Post: #3 Title: Re: الصورة (الأصل) .. Author: محمد المرتضى حامد Date: 01-13-2012, 02:20 PM Parent: #1
البصر دون البصائر
حكمة قالها الراحل الجميل حسن الزبير
وجرت لحنا سلسبيلا على لسان الأنيق المهذب الطيب مدثر
الأصل ما ببقى صوره
كلو كلو
Post: #5 Title: Re: الصورة (الأصل) .. Author: Osman Musa Date: 01-13-2012, 02:28 PM Parent: #1
ياخ أنشاءالله صباحك زين ؟
Post: #6 Title: Re: الصورة (الأصل) .. Author: محمد المرتضى حامد Date: 01-13-2012, 02:57 PM Parent: #5
Quote: طالما رجعت للغنى معناها شُفت العافية
عزيزنا أبو حسين .. أوعا تصدق أن العلاج – بعد رحمة المولى – كان بأدوية ناس جلاكسو وأسترا زينيكا ؟ مواجهة الأدواء والنوازل يا مولاي تتم بكلام ناس حسن الزبير وأبوصلاح ورفاقه بوصفة الأمرضني وما طباني وهي (روشتة) تستند إلى قاعدة طبية فاتت على جالينوس فحواها (داوني بالتي كانت هي الداء) ..
Quote: إن شاء الله تكون إنتهيت من الكار ووش برضو
ياخ أنا زاتي لي هسه بضحك ، قلت ليهو مع الإصابات حركة اليدين في الحمام بقت حاره ، قال لي أمشي الكار ووش.
Post: #7 Title: Re: الصورة (الأصل) .. Author: دينا خالد Date: 01-13-2012, 03:24 PM Parent: #6
يا سلاااام يا تضى انت عرفت كيف انو دى اغنيتى المفضلة ؟؟ الود الطيب مدثر دا صوتو مباااالغه لكن ما بتدى حريف ...
ـــــــــــــــ سمعت حاجاتنا الصغيرة دى ؟
Post: #8 Title: Re: الصورة (الأصل) .. Author: محمد المرتضى حامد Date: 01-13-2012, 05:09 PM Parent: #7
Quote: هل صحيح راقي و مهندم؟
ألف مبروك يا مخيَّر..
- سعدالدين الخطيب ..
السؤال التاني : هل ببكي الريد عيونو؟
الإفادة كانت : his heart and eyes brimmed over with tears
ده السهل المترع المعلم حسن الزبير يا صاحبي بلعب في المناطق العاديه الغير عاديه ملك ملوك البساطه .
ياخ اليالى بعذبه عذاب
Quote: ليه حياتنا اخترت غيرا فيها أحلامنا وكلامنا فيها حاجتنا الصغيرة كيف تغطي الصورة صورة ريدنا داك يا سيدي كلو يبقى ماضيك بالضرورة ايه لقيت فيهو الجديد ريدتو من حاجات بقولا او ليك قرب اماني بينا ما قادر تطولا هل قدر يكسر غرورك هل هو في الاحلام بزورك هل هو بالجد بيعرف لعبة الريد واصولا هل صحيح راقي ومهندم هل ببكي الريد عيونو هل عرفتو ما بتندم في الليالي القاسي طولا الف مبروك يا مخير انت بتبيع المشاعر البصر دون البصائر والاصل ما ببقى صورة
ياخ العافية التخصك فى المصارين تبقالك هدم وجلباب و نعلين زي ما قالت بت خير.
Post: #10 Title: Re: الصورة (الأصل) .. Author: عمران حسن صالح Date: 01-13-2012, 06:22 PM Parent: #9
الزول الوجيه صوت وصورة ده يا مولانا إكتشفتو وانا طريح ملاريا قبل أكتر من عشرين سنة وسمعتو أول ما سمعتو بالعود وصدقني دايماً بقول الزول البغني بالعود أسمعو كويس بعدين قرِر والراجل ما خزلني ولامن الكلام يكون لحسن الزبير ونكهة تسجيل الصوت موديل 2012 كِملت الحكاية
Post: #11 Title: Re: الصورة (الأصل) .. Author: Ahmed al Qurashi Date: 01-13-2012, 08:18 PM Parent: #10
فنان مبدع وأداء رائع
أعجبني صوته كثيرا وأطربني عندما تغني برائعة
ابراهيم ادريس ود المقرن ( حديث الحب) وهي من كلمات
الشاعر عبدالرحمن الريح .
