الدوش والاخوة شريف وايام خلت!!!!

من اليمين حافظ عبد الله شريف واقصى اليسار شقيقه محمد عبد الله شريف ويتوسطهما الدوش
والزمن كان مبتسم
والليالى جميلة حالمه
رد الله غربة الاخوة (شريف) ولحافظ بعد ان تماثل تماما للشفاء امنيات بان يرفل ويتوشح ثوبا من العافية قشيب





الصديق وعضو البورد محمد عبد الله الشريف يسجل ويوثق باهتمام فى عملية تسليم وتسلم بين الاجيال ياترى !!ماذا يحمل التسجيل.





الراحل المقيم الدوش وحافظ شريف
وابتسامات عزيزة
وعالمنا راحة وبسمتنا طيبه

اللهم ارحم الدوش
واغفر له ذنوبه..
آمين

لقد تغير شكله كثيرا.. منذ آخر مرة رأيته فيها..
كما انا حزينة عليه
لقد كان استاذا ممتازا
وصديق للكل

فى اوائل العام 2003 كتب الاخ المبدع الرشيد احمد عيسى (ريشو) ولانها كتبت عن محبة معهودة فى الرشيد فله التحية والامنيات
عن الدوش نحكى

وعن الدوش نحكي
الرشيد احمد عيسى

زمان كنا بنشيل الود ندى الود

شوقى ليك طول ..طول ..طول للسماى

والساقيه لسه مدوره

الى الانسان الكونى استاذى الذى قتلته الشفافيه شاعر الاشواق والاحلام وصور الوطن الذى ابى ان يتحقق فى الواقع مات وهو يحلم بسودان عبد الغفار ،مات كما مات مايكوفيسكى يحلم بالغد المشرق الذى يسرقه سياسيو الغفله

استاذى عمر الطيب الدوش

ابو ستــــــنا

وانت ترقد فى قبرك بسلام بعد مشروع بحث مضن فى تحقيق الذات ياخذنا الشوق اليك ونسمع اخر كلماتك (ضلمت )كنت ياستاذى قد استشرفت الظلام الاتى الذى غطى بسواده كل شئ جميل كل الاحلام والامال ،كل التطلعات والاشواق .ان مبدعينا يموتون باحلامهم واشواقهم ..يرحمك الله استاذى الدوش ويسكنك فسيح جناته

سيناريو البدايه

طفله عمرها لايتجاوز العشره اعوام عيونها تشع بالبراءه ،شعرها مجعد انفها دقيق فمها صغير ..وابتسامه تفتح كل نوافذ عالم الطفوله ..جسم نحيل لم يعرف من الغذاء غير العصيده ..ملابسها رثه كانت تضج بالطفوله الغائبه ،احضرتها امها لكى تعمل فى المنازل باجر يومى امهاتتساوى عندها المنازل مايهم هو الاجر حتى تسد رمق اطفالها الجوعى ،دخلت الام وابنتها الى البيت الكنز تركتها امها بعد الاتفاق مع صاحبة البيت لكى تقوم بالنظافه وتركتها صاحبة البيت لزوجها استاذى عمر الدوش وذهبت لعملها ..نظر اليها استاذى الكنز وابتسم سالها عن اسمها قالت له:منى

اتسعت الابتسامه وقال لها :يامنى لعبتى حجله ؟قالت له نعم ..لكن امى مابتخلينى العب مع البنات لانو لازم اشتغل عشان اخوانى ياكلو .نزلت دمعه حرى على خد استاذى وقال وهو يحبس دموعه حتى لاتراها منى :ان الوطن فقد براءته قال لها :بتعرفى علب الصلصه الصغيره ..اجرى جيبى من الشارع اتنين وانا عندى الخيط ..اجرى .ضحكت منى ضحكه تنم عن البراءه وجرت نحو الشارع احضرت بسرعه متناهيه علب الصلصه الفارغه وكان استاذى قد جهز الخيط والمسمار وبدا فى صناعة تلفون العلب وعندما ماكتمل قال لها :نلعب تلفون تلفون .انا قاعد هنا ،وانتى امشى باللفه دى .حملت تلفونها وجرت بفرح غريب سالها خلاص يامنى وصلتى ؟ قالت له :نعم

