Post: #1
Title: كلكم .. يسمكم !!
Author: عصام دهب
Date: 09-11-2005, 12:07 PM
Parent: #0
تنبيه :
هذا العنوان ليس له أي علاقة بما يدور في هذا المنبر و بعض المنابر الأخرى من تحرشات و مناوشات و مطاعنات و تكتلات .. و أطلع معاي الخور ..
تنبيه تاني :
و هذا المقال ليس له أي علاقة بأحداث سبتمبر و غزوة أيه مش عارف ..
و بعدا كدا
هو مقطع من أغنية يقول السميعة عنها أنها هابطة .. و أنا شخصياً أحب الإستماع لمثل هذه الأغاني خاصة عندما أكون محبطاً ..
إحباطي شيئ عام لكنه حتماً يخصني .. أنا ما فاهم أنا قاصد شنو .. لكن أتمنى أن تكون وصلت ..
تقول الفنانة حفظها الله ..
دايرها .. دايرها .. كلكم .. يسمكم ..
أنا لا أفهم ما تعنيه بالضبط لكننني متكيف و أردد وراها بهبالة ..
يسمكم ..
زميلي السعودي ( عمرو ) يقتحم علي خلوتي و أنا أتمعن في عناوين المنبر اليوم متجهماً فيداعبني بقوله ( و الله شكلك اليوم .. يبغالك شكشكة ) ..
و حتى لا تسيئوا الظن أوضح أن الشكشكة عند السعوديين تعني الحفلات الشبابية الراقصة على وقع الأغاني الشعبية أو الأغاني التي يسمونها هابطة .. ليس أكثر ..
و هي تمثل متنفساً لكثير من حالات الإحباط ..
إن لم تسعفني فنانتي الصاعدة بأغنياتها الهابطة ..
فحتماً سأبحث عن شكشكة ..
و إن فشلت ..
فيا حبذا الليمون من علاج ..
|
Post: #2
Title: Re: كلكم .. يسمكم !!
Author: magdi elmahi
Date: 09-11-2005, 01:07 PM
Parent: #1
عصام دهب
حمدالله على الطلة
وان شاء الله فضيت لينا
وتمرق تتلفت زى الفرع الشارد
من غصناتو
وزى الليل يهيم يرجع بدون عشاق
هلا تنفست الهدوء الساكن جواك
واديتنا من زمنك شوية
نحن عارفنوا غالى
لكن مابيغلا على الناس الشربت من ساحاتوا
عشق ودموع وسكينة
مدخل صغير
حيدر حنين بيسلم عليك
بلقاه دائماً فى بوستاتى
فهو كما عهدناه ذو حضور متميز
لك عبق التحايا
مجدى الماحى
|
Post: #3
Title: Re: كلكم .. يسمكم !!
Author: نادية عثمان
Date: 09-11-2005, 05:27 PM
Parent: #2
عصام ..سلام
ممكن طلب يعنى ؟!!
ايوة صاح
عايزاك تنزل لينا الاغنية ولنك الحفظ وبعدين نشوف ..
سمح ؟!!
|
Post: #5
Title: Re: كلكم .. يسمكم !!
Author: عصام دهب
Date: 09-12-2005, 02:38 AM
Parent: #3
أ . نادية .. سلام كتير
زماان في البوست بتاعك داك كنت قلت ليك أنا بحب الحاجات دي ..
يعني معاك في التنظيم ..
و هسع قدرت أقنع أهم زول ينضم للتنظيم ..
أهو كل الناس بتكبر كيمانها ..
لما انا و يارا نختلي في العربية مع ( منى كلدم ) ـ و بالمناسبة منى دي أكتشاف فظييييع ـ يارا تنفعل مع دلوكة منى و تجلياتها و تصيح ببراءة ( بابا .. حِتي .. حِتي )و رغبة مني في الحت الصحي صحي كثيراً ماأتمنى لو أنني وقفت العربية في أقرب ركن ونزلت حتيتو كلو في شارع الله أكبر عشان أنفس على الأقل شوية من إحباطات البورد دا.
