الفنان دا منو ؟

الفنان دا منو ؟


06-30-2010, 04:01 AM


  » http://sudaneseonline.com/cgi-bin/sdb/2bb.cgi?seq=msg&board=219&msg=1398702459&rn=85


Post: #1
Title: الفنان دا منو ؟
Author: محمد المرتضى حامد
Date: 06-30-2010, 04:01 AM
Parent: #0


Post: #2
Title: Re: الفنان دا منو ؟
Author: محمد المرتضى حامد
Date: 06-30-2010, 04:04 AM
Parent: #1

أتيح لي الإستماع إليه في إحدى القنوات منذ 3 سنوات ولم أسمع عنه بعدها،
غنى ( مساء الخير) للراحل عبدالعزيز داؤود فمنح المساء والأمير خيرا جزيلا،
والله زول قيافه ومريح.

Post: #3
Title: Re: الفنان دا منو ؟
Author: يسرى معتصم
Date: 06-30-2010, 04:17 AM
Parent: #2

نصرالدين القضارف

Post: #8
Title: Re: الفنان دا منو ؟
Author: محمد المرتضى حامد
Date: 06-30-2010, 04:39 AM
Parent: #3

يسري العزيز سلامات،
شكرا على المعلومه ،
الحمدلله لحقتني بالإسم الثاني عِوضا عن المدينه،
طبعا يا يسري ، أظن، أن السودان هو القطر الوحيد الذي يُعَرَّف فيه المشاهير بأطلس الجغرافيا،
حسين شندي ، حيدر بورتسودان ، ثنائي الدبيبه ، الخ..
كدي إتخيل لو القصه دي تم تبنيها في الخارج ، كوستاوي دي سي أو ( هوا كوفنغ شنغهاي) مثلا.

__

عينك تخوِّف.

Post: #4
Title: Re: الفنان دا منو ؟
Author: محمد المرتضى حامد
Date: 06-30-2010, 04:17 AM
Parent: #2

مرّات كده لما يضيع منك زول سنين وتقوم تلاقيهو صدفه ( رغم عدم إيماني بالصدف لأن الكون منظم بدقه) تحس
بي حاجه تنسيك مصائب حتى لو كانت بحجم الهملايا.
أها ، الزول ده مع (لوموهو اللاهي) كان مفاجأة جميلة بالنسبة لي وأنا أتصفح الولي (يوتيوب)
باحثا عن تسجيل لأبي داؤود .
ما أجمل الذين يبدعون بلا تكلف أو ضوضاء
.

Post: #5
Title: Re: الفنان دا منو ؟
Author: يسرى معتصم
Date: 06-30-2010, 04:18 AM
Parent: #4




ابن مدينة القضارف الرائع نصر الدين الشريف

Post: #6
Title: Re: الفنان دا منو ؟
Author: Kabar
Date: 06-30-2010, 04:24 AM
Parent: #2

أستاذنا محمد المرتضى..حبابك يا صديق

كتر خيرك على هذه الأيكة الأنيقة.. تحلو المقيلة في منتداها..

الفنان.. هو الشاب الواعد.. نصر الدين الشريف من القضارف..

و هذه هدية مننا..الجيلي عبد الماجد..وهو أقرب صوت للعملاق عبد العزيز محمد داوؤاد..
سئل الموسيقار الكبير وديع الصافي في حوار مع الببي سي.. عن فنان يستمع اليه في اوقات السكينة..فاجاب بلا تردد أنه يسمع عبد العزيز محمد داوؤد..و المحنة ما كانت الببي سي تملك أي تسجيل له..فدخلت في حرج..!!
هو بالجد محطة ولا كل المحطات.. سلاما في الخالدين عبد العزيز محمد داوؤد..

" target="_blank">




كبر

Post: #7
Title: Re: الفنان دا منو ؟
Author: khaleel
Date: 06-30-2010, 04:32 AM
Parent: #6

يا سلام يا محمد مرتضي

اجمل بداية للربع التالت

الولد صوتو جميل والاغنية جميلة وعندها وقع خاص في الوجدان السوداني


شكرا يا حلو

Post: #9
Title: Re: الفنان دا منو ؟
Author: Emad Abdulla
Date: 06-30-2010, 05:49 AM
Parent: #7

مرتضى ..
ياخي الله يريحك بركة النبي و اهل بيتو ..
و الله يا مرتضى و ماك طالبني حليفة ، قدر ما أدخل سودانيز دي : أفتش ليك ..
إنت و ناس شويين تانيين .. بيختو الرحمن في القلب ..
هذا البكان بقى صعب شديد يا ابن خالتي ..
و غير ينكد عليك .. ما بتمرق منو بشي .


........
قبل كم يوم مشنقل علي قفاي في ليل الصيف و الحر هاريني هري ..
إنت يا الراديو قوم جيب : ( كفاية كفاية ) .. لا إله إلا الله ..
دخلت يا مرتضى في أمراً ضيّق .. لي تاني يوم و أنا بزازي أمرق من حالة الشنو دي الدخلت فيني .
اها النبي فيك إمّا فتشت النصيبه دي و دخلت في الأمر الضيق ده عشان تعرف الله واحد ..
أما لو وصل ابو داوود للمقطع البيقول فيهو : ( إنت حبيبي إنت إنت ، إنت الروح و ذاتي ) ..
قبال ما يتني " حبيبي " دي .. شوف ليك شي يسندك وللا زول قعدو جنبك عشان تقلدو .

الله يريحك يا مرتضى .

Post: #17
Title: Re: الفنان دا منو ؟
Author: محمد المرتضى حامد
Date: 06-30-2010, 03:42 PM
Parent: #7

يا خليل صباحاتك زاهية بالغرام.
حقيقة الشاب (صوتو جميل والاغنية جميلة وعندها وقع خاص في الوجدان السوداني)
أكثر ما أعجبني أنه لم يحاول تقليد طريقة الأداء الخاصة بالراحل عبدالعزيز
وفي ذات الوقت لم يبخسه حقه واتخذ بين ذلك سبيلا إضافة إلى إحساسي إنو
(مُرتاح) في غناهو بعيدا عن انتفاخ الأوداج وطلب إمدادات أوكسجينية
يكمل بها رحلة التشبُّه الصوتي، بس كمان زي ما قلت الأغنية زاتا
عندها وقع خاص في الأذن السودانيه وكلام العرس عندنا كلو
سمح في نفوس تبدأ بالحبوبات ( يسوو لينا عديلنا )
والكبار يدعون (الملايكة تشيلنا) والكهول في
( يوم تجقلب خيلنا) وآمال الشباب العراض
في صيغة أمر عسكري ( إنتصر يا حب).



__

الله ما بينسانا.

Post: #10
Title: Re: الفنان دا منو ؟
Author: محمد المرتضى حامد
Date: 06-30-2010, 06:45 AM
Parent: #6

استاذنا وعزيزنا Kabar
ألفين سلام وشرفتنا،
لما وديع الصافي الفخم الضخم يقول كلام زي دا معناتو عبدالعزيز هو الأضخم،
سبحان الله ، وديع صوته كعبدالعزيز كأنه يأتيك من قارة أخرى عبر دهاليز السحر
الذي لايترك لك خيارين فقط إما الإنجذاب أو الإنجذاب ،
سمعت ليك صوت بيجي شايل معاهو صداهو؟ صوت معاهو قوافل وكرافانات شاحنين فيها
كل ما يجعلك تبدأ السمع من الحجاب الحاجز وانت ماش؟
أبوداؤود يا كبر كان عمل رميه ووديع كان عمل موال لازم تتكل على حاجه أو تسند
ظهرك (إلى حائط ليس ينهار) كما قال الشاعر وكما أفتى مولاي عمادعبدالله.
شكرا يا كبر إنك ، وفي إيجاز غير ظالم ، قلت لي منو ممكن يطرب البشر بصوته
مجردا ، كدا لله في الله.
تسلم

Post: #11
Title: Re: الفنان دا منو ؟
Author: سفيان بشير نابرى
Date: 06-30-2010, 08:42 AM
Parent: #10

قلتوا شنو ؟؟؟؟

Post: #12
Title: Re: الفنان دا منو ؟
Author: صديق حمدتو
Date: 06-30-2010, 12:09 PM
Parent: #11

فعلا أداء أكثر من رائع - شكرا مولانا محمد المرتضى على الهدية الرائعة

أعتقد أن لهذا الفنان لقب آخر أشتهر به وهو (نصر الدين التقانة)

Post: #13
Title: Re: الفنان دا منو ؟
Author: Gaafar Ismail
Date: 06-30-2010, 12:40 PM
Parent: #12


أستاذنا الفاضل محمد المرتضى
شكرا جزيلا على إهدائنا هذا الصوت المميز والأداء الرائع...تسلم يا حبيب
تحياتي ومودتي

Post: #14
Title: Re: الفنان دا منو ؟
Author: طارق جبريل
Date: 06-30-2010, 01:07 PM
Parent: #13

محمد وضيوفه كيفنكم
الود غناي ورايق كدة


كدي اسمعوا ابو داوود هني:

Post: #32
Title: Re: الفنان دا منو ؟
Author: محمد المرتضى حامد
Date: 07-01-2010, 02:42 AM
Parent: #14

عليك الله يا طارق جبريل كلمات زي طوبه ومونه ديل مش ذكروك مباني الريده يا طُلبة الغرام؟
يعني هسه لو الكلمتين ديل دخلو أي قصيده ممكن يسمعا غير مقاول ؟ لكن في الغنيه دي
إبداع عديل ، مش قلنا ليك الجمال ده علم؟ الجمال البيخلي جلد حمار الوحش جميل زي
سلمى حايك ، بس لما كل حاجه تكون في مكانا الصحيح.

قادر الله.

Post: #15
Title: Re: الفنان دا منو ؟
Author: Osman Musa
Date: 06-30-2010, 01:40 PM
Parent: #13

عزيزنا ودحامد
سلامات
الشكر لفنان القضارف الجميل العجبو الفنان الاجمل أبوداؤود .
أبوداؤود الفطنة والحذاقة فى الغناء .
أبوداؤود يا ودحامد فنان ثقف الفن وهذب السلوك والذوق الفنى والأدبى .
فنان ماهل و منسجم مع المجتمع أنسجام فات الحدود .

تحياتى

Post: #16
Title: Re: الفنان دا منو ؟
Author: عبدالكريم الامين احمد
Date: 06-30-2010, 01:49 PM
Parent: #15

يبدو انها دورة اسفيرية ستحملنا علي جناح غيمة الي عوالم الدهشة كوننا ارتشفنا في بداياتها شهقة الاجراس الجاية من الاسطوري ابوداوود
عبر صوت ود القضارف نصر الدين ...واها انا يا قضارف او (قدارف وربك عارفك) فهي مدينة رائعة وطيب اهلها..
وابوداوود في كل غناويه يجعلك في حالة سكر واعجاب بان يكون فيك سكر..
وفوووق

Post: #18
Title: Re: الفنان دا منو ؟
Author: الطيب شيقوق
Date: 06-30-2010, 05:17 PM
Parent: #16


المرتضى ازيك

الفنان دا ظني مننا عديل - عوضابي وببالغ

انت قبل كدا مش قلت لينا مافي حد شين في الدنيا دي ؟

Post: #19
Title: Re: الفنان دا منو ؟
Author: أمين محمد سليمان
Date: 06-30-2010, 05:59 PM
Parent: #18

قولو ليهو الحب شي طبيعي إلاهي !!!!
مووباااالغه !!!!
أداء عجيب و صوت أعجب : سلاسه بدون تكلف تفتح القلب و توقف الزمن : حاجه كده عطيه من الواحد الأحد !!
لك يا نصر الدين و يا مولانا مرتضي حبنا الطبيعي الإلاهي و رحم الله أب داؤد بقدر ما اطربنا !!!

