Post: #1
Title: ساخر سبيل : فنبلة
Author: الفاتح يوسف جبرا
Date: 01-18-2009, 06:54 AM
صحيفة الرأى العام
الأحد 18 يناير 2009
________________________________________________________________________________________________
التلفون المحمول أو (الموبايل) كما يحلو للناس أن تسميه جهاز كان حتى سنوات قليلة حكراً على المسئولين الحكوميين ونجوم المجتمع من (أصحاب المليارات) ثم شيئاً فشيئا إنتشر إستخدامه ليشمل كل شرائح المجتمع ليصبح موجوداً فى كل (جيب) وكل (بيت) وكل (عربة) حتى أن البعض أصبح يحمل معه (موبايليين) ثلاثة!!!
كان (مبارك) يكره التعامل مع أى الأجهزة الإليكترونية ولا يجيد التعامل معها فهو لا يستطيع (مثلاً) إستخدام (رموت الدش) لتغيير القنوات كما أنه لا يورط نفسه فى محاولة تغيير قنوات التلفزيون إذ إختار لنفسه أن يكون بعيداً عن هذه الحمى (التكنولوجية) المجنونة وكان يضحك على أصحابه عندما يراهم يصرفون كل نقودهم على أحدث أجهزة الموبايل وعلى الفواتير و(الإسكراتشات) .
في أحد الأيام عاد أخيه الذي يعمل فى الخارج فى إجازته السنوية وهو يحمل له (موبايل) فاخر من أحدث الموديلات وأفخمها ، حاول (مبارك) أن يرفض الهدية ولكنه خاف أن (يزعل أخيه) فأخذه وفوض امره لله، فرح أبناء (مبارك) بالموبايل الحديث وأصروا أن يشتري له شريحة فورا وهكذا كان.
في اليوم التالي تعجب أصحاب (مبارك) وهم يرونه يحمل جهاز موبايل وهو العدو اللدود له :
- معقولة ؟ مبارك شايل ليهو موبايل وكمان أحدث موديل؟
- والله ده هدية من أخويا ولو ما خايفو يزعل كان ما شلتو منو
- (أحدهم يمسك به فى إعجاب) : غايتو يا مبارك لو فكرت تبيعو أنا بشتريهو منك .
- أبيعو شنو؟ معقوله بس .. ياخى ما عارف إنو الهديه لا تهدى ولا تباع
- خلاص ياخى سحبنا (العرض) بتاعنا ، لكن والله يا مبارك إنت كلام الموبايلات ده (ما بتقدر عليهو) !
بينما كان (مبارك) يجلس على مكتبه فى الوزارة جاءة (خضر المراسلة) يخبره بأن (السبد الوكيل) عاوزو ، لم يكن (مبارك) يحبذ (السيد الوكيل) فهو شخص متغطرس و(عامل رسمى) ، ترك مبارك (الأوراق) التى كانت أمامه وإتجه نحو مكتب الوكيل ، تعوذ من الشيطان ثم طرق الباب ودخل للوكيل الذى ما أن رآه حتى بادره قائلاً :
- الأوراق العندك ليها كم يوم دى حاول أخلص لينا منها عشان السيد الوزير عاوزا
فجأة وقبل أن يجيب (مبارك) تحول مكتب السبد الوكيل إلى ( حفلة هاجه) إذ إنطلق صوت المغنية :
- وين مقدرة راجل المرا ده حلو حلا !
لم يفهم كلاهما من أين يأتي الصوت ، حتى انتبه (مبارك) إلى أن الصوت يأتي من (جيبه) فأخرج جهاز الموبايل وقام بالرد فجاءه صوت ابنته (أمانى) :
- أيه رايك يابوى فى (الغنية) الختيتا ليك (رنه) دى؟ مش حلوة ؟
- خلاص بعدين بعدين ، بعدين (ثم اغلق الخط) !
- شنو ده يا (أستاذ مبارك) ؟ مش عيب عليك يا راجل زول في سنك ومركزك ده يخت ليهو كلام فاضي زي ده فى موبايلو؟ وكمان جايى بيهو في مكتبي؟ ما فيش احترام ؟
- اصلو فى الحقيقه سعادتك يعنى ...
