خبر مُريح ..

وممكن يكون مُتعِب..
لبعضهم/ن.

بحث: تحليل للدم يكشف صدق حب الرجل

“هرمون الدلال والمحبة”


إنتهى زمن الخداع و (الحنك) الفاضي

منقول من مواقع إخبارية.

كشفت دراسة جديدة نشرتها مجلة التايم الأمريكية، الأربعاء، عن إمكانية كشف حب الرجل الحقيقي للمرأة، من خلال تحليل الدم.

وجاء في الدراسة أن تحليل الدم الجديد يتتبع هرمون الأوكسيتوسين، والذي يعرف أيضا باسم “هرمون الدلال والمحبة،” والذي يشير ارتفاع نسبته في الدم إلى مدى حب الرجل للمرأة، والعكس صحيح.

وأشير في الدراسة إلى أن هرمون الاكسيتوسين، الذي يرتفع عند النساء أثناء فترة الرضاعة والأمومة بالإضافة إلى العلاقات الزوجية، يمكن تتبعه في دم الرجل عندما يكون في حالة الحب.

وأكد الباحثون في الدراسة التي ضمت 136 شابا في العشرينيات من العمر، على أن معدل هرمون الاوكسيتوسين عند الشباب الذين تجمعهم علاقات غرامية مرتفع إلى حد ملحوظ، على عكس الشباب الذين لا تجمعهم أي علاقات غرامية.

وجاء في الدراسة ان ارتفاع هرمون الاوكسيتوسين لدى الشباب اثر بشكل مباشر على حساسية اللمس والحنان والمزاج الجيد بالإضافة إلى انسجام الحركات بين الشاب والفتاة.

وأكد الباحثون على أن ارتفاع نسبة هرمون الدلال والمحبة في الدم يؤثر بشكل مباشر على مدة العلاقة ومدى استمرارها، حيث أن الدراسة التي تتبعت 25 زوجا لمدة لا تقل عن ست أشهر، أشارت إلى أن الأزواج الذين ترتفع عندهم نسبة الهرمون في الدم بقوا على علاقة أطول من الأزواج الذين انخفضت معدلات الهرمون في دمهم.

Quote: وجاء في الدراسة أن تحليل الدم الجديد يتتبع هرمون الأوكسيتوسين، والذي يعرف أيضا باسم “هرمون الدلال والمحبة،” والذي يشير ارتفاع نسبته في الدم إلى مدى حب الرجل للمرأة، والعكس صحيح.

يا مرتضي العلماء ديل عبيد عبدالرحمن سبقهم بسنوات حين قال

هواه بجسمى اتخلل
مجارى الدم اذا اتحلل
وقيع لى رضاه أتذلل
وما هماه يا سيدى
دا واحد أصلو بتدلل

انتهى زمن الخداع ( والحنك ) الفاضي
من شاكلة :
أجدك في كل قطرة من دمي ..........
أو كما غنى المغني:
زرعوك في قلبي
يا من كساني شجون
ورووك من دمي
ياللادن .. العرجون
..
وواحد تاني غنى:
وأزرعك في قلبي زهرة وبي دماي أجود عليك
..
ثم السلام عليكم يالمرتضى يا ذوق سلاما مبرءا من الخداع وما هو حنك فاضي

التفاصيل.

Quote: وأكد الباحثون على أن ارتفاع نسبة هرمون الدلال والمحبة في الدم يؤثر بشكل مباشر على مدة العلاقة ومدى استمرارها، حيث أن الدراسة التي تتبعت 25 زوجا لمدة لا تقل عن ست أشهر، أشارت إلى أن الأزواج الذين ترتفع عندهم نسبة الهرمون في الدم بقوا على علاقة أطول من الأزواج الذين انخفضت معدلات الهرمون في دمهم.

محمد المرتضى مالك علينا , خلي الناس مغمضين

و بالله الحقنـا بالمصـل أو الحقن التعويضية للهرمون دا

و ابقى وكيل في السـودان و الشـرق الأوسـط و افريقيا , صدقني تغني في اســبوع

لك ســلامي

Quote: ترتفع عندهم نسبة الهرمون

يا ود حامد

هن خلّن فينا هرمون ياخ .؟

Quote: أشارت إلى أن الأزواج الذين ترتفع عندهم نسبة الهرمون في الدم بقوا على علاقة أطول من الأزواج الذين انخفضت معدلات الهرمون في دمهم.

اكان كدى تكون المحاية بتاعة قوني ، البتسقيني ليها ام عبد الله ، متروسة بهذه الشريحة من الهارمونات

وين يا اخوانا ممكونة ؟

هسي يا محمد المرتضي ده خبر تجيبوا
بالطريقة دي دقست النسوان ساكت
ياخ مافي رجل سوداني بحب مرتو الا من رحم ربي وبرضو هرمون الجن دي بلقوهوا مرتفع البحب المذيعة العلانية والفنانة الفرتكانية
وبالعدم تلقاهم جت مكسرين في لميس لووووووووووول

قد يكون خبرا مريحا للأخوة الاعداء :)
الغير مريح أن نفس هذا الرجل قد يكون مغرما بأخرى بالتزامن،
في صورة مقلوبة لقول الشاعر: همنا ب(فلانة) و هامت بغيرنا و داك زاتو هام بغيرها
و النتيجة تطلع (+) عااادي، و يحلف أخينا أن ليس هناك سواها (نهييي ماهبت)
اها دي يحلوها كيف؟

Quote: يا مرتضي العلماء ديل عبيد عبدالرحمن سبقهم بسنوات حين قال هواه بجسمى اتخلل مجارى الدم اذا اتحلل

مبالغه يا أحمد،
ياخ ناس الحقيبه ديل فاتوا نوستراداموس في نبوءاتهم.

Quote: أجدك في كل قطرة من دمي ..........

ملوَّث

يا مولانا طه،

في واحد فات زولك ده ووصل به الحال إلى المعمل فقال:

(توحَّدتُ فيك وصِرتُكِ أنتِ
فحين مشيت مشيت بمقدمك
وحين أكلتُ لمستُ فمِك
وحين مرِضتُ فحصتُ دمِك..)


شايف كيف..

قلت لي الدراسات دي شملت الشباب!
وناس الدم المعتق منظرم كيف في الموضوع دا؟

Quote: التفاصيل.

يا عربي، التفاصيل - وفقا لاجتهادي - تتمحور في أن الناس ديل سيتوصلوا إلى
جهاز يشبه جهاز كشف الكحول أو بالونة إختبار كتلك المتوفره لدوريات المرور،
بمجرد دخول الزوج إلى البيت يجد الزوجة في انتظاره وهي تحمل بالونه
وتقول ليهو: هاك انفخ ..


أمانه ما وقعوا رجال..

