايف القيرل فريند بتاعتي بتتحاوم مع واحد
و أشار إلى حى يكتظ بالبيوت المتشابههة ( شبه القردة يا يابا ) ..
فقلت له : غريبة .. أيكتفي الصيني بقيرل فريند واحدة مع هذا العدد المهول من البشر ؟

ثم قال لي سعودي ( غتيت ) يجلس بجانبه بلغة بدوية يصعب حتى لأهل الرياض فهمها :
الصينيين هادولي .. بياكلون ريسين القرود .. عشان كدي تلاقيه الواحد ينسدح بدري و صوت شخرانو يجيب الرايح في التنهات *...

___

* التنهات : صحراْء قريبة من الرياض يقصدها الناس في الويك إند و كدة

الزول اللذيذ دكين
تحية طيبة
مالك وتجديدمثل هذا الشقاء مثل هولاء لم يخلقن لمثلنا
طفرات تمر عليك فى المركز البريطانى او الفرنسي او معرض الزهور فى القاعة
تطالع ولا تمتلك.
ذكرتنى واحد صاحبنا مثلنا من بيوت الطين خطب وحده من نواحى المنشية
نزل يتزوج البت قالت ليهو معاك كم قال كده, ضربتوا بالسودانى
قالت ليه هذا لا يكفى لاخراج زواج يليق بى اهلوا قال ليهو احفر لينا السايفون
والسنه الجايه زيد قروشك وتعال اتصلت عليه اها يا زول عرسته قال لى قربت تجيب الموية.

عقيد

Quote: شفت خدر وحاتم الياس، وآخرين؟ يتدهدهون طربا..

ديل يا حبيب ممزوجين بي الشجن لذا تجدهم يتدفقون في الهبشة ..
موش بقول ليك نحن في الشدة باس يتجلى ..
اها ديل في الذكريات شجونُ ُ تتدفق..


bakhaf

Quote: ياخ انت زول مسكون .. وبتبالغ .. ومحسن خالد كان غلطان وكت قال ليك نفسك قصير في الكتابه ..

اظني مسكون ..
مسالة ارتباطيبي الايام السمحة الفاتت بقت مبالغة..
ماعارف هل ده من بؤس هذه الايام ام من شدة تلك ..

ام من كليهما..
محسن الله يطراهو بالخير ..
عايز يورطنا بس نقشنا النومة بتاعتو..
هسي قالو مودر في لندن..
الله يكون في عون المواني..



تولوس فريد عبد الوهاب

Quote: هل هن ن مسلمات مؤمنات قانتات..

اقول ليك حدي معاهن صورة امبيا وخرز منضوم ..تقول لي مسلمات؟؟
قوووووول يهود ..البحصل شنو؟؟



موووووووووووووووووووووو

Quote: يا وغد خايف اقول ليك البنتين ديل بعرفهن تقوم تتجنن علي .. ممكن أديك أمارة عشان تصدق كلامي

..

يامووو ما تبالغ؟؟
انا قتا شفتهن في البرتش كاونسل ما قتا في 24 القرشي ..

انتا طبعا مافي بت في الدنيا دي مابتعرفها يا معتصم..
وبعدده كلو عندك احزان؟؟

كترتن يا ولدي ماكويسة..
اقسم لي تامبا ده معاك..


HUMAIDA ..

Quote: انشاء الله في ظرف اسبوع .. بتجيك واحدة في ( الماسنجر ) ..

حرم جات واحدة زي الرصاص..
لكن اخوك شاكي انو ده شرك من عمر الفاروق..
لومرقت من عمر ما بتختاك..
من القائل:

(الحرج حاصل والرسالة وصلت..) طبعا دي انا ووليد طه قعدنا فيها 3 ساعاات عشان نحاول نفهمها..
غلبنا..
في النهاية عرفنا انك زول لذيذ جدا .. ومنقة
بس مشكلتك وجيه حبتين ..
لوكنتا شين كنتا حتكون زي الدبستك..
وماتنسى العضة يوم الخميس مع عمران ..
حاتم الجميل

Quote: الاخ دكين هل تقصد تهاويل... حقيقة هناك مسافة قصية بين الهمك وكلتوس وأرس ..وبين تلك الجميلات الأئي أشغلنك ويبقى الشجن الأليم هو الإبداع الذي يجمع بينك وبين هذا الربيع الأخضر وتلك الفيافي .. عمل جميل

والله والله والله لو اجتمعت شجون الدنيا ما ماثلت شجوني فيما بين كلتوس وإرس والهمك..
تلك دنيا اخرى تمتلك ناصية الحلم ..
وكم اود لو أُقبر هناك..
اموت بين ظلال الطرفه وفي جوار يؤنس سفري..