قال لها خلاص ختى السماعه فى اضانك .آلو منى ازيك انا الدوش .انتى منو؟

وادركت منى لاول مره طفولتها فضحكت ضحكه خجوله وسرعان مانفجرت فى الضحك كان ضحك الفرح الغائب المغتصب .وهكذا كان الدوش يعبر عن الوطن :بتطلعى انتى من صوت طفله وسط اللمه منسيه


الوسط

كان استاذى مستلقيا على سريره فى الحوش يتصفح كتابا .هجره الاحبه والاصدقاء والزملاء الا من صديق هو خير جليس فى الانام .الكتاب الذى لم يفارقه حتى عندما لفظ اخر اهاته .كان يدرك ان ازماته الوجوديه من ملل ومن اخر يفتقد الشفافيه لابديل لها الا الكتاب ..المعرفه التى تمنحه الاستمراريه والديناميكيه .فجاه تقف عربه من صوتها ادرك انها عربه كبيره لايمكن ان تحمله له صديق او قريب واستمر مسلسل المفاجات يرتفع سلم على عمود الكهرباء يتسلق احد العمال وهو يحمل ..زرديه..ويلبس قفازات على يديه ادرك استاذى ان عناصر المؤامره والازمه قد اكتمل .فهو موقوف من المعهد العالى للموسيقى والمسرح والذى يعمل استاذا فيه وكذلك راتبه .والاصدقاء والزملاء الاساتذه كل ينادى على من؟ لادرى .نهض استاذى ضاحكا وقال للعامل :خلاص جيتو تقطعوها والله ماقصرتو معانا امهلتونا لكن والله كنت جاى ادفع وهسه انا حاادفع بس اصرف الموقوف ده ويستمر فى ضحكته الشهيره آآآآآآآآآ.ويسترسل قائلا للعامل:اقوليك لو مصرين عليك الله خلى لى لمبه صغيره واحده اقرا بيها وانشاء الله افك الموقوف ده واجى ادفع ضاحكا هاهاهاهاهاهاهاها.هذا هو الدوش شاعر الوطن العظيم لايحلم بقصر او فيلا او منزل على النمط الكليفورنى كان فقط يحلم بان لا تقطع الكهرباء وان تكون له لمبه صغيره تنير له وتيسر له المعرفه حتى ينير لهذا الشعب حياته ومستقبله ويشبع وجدانه بحب الوطن والتراب


النهــــــــــــــايه

المسرح هو الفن الاكثر ارتباطا باللحمه الحيه من المجتمعات ،هو الانعكاس الاسمى للوجود الانسانى المسرح فعل معرفه وتعرف وادراك وفهم ،المسرح تعبير الانسان الغريزى نحو الفرح ،المسرح فن شعبى جماعى يعبر عن وحدة الوجود البشرى ،المسرح فن يعبر عن اشواق واحلام وتطلعات وامال الشعوب فى الفر ح والحب والسلام