Post: #20
Title: Re: الفنان دا منو ؟
Author: محمد المرتضى حامد
Date: 06-30-2010, 06:46 PM
Parent: #19

يا عماد،
يا خ الناس أكلوا لحمي بالسؤال عنك ، في داعي تخلي أي زول يسألني وما أعرف أودِّي وشي وين!!
من يومين إتذكرتك وأنا أستمع لعبدالمنعم الخالدي وهو ( يُصوِّر على أعصابي) رائعة (الزهور والورد)
للحكيم عثمان الشفيع ، كنت داير أجيبا هنا وأقول معاها كلامي الزي الزفت البقولو كل مره وبرضو تكون
النهاية خيانة مفرداتي لمشاعري ، كما هي العادة ، ويتجلي من ثم عجزي المواليني في أبهى صوره ،
عشان كده لما تقول لي (شوف ليك شي يسندك وللا زول قعدو جنبك عشان تقلدو) بتكون ختيتني في الربع
الخالي مع سعلاة عمرو بن يربوع أو بانتظار(جودو) وحجزت لي مقعد على رحلة فشل الإفصاح المزمن يا عماد،
بس كمان كتير تداهمك مصيبه زي ( الزهور والورد) زي ما داهمتك كفايه كفايه وتِتلَفَّت ما تلقى اليسندك ولا
اليقالدك وديل الحاجتين المابجيبوهم قروش يا ابن خالتي ، انت براك عارف إنو الكتف اليجمع دموعك
هو زاتو ال ما لاعين رأيت ولا أذن سمعت ولا يبتاعه الكريدت كارد، ، بس كمان يا عماد البتقع من السما
الفانيه بتشيلا.
نسوِّي شنو.


ياخ أقول ليك قوله؟ الله ما بينسانا.

Post: #21
Title: Re: الفنان دا منو ؟
Author: الفاضل يسن عثمان
Date: 06-30-2010, 07:20 PM
Parent: #20




محمد المرتضي:

زول مبالغة، لديه ثقة الموهؤب، وحنجرة تطربية، تراقص الجبال
نتمني ان يشق طريقه بنجاح، ويبتعد من سماسرة المطربيين


شكرا علي لفت الانتباه للموهؤب نصرالدين.

Post: #22
Title: Re: الفنان دا منو ؟
Author: الطيب شيقوق
Date: 06-30-2010, 07:28 PM
Parent: #21

المرتضي

عليك النبي ما تفطنى منتظر رد مستصحب بشهقات امهرية

Post: #23
Title: Re: الفنان دا منو ؟
Author: أيمن الطيب
Date: 06-30-2010, 07:41 PM
Parent: #22

سلامات يا أبو أيمن,,

دائما جالب للفرح وللروائع,,
ياخ بقى صعب تسمع ليك فنان
ويعجبك أو يطربك,,

وهذا الشاب الخجول مدهش وفنان مرهف
ومسكون بالداؤوديات,,أو كما قال عماد,,
وكلو قاعد على الهبشة ,,الشاب فنان بصدق,,

تسلم يا عزيز..

Post: #44
Title: Re: الفنان دا منو ؟
Author: محمد المرتضى حامد
Date: 07-02-2010, 10:15 PM
Parent: #23

Quote: هذا الشاب الخجول مدهش وفنان مرهف
ومسكون بالداؤوديات,,أو كما قال عماد,,
وكلو قاعد على الهبشة ,,الشاب فنان بصدق,,

شكرا يا أيمن ،
مرهف وله صوت حقو براهو، لكن نحن القاعدين على الهبشه،
والله منتظر زول يبرني ب (مساء الخير) يا أيمن،

Post: #24
Title: Re: الفنان دا منو ؟
Author: محمد الشيخ أرباب
Date: 06-30-2010, 07:43 PM
Parent: #22


Post: #25
Title: Re: الفنان دا منو ؟
Author: عبد الله الشيخ
Date: 06-30-2010, 08:03 PM
Parent: #24

والله يا مرتضى الزول غناي..
لكنه حظه كدا ..
ظهر فى ( زمن ماشى وزمن لسه)..
ياريت ترجع بينا للاصل ( سيبونى بس فى حيرتى ) بصوت عبد العزيز داؤد ..
هذه الاغنية هي عنوان المرحلة الجديدة ( الماثلة) ..
بختك انت لسه بتسمع الغنا..

Post: #26
Title: Re: الفنان دا منو ؟
Author: الطيب شيقوق
Date: 06-30-2010, 08:04 PM
Parent: #24

يا اخي فوق بي فطانك

Post: #27
Title: Re: الفنان دا منو ؟
Author: محمد المرتضى حامد
Date: 06-30-2010, 08:18 PM
Parent: #26

يا الطيب ، سفيان نابري عندو سؤال وجيه قل ودل ومعاهو إجابتو خليني أشوفو واجيك،
Quote: قلتو شنو؟

كلامك وصل تب يا سفيان،
مش كده بالله؟

Post: #28
Title: Re: الفنان دا منو ؟
Author: محمد المرتضى حامد
Date: 06-30-2010, 08:51 PM
Parent: #27

يا الطيب،
قالوا التسخين بالميكرويف نظريتو قايمه على موجات راديو بتردد 2500 ميجاهيرتز يتم امتصاصها
بواسطة جزيئيات الماء والدهون والحاجات الحلوه البتشبهك كده فيكسبها طاقة تجعل جزيئياتها
تتصادم مع بعض بدرجة كبيرة فتنتج حرارة تخليها تسخِّن من جوه الجوه ، أها ، نوع غنا الشاب دا
زي المايكرويف ، يرسل ليك موجات تسخِّن عضامك وتولِّع قلبك بعدين في الآخر تعرف الحصل في جلدك شنو.
نسيت اقول ليك جزيئات الحديد والبلاستيك والخزف لاتمتص تلك الموجات عشان كدا ما بتسخِّن وتفضل
قاعده بارده وبليده و تُجُم – أجارك الله – .
شيقا يا سكر..

Post: #45
Title: Re: الفنان دا منو ؟
Author: محمد المرتضى حامد
Date: 07-02-2010, 10:40 PM
Parent: #24

محمد الشيخ أرباب،
مش كده بالله؟

Post: #29
Title: Re: الفنان دا منو ؟
Author: محمد المرتضى حامد
Date: 06-30-2010, 10:44 PM
Parent: #12

Quote: أعتقد أن لهذا الفنان لقب آخر أشتهر به وهو (نصر الدين التقانة)

حبيبنا ود حمدتو
رسونا على بر
قضارف وللا تقانه
خليك معانا

Post: #30
Title: Re: الفنان دا منو ؟
Author: طارق ميرغني
Date: 06-30-2010, 11:23 PM
Parent: #29

اخي محمد المرتضي

الف تحيه

عندما غني هذا الشاب والفنان الجيل لابو داؤود

شنت احدي بنات ابو داؤود وغالبا ما تكون عزه عبد العزيز

هجوما عنيفا لمن قلدوا والدها خاصة علي هذين الشابين

ولم ينج الموسيقار برعي محمد دفع الله من هجومها وكان حيا حينئذ

حيث اتهمته بانه يتبني مطربين يقلدون والدها وهو يرتكب جريمه في حقه

اللهم ارحمهما برعي وعبد العزيز

بعد ذاك ظهرت اختنا عزة بصوتها البعيد كل البعد عن ود داؤود وابداعه

لتتبني اغانيه كانما ورثت بقاله ناصيه.

شي عجيب

Post: #31
Title: Re: الفنان دا منو ؟
Author: محمد المرتضى حامد
Date: 07-01-2010, 00:14 AM
Parent: #30

العزيز جعفر إسماعيل،
شكرا لمجيئك ،
لا أستطيع أن أشرح لك الظرف الذي استمعت فيه لأول مرة لهذا الشاب،
لكن على أية حال الروح كانت سمحه رغم النَصَب والرهق ، أها الزول
ده مع فتحة التلفزيون لقيتو بيقول ( ياالخيالك بقا لي سمير بحنانك أنا مستجير)
حي والله ..
غيرك ما لي سمير،
مساء الخير (قُلنا) يا الأمير..

صوتو نضيف ،
وتقاسيمو مهذبه ..
أنيق بأدائه بعيدا عن فيرساتشي وبيير وغوتشي.
يا سلام على القضارف وأبوداؤود الملهم.

Post: #33
Title: Re: الفنان دا منو ؟
Author: الطيب شيقوق
Date: 07-01-2010, 05:36 AM
Parent: #31

Quote: قالوا التسخين بالميكرويف نظريتو قايمه على موجات راديو بتردد 2500 ميجاهيرتز يتم امتصاصها
بواسطة جزيئيات الماء والدهون والحاجات الحلوه البتشبهك كده فيكسبها طاقة تجعل جزيئياتها
تتصادم مع بعض بدرجة كبيرة فتنتج حرارة تخليها تسخِّن من جوه الجوه ، أها ، نوع غنا الشاب دا
زي المايكرويف ، يرسل ليك موجات تسخِّن عضامك وتولِّع قلبك بعدين في الآخر تعرف الحصل في جلدك شنو.
نسيت اقول ليك جزيئات الحديد والبلاستيك والخزف لاتمتص تلك الموجات عشان كدا ما بتسخِّن وتفضل
قاعده بارده وبليده و تُجُم – أجارك الله – .
شيقا يا سكر..


يا اخوانا ود القرشي وين ؟

غايتو كان جاء وقرا الكلام دا بغلبو النوم

الراجل دا لهسع ما عتّّب بجاى عليك الله يا المرتضى اكان جاء مباري بجاى اوطاهو في عنقرتو وامشي فيهو سايرين

Post: #34
Title: Re: الفنان دا منو ؟
Author: Ahmed al Qurashi
Date: 07-01-2010, 06:46 AM
Parent: #33

سلام للجميع

اليوم فقط شفت البوست دا

فعلا الشاب اداؤه رائع

وأجاد الغناء لابو داوؤد

وبعدين يا صاحب البوست لو أنت متأخر رسل

لينا المفتاح ،

ولا حنمشي الولجه سيدا

تحياتي يا ود شيقوق

Post: #35
Title: Re: الفنان دا منو ؟
Author: الطيب شيقوق
Date: 07-01-2010, 07:31 AM
Parent: #34

Quote: ولا حنمشي الولجه سيدا


تآخد فطة وتمشي الولجة هههههههههههههههههههههههههها

المرتضى عليك النبي علقو لبكرة خليهو يقلّب البوست دا زي البرق ابو وسيعة

Post: #36
Title: Re: الفنان دا منو ؟
Author: عثمان دغيس
Date: 07-01-2010, 10:03 AM
Parent: #35

Quote: بعد ذاك ظهرت اختنا عزة بصوتها البعيد كل البعد عن ود داؤود وابداعه

لتتبني اغانيه كانما ورثت بقاله ناصيه.

