انتحـــــال شخصية

Post: #1
Title: انتحـــــال شخصية
Author: DKEEN
Date: 02-03-2007, 09:40 PM
Parent: #0

الاخوة الحلوين والاخوات الحلوات

يبدو ان هنالك من اتصل على عدد من الاخوة والاخوات في البورد وخارج البورد وقال ليهم انو انا دكين وكده..

مثال الاخت تراجي
والاخ محسن خالد
وماعارف منو من باقي الشبيبة

الاتنين الفوق ديل محبتي ليهم كبيرة بس حرم ما بخسر فيهم ريال..

العسل الظريف القاعد يسوي الحركة البايخة دي حقو مايعملا..

انا صحي مشهور وكده بس كمان ما مبذر..

رسالة خاصة لي الاخ..

ياخي انتا بدل تباري الفارغة دي ماتشوف لينا عروس..
اورسل لينا القروش البضرب بيها وتقول انوانتا دكين..
القروش الحارقاك دي ياخي لو ماعارف توديها وين زرِقا..
بتعرف تزرقا ولا تجيني ازرقا ليك؟؟
اوتعال امصر ليك فيها ليمونة..وازرقا برضو ..

الوغد دكين عشا البايتات

Post: #2
Title: Re: انتحـــــال شخصية
Author: محمد البشرى الخضر
Date: 02-03-2007, 10:19 PM
Parent: #1

Quote: وقال ليهم انو انا دكين وكده

كدا دي شنو ؟
هي المهمة.
ما دام حبيت تناقش الموضوع بالصورة العلنية دي كنت تذكر الحقيقة كاملة
و تجيب الكلام الأنا قلته على لسانك
أنا ما أسأت ليك أو للناس الإتصلت عليهم
بالعكس أنا صلحت صورتك عندهم, لو بتفهم؟
دا بدل ما تشكرني تقعد تقول زرقها و ما عارف شنو
أها أبيت ما بزرقا
و الله صحي المثل قال
يا محسنا في اللئيم زي الشرا في القندول

-----------------------------------
لقيتني كيف؟

Post: #3
Title: Re: انتحـــــال شخصية
Author: الطاهر ساتي
Date: 02-03-2007, 10:40 PM
Parent: #1

معليش يامحمد ياخي ... لكن هظارك زاتو بيفقع المرارة ...

والارعن البيتصرف بالشكل ده حقو يعتذر ولو بالماسنجر لدكين و تراجي و محسن

Post: #4
Title: Re: انتحـــــال شخصية
Author: وليد محمد المبارك
Date: 02-03-2007, 10:59 PM
Parent: #3

تصرف بليد

Post: #6
Title: Re: انتحـــــال شخصية
Author: محمد البشرى الخضر
Date: 02-03-2007, 11:11 PM
Parent: #3

يا أستاذ
برد نفسك و براحة علي
ما حا اقول ليك أكتر من

Quote: انت مالك ومال صورتو ..؟؟

Quote: وانت مالك و مالم ..؟؟

بنفس المنطق
إنت مالك؟
دكين كفيل بالرد علي و أنا واثق من تفهمه للموضوع و الأهداف النبيلة اللتي أسعى لها
بعدين إنت زول صحفي يعني زول معلم
مفروض تكون قريت بين السطور
و نصيحتي ليك ما تقرا الكلام دا بمعزل عن المكتوب في بوستات أخرى
و صدقني حا تعذرني , بل أتوقع تأييدك لتصرفي
و بالمناسبة ما في داعي لبوست إعتذار منفصل, مسنجر او مداخلة هنا مقبولة

بتاع.....
علامات الإستفهام دي إتنين إتنين ليه , واحدة بتأدي الغرض

Post: #5
Title: Re: انتحـــــال شخصية
Author: DKEEN
Date: 02-03-2007, 11:09 PM
Parent: #1

العزيز الطاهر

محمد البشرى قاعد يهظر ياحبة..
وماهو جادي فيالقالو ده ..
انفصمتا في الراجل لامن انا الضحك شرطني..

مودتي كلها ياالطاهر ..

وكن في خير

Post: #7
Title: Re: انتحـــــال شخصية
Author: محمد البشرى الخضر
Date: 02-03-2007, 11:16 PM
Parent: #5

يا دكييييييييين

مالك ياخ
أنا كنت مستمتع جدا

وليد
Quote: تصرف بليد

لكن الفيك إتعرفت يا حبة

Post: #8
Title: Re: انتحـــــال شخصية
Author: DKEEN
Date: 02-03-2007, 11:30 PM
Parent: #1

الذ شي انو تراجي مصرة اني ضربتا ليها

حتى بعد مارسلتا ليها رسالة سغبمتوتة وقتا ليها انا تلفونكذاتومابعرفو
ردت بي كل لطف وقات لي:
يامستهبل لومفلس رسل لي الرقم وانا بضرب ليك..

اصرار شديد على انو انا فعلا ضربتا..
ويبدو انو الزول منتحل الشخصية لقى ليهو انصر ماشين وقال ليهم انو هو دكين ..

وكذلك اظن الحال كان مع محسن خالد..

لقى انصر ماشين برضو وترك رسالة..

عايز اعرف بس لماذا من دون كل هذه البشرية اتصل بي محسن وتراجي ..
وليه بس الاتنين ديل صادف انو ماقاعدين جنب تلفوناتهم؟؟

لحدي مارسل لي محسن خالد رسالة خاصة انا قايل تراجي بتهظر..
ولامن جات من محسن انا بصراحة قتا معناتا اتصل على ناس كتار وكده..
ضحكتا في البداية وقتا ده زول شكلو ظريف وهاظار ..
قتا ياخي يكون شحد محسن خالد قروش بي اسمي وكده
نقوم نخش مع الراجل في حتت ضيقة ..
ولامن نجي نتقدم لي واحدة من قريباتو الجعليات ديل يقوم يقول ليهم (ياخي ده زول شحاد ساي)

او يكون قال لي تراجي انا عايز انضم لي رابطة محبي اليهود حقتم ديك ..
وبعد شوية لامن وصلت حتة اليهود وحتة منظري الشين مع الجعليات ..
جاتني زعلة كده وقمتا وصفتو بي سري بي وصف مقذع ونسبتو لي قوم مغضوب عليهم في القران الكريم...

قبل مدة طويلة في واحد اظنو كان زعلان من زميل في البورد هنا..
وقام رسل ليهو رسائل ساخطة وصاخبة وبذيئة وقال ليهو انو هو دكين..
وكان عامل ليهو ايميل (دكين الدكين @هوت ميل دوت كوم..)
اظنو مالقى زول بذي غيري في البورد قام قال ده احسن زول استيعر اسمو وانبذ من خلالو..