الحقنى بالهرمون دا عشان اشوف الراجل دا ماشى على وييييييييييييييييييييين

مُريح لمنو ؟
للبقولو للنساء بس غلطانين !! " الشرح في ملحق إرشيف الربع الثاني من العام 2020 "
عموماً بإعتبار منطقة المعايش الحالية لي فكرت في الموضوع من جانب تجاري بحت ، أصلو الزمن ده الفكرة الجديدة تنفذه سريع وتلم المقسوم منها ، أو بمنطق ناس نجد ( كُل الفطير وطير )
بعدين يجوا الناس وراكـ يحاكوكـ .
الفكرة بسيطة ، معمل بلوحة مضيئة واسم لافت (للنساء) بيوصل فكرة التحليل وتقوم تعمل دعاية قوية في ربوع "نجد" مع صورة ضوئية للخبر
والطبيب الرئيسي طبعاً أمريكي عيونو خدر * وعينكـ ما تشوف إلا النور :)
: ألو .
: أيوه نعم .
: بلاهي عايزة أحجز عشان موضوع التحليل بتاع الـــ ..... !! .
: أيوه أيوه يا مدام بس والله متأسفين مافي حجز إلا بعد ستة شهور !! " المهم المدام إتصرفت ودفعت زيادة وحصلت ليها حجز بعد شهرين "
طبعاً نسيت أقول سبب الزحمة دي إنو المدامات قدرو أخدو الدم من غير ما الزوج يحس لأنو عند التسجيل بيدوكـ حقنة تشفط الدم بدون ألم قبل المواعيد بساعة أو ساعتين
...
بتكون شفت فلم الآكشن الأمريكي لـ Nicolas Cage و John Travolta إسمو Face Off " أضغط لمشاهدة مقطع منو "
وده البوستر بتاعو :

ملخص القصة إنو رجل العصابات لبس وش مسئول الشرطة القوي بعملية جراحية ودخل بيتو مرتو وحاجاتو كلها ،
ومع إستمرار الأحداث حبت الزوجة تتأكد من الزول المعاها ده فأعطوها حقنة عشان تشفط ليها " حبة دم " من الدمو تقيل وعامل زوجها ده ، لامن سألت : لكن ما حايصحى ؟؟
قالو ليها ما تشيلي دم أشفطي بس وهو نايم ، بس ما تتأخري بالعينة



_________________________________________________
* العيونم خدر ديل كاتمين أسرار ، بلاهي السر بعد خمسين سنة حتى يفكوهو للعامَة

Quote: و بالله الحقنـا بالمصـل أو الحقن التعويضية للهرمون دا و ابقى وكيل في السـودان و الشـرق الأوسـط و افريقيا , صدقني تغني في اســبوع

حُقَن؟
يا إحيمر في ناس جردل ما يعمل ليهم الحبه،
ما تسمع الغنا بتاع نحن أصلنا ناس محبه زول نعِزو وزول نريدو..
غايتو يا عُبَد مع المقاطعه الأمريكية تنعدم إمكانية ال agency لكن ممكن نشوف franchise مضروبه.

الراحه عندك لكن .... تحليل الدم ده فرقو شنو من جهاز كشف الكذب اياه؟
أمانه ما اتمقلبو ناس .... خبرك شين ياخى

Quote: الحقنى بالهرمون دا عشان اشوف الراجل دا ماشى على وييييييييييييييييييييين

الله يجازيك يا نجاة

شوفي واقول انا مجرب حاولي اعملي الاتي وطوالي قيسي الهورمون دا حتجدي زوجك بموووووت فيك اكان فعلت الاتي :

اولاد : لو طلع ما ترني ليهو في موبايلو
ثانيا : ولو رجع ما تقولي ليهو انت بتمشي وين ؟
ثالثا: ولو اتلهم الانترنيت ما تقولي ليهو انت مطنشني مالك؟
رابعا: ولو بتاع جاتنج عبر المسنغرات ما تجي ليهو من خلف خلسة عشان تعرفي هو مع منو او مع منى
خامسا: ولو جاء قال ليك الليلة كنت مزحوم في الشغل ومرهق ما تتدقسي جنبو

محمد الطيب يوسف..... سلام
مولانا ده بتكلم عن الحب الدخل حديقة الحيوانات شنو؟
هسه فى داعى لصورة الزرافه دى؟؟
لكن البنية بعيدة مهوى القرط والله صحى !!
غايتو براكم تقلبوا فى الدراب وتكوسوا فى العقارب..
الوغد طارق جبريل حالو مشيول ساكت!!!!

بعيدة مهوى القرط ساااااااااااااكت كده

ياخ دي غراء فرعاء .... دعجاء ,,,, زهجاء

لمن تزهج

Quote: ولو بتاع جاتنج عبر المسنغرات

ده انجليزي يامرسي !!!!

الطيب شيقوق بالله ده منبر العربي منبر اللغات والرطانة بهناك

ولو حللو ولقو النسبة ضعيفة ...
الوصفة لاعادة الحب للدم حتكون كالاتي

غيري نوع العطر والمكياج
جرعة إبتسامة طول اليوم وفي كل لحظة
جرعة حنية مرة كل إتناشر ساعة(كترتها مضرة وبتدي نتيجة عكسية)
معاودة الطبيب بعد إسبوعين من المداومة في العلاج

أما في حالة وجود نسبة عالية من الحب في الدم
فينصح بالابتعاد عن المسببات نهائيا
وذلك لفائدة المريض

اما لو الموضوع تمام التمام ونسبة الحب في القلب مية مية
فيجب قطع تذكرتين لجزر هاوي وقضاء إسبوعين

Quote: الحقنى بالهرمون دا عشان اشوف الراجل دا ماشى على وييييييييييييييييييييين

الله يجازيك يا نجاة

شوفي واقول انا مجرب حاولي اعملي الاتي وطوالي قيسي الهورمون دا حتجدي زوجك بموووووت فيك اكان فعلت الاتي :

اولاد : لو طلع ما ترني ليهو في موبايلو
ثانيا : ولو رجع ما تقولي ليهو انت بتمشي وين ؟
ثالثا: ولو اتلهم الانترنيت ما تقولي ليهو انت مطنشني مالك؟
رابعا: ولو بتاع جاتنج عبر المسنغرات ما تجي ليهو من خلف خلسة عشان تعرفي هو مع منو او مع منى
خامسا: ولو جاء قال ليك الليلة كنت مزحوم في الشغل وريهو عرض اكتافك بس

Quote: بحث: تحليل للدم يكشف صدق حب الرجل

يعنى هو يااااا التضى
لما مجرد دم ... لييه بكشف حب الرجل بس ؟؟
يعنى يقصدوا انو المرأة ما عندها دم ؟
ولا ما بتحب من اصلوا ؟
ولا حقارات من ناس البحث وكدا !!!
قول ليهم انشالله يبحثوكم فى المحيط ...

بعدين هو (الحبوميتر) دا
ح يعرف كيف بعد ما يكشف على
راجل الهنا دا ويلقى الحب للطيش ح يعرف كيف انو
الحب دا حب مرتو ؟ ولا حبيبتو ؟ ولا عشيقتو ؟ ولا بت الجيران ؟
ح يعرف كيف انه حب سلوى مغارز ولا حنان كانون ولا فاطمة جكسا
ولا سميرة عذاب ؟؟








ــــــــــــــ
غايتو يا تضى قول ليهم (الحبوميتر) بتاعكم دا
بعد الكشف الا يستعين بى بله الغايب !! لوووووب وكدا .

Quote: هن خلّن فينا هرمـون ياخ ؟

وهذا ما يعرف طبيا بأنيميا الدلال يا هشام؟
كدي بالله قول ليها ( في عينيك عنواني) وامشي افحص..

هسه دا داير فحص ؟؟؟
لوووووب .









ــــــــــــــــ
ياااا خسارة الحبوميتر !
ويا خسارة البحث والتعبانين فيه ما قايلين
انو الرجال كلهم ما بحتاجوا يخسروا فيهم اى فحص !
المصريين بقولوا
اللو للحرامى احلف ال جالك الفرج ..

ياربي ليك الحمد



..........
قال " العَبِدْ " لما " سيدو " شابي في النخلة عشان يعزل ليهو جريدة طرية و غليده يدق بيها العبد المغضوب عليهو :
( فرج الله قريييييييييب لامِن سيدي يقطع الجريد )
فيا سيدي المرتضى .. لامن نجود فحص الملاريا و الدوسنتاريا و اليرقان و الإيبولا و الإيدز و الجوع و و و و و و ..
بعد داك - لو الله مدّ في أجل الشعب الفاضل - نقوم يفحصوا لينا الدم .. يا لقوا عندنا يا ما لقو غير هبوب ..
ربك ح يستر علينا .. بإذن واحد أحد .

و بعدين ياخ فحصك ده يصلح للرجال العندهم نسواااااااان ..
نحنا العندنا ديل : ( سلامٌ قولاً من ربٍ رحيم ) .