شي عجيب


كااااااااااااكين بدل واحد ..!
والله ريحتني في حناني زاتو

الود ده والله غناي عدييييييييل كده ...
بس كمان يا أخوانا تقليد أبو داؤود بمعني التقليد سيبوهو للجيلي عبد الماجد ...
لا حولا ولا قوة إلا بالله ...![/red
]

Post: #37
Title: Re: الفنان دا منو ؟
Author: محمد المرتضى حامد
Date: 07-01-2010, 06:19 PM
Parent: #36

Quote: وابوداوود في كل غناويه يجعلك في حالة سكر واعجاب بان يكون فيك سكر..

يا كيكي ، على الرغم من أن حالة السكر والشعشعة تقليديا معروف اسبابها وتنتاب الفرد
بمؤثر كل الجمال والفنون بما يتضمن الترتيل والمدح إلا ان تعبير ( إعجاب بأن يكون فيك سُكر)
مرحلة لا يعرفها إلا نفر قليل ، والله التعبير دا عاجبني حتى صرت معجبا بأني معجب.

Post: #38
Title: Re: الفنان دا منو ؟
Author: حمزه بابكر الكوبي
Date: 07-01-2010, 06:36 PM
Parent: #37

التحايا لك يامرتضي وايضا للاخت تيسير عووضه فقد نبهتنا لهذا الفنان
في بوست سابق بعنوان (نادوا لينا البنا) ومن يومها وانا ابحث عن اغاني
هذا الفتي الرائع ولكن للاسف لا شفوت اليوتوب ولا شفوت اغاني الشباب
في موقع مزيكا سودانيه عندهم له اغاني كتيره ويبدوء ان هذا الفتي مقل في
اغنياته !!!

Post: #39
Title: Re: الفنان دا منو ؟
Author: سلمى الشيخ سلامة
Date: 07-01-2010, 08:49 PM
Parent: #38

Quote: والله زول قيافه ومريح.

غايتو يا مرتضى اخوى قيافة دى كيف ومريح دى برضها
بالجد زول بنطق الميم "باء " كيف يكون مريح ؟
ابلنا ؟ فى مقام املنا
يعنى يكون عنده "نزلة بالباء؟
بعدين زى ماقالت البروفيسور بت بتى عليها الرحمة وبالمناسبة اللقب دا ما حقى
ادوهو ليها الانجليز اسياد الاسم لانه الكسر البترجعو شى طبيعى والهى
اها زولك دا داير ليهو تلاته اطنان عشان يتبلبل
شوية امكن يبقى قيافة الراحة خليناها
بت بتى يا ود امى قالو ودوا ليها لاعب كورة ضعيف ورهيف ومكسورة كراعه
بعد عدلتها ليهو قالت ليهو
ـ انت يا ولدى كورة شنو ليك نعنمك لحمة مافيك
يعنى المعنى نرجع لكلام عمنا ابن خلدون
ومسالة الوش الصبيح للمغنواتية وضرورته
بصراحة بصراحة
فى فنانين بسمعهم من الاذاعة بث
اى تسجيل تلفزيونى ما ممكن خالس
معليش ياخ طرطشة كتيرة منى
اعذرنى يا مياس

Post: #40
Title: Re: الفنان دا منو ؟
Author: محمد المرتضى حامد
Date: 07-02-2010, 06:09 PM
Parent: #39

Quote: فنان ماهل و منسجم مع المجتمع أنسجام فات الحدود .

بالحيل يا عثمان،
أبوداؤود ماهل وشامل ومتكامل،
لايحتاج أي آلة موسيقية تصاحبه دعك عن أوركسترا بحالها وقيل أن (علبة الكبريت) التي
كان يُقلِّبها بين أصابع يسراه كانت فقط ل (حفظ الزمن) ، كنت من المعجبين به وهو يغني
أو يؤدي المدائح أو يُنشِد بالشعر العربي الفصيح ، يطرب في كل الأحوال ، والله صدقت،
ماهل وفات الحدود يا ودموسى،
له الفردوس.

Post: #41
Title: Re: الفنان دا منو ؟
Author: محمد المرتضى حامد
Date: 07-02-2010, 07:01 PM
Parent: #40

Quote: أداء عجيب و صوت أعجب : سلاسه بدون تكلف تفتح القلب و توقف الزمن : حاجه كده عطيه من الواحد الأحد !!

زي ما تفضلت يا أمين، الشاب نصرالدين يغني كما لو أنه يغني لأصحابه دون عناء مع ثقة أنه يطربهم ، صدقني ، الواحد
لما يسمعو يؤدي مساء الخير ويقول :

باهي طلعة وما ليك نظير .. الزهر في خديك نضير

بعد داك لو عاين في المرايا يلقى روحو بقى باهي طلعه وسمح عديل كده ،

سبحان الله.

Post: #42
Title: Re: الفنان دا منو ؟
Author: الطيب شيقوق
Date: 07-02-2010, 07:22 PM
Parent: #41

Quote: والله صدقت، ماهل وفات الحدود يا ودموسى،


نان ات قايلو بفط؟

Post: #43
Title: Re: الفنان دا منو ؟
Author: محمد المرتضى حامد
Date: 07-02-2010, 08:15 PM
Parent: #42

Quote: نتمني ان يشق طريقه بنجاح، ويبتعد من سماسرة المطربيين

الفاضل سلام،
يبدو لي أن الشاب نصرالدين ، الذي استمعت إليه منذ 3 سنوات تقريبا، ليس
من الفنانين الذين يحوم حولهم السماسرة وينتابني إحساس أنه من المطربين
الذين يمتعون أنفسهم فيطربوا الغير كنتيجة غير مقصودة لذاتها.
مش مرات تلاقي واحد في الحي حريف في كرة القدم لكنه يلعب فقط ليمتع نفسه
ولا يسعى للفرق الكبيرة ثم يترك اللعب مبكرا؟
تسلم
.

Post: #46
Title: Re: الفنان دا منو ؟
Author: محمد المرتضى حامد
Date: 07-02-2010, 10:58 PM
Parent: #43

Quote: والله يا مرتضى الزول غناي..
لكنه حظه كدا ..
ظهر فى ( زمن ماشى وزمن لسه)..

يا عبدالله ، بإيرادك ل (الزمن اللسه) لايسعني غير أن أقول ليك تُفَها من خشمك
أصلو ما بشَّرتني ،
يعني مافي أمل؟

Quote: بختك انت لسه بتسمع الغنا..

السِمِعتو والبسمعو كتير يا عبدالله ،
عارف يا ود الشيخ، بعد العمر دا كلو اكتشفت إنو الإستماع
للمشوا خلونا ، إضافة إلى أنه أصدق من كلام الأحياء ، فهو
وسيلة وتحايل لاحتمال الحياة، عشان كدا لمن نسمع الزي
أبوداؤود بنقول سرا ( إيه الحياة غير ليمك) ،
ياخ ديل مشوا خلونا لناس .. غايتو،
تقول لي بختك؟

Post: #47
Title: Re: الفنان دا منو ؟
Author: محمد المرتضى حامد
Date: 07-03-2010, 00:10 AM
Parent: #46

Quote: بعد ذاك ظهرت اختنا عزة بصوتها البعيد كل البعد عن ود داؤود وابداعه

لتتبني اغانيه كانما ورثت بقاله ناصيه.

شي عجيب


حبيبنا طارق ميرغني،
أثناء دراستنا لحقوق الملكية الفكرية تقدم طالب من كوستاريكا بورقة رائعة
حول الإبداع بصورة شائقة وقال إن الذي يدعي حقا خالصا له على النتاج الفكري
يلغي بادعائه جهد وفكر وإبداع من نقل عنهم ليصل بإنتاجه الذي يريد احتكاره
ما وصل، وهو يريد أن يقول أن إبداع الفرد هو تراكم إبداع من سبقوه ومن ثم
لايجوز له الإدعاء بغير ذلك.
أبوداؤود وبرعي محمد دفع الله ومن كتبوا أشعار أغنياتهم جميعهم شاركوا في إضافة
لإبداع من سبقهم وهم لم يأتوا بإنتاجهم من فراغ كما لو أنهم جاءوا من جزيرة روبنسون
كروز وفقا لورقة زميلنا.
شكرا ، لأول مرة أعرف أن هناك إبنة لعبدالعزيز داؤود تحاول تقليده ، في الناصيه،
ذكرتني واحد ، لا أذكر إسمه ، إبن للشامخ وردي.
أو ،
ناس سانتو.

Post: #60
Title: Re: الفنان دا منو ؟
Author: محمد المرتضى حامد
Date: 07-04-2010, 11:16 AM
Parent: #42

Quote
Quote: :
Quote: والله صدقت، ماهل وفات الحدود يا ودموسى،




نان ات قايلو بفط؟

على الأقل بيغني بالدور يا شيقا.

Post: #58
Title: Re: الفنان دا منو ؟
Author: محمد المرتضى حامد
Date: 07-04-2010, 04:28 AM
Parent: #38

Quote: التحايا لك يامرتضي وايضا للاخت تيسير عووضه فقد نبهتنا لهذا الفنان
في بوست سابق بعنوان (نادوا لينا البنا) ومن يومها وانا ابحث عن اغاني
هذا الفتي الرائع ولكن للاسف لا شفوت اليوتوب ولا شفوت اغاني الشباب
في موقع مزيكا سودانيه عندهم له اغاني كتيره ويبدوء ان هذا الفتي مقل في
اغنياته !!!

والله يا حمزه شوقتني أمشي أفتش عن بوست أختنا تيسير ، هذا الشاب يستحق
لفت النظر إليه وابتدار (بوست) لأجله وحسنا فعلت تيسير وتفريعا على هذا
أكون محقا في رأيي ( يعني ما براي) ، أما غيابه عن المكتبات الموسيقية
الإسفيرية وعدم التفات (شفوت اليويتوب وأغاني الشباب) إليه ربما ناجم
عن قلة ظهوره في وسائط الإعلام ، ليتهم يفعلون، أنا بالذات مغرود في غنية
مساء الخير كاملة غير منقوصة ، هذه الأغنية متوفرة لدي بعدة (قراءات)
لسيد الشئ زاتا زي ما بيقول ناذر لكنني ، بسبب العطش غير القابل للإرواء،
أود لو أسمعها بصوت هذا الشاب بالتسجيل الذي أداها به في تلك القناة.
شكرا يا كوبي على مشاركتك.

Post: #55
Title: Re: الفنان دا منو ؟
Author: محمد المرتضى حامد
Date: 07-03-2010, 10:06 PM
Parent: #36

Quote: الود ده والله غناي عدييييييييل كده ...

يا دغيس أتفق معك في إنو الشاب غناي وبأسلوبه الخاص ، ليس لأنه غنى لعبدالعزيز
داؤود ولكن تغنيه له أضاف جمالا آخر بسبب إنحيازنا المكشوف للراحل الشامخ ولأيامنا
الخضر النواضر قبل أن نبلغ زمن الكوليرا والقنبله، أظن أن هذا الشاب لو عبَّد مسارا
غنائيا خاصا به سينجح أيما نجاح والواقع أني في مستهل البوست أكدت لك أنه لم يقلد
عبدالعزيز ولم يصادر بصماته في لوموهو اللاهي وغيرها خلافا للجيلي الذي - بأدائه -
لأغنيات أبوداؤود أعلن أنه ما ناقصاهو إلا الكبريته.
تسلم يا العزيز.

