الأسعار في العاصمة اليوم..

في أيام نميري الأخيرة جمعنا مجلس عزاء بأستاذ لغة إنجليزية مشهور وكان - عليه الرحمة - يتمتع
بطرفة حاضرة وبديهة ديجيتالية ، وتصادف أن جاء أحد (رجال الدين) لتأدية واجب العزاء يتبعه جيش
من الحواريين والمريدين ، فاستفسر أحد الحضور عن الزول العملوا ليهو (هلوله) دا منو ؟ فرد أحدهم بأنه
الشيخ فلان وأردف أنه من الأولياء أصحاب الكرامات ، فما كان إلا أن علَّق أستاذنا ضاحكا: يمين
الأولياء أصحاب الكرامات ديل فئتين ، الخواجات البينقلوا لينا منافسات كأس العالم حيَّه صوت وصوره ملونه
والفئة التانية السودانيين ، الواحد فيهم مع قلة مرتبه قادر يوفر لنفسه ولعياله المأكل والمشرب
والملبس و(حق) المواصلات ..


ومما لاشك فيه أن استاذنا لو عاش ورأى ما يحدث اليوم لنسب الشعب السوداني لرهط هاروت وماروت.

كان ذلك في 1984 وكان سعر الدولار وقتها 3 جنيه أو أقل إن أسعفتني الذاكرة الخؤون .
الدولار اليوم ب 6400 جنيه.

حتى وقت قريب كانت تتداول جملة ( والله أستقيل كان آكلا كسره بمويه وطماطم ) ، يعني يعيش بأرخص
ما يمكن تخيله..
هذا الصباح كان كيلو الطماطم ب 25 ألف جنيه.
الكسرة لم تعد متاحة لقطاع كبير من الشعب.

سنة 1984 قول سعر الدولار 3 جنيه متوسط دخل الفرد في الشهر كم؟ او بيعادل كم دولار في الشهر؟

سنة 2012 الدولار قول 6500 جنيه (بالقديم) مع متوسط دخل الفرد ب 800000 جنيه (بالقديم)

سنة 2012 الدولار قول 6.50 جنيه مع متوسط دخل الفرد ب 800 جنيه.

نحسبها بطريقة تانية

صبي غسيل سيارات ياخذ 3 جنيه متوسط أجرغسل عربية (بيبدأ ب5 ولو فاوضته ممكن يصل معاك ل3 جنيه) وفي اليوم ممكن يغسل أكثر من عشرين عربية بيشتري صابون سائل ب2 -3 جنيه والموية مجان من صاحب العربية وفوطة (قميص قديم في الغالب برضو من أحد الزبائن)

دخله في اليوم يساوي 19*3 جنيه = 57 جنيه في اليوم في الشهر = 1710 (بعد خصم ثمن الصابون) نقول في اسوا الحالات كان دخله 1000 جنيه في الشهر بتعمل كم دولار دي؟

رمضان كريم

Quote: سنة 1984 قول سعر الدولار 3 جنيه متوسط دخل الفرد في الشهر كم؟ او بيعادل كم دولار في الشهر؟ سنة 2012 الدولار قول 6500 جنيه (بالقديم) مع متوسط دخل الفرد ب 800000 جنيه (بالقديم) سنة 2012 الدولار قول 6.50 جنيه مع متوسط دخل الفرد ب 800 جنيه. نحسبها بطريقة تانية صبي غسيل سيارات ياخذ 3 جنيه متوسط أجرغسل عربية (بيبدأ ب5 ولو فاوضته ممكن يصل معاك ل3 جنيه) وفي اليوم ممكن يغسل أكثر من عشرين عربية بيشتري صابون سائل ب2 -3 جنيه والموية مجان من صاحب العربية وفوطة (قميص قديم في الغالب برضو من أحد الزبائن) دخله في اليوم يساوي 19*3 جنيه = 57 جنيه في اليوم في الشهر = 1710 (بعد خصم ثمن الصابون) نقول في اسوا الحالات كان دخله 1000 جنيه في الشهر بتعمل كم دولار دي؟ رمضان كريم

لا حول ولا قوة الا بالله
سادية تفوق حتى الوصف
يا رجل اليش فى قلبك ذرة من رحمى الناس بالكاد ياكلون وجبة واحدة!
اتق الله يا رجل ولا تسئ الى نفسك تقاتل فى قضية خاسرة حتى اصحابها تواروا خجلا من الدفاع عنها!
جنى

Quote: الناس بالكاد ياكلون وجبة واحدة!

سلام جيني
طيب قول ما قاعدين ياكلوا خالص

دا علاقته بمداخلتي حول سعر الدولار شنو؟

أنا عملت عملية حسابية بسيطة توضح أنّ ما ذكره كاتب البوست عن قيمة الدولار سنة 1984 و2012 ليس صحيحاً ويفتقد لعنصر مهم وهو متوسط دخل الفرد وأن حساب الجنيه بقيمة الجنيه القديم تفتقد للمنطق والحساب البسيط دا

لو عندك تقيب على كلامي الفوق دا أهلاً وسهلاً

حكاية تشتمني وتسيء إلي وتصفني بكل هذه الأوصاف التي جادت بها قريحتك ما كلام حلو والله يسامحك

كن بخير

سلام

ورغم أني رأيت بأم عيني من يفتح أكياس القمامة ليأكل منها
إلا أن هنالك من كلَّت في كفه الأصابع بسبب هذا التمرين الذي استعاض به عن المسبحة..






الأخ فرانكلي،
رمضان كريم،
تقبل الله منكم ،

يبدو أن غاسلي السيارات اليوم يمتلكون اليخوت دون أن أدري..
منهم لله ..

بتاعين اليخوت ..

Quote: سلام جيني طيب قول ما قاعدين ياكلوا خالص دا علاقته بمداخلتي حول سعر الدولار شنو؟ أنا عملت عملية حسابية بسيطة توضح أنّ ما ذكره كاتب البوست عن قيمة الدولار سنة 1984 و2012 ليس صحيحاً ويفتقد لعنصر مهم وهو متوسط دخل الفرد وأن حساب الجنيه بقيمة الجنيه القديم تفتقد للمنطق والحساب البسيط دا لو عندك تقيب على كلامي الفوق دا أهلاً وسهلاً حكاية تشتمني وتسيء إلي وتصفني بكل هذه الأوصاف التي جادت بها قريحتك ما كلام حلو والله يسامحك كن بخير

يديك العافية
اراك لا تالو جهدا فى نسف فكرة اى بوست يعرى النظام بصورة مستفزة لا تحترم فيها عقول الناس
جنى

Quote: اراك لا تالو جهدا فى نسف فكرة اى بوست يعرى النظام بصورة مستفزة لا تحترم فيها عقول الناس

هذا راييك وأنا احترمه كراي ولكن لا اتفق معك فيه

أنا أخاطب العقل واطالب باحترام العقل

ومداخلتي في هذا البوست تحديداً هي مخاطبة مباشرة للعقل بعملية حسابية بسيطة إذا رايت أنّ فيها كلام لاي خاطب العقل فهات نتحاور حوله

أمّا إذا كان كلامي صحيحاً ولا تعقيب لك عليه ولكن في مطالبتي باحترام العقل نسف لفكرة بوست. فليكن سواء كان ذلك يعري النظام أو يعري الفوضى

Quote: يبدو أن غاسلي السيارات اليوم يمتلكون اليخوت دون أن أدري..

يجوز ذلك ولكنليس بالضرورة

أنا أعرف خريج جامعي كان يغسل السيارات أمام مستشفى مكة للعيون

وقال لي هذا عمل خير من اي وظيفة بشهادته او بدونها

لكن هذا خارج نقطتي التي ركزت عليها

وهي في حديثنا عن سعر الدولار اليوم وسعر الدولار في الماضي ان نستصحب معنا العوامل الأخرى التي توضح للقارئ أبعاد هذه الارقام ومعناها وقوتها الشرائية في ذلك الزمن مقارنة مع هذا الزمن

يعني قول الدولار كان سنة 1984 ب3 جنيه واليوم 2012 ب 6400 جنيه كلام مختل حساباً وبالتالي معناً لأنّه لم يتطرق للعوامل المصاحبة لهذه العملية الحسابية البسيطة

عايزين نوضح للتاريخ اي قراءة اقتصادية يجب أن يكون الكلام مبني على حقائق وبيانات وارقام حقيقية آخذين في الإعتبار كل العوامل التي تساعد على فهم هذه الأرقام في إطارها الصحيح

رمضان كريم

يا فرانكلي بيانات شنو وقراء شنو وارقام شنو
يمين بالله اهلنا ما قادرين ياكلوا
ياخي خليك من الحكومة اضرب لي اي زول من اهلك بيديك النجيضة





ود المرتضى كيفنك ياخ

Quote: يا فرانكلي بيانات شنو وقراء شنو وارقام شنو يمين بالله اهلنا ما قادرين ياكلوا ياخي خليك من الحكومة اضرب لي اي زول من اهلك بيديك النجيضة

يا أخي قول كلام غير دا

الناس بتاكل في اندومي وتشرب في الشامبيون وتتسوّق في واحة الخرطوم غرفة النوم ب300 ألف جنيه

والطماطم ب 25 جنيه للكليو جرام والناس مبسووووطة وما في زول طلع مظاهرات

كدا كويس معاك؟؟

طيب دا كله دخله بكلامي أنا شنو؟

حكاية الناس جعانة وشبعانة ما محتاجة لخبطة كيمان

العايز يقول في ضائقة معيشية بتحيّر في الزمن دا ما أهو الحال من بعضه

لكن هذا لا يعني أن الناس ترص كلام خارج إطاره الصحيح

ليه؟ عشان البوست يكون مؤسس وما يتنسف على قول جني بعملية حسابية بسيطة

محمد سلام ..... ورمضان كريم.

Quote: حتى وقت قريب كانت تتداول جملة ( والله أستقيل كان آكلا كسره بمويه وطماطم ) ، يعني يعيش بأرخص ما يمكن تخيله.. هذا الصباح كان كيلو الطماطم ب 25 ألف جنيه. الكسرة لم تعد متاحة لقطاع كبير من الشعب.

تصحيح ..... كيلو الطماطم = 28 ألف قابل للزيادة.

يا محمد ، زولك ده، بعد ما يلقى الطماطم والكسرة ....... إنت قايلو حيلقى الموية؟ ...... مالك بقيت زي ماري أنطوانيت؟

أما كلام فرانكلي ...... لا يختلف في شئ عن كلام ربيع عبدالعاطي (رد الله غربته)*

________
* كلامو فيما يتعلق بالـ 1800 دولار

Quote: صبي غسيل سيارات ياخذ 3 جنيه متوسط أجرغسل عربية (بيبدأ ب5 ولو فاوضته ممكن يصل معاك ل3 جنيه) وفي اليوم ممكن يغسل أكثر من عشرين عربية بيشتري صابون سائل ب2 -3 جنيه والموية مجان من صاحب العربية وفوطة (قميص قديم في الغالب برضو من أحد الزبائن) دخله في اليوم يساوي 19*3 جنيه = 57 جنيه في اليوم في الشهر = 1710 (بعد خصم ثمن الصابون) نقول في اسوا الحالات كان دخله 1000 جنيه في الشهر بتعمل كم دولار دي؟

لم اتصور ابدا ان يكون هنالك اغبى من ابوريالة
وقد كان ....
تحليل غبي وبليد

Quote: كان ذلك في 1984 وكان سعر الدولار وقتها 3 جنيه أو أقل إن أسعفتني الذاكرة الخؤون . الدولار اليوم ب 6400 جنيه.

