(سيناريوهات) ... إنفـلـونزا الســرور

بينما كان حاج سليمان يضع (صينية) العشاء والمكونة من( صحن الفول) والرغيفة (المدورة) أمامه بعد أن عاد من صلاة العشاء صاحت فيه ( أم العيال) والتي كانت تشاهد أخبار التاسعة التلفزيونية.
- يا أبو محمد .. يا أبو محمد حصل.. أنت ما سامع قالوا( أنفلونزا السرور) وصلت
- يا ولية يا غبيانة دي إسمها (أنفلونزا الطيور)
- طيور شنو يا راجل .. وحات الله سمع أضاني دي قالوا أسمها (أنفلونزا السرور)
حيث أن (حاجة كلتوم) كانت تستمع إلى ذلك الخبر في موجز النشرة فقد ترك (حاج سليمان) الأكل في الصينية وجلس أمام التلفزيون في إنتظار تفاصيل النشرة والتي جاء فيها أن هناك نوعاً جديداً من الأنفلونزا القاتلة التي تصيب الإنسان قد تم رصده في بعض الدول الأوربية وأن من أعراضها السعال والرشح والحمى وأن العلماء قد توصلوا إلى أن معدلات الإصابة ترتفع عندما يتعرض الشخص لأى حالة من حالات الفرح والسرور.
بعد أن أستمع (حاج سليمان) إلى تفاصيل الخبر جيداً التفت إلى (حاجة كلتوم) قائلاً :
- عليك الله أنحنا هسع أنتهينا من( أنفلونزا الطيور) كمان تجينا ( أنفلونزا السرور)..
- (حاجة كلتوم في خوف): هسع يا ابو محمد لو جاتنا؟
- تجينا شنو يا ولية.. أنتي (مطرطشة) والله (السرور) دا مرض ما يجينا ودواء مانلقاهو..
كان هذا الخبر هو حديث الشارع في اليوم التالي:
- هسع أنفلونزا السرور دى البتنقلها برضو(الطيور)؟
- طيور شنو يا (طيره) دي بتجي للزول المبسوط يعني بالعربي كدا للزول السعيد .. الفرحان..
- (فى إرتياح) الحمد لله معنى كذا ما ح تجينا .. خلي (الجماعة) اليشيلو شيلتم على بالطلاق زول (مبسوط) غيرهم ما في..
مع أن الإعلان العالمي عن هذا الوباء لم تمض عليه إلا أيام قلائل وليس هناك ما يدل على أنه سوف يصل إلى (أفريقيا) أو (الشرق الأوسط) إلا أن حكومتنا الرشيدة وكما عودتنا دائماً وفى سبيل حرصهاعلى حياة المواطن قد قامت بتكوين (لجنة عليا) لدرء خطر هذا الوباء على الرغم من أنها تعلم تماماً أن غالبية المواطنين لن يصيبهم الوباء لانعدام البيئة التي يعيش فيها وهي الفرح والسرور(والانبساط)..
على نطاق المواطن العادي وعلى الرغم من قلة بل انعدام لحظات السعادة والفرح التي يعيشها إلا أن خبر إتمال إنتشار ووصول هذا الوباء جعله (يعمل حسابو) فها هي (سعدية) وهي تودع زوجها الذاهب لمقابلة لجنة تعويضات أحداث(الاثنين الأسود) قائلة:
- ما يقولو يدوك جزء من التعويض تقوم تفرح تجيك الأنفلونزا دي وتجيب لينا مصيبة .
أما على نطاق (المواطن المسئول) فها هي (زوجة ) أحد (الولاة) تودعه عند باب الفيلا الحكومية وهو يهم بركوب ( اللاندكروزر) المظللة الفارهة:
- شوف إنت حقو تخلي الإبتسامة الطوالي دي عشان لو (المرض) دا جاك نعرفو !! هسع نعرفو كيف وأنت أيام الله السبعة كلها مبسوط ومبتسم
في خطوة جريئة للحكومة فقد قامت (اللجنة العليا لدرء مخاطر وباء أنفلونزا السرور) وفي محاولة للقضاء على مسببات الوباء (من جذورها) فقد قامت بإبادة جميع أشرطة الكاسيت والفيديو الخاصة بالنكات و(المنلوجات) المضحكة كما تم إيقاف جميع المسرحيات ( الكوميدية) مما جعل العاملين في هذا الحقل من شركات (الإنتاج الفني) يمنون بخسارات كبيرة وفادحة وتبعاً لذلك فقد توقف المواطنين من تماماً عن شراء أشرطة (النكات) أو دخول أو مشاهدة المسرحيات الكوميدية خوفاً من الإصابة بهذا الوباء.