بمناسبة الطلب..
تعرفي يا أستاذة بصراحة أنا معرفتي بتقنيات الأنترنت زي معرفة كتير من المتناطحين بأبسط قواعد الإختلاف .
لكن رغم كدا حأحاول أستعين بصديق عشان تسمعي الكلام المفيد ..
حبيتو بي حسن نية ... آآآي ... أأأيا
سحرني بي جاذبية ... آآآي ... أأأيا
بروحو العاطفية ... آآآي ... أأأيا
لو كتر القول عليّ
بشيلو فوق عينيّ
... آآآي ... أأأيا
و كلكم ..
دايرها .. عايزها ..
يسمكم ..
شفتي كيف ؟؟
أوعدك أن أفعل ما بوسعي لتلبية طلبك ..
سمح ؟!!
|
Post: #6
Title: Re: كلكم .. يسمكم !!
Author: waleedi399
Date: 09-12-2005, 03:20 AM
Parent: #3
عصام دهب،، Quote: فحتماً سأبحث عن شكشكة ..
و إن فشلت ..
فيا حبذا الليمون من علاج .. |
علاقة الليمون بالشكشكه شنو يا عصام ..
نعل ما تكــون بطـنك طامـه 
|
Post: #4
Title: Re: كلكم .. يسمكم !!
Author: عصام دهب
Date: 09-12-2005, 02:01 AM
Parent: #2
أخي و زمييلي باشمهندس / مجدي
ياسيدي .. مرحبابك في بوستك
أنا عارف نفسي متلوم معاك بالحيل ..
و مع ناس كتارين تاني ..
و أظنك عارف !!
و العشم فيك أن تعذرني ..
جاءت حالة الإحباط هذه
مقرونة مع كثرة المشاغل
التي تعلمها يا صديقي ..
فلم يكن من مفر سوى أن أحاول تجاوزها
بالهبوط إلى أعلى ..
أو الصعود إلى أسفل ..
و الحال من بعضه ..
يا مجدي ..
مراحب ألوف ..
و لك عودة بمزاااج ..
سلامي للجدع حيدر
و لأجدع الناس حداك
|
Post: #7
Title: Re: كلكم .. يسمكم !!
Author: نادية عثمان
Date: 09-12-2005, 07:38 AM
Parent: #4
سمح ياعصام
والحقيقة بينى وبينك لابد من الحت كما قالت يارا الحلوة فى بعض الاحيان!!
فالحت متنفس جيد وسريع المفعول باسرع من الليمون!!
|
Post: #8
Title: Re: كلكم .. يسمكم !!
Author: عصام دهب
Date: 09-13-2005, 02:22 AM
Parent: #7
الأخ / وليد
تحياتي
قلت :| Quote: علاقة الليمون بالشكشكه شنو يا عصام .. |
و أقول بكل
علاقة الليمون بالشكشكة زي علاقة الشكشة بالليمون
دا الأنا فاهمو ..
و فاهم أكتر إنهم الإتنين ممكن يكونوا علاج للطمام و الإحباط .. أجارك الله ..
لك تحياتي ..
|
Post: #9
Title: Re: كلكم .. يسمكم !!
Author: Tabaldina
Date: 09-13-2005, 07:46 AM
Parent: #1
..
.
سلام يا ابو يارا ،،،
تنفع برتكانة !!؟؟
تحياتي ،،، وللصغار
|
Post: #10
Title: Re: كلكم .. يسمكم !!
Author: عصام دهب
Date: 09-13-2005, 09:06 AM
Parent: #9
سنيري / صالح ..
تنفع .. برتقالة .. تفاحة ..
( سويلي مس كول ) ..
أي حاجة تفتح النفس ..
إن شاء الله نبق ..
|
|