الزول القيافه ..

Quote: تعبان أنا يا مولانا ياخي والله تعبان راحت مني دروب وكلام رغم كمية الكلام الإتقال لكن دي ياها البفتش ليها واتوكأ عليها باقي العمر : Quote: Quote: وليس في خاطري أنه رحل

عمران،

فيديو اللوحات والأعياد والخاطر الما عاد دا جبتو من وين؟
ياخ أنا الغنيه دي ظللت أستمع إليها مذ أن كنت حرفا مجهريا في سفر التكوين ،
نعم ، منذ القرن الافريقي المخمس، لكن لأول مرة أشاهد الفيديو اليقطع النفس ويرجِّعو دا،
وردي لامِن ياخد أوكسجين ويرفع كتفيه إلى الأعلى ثم يزفره شجنا مذيبا بجهجه
ثباتي ويذكرني بعواصف الصحاري ..
لكن مُش لاحظت إنو سرعان ما يشملنا بشفاعته ورعايته ويعيدنا إلى خيمة فريدة الأوتاد
تمد لسانها للزعازع والمغيرين والموريات قدحا!!
خيمة كتب عليها (مشروع خلي من حضنك ضرايا الإستراتيجي).

شوف بالله كيف ينسق بإشارات من يديه عمليات الفرقه 17 كمنجات المجوقلة والمتحركات الميكانيكية
وتابلوهات الساكسفون الجوية، ما تعرفو عرض عسكري مبهر وللا درس في الموسيقى فادح الوسامة ،
يوزع الصولو على العازفين والشجن للسامعين كما تُوزع المنح للمنكوبين واللاجئين ..
في حضرته يغدو كل لاعب في أناقة المايسترو ويتبدى الجزل جليا في قسماته كفرح البعيد العاد،
بهجة بطعم الحلوى في بواكير الطفولة ورعشة الريدة الأولى في القلوب اليافعة.. تتذكرا؟
قول لي : هي بتتنسي !!

عارف يا عمران ، أنا جادي جدن في إنو وردي دا قاعد معانا مقبقب قلوبنا وأعرف أنه يختبر
شجاعتنا وصبرنا منذ مزحة قلت ارحل ، وين يمشي؟ يمين متربع في مجرة الدهشة وفي كل دفقة
عشق وهمس حبيبين ، يمشي وين عاد؟ ما قدمه لنا لن ينضب حتى نلاقيه ، غناويهو بلا نهاية محددة
وقصتا عجيبة لا ليها حد لا ليها قيف كانفجار كوني تنداح أطرافه نحو حواف المجرة ..

تتذكر لامن قالوا زيدان مات ؟ أها جريت ل (سي دي) واستمعت لكنوز محبه ووجدته فيها وسمعتو
بأضاني دي بيقول تلقى فيها الريده فارده جناحا تشتاق للربيع .. يا ربيع يار بيع ، شلت نفس
طويييييل وقلت الحمد لله ..الله يخلعكم..

هسه بعد خروجي من غيبوبة الضل الوقف ما زاد عرفت إنو القالوا لي رحل خلعوني ساي ..

وردي يا عايش وموهط فينا ياقيافه...

برضو نسيت اقول ليك،
لو جا واحد قال ليك محمد كرم الله رحل ما تصدقو..
الطيف هو الرحل ..
محمد كرم الله طيَّب خاطرنا واستقر في الخلايا بشكل مستدام بالنسبه لنا..
مثله لايدرج في قوائم الراحلين..

.



.

http://www.youtube.com/watch?v=jmbAfIXRoKA&fe...yer_detailpage#t=16s


عليكم الله خلوني هنا براي بس

Quote: عليكم الله خلوني هنا براي بس

مع الحمام وبس

سلام مرتضي

سلام يا مسنوح

يااااا تضى .. كان محمد وردى اسطورة بحق ...

وابدا ما هنت يا سوداننا سوداننا سوداننا يوما علينا ...
أبدا ما هنت يا سوداننا يوما علينا
بالذي اصبح شمسا في يدينا
وغناء عاطرا تعدو به الريح فتختال الهوينى
من كل قلب يا بلادي
فرحة نابعة من كل قلب يابلادي

يا سلاااااام يا سلاااااااااام
يا سلاااااااااااااااام ياخ
أنت و عمران تطيب ايامكم
ريحتني باخد النفس و رفع
الكتفين ديل ياخ

شفت الورطة الأنــا فيها يا سفيان

Quote: وردي لامِن ياخد أوكسجين ويرفع كتفيه إلى الأعلى ثم يزفره شجنا مذيبا بجهجه ثباتي

شجناً مذيباً يا مولانـــا .

Quote: درس في الموسيقى فادح الوسامة ، يوزع الصولو على العازفين والشجن للسامعين كما تُوزع المنح للمنكوبين واللاجئين .. في حضرته يغدو كل لاعب في أناقة المايسترو ويتبدى الجزل جليا في قسماته كفرح البعيد العاد، بهجة بطعم الحلوى في بواكير الطفولة ورعشة الريدة الأولى في القلوب اليافعة.. تتذكرا؟

بصدقها وآهاتها وبراءة أفعالها .

Quote: هسه بعد خروجي من غيبوبة الضل الوقف ما زاد عرفت إنو القالوا لي رحل خلعوني ساي .. وردي يا عايش وموهط فينا ياقيافه...

