هل بيعت ميادين أمدرمان لهذا الرجل؟

هل بيعت ميادين أمدرمان لهذا الرجل؟


03-11-2012, 04:16 PM


  » http://sudaneseonline.com/cgi-bin/sdb/2bb.cgi?seq=msg&board=219&msg=1398702357&rn=63


Post: #1
Title: هل بيعت ميادين أمدرمان لهذا الرجل؟
Author: محمد المرتضى حامد
Date: 03-11-2012, 04:16 PM
Parent: #0

مساء الجمعة 9 مارس 2012
قناة أمدرمان الفضائية..
برنامج بعنوان (هتاف المساطب)..
تقديم عوض الجيد الكباشي (حسب الشاشه)..
ضيف الحلقة أحد الوزراء (لعله وزير إتحادي أو ولائي أو نهائي لا أدري)..
جرى الحوار التالي ( بتصرف مني لأني لم أسجل الحلقة كما أن الضيف والمضيف لم يتركا لي أو لبعضهما
فرصة لأستمع جيدا لحوارهما – لم يكن حوارا بل شيئا أقرب ما يكون إلى "الورجغه")..

الكباشي: صحي بعتو ميادين الرابطه حيث تقام مباريات الليق وأندية الدرجه التالته لمعتز البرير؟
الوزير: التمن كم؟
الكباشي: بعتو ولا ما بعتو؟
الوزير: وريني التمن كم؟
الكباشي: يعني ما بعتو؟
الوزير: ياخ دي (عقودات) ليها شروطا والتزاماتا ومعتز البرير عايز يعمل ملاعب رياضيه يخلِّد بيها إسمو..
المذيع: لكن الميادين دي ملكيه عامه ومفروض تبقى للشعب سيما الناشئة.
الوزير: ياخ نحن ما بعنا وما زالت الميادين بإسم المجلس الأعلى للرياضه بولاية الخرطوم!!
الكباشي: دقيقه ، في إتصال هاتفي .. ألو.. معانا.. أهلن أسامه عبد السلام..
(يظهر على الشاشة إسم أسامه عبدالسلام – رئيس منطقة أمدرمان الفرعية)..
الكباشي: رأيك شنو في كلام الوزير دا يا أسامه؟
أسامه: والله أنا بشكر غناة أمدرمان وووو .. بس عندي شهادة بحث بأنو الميادين بإسم مؤسسة البرير الرياضيه
(أو هكذا سمعتها..)
الكباشي: أها يا سيادتك، ردك شنو على كلام أسامه دا؟
الوزير: الشهادة دي عندي زيَّها في المكتب.. لكن الأرض مازالت مملوكة للمجلس ، الموضوع عقد انتفاع..
عموما وسط (الجلبغه) و (الدغمسه) لم أتمكن من متابعة الحوار والمصطلحات بدقة..
لكنني بعد أن (لحست كوعي) خلصت إلى أن الوزير نفى واقعة بيع أراضي ميادين (الليق) بأمدرمان
لمعتز البرير لكن هناك عقد انتفاع (أو هكذ فهمته) بتلك الأراضي ولا أدري كم مدته ، قرن أو نصف قرن لا أدري..
لو كان بينكم من حضر اللقاء أن يفيدناب (النجيضه) على قول محمد الصايم....


*جِدوا لي العذر في استخدام بعض المصطلحات فقد نهلتها من ولاة أمورنا..

Post: #2
Title: Re: هل بيعت ميادين أمدرمان لهذا الرجل؟
Author: Ahmed al Qurashi
Date: 03-11-2012, 04:43 PM
Parent: #1

هم لو ما باعوها لحدي الأن يكونوا بالغوا !

انا أذكر انو سينا قبل وفاته أشار الى بيع ميادين امدرمان وذلك في برنامج تلفزيزني حيث قال

(الحكومة باعت كل الميادين ، اسه لو شاكلت ليك زول ما تلقى ليك ميدان تطالعوا فيهو )




Post: #3
Title: Re: هل بيعت ميادين أمدرمان لهذا الرجل؟
Author: عمران حسن صالح
Date: 03-11-2012, 05:24 PM
Parent: #2



حسي بقى للــ ...............
ما لقيت لي كلمة ( مأدبه ) فتموهــا خيال يا مولانــا

Post: #4
Title: Re: هل بيعت ميادين أمدرمان لهذا الرجل؟
Author: د.محمد حسن
Date: 03-11-2012, 05:29 PM
Parent: #3



هو نحن ذاتنا باعونا
من كفيل لي كفيل
خلي الواطة

Post: #5
Title: Re: هل بيعت ميادين أمدرمان لهذا الرجل؟
Author: محمد أبوالعزائم أبوالريش
Date: 03-11-2012, 05:45 PM
Parent: #4


ميادين أمدرمان؟

والله يا مرتضى أنا خايف يكون في زول شايل شهادة بحث القصر الجمهوري في جيبو.

بعدين إنتو مش قالوا ليكم البلد ما فيها فساد؟

أصلكم ما بتصدّقوا الكلام.



الفساد موجود، فلا حاجة للكذب والفبركة:

Post: #6
Title: Re: هل بيعت ميادين أمدرمان لهذا الرجل؟
Author: rummana
Date: 03-11-2012, 05:57 PM
Parent: #5

ومباني الجامعة الحدادي مدادي ... قصتها شنو؟
أسرة البرير من أسر أم درمان المعروفة والعريقة.. ماذا فعلت ببعضهم الانقاذ؟

Post: #7
Title: Re: هل بيعت ميادين أمدرمان لهذا الرجل؟
Author: الطيب شيقوق
Date: 03-11-2012, 06:34 PM
Parent: #6

Quote: الوزير: الشهادة دي عندي زيَّها في المكتب.. لكن الأرض مازالت مملوكة للمجلس ، الموضوع عقد انتفاع..


معقول دا وزير؟؟؟؟؟؟؟؟؟؟؟؟؟

Post: #8
Title: Re: هل بيعت ميادين أمدرمان لهذا الرجل؟
Author: حبيب نورة
Date: 03-11-2012, 08:40 PM
Parent: #7

هسه الميادين دي ياعوها واللا لأ ؟

مولانا كيفنك

Post: #36
Title: Re: هل بيعت ميادين أمدرمان لهذا الرجل؟
Author: هشام هباني
Date: 03-13-2012, 02:45 PM
Parent: #8

مرتضي يا حبيب


سلامات


الحرامي لمن اسرق كل الدكان بتبقى هينة حكاية العب بالميزان واغش الغافل والضهبان لانو حرامي فنان وهكدا حال السودان المسروق من قبل الكيزان لا يمكن ان تشغلنا سرقة الميدان عن سرقة سيد الاوطان السودان وسارق الاوطان حتما سيقزقز بالشركات والوزارات والسفارات وسيضقل ايضا بالميدان
وبالانسان والحيوان....وانا لله وانا اليه راجعون.

تحياتي لكل السمحين بطرفكم وخسوسا الشقيق احمد هاشم وحرمه المصون

Post: #9
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-11-2012, 08:44 PM
Parent: #7

Quote: (الحكومة باعت كل الميادين ، اسه لو شاكلت ليك زول ما تلقى ليك ميدان تطالعوا فيهو )


(سينا) كان رهيبا يا أحمد، لا تفارق الملح والطرف لسانه،

منذ بضع سنوات كنت أشاهد اللسد النتر يدلي بتصريح خطير أثناء إحتفال رياضي
وقال بأنه سيمنع التغول على الميادين والساحات وكان جوزيف بلاتر
قااااعد شاهد يسمع ويتبسّم وبجواره كمال شداد..
لا أدري عدد الميادين والساحات التي اختفت بعد ذلك التصريح ،
بل بلغ الأمر أن المدينة الرياضية نفسها ظلت تتقلص مساحتها باضطراد
وعما قريب لن تكفي (المدينة) لاستيعاب طربيزة تنس طاوله..

Post: #10
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-12-2012, 02:57 AM
Parent: #9

Quote: حسي بقى للــ ...............
ما لقيت لي كلمة ( مأدبه ) فتموهــا خيال يا مولانــا

الحواجب يا عمران؟
عارف يا ودحسن، يبدو لي أن الرجل ربما لايدري أن بعض عقود الإنتفاع أخطر بكثير من عقود البيع،
فربما تمنح حق انتفاع لسنوات طوال قابلة للتجديد برسم رمزي حتى يكاد يكون هبة مستترة بينما
الثمن في عقد البيع ربما يكون عاليا لدرجة الغبن ،
تمنيت لو كشف (المسئول) عن شروط العقد على الأقل من باب الشفافية ودرءا للشبهات ..
بالطبع لانتهم شخصا بفساد لكن أراضي الدولة هي أرض كل مواطن ومن ثم تهمنا معرفة مصيرها..
هذا إذا كانت حكومتنا الرشيدة تعتبرنا من المواطنين..