Post: #56
Title: Re: الفنان دا منو ؟
Author: محمد المرتضى حامد
Date: 07-04-2010, 00:05 AM
Parent: #35

Quote: المرتضى عليك النبي علقو لبكرة خليهو يقلّب البوست دا زي البرق ابو وسيعة

الترجمه يا شيقوق
الترجمه
ساعدنا بالترجمه
البورد دا فيهو ناس شهاده عربيه وفيهو ناس مولودين في زيورخ
والغالبية العظمى جنسية مزدوجه وبيشجعوا ألمانيا..

Post: #48
Title: Re: الفنان دا منو ؟
Author: محمد المرتضى حامد
Date: 07-03-2010, 05:21 AM
Parent: #33

Quote: يا اخوانا ود القرشي وين ؟

هسه كان الزول السألنا منو دا كان (حقيبه) كان لقيتو في التَندَه.

Post: #49
Title: Re: الفنان دا منو ؟
Author: حليمة محمد عبد الرحمن
Date: 07-03-2010, 05:47 AM
Parent: #48

Quote: هسه كان الزول السألنا منو دا كان (حقيبه) كان لقيتو في التَندَه.

محمد المرتضى حامد...شِرِقْتَ لامن لقيتك بتعرف التنده...
بوست فات حد الفهم...الله يخليك!

Post: #63
Title: Re: الفنان دا منو ؟
Author: محمد المرتضى حامد
Date: 07-04-2010, 05:18 PM
Parent: #49

Quote: شِرِقْتَ لامن لقيتك بتعرف التنده...
بوست فات حد الفهم...الله يخليك!

عارفه يا العزيزه، التنده دي كنت من المغرمين بها في تسفاري الكثير في أنحاء الوطن
الحبيب ، كنت أتحين الفرص التي تكون أمي - رحمها الله - غائبة عن الرحلة كي أتموضع
فيها لأنها تهيئ لي إطلالة على الطريق أعلى من السائق وغيره، أبي - أطال الله بقاءه
لم يمنعني منها لكنه كان بيقول لي ( أعمل حسابك) وهذه الأخيرة سببها شرحك لمعنى
التنده، لم تكن بالخطورة لأن اللواري كانت تسير بسرعة بطيئة في خيران وطرق كردفان
ودارفور التي قضيت فيها كثير من سني طفولتي وصباي ، المنظر وال (موقع) في عصاري
الخريف يا حليمه كان أروع من التجول بمروحية في سهول كاليفورنيا وكندا أو الجنوب
الفرنسي ، التنده دي زاتا القال عنها صلاح أحمد إبراهيم في قمة الأولمب جالس.
تاني جاييك، بس شيقوق يديني فرقه.

Post: #50
Title: Re: الفنان دا منو ؟
Author: محمد المرتضى حامد
Date: 07-03-2010, 05:56 AM
Parent: #48

ودالقرشي كيفك،
الشاب دا ومعاهو الجيلي عبدالماجد يؤديا أغنيات أبوداؤود
بشكل جميل لكن إبن عمتي مأمون عوض صالح لايُجارى في تقليد
عبدالعزيز داؤود وهذا ليس انحيازا له لكنها الحقيقة.
ما يهم في هذا البوست ليس التقليد وأنا لا أؤيد التقليد
رغم أنه (حالة) تجدها في عديد من الدول شرقا وغربا وكثير
من النجوم صعدوا بسبب ترديد أغنيات مشاهير ، لكن طريقة
الأداء المتميزة لأغنية معروفة شئ يبعث الغبطة في النفس،
إستمعت في أوائل الثمانينيات لمصطفى سيد أحمد يغني (مرت الأيام)
بقراءة جديدة فطربت ربما بأعلى من طربي لأداء عبدالدافع عثمان.
من الذين يؤدون أغاني أبوداؤود بلونيتهم الخاصة مع طرب مُسكِر
، ودون محاولة تقليد، الفنان عاصم البنا وأظن أن إضافات
البعض الموسيقية في أحايين كثيرة تقوم بعملية تجديد للأغنية
تحول دون اندثارها.
مشكلتنا يا أبوحميد إننا بقينا ما دايرين نسمع غير القديم المتجدد
لذا لا أعرف أي أغنية ظهرت في العقدين الأخيرين سوى بضعة أغنيات
لاتتعدى أصابع اليد الواحدة.

Post: #51
Title: Re: الفنان دا منو ؟
Author: احمد محمد بشير
Date: 07-03-2010, 05:59 AM
Parent: #50

نصر الدين .... خليفة أبو داؤود

Post: #52
Title: Re: الفنان دا منو ؟
Author: othman mohmmadien
Date: 07-03-2010, 07:16 AM
Parent: #51


تحية طيبة للجميع ...
من المعجبين والمستعمين لأبوداؤود كثيرا منذ صغري
ولا أدري ما سبب حبي له وأنا طفل صغير لم أميز ما يغنيه من كلمات أو معناها
رأي في هذا الفنان "نصر الدين" أبعد ما يكون عن آداء الراحل المقيم أبو داؤود
وشتان بينهما ... ولم أستطع أن أكمل الأغنية التي أداها ...
سيظل أبو داؤود رقما في عالم الغناء العالمي وكما قال البروفيسور: محمد عبد الله الريح
أبو داؤود لا يقلد نفسه ... نعم لا يقلد نفسه وأن كل أغنية عندما يؤديها لأكثر من مرة كل طريقة تختلف عن الأخرى ...

Quote: محمد المرتضى حامد...شِرِقْتَ لامن لقيتك بتعرف التنده...
بوست فات حد الفهم...الله يخليك!


أختنا حليمة: ضحكينا معاك ... التنده يعني شنو...؟

Post: #53
Title: Re: الفنان دا منو ؟
Author: طارق ميرغني
Date: 07-03-2010, 08:35 AM
Parent: #52

اخي محمد المرتضي

سعدنا كثيرا بسكننا منذ صغرنا بشارع عبد العزيز داؤود

وهو الرجل الفنان المحبوب من الجميع

ابنته عزه عبد العزيز تغني له كثيرا ولو فتحت قناة النيل الازرق

كل اسيوعين ما بتجلي

ابناؤه داؤوود وعمران

عمران ايضا لي معرفه به وجلسنا مع بعضنا كثيرا ايضا يغني لابيه وبصوت

جيد لكن اجمل ما فيه انه لم يحاول تقليد ابيه

فقط هذه العزه حاولت وفشلت حسب اعتقادي

لا اظن ان التقليد يفيد اي فنان وقبل قالها محمد وردي

الشعب السوداني لا يحتاج لاثنين وردي ..!!

عصام البنا كما ذكرت يعجبني غناءه لفنانين اخرين

لانه يصبغ الاداء ببصمته وهذه اجمل ميزه فيه

ولك ودي

Post: #54
Title: Re: الفنان دا منو ؟
Author: Abdul Monim Khaleefa
Date: 07-03-2010, 10:24 AM
Parent: #53


العزيز الأستاذ طارق ميرغني
لك التحية والمودة

Quote: سعدنا كثيرا بسكننا منذ صغرنا بشارع عبد العزيز داؤود

أرجو ان أهديك هذا المقتطف من مقال للدكتور مرتضى الغالي عن علي المك.. وعن شارعكم!، وهو بعنوان (علي المك .. الدنيا الجميلة على جسر حي الدناقلة!!)، عله يطربك ويعيد لك ذكريات عذبة.. وهو مهدى أيضاً للعزيز محمد المرتضى وأصدقاء هذا البوست وهم يعيشون من خلاله في عالم أبو داؤود المبهج.

علي المك مر من هناك

"فقد تجد كفايتك كلها في الصور التي رسمها حبيب الحياة علي المك للجسر الصغير الذي يعترض الخور الفاصل بين أحياء بحري العابر إلى حي الدناقلة حيث على الناصية التالية منزل عبد العزيز داؤود..
هذه حياه كاملة يمنحها علي المك لهذا الكبري الصغير الذي لا يكاد يتسع لعربة صغيرة مع أقدام صبيان الحي الجالسين على دكته ونتوئه الجانبي !! أفاويح عطر الصداقة التي تتدفق من (ود المك) هو في طريقه إلى داؤود ... ذاكرته الحبلى بالأنغام (وترشيحات) الأغاني والمقاطع للفنان الذي ينتظر القدوم في لهفة المتحفز للأنس والمفاكهة والتطريب !! . كلما قادني الطريق عبر مدينة بحري نظرت إلى هذا الكبري الصغير الذي أدخله (علي) إلى معالم الدنيا؛ فحديثه عنه لم يظفر به أي وصف لبرج إيفل ولا برج بيزا ولا حدائق بابل المعلقة، إنه يصف صبيان الحي عندما ينقلون أرجلهم في تثاقل ليسمحوا بعبور (سيارة علي)، وأحيانا يرحبون وينفضون أردافهم ناهضين ليفسحوا المجال، أحيانا في تثاقل متبرمين، وعجلات العربة تمر برفق على الحصا الذي يتناثر على حوافي الخور وبين أطراف الجسر الصغير..!! التفتوا يا أهل بحري إلى هذا المعلم الخطير في مدينتكم واكتبوا على لوحة الجسر التذكارية (علي مر من هناك!!)."


محبتي
عبد المنعم خليفة


Post: #57
Title: Re: الفنان دا منو ؟
Author: mamkouna
Date: 07-04-2010, 00:48 AM
Parent: #54

Quote: لأول مرة أعرف أن هناك إبنة لعبدالعزيز داؤود تحاول تقليده ،


ظهرت عزة اعلامياً لأول مرة عبر برنامج ( فونوغراف ) على النيل الازرق..و هو برنامج مسابقات فنية بيختارو فيهو فنان محدد , و يجو المتسابقين و المتسابقات يغنوا اغانيهو. دا نفس البرنامج الظهر فيهو ولد الراحل سيد خليفة.
عزة ما لاقت قبول في الاول و الناس قالو صوتا ضعيف , لكن شايفاها تحسنت كتير , يمكن بالممارسة و يمكن بالتدريب...
( من زمن مستني عودة قلب راحل ) يا يغنيها ابو داؤود ذات نفسو ..أو... حامد اب سبح !!!
سمعت بيهو؟


.......................
http://www.youtube.com/watch?v=Au2uEHOHmWY&feature=related
.................

Post: #59
Title: Re: الفنان دا منو ؟
Author: محمد المرتضى حامد
Date: 07-04-2010, 06:33 AM
Parent: #57

Quote: Quote: والله زول قيافه ومريح.