أهم الاسباب التى دفعتنى لكتابه هذا المقال العجالة وان جاء متاخرا واعتقد اننى وغيرى مهما كتبنا عن الدوش لايمكن ان نطول هذه القامه الشامخه او كما قال احد الرائعين الراحلين المقيمين صديقى عبد العزيز العميرى :ياقمر انا مابطولك ..وكيف اطولك ؟ ادينى من نورك وميض عشان اضوى ..ايضا هذه العجاله تكفير عن عقدة زنب لازالت تراودنى كان استاذى بطريقه اخرى عندما نتلاقى يحدقنى بتلك النظره المليئه بالمعانى .لقد خنت استاذى عندما لم انفذ له احد اهم مشاريعه المسرحيه (عبد الغفار)التى كان يعتقد انها اهم مشاريع رؤيته المسرحيه لهذا الوطن وعندما قدمها غيرى على خشبة المسرح القومى لم استطع ان احبس دموعى لاننى ادركت فعلا اننى قد قمت بالخيانه ..لم ارى عبد الغفار الدوش التى بدأنا العمل فيها انا والصديق العزيز يحيى فضل الله بمنزل استاذنا بامبده ،ولكن اختلاف الرؤى الفنيه لايفسد للمسرحيه قوتها وجمالها .استاذى الدوش الذى يحكى عن المسارح فى ذلك المقال الاسبوعى الثر الذى ننتظره فى الملحق الثقافى كان يحلم بمسرحيته عبد الغفار وفق رؤيته التى تحدث لى عنها كثيرا ان عبد الغفار هو حلم الشعب السودانى فى الوحده الاجتماعيه والاستمرار والفرح والحب والسلام كان يحلم باكتمال هذه الرؤيه خاصة ان الوطن يحتاج ولا زال لمسرح يعبر عن هذه الاشواق والامانى خاصه انه فن شعبى جماعى .كان الدوش يحلم بمسرحيه ملحميه يشرك فيها الجمهور لانه المعنى كان يعتقد ان احد اهم خطوط رؤيته للوطن الذى عبر عنه فى قصائده الرائعه ولكنها تكتمل بالمسرح الذى يقوم على الفعل

واخيرا وليس اخرا استاذى وانا اكتب لك هذه الرساله الحكايه التى سيقراها غيرك اكتب تخنقنى العبرات ولا استطيع ان احبث دموعى تتلبثنى او بالاحرى تتغمصنى حالات لاتحصى من المشاعر والذكريات والتفاصيل والحكاوى تجمعنا بك انا واخرين فى اذقة وحوارى امبده ومنازلنا الصغيره التى لا ابواب لها ولانوافذ مفتوحه على فضاء لانهائى يمسع الناس فيه قصائدك وضحكاتك المجلجله

سعاد زعلتنى

شلت قزازتى ومشيت سكرت جد

وكانو معاى واحدين باعو هدومهم فى سوق الاحد

وانا جاى منتشى ..لاقتنى هى

قالت لى تعال

من الفرح كبرت كراعى

نص فى الارض ..ونص فى النعال

واخيرا تلك الفونيما الشهيره ييييييييلا


الرشيد احمد عيسى

-المملكه العربيه السعوديه -الخبر

شكر الاخت بيان على المرور
ورحم الله الراحل المقيم شاعرنا الكبير الدوش

الاخ العزيز
مطر قادم
ياسلام على الشاعر الجميل الثائر عمر الطيب الدوش ,المعلم الانسان ,وعلى ذكراة العطرة
لة الرحمة والمغفرة
ولك الشكر الجزيل

الـذكـرى



سحابات الهموم ياليل
بكن
بين السكات والقول
وباقات النجوم الجن
يعزن فى المطر
فاتن عزاك
رجعن
وشوق رؤياك
زمان مشدودعلى اكتاف خيول
هجعن
وشوق رؤياك
محل يجرى
يلاقى السيل
وسر مدفون بصدر النيل
وكان ما الذكرى مافى أسف
ولو حتى التجنى وقف
وصوت ذكراك رذاذ صفق
على خطوات بنات سجعن
وصوت ذكراك
حنين لى غيبة المجهول
ولو لا الذكرى مافى وصول
وكان ما الذكرى مافى اصول
وغير الذكرى مافى شجن

عمر الدوش

الاخ عمر ادريس محمد
كل التحايا
كل التقدير والشكر على المرور والتعليق المعبر وعلى ايرادك لسحابات الهموم

Quote: وصوت ذكراك حنين لى غيبة المجهول ولو لا الذكرى مافى وصول وكان ما الذكرى مافى اصول وغير الذكرى مافى شجن

Quote: وصوت ذكراك حنين لى غيبة المجهول ولو لا الذكرى مافى وصول وكان ما الذكرى مافى اصول وغير الذكرى مافى شجن