لكم تحية طيبة ومودة خالصة

مداخلاتكم اسعدتني ..
الرد عليكم فردا فردا امر مرهق بيد انكم تستحقونه..


مافي واحد فيكم جاب لي خبر البنيات ديل .. مما يعني انو البوست بتاعي ده راح بندق في بحر ساي..

يكونوا جن ياربي؟؟

Quote: كلتوس وإرس والهمك..

الااااااااااااااااااه ......!!

معقول يا دكين ....؟؟

انت من ديل ....؟
ياتها فيهن ...؟
سريع ... سريع ...؟

الليلة انا قاعد ليك مخصوص ... حريقة في الجريدة ...وحريقة في اي شئ ..

امسكن لي واحدة واحدة ...
ابدأ بكلتوس ابداها من " قكر " لحد " حواء مار "
و طوالي خش في الهمك برضوا من " قكر " لحد " ارواسى مار "
وبعد ده نعدي ارس ابداها " بالكنج " و اختما في " الساب "
يلا ...
يلا..

دكين
قلمك حاضر الشوق
وحنينك زول مدفور لي مشوار الروح
بدون كرعين
جنحينو تساب الساكنك انت
يا مسكون
مسخوت القال الدنيا نظام
العالم كلو بعيش في رحلة معولق فيها الزمن الأشتر
يا جهجه وجعك كل ملامحي
يا وج وج شوقك بلّ صباحي
يا زول يا خريف السرور
ممنون لي المطر الفي واديك
ياااااااااااااااه

دكيييييييييييييين
بحبك مووووووووووت

الطاهر امبس

طبعا المعرفة بينا واصلة شديد واكتر مما تتخيل ..
بس ماجات مناسبة تستاهل ..
قنا نختك دخرية لي يوم فيهو ساير النيل..
وتتوسط لينا عند صاحب الوان..ونشتغل نكتب ليهو (عسل سوداني)


اها طالما جبتا سيرة إرس والهمك وكلتوس انجلس..

كدي النشوف حصافتك وقدرتك على التكهن وانتا زول مشهود ليك بهذه الصفات في سوح الصحافة ..

لو قتا ليك انا من كوش مار ..تفتكر منو ؟؟

معرفتك بي ارساونجي قدر شنو ياحبيب.


غايتو للضمان كده عندك تلاتة فرص اختار فيهم زول من ديم بين وحتى المنشلين..
مرورا بي كوشنجي نشاي وفيلنجي مار واننتوني مار وخواجة مار وثملي مار وشلالي مار وشامنجي مار وكورنجي وحتى بيت ناس عبد الرحمن شامي..



ارس طبعا خياراتك مفتوحة من بيت ابراهيم حسن بحري وحتى بيت ناس كنون قبلي
ومن بيت ناس عبدو بشير شرقا وحتى بيت ناس ابوعبيدة غربا..





لو الشغلة غلبتك قول عووووووووووووووك
انا بجيب ليك اخرى ..
وارقد عافية يا سليم الذوق

حذف للتكرار

العزيز دكين

Quote: نحن من طينة رجال لو بسط الواحد منا درهما من محبته وشجونه لكفت من في الارض جميعاً

عيناي فاضتا دمعا مختلف ألوانه : الأولى حزنا على مرض صديقي الأستاذ ميرغني عبد الله مالك (شايب) وإبنه مازن ، والأخرى غرقت في نشوة ما تكتب أخي العزيز،،

لا يزال فيك متسعا من الإبداع : ألحق روحك،، روج لهذه الروعة فينا فقد مللنا ظاهر الأرض كما قال وزير الدفاع (حقنا طبعا)،،

هذه التلقائية تقودك في النهاية لمعرفتهن : ابحث وإلا سوف يجد الباحثون في تراثك ما يصلح لتايتنك جديد ، وإحداهن تئن بذات الصوت الخافت وأنت تتهاوى :
JACK! JACK! COME BACK,
DEKO COME BACK