Post: #11
Title: Re: هل بيعت ميادين أمدرمان لهذا الرجل؟
Author: Ahmed al Qurashi
Date: 03-12-2012, 07:02 AM
Parent: #10

Quote: هسه الميادين دي ياعوها واللا لأ ؟


يا حبيب نورة الوزير قال ليك عقد انتفاع

ما تضغط عليهم كتير كده

Post: #12
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-12-2012, 07:50 AM
Parent: #11

Quote: هو نحن ذاتنا باعونا
من كفيل لي كفيل
خلي الواطة

يا د. محمد،
باعتبارك جار قريب جدا للميادين المعنية مِد راسك شوف لينا الحاصل..
ياخ مفروض تفرح ،أهو حظكم السمح ، ستجاورون صرحا رياضيا يكون ويمبلي بالنسبه إليه مجرد تُكُل..

Post: #13
Title: Re: هل بيعت ميادين أمدرمان لهذا الرجل؟
Author: رشا سالم
Date: 03-12-2012, 08:11 AM
Parent: #12

ود المرتضى مالك علينا من الصباح..

فتحت الفيس بوك لقيت وقفة الاطباء والجماهير لمنع بيع مستشفى العيون(عبدالفضيل الماظ)

قفلتوا وفتحت سودانيز لقيت بيع ميادين امدرمان..القصة شنو؟يعني خلصوا اي حاجة وما فضل غير

الاراضي..؟ ياخي دا مؤشر خطير جدا..يضاف للمية وخمسين الف مؤشر الفاتو..في حل؟ مافي اعتقد

بس نبلع حبوب الضغط والله كريم على العباد ..

Post: #14
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-12-2012, 08:18 AM
Parent: #12

Quote: والله يا مرتضى أنا خايف يكون في زول شايل شهادة بحث القصر الجمهوري في جيبو.



Quote: بعدين إنتو مش قالوا ليكم البلد ما فيها فساد؟

أصلكم ما بتصدّقوا الكلام.

على العكس تماما يا محمد،
القالوا في فساد هم زاتم وقاموا عملوا لجنة ول هيئة ول دائره أو مربع ما عارف لمكافحته
جزاهم الله خير..
ما يهمني هنا الإجابة عن موضوع ميادين الكرة العامة بأمدرمان وتحديدا ملاعب الرابطة..
أتمنى على العارفين ببواطن الأمور توضيح الأمر..

Post: #15
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-12-2012, 08:30 AM
Parent: #14

Quote: ومباني الجامعة الحدادي مدادي ... قصتها شنو؟

بعد خروج البترول من الحسبة ستباع أشياء كثيرة لردم ال (فجوة).

يا اخوانا بيع ولا انتفاع؟

Post: #16
Title: Re: هل بيعت ميادين أمدرمان لهذا الرجل؟
Author: saadeldin abdelrahman
Date: 03-12-2012, 08:34 AM
Parent: #14

مستشفى العيون بمساحة تزيد عن العشرين كيلو
معروض في مزاد الله أكبر، و لما احتج العمال
قالوا ليهم احنا (حنبيع المستشفى هنا بس) يقصدون الموقع
يعني نظام حنبنيهو في حتة تانية، ما البنحلم بيهو
المستشفى زاتو!
المشكلة طريقتهم في البيع دي لا تشعرك بأن عائدات البيع الضار هذه
داخلة الى خزينة الدولة أو تستفيد منها الميزانية!
هؤلاء القوم فاسدون في انفسهم و مفسدون لغيرهم بوعي أو بدونه،
و من يهن يسهل الهوان عليه!

Post: #17
Title: Re: هل بيعت ميادين أمدرمان لهذا الرجل؟
Author: rummana
Date: 03-12-2012, 09:01 AM
Parent: #16

رشا وسعد الدين
كمان سمعت انه مستشفى الأطفال (جعفر بن عوف) تم قفله وترحيله.. القصة شنو وعمكم مأمون ناوي يعمل شنو في مكان المبني؟

Post: #18
Title: Re: هل بيعت ميادين أمدرمان لهذا الرجل؟
Author: قلقو
Date: 03-12-2012, 09:25 AM
Parent: #17

Quote: وعما قريب لن تكفي (المدينة) لاستيعاب طربيزة تنس طاوله..

الأخ محمد المرتضى,
وهل بالضرورة بنق بونق ؟
العبوا ياخى شطرنج, سيجا, صفرجت والخيارات المتاحة كتيرة .
ياصديقى ان موضوع بيع الأراضى المخصصة للمدينة الرياضية موضوع فساد كبير وخرافى لا يقل عن فساد شركة الأقطان بأى حال, وكل من حاول الأقتراب من ذلك الملف أحترق وآخرهم الوزير المرفود حاج ماجد سوار .
خلينا احسن فى ( رياضة) الويست وكونكان 14 .
مع تحياتى

Post: #19
Title: Re: هل بيعت ميادين أمدرمان لهذا الرجل؟
Author: Haitham Labib
Date: 03-12-2012, 09:34 AM
Parent: #17

يامولانا هي جات على الميادين ديل باعو ميدان بمساحة وطن .. فياخي ماتاخد عليهم .. البيبيعو في الميادين ديل عاوزين ياكلو رزق اليوم باليوم .. أقول ليك شي عجيب جداً ..
زماااااااااااااااااان ميدان المولد بتاع بحري كان جنب البيت على طول أطلع من بيتنا أشوف مدرسة الشعب .. أها زمن مايو عملوه مستشفى أحمد قاسم .. قدامو طوالي مساحة كده عملوها زمن الحيكومة دي جامعة شرق النيل للمختبرات .. وباقي المساحة فيها جامع وقدامو مساحة كده كانت ميدان كورة لعبو فيه من ناس المرحوم شيخ أدريس كباشي مروراً بهيثم السعودي وحمد كمال والبرنس هيثم مصطفى يعني ميدان تأريخي .... المهم في القصة .. وفيه مبنى بتاع دار العمل الوطني زمان وهسه لهاف شعبية .. أقصد لجان شعبية ..
نزلت إجازة قبل كم سنة لقيت ليك واحد باني في نص الميدان ومجاور الجامع الهيتة بالهيتة .. ياجماعة ده شنو ده .. قالو ده إشترى الحتة دي .. نزلت السنة دي هسه لمن أتشرفت بمقابلتك لقيت ود عمو أشترى نص النص الباقي .. وباني ليك حاجة غريبة جداً .. وباقي زي ربع الميدان هسه خليتو الله يكرمك كوشة .. الحلوة في الموضوع دار اللجان الشعبية فتحوه داخل الجامع يعني تدخل تصلي وتسحب شهادة السكن حقتك مرة واحدة .. الأحلى في الموضوع اللعب القصة دي كلها واحد سكن جديد في الحي وبقى رئيس اللجان وهو اللاعب القصة وباع الميدان وشتت سكن في شمبات .. هسه ياربي بيكون بقى رئيس لجان في شمبات .. غايتو الإجازة الجاية لو الله مدّ في الأجال بجيب ليك النجيضة لو لقيت السوق المركزي الفي شمبات مبيوع معناته هو رئيس اللجان هناك ..
فيا مولانا ماعليك بالحرترت ده .. وخليك في أبضنبن كبير ..

Post: #20
Title: Re: هل بيعت ميادين أمدرمان لهذا الرجل؟
Author: الطيب شيقوق
Date: 03-12-2012, 11:25 AM
Parent: #19

