التسوي تندم ولا ما تسوي تندم

إطلاق الصراح المشروط

يا خوانا والله انتو قاعدين تبالغو عديل
انتو كيف تفصلوني عشان هوبفل ؟؟
معقولة بس ؟؟
انتو الزول ده قيمتو بي ياتو زاوية ...
ورونا معاكم يمكن انا في زواية غير ذي زرع..
وروني بس اي حتة ولو ضيقة اقدر بس اعاين ليها للمسمى اعلاه عشان اختو ضمن المحترمين..
والله انا فتشتا ما لقيت ليهو غير مزيد من الاحباطات والسلوك النفسي غيرالمتزن ..
من المؤكد ان هناك خطا ما ..

ياخوانا انا اعتقد بي شده جدا ان في سوء فهم كبير في الموضوع ده
انا لامن وصفتا هوبفل بما قلته ما كنت قاصد اي نوع من الاهانات
ولا كنتا بستهتر بي لائحة او قانون ..

كما ان ظني ابدا لم يذهب الى ان مردود ذلك قد يكون ابعادي بهذه السرعة ..
وابدا ما كان قصدي الناس تخش وتقول دكين مسي..
ليس في الامر اساءة يا شباب

يا خوانا
مسألة انو الود ده حقير مريض وسايكو باتي دي مسألة ما عندها ادنى علاقة بادنى إساءة ..
دي مسألة اعتقاد ويقين
ولا تدخل في عموم الفاظ الاساءات ..
مسألة داخله في عموم معتقدات دكين..

يعني لو حاربتوني عشان الحتة دي وماحاربتو بقية المعتقدات (الكريمة والغير كريمة ) اكون اتظلمت واتفهمتا غلط..
كيف يستقيم ان اظل في موقع يستهين الامين عليه في معتقداتي ولا يقيم لها وزناً ؟؟

يا عادل عبد العاطي اسوي ليك شنو بس؟؟
نهيت المسالة بي مسالة لاتصلح لتكون مسالة..
عركتنا في غير معترك وسويت لي منو بطل ساي ...


السيد بكري
الاخوة الاعداء
والاخوة الما شغالين بالموضوع كتير لانو همهم اكبر من ذلك ..
شاكر لكم وجودكم بالصفات المشار اليها اعلاه ..


الذ ما فيكم انكم تختلفون في كل شي وتتفقون على اني قليل ادب ومجتري
والله لو رايتم فيني قلة ادب وجراءة صريحة في القول فما ذلك إلا من احساسي بعدم الامن بينكم..
الاحساس بالخوف وبغربتي حين اقرا لكم ...
يقيني القديم الذي ياتيني بان الذين اقرا لهم لاشك يوما سياخذونني على حين غره ..
يقينك بانك قد تؤخذ على حين تلك غره وبانك لامحالة ذاهب يولد فيك شيئا دائما لقول ما تشاء قبل ان ُتـحرم من القول ...

الخوف يا سادتي..


ود عزة قال انو بكري ليهو علينا حق العرفة المجانية والجكيس المجاني وافراغ الاشواق المجاني..
وكان ود عزة على حق..
فمنذ ان غادرت البلاد والجمييلين من السودانين دوما كانو بعيدين عن متناول الجوار ..

بس ذلك لايمنع انو بكري ابو بكر هو ربيب المنهج السياسي اللااخلاقي..
وذلك لا يخفى على اي حصيف متابع كتابات بكري ومشاركاته وده موضوع ما بخصني إلا على نطاق محدود ..
بكري تعود على انو يكمم الواحد ثم يصرخ في وجه..
وبيني وبينه عميلة رفد قديمة ..
تركني مصلوبا عاريا مكمم الفم ايامئذ وكان البورداباب يتوافدون في بوست الرفدية ويبصقون تحت اقدامهم ..
وحين افتقدني البعض يومها واستغربو صمتي ،اتهموا احدهم بانه سلبني الباص ويرد وخلاني في السهلة قاعد ساي ..
لعنه الاصدقاء وكالو له كيلا بليغا ..
بينما بكري كان هو ابوالدفان ...
بيد انه لم يكن شجاعا ليقول انا ابوالدفان على الملا والذي كان استياء بعضهم من ايقافي حينها قد بلغ الزبى ..
ختاها لي في ايميل تحت تحت ..
وقال لي: يا حبيب هاك باص ويردك بس ما تقل ادبك تاني..

