ساخر سبيل : بلا كلام فارغ !

ساخر سبيل : بلا كلام فارغ !


10-08-2008, 06:37 AM


  » http://sudaneseonline.com/cgi-bin/sdb/2bb.cgi?seq=msg&board=226&msg=1241742535&rn=4


Post: #1
Title: ساخر سبيل : بلا كلام فارغ !
Author: الفاتح يوسف جبرا
Date: 10-08-2008, 06:37 AM
Parent: #0

صحيفة الرأى العام
عدد الأربعاء الموافق 8 أكتوبر 2008م
موقع الكاتب www.alfatihgabra.com
__________________________________________________________________________________________

فى خبر نقلته وكالات الأنباء العالمية فى يوم 18/9/2008م أى قبل أسابيع قليلة أن وزير الزراعة الياباني (سيشي أوتا) قد قام بتقديم استقالته بسبب وجود (أرز) مصاب بالفطريات بالأسواق مما جعله غير صالح للإستهلاك الآدمى وأوضح (أوتا) أنه بهذه الإستقالة فإنه يقوم بتوضيح مسئولية وزارته عن ذلك رغم أنه لم ترد تقارير حول ظهور حالات إصابة بأمراض بسبب استهلاك الأرز الملوث.
إنتهى الخبر والذى ما أن إنتهيت من قراءته حتى قلت لنفسى : أيه الكلام الفارغ والدلع بتاع (اليابانيين) ده ؟ عشان (رز) فيهو شويت فطريات (وزير) يستقيل؟ وكمان مفيش حد (مات) وإلا (إتسمم) وإلا جاتو حاجه؟ إذاى يستقيل (اليابانى العوير ده)؟ هو كان جاب الرز ده من بيت أبوهو؟ وشنو يعنى (فطريات) ما أهو نحنا لينا زمن قاعدين نشرب (مويه بالفطريات) وبالطحالب وبالما بعرف شنو داك .. حصل أيه يعنى؟ قال أيه (رغم أنه لم ترد تقارير حول ظهور حالات إصابة بأمراض بسبب استهلاك الأرز الملوث) يعنى مفيش حد مات ! والله ده شئ عجيب ما ممكن يحصل طبعا فى (بلدنا) لأنو نحنا معندناش الكلام الفارغ والدلع ده علشان كل مسئول عندنا (قوى وأمين) وجلدو (تخين) يموتو عشرة يموتو عشرين يموتو مية مش مشكلة .. طيارات تقع (زى الرز) .. عمارات تنهار (نص النهار) .. الخريف يجى (فجأتن) ويموت من يموت (بالسيول والأمطار) وتمتلئ البرك والحفر والمستنقعات وتنتشر الأسهالات والملاريات ... وتمتلئ الأرفف بالأدوية (منتهية الصلاحية) ويأتى الصيف (فجأتن) – منذ عشرات السنين- ويضعف الإمداد الكهربائى وتقطع الكهرباء ... عاوزين المسئولين يقدموا إستقالاتهم عشان الحاجات البسيطة دى ؟ ! ده يبقى (سخف) زى (السخف) بتاع (الكيان الصهيونى) الذى إتهمت (شرطته) مؤخراً رئيس وزرائه (الإسرائيلي) إيهود أولمرت ، بتهمة (الفساد المالى) قال أيه فى رجل أعمال أميركي إسمو (موريس تالانسكي)، جمع ليهو حوالى (مائة ألف دولار) – يعنى حوالى ميتين مليون جنيه بالقديم- عشان يدعم بيهم الحملتين الانتخابيتين اللتين خاضهما أولمرت للوصول إلى بلدية القدس في عامي 1993-1998، وكمان لحملته الانتخابية الفاشلة لزعامة حزب الليكود عام 1992، وانتخابات داخلية تانيه الحزب عام 2002 ، وعشان الإتهام ده قام (أولمرت) بتقديم إستقالته من منصبه كرئيس للوزراء ورئيس للحزب (كمان) !
بالله شوفوا السخف الصهيونى ده؟ أول حاجه القروش موضوع (التهمة) دى ما تشترى ليها بيت جالوص فى (أم جلافيط) ! وتانى حاجه ليست من (بيت مال الصهاينة) كما إنها ليست (كومشن) لإرساء (العطاء) الفلانى للشركة (الفلتكانية) بل هى مبالغ تم جمعها (خلال 15 سنة) كتبرعات لدعم حملات (أولمرت) الإنتخابية !
أيه السخف ده (شرطة) تحقق مع (رئيس وزراء) عشان واحد بلدياتو ومن حزبو قاعد فى (أمريكا) جمع ليهو (ميتين مليون جنيه بالقديم) يساعدو بيها فى حملتو الإنتخابية ؟ ومش كده وبس و(رئيس الوزراء ) يقدم إستقالتو من (رئاسة الوزارة) ومن (رئاسة) الحزب كمان ؟ ده يبقى إسمو (دلع) ؟ ده كلام برضو؟ نحنا معندناش كلام فارغ ذى ده .. يعنى لما كل وزير أو مسئول عندنا يقدم أستقالتو حنجيب وزراء ومسئولين من وين؟ هو نحنا عندنا ناس (تفتيحه) وعباقرة زيهم؟ هم كم واحد (الحيلتنا) نشيلهم من الوزارة دى نختهم فى الوزارة دى .. يلا .. بلا (إستراحات) بلا (استقالات) بلا كلام فارغ !