بـس الآن دخل الفرد 1800 دولار ( ما عارف في الشهر و لا في الدهر أسألو ربيع )

بعدين مساهر لغاية الآن مالك ....؟؟؟

و أخيراً و ليس اخراً إزيـــــكـــــ......

كيلو لحمة الضان 55 ألف جنيه

ويا جني ما تزعل من الأخ فرانكلي ، أهو مرتب الطبيب الأخصائي بجيب 10 كيلو ضان

هو شبع وللا شبع؟

بطلوا جحود ياخ..

شنو يعني ، يجيبوا ليكم كافيار ..


بالمناسبه ، الكافيار دا شنو؟

وبعدين يا جني ، كان التحويلات هلكت بعيرك ما تفِشَّها في فرانكلي..

فرانكلي سبيكينق ..

يا فرانكلي حسابك دة يمين كوار عديييييييييل

( ياخي خليك من الحكومة اضرب لي اي زول من اهلك بيديك النجيضة)
-------------------------------------
يمكـن أهلـو كيزان وربما أنصار سنة !!

Quote: كيلو لحمة الضان 55 ألف جنيه

حليلك

العجالى 45 جنية

الضان ما سألت منو والله



ود المرتضي إزيك

سلام الزعيم محمد المرتضي
حاليا لو تعاون الاسر والتكافل السوداني الحقيقي لحدثت كوارث انسانية في قلب الخرطوم
دعك من الولايات الطرفية ...
الله يقوي ضراع المغتربين ويصبرهم ويعوضهم خيرا

Quote: حاليا لو تعاون الاسر والتكافل السوداني الحقيقي لحدثت كوارث انسانية في قلب الخرطوم

تقصد لو لا يا مسلمي.


كل رمضان وانت والجميع بخير يا العوض وتشكر على دعاء الجمعة.


مولانا ود المرتضى، يا أخي يكفي إنو المواصلات فاضييييية.

رطل الزيت 9 ألف

أرجو ألا تكون (أم جغوغة) قد تأثرت بذات النسبة.

في التسعينيات زرت أحد الأصدقاء بمناسبة قدوم صديق مشترك من بلغراد أيام

حرب البوسنه وأخرج الصديق القادم من البلقان ورقة عملة يوغسلافيه قيمتها

كم مليون دينار وعلّقت ضاحكا ماشاء الله مليونير ، قال لي دي بتجيب رغيفه ،

وأكد على صحة الطرفة التي تقول أنك إذا وقفت في صف لشراء سلعة فحتما يزيد سعر

السلعة عندما تصل البائع ، وهكذا الحال في السودان منذ أن قرر الناس ديل إطلاق

إسم الدينار على عملتنا يوم ظن صلاح كرار ورفاقه الميامين أن كلمة دينار

إسلامية المنشأ ..

السكر (بضم السين وتشديد الكاف) 6000 جنيه وبرضو معدوم..

يعني أم جغوغه زاتا كان لقيتا ما عندها معنى ..

منو القال ليكم كيلو الضأن ب 55 الف جنيه...الكيلو ب 55 جنيه بس....
انتو أصلو ما بتـــــــنـــســــــــــو أل 3 اصفار دى....
إلا يفتشو ليكم فايرس يعمل ليكم فقدان ذاكرة بعد كده ....



رمضان كريم وكل سنه وكلكم بخير وعافيه

الاخ محمد المرتضى

رمضان كريم

الناس بقت تسري عليها سياسة ( يعني ما ننوم)!!
ما يكون سعره 10 الف في الامس عادي جدا تصحى الصباح تلقاهو 20 الف!!

والكل غضبه قاعد ( على طرف نخرته)

والشعب السوداني بقا ما عارف يبكي ولا يعد!!

يا مرتضي قبل شهر كنت في السودان

في بداية اجازتي اشتريت دواء للوالدة لمدة 15 يوم بمبلغ 194 الف جنيه

بعد اسبوعين ومن نفس الصيدلية اشتريت نفس الدواء ولمدة 15 يوم بمبلغ 250 الف جنيه

وبعد رجوعي لعمان لم أسأل أخوتي عن سعر الدواء حتى لا يرتفع الضغط بالنسبة لي

أما هم فمتعودون على مثل هذه الزيادات الخرافية

أمس قرأت أن الحكومة زادت الدواء المستورد بنسبة تفوق 90%

اتخيل قبل شهرين وليس الان مريض يحتاج لدواء بخمسمائة الف جنيه في الشهر طيلة حياته

البعض يستطيع ان يوفر مثل هذا الدواء ولكن كيف يستطيع ان يوفره المواطن البسيط الذي يعيش داخل السودان

ومتوسط دخله (800 الف) اذا صدقنا رواية الأخ فرانكلي .

صعب النقاش معاك يا فرانكلى
بالمناسبة ربيع عبدالعاطى ببقى ليك شنو!
نفس الفصيلة الخالق الناظر
ياخ ما ترجع تشتغل معاهم ناطقى رسمى او محلل اقتصادى وتظهر فى قناة الجزير وتقبض بالدولار!
انت عندك مشكلة بيرسونال مع المعارضة!
المعارضة دى عملت ليها بيوت اشباح ونحن ما عارفين!

يا اخ \ السودانيين ديل ناس جبارين خلاس الله فاتحها عليهم ومصرين ياكلوا وجبة واحدة!
يا فرانكلى نححن الاربعة بنحول لى بيتنا ويا الله الله نلحق!
يا فرانكلى زمان الاب قادر يعيش اولاده السبعة هسة السبعة ما بقدروا يعيشوهو!
خلى فى جوفك رحمة تجريم الضحية سلوك غير انساني
جنى

Quote: صعب النقاش معاك يا فرانكلى بالمناسبة ربيع عبدالعاطى ببقى ليك شنو! نفس الفصيلة الخالق الناظر ياخ ما ترجع تشتغل معاهم ناطقى رسمى او محلل اقتصادى وتظهر فى قناة الجزير وتقبض بالدولار! انت عندك مشكلة بيرسونال مع المعارضة! المعارضة دى عملت ليها بيوت اشباح ونحن ما عارفين! يا اخ \ السودانيين ديل ناس جبارين خلاس الله فاتحها عليهم ومصرين ياكلوا وجبة واحدة! يا فرانكلى نححن الاربعة بنحول لى بيتنا ويا الله الله نلحق! يا فرانكلى زمان الاب قادر يعيش اولاده السبعة هسة السبعة ما بقدروا يعيشوهو! خلى فى جوفك رحمة تجريم الضحية سلوك غير انساني جنى

يا جيني لما تفرح أنّك بترسل الريال السعودي وتصرفه في السوق الاسود وأنه بقى يجيب ليك قروش كتيرة

والواحد فيكم يجي فرحان أمس حولت الريال 1500 جنيه

والدولار بقى ب 6500 واليورو ب7000 جنيه

فليه تزعل لما الناس ما تلقى تأكل؟

أنت السبب في رفع سعر الدواء والمعيشة

لأنّ أي شيء بيحتاج لعملة صعبة

والتاجر البشتري منّك الريال السعودي بالقروش الكتيرة دي برضو عايز يعيش عشان كدا الدواء البجيبو والأكل البستوردوا بخت ليه قيمة مضافة فوق على الثمن العرضو عليك مقابل الريال

وتجو هنا تستهبلو على المواطن وأن حياته بقت صعبة

ما الزيّك دا السبب

رمضان كريم

____________

التعقيب الفوق دا ما شخصي ولكنه رمزي ومثالي

سعر برميل النفط في 1984 كان كم دولار؟

سعر برميل النفط الآن كم دولار؟


سعر غرام الدهب في 1984 كان كم دولار؟

سعر غرام الدهب في 2012 كم دولار؟


قيس بالسعرين وقيس عليهم السلع الأساسية المربوطة بالدولار والذهب والنفط

وبعد داك تعال احسب دخل الفرد ودخل العاطي

Quote: سعر برميل النفط في 1984 كان كم دولار؟ سعر برميل النفط الآن كم دولار؟ سعر غرام الدهب في 1984 كان كم دولار؟ سعر غرام الدهب في 2012 كم دولار؟ قيس بالسعرين وقيس عليهم السلع الأساسية المربوطة بالدولار والذهب والنفط وبعد داك تعال احسب دخل الفرد ودخل العاطي

ههههههههههههه

إنتا كدا
الله لا يجمعني معاك في تجارة

هههههه

رمضان كريم

Quote: وبعد داك تعال احسب دخل الفرد ودخل العاطي

هاني البوست دا جادي ، ما تجيب لي هزل العاطي بالله.
عارف يا عربي ، الزول دا لو كان في حزب محترم كان أقالو قبل إطفاء كشافات الأستوديو.

Quote: هاني البوست دا جادي ، ما تجيب لي هزل العاطي بالله. عارف يا عربي ، الزول دا لو كان في حزب محترم كان أقالو قبل إطفاء كشافات الأستوديو.

تحيّاتي محمد المرتضى حامد.

لو كان حزب محترم لما رأيت أمثاله أصلاً أعضاء.

Quote: يا جيني لما تفرح أنّك بترسل الريال السعودي وتصرفه في السوق الاسود وأنه بقى يجيب ليك قروش كتيرة والواحد فيكم يجي فرحان أمس حولت الريال 1500 جنيه والدولار بقى ب 6500 واليورو ب7000 جنيه فليه تزعل لما الناس ما تلقى تأكل؟ أنت السبب في رفع سعر الدواء والمعيشة لأنّ أي شيء بيحتاج لعملة صعبة والتاجر البشتري منّك الريال السعودي بالقروش الكتيرة دي برضو عايز يعيش عشان كدا الدواء البجيبو والأكل البستوردوا بخت ليه قيمة مضافة فوق على الثمن العرضو عليك مقابل الريال وتجو هنا تستهبلو على المواطن وأن حياته بقت صعبة ما الزيّك دا السبب رمضان كريم ____________ التعقيب الفوق دا ما شخصي ولكنه رمزي ومثالي [ICQ] [AIM] [Yahoo] [URL] [Email] [Profile] [Edit]

باعتبار انه ما شخصى
كالعادة تجريم المواطن ولا حول ولا قوة الا بالله
وجود سعر سوقين فى بلد واحد رسمى وسوق اسود هذا فشل دولة فى وضع سياسة اقتصادية سليمة تستقطب التحويلات فى القنوات الرسمية
ثانيا الدولارات دى كلها بشتروها ناس المؤتمر الوطنى والحكومة واجهزتها الدولة اكبر مشترى من السوق الاسود لعلمك
ثانيا اذا كان ناس قطبى المهدى عنده سلة عملات وبفتح بلاغ سرقة لعملات صعبة في بيته تفوق التحويلات اليومية لاجعص بنك فى السودان!
سؤال شخصى هل تقوم بتحويلاتك خلال القنوات الرسمية!
شخصيا انا يا فرانكلى بعد 25 سنة اغتراب لا املك بيتا فى السودان ولا مزرعة فى السليت وليس لنا غير بيت الوالد فى ضواحى امبدة هنلك عضوية مقدرة فى المتنبر تعرفنى شخصيا وتعرف صحة معلوماتى ودقتها !
لعلمك دخلى اعلى من رئيس جمهوريتك الذى قال انه يتقاضى تسعة ملايين والتى بالكاد تساوى ستة الاف ريال سعودى وهو بحمد مقسم الارزاق يمتلك بيتا فى كافورى واخر فى الطائف وشقة فى مجمع النصر ومزرعة فى السليت!
طبعا ممكن تقولى انت سفيه بتودى الفلوس وين!
جنى

Quote: وجود سعر سوقين فى بلد واحد رسمى وسوق اسود هذا فشل دولة فى وضع سياسة اقتصادية سليمة تستقطب التحويلات فى القنوات الرسمية

قوووول فشل دولة لكن الفشل دا من صناعتك أنت

عشان فرحان اليوم حولت 1500 جنيه وفي البنك ب65 قرش

لكن بتنسى أنت حولت لمنو؟

والرابح والخاسر نو؟

رمضان كريم

Quote: السكر (بضم السين وتشديد الكاف) 6000 جنيه وبرضو معدوم..