وللعلم فان تلك المسالة التي ُرفدت من اجلها قديما لم تكن فيها قلة ادب لمجرد قلة الادب ..
كان هناك بوست ميادة بتاع اساءة الشعب السعودي ــ فتشوهو لو انتو ناس فاضيين وما عندكم شغلة غير البورد ده ــ ورددت عليها لانو لا يستقيم للسوداني ان يشتم شعبا ويجلس بينهم..
ونحن قوم اذا غضب احدنا ضرب الارض بقدميه وسب ابو ميتين الذي اثار غضبه ....
دعم ميادة في ذلك الوقت ود شاموق واستغربت منه ان يفعل ذلك وهو ياكل من خير المملكة ويجعل من ادب خانتها مكانا لغائطه..
ود شاموق ومع انه لم يكن محقا في وصفه للشعب السعودي طلع راجل وقدر كلامو ورجع نهائي وكسر ركبة في شمبات واشترى تنسم النيل الازرق وجمال الجهنميات عند ابواب منازل بحري ..
لانه اتاريهو كان فعلا بقول ما يجول بنفسة وكان قدر الذي يقول ..
التقيت ود شاموق فيما بعد وكان حبيبا بهيجا دائم السرور وعندو مرسيدس بنز عليها مؤخرة كصدر هندوية..
غفر الله له زلاته وغفر لي سوء ظني به وحسن ظني بمؤخره سيارته.


ذلك كان سبب رفدي الاول

مؤخرا
افرد بكري بوستا وقال بيني وبين الذي وصفني باني اكبر جبان..
انا حقيقة ما عارف هل بكري كان قاصدني انا ..ام أن هناك شخصا اخر اثار حفيظته..
و مع انه كان يستطيع الرد في نفس البوست الذي وصفته انا ـ او الشخص الاخر أن وجد ـ حرصا على باندويثه ..
إلا ان نهجة الاستعلائي وحسسه الدائم بعظمةِ نفسة جعلانه يفردُ بوستاً جديداً آملاًََ في ان يحصد مجدا على انقاضنا في محاوله منه لرشوة توازنه النفسي المفقود دايما فيتبعه الطبالون والقادمون الجُـدد الذين يشعرون بان بكري حين سمح لهم بالدخول ملَك عليهم دَيناً طويل الأجل ..

انا لا الوم بكري في شي لانني حقيقة ما تعودت منه الحق ..
وما رايته يوما حقانيا او موضوعيا ..
دوما كان مهزوز الراي يُـفاضل في المصالح وفي اتخاذ القرار فلا يفلح لا في مفاضلته لا في اتخاذ قراره ..
استغرب كيف ُقـــدر له ان يقوم بهذا العمل الضخم بتلك الشخصية..
واحسبُ ان الامرَ لم يكن إلا صدفة مستمرة..
عزز تلك الصدفة وجود فراشات واشخاص معروفين و ُمبعدين ُمبدعين لم يحظو بفرصٍ في اي مكان اخر..
اثبتو انهم نابتون من عمق الالم وجديرون بالبقاء على رؤس النبت الجديد ..

عزز تلك الصدفة ايضا الغربة التي يعاني منها اغلب السودانيين في الشتات وحوجتهم لافراغ مكبوت اشواقهم للبلاد في لقاءات عابره وسلامات حميمة لكل ماهو من البلاد ولو كان سايبر ..

عادل عبد العاطي..
ان احترامي لك امر موضوعي جدا..
ولم يقلل فصلك لي من دعمي السابق لك ..
ولو كانت اماليا في ُعمر عرس كنتا جيتك جاري..
مع اني شديد الاعتقاد بانك كنتا حتخذلني فيها ..

يا ود انتا الم تكن قبل التكليف حرا ومصادما ؟؟
تخيلتك تكون كذلك وعلى نفس النهج ستسير الامور ..
المؤسف ان بعد التكليف قيدك المنصب وهذبتك الالتزامات والطموح ...
اظنك بقيت تحسب الامور آلافا قبل التصرف..
تلك هي الطامة ..
حينما قدمك علينا بكري بررت انتخابي لك بان المنبر يحتاج الى واحد تقدمي خارج عن المنظومة او الى دكتاتور..
دوما لم يكن الشيوعي الذي يخرج عن التنظيم قابلا للتهذيب ..
الذين تمردوا على منظمة الحزب الشيوعي السوداني ابدا لم يخضعوا لتهذيب من اي نوع ما تبقى من حياتهم..
ظلو دوما في قلةالادب واستهتارهم بالثوابت ونشاف رأسهم الذي لايأبى إلا الدوران.. ذي راس الحطابة ميسون ..
ودوما كان المثقف السوداني خارجا عن النظام ومنتجا في ظل الانظمة القمعية..
تغربهم تلك الانظمة في بلادهم وفي اصقاع الارض فيرون عالما اخر فلا يقولون بعدها إلا الالم والابداع..