- بلا فى الحقيقه بلا يعنى تانى لما أناديك تقفل موبايلك ده مفهووووم !
خرج (مبارك) من مكتب السيد الوكيل (غاضبا) لهذا الموقف (السخيف) الذى (لقى روحو فيهو) وذهب إلى البيت على الرغم من إنو (اليوم ما إنتهى) حيث عنف ابنته ووبخها بشدة على وضعها لهذه (الاغنية الهابطة) السخيفة ومنعها من أن تقترب من الموبايل مرة أخرى وطلب من ابنه (طلال) أن يغير الرنة الى رنة أخرى معقولة أخذ الابن الجهاز وأخذ يعبث بأزراره بينما ذهب مبارك ليتناول الغداء .
في عصر ذات اليوم توفى جار (مبارك) الذى كان يشغل منصباً مرموقاً ، لم يستطع (مبارك) حضور التشييع فأكتفى بالذهاب لصيوان العزاء حيث أختار له كرسياً جاء مصادفة قريباً من إحدى الشخصيات الحكومية الهامة التى جاءت لتقديم واجب العزاء وفجأة سمع الجميع صوتاً ينطلق :
- قنبلة ... قنبلة !!
تضاير الجميع .. وقف أفراد الفريق المصاحب المكلف بحماية تلك الشخصية (الهامة) فى حالة تأهب وحذر لم تستمر كثيرا حيث إنطلق ذلك الصوت مواصلاً :
سماحة الزول في الطول والعُلا
قنبلة ..
الإيـديـن كلاشـنـكـوف
قنبلة
الحواجـب شايفـة شــوف
قنبلة
والحنـان المالـي الـجـوف
فسـحـة للـعـذاب والـبـلا
إستدار الجميع ليبحثوا عن مصدر الصوت فإذا به موبايل (مبارك) الذى أدخل يده فى جيبه (بالغمتى) وقام (بتتبيظ) جميع المفاتيح حتى أستطاع إيقافه وهو يتصبب عرقاً ولكن بعد أن قاربت (الأغنية) على الإنتهاء!!
|
Post: #2
Title: Re: ساخر سبيل : فنبلة
Author: sudania2000
Date: 01-18-2009, 09:59 AM
Parent: #1
الاخ المبدع الفاتح جبرا
تحياتي واحترامي
دي مشكلة تعاطي مع التكنولوجيا تكتسح بلدنا
والسيناريو غاية في الحلا
وفي اجتماع رسمي جدا سمعت أغنية حبيبي تعال نتلم باللكنة الحبشية
وفي المقابر تسمع اصالة نصري
وفي صلاة الجمعة تسمع قنبلة :)
تحياتي
|
Post: #3
Title: Re: ساخر سبيل : فنبلة
Author: الفاتح يوسف جبرا
Date: 01-18-2009, 07:27 PM
Parent: #1
الإبنة العزيزة sudania2000
كل سنة وإنتى طيبة وشكرن للمرور الانيق ... ألف شكر
|
Post: #4
Title: Re: ساخر سبيل : فنبلة
Author: ابراهيم سائحون
Date: 01-18-2009, 10:36 PM
Parent: #3
استاذى الجميل ... الفاتح جبرا
كما كنا نقولها هكذا على الهواء الطلق بجامعة التقانة ايام كانت كلية علوم التقانة
و القدر وحده يحوى جمال الحياة مع خدوشها
انا ابنك و تلميذك و طالبك ابراهيم سائحون
ولكم شاقنى و شدنى و زادنى اعزازآ و تمنى انك درستنى تحليل نظم
المادة التى برغم تمردى على جميع المقررات التى يأتينا اساتذتها وهم مخنوقى الخيال
و مخمودى الخاطر و البديهة وكانوا ينزلون الينا العلم وهم ابعد ما يكونوا من معرفة ان جبريل اتى بالروح
وقد ترك العلم للحياة .. للدنيا ام المدارس .. انا اراك حينها فى قاعة الدرس قبل 8 اعوام او اقل قليلأ
تدور و تدور و تسرح بعلمك الجميل الذى لكم احببته فيك و تضع معالم فى طريق الحكمة لكل عاقل و كل (( ذكى )) فقط
لك التحية استاذى و انا استلهم حواسى و اقرأك لا اقراء لك .. على الصحف و القوافى و النصوص
استرجع حتى رائحتك فى محاضرات ما بعد الثالثة و انت تتهادى تحليلآ لمعادلات لا تنطق الا عن جبرا ... الفاتح الاستاذ الصحفى
لك التحية استاذى و ما تبقى من التواضع فى حضرة علمك على حد تعلمى ... استاذى لك التحية
..................