الاخ المسافر
كل التحايا وجزيل الشكر على المرور واقتباسك لمقطع اتفق معك على انه يستحق الاقتباس

اخي مطر قادم
مشكور على النفحات العطرات في حق الراحل المقيم العملاق عمر الطيب الحاج الدوش -
أكاد أجزم أن الصور كانت بمنزله الكائن بامبده الحارة ( تحت شجرة البان التي كان رحمه الله يقضي كل وقته تحت ظلها
اللهم أرحمه وأغفر له ، ولذويه وأهله ومعارفه الصبر وحسن العزاء
الشفيع
الدمام

الاخ العزيز الشفيع
كل التحايا
اولا شكرى الجزيل على تعليقك ومرورك

Quote: أكاد أجزم أن الصور كانت بمنزله الكائن بامبده الحارة ( تحت شجرة البان

الصورة اخذت فى منزل بالخرطوم 2 فى يوم لاينسى وهو يوم ان ضرب مصنع الشفاء وتحياتى

وطن
حأسال عن وطن رايح
وافتش عن بلد سايح
وأسال عن امانينا
الى مابتدينا صوت
صايح
حاسكن كل نخلاتنا
اذا جانا الزمن لافح
وأكتب عن بلد مجروح
وعارف الجارحو
ليه جارح
وأبكى على بلد ممدوح
مامادح
وأحلم بى حلم مسروق
لاهو الليله
لا أمبارح
أعلق فى جناح سفرى
جوابات لى زمن فجرى
حادخل من من درب سرى
لكل مضاجع الاحزان
لكل منابت الاوطان
وأضفر من شجر بلدى
بروقا مارقه من صدرى
حأسال عن بلد غاطس
لحد الليله فى الوجعه
انط فوق سرجى اتحزم
أقوم من وقعه
لى وقعه
وتبقى الفوته هى الرجعه
أخت ايدى البتوجعنى
على السأم البراجعنى
وأسال
ياوطن يابيتنا
ليه شوقك مواجهنى
وليه حبك مجهجهنى
وليه تاريخ زمن خاسر
موكر لسه فى شجنى
حاكتب لى شدر مقطوع
مسادير
يمكن يتحرك
خطابات لى طفل مجدوع
يقوم
يجرى
يقع
يبرك
رساله لكل قمريه
اذا دم الشقا اتوزع
على كل البيوت
ماترك
لكل بنادق العالم
اذا فى طريقه تتمحرك
وأسال عن وطن رايح
وأديكم خبر جارح
بانه جميع جموع الناس
حيفضلو لا كراع لا راس
ونشترى فى الدكاكين يوم
مساحيق من دموع الناس
مسابح من هموم الناس
زهج يتعبا فى الاكياس

الاخ العزيز

مطر قادم

الصورة اعلاة من غلاف كتاب الاستاذ المرحوم عمر الدوش

(ليل المغنيين)

وبكل اسف المعلومات عن حياة وابداع عمر الدوش

شحيحة بصورة محزنة

اتمنى ان يكون هذا البوست بداية للتوثيق

لحياة الاستاذ عمر الدوش الحافلة بالنضال

والعطاء والابداع الصادق الجميل .

لك التحية مجددا

ايها
اللعين وبكامل
التمام (مطر)
كثيرا ما اراك هنا واتحاشاك
لاني عارفك زول فقري ومجنون ومشغول بالحنين

وبكاي جدا
عارفك
وبتبكينا معاك

تقوم تعملها بهذا الشكل
وقسرا تاخدنا اليك
ياخي حرام والله (انا القشه بقصم ظهري حنينا)
ناهيك عن الدوش(له الرحمه) واولاد شريف (صعاليك الحي الغربي)

وحد الشوق بحبك ومضطر اموت واسكن جنبنك ده رغم (مرارتو)

الاخ فيصل عباس
ان الذم والمدح الخاص بين الاصدقاء لايرد عليه.ولكن يافيصل بجيك راجع.

