بالدارجية على خطى شكسبير

ابتدع شكسبير ما يعرف بالـ oxymoron's وتعني تكوين معنى ثالث من جمع كلمتين متضادتين في المعنى: مثلاً (والأمثلة ليست لشكسبير):
Act naturally

Found missing

Resident alien

Advanced BASIC

Genuine imitation

Airline Food

Good grief
طيب هل في دارجتنا السودانية ما يقابل هذا؟

في ذهني أمثلة قليلة أرجو أن يسهم هذا البوست تكثيرها
مثل:
ــــــــــ قام قعد

و
ـــــ بتكلم ساكت

و
ـــــ تقريباً بالضبط كدة

و
ــــ لقيتو مافي

كنت يا دكتور في حضرة سائق تاكسي بالخرطوم متجهين الي المطار
وكان وقتها الحديث عن الاحداث الاخيره وسقوط طائرة جون قرنق
وسألتو هل تظن ان ثمة مؤامرة ما في الامر ...وكان سؤالي بنفس الصيغة

قال لي

أكيد يمكن يكون صاح...ما بستبعد كلو كلو...وقبل ما يسترسل
كنا قد وصلنا بوابة صالة المغادره...

والثانية

اهلنا بقول

قمت رحت جيت ليك جنب اول مطعم


والكلمات الزي دي كتيييره عندنا بجيك صاد

العزيز نزار حسين

Quote: أكيد يمكن يكون صاح...ما بستبعد كلو كلو

وما يحيرني أكثر أن البعض يقول لك:
يعني أنا زي متأكد إنو....
هناك نوع من البشر لا يريد أن يقطع بشيء أصلاً، ودائماً يقف في الوسط.
بالمناسبة شايفك مع الأخ بدر الدين حلا ذكرت Pretty good
وطبعاً pretty ugly بمكن إضافتها لقائمة شكسبير والحمد لله لا أعرف لها مقابلاً عندنا
كذلك أحد الظرفاء اقترح إضافة military Intelligence لقائمة شكسبير، طبعاً مع الاعتذار لعساكر البورد إن كان في البورد عساكر.
لك تحيتي وودي.

والله يا دكتور موضوع البوست تمام لكن هسه ما بتذكر
الســـودان دا البــلد الوحيـد البكون الطفل فيهو بيبكي ويدوقوا عشان يسكت

بجيك راجع

اضيف معاك يا دكتور

Criminal Justice
Dead-born

العزيز إبرهيم عدلان

Quote: الســـودان دا البــلد الوحيـد البكون الطفل فيهو بيبكي ويدوقوا عشان يسكت

يبدو أنه ليس الأطفال السودان وحدهم.
كان عندنا جهاز فيه صمام يوصل غاز النيتروجين لطلمبة ويعطي قراءة لكيمة النيتروجين الداخلة عبر مؤشر، مرات كثيرة عندما تحاول تغلق الصمام كانت النتيجة إنو الصمام يتحرك (في الفاضي) وضغط الغاز لا يتغير، وكان الحل لهذه المشكلة هو أن تفتح الصمام لنهايته وتتحمل صوت الطلمبة المزعج لثواني بعدها يعود الصمام للعمل ويمكن إغلاقه. ألم أقل لك ليس الأطفال وحدهم.
كذلك لأول مرة أنتبه إلى أن تيبيكال هي طبق الأصل. لك شكري وتقديري.

up side down
say no more
make no mistake
كلمات عربية انجليزية

طبق الأصل

و

typical


نقاش

و
negotiation

تفضل يا دكتور ..
حلو مر ..
دي يقابلها شنو عند غيرنا ..
و ..
لدينا في الشركة مستشار لبناني و سمعت منه عبارة بالدارجة اللبناني و هي :

كتير إلييل
و تعني ( قليل جداً ) ..

فلسنا وحدنا ..
و بمناسبة وحدنا دي ..
لماذا نجمع : الواحد و نقول : واحدين ..
كقول المادح :
( واحدين زهاد واحدين عباد .. واحدين صايمين تاركين الزاد ) ؟؟
تحياتي لك

سلام يا دكتور .. جيت لقيتك مافى

روح انتظر هناك...او امشي انتظر هناك...او روح استنّانيّ هناك

او امشي اقيف هناك...في الصف داااااااااااااااااك

جاء رجع في كلامو....