بما يخص مبارك
هكذا الحياة اما ان تبتلعها او تبتلعك
وهكذا ابتلع لسانه مبارك حينما هضمت كبريائة قنبلة
راجل المرة حلو حلا
ابراهيم محمد عبد الرحمن
|
Post: #5
Title: Re: ساخر سبيل : فنبلة
Author: حمور زيادة
Date: 01-19-2009, 04:13 AM
Parent: #4
امتاع يا استاذنا
اسمعني - لو سمحت - النحدثك بالقصة دي
واحد صاحبنا مقسم الناس في تلفونو مجموعات ( بتعرف الحركة دي ؟ ) و عامل لكل مجموعة نغمة معينة عشان من تلفونو يضرب يكون عارف ده واحد من ناس البيت او ديل شباب الشيشة او ديل ناس الشغل او .. او ..
اها الزول ده في واحد بيضرب ليو كتير كان عاوز منو خدمة و صاحبنا زايغ ما بيرد عليو
قام لاقاهو وش لوش و لامو لوم تقيل كيف ياخ ما بترد على تلفوناتي
طبعا العذر الجاهز انو تلفوني نغمتو واطيه ما سمعتها ياخ و انا اسف و اعتذارات شديدة
الزول السغيل قام براحة مرق تلفونو و عاوز يجرب يضرب لصاحبنا عشان يتكد انو النغمة فعلا واطية وله دي حركات واطية من صاحبنا
اول ما داس الرقم تلفون صاحبنا دق
ما كان المشكلة انو الصوت كان عالي و واضح
ابدا و الله
المشكلة انو النغمة كانت تسجيل صوتي بيقول :
هناك شخص تافه يتصل بك
|
Post: #8
Title: Re: ساخر سبيل : فنبلة
Author: Ridhaa
Date: 01-19-2009, 06:23 AM
Parent: #3
الاستاذ الجليل الفاتح جبرا
سلام ...
دائما تأتي يالجميل ....
الأخت سودانية 2000
سلام ....
الاستاذ الفاتح جبرا بتاع مقالب وقال ليك شكرن - بدلا عن الألف - شكرا
والنون نون النسوة( قاموس المقالب ) .....
خالص تحياتي
|
Post: #6
Title: Re: ساخر سبيل : فنبلة
Author: اسعد الريفى
Date: 01-19-2009, 05:01 AM
Parent: #1
الفاتح جبرا
الرائع جدا
صباح الخير
كدى باللاى شوف الكلام ده
Quote: الإيـديـن كلاشـنـكـوف
الحواجـب شايفـة شــوف
والحنـان المالـي الـجـوف
|
موش قنبلة !!