غايتو يا مرتضى اخوى قيافة دى كيف ومريح دى برضها
بالجد زول بنطق الميم "باء " كيف يكون مريح ؟
ابلنا ؟ فى مقام املنا
يعنى يكون عنده "نزلة بالباء؟
بعدين زى ماقالت البروفيسور بت بتى عليها الرحمة وبالمناسبة اللقب دا ما حقى
ادوهو ليها الانجليز اسياد الاسم لانه الكسر البترجعو شى طبيعى والهى
اها زولك دا داير ليهو تلاته اطنان عشان يتبلبل
شوية امكن يبقى قيافة الراحة خليناها
بت بتى يا ود امى قالو ودوا ليها لاعب كورة ضعيف ورهيف ومكسورة كراعه
بعد عدلتها ليهو قالت ليهو
ـ انت يا ولدى كورة شنو ليك نعنمك لحمة مافيك
يعنى المعنى نرجع لكلام عمنا ابن خلدون
ومسالة الوش الصبيح للمغنواتية وضرورته
بصراحة بصراحة
فى فنانين بسمعهم من الاذاعة بث
اى تسجيل تلفزيونى ما ممكن خالس
معليش ياخ طرطشة كتيرة منى
اعذرنى يا مياس


دا شنو يا سلمى!!
البا والميم مالم؟
قيافه ، يعني لازم ينطق الميم في الغنيه زي ما بينطقها علي عثمان محمد طه؟ الزول
ده لما يصل لموضع كلمه فيها الميم لو جا ماشي فيها صايلنط بنغنيها معاهو في دواخلنا زي ما كتبوها،
إنتي كنتي بتسمعي حسن عطيه ، سمعتيهو يوم قال حرف في أي أغنيه زي مدرس العربي؟ أبو علي بياكل الحروف
وينخنخا بطريقة إبداعيه عن علم ومعرفه مش زي بتاعين اليومين ديل البياكلوا الكلمات ونحن ناكل في خاطرنا.
عبدالعزيز زاتو مرات - زي أم كلثوم- بيعملا متعمدا ، يعمل الدايرو ، ديل بيضقلوا بالغنا لأنهم
حُرَفا ومافي زول بيغالتم، ما سمعتي زميلتنا في البورد بتغني ( ألا المسا ألا المسا)؟ واللات والعُزى،
بعدين مسألة القيافه دي ما ليها علاقة بالبلبله القالتا بت بتي ، ده فنان (رفيع) المستوى ، دايرانا
نسمعو بالكيلو يعني؟ بت بتي دي - الله يرحما - لو كانوا زبائنها من النوع 8 سلندر كان تركت الشغل
وهي تشجع النحافه لأسباب عمليه ، القصه أداء اغاني وليست مواصفات موريتانيه وخطوه اتنين مستحيل.
أها كمان عايز أقول ليك قوله، الوش الصبوح برضو ما ليهو علاقه بالطرب ، والله يا سلمى والله ، وما طالباني
حليفه ، أطرب لكثير من الفنانين اللي شايفنهم الناس شينين بالمواصفات العاديه وفي ذات الوقت تصيبني
بالضجر مغنيات يعتقد البعض أن فيهن شئ من الملاحة ، (مدام توسو) مثلا ، أو (بَلى الخَلعَه) أو... مافي داعي.
الجمال دا يا سلمى أثر يتركه المرسِل في نفس المستقبل وليس صفات في المرسِل، أها أنا الزول البيطربني
بشوفو قيافه وفايت ..
مِرَوِّح وين.


حاشاك الطرطشه يا العزيزه،

Post: #61
Title: Re: الفنان دا منو ؟
Author: الطيب شيقوق
Date: 07-04-2010, 11:26 AM
Parent: #59

ود القرشي


حظك شايف فوق المرتضى سخى ليك وكتب ليك كلام قدر قينان المانيا في الارجنتين


Quote: الترجمه
ساعدنا بالترجمه
البورد دا فيهو ناس شهاده عربيه وفيهو ناس مولودين في زيورخ
والغالبية العظمى جنسية مزدوجه وبيشجعوا ألمانيا..


ههههههههههههههههههههههههههههههها

دي قدله يا مولاي حافي حالق بالطريق الشاكي الجكس ذاتو .

Post: #65
Title: Re: الفنان دا منو ؟
Author: mamkouna
Date: 07-04-2010, 11:37 PM
Parent: #57



حامد اب سبح
...

احترامي اليك

http://www.youtube.com/watch?v=GaIaH_EOgA8&feature=related

........................

ابني عشك يا قماري

http://www.youtube.com/watch?v=NRfaHz01djs&feature=related

..........................

يا بلاد النور

http://www.youtube.com/watch?v=v_Wz3AuihLI&feature=related

....................



Post: #74
Title: Re: الفنان دا منو ؟
Author: محمد المرتضى حامد
Date: 07-05-2010, 06:38 PM
Parent: #53

Quote: فقط هذه العزه حاولت وفشلت حسب اعتقادي

والله يا طارق استمعت وشاهدت الفيديو كليب الذي رفدتنا به عزيزتنا ممكونه،
ياخ لو أنها قصدت التقليد فهذا فشل ذريع ، لم أتصور ابدا أن تقم أختنا المؤدية
بما قامت به، عبدالعزيز داؤود لايمكن تقليده ولايمكن لأي كائن أن يرث صوتا أو موهبة
كما لو أنها جزء من التركة تجري عليها الأنصباء الشرعية في المواريث.

Post: #62
Title: Re: الفنان دا منو ؟
Author: حليمة محمد عبد الرحمن
Date: 07-04-2010, 01:06 PM
Parent: #52

الاخ عثمان محمدين

Quote: أختنا حليمة: ضحكينا معاك ... التنده يعني شنو...


التندة يا اخ عثمان كانت توجد في عربات الاوستن والسفنجات والعربات الكبيرة عموما . وهي المظلة التي تعلو السائق وبتكون مغطاة من الخارج بمشمع غالبا ما يكون لونه اخضر .
واحيان يكون للتندة درابزين . مساعد العربية وغيره من الشباب "الشفاتة" او التفتيحة يركبون على التندة فوق ويمدون ارجلهم حتى تلامس الزجاج الامامي وهم اكثر الركاب استمتاعا
بالمناظر لانهم زى الطالعين على السطوح .
خطورة ركوب التندة هي عندما تمر العربية على اشجار بها فروع متدلية لان الافرع بالذات الشوكية ربما تصيب راكبي التندة لانهم على اعلى قمة في العربية .
غاتيو تندة محمد المرتضى دي كان فيها تورية او جناس الا يفكهن هو ذات نفسه..

اها يا اخ عثمان خوفي هسع دي يجينا الطيب شيقوق ويمسك الموضوع ويبقى سيدو ويقول انه كان بشنق الطاقية وبركب في التندة فوق ولسان حاله بيقول يا دنيا ما فيك الا انا .

Post: #64
Title: Re: الفنان دا منو ؟
Author: الطيب شيقوق
Date: 07-04-2010, 08:05 PM
Parent: #62

Quote: تاني جاييك، بس شيقوق يديني فرقه.


والله ما اديك فرقة حالف ادخل تووووش طالما الحكاية جابت التندة

التندة دي انا من عشاق ركوبها لا سيما في ايام حصاد الذرة والسمسم - كنا - ايام الحصاد - نذهب الى الضهاري بالعربية السفنجة وهذه تتميز عن الاوستن بتندتها المهولة - كنت اجيد ركوب التنادي واحبه جدا لانها تمكنك من رؤية المناظر التي لا يمكن لبقية الركاب مشاهدتها كما ان الركوب على التندة يجعلك تتحسب لكل المضبات والحفر التي تظهر فجأة للسائق وتضطره لان يدوس فرملة حارة تنقل ركاب المؤخرة للمقدمة مسببة لبعض منهم متاعب بدون تعويضات !!! كما هي الحال في ابي رجيلة وبصات البراري عند ناس البندر .

تاني كان داير تفط فط




Post: #66
Title: Re: الفنان دا منو ؟
Author: محمد المرتضى حامد
Date: 07-05-2010, 01:38 AM
Parent: #51

Quote: نصر الدين .... خليفة أبو داؤود

والله يا أحمد الإبداع دا ما فيهو خلافه تب،
نصرالدين زول غناي مافي كلام لكن الخلافه دي
خليها للطرق الصوفيه وناس السجاده ال..... يه،،
ياخ أبوداؤود دا لما يغني لبازرعه ويقول (كانت ذراعاك لرأسي مرقدا) ..





غايتو.

Post: #67
Title: Re: الفنان دا منو ؟
Author: محمد المرتضى حامد
Date: 07-05-2010, 06:18 AM
Parent: #66

Quote: رأي في هذا الفنان "نصر الدين" أبعد ما يكون عن آداء الراحل المقيم أبو داؤود
وشتان بينهما ... ولم أستطع أن أكمل الأغنية التي أداها ...

الأخ عثمان سلام،
أوضحت أعلاه أن الشاب نصرالدين ( على وزن الشاب ميمون أو خالد) لم يحاول تقليد
الشامخ عبدالعزيز ولم يسع للتعامل مع الأغنية كما يفعل الجيلي وفي ذات الوقت
سعى لإبراز بعض نكهة عبدالعزيز في الأغنية وفعل ذات الشئ في (مساء الخير)
عندما سمعتها لأول مرة ، والواقع شخصي الضعيف مستمع عادي ومعرفتي بالنقد
هنا تعادل معرفتي بهندسة النانو، أما قولك أنك لم تستطع إكمال الأغنية
فهذا شئ طبيعي إلهي ، فلكل إنسان ما يشنف أذنيه وما (يُشلَِتهما) ، مش
كده ، في زول عاقل ومسغف قبل كده قال لي أبوداؤود دا لما أسمــعو
بتجيني نفسيات مما أنا سغير ، تصدق الزول دا بيعشق فنان لو قلتو
ليك حاتخلي البورض، المهم كان تكمل الإستماع للأغنية عشان يمكن
كان في الثواني الأخيره تغير كلامك ، يعني تسمع (القضيه)
للآخر قبل ما تحكم،
يا عثمان حكِّم ضميرك.
تسلم يا سيدي.

Post: #68
Title: Re: الفنان دا منو ؟
Author: الطيب شيقوق
Date: 07-05-2010, 06:27 AM
Parent: #67

Quote: اها يا اخ عثمان خوفي هسع دي يجينا الطيب شيقوق ويمسك الموضوع ويبقى سيدو ويقول انه كان بشنق الطاقية وبركب في التندة فوق ولسان حاله بيقول يا دنيا ما فيك الا انا


شايف المداخلة المقتبسة دي يا حلوم وعارفها من امبارح وقلت اديك فطيطة لكن الانكراشة حامياني

والله الناس البفطوا ديل حديد ياباني عديل كدا

المرتضى ات معاى ولا سارح مع فنانك؟

Post: #69
Title: Re: الفنان دا منو ؟
Author: حليمة محمد عبد الرحمن
Date: 07-05-2010, 06:36 AM
Parent: #68

Quote: والله الناس البفطوا ديل حديد ياباني عديل كدا


هههههههههههههههههههههههه

Post: #70
Title: Re: الفنان دا منو ؟
Author: الطيب شيقوق
Date: 07-05-2010, 09:09 AM
Parent: #69

حليمة

المرتضى الياباني بيكون الحين بين طيات السحاب مقلع من اتوا متوجها الى الخليج

صدر تحت ختمي وتوقيعي

شيقا الكوري تجميع جياد

Post: #71
Title: Re: الفنان دا منو ؟
Author: خالد المحرب
Date: 07-05-2010, 09:23 AM
Parent: #70

الاخ الاستاذ محمد المرتضى لك التحيه لضيق الوقت انا جيت توش بدون ما اقرا البوست كاملا
ولكن لفت انتباهى التعليق بتاع الود طروقى
Quote: بعد ذاك ظهرت اختنا عزة بصوتها البعيد كل البعد عن ود داؤود وابداعه

لتتبني اغانيه كانما ورثت بقاله ناصيه.

شي عجيب


فعلا عازه خست اغانى ابوها لان تلك الحنجره الذهبيه من الصعب ان يقلدوها الرجال الخشن الاصوات
فما بالم بصوت امراءه وعليه مفروض يشكر ود القضارف على تتبعه للفنان ابوداؤد هناك كم فنان يصعب
تقليدهم منهم ابوداؤد حسن عطيه مصطفى سيد احمد عثمان حسين على سبيل المثال لاالحصر فهذا الشاب مشكور جدا انا تتبع هذا الصوت الجسور الذى يصعب جدا تقليده من ابناء جلدته شكرا مره اخرى استاذى محمد المرتضى
والتحيه عبرك الى العريبي ود شيقوق تحياتى ......