إن قيادة بورد المثقفين هذا يتطلب عدم تهذيب مطلق او تهذيب وإلتزام مطلق ..
لا مجال للالوان الرمادية..
لامجال لمواقف بكري المهزوزة الواقفة بين بينين..

كان عادل كذلك قبل ان يستغرقه المنصب الجديد ويتلبس حلل السطان ..
عادل
انت تهذبت وحبستك اللوائح من ان تكون نفسكك وذلك امرٌ غريب..

*هُـم البسوكَ ِدثارَ خزٍ ناعم الاطرافِ منظومِ الحفيف ..
ودعوك تاج العزِ مجد العزِ عزِ العزِ صبـو في دماك عصارة الكذبِ المخيف ..
م.سند.
اخرجوك منك يا ود عبد العاطي

ويؤسفني انني وضعت عادل الاسبوع الماضي في خيار بين نفسه وبين ما ينبغي للنفس أن تكون ..
لكنه اختار المصلحة العامة وفصلني وذلك لا يؤسفني..


ويؤسفني انني اضعة مرة اخرى في خيارٍ اخر بينه وبين نفسة التي قد تكـَــونت
حيقوم عادل يحترم التزامه بالقوانين .. وتكـوينه الجديد..
وحيفصلني ..
وما اظنو يديني فرصة اعقب حتى على الاوغاد في هذا البوست

ليس لان بيني وبينه ثأر بائت او لانه يفضل بقائي خارج هذا المكان ..
وليس لانني اتمنى ان أُفصل من هذا المكان ــ فقد جئته باختياري واتمنى ان لا اغور منه لاسباب تافهة داخلة في عموم معتقدات دكين التافه ــ لكن لان عادل تغير ملتزما نحو المؤسسية وسيادة القانون ..
ولانني ما تركت له خيارا اخر امام هؤلاء التواقين لالقائي خارجاً..


يسرني جدا ان التزم بالقوانين ولوائح التنظيم ..
ولكن مفاضلاتكم في المصالح وغتغتة الامور لا تـسُـر ..
ولغتكم تضِــن علي بحاجتي من المعاني ولاتفي بها..
انا إن كنت على خطا في ظني بكم فلا سبب سواكم ..
انتم ما بذلتم الجهد الكافي لاقناعي بانني اهيم في سوء ظني ..

انا لم تقنعني تفاهاتكم التي بررتم بها مواقفكم في ذلك الموقف يا سادة ..
فانا فكيت الخط قبل تلاتة وعشرين عاما خلت ..
تربية مجلات ميكي وتان تان..

مداخلاتكم للتبرير لم تكن تصلح حتى رموز لقصص الناشئة..

جعلتم سوء الظن يعمل فينا- إن كان في الامر سوء ظن - بصمتكم المريب وتبريراتكم التي لم تكن ابدا تليق بمستوى مناصبكم ..
ولا بمستوى الاحداث ..
وجعتو قلبنا ساي.. الله يهديكم بس ..

وعالمكم هذا لا يستحق هذاالعناء ووجع القلب ..
ولا تزال مشاكلي على ظهر الارض اكبر وثقيلة تثير الشجون..

كما ولاتزال بت الذين تقول لصديقي انها تخاف المجهول ..
كأن النفس تدري باي ارض تموت وكأن هذا المجهول لن يتربص بها في مكان اخر ..
عموما اتمنى انو بت الذين تحتفظ بذلك التردد مائة عام عشان تشوف المجهول الخايفة منو ده بقى شكلو كيف في المراية..

واتمنى انو عادل يقدر يحتفظ بهذا الالتزام المؤسسي الذي نبت فيه ما تبقى من حياته..
حينها لن يكون وجودي خارج هذا المكان عبث ..
على الاقل يكون واحد من النافعين - او الذين احسبهم كذلك- قد تغير نهج حياته الى ما يتمنى وكنت انا تجربة التغيير الاولى له ..
فانا اعلم انو عادل يتمنى ان يكون مؤسسيا..
حينها لن يطاردني عار اني ُفصلت من سودانيز اون لاين بسبب ذلك المريض ..