|
Post: #7
Title: Re: ساخر سبيل : فنبلة
Author: هشام كمال
Date: 01-19-2009, 06:22 AM
Parent: #6
ياخى انت احلى زول فى السودان
مودتى
|
Post: #9
Title: Re: ساخر سبيل : فنبلة
Author: عمار زكي
Date: 01-19-2009, 07:02 AM
Parent: #1
والله ظريف جدا يا أخ الفاتح جبرا .. لكن تصدق أنا دخلت البوست لما قريت عنوانه (فنبلة) وقلت الليلة الفاتح الظريف دا ح يكتب شئ عجيب عن فنبلة دي وما قدرت أفهم ماهو المقصود بكلمة (فنبلة) ولما فتحت البوست لقيت الموضوع قنبلة وليس فنبلة وده في حد ذاته منتهى الظرف وخفة الدم إنك تكتب حاجة ما مفهومة بعدين لما تقرأ الموضوع تفهم وبهذه المناسبة تذكرت عندما كنا أطفالا نذهب لشراء اللقيمات في الصباح الباكر من السوق المحلي ويتنافس بائعي اللقيمات في البيع لنا مع أنها كلها لقيمات يعني دقيق وزيت وسكر وفي يوم جئنا لنجد أحد البائعين يصيح : (أيوة عندنا الفربيك) أيوة الفربيك ووقفنا أمامه لنرى ماهو هذا الفربيك فوجدنا أمامه لقيمات عادية (دقيق وزيت وسكر) قلنا له فربيك يعني شنو دي مالقيمات ..أجاب لا دي ما لقيمات ساكت كدي أشتريها وأكلها وشوف الفرق بينها وبين اللقيمات العادية وكان ما لقيت في فرق برجع ليك قروشك .. ونشترى منه الفربيك المزعوم بتعريفة وناكل أول واحدة فإذا بنا نجد أنها لقيمات لكنه وضع في داخل كل لقيمة (تمرة منزوعة النوى) وبالفعل أصبحت اللقيمات محشوة بالتمر وكان طعمها رائع بالفعل ولكن البائع الماهر شعر بأنه إن لم يغير الإسم فلن ينتبه له أحد وكان أن جاء بكلمة الفربيك بدون أي مدلول فقط لتغيير الإسم من لقيمات إلى إسم غريب يجذب الجمهور .. وعشان كدا أنا تخيلت أنو الفاتح جبرا كتب العنوان عمدا (فنبلة) بالفاء بدلا من (قنبلة) بالقاف.. ولا كيف؟؟؟؟
|
Post: #10
Title: Re: ساخر سبيل : فنبلة
Author: عبدالله الشقليني
Date: 01-19-2009, 07:43 AM
Parent: #1
الشكر الجزيل للأستاذ الفاتح يوسف جبرا
مرّ زمان طويل منذ قراءة إبداع الكتابة الساخرة
( قنبُلة ) ..مُدهشة .
والشيء بالشيء يذكرُ .
قبل زمان طويل نذكر الدكتور أحمد الطيب عند كتابته الساخرة في الصحافة السودانية وهو من رواد الكتابة الساخرة .
يحكي بسرد شيق كيف كان يقف مُعلم الإنجليزية الذي يحضر للتدرُب في مدارس ما وراء البحار عندنا في السودان . يحكي ما يدور في ذهن المُعلم الشاب ، وهو يستذكر مغامراته وهو بعيد عن صويحباته أنه حين يقف مُشرفاً على ( المنـزل ) عصراً بحنتوب الثانوية و يمتد أمامه صف الطلاب بملابسهم الداخلية التي تناسب الرياضة عصراً.لم يكن يدُر بخلده أن الطالب ( أحمد سليمان إبراهيم ) قد تسلم قبل يومين برقية من والده الحاج سليمان يُخبره أنه قد رُزِقَ طفله الثاني ذكراً ، وقد سماه جده على اسم النبي الأكرم ( محمد ) ! ، وهو يرى نفسه بحٌكم أنه المشرف لم يكن ليصدق أن أحد تلامذته ، بل جلهم أرباب أسر ، لهم عائلاتهم وممتلكاتهم في الريف من بغال ومزارع ودجاج ... وعُمرٌ خفي عن النُظُم !
واتخذمن تلك الأحداث والغرائب طريقة ساحرة للسرد عميق الغور .
شكراً لك قلماً تُزهر الطُرفة من بين يديه ، وتقول الكثير .
|
Post: #11
Title: Re: ساخر سبيل : فنبلة
Author: ismeil abbas
Date: 01-19-2009, 08:40 AM
Parent: #1
تسلم /ألأخ,,ألأستاذ.,,,الفاتح..