طيب السكر سادة بكم ؟

بعدين الكهرباء انت زايغ من سعرها مالك

خائف الهواء يقسمها ولا شنو

زمان الزيادات البتتعدى الميزانية المعدة للأكل والشراب بنقول عليها Leakage

هسة شكلها الماسورة نفسها اتكسرت

Quote: عشان فرحان اليوم حولت 1500 جنيه وفي البنك ب65 قرش لكن بتنسى أنت حولت لمنو؟ والرابح والخاسر نو؟

لو حول بالرسمي ولا بالأسود
كلو بكب في خزنة شيخ تلب
وبمشي مليزيا ولا دبي ... بي يقوم عمارات وفلل سمحات
فالتجار في السوق تجارهم ... والبنوك حقتهم


سلام لسعادتو القاضي المقيم بالبوست
وللمشاركين

طارق جمكسين،
رمضان كريم،
،

ياخ إنت محظوظ ،

صايم في المغرب ، يعني مع الآذان..

يا طارق الذين يسوقون المبررات لما آل إليه الحال في السودان وتحديدا في الجزئية المتصلة بالأسعار
وبالقيمة الشرائية للعملات يغالطون أبسط أصول الإقتصاد ، فالأمر لايتم بالبساطة التي عرض بها البعض
للمسألة، فهناك ما يعرف بتعادل سعر الصرف للعملات وهي طريقة يتم تطبيقها لمعرفة سعر صرف عملتين
بالنسبة لسلعة معينة في نطاقين جغرافيين مختلفين ، والدولار الذي أشرت له في مستهل البوست ( وكان يساوي
3 جنيه في 1984) يصلح أن يكون مقياسا في مواجهة عملة أخرى، ولتقريب الصورة إذا كان بإمكانك شراء
سيارة في 1984 ب 3000 دولار وهي تعادل مبلغ 9000 جنيه وقتها فإنك يمكنك شراء سيارة بمستوى أقل بمبلغ 3000 دولار
اليوم ولكن ال 9000 جنيه اليوم ما بتجيب عجَّورتين لأنو العجَّوره اليوم ب 6000 جنيه.

Quote: قوووول فشل دولة لكن الفشل دا من صناعتك أنت عشان فرحان اليوم حولت 1500 جنيه وفي البنك ب65 قرش لكن بتنسى أنت حولت لمنو؟ والرابح والخاسر نو؟

أشك فى انك فى كامل قواك العقلية!
كالعادة تجريم الضحية
مرضة الله يشفيك
جنى

Quote: تصحيح ..... كيلو الطماطم = 28 ألف قابل للزيادة.

صدقت يا محمد، للتأكد من السعر اليوم قيل لي بأن الطماطم التي
تُشترى بال 25 ألف لاتصلح للسلطة لأنها بتكون هردبيس و mimachira (مافيكم
زول يمشي للدكشنري) وأما الطماطم صقيلة الملمس فالكيلو ب 28 - 30 ألف.
ناكل مما نزرع ونطمطم مما نبرطم..


-

أبو الريش ،
سمعت بالربط بين الكهرباء والمياه من حيث الفوترة وإنهم حايقطعوهم مع بعض
بتوحيد الحسابات ؟ تاني قبل ما تدخل الحمام لازم تراجع العدادات.
قطع الكهرباء يعني حظر التجول وقطع المياه يعني حظر التبول..
اللهم إني صائم..

خالد العبيد سلام وكل رمضان وانت طيب،
أرجو وأتمنى دوما أن يتم الحوار بشكل
هادئ بعيدا عن العنف اللفظي،
أعتذر للأخ فرانكلي وليس ثمة ماهو شخصي
فقط نعرض حقائق ماثلة في الأرض يمكن الإستيثاق
من صحتها في ثوان معدودة..
تحاياي يا خالد لك ولفرانكلي.

Quote: بـس الآن دخل الفرد 1800 دولار ( ما عارف في الشهر و لا في الدهر أسألو ربيع ) بعدين مساهر لغاية الآن مالك ....؟؟؟

يا (أبوحسين) ، هسه تلاقي ناس المرور بيوقفوا أي عربية رقم لوحتها 1800 ويقولوا للسائق
إنت ماشي في الإتجاه المعاكس ..
سألتك بالله ما تقول لي بايخه..

والله أنا هسه مزعلني حبيبنا جني المغترب ليهو 25 سنه دا وما عندو مزرعه في السليت
ولا في سندس ولا قصر في كافوري ولا المنشيه ومافي زول من أصحابو دق سدرو وبنى ليهو
مسجد على إستايل أياصوفيا أو مول على نسق أيا عفراء..
بالله يا جني ولا فندق في ماليزيا؟

غايتو يا جني إنت زاتك القاصدك فتحي الضو ب شقي ومجنون (على قراءة الكحلاوي) ..

Quote: Quote: ( ياخي خليك من الحكومة اضرب لي اي زول من اهلك بيديك النجيضة) ------------------------------------- يمكـن أهلـو كيزان وربما أنصار سنة !!

يا عبدالله سلام،

لم تعد المسألة كيزان وأنصار سنة،
تلك التصنيفات السياسية التقليدية لم تعد تعكس الصورة لما يجري هناك،
فالمأساة يشارك في صناعتها من كنا نحسبهم من الوطنيين وبعض الطائفيين والصوفيين و
والإنتهازيين تحت القيادة (الرشيدة) والإدارة المباشرة للتتار ، وأظن أنه حان الوقت لإيجاد
مسميات جديدة تتناسب مع الفئة التي نتحدث عنها عِوضا عن كيزان ويسار ويمين حتى أن بعض
أهل اليسار على الباب الآن يطمعون في فتات ويغنوا خذيني باليمين وانا راقد شمال...

رمضان كريـــم يا الحبيب..

وحماية المستهلك

لمقاطعة اللحوم الحمراء والبيضاء والبيض والطماطم



بدون طماطم

كيف الحياة غير ليمك

Quote: Quote: Quote: كيلو لحمة الضان 55 ألف جنيه حليلك العجالى 45 جنية

يا ماضي خليني من العجالي ، كيلو الحمير بي كم؟
قالوا الكوارع بتاعتا فيها شوربه ما تخلص ،
تخليك الليل كلو ترفس..

Quote: حاليا لو تعاون الاسر والتكافل السوداني الحقيقي لحدثت كوارث انسانية في قلب الخرطوم دعك من الولايات الطرفية ... الله يقوي ضراع المغتربين ويصبرهم ويعوضهم خيرا

يا ريس العوض،
وأظنك تعني ما جاء في تصحيح الأخ إسماعيل التاج، لكن وفقا لإفادة جني
أن تحويلات المغتربين لم تعد تغطي وأصبحت مرونتها الحدية صفرا ، كيف يمكن
ملاحقة قفز بتشالنجر كما حدث بالنسبة للكهرباء؟
زيادة 300% قبل أن يرتد إليك طرفك؟
كيف؟
سألت شقيقي : كهرباء بعشرة آلاف بتعمل شنو،
فأجاب: لاتكفي للتعبير عن المشاعر ، يعني لو صعقوك بيها ما تقول أح..

يا جني ما تتعب روحك ساكت
فرانكلي دة عنده منطق أسوأ من منطق النعامة

Quote: مولانا ود المرتضى، يا أخي يكفي إنو المواصلات فاضييييية.

يا سمعه ، برضو محلات المجوهرات فاضيه،

ياخ البيض ، البيض يا اسماعيل بقى من مظاهر البذخ،
على الرغم من أني لا أستسيغ عبارة ( ده زول بيض ساي) والتي تنم- وفقا لثقافة اللنغاز - عن
وصف لشخص ثقيل إلا أن المعنى سيتحور قريبا ولن تعجب إذا عدت للسودان ووجدت أحدهم يثني على
رجل ويقول يا سلام عليهو ، رجل شهامة ومروءة وكرم ، راجل بيض بالحيل..
سيتغير مفهومنا للبيض مثلما تغير عندنا معنى كلمة (ربيع).

مولانا محمد المرتضى ..................سلام

الله لاجعل الطماطم وحم يا حبيب
وانا حسب متابعاتى لسعرها فى السودان ما بستغرب ابداً اذا فتحت قناة سى ان ان
يوماً و بسمع فى النشرة الاقتصاديه وكان الخبر الاول كالاتى:
تراجع اسعار الطماطم فى الفكى هاشم والشقلة عوج الدرب
وارتفاع طفيف للاسعار فى الجيلى والشكابة شاع الدين
بينما سجل اعلى سعر فى البردانة و الفتكوبة
حتى يعرج المذيع على مؤشرات داو جونز ونيكاى
ثم يتحدث عن سعر خام بردت وتكساس ومزيج دبى والخام الخفيف
واخيرا ياتى على اسعار الذهب والعملات
والله يا محمد انا اول يوم فى رمضان اتصلت على ناس البيت مهنئياً
وسألت الوالده عن الاسعار قالت لى الطماطم من 16 لى 22 جنيه للكيلو تالت يوم
وصلت 25 رابع يوم 28 خامس يوم وحاتك 30 جنيه....
يعنى اينعت فى الروض طماطماية واللا كيف؟
طماطم تعمل طمام عديل....
عندى اختى قالت عايز تشارك ممكن نحكى نكتة يامولانا:
قالو مسطول بتابع فى التلفزيون قامت المذيعه قالت :
هل تعلم ان ايطاليا تستهلك حوالى تسعة ملايين طن من الطماطم فى العام
رد المسطول قائلاً والحالة ما بعرفو الدكوة!!

Quote: أشك فى انك فى كامل قواك العقلية! كالعادة تجريم الضحية مرضة الله يشفيك جنى

يا جيني قوول فرانكلي دا نزيل التجاني الماحي

لكن أنت بعمايلك ضد الإقتصاد السوداني ما ممكن كلو كلو تكون ضحية
انتا لو ما الجلاد بتكون البفتش هل الضحية لابس كركاسة ولا لا وتقعد تعد ولو غلطت في العد بتقول نعيدو من الأوّل

فدحين سواتك دي سوات ضحية

الله يرحم الضحية والتضحية بفهم جني دا

لكن لن نفقد الأمل فهناك عقلاء

Quote: سألتك بالله ما تقول لي بايخه..

الله عزيز ......

Quote: منو القال ليكم كيلو الضأن ب 55 الف جنيه...الكيلو ب 55 جنيه بس.... انتو أصلو ما بتـــــــنـــســــــــــو أل 3 اصفار دى.... إلا يفتشو ليكم فايرس يعمل ليكم فقدان ذاكرة بعد كده ....