==================
جاك : لا تيأس واصل البحث أنا مثلك كنت قبل خمسة عشر عاما (هي عمر الزواج حتى تاريخه) أبحث عن وجه جميل أطل من نافذة القطار في منحنىً في طريق الدمازين لبعض ثوان وتوارى ،،(الآن بطلت والله العظيم/وللعلم المدام جعلية)،،

================

أشكرك على هذه الروعة ، وكنت أتحاشى المداخلة معك في بعض البوستات الملتهبة مع صديق لي عزيز وكنت أطرب وأقول لك في سري: غضبك جميل زي بسمتك ،، طالما جاش في الخاطر خبر للفحيص فنان النخب آنذاك،،

أرجو ألا تكون مساهمتي نشاذ ، أو عائق لك من مواصلة التفحص في وجوه المتداخلين،، واصل يارائع،،

وتحيات خاصة لصاحب القلم الرصين: أبو جهينة : أنتظرك في مناسبات كثيرة،،
تحياتي ،،

Quote: لو قتا ليك انا من كوش مار ..تفتكر منو ؟؟ معرفتك بي ارساونجي قدر شنو ياحبيب. غايتو للضمان كده عندك تلاتة فرص اختار فيهم زول من ديم بين وحتى المنشلين.. مرورا بي كوشنجي نشاي وفيلنجي مار واننتوني مار وخواجة مار وثملي مار وشلالي مار وشامنجي مار وكورنجي وحتى بيت ناس عبد الرحمن شامي..

دكين !!
والله حيرتنى عديييييييييييييل كدة وقربت اقول الرررررررررروب مش العوووووووووك !1
كوش مار دي انا بعرفا بيت بيت ، من بيت عمناالمرحوم عبد الكريم غربا لحد بيت اخونا الظريف يوسف شرقا ، وكل الفي النص حتى الصغار الفاتو الكبار و القدرم مبارك هيمن علاء الدين مصطفى فتحى حمدان ميرغني منعم محمد ، عليك امان الله الميتين نفر الفي الحلة دي انا ممكن ارسمن من شدة ماهم في ذاكرتنا
لكن السجم الاسمو دكين البيرسم الكلام رسم ده ما قادر اختار ليهو الاسم المناسب !!
عليك في جن اكتر من كدة ؟؟
كوش مار ؟؟؟؟؟؟؟؟
ماتبالغ ياخى ؟؟
اما ارس دي يا اخوي اطلع منها ؟؟
دي دايرة مقفولة لصاحبك و السنة القبل الفاتت شلت منها احدى حسناواتهم !!
حيرتك مش كدة ؟؟
وبالضبط كدة من بيوت استاذنا ابراهيم حسن !!
بعد ده معقول ما القى ليك الاسم والشكل ؟
حاجة تجنن !!
عووووووووووووووووك
اها

Quote: وماتنسى العضة يوم الخميس مع عمران ..

دكين الشين
يعضيك كلب في زقاق مقفول وحارسوا عسكري جوازات كاره اليوم الدخلو في الشغلانة دي ويقيف ليك في حلقك

عمر الفاروق ود الحلة..

طبعا انتا من الناس الونستك زخيرة واشهد لك بذلك..
يعني قدرتك على تذكر تفاصيل حركة الضل وحركة جكس الحلة والاكسسوارات ..

اها اليوم عرفتا قدرتك على ربط مسلسلات الاطفال بواقع ود الحلة البائس..

Quote: كانت تحلم بفارس احلام يكون من طبقة الفقراء فهن بليدات وانت شاطر وهن تعيسات وانت سعيد في حياتك انت بسيط وهن يحببن البساطة ..

ياخي انتا قايلني واقع من مسلسل (سالي)..
ماادس عليك ..
ده حصل وقمتا ولشدة ارتباطي ايضا بي ناس طم طم وسالي وريم وناس كاتولي ..قتا في نفسي اكيد الناس ديل عايزين ليهم زول بتاع مبادي وفقير في بيتهم اب زهور وجهنمية داك..
زول بسيط كده بياخد الامور بدون تعقيد ومراسم..