يا قول عمك عصمان فرح لما ساقوا نسوانهم الإسكندرية هو و عمك إبراهيم شريف
و قاموا تهور منهم قالوا يتمشوا في البلاج ..
و هناك الحريم الجد متجدعات : العلى ضهرها و العلى بطنها .. و العلى اربع و العلى اللحم و و و .. شغل زي الشغل ، و كلو لابس ابو قطعتين .. و صلاتي علي النبي ..
عمك عصمان نظرَ فبسرَ .. وإنقهر و روحو حرقتو و ما قدر يدس غبينتو
و جوز نسوانهم ماشات قدامهم و عاملات قال مالصات الشباب و متجدعات حفيانات في رملة القيفة الأوسطية .. بس الشكلوته* بس .
قام عمك إتلفت بحزن على إبراهيم شريف الكان سارح في ملكوت ربو .. و قال ليهو بلسان عربي مطعم بالنوبي مع شوية مرارات :
الحمدو للاه يا ابراهيم أخويا .. أحنا خلي بالك ناس آخره ، إلاكين ربُنا بيعذبنا شويتين كده في الأرض . من حقو ياخي . أمال بعدين ح ناخد المكافأة إزاّاي ؟؟

.........
عارفك ود خرتوم و حنكوش ..
*الشكلوته هي ود ام بعلو .. لكن علي خلاقة شوية كده .

Quote: وتقول ليهو: هاك انفخ ..

مولانا الزمن ده البنفخو شوية
يا حليل زمن الرجال البطرشقو الهنابيب
لووووووووووول

Quote: الله يجازيك يا نجاة شوفي واقول انا مجرب حاولي اعملي الاتي وطوالي قيسي الهورمون دا حتجدي زوجك بموووووت فيك اكان فعلت الاتي : اولاد : لو طلع ما ترني ليهو في موبايلو ثانيا : ولو رجع ما تقولي ليهو انت بتمشي وين ؟ ثالثا: ولو اتلهم الانترنيت ما تقولي ليهو انت مطنشني مالك؟ رابعا: ولو بتاع جاتنج عبر المسنغرات ما تجي ليهو من خلف خلسة عشان تعرفي هو مع منو او مع منى خامسا: ولو جاء قال ليك الليلة كنت مزحوم في الشغل وريهو عرض اكتافك بس

تاااااااااااني ياشيقا تاااااااااني
عشان كدا قالولي ماتباري شيقا دا
.
.
الانيق الجميل محمد المرتضى حامد وضيوفة الاف التحايا

ومالك يا محمد مرتضي

من صديق مدثر

من دمي غذيته

عمدة يا مُريح!! زيّك زي الأندروس واحد!!

مولانا ممكن سؤال؟
اها وجهاز الحبيومتر ده بعرف نوع الحب؟
يعنى فى الحب الافلاطونى و الحب الاعمى و الحب الاعشى
و الحب من طرف واحد و الحب سنة سبعين
وكدة واللا النتيجة بتظهر محض حب؟

شايف الموج مهتم بالموضوع دا شديد!!
إت يا زول داير تاكل (حبّكـ) و(حب) غيركـ!!

Quote: الأندروس

.. يا قديم يا ود الصايم ..

في صيدلية هنا في شمبات فيها دكتورة ظريفة ، شافعه حنكوشه كده ( بيكون هرموناتا بتاعت ود المرتضى دي .. ألف ) ..
جيتا و مليان نفاخ أصلي : يا بتي .. أديني كظرظل .
إنقهمت : سوري معليش .. بس شنو هو الكضرضل ده يا عمو ؟
قلت ليها : فوار .. فوار عشان البطن الغلتانه .. و الهناي ، النفاخ بعيد عنك .
المسكينة الفي راسا راح .. و قرت لي كل انواع أدوية الفوار بتاعت خمة النفس و عصرة القلب و الهففان و اللواية و الحاجات .. و إنت يا الكظرظل سما أرض .. مافي .
كتبتو ليها باللنقليزي : ALKA-SELTZER .. قومي يا الشافعه اتصلي بأمك :
ماما ، دو وي هاف أني ثينق كولد الكاسالتزار ؟؟ .. يس .. يس .. اوكيه ، أها .. أهااااا .. يس هي إز أولد أند لوكس فنني .. أها ، آي قوت إت موم .. ثانكس .
و اتلفتت لي : عمو .. إنت جادي ؟ .
طوالي مشيت .

إنت يا ود الصايم جادي في حكاية أندروس دي ؟؟!!

......
أنا بقول الفحص بتاع ود المرتضى ده باطل و ما جادي ..
و الخواجات دايرين يلاوزوا بينا ساكت .

Quote: هي إز أولد أند لوكس فنني

تعرف يا عمدتنا .. بمناسبة الكظرظل دي
أنا عندي صيدلانية حنكوشة في البيت برضو
أها كل يوم بقول ليها جيبي لي معاكـ دوا
يوم للنُفاخ .. يوم للحساسية .. يوم لوجع العيون
أها .. قبل يومين اتصلت عليها وقلت ليها
يا أخت .. جيبي لي معاكـ حاجة للمفاصل .. ركبي واجعاني!

جاني ليكـ الرد الشافي:
إنت يا زول داير تشغّل جسمكـ دا كلو بالحبوب!!!



ومع الحبوب العلينا دي كووولها .. عمكـ
مرتضى داير يدخل لينا (الحبوميتر)!ّ!

حبيبنا محمد ..سلامات وليك وحشة يازول ..


بنسال ..

قطع شك اذا فحصنا النتيجة بتكون وجود الحب في الدم وبغزارة ...
لكن الحب ده بعرفوهو بتاع شخص واحد أو متعدد كيف ؟!!!



تحياتي وابقى ظاهر ياخي فمحبتنا مادايرة فحص ..

شوفي واقول انا مجرب حاولي اعملي الاتي وطوالي قيسي الهورمون دا حتجدي زوجك بموووووت فيك اكان فعلت الاتي :
اولاد : لو طلع ما ترني ليهو في موبايلو
ثانيا : ولو رجع ما تقولي ليهو انت بتمشي وين ؟
ثالثا: ولو اتلهم الانترنيت ما تقولي ليهو انت مطنشني مالك؟
رابعا: ولو بتاع جاتنج عبر المسنغرات ما تجي ليهو من خلف خلسة عشان تعرفي هو مع منو او مع منى
خامسا: ولو جاء قال ليك الليلة كنت مزحوم في الشغل وريهو عرض اكتافك بس




بالله


الاقتباس ابى اجى معاى

مولانا المرتضي اضحك الله قلبك
والله ضحكتني من جوه قلبي

Quote: . و قال ليهو بلسان عربي مطعم بالنوبي مع شوية مرارات : الحمدو للاه يا ابراهيم أخويا .. أحنا خلي بالك ناس آخره ، إلاكين ربُنا بيعذبنا شويتين كده في الأرض . من حقو ياخي . أمال بعدين ح ناخد المكافأة إزاّاي ؟؟

Quote: إت يا زول داير تاكل (حبّكـ)

ود الصايم تاكل السم انا قاعد اكل نعناع المدينه
قال حبك قال!!!

Quote: ود الصايم تاكل السم انا قاعد اكل نعناع المدينه قال حبك قال!!!

يا موج .. النعناع دا بيتشرب ياخ!
دا بالنسبة للبني آدم طبعا!!

Quote: يا أخت .. جيبي لي معاكـ حاجة للمفاصل .. ركبي واجعاني!

يا ود الصايم انت وصلت لمرحلة وجع الركب

يا ساتر

طيب بتتفاصح مع ود االموج مالك

Quote: يا ود الصايم انت وصلت لمرحلة وجع الركب يا ساتر طيب بتتفاصح مع ود االموج مالك

دكتورنا وحبيبنا القرشي
الركب لعامل ضغط 120 كيلو جرام
على الركب لمدة 34 عاما!!