لؤي إنت وين ؟



..............................................................................
رايح انــا وما لاقي التكتح الأقولو غير أسمع بناديها للمرة المليون
وللمرة الأولى دائماً .

وطن يمتلك أفراد كهذا الوردى ويمتلك فن ناضج بذاك المستوى المتكامل من
السيمفونيات النازفه للتطريب والناطقه للكلام العسل بوخز يشفى الأرواح
ويبعث فى القلوب الفرح وفى العقول الأنوار الخلاقه شعب أنتج كرومه وعبدالجليل
والكاشف وزنقار وإبراهيم عوض ووردى والكابلى والجابرى وزيدان ومصطفى سيد
أحمد وعركى والشفيع وعثمان حسين وعباقرة التشكيل وأباطرة المسرح والطيب صالح
والنور عثمان أبكر وإبراهيم إسحاق وعوض حسن أحمد وخليل فرح وعتيق وعبدالرحمن
الريح بلد جاءت ببعانخى وطهراقا وبالفونج والمسبعات وتقلى ودارفور وجاءت
بعلوه والمغره وجاءت بسنار وسوبا وقرى وجاءت بالخرطوم بلد أنجبت المهدى ودينار
وقرض والباشا الزبير وأنبتت عبداللطيف وعبد الفضيل وحسن فضل المولى ونجيله
وعرفات عبدالله وأبوشامه عبدالمحمود وعشرى صديق ومحمد وعبدالله عشرى وأنجبت التنى
وكرف والرشيد نايل وعبدالله الطيب والمجذوب وأنجبت عبدالقادر المرضى ومنصور عبدالحميد
وزنون جباره ومحمود محمد طه وأنبت أزهرى والفضلى وأبوحسبو والسلمابى والضرير
وحماد توفيق والمحجوب بلد شب فيها التجانى وقدل فيها العباسى ونشق فيها الناصر
قريب الله وعزف فيها معاويه نور أروع نغم للحروف بلد بذاك المجد التليد والتاريخ
المتجذر المتأصل والفطاحله الميامين تتناهشها سيوف بنيها ساعية لتشليعها ليفقد
أى منهم شليته لغيره من الأجانب وسيبكى ساعتئذ لمجد بنوه رجالا وهزموه بلا همة ولا زمه
ود المرتضى ذلك الفن هو القاسم المشترك الأعظم الذى سنظل نتشبث به أبدا ما حيينا
ولك عزيزى يا أيها القابض على القضيه بذات الطريقه التى كان يفعل البك خليل فرح
عندما نحت عازه فى هواك موناليزة وطنيه وأى سلاح يا صاحبى أمضى من سلاح الفن.

ياخ ألف رمضانك كريم وأستغفر الله على الفقد الكبير وردى
له من الله الفردوس والدعاء الصادق ليؤلف الله بين قلوب أهلنا أهل السودان أجمعه



منصور

يا مولانا كان أنت قاضي وعارف القانون أنو حرم القتل العمدنحن هنا بنموت من الزول القيافه دا مئات المرات حتي في رمضان دمنا حلال
أخ أنا ميت ومن قبري بشابي
والله يا ودالمرتضي حالتي صعبة شديد حتي الدموع بقت بداية الفلم
دعوتكم يا حنين في العشرة الاحرة بس أنشالله لمسه كفايه علي
لكين ليك علي اللمسه بتحصل

لك كل الود يا رائع

بعد إيه ؟

شيقا..

بعد إيه دي كانت من أوائل الأغاني التي لامست أذني
أذكر - وأنا طفل - إنو عمك حامد كان يستلقي على ظهره
ويحرك يديه جزلا طرِبا لهذه الأغنية ومعها المستحيل وخاف من الله ..
ناس عمك حامد - أطال الله في عمره - مرروا إلينا شفرات متعبة ..
..

متعبه جد..

مُشـــاط كيني & عمر الطيب الدوش . !
الواطة أصبحت وانا بونس في نفسي بوردي
إتذكرت الخيت القديم ده يا مولانــا

أســتاذنا إلـق الـكلـم ومسـتحـلب الأحـاسيـس
تعـابـيـر نـديـة تـشـد الـظامـئـيـن مـن امثالـنا
إلـى يـنابـيـع الـندى ومصادر السـقـيا فـنـظل
مـسـلـوبى الإرادة تقودنا خـطانا نـحـو ذاك
النـدى الذى يجـذبـنا إلـية أملا فى أن يـبـلل
عروق أحاسـيـسـنا المتصحرة بـتـرطـيب
الجـلد والأطراف وهـماً؛ بعد أن يسـترسـل
الـعـقل فى شـبـه ذلك الـشـعـور الـفانـتـومى؛
تـماما كإحساس الـصـائـميـن الـذين يـبلـلـون
عمائمهم فى هجير أيام صيف رمضانى قائظ.

سـامـحـك الله أنـت وخـيـك الـمفـتاح الـذى مايـفـتأ
يفـتـح عـلـيـنا كـنوز الأصالـة والرزانـة، فـيـشـرد
العـقـل فى ذكريات الـجمال ومرارة الـفـقـد وبـقاء
الـندوب إشـارات بائحـة بتلك الجـروح الـعـميـقـة
فى الـعـقـل والـقـلـب.