Post: #72
Title: Re: الفنان دا منو ؟
Author: خالد المحرب
Date: 07-05-2010, 09:33 AM
Parent: #71

Quote: التندة يا اخ عثمان كانت توجد في عربات الاوستن والسفنجات والعربات الكبيرة عموما . وهي المظلة التي تعلو السائق وبتكون مغطاة من الخارج بمشمع غالبا ما يكون لونه اخضر .
واحيان يكون للتندة درابزين . مساعد العربية وغيره من الشباب "الشفاتة" او التفتيحة يركبون على التندة فوق ويمدون ارجلهم حتى تلامس الزجاج الامامي وهم اكثر الركاب استمتاعا
بالمناظر لانهم زى الطالعين على السطوح .
خطورة ركوب التندة هي عندما تمر العربية على اشجار بها فروع متدلية لان الافرع بالذات الشوكية ربما تصيب راكبي التندة لانهم على اعلى قمة في العربية .


والله ياحليمه ات قديمه قدم الهوستن ووصافه وصف البسمع كلامك دا يقول كنت جلابيه ولا مساعدى
لكن التنده هسع مافى ليها طريقه مع السرعه والعربات السمحات ديل والناس البركبو التنده ماتو

Post: #73
Title: Re: الفنان دا منو ؟
Author: حليمة محمد عبد الرحمن
Date: 07-05-2010, 06:12 PM
Parent: #72

فوووووووق...
الى حين عودة الاخ محمد المرتضى حامد.

Post: #75
Title: Re: الفنان دا منو ؟
Author: الطيب شيقوق
Date: 07-05-2010, 06:53 PM
Parent: #73

Quote: والناس البركبو التنده ماتو


منو القال ليك ماتو يا العشاء اب لبن؟

اهو انا القدامك دا هسع اكان رجعت الاجازة وصادفت دق العيش وقطع السمسم طوالي انشلخ ليك معاهم فووووووق تنداوي بس واخت درسة العنكوليب قدامي انقي ساااااااااااى واجدع في الشارع والطاقية في الجيب من الهواء .

قال مافي ناس


بس اوصيك كان بتدخن ما تشيل البينسون الحنيّن شيل البرنجي وولع السجارة قبل العربية تتحرك ودائما عمرها الافتراضي وانت في التندة بختلف عن عمرها في اى موقع ركوب اخر في السيارة .

Post: #76
Title: Re: الفنان دا منو ؟
Author: محمد المرتضى حامد
Date: 07-05-2010, 11:38 PM
Parent: #75

أستاذنا الجليل منعم،
شكرا على (جسر علي المك) والكتابة المائزة عن ذلك النضر الأديب،
كنت أسكن أيام الطلب مع أخي وصديقي عادل مختار عباس مع آخرين، وكانت لعادل تسجيلات
وصور توثق للعلاقة الروحية السامية بين والده مختار وعلي المك وعبدالعزيز تمنيت لو
أنني استنسختها لأنها جد جميلة غزيرة، كنت كتبت في أكثر من بوست عن طرائف أولئك
العماليق وكيف أن مختار كان ( بيشرِّط جلابيتو) عندما يبلغ به الطرب مداه في أغان
بعينها، وكانوا حين يطلبون واحدة منها يقول لهم ابوداؤود:
أنا ممكن أغنيها بس مختار دا شوفو ليهو عراقي قديم.
أولئك الأفذاذ رحلوا عنا وهم في أعلى حالات عطائهم وإبداعهم لكنها إرادة المولى
ولكل أجل كتاب ، ومما يؤكد أصالة ما قدموا لنا أننا وبعد 26 عاما على رحيل
عبدالعزيز نكتب عنه ونطرب له ونحتفي به وبكل من صاحبه.
اللهم ارحمهم واغفر لهم واجعل الجنة مثواهم.


779.jpg Hosting at Sudaneseonline.com

Post: #77
Title: Re: الفنان دا منو ؟
Author: HAYDER GASIM
Date: 07-06-2010, 01:01 AM
Parent: #76

العزيز ... ود المرتضى ... تسلم

Quote: عينك تخوِّف.


تعرف دخلتني خوفة ما راحت إلا بعد
أن قرأت تعليقك هذا... عالم ########ات
بشكل.

الغنا حلو ... والتواقيع الموسيقية
جميلة, لكن يا بابا الحنجرة قسمة.

... يادوبي في المداخلات الأولى ومستمتع.

... بجيكم صادي ... مع تحياتي لضيوفك الكرام

Post: #78
Title: Re: الفنان دا منو ؟
Author: محمد المرتضى حامد
Date: 07-06-2010, 03:59 AM
Parent: #77

Quote: ( من زمن مستني عودة قلب راحل ) يا يغنيها ابو داؤود ذات نفسو ..أو... حامد اب سبح !!!
سمعت بيهو؟

ممكونه، اللقطات اللي جبتيها لعزه داؤود دي لو كانت ( بعد تحسن صوتها) زي ما قلتي دي تبقى
مشكله حقيقيه ، شوفي يا ست ، أنا لاأعرف في الصوتيات وكلام سوبرانو وألتو وتينور وكلام ناس
الموصلي وأنس العاقب الكبار كبار دا، أنا بعرف إنو الزول صوتو سمح من مجرد كلامو دعك عن الغنا،
الزول البيطربني لامن أسكر وأتَّرتح - حتى لو راقد - دا الزول الصوتو سمح، وحياتك يا عزيزه
زولتك دي بمجرد ما سمعتها قفلت اللينك لأني عندي كباية شاي ما داير أخربا,مع احترامي لها.
أبوسبح دا ما عجبني في ( أنا في شخصك) لكن من (خامة) الصوت أعتقد إنو ممكن يغني
لعبدالعزيز ( كلمة "خامة" دي مش حلوه؟ شكرا)، المهم يا ممكونه في موضوعي دا إنو
ما بالضروره كيما نطرب لفنان أن يقلد غيره كوبي آند بيست. هسه أنا بيطربني
الأثيوبي اللي بيغني ارقيبه قزازة أصير والأُيون متل الفناجين) رغم الفارق
الشاسع وواسع بينه وبين وردينا.
تسلمي .

Post: #79
Title: Re: الفنان دا منو ؟
Author: الرشيد شلال
Date: 07-06-2010, 09:32 AM
Parent: #78


سيدى ود مرتضى لك التحايا وحمدلله على السلامة ( انت جيت من كندا ولالسع ؟)

مجرد فرد مساحة يذكر فيها المبدع والملهم رحمه الله ابودأود هى ابداع

نستظل دوما تحت مظلة التميز ان وجدت ، وهأنت كالعادة تضيف بعدا للمظلة ومريح سكن

هذا الشاب لانقول صوته يشابه صوت ابودأود فألاخير استثنائى ولكن يعجبنى الحضور وهداوة البال ورواقة الغنا

ومثل هولاء نهرب اليهم دوما نستمتع بهم فى ظل الهرج الذى اصبح يغطى ثقافة الغنا .

الحبيب ود مرتضى لك من الشكر اجزله واكيد الاحترام



Post: #80
Title: Re: الفنان دا منو ؟
Author: الطيب شيقوق
Date: 07-06-2010, 09:55 AM
Parent: #79

الشلالي

Quote: سيدى ود مرتضى لك التحايا وحمدلله على السلامة ( انت جيت من كندا ولالسع ؟)

مجرد فرد مساحة يذكر فيها المبدع والملهم رحمه الله ابودأود هى ابداع

نستظل دوما تحت مظلة التميز ان وجدت ، وهأنت كالعادة تضيف بعدا للمظلة ومريح سكن

هذا الشاب لانقول صوته يشابه صوت ابودأود فألاخير استثنائى ولكن يعجبنى الحضور وهداوة البال ورواقة الغنا

ومثل هولاء نهرب اليهم دوما نستمتع بهم فى ظل الهرج الذى اصبح يغطى ثقافة الغنا .

الحبيب ود مرتضى لك من الشكر اجزله واكيد الاحترام


قلت اصبرك على بال ما يجي دورك في التعقيب عليك من قبل المرتضى - باقي لي انت نفسك قصير بالحيل

Post: #81
Title: Re: الفنان دا منو ؟
Author: Abdul Monim Khaleefa
Date: 07-06-2010, 11:57 AM
Parent: #80

images10sudan1sudan.jpg Hosting at Sudaneseonline.com

علي المك

الأصدقاء الأعزاء

Quote: و هذه هدية مننا..الجيلي عبد الماجد..وهو أقرب صوت للعملاق عبد العزيز محمد داوؤاد..
شكراً العزيز Kabar فلقد أعدت لي ذكرى مناسبة جميلة جمعتني مع الفنان الجيلي (آمل أن يكون ما زال يذكرها).. كانت المناسبة حفل أقامه لي بعض الأهل والأصدقاء بمدينة كوستي في الثمانينات، أطربنا فيه الجيلي بأدائه للعديد من أغنيات أبو داؤود. ورغم أنني لا أفهم كثيراً في تقييم أصوات المغنين ، حيث أنني أطرب فقط كما يطرب الهواة! إلا أن تشابه، بل تطابق البصمة الصوتية بين الجيلي وأبو داؤود كان أمراً مدهشاً.
أول ما خطر إلى ذهني أن أدعو هذا الشاب لزيارتي في الخرطوم (وهو من مدني على ما أذكر)، وذلك بهدف تقديمه لصديقي بروفيسور علي المك، لثقتي من أنه خير من يقيمه ويهتم به ويقدم له النصح المفيد الذي يساعده على صقل موهبته. وبالفعل تمت الزيارة، وتحقق التقديم، واستقبله برفيسور علي المك بالبشر والترحاب والتشجيع. انتهت مهمتي بالتسليم والتسلم! وشكرني العزيز علي المك كثيراً على تلك الهدية النفيسة!.
نسبة لظروف أسفاري، وبقائي خارج السودان، لم أقابل الجيلي من بعدها، ولم أسمع عنه إلا الآن من خلال هذا البوست .. ومن هنا أيضاً أتوجه له بالتحية والأمنيات الطيبة.. وكم أنا سعيد أن اسمع عن تقدمه علي طريق الفن.. الرحمة والمغفرة لصديقنا الراحل علي المك.

محبتي
عبد المنعم خليفة

Post: #82
Title: Re: الفنان دا منو ؟
Author: othman mohmmadien
Date: 07-06-2010, 04:00 PM
Parent: #81


Quote: اها يا اخ عثمان خوفي هسع دي يجينا الطيب شيقوق ويمسك الموضوع ويبقى سيدو ويقول انه كان بشنق الطاقية وبركب في التندة فوق ولسان حاله بيقول يا دنيا ما فيك الا انا .