اها لامن النبذ زاد وبقى حار وشيييييين قام الزول المنبوذ ده ..ضرب لي بي ادب وقال لي :
ليه ياخي انا سويت ليك شنو؟؟
قتا ليهو : ياخينا مالك قول يالطيف..
قال لي: بتنبذ فيني مالك
قتا ليهو: انا يامنقة بيني وبينك شي؟؟
قال لي : لا
بعرف بيتكم؟؟
قال لي : لا
جتيكم في حلتكم قبل كده ؟؟
قال لي : لا
قتا ليهو طيب شنو نبذتك وهرجلتك دي انتا حتتبلى على ولا كيف؟؟
قام شرح لي الفكرة بتاعة انو في زول رسل ليهو ايملات فيها كذا وكذا..
قتا ليهو ده ما انا وانا مافاضي ليك..
وتاني مرة مرة ماتضرب لي تلفون ..
والاداك رقمي ده قنيطة زيك..
وانا ماعندي شي اعتذر ليك عنو ..عشان كده اقطع وشك مني..

ويخونا مافي زول بعد فترة يجي يقول لي رجع لي قروشي السلفتك ليها لامن شحدتني ..
انا ياخوانا صحي مفلس وفقران..
لكن مابشحد قروش....

جرى تحري هذه المداخلات ابراءا للذمة..

Post: #9
Title: Re: انتحـــــال شخصية
Author: وليد محمد المبارك
Date: 02-03-2007, 11:43 PM
Parent: #8

Quote: لكن الفيك إتعرفت يا حبة

ياعمك انت قايلني الطاهر ساتي ( شالت فيني )

الطاهر ده زول مثف ومستنير وكااااااتب كبير .. بكتب في جريده ماكنه
ما بخش بوستات الرمتالة حقتكم ديك وبخش بوستات ناس الدميغرافيا والبروقاطيا والذي منو .. عشان كده شالت فيه

بعدين اخوك مفتح للدين

فما تفرح تقول الفارة دقس

البليد القاصده انا الاتصرف التصرف ده
ولو بقيت انت
غايتو مرقت
( وش خجلان .. لكن جمجار )

Post: #10
Title: Re: انتحـــــال شخصية
Author: محسن خالد
Date: 02-04-2007, 00:53 AM
Parent: #9

Quote: قتا ياخي يكون شحد محسن خالد قروش بي اسمي وكده
نقوم نخش مع الراجل في حتت ضيقة ..

يا دكين، أنا غايتو التلتماية دولار حقتي عفيتها، تراجي بطريقتها

Post: #11
Title: Re: انتحـــــال شخصية
Author: فيصل نوبي
Date: 02-04-2007, 00:59 AM
Parent: #10

دكين
الزول ده ما ضرب لي أخوكـ ليه

بطل حركات

Post: #12
Title: Re: انتحـــــال شخصية
Author: bayan
Date: 02-04-2007, 03:45 AM
Parent: #11

العزيز دكين

كيفنك يا وليدي
نفس الفلم دا
حصل
حين اتصلت واحدة بمحمد عادل وقالت ليه انا بيان وشتمته
هو هنادي. الذيذة انه هنادي مصرة دي انا رغم انه المكالمة من امريكا
واي زول قاليها كدا...
تانيا في زول استخدم ايملي وشتم العضو جاد
رغم انه علاقتي معه طيبة ولا اعرفه شخصيا
الا من البورد..ولا يوجد سبب اشتمه او ارسل له للاساءة له
خاصة انه ظلامي,,
في زول استخدم ايملي رسل لناس رسائل غرامية
لقى الاسامي في الادرس بوك حقي
المضحك جزء منهم اهل من الدرجة الاولى..
انا بنبه الناس تكون واعية لهذه الامور

البتقع من السما تتحلمها ا

Post: #13
Title: Re: انتحـــــال شخصية
Author: عزاز شامي
Date: 02-04-2007, 06:38 AM
Parent: #1

دكين
صباحات متبلة بالليمون

زولك الحريف رسل لي رسالة في الايميل الخاص بتاعي بتاع الهوت ميل،
واللي طبعا بيعرفوه ناس محدودين من البورد
وعليه،
القائمة صغنبتونية شديد

المهم ما علينان زولك كان داير بس واسطة شغل،
وبصراحة ما وعدته لانو المتقدم لا يستوفي الشروط

روق اعصابك، انا موش كلمتك زمان رأي في الهلمة الهملة دي؟

Post: #14
Title: Re: انتحـــــال شخصية
Author: ناذر محمد الخليفة
Date: 02-04-2007, 06:48 AM
Parent: #1

دكين ....

يا زول دي والله سلامة كبيرة !!
الإنتحل شخصيتك ما مهم .. كعب تسجيل المكالمات

Post: #15
Title: Re: انتحـــــال شخصية
Author: نادر
Date: 02-04-2007, 07:02 AM
Parent: #1

بي كده عادي دكين ده ممكن يجوبغ الدنيا ويقول ده (دكين الرديف) والله ورطتك ورطة يا حبة.. خالص تحياتي

Post: #16
Title: Re: انتحـــــال شخصية
Author: Dina Faisal
Date: 02-04-2007, 07:52 AM

يا دكين

قريت العنوان قلت كالعادة ح القى اسمي مكتوب للمرة المليون

خليني انظر ليك شوية:

الزول الضرب تلفون دة لتراجي ومحسن ما ظهر ليهم رقمو والا ما عندهم كاشف؟

وما تجي تقول لي يا بليدة اكيد ضرب من تلفون عام,, طيب ما ظهر مفتاح البلد؟

لكن لو ضرب من الرقم الخاص يبقى حريف واخير ليك تنزل ابراء ذمة في الجرايد وكدة.

Post: #17
Title: Re: انتحـــــال شخصية
Author: DKEEN
Date: 02-04-2007, 09:04 AM
Parent: #1

عزاز
Quote: زولك الحريف رسل لي رسالة في الايميل الخاص بتاعي بتاع الهوت ميل،
واللي طبعا بيعرفوه ناس محدودين من البورد
وعليه،
القائمة صغنبتونية شديد

ياغبيانة انا الرسلتا ليكي السي في بتاع الزول الوصلك اسمو..

شوفي ليهو شغل وبطلي هرجلة..
الزول ده عزيز علينا ورميناهو على واحدة عزيزة علينا..
يعني عزيزان في ذمة عزيز
المؤهلات الفي (السي في) دي قونداليزا عمتك ماعندها..

Post: #18
Title: Re: انتحـــــال شخصية
Author: DKEEN
Date: 02-04-2007, 09:24 AM
Parent: #1

Quote: الزول الضرب تلفون دة لتراجي ومحسن ما ظهر ليهم رقمو والا ما عندهم كاشف؟

دينا شرلوك هولمز الانفصامية..