الاخ العزيز عمر ادريس محمد
تحية حاره
اشكرك على تكرار المرور والافادة والاضافة ثم اتفق معك على ضرورة التوثيق والاهتمام بتجربة الشاعر الدوش وهو احد اعمدة الشعر وقاماته المديدة فى بلادنا.وقد كتب عنه الكثيرون ومازالت الحاجة الى عمل شامل عنه فى متناول الجميع . واليك رابط به قصائد للدوش ولك تحياتى مجددا
http://www.geocities.com/alneel_s/aldoosh.htm

الدوش وحديث الذكريات
=============
سحابات الهموم يا ليل

بَكَن

بين السُكات والقول


شجون الدوش خير من ترجمها الراحل مصطفى سيد احمد حزنا لفراق أخته مريم
وهاهو الدوش يلحق مركب الوداع مخلفا من ورائه دررا لن يبخسها التاريخ:

الوُّد
زمان كُنّا بنَشيل الوُّد

ونَدِّى الوُّد

وفى عينينا كان يكْبَر

حناناً زاد

وفات الحدَ
===============
الحزن القديم

ولا الحزن القديم

إنتِ

ولا لون الفرح

إنتِ
'''
بتَطْلَعى إنتِ من صوت طِفلَهْ

وسط اللمَّهْ منْسيَّهْ
================

الســـــــــــاقية
الساقيَهْ لسَّهْ مدوِّرَهْ

وأحمد ورا التيران يَخُب

أسيان يفكّر مُنْغَلِب
'''

فى اللّى ما شين المدارس

فى المصاريف

فى الكُتُب

في اللّى ضاق عنُّو المكان

وهسَّه سافَر

واغتَرب

لِمُدُن بعيدَهْ تنوم وتصْحى
===================
محمد ود حنينة

وركزْتَ

شان البِتْ سُعاد
'''
ضمّيت قزازتى مرقتَ عِن طَرَف البلد

وسِكرْت جَدْ

وأنا جايىّ راجعِ مُنْتَهى لاقتْنى هِى

قالت "تعال"

كِبْرَتْ كُراعى من الفرح

نُص فى الأرِض نُص فى النِّعال

اتْلخْبَط الشوق بالزَّعل

اتْحَاوروا الخوف والكلام

'''
وأنا يا سعاد وكتين أشوفِك ببقى زول

فَرَشولوا فَرْش الموت وعاش
'''
====================

ويتبقى الحديث عن الأخوين شريف...
حمد لله على سلا مة الأستاذ حافظ 'باشا'
وإ رجوا أن يكون بخير وفى أحسن الأحوال.

أماصاحب المواقف الأنسانية الصحفى والمحامى محمد
أتمنى أن ينشر تفاصيل هذا القاءالنادر خاصة
وإنه قد يكون آخر تسجيل للراحل الدوش.

وأخيرا وليس آخرا
لك التحية يا أستاذ مطر

الاستاذةNajat Al-Bashir
كل التحايا
لقد اضفت الكثير لهذا البوست عن الشاعر الراحل المقيم الدوش وقدمت نماذج نالت اعجاب الكثيرين ولايفوتنى ان احيى معك الاخ الباشا شريف وامنياتنا له بدوام الصحة وايضا للاخ والصديق الاستاذ محمد وهو يخطو نحو الشموخ فى البرارى القصية.وهما ربطتهما اكثر من علاقة ووشيجة بالراحل
ولايسعنى الا ان اشكرك جزيل الشكر على مداخلتك القيمة لاثراء البوست

Quote: أماصاحب المواقف الأنسانية الصحفى والمحامى محمد أتمنى أن ينشر تفاصيل هذا القاءالنادر خاصة وإنه قد يكون آخر تسجيل للراحل الدوش.