Quote: ترسم لنفسك ادوار بطولية تقوم بها في المكتبة فمثلاً إن عاكسهم شخص قمت انت وكنت مثالاً للمروءة وإن نسيا المال لأي سبب كنت انت المنقذ فتدفع عنهما أو ان يكون في الطريق اشواك أو زجاجة مكسورة فتذهب وتزيحها .. تتقمص فجأة دور الشاب اللطيف الظريف وكيف انك ستحكي لهن نكات وترسم البسمة في شفاههن فهن بنات عزّ ولك اولاد العز دمهم تقيل فبالتالي هن محرومات ..

طبعا انحنا غير المروة دي ما عندنا شي نقشر بيهو ..
وكانت عندنا موش لانو تعبنا جبناها ..عندنا لانو بتجي باي ديفولت..

للاسف ياعمر انا فقدتهن لاني لم اكن املك شيئا
بالكاد الجنز البني والقميص المسطردة وشبط بي حزام..
وفقري اللامحدود ..وطموحي المحدود
اشعس اغبر فكيف انال مثلهن...

ود الفاروق احساسك ده ياهو ذاتو المشى فيني ايامها..

من الواضح انك كنتا معانا هناك..
او الجكس ده من حلب الموردة..



عمر انا جاييك تاني

Quote: ليس ثمة من ُيدعى رودريغو ليخاندروس

لطالما خالطنى شكٌ فى ذلك

غير أن اسمه يشابه فى مكان ما مساعدأول فنى الصوت لإحدى المسلسلات المدبلجة او ربما قيصر متقاعد
والله أعلم








تعرف البتين ديل ما غريبات على
كدى عيد لى وصفهم

*

Quote: كنا جماعة تستلذ المغارب وتقدس البنقو مع غروب الشمس في ملتقى النيلين

دكين أيه كل هذه الروعة والابداع......

سيف جبريل

لولوووووووووووز
شكلك كنتا في السودان مرطب .. ودنيتك ممغربة يا حبيب..

لو فرقت معاك اديني عنوانك..

مهدي الصادق
ازيك ياحبوب ..
جيتك والله عندي مكرمة زي شوفتك ياالغالي..

وشكرا لي الكلام السمح مع اننا وحاتك ماقدرو..

Quote: الصينيين هادولي .. بياكلون ريسين القرود .. عشان كدي تلاقيه الواحد ينسدح بدري و صوت شخرانو يجيب الرايح في التنهات *...

ابو الجلاجل
طيب ياخي ماتشوف لينا صيني
البتين ديل لو وصلو ابو ضلوع البركة فينا وفيكم..

حسام كرار

Quote: طفرات تمر عليك فى المركز البريطانى او الفرنسي او معرض الزهور فى القاعة تطالع ولا تمتلك.

والله زي ماقتا تطالع ولاتمتلك
وتتخارج بعدها لاتلوي على شي ..

لكن ياحبيب الله ده قادر .. واملنا فيهو كبير ..


حبيب نورة
ياخ انتا زول مبدع ورومانتك وجاي من زمن تاني

كلام نغم وساي ودرتو فينا ونحنا ما اهلو ..

محباتي تغشاك بالزيادة ياحنين
ونحنا الممنونين لي خريفك المتتابع ..
زول زيك عاييش خريف متواصل ده مالاقاني قريب..
الله يديم محباتك ومطرك..



عبد اللطيف العزيز
ربنا يوالي ميرغني عبد الله وولده بالعافية وعجل بي شفاهم..

المحنة لي الشي الفات يا عبداللطيف فيها مافيها من القسا والمحنة والبكا..
ونحنا غلبنا نرسم لوحة وغلبنا البكا فخرج حنين الزمن السمح في شكل اشواق لي بنات لاجود لهم إلا في ساعة من عام كامل..

Quote: أبحث عن وجه جميل أطل من نافذة القطار في منحنىً في طريق الدمازين لبعض ثوان وتوارى ،،(الآن بطلت والله العظيم/وللعلم المدام جعلية

بدون حليفة مصدقك ..
انا عارف الجعليات ديل ممكن يروحوك فيها..
والدمازين البتفتش لي بناتا ديل بودوك ليها حفيان..
لكن برضو ماتياس ..
هسي تلقاها بتبيع ترمس في مدرسة الدمازين الابتداية المختلطة بنين..

مودتي الخالصة..




عمران ابو حمودي

عسكري الجوازات ده يوم الخميس بلاي حاول جيبو معاك..
في ناس هنا طيارات ..
وبالمناسبة يا حبة
خميسك ده جايين فيهو جكس كمان ..
وعازمين اصحابنا ..
بل الابري..
وبل معاهو راسك..