شكرا مرتضى
Post: #12 Title: Re: الصورة (الأصل) .. Author: محمد المرتضى حامد Date: 01-13-2012, 08:55 PM Parent: #11
Quote: ياخ أنشاءالله صباحك زين ؟
على العاشقين في الأقاليم مراعاة فروق النبض..
- عثمان معقول تمر من (شيمة) رِدتو من حاجات بِقولا..كدا سااااي؟ ياخ دي خط ماجينو زاتو.. عثمان ياخ خلي بالك معاي ..
Post: #13 Title: Re: الصورة (الأصل) .. Author: Emad Abdulla Date: 01-13-2012, 09:52 PM Parent: #12
الله الله الله .. يا المقريف للنفيسة السغيرونة دي .. كان كلامات كان إختيارات كان كتابة .. كل أمرك حلو يا ابن خالتي . فياخي .. بحق الليل ده : ينصر دينك و يرحم ميتينك و يخليك لي مريدينك ..
............ إنت عارف أنا بحبك .. صاح ؟
Post: #14 Title: Re: الصورة (الأصل) .. Author: خـالد سـوميت Date: 01-14-2012, 06:26 AM Parent: #13
Post: #15 Title: Re: الصورة (الأصل) .. Author: صديق الموج Date: 01-14-2012, 06:40 AM
مولانا كيفك كان لى شرف ان اكون من الاوائل الذين استمعوا الى هذه الاغنية قبل تسجيلها للاجهزة ومن وقتها انا بها كلف.. التحية ليك ولصديقى الطيب المدثر صاحب الصوت الشجى.. ساعود الى هنا انشاء الله لاحكى لك،،،
Post: #16 Title: Re: الصورة (الأصل) .. Author: محمد المرتضى حامد Date: 01-14-2012, 10:52 AM Parent: #15
Quote: يا سلاااام يا تضى انت عرفت كيف انو دى اغنيتى المفضلة ؟؟
إنها (البصائر) يا دينا..
Quote: الود الطيب مدثر دا صوتو مباااالغه لكن ما بتدى حريف ...
أنا ول الطيب ول دينا؟
Quote: ـــــــــــــــ سمعت حاجاتنا الصغيرة دى ؟
القاتل الصامت؟ آخ يا دينا ، جيتي للكلام البخلي النوم خزاز، الحاجات الصغيرة هي كل شئ لمن ألقى السمع وهو شهيد.. في كل الإتفاقيات والمفاوضات تكون التفاصيل الصغيرة مخدعا للشيطان و في كل العلاقات الحميمة تغدو تلك الحاجات مؤنِسة ومؤنسِنة للإنسان أصغر ما فيها يقوم بدور هاتف الداخل ( ولا تنسوا الفضل بينكم) .. أقول ليك شنو؟ أرق خيط فيها يمكن أن يحول بينك وبين الإلحاد والجحود ويربطك إلى رصيف مرفأ الآخر .. الحاجات الصغيرة ياخ.. هِلِب .. سمير( في الليالي القاسي طولا..)
Post: #17 Title: Re: الصورة (الأصل) .. Author: Hisham Ibrahim Date: 01-14-2012, 01:04 PM Parent: #16
سمع وشوف ..
كلمات ولحن ..
نقول شنو غير إبداع ماشي بي خُطى ثابته ..
Post: #18 Title: Re: الصورة (الأصل) .. Author: Emad Abdulla Date: 01-14-2012, 02:44 PM Parent: #17
Quote: الحاجات الصغيرة .. هِلِب
الله يكتلك ياخ يريحني منك
Post: #19 Title: Re: الصورة (الأصل) .. Author: mamkouna Date: 01-15-2012, 11:49 AM Parent: #18
و لا هو البجد بيعرف لعبة الريدة و اصولا .... .....