العزيز نزار حسين
شكراً على الإضافة القيمة

Quote: روح انتظر هناك

ذكرتني بعض العرب الواحد منهم يقول ليك: تعال فوت أو فوت أدخل

علي الحلاوي:
مرحبا بك ومشكور على الجية، والمرة الجاية أكيد امكن تلقاني
لك شكري وتقديري

العزيز عصام دهب
حلومر مشروب جميل واسم غريب ولا أراه ينطبق على (الآبري الأحمر) لأنه حلو وليس مراً على الإطلاق
أما لماذا نجمع : الواحد و نقول : واحدين ..
أظنه قياساً على جمع المذكر السالم في حالة النصب :واحدين، رغم أنها في موضع رفع.
في دارجيتنا نوع عجيب من الجمع أسماه أحد زملائنا في الابتدائي (جمع تفجيخ) مثل دكان عندما تجمع في لهجة الـ (مرقنبو قرنبو) على دككّن

الليلة الصباح




سكت ساكت


و ده ممكن نسمية توكيد لفظي مؤكد للفعل وهو السكوت


هذا والله اعلم

اخي دكتور نزار
السلام عليكم ورحمة الله وبركاته

مساهمتك هذه من الطرافة بمكان ومن الأهمية كذلك ، حيث تقربنا اكثر من فهم كيمياء العقل السوداني العفوي
ثم دعني اضيف ..

من الشائع في كلامنا ان نقول مثلا:

فلان وصل الليلة الصباح !! أو حا يجي باكر بالليل !!
أو داير تخليني ؟!!
او خليها معاك !
أو احتمال 100% يقوم يموت براو

غير أنه مما أدهشني يوما قصة رواها لي صديق عن صديق له ، لا اعرفه، قال ان مما درج عليه القول مثلا:

يا فلان زولك دا ما قال ما جاي .. وينو؟!!
مثل ذلك كثير وسأعود
________________
رب اشرح لي صدري

هـاك يا نزار دى برضـو:

محمـد عبد القادر سبيل فى المنبـر!




الف حمـد الله على سلامـة الوصـول يا محمــد.. ليك وحشــة.

سلامات يا نزار

مساء أمس؛ و في ختام ندوة بقاعة الشارقة عن الأثر السلبي
لمحطات التوليد الكهربائي داخل المناطق السكنية؛ تحدث السيد
التيجاني آدم الطاهر وزير البيئة و التنمية العمرانية المكلف؛
فقال ضمن ما قال:

بُعد نظرنا كان قصير!

العزيز ملاسي:
تعرف الناس ديل 3 أصناف:
واحدين بعد نظرهم كان قصير.
وواحدين قصر أملهم كان طويل.
واحدين صايمين تاركين الزاد. من بتين؟ يا مولاي!

العزيز/ د. نزار .. لك التحية وعاطر المودة
لدينا زميل يمني في العمل، دائم المزاح معنا، نحن السودانيين،
وكان ممن يبحث عن مثل ما ذكرت وذكر الإخوة المتداخلين في هذا
البوست ويقول لنا مرة: أول مرة الواحد يشوف زول قاعد نايم
يعني كأن يقول: الزول ده قاعد ينوم كتير..
أو أول مرة أشوف زول بتكلم وهو ساكت .. كما ذكر أعلاه
وفي فترة من الفترات كانت هنالك لغة خاصة بالمثقفاتية كما يحلو
للكثيرين تسميتهم، على سبيل المثال:
كنا مع واحد صاحبنا طوال اليوم، عشان أبوه زي قام مات كده !!

مع خالص الود

الخال الحبيب صلاح درار
لك وللأسرة أعطر التحية وأصدق الود

Quote: الزول ده قاعد ينوم كتير

والله اليمني معاه حق، مافي داعي يقعد وهو نائم، يعني لو رقد بحصل شنو؟ وزي ما قال الشاعر:
قل لمن عاب على زول قعد *** نائماً ماضرّ لو كان رقد
واقترح تعديل العبارة: الزول ده راقد ينوم كتير
لك شكري وتقديري.