وليد طه
خلاص اتجدعتا في الشاشات إل سي دي ؟؟
عجاجو ربط صاحب المحل..
قتا لي شفتهم قبل كدى؟؟
ياربي في سلتي؟؟

كيف الدبار وصبرنا بعدك قلا يا بدر التمام..
طلينا كان بس طلة..

يخوانا

معقولة بس ..
موزعين في انحاء الدنيا ..ومافي زول شافهم؟؟
عاملين لي فيها بتاعين انجليزي وبطيخ وهناي ومافي زول مشى البرتش كاونسل؟؟
انتو كنتو بتمشو تقروا هناك ولاشنو ؟؟

DKEEN
شكلك كده ما صدقتنى
انا كنت جاده جدا
على العموم ممكن اوصل ليهم سلامك ,(لو عاوز !!!!!!!!!)

سمارت
طبعا ما مصدق..

يعني معقولة تجي اول واحدة في البوست وتنتهي لي من القصة وتقولي لي بعرفهم..
ياخي الافلام مابتنتهي كده خلي البوست بتاعي ده..


بعدين ياخي ادينا امارة.. علامة.. إشارة
من باب الوفاء لهذه الاطناشر سنة التي انصرمت ورينا انشالله صورة ليهم

Quote: على العموم ممكن اوصل ليهم سلامك ,(لو عاوز !!!!!!!!!)

وصلي شديد جدا
واعملي لي البوست برنت واديهو ليهم ..

قولي ليهم دكين قال ليكم :
دي عملية تعملوها فيني؟؟

يخوانا انا سمارت دي بقت صحبتي عديييييييييييييل

شكرا لهذا الحوش

Quote: يخوانا انا سمارت دي بقت صحبتي عديييييييييييييل

شكرا يا اخى , و الله دى ما حاجه سااهله, خاصة انو انا ما فى زول بصاحبنى بالساهل ,(لسانى طويل و بتاعة مزاجات)
و ليك على اول مره ارجع جمهوريه السودان الديمقراطيه , اطبع البوست ده و و اوديه ليهم

سمارت ما اظن البنيات عبرن في هذا المكان يوما..
إلا اكون زول مغفل..
ودي ما مستبعدة بالمناسبة..




كلية الهندسة / مسقط حنيني

الله الله يا دكين الهتاويل الهتاويل الهتاويل (أرقي دور )

هندسة وآداب والباقي عذاب

محمد عبدالله هارون

اسمك ده ياخوي مالو عايز يجيب لينا الاشواق..
ياخوي حدد اللكويشن .. لو طلعتا من السير واضاتك اصبحت..

وليد طه

وليد طه ارقي دور ..


مودتي يا محمد ووافر الاشواق

.
يا "الهتــاويل" لـيكم بصــيح *** جـنَّ عـقلي بعـد كان نصــيح
.

عدلان

الهتاويل لم اقصد بها البتين كاسم لهما..
وانما قصدت بها مايدور في ذهني من هذيان..

ُيقال هتوال اذا كثر هذيانة..

وهتل يهتل فهو هتول..
اي انه يهذي باستمرار..
والهاتل والمهتول في محبة الله باذنه تعالى..

هذا وتقبل مودتي لشعرك الجميل..

اخوك
دكين الهتوال.

اخوي الهتوال دكين..

عالم الله كُـت قايل الهتاويل هم "البتين".. والشعر الجميل داك أصلوا كان؛

يـا الوراريق ليكم بصـيح
جـنَّ عقلي بعد كان نصــيح

ودي بغنيها فنان الطمبور صديق احمـد ربنا يحفضوا ويواليهو بالعافية، والشعر ظنيتوا أللَـيل عبدالله محمد خير، كان ما أخاف الكِــضِب.. وحــرم "البتـين" ما بمرٌقِن ساكت.. أها الشاعر في قصيدتوا البغنيها ليهو صديق أحمد قال:

خـلَهِن سوا لا تـفرِقِن
ياالله توماتي انا بعــشقن

ويادكـين ربنا يلمك في الرايحالك ويتمم لك الفي مُرادك..

عدلان.