هل الريدة لعبة ؟ هل لهذه اللعبة اصول و تقاليد و قوانين و انتصارات و هزائم؟؟ .... اوبرا - الله يطراها - بالخير , عملت استفتاء لعدة مئات من الازواج و الزوجات و المرتبطين و المرتبطات القاموا بخيانة شركائهم او شريكاتهن.. و توصلت لانو العشيق او العشيقة بيتميز عن الاصل ب the way you make your partner feel يعني بالعربي كدا و زي ما قالت عابدة الشيخ :
اوليني اهتمامك و امنحني المزيد ...بخلص و بوفي ليك للحد البعيد
ليس صحيحا ان يتعامل الناس بمختلف نوعياتهم بالتعامل الانساني الراقي . فهناك نوعية من البشر يحسبون الكرم في التعامل ضعفا . ويتوقعون ان التواضع اقلال من القيمة
انت لا تستطيع ان تغير الناس اجمعين . وكل انسان في هذا المجتمع هو نتاج اسرته .
العرب قديما تقول " كل اناء بما فيه ينضح " وهي عبارة صحيحة وعميقة فالاناء الذي امتلأ بالغيرة والحقد وتصيًد السلبيات لا يمكن ان يفيض الا بكل المشاعر السلبية مهما حاولت ان تتفاءل بان الاناء بذرة يمكن ان تنبت يوما.
التعامل مع الناس فن من الصعب اتقانه ولكن ليس من المستحيل اطلاقا تعلمه ان كنوز هذا الفن ان تجعل معرفة من تتعامل معه اساسا للتعامل فاللئيم والعدواني والغيور الحاقد لا يمكن ان يفهم معنى كرم التعامل ولا تكن متفائلاً وتحسب انك بحسن تعاملك ستفعل ما يفعل السحر .
الناس لا يتغيرون في يوم وليلة ولن يتغيروا لأجلك فاذا كنت ذا روح فياضة بالعطاء ونفس متسامحة انصحك بالبعد عنهم . وعند الفرس قديماً حكمة عميقة تقول
(( لا تعاشر الا اناساً من مقامك وقدرك فلا يمزج الزيت بالماء ولا الخل مع الحليب )).
الحكيم هو من يتعامل مع الناس وفق قواعد مترنة ويخاطبهم على قدر عقولهم ولا يتوقع من الناس جميعاً الشكر او الأحسان فان رضا الناس غاية لا تدرك .
يكفي المرء احساسه وايمانه بقدراته اما من ينتظر ان يقيمه الاخرون فلا شك انه سوف يعاني كثيراً .
قيمة الانسان فيما يصنع وليس فيما يتحدث به الاخرون الذين لا يفهمون ان الاساءة للانسان الكريم لا تدميه .
بل ترفعه عاليا مثل الشجرة المثمرة ترمى بالحجارة فلا يؤذيها ان الثمر الناضج يسقط على الارض اذ انها تعرف اي خير وعطاء يكمن فيها.
لك كل الود والاحترام يا قمة
ويا جبل ما يهزك ريح
Post: #21 Title: Re: الصورة (الأصل) .. Author: انعام حيمورة Date: 01-15-2012, 12:49 PM Parent: #20
الاصل ما ببقى صورة ياود المرتضى
بس ناس مبدعون ديل سرقوني ياخ لانو التسجيل دا حقي مسجلاهو انا ورفعتوا في اليوتيوب هم شالوه واعادوا رفعوا باسم مبدعون (اها دي سرقة اسفيرية ولا لا ) كانوا بس يدوني حقي الادبي ههههههههه
والدليل .. haimoura07
Post: #22 Title: Re: الصورة (الأصل) .. Author: Ahmed al Qurashi Date: 01-16-2012, 07:18 PM Parent: #21
حديث الحب
كلمات الشاعر / عبدالرجمن الريح
Post: #23 Title: Re: الصورة (الأصل) .. Author: Ahmed al Qurashi Date: 01-16-2012, 08:23 PM Parent: #22
أغنية أحاسيس أو حديث الحب هي من كلمات الشاعر عبدالرحمن الريح ولقد تغنى بها إبراهيم إدريس ود المقرن ثم إبراهيم عبدالجليل ولقد اعجبنى كثيرا أداء الفنان الطيب مدثر لهذه الأغنية ....