وقد جاء في الأخبار (تحت .. تحت) أن مسئولاً حكومياً يمتلك واحدة من أكبر شركات الانتاج الفني قد مني بخسارة (مليارية) فادحة نسبة لأحجام المواطنين عن شراء تلك المواد وتوقف مبيعات شركته من الأشرطة الكوميدية مما حدا بهذا المسئول إلى (عمل) سهرة كوميدية ( متلفزة على الهواء مباشرة) أستضاف فيها رهطاً من رجال الأعمال والمسئولين الحكوميين وبعض الصحفيين وأعيان البلد وقد قامت الفرق الكوميدية المستضافة بتقديم فواصل من (الاسكتشات) الفكاهية والنكات والمنلوجات التي ضحك معها هذا (الرهط) المستضاف ضحكاً شديداً ( يقطع المصارين) وكان كل مسئول وضيف عند سماع كل نكتة يضحك ويقرقر في نوبات متواصلة حتي (يقع على قفاه).
وبعد أن هدأت نوبات الضحك قليلاً (والجماعة إستغفروا) وقامو (لموا) العمم والشالات والموبايلات ومفاتيح السيارات التي تناثرت على أرضية (الأستديو) من أثر الاستغراق في نوبات الضحك المتواصل و(القرقراب) أتجهت الكامير(close-up ) للمسئول الذى نظم الدعوة لهذه (المسخرة) والذي قال وهو في قمة الأنبساط والسرور والبهجة والانشراح موجهاً حديثه للمواطنين المشاهدين:
- ياجماعة أنحنا الليلة هنا ذي ما شفتو عشان نضحك ونضحك ونضحك ونكون مسرورين ومبسوطين عشان أنتو تعرفوا (بيان بالعمل) أنو مافي حاجة إسمها (أنفلونزا السرور) وأنو ناس (منظمة الصحة العالمية) ديل غبيانين ساكت .. وأهو إنتو شايفين براكم نحنا ضحكنا كلنا لمن الضحك (شرطنا) وما حصل لينا شيء وما ح يحصل (بإذن الله)... (ثم مواصلاً) يا جماعة أرجعوا لحياتكم الكلها ضحك وإنبساط وسرور .
وبعد أن طمأن المسئول (وهو يضحك) المواطنين فى نهاية (المسخرة) قام الفنان (ودالعدنى) وحمل (طنبوره) وإعتلى خشبة المسرح بعد أن قام كالعادة (بتفصيل) أغنية بهذه المناسبة تقول رميتها :
يا مواطن أضحك ضحكـك وخليك مسـرور
البيقولوهو دا إشـاعة ذى إنفـلونزا الطـيور
الأمريكان قاصدننا وما عاوزننا نكون فى حبور
آآى نحن تعبانين .. تعبانيييييين لكن حالنا مسـتور (تتررا رم ترم ترارم ترمتم ترم )
ردود الأفعال :
تفاوتت ردود أفعال المواطنين تجاه تلك (الحلقة) التلفزيونية الضاحكة التي نظمها ذلك المسئول ففئة كبيرة منهم لم تخف شكوكها من أن جميع الحضور فى تلك الحلقة الضاحكة قد تناولوا جرعات التحصين من وباء (أنفلونزا السرور) قبل حضورهم للأستديو ، فهذا (عوض المكانيكي) يخاطب بعض أصدقائه:
- الجماعة ديل من قولة (تيت) غشونا . يغشوا كدة فينا لمتين؟ يكونوا محصنين ..الضحك بتاعهم دا (على بالطلاق) لعبة وداخلها غش .... على بالحرام أنا هسع ليا (تلاتة ووتلاتين) سنة ماضحكت ولا إنبسطت !!!
أما (النسوان) فقد كانت تلك (الحلقة التلفزيزنية الضاحكة) مثار تعليقاتهم النسوية:
- عليكي الله يا سلوى شفتيهم لامن قاعدين يضحكوا (جضومهم) دي كانت بتلمع كيف؟ يكونوا يا ربي بيعملوا (كريمات) ولا ده هواء المكيفات ساكت؟
- وترد سلوى:
- والله (يانعيمة) يعميني أنا ذي لون بشرتم دا أنا ماشفت .. قالوا (الوضوء) يا (نعيمة) يكونو (كضاين)؟
- وضوء شنو (يابت أمي) الوضوء(بشحم)؟ ماشفتي جنس الشحم واللحم دا
بينما وفي مكان آخر كان (حاج عثمان) يسال إبنه الطبيب المتخرج حديثاً:
- أنت يا ولد هسع (الجماعة) القعدوا يضحكو في التلفزيون ديل صحي المرض ما ح يجيهم؟
- والله شوف يا ابوي بما انو المسئول الجاب الجماعة ديل هو ذاتو (طبيب) بيكون عارف انو (الفيروس) دا بيدخل (الجسم) ويصيب (الزول) البيضحك بالجد عشان في هرمونات معينة في الجسم بترتفع مع الضحك.. عشان كده يا أبوي أنا بفتكر إنو (الجماعة) ديل كانوا ما بضحكوا من (قلوبهم) يعني ضحكو ضحك ساكت يعني..
- يعني شنو ضحكو علينا؟؟
- هم يا أبوي قاعدين يضحكوا عليكم من هسع..
