Post: #1
Title: ساخر سبيل : خروف بالتقسيط !
Author: الفاتح يوسف جبرا
Date: 12-07-2008, 07:44 AM
Parent: #0
صحيفة الرأى العام
عدد الإحد الموافق 7 ديسمبر 2008م
_____________________________________________________________________________________________
فى هوجة نظام (البيع بالتقسيط) الذى أصبحت تمارسه (الشركات) و(المؤسسات) وبعض (البنوك) المحترمة التى كنا نأمل أن تقوم بدفع عجلة (الإقتصاد) وتمويل (مشاريع) تنموية تدفع بعجلة التقدم وتشغل لينا (جيوش العاطلين) خريجى (جامعات الفكة) فإذا بها تنافس (عزيزة الدلالية) تبيع للمواطنين (العربات) والشنو ما بعرف داك .
فى هوجة هذا الإستغلال البشع لظروف المواطنين أطلت برأسها مسألة تقسيط (خروف العيد) والجميع يعلم (القداسة) التى يوليها (السودانيون) لعملية (الأضحية) ! يعنى المسألة تجاوزت (التلفزيونات) و(التلاجات) والعربات لتشمل (الخروف) ليقع المواطن (ضحية) الأقساط التى سوف (تذبحه) أكثر من مرة بينما (الخروف ذااااتو) بيذبح مرة واحدة .
نسبة لغرابة الفكرة فقد سرحت بعيداً متخيلاً (الجهات) التى سوف تقوم بهذه الخدمة وقد إحتدم التنافس بينها وهى تستخدم الوسائط الإعلامية لجذب اكبر عدد من المواطنين (الضحايا) فهذه شركة (خروف قدر ظروفك) وقد أنشأت لها فرعا (للبيع الإيجارى) تروج إعلانا يقول :
- يا عوض مالك زهجان وخاتى إيدين فوق راسك تقول القيامة قامت؟
- الخروف يا محمود الخروف ... الوليه اليوم كلو تنق تنق .. أجيب ليها خروف من وين؟
- كان على كده يا عوض قضيتك محلولة بس تمشى طوااالى على شركة (خروف قدر ظروفك)
- وديل ح يضحوا ليا
- أيوااا ح يضحو (بيك ) وكمان على (تلاته أقساط) !!
- (صوت جهورى مع صوت خروف كخلفية) : أدفع تلاته (أقساط) عشان ما تلاقى المرا تنق والأولاد
يبكو والبيت (جاط)
أما شركة (خروف ببلاش) فقد قامت بترويج إعلان من نوع آخر :
- الرسول يا نفيسه خروفكم المدوعل السمين ده إشتريتوهو بى كم ؟
- والله كان قلت ليكى يا سعاد ما بتصدقى ؟ ده مجانن !
- خروف قدر ده ومجانن ما بصدق
- لا صدقى يا سعاد .. أصلو عصام أخوى إشترى ليهو (خروفين) وأدوهو التالت ده ساااكت !
صوت جهورى (غير داك) : إشترى خروفين بالأقساط وأحصل على الثالث مجانن من شركة (خروف ببلاش) !
عبدالعال موظف بسيط لا يقوى مرتبه الضعيف على الإنفاق على إحتياجات أسرته (الضرورية) ناهيك عن (خروف العيد) بعد ضغوط شديده من الأولاد و(أم الأولاد) توجه لشركة (الذبيح السمين) وقام بإختيار خروف (مدوعل) بعد أن قام بكتابة عدد من (الكمبيالات) الشهرية قام بوضع (الخروف) على ضهرية (البوكس الهايلوكس) الذى إستأجره خصيصا لذلك ، لم ينس أن يغشى (السوق الجديد) لأخذ كمية من (أبو سبعين) وكم ربطة (برسيم) لمدة يومين تفصلانه عن العيد ، ما أن توقف البوكس حاملاً الخروف أمام منزله حتى تجمع الصبية والأطفال بينما تهللل وجه زوجته (نعيمة) وهى تفتح باب الشارع مستقبلة (الضيف) المنتظر.
فى صباح اليوم التالى إستيقظ عبدالعال على صياح (نعيمة) وهى (تلكز فيهو) :
- عبد العال عبد العال قوم شوف خروفك ده
- (منزعجا) : مالو !؟
- مشيت أشوف مويتو لقيتو راااقد وقاطع الحركة !
هب عبد العال واقفا وأسرع نحو الخروف المستلقى دون حراك ، ما أن نظر إلى عينيه (الجاحظتان) حتى تأكد له بأن الخروف قد فارق الحياة !
تفاجأ العاملون فى شركة (الذبيح السمين) بشخص يدخل إلى الإستقبال وهو يجر خلفه (خروف ميت) يضعه فى منتصف الصالة ويتجه نحوهم والشرر يتطاير من عينيه :
- تدونى خروف بالليل يموت ليا الصباح
- وما يموت كان مات دى مسئوليتنا ؟
- (فى غضب) : كيفن يعنى ما مسئوليتكم؟
- إنتا ما قريت العقد الوقعتو لينا ده وإلا شنو ؟ أقرأ هنا .. أقرأ هنا مش مكتوب (الشركة
غير مسئوله عن البضاعه بعد خروجها من المحل) !!