واتفق معك بان ياتينا محمد بالتسجيل ان توفر له ومجددا خالص التحايا

فوق للدوش ولنا جميعا سوف اتي اليك ليلا يا مطر تسلم

الاخ مطر
رحم الله استاذنا الكبير عمر الطيب..
وسلامات.. اولاد العم عبدالله شريف..
لكن المحير و(مابتحير الا مغير) هو صورتك ..
اخذتها سنة كم؟؟
فى السبعينات...صاح
مودتى وتقديرى

Quote: الاخ مطر رحم الله استاذنا الكبير عمر الطيب.. وسلامات.. اولاد العم عبدالله شريف.. لكن المحير و(مابتحير الا مغير) هو صورتك .. اخذتها سنة كم؟؟ فى السبعينات...صاح مودتى وتقديرى

كل التحايا
فى مداخلتك تسال عن السنة التى اخذت فيها الصورة وفى نفس الوقت قدمت اجابة محتملة حسب تقديرك فى السبعينات.وهى ليست فى السبعينات وعموما هى فى الايام الخوالى ولا اقدم لك اجابة قاطعة واتركك فى حيرتك واحتمالاتك وهما الاحتمال والاحتمال المكمل كما يقول اهل الرياضيات مع شكرى الجزيل لحضورك وملاحظاتك.

الاخ صبرى الشريف
كل التحايا
اجزل الشكر على مرورك ذو المعانى العراض.

مـــطر


تجـيني .........ويجيني معــــاك زمـن

امـتع نفســــي بالدهشــــــــه

Quote: تجـيني .........ويجيني معــــاك زمـن امـتع نفســــي بالدهشــــــــه

]

رحم الله شاعرنا الكبير الدوش ..
والتحية للاخوة شريف ..


ولك الزول الجميل مطر قادم ..
بنسأل عليك كتير ..
والشوق كميات ..

بجيك تاني ..

الاخ معتصم دفع الله
كل التحايا
ومنذ مغادرتك لنا مازالت تلك الايام حاضرة ومتقدة وخالدة وبعض الناس تلتقى بهم لقاءا عابرا فيترك مالا يمحى ولا ينسى من الاثر.
فشكرا لحضورك الينا ولحضورك لهذا البوست وكل الاشواق وسنلتقى.

التحية لصاحب المقال المصاحب المبدع القدير الرشيد احمد عيسى

الاخ العزيز

مطر قادم

لن انسى ماحييت هذه القصيدة التى وصفها بحق المرحوم الاستاذ سليمان هباش صديق الشاعر عمر الدوش باجمل كنوز الشعر السودانى ...واذكر اننى سمعتها منة فى منزل الصديق عمر العالم بالثورة الحارة السابعة .

وعليك الله أتامل معاى


سؤال ؟

جيت اسالك
ياطفلة الالم الرضيع
تدينى خاطرك شان اضيع
فى شوق موزع فى الزحام
ياعذاب الريح للخيام
ياصهيل كسر اللجام
ياختم قبل البدايه
ويابدايه بدون ختام

جيت اسالك مين علمك
انو الزمن فى مره ناقص
ومره تام

جيت اسالك
الشوق مكتف فى الطريق
والخوف مداخل للفريق
جيت اسالك مين علمك
لغة الزهور
مين علمك غضب الحريق
وانت باحه
وانت واحه
وانت ذاتك سكة الزول للمضيق
فارده السواعد
للزوابع والمطر
للهم يولول للشجر
عايز اسالك
مين
علمك
لم السلامه مع الخطر

لك التحيه .. ولعمر للدوش الخلود

الاخ عمر ادريس
كل التحايا
فهى بلا شك احد تجليات الدوش الكبرى

Quote: جيت اسالك ياطفلة الالم الرضيع تدينى خاطرك شان اضيع فى شوق موزع فى الزحام ياعذاب الريح للخيام ياصهيل كسر اللجام ياختم قبل البدايه ويابدايه بدون ختام

ارجو ان تبقى معى هنا لتاتينى ببعض مما لديك من درر الدوش التى لم تلقى حظها فى النشر لاسباب كثيرة هذا مع شكرى الجزيل.

