Post: #1 Title: الموجز (آخر زمن !!) Author: محمد المرتضى حامد Date: 06-09-2013, 11:53 AM Parent: #0
-
-
Post: #2 Title: Re: الموجز (آخر زمن !!) Author: محمد المرتضى حامد Date: 06-09-2013, 11:55 AM Parent: #1
آخر زمن ..!! يا دنيا آآآآآهـ .. آخر زمن .. مين كان بصدق لو زمان ـ حكو ليهو بالمحن البقن ؟؟!! كل الخلوق اتغيرت .. كل الحقايق .. كل شي .. ما باقي غير داك السما و هادي الأرض ـ مَدَّ المدى الـ ما اتغيرن .. كبرت مدن ـ وكأنما كانت بيوت ـ مخفية في بطن الأرِضْ نشرت نشور .. بين يوم وليلة و سيل نفوس ماجت تجوس جواها في صورة بشر .. وهي ما بشرْ !!! آخر زمن .. يا دنيا آآآه ؟؟ آخر زمن ... مين كان بصدق لو زمان شاف شَمْسْ تطلع شان تغيب بس !! وانتهى اليوم والسلام .. وين الضحى ؟ وين العصير ؟ وين المغيرب و قُبَّة الليل والْحُجا .. ؟ كيف دنيا كاملة بتختفي وتجي دنيا غير ؟ وين الحلم ..؟ طلعت شَمِسْ .. غابت شمَسْ..راح العمير .. زيَّ الهوا الشايلو الهوا ..! زي حَلْمة كانت في منام !! كيف اختلف طَعَمَ الطَعَمْ ؟ كيف اختلف حتى الكلام ؟ !! بقى من زَبَد .. مهما كِتِرْ .. ما فيهو خير !! ما فيهو حبَّة من الصِدِقْ .. مع اِنو ما بين القَلِبْ واَصْل اللسان يا دوووب ـ أقلَّ من الشِبِر أو قول شبير !! لكن بتوحل فيهو خيل .. رايات ملوك .. أقدار رجال .. حتى اللِّحى .. حتى الكُبار .... وكأنه ما في رقاد شبر .. و كأنه ما في سؤال نكير ..!! حتى الجمال ! الكان محال .. غرَّز معاهم في الوحل .. راح الغنا وراح الشعر .. آخر زمن يا دنيا يا آخر زمن .. مِحَنَكْ تهد حيل الخيال .. و مروة الروح والبدن زي الكأنو بدون وعود وبدون رعود .. وبدون برِقْ ـ صبَّتْ علي كل الأرِضْ مطرة فِتَنْ .. دخلت على كل البلود ..كل البيوت .. و الدم رخص .. يا دنيا يااا.. آخر زمن .. يا دنيا هل دنية زمان ..كانت وهم ..؟؟ أم حلمة كانت في منام .. ؟؟!! آخر زمن .. يا الله بس حسن الختام .. !!
Post: #3 Title: Re: الموجز (آخر زمن !!) Author: د.محمد حسن Date: 06-09-2013, 02:28 PM Parent: #2
Post: #8 Title: Re: الموجز (آخر زمن !!) Author: Mahmoud Mustafa Mahmoud Date: 06-09-2013, 06:18 PM Parent: #7
Quote: شئ عجيب ..
عجيب حاف كدا يا مولانا؟؟
مالها عجيب (خالص)
أو عجيب (جداً)
أو بالعدم : عجيب (مرررررة واحدة)..
تحياتي وأنت تحمل إلينا أزهار الكتيابي وتأملاته العميقة..
بل تحياتي وأشواقي لكما..
..
.
Post: #23 Title: Re: الموجز (آخر زمن !!) Author: محمد المرتضى حامد Date: 06-10-2013, 02:40 PM Parent: #8
Quote: Quote:
Quote: شئ عجيب ..
عجيب حاف كدا يا مولانا؟؟
مالها عجيب (خالص)
أو عجيب (جداً)
أو بالعدم : عجيب (مرررررة واحدة)..
أو بالعدم ، عجيب زي العجيب !!
مين كان بصدق لو زمان شاف شَمْسْ تطلع شان تغيب بس !! وانتهى اليوم والسلام ..
Post: #9 Title: Re: الموجز (آخر زمن !!) Author: خالد علي محجوب المنسي Date: 06-09-2013, 06:23 PM Parent: #7
Quote: طلعت شَمِسْ .. غابت شمَسْ..راح العمير .. زيَّ الهوا الشايلو الهوا ..! زي حَلْمة كانت في منام !! كيف اختلف طَعَمَ الطَعَمْ ؟ كيف اختلف حتى الكلام ؟ !!