وجعـتـنا فى وردى كبيرة ولكن كما قـلـت لأخـتـنا
وأديبتـنا سـلـمى بت الشـيـخ سـلامة فى مكان آخـر
أن العزاء فيما ترك لنا مـن إرث ثرى جميل فكما
قال شاعر الرومانسـية الإنجليزية وليم ووردورث
فـى قـصـيـدتـه الـرائـعـة

Ode:Intimations of Immortality from Recollections of Early Childhood
أنـشـودة: حميمية الخـلـود مـن ذكريات الطفولة الباكـرة

Though nothing can bring back the hour
;Of splendour in the grass, of glory in the flower
We will grieve not, rather find
Strength in what remains behind

رغـما عـن أن لاشـئ يـمـكـن أن يـعـيـد مـيقات
روعـة الـنضار فـى الـعشـب، والـتألـق فى الـزهـرة
فـلـن نـحـزن، بـل نـجـد
القـوة فـيـمـا تـبـقـى

والـمـرحـوم قـد أبـقـى لـنا أطـنانـا مـن الإبـداع
والأمـل فـعـزاؤنـا أن نـهـنـأ بـذلـك:

وردى أخــى...
أنـتَ الـذي عَـلْمـتَنا
مَـعـنى الـنـضـالِ
وروعـةَ النـصـرِ الجَلـيلْ
..........
..........

أنـتَ الـذى ألْـهَـمْـتَـنا
سِــَّر الـغَـرامِ
وَدنْـدَناتَ العِـشْـق
إيـقَـاعـًا مِـن
الـَفـنِ الأصــيـلْ

أطـعَـمْـتَـنَـا وسَـقـيْـتَـنَـا
لُغَـةَ الـُفـتُـونِ
ومَـْرحَـبًا يـا شَـوقُ
إبْـدَاعـًا مـن
الـشِــعْـرِ الـجـمـيـلْ

تَـسْــرِى نَـسَـائِـُم فَـِّنكَ
المِـعْـطَاءِ ألْـحَـانـًا
تُمَوْسِـقُ خُصْـلَةً حَيْرِى
عَـلى خَـدٍ أسـيل

فَتَظَـلْ أعْـيُـنُـنَا تُتَـابِـعُ
هـْفـهَـَفات الـشَـعْـِر
تَلْـثُـمُ وجْـَنةً قـدْ زَانَـها
طَـرفٌ كـحـيـلْ

وتَـسُـوقُ أنْـغَـامـًا تَـهُـزُ
دَوَاخِـلَ الإحْـسَـاسِ
تَـأسِـرُ وعـيَنا بِـمَفاتنٍ
تَحْـكِى جَمالَ الـريـلْ

فَـتَـظلُ تَـرقُـصُ كُلَّ
خَـلِـيةٍ فِـيـنا
والعَـيْـنُ تَسْـرِقُ
نَـظْرَةً تَـهْـَوى
الـقَـوَام السـْمهَـرىَّ
وفِـتْنَةَ الـخِـصرِ الـنْـحِيـلِ

ولَـعِـقْـتُ جُـرحَكَ ياوطـنْ

نَـاديْـتُ ذَاكِـَرتِـي
بِـكُلِّ الـودِ
أسْــمَـعُ أُغْـنِـيـاتِ الـشَـوْق
نُــورَ العـيـنِ
قَـطْـرَاتَ الـنَّـدى
والـمُـْسـتَـحِـيـلْ

ونَـشـرتُ أشْـرِعَـتي
عَـلى سُـفُـنِ الـَرجَـاءِ
المُـسْـتَـدامِ جَـواريًا
يَـسـرِى بِها نَسْـمٌ عَـلِـيلْ

فَـمَـخـْرتُ أبـحُـرَ
نَـشْـوَتـي طَـرِباً
ونَـصَـبْـتُ ألـوِيَـتـي
عـلـَى صَـدرِ الـسَـحَـابِ
الـمُـشْـَرئـبِ إلـى الـسـماءِِ
بِـلا دَلـيـلْ

وبَـعَـثـتُ أنْـفَـاسـي
بـجُـنـحِ الـلـيلِ
تـسـبِرُ غـورَ آمــالٍ
تَـقـوُد إلـى
تُـخُـومِ الـفُـلـكِ
والمَسْـرَى الـطَـويـلْ

ولَـعِـقْـتُ جُـرحَكَ يا وطـن

البروفيسور المُبجّل عبد الرحمن إبراهيم يرثي فقيدنا وردي بِلُغةٍ آسِرة!

ولـك مـودتـى وإعـزازى

الشبلي

مع الحمام وبس


لا مع البقنية




مرتضى - مستحلب الاحاسيس والمشاعر

يطول عمرك يا بروف امانة تاني ما لصقت في زولك

صديق لي كان يبكي لا شعورياً حينما يغني وردي هذه الأغنية ويأتي لمقطع:
"زي كلمات بتتأوّه..تتوه لمن يجي الميعاد"
وبعد أن يمسح دموعه –وهو منتشي- يقول لي عليك الله ركّز في حتة "الكلمات البتتأوه دي"
.. " ركّز على المقطع... غمّد عيونك ...ومارس شوية يوجا...
وبعد داك شوف نفسك وصلت وين مع الالتزام بمبدأ:
Expectation is better than realization

تسلم مرتضى...