الموج دا 34 كيلو جرام لمدة 120 عام

Quote: يا ود الصايم انت وصلت لمرحلة وجع الركب يا ساتر طيب بتتفاصح مع ود االموج مالك

ود الصايم ده كلام دكاتره مش عنقاله
هييييييييييييييييع عفيت منك. يا دكتور
قوم لف قال 34 سنه بالله؟؟؟؟؟؟؟؟؟؟؟؟؟؟؟؟؟

اووووووووووووووه ش .... ت !!
يا مولانا أول شي البوست ده خليهو للضهب
يعني سيبكـ من حكاية تجي ترد للعالم دي واحد واحد ، الموضوع ده بس أنقلو معاكـ لباقي أرباع العام 2012 لأنو فيهو بلاوي لسه ما اتقالت .
بعدين الشي اليجيب " إماد أبد الله " شيتاً ما هين ، ياخي كبَ الآخر كلو والذي بعدو . " بيني وبينكـ كلمة الصيلانية الحنكوشة بتاعة ياعمو بتكون هارده حشاهو
بعدين في كضب بائن بينونة كبرى زي محمد الصايم الما بيخجل ده :
قال شنو ؟

Quote: الركب لعامل ضغط 120 كيلو جرام على الركب لمدة 34 عاما!!

شوف المِحن بلاهي " يا تمبس جهِز البزز "
إنا لله
وإنتبه ثم إنتبه يجي الوغد DKEEN حايم بجاي وإلا فالخور أولى بما كُتِب .
..
ود القاضي كلامكـ قالتو دينا بس بلغة تانية ، التكرار لزومو شنو ؟
ود الموج إنت اتجاوزت المراحل دي
يعني دمكـ تقيل
يعني نتيجة الفحص بتكون بلاوي تانية مغطية على الفحص الرومانسي ده
يعني إتخارج


________
يتبع :) :)

خلي بالكـ الواحد بعد دا يجي
شايل معاو شهادة الميلاد وشاهد عدل!!

Quote: اكان كدى تكون المحاية بتاعة قوني ، البتسقيني ليها ام عبد الله ، متروسة بهذه الشريحة من الهارمونات

يا شيقا، إنت ما بتحتاج ل محايه ياخ حاشاك ، إنت مَمحي طَبِع..
بعدين هارمونات دي شنو يعني؟
وشنو ال (بيسقوهو)؟
لبن مقنَّن؟
عارف يا شيقا إنت من النوع البيقول ليها (عيناك لي سقيا) ..
يا زول نحن بنتكلم عن هرمونات وقياس مستوى الريده بال ميلي مول ..

أنا ما عارف بكري دا الزول يسوي معاهو شنو !!

Quote: ياخ مافي رجل سوداني بحب مرتو الا من رحم ربي

محمد الطيب ذكرتني طرفه حكاها لي سفير سابق وهي أن أحد الدبلوماسيين (س)،
وهو زول الله ساكت ، كان يعمل في سفارة السودان بدولة نفترض إسمها (عشقستان)،
بعد عدة سنوات إجتمع عدد من الدبلوماسيين في مقهى وزارة الخارجيه في الخرطوم
يناقشون موضوعا ما فذكر أحدهم إسم (س) ولم يتذكره أي زول من الحضور ودار بينهم
الحوار الآتي:
- (س) ياخ..
- والله ما عرفناهو..
- ياخ الزول اللخدر الطويل..
- والله ما متذكرنو..
- يا اخوانا الزول الكان قنصل في سفارتنا في عشقستان داك..
- والله والله ما مر علينا..
- يااخواناالزول الكان بيحب مرتو
- أيواااااا عرفناهو .. إتذكرناهو .. آآآي والله .. أها مالو؟

انا محيرنى دخول عماد عبد الله فى البوست ده
الا كان سغاله منو ساكت!!

Quote: الغير مريح أن نفس هذا الرجل قد يكون مغرما بأخرى بالتزامن،

يا سعد ، دا قلب ول دورشستر،
شوف، حتى إذا كانت هناك ثمة حالة حب ( خارجيه ) متزامنة مع (الداخلية) فإن هرمون الأولى
يؤثر في الكريات البيضاء حسب (حبوميتر) دينا ، أما هرمون الداخلية فيظهر في (الصفائح ) الدموية..
شغِّل مخك شويه يا عريس.

Quote: في صيدلية هنا في شمبات فيها دكتورة ظريفة ، شافعه حنكوشه كده ( بيكون هرموناتا بتاعت ود المرتضى دي .. ألف ) .. جيتا و مليان نفاخ أصلي : يا بتي .. أديني كظرظل . إنقهمت : سوري معليش .. بس شنو هو الكضرضل ده يا عمو ؟ قلت ليها : فوار .. فوار عشان البطن الغلتانه .. و الهناي ، النفاخ بعيد عنك . المسكينة الفي راسا راح .. و قرت لي كل انواع أدوية الفوار بتاعت خمة النفس و عصرة القلب و الهففان و اللواية و الحاجات .. و إنت يا الكظرظل سما أرض .. مافي . كتبتو ليها باللنقليزي : ALKA-SELTZER .. قومي يا الشافعه اتصلي بأمك : ماما ، دو وي هاف أني ثينق كولد الكاسالتزار ؟؟ .. يس .. يس .. اوكيه ، أها .. أهااااا .. يس هي إز أولد أند لوكس فنني .. أها ، آي قوت إت موم .. ثانكس . و اتلفتت لي : عمو .. إنت جادي ؟ .

:) :) :)

Quote: وناس الدم المعتق منظرم كيف في الموضوع دا؟

ياخ مالك داير تجيب لينا زولك داك،
هسه يجي يقول ليك الهرمونات في العتاقي والحب من طرف خفي والشدر الكبار فيهو الدلال وهكذا ترهات..

في صيدلية هنا في شمبات فيها دكتورة ظريفة ، شافعه حنكوشه كده ( بيكون هرموناتا بتاعت ود المرتضى دي .. ألف ) ..
جيتا و مليان نفاخ أصلي : يا بتي .. أديني كظرظل .
إنقهمت : سوري معليش .. بس شنو هو الكضرضل ده يا عمو ؟
قلت ليها : فوار .. فوار عشان البطن الغلتانه .. و الهناي ، النفاخ بعيد عنك .

Quote: في صيدلية هنا في شمبات فيها دكتورة ظريفة ، شافعه حنكوشه كده ( بيكون هرموناتا بتاعت ود المرتضى دي .. ألف ) .. جيتا و مليان نفاخ أصلي : يا بتي .. أديني كظرظل . إنقهمت : سوري معليش .. بس شنو هو الكضرضل ده يا عمو ؟ قلت ليها : فوار .. فوار عشان البطن الغلتانه .. و الهناي ، النفاخ بعيد عنك .

إخيييييييييى فيرى فيرى مقرف،،،

ياخواني كان رُقتُوا بوصِّف الشفتُو


جاييك بي رواااااااااااااقة
مولانا وضيوفوا ما عدا الموج

نحن مالناش غير سمعتنا :)

تعرف .. الخواجات ديل جد إنصرافيون ..
عشان كده يا حلاة الدنيا عليهم .
و بما إني إنصرافيون برضك .. ح اقوم أخلل ليك في بوستينك ده ..
( فوقفتُ فيها ناقتي و كأنها فدنٌ ) .. كده بس .