دي على وزن دينا بالنهار ودينا باليل ودينا الراجل ودينا شرلوزك هولمز
ومامعروف لي قدام تمرقي شنو..

ياستي مسالة اظهار الرقم دي الواحد لامن يلقى رسالة في انصر ماشين ويقول ليك انو هو فلان بكون ريحك ومابجي في بالك غالبا انك تعاني لي الرقم عشان تعرف هوية المتصل
لانو الهوية سلفا تم تحديدها من خلال رسالة..
خاصة لامن مايكون هناك معرفة مسبقة بشخص المتصل..
يعني ياستي انا لامن مثلا القى رسالة في تلفوني من واحدة بتقول لي انو هي دينا فيصل
ما حاقوم اعاين لي الرقم عشان اتاكد انها دينا ولا لا..
لانو انا اصلا ماعارف انتي في ياتو بلد..
ولو عارف ممكن تكوني في سفرة في شغل في اي سجم..

محسن وتراجي انا ماحصل اتكلمتا معاهم تلفون
وما عارفني شغال شنو اصلا..
يعني لو محسن ده لو لقى في رقم التلفون مفتاح البرازيل.. وصاحب الرسالة قال ليهو دكين حيخت انو انا دكين..
البرازيل بعيدة على ربنا؟؟

بعدين محسن نقش الكنتة ورسل لي رسالة قال لي ياخي في زول اتصل ودد شكلو ما انتا..
يعني شكا فيهعو ابتداءا..
والمصيبة انو محسن شكا فيهو لانو المتصل كان مؤدب..
يعني انا الادب ماخايل فيني عند المحمول الذهني بتاع السي محسن..

اها تراجي طبعا مرة
والنسوان ناقصات دين وعقل
اصلا ماشكت
بل وحتى بعد رسلتا ليها الرسالة
اصرت على انو ده انا..
استخدمت نص عقلها وكل عاطفتها ..
عرفتي ليه النسوان شهادتم بي نص شهادة راجل..

دينا فيصل
انا لو لقيت رسالة في جوال من واحدة بتقول انك انتي..
ما حاستبعدا نهائي
فالمنفصمون هم جماعة لايدرون ماهية تصرفاتهم التي تقوم بها شخصياتهم الاخرى ..

Post: #20
Title: Re: انتحـــــال شخصية
Author: waleed500
Date: 02-04-2007, 09:36 AM
Parent: #18

يعنى عاوز تقول انك ما اتصلتا على انا برضووو؟؟؟ظ

Post: #25
Title: Re: انتحـــــال شخصية
Author: Dina Faisal
Date: 02-04-2007, 09:49 AM
Parent: #18

Quote: عرفتي ليه النسوان شهادتم بي نص شهادة راجل..

عشان الراجل ذكي طبعا

طيب يا مستر ذكي ومحسن دة ما عندو سجل مكالمات يرجع ليها بعد ما شك في ادب الزول طوااالي؟؟

نقول تراجي نص عقلها قال ليها الزول دة دكين وطوالي عملت ليهو ديليت,, اها باقي عقل محسن

الخلاهو اتاكد انو في الامر ملعوب ما كان يخليهو يحفظ النمرة كدليل؟؟؟

دكين اسمح لي بعد الاربعين سطر الكتبتهم ديل طلعت اوفبوينت

دكين
انا غايتو ما باستبعد تكون دة انت ذاتك فالاوغاد هم جماعة لا يؤمن جانبهم

Post: #19
Title: Re: انتحـــــال شخصية
Author: DKEEN
Date: 02-04-2007, 09:34 AM
Parent: #1

Quote: يا دكين، أنا غايتو التلتماية دولار حقتي عفيتها، تراجي بطريقتها

يامحسن، انا لو عندي تلتماية دولار كان عرستا ..
اصلو في البورد ده في جكس مادي جدا وبحب انو الراجل يكون غندولي..
يعني بدون مبلغ مهول زي ده ماحيرضو بينا..

القروش هينة
انشالله بس مايكون شحد ناس تانين حاجات تانية ..

طبعا طوالي حتلصق فيني لانو ُبساط البراءة مسحوب سلفا من تحت شخصيتي

Post: #23
Title: Re: انتحـــــال شخصية
Author: فيصل نوبي
Date: 02-04-2007, 09:44 AM
Parent: #19

Quote: القروش هينة
انشالله بس مايكون شحد ناس تانين حاجات تانية ..

طبعا طوالي حتلصق فيني لانو ُبساط البراءة مسحوب سلفا من تحت شخصيتي

سفة(صعوط) و لا حاجة أوسخ من كده

Post: #21
Title: Re: انتحـــــال شخصية
Author: DKEEN
Date: 02-04-2007, 09:37 AM
Parent: #1

ود المبارك

اكون ياربي ضربتا ليهم وانا ماداري بي روحي ..

اكون بقيت منفصم زي ناس كده..
قالو من عاشر المنفصمين في بوست اكتر من اربعين مداخلة..
صار ُمنفصما..

اربعين دي حرف مبالغة زيو زي المليون كده..

Post: #22
Title: Re: انتحـــــال شخصية
Author: DKEEN
Date: 02-04-2007, 09:40 AM
Parent: #1

د. بيان

Quote: في زول استخدم ايملي رسل لناس رسائل غرامية

دي انا ماعندي مانع فيها..
يكتب مايشاء من غراميات ..ويحب ..
بس لامن الصنارة تغمز يرمينا بي حاجة وماينسى اخوهو..

Post: #24
Title: Re: انتحـــــال شخصية
Author: DKEEN
Date: 02-04-2007, 09:46 AM
Parent: #1

ناذر ود الخليفة

ياخوي اليسجل ماشاء الله له ان يسجل..
يسعدني اني القى نفسي في مدونات صوتية مخلدة..
المهم بس مايملانا ديون اكتر مما نحن عليه..

Post: #26
Title: Re: انتحـــــال شخصية
Author: DKEEN
Date: 02-04-2007, 09:50 AM
Parent: #1

ابو محمود سلامات

دكين الرديف هينة

كعبة دكين العيالاتي...
هسي لو قام يشحد في العيال من طرف انا اقبل وين تاني؟؟

Post: #27
Title: Re: انتحـــــال شخصية
Author: bak2010ory
Date: 02-04-2007, 10:00 AM
Parent: #1

حرقووووووووو ،،، حرقو ،، حرقو ها ..ها .ها.هاههههههههه
والله مسكين يا

Post: #28
Title: Re: انتحـــــال شخصية
Author: DKEEN
Date: 02-04-2007, 10:01 AM
Parent: #1

Quote: يعنى عاوز تقول انك ما اتصلتا على انا برضووو؟؟؟ظ

وليد 500

اوعى زعلتك ديك تكون من حركة زي دي..
لاني قتا ليك وريني سبب زعلتك انتا عملتا تقيل..