بى حبي فيك اصرّح....... والتصريح يكون بعض أحيان مجرّح حديث واحد يبكى ......... وحديث واحــــــد يفرح ************** حديث الحب ملوّن ......... واحد منه ظاهر والآخر مدون في صفحة فؤادي ........... من الآمـــــال مــكـــــون حبيب يوم سعدي يطلع بقربك منّى اســــمع أشوفك ولى يرجع .......... عقلي الدوام مسرّح ********* حديث الحب جواهر .......وباقات من أزاهر تغنى به الطبيعة ........... على لحن المزاهر تفهم منّه كلمه .............. بمعنى الحب تجاهر تسمع منه نغمه ............ مع الأفلاك تساهر تعلّم كيف تهوى حبيب للحب يسوى بعيد عن كل دعوه ....... كلامه وشكله مفرح ******** كلام الناس دعوه ........ خداع لا تسمعوه يحسدوك في حبيبك ..... ومنك يمنعوه إذا حاولت وده نحوك يبدى صدّه يخالك انت ضده يحب بعدك قريبك .............. ويتغير حــــبيبك يكون في الحب نصيبك ..... وحيد تمسى وتصبح
Post: #24 Title: Re: الصورة (الأصل) .. Author: محمد المرتضى حامد Date: 01-18-2012, 08:06 AM Parent: #23
Quote: ده السهل المترع المعلم حسن الزبير يا صاحبي
حسن الزبير يا سفيان في الواقع جسم أثيري إتخذ هيئة رجل لأغراض التمظهر المادي وحسب وكان ذلك ضروريا كي يتعامل معنا ويبثنا الحرف المضرج بالحكمة والجمال، إلتقيته مرات عدة في ثمانينات القرن المنصرم عندما كنا نتسابق لليالي الشعر والتهجد ونستبقها بصور أشعة للضلوع كإجراء إحتياطي ، قامة نحيلة كالسيّاب في ابتسامة أصيلة وصوت بحشرجة محببة تصيبك بالدعاش ، ما أن (يتوغل) في الإلقاء حتى تحس حالة بين التحليق والمشي على وسادة هوائية.. حالة بين الطيران الشراعي والهوفركرافت يا سفيان..
تريدو ( من حاجات بيقولا)..
Post: #25 Title: Re: الصورة (الأصل) .. Author: محمد المرتضى حامد Date: 01-18-2012, 12:08 PM Parent: #24
دا كلام تؤجر عليه يا أبا محمد ، في مغنيين بتموها دلوكه وكيبورد و (توليفة) أزياء وجردقه وحرجل.. لكن الصورة ما بتبقى أصل ..
Quote: والراجل ما خزلني
لا خذلان مع الطيب مدثر ، الطيب لايحتاج حتى العود ليطربك .. يا عمران ، الحنجرة بحد ذاتها ساكسفون أو ناي إلهي إذا ما أحسن توظيفها والطيب مدثر حباه المولى حنجرة لو مرت من خلالها القصيدة ستشبه إلى حد كبير صولو لفلوت سماوي..
Quote: ولامن الكلام يكون لحسن الزبير ونكهة تسجيل الصوت موديل 2012 كِملت الحكاية
لتبدأ..
Post: #26 Title: Re: الصورة (الأصل) .. Author: محمد المرتضى حامد Date: 01-18-2012, 03:30 PM Parent: #25
Quote: فنان مبدع وأداء رائع
أعجبني صوته كثيرا وأطربني عندما تغني برائعة
ابراهيم ادريس ود المقرن ( حديث الحب) وهي من كلمات
الشاعر عبدالرحمن الريح .