اخي مرتضى هذا الرجل جامع للكلم وحتى في ونسته الكتيابي سنحت لي فرصة أن اجلس معه لفترات طويلة وعرفته عن قرب تصدق اخر شئ يمكن أن نصف انه مبدع فيه الشعر ونقول ما شاء الله .... الكتيابي حافظ لكتاب لله الكتيابي مرجع لغوي في الفصحى الكتيابي لو حدثك عن ربط العلون وإتخذ القرآن مرجعا أدهشك الكتيابي لو تأملت زهده في الدنيا وقناعته كرهت القروش ويوم القروش التي صارت ترفع من مقام له وتدني صاحب الشأن والمكانة ... الكتيابي لو حدثك عن التوحيد مسح كل ما كان مشوش في عقلك بطريقة بسيطة الكتيابي كما قال الأخ عبيد الطيب ود المقدم ( هو بحتري هذا الزمان ) وكما قال الأخ إبراهيم فضل الله ( لو ماقل الكتيابي غير قصدة لمحتك لكفته أن يكون شاعرا ) الكتيابي ظريف والندرة والنكتا في فمه يجلل ضاحكا قبل أن يلقيها لك الكتيابي مع الصغير صغير ومع الكبير فهو ذاك الهرم وقد لا استطع وصفه لكن أجمل شئ إن تمتعت بصحبته في الفترة الأخيرة وأحمد الله على ذلك واحسبها واحدة من فوائد وجودي في الأمارات
لي عودة
Post: #10 Title: Re: الموجز (آخر زمن !!) Author: خالد علي محجوب المنسي Date: 06-09-2013, 06:26 PM Parent: #9
استمهـــــلك
أرجوك أقيف أتأملك أنا زي بعرفك من زمن كان فيه شكل الناس حمام ياكنا طيفين في منام يا كنا في أحضان ملك في زفة الريش والرفيف وين كنا وين أمهلنى أتذكر شذاك بطلع شذاك من روحي كيف زي كنا فصين في صدف واحد مشى و واحد وقف أرجوك أقيف أتأملك أنا حاسي شي جاذبني ليك منك عليك شي زي مدار آسر فلك وانا زي فراش النار أطوف حولك أفتش عن أنا أعصر ندى الألوان عليك بين انكسارات السنا وأتأملك .. ما أجملك
صاحبنا وصديق الانجمامة ابو بكر سيد احمد السنجك الايام دى معاكم هناك
جاييكم يا أمحمد
Post: #12 Title: Re: الموجز (آخر زمن !!) Author: خالد علي محجوب المنسي Date: 06-09-2013, 07:15 PM Parent: #10
ما أشبه اليوم بي أمس نفس الدواير والرموز نفس الحــــزن ... نفس الـــــــزبد ... نفس الدخان .. نفس الكلام المنحبس واقفين مكان خليتنا في نفس المكان المسرح ... المسرح .. شخوص بتعيد شخوص . نفس البطل .. نفس الحصل .. نفس الفصول ... نفس الدرس .. كضب الجرايد والصور .. والعرضة في زفة جنايز بي دلاليك العـــرس .. صدق الشهيـــــد صدّق تفاصيل النشيد وأنا وأنت عارفين الفرق .. بين المفيد والمســــتفيد ما أشبه اليوم بي أمس.. واقفين مكان خليتنا .. فوق تلة غناك .. تلة غناك كِبر النفس شايلين غناك .. شفرة ونصال .. شايلين غناك شتل النضال المنغرس في عازة كانت في الفريق للضيف مجال وعازة ما سليت.. واقفين .. وواقف ما مشيت إتلالا يا عين الشمس ..
ولو ماقال الكتيابي غير هذا البيت لكفى عنه أنه بلغ وابلغ شعرا
وأنا وأنت عارفين الفرق .. بين المفيد والمســــتفيد ما أشبه اليوم بي أمس..
Post: #13 Title: Re: الموجز (آخر زمن !!) Author: خالد علي محجوب المنسي Date: 06-09-2013, 07:22 PM Parent: #12
آخر زمن ..!! يا دنيا آآآآآهـ .. آخر زمن .. مين كان بصدق لو زمان ـ حكو ليهو بالمحن البقن ؟؟!! كل الخلوق اتغيرت .. كل الحقايق .. كل شي .. ما باقي غير داك السما و هادي الأرض ـ مَدَّ المدى الـ ما اتغيرن .. كلام
Post: #14 Title: Re: الموجز (آخر زمن !!) Author: محمد المرتضى حامد Date: 06-09-2013, 09:17 PM Parent: #3
محمد حسن،
آخر زمن !!