طبعا لو طلعت زعلتك بهذا السبب تكون قلبتا هوبة..
واكون طالبك اعتذار..
ولو ماكده برضو انا طالبك اعتذار
لاني ماقاعد اغلط في حق زول مابغلط في حقنا على كل حال..

Post: #36
Title: Re: انتحـــــال شخصية
Author: waleed500
Date: 02-04-2007, 11:06 AM
Parent: #28

انت يا دكين فاكر انى ما بعرف افرز الاصوات؟؟؟؟؟
يا ود الحلال بقرا الاصوات والصوت البسمعو بتخزن عندى على طول
لانى بحمل زاكرة 260 مش متل زاكرتك 65 فقط

اى ياهو ده سبب قفلتى منك

تانى ما تتصل مثل اتصالك ده لانو الاتصال علينا بيحتاج
لتحديد مواعيد قبل ثلاثة ايام على الاقل من تاريخ الاتصال

Post: #29
Title: Re: انتحـــــال شخصية
Author: عمر الفاروق
Date: 02-04-2007, 10:09 AM
Parent: #1

انا أشك وأتهم الأخت سودانية ..

لقيتوني كيف عليكم الله ..

التوقيع :المحقق كونن ..

Post: #31
Title: Re: انتحـــــال شخصية
Author: انور تاج السر
Date: 02-04-2007, 10:16 AM
Parent: #29

ود الفاروق،ازيك
Quote: لقيتوني كيف عليكم الله ..

التوقيع :المحقق كونن ..

لقيناك كيشه و شليق،
المحقق الجديد و مسؤول المباحث و الاستخبارات بالبورد هو ناذر الخليفة.

Post: #37
Title: Re: انتحـــــال شخصية
Author: بشير جبريل علي
Date: 02-04-2007, 11:10 AM
Parent: #29

الأخ: محمد البشرى
عاطر التحايا

اليومين دي .. أعمل حسابك من دكين ..نيرانو مولعة .. شايل ليمونتو ولافي ..
مرة .. يزرقن .. ومرة ..يمصر ..

______________________________

كلم ليهو صاحبو .. تبل(دينا)
شايف تداخل الأسماء وتوارد الخواطر

Post: #30
Title: Re: انتحـــــال شخصية
Author: DKEEN
Date: 02-04-2007, 10:14 AM
Parent: #1

Quote: طيب يا مستر ذكي ومحسن دة ما عندو سجل مكالمات يرجع ليها بعد ما شك في ادب الزول طوااالي؟؟

يافالحة محسن عندو مسنجر داخلي قام رجع ليهو..

بعدين هو ماعارفني انا ممكن اكون في ياتو خريطة لذلك اتاكد من خلال الشي الوحيد الهو عرفني بيهو وحيعرفني بيهو ..
انتي قايلاني لاقيت محسن ده في تيمولليت؟؟
انا لاقيتو في بورد من خلال (نك نيم) وعشان يتاكد مني.. فمرجعيتو لي هي (النك نيم) وليس رقم تلفون مشكوك في امرو او اي شي تاني..

يعني افرضي هسي الرقم لسع قاعد في جهاز محسن ..
اها حيعرف كيف انو ده رقمي ولا مارقمي بدون مايتصل بي في مسنجر..
واول مايتصل مسنجريا الرقم بفقد قيمتو لانو انا حاقول ليهو ده ما انا ..
بالتالي الرقم حيكون طوالي بقى ما حقي..
وايا كان الرقم بعد ذلك فهو لمجهول..
بي مفتاح بدون مفتاح ..

دينا انتي قريتي لحدي سنة كم؟؟

Post: #32
Title: Re: انتحـــــال شخصية
Author: Dina Faisal
Date: 02-04-2007, 10:25 AM
Parent: #30

وااااي انا من ذكاءك يا دكين

انت متاكد انك شغال بعقلك كلو؟؟

ياخي ما اختلفنا في انو محسن ما بعرفك الا من خلال البورد لكن دة ما بيمنع انو يحتفظ بالرقم

المشكوك في امرو دة ويرسلوا ليك مسنجريا كمرجعية ليس الا.

انا غايتو بي نص عقلي دة كنت ح اعمل كدة.

Quote: دينا انتي قريتي لحدي سنة كم؟؟

بالليل والا بالنهار

Post: #33
Title: Re: انتحـــــال شخصية
Author: DKEEN
Date: 02-04-2007, 10:42 AM
Parent: #1

عمر الفاروق

كان ما اخاف الله المتصل تكون انتا..

او احمد ليمونة..

Post: #34
Title: Re: انتحـــــال شخصية
Author: DKEEN
Date: 02-04-2007, 10:47 AM
Parent: #1

فيصل نوبي

انتا قبل يومين سالتني من تلفون تراجي قتا ليكي ماعندي
وسالتني من تلفون محسن وقتا ليك ماعندي..

يعني حيكون منو غيرك..
وتقول لي مطنشني ليه ؟؟

تخريمة..

الحق نفسك يامان
لو بدت سودانية تحللك ياهو الحينتحلو شخصيتك ..
اصلك شخصية ماعندك ذاتو..

Post: #35
Title: Re: انتحـــــال شخصية
Author: عمر الفاروق
Date: 02-04-2007, 10:53 AM
Parent: #1

يا دينا:
انتي ساكّة الموضوع ده شديد كده مالك؟

والله عندي احساس الزول المنتحل شخصية دكين ما ساكيهو زيك ..

تخريمة :
دينا بالليل والنهار..
قراية بالليل والنهار..
والله بقيتي زي العملة السودانية والزمن السوداني والكباري السودانية ..
كلها شغالة بي نظام بي القديم ولا بي الجديد ..

اها انتي بالليل ولا بي النهار؟

Post: #40
Title: Re: انتحـــــال شخصية
Author: Dina Faisal
Date: 02-04-2007, 11:53 AM
Parent: #35

Quote: يا دينا:
انتي ساكّة الموضوع ده شديد كده مالك؟

انت قايل روحك براك البتحضر كونان؟

Post: #38
Title: Re: انتحـــــال شخصية
Author: DKEEN
Date: 02-04-2007, 11:22 AM
Parent: #1

Quote: سفة(صعوط) و لا حاجة أوسخ من كده

اعوذ بالله سفة عديل كده؟؟
لا ياحبيب دي حاجة بسيطة ..الخلايق دي كلها قاعدة تشحدها..
بس بتنكر مرات مرات..