ود القرشي ..
السلام يا روح البدن، عزيزنا ود مدثر دا ما بيغني ساااي ، بيعرف يغني شنو وبيعرف (يقبقِبنا) كيف، عندي ليهو CD ما بشيلو في العربيه كلو كلو لأنو ببساطه ممكن ما تشوف القدامك وماهي إلا أمتار وتجيك ال air bags في وشّك،
شوف ، هسه لو عندك في الموبايل أغنية (العزيزه) مسجله بصوته ما تسمعا وانت بتتمشى في شاطئ العذيبة نهائي لأنو لامن يصل ( والله أحضانك بلد يا حلوة ما تنسينا فيها) ممكن جدا تُتَّهم بالتواجد في حالة سكر ظاهر في مكان عام.
- (سلميلنا على ضفايرك موجة موجة وكلميها قولي ليها حرام تتوه فيها المواسم ونحنا بالجد نشتهيها)
Post: #27 Title: Re: الصورة (الأصل) .. Author: محمد المرتضى حامد Date: 01-19-2012, 06:38 AM Parent: #26
Quote: إنت عارف أنا بحبك .. صاح ؟
هكذا حدثني الفؤاد وما حوى ، قلب (بوهية شركة) بشهادة منشأ سدرة المنتهى يا عمدة، موثوق به ومعتمد .. خلايا ومكنونات.. حديد وحرير وأشكر البارئ عليها من نعمة، سبقنا جبران حين رتل " لولا القلب الذي يحبك والقلب الذي تحبه لكنت هباء منثوراً .."
في الفؤاد ترعاك العناية ..
Post: #28 Title: Re: الصورة (الأصل) .. Author: محمد المرتضى حامد Date: 01-19-2012, 09:02 AM Parent: #27
والله يا خالد أضحكتني في حزن حتى بانت ... بالمورده..
قلت لي CD بقى DVD ؟
قصدك CD بي سيدو ؟
غايتو البركه في سيدي بانك،
عموما البركه فيكم يا سوميت ..
الفقد واحد..
Post: #29 Title: Re: الصورة (الأصل) .. Author: محمد المرتضى حامد Date: 01-19-2012, 02:17 PM Parent: #28
Quote: و لا هو البجد بيعرف لعبة الريدة و اصولا .... .....
هل الريدة لعبة ؟ هل لهذه اللعبة اصول و تقاليد و قوانين و انتصارات و هزائم؟؟ .... اوبرا - الله يطراها - بالخير , عملت استفتاء لعدة مئات من الازواج و الزوجات و المرتبطين و المرتبطات القاموا بخيانة شركائهم او شريكاتهن.. و توصلت لانو العشيق او العشيقة بيتميز عن الاصل ب the way you make your partner feel يعني بالعربي كدا و زي ما قالت عابدة الشيخ :
اوليني اهتمامك و امنحني المزيد ...بخلص و بوفي ليك للحد البعيد
... سمعتو بي بنك المشاعر !!؟؟؟
1- (لعبة الريد).. 2- the way you make your partner feel 3- بنك المشاعر..
ممكونه، قبل التعليق على أي من (البنود) الثلاث الواحد كدا محتاج ضمانات، لكن بإيجاز مخل لا أتفق مع الشاعر في البند الأول ، إلا إذا كان يقصد الألعاب النارية.. أوبرا زوله ممسوخة وبتاعت مشاكل وصريحة حد البشتنة ، وغض النظر عن الزوجة أو العشيقة الزول البيبعث في النبات شعور جميل ينجذب إليه النبات دعك عن البشر.. عجبتني عبارة (بنك المشاعر) يا ممكونه ، وأظن أن (الحاجات الصغيرة) التي وردت في الغنية هي التي يتم إيداعها في ذلك البنك بين الفينة والأخرى ويتم السحب منها والإيداع فيها وفقا للكرنفالات والزلازل ، حالات الإنتعاش الإقتصادي ومواسم الكساد.. يعني في البنك إياه كلمة (بريدك) تغدو fixed deposit عدييييل كده والصرصرة تخطي لسقف السحب على المكشوف.. الله يردم رصيدك ويخلي ليك الكريدت بالانس في ارتفاع ..