كيفن ننساها يا سوركتي،
لاحظ إنو الناس ديل حاولوا يواروا فشلهم الإقتصادي بمسميات فاشلة كالدينار
ولكن بقي الجنيه مرجعية تنتصب أمام فشلهم ، ألغوا الدينار وبقي الجنيه
(بأصفاره) شاهدا على خرابهم ودمارهم، نحن لن ننسى الأصفار لأنها تصفعهم
صباح مساء وتقول لأمثال عبدالرحيم حمدي وصلاح كرار في كل عام : هاكم إقرأوا كتابكم..

ذات الشئ يمارسه رئيسهم الذي أعلن بالأمس بأنه سيخفض الكهرباء بنسبة 25%
لفئات معينة وبمعدل 30% لفئة غيرها ، فهلل له أفراد كوراله وكبروا وذلك بعد
مرور 3 أيام فقط على زيادة سرية ليظهر أمام الناس أنه خفف عن كاهل
الناس بذلك التخفيض الكاذب..

رمضان كريم

مولانا ود المرتضى سلام الله يغشاك ويبرد عليك حر الغلاء قول آمين
ياخي المفروض يحظروا الكتابة على كل أحد لا يملك مثل مهاراتك
فالمآسي التي تكتبها هنا لو أتت من عندي مثلا لكانت كفيلة بإزهاق أرواح بشر كثير
لكنها تغلفها بعبارات مخففة للصدمات

الأخ طارق جبريل محق في قوله

Quote: يا فرانكلي حسابك دة يمين كوار عديييييييييل

فنزولا على رغبة فرانكلي نديه الحسبة دي
سنة 1983 سعر الدولار كان بالضبط بالضبط 3.33 جنيه
واشترى الوالد بوكس موديل 1978 جنيه بحالة ممتازة بمبلغ وقدره 3000 جنيه
أي ما يقل قليلا عن الألف دولار
وسعر الألف دولار اليوم = 6500 جنيه بالجديد و 6500000 بالقديم
فهل هذا المبلغ يكفي لشراء جوز لساتك لهذا البوكس دعك من أن يشتري البوكس بذات روحه

الله يكفينا شر الطماطم الممجرة

Quote: وسعر الألف دولار اليوم = 6500 جنيه بالجديد و 6500000 بالقديم فهل هذا المبلغ يكفي لشراء جوز لساتك لهذا البوكس دعك من أن يشتري البوكس بذات روحه

بجيب ليك بوكس آخر موديل وبالتقسيط المريح كمان ويكون عندك شوية فكّة

يا جعفر رمضان كريم

أنا كلامي في نقطة محددة وهي سعر الدولار اليوم وسعر الدولار سنة 1984 لا يمكن حساب الدولار بقيمة أي عملة ما لم نضع في الحسبان التطورات التي طرات على معدل دخل الفرد

نقطة سطر جديد

Quote: والشعب السوداني بقا ما عارف يبكي ولا يعد!!

الشعب بيعملِن الإتنين لكن تقولي شنو،

عزيزتنا مايا ،
في التسعينيات ، وبعد (تحرير الإقتصاد) واستعباد العباد ، ظهرت كوميديا سوداء
وظل الناس يؤلفون النكات التي سرعان ما أصبحت حقيقة فسمعنا ب (قدِّر ظروفك)
وبخَّة العطر واستئجار الملابس ويقال أن البعض يذهب اليوم بفرشاة أسنانه ليبتاع
سنتمتر طولي سيجنال لأجل نظافة مع ابتسامة مضيئة تنير له عتمات درب الرزق
في نهار الإنقاذ الكالح ..

Quote: لعلمك دخلى اعلى من رئيس جمهوريتك الذى قال انه يتقاضى تسعة ملايين والتى بالكاد تساوى ستة الاف ريال سعودى وهو بحمد مقسم الارزاق يمتلك بيتا فى كافورى واخر فى الطائف وشقة فى مجمع النصر ومزرعة فى السليت! طبعا ممكن تقولى انت سفيه بتودى الفلوس وين! جنى

الله يجازيك يا جني
لكن نبهتنا لحاجة مهمه ياخ

الله المستعان وعليه التكلان

لكن بلا شك يوم الحساب آت

Quote: لكن بلا شك يوم الحساب آت

يا البشير ،
في داخله يرد عليك أحد التتار قائلا بما هيئ له من ثقافة وألفاظ:
كلامك دا قولو لزول ما عندو حديده..
لو كانوا يعتقدون بقدوم أي حساب لما تسببوا في هذا الخراب..
الناس ديل الأسبوع الماضي كانوا يتحدثون عن استراتيجية ربع قرنية..
تصور ..

سلام جميعا

شكرا صاحب البوست على فتح هذا الحوار

لفتت نظري طريقة حسابات فرانكلي، و لنمضي معه إلى النهاية في حساباته دون تشنج

اولا فرضيته ان متوسط الدخل ٨٠٠ جنيه في السودان ليست بصحيحة
فانا عملت في ٢٠٠٩ في مستشفى التيجاني الماحي مع اطباء و نواب اخصائيين و اخصائيين

اولا المرتب الاصلي للطبيب حوالي ٣٠٠ جنيه مع البدلات يصل إلى ٥٠٠ جنيه
ماهية نائب الاخصائي تصل مع البدلات ٥٩٠ جنيه
ماهية الاخصائي ٨٥٠ جنيه بعد ١٢ سنة مدارس و ٦ سنة جامعة و سنة امتياز و سنة شدة، و ٤-٥ سنين تخصص، يعني ٢٥ سنة تعليم

هذا ينسف فرضية ان متوسط ماهية الفرد في السودان ٨٠٠ جنيه فالاخصائي يعتبر في قمة الهرم الوظيفي في السودان، من الاستهبال الضخم جدا ضد موظفي الدولة في السودان، ان البدلات تقارب الماهية مما يقلل التزامات الدولة بالمعاش، فكيف يمكن ان تكون بدلات الطبيب حوالي ٢٠٠ الف و ماهيته ٥٠٠ الف، ذلك يؤدي إلى ان المعاش في النهاية سيكون من الماهية الاساسية و هذا من ابداعات الحكومات في السودان.

من ناحية اخرى فلترجع إلى حسابات الاخ فرانكلي

و قد حسب ان غسال السيارات في السودان يتحصل على ٣ جنيه في غسيل السيارة الواحدة، و مضى في حساباته ب ١٩ سيارة في اليوم، ليحصل الطفل المكلوم و المحسود على فقره ٥٩ جنيها يوميا، و بعد ذلك ضرب الرقم في ٣٠ ليحصل على ماهية الطفل الشهرية،

عليك الله يا فرانكلي ده حساب شنو، اولا لماذا يجب ان يعمل هذا الطفل من اساسه، واجب الدولة ان تتيح له فرصة التعيلم لا ان يغسل ١٩ سيارة يوميا ٢٦٥ يوما في السنة، من ناحية اخرى ألا تفترض ان هذا الطفل يجب ان يتحصل على عطلة و لو ليوم في الاسبوع، و لنمضي قدما من يضمن لهذا الطفل غسيل ١٩ سيارة يوميا و من اين اتيت بهذا الرقم لخرافي، غسيل السيارة ابو ٣-٥ جنيه يعني حوالي الساعة في الغسيل و اذا اراد الطفل أن يغسل ١٩ سيارة فهذا يعني انه يعمل ١٩ ساعة يوميا

المهلم خلاصة حساباتي هìا ان الطفل لن يستطيع ان يوفر مبلغ ١٧٧٠ الا اذا مات من الشغل

من ناحية اخرى يا عزيزي فرانكلي ألا تعتقد انه من العبث ان يعمل احد الخريجين الجامعيين في غسيل السيارات، اليست هذه كارثة في حد ذاتها. فغسيل السيارات ليس عيبا لكن الفاجعة الاقتصادية هي ان تهدر ١٢ سنة تعليم و ٤ سنة جامعة في مهنة يمكن ان يقوم بها اي امي، ١٦ سنة تعليم تساوي ثروة ضخمة من المعرفة تقدر في اوروبا بمئات آلاف الدولارات

خلاصة مداخلتي هذه هي، ليس مهم من يحكم السودان المهم كيف يحكم هذا البلد المسكين، الذي فصل جنوبه لفكرة عنصرية، و يضطر خريجوه لغسيل السيارات، و بعد ذلك يتحملون اخطاء ضعف سياسيات دولتهم الاقتصادية و الاجتماعية

اتمنى أن لا اكون قد اطلت عليكم

و رمضان كريم

و بركة الله العيد الجايي بلا كيزان

Quote: أنت السبب في رفع سعر الدواء والمعيشة

تعبنا يا جني من جهل الشيخ فرانكلى و تماديه فى الدفاع عن الحكومة بقلب و عيون مقفولة.

فرانكلى لا يعلم بان دخول الولار للسودان بسوق اسود او سوق رسمي بيزيد من حجم العملة الصعبة فى البلد و بينزل سعر الدولار.
بغض النظر عن الطريقة الى انت بتحول بيها اكيد بنزل سعر الدولار.
الموضوع من اساسيات الاقتصاد و السوق...قانون العرض و الطلب..اصلا مشكلة السودان الان فى توقف تدفق العملة من الخارج.
انت ترسل لاهلك عملة حرة و يجي فرانكلى يقول ليك انت اللى خربت الاقتصاد!!!!

بوست يهضم ليك ولا احسن فوار بعد الافطار :)








ـــــــــ
يامولانا، البوست ده برعاية منو؟

Quote: تعبنا يا جني من جهل الشيخ فرانكلى و تماديه فى الدفاع عن الحكومة بقلب و عيون مقفولة.

رمضان كريم يا سمارت_أنا2001

أنا ساظل دافع عما أراه صحيحاً بقلب مفتوح وعين مفتوحة

والما عاجبو كلامي يا يناقشو أو يضرب راسه في اقرب حيطة

العايز يناقش بهدوء نحن لها

ام جغوغه دي رفاهيه يا مورتا

انت ما سمعت باللحمه الموبايل؟









__________

لحمه موبايل = ربع كيلو مقسوم علي اتنين




_________

كمال فرانكلي الله يسامحك ياخ

والله العظيم ما بغلط التافـ ه فرانكلي ده
بجرمكم انتو البتتكلموا معاهوا
وبتدوهوا اعتبار ده حشرة
انسان مريض اكيد طالع من بيت مافيو تربيه
بالله شوف الصورة الخاتيها دي
تف عليك وعلي اخلاقك يا منحط!
قال شيخ فرانكلي ياخ تخ

Quote: صايم في المغرب ، يعني مع الآذان..