عساك متماسك في غربتك..
Post: #15 Title: Re: الموجز (آخر زمن !!) Author: rosemen osman Date: 06-09-2013, 09:36 PM Parent: #14
سلامات محمد المرتضى عبد القادر الكتيابي زول سمح بالحيل ..ووقوفكم عنده دا لأنكم برضو سمحين هادا الزمن ممحوق وصعب وأهي الحاجات والتفاصيل دي ممكن تخليه محتمل شوية شكرا ليك وكل الناس الطيبة
Post: #16 Title: Re: الموجز (آخر زمن !!) Author: محمد المرتضى حامد Date: 06-09-2013, 11:40 PM Parent: #15
Quote:
مِحَنَكْ تهد حيل الخيال ..
كنت أسمع عن (أفق لم يحلق فيه شاعر) ففهمت ما كنت أسمع
Post: #17 Title: Re: الموجز (آخر زمن !!) Author: عبيد الطيب Date: 06-10-2013, 08:18 AM Parent: #2
Quote: حتى الجمال ! الكان محال .. غرَّز معاهم في الوحل .. راح الغنا وراح الشعر .. آخر زمن يا دنيا يا آخر زمن .. مِحَنَكْ تهد حيل الخيال .. و مروة الروح والبدن زي الكأنو بدون وعود وبدون رعود .. وبدون برِقْ ـ صبَّتْ علي كل الأرِضْ مطرة فِتَنْ .. دخلت على كل البلود ..كل البيوت .. و الدم رخص .. يا دنيا يااا.. آخر زمن .. يا دنيا هل دنية زمان ..كانت وهم ..؟؟ أم حلمة كانت في منام .. ؟؟!! آخر زمن .. يا الله بس حسن الختام .. !!
شكرا ليك كتير كتير علي سماحة النفس يا محمد المرتضي وجاد الإسم أظن الحنان المنّان اجاب دعوة حبوبتك او جدك حين حملت علقك وقالت :- "إنشاء الله شايل إسمو" شكرا لأمساكك بمسبحة الكتبابي يا سماحة المستشار أعجبني تعليق الأخت "روزمين" ان الدنيا بقت ممحوقة وما ها ممحوقة من القوت ولكن من القيم ومن ناس "سمحين النافلة" حتي البادية إتغيرت يا ناس.........! وكما اسلفت في بوست سابق الناس بقت حناياها ودواخلها "بُرق" الواحد يسالمك بي لون ويغادرك بي لون وكان قالدك وعانقك حضنو شوك شوك ..........!
الكتيّابي والراحل حميد عندهم تفاصيل صغيرة ما بتلقاها عن آخر ولا حتي "غارسيا" "ولا الكوني ولا واسيني الأعرج" ويوما ما سيعرف العالم هذين الشاعرين الرائعين محبتي ودمتم سمحين النافلة مهما تكالبت المحن
Post: #18 Title: Re: الموجز (آخر زمن !!) Author: جعفر محي الدين Date: 06-10-2013, 08:39 AM
يا سلام يا سعادة المستشار يسعد صباحك وصباح ضيوفك الملانين جمال ديل
Quote: كيف اختلف حتى الكلام ؟ !! بقى من زَبَد .. مهما كِتِرْ .. ما فيهو خير !! ما فيهو حبَّة من الصِدِقْ .. مع اِنو ما بين القَلِبْ واَصْل اللسان يا دوووب ـ أقلَّ من الشبِر أو قول شبير !! لكن بتوحل فيهو خيل .. رايات ملوك .. أقدار رجال .. حتى اللِّحى .. حتى الكُبار .... وكأنه ما في رقاد شبر .. و كأنه ما في سؤال نكير ..!!