قولي آمين..
Post: #30 Title: Re: الصورة (الأصل) .. Author: محمد المرتضى حامد Date: 01-20-2012, 09:22 AM Parent: #29
Quote: ومن وقتها انا بها كلف..
وأنا كذلك، فيها شئ يا صديق غريب ما قادر أحددو..
سمعتها قريبا وما عارف (الضربه) جاتني من وين.
زي أغنية تانية مغمورة لخوجلي عثمان ظلت تهدهدني، فاجأني عزيز بتعلقه بها
و ما ظننت أنها خرجت من تحت جلدي للعلن حتى يعرفها..
Quote: ساعود الى هنا انشاء الله لاحكى لك،،،
بانتظارك وأرجو ألا يكون كوعد عرقوب.
Post: #31 Title: Re: الصورة (الأصل) .. Author: محمد المرتضى حامد Date: 01-20-2012, 02:11 PM Parent: #30
Quote: سمع وشوف ..
كلمات ولحن ..
قصدك الدقيقة 3 والثانية 20 يا هشام؟ كلامك صح واللحن والكلمات خمج..
والأصل ما ببقى صوره..
مودة يا ودابراهيم.
Post: #32 Title: Re: الصورة (الأصل) .. Author: انعام حيمورة Date: 01-20-2012, 06:35 PM Parent: #31
<[center] العزيزة الما بتسأل عن ظروفنا الوحيدة الطال عشان جيتك وقوفنا العزيزة الما بتسأل عن ظروفنا الوحيدة الما بتحاول يوم تشوفنا ***************
المواعيد لسة حزنانة بتنادي والأماسي بتبكي في أسى ما إعتيادي ما كنتي بهجتا براوئع قوس قزح والله ما طلانا من بعدك فرح سلميلنا على ضفايرك موجة موجة وكلميها *************** قولي ليها حرام تتوه فيها المواسم ونحنا بالجد نشتهيها سلميلنا على عيونك يوم تسهي تغروديها ويبقو تفاحتين خدودك بس خدودك وين شبيها سلميلنا علي يدينك وشملة الريد أنسجيها سلميلنا علي خطاكي عزة العاملة ومشيها والله أحضانك بلد يا حلوة ما تنسينا فيها
محمد المرتضى الف حمدالله على سلامتك ..اتمنى انك تكون دايما بخير .. اخبارالاسرة يارب كلهم بخير عارف انا اكتر اغنية بحبها ليهو العزبزة اماالاصل والصورة ديل حقين ناس هسه بجوك براهم طايرين انت براك هبشت ليهم عش الدبابير... تحياتى للصديق العزيز الطيب وحقيقة هو اصلو وصورتو واحد اصلو مافيهم فرق ابدا على العموم انا الايام دى Homeless ويانى الساكنه هنا .... تسلم يارب من كل شـــر ...
Post: #33 Title: Re: الصورة (الأصل) .. Author: محمد المرتضى حامد Date: 01-20-2012, 10:33 PM Parent: #20
Quote: فهناك نوعية من البشر يحسبون الكرم في التعامل ضعفا .
هلا دعوت المولى أن ينجيهم مما هم فيه؟ لكن برضو يا وضاحة هذا لايؤثر في حقيقة أن (الأصل ما ببقى صوره).. ول أنا غلطان..؟؟ مودتي..