Post: #2
Title: Re: ساخر سبيل : بلا كلام فارغ !
Author: Amira Elsheikh
Date: 10-08-2008, 06:44 AM
Parent: #1

استاذ الفاتح...

اليابنيين ديل كان سلفونا وزيرين تلاتة كدا مالو??

والله نرجعهم ليهم...

ناسنا ديل قاعدين يقرو الكلام دا ياربى??

Post: #3
Title: Re: ساخر سبيل : بلا كلام فارغ !
Author: الفاتح يوسف جبرا
Date: 10-08-2008, 07:11 AM
Parent: #1

Quote:
ناسنا ديل قاعدين يقرو الكلام دا ياربى??


ناسنا ديل يا أميرة ما (بقرو) .. (بسفو) ساااكت !! هم فاضين من (العطاءآت) والشنوما بعرف دااك ؟

Post: #4
Title: Re: ساخر سبيل : بلا كلام فارغ !
Author: ALMURADABI
Date: 10-08-2008, 08:17 AM
Parent: #3

سلام أستاذنا العبقري جبرة

حكاياتك تضرب لب القضية

كمثال موضوعك عن الدكاترة والدكتورات الشباب ديك واقع ماثل
مع سلسلة الأخطاء الطبية المتوالية وانعدام المسألة والشفافية ، والمسئولية تتحملها جهات عديدة أهمها الدولة وغياب المؤسية ووالصرف على الخدمات الأساسية مثل الصحة والتعليم والخدمات والبنية التحتية المغيبة لصالح بناء المسئولين والمتنفذين لعماراتهم وقراية أولادهم في المدارس الخاصة والجامعلات الفكة بدوون مجموع وبالواسطة التحضير في الخارج على حساب الشعب الفضل..

آسف للجدية المفرطة والمتعجلة

Post: #5
Title: Re: ساخر سبيل : بلا كلام فارغ !
Author: ALMURADABI
Date: 10-08-2008, 08:19 AM
Parent: #3

جبرة أواصل أدناه ما أخطأت في ايراده في مداخلتي السابقة وهو الأهم


موضوع هام هو ورود خبر عن نية وزارة الصحة إلغاء إمتحان المهنة للأطباء الجدد!!!

وهو لعمري لأمر عجب (عجب سيدو) غذ من المتوجب التشدد في هذه الامتحان خاصة مع دخول كلية الطب الذي أصبح لكل من هب ودب وبالواسطة في كثير من الأحيان، خاصةً للجامعات التي ترغب في زيادة أو تعديل ميزانياتها لتكتنز مزيد من الاموال فلا بأس من قبول بتجاوزات يمكن معالجة أمرها بالهاتف مع الأحباب في القبول والتعليم العالي وإلى حين الترخج يحلها الحل بلة..

أرجو الطرق على هذا الباب والتأكيد على أهمية هذا الامتحان لنضمن على الأقل المام الأطباء الجدد بالطب على الأقل نظرياً بدلاً من اعفائهم وتسهيل الأمر في منح الدرجات العلمية لمن يرغب وإمكن إجيبها في سنتين كمان (ما كلو دفع في دفع)


سؤال هل رسب أحد أبناء المسئولين في هذا الامتحان فأمر بالغائة من أجل خاطر عيون حمادة السكر زيادة

ولك الله يا وطني

Post: #6
Title: Re: ساخر سبيل : بلا كلام فارغ !
Author: شكرى سليمان ماطوس
Date: 10-08-2008, 08:21 AM
Parent: #1

الأستاذ الفاتح،
لك التحية و كل عام و أنتم بألف خير

ناسنا كان بسفواا كان خلواا لينا حاجة حتى ولو فتافيت


ديل بخمواااا و بالتقيل

لعنهم الله





--------
أميرة الشيخ لك ولأسرة عمر بوب ألف تحية
و كل عام و أنتم بمليار خير





اللعنة= الطرد من الرحمة
المليار = لغة العصر







ش

Post: #8
Title: Re: ساخر سبيل : بلا كلام فارغ !
Author: كمال حامد
Date: 10-08-2008, 10:58 AM
Parent: #6

يعني شنو مسئول ياباني يستقيل؟
إنت ناسي إنو زي ده يكون ليهو كم سنة بقبض راتبو بالين الياباني ؟!
وكمان بالشي الفلاني!!
خلوني أقبض زيو بالياباني..
وبعدها شوفو كان هماني!!

Post: #7
Title: Re: ساخر سبيل : بلا كلام فارغ !
Author: الفاتح يوسف جبرا
Date: 10-08-2008, 10:56 AM
Parent: #1

Quote: وتسهيل الأمر في منح الدرجات العلمية لمن يرغب وإمكن إجيبها في سنتين كمان (ما كلو دفع في دفع)


أنا أفتكر ياموردابى (السنتين) ديل ذاتم مافى ليهم داعى .. الطالب/ة يدفع الرسوم ويجر (القرعة) وقعت ليهو هندسة يبقى مهندس .. (طب) يبقى طبيب ويلا أصلو فى النهاية المحصلة وااااحده !