دعني انتبه هنا الى ان ثمة مفردات نالت صفة وظيفتها وفقدت صفة أصيلة اخرى ولكنها نابعة من عكس الوظيفة الأولى
مثل مفتاح مثلا
فلماذا لا نقول مغلاق طالما انه يغلق بمثلما يفتح
هل نسميه مفتاحا لأهمية الفتح التي تعلو على اهمية الاغلاق عموما؟
فالباب الموصد والصندوق المغلق يعد مشكلة أكبر من الباب المشرع نهائيا،ولذلك اكتفينا بأن اطلقنا عليه صفة الاسم الدال على صفة الفتح وحدها
( طوبى لمن جعله الله مفتاحا للخير مغلاقا للشر )
ولكن هنالك ( القفل / الطبلة التي لها مفتاحها) فهل الكالون هو كذلك ( قفل ) بينما المفتاح مفتاح؟
ربما ..
ولكن لماذا نكتفي بتسمية ( المصعد ) مصعدا ولا نسميه مهبطاً ( بكسر الميم) رغم انه يستخدم في الصعود وعكسه؟ لماذا لا نعمد الى الاتيان بصيغة توفيقية كالتي تقترح يا دكتور نزار في بداية البوست: أقصد المزج بين الصفة وضدها كأن نقول: المفلاق مازجين مفتاح ومغلاق معا !!
أم اننا نكتفي ب ( مفتاح) لتقدم اهمية الفتح كما قلنا وب(مصعد) لأن الصعود اشد صعوبة من الهبوط وبالتالي فان اهمية هذه الآلة تكمن في امكان صعودها بنا أكثر من كونها وسيلة هبوط من ناطحات السحاب؟
وهكذا الطائرة وغيرها
*******************
ثم..
اخي ابو الريش

Quote: الف حمـد الله على سلامـة الوصـول يا محمــد.. ليك وحشــة.

انت رجل عزيز علينا والله
_______________
رب اشرح لي صدري

الأخ أبو الريش
مرحباً بك
وأبقى لا جوّه:
واسمح لي أن أشرح العبارة أعلاه لغير السودانيين: العبارة ترجمتها الحرفية هي إبق إلى الداخل: وابقى هناليست بمعنى البقاء في مكانك بل بمعنى ادخل تفضل!

العزيز محمد عبد القادر سبيل
مرحباً بك، وشكراً على إثراء موضوع البوست.
والعجيب أنك قد تسمع اثنين يتكلمان:
الأول: يا أخي أنا الصباح مريت عليك في البيت؟
الثاني: أها، إن شاء الله لقيتني!
طبعا التاني ده بيكون زهجان من الأول جداً

العزيز ياسر محمد عثمان
مرحبابك.
الليلة الصباح ، قمت قعدت قدام الكومبيوتر ، رحت مشيت على المنبر الحر، لقيتك مافي!
استخرج ما له صلة بموضوع البوست من الكلمات أعلاه؟
هل (المنبر الحر) تصلح أن تضاف للقائمة؟
لك شكري وتقديري

العزيز دكتور / نزار ..
تحياتي لك مجدداً ..
و حقيقة بوست كتيير مهضوم ..
و في ذات سياقه ..
لدي ملاحظة حول إستخدامنا العفوي لبعض العبارات في حالة الإرتباك .. و على سبيل المثال كنت قبل يومين في المحكمة وقابلت ( زول ) ملخووم جداً و الظاهر أنه أراد أن يجري مكالمة مهمة وفؤجئ بأن رصيده منتهي و لم يكن أمام كابينة هاتف .. و حين رآني جاء مسرعاً و بذات سرعته قال لي ( لو سمحت ياخي رصيدك فيهو جوال ؟؟ ) وصراحة ضحكت و ضحك هو معي مبرراً إنزعاجه بأنه أول مرة يدخل محكمة في حياته .. و صارت بينا معرفة !!
و كحالة شبيهة بالأولى مثل حالة ( كرتة و شنطونتين ) فقد حكى لي أحد أصدقائي أنه و قبل تيسر وسائل الإتصال الهاتفي كان أغلب الناس هنا يستخدم كبائن الإتصال بالعملات المعدنية ( الهلل ) و مرة كان يحادث أسرته و طلب منهم تزويده برقم حساب مصرفي و أثناء بحثهم عن الرقم شعر أن رصيده يشارف على الإنتهاء فأنزعج و صاح في محدثه ( ياخي سرعة الخلص حيهلِل ) و كان يقصد الهلل حيخلِص .