المهم يا ابن خالتي إنه هذا المبحث العلمي طلع بنتايج فالصو .. قول لي كيف ..
هسه أنا القدامك ده - و يا صديق و عمران ما تفتحوا خشمكم ده .. إنطموا - ..
أنا القدامك ده لو عندي جنس الهرمون ده بيكون فورانو بالليل .. ايوه .
يفور زي ما داير .. و أمرق انا من حق الله ,
وكت بقت هرمونات و حمضات نوويات و خلايا جذعية و خلقة ربنا , نحنا ناس موحدين و ما عندنا كلام .. لكن هرموننا يمرق بالليل .
بالنهار ده اصلو ما معانا كلو كلو ..
كمان آخر ما آخر تجيب ليها هرمون بتاع حركات ؟؟ .. و في السودان ؟؟ و نصة نهار ؟؟؟
حب شنو في شمس الله القاده صنقورنا ده ؟؟ .. احب كيف يعني مثلاً و أنا عرقان و و ريحتي طير طير وأخلاقي في طرف نخرتي ؟؟ ..
احب كيف و الهرمونات التانية القبل ده اصلاً منفسه ؟؟ .. مش في هرمونات أساس - زي كريم الأساس - .. اها !!
بعدين هي الزولة زاتا بتكون وشها ينعل قفاها .. مش سودانية ؟؟
يجيني كيف هرمون الحبوليك ده يعني ؟؟ ..بالنية ؟؟

.....
أنا بقول البحث بتاع الخواجه ده فيهو إستهتار بمقدراتنا و ظروفنا و هناي ..
و الخواجة الضلالي العمل البحث ده ما عندو ذمة علمية بتعريفة ..
بس .

Quote: بال ميلي مول

والله دي كتبتها في قوقل ما جاب لي خبرها

اهي انجليزية مكتوبة بالعربي ام عربية مكتوبة باحرف انجليزية ؟

Quote: الحقنى بالهرمون دا عشان اشوف الراجل دا ماشى على وييييييييييييييييييييين

نجاة استهدي بالله وما تلتفتي لناس عماد ديل ، بعدين الموضوع
لسه مجرد أبحاث ، شنو ألحقوني بالهرمون ويا أبومروه ، هنا مافي زول شغال في بايير أو أسترازينيكا..
إحتياطيا كده غني ليهو أهرموني ولا تهرموني ..
بخصوص نشوفو ماشي على وين يبدو أنك تخلطين بين الأبحاث والمباحث.


الله لاتاجركم .. لَوَّعتوا أختنا دي ساي.

عماد أخوي ماتتعقد الكسلسر هنا موضة
دوا كحة وكونجكشن ريليف ونزلة وأي شي
إعلاناته في التلفزيون كل خمسة دقايق

الكونكشن في الريق دا شنو كمان يا راوية؟

الله لا تجاركم كلكم


خصوصاً راوية :)

مولانا انا بعد كلام عماد عبد الله المحبط ده
انا واخوى المسنوح ود شيقوق بمناسبة الهرمون فقد هرمنا هرمنا..
ولا اراكم الله هرمون فى عزيز لديكم ،،،

Quote: أنا القدامك ده لو عندي جنس الهرمون ده بيكون فورانو بالليل .. ايوه . يفور زي ما داير .. و أمرق انا من حق الله , وكت بقت هرمونات و حمضات نوويات و خلايا جذعية و خلقة ربنا , نحنا ناس موحدين و ما عندنا كلام .. لكن هرموننا يمرق بالليل . بالنهار ده اصلو ما معانا كلو كلو .. كمان آخر ما آخر تجيب ليها هرمون بتاع حركات ؟؟ .. و في السودان ؟؟ و نصة نهار ؟؟؟ حب شنو في شمس الله القاده صنقورنا ده ؟؟ .. احب كيف يعني مثلاً و أنا عرقان و و ريحتي طير طير وأخلاقي في طرف نخرتي ؟؟ .. احب كيف و الهرمونات التانية القبل ده اصلاً منفسه ؟؟ .. مش في هرمونات أساس - زي كريم الأساس - .. اها !! بعدين هي الزولة زاتا بتكون وشها ينعل قفاها .. مش سودانية ؟؟ يجيني كيف هرمون الحبوليك ده يعني ؟؟ ..بالنية ؟؟ ..... أنا بقول البحث بتاع الخواجه ده فيهو إستهتار بمقدراتنا و ظروفنا و هناي .. و الخواجة الضلالي العمل البحث ده ما عندو ذمة علمية بتعريفة .. بس .

أنا ذاني بَسْ!

المطرطش يا حبيب
رسلت ليگ إيميل في البريد السخن رجع لي تاني!

Quote: بلاهي عايزة أحجز عشان موضوع التحليل بتاع الـــ ..... !! .

وبعد ما ترجع من المعمل تلقاك قااااعد في البيت ماسك كتاب أو ريموت وطبعن
ما بتسألا كنتي وين لكنها تتبرع من عندها وتقول ليك : غايتو الشوارع بقت
ما محتمله ..اوووف !! أنا جايه من ناس شيراز في ساعه ، طبعن مستحيل توريك إنها
تكبدت وعثاء السفر عشان تعرف مقدار حبك ليها ، مسألة ego وكده ، فيعملوها شيراز..




لا أصفهان.

Quote: ود القاضي كلامكـ قالتو دينا بس بلغة تانية ، التكرار لزومو شنو ؟

كل الناس اتنين اتنين
كلام واحد بلغتين

انا ديك الساعة وكت اقول كلام قالته دينا !!!

Quote: تحليل الدم ده فرقو شنو من جهاز كشف الكذب اياه؟

يا عصام جهاز كشف الكذب غير موثوق بنتائجه لأنو بيعتمد على ظواهر ممكن تحدث في حالات الصدق أيضا
زي خفقان القلب وخمَّة النَفَس وسرعة النبض وتظلمني ليه يا جميل ما ليك حق والله.. يعني نفس الأعراض
البتظهر للزول لمن يلاقي ظبية المسالمه، لكن ده هرمون صاااادق لايأتيه الإيرور من مصدره ولا من خلفه،

Quote: أمانه ما اتمقلبو ناس .... خبرك شين ياخى

هي داب شنا يا عصام..
بس للخواجات..
للخواجاااات بس يا عصام لأنو السودانيين ..

Trust pervades human societies1, 2. Trust is indispensable in friendship, love, families and organizations, and plays a key role in economic exchange and politics3. In the absence of trust among trading partners, market transactions break down. In the absence of trust in a country's institutions and leaders, political legitimacy breaks down. Much recent evidence indicates that trust contributes to economic, political and social success4, 5. Little is known, however, about the biological basis of trust among humans. Here we show that intranasal administration of oxytocin, a neuropeptide that plays a key role in social attachment and affiliation in non-human mammals6, 7, 8, causes a substantial increase in trust among humans, thereby greatly increasing the benefits from social interactions. We also show that the effect of oxytocin on trust is not due to a general increase in the readiness to bear risks. On the contrary, oxytocin specifically affects an individual's willingness to accept social risks arising through interpersonal interactions. These results concur with animal research suggesting an essential role for oxytocin as a biological basis of prosocial approach behaviour.

دي مشاركتي المتواضعه في الموضوع بتاعك دا يا ود المرتضي.........
l

ودا الرابط لمزيد من القراءة


.http://www.nature.com/nature/journal/v435/n70.../abs/nature03701.htm

وان عدتم عدنا !!!!!!!!!!!!!!!

Quote: الوغد طارق جبريل حالو مشيول ساكت!!!!

يا موج ، طارق جمكسين دا المُصَنِّع والمُصَدِّر يعني principal والباقين وكلاء وموزعين
طبعا توجد إستثناءات زي حبيب نوره لأنو الإسم لم يأت من فراغ والناس مقامات..
جمكسين دا هورمونو في السما 24 ساعه ودائما قافل على ارتفاع زي خام غرب تكساس ،يعني ما زول
فحص ، نسال الله أن يديمها عليه من نعمه ..
عيني بارده.