مستمتع....ومواصل...معاك فى طريق ساخر سبيل..مودتى.......................إسماعيل محمد احمد عباس...
|
Post: #12
Title: Re: ساخر سبيل : فنبلة
Author: Mubarak Eltayeb
Date: 01-19-2009, 10:58 AM
Parent: #11
Quote: معقولة ؟ مبارك شايل ليهو موبايل وكمان أحدث موديل؟
- والله ده هدية من أخويا ولو ما خايفو يزعل كان ما شلتو منو |
الفاتح أخوي
بالغت معاي
|
Post: #13
Title: Re: ساخر سبيل : فنبلة
Author: ابراهيم احمد سليمان
Date: 01-19-2009, 02:16 PM
Parent: #1
الأستاذ / جبرا
تحياتى
متعك الله بالصحة والعافية فأنت دائماً وأبداً تطرق المواضيع
الحساسة فى قالب من السخرية يدل على خفت دمك (روحك)
ماأود أن أقوله والله هذه الأغانى الهابطة قددت أذاننا عمدا مع سبق الأصرار والترصد من لجنة المصنفات الفنية .
احياناً كثيرة يقطع تفكيرك وسرحتك صوت أغنية من غير أى مقدمات ولا دخلة موسيقية منبعث من مقاعد الحافلة (الهايس )الخلفية وبعدم إهتمام بمشاعر الركاب وبإهتمام مصطنع من قبل متلقى المكالمة تجده يحملق فى الهاتف حتى تنتهى الضجة مع حرق أعصاب الجميع . يا أصحاب الهواتف الميوزك رفقا بنا .
ودمت الفاتح جبرا
|
Post: #14
Title: Re: ساخر سبيل : فنبلة
Author: عزيز عيسى
Date: 01-19-2009, 06:16 PM
Parent: #1
الأستاذ العزيز الفاتح جبرا،
سلام من الله يغشاك ويجدك أنت ومن معك في أحسن حال..
أمتعتنا بمثل هذه الكتابة الساخرة الجميلة التي نفتقد لها منذ فترة من الزمن..
حدث لي موقف مشابه محرج جدا مع موبايلي..
قبل إسبوعين عرجت مع زوجتي على محل تجاري فخم لبيع الأدوات المنزلية
في منطقتنا وكان غالبية الزبائين المتسوقين خواجات..
وفي إثناء إنشغالنا بإختيار بعض الأواني فإذا بأغنية مع صوت موسيقي
صاخب تنطلق بصوت عالي جدا سمعها كل من كان حولنا..
كانت المغنية ترددها بإستمرار ودون توقف:
peanut butter jelly time
peanut butter jelly time
peanut butter jelly time
كنت كالأهبل أدور بعيوني وأذني مع الجميع لمعرفة مصدر تلك الأغنية
فإذا بي أشاهد الجميع ينظر الى.. وبعد لحظات أشارت فتاتين على
جوالي وكن يضحكن ولسان حالهن يقول:
بالله شوف الراجل العجوز (المتصبين) دا عامل نغمة بتاعة شباب صغار..
طبعا عرفت أن مصدر الأغنية هو جوالي..
فتحت الجوال ورديت وجدت المتحدث إبنتي الصغيرة..
قلت ليها دا شنو العملتيه في جوالي دا يا بت الذين..
فضحتيني قدام الناس.. ليه غيرتي النغمة في جوالي..
قالت لي ما غيرت نغمة جوالك الأصلية ولكن
أدخلت هذه النغمة علشان تعرف المتصل دا أنا..