مــولانـا شــيـقـوق

سـلام ورمـضـان كـريـم

وزى مـابـتـقـول أخـتنا الأسـتـاذة دينا

أمـنـع الـفـوضـى، يـاخ

Quote: مرتضى - مستحلب الاحاسيس والمشاعر يطول عمرك يا بروف امانة تاني ما لصقت في زولك

أنـا قـلـت مُـسـْتـحْـلـِبْ

ومـا قـلـت حـلاب

وشــتان مـابيـن الأثـنـيـن

أبـقـى عـافـيـة

وود حـامـد الله يـديـه الـفـى مـراده!

بناديها

وبعْزِم كُلّ زول يرتاح

على ضحكَة عيون فيهَا

وأحْلم اني في أكوان

بتْرحَل من مراسيها

مأزق صعب وورطة وخطيرة يواجهها شعراء أغنية ما بعد الدوش ..
كرم أعلى مما روي عن حاتم يا عماد، تعزم الجنس البشري يرتاح
على ضحكة عيون من يناديها ويحلم بها الدوش ويرسل
الأخيلة فيخرج من كونه المعروف عند أهل الفلك والفيزياء
التطبيقية و النظرية ليشاهد الأكوان تغادر مرافئها..
بالله يا شبلي مش كلام يطلِّع الزول من رغوة الكون زاتا !!

الله قادر..

آه يا المرتضى؛ والله إنني احبك في الله؛ حباً ما بعده حب؛ وأنت تكفكف احزاننا بطرف اكمام كلماتك الساحرة.

لقد صرت يا صاحبي الكبير؛ صرتَ بفضل ذلك متكئا وارفا؛ نحج اليه بعد ان نخلع خيباتنا واحزاننا بالوصيد؛ ولعلك تدري ما حاق بنا من يتم بعد رحيل من أحببناهم مثلك عنا تاركين ارواحنا تبحث عن ارواحهم فلا تجدها إلا في هذه الذكريات الرائعة!

كنتُ من اكثر الناس حظوظا من بين اهلي واترابي؛ إذ رماني القدر الرائع الجميل في محيط وكوكب هذا الانسان الخالد وردي؛ الذي لم يمت فينا ولن يموت! ولطوال اكثر من ثلاث عقود؛ كنت قريبا منه لا يفوت اسبوع الا وقد تجاذبنا اطراف الحديث بلغتنا الام النوبية ووقفنا على السياسة والاقتصاد والشعر والغناء وآخر الكتب التي يقرأها. كان وردي نهما في شيء واحد وهو متعة القراءة. ما مررت عليه يوما طيلة هذه العقود؛ إلا ووجدته منكبا على كتاب وكأنه يقرأ القرأن ويحفظه في خلوة. وهو اول من هرب لنا الكجكوعة الشعرية لمظفر النواب من سوريا وقد سرقت منه الكتاب واعدته له وكنت قاضيا للجنايات باحدى محاكم مدني وكان يزورنا كثيرا بميز القضاة بمدني ويقيم بيننا بالاسابيع الطويلة.

لقد جلست هذا الصباح الرمضاني وانا استمع للرائعة بناديها وتذكرت زواجي الذي تم بمنزله العامر بالقاهرة حدائق المعادي وتذكرتُ ابوته معي وهو يقيم لي حفلا بمنزله ويدعو اصدقاءه المقربين ويغني الاناشيد في عرسي ويقف على الناس وتحث النساء على الزغاريد وينتهرني قدام عروستي ويريني كيف ارقص معها ويعرفها بي ساخرا بان هذا العريس لم ير في حياته سوى الحمير وانني قروي ....الخ...

تذكرت كل ذلك وحبست دمعتين كادتا ان تسيلا عني بعد ان قررت بان محمد وردي لم يمت. لم يمت فيّ الى الأبد. وكل ذلك موثق ومرسوم على لوح القدر الذي بدات به حديثي هذا؛ أن أكرمني الله بمعرفة هذا الانسان النادر صفحة صفحة وسطرا سطرا ونفطة نقطة وذرة ذرة...

تتنزل عليه شآبيب الرحمة ولك ايها المرتضى نور السالكين في محبة المحبة والغاوين للجمال والمشاعر النبيلة.

كل الحروف لاتوصف مقدار دهشتى بجمال هذا البوست...وردى.محمد المرتضى حامد ..عمران..ديل الناس القيافة..وممكن أضيف السادة الضيوف..تقديرى وإحترامى للجميع.

Quote: كان محمد وردى اسطورة بحق

دندون..

كنت تلميذا عندما سمعت في ونسة بعض كبار الأسرة أن وردي سيدرس بمعهد الموسيقى
أو شيئا من هذا القبيل ، ولا أخفيك أني استغربت كثيرا لأني كنت أعتقد عن جهل أن
هذا الفنان الذي ملأ النفوس طربا لم يدرس موسيقى مستندا على فرضيه أن كل مغن
قد درس الموسيقى..*
الأسطورة التي وصفته بها تتأتى وتتأكد حين نعرف أنه لم يدرس الموسيقى ورغم
ذلك أسكر كل فئات المجتمع العمرية ودوائره الجغرافية وتخطى الحدود التي
رسمتها بريطانيا وفرنسا في أفريقيا ، فأصبح فن وردي يعمل في دائرة إشعاع
إفريقية آسيوية حتى اليمن وشرق المتوسط والخليج.