Post: #39
Title: Re: انتحـــــال شخصية
Author: عمر الفاروق
Date: 02-04-2007, 11:29 AM
Parent: #1

تعرف يا ديكو الموضوع من لقيت فيهو ليمون وبرتكان وقريب فروت خطرت في بالي تراجي لييي ما عارف..
تتذكر أبيخ نكتة قيلت لنا في الصغر؟
واحد جا يحلب ليمونة رفستو ..

تخريمة :
انا فعلاً حا انتحل شخصيتك يا مان بس ما لي تراجي ولا محسن ..

Post: #41
Title: Re: انتحـــــال شخصية
Author: خضر حسين خليل
Date: 02-04-2007, 12:00 PM
Parent: #1

دكين يا ....

شنو ياخينا شابك الناس إنتحلو شخصيتي وسجم رماد علي الله علي قول محمد الفادي
هي وينها الشخصية اليسوا ليها بطاقة (لامين ينتحلوها) .
غايتوأنت . والعجب دايروا يجي يقول ليك أنا الانتحلت شخصيتك عشان تزرقا ليهو
(قر قر قر) وش زول ميت من الشماتة فيك .
نهايتو ياخينا .

طبعاً كان قلت ليك أنا الانتحلت شخصيتك ماحتصدق لظروفي الانا ماري بيها .
لكن وحياتك الانتحل شخصيتك ده مفروض يكرموهوا عديل .
ونقترح من هذا المنبر (تكريم الشخصية الانتحلت صفة صديقنا عبد العزيز)

ياخي ... مع السلامة أنا جعان شديد

خضر

Post: #42
Title: Re: انتحـــــال شخصية
Author: DKEEN
Date: 02-04-2007, 12:54 PM
Parent: #41

خضر اخوي
الزول ده هسي بكون حاسي بي عار

ليس لفعلته في فكرة انتحال الشخصية..
ولكن للشخصية المُـنتحلة..

هسي يكون بدون مايشعر بقى مفلس وسجمان ..

اقترح فعلا تكريم هذا الجندي المجهول..
دي عملية مابعملها إلا زول بحب التضحيات..

Post: #43
Title: Re: انتحـــــال شخصية
Author: احمد التجانى احمد
Date: 02-04-2007, 01:42 PM
Parent: #42

دكين

برغم اشراقاتك فى هذا البورد الا انو الواحد بقى لا شعوريا
لما تجى سيرتك يتذكر الفلس والمفلسين والسبب انت طبعا لانك بمناسبة
وبدون مناسبة بتذكرنا بفلسك
اولا عايزين نعرف انت مفلس لاى درجة كدة
يعنى مثلا هل لو جيت تمشى اجازة دربك عديل على الاسكلا ولا عبر مطار الرياض
وبتشترى هدومك من وين دبنهامز الفيصلية ولا البطحاء والجزم كلاركس ولا وارد الموسكى
وبتعرف درب قزاز ومحمود سعيد ولا بتكتفى بعطور شارع منفوحة
وكمان من كلامك عرفت انه ماعندك عربية
وده بيقودنى لسؤال انت شغال شنو يادكين ووين؟ انا عارف انك متخرج من احدى الكليات
النظرية بجامعة الخرطوم بعدنا بكتير كدة
ثانيا عايزين نتدخل فى هذا الموضوع لو لقبنا انه الموضوع مافلس عادى زى فلسنا كدة
ودى طبعا بعد تجاوب على الاسئلة الفوق

هذه المداخلة برغم انهاخالفت موضوع البوست الا انها مصحوبة بحسن النوايا
(كحماية من شر ردودك)

اخوكم احمد التجانى

Post: #44
Title: Re: انتحـــــال شخصية
Author: saif massad ali
Date: 02-04-2007, 02:29 PM
Parent: #43

دكين

Quote: القروش هينة
انشالله بس مايكون شحد ناس تانين حاجات تانية ..

العنة كيف بتشديد النون

Post: #50
Title: Re: انتحـــــال شخصية
Author: DKEEN
Date: 02-04-2007, 10:21 PM
Parent: #44

سيف
Quote: العنة كيف بتشديد النون

كويسة وبتسلم عليك ..

Post: #48
Title: Re: انتحـــــال شخصية
Author: DKEEN
Date: 02-04-2007, 06:01 PM
Parent: #43

احمد التجاني سلامات وازيك يا حبوب..
Quote: لما تجى سيرتك يتذكر الفلس

ياخي ماترمي بلاويك علينا
الواحد المرة تفلس بيهو يجي يقول دي سيرة دكين
والله اهو ده الفضل ..

Quote: اولا عايزين نعرف انت مفلس لاى درجة كدة

لدرجة اني هسي ومعزة (اوفا) عندي لااملك سوى اربعين ريال طيلة فترة اغتراب قاربت الخمسة سنوات..
الاشكال انو انا اتعودتا على الفلس ده والفلس ذاتو عودني عليهو..
يعني لامن اقرش بكون مخلوع كده لحدي ما ارجع تاني زول سوي..

Quote: هل لو جيت تمشى اجازة دربك عديل على الاسكلا ولا عبر مطار الرياض
بمشي بي طيارة ملكية
انا بتاع اسكلا؟؟
اصلا انا بتاع اجازات؟؟

Quote: وبتشترى هدومك من وين دبنهامز الفيصلية ولا البطحاء والجزم كلاركس ولا وارد الموسكى

الهدوم ياحبة من الحتة الاولى القتها دي بس من المملكة..
والجزم من عبد اللطيف جميل..
Quote: وبتعرف درب قزاز ومحمود سعيد ولا بتكتفى بعطور شارع منفوحة
انا ريحتي طبيعي سمحة ياحبيب..
Quote: وكمان من كلامك عرفت انه ماعندك عربية

يامان بص 89 هايس 14 راكب
يولول في البطحاء دي وفي مواسم الحج في مكة زي الترتيب..

وشغال في عربتي دي نقل وترحيل طالبات ومعلمات ..في الايام العادية
وفي الحج نقل حجاج..

وخاتي شهادة المعادلة في الطبلون وكاتب في ضهر الحافلة (الاستاذ)

Quote: ثانيا عايزين نتدخل فى هذا الموضوع

تتدخل كيف يعني
وفي ياتو موضوع ؟؟

انتا لو عايز تخدمني واحد من اتنين
ياتشوف لي شغلة سمحة
ياتشوف طالبات ومعلمات عايزين توصيل..

ياتنساني..

Post: #45
Title: Re: انتحـــــال شخصية
Author: Ibrahim Algrefwi
Date: 02-04-2007, 02:30 PM
Parent: #1

والله السعودية دي !!!