قلت ليها: يا بتي ما لقيتي نغمة أحسن من كدا تضيفيها؟
غايتو صبيان الزمن دا بيدخلونا نحن العجائز ديل في
إحراج مع التكنولوجيا الحديثة!!
|
Post: #15
Title: Re: ساخر سبيل : فنبلة
Author: رأفت ميلاد
Date: 01-19-2009, 10:28 PM
Parent: #14
حبيبنا الفاتح جبرا
كل سنة وأنت طيب
غايتو أجمل قنبلة فى 2009
]مشتاقين كتير
|
Post: #16
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:08 PM
Parent: #1
Quote: استاذى الجميل ... الفاتح جبرا
كما كنا نقولها هكذا على الهواء الطلق بجامعة التقانة ايام كانت كلية علوم التقانة
و القدر وحده يحوى جمال الحياة مع خدوشها
انا ابنك و تلميذك و طالبك ابراهيم سائحون
ولكم شاقنى و شدنى و زادنى اعزازآ و تمنى انك درستنى تحليل نظم
المادة التى برغم تمردى على جميع المقررات التى يأتينا اساتذتها وهم مخنوقى الخيال
و مخمودى الخاطر و البديهة وكانوا ينزلون الينا العلم وهم ابعد ما يكونوا من معرفة ان جبريل اتى بالروح
وقد ترك العلم للحياة .. للدنيا ام المدارس .. انا اراك حينها فى قاعة الدرس قبل 8 اعوام او اقل قليلأ
تدور و تدور و تسرح بعلمك الجميل الذى لكم احببته فيك و تضع معالم فى طريق الحكمة لكل عاقل و كل (( ذكى )) فقط
لك التحية استاذى و انا استلهم حواسى و اقرأك لا اقراء لك .. على الصحف و القوافى و النصوص
استرجع حتى رائحتك فى محاضرات ما بعد الثالثة و انت تتهادى تحليلآ لمعادلات لا تنطق الا عن جبرا ... الفاتح الاستاذ الصحفى
لك التحية استاذى و ما تبقى من التواضع فى حضرة علمك على حد تعلمى ... استاذى لك التحية
|
الإبن العزيز إبراهيم
التحايا والود .. تعرف أجمل حاجه ممكن يحس بيها (الأستاذ) هى لمن (تلميذو) يتذكرو ... ده أعظم شعور .. والله أنا سعدت (ايما) سعاده بكلماتك الجميلة التى إن دلت على شئ فإنما تدل على إنو المجهود
العملناهو ما راح ساااكت .. تعرف يا ابراهيم رجعتنى لأيام جميلة (أيام التدريس) طبعن أنا خليتو ليا مده بعد ما(القلب) بقى تعبان وعملت ليا عمليتين (قسطرة) وبقينا ما بنقدر على (الوقوف) والتعب !
الإيميل بتاعى يا أبراهيم ياهو ده [email protected] خلينى أعرف أخبارك .. لك محبتى
|
Post: #17
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:11 PM
Parent: #1
Quote: المشكلة انو النغمة كانت تسجيل صوتي بيقول :
هناك شخص تافه يتصل بك |
الزول ده لكن ما بالغ يا (حمور) ! ما لقى ليهو (أتفه) من (الرنة) دى ! ؟
لك مودتى
|
Post: #18
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:15 PM
Parent: #1
Quote: الأخت سودانية 2000
سلام ....
الاستاذ الفاتح جبرا بتاع مقالب وقال ليك شكرن - بدلا عن الألف - شكرا
والنون نون النسوة( قاموس المقالب ) ..... |
ده يا Ridhaa أسلوب جديد فى (الكتابه) قاعد إتبعو .. قلنا أحسن نكتب (البنسمعو) مافى داعى (للتعقيدات) وتنوين وما تنوين .. يعنى ما مقلب وكده ..!
تحياتى
|
Post: #19
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:18 PM
Parent: #1
Quote: كدى باللاى شوف الكلام ده:
الإيـديـن كلاشـنـكـوف
الحواجـب شايفـة شــوف
والحنـان المالـي الـجـوف
|
إذيك يا أسعد ... وينك يا راجل ؟
أنا ما عارف الأغانى (الميدانية) دى فكرو فيها كيف والله !