على صعيد آخرمن ردود الأفعال فكما عودتنا دائماً ً (هيئة علماء السلطان) بإصدار بياناتها الملتهبة فيما يطرأ من أمور جسام تهم المسلمين كالبيانات الملتهبة التي أصدرتها عندما تم تشريد الآلاف من وظائفهم تحت مسمى الصالح العام والفصل التعسفي والبيانات المندده التى أصدروها عند ( اعدام الزول في حقو) .. فقد بادرت (هيئة علماء السلطان) بإصدار بيان عزت فيه مسألة إعلان البلاد من الدول الموبوءة بمرض أنفلونزا السرور إلى نظرية ( المؤامرة) حيث جاء في البيان أن (الغرب الكافر) يريد من مواطني دولتنا الحضارية أن يكونوا مكشرين ومبوزين وعابسين حتى يتم وصفهم بالتشدد والإرهاب وناشدت الهيئة فى بيانها جميع المسلمين بالضحك وعدم العبوس والتبسم في وجوه بعضهم البعض.
وفى هذا السياق أيضاً فقد جاء على لسان عالم من علماء الدين وهو يوجه حديثه للمواطنين بأن لايقوموا بتناول إي جرعات تحصين ضد (المرض) لأن هذه الجرعات -كما جاء في حديثه- تحتوي على فيروس ( مرض الايدز)وقد قصد منها قطع دابر المسلمين وإهلاكهم وإفشال (المشروع الحضارى) .
أول أصابة:
بعد عدة أيام تناقلت الصحف ووكالات الأنباء حدوث أول اصابة بأنفلونزا السرور في البلاد وعلى عكس ما كان يتوقع المواطنين الذين كانوا يتوقعون أن تنحصر الاصابة بهذا (الوباء) في اوساط المسؤلين و(التابعين) والمروقين إلا ان أول ضحية من ضحايا هذا الوباء قد كان (خواجة) جاء سائحاً للبلاد إلا انه وفي طريقه لمطار الخرطوم مغادراً وقبل وصوله للمطار تمت إصابته بالوباء أما كيف تمت إصابته .. والضحكوا شنوا لمن المرض جاهو..والحصل شنو؟ فهذا ما تجدونه في متن الحوار الذي أجرته أحدى الصحف الاجتماعية مع مرافق (الخواجة) الذى كان يرافقه إلى المطار..
- والله الخواجة دا أنا طلعت بيهو من الفندق وماشين على المطار عشان هو مغادر قمت فى السكة قلت أحسن أحكى ليهو عن (الإسلام) وعن (عظمة مشروعنا الحضارى) إحتمال قلت (الخواجة) دا يقوم (يسلم) ويدخل معانا ونلقى (ثواب) قمت حكيت ليهو عن (كلكم راع) و(لو سرقت فاطمة بنت محمد) و(هلا جلست فى بيت أبيك) و(من نام شبعان وجاره جائع) وعن العدل والمساواة وعن البعد عن الشبهات وعن .. وعن ... المهم ما خليت للخواجه حاجة بس قام (للتكتلو) لمن وصلنا (برى) قال ليا أقيف قدام (العمارة) دى قمت وقفت قام قال ليا :
- ده مش عمارة بتاع مصنع شفاء ضربوا امريكا.
- لا ياخواجة
- طيب عمارة ده وقع عشان شنو؟
- المواصفات والمواد بتاعتو ما كانت تمام يا خواجة .
- سيدو ما كان بيشرف عليهو؟
- سيدو منو يا خواجة ده مبنى حكومي .
- طيب مبنى ده بعد وقع .. مسئول حاكموهو .. غرموهو؟
- لا .. رقوهو
- قلت شنو؟
- رقوهو يا خواجة .
- شنو يعني رقوهو
- يعنى promoted يا خواجة
وهنا أنتابت الخواجة نوبة من الضحك المتواصل استمرت أكثر من نصف ساعة حتى إستلقى على قفاه وبعد كل دقيقة والأخرى كان يردد ضاحكاً Are you sure ?, promoted وبعد ان هدأت قليلاً نوبة الخواجة) الضاحكة سالني:
- ومقاول ده بنا عمارات تاني؟
- أيوة بنى بيت المسئول ذاتو وبيوت مسئولين تانين.
- بيوت الحكومة الساكنين فيهو يعني ؟
- حكومة شنو يا خواجة بيتوهم الخاصة.
- أيه يعنى خاصة ؟
- يعنى Their Private يا خواجه
وأخذ الخواجة في الضحك مرة أخرى وهو يردد على رأس كل دقيقة Promoted and their Private حتى زغللت عيناه واحمر لون وجهه وأخذ يتصبب عرقاً ثم (كضم) فأخذته لأحدى المستوصفات القريبة بشارع المطار وهو شبه مغمى عليه .. وضعته في (النقالة) ريثما يحضر الطبيب للكشف عليه ..وفى هذه الأثناء أفاق قليلاً وهو يسالني :
- بيوت مسئولين وقع ؟
- لا يا خواجة لكن في عشرين عمارة تاني بناهم نفس المقاول واشرف عليهم نفس المسئول عاوزين يقعوا..
- هنا انتابت الخواجة نوبة من الضحك .. وهو يقول ومسئول promoted .. مسئول promoted .... حتى إذا ما جاء دور الطبيب للكشف عليه وجده وقد اسلم الروح وقد جاء في شهادة الوفاة أن أسباب الوفاة هو أصابة المتوفي بنوع نادر من أنفلونزا السرور يسببه (الضحك بالمقارنة مع الإندهاش) !!!