ههههههههههههه
الله يريحك يا مولانا .. نزّلت لي الضغط الرفعتو اسعار الطماطم و غلاط فرانكلي الطلع جني مسؤول عن الأزمة
ياهو احنا كدا لولا شوية الضحك و البسمات البتخفف الهموم كنا انفجرنا
يكون دا سبب فشل الثورة خلي بالك!!
حقو بدل نهاجم سيدي الإمام و نعملو شماعة نطلع بيان نمهل فيه محمد موسى وتيراب الكوميدية وود الصايم اطناشر ساعة يوقفوا الضحك و تخفيف الهموم و يخلونا ننفجر - فجرنا البلا اليخمنا زاتو احنا

في عام 1988 م كنت في بداية حياتي العملية موظفا ببنك النيلين بمرتب 346 جنيها قبل خصم الضرائب علي الدخل واستقطاع النقابة والصندوق الخيري للعاملين
اضافة لحوالي مائة حنية بدل ساعات ما يعرف بال clearing house
والله العظيم كنت عايش ملك ، ملك شنو كنت إمبراطور وبعد مصاريف الشباب المعروفة ( ما تفكروا كتير أنا قصدي التمباك ) ومساهمتي في المصاريف الأسرية والاجتماعية الأخري
بوفر توفير يمكنني من السفر لمصر علي الدرجة الأولي بالخطوط المصرية
وفي عام 97 م وانا لدي ابنه واحدة وزوجه طبيبة تعمل بالكلية التي تخرجت بها وترقيت في مجالي الوظيفي اكثر مما خططت له لا استطيع ان اوفر رطل لبن واحد في اليوم للبنت
واقسم لكم ان بتاع الدكان كان يرفض ان نشتري علي النوته لان الحساب كان تقيل والسداد بالقطارة لضعف الرواتب مقارنه بالأسعار واللباني كان بيفط بيتنا لأننا لا ندفع بانتظام
واقسم لكم مرة اخري انني رفضت عرضا مغريا بعقد عمل في الخارج عام 92 وفي 97 وسطت طوب الارض وحفيت لاخرج من السودان
ويأتي من يريد ان يقارن الماضي بالحاضر
لا تحاولوا ان تبعوا لنا بضاعتكم لأننا جربناها من قبل وخبرنا نوعها

Quote: اسعار الطماطم

التقول الطماطم دي فرض عين

اكلو تبش!!

Quote: التقول الطماطم دي فرض عين اكلو تبش!!

لحمة غالية+ خبز غالي + طماطم غالية+ سكر مافي +كهرباء غالية+ بعد شوية الموية تبقى عكرانة +++++
ويقول ليك أكلو تبش


التبش دا ما داير ليمون وشطة وملح الخ وبعدين بزرعوه بنفس الناس البزرعوا الطماطم وببيعوه نفس السماسرة

الجابرنا على الكلام دا كلو شنو وعشان خاطر منو ولشنو نتحمل الكلام دا

ياخ مرة واحدة تكرم وقول للحكومة دي أمشي

Quote: أمس قرأت أن الحكومة زادت الدواء المستورد بنسبة تفوق 90%

يا ودالقرشي إنت إجازتك دي قضيت نصها مع صاحبك ياسر ميرغني ليه ما سألتو
عن قصة الدواء دي ودور منظمته في ما يجري ، ياسر سمعتو بتكلم في التلفزيون
عن موضوع السكر بانفعال وحماس ولكنه لم يضع النقاط على الحروف ، لم يعد خافيا
أن فارق السعر بين المصنع والمستهلك يذهب لبعض شركات الوجوه المتوضئة للتوزيع،
الكيلو 6000 وشبه معدوم ، شركات التوزيع تم اختيارها على أسس معروفة
ويتم تحميل هذا الفارق على كتف المستهلك المهتوك..
حين تحدث ندرة في سلعة ما تضع الدولة يدها على السلعة ليتم توزيعها
من خلال جمعيات تعاونية تحت رقابة صارمة أما تركها لشركات أهل التمكين
فايلولة النتائج معروفة..

ياخ كابلي زاتو بطَّل يغني ليهو..

Quote: الجابرنا على الكلام دا كلو شنو وعشان خاطر منو ولشنو نتحمل الكلام دا

يا ود البشرى اقعد اضحك لي كدة لامن سعر الطماطم يحصل سعر الركشة

Quote: يا ود البشرى اقعد اضحك لي كدة لامن سعر الطماطم يحصل سعر الركشة

لا ما خلاص يا ود جبريل فرانك طوانيت حل المشكلة ونصحنا ناكل تبش
ما بركة الما قال اكلو نيم

زماااان المصريين كانوا بيحسدوا السودانيين و يصفوهم بانهم بيفطروا لحمة...
اللحمة الآن سلعة من سلع الخيال العلمي...
اول مرة سمعت انو بقى في "نص ربع" لحمة...بكيت...
بكيت لانو البامية ما ياها..
و الدنيا كلها ما ياها...
عجبي !

Quote: لحمه موبايل = ربع كيلو مقسوم علي اتنين

اسمها (مس كول) يا كابتن ما تحرجونا مع الجزار لو سمحتو

Quote: لا ما خلاص يا ود جبريل فرانك طوانيت حل المشكلة ونصحنا ناكل تبش ما بركة الما قال اكلو نيم

ود البشري تقديري
في حاجة اسمها المعاني بين السطور وفي واحد ممكن يقول ليك يمين وهو قاصد شمال
يعني بالعربي تبش قد تعني حسب معجم صحيح المعاني نيم

Quote: Quote: Quote: السكر (بضم السين وتشديد الكاف) 6000 جنيه وبرضو معدوم.. طيب السكر سادة بكم ؟

دا زاتو أباريقو مَمّحَّنه وبتن في إطراق،

الساده دا يا حمد أسال منه الإنتهازيين القالوا تابوا وقاعدين يتحاومو ببره ويطلبوا
من ناس الحقيبه يغنوا ليهم خمرة هواك يا مي صافيه وجليه.. وعربوا الطلب : أنفحنا بها يا هذا..
واحد من الجماعة الذين يعاقرونها قال لي تاب ، قلت ليهو الحمد لله ربنا هداك ياخ بعد دا حج، قال
لي شنو الحمدلله وحج وحركات القرضاوي دي يا أخا العرب ، القصه كلها إنوالعرقي دا بدون مزه وشيّه
بيوديك البرزخ باللوفتهانزا..

Quote: اسمها (مس كول) يا كابتن ما تحرجونا مع الجزار لو سمحتو

هاهاهاهاها
ما شفت لي ناس بتضحك على همومها أكثر من السودانيين
على قول ود البشرى: بطلوا ضحك خلوا الثورة تنجح...

متوسط دخل الفرد اليوم 800 جنيه في الشهر حسب ما ذكر في البوست .. أنا عايزة أعرف متوسط دخل الفرد سنة 84 كان كم في الشهر؟ او بيعادل كم دولار في الشهر؟؟ عشان أفهم الحسبة صاح..

Quote: لو حول بالرسمي ولا بالأسود كلو بكب في خزنة شيخ تلب وبمشي مليزيا ولا دبي ... بي يقوم عمارات وفلل سمحات فالتجار في السوق تجارهم ... والبنوك حقتهم

البنوك دي يا عيدروس كانت مسرحا لأول حادثة من نوعها في تاريخ العالم ألا وهي
أن يقنع أصحاب المصالح رئيس جمهورية بأن يصبح رئيس مجلس إدارة بنك،
إي والله يا بن عيدروس ، وأثق أنهم أقنعوه بأن أمير المؤمنين المتوكل بن
أب معيط كان عضو مجلس إدارة بالإستوك ماركت بسوق عكاظ حتى أن الأكتع الهمذاني
كتب فيه معلقة سارت بها الركبان حين ارتفعت أسهم البعير في مؤشر بن أبي بلتعة.

ياخ ديل عينه ياخ،

Quote: بدون طماطم كيف الحياة غير ليمك

قال ليك بالدكوه يا هذا..
يا khaleel والله مشتاق ليك زي البصل،
اليوم أصبح البصل ب 4000 جنيه ، الكوم ، وتسبب ذلك في حرج
شديد لربات البيوت لأنهن يعرفن جيدا مقولة (الحله بصله) لذا
كانت حبوباتنا يجتهدن في حش البصل بكمية تجاريه وهن يغنين :
يا دمعي الإتشتت وغلب اللقاط..
هسه (الدمعه) بقت (سخينه)

Quote: أنا كلامي في نقطة محددة وهي سعر الدولار اليوم وسعر الدولار سنة 1984 لا يمكن حساب الدولار بقيمة أي عملة ما لم نضع في الحسبان التطورات التي طرات على معدل دخل الفرد نقطة سطر جديد

يا فرانكلى كان الله فى عونك
سنة 1984 العلاج محاني والتعليم مجانى ومافى ضرائب واتاوات بهذا القدر المهول
الله يديك العاقية
جنى

*لأنكم ( تستاهلوا ) !!!!! - صلاح الدين عووضه



محمد ود المرتضي تحياتنا ياخ و بقي قريب لانة الأسعار دى قبل ما تكمل المداخلة بتكون ذادت

وبعدين والله ما محيريني ناس فرانكلي والشفيع وراق وربيع عبد العاطي لكن محيريني ناس جني الخربو االإقتصاد وجايين يغالطو

ياخوانا البلد تمام والناس مبسوطة والإنقاذ لا فيها ظلم لا فساد والحالة ألسطة و الحالتة صعبة بدل النقة فرانكلي قال ليكم عندكم حلين ياتغسلو عربات يا تاكلو تبش

والله صحي

Quote: والله يا محمد انا اول يوم فى رمضان اتصلت على ناس البيت مهنئياً وسألت الوالده عن الاسعار قالت لى الطماطم من 16 لى 22 جنيه للكيلو تالت يوم وصلت 25 رابع يوم 28 خامس يوم وحاتك 30 جنيه....

هسه ياموج يجيك واحد يقول ليك إنت الغلطان ، في زول بيهنئ ناس في السودان
في الظرف الحالي بقدوم رمضان؟
في السنوات الأخيرة أصبح رمضان عند الناس في السودان مشكلة حقيقية مرة عند قدومه
والأخرى عند انتهائه، قدومه يرفع الأسعار ويخرج السلع الأساس من مستوى التناول
وانتهائه يواجه رب الأسرة بمتطلبات عيد لاقبل له بها.. يعني ضربه مزدوجه ..
نسأل الله سبحانه وتعالي أن يجزيهم بمستوى صبرهم..


-
الدكوه الإيطالية خطيره يا موج..

Quote: فالمآسي التي تكتبها هنا لو أتت من عندي مثلا لكانت كفيلة بإزهاق أرواح بشر كثير لكنها تغلفها بعبارات مخففة للصدمات

عزيزنا جعفر سلامات ورمضان كريم،
هو أصلو الحصل حصل والقارئ داير ينشرط ويعرف كل ما نكتب فإذا كان النكد هو اللحن
الرئيس الممل في كوراله الممعن في البياخه مع هذه الحكومة غير المسؤولة فلا بأس من
صولو بين الفينة والأخرى يكسر هذا الملل حتى لو كان من ذات الفرقة وبآلة (نفخ) في
غياب الكمنجات المجيدة..

أرفع يدي معك في الدعاء أن يكفيك شر الحاجات الممجره طماطما كانت أو حكومة ..