طيب نحن كدة ما رقدنا كاويق
جمكسينا براهو في السماء

الحبيب مولانا محمد المرتضى وضيوفه الكرام

ألم تسعموا الشاعر الغنائي الذي يقول ( أنسيت انك في شعوري وفي دمي ) ؟
فإذا لم ينفع ثيرمومتر الشعور قد ينفع الحبومتر

Quote: ولو حللو ولقو النسبة ضعيفة ... الوصفة لاعادة الحب للدم حتـكون كالاتي غيري نوع العطر والمكياج جرعة إبتسامة طول اليوم وفي كل لحظة جرعة حنية مرة كل إتناشر ساعة(كترتها مضرة وبتدي نتيجة عكسية) معاودة الطبيب بعد إسبوعين من المداومة في العلاج

يا راويه ركزي على الحنيه والإبتسامه والكلمه الطيبه وخليني من المكياج
والعطور ومنتجات بيوت الأزياء والجردقه والحرجل.
صابحني دايمن..

Quote: بعدين هو (الحبوميتر) دا ح يعرف كيف بعد ما يكشف على راجل الهنا دا ويلقى الحب للطيش ح يعرف كيف انو الحب دا حب مرتو ؟ ولا حبيبتو ؟ ولا عشيقتو ؟ ولا بت الجيران ؟ ح يعرف كيف انه حب سلوى مغارز ولا حنان كانون ولا فاطمة جكسا ولا سميرة عذاب ؟؟

(مغارز) (كانون) (عذاب) ..
يا دينا ، بدءا لازم تعرفي إنو موضوع البوست عن هرمون الحب ..
ثانيا دي أسماء ول ألغام ؟ عشان نكون في الصوره وكدا..
ثالثا أتوقع إنو علماء الصيدلة حا يطلعوا لينا ب agent يستعمل
في عملية الفحص ، فإذا تغير لون الهرمون إلى الأخضر فهذا يعني
أن الدرجه المعنيه تخص الزوجه وإذا كان اللون أزرقا فإنها تخص
العشيقة أما لو تغير اللون فجأة إلى الأحمر فالموضوع فيهو مغارز.

دينا بالله إتصلحي معانا وبطِّلي الأسئله الصعبه..

Quote: هرمون الأوكسيتوسين

قال رب اني وهن العظم مني واشتعل الرأس شيبا

ونحن قوم (هرمون) .. فإذا عثروا لدينا علي شئ من الدم فلن يعثروا فيه علي اي (هرمونات) .. سبحان
الله .. فقد طردت الامراض المستوطنه بدمنا كل ما عداها .. فلا تحس في الشرايين الا وجعة هنا وطعنة
هناك .. ولا يخفق القلب الا لارتداد الدم الوارد اليه يضخه بآلية وميكانيكية الي مساراته فلا تجف او تنسد

قل لهن اذا اردن قياسا بالحبوميتر فالنتيجة لن تكون الا 170/ 110 (ضغط) او 160 (سكر) وسيمد لهن
الحبوميتر لسانه فلا يكررن المحاوله ..

وقل لاخيّك شيقوق اهلنا من العقل بحيث لا يسالوا ولا يتلصصوا .. فاللعب امامهن مكشوف (كما الحال)..
وهن ممسكات بمفاتيح اللعب ولسن بحاجة لحبوميتر .. وربنا يخلف علينا في الشعر والصبر من الجاهليه
الي الحلنقي .. دحين سمعت ليك بي واحده قالت لحبيبها (النفسه مسك وعرقو جلاد) !

هن مجبولات علي التعالي والزراية بنا .. فإن افرطن في البحث فانهن يبحثن عن مضاربهن في قلوبنا ..
لذلك حرمهن الله من نعمة الأوكسيتوسين .. وخص به الرجال المساكين ..

عمر علي حسن

Quote: هسه دا داير فحص ؟؟؟

حرررم زولك بقا حبل غسيل بس..

ما قلتو هرموناب !!

عارفه يا دينا ، صدق القال : يظل الرجل يطارد المرأة حتى تُمسِك به..

الاستاذ المرتضى
تحية طيبة
بوست حلو الطعم والمزاج

وانت دوماً رائع يا مرتضى

بس مافي شئ بكشف
والفي القلوب يعلمبو ربي

لازم عماد عبدالله يبوِّظ الرصَّه، ويجيب لي الكلام ..لازم..
يا عماد منو القال ليك نسوانا ما نسواااااان؟
هسه سألتك بالذي خلقك فسواك فعدلك غير حريمنا ديل عندنا كنوز محبه؟ حصل في أي بلد
سمعت بناس كتبوا غنا قدر الكتبوهو السودانيين في نسوانم ؟ أقول ليك حاجه؟ أنا زاتي
بستغرب لامن أسمع خواجه كتب غنيه في واحده من حريمهم ، ولامن اشوف صينيه كتبوا فيها
قصيده والله بحتار.. مش عشان العيون السغار زي عرواي الزراير لكن عشان نحن عندنا فهم
واحد والله واحد وهو إنو المرأة فقط هي الأنثى السودانية من تسعطاشر وفوق، بعدين إنت
ذاتك ما تركز على الشكل والشكلوته والمصطلحات دي، يا عماد ركز على الروح ، ياخ إنت
لما تحتضن سودانيه فإنك لاتحتضن جسدا خلق لأغراض الحياة الأرضيه ، بل تحتضن و تستحضر
تاريخا طويلا منذ الكنداكه مرورا بست النفر ففوزيه ثم هنيده ورويدا رويدا يحتشد بكل
حنان نسائنا ونظراتهن ولمساتهن المكهربة مضمخا بصندل التاريخ البِرَقِّد الروح سلطه ..
أنت تحتضن حضارة وتستصحب تراثا لايزول وجمالا لايفنى..
نحن زاتو أنثى ما بتقول ( أجي يا اخواتي وسجمي يا يمه) ما بنعترف بيها وما عندنا ليها هرمونات
ولا إنزيمات ، فيا عمده ما تهتم للون أو شعر أو قوام ، بل إعمل ببيت جرداق واغمض عينيك
حتى تراها شوف كان ما هرمونك بقا نهاري..

أقسم لك واحده ضربت لي تلفون قالت لي صاحبك دا يقول نحن ( سلامٌ قولاً من ربٍ رحيم) ؟
بالله لو نحن كدا إنتو حربا من شيطان رجيم!! هسه لو إتجدعنا في بلاجات اسكندريه بالمايوه
البيعوس ليكم الكسره منو ربي يكسر خاطركم ويعوسوا في ضهركم ، مش تحمدوا الله أداكم نسوان ماليات
مركزن ؟( تقصد 4×4 تمانيه سلندر جاز) لكن غباكم يوديكم تبحلقوا في المعشكبات ناس نانسي زفت
وكلوديا هباب ، بعدين صاحبك دا ما بختشي يقول والله نحن ماخدين عسس ؟ دا مش جاحد؟ قول ليهو شكلوته إنت ) ..
تخيل قعدت أهدئ فيها يجي زي نص ساعه ، وبعد ما راقت شويه واطمأنيت إني أقنعتها قالت لي
إنت زاتك بتكون زيو وهرموناتك هرمونات ودامبعلو مخلقن لأنك صاحبو يا شبهينا .. وقفلت الخط ..
شفت جبت لي الكلام في صمة هرموناتي كيف؟

عماد .. أختاني.

يا مولانا
، عمدة جاء الى هذا البوست مركب مكنة دكينية و لم يأت لحوار ابدا،
الصيدلانية عملت ليهو خمة نفس و شحتفة و فهمتوا أنو حركات الديم
و الشرطة و الفنون و الحاجات دي ما عادت (بتقسم) مع جيل الديجيتال،
ياخ انت زاتك لو قالوا عنك look funny بتملاهم طوب خليك من فناننا المرهف البتاعات،
يا ربي الطف علينا من ال Mid age هنايات
بعدين بي صراحة انت تستاهل يا مولانا أو يا قول الخلايجة
(تستاهلون) ، تشبكوهن المرأة المغنيسيوم و كنداكة و داك يقول
لي منو ما عارف عايز ارسم قديمك قديم الحمام ده،
عليتوا النسبة و جماعتنا ديل اذا بلغن مكانا لا يتنازلن عنهو قيد هرمنة
خموا و صروا عاد..