فما رأيكم ..

سلام أخى د. نزار

هل يمكن أن نطلق كلمة السميح مع تشديد السين وكسرها على كلمة pretty ugly

و كلمة وأبقى لا جوّه بكلمة فوت يا زلمى الفلسطينية والتى تعنى عندنا أمشى أو روح

والسلام

أخي صلاح دهب
السلام عليكم ورحمة الله وبركاته

يقال ان الانقاذ في فترة منتصف التسعينات بلغت مبلغا من الصلف من تشديد القبضة ، وكان المرحوم ابراهيم شمس الدين ، قد طارت شهرته في الآفاق آنئذ، وظنه الناس صدام السودان المقبل ، حيث بدا بمثابة الذراع التي تطال بقوة وسحق حتى المخفي من المؤامرات العسكرية، ولذلك كان لا ينام ، فتجده يذرع الارض بين مدرعات الشجرة ووادي سيدنا والقيادة العامة وسلاح المابعرفو شنو الواقع تحت كبري شمبات ( ربما المظلات) وهكذا ..
وفي يوم كان ابراهيم شمس الدين قافلا من الشجرة نحو القيادة العامة في سيارة ملاكي وهو لابس ملكي!! ( يعني غير عسكري يا دكتور نزار اضف هذه الى القاموس العجيب )
المهم عندما وصل الى محطة ابوحمامة استوقفه رجل وحيد مستاء الساعة تلاتة صباحا يريد الخرطوم جوة
وبناء على فضيلة ( فضل الظهر) أناخ الجنرال دابته وحمل الرجل الذي اخذ يربرب ربربة شديدة، كعادة اهلنا الطيبين في المواصلات ،...
اخرج الرجل بلاوي الانقاذ جميعا : القديم منها والجديد وعبر عن سخطه لتردي الأوضاع وانعدام المواصلات والفقر والبنزين المافي وال وال.. واستدرجه الجنرال نحو المساس بقادة الانقلاب وظلمهم ومحاباة الجبهجية الخ
الرجل ما قصر قط .. حيث لعن سلسفين يومهم
وعندما وصل الى نواحي القيادة العامة توقف الجنرال جانبا طالبا من زولنا النزول ، فنزل شاكرا حامدا يلهج بالعرفان
ولكنه قال لمن حمله مجانا : ما اتعرفنا على بعض .. الدنيا ما معروفة امكن نتلاقى تاني
قال الجنرال : أنا ابراهيم شمس الدين
فارتبك المسكين وقال : ابراهيم شخص الدين شمسياً؟ لا حولااااااا .. أها؟
فقال له : بس !
_____________
رب اشرح لي صدري

العزيز د نزار

Quote: هل (المنبر الحر) تصلح أن تضاف للقائمة؟

والله يا دكتور انت قاعد تسال اسئله صعبة خلاص

اعرب ما تحته خط!

وبالمناسبة الالوان ما داخله معانا هنا في المنظومة دي؟؟؟

تعرف اول ما جيت الخليج أول يوم ادخل فصل، واحد من الطلبة قال يا استاذ لو سمحت قلم ازرق؟؟
وانا كان عندي فعلا قلم أزرق وتاني اسود، قمت طوالي طلعت القلم الاسود واديتو ليه، قام قال لي لا يا استاذ الازرق، قلت ما يا هو ده الازرق، قام قال لي لا التاني ما ده، فسررتها في نفسي ولم ابدها