شيء جوانا يرفض أن نستسلم لهذا الزمان وهو يسارع بنا الخطى قبل أن ننجز ما نتمنى لسه حاسس إني شباب زي أيام الجامعة وعايز أشارك في صنع تغيير في البلد ونرفض نحن نموت ... قولوا لهم راح نبقى
Post: #19 Title: Re: الموجز (آخر زمن !!) Author: محمد المرتضى حامد Date: 06-10-2013, 09:24 AM Parent: #18
Quote: والله كتبت نص صفحة معلقا على الابيات الحلوة دي لكن هبشت واحد من الازرار خطأ
وين الضحى ؟ وين العصير ؟ وين المغيرب و قُبَّة الليل والْحُجا .. ؟ كيف دنيا كاملة بتختفي وتجي دنيا غير ؟
شايف حبيبنا عبدالقادر دا صَعَّب علينا الأجوِبه كيف؟
Post: #20 Title: Re: الموجز (آخر زمن !!) Author: محمد المرتضى حامد Date: 06-10-2013, 11:22 AM Parent: #19
Quote: حتي الاجازة يا محمد المرتضي .. وكأنك ما مشيت ولا حاجة .. حتي الوطن !! حتي الوطن مافيش !!
من الأشياء المريرة يا المشرَّف أن تذهب إلى هناك محمَّلا بمخزون قديم ومعتَّق عن كل العام والتفاصيل ، ولكنك تفاجأ بأن ما جئت به لايوجد إلا في دواخلك وكل ما حولك يقول إن مافي الخاطر والدواخل expired وهنا يصبح الزهايمر أنجع دواء.
Post: #21 Title: Re: الموجز (آخر زمن !!) Author: محمد المرتضى حامد Date: 06-10-2013, 12:32 PM Parent: #20
Quote: عبر عن دواخلنا تماما
عبدالقادر لخَّص كل ما يدور في الخاطر ، قبل فترة يا أحمد كنت عايز ارجع لودالرضي وأكتب عن (الأهلية كملت) لكن كلام الكتيابي لقيتو أشمل..
كيف اختلف طَعَمَ الطَعَمْ ؟
قلت ليك أشمل..
Post: #22 Title: Re: الموجز (آخر زمن !!) Author: Osman Musa Date: 06-10-2013, 01:00 PM Parent: #20
عزيزنا محمد سلامات جد يا محمد مافي شاعر في الدنيا بخلي الحروف تقيف بب و تتمحن وتناهد وتندهش وتضج من الحاصل خلافو . وبخليها علي كيفو . وبي طريقتو الرسامة . الكتبابي يا محمد طيبتو وتفكيرو وشعرو من الحجم المعدوم بين العالمين . ربنا يديه لينا العافية ويطول عمرو
Post: #24 Title: Re: الموجز (آخر زمن !!) Author: محمد المرتضى حامد Date: 06-10-2013, 04:01 PM Parent: #22
Quote: الكتيابي كما قال الأخ عبيد الطيب ود المقدم ( هو بحتري هذا الزمان ) وكما قال الأخ إبراهيم فضل الله ( لو ماقل الكتيابي غير قصدة لمحتك لكفته أن يكون شاعرا )
عندما كنا أطفالا في مدرسة أمدرمان الأهلية الثانوية العامة الجمب بيت ازهري يا خالد، كان هناك برنامج مدرسي أسبوعي ثابت ننتظره بفارغ أي حاجه يشارك فيه التلاميذ وفقا لما حباهم المولى من مواهب، كان عبدالقادر يكتب الشعر ويلقيه، وكنت أعجب كثيرا بما كان يسمى ب (الشجاعة الأدبية) لعبدالقادر ، وكنت أحبه كثيرا لأنه كان - كما الآن - هادئا ومقنعا ومهذبا وأصيلا في ساحة المدرسة وفي بص (الشركة) جيئة وذهابا والتزاما.. كان لابد أن يصبح عبدالقادر اليوم الكتيابي.. عبدالقادر البيسأل الدنيا: يا دنيا هل دنية زمان ..كانت وهم ..؟؟
Quote: وين الضحى ؟ وين العصير ؟ وين المغيرب و قُبَّة الليل والْحُجا .. ؟ كيف دنيا كاملة بتختفي وتجي دنيا غير ؟
والله يا المرتضى عمتنا فاطنة بت شيقوق دى لو عايز تبكيها قول ليها بس الدنيا دي يا عمتي فاطنة ما فيها خير
هسه ويييييييييييييين اخوك الرضي ووييييييييييييييين اخوك البشير ووييييييييييييييييين اختك الزيتون
لو تميت ليها الرابعة بتسمع سكليها في السماء
ياخ وين دى مترعة بكمية حنان ما عادية
هسه انت ذاتك حاول تذكر الرحلوا من فانيتنا دي وقول بينك وبين نفسك
ويييييييييين المرحوم ود المصطفى المحامي ؟
وييين سيف برعي ؟
وويييييييين نادر خضر؟
ووييييين محمود عبد العزيز ؟
Post: #26 Title: Re: الموجز (آخر زمن !!) Author: خالد علي محجوب المنسي Date: 06-10-2013, 06:32 PM Parent: #25
مع اِنو ما بين القَلِبْ واَصْل اللسان يا دوووب أقلَّ من الشِبِر أو قول شبير !! لكن بتوحل فيهو خيل .. رايات ملوك .. أقدار رجال .. حتى اللِّحى .. حتى الكُبار .... وكأنه ما في رقاد شبر .. و كأنه ما في سؤال نكير ..!!