Quote: أنا بقول البحث بتاع الخواجه ده فيهو إستهتار بمقدراتنا و ظروفنا و هناي ..

يا هناي، أتفق معاك فالسودان والسودانيين إستثناء على أي قانون أو نظرية أو بحث أو قاعدة..

Quote: تاااااااااااني ياشيقا تاااااااااني عشان كدا قالولي ماتباري شيقا دا

نعم يا وليد،
البباري شيقا بوديهو المعمل..

بعادك طال يا رجل.

Quote: ومالك يا محمد مرتضي من صديق مدثر من دمي غذيته

والنتيجة يا khaleel

Quote: ركز على الروح ، ياخ إنت لما تحتضن سودانيه فإنك لاتحتضن جسدا خلق لأغراض الحياة الأرضيه ، بل تحتضن و تستحضر تاريخا طويلا منذ الكنداكه مرورا بست النفر ففوزيه ثم هنيده ورويدا رويدا يحتشد بكل حنان نسائنا ونظراتهن ولمساتهن المكهربة مضمخا بصندل التاريخ البِرَقِّد الروح سلطه .. أنت تحتضن حضارة وتستصحب تراثا لايزول وجمالا لايفنى..

هههههههههههههههه لكن كدا مش كبرت اللفه شديد ؟
منو ود المقنعه العندو زراعين قدر دا ؟
التضى ..... اركز !









ـــــــــــــــ
تضى امرقوا كلكم من هنا تعالوا بى هناك
لايمننا وقالوا مثقفين انصرافيين بنعمل قراءه عالية
هنا ونزوغ من الكعه ونجى عند المغنمى ! انت قايل نفسك
ما جايب لينا الكلام ؟

Quote: مولانا ممكن سؤال؟ اها وجهاز الحبيومتر ده بعرف نوع الحب؟ يعنى فى الحب الافلاطونى و الحب الاعمى و الحب الاعشى و الحب من طرف واحد و الحب سنة سبعين وكدة واللا النتيجة بتظهر محض حب؟

يا موج،
كافة الأسئلة المتصلة بالحبوميتر وطريقة عمله تحال لمن أورد المصطلح،
إحتياطي كده أوضح الآتي:
-الحب الأعمى والحب الأعشى بسبب سهام عينيك يحال لاختصاصي بصريات
رغم غناعتي بأن المسألة تتعلق بالبصيرة ..
- الحب من طرف واحد يحال لحبيب فلانه العمل ليها طرف تالت وسواها شقدوم..
- الحب سنة سبعين ما عندي عنو فكره ، فوقتها لم أكن أشاهد افلاما مصريه وكنت غرقان في التمني.
- كنت أوضحت في ردي على دندون أعلاه دور الألوان في التمييز بين النتائج المتصلة
بالزوجه أو العشيقة أو المغرزة لكن المشكله تقفز إذا كانت هناك أكثر من زوجة وهنا تبدو قضية..
أعتقد إنو في حالة الزوجه الجديده اللون بيطلع فوشي..

Quote: إنت يا زول داير تشغّل جسمكـ دا كلو بالحبوب!!!

ياخ أوسكار شنو وقرامي شنو ونوبل شنو.. والله يا ود الصائم صيدلانيتك دي
إنتهت منك عدله وقلبه..
غايتو ، قالوا القطره والنصيحه متباريات..

Quote: بنسال .. قطع شك اذا فحصنا النتيجة بتكون وجود الحب في الدم وبغزارة ... لكن الحب ده بعرفوهو بتاع شخص واحد أو متعدد كيف ؟!!!

بختك يا فايز، غزارة في الريده وسوء في التوزيع،
الحب لازم يكون بتاع زول واحد بس يا حبيبنا ، يعني ما ممكن
في ذات الوكت تكون بتحب إتنين وفقا لنظرية الإزاحة لأرخميدس،
ممكن بعد شهر تحب حاجه تانيه (غير) لكن بالتزامن ؟ لا لا..
الحب دا زي البنطلون كرعين إتنين بس ..


عشان كدا الخبثاء يقولوا ليك الحب زي المسمار تمرقوا بمسمار تاني...
في الحاله دي نتيجة الكشف بتطلع 3 بوصه..

يا مولانا ياخ ركز معانا ،
التزامن المعني أن يكون حدس الأخوة الاعداء صحيح من حيث نضوب المشاعر
و باب الريدة انسدا و كدا، و هناك تسريبات و تهريب لملمحبات التموينية
الى قنوات جديدة (خارج اطار الزوجية) يا قول أختنا ديك،
في حين أن الزوج يكون شغال ليها : انتي حب حياتي و ماهبات زندقي، ماهال كيتا ( دي بالفلبيني)
و هو عايش قصة غرام برة البيت، و في نوع تاني.. ديل وكيلك الله، عندهم برندات و بلكونات و حيشان
مع غرف القلب، و مع كل ست توب تجد: دقات القلب صحت تاني و جددت النبض في وجداني
،فنظريتكم المسمارية يا مولانا لا تصلح مع تلكم الفصائل  المعدنية :)

Quote: مولانا المرتضي اضحك الله قلبك والله ضحكتني من جوه قلبي Quote: Quote: . و قال ليهو بلسان عربي مطعم بالنوبي مع شوية مرارات : الحمدو للاه يا ابراهيم أخويا .. أحنا خلي بالك ناس آخره ، إلاكين ربُنا بيعذبنا شويتين كده في الأرض . من حقو ياخي . أمال بعدين ح ناخد المكافأة إزاّاي ؟؟

أم احمد أريتك عافيه،
الكلام دا جابو عماد ، دا نضم ما عندي ليهو لسان ، أنا - زي ما عارفه - زول مسكين بمشي بضل الدرابزين
والغنمايه تاكل عصيدتي ، لكن عماد ما بتوصى ، زمان كان بيقولوا لينا البحر وشارع الظلط وعماد.. حذاري.
تسلمي يا العزيزة.

Quote: و قرت لي كل انواع أدوية الفوار بتاعت خمة النفس و عصرة القلب و الهففان و اللواية . و الحاجات .. و إنت يا الكظرظل سما أرض . مافي

كلام الممكونين ما بِندسَّ كلو كلو..
طبعن يا رمانه دي كلها أعراض شراء الذهب ، وبالطبع أنت أدرى من غيرك أن كمية الذهب
تتناسب عكسيا مع حاجتين وهما الحب والقيافه، كلما زادت العنكشه بالذهب كلما قل جمال
المرأة وقل حب بعلها لها ، والغريبه كثير من نسائنا يعرفن هذه الحقيقة وعند مصارحتهن
بها لايترددن في الإجابه : الحب دايرا بيهو شنو ؟ بينصرف في السوق ول بيجيب لي رغيف
بعدما الراجل (يتلحس)؟ وعند ما تتقيأ كلمة (يتلحس) هذه تكون هزَّت عارضيها وأصابع كفها
في شكل (لحسه) وأظهرت ما تعلق بصدرها من مخزون الخرده ، طبعن في واحدات يتعمدن ذلك
( إرخاء الثوب من على الصدر وتحريك اليدين بدون أي سبب وجيه لإبراز مثبطات الهرمون من عيار 22 ) ،
متابعه الفضائيات ؟..

قال لي صديق قدر ما يقول لحرمه المصون الحب وحده يجعلك جميلة أنيقة ترد عليه :
إنت بس أقعد باري لي كلام المفلسين بتاعين سودانيزأونلاين ديل .