سمارت

يعني نحسنك؟؟

Quote: سمارت يعني نحسنك؟؟

ايوه....................Yes

Quote: ايوه....................Yes

الرسول

Quote: هسي ولان هذا موقع عام ويرتاده الكثيرين بلاي لو في زول شافهم معاي او عارف ليهم خبر يورينا.. عشان انسف هذه الهتاويل التي تعج براسي منذ سنين.. واحد من اتنين ياخوانا: ياواحد يجي يقول لي انا بعرفهم وتعال نعرس ليك واحد منهم ... يا واحد يجي يقول لي انا بعرفهم وديل بنات عاديات جدا من الثورة الحارة الفلانية .. او من الصحافات او من قلع النحل ذاتو.. لاارضا قطعوا ولا ظهرا ابقو..

Ahin Koti edo dabo

إقسم بالله انك مسكون بجن الكتابه
نص جميل
و
و ذكريات أجمل

بالله شوف الناس ديل
عطشانة كلها
متلمة فى حفير
مويتها طملة
نابعة من اثر رجلين لواحدة
منعمة البكاير والخضور
لا تعرف الورادة لا شيل قفة
لكنها جمسها تقيل
تقيل من شنو يادكين
لحدى ما ينبع منه هذا
الغدير المتدفق احرفا ومدادا
فكانت هذه الاندياحة...
فرايت الساسة
والصفوة يمحلقون خلسة
ادخلو عادى وقولو دكين مبدع
مالو يعنى لو كان مبدع..
هل الابداع دا حكر على ناس
والله مشكلة..كيف لا يرون

لكن جنى يادكين...

دحين بنوتك ديل
بكونن تقرقرن وتريفن
وتركن شراب القارورة
وبقن عوضيات..بشربن
من الترعة واب عشرين..
فهدت حمرتهن فى نساء الهامش
فكان ذلك الحمار المشتت
فى جسيم المعشوقات
مما ساعدهن لجذب القسمة والنصيب
تسلم..

Quote: دحين بنوتك ديل بكونن تقرقرن وتريفن وتركن شراب القارورة وبقن عوضيات..بشربن من الترعة واب عشرين..

فآل الله ولا فآلك يابوقوتة..









ومابقيتو تلاتة؟؟
هسي بتقول ليك عايزة طين بحر.. .واضاتك بتصبح

ناصر الخطر


ياخ والله انتا الخطر

بس (الذكريات اجمل) دي صدقت فيها..

انا الايام دي قاعد اتحول لي كائن ذكري..






*ذكري دي نسبة الى ذكريات ..
بالك مايمشي بعيد

قرجة الحبيب

Engon marso

دكين

سلام مربع

عقدت اللون قاعدة ولا طارت

نقول لبشاشة الحق

تسلم

كل سنة وانت طل الطيبة والجمال

الله يكتلنى البوست دا فيهو حاجة غلط!!!!
عموما الله يكضب الشينة
وكل سنة ونحن طيبين
منعم

http://www.youtube.com/watch?v=Mh92yOyHUwQ&mode=related&search=#

أرفعه ليسهل إلتقاطه ،،
عيدية للمسلمين الطارت ليهم كيف تكون الفرحة بالعيد

أيها الوغد دكين

عيد سعيد

و نسأل الله أن يمنحك نفسا طويلا للكتابة .. رغم أنى مازلت "هتوالا" فى الطريق بين "شئ من العفن" و "الهتـاويل" .. يا أخى أنت وغد بكل ما تحمل الكلمة من جمال الأبداع

كنتا أود أن أقول ربنا يعرس ليك .. لكن أخاف الا أرى سناء أو أسمع مرسوما عن بنات الكدرو


"ليس ثمة من ُيدعى رودريغو ليخاندروس " .. و لكن هناك شخص مسكون بعفاريت الكتابة يدعى "دكين"

البوست إتملا تعليقات..
ولم يدلني احد على مبتغاي..









وحيث ان عدد زوار الموقع في اطراد والفارغة لازالت تخب في جوانبه وهنالك مزيد من الاعضاء
اعيد رفع البوست املا ان يكون ثمة من رأي او شاهد ..
المسالة ما صعبة ..اكيد في واحد منكم كان بي هناك في تلك الظهيرة..
الدنيا دي لطالما حسبتها اضيق من كده..
حتتوسع الليلة في هذا المقام ولاشنو؟؟