ضلمت
أقـــول

والشمْسِ في عِزّ الامل

تُهْتَ ومشيتْ

أقول يا نحن يا انتو و

بكيتْ

يا مواعيد

يا صباح من غير وسِم

تُهْتَ ومشيت

ما ضَلّمَتْ

ما بْتَعْرِف الزول البِجِيك

ولا البِجيكَ

بيعْرِفَك

حتى الشبابيك

والزوايا الكان بِتَجْمَع

في حنايا الشكوك



ضلّمتْ

أغْشاكِ يا نفسي الغريبَهْ

من همومي اطلِّعِك

القاكِ واقْفَهْ على الطريق

أحزان بِتفْرح

وتشْتبِك

أفراح بِتحْزَن

وترْتَبِك

لمّنْ رحلتَ مع الغُنا

عِز الأماني و

ضلّمـــــت

مَدّيتْ على الأمل القريب

أشواق كتيرَه و

قَصّرَتْ

في زاويهْ من ضُل الشجون

جابتْ ظُنونا و

قيّلَتْ

كلّمتَ أشجار الخريف

عن شوق نَمَا

في الوحشَهْ والزمن الأسيف

دلّتني اْفتِّش

في المغارِب

والمشارِق

عَن علامات

أو رصيف

ترقُد الأزهار عليهو

يا بنفسج

كُحْلي غالي

وبُتقالي

امشوا انتو

أنا البقِيف

ما ضلّمَـــتْ

فوووووق

الاخ عمر ادريس محمد
كل التحايا
ارجو اضافة مايتوفر عندك من قصائد للشاعر بخلاف الوارده فى ديوان ليل المغنيين هذا مع شكرى الجزيل.

الـــــــــــــود



أعيشهْا معاكَ لو تعْرف

دموع البهجَهْ والأفراح

أعيشهْا معاكَ واتأسّف

على الماضى اللّى ولَّىَ وراح

على الفُرْقَهْ الزمان طويل

على الصبر الّى عِشْنَاهو

مع طُول الألم والليل

زمان كُنّا بنَشيل الوُّد

ونَدِّى الوُّد

وفى عينينا كان يكْبَر

حناناً زاد

وفات الحدَ

زمان ما عِشْنَا فى غُرْبَهْ

ولا قاسينا نِتْوحّد

وهسَّع

رُحْنا نتْوجّع

نعيش بالحسرَهْ نتأسّف

على الماضى اللِّي ما بِرْجَع

أحبَّك

لا الزمن حوّلْنى عن حُبّك

ولا الحسرَهْ

وخوفى عليكَ يمْنَعْنى

وطول الإلفَهْ والعُشْرَهْ

وشوقى الليك من طوَّل

لسّه معاي

ولى بُكْرَهْ

لسة معاى

الاخ

مطر

معزرة يا اخى.. حاولت انزل "الود" بالموسيقى وصوت الفنان وردى...بس حصلت عندى مشكلة فنية, وقلت بدل امشى ساكت اخير انزلها مكتوبة .

اكرر الاعتزار

وتحياتى

Quote: معزرة يا اخى.. حاولت انزل "الود" بالموسيقى وصوت الفنان وردى...بس حصلت عندى مشكلة فنية, وقلت بدل امشى ساكت اخير انزلها مكتوبة

الاخ عمر كما ترى انزلت اغنية الود وشكرا لذوقك الجميل مع تحياتى

رحم الله المعلم العظيم عمر الطيب الدوش.
..
..
الدوش لديه مجد ادبي,حينما اراه,يطيف ماركيز وكافكا.
الدوش معشعش فينا جوه هناك.
..
تحيه من القلب عزيزنا مطر

الاخ محمد بهنس
كل التحايا
مازلت احفظ مقاطع لك وارددها فى المناسبات مثل (اهديك ولاشئ) واهديك شكرى

Quote: الدوش لديه مجد ادبي,حينما اراه,يطيف ماركيز وكافكا. الدوش معشعش فينا جوه هناك. ..