Post: #9
Title: Re: ساخر سبيل : بلا كلام فارغ !
Author: هاشم أحمد خلف الله
Date: 10-08-2008, 11:41 AM
Parent: #1

استاذ الفاتح مشتاقين كتير والله
وكل سنة وانت طيب والعيد عليك وعلينا يتبارك
وربنا يحقق الأماني

المثل قال شنو ؟ العجلة ما من الشيطان العجلة من اليابان
يعنى في داعي للوزير الياباني ده يستعجل وبقدم إستقالتو قبل إستشارة
ناسنا اصحاب الفهم والراي !! اصحاب القيم والمبادي !!!
حاجة غريبة والله .
فعلاً العجلة من اليابان

Post: #10
Title: Re: ساخر سبيل : بلا كلام فارغ !
Author: ibrahim sidahmed
Date: 10-08-2008, 02:47 PM
Parent: #1

ديل يا جبرة ناس شيخ تلب عيشهم كمهو وديشهم هانقدر , مافيش إستقالة مافيش شفافية مافيش حد مش ماخد منهاحاجة

Post: #11
Title: Re: ساخر سبيل : بلا كلام فارغ !
Author: Badr Edinn Abdul Rahman
Date: 10-08-2008, 04:49 PM
Parent: #1

والله يا الفاتح قصة رااااااااااائعة نحن فعلاً نحن عندنا مسؤولين جلدهم ثخين

Post: #12
Title: Re: ساخر سبيل : بلا كلام فارغ !
Author: rosemen osman
Date: 10-08-2008, 05:38 PM
Parent: #11

*

Post: #13
Title: Re: ساخر سبيل : بلا كلام فارغ !
Author: طارق عبد اللطيف نقد
Date: 10-08-2008, 05:55 PM
Parent: #1

العزيز ولد ود جبرا
والله انا نفسي ومني عيني اقراء لي خبر عن
استقاله وزير ولا مسئول000
ياخي دي ثقافة ممسوحه خالص من ادمغتنا000

نحن اغرب شعب في الدنيا
الوزراء عندنا عادي ممكن يبقى وزير مالية
بعد كم شهر كده ممكن يتحول الى وزارة الطاقة
وفي التعديل الوزاري الجديد ممكن يتحول الي وزير زراعة

شوف بعد ده كله ممكن يكون جامعي فقط او ثانوي كمان000سبحانك يا دايم000

وفي وزراء كمان من ايام الديموقراطيه الاولى مرورا بحكومة عبود ومرورا بحكومة النميري

وحكومة البشير000

وزراء فل اتوماتيك يصلحوا لكل زمان ومكان!!!

يستقيل قال 000
ديل شيخهم الذي علمهم السحر000
طلعوا من الخارطة السياسية000 عشان فقط حلم انه يصبح رئيس!!!

نحن عندنا ثقافة اسمه 000الكنكشة!!!

Post: #14
Title: Re: ساخر سبيل : بلا كلام فارغ !
Author: Nasr
Date: 10-08-2008, 06:07 PM
Parent: #1

شايفك بتلمح لإستراحة المحارب إياها
والله أنا خايف عليك

Post: #15
Title: Re: ساخر سبيل : بلا كلام فارغ !
Author: elfadl abdellatif
Date: 10-09-2008, 12:00 PM
Parent: #1

استاذنا الفاتح
انت رجل مثالي وخيالي عندما تقارن بين وزراء اليابان ووزراء الدولة
حينما تحدث مثل هذه الاحداث فان الوزير المسئول سيفصل كل الذين لم يتسببوا في الكارثة ويظل هو والمتسببون فيها في اماكنهم ...
ثم اذا افترضنا ان المسئول لا يملك كل تلك الحساسة والشعور بالمسئولية .. فاين هي المحاسبة والمسئولية يعني المسئول مفروض يَسْأَل ولَا يُسْأَل

Post: #16
Title: Re: ساخر سبيل : بلا كلام فارغ !
Author: عبدالكريم أحمد الامين
Date: 10-09-2008, 01:42 PM
Parent: #15

البروف ابو ناجي

تعرف الجماعه الوهم البره ديل بيستقيلوا ليه ,,, لانهم ماعندهم توجه حضارى زي العندنا ونسبة لذلك نحسبهم عندئذ يقدمون علي هذه الخطوه غير الموفقه لإفتقارهم للجانب الإيماني الذى نمتاز به ,,, والله أعلم… (فتوى بموجب فقه الضروره)
** وناكل مما نزرع ,, ونلبس مما نصنع = ونضحك مما نسمع … وهاك الاستقاله دى …

*** كسره:- الوزير البنقلوه من وزاره لوزاره زي نقليات المدرسين وموظفي الاشغال زمان لو عرس السكرتيره وجاتو النقليه بتنتقل معاهو ولى بفكها لاخوه الجديد من ضمن التركه..