أقعدإنت يا ناذر اضحك ليا كده لمن تلحق (الخواجة) !!!

سلامات يارائع
لو حقيقى المرض ده..
يبقى البوست بتاعك ده بسبب المرض ده برضو
مرح جداً وهادف
تحياتى لك .

Dear Fatih
Brilliant and real
You touched all links and still made us laugh
You will be held accountable if I got the virus
Abdel Moneim Elhoweris

يا الفاتح

سيناريو ( أنفبونزا الطيور ) بخلينا نضحك بعد كثرت الحزن العلمنا البكا( وده ما في صالحك لأنو يصنف تحت بند جرائم ضد الإنسانية ودي حنجي ليها بعدين) .. لكن يفترض تورينا نوع المصل الواقي منو وإلا إنت ذاتك تكون مشترك مع ( الغرب) في ( المؤامرة) وهنا لا بد ومن إقامة حد ( الحرابة) عليك .. شيل شيلتك !! جاك الموت يا تارك البكا!! أما الموضوع القلت ليك نجي ليهو بعدين فهو ممكن يسلبطوا فيك بتقديمك لمحكمة الجزاء الدولية بتهمة جرائم ضد الإنسانية ( إبادة جماعية) .. إنبسط يا عم حتكون مشهور وتتناقل إسمك وكالات الأنباء ولا أو جي سمبسون.. لكن لو حصل خلاف في ولاية دولتك واللآ المحكمة الدولية في أحقية محاكمتك وحاكموك هنا فلا مناص من إقامة حد الحرابة.. فنحن طبعاً حنصنفك شهيد بعدين ما تنسى توصي لينا الورثة بحاجة من صالح الدعا كأبناء السبيل!! والله إنت سعيد في روحك دي .. بختك ماشة معاك زي العسل!!
ابوبكر

Quote: إنت ذاتك تكون مشترك مع ( الغرب) في ( المؤامرة)

(الغرب) حته واحده ...والله يا أبوبكرأنا ما أشترك فى (مسابقة) !!!

Quote: Brilliant and real You touched all links and still made us laugh

OOOOOh Dear Monein , Thank you very much .

Fatih

Quote: سلامات يارائع

شكرا ليكى يا تماضر على الإطراء ده .. وأعملى حسابك ما (تضحكى كتير) عشان ما تلحقى (الخواجة) !!!

أستاذ الفاتح
بصراحة الواحد ضحك لمن وقع والمشكلة الضحك
كان مقرون بالدهشة عشان كده الخوف ياغالي نسرح
طوالي وتكون إنت السبب ونلحق خواجة السجم داك


مودتي بلاحدود

Mr. Alfateh
wounderfull as usual.
my keyboard refuse to write in Arabic. is it infected?