ولعل اكثر ما اثار قلقي في فترة اسبوع الحبس التي مضت حلول موعد تسديد اشتراكات الجمعية والحركة الغير معتادة لمنسوب النيل الازرق في محطة ودالماحي وتعطش ميادة لالقائي خارج هذا الجمع السايبيري..

انا لا احب ان اكون كريها لهذه الدرجة وكم ازعجني ذلك الاصرار منها على ان اكون خارج هذا المكان..
لا سبب يدعو احدهم لان يحتفظ بكراهيتي كل تلك المدة مالم يكن مصاباً في يقينه او ذاكرته قد توقفت عندي ..

على اي حال انا يسرني ان اكون نفسي ويسرني كذلك ان اواصل حبي اللامحدود للبنات ..
ولان ميادة من البنات فيسعدني ان احقق رغبتها واغور...
ليس تملقا لها ولكن فقط من باب انها من البنات ولانني احببتُ ذلك الباب..
وصعب على دكين انو يشوف بت تطلب شي وهو ما قادر يسويهو ..

والبنات ديل دوما يأسرنني بما يقلن..
ولان المسالة بالنسبة لي محسومة ولا تحتاج الى مستشار ..

فان العبارات التي كررتها تاني بحق هوبفل هي اولاً راحة لنفسي التواقة للشر ..
ثانيا مبرر لعادل لفصلي نهائيا دون تانيب ضميرلانها في نظرو اساءة للمرة الثانية مع سبق الاصرار..
وفصلي يريح دواخل ميادة .. ذلك ثالثا


رابعا إعطاء هبفل مايستحقه من الوصف
..

شفتو الى اي مدى مريح كون هوبفل ده
طحلبي حقير مريض وسايكو باتي ..
الدنيا دي كلها بترتاح
انا وعادل وبكري وميادة

هبفل ذكر في بوست وقال انو القانون لايحمي المغفلين..
وما عارف اذا استحمرك الحمار حمر ليهو وكلام برضو مغتغت من هذا القبيل..
هبفل ماقادر يختها لي عديل لانو ما مغفل ذيي..
ختاها كده مصرجة ومغتغتة لانو مدردح وبشبه ناس بكري ..

انا بقى ختيتا ليك عديل لاني مغفل والقوانين القتها دي سبق قتا فيها طــز وانا لاذلت على ذلك الطـــز واقف طالما هذه القوانين تحرمني من حسن اعتقادي فيك..


هذا ونسال الله الستر ودوام العافية وان يهب لنا من لدنه بنية تهتم باحوال النيل الازرق طوال العام والشكر موصول لي خدر والبحيري والمسافر ونادر وناس الشرقية وابو امنة ومراويد وابوقوتا واساسي وكل الذين سعوا لان يكون البورد شفافا عشان الناس الذي ميسون يكتبو بي اطمئنان مع انو اساسي ما سعى معاهم لكن كونو يصاحب هوبفل ده ذاتو نوع من انواع الابتلاءات والمجاهدات..
عسى الله يمنحة الصبر وحسن العزاء .

اساسي كنتا اتمنى اني اعرفك بصورة شخصية لكن انتا دوما كنتا في الفرص الضيقة البلقاها معاك بتدهشني بمنتهى وقاحتك وعدم قدرتك الفائقة علىاختيار مقامات الالفاظ..
انتا يلاقوك بي ياتو مزاج؟؟

وللذين ما يزالون مستاؤؤن مني لهذا الوصف اقول لهم ..
يا خوانا المسالة دي ليس بها اي نوع من البغضاء ولو رايت هبفل هذا في زنقة لفزعت له ..
وليست في المسالة كذلك اي نوع من الاحقاد القديمة ..
انا الزول ده ماعندي بيهو سابق معرفة ..
كذلك ليس فيها اي نوع من قله الادب والاستهتار بادبيات المنبر وزواره وتكرار الشتم اللامجدي..
المسالة اعتقاد ناتج من تصرفات المذكور وعززو لينا بكري والسيد عادل المحترم ..

والبسويهو واندم عليهو اخير لي من المابسويهو واندم علي اني ما سويتو ..