مودنى
|
Post: #20
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:29 PM
Parent: #1
Quote: ياخى انت احلى زول فى السودان
|
هشام وينك يا راجل ؟ من ديك وعيك ! (العود) فى إنتظارك وكمان عملنا معاهو (كمنجه) !! خلينا نشوفك
كسرة :
كده يا هشام راجل المرا ح يقوم يحتجا !
|
Post: #21
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:35 PM
Parent: #1
| Quote: والله ظريف جدا يا أخ الفاتح جبرا .. لكن تصدق أنا دخلت البوست لما قريت عنوانه (فنبلة) وقلت الليلة الفاتح الظريف دا ح يكتب شئ عجيب عن فنبلة دي وما قدرت أفهم ماهو المقصود بكلمة (فنبلة) ولما فتحت البوست لقيت الموضوع قنبلة وليس فنبلة وده في حد ذاته منتهى الظرف وخفة الدم إنك تكتب حاجة ما مفهومة بعدين لما تقرأ الموضوع تفهم |
تعرف يا (عمار) والله جات براها كده وما قاصدا ؟ أصلو كنت مساهر ورفعت المقال (وش الفجر) وقمت بدل (أدوس) على (القاف) دستا على (الفا) وطبعن اخونا (بكرى) ما عامل لينا طريقه عشان الزول لو غلت فى عنوان (البوست) يقدر يغيرو !! وكمان شالو بى (ضبانتو) وختاهو فى (العناوين) .. يعنى يا عمار ما (فلاحة) منى ! بتاع (الزلابية) كان أشطر !!
تحياتى وسلامى ليك !
|
Post: #22
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:39 PM
Parent: #1
| Quote: يُخبره أنه قد رُزِقَ طفله الثاني ذكراً |
العزيز الشقلينى
قلت ليا (طفلو التانى) ؟ ياخى أنا هسه (يا دوبك) قبل سنتين تلاته (رزقت) بالتانى !!
مودتى
|
Post: #23
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:41 PM
Parent: #1
| Quote: ومواصل...معاك فى طريق ساخر سبيل |
العزيز إسماعيل
يسعدنى دائماً حضورك الأنيق .. دمت بألف خير
|
Post: #24
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:44 PM
Parent: #1
Quote: الفاتح أخوي
بالغت معاي
|
هى لكن يا أبوجمانة 3310 كان مالو ؟
|
Post: #25
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:49 PM
Parent: #1
Quote: ماأود أن أقوله والله هذه الأغانى الهابطة قددت أذاننا عمدا مع سبق الأصرار والترصد من لجنة المصنفات الفنية .
احياناً كثيرة يقطع تفكيرك وسرحتك صوت أغنية من غير أى مقدمات ولا دخلة موسيقية منبعث من مقاعد الحافلة (الهايس )الخلفية وبعدم إهتمام بمشاعر الركاب وبإهتمام مصطنع من قبل متلقى المكالمة تجده يحملق فى الهاتف حتى تنتهى الضجة مع حرق أعصاب الجميع . يا أصحاب الهواتف الميوزك رفقا بنا .
|
مرة يا أبراهيم واقف مع بتاع الموبايلات بصلح فى موبايلى جاهو واحد سألو قال ليهو :
- ما عندك موبايل بيشتغل (بالرموز كنترول) !!!
|
Post: #26
Title: Re: ساخر سبيل : فنبلة
Author: الفاتح يوسف جبرا
Date: 01-19-2009, 11:54 PM
Parent: #1
Quote: كنت كالأهبل أدور بعيوني وأذني مع الجميع لمعرفة مصدر تلك الأغنية
|
الحبيب عيسى ..
خلى بالك دايمن من (موبايلك) عشان ما تجى يوم الغنماية (تاكلا) !
محبتى
|
Post: #27
Title: Re: ساخر سبيل : فنبلة
Author: الفاتح يوسف جبرا
Date: 01-20-2009, 00:07 AM
Parent: #1
Quote: حبيبنا الفاتح جبرا
كل سنة وأنت طيب
غايتو أجمل قنبلة فى 2009
|
حبيبنا رأفت
وينك إنت يا راجل؟ والله مشتاقين .. تعرف ليا كم يوم كده قاعد إتذكر فى بوستات (الزمن الجميل) .. عادل سمير .. منى خوجلى .. فاروق محمد حامد .. الطيب شيقوق .. و .. و .. ترى هل من عوده هل ؟ !!