Post: #46
Title: Re: انتحـــــال شخصية
Author: عبد الله عقيد
Date: 02-04-2007, 03:10 PM
Parent: #1

يا دكين سلام
موضوعك دا خليهو بي جنبة
انا ياخي مطول من الناس وحايم في بوادي السودان الخالية
من الإنترنت..
وحبيت أسلّم واتفقد الأحوال
وشايف الحبياب معاك بي جاي..
سلم لي عليهم فردا فردا..
وكمان في ناس شافوني اختفيت ظهرو..
.. طيب يا بيان ياخي ما كان من زمان تقولي لي امشي اهلك..؟
وكمان محسن خالد رجع..ّّ!!
لو عارف كدا كان من زمان مشيت السودان..

سلام تاني
واشتياق

Post: #53
Title: Re: انتحـــــال شخصية
Author: DKEEN
Date: 02-05-2007, 08:32 AM
Parent: #46

الجريفاوي
سلامات ..
السعودية عيبها لي؟؟
موش كفاية قعد فيها خضر حسين لامن عتت

ود عقيد
سلامات وحمدلالك بالسلامة..

اها فكيت الحديدة ولا لسع مدروعة في ذمتك؟؟
عرستا ولا لسع بي المرة القديمة؟؟
جاي ولا خليت الجية؟؟
انتا كويس؟؟

Post: #47
Title: Re: انتحـــــال شخصية
Author: عزاز شامي
Date: 02-04-2007, 05:48 PM
Parent: #1

دكين المنتحل

سبق وذكرت ليك انو ما عندي كبير غرض اخدم صديقك لانو ما مستوفي كراسة الشروط بتاعتي
وانا ما زولة اخدم لوجه الله تعالى ولا زولة قلبي حنين
وعليه،
يا تنطبق عليه الشروط
يا تطبق ليهو الشروط

اهن، قلتي داير تعرس بـ300 دولار أمريكي؟ ليه؟ عروسك دي لاقيها في عروض بنده العزيزية؟
بنت الهيلمانه دي كان مرقت ليك من هيلمانتها تكون غبيانه!

Post: #49
Title: Re: انتحـــــال شخصية
Author: حاتم الياس
Date: 02-04-2007, 08:09 PM
Parent: #47

المهم يأخى قصتك دى مرقتنى من طورى المهذب جداً..وزعلته والله

لكن يأخى كمان النقولك.. زولك ده (مسكين) أمكانياتو فى الدنيا مفصله على كدا...

Post: #56
Title: Re: انتحـــــال شخصية
Author: DKEEN
Date: 02-05-2007, 09:35 AM
Parent: #47

بت ابو الشام

Quote: يا تنطبق عليه الشروط
يا تطبق ليهو الشروط

ابشرك .. الزول ده الشروط حتنطبق عليهو ..
انتي بس قولي خير..

Quote: اهن، قلتي داير تعرس بـ300 دولار أمريكي؟ ليه؟ عروسك دي لاقيها في عروض بنده العزيزية؟
بنت الهيلمانه دي كان مرقت ليك من هيلمانتها تكون غبيانه!
اتورطتي يامنقة

محسن خالد قال انو انا اكتر زول مناسب ليكي في دنيا الناس دي..
يعني تجهزي حالك وتختصري طلباتك كلها وتختزليها في التلتمية دي..

محسن خالد قد افتى وانتهى الكلام..

Post: #57
Title: Re: انتحـــــال شخصية
Author: عزاز شامي
Date: 02-05-2007, 10:23 AM
Parent: #56

خلاص كان كده!

اخطبني من محسن خالد وادفع ليهو المقدم، والمؤخر اكتبو شيك مؤجل باسمي!!

وانا بجيك طرد وشايلة كرتونة شاف و جركانة تركين

Post: #51
Title: Re: انتحـــــال شخصية
Author: walid taha
Date: 02-05-2007, 08:05 AM
Parent: #1

Quote: ياخي انتا بدل تباري الفارغة دي ماتشوف لينا عروس..

أبيـــت
Quote: اورسل لينا القروش البضرب بيها وتقول انوانتا دكين..

أبيييييت

ملحوظة: الردود أعلاه نقلاً عن لسان (المنتحل)واللئيم معاً

تخريمة: مُش الغنية بتقول(جسمى إنتحل)؟

Post: #52
Title: Re: انتحـــــال شخصية
Author: حيدر حسن ميرغني
Date: 02-05-2007, 08:22 AM
Parent: #51

شوفت يادكين اللي ما بيسمع كلام المعجبين بيحصل ليهو شنو؟

غايتو لو لقيت الزول الوسخان ده كلَمني عشان ارسل ليك شوال ليمون تنضَفو بيهو من حالة الاسهال دي

وسخان وشحاد كمان

Post: #58
Title: Re: انتحـــــال شخصية
Author: DKEEN
Date: 02-05-2007, 10:34 AM
Parent: #51

وليد طه

الغنية ولا عزاز؟؟

Post: #54
Title: Re: انتحـــــال شخصية
Author: fadlabi
Date: 02-05-2007, 08:41 AM
Parent: #1

عليك يا عزيز

هو الداير يبقى قصير و أزرق و شين و مفلس منو

بطل حنك

و رسل الحاجات الوعدتني بيها في التلفون

30 كفاية جدا

القروش حولتها ليك حسب الإتفاق

5320 دولار

Post: #55
Title: Re: انتحـــــال شخصية
Author: alsngaq
Date: 02-05-2007, 09:06 AM
Parent: #1

دكين
بطل الحنك البيش دا

فلسك دا اصبح عامل زي مشكلة دارفور

Post: #59
Title: Re: انتحـــــال شخصية
Author: DKEEN
Date: 02-05-2007, 12:49 PM
Parent: #55

فاضلابي يافنان

ياخي مافي داعي تشيل حالنا

بتك دي مافي زول بسترها غيري لو استمريت تخرب سوقنا كده..

ياالسنجك

والله انا جادي جدا محتاح استلف منك الايام الجاية دي 500 ريال فقط لاغير ..
اجيك؟؟

سلف بس والله..

Post: #60
Title: Re: انتحـــــال شخصية
Author: mutwakil toum
Date: 02-05-2007, 01:02 PM
Parent: #59

Quote: محسن خالد قال انو انا اكتر زول مناسب ليكي في دنيا الناس دي..

محسن خالد ده زول نصيحة وكلامو ما بقع واطة ,,
كدي إستخير .