شوف الكلام الاحمر دا يا مرتضى

Quote: الناظر للإنقاذ طوال سنواتها الثلاث والعشرين ، لا يخالجه أدنى شك بأن حركاتها وسكناتها كانت تتحرك بمنطق القرية وليس المدينة خصوصاً في إدارة الدولة ، فهذه السمة كانت ظاهرة في المنطق اللفظي الذي شنف أذان السودانيين تبريراً لانقلابهم على الديمقراطية بأنهم وجدوا البلد (جنازة بحر) ، فهذا لفظ قروي لا يعرفه إلا أهل النيل الأوسط في السودان ، ثم توالت العبارات الدالة على (القروية ) مثال عبارات (لحس الكوع وتاباها مملحة تأكلها يابسة، وبلوها و أشربوا مويتها) وغيرها من العبارات التي لا تعرفها المدينة، لأن المدينة إذا أرادت أن تعبر عن هكذا موقف صاغته بمنطق مختلف !!
ثم توالى الهجوم القروي على الدولة السودانية ، عندما قامت وزارة التخطيط حينها في عهد المهندس / شرف الدين بانقا / بفتح الخطط الإسكانية بالعاصمة والمدن الكبرى على مصراعيها دون مراعاة لمتطلبات التخطيط الحضرية ، فكيف تضع خططاً إسكانية في المدن وأنت لم توفر الخدمات الضرورية للمدينة مثل الماء والكهرباء ورصف الطرق وغيرها ، حيث إنه من المعروف أن توفير الماء والكهرباء يتم قبل البناء والتشييد خاصة في المدن، ولكن في السودان كان العكس ، وهذا يدل على استسهال هذه المسائل الخطيرة خاصة إذا أحسنا الظن بهم و ذلك حسب المنطق القروي الذي يتحكم في صانع القرار ، وكان نتيجة هذا التصرف القروي في المدينة أن تحولت المدن إلى أرياف ، لأنه من الصعب أن تسكن المدينة وأنت لا تتمتع بخدمات الكهرباء والماء مثلاً على عكس القرية التي لا تراعى فيها مثال هذه الخدمات لسهولة الحياة فيها !!!
وكان المنطق القروي بائناً في الهجوم الكاسح على الميادين المتواجدة بين الأحياء في المدن والتي صممت لتكون متنفساً للسكان وهي كذلك مساحة جمالية لا بد منها ، ولكن الأخوة القرويون لا يهتمون للناحية الجمالية ، فتساءلوا لماذا تترك هكذا مساحات بين الأحياء دون مباني والناس يسكنون أطراف المدن ، فقالوا تعالوا نهجم عليها ونوزعها قطعاً سكنية ليستفيد منها آخرون حقاً وباطلاً!!على الرغم أنني قروي، لكني على يقين أنك إذا أردت أن تطور منطقة حضارياً فإنه ينبغي عليك أن تصحب معك المتخصصين من(آهل المدن) لأنهم بفطرتهم يجنحون للحضارة أو على أقل تقدير أن يكونوا هم من أهل الصدارة في هذا الشأن ، فلأهل القرى مجالهم الذي يبرعون فيه!!
ويظهر هذا السلوك القروي عند حكومتنا السنية حين جعلت الصحة العامة وخاصة صحة البيئة في آخر سلم أولوياتها ، وكيف أن الكل يرى التدهور المريع لصحة البيئة في السودان، فالمدن في السودان متربة مغبرة مليئة بشجر المسكيت وأكياس البلاستيك وأسراب الباعوض الطائر وغيرها من مهددات الحضارة ، وكل هذا لا يحرك شعرة في صناع القرار ، ليس لأنهم يتجاهلون ذلك ولكن لأن طبيعتهم القروية هي التي حددت نظرتهم للأمور ، ومعلوم أن المدن الآن في السودان قد تريفت تماماً نتيجة هذا السلوك القروي ، ففي الدول المتقدمة يحاولون بشتى الطرق نقل المدينة (أقصد الشق الحضاري من المدينة ) إلى القرية وليس العكس ، فأنت ترى أن الناس في تلك البلدان قد بدأوا يهجرون المدن ويتوجهون صوب الريف ويظهر ذلك في الريف الانجليزي والأمريكي ، وذلك لأن مقومات المدنية متواجدة في الريف إضافة إلى الهدوء والهواء النقي والطبيعة الخلابة !!
أما بالنسبة للتعليم ، فله قصة أخرى محزنة ، حين يشاهد الناس في التلفزيون كيف أن بعض المسؤولين عن التعليم العام في السودان يبرر تهالك المباني المدرسية بأن ينسبها للخريف مثلاً أو أن أولياء أمور التلاميذ كان ينبغي عليهم أن يصينوها ، أو أن يحل مشكلة اكتظاظ المدارس بالتلاميذ بأن يبرر أن (مدرسة مكتظة خير من لا مدرسة أصلاً) أو أن يأمر بزيادة الجرعات الدراسية والدروس العصرية، أو يناشد مديري المدارس بأن يراعوا التلاميذ الفقراء عند جباية الرسوم المدرسية ، متجاهلاً النصوص القانونية التي تجرم مثل هذا التصرف، هذا كله نتيجة السلوك القروي الذي لا يحب الانضباط القانوني ويجنح دائماً إلى المصالحات لا سيما في أمر خطير وقضية كبرى كالتعليم . نعم أنه يمكن أن تكون هناك بعض الأسباب المادية ، ولكننا نتحدث هنا عن استسهال واستصغار قضية التعليم وعدم وضعها المكان اللائق بها كأم القضايا والسلوك القروي الذي يستخدم لمعالجة مشاكلها !!؟؟
وتظهر الكارثة في عدم احترام الأنظمة والقوانين لا سيما القوانين والأنظمة الدولية المتعارف عليها ، وبان ذلك جلياً في التعاطي السياسي من مذكرة الجلب الشهيرة بحق السيد رئيس الجمهورية ، فأنت ترى أناساً يذكرون مدعي المحكمة الجنائية الدولة أوكامبو بسد أنشأ علي النيل بأنه رد طبيعي لمذكرة قانونية ، فالسلوك القروي يظن أن التنمية والتقدم في البلاد يمكن أن تجعل من مذكرة قانونية صادرة بحق شخص مجرد هباءاً منثوراً في حين أن السليم أن يكون الرد المتعارف عليه بذات منطق المذكرة القانونية الصادرة ، ورأى العالم كيف أن المسؤولين والصحفيين السودانيين قد أهريقوا حبراً كثيراً وعلت أصواتهم مجلجة لمجرد أن هناك قاضياً قد أصدر مذكرة بحق رئيسهم المحبوب ، لم يتركوا هذا الموضوع لأهل الشأن والذين ربما وجدوا حلاً أراحهم وأراح البلاد من هذا السلوك القروي الفج الذي لا يقيس كل غلة بمكيالها.
في الكنانة كثير من هذا السلوك القروي الذي اجتاح بلاد السودان في العقدين الأخيرين فلا هي أصبحت من بلاد العالم المتحضرة ولا هي بقيت قرية لها ميزتها ، فصار حالها كحمارة المحمدية التي أرادت أن تعوم مع البقر فغرقت ، وهذا المثل تعبير قروي يليق بحال دولتنا المستباحة من قبل أخوتنا القرويين!! والله المستعان ..

الطيب كباشي الفزاري

Post: #21
Title: Re: هل بيعت ميادين أمدرمان لهذا الرجل؟
Author: نجاة محمد بابكر
Date: 03-12-2012, 12:11 PM
Parent: #20

انتفاع قال ليكم الراجل انتفاع انتو مصرين على البيع لمن ابيعها احيركم


صاحب البوست والمتداخلين سلام


كدى النمشى فى الشمس الحارة دى على الميدان الجنبنا نشوفو بيع وى انتفاع

Post: #22
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-12-2012, 12:21 PM
Parent: #21

يا الطيب،
الضيف بقوله أنه يحوز شهادة مماثلة لتلك التي تحدث عنها السيد أسامه عبدالسلام ربما
كان يعني أنه يحوز شهادة بحث عليها إفادة توضح حق الإنتفاع ، وكما تعلم أن حق الإنتفاع
بقطعة أرض يظهر في شهادة البحث إلا أن ذلك لايؤثر في ملكية (الرقبة) كما يقول أهل القانون.

Post: #23
Title: Re: هل بيعت ميادين أمدرمان لهذا الرجل؟
Author: Osman Musa
Date: 03-12-2012, 02:01 PM
Parent: #22

هسع يا ودحامد
نعمل عملية العيون للعمة وين ؟
..
والله يا محمد غايتو يا حليل حاجات الشعب السوداني الفكت من يدو .
.. مشيت يا محمد السودان شهر 1 الفات . في مشروع الجزيرة يا محمد الموية
مفكوكة في الحواشات من سنار لاحدي كاب الجداد .
مفكوكة ساكت . تخيل ؟
وفي مستشفي عطبرة يا محمد . وفي داخل المشرحة المهجورة قبضو ورل مترين ونص .
ورل عديل منقرط .
وأحد مجنون قال : أحتمال لعدم وجود حبوب ال Fish Oil .
الجماعة ديل عندهم محاولات لصناعة حبوب زيت الورل .
البيع يا محمد في كل مكان . تصدق يا محمد باعوا المحلج بي مكنو حق
مشروع الزيداب المحلح الفتحو مستر هارفي سنة 1903 .
القطن بتاعو من نوع طويل التيلة ونوع نورث كارولاينا كان يصدر من محطة
سكة حديد الزيداب علي طول لمناسج لانكشير جنوب لندن .
أذكر يا محمد سنة 1966 كيف كنا عايشين وكيف كانت المدارس وكيف كانت الصحة
وكيف كانت الخدمة المدنية .
البلد كانت بلد والحلة كانت بصل وكنا حامدين شاكرين ماكلين شاربين .
الي أن تعرض البلد للسرقة في الليلة ديك .
تحياتي

Post: #24
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-12-2012, 02:17 PM
Parent: #22

Quote: هسه الميادين دي ياعوها واللا لأ ؟

يا حبيب نوره،
في مقابلة إذاعية سأل المذيع ضيفه ( وهو مغن صاعد) ، إنت ما عندك غنا خاص بيك؟
المغني قال ليهو: عندي غنيه جديده حقتي بتقول ( يا أب بطنا غريقه قول لي الحقيقه)
غايتو كان لميت في الصاعد زي ديسكفري دا حا يقول لي الحقيقه..