بخٍ بخٍ، ربح البيع ابا أكرم :)
تعرف الما مريح في هذا الخبر بالجد شنو؟
ده طبعا بعد التأكد من صحته علميا ان صدق فريق بحثه العلمي فيما يدعون،
الما مريح أنه سيقضي على اللهفة و الشوق و العذاب ، و تلك الحيرة عند مسك زهرة النرجس أو الياسمين
و قطف بتّلاتها واحدة تلو الأخرى مع ترديد : بيحبني لا ما بيحبني،
يعني حبك يبقى زيو و زي الملاريا و التيفويد، يسوقوك من اضانك لاقرب فحيص ، يطعنوك
و يشفطوا دمك و في النهاية يمكن تطلع كضاب كمان!
ياخ أنا اليوم داك فحصت ملاريا و تيفوبد و قربوا يعدوا لي كرياتي البيضاء لولا أن قرعت الجرس عديل كدا: يا أخوانا كان تقولوا
لي اتبرع بي دم عديييل!
اها قول لو جابت ليها فحص حُب كمان!
يعني انتحار على طريقة الهاريكيري أو بقطع الاوردة عديل!


--------
عليك الله فحص الدهب ده ما زي فحص دمك الجبتو لينا ده يا مولانا، فايتو بي شنو؟ 

Quote: نحن مالناش غير سمعتنا

حبيب نوره،
يا الحب من طرف خفي،
هسه في داعي لقصة السمعه والحاجات دي هنا؟
ألم تسمع بمقولة هتلر ( لا كرامة في الحب والحرب) ؟

سُمعه؟؟؟



دا بيلعب في الرابطه؟

يا ود حامد
سلامات
عاين !
تابعت كتاب عمك . الزول الطيب الفاهم داك .
تابعت قصة كتابو مع مع الوعلة الجميلة مونيكا في ذلك البيت الكبير .
غايتو لو الكلام ده كلو صاح . عمك ده هرموناتو تكون تزرع حواشة .

محمد عبدالرحمن،
يومتا قلت لي برجع ليك ..
مالك ما رجعت؟
مشيت الفحص ؟



نتائج الهرمون المتدني.

ود المرتضى

يا ريت يتوصل العلماء والاطباء لى بحث و تحليل للدم يكشف صدق و حب الاصدقاء وفاهم لى بعضهم

Quote: We also show that the effect of oxytocin on trust is not due to a general increase in the readiness to bear risks. On the contrary, oxytocin specifically affects an individual's willingness to accept social risks arising through interpersonal interactions

مستر كوجان،
هذا الكلام يتعارض مع المعنى الحقيقي للحب ويتعارض مع ما ورد في الخبر أعلاه ومع ما ورد في
كلام الحقيبه وإفادة بمستوى (أهدي ليك الروح وانت بي لاتقبل أعيش محروم يا ..).
شوف يا الخليل ، إذا كان الأوكسيتوسين يتجه بصاحبه إلى النأي عن المخاطر الإجتماعية معناتو
النظرية كلها غلط.
ياخ أقول ليك قوله، الكلام دا صاح لأنو لو كان هذا الهرمون يدفع باتجاه الأخطار الإجتماعية الزول
ما ممكن يحب لأنو الحب يمنح الشعور بتدني الخطر الإجتماعي وسبق أن قلت أنه بوليصة تأمين
شاملة ضد الكوارث شريطةألا يصبح كارثة بحد ذاته.
أعتقد كلام ناسك ديل منطقي أكتر من عبدالرحمن الريح على لسان عوض الجاك..

لك عودة..

غايتو البعرفو أنا ... إنك زول بتفتش للمشاكل و الفتن


و بعدين قول لي الخبر مريح كيف ..؟؟ و مريح لي منو ...؟؟؟

(شايف صاحبك بي هناك في بوست الكرعين)

Quote: ( إرخاء الثوب من على الصدر وتحريك اليدين بدون أي سبب وجيه لإبراز مثبطات الهرمون من عيار 22 ) ، متابعه الفضائيات ؟..

هو الفضائيات لوحدها ؟ ات مالك ما حصل وقفت في صف وزن العفش في المطار عندما تنوي الواحدة استخراج البوردنغ كارد .

الواحدة تلقاها تدنقر للشنطة سبعة مرات عشان التوب يقع وترفع يدها تلفحو كم وكم وكم مرة وكانها ود القرشي قاعد بسرح ماشي الدوام .

Quote: ألم تسعموا الشاعر الغنائي الذي يقول ( أنسيت انك في شعوري وفي دمي ) ؟ فإذا لم ينفع ثيرمومتر الشعور قد ينفع الحبومتر

حبيب الناس جعفر اسماعيل،
والله لو لم يكتب حسين بازرعه غيرها لكفته ،
قيل إن هذا البيت تحديدا أروع ما كتب في الشعر الغنائي السوداني على الإطلاق..
أحتفظ بتسجيلات مختلفة لهذه الأغنية بصوت راحلنا فادح الروعة أبوداؤود وتسجيل
أنقى منه لم أسمع لعزيزنا عاصم البنا بأداء إستثنائي وسأرسله لك كملف صوتي.

يا مولاي ، بازرعة مقياس للحب بحد ذاته ، يعني هو زاتو وحدة قياس زي ريختر
الزلازل وراديوميتر الإشعاع النووي ، يعني ممكن الواحده لو قالت أنها مغرمة
بواحد أو واحد مرجرج في واحده يُمكن أن يسألوه ( كم بمقياس بازرعه)؟

والله يا أبا سعد ذكرت زولا ماهين تب ولايكون الحديث عن الحب المحض ومعاييره
مكتملا إذا لم يكن فيه بازرعه..

صبابة
كلمات / حسين بازرعة
لحن / برعي محمد دفع الله
غناء/ عبدالعزيز محمد داؤود

عجبا يقول الناس إنك هاجري
وأنا الذي ذوّبت فيك مشاعري
سبّحت باسمك والشجون سوامري
حتى بكى قلبي .. بدمع محاجري

*****************
قل لي بربك ، كيف تنسى الموعدا؟
والليل أحلام ... وشوق غرّدا
والجدول الهيمان ..حولنا عربدا
كانت ذراعاك ... لرأسي مرقدا
عجبا أتنساها وتنسى المشهدا
**************
أنسيت أنك في شعوري وفى دمي؟
مهما بعدت ... وزاد منك تألمي
سأعيش بعدك ... راهبا في مأتم
وتعيش أبدا .. ذكرياتك في فمي
ما دام حبّك يا حياتي ملهمي

Quote: دحين سمعت ليك بي واحده قالت لحبيبها (النفسه مسك وعرقو جلاد) ! هن مجبولات علي التعالي والزراية بنا .. فإن افرطن في البحث فانهن يبحثن عن مضاربهن في قلوبنا .. لذلك حرمهن الله من نعمة الأوكسيتوسين .. وخص به الرجال المساكين

يا سعادتك الذين جبلوا على الزراية وحرموا من نعمة التواضع والتآلف وبالتالي حرموا من الحب المصفى يستحقون الشفقة ، المابقولوا عن المحبوب (نفسو مسك وعرقو جلاد ) ربنا يكون في عونم،
هسه يا أبا أمير الما عندو أوكسيتوسين مش زي الهومليس؟ مجرد روبوت وكمان بدون بطاريه..
لكنك أنت أعلم مني بأنهن يغرقن حتى الأذنين ويتظاهرن بالطناش ويتمنعن وهن المجهجهات ..
بس في أغلب الأحايين صادقات.

Quote: لكنك أنت أعلم مني بأنهن يغرقن حتى الأذنين ويتظاهرن بالطناش ويتمنعن وهن المجهجهات .. بس في أغلب الأحايين صادقات.

صدقت ..
هل سمعت بالتي صرخت في زمان سحيق قائلة :
(السحبت حبيبي ..
بخلصو من عيونها)

عمر علي حسن