Post: #61
Title: Re: انتحـــــال شخصية
Author: حبيب نورة
Date: 02-05-2007, 01:33 PM
Parent: #60

Post: #62
Title: Re: انتحـــــال شخصية
Author: احمد التجانى احمد
Date: 02-05-2007, 01:56 PM
Parent: #60

دكين كيفك

يقال ان عبداللطيف جميل بدا يتاجر بأفياش وكوبسات الكهرباء
من بورتسودان لجدة لكن تجارة الجزم لم تثبت عليه
ولا تكون قاصد جزم تانية؟

فى حالتك ياحبيب يكاد يكون الفلس مستبعد قول لى ليه؟
اقول ليك كل مقومات الحياة المستورة متوفرة عندك
1- خريج قانون الخرطوم (الجابك السعودية شنو؟)
2- سودانى رطانى بيكون عندك كذا واسطة جهبيزة كدة فى القصور
3- قربت من الخمس سنوات غربة

كل ماذكر اعلاه لايساوى هللة لو كانت الوجاهة مخاصماك كما لمح احد
الاعضاء فى هذا البوست فحقوا تنزل صورتك عشان نقدر نحلل الوضع كويس
وهذا ماقصدته بالتدخل واكيد ح نقدر نطلع بحاجة

Post: #67
Title: Re: انتحـــــال شخصية
Author: DKEEN
Date: 02-05-2007, 07:08 PM
Parent: #62

Quote: فحقوا تنزل صورتك عشان نقدر نحلل الوضع كويس

قال نزل لينا صورتك قال؟؟

اقول ليك المسنجر مليان جكس وورود وزهور تقول لي نزل لينا صورتك؟؟

وضع شنو العايز تحللو كويس بي صورتي
حرم إلا تحلل بيها البول..

Post: #65
Title: Re: انتحـــــال شخصية
Author: DKEEN
Date: 02-05-2007, 06:22 PM
Parent: #60

متوكل التوم نمر (وجه باسم)

استخير كيفن ؟؟
انا من محسن قال لي الكلام ده وانا غالبني النوم من الفرحة..
كيفن يستخير من لا يستطيع ان ينام ليحلُـم بنتائج الاستخارة؟؟

Post: #63
Title: Re: انتحـــــال شخصية
Author: esam gabralla
Date: 02-05-2007, 02:48 PM
Parent: #1

يا حاج مفتى الديار

الايام دى وارة معاك تمام ...الماركتنق بتاعك شغال تش ، شئ فتاوى ميراث و شئ شخصياتهم من كتاباتهم .. ولما كلو ما نفع تقوم تضرب تلفونات لشخصيات مشهورة و تجى تقول واحد انتحل شخصيتى... لكن التخطيط عندك
هسه في زول عاقل و طبيعى ينتحل و لا حتى ينتعل شخصيتك؟ بعدين هى وينا الشخصية الينتحلوها؟ يا دكين دى وااااسعة ... خففا شوية... ممكن تمشي على ناس XYZ لكن شفوت مدنى ناس احمد التجانى ديل ما ببلعوها ناشفة كده...

تعرف خلق الله دى كلها لما يكونو بفتشوا على حبيب/ه زوج/ه شريك/ه حياه بيصلحو سمعتهم و سيرتهم و بيقشروا و بتريحو و يختو صندوق البنسون ظاهر و يلبسو شارلستون و جزمة دبابة و يصلحن مسيرتن و يتدهنن بالكركار... الا حاج دكين يبحث عن حبيبة بزيادة رزالته و تاكيد انه وغد و جلف و "بذئ"...

غايتو الا صاحبك خدر بتو تطلع ماخدا اخلاق ابوها... في الحالة دى بضمن ليك زوجة و حبيبة بمواصفاتك ... ده اذا انت على قيد الحياه حينها، واذا الهولندية لقاء قبلت تنظر لشخص زيك سيرته و خلقته ليست افضل من رائحة التركين (و ليس مذاقه)

جسمى انتحل ...

تسلم يا وغد

Post: #64
Title: Re: انتحـــــال شخصية
Author: محمد البشرى الخضر
Date: 02-05-2007, 03:20 PM
Parent: #63

Quote: الا حاج دكين يبحث عن حبيبة بزيادة رزالته و تاكيد انه وغد و جلف و "بذئ"...

وجهة نظر سليمة و منطقية

تحتاج دراسة و تحليل

Post: #66
Title: Re: انتحـــــال شخصية
Author: DKEEN
Date: 02-05-2007, 07:04 PM
Parent: #63

ود جبر الله

حرم وارة معاي ورة اصلا ما تتخيلا..

ياخي المنسجر بتاعي كلو بقى جكس وحنينات..
انا لو عارف اننتحال الشخصية ديه بجيب لي الحنية دي كلها كان من زمان بقيت زول منفصم وريحتا روحي..

يالزول شي صور جكس وشي صور زهور ..وشي صور فراشات ..وشي صور وحيد قرن في مواسم التزاوج
غايتو المسنجر من شدة وحلاوة الجكس الفيهو انا خايفو يحـمل ..

Quote: الا حاج دكين يبحث عن حبيبة بزيادة رزالته و تاكيد انه وغد و جلف و "بذئ"...

انحنا ياخي بنجعر ساي ..وما اظن فينا قلب نهرش بيهو مرة شايلا بساتينها وماشة..
وزي ماقالت دينا فيصل* : الزول البنبح مابعضي..او فيما معناه..

وتحية لي الزول السمح الذكرتو
العزيز خدر
وسلام لي كتير لي الانسة لقاء وانا موعود بي تاني رقصة من الانسة دي..

مودتي يا عصام وكن في خير

Post: #68
Title: Re: انتحـــــال شخصية
Author: الجندرية
Date: 02-05-2007, 08:41 PM
Parent: #1

دكين
غايتو التسوي كريت في مفاهيم الإنسانية السوية تلقاهو في شخصيتها

عفيت منك يا عصام جبر
خلصت لي تار بوست الميراث
يسلم فمك

Post: #69
Title: Re: انتحـــــال شخصية
Author: DKEEN
Date: 02-06-2007, 10:53 AM
Parent: #1

الذ شي في الهلمة دي كلها

انو الزول اتصل بي عبر الايميل وقال لي انا آسف وبعتذر..وانا من الرياض هنا..
والحق يقال انو كان مهذب في ايميلو شديد
وطريقة الكتابة والاسلوب تنم عن زوق وعن ادب واضح..

انا زعلتا فيهو بداية..
ولانو كان ضكران واتصل بي واعتذر ..
ولانو ما اساء لي محسن او تراجي قبلتا اعتذارو ..

وده كان لحدي امس

امس المساء اتصلت بي تراجي..
ثاني سؤال ليها بعد( منو معاي..)
قتا ليهالاداك رقمي ده منو؟)
قات لي : اداني ليهو الزول الاتصل بي وقال انو هو دكين..