أسطورة ..



-
*
شوفي برضو زول عالمي أسطوري ك YANNI لم يدرس الموسيقى..

القصه دي في القلب وما عندها علاقة بالنوته..

Quote: ريحتني باخد النفس و رفع الكتفين ديل ياخ

تلك الحركة كانت إنذارا مبكرا لما سيأتي بعدها ولم أرها في
مطرب سوى وردي، كأنو بيقول لينا ما تخافوا ، في الرئات
ما يكفي لإمتاعكم وفي الخاطر والحناجر ما يروي ظمأ المشتاقين
للطرب..

يا سفيان يا صديق وردي حاجاتو كلها براها..
والله رفع الأكتاف للتزود بالوقود كانت دائما تذكرني
بإنطلاقة محركات ال 747 جامبو جيت في أقصى حمولتها على
المدرج لترتقي بالمسافرين والطاقم والعفش وحزن الفراق
وترقب الأحباب عند الوصول لارتفاع 34000 قدم فوق سطح الشجن.

وردي رحلة جميلة ومستمره في خواطرنا وذواكرنا يا ودود.

بناديها
وبعْزِم كُلّ زول يرتاح
على ضحكَة عيون فيهَا
وأحْلم اني في أكوان
بتْرحَل من مراسيها
عصافير
نبّتَت جِنْحات
وطارت
للغيوم بيهَا
مسافرِ من فرح لس شوق
ونازِل
في حنان ليهاَ
أغنّي مع مراكب جات
وراها بلاد حتمْشيهَا
واحزَن لي سُفُن جايات
وما بْتلقَى البِلاقيه
بنادِيــــــهَا
ولمّا تغيب عن الميعاد
بفتِّش ليهَا في التاريخ
واسأل عنَّها الاجداد
واسأل عنّها المستقبل
اللسّع سنينو بُعاد
بفتِّش ليها في اللوحات
مَحَل الخاطر الما عاد
في شهقَة لون وتكيَة خط
وفي أحزان عيون الناس
وفي الضُّل الوقَف ما زاد
بناديــــــهَـا
والاقيـــــهَــا
واحِس بالُلقيا زي أحلام
حتصْدِق يوم
والاقيــــــهَــا
واحْلًم في ليالي الصيف
بَسَاهر الليل
واحجِّيـــهَــا
ادوبي ليهَا ماضيهَا
واطنْبِر ليها جاييــهَا
وارسِّل ليها غنوَة شوق
واقيف مرات واْلُوليهَا
بنادِيـــــــــهَــا
وبناديــــــــهــا
وبناديـــــهــا

تحياتى
غايتو فى انتظارك يابديع وانت فى قمة الشهيق كده !!!
على قيفة (ولم تغيب عن الميعاد)!!!
وماتنسانا فى الغوص يمكن نلقانا تحت!!!
(ما براى ) كتيرين بيفتشوا الزمن داك......
زمن الناس بتسمع ,,وتشوف ,,,وردى وكمان تحس فى آن واحد!!!
بستناك معاها ...على حسب نداء وردى (استنينى) !!!على شفا ...ولم تغيب عن الميعاد
kofi

Quote: رايح انــا وما لاقي التكتح الأقولو غير أسمع بناديها للمرة المليون وللمرة الأولى دائماً .

واحزَن لي سُفُن جايات
وما بْتلقَى البِلاقيها

عشان كدا محمود درويش - له الجنة - قال أخاف من المطارات التي يودعني فيها
أحد وتلك التي لايستقبلني فيها أحد..
سفن تبعث على الأسى تمخر المحيط بدفة اليتم وبوصلات الضياع..
دي يا عمران انا بعرفا وحاسيها كويس لكن :

في شهقَة لون وتكيَة خط
وفي أحزان عيون الناس
وفي الضُّل الوقَف ما زاد

اللون لما يشهق بيحتاج لزول بصره وبصيرته بمستوى الدوش عشان يستوعبو..
قلت ليك الدوش في الغنيه مَحَّن من أتى بعده ..
صعب جد ..
بعده ضل الشعر وقف ما زاد..

Quote: الفن هو القاسم المشترك الأعظم الذى سنظل نتشبث به أبدا ما حيينا

صدقت يا المنصور،
كما أن البسمة لغة مفهومة لكل ذرية آدم كذا الفن،
عندما كنا في غرب السودان كنت أستمع أحيانا لإذاعة تشاد من أنجمينا حيث كان إرسالها
يصل دارفور وكردفان بوضوح ، كان برنامج ما يطلبه المستمعون من أهم البرامج اليومية
في الإذاعة ولايخلو من أغنية للبلابل وحمد الريح ( ما قوقن جنياتو) وعبدالرحمن عبدالله
وغيرهم إلا أن الرقم الثابت كانوردي وقلبي الحابيكا ما خان لياليكا..
ذات الأمر ينطبق على الأرض الأثيوبية فلا تخلو قاعة موسيقى (ما عايز اقول مرقص) من الرقيبه
قزازة أسير والأويون متل الفناجيل إنتي ريهتك ريهت الفرير ولا بت السودان أسيل يا قمر بوبا
أليك تاقيل.. ولابد أن تزين صورة وردي محال بيع السيديهات والكاسيت ولعل حفله الأبرز في
أديس في الإستاد شاهد على مكانة وردي في قلوب أهلنا الإثيوبيين وبمستوى لايقل عن محمود أحمد
وتلهون قسسا أو الراحلة بيزونيش بيكيلي.
وردي كالبسمه يا المنصور ، لغة يطرب لها ويعرفها الجميع عبر الحدود وفي كل الإتجاهات..