شكراً أختي الكريمة حليمة - على هذا الشرح الوافي وكأنه مصور بالنسبة لي - شكرا على تعريف التندة: وبالمقارنة بباكستان وأفغانستان يمكننا أن نرى أجمل التندات زينة - صورة من المشاهد رأيتها في التلفزيون وتزيين للسيارات في تلك المناطق ... ولا أعتقد أن شعب يزين السيارات مثلما يزينوها هم

وفعلا يا أخت حليمة ... شيخ الطيب شيقوق قطع قول كل خطيب... إتحكر في التندة وولع سيجارته ... قصبه ... وخت الطاقية في جيبه عشان الهواء مايشيلها ... والمركوب الواسع جلس عليه عشان ما يقع منه ... والجزلان إتوهط جيب السديري بدل الجلابية ...خايف عليه وعلى القريشات الفيه .. ما فيهن بركة لكن بيرقعن اليوم الأسود خاصة الجنيات/العيال كتار وبلاويهم كتيرة - ده عايز لالوبه وده عايز نبقة وآخر عنكوليبة - ودندرمة الكركدي - وسيجارته برنجي ما من عوز ولكن بسبب "العمر الافتراضي"- وأحلامه الاستثمارية الخضراء ممتدة على مدى البصر وخضرة الضريساء المشرورة على الأرض - إصلوا من زمان بمني نفسه بالإستثمار فيها ... وكتب بوست عن بذورها قبال كدي ... والهواء ما خلاني أسمعه لكن أعتقد بغني في يا السايق الفيت ...
يا الطيب
إنت من زمن:
قوم بي أخد سنده بالدرب التحت ...
وأحيانا يدندن
شوف سايق الفيات الليلة كيفن هاش
والشجر الكبار .. بقى شوفنا ليهو طشااااااااااااااش يا
السايق الفيات

يا الطيب
الناس بقت
اللكزس هدية ما علاقة شخصية
أها اللكزس ده وين تتوهط تندته

Post: #83
Title: Re: الفنان دا منو ؟
Author: othman mohmmadien
Date: 07-06-2010, 05:19 PM
Parent: #82


Quote: المهم كان تكمل الإستماع للأغنية عشان يمكن
كان في الثواني الأخيره تغير كلامك ، يعني تسمع (القضيه)
للآخر قبل ما تحكم،
يا عثمان حكِّم ضميرك.
تسلم يا سيدي.


الأخ الفاضل محمد المرتضى حامد:
تحية طيبة ...
حكمت ضميري وما بنختلف وريني بس قانون هواي ... ربما هوى عبد العزيز قد أعماني وجعلني غير منصف أخي محمد ... وحينما قرأت كلمة حكم ضميرك - سيل من الكلمات الجارفة التي تحمل أغاني أبو داؤود قد برزت في الذاكرة: انا من شجوني - صباخ الخير يا الأمير - نسيتنا وما ودعتنا - دقت الأجراس - فينوس - زرعوك في -قلبي - طولت ما رديت - اثري الفنان عبد العزيز محمد داؤود الحياة الفنية بروائع من الأغاني لم تزل خالدة وتردد من الجميع وعشقه الكثيرون من ذوي الآذان النظيفة التي تطرب حقا لصوته - عموماً التحية لك ... ولهذا الواعد ... وربنا يوفقه ...

Post: #84
Title: Re: الفنان دا منو ؟
Author: الطيب شيقوق
Date: 07-06-2010, 06:44 PM
Parent: #83

محمد المرتضى والضيوف الكرام كيف امسيتوا؟

الاخ عثمان محمدين



Quote: وفعلا يا أخت حليمة ... شيخ الطيب شيقوق قطع قول كل خطيب... إتحكر في التندة وولع سيجارته ... قصبه ... وخت الطاقية في جيبه عشان الهواء مايشيلها ... والمركوب الواسع جلس عليه عشان ما يقع منه ... والجزلان إتوهط جيب السديري بدل الجلابية ...خايف عليه وعلى القريشات الفيه .. ما فيهن بركة لكن بيرقعن اليوم الأسود خاصة الجنيات/العيال كتار وبلاويهم كتيرة - ده عايز لالوبه وده عايز نبقة وآخر عنكوليبة - ودندرمة الكركدي - وسيجارته برنجي ما من عوز ولكن بسبب "العمر الافتراضي"- وأحلامه الاستثمارية الخضراء ممتدة على مدى البصر وخضرة الضريساء المشرورة على الأرض - إصلوا من زمان بمني نفسه بالإستثمار فيها ... وكتب بوست عن بذورها قبال كدي ... والهواء ما خلاني أسمعه


الاحتياج الدائم لعمر الطفوله وزمن الصبا والعمر والتجارب والمراحل حميض عنكوليب تبش موليتة - يا عثمان اخوي - تاخذ الانسان فى تجوال ملزم وتتشتت فى سماء الكون احاسيس الالفه والامان.. فمحطات الطفولة لن تنمحى من خيال الذاكره ابدا..حتى تفاصيل الاشكال . قد تغيب الاسماء لكن هنالك اسماء حفرت فى اخاديد الذاكره لن تنمحى..ويبدا الطواف الذى فى اجتراره يمنح دعشات تلك الانسام ويجدد خلايا الروح ويوصل مسافات العمر ليبقى ذلك الارتباط هو حلم الخيال الامانى والاحلام..وكل منا يريد ان يعود الى زمن الطفوله ورفقة الصبا وركوب التندات عله يستطيع تعديل واصلاح مدى الرؤيا فى مستقبل عالم مضطرب..لان متعة اللحظه وقتها كان قائما على احساس ذلك الامان فى البيت والحله والقريه والطريق والمدرسه ..وكانت تلك - يا عثمان اخوي - هي نفحات ليلى .... و نسائم الزمن الجميل .

Quote: لكن أعتقد بغني في يا السايق الفيت ...
يا الطيب
إنت من زمن:
قوم بي أخد سنده بالدرب التحت ...
وأحيانا يدندن
شوف سايق الفيات الليلة كيفن هاش
والشجر الكبار .. بقى شوفنا ليهو طشااااااااااااااش يا
السايق الفيات



صدقت يا عثمان فهذه الاغنية خلدت في وجداني منذ طفولتي معهاالطير الخداري وبعد ايه وقصة حب طويلة وعبد العظيم حركة يا قلبي توب وعبد الوهاب الصادق ما احلى التصافي وابو عبيدة حسن عقد الجواهر وكمان محمد سعد دياب وانت الذى سكن الجوارح .

Quote: يا الطيب
الناس بقت
اللكزس هدية ما علاقة شخصية
أها اللكزس ده وين تتوهط تندته


اللكزس بدون حنية واللكزيس بدون همة لتلافي الموجوعة للولادة في وقت الهجعة لا طعم ولا لون ولا رائحة لها يا عثمان .

Post: #85
Title: Re: الفنان دا منو ؟
Author: محمد المرتضى حامد
Date: 07-06-2010, 07:18 PM
Parent: #84

Quote: تقليدهم منهم ابوداؤد حسن عطيه مصطفى سيد احمد عثمان حسين على سبيل المثال لاالحصر فهذا
الشاب مشكور جدا انا تتبع هذا الصوت الجسور الذى يصعب جدا تقليده

ود المحرب سلامات ياخ وحمدالله على الشوفه،
كلامك في محلو ولو كنت في مكان عزة داؤود لما خاطرت حتى بإلقاء (نكته) أو طرفه لعبدالعزيز
دعك عن أداء واحده من أغنياته لأن أصوات الرجال تقصر عن تقليده دعك عن أصوات النساء وما تتميز
به من رقة، ياخي أبوداؤود صوته حقو براهو ما تقول لي كيني روجرز أو إيزاك هيز. والله لوكنت
مكان عزة لما اعترضت على أداء أي شخص أغنيات أبيها لأنها ملكية عامة تم تأميمها لمصلحة البلاد
الوطنية العليا لايجري عليها التخصيص مدى الحياة.
ياخ أغاني أبوداؤود دي زي مكتبة الكونغرس والحدائق العامه واحد.

Post: #91
Title: Re: الفنان دا منو ؟
Author: محمد المرتضى حامد
Date: 07-08-2010, 05:28 AM
Parent: #84

Quote: فهذه الاغنية خلدت في وجداني منذ طفولتي معهاالطير الخداري وبعد ايه وقصة حب طويلة وعبد العظيم حركة يا قلبي
توب وعبد الوهاب الصادق ما احلى التصافي وابو عبيدة حسن عقد الجواهر وكمان محمد سعد دياب وانت الذى سكن الجوارح

والله يا الطيب هي أغنيات خالده ومحفوره بالليزر جوه الجوه لكن بعد إيه والطير المهاجر ديل
يدخلوا أبحاث الطب البديل ولا يساورني شك في انهما تكمن فيهما معان فيها شفاء للناس.
إيدك وخاطرك معانا يا طيب؟



-
بالله كنت بتحب أغنية سائق الفيات رغم التيمس؟

Post: #88
Title: Re: الفنان دا منو ؟
Author: محمد المرتضى حامد
Date: 07-07-2010, 01:49 PM
Parent: #80

قلت اصبرك على بال ما يجي دورك في التعقيب عليك من قبل المرتضى - باقي لي انت نفسك قصير

والله زول صبرو زي شلال نادر

Post: #87
Title: Re: الفنان دا منو ؟
Author: محمد المرتضى حامد
Date: 07-07-2010, 01:30 AM
Parent: #79

Quote: هذا الشاب لانقول صوته يشابه صوت ابودأود فألاخير استثنائى ولكن يعجبنى الحضور وهداوة البال ورواقة الغنا

ومثل هولاء نهرب اليهم دوما نستمتع بهم فى ظل الهرج الذى اصبح يغطى ثقافة الغنا .

شيخنا العارف بالله مولاي رشيد،
لا أدري سبب ميلي للإستماع إلى كثير من الشباب وهم يؤدون أغنيات قديمة بأصواتهم
ربما بسبب تطور الآلات الموسيقية ونقاء التسجيل ، يعني حاليا أسعى للحصول
على تسجيلات أحمد بركات وأطرب له رغم أنه يقلد خاله الشاهق أحمد المصطفى،
الجانب السالب في هذه المسألة أننا لم نعد نسمع للفنانين الجدد إلا إذا غنوا
القديم - شريطة أن يجيدوا الأداء - وهذا أغلق مسامعنا عن الأغنيات الجديده
سوى بعض أغنيات عقد الجلاد وعاصم البنا ، هسه يجي زول يقول لي نوستالجي
برتبة عريف، نعم ، فالغناء بعض من النفس ويرتبط بالوجدان والزمكان
وتاني ما عندنا غير ما مضى.
شكرا يا مولانا
.

Post: #86
Title: Re: الفنان دا منو ؟
Author: محمد المرتضى حامد
Date: 07-06-2010, 10:02 PM
Parent: #77

Quote: الغنا حلو ... والتواقيع الموسيقية
جميلة, لكن يا بابا الحنجرة قسمة.

بالله يا حيدر أسمعو كويس وقول لي،
حقيقة الحناجر قِسَم ،
تسلم يا العزيز.

Post: #89
Title: Re: الفنان دا منو ؟
Author: الطيب شيقوق
Date: 07-07-2010, 07:15 PM
Parent: #86

Quote: ود المحرب سلامات ياخ وحمدالله على الشوفه،
كلامك في محلو ولو كنت في مكان عزة داؤود لما خاطرت حتى بإلقاء (نكته) أو طرفه لعبدالعزيز
دعك عن أداء واحده من أغنياته لأن أصوات الرجال تقصر عن تقليده دعك عن أصوات النساء وما تتميز
به من رقة، ياخي أبوداؤود صوته حقو براهو ما تقول لي كيني روجرز أو إيزاك هيز. والله لوكنت
مكان عزة لما اعترضت على أداء أي شخص أغنيات أبيها لأنها ملكية عامة تم تأميمها لمصلحة البلاد
الوطنية العليا لايجري عليها التخصيص مدى الحياة.
ياخ أغاني أبوداؤود دي زي مكتبة الكونغرس والحدائق العامه واحد


البطحاني بعد فتّح وعرف السواها ما اظن يجيك لاج تاني

Post: #90
Title: Re: الفنان دا منو ؟
Author: محمد المرتضى حامد
Date: 07-07-2010, 08:06 PM
Parent: #89

Quote: وحينما قرأت كلمة حكم ضميرك - سيل من الكلمات الجارفة التي تحمل أغاني أبو داؤود قد برزت في الذاكرة: انا من شجوني - صباخ الخير يا الأمير - نسيتنا وما ودعتنا - دقت الأجراس - فينوس - زرعوك في -قلبي - طولت ما رديت - اثري الفنان عبد العزيز محمد داؤود الحياة الفنية بروائع من الأغاني لم تزل خالدة وتردد.