طبعا انا استغربتا من تصرف البني ادم ده..
يعني هل ماكان متوقع انو تراجي تتصل بي لامن يديها الرقم ..
هل قصد اني انفعل كده..
وبالتالي اقعد اشك منو البعرف رقمي من ناس الرياض وبعرف تراجي؟؟
هل قصد انو يدخلني في متاهات وبحث ودين حجر؟؟
كيف يوزع كمان تلفوناتي كده ساي على السابلة..
يتصل بي اسمي ..
ويتونس..
ويضحك..
ويعلق على البوستات حقتي مع بت الاسيد بي حرفنة (حسب كلام تراجي)..
ويقرقر ..
وكمان يدي تلفوناتي لي الناس ساي كده طاخ طراخ..

للدرجة دي انا بقيت زول هملة كده؟؟
للدرجة دي انا ضحكي معاكم وهظاري ده خلاكم تاخدو علي شديد؟؟
غلطان يعني العملتكم في مستواي وقعدتا اتفصل معاكم؟؟
الواحد تاني ماينزل من البرج العاجي بتاعو ولا كيف؟؟

يعني بعد شوية مابعيد يتصل بي زول يقول لي دايرين منك تلتماية دولار تمن لباسات ..

او يتصل بيك زول يقول ليك ياخي مالك بنبذ فيني..زي ماحصل معاي مع اخونا الفي البورد..

ومابعيد تتصل بي زولة تقول لي انا حامل..
اقول ليها ربنا يكتب سلامتك وانا مالي بي حملك ؟؟
- تقول انتا موش دكين..؟
-اي انا دكين!!
تقول لي: طيب شنو مالي بي حملك دي..عايز تنكر وليداتك..

اها ونبقى في جنس ده..
نفقة ومصاريف وبامبرز لي شافع مابعرفو..
ولا بعرف امو..

لذلك انا بصراحة وبعد ما صالحتا نفسي تماما مع الزول ده ..
قصة التلفون دي زعلتني شديد..
وتراجي قات لي ده اكيد زول بعرفك..
يعني كمان جابت ليها شك في معارف وقصص زي دي..

والارزل من كده رسل لي رسالة قال لي :
ياخي انا الناس دي زعلانة مني شديد فحاول قول ليهم الزول ده اعتذر...
يعني بغلط في حقي وعايز كمان يحملني نتائج غلطتو وابقى ليهو محامي!!
يوزع في تلفوناتي وعايز كمان اقول لي الناس الزول ده اعتذ1ر فكفو عنه حديثكم..
انا القاعد في امان الله
اتركب واتحشا بي مسنجرات وظنون وتلفونات ماليها داعي بي سبب تصرف ارعن وكمان مُـطالب بي الدفاع عنو امام الراي العام بتاع البورد..
انا المركوب في كلا الحالتين..

فيا صديق
انا تصرفك الواطي ده ماقدرتا اصنفو في ياتو خانة من خانات اللـواط الانساني..
وانا زعلان بس مازعلان شديد...
يعني ماتشيل هم زعلتي انتا وحبيبتك..

حاول اتصالح مع نفسك قبل تفكر تتطلب اعتذاري..
ما اظنك زول كعب لانك ماقتا فارغة في ونتسك مع الناس ديلا..
فقد تحدثو عن حديثك بادب غير معروف عني اصلا..
وكت انتا كويس كده وبني ادم .. خليك كويس واقعد مع نفسك وشوف انتا سويت كده لي شنو..
حلحل مشاكلك بي رواقة ..

يسعدني انك تقعد مع نفسك وتجيب اخرها وتلقى نفسك متصالح معاها..
كل زول في دنيتنو دي عندو مشكلة ومافي زول خالي من هم ..
دبر نفسك وساعدها ..شي منك وشي من حبيبتك وبتحلها ..

اخيرا خالص
انا ماعايز رسالة منك تاني..
ولا تعتذر او تبرر ..
مابعرفك ولن اسعى عشان اعرفك..
ووحاة (الخوة البيني وبين مروان وياسر كمبال) ماحافتح اي رسالة جاية من طرفك او اشك انها جاية من طرفك..
عشان اقطع ليك دابر فكرة انك ترسل رسالة..
الناس الهنا ديل لو شايفم قالو فيك شي مابتستحقه فدونك ايملاتهم او مسنجراتهم او تلفوناتهم اضرب ليهم واعتذر ليهو او اشرح ليهم موقفك..
وتلفوناتهم اكيد مابتغلبك..

واعلم ..
كل شي حتى الان في خير تام ومافي عوجات..
بس الاشياء قد لاتنتهي دوما كما نود ونشتهي..

Post: #70
Title: Re: انتحـــــال شخصية
Author: وليد محمد المبارك
Date: 02-06-2007, 11:33 AM
Parent: #69

كده بقوا تصرفين بليدين

Post: #71
Title: Re: انتحـــــال شخصية
Author: خالدة البدوي
Date: 02-06-2007, 11:44 AM
Parent: #1

دكين الغالي

دهـ بس غيران منك صدقني ،،،

Post: #72
Title: Re: انتحـــــال شخصية
Author: DKEEN
Date: 02-06-2007, 01:54 PM
Parent: #71

حبيب نورة
معزتي ياحبيب

ود المبارك..
الشغلة دي مستحمية بعيد عنك..

بت البدوي

Quote: دكين الغالي

دهـ بس غيران منك صدقني ،،،

ايوه ..اصلي مليان قروش ومعرس مرة سمحة وعيونا كبار..
كيفن مايغير ..

Post: #73
Title: Re: انتحـــــال شخصية
Author: علاء الدين حيموره
Date: 02-06-2007, 03:00 PM
Parent: #72

دكين أخوي :

الناس ديل ما لقو الا شخصيتك ..

البوست ده بوريهم وغايتو اليشوفو ليهم شخصية عليها القيمة ...

بس في زول هنا ما تبرد بطنو اصلو .... ( لايوووووق ) ( ليل ونهار )..

وكان للشغل ( ابتسم ) اصلو ياسر فضل ليه كلها 6 سنوات ويدخل المدرسة .المشوار حا يكون من الشفا لغاية حي الملك فهد ... عارفك ضحكت عشان ضمنت مشوار كارب .

مسعول من الخير ..وين ناس المانيا ؟؟؟؟
ما يكونو طرف في الانتحال ؟

مودتي

Post: #74
Title: Re: انتحـــــال شخصية
Author: محمد البشرى الخضر
Date: 02-06-2007, 03:42 PM
Parent: #73

Quote: كده بقوا تصرفين بليدين

وليد ياااااخ
ما معقول كترتها
لكن ما منك
من الوغد الما عارف مصلحتوا وين دا
و ما بيحترم كلمتوا
أحنا أتفقنا تاني ما يكتب الموضوع هنا تاني
لكن تقول شنو
الخيل تجقلب و في الآخر يطلعها الشفت بليدة