Quote: يا فرانكلى كان الله فى عونك سنة 1984 العلاج محاني والتعليم مجانى ومافى ضرائب واتاوات بهذا القدر المهول الله يديك العاقية جنى

يا جني خلي الضرائب والبطيخ دا ما موضوعي ابدأً

أنا عملت عملية حسابية بسيطة وهي سعر الدولار اليوم وسعر الدولار سنة 1984 لا يمكن حساب الدولار بقيمة أي عملة ما لم نضع في الحسبان التطورات التي طرات على معدل دخل الفرد

عندك عليها رد يلا احسب وقول لينا

بطيخك دا لمو عليك

نقطة سطر جديد

رمضان كريم

يا الزبير ازيك

Quote: يعني بالعربي تبش قد تعني حسب معجم صحيح المعاني نيم

يعني قال النيم !! ما مشكلة إحنا كشعب هدي ورضي وبخت اي دكتاتور بينا بنفتش النصف - قول الربع - المليان دايما و بكفينا
كويس برضو الماقال اكلو قرض
كان قلت المعجم قال قرض بقول ليك الحرجل ثم المحلب و علي اليمين معاك لييييييي الهوا
وبرضوا كان قال اكلوا هوا بلقى لينا مخارجة
احنا شعب مبسوط ياخ و نستاهل ياقول عووضة

Quote: Quote: Quote: صايم في المغرب ، يعني مع الآذان.. ههههههههههههه الله يريحك يا مولانا .. نزّلت لي الضغط الرفعتو اسعار الطماطم و غلاط فرانكلي الطلع جني مسؤول عن الأزمة ياهو احنا كدا لولا شوية الضحك و البسمات البتخفف الهموم كنا انفجرنا يكون دا سبب فشل الثورة خلي بالك!! حقو بدل نهاجم سيدي الإمام و نعملو شماعة نطلع بيان نمهل فيه محمد موسى وتيراب الكوميدية وود الصايم اطناشر ساعة يوقفوا الضحك و تخفيف الهموم و يخلونا ننفجر - فجرنا البلا اليخمنا زاتو احنا

إنت وأنا (كما في أغنية هاشم ميرغني) ..
أبوحتوت ، أقسم بالله لا الإمام بينفع شماعه ولا كافة ما يسمى بالأحزاب، منذ متى كانت الأحزاب
عنصر تغيير ثوري في السودان حتى نتوقع منها تغيير حياتنا ، الموضوع دا شخصي عند كل فرد
بالنسبة لي ولك عشان كدا أنضم إليك في الدعاء ، بلا يخمنا الإتنين..
رطل الزيت يا ودالبشرى 9000 جنيه..

قت ليك يخمنا مع بعض.

Quote: في عام 1988 م كنت في بداية حياتي العملية موظفا ببنك النيلين بمرتب 346 جنيها قبل خصم الضرائب علي الدخل واستقطاع النقابة والصندوق الخيري للعاملين اضافة لحوالي مائة حنية بدل ساعات ما يعرف بال clearing house والله العظيم كنت عايش ملك ، ملك شنو كنت إمبراطور وبعد مصاريف الشباب المعروفة ( ما تفكروا كتير أنا قصدي التمباك ) ومساهمتي في المصاريف الأسرية والاجتماعية الأخري بوفر توفير يمكنني من السفر لمصر علي الدرجة الأولي بالخطوط المصرية وفي عام 97 م وانا لدي ابنه واحدة وزوجه طبيبة تعمل بالكلية التي تخرجت بها وترقيت في مجالي الوظيفي اكثر مما خططت له لا استطيع ان اوفر رطل لبن واحد في اليوم للبنت واقسم لكم ان بتاع الدكان كان يرفض ان نشتري علي النوته لان الحساب كان تقيل والسداد بالقطارة لضعف الرواتب مقارنه بالأسعار واللباني كان بيفط بيتنا لأننا لا ندفع بانتظام واقسم لكم مرة اخري انني رفضت عرضا مغريا بعقد عمل في الخارج عام 92 وفي 97 وسطت طوب الارض وحفيت لاخرج من السودان ويأتي من يريد ان يقارن الماضي بالحاضر لا تحاولوا ان تبعوا لنا بضاعتكم لأننا جربناها من قبل وخبرنا نوعها

إصبر يا شيخنا،


إنها ابتلاءات..


كلها 1000 سنه والحال يتصلح يا الزبير.


الشفقه في شنو..

Quote: اولا فرضيته ان متوسط الدخل 800 جنيه في السودان ليست بصحيحة فانا عملت في 2009 في مستشفى التيجاني الماحي مع اطباء و نواب اخصائيين و اخصائيين اولا المرتب الاصلي للطبيب حوالي 300 جنيه مع البدلات يصل إلى 500 جنيه ماهية نائب الاخصائي تصل مع البدلات 590 جنيه ماهية الاخصائي 850 جنيه بعد 12 سنة مدارس و 6 سنة جامعة و سنة امتياز و سنة شدة، و 4-5 سنين تخصص، يعني 25 سنة تعليم هذا ينسف فرضية ان متوسط ماهية الفرد في السودان 800 جنيه فالاخصائي يعتبر في قمة الهرم الوظيفي في السودان، من الاستهبال الضخم جدا ضد موظفي الدولة في السودان، ان البدلات تقارب الماهية مما يقلل التزامات الدولة بالمعاش، فكيف يمكن ان تكون بدلات الطبيب حوالي 200 الف و ماهيته 500 الف، ذلك يؤدي إلى ان المعاش في النهاية سيكون من الماهية الاساسية و هذا من ابداعات الحكومات في السودان.

يعني أنت فاكر متوسط الدخل دا بالاسم الوظيفي؟؟؟

ما في بتاع درداقة بيتحل في اليوم 100 جنيه

وفي صبي كافتيريا بيتحصل على 1500 جنيه في الشهر

وفي وفي وفي

وفي دكاترة شغالين في المستشفيات الخاصة بياخدو أكتر وفي موظفين في القطاع الخاص بياخدو من 3000 ولي فووق بس عشان دكتور يبقى هو القاعدة التي يجب أن يضرب المثل بها؟؟

الطبيب وموظف الدولة والمعلمين ديل أقل الناس دخلاً وهذه يعلمها الجميع وهذا هو أيضا أحد سياسات الدولة الفاشلة في تهيئة الجو المناسب لهم للعمل بالسودان مما اجبر الكثيرين من هذه الطبقة العمل بالخارج

والآن الحكومة تتاجر فيهم عديل بسفرهم للعمل بليبيا وجلب أموال صعبة للسودان

حليل زمن الدكتور ليه شنّة ورنّة

Quote: من ناحية اخرى فلترجع إلى حسابات الاخ فرانكلي و قد حسب ان غسال السيارات في السودان يتحصل على 3 جنيه في غسيل السيارة الواحدة، و مضى في حساباته ب 19 سيارة في اليوم، ليحصل الطفل المكلوم و المحسود على فقره 59 جنيها يوميا، و بعد ذلك ضرب الرقم في 30 ليحصل على ماهية الطفل الشهرية، عليك الله يا فرانكلي ده حساب شنو، اولا لماذا يجب ان يعمل هذا الطفل من اساسه، واجب الدولة ان تتيح له فرصة التعيلم لا ان يغسل 19 سيارة يوميا 265 يوما في السنة، من ناحية اخرى ألا تفترض ان هذا الطفل يجب ان يتحصل على عطلة و لو ليوم في الاسبوع، و لنمضي قدما من يضمن لهذا الطفل غسيل 19 سيارة يوميا و من اين اتيت بهذا الرقم لخرافي، غسيل السيارة ابو 3-5 جنيه يعني حوالي الساعة في الغسيل و اذا اراد الطفل أن يغسل 19 سيارة فهذا يعني انه يعمل 19 ساعة يوميا

الواحد تعب من المنبر دا الفيه ناس بتقرأ من باطن عقلها وترد علي ما ظنوه

هسّع في كلامي دا من وين جبت أنّ الغسال د طفل

أنا بنفسي قلت بعرف خريج جامعي عديييييل

دا طفل؟؟

Quote: من ناحية اخرى يا عزيزي فرانكلي ألا تعتقد انه من العبث ان يعمل احد الخريجين الجامعيين في غسيل السيارات، اليست هذه كارثة في حد ذاتها. فغسيل السيارات ليس عيبا لكن الفاجعة الاقتصادية هي ان تهدر 12 سنة تعليم و 4 سنة جامعة في مهنة يمكن ان يقوم بها اي امي، 16 سنة تعليم تساوي ثروة ضخمة من المعرفة تقدر في اوروبا بمئات آلاف الدولارات

أبداً أذا كان هذا خياره
ليس بالضرورة أن يعمل أي منّا بشهاداته من الذي يفرض ذلك

الربح والخسارة هذا شيء شخصي يحدده كل منّا على نفسه ما دام انسان راشد يختار بين هذا وذاك

كم من سوداني يعمل عمل لا علاقة له بتخصصه

حتى في الغرب ومع وجود الفرص التي تقدر في أوروبا بمئات ألاف الدولارات تجد سودانيين يغسلون الصحون وتجد سودانيين سواقين تاكسي وتجد سودانيين بتاعين بيتزا دلفري وسواق بص وبوستجي وأغلبهم خريجين

دي ما عندها علاقة بالدراسة

صحيح ممكن يضطر إليه اضراراً إذا كان ضحية للبطالة لكن بعضهم يعملون بقناعة تامّة في مثل هذه الأمور

يا أخي حتى في أوروبا دي وأمريكا ديك في أمثلة ذي دي لمواطني البلد انفسهم بما يغني من سرده هنا

عشان كدا حسابي لم ينسف بمثل هذه المداخلة المطولة ولكن دعمته تماماً

رمضان كريم

يا أمجد دعك عن حديث شيخنا فرانكلي الذي انتهى إلى إقراره بفشل نظام الإنقاذ
والذي أكد فيه على أن الدولة فاشلة وتتاجر بأطبائها ومعلميها للحصول على العملة الصعبة
(التي سيحولونها عن طريق البنوك وبسعر الصرف المعتمد من البنك المركزي " بالطبع" )

المسألة بإيجاز أن العملة ترتبط قيمتها بالناتج المحلي والتغطية بالعملات الصعبة والذهب
- أوهكذا علمونا في الجامعة – وهي مرآة لإقتصاد الدولة ومن ثم فإن هذه الدولة الفاشلة
– كما قال فرانكلي – بسياستها التي جففت مصادر العملات الصعبة ووظفت جل مدخولها إلى الأمن
والدفاع والإنفاق الحكومي وصرف الباقي على محسوبيها ومنسوبيها فإن النتيجة الطبيعية حدوث
هذا التضخم الأسطوري الذي لا يحدث إلافي حالات الحروب وأنت تعلم أننا في حرب لمدة 23 سنه
وأمريكا قد دنا عذابها وكمان روسيا والصينيين ذاتم ليهم يوم ، أصبر ليهم العاملين لينا نمل
ديل.. حكومتنا دي شغاله بنسخه رديئة من فيلمThe Ultimate Warrior
يا أمجد التضخم الحاصل عندنا ألغى كل نظرية عن العملة كوسيط للتبادل السلعي والخدمي وما قلته
في مداخلتك صحيح فمرتبك كطبيب لن يكفيك لشراء بطيخه أو تبشه من خدار فرانكلي الذي زرعه في
جل مداخلاته ولو ما عجبك منطق التبش والبطيخ فقد نصحك وغيرك بأن تخبطوا رؤوسكم بالحيطه حسما
لموقعة ذات اليقطين.
وفي رواية أخرى .. القرع.