الحبيب محمد مرتضى تأمل هذا الربط لمفردات لتخرج تعبر عن كلام فاق حد الحكمة والحكمة واضحة في كل شعر الكتيابي إستنباط المفردة من الأصل وارد دوماً في شعره يا أخي دا زول عجيب ربنا يحفظه رغم العذابات العامة والخاصة التي يلاقيها ثابت على مبدأ خطه لنفسه سوداني شريف ولم يلتطخ صوته ونفسه أبدا عبر كل الأزمنة المسافة قريبة بين اللسان والقلب لكن طريق وعر وحل ضباب خريف زلقيب محفوف بالمخاطر والسمين بقع والضعيف بقيف هييييييييييييع يا كتيابي لله درك
Post: #27 Title: Re: الموجز (آخر زمن !!) Author: محمد المرتضى حامد Date: 06-10-2013, 09:40 PM Parent: #26
Quote: عبد القادر الكتيابي زول سمح بالحيل ..ووقوفكم عنده دا لأنكم برضو سمحين هادا الزمن ممحوق وصعب وأهي الحاجات والتفاصيل دي ممكن تخليه محتمل شوية شكرا ليك وكل الناس الطيبة
روزمين العزيزة في الشعر والأدب عموما تعجبني الصور الهجين والصور غير المالوفة ك (بادرة العِطاس) والعبارات التي تتزلج بين العيون والقلب ، في كلام يا بت عثمان ، عند مطالعته، تحس أنك خارج جسدك ، إي والله ، كل ما يبقى كرابط بينك وجسدك المادي مجرد حبل كوكبي astral cord لاغير ، وتشوف الأشياء بشكل جلي لفرط إعجابك بمن تقمص خاطرك وأفصح نيابة عنك بارتياح وأنت تقرأ وتهز الرأس إستحسانا كأنك تقول : دا الداير اقولو فهل من مزيد.. وعبدالقادر ، يا روزمين ، منذ نعومة لهاته وحنجرته كتلميذ كان بأدائه يعطي أشعاره جمالا على جمالها ، في هدوء يهدهد خلاياك حد الطفو والرضا.. لكنه يصفعك أحيانا ويقلق منامك بأسئلة تستعصي على الإجابة ، وأحيانا ينقل إليك عدوى ما يعاني بأسرع مما يتوقع المنصتون وناس الحجر الصحي حين يقول..
(انى مللت زحام ذاكرتى من الأضداد)
لكن سرعان ما يعيدك إلى حال بين السماء والأرض قائلا:
لو كنت أعلم أن هذا الشعر يهدى
للتى هى للجحيم
لكفيتك العبرات كنت هديت بالك
للصراط المستقيم
Post: #28 Title: Re: الموجز (آخر زمن !!) Author: يحي قباني Date: 06-11-2013, 05:06 AM Parent: #27
يا سعادتك ...
الزول القال جنس الكلام ده :
لمحتك .. قلت بر آمن .. بديت أحلم .. ألملم قدرتي الباقيه و أشد ساعد علي المجداف تلوح لي مدن عينيك وترفع لي منارة بسمتك سارية وبديت أحلم
وعاش ... وشاف زمنا الملامحة معكره ده ...
بيقول شنو غير ( آخر زمن ) ... ______________________ الكتيابي زول صعب يا مولانا ...