يا استاذ الفاتح حقيقي روعة .. وانـا بيني بينك كااااااااتم الضحكة خوفاً من لحاق (الخواجة) .. لكن كمان خايف الكتمة تلحقني (امات طه) .. عشان كده قلت اخير النضحك واتفشى عشان ما تبقى (ميتة وخراب ديار) ..

Quote: يا مواطن أضحك ضحكـك وخليك مسـرور البيقولوهو دا إشـاعة ذى إنفـلونزا الطـيور الأمريكان قاصدننا وما عاوزننا نكون فى حبور آآى نحن تعبانين .. تعبانيييييين لكن حالنا مسـتور (تتررا رم ترم ترارم ترمتم ترم )

واصلك كان ضحكت كان زعلت مع (الإن ...) حا تمشي الخور

Quote: عليكي الله يا سلوى شفتيهم لامن قاعدين يضحكوا (جضومهم) دي كانت بتلمع كيف؟ يكونوا يا ربي بيعملوا (كريمات) ولا ده هواء المكيفات ساكت؟

لا ده من كترت الوضوءءءءء !!!!


واصل يا جبرااااااا هذا الجمال

العزيز دكتور الفاتح المبدع
انت بالصورة دي حتصيب
كل البورد بانفلونزا السرور دي
بالراحة علينا

استاذ الفاتح الله يجازي محنك ،،،، صدقني ضحكت لحدي ما لحقت الخواجة،،،،

والله يخضر يدك كمان وكمان،،،
تحياتي واحترامتي التي لا تنفذ

احمد بوش

الإخوة الأعزاء :

1- الشيخ إبراهيم الشيخ
2- محمد عمر الفكى
3- أمير عوض الجمرى
4- والى الدين الفكى
5- أحمد بوش

لكم منى خالص التحايا وأصدق الودوشكرا ليكم كتير جدا ووالله تجدونى سعيد جدا بمتابعتكم لما أكتب .. دمتم إخوتى

الاستاذ الفاتح
التحايا كما تجب
علي صفحات السوداني أستمتع بسيناريوهاتك التي تناقش قضايا بحجم الكوارث التي تحدق بنا من كل صوب بالامس القريب أخرجت حكاية بدر الدين الكاملة وقرأتها للمرة الثالثة وقرأتك وأنت تكتبني وجيلي بكامل تفاصيلهم وقضاياهم ومتاعبهم بحثاً عن الوظيفة .
جميل ماتقوم به هنا وهناك فشكراً لك .

سلمت

خضر

الاستاذ الفاتح جبرا...
عمت صباحا..انت بجاي بقيت.....لكن زي ما بيغني جورج وسوف (إتأخرت كتييير)في اضمامك للبورد.
السوداني يوم الجمعة(سيناريوهات)نستمتع بها فعلا...ومرات كثيرة لا نجد السوداني يوم الجمعة في المكتبات
لك التحية وكلماتك تعري الواقع في السودان بكوميديا متناسقة وخيال قابل للتحقيق في كل لحظة...اخرها الخروفي المعافي.

Quote: لك التحية وكلماتك تعري الواقع في السودان بكوميديا متناسقة وخيال قابل للتحقيق في كل لحظة

شكرا ليك كتير على هذا الإطراء الذى لا نستحقه وعلى المتابعة يا (قمر) يا (بوبا) وصدقنى أى شئ بنعملو من أجل (السودان) بنشوفو قليل !! لك خالص ودى ودمت

Quote: وقرأتك وأنت تكتبني وجيلي بكامل تفاصيلهم وقضاياهم

الإبن العزيز خضر

شكرا ليك على الإطراء ثم المتابعة ...جيلكم يا إبنى (ضيعوهو) بعض (أعمامكم) الذين غلبوا مصالحهم (الخاصة) ولم يعملوا من أجلكم وأجل الأجيال القادمة .. إن التاريخ قطعا لن يرحمهم بقدر عدم (رحمتهم) لكم .. عشمنا فى الله سبحانه وتعالى أن يصلح الأمور إنه سميع مجيب ودمت


عمك الفاتح

الفاتح جبرا

سأفتح بلاغ
فقد أصبتنى بالمرض

وازداد الأمر بأنى مصاب بانفلنزا السرور والعظمة ...

ربنا يسر بالك

Quote: سأفتح بلاغ

حضرة الأخ الوجيه معتصم الطاهر
التحايا وخالص الود
ياخ بالله لازم تفتح لينا بلاغ فقدان (للسرور) الذى خرج ولم يعد ده !!
.... هذا مع محبتى