الليلة سمعت خبر قالوا ح تتأسس

شركة سرايا الإسلام لبيع وتسويق التبش ومنتجاته

بموجب السجل التجاري بالرقم الموحد 30-6-89-19

يعني من الاسبوع الجاي التبشة بـ 10 جنيه


شعارها : استمتع بأكل التبش وأنت تشاهد القناة الفضائية السودانية

Quote: فرانكلى لا يعلم بان دخول الولار للسودان بسوق اسود او سوق رسمي بيزيد من حجم العملة الصعبة فى البلد و بينزل سعر الدولار. بغض النظر عن الطريقة الى انت بتحول بيها اكيد بنزل سعر الدولار

يا سمارت فرانكلي غير رأيو وقال إن :

Quote: الطبيب وموظف الدولة والمعلمين ديل أقل الناس دخلاً وهذه يعلمها الجميع وهذا هو أيضا أحد سياسات الدولة الفاشلة في تهيئة الجو المناسب لهم للعمل بالسودان مما اجبر الكثيرين من هذه الطبقة العمل بالخارج والآن الحكومة تتاجر فيهم عديل بسفرهم للعمل بليبيا وجلب أموال صعبة للسودان

وحيث أن أولئك لن يحولوا أموالهم بالسعر الرسمي وعن طريق البنوك من ثم فهذا بقراءة أخرى يعني الآتي:
1- أن (جني) لم يتسبب في خراب اقتصادي لأنه يضخ عملة صعبه بالحيل للسودان..
2- صحة كلامك بأن المهم أن تكون هناك منابع عملة صعبة ترفد المصب غض النظر ما إذا كانت تلكالروافد نهرا أو خور ..
3- إن الدولة وصلت إلى تلك الحقيقة (العبقرية) فأصبحت تتاجر ببنيها في مصراته ل(جلب أموال صعبة للسودان) من الزندان..
4- إن كلام( جني ) ليس ب (بطيخ) أو (تبش) أو شمام أو قرع .. ومن ثم أبشره بأن رأسه قد نجا من حيطة ذات اليقطين.

أعتذر لبقية الزملاء والزميلات عن التأخير في الرد وسأعود إليهم فردا فردا ..

Quote: وحيث أن أولئك لن يحولوا أموالهم بالسعر الرسمي وعن طريق البنوك من ثم فهذا بقراءة أخرى يعني الآتي:

بالجد مسكين انتا فاكر الحكومة منتظر المغتربين يحولوا

الحكومة باعت واستلمت كاش يا صاح

Quote: Quote: Quote: وحيث أن أولئك لن يحولوا أموالهم بالسعر الرسمي وعن طريق البنوك من ثم فهذا بقراءة أخرى يعني الآتي: بالجد مسكين انتا فاكر الحكومة منتظر المغتربين يحولوا الحكومة باعت واستلمت كاش يا صاح

Quote: يامولانا، البوست ده برعاية منو؟

فرانكلي سبيكنق يا دكتوره الرعاة كثر،
مرات أقول حظي المهضلم
مرات أقول لنفسي كفاك
مرات أقول لحظات أقيف أتأملو ،

والله يا رحاب مرات أقول أرعاه بحناني لكن مسرح اللامعقول دا لم يترك لي
فرصة عمل شئ تجاهه فتركت مسألة الرعاية وتركته في غياب التبني مشردا في شوارع المنبر..

الله في يا عزيزة..

يا مولانا محمد المرتضى طماطم شنو؟
انا مع فرانكلى ده المن الله خلقو ماقالو كلمه مى ياها فى حكومتنا المبجلة دى...
انت ماتاكلو تونة الوابل البتقدما افراح عصام دى
ودى لو الحبة بخمسمائة الف رخيصه ، تقديم افراح ده براهو بى كم؟
وده اسألو منه حبيب نورة وطارق جبريل....
احييييييييييييى انا ...... نحن نأكل السم،،،،

Quote: لحمه موبايل = ربع كيلو مقسوم علي اتنين

ودعدلان،
أهو نازك صححتك وقالت ليك دا إسمو (مس كول) مع توصية بألا تحرجها مع الجزار..
شايف الناس المرتاحين الفايقين،
لسه بتمشي الجزار..

Quote: ودعدلان، أهو نازك صححتك وقالت ليك دا إسمو (مس كول) مع توصية بألا تحرجها مع الجزار.. شايف الناس المرتاحين الفايقين، لسه بتمشي الجزار..

يا محمد المرتضى اذا بليتم فاستتروا ومافي بلوى اكثر من حال السودانيين اليومين دي بقينا لمن نشتهى اللحمة نقول للجزار عايزين عضم بريال (سعودي ) لبوبي زي عادل امام في فلم (رمضان فوق البركان)
دا كلو كوم وناس حماية المستهلك القالوا صوموا تصحوا كوم
طبعا هم قاصدين الصيام الابدي ولسان حالنا يقول وهل يضير الشاة سلخها بعد ذبحها

Quote: بقينا لمن نشتهى اللحمة نقول للجزار عايزين عضم بريال (سعودي ) لبوبي زي عادل امام في فلم (رمضان فوق البركان)

نازك الطيب يا مفترية ...... رمضان كريم
مادايرين كلاب لبيتكم ده نخلى اهلنا يقدمو؟؟

مسرح اللا معقول، لووول

ياخ كلام ما قادرين نشتري من السوق ده قولو لزول ما عنده حديدة و الدليل تبرعاتكم لساكني المدينة كمان:












__________
PS my brother sent me this link, but we cannot ascertain its authenticity

خالد،
على رسلك يا عزيز،
هذا منبر عام لايملك أحدنا أن يمنع أي عضو في الكتابة في أية مساحة يختارها فيه ..
أنا زيَّك زعلان..
علي اليمين 4 ساعات بتفرج في إفتتاح أولمبياد لندن الإبداع والجمال والحضارة وأتحسر
على حالنا ، أتحسر على المساكين الذين ظلوا ل23 سنه يتلقون نصيبهم من سخف حكامهم
وهي لله ولا السلطة ولا للجاه ولا للحياه نفسها ، حتى انتهى بنا الحال إلى ما نحن فيه..
عندما أسدل الستار على حفل الإفتتاح تمنيت أن يكون كلام ناسنا صاح بأننا (مستهدَفين)..
تاني البيقول نحن مستهدفين بنقول ليهو خمشك فيهو اللبن..
دعهم يستهدفونا..

حظ كعب ياخ..

بوستك بيخوف








-__-_
وبيملا الزول رعب وقلق
على العقاب

Quote: زماااان المصريين كانوا بيحسدوا السودانيين و يصفوهم بانهم بيفطروا لحمة... اللحمة الآن سلعة من سلع الخيال العلمي... اول مرة سمعت انو بقى في "نص ربع" لحمة...بكيت... بكيت لانو البامية ما ياها.. و الدنيا كلها ما ياها... عجبي !

ما ضروري لحمه يا ممكونه،
أطبخي بالدجاج،
الدياي .. نسيتوهو وللا شنو؟
الدجاجة كلها ب 26 ألف بس ..
مع ضمان مجانا للمكنه والأجنحه..
وهنالك ميزة أنها مضمونة ولاتختلط بلحم الحمير ..
وبطلي النقه الكتيره وأجري اشتري لأنها باكر بتبقى ب 40..

عالم تغيز..

Quote: هاهاهاهاها ما شفت لي ناس بتضحك على همومها أكثر من السودانيين على قول ود البشرى: بطلوا ضحك خلوا الثورة تنجح...

إلى قراء البوست الكرام..
شششششششششششش ، خلَّوا الثورة تذاكر (تراجع دروسا)..





-
بالله يا رمانه في أسباب نجاح أكتر من الحاصل دا ؟



-
حمدا لله عالسلامة ..
صحي طلعت أغنية بتقول يا الماشي لامدرمان جيب لي معاك بمبان؟.


وسافر..

Quote: Quote: الجابرنا على الكلام دا كلو شنو وعشان خاطر منو ولشنو نتحمل الكلام دا

أبوالريش سلام،
إنت وحمد عبدالغفار سيد السؤال بتسألوا أسئلة شخصية ..
ياخ كل زول وبمزاجو!!

موضوع الأسعار ليس بجديد،
رفعت هذه الحكومة أي شئ ، عدا قدر المواطن ، وظلت تقول لنا لئن (شكوتم) لأزيدنكم والناس ساكته،
الحكومة دي أي حاجة ممكن تعملا ضد الشعب عملتو وياها قاعده،
شفت ليك زول بيفتتح سد لانتاج الكهرباء ويرفع سعرها 300% ؟
هسه في ناس خاتين إيدم في قلبم لأنو سمعوا تحت تحت إنو سيتم افتتاح مصنع هوا..
تسألني عشان خاطر منو نتحمل الكلام دا؟

عشان خاطر ربيع..

Quote: ياخوانا البلد تمام والناس مبسوطة والإنقاذ لا فيها ظلم لا فساد

برضو خشمك فيهو اللبن ..
إن استطعت إليه سبيلا ..
لأنو كيلو لبن البودرة وصل خمسين ألف جنيه..
نعم 50 ألف جنيه..
ياهيثم عرفت ليه لبن البودرة الحايم في السودان ويحبه الناس هناك إسمو (المدهش) ؟
قالوا في واحد جديد الوقيه منو ب 1800 (جنيه) إسمو ربيع..
هسه الهيروين بيغني للمدهش قائلا:

وكتـيـن بقـيـت مـعــاي فـــي أعـمـاقـي ..
فـــي أعـمــاق مـشـاعــري الـمـرهـفـة ..
لا مـــنـــك إبـــتـــدت الـــظـــروف ...
لا بــيــك إنـتـهــت الأمــانــي الـمـتـرفـه

والأطفال عادي بيقولوا ليهو يا جميل يل مدلل.

ياهيثم اخوي زمان كانت قزازة اللبن من كافوري ب (ريـال) ، هسه ناس كافوري طفشوا القزاز والريـال بقى برشلونه..

Quote: الليلة سمعت خبر قالوا ح تتأسس شركة سرايا الإسلام لبيع وتسويق التبش ومنتجاته بموجب السجل التجاري بالرقم الموحد 30-6-89-19 يعني من الاسبوع الجاي التبشة بـ 10 جنيه شعارها : استمتع بأكل التبش وأنت تشاهد القناة الفضائية السودانية

في منتصف ثمانينيات القرن المنصرم ضربت حمى الأسلمة مفاصل الٌإقتصاد ف (بعد البنوك الإسلامية وشركات الـتأمين الإسلامية) أصبح من الطبيعي جدا أن تجد بص سفري مكتوب عليه (مواصلات "..." الإسلامية – الخرطوم كوستي وبالعكس) وقد حدث أن اصطدم احد تلك البصات و (استشهد) نصف الركاب ( بالطبع على الطريقة الإسلامية ) وتجد مخبزا بإسم (مخبز الرفاه الإسلامي) وإذا وجدت في داخل الرغيفة دُباره فهي إسلامية وكذا البروميد المسرطن إسلاميا. . أحد الإنتهازيين ركب الموجة وأطلق على محل للحلاقة (صالون أبوذر الغفاري) لكنه سرعان ما غير الإسم لأن الزبائن عايزين استايل بعيدا عن نمره واحد..

حكى لي صديق معتق ، وهو من المحركين لعظائم الأمور الآن ، أنه عندما كان يدرس في دولة عربية أصدر رئيسها الثوري قرارا بإزالة الأسماء الأجنبية وإطلاق أسماء على الأماكن والمحال التجارية مستوحاة من التراث العربي وذات نكهة إسلامية ، بعدها أصبح طبيعيا أن ترى لافتات مكتوب عليها ( بار بن الأكتع ) و (الزمخشري لحلق الشعر والشعور ولحية بن غضبان المكفهر) و ( قطع غيار كعب بن زهير) إلخ.

فيا حمد لاتظنن أن روايتك لن تتحقق على أرض الواقع...

Quote: بوستك بيخوف

يا راويه ..

هذا البوست لايمثل شيئا مقارنة بما يجري،

لكن ما يخيف هو الصمت إزاء ما يجري.

تسلمي.