خالص معزتى
|
Post: #28
Title: Re: ساخر سبيل : فنبلة
Author: اسعد الريفى
Date: 01-20-2009, 05:38 AM
Parent: #1
| Quote: أنا ما عارف الأغانى (الميدانية) دى فكرو فيها كيف والله ! |
أستاذنا الفانح
الشوق مطر .. رساسو الكلام رصاص
و الراس حساس
و النوم كباس ..
( من اغانى التم تم) !!
|
Post: #29
Title: Re: ساخر سبيل : فنبلة
Author: saif basheer
Date: 01-20-2009, 12:38 PM
Parent: #28
الاستاذ الفاتح جبرا
تحية وتقدير
اتابع باهتمام كتاباتك، سواء كانت هذه السلسلة "ساخر سبيل" أو "سيناريوهات"
كنت في السودان الاسبوع الماضي لفترة بسيطة لظرف عائلي طاريء، والتقيت أحد الأصدقاء ودار حديث عن البلد وما يدور فيها على مختلف الأصعدة، فقلت للصديق إنني أرى ما يدور في البلد عبر "سيناريوهات" الفاتح جبرا.. فكان تعليقه، أنه، يقصد الفاتح جبرا، دون أن يدري يمد "الجماعة ديل" بالافكار!
"قُنبلة" وما شابهها من "بلّه" و"الشمار الجابو منو" والقائمة تطول تعبير عما آل إليه حال الغناء.. أما القطاعات الأخرى فلا توجد كلمات توصفها،،، باختصار، الدمار beyond repair
|
Post: #30
Title: Re: ساخر سبيل : فنبلة
Author: الفاتح يوسف جبرا
Date: 01-20-2009, 08:06 PM
Parent: #1
العزيز سيف
التحايا والود
| Quote: باختصار، الدمار beyond repair |
أنا أتفق معك تماما فالحال أصبح (مائل) لدرجة توقع (السقوط) فى أى لحظة .. ربنا يكضب الشينة ويتولانا برحمتة وليس ذلك على الله بعزيز .. تقبل خالص مودتى
|
Post: #31
Title: Re: ساخر سبيل : فنبلة
Author: اسعد الريفى
Date: 01-20-2009, 08:18 PM
Parent: #1
| Quote: فالحال أصبح (مائل) لدرجة توقع (السقوط) فى أى لحظة |
الكلام قنابل
و الحروف رصاص
و لا ازال مستمسكا بسؤالى اعلاه !
Quote: الإيـديـن كلاشـنـكـوف
الحواجـب شايفـة شــوف
والحنـان المالـي الـجـوف |
و السقوط يا جبرا ما منو خوف
____________________________________________
أنا لا بلادي الحلوه شالتني ولا شالني الجمال
هم الهجير بالاحتشاد والغربه يا وطن الظلال
أبو أمنه حامد
|
Post: #32
Title: Re: ساخر سبيل : فنبلة
Author: الفاتح يوسف جبرا
Date: 01-21-2009, 06:02 AM
Parent: #1
| Quote: و السقوط يا جبرا ما منو خوف |
بينى وبينك ياأسعد ياخوى والله الحكاية بقت تخوف !
|
Post: #33
Title: Re: ساخر سبيل : فنبلة
Author: اسعد الريفى
Date: 01-21-2009, 06:10 AM
Parent: #1
Quote: مالها ياخي القنبله
ما زينه فايتاها الحلا
السلاح في خمسه جي
و الرجول زي آر بي جي
العيون تمشي وتجي
هي بوصله ومتحوله
في لغم لو دار تجي
وسِم يختو السفرجي
وسوط ولا عند عربجي
صواريخنا جاهزه مكمله |
صباح اخير يا أستاذنا الجليل
تعرف الخوف الاكبر انو الكلام الفوق ده .. يكون جزء لا يتجزاء من كلاسيكيات " الشعب الفضل"
|
|