كسرة :
- إذا ذهبت لزيارة عبدالعال يوم العيد فى منزله ووجدته قد وضع لافتة على منزله تقول ((الشركة غير مسئوله عن البضاعه بعد خروجها من المحل) !! فلا تسأل عنه زوجته نعمات لأنك إن فعلت فسوف تقول لإبنها الصغير (حماده) :
- يا ولد أمشى نادى أبوك من (الصينية) القدام التقاطع ديك قول ليهو فى ضيوف جوك !!
|
Post: #2
Title: Re: ساخر سبيل : خروف بالتقسيط !
Author: Adel Sameer Tawfiq
Date: 12-07-2008, 07:54 AM
Parent: #1
| Quote: - يا ولد أمشى نادى أبوك من (الصينية) القدام التقاطع ديك قول ليهو فى ضيوف جوك !! |
|
Post: #3
Title: Re: ساخر سبيل : خروف بالتقسيط !
Author: الفاتح يوسف جبرا
Date: 12-07-2008, 09:32 AM
Parent: #1
مرحب الحبيب الصديق مولانا عادل ... وأهو مناسبة نقول ليك كل سنة إنت طيب والأسرة الكريمة
|
Post: #4
Title: Re: ساخر سبيل : خروف بالتقسيط !
Author: أسامه الكرور
Date: 12-07-2008, 09:50 AM
Parent: #1
الأستاذ الفاتح جبره
أولا كل سنه وإنت طيب
سؤال صغيرونى
حكاية (الخروف المعافى) ورسومها وكده على منو؟؟؟
على البنوك ولا الضحيه .. أقصد المشترى
(وشكرن كتيرن)
|
Post: #5
Title: Re: ساخر سبيل : خروف بالتقسيط !
Author: الفاتح يوسف جبرا
Date: 12-07-2008, 10:29 AM
Parent: #1
Quote: حكاية (الخروف المعافى) ورسومها وكده على منو؟؟؟
|
وإنت كمان طيب يا أسامة ... والله أنا قربت أنزل ليهم (الخروف المعافى) لكن خفت بس من التكرار ... تحياتى !!
|
Post: #6
Title: Re: ساخر سبيل : خروف بالتقسيط !
Author: هاشم أحمد خلف الله
Date: 12-07-2008, 11:31 AM
Parent: #1
صديقي جبرا قلت والله ما بدخل بوستك
ده إلا ومعاي خرفان أصبر علي أمانة ما أشبعك لحم
|
Post: #7
Title: Re: ساخر سبيل : خروف بالتقسيط !
Author: هاشم أحمد خلف الله
Date: 12-07-2008, 11:34 AM
Parent: #6
|
Post: #8
Title: Re: ساخر سبيل : خروف بالتقسيط !
Author: عبدالوهاب علي الحاج
Date: 12-07-2008, 11:55 AM
Parent: #1
استاذنا الغالي جبرا
تمنياتي بدوام الصحة والعافية
|
Post: #9
Title: Re: ساخر سبيل : خروف بالتقسيط !
Author: كمال سالم
Date: 12-07-2008, 12:28 PM
Parent: #8
كل سنه وإنت طيب أخى الحبيب الفاتح ,, أعاده الله علينا وعليكم بالخير ,,
طالما جرادل الخبيز بقت بالاقساط ,, فالبتأكيد خروف الاضحيه حيكون كذلك ,,
تحياتى للمدام والوليدات ,,
|
Post: #10
Title: Re: ساخر سبيل : خروف بالتقسيط !
Author: علاء الدين صلاح محمد
Date: 12-07-2008, 12:47 PM
Parent: #9
الرائع الاستاذ جبر ا
متعك الله بالصحة و العافية
وكل عام و انت بخير
|
Post: #11
Title: Re: ساخر سبيل : خروف بالتقسيط !
Author: فتحي الصديق
Date: 12-10-2008, 10:29 PM
Parent: #1
*
|
Post: #12
Title: Re: ساخر سبيل : خروف بالتقسيط !
Author: Ishraga Mustafa
Date: 12-11-2008, 12:28 PM
Parent: #11
Quote: - إذا ذهبت لزيارة عبدالعال يوم العيد فى منزله ووجدته قد وضع لافتة على منزله تقول ((الشركة غير مسئوله عن البضاعه بعد خروجها من المحل) !! فلا تسأل عنه زوجته نعمات لأنك إن فعلت فسوف تقول لإبنها الصغير (حماده) :
- يا ولد أمشى نادى أبوك من (الصينية) القدام التقاطع ديك قول ليهو فى ضيوف جوك !! |
ياخ دى حاجة تطمئن القلب اذا لسه فى ضيوف بيمشوا لعبدالعال
انا افتكرتهم ملوا صواتى يوسف عبديالفتاح ديك بالمرارات اللى فيهم
كل سنة وانتى واسرتك طيبين يا الفاتح
|
|