ختاما يا اوغاد

المجموعة التي يرعى فيها هوبفل و شايننق ودريمز والجميلات الباقين الموغلات في الياسمين في مكان واحد عااااااادي .. هي بلا شك مجموعة غير طبيعية..
وانا لايسرني انضمامي لي مجموعات غير طبيعية لا تفرق بين الـَفـراش وبين السايكو بات ..
كما وان الما طبيعية الفيني دي تكفيني ما تبقى من العمر بل وتكفي لحياة تانية..













لو بس القى لي سفة استعيض بها عنكم

الكلام اعلاه اتكتب قبل نزول بوست عادل الاخير بي يومين كاملين..
وما قدرتا انزلو لانو الاسبوع انتهى وبرضو الحظر استمر والظاهر لاسباب فنية والله وعادل اعلم..

بعد قراتي لبوست عادل ..
اكتشفتا الى اي مدى انا كنتا محق في ظني في عادل ..واني زول خطير وقاري افكار جيد وانو فعلا مكاني ما هنا .. مكاني كهف في التبت..
وعرفتا ايضا الى اي مدى عادل وجع قلبو ساكت عشانا لايغاله في المؤسسية ..
والى اي مدى ساصاب بالاسف لان ظني لم يخب في الرجل ..
وكم كنت اتمنى انو عادل يطلع وغد ويخيب حسن ظني فيهو عشان الواحد يمرق منهاوليس في هتاويلهِ ادنى اسف..

مع انو قرارو بي فصل هوبفل خلاني حتى ما اتمتع بي شرف الفصل ..
كانو قصد يحلق بي ذلك العار حتى في إقصائي ..

كرهتني الفصل ذاتو ياخي..

عموما انا مارق منها لا احمل ضغينة لاي زول ..لكن حأسب ليك لوجبتو وراي في الفصل النهائي ..

وشاكرين يا عدولة الفرصةالاخيرة الادتينا ليها..
ولامن تكبر اماليا قول ليها كان في دكين عايز يعرسك بس كتلتوالمؤسسية ..

ربنا يديها طولة البال والعافية


بلاي لو تكرمتا قرار الفصل بتاعي ختو لي في نفس البوست ده ..
نوع من انواع حب الذات وتمنيات المحكوم عليه بالاعدام ..


كدي ما تخلها بدل النهائي دي ستة شهور ..
اصلو الظروف ما معروفة...
يمكن الواحد يمشي ليهو بلدا طيرا عجم وناسا بخافو المجهول ومامعروف نصارى ولا مسلمين يقوم يحس هناك بي غربتو وسجم امو ...

خاص

قال مجهول قال؟؟
والله في المجهول الخايفة منو ده اضمن ليكي انوما حيحصل اختلاف غير في موضوع الصعوط ..

انا قد اخلي وجه الارض بس ما اخلي سفتي ..


بلي راسك يبدو انو موضوعك استحمى..


تعرفي انا المجهول الحقيقي لم اسمع به الا من خلال اصدقاء غاية في الدجل ..

واحد يقول لي نصرانية حضرت فلم الآم المسيح اكثر من خمستاشر مره في عدد من دور العرض وبزوايا مختلفة لتتبين الرؤيا من جميع الجوانب التي اغفلها المؤرخين والسادة كتاب السناريو ...
وفي كل مرة تحضرو كانت تبكي وتضع اشارة الصليب حول صدرها..
وواحد يقول لي مسلمة عادية جدا .. كثيرة الصلاة والتسبيح وتدعو الله سرا وعلانية بان لا يؤاخذ الخلق بجريرة السفهاء منهم..
وواحد تالت يقول لي لا مسلمة ولا نصرانية هي فقط سودانية..
تأكل من ماكندونالد وتمشي في الاسواق وتنام حين يأخذها النعاس وتتالم لما يحدث في البلاد وترتدي الجنز في العمل ، تسكب بقية المياة اذا ارتوت وتخاف المجهول ..

ورابع يقول لي هي مزيج من هؤلاء جميعا غير انها ولشدة جمالها يراها الناظراليها كلٌ حسب عقيدته في الحياة وما يتمنى في اغوار نفسه ..

وهكذا تضاربت الاقاويل حولك حتى عمك شي من الضباب تماما كهذا البورد المُــفتري عليه ..

وانت يا عزيزتي تعلمين ـ صاحبك ده من الجميعاب ومن حي صوفي خليهواليوريك كان ما تعلمين ــ إن الحقائق عندنا نحن اهل السودان اذا تغشاها الضباب وضلو اليها السبيل صارت في عداد الغيبيات واذا صارت في عداد الغيبيات دخلت في خصوص معتقدات الناس وما دخل في خصوص مُـعتقد الناس وكان من البشر ألحقوه بزمرة الصالحين والأولياء..