Post: #29 Title: Re: الموجز (آخر زمن !!) Author: عبدالعزيز عثمان Date: 06-11-2013, 06:06 AM Parent: #28
الدنيا اخر ليل،وانا ذي داير انوم ،وخايف من كوابيس الليل،فجاة لمحت الوادي المقدس بمدينته الفيحاء،وبئره فقلت لنشرب منه،يا لعالم الكتيابي الملئ بالوجد والصدق ،الذكر وصوت الرحمن،الان تستحيل الهواجس لحزن وجداني شفيف، وانام علي، ياكنا طيفين في منام يا كنا في أحضان ملك
Post: #30 Title: Re: الموجز (آخر زمن !!) Author: عبيد الطيب Date: 06-11-2013, 10:26 AM Parent: #29
صعب علي وأنت قد بشرتني..... أن لا أبوح........ بشرتني ابْيَضَّ المدى حولي .. بروقك أوشكت وتهيأت مقل السفوح بشرتني فالنور والأظلال واللحــن الصداوي المؤوج... قصر الزمام على البصيرة والتقت .. صرط العروج....... فاغفر إذا شوقا......... دخلت إليك من باب الخروج.....
الكتيابي
.... وأنا يلسعني نحل النشوة في الوجدان لا أعرف كيف أحكك..... كيف أحكك يا وجدان.... محظوظ حقا نحل عيونك صادف قلبا عريان... .......الكتيابي
Post: #31 Title: Re: الموجز (آخر زمن !!) Author: محمد المرتضى حامد Date: 06-11-2013, 11:57 AM Parent: #30
Quote: Zubeir Mohammed · Buraydah يا الله بس حسن الختام .. !!
عزيزنا الزبير، عبدالقادر يعنيها.. لا أشك أنها جاءت من غرف قلبه الأربعة..
يا الله بس.. حسن الختام..
Post: #32 Title: Re: الموجز (آخر زمن !!) Author: محمد المرتضى حامد Date: 06-11-2013, 02:35 PM Parent: #31
Quote: Hassan Ali Abugroonالأستاذ محمد المرتضى ماكليت من المساسقة خلفك وما وجدت إلا ما يجعلني أعود لأساسق من جديد الكتيابي صحابي تأخر وقت وجوده جانا في الزمن الكعب علا بيمس جوانحنا ويهبش زاتنا
مشكور ياخ
الشكر لك أنت يا حسن،
كيف لانحتفي بملهم يناجي التجاني وجماع والمجذوب قائلا :
والجلاد يرضع من لسان السوط شهوته . ويرمقني كما لو كنت قهوته .. فلي قدري .. ولي كأسي .. عرفت الآن كيف غدي فساعة حائط الأضلاع سابقة .. وحاضر يومهم أمسي
أخيلة كالأخيلة صور عبدالقادر الشعرية يا حسن ..
Post: #33 Title: Re: الموجز (آخر زمن !!) Author: محمد المرتضى حامد Date: 06-11-2013, 09:33 PM Parent: #32
(الكتيّابي والراحل حميد عندهم تفاصيل صغيرة ما بتلقاها عن آخر ولا حتي "غارسيا" "ولا الكوني ولا واسيني الأعرج" )
لملمت أهل الكرامات كللللهم في سطرين يا عبيد! عارف يا رفيق البادية والنجم ، قيل أن أحدهم سئل عن أقصى أمانيه في الحياة فقال: أتمنى أن أعيش في جزيرة جميلة فيها مكتبة الكونغرس وحسناء تدير المكتبة..
يا ودالطيب ، لو أتيح لك أن ترافق من ذكرتهم أعلاه في سهر يومي في تلك الجزيرة ومعهم آرثر فندلي (لزوم الروحانيات) فاعلم بأنك قاب قوسين ..
Post: #34 Title: Re: الموجز (آخر زمن !!) Author: محمد المرتضى حامد Date: 06-12-2013, 02:32 PM Parent: #33
Quote: لسه حاسس إني شباب زي أيام الجامعة
يا جعفر،
أحييك على هذه الروح، الكتيابي من جيلي لذا كتب قصيدته من مضاهاة متمهلة بين ما كان عليه الحال وماهية المآل، هذه المقارنة ربما لا يعقدها إلا من جايلونا.. بهذه الروح يا جعفر ، لايسعني إلا أن أهديك قول الفخم سيف الدين الدسوقي في المصير..
مودتي
Post: #35 Title: Re: الموجز (آخر زمن !!) Author: محمد المرتضى حامد Date: 06-12-2013, 03:23 PM Parent: #34
Quote: Hassan Mahgoub · Alaxandria محمد المرتضي يا أخي ليك وحشة زمن وزمن طول لا شوفتن تبل الروح ولاتواصل يطمن انت إن شاء الله طيب ... عارف إنك في السلطنة ... أنا مع العم سام أرجو التواصل لك الود
دنيا سغيره يا حسن، أسغر مما يتوقع أي