Post: #35 Title: Re: الصورة (الأصل) .. Author: محمد المرتضى حامد Date: 01-21-2012, 07:46 AM Parent: #33
Quote: بس ناس مبدعون ديل سرقوني ياخ لانو التسجيل دا حقي مسجلاهو انا ورفعتوا في اليوتيوب هم شالوه واعادوا رفعوا باسم مبدعون (اها دي سرقة اسفيرية ولا لا ) كانوا بس يدوني حقي الادبي ههههههههه
سلامات يا إنعام،
أثناء الدراسة العليا قدم أحد الزملاء بحثا موجزه أنه يجب إهمال كل ما يسمى بالملكية الفكرية أو الفنية وما يتصل بها وكان البحث يستند إلى مقولته أننا جميعنا نقلد بعضنا أو نطور ما سبقنا إليه الغير بشكل أو آخر ، يعني مثلا مشاهير الفن والأدب لم يأتوا بإبداعاتهم من فراغ بل إنهم أخذوا عن سابقيهم ولولا الأعمال الموروثة لما كان إبداع اليوم وتفريعا على هذا يجب ألا يتمشدقوا بحقوق إبداع وملكية إلخ.. ولا يجب أن يزعم (مبدع) اليوم أن (إبداعه) حق خالص له فكل إبداعه - في أحسن الأحوال - مجرد تطوير لعمل من سبقوه الذين نقل عنهم مجانا ولو فكرة. صحي والله ذكَّرتيني، هو الرفع في اليوتيوب بإذن القناة أو بدونه إبداع؟ الموضوع طويل ونتمنى يناقش في مساحة أخرى وأثناءها ركزي لي على أسئلة الراجل التي وردت في مداخلتك الأخيرة(هل عرفتو ما بتندم؟)..
سلام يا مولانا، تعرف لما اطول ما القى ليك حاجة فب الصفحة الاولى بحس في شيئ ناقص! ليك كم يوم ما ظاهر، لعلك طيب!
Post: #37 Title: Re: الصورة (الأصل) .. Author: محمد المرتضى حامد Date: 01-31-2012, 10:50 AM Parent: #36
سلامات يا ماجده،
(عزيزة) سعدالدين إبراهيم المابتسأل عن ظروفو من الأغاني التي نتحاشى الكتابة عنها رغم أن الكثيرين جربوا ولم يوفوها حقها ، أظن أن هناك أغنيات خلقت لتُسمع وحسب ولاتقبل (النقه) ، هي زاتا ما بسمعوها بالأذن وما عرفناه في حصص العلوم المضللة.
على أية حال المواعيد لسه حزنانه والحلول ضنينة وعزيزة.
Post: #38 Title: Re: الصورة (الأصل) .. Author: طارق جبريل Date: 01-31-2012, 11:00 AM Parent: #37
اخخخخخخ انا ياخي لمن الجمكسين دة يكون مدفق كدة وجع يا حبيب
Post: #39 Title: Re: الصورة (الأصل) .. Author: ismeil abbas Date: 01-31-2012, 11:29 AM Parent: #38
الزول ألأنيق/محمد المرتضى حامد.
لك التحايا العطرة.
يامنشرى فى الاعصاب وساكن فى السمع والشم.. تعال لو صدت الابواب تعال ادخل مسارب الدم.. ماتستنى منى حباب ولا تكتب حضرته ولم. عندما يغنى الطيب مدثر هذه ألأغنية والصورة أى عزيز بسمعه بتصل بى وبقول لى إنت وين؟ الطيب مدثر ده فيهو تطريب خاص والقصائد منتقاة..ما لاحظت إنى ما قدرت أتحرك يوم غناها عند لمة الوجيه العوض المسلمى..كنت فى عالم ثانى.
لك وللجميع التحية وللطيب مدثر الزول الفنان ألف تحية...
Post: #41 Title: Re: الصورة (الأصل) .. Author: محمد المرتضى حامد Date: 03-19-2012, 03:51 PM Parent: #38
Quote: اخخخخخخ انا ياخي لمن الجمكسين دة يكون مدفق كدة
والله يا الدي دي تي الغنيه دي فيها كلام ، بمفهوم المخالفة، الشافعية ما عرفوهو..
Post: #40 Title: Re: الصورة (الأصل) .. Author: محمد المرتضى حامد Date: 01-31-2012, 01:23 PM Parent: #36
Quote: تعرف لما اطول ما القى ليك حاجة فب الصفحة الاولى بحس في شيئ ناقص!