رضي الله عن الصالحين وارضاهم وجعل الجنة مثواهم وسدد في الخير خطاهم ..

اها قتا شنو في الستة شهور؟؟

معاك لحدي تمنية..

حرم ما تقول شي

دكين

الاسبوع انتهي الليلة واتاخرنا عليك كم ساعة بس ..
انت اتوقفت يوم الجمعة ورجعت يوم الجمعة فما تعمل ضجة ..

اماليا دي يا زول دكينية بتختار براها وعجائز غابرين ما اظن حتحتاج ليهم ؛ لكن علمو عند الخلقو ..

واصل هنا قبل ما نفصلك؛ لكن قرارات الفصل دي بتجي بموافقة لجنة الادارة ومجلس التحكيم؛ فديل علي الاقل ما تشتمن.

عادل

صديقي

دكين

هل رجعت عن فكرة ان هذا النيت شئ واهي وما المفروض نقرط عليهو كتير

انت عارف انا بقيت قاطع شك في انو الحكاية كلها لعب في لعب ...وانو ما المفروض نعكر دمنا وباقي الدماغ الفينا بمشاكل عالم وهمي


يازول امش نوووم

عزيزي دكين.... بركة الشُفناك طيب يا أخوي.
شكراً على الكلام السمح والعميق. إنه حديث يستحق من "الكُل"، وعلى وجه الخصوص "من يهمّهم الأمر"، مذاكرة معتبرة وبتركيز عال.
مسرور لعودتك...
مع الود،

ع ع

ثمة امرأة تعرف الحكاية من أولها الى آخرها....
وثمة رجل لا يعرف شيئا عن أي شيء....
وثمة لقاء مأمول بينهما لتروي له كل شيء ليسلبها الحكاية ويرمي بها عند نقطة النهاية...

حمدلله علي السلامه يا دكين ...

•·.·´¯`·.·• نورتا •·.·´¯`·.·•

اما بعد...
ذرات من هواء الابتسام
و همس من تراتيل السلام
وسهام تقتفي أثر السهام
وباقة
من كل الورود تشكلت
وتجمعت عدد الأنام
والشوق شمع قد توقد
كلما حل الظلام
لكنها الكلمات تاهت بالمساء
ولم تعد
كيف السبيل إلى ملامحها...وقد زاد الزحام؟

Quote: كيف السبيل إلى ملامحها...وقد زاد الزحام؟

كيف ؟؟؟



سعادتو

دكــــــــــــــــــــين
والله مشتقين
بركة الفكو سجنك يافاكهة البورد
بمناسبة الفاكهة كنت داير ازورك
في الحبس ومعي كيس برتقال ولكن امين
السجن رفض ..
بركة الشوفناك تاني..
مسؤب

لا تعليق
.... سوى المحبة
.... محضها

دكين
نجحت اخيرا في انك تصيبني بحاله من القرف من :

1/ المنبر الحر بسودانيز اون لاين
2/ فكره الانترنت كوسيله اتصال و حوار
3/ قانون المصنفات الفنيه الجديد
4/ النظام
5/ و طبعاالمملكه العربيه السعوديه


غور ياخ

دكين العزيز (لاحظ أول مرة أكتب ليك) .. لوووول

أحييك وأحيي ما قمت به.. أهدأ كده.. وخلينا نواصل بالروااااقة لنهاية المحكمة التي ما زال يتجاهلها الكثيرون..

حمد لله على السلامة.. وبالمناسبة دي لو كنت بعرف ليك ايميل كنت رسًلت ليك (عيش وحلاوة) ..

تخريمة: أوعك تحسبنا مع الجكس ..

يا وغد ..

عندى تمباك صاموتى
ارسل ليك سفه بالايميل و لا المسنجر


و كان هكروها فى الدرب ؟؟

Quote: وعندو مرسيدس بنز عليها مؤخرة كصدر هندوية

هسه ده شكر و لا نبز؟؟

دكين مرحب بيك

عامل جوطة مالك
حمد الله على السلامة

دكــــــــين...


أول مرة أتشــــرف.. لكن السمعته عنّك بخليني أنحني احترامـــــــاًً...


مـــــرحب بيك....


بالمناسبة .. انا من الإدارة، لكن وظيفتي فنية فقط ...


وزيرة مستقل وكده...


بنت الحسين

عاد الحبيب المنتظر عاد