Quote: ولعل حفله الأبرز في أديس في الإستاد شاهد على مكانة وردي في قلوب أهلنا الإثيوبيين وبمستوى لايقل عن محمود أحمد

حضور .. وصمت دامع .

عمرعلي حسن

Quote: أخ أنا ميت ومن قبري بشابي

أبوالزهراء يا حبيب الشعب،
لعلك من عناه التجاني سعيد القيافه بقوله (أبدِّل ريد بعد ريد)..
هسه جاي تقول ترحل؟
عارف يا زهير ، إنت بالذات أغنيات وردي فيها ليك ألف علاج،
الكمده بالرمده لأنو الميزه في أغنيات وردي إنها بتتوفر فيها أنواع متعددة من فايتمينات
الروح وعناصر تعيد العافية للجسم المنحول والروح الطاشه ..
كلمات السهل الممتد الممتنع وموسيقى تجبر العظم والخاطر المكسور..
أغاني وردي طبيعية وينصح بها الأطباء وهي مجازة من ال U.S FDA وممكن تاخدا over counter

ما تتأخر يا زهير..

Quote: وجعـتـنا فى وردى كبيرة ولكن كما قـلـت لأخـتـنا وأديبتـنا سـلـمى بت الشـيـخ سـلامة فى مكان آخـر أن العزاء فيما ترك لنا مـن إرث ثرى جميل

البروف عبدالرحمن إبراهيم،

كثير من المبدعين تنحصر علاقتنا بهم في جزئية إبداعهم وفقا لطبيعته ولاتتعدى ذلك،
فتفاعل إنسان بسيط مثلي مع لوحة ينتهي بجمال اللوحة وربما الشاعر والملحن كذلك،
لكن المطربين يتعاملوا معنا بأبعاد رباعية ، لاينتهي عملهم ( والذي كثيرا ما يتضمن إبداعات
غيرهم من شعراء وملحنين) في حدود ما يقدموه، فهم - ودونما نشعر - يتخللوا أجسامنا
خلية خلية سيما إذا جاءوا في مرحلة تكويننا الوجداني.. وردي زاد على ذلك بأنه (تسبب) في
حالة تسمى الحالة الوردية لعدة أجيال ، فعندما بدأ الغناء لم نكن أتينا للحياة ولكنني
ورثت (الحالة) من الوالد - أمد الله في عمره - لذا تداخل الإبداع بالغريزة والإنحياز
غير المنطقي للأشياء الذي نجد له المبرر في دعاء اللهم لاتلمنا فيما تملك..

وردي كان الناطق الرسمي لعدة أجيال ، عبر عنا في عدد لايستهان به من المشاعر سواء
المتصلة بالحب أو الهزيمة أو النصر اسياسي حتى لو كان مؤقتا لذا تختلط أكتوبرياته
عندي بجميلة ومستحيلة والمستحيل ، غناء تتماهى فيه الأشياء وتتمهل فيه الحواس ،
يتعالى فيه مد أرستقراطية الموسيقى المجيَّهة مختلطا بانفعالات الصحارى والسافناالفقيرة
ببساطة طبولها وفرحة أهلها التي لاتصحبها شروط..

برضي ليك المولى الموالي..

يااااااااااااه


بوست عمل لي اشعه مقطعيه للمشاعر

يا مورتا و انا ها هنا قاعدون تحت تأثير انستيجيا التمدد و التوسد علي الشوق

كما وصفها سيدي ود حد الزين

وذهب بها مولاي وردي

بتمدد وبتوسد وسادة شوق
وبنوم مرتاح وخالي البال

واقالب تاني عهد صباي
عشان ما تبكي
ببكي أنا
واحاكي الطرفة
في نص الخريف بكاي

حمولي تهد جبال الشيل

وفايت في العتامِ الليل

ومتوكل عليك يا الله دافر الليل

والله الليل دا زول كويس شديد ياخ يا مورتا

وردي شنو البيموت ياخ

انت الله ما ليك؟

Quote: Quote: ريحتني باخد النفس و رفع الكتفين ديل ياخ تلك الحركة كانت إنذارا مبكرا لما سيأتي بعدها ولم أرها في مطرب سوى وردي، كأنو بيقول لينا ما تخافوا ، في الرئات ما يكفي لإمتاعكم وفي الخاطر والحناجر ما يروي ظمأ المشتاقين للطرب.. يا سفيان يا صديق وردي حاجاتو كلها براها.. والله رفع الأكتاف للتزود بالوقود كانت دائما تذكرني بإنطلاقة محركات ال 747 جامبو جيت في أقصى حمولتها على المدرج لترتقي بالمسافرين والطاقم والعفش وحزن الفراق وترقب الأحباب عند الوصول لارتفاع 34000 قدم فوق سطح الشجن. وردي رحلة جميلة ومستمره في خواطرنا وذواكرنا يا ودود.