Quote: في منتصف ثمانينيات القرن المنصرم ضربت حمى الأسلمة مفاصل الٌإقتصاد ف (بعد البنوك الإسلامية وشركات الـتأمين الإسلامية) أصبح من الطبيعي جدا أن تجد بص سفري مكتوب عليه (مواصلات "..." الإسلامية – الخرطوم كوستي وبالعكس) وقد حدث أن اصطدم احد تلك البصات و (استشهد) نصف الركاب ( بالطبع على الطريقة الإسلامية ) وتجد مخبزا بإسم (مخبز الرفاه الإسلامي) وإذا وجدت في داخل الرغيفة دُباره فهي إسلامية وكذا البروميد المسرطن إسلاميا. . أحد الإنتهازيين ركب الموجة وأطلق على محل للحلاقة (صالون أبوذر الغفاري) لكنه سرعان ما غير الإسم لأن الزبائن عايزين استايل بعيدا عن نمره واحد..

يا مرتضى هذا الحديث كنت أردده كثيرا في أركان النقاش بجامعة الخرطوم

وكنت أعني به المتاجرة بالدين من أجل منفعة أقتصادية ومالية ، وأستغلال التدين

في الشعب السوداني وتضليله والأكتساب المادي من هذا التضليل . لا أستطيع أن أفهم

كيف يكون المخبز اسلامي وكل آلات تصنيعه من دول الإستكبار العالمي ، وحتى القمح مستورد

من هذه الدول ، واهم مادة في تصنيع الخبز هي الخميرة ، لا أعرف ما هو الاسلامي وغير الاسلامي

في عملية تصنيع الخبز انه المتاجرة بالدين دون شك .

أما بصات الهدى الاسلامية وغيرها فهي نيسانات مصنوعة في اليابان وتعمل بالجازولين

ولكن يكمن الاستغلال الديني عندما يحضر أحد هولاء البسطاء الى السوق الشعبي ويجد هذه البصات اسلامية

وتلك غير اسلامية فيفضل البصات الاسلامية خاصة اذا حصللها حادث في الطريق عله يكتب له النجاة او الجنة

Quote: في منتصف ثمانينيات القرن المنصرم ضربت حمى الأسلمة مفاصل الٌإقتصاد ف (بعد البنوك الإسلامية وشركات الـتأمين الإسلامية) أصبح من الطبيعي جدا أن تجد بص سفري مكتوب عليه (مواصلات "..." الإسلامية – الخرطوم كوستي وبالعكس)

أما بعد (منتصف التمنينات) - يقال إنه الحكومة فرضت على الناس اختيار اسماء "اسلامية" للشركات والاعمال وخلافها .. يعني للتصديق على عمل أو تسجيله لازم تتم الموافقة على اسلامية الاسم أولا ...عشان كده حتلقى الـ ما لقى اسم اسلامي يناسبه اختار اسم للشركة او العمل أو المحل .. أو الكافتيربا واضاف ليه كلمة اسلامي/ية -
ويا مرتضى لا ما سمعت "يا ماشي لامدرمان جيب لي معاك بمبان" لكن سمعت أهل البنات قالوا تاني ما "بيدوا" بناتهم إلا لواحد من جامعة الخرطوم أو من ودنوباوي...!

Quote: كيف يكون المخبز اسلامي وكل آلات تصنيعه من دول الإستكبار العالمي ، وحتى القمح مستورد من هذه الدول ، واهم مادة في تصنيع الخبز هي الخميرة ، لا أعرف ما هو الاسلامي وغير الاسلامي في عملية تصنيع الخبز .

يا أبوحميد الخميره الفي الأفران دي برضو إسلاميه طالما اللافتة خارج المخبز تقول ذلك
وهذا ينسحب على الماكينات والدقيق الكندي والأسترالي ..

بعدين خميرة الخبيز كان عطنتها تلاته يوم يا دوب تنعنشك لكن في 2009 قام عمر البشير بافتتاح
مصنع للإيثانول بكنانه وإنت عارف الإيثانول ككحول .. فنجان واحد منه يخليك تسلم على الشارع من طرف..
وتصيح اين أبي لهب لأنازله بسيفي هذا .. تقول لي خميرة بيره !!

في مدينة ليدز كنا نشتري (حاجات الأسبوع) من محل باكستاني وضمن التسوق كنا نحرص على شراء اللحمة
الحلال والدجاج الحلال ..إلخ .. وجدت في أحد الأرفف كيس شطه مكتوب عليهو فلفل حار حلال..
ياخ دي لو لقت ليها ليمون ودكوه إسلامية مع شيه شرعيه ، ما مبالغه ..

غايتو ربنا يغفر ليهم ويسامحم ..

Quote: ويا مرتضى لا ما سمعت "يا ماشي لامدرمان جيب لي معاك بمبان" لكن سمعت أهل البنات قالوا تاني ما "بيدوا" بناتهم إلا لواحد من جامعة الخرطوم أو من ودنوباوي...!

الله يطمنِّك....
بس الفارق إنو جامعة الخرطوم ما زالت بها جيوب ( مساومه) تحتاج إلى تمشيط ، أما ودنوباوي تمام،
لكن برضو أولاد الخرطوم وودنوباوي كووولهم بيغنوا لي في المسالــمه غزال..

Quote: إصبر يا شيخنا، إنها ابتلاءات.. كلها 1000 سنه والحال يتصلح يا الزبير. الشفقه في شنو..

مولانا محمد المرتضي
أنا والله صابر وما شفقان لكن داك زمن ضقناة ودة كمان خبرناه وعارفين الفرق بيناتهم
عشان كدة المغسة بتحصل وبنقوم نكورك ليس الا
لكن من ناحية الصبر صابرين

الحاصل في السودان بيذكرني بجملة المسلسلات المصرية

( اضطرينا نضحي بالأم والجنين عشان الدكتور يعيش)!!

Quote: أنا والله صابر وما شفقان لكن داك زمن ضقناة ودة كمان خبرناه وعارفين الفرق بيناتهم عشان كدة المغسة بتحصل وبنقوم نكورك ليس الا لكن من ناحية الصبر صابرين

ممتاز،
للتاريخ دورات يا الزبير ، ربما يأتي اليوم الذي يتكرر فيه ما جاء بالوثيقة التي جاءت بها رحاب أعلاه..
يعني نتبرع لمنكوبي طوكيو أو نعمل جسر جوي من مطار الطينه لإغاثة ضحايا زلزال سان فرانسسكو..

في بداية عهدهم قال عرابهم الذي علمهم السحر أن السودان سيقود العالم بعد عشرة سنوات ..
لم يقل إلى الهاوية .. لكن لا أدري لماذا تذكرت عربة الفرملة في مشترك الخرطوم نيالا..

Quote: زماااان المصريين كانوا بيحسدوا السودانيين و يصفوهم بانهم بيفطروا لحمة... اللحمة الآن سلعة من سلع الخيال العلمي... اول مرة سمعت انو بقى في "نص ربع" لحمة...بكيت... بكيت لانو البامية ما ياها.. و الدنيا كلها ما ياها... عجبي !

مولاي الحبيب محمد المرتضى وضيوفه الكرام
رمضان كريم وكل سنة وانت والأسرة الكريمة بخير
الرئيس السادات (الله يرحمه) عندمااحتج الشعب المصري على اسعار اللحوم في منتصف السبعينات وخلال فترة اختلافه مع الرئيس نميري ، خاطب المصريين في احدى خطبه النارية قائلا ( السودان الكلو بهائم شوفو كيلو اللحمة عندهم بكام ؟)

Quote: كيلو لحمة الضان 55 ألف جنيه

بدون غلاط حول السعر صحيح أو غير صحيح

1- لماذا وصل سعر كيلو الضان الى 55 ج؟
2- كيف يتم معالجة ذلك؟

اسئلة تحتاج لردود منطقية بعيدا عن القوالب و الجمل المكرورة

أكلو مورينقا!!!!

Quote: لماذا تذكرت عربة الفرملة في مشترك الخرطوم نيالا..

وفي رواية أخرى .. الفرّازة ..
ريحة السكة حديد بتستدرج الواحد من حيث يدري ..
قلت لي المخبز الإسلامي الآلي يا المرتضى ؟ تمييزاً له عن مخابز الكفر غير الآلية !!!
حاصل الأمر أن التدين بعدما كان سوفت وير في داخل قلوب الناس،
يوجه سلوكهم ويحكم معاملاتهم وتراحمهم وسائر شؤونهم ،
خرج من القلوب ليصبح شعارات ولافتات .. تملأ الشوارع
يعني ما ضرّ صاحب المخبز الإسلامي الآلى أن يغش في العجنة
أو يضيف بروميد السيانيد - ( في حاجة بالاسم دا ) ههههه -
طالما أن شعاره العالي بيرفع والعالم كلو بيسمع .. ويتفرج

Quote: الحاصل في السودان بيذكرني بجملة المسلسلات المصرية ( اضطرينا نضحي بالأم والجنين عشان الدكتور يعيش)!!

والدكتور يا مايا قال عندو خطه لعمليات لربع القرن القادم (25 سنه تاني) ..
بل ثمة من يطالب ببقائه دكتورا مدى (الحياة)!!
(الحياه) الماسخالي كما قال ودالرضي..
سيبقى دكتورا حتى لو تخطى الخرف بفاصل أسطوري من السامبا أو اللمبادا..
25 سنه تاني ..
طبعا نحن عمرنا أردب سمسم..

Quote: ( السودان الكلو بهائم شوفو كيلو اللحمة عندهم بكام ؟)

رمضان كريم وألفين سلام أستاذنا جعفر ،
كدنا نغنيك مع كابلي ( بعادك طال)..
غريبه السادات يقول كلام دا عن أهله السودانيين لأنه كان دائما يقول : دول أهلي..
فقد المنطق .. يكون ناس اليسار أكلو لحمو!!

Quote: بدون غلاط حول السعر صحيح أو غير صحيح 1- لماذا وصل سعر كيلو الضان الى 55 ج؟ 2- كيف يتم معالجة ذلك؟ اسئلة تحتاج لردود منطقية بعيدا عن القوالب و الجمل المكرورة

ليست ردودا منطقية .. بل ردا واحدا فقط ..
أتفق معك ومع مالك بن نبي الذي قال:

"إنّ الحديث عن المرض والشعور به لا يعني بداهة "الدواء".

شكرا يا هاشم

Quote: حاصل الأمر أن التدين بعدما كان سوفت وير في داخل قلوب الناس، يوجه سلوكهم ويحكم معاملاتهم وتراحمهم وسائر شؤونهم ، خرج من القلوب ليصبح شعارات ولافتات

hameem
والله البركه في الشوفه..
مسحراتي؟
ما نسمعك إلا في رمضان ؟
حولا كاملا؟
أأنت الأعشى؟
ياخ انا فرحان بيك زي ما قال أحمد المصطفى وياريت يدوم هنانا..

إي والله يا هميم،
كان عاملين تماثيل قرب السلاح الطبي لأكف ترتفع بالدعاء إلى السماء ..
طبعا شالوها بعد أن تلقوا نصحا بأنه ليس بالضرورة أن يكون الدعاء هكذا..
الناس ديل ما بيعرفوا كلامك عن سوفتوير الروح..
ولا حتى قوله (ص) إنما بعثت لأتمم مكارم الأخلاق..
ف شبكونا ألحس كوعك وديل تحت جزمتي ويا شذاذ ويا أجانب..
ويا معزولين..
المغني والكوراس..
كووولهم..

ياخ والله البوست المرقك دا بوستن كامل البركه ..

أعمل لينا نسخه تانيه من (أشياء صغيره مفرحه) ..

في الزمن المنزوع الفرح دا..