أنا من شجوني
مساء الخير ياالأمير
نسيتنا وما ودعتنا
أجراس المعبد
فينوس
زرعوك في قلبي
طولت ما رديت
صبابه
صغيرتي
من غير أسباب
بدرالحسن فاح
نعيم الدنيا

ودرر كثر مكانها الخاطر ،
وقيل أنه كان يعشق من أغانيه (زهرة الروض) ودائما ما يترنم ب:
( مناي في الدنيا قبل الرحيل أخلي العالم طربا يميل )
بس تاني يا عثمان ما تكتب اسماء الأغاني دي مع بعض لأنها بتبقى أوفردوز على العين



هل أنت معي؟

Post: #92
Title: Re: الفنان دا منو ؟
Author: حليمة محمد عبد الرحمن
Date: 07-08-2010, 09:45 AM
Parent: #90

محمد المرتضى كيفنك يابا...
ياخي طلب بالله ان شاء الله القاهو عندك..
عايزة صغيرتي... حفظ..
عشان اقعد اسمعها في اي حتة..
اها ما بلقاها عندك دحين؟

Post: #93
Title: Re: الفنان دا منو ؟
Author: محمد المرتضى حامد
Date: 07-09-2010, 05:56 AM
Parent: #92

يا حليمه بجيب ليك (صغيرتي) من ( شفوت) النت ناس محمد عثمان وهيثم لبيب وحسام صحافه 30
بس في الأول أسمعي عاصم عمل شنو في الأغنيه دي (صبابه) ،
ما لا أشك فيه أن بازرعه نفسه لم يتوقع هذا السقف سيما في (بكية) عاصم
حين غنى ( كانت ذراعاك لرأسي مرقدا)..
اللهم ..
يا الله أجرنا من عذاب النار..




Post: #94
Title: Re: الفنان دا منو ؟
Author: محمد المرتضى حامد
Date: 07-09-2010, 10:26 PM
Parent: #93

مازلنا بانتظار مساء الخير بصوت نصرالدين يا شباب


كرامه لله

Post: #95
Title: Re: الفنان دا منو ؟
Author: محمد عثمان
Date: 07-10-2010, 08:23 AM
Parent: #94

ود المرتضى...


سلااام ليك و لضيوفك الكراام


متابعين من قوله تيت و فعلا بوست جميل و دسم

جايينك بالمطلوب..


تسلم..

Post: #96
Title: Re: الفنان دا منو ؟
Author: محمد المرتضى حامد
Date: 07-10-2010, 08:27 PM
Parent: #95


Quote: جايينك بالمطلوب..

يا باشمهندس سلام،
راجينك وحِسَّنا إنقَرَش ،
عساه لايكون كوعد عرقوب،
ب (أرشيفك) أنا مستجير يا ملاك أي والله.
تسلم يا الأمير.

Post: #97
Title: Re: الفنان دا منو ؟
Author: محمد عثمان
Date: 07-10-2010, 09:37 PM
Parent: #2

مساء الخير للجميع...

Post: #98
Title: Re: الفنان دا منو ؟
Author: حليمة محمد عبد الرحمن
Date: 07-10-2010, 10:04 PM
Parent: #97

Quote: يا حليمه بجيب ليك (صغيرتي) من ( شفوت) النت ناس محمد عثمان وهيثم لبيب وحسام صحافه 30
بس في الأول أسمعي عاصم عمل شنو في الأغنيه دي (صبابه) ،
ما لا أشك فيه أن بازرعه نفسه لم يتوقع هذا السقف سيما في (بكية) عاصم
حين غنى ( كانت ذراعاك لرأسي مرقدا)..
اللهم ..
يا الله أجرنا من عذاب النار..

نعلك طيب يا محمد... كان ما العتالة حارة....قربت اقولك علي النبي خارب لي مزاجي مالك؟
يا خ البنا ده هد الغنية دي عديل ورمى ساسها في الواطة دي... اكتر حاجة غايظاني لما بجي في حتة
بِعَلِق... اي والله بعلق زي الماشي في رمال بارا...اسال الطيب شيقوق بوريك التعليقة دي كيفنها وبوصفها ليك؟
والله المزاج ده بعد ده ما بعدلوا الا صغيرتي الصغيرة..
----
فاتني ان امر على البوست الايام الفائتة لاشكرك (كثيرا) على عمايل (الطُلَب ) الجبتهم..
بس نقول شنو ؟ الله قادر..والكيبورد ليهو رافع.
(بالله الوش اللخدر ده اصلي ما بريده).
تنهدات زي حقت بدر الدين الامير... قاتلك الله يا بكري ان لم تفعل الوجوه الضاحكة..

Post: #99
Title: Re: الفنان دا منو ؟
Author: الطيب شيقوق
Date: 07-10-2010, 10:25 PM
Parent: #98

Quote: بِعَلِق... اي والله بعلق زي الماشي في رمال بارا...اسال الطيب شيقوق بوريك التعليقة دي كيفنها وبوصفها ليك؟
والله المزاج ده بعد ده ما بعدلوا الا صغيرتي الصغيرة..


شكيتك على الله يا حليمة التعليقة دي علا يختوا ليها صاجات - تعرفي الصاجات ؟- ويرموا ليها ترس تقيل

Post: #100
Title: Re: الفنان دا منو ؟
Author: حليمة محمد عبد الرحمن
Date: 07-10-2010, 10:34 PM
Parent: #99

عليك النبي انت نبلت من وين يا الطيب شيقوق؟
عاينت ليك في الحضور ما لقيتك... رميت مداخلت وقبلت..
Quote: شكيتك على الله يا حليمة التعليقة دي علا يختوا ليها صاجات - تعرفي الصاجات ؟- ويرموا ليها ترس تقيل


كيفن ما بعرف التعليقة... انا غرقانة ووحلانة في احد قيزان بارا - اظنه قوز ود البشير ولا البشيري كما قيل لي انذاك- يوم كامل... ما كان معانا
صاجات ولا من يحزنون وكنا خريجات لنج 7 خريجات ومعانا المشرف والسواق فقط.. المشرف رجع المنطقة عشان يجيب نجدة وكانت الدنيا رمضان..
لما جا ء راجع العصر لقانا قطعنا اغصان الشجر سويناها صاجات وحفرنا للساتك الامامية وضعنا الصاجات وقمنا باللساتك الخلفية دفر
لما طلعنا العربية... تقول لي صاجات|!!

Post: #101
Title: Re: الفنان دا منو ؟
Author: محمد عثمان
Date: 07-10-2010, 10:51 PM
Parent: #98

Quote: نعلك طيب يا محمد... كان ما العتالة حارة....قربت اقولك علي النبي خارب لي مزاجي مالك؟
يا خ البنا ده هد الغنية دي عديل ورمى ساسها في الواطة دي... اكتر حاجة غايظاني لما بجي في حتة
بِعَلِق... اي والله بعلق زي الماشي في رمال بارا...اسال الطيب شيقوق بوريك التعليقة دي كيفنها وبوصفها ليك؟
والله المزاج ده بعد ده ما بعدلوا الا صغيرتي الصغيرة..



ود شيقوق...

مشتااقين يا ملك...

Post: #102
Title: Re: الفنان دا منو ؟
Author: محمد عثمان
Date: 07-10-2010, 10:53 PM
Parent: #101



ـــــــــــــــــــــــــ

Post: #103
Title: Re: الفنان دا منو ؟
Author: الطيب شيقوق
Date: 07-11-2010, 05:47 AM
Parent: #102

الفضلى حليمة بت عبد الرحمن

Quote: عليك النبي انت نبلت من وين يا الطيب شيقوق؟
عاينت ليك في الحضور ما لقيتك... رميت مداخلت وقبلت..


آآآآآآآآآآآآي مرات بكون دافوووونة بعاين ليكم وما بتشوفوني وبكتب ليكم على المايكروسفت اوفس وردز وانا offline واخمشها ليك براااااااااااحة واقوم ارميها في البوست واقبل بيتنا . ودا يا حليمة اسمو الفط الايجابي يعني حاجة Pennine ( مرتضى بناين كدا صاح؟)


Quote: كيفن ما بعرف التعليقة... انا غرقانة ووحلانة في احد قيزان بارا - اظنه قوز ود البشير ولا البشيري كما قيل لي انذاك- يوم كامل... ما كان معانا
صاجات ولا من يحزنون وكنا خريجات لنج 7 خريجات ومعانا المشرف والسواق فقط.. المشرف رجع المنطقة عشان يجيب نجدة وكانت الدنيا رمضان..
لما جا ء راجع العصر لقانا قطعنا اغصان الشجر سويناها صاجات وحفرنا للساتك الامامية وضعنا الصاجات وقمنا باللساتك الخلفية دفر
لما طلعنا العربية... تقول لي صاجات|!!


لا حول والله مبااااااااااااااااااالغة انا قلت دا مساعد عربية ومش كمان من مساعدية الزمن دا تلقى الواحد بقرأ في الاساس ومساعد بارتايمر - لالالالا كلامك دا شغل مساعدية زماااااااان الواحد بتلقيهو اشتغل مساعد نامن راسو بيض عشان بعد داك يدوهو الرخصة .

Post: #104
Title: Re: الفنان دا منو ؟
Author: الطيب شيقوق
Date: 07-11-2010, 05:50 AM
Parent: #103

محمد عثمان

مشتاقون يا هندسة وشكرا ليك على هذا الابداع

المرتضى عارفك سريع نهمة عشان كدا اتلهمك ساى .

Post: #105
Title: Re: الفنان دا منو ؟
Author: محمد المرتضى حامد
Date: 07-11-2010, 05:16 PM
Parent: #104

(عارفك سريع نهمة عشان كدا اتلهمك ساى )

الترجمه

الترجمااااه

Post: #106
Title: Re: الفنان دا منو ؟
Author: محمد المرتضى حامد
Date: 07-22-2010, 08:32 AM
Parent: #105

DSC00694.JPG Hosting at Sudaneseonline.com

مأمون عوض صالح
لايوجد من يتقن تقليد صوت عبدالعزيز وأسلوب أدائه مثل مأمون
التحية لمأمون عازف الكمنجه المعروف وعضو فرقة الإذاعة والتلفزيون
-
يا الخيالك بقى لي سمير
بي حنانك أنا مستجير
(طلب لجوء عاطفي موضوعي )

Post: #107
Title: Re: الفنان دا منو ؟
Author: محمد المرتضى حامد
Date: 07-22-2010, 11:04 AM
Parent: #102

محمد عثمان ، وزير أغاني السحاب في المنبر
مساء الخير يا الأمير وشكر بحجم المجره