Quote: صديق لي كان يبكي لا شعورياً حينما يغني وردي هذه الأغنية ويأتي لمقطع: "زي كلمات بتتأوّه..تتوه لمن يجي الميعاد" وبعد أن يمسح دموعه –وهو منتشي- يقول لي عليك الله ركّز في حتة "الكلمات البتتأوه دي" .. " ركّز على المقطع... غمّد عيونك ...ومارس شوية يوجا... وبعد داك شوف نفسك وصلت وين مع الالتزام بمبدأ: Expectation is better than realization

وزي ما قال أحدهم يا الزاكي الأديب، إن الخيال أروع من الواقع لأنه يذهب بك
حتى السدم البعيدة أما الواقع فهو لايتعدى بك باب حجرتك ..
يعني الواقع رديف الإعاقة..

مسألة بكاء صاحبك عند النشوة الشاهقة دي مرت بي قريب عندما أتحفنا عزيزنا عادل نجيلة
بالطير المهاجر في تسجيل عندو قصه غريبه يا زاكي، قبل ثلاثة سنوات تقريبا زارني صديق
في منزلي بكندا وقال لي تعال بره أسمعك حاجه وبالفعل أسمعني في سيارته مقدمة تلك الأغنية
بتسجيل كالفورنيا الذي كان محظورا خروجه للقلوب لأن ثمة خلاف بين وردي وصاحب المشروع
– كما قيل – وطبعا صاحبي كان عارف إنو أغنية الطير المهاجر من أبرز نقاط ضعفي وإنو
على بال ما وردي يقول (غريب وحيد) أنا بكون بقيت إكتوبلازم لا أكثر عشان كدا لا أستمع
لها بالنهار أو أنا واقف على حيلي، فأسمعني صديقي جزءا من المقدمة من ذلك التسجيل
الإلهي ورفض نسخ السي دي وحسنا فعل .. المهم يا باهي لامن عرفت من أول نانو ثانيه إنو
الجابو نجيله دا زاتو التسجيل المعني طوالي وقفت الأغنية ومشيت جبت مويه وطفيت النور
ووضعت سماعات الراس المخلوق للأسى والبهدله عساه ينعدل وهاك يا ..
إنت قايل تاني نمت؟

بتبالغ يا الزاكي وصاحبك زاتو..
وردي يا الزاكي قابضنا من الشريان التاجي وانت طالع ، هو ظرف الزمان والمكان ،
الإستماع إليه يحرض على الحب حتى لو لم يكن هناك حبيب في الدنيا النارا حراقه دي ،
إن شاء الله بس عشان حتة التوقع القلتها فوق دي، يعني تحب باعتبار ما سيكون..
يا الزاكي إنت واعي وعارف ما أعنيه بكلمة الحب ..

شئ طبيعي إلهي..

.


.

يا مولانا زمراوي،
إنت الله راضي عليك وأمك داعيا ليك،،

الزول القيافه اللي غنا ليك في عرسك دا كا ن - لاقدر الله - جاتك زعله ساي من المدام
غنا وردي في المناسبه العظيمة دي بيمتص الزعله..

الزول الغنا ليك يا عبدالإله وأشجى ضيفك يبكينا شجنا بهذه الأغنية المرفقة والتي لاتجارى
على الإطلاق في كل جوانبها ..

لم أستمع لتسجيل بهذا المستوى لأي فنان سوداني..
يا مولانا .. عملا بوصيته ووصية صلاح أحمد إبراهيم لما يتعب مننا الجناح في السرعة
لانجارى ..

هذه هي حياتنا حتى سيد (الوداعه) ياخد وديعته..

لك الحب المصفى يا عزيزنا..

وتمشي معايا وسط روحي ..

يا إسماعيل عباس الزول دا متخصص في انتقاء قصائد أقل ما توصف به
أنها ولدت وردية كحنجرته..

بلا انحياز أقول ليك لم تعجبني رائعة الحقيبة (قسما بمحياك البدري) إلا
عند وردي لأنو أي حاجه ممكن تتعمل فيها عملها..


صحيح يا جروحي لاتبري ..

شكرا على كلامك السمح يا اسمعاعيل ونسأل المولى نكون كما تقول....

Quote: عصافير نبّتَت جِنْحات وطارت للغيوم بيهَا مسافرِ من فرح لي شوق ونازِل في حنان ليهاَ

ودالقرشي سألتك بالله راجع الكلام دا وشوف فنون الطيران والهبوط في مدرج الحنان..
قت ليك الدوش ورَّط شعراء الأغنية ورطة عظيمة..
منذ (خلي العيش حرام) لم يمر الناس بمثل هذه الصور ..
زي ما قال عمران ممكن تسمع بناديها كل مرة بقراءة جديدة..
الله يرحمم العظما الرسموا أجمل صور ومثلوا أعظم دور .. ..