Post: #25
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-12-2012, 04:28 PM
Parent: #24

Quote: بس نبلع حبوب الضغط والله كريم على العباد ..

د. رشا ،
ضغط بس؟
أنت متفائلة وأدامها الله عليك من نعمة،

Post: #26
Title: Re: هل بيعت ميادين أمدرمان لهذا الرجل؟
Author: Haitham Labib
Date: 03-12-2012, 10:01 PM
Parent: #25

هاك يامولانا علشان الكلام يكون على بينة ( أنفع محامي معاكم)



Post: #27
Title: Re: هل بيعت ميادين أمدرمان لهذا الرجل؟
Author: Kostawi
Date: 03-12-2012, 10:19 PM
Parent: #26

امدرمان الأهلية المتوسطة في خطر!

Post: #28
Title: Re: هل بيعت ميادين أمدرمان لهذا الرجل؟
Author: عمر مصطفى مضوي
Date: 03-13-2012, 07:01 AM
Parent: #27

يا دكتور سلام ومتعك ربي بالعافية وضيوفك .

وأرجو أن لا نستغرب بيع الميادين من قبل من باعوا الفرح الكان حدادي مدادي وكان أسمو السودان . ممن باعوا ذكرياتنا وأفراحنا وحتى آلامنا النبيلة .
يا خي ديل باعوا أعمارنا وقيمنا ومبادينا . سماحتنا ووفاقنا وعيشتنا واماسينا الجميلة هل تتخيل يادكتور بلد بدون أماسي .
أنا كنت هناك ابحث عن هذه الاماسي والله البلد شدة ما حزينة تقول مارقة من بيت الحبس .
يا أخي ديل خلونا نستجدي الحياة والفرح من بقايا حيوات وافراح الآخرين
وما يتصدقون به علينا من إلفه كاذبة اغلب الظن أنها الشفقة .
قاتلهم الله أينما ثقفوا ،،

Post: #29
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-13-2012, 07:48 AM
Parent: #28

Quote: معقول دا وزير؟؟؟؟؟؟؟؟؟؟؟؟؟

بلى يا شيقوق..


بلى..

Post: #30
Title: Re: هل بيعت ميادين أمدرمان لهذا الرجل؟
Author: anwar abu gaidaa
Date: 03-13-2012, 08:46 AM
Parent: #29

الاخوه الاحباب
الموجوعون الموجوعيين؟ المتوكون والمتوكات
الحادبين والحادبات على مصلحة بلدنا
اديكم النجيضه
اى خلل فى موضوع الاراضى امشى ابحث عن
صندوق الاستثمار للضمان الاجتماعى
وهى مجموعة صناديق؟
مسئوله عن اى مخطط سكنى وخلافه
مع ما تبقى من ودى ؟؟

Post: #31
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-13-2012, 10:21 AM
Parent: #30

Quote: مستشفى العيون بمساحة تزيد عن العشرين كيلو
معروض في مزاد الله أكبر، و لما احتج العمال
قالوا ليهم احنا (حنبيع المستشفى هنا بس) يقصدون الموقع
يعني نظام حنبنيهو في حتة تانية،

يا سعدالدين ،\
ربما يجد بعضهم المبررات والمخرج (الكريم) لأفعالهم في حالة
مستشفى العيون بزعم أن عائد البيع سيوظف لبناء مستشفى راق في موقع
آخر سيما أن موقع المستشفى الحالي يُسيل لعاب أهل السياحة وسماسرة
الخمسة نجوم فما فوق. لكن ما لا أستطيع استيعابه تحميل الميادين العامة
بأعباء قانونية كحق الإنتفاع ولشخص واحد سواء كان شخصا طبيعيا أو اعتباريا
وهذا يناقض رأسيا وأفقيا عهدا قطعه عمر حسن أحمد البشير في هذا الصدد
في حضور رئيس الفيفا ورئيس إتحاد كرة القدم وقتها كمال شداد وكنت شاهدا
عليه من خلال الشاشه ..

Post: #32
Title: Re: هل بيعت ميادين أمدرمان لهذا الرجل؟
Author: معتصم الطاهر
Date: 03-13-2012, 12:18 PM
Parent: #31

أها .. عقد الانتفاع شروطو شنو


المساحة الخضراء كم ؟


مساحة الملاعب كم ؟


فيهو كم دكان .. وكم مول ..

مساحة المدرسة الاكاديمية كم ؟

و الدراسة فيها بى كم ؟


بعدين البرير دا علاقتو بالرياضة بدت متين ؟

Post: #33
Title: Re: هل بيعت ميادين أمدرمان لهذا الرجل؟
Author: الطيب شيقوق
Date: 03-13-2012, 12:42 PM
Parent: #32

بلى يا شيقوق..

ههههههههههههههههههههههههههها

Post: #34
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-13-2012, 01:10 PM
Parent: #31

Quote: العبوا ياخى شطرنج, سيجا, صفرجت والخيارات المتاحة كتيرة .

قصدك بالخيارات الواحد يلعب بضنبو if any؟
يا قلقو سلام،
في مدينة المهندسين بأمدرمان تم تسوير مساحة معتبرة بالسلك لتكون حديقة تقوم بدور
الرئة للحي في زمن عز فيه الأكسجين رغم أنها كان مخطط لها أن تكون منطقة خدمات ،
ولكن ماهي إلا شهور وقامت الجهات (المعنية) بإزالة السور وتم توزيع المساحة كلها لأفراد
فأصبح الحي - وهو بمساحة مدينة صغيرة - يكاد يكون خاليا من أي حديقة بل إن شوارعه
الداخلية نفسها بالكاد تتسع لمرور سيارة ، ليس ذلك وحسب بل إن ميدانا كبيرا في الحي
كان يستضيف هواة الكرة وغيرها تم الترخيص ببناء جزء كبير منه كصالة (أفراح) في وسط
منطقة سكنية جعلت الكثيرين يزهدوا العيش هناك بسبب الزحام والإزعاج والغبار الخرافي
الذي تتسبب فيه الحافلات والسيارات والمركبات يوميا وبشكل أحال مساءات الحي إلى
حال يلامس سقف العذاب..


-
صحيح ( أفراح) قوم عند قوم (أتراح) ..
مثل شعبي من كوكب بلوتو ..
والعاقبه عندكم في المسرات..

Post: #35
Title: Re: هل بيعت ميادين أمدرمان لهذا الرجل؟
Author: DKEEN
Date: 03-13-2012, 01:34 PM
Parent: #34

يامرتضا

عقود الانتفاع دي ماياها ذات عقود البيع التي اشترينا بها مانسميهو حاليا (اشتريت واضة في الحتة الفلانية)
اصلا مافي بيع لي ارض في السودان يااصلي.. هي عقود انتفاع (حواكير) كل سنة بجيك واحد او واحدة تدق الباب تقول ليك ادينا حق العتب..

الملك الحر ده من زمن الخليفة التعايشي اللحق كاوش لحق والمالحق عليهو بالانتفاع..
تنتنفع وتنتفع وتنتفع كده الى مالانهاية..

انا احي معاوية البرير
على الاقل ابوهو كان راجل عندو فضل ومعروف الاصل..
خلي يخمها، يعني الخموها قبلو جدهم كان الخليفة؟؟

خلي يخمها خماها البلا ..بلا ميدان بلا آرف..المحتاج لي ميدان يطلع الشارع يقول (انا عايز ميدان..انا عايز حقنا)
اظر وايس كلو زول يلبد في علبة رعبو الخاصة..ويحاول يستمتع بهذا النكــــــاح المميز..
فقد قال قائل:

لو ماقدرتا تقاوم الاغتصاب فلا اقل من ان تستمتع به..

Post: #37
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-13-2012, 04:27 PM
Parent: #35

هيثم لبيب،

في مثل سردك ووجعتك على ميدانكم ببحري اعتاد العامة أن يقولوا (الجاتك في ميدانك سامحتك)
لكن يا الحبيب ظلت تلك التعازي في حالات الفقد تترى و(القضم) مستمر حتى يأتي اليوم الذي
يصاب العامة بإسفكسيا الخنق وتهتك الرئات ، يبدو لي أن مسئولينا تفتح شهيتهم الإحتجاجات
فيصبحوا مع كل اعتراض كالنار إذا ما ألقي فيها (ميدانا) يقولوا هل من مزيد؟

لم أتوقع قط أن يأتيني أحدهم بالمادة كاملة، ومن منبري هذا في يومي هذا أرسل
إليك التحايا الخضر وأنت تقدم لي المادة التي أصبحت كالوضوء وألغت كل سردي التيممي
أعلاه.. كنت عايز أعمل فيها مشروع كاتب مسرحي وبتاع سيناريوهات فأجهضت محاولتي ..
لكن بالله ما رأيك في مقولة وزيرنا الهمام عن معتز البرير (عايز يخلِّد إسمه) وهو
من العارفين بأن كل من عليها فان ويدرك أن كل شئ هالك إلا وجهه؟

دي تجي ككيف يا هيثم؟
حيَّرت أفكاري معاك..
الفيديو مبالغه يا هيثم..

لك حب بلا شوائب غير منزوع الدسم ..

Post: #38
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-13-2012, 09:22 PM
Parent: #37

Quote: كدى النمشى فى الشمس الحارة دى على الميدان الجنبنا نشوفو بيع وى انتفاع

ربما تعتقدينها طرفة يا نجاة لكن مع الإنقاذ أصبح السودان مسرحا عبثيا كبيرا مع تزايد
المتفرجين وتقلص (الخشبة) والجميع بانتظار جودو باستثناء المخرجين ، إنه مسرح اللامعقول
بس أعملي حساب بيتكم..

Post: #39
Title: Re: هل بيعت ميادين أمدرمان لهذا الرجل؟
Author: محمد علي شقدي
Date: 03-14-2012, 04:16 AM
Parent: #38

مولانا ًسلامات يا جميل

الحيكومة دي مفوضه من الشعب اصلا لبيع ارضه فلا تستنكر عليها ممارسة حقها في الانجاز
اشان ردمه في شوارع مدني الكانت قرينة الجمال ولعدم وجود سيوله الحيكومة فرع الوسطى
بتسلموا جزء من اراضي بيوت الموظفين المدكوكه الفي ستر السوق يعني
يعني ينجزوا ليكم من وين علامة الاستفهام في السوادن حبينا المرتضى شبه معدومة في سوق المنطق
تحياتي

Post: #40
Title: Re: هل بيعت ميادين أمدرمان لهذا الرجل؟
Author: عمر علي حسن
Date: 03-14-2012, 05:52 AM
Parent: #35

Quote: خلي يخمها خماها البلا ..
لو ماقدرتا تقاوم الاغتصاب فلا اقل من ان تستمتع به..


المرتضي

انا لي تلاته ايام بقرأ في البوست ده و(متلبب) الصبر .. والله لو اتفتحت فيكم
ما تلقوا اليسكتني ..

عمر علي حسن

Post: #41
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-14-2012, 07:16 AM
Parent: #40

Quote: وفي مستشفي عطبرة يا محمد . وفي داخل المشرحة المهجورة قبضو ورل مترين ونص .

بلد يقدل فيها التمساح لازم ينقبض فيها الورل،

(مثل من نهر الجور)





سلامي يا عثمان..

Post: #42
Title: Re: هل بيعت ميادين أمدرمان لهذا الرجل؟
Author: المسافر
Date: 03-14-2012, 07:34 AM
Parent: #40

مولانا أزيك

زمان كان في مدير أراضي من أم درمان اسمه عبد الكريم ، ساكن في التاسعة ، جوار الكوارتة ، هو من بدأ بيع ميادين ام درمان في نهاية السبعينات وأول الثمانين...
ولما ظهرت عصابة الميادين كانت العدوى انتقلت من ام درمان إلى الخرطوم جنوب ، والجماعة أنهالوا على البيوت المتروكة...
العصابة كلها كانت ام درمانية والقصة كانت كبيرة لما عويرة حتى نميري ذاتو زهج من قصة ام درمان دي وقالهم (( خلاص رحلوها وقصقصوها وعتلوها فوق ضهركم ده ... ينعل ابوكم ... ما خلينا بيت في ام درمان ما جبنا منو زول طلع لينا فشوش ... هسي اهلكم بقو يسألوني ده منو الجبتو ده ... وده من وين... يلا روحوا بلا يخمكم...))

يعني جات لي ناس بريرو ده ... ديل نص ام درمان ... انا مشيت مع عاكف بيتو لقيتو جنب البوستة ... ده لو ما لحقو ضموها لبيتهم ... وسمعت قالو باعوها..

وبالمناسبة دي أهديك أغنية العندليب الأسمر
بيع قلبك بيع حبك شوف الشاري مين

اكيد الشاري امدرماني

Post: #43
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-14-2012, 09:19 AM
Parent: #42

Quote: امدرمان الأهلية المتوسطة في خطر!

يا كوستاوي،
شكرا لإيراد الرابط للموضوع الذي ابتدره الأخ سامي عبدالوهاب مكي .
لاشك أنه من يومها مرت مياه كثيرة تحت الجسر ولكن الحال - رغم مرور 4 سنوات على الموضوع -
ما زال على حاله،المدرسة الأهلية التي قضينا فيها أجمل أيام العمر كُتب عن حالها الكثير
وميدانها الذي شهد تجمعات سياسية خالدة أصبح ساحة خرده وموقفا لشاحنات مشبوهة وانعطنت
تربته بزيوت الماكينات المستعملة ( الراجع) وأشياء أخرى.

لو كانت تلك المدرسة - التي تم تأسست في 1926 - في دولة أخرى لأصبحت معلما أكاديميا أو
متحفا ومزارا حيث أنها شيدت بالدموع والعرق والدم في مواجهة المستعمر وهي أول صرح تعليمي
أهلي وتخرج فيها نفر عمروا الأرض منهم من قضى نحبه ومنهم من ينتظر ويكفيها أنهاإحدى محطات
الزعيم الأزهري في سلك التعليم،
لكنه زمن الكوليرا.

Post: #44
Title: Re: هل بيعت ميادين أمدرمان لهذا الرجل؟
Author: محمد أبوالعزائم أبوالريش
Date: 03-14-2012, 10:18 AM
Parent: #43

Quote: هاك يامولانا علشان الكلام يكون على بينة ( أنفع محامي معاكم)


إنا لله ...

يا مرتضى .... يمكن تكون عارف أخوك ما عندو أي علاقة بالرياضة (الكورة) ... عشان كدة لا بشوفها في التلفزيون ولا بقراها في جريدة ... بس إتضح إنو (عدم الهواية دي) مرات بتفوّت على الزول متعة حقيقية.

هسي التسجيل ده مش متعة بالله (متعة بالمغص)

سلام

Post: #46
Title: Re: هل بيعت ميادين أمدرمان لهذا الرجل؟
Author: محمد المرتضى حامد
Date: 03-14-2012, 11:56 AM
Parent: #44

Quote: يا خي ديل باعوا أعمارنا وقيمنا ومبادينا. سماحتنا ووفاقنا وعيشتنا واماسينا الجميلة هل تتخيل يادكتور* بلد بدون أماسي .
أنا كنت هناك ابحث عن هذه الاماسي والله البلد شدة ما حزينة تقول مارقة من بيت الحبس.

يا عمر ، لِم لاتحزن البلد وهي فقدت أبناء جنوبها دعك عن أرض كانت تجمعهم مع إخوتهم في الشمال
، كيف لاتحزن بلد وأطرافها تشتعل فيها الحرائق ومركزها كما ترى..
بيت حبس؟
كما يقولون ، كل شئ يولد صغيرا ثم يكبر عدا الحزن ، إلا أن حزننا يولد كبيرا ثم يكبر ..



-
*
إن كنت تعنيني في مداخلتك بلقب (دكتور) فليست لي درجة علمية تؤهلني لهذا اللقب ..
مودتي يا عزيز.

Post: #45
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: نجاة محمد بابكر
Date: 03-14-2012, 10:29 AM
Parent: #43

غايتو انا شايفة فى ميادبن بسوروها وبختو فيها نجيبلة صناعبة وبتتأجر للشباب عشان العبو فيها كورة الساعة ب 250 جنيه اقومو الاولاد اعملو شيرنج عشان العبو

جنبنا فى ميادين عملوهم كدة ويقال فى واحدات مجانا




.

Post: #47
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: Osman Musa
Date: 03-14-2012, 12:45 PM
Parent: #45

سنة 1995 يا محمد
وأحد من جماعة لهط الأرض ديل
كسح النهار الي أسبانيا وكان معاو 80 مليون دولار .
دأك يا محمد كان يمسح أي حاجة . ميدان علي قوز علي طاحونة .
زول صعب وعندو المدردم كلو ليمون .
غايتو يا أخوي أحسن حاجة الزول يموت وماعندو في الدنيا دي الا
مكتبة بكري ابوبكر دي و38 دولار في B N C بانك و 20 نخلة في البلد
وبقرتين .
..
عليك الله وزي ما قال حميد :
أيه الدنيا غير
لمة ناس في خير ؟؟؟؟؟؟؟؟؟؟؟؟؟؟؟؟؟

Post: #48
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-14-2012, 02:26 PM
Parent: #47

Quote: اديكم النجيضه
اى خلل فى موضوع الاراضى امشى ابحث عن
صندوق الاستثمار للضمان الاجتماعى
وهى مجموعة صناديق؟
مسئوله عن اى مخطط سكنى وخلافه
مع ما تبقى من ودى ؟؟

يا أنور لا أظن أن الحالة التي نحن بصددها لها علاقة بالصندوق الذي
تفضلت بالإشارة إليه ، هذا الصندوق ربما اشترى أراض أخرى سمعت أن من بينها
منطقة واسعة تقع جنوب كلية البيطرة وغيرها لكن أيا كان الحال
فهو وما يملك بعض من المال العام إذا صحت معلوماتي ، لكن
أن يتم التصرف في أراضي الدولة لأفراد ولأجل منافع ضيقة من
عيار (يخلِّد إسمو) كما قال الوزير في البرنامج فهذا
ما يحتاج الوقوف عنده ..

يا أبا غيداء البوست دا شارف على 3000 مشاهده في 3 يوم وبكري
رافعو بيرق زي بتاع عربية الوالي المدهش إياه ويا كافي البلا
مافي زول يورينا بيع ول انتفاع؟
ياخ عبِّرونا..

هسه البطنم غريقه يكونوا بيقولوا في سرهم : التجاهل التجاهل إنهم ما جاؤوا لميادين؟
كويس نغيِّر كلمة (ميادين) دي طالما بتجيب حساسية ، إعتبروها (ساحات) ..

Post: #49
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: حسن طه محمد
Date: 03-14-2012, 02:35 PM
Parent: #47

Quote: معقول دا وزير؟؟؟؟؟؟؟؟؟؟؟؟؟


أخوي الطيب

دا مش احسن من وزير

قال في كلمة رسمية اثناء زيارة له لاحدي الدول وهو يتحدث عن السيد الرئيس حسب ما سمعنا:

" السيد عمر حسن احمد البشير الرئيس الفخري للسودان " !!!!

بالله شوف جنس دا يا الطيب

Post: #50
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-14-2012, 04:10 PM
Parent: #49

Quote: أها .. عقد الانتفاع شروطو شنو


المساحة الخضراء كم ؟


مساحة الملاعب كم ؟


فيهو كم دكان .. وكم مول ..

مساحة المدرسة الاكاديمية كم ؟

و الدراسة فيها بى كم ؟

valid questions
تنتظر الإجابة عليها فهل من مجيب؟

Post: #51
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-14-2012, 09:42 PM
Parent: #50

Quote: خلي يخمها خماها البلا ..بلا ميدان بلا آرف..المحتاج لي ميدان يطلع الشارع يقول (انا عايز ميدان..انا عايز حقنا)
اظر وايس كلو زول يلبد في علبة رعبو الخاصة..ويحاول يستمتع بهذا النكــــــاح المميز..

ما بيخمها يا دكين،
الزول دا إيدو مبروكه وهذه ليست من عندياتي ، ففي إفتتاح رويال كير ، وكنت
أشاهد الإفتتاح من خلال شاشة النيل الأزرق ، قال أسد أفريقيا إن هذا الرجل يده
مبروكه ما أن يضع يده على شئ وإلا لحقه النجاح أو شئ من هذا القبيل، وأنا
أصدق ولي أمري ورئيسي وسيدي وسيد أطفالي وبعيري - كما قال دريد في شقائق النعمان-
أنا أتمنى أن يضع المبروك يده على كل شئ ليصبح ذهبا كلمسة ميدوزا الوارد
ذكرها في الميثولوجيا الإغريقية ..
إن شاء الله يضع يده علينا كلنا عشان نغني للفشل دربي أصبح ماهو دربك ونقول
للهموم فارقيهو دربي ونوقف تصدير الدكاتره والنبق.. بعدين شنو قصة نطلع للشارع
ونقول عايزين ميدان وعايزين حقنا ، ياخ نحن بنفتح بوستات للونسه وتزجية الوقت
عايز تعمل الموضوع جد؟
دكين ، أنا زول مسكين ساي ما تدخلني في السياسه..

Post: #52
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-15-2012, 07:45 AM
Parent: #51

Quote: يعني ينجزوا ليكم من وين

دا سؤال دا يا شقديّّ أخوي!!
مش قلنا نعلف مما نرتع؟

يامحمد اليابان ما عندها بترول ومواردها الطبيعية شحيحة ولكنها تمثل
ثاني إقتصاد في العالم ، لو أن مواردنا تم توظيفها بشكل صحيح وتبنينا
الشفافية والجديه في عملنا وتركنا الشعارات الفارغة التي لم تصنع (منقد)
لما كان هذا حالنا..

بالله يا شقدي دعواتك أن نحافظ على ما تبقى من وطن أما الإنجازات دي
فما عايزنها كلو كلو..

تسلم يا عزيز.

Post: #53
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-15-2012, 08:36 AM
Parent: #52

Quote: المرتضي

انا لي تلاته ايام بقرأ في البوست ده و(متلبب) الصبر .. والله لو اتفتحت فيكم
ما تلقوا اليسكتني ..

عمر علي حسن


يا سعادتك
إن مع العسر يسرا ، الصورة ليست كما يراها الآوتسايدرز فهنالك إنجازات في الطريق
في مجالات الزراعه والصناعة والسكة الحديد ، وخطاب السيد معتز البرير في افتتاح
رويال كير يوضح بأن للرجل خطه مدروسه في مختلف ميادين الإقتصاد ونسأل المولى
أن يوفقه ويسدد خطاه ويحفظه من أعين الحاسدين ، بس يخلي لينا الميادين..
آمين.



Post: #54
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: عبدالله احيمر
Date: 03-15-2012, 09:47 AM
Parent: #53

محمد المرتضى

الناس الببيعوا و البيهدوا في اراضي السـودان ديل ياهم اصحاب التفكير الضيق
و المصالح المقدمة و المؤجلة و الذمة الأوســـع
و الله يا محمد جنبنبا ميدان كان متنفس لأهل الحي قاموا ادوه لواحد كوز بدون مقابل
و بدون وجه حـق غير انه كوز من الثانوي , فلا بيت له في الحي اصلا عشان يكون اخدوا بحق الشفعة
الزول دا كان مؤجر في حينا وله ارض خطة اسكانية

اها الزول بعد 10 سنين باع ميدانابمئات الملايين و قلع الخرطوم


ديل ناس ضد الجمال و الصحة ,



يا زول رجعت ولا لسة

Post: #55
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: DKEEN
Date: 03-15-2012, 12:52 PM
Parent: #54

يازول الارض لمن يفلحها..

Post: #56
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: اسعد الريفى
Date: 03-15-2012, 01:45 PM
Parent: #55

كنت قد كتبت ها الكلام قبل اكثر من ستة اعوام
Quote:

الردمية الفين و ستة للاسكان الفاخر و الشعبى

بعض عمرك ما لم تعشه
وما لم تمته
ومالم تقله
وما لا يقال
وبعض حقائق عصرك
أنك عصر من الكلمات
وأنك مستغرق في الخيال
الكلمات اعلاه ، تقرير لواقع حال و لم أقلها أنا لكنها كلمات شاعرنا الفيتورى، و المذهل فى كلماته أننا و بقليل من التصرف نجدها قراءة لواقعنا الاغترابى اليوم ، خاصة لبعض اولئك الحالمين بيوم العودة، و الاندماج فى خضم سيارات تتهادى "كما الوجى الوحل" و التى حين تتجاورها الاتوس و النوبيرا و الركشا و الدفار.. تحمر " طاساتها خجلا"..
أما أصحاب الامانى الوردية من فئة المقيمين خارج السودان لدواعى أكل العيش بأمتلاك " فيلا" فى الفردوس أو المنشية و حى الشاطئ و الطائف و المعمورة و المهندسين و العودة و كافورى فدائما تحول المدخرات المتآكلة و المصاريف المتعاظمة بينهم و امتلاك أمتار حتى فى البيداء و تجعلهم فى خانة "الأستغراق في الخيال"..
و بمناسبة البيداء، و رغم تفسيرات السيد محافظ بنك السودان حول " التعويم المدار لسعر الصرف او العملات الاجنبية مقابل الدينار السوداني" و أيضا ما قاله عن "السعر التأشيري الذي يعتمد في تحديده عل العرض والطلب" .. فأننى احمد الله كثيرا ، بكرة و أصيلا على أننى لم أنل من العلم إلا قليلا.. لكن و حسب مقدراتى العقلية المحدودة و ما تبقى فى الدماغ من خلايا عصبية معدودة و بقليل من الجمع و الطرح أدركت أننى لو عملت خبيرا متفرغا لدى الناسا و لمدة خمسة سنوات متتالية ، و فتحت حسابا للتوفير ، أضع فيه كل دولار و سنتا و ريالا أجنيه ، مع ترك 100 دولار للمصاريف الشخصية .. لما أستطعت شراء منزل فى الاماكن المذكورة اعلاه إلا بالاقساط المريحة جدا جدا .. و على مدى قرن من الزمان.
رغم أننى وجدت أن أغلب المشترين و المالكين فى تلك المناطق و لحسن حظهم لم يفارقوا السودان يوما للحصول على الدولار أو الريال مثلى و لم يعانوا فى مسائل الكفالة و الاقامة، و لم يسمعوا بالتحويل الالزامى أو المساهمة الوطنية .. قنعوا بما يكسبونه.. و يا ليتنى "مثلهم" و كم كنت أتمنى أن أجد الوقت الكافى لأسأل بعضهم عن سر هذا النجاح و النبوغ المذهل الذى أوصلهم لما هم عليه من نعمة أسأل الله أن يديمها عليهم.. خاصة أولئك الذين يملكون من هذه المقتنيات" الارضية" عدد يفوق اصابع اليد الواحدة..
و ما يدفعنى بضرب الامثال بالمناطق اياها هو ما وجدته فى الخرطوم من ثراء و بذخ و جمال فى العمران يفوق الوصف ، بل و طرز من المعمار يصعب أن تجدها مجتمعة فى كثير من مدن العالم، اسبانى ، برتغالى، انجليزى كلاسيكى، صينى، عربى .. " اشى رخام و اشى سيراميك و اشى بورسلين".. اللهم زد و بارك، وتأكد لى من مشاهداتى أن البترول فعل فعلته و أصبحنا بفضل الله من الامم الثرية كما يبدو ذلك جليا و ساطعا فى كثير من احيائنا و مدننا السكنية.
و رغم ذلك و بلا ذرة إحباط فاننى قد أقترح على القائمين بمشاريع الخرطوم بلازا و الياسمين سيتى و الفل تاون و الرحاب سيتى أن يفكروا نسبة لتعاظم الطلب فى الامتداد و التوسع نحو العتمور سيتى و بيوضة تاون أو أم ضريوة رسيدنشيال و فى حال العدم.. يمكن ان نكون شركة مساهمة عامة لردم البحر الاحمر و تخطيط مدينة " الردمية الفين و ستة للاسكان الفاخر و الشعبى".
و نختم، بأبيات شاعرنا المرهف عبد القادر الكتيابى:
وأجيك بى قدرتى الباقية
حطام إنسان موسّم بى شقا الدنيا
ومقسّم قلبو فى الأحزان
أجيك فنان
أشد أوتارى .. وأحكيلك
حكاية إنسان وهب لى سكتك نفسو
ورسم صورتك على حسّو
وربط ساعد على المجداف
وقال يا إنتى يا أغرق..

Post: #58
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: عمر علي حسن
Date: 03-15-2012, 04:32 PM
Parent: #55

Quote: يازول الارض لمن يفلحها..


دكين
ما سمعتك كويس .. من يفلحها ، ام من (يقلعها) ؟

عمر علي حسن

Post: #57
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: عمر علي حسن
Date: 03-15-2012, 04:23 PM
Parent: #53

Quote: إن مع العسر يسرا ،


شيخنا المرتضي
والله ما هزني فقد الساحات .. فملك الارض باق للسودان ولشعب السودان .. ومامن حق استلبته
اي قوة او عبثت به الا هو عائد الي اصحابه .. فالحق العدل موجود الي قيام الساعة .. يصون
ويرعي .. فلا يبقي الا ماينفع الناس

الذي هز كياني وزلزله .. الحوار .. وانا لا احب انتقاد الناس .. الا ان الحوار كشف لي سقوطا ينتظر
السودان كله اذا كنا نناقش امورنا بهذا المستوي من الهتر واللهوجه فلن نصل الي نتيجة او حكم نبني
عليه تصحيحا .. المحاور الضعيف يستأسد علي الوزير الاضعف فيقاطعه في كل ما يريد ان يقول
ويفرض عليه الاذعان لحكم مسبق خطأ كان او صوابا .. والوزير الضعيف لا يدري عن موضوع
الحوار شيئا فلا يتفوه الا لجاجة ولغوا .. ياخي من اين ياتون بمثل هذا الوزير .. وقد سمعته مرة
اخري في موقف آخر فانكسفت ..

سأل عبدالله رجب الاميرالاي عبدالله بك خليل عن قرار اتخذته الحكومه فرد الاميرالاي انه لا يعلم شيئا
عن حيثيات القرار ولكنه يسانده لانه صدر عن سلطة مختصة ومفوضة دستوريا للتصرف في اطار
مصلحة البلاد .. رد عبد الله رجب : حتي ولو كان غلط .. فرد البيه لن يكون غلط الا اذا جييء بمثلك
الي موقع صنع القرار .. الا تعلم الي اي جهة تستانف القرارات الخاطئة ؟ اذهب الي البرلمان ياخي !!

الوزير والمذيع - الذي يقلد فيصل القاسم - اقل قامة من ان يستمع اليهما الناس في قضية عامة ..
احدهما يبني لنفسه شهرة بتخويف ضيوفه بنصف الحقيقة وعلو الصوت وحرمانهم من حق الرد ..
والاخر بالجرأة علي قول ما لايصدّق مثل ان البرير الكبير يريد تخليد اسمه .. ياخي حرام علي الذي
فرضك وزيرا ... هل يخلد البرير الكبير ربط اسمه بملاعب كرة قدم ام يخلده ببسط قدراته لصحة الناس
ولاعادة السكة الحديد للحياة او التوسع في الزراعة ..

ثم هل امتنع علي منطقة امدرمان الفرعية (الانتفاع) بهذه الملاعب

انني ازداد ايمانا بان السودان يقتله الجدل .. لا اختلاف الرأي .. الجدل المضلل. وهو نفسه الذي يجعل
البعض يفعل مايريد لأن القوة بيده .. مستلهما ميثودولوجية اسرائيل في عدم الاهتمام الا بمصلحتها ...

ثم من الذي باع الساحات والملاعب .. هذا الوزير لا يستطيع بيع بصله

عمر علي حسن

Post: #59
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-15-2012, 10:14 PM
Parent: #57

Quote: وبالمناسبة دي أهديك أغنية العندليب الأسمر
بيع قلبك بيع حبك شوف الشاري مين

قلب ؟
حب؟
والله لما قريت كلماتك أصابني خوف سريع قلت الناس ديل ممكن يبيعوا أعضاءنا
مع الدكاترة والنبق..
المسافر يا قلب، مهما اختلفنا مع الراحل نميري لكنه كان مهاب الجناب ،
أعرف أنه كان متابعا للقضية التي عرفت بقضية (الصول) والتي لم أعرف
نهايتها حتى الآن ، لكن في زمن اللنغاز المعروف من عمليات البيع والإنتفاع
والهبات والعطايا لأراض ومصانع ومؤسسات عامة لايمثل سوى رأس جبل الجليد كما
يقولون، كل ما كان تعتمد عليه خزينة السودان - قبل النفط - تم بيعه ببخس
أو تجفيفه بفهم أن الزيت باق ، وبعد ما طلع الزيت من الميزانية وبدأ (ضي القناديل)
يخفت تدريجيا برزت إلى السطح أفكار وظواهر غريبة سيعرف الناس حجم الدمار الذي
تسببه بعد فوات الأوان،
عموما لو لقيت خبر عن موضوعنا دا ألفانا بيهو..


Post: #60
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: rummana
Date: 03-15-2012, 10:26 PM
Parent: #59

Quote: الصورة ليست كما يراها الآوتسايدرز فهنالك إنجازات في الطريق
في مجالات الزراعه والصناعة والسكة الحديد ، وخطاب السيد معتز البرير في افتتاح
رويال كير يوضح بأن للرجل خطه مدروسه في مختلف ميادين الإقتصاد ونسأل المولى
أن يوفقه ويسدد خطاه ويحفظه من أعين الحاسدين

المفروض ده يتقري باللون الأخضر ولا الأحمر..؟؟

غايتو...!!

Post: #61
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-15-2012, 11:10 PM
Parent: #60

Quote: يا مرتضى .... يمكن تكون عارف أخوك ما عندو أي علاقة بالرياضة (الكورة) ... عشان كدة لا بشوفها في التلفزيون ولا بقراها في جريدة ... بس إتضح إنو (عدم الهواية دي) مرات بتفوّت على الزول متعة حقيقية.

هسي التسجيل ده مش متعة بالله (متعة بالمغص)

صدقني يا محمد لا أشاهد مباريات كرة القدم إلا نادرا وعندما يكون البرشا
في الميدان أو بعض المباريات العالمية بسبب أن غدد المتعة وعناصر الإثارة بهذه
المسائل نضبت منذ سنوات، لكن في تلك الليلة البايخة كنت أمر سريعا على القنوات
فاستوقفتني قناة أمدرمان والتي أشاهدها للمرة الثانية أو الثالثة لا أدري، ولسوء
حظي الملازمني وقعت في المقابلة دي.
ياخ صلي ركعتين شكرا لله أنك لم تشاهدها..
ما تبقى زول جاحد..
أشكر ربك إنك زاتك ما عندك علاقه بالكوره السودانيه من أصلو..
قوم صلي..
قوم .. قاعد مالك؟

Post: #62
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-16-2012, 08:30 AM
Parent: #61

Quote: زول صعب وعندو المدردم كلو ليمون .

يا عثمان بعرف واحد عندو المنصوب كلو مضموم
والمجرور كلو مبلوع ، زي المكنسه الكهربائية ، كان وصل
إسبانيا ما بفرز جبل طارق من هضبة أم الحسن..

Post: #63
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-16-2012, 11:03 AM
Parent: #62

Quote: دا مش احسن من وزير

قال في كلمة رسمية اثناء زيارة له لاحدي الدول وهو يتحدث عن السيد الرئيس حسب ما سمعنا:

" السيد عمر حسن احمد البشير الرئيس الفخري للسودان " !!!!

يا مولانا،
ربما لحظت أن هناك فوضى ألقاب رسمية في سوداننا الحبيب ، يعني ممكن تقول لي نفس الزول
معاليك وفخامتكم وسعادتك وسيادتك سيما إذا ارتبط اللغم بعسكري غض النظر
عن المحمول في الكتف.. بس (فخري) دي مبالغه..
مما يجدر ذكره أن (الفخري) هذا كان رئيس مجلس إدارة بنك في أحد الأيام..

تصدق!!

Post: #64
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-16-2012, 05:26 PM

Quote: والله يا محمد جنبنبا ميدان كان متنفس لأهل الحي قاموا ادوه لواحد كوز بدون مقابل
و بدون وجه حـق غير انه كوز من الثانوي , فلا بيت له في الحي اصلا عشان يكون اخدوا بحق الشفعة
الزول دا كان مؤجر في حينا وله ارض خطة اسكانية

اها الزول بعد 10 سنين باع ميدانابمئات الملايين و قلع الخرطوم


ديل ناس ضد الجمال و الصحة ,

يا إحيمر ، إنها سياسة التمكين التي خطط لها بدقة ، يتم إحالة كافة أصحاب القرار
إلى الصالح العام ( من مستوى وزير وإنت نازل) يتم إصدار قرارات وزارية بتصرفات
قانونية محددة لصالح الموالين من أصحاب المال ثم تأسيس شركات تهيمن على الإقتصاد
والتجارة وبالطبع بعيدا عن أي رقيب وزيتنا في بيتنا ، أها تشتكي لمنو؟
الناس ديل مسكوا المفاصل من تيت وفي كل مكان يتخذ فيه القرار ، هم الخصم والحكم ..
والشعب في الخارج لافي صينيه يغني ( أنا في التمني ديما هديلي ساجع ..
ما لقيت لي مغيث وما لقيت لي مراجع)..

الله في..

Post: #65
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: خالد علي محجوب المنسي
Date: 03-16-2012, 06:25 PM
Parent: #64

يا مرتضى سلااااااام
ديل باعوا كل ميداين الخرطوم وقبلوا علي بحري
وام درمان

يا اخوي بل رأسك انت ذاتك
لو مدَّ الله في عمر هذه الشرزمة بتجي يوم مطار الخرطوم
وتلقى في انتظارك شخص لا تعرفه ( واهلك غياب خارج صالة القدوم )
وهذا الشخص يعطي الأمر لخدمه ان يحملو متاعك
ويدور الحوار بينك وبينه
محمد المرتضى: انت منو منو ؟
يرد عليك : انا موظف مع زوجة الوزير فلان الفلاني
محمد المرتضى: وانا دخلي شنو فيك وفي زوجت الوزير
يرد عليك : انت ماعارف ؟ ما اشترتك انت واسرتك

ههههههههههههههه
هسي بتشوف كلامي دا خيال بعيد
لكن صدقني حا يحصل وقريب لما لا يجدوا شئ يبعيو

تحياتي ومودتي

Post: #66
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-17-2012, 07:26 AM
Parent: #65

Quote: حسب مقدراتى العقلية المحدودة و ما تبقى فى الدماغ من خلايا عصبية معدودة و بقليل من الجمع و الطرح أدركت أننى لو عملت خبيرا متفرغا لدى الناسا و لمدة خمسة سنوات متتالية ، و فتحت حسابا للتوفير ، أضع فيه كل دولار و سنتا و ريالا أجنيه ، مع ترك 100 دولار للمصاريف الشخصية .. لما أستطعت شراء منزل فى الاماكن المذكورة اعلاه إلا بالاقساط المريحة جدا جدا .. و على مدى قرن من الزمان

يا أستاذ أسعد، أخطأ نزار قباني حين قال :
أأحاسب امرأة على نسيانها؟ ومتى استقام مع النساء حساب؟
فالصحيح أنه لايستقيم في السودان حساب، دعك عن البيوت (التي وصل أحدها 7 مليون دولار بالكمال والتمام)
فكافة العمليات الرياضية لن تسمح لك بفهم معالجة راتب الموظف ليأكل (طرقة) كسرة ويشرب كوب ماء في اليوم،
أما اقتناء بيت أو سيارة فهذه اسهل منها ولوج البعير سم الخياط ، في ذات الوقت تجد من يتبرع لناد رياضي بأربعة ملايين
دولار وقائمة من (المحافظين الجدد) والتابعين وتابعي التابعين والمقربين يملكون كل شئ ، السلطة والثروة
والتسهيلات والمكيفات والفيرست كلاس وتفحيط الإطارات ..
هل تعلم أن مرتب الطبيب العمومي لايكفيه للوصول إلى العمل ولك أن تنسج على هذا النول بقية المعادلات..
أحيانا ينتابني شعور بأن الموظفين البسطاء يعيشون بالطاقة الشمسية أو أنهم من أهل الكرامات..

مدد..

Post: #67
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-17-2012, 10:48 AM
Parent: #66

Quote: يازول الارض لمن يفلحها..

يا سعادتك،
بالطبع لم تغب عنك سخرية دكين المصراتي ..
هم لايحتاجون شعارات المرحوم ولا التذكير ب (الفلاحة) ، ولا نصوص الكتاب الأخضر،
ربنا يخدِّر ضراعم..

Post: #68
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-17-2012, 01:48 PM
Parent: #67

Quote: Quote:
Quote: الصورة ليست كما يراها الآوتسايدرز فهنالك إنجازات في الطريق
في مجالات الزراعه والصناعة والسكة الحديد ، وخطاب السيد معتز البرير في افتتاح
رويال كير يوضح بأن للرجل خطه مدروسه في مختلف ميادين الإقتصاد ونسأل المولى
أن يوفقه ويسدد خطاه ويحفظه من أعين الحاسدين



المفروض ده يتقري باللون الأخضر ولا الأحمر..؟؟

تُركواز يا rummana

معقول ما قريتي الكلام الفوق دا ولا سمعتي وشاهدتِي الفيديو؟
غايتو..

Post: #69
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: محمد المرتضى حامد
Date: 03-17-2012, 02:46 PM
Parent: #68

Quote: ويدور الحوار بينك وبينه
محمد المرتضى: انت منو منو ؟
يرد عليك : انا موظف مع زوجة الوزير فلان الفلاني
محمد المرتضى: وانا دخلي شنو فيك وفي زوجت الوزير
يرد عليك : انت ماعارف ؟ ما اشترتك انت واسرتك

ههههههههههههههه
هسي بتشوف كلامي دا خيال بعيد
لكن صدقني حا يحصل وقريب لما لا يجدوا شئ يبعيو

خالد المامنسي،
تنتخب حكومه يقوموا الجماعه بالليل ينقلبوا عليها،
بعد مليون سنه يعملوا إنتخابات صوريه وبرضو يقولوا ليك إنت مغترب ما عندك حق تصويت لمرشح،
يشيلوا منك ضرائب وزكاه وأشياء أخرى في الجهاز إياه وانت ما شغال في بلدك زاتو،
لا سبيل لمنحك أرضا مجانيه في وطنك تسكن فيها أنت وعيالك.. ياخ إن شاء الله (حق انتفاع) مافي ..
أولادك في الدرك الأسفل في القبول بعد تخفيض ما حصلوا عليه في الخارج 10% .
عشان تسافر من بلدك راجع لمكان عملك لازم تمشي المكان العجيب داك تزح يوم يومين في 5 صفوف..
علاج مجاني؟ تعيش إنت..
وظيفه بعد العوده؟
أحلام ..
هو البيع دا شنو يا خالد؟
تقول لي كلامك دا بشوفو خيال؟

المهم منتظر إجابة .. بيع ولا انتفاع ؟

Post: #70
Title: Re: هل بيعت ميادين أمدرمان لهذا الرجل؟http://www.sudaneseonline.com/co
Author: rummana
Date: 03-28-2012, 09:57 PM
Parent: #69

Quote: المهم منتظر إجابة .. بيع ولا انتفاع ؟

الشاغلك يا مولانا تتهنابه.. ولا مشيت تفتش على الاجابات..!!