Quote: غايتو فى انتظارك يابديع وانت فى قمة الشهيق كده !!! على قيفة (ولم تغيب عن الميعاد)!!! وماتنسانا فى الغوص يمكن نلقانا تحت!!! (ما براى ) كتيرين بيفتشوا الزمن داك...... زمن الناس بتسمع ,,وتشوف ,,,وردى وكمان تحس فى آن واحد!!! بستناك معاها ...على حسب نداء وردى (استنينى) !!!على شفا ...ولم تغيب عن الميعاد kofi

والله يا أحمد كلامك عن ( زمن الناس بتسمع وتحس ) كلام مخيف، نعم مخيف ، كنت أعتقد
أن ملاحظة المسألة حالة فردية ، لكن يبدو أنها إحساس نفر غير قليل وأن ذلك ربما
يعزى إلى نضوب غدد الإبداع في كل الذين أتوا من بعد ناس وردي إلا من رحم ربي..

غنا جيل وردي زي البنيه التحتية العملوها الإنجليز ، لسا عايشين عليها، ومن
جانبي أنا يا الخليل قفلت إضنيني من أي شئ أنتج في الزمن الأعرج عدا صوتين
أو ثلاثة لأنو المضاهاة نتائجها محزنة ، وبصراحة لا أدري كيف نتخلص من عادتنا السيئة
المؤسسة على إغلاق الأبواب في وجه أي طارق ينتمي لزمن الغفلة..

ياخ الناس كان غناهم بينطبخ على جمر وقصايدم جايه من ناس موهوبين ،
هسه في طالب ثانوي ممكن يقول (أصلو العمر كان دربا مشيتو كسيح كان غرسا
سقيتو بكا وقبضت الريح..)
في يا أحمد؟
في غنيه من غناوي الزمن دا عاشت 52 يوم دعك عن 52 سنه وبذات الوهجوالألق؟

شفت الفرق بين الماس والقزاز !!

Quote: حضور .. وصمت دامع . عمرعلي حسن

يا سعادتك ،

عندما توفاه الله ، وكان زيدان سبقه بفترة وجيزة إلى حيث السمحين ، قلت لنفسي أن
تستصحب الإرث الفني الكان رابطني بيهو كمستمع ومستمتع وأن أتناسى مسألة وجوده
الجسدي الذي لم يكن الأساس في جواي وهذا ينطبق على كثير ممن أنسنونا ، ولا أخفيك
أني وجدت في ذلك مخرجا رحيما وكريما لنفسي من مغارة الحزن الملحد لكن إلى حين ..

مرات من شدة أنانيتنا بنكون عايزين الزول البيبهج أيامنا قاعد طوالي فوق
الأرض وتحت الطلب رهن إشارة مشاعرنا حتى إن كان في رحيله راحة لروح وجسد أنهكهما
طول السفر..

له الجنة..

Quote: إن شاء الله بس عشان حتة التوقع القلتها فوق دي، يعني تحب باعتبار ما سيكون.. يا الزاكي إنت واعي وعارف ما أعنيه بكلمة الحب ..

يا صديقي..
لو ما الحب باعتبار ما سيكون ما كنّا رحنا فيها واتلاشينا زمان..
واحد صاحبنا سمّاه الحب الذي يولده ترويض القلق..
والقلق يا مرتضى ما ممكن تروضه لو ما اتفك الارتباط بين الواقع والإعاقة..
عجبتني عبارتك "الواقع رديف الإعاقة"...
ياخي سافرت بي بعيد شديد ..
ياسيدي كلام زي دا هو الزاد الحقيقي لرحلة الابحار في عوالم وردي الوردية..
شكراً مرتضى وواصل الله يديك العافية..

Quote: مرات من شدة أنانيتنا بنكون عايزين الزول البيبهج أيامنا قاعد طوالي فوق الأرض وتحت الطلب رهن إشارة مشاعرنا حتى إن كان في رحيله راحة لروح وجسد أنهكهما طول السفر..

ياخي راعي لينا وانت بتنزف كلام زي ده




............................................................................
ده كلام لازم كان لونو يكون أخدر
لون التصوف وأهل التصوف يا الزاكي
..
دربكـ أخدر ياخي

Quote: حمولي تهد جبال الشيل وفايت في العتامِير الليل ومتوكل عليك يا الله دافر الليل والله الليل دا زول كويس شديد ياخ يا مورتا

كون بحالو يا إبراهيم،
الليل هو الأصل وهو الشمول ودا ما كلامي دي حقيقة الكون والفضاء اللانهائي،
الليل يا ودعدلان بيخليك في مواجهة صريحة مع روحك وإنت عارف لامن أقول ليك روحك
فأنا أعني كل ما يمكن أن تقول له (يار روحي) ، وعلى الرغم من بعض
المصاعب التي تتسبب فيها تلك المواجهة لكن ما فيه من سكينة ويقين وصلاة مستجابة
تجعل من تلك المصاعب مجرد هامش على دفتر الجمال .. بس كمان ود حد الزين في سفر
العتامير و( دافر الليل)
دي قدم صورة أعشقها حد العشق زاتو،
نحن خلقنا للسُرى والقوافل، وحُداة كوردي يطربوك حتى يخال إليك أنك تعرج إلى السماء،

...

إهــــــــــــــــــــــداء لمحبي الامبراطور

Quote: لؤي إنت وين ؟ .............................................................................. رايح انــا وما لاقي التكتح الأقولو غير أسمع بناديها للمرة المليون وللمرة الأولى دائماً

أنا ذاتـي ما عارف أنا ويـن يا عـمران يا صديقـي

وعُذراً أُستاذنا ودّ الـمرتضـى
لك التّـحيّة ولعـمران وزوّار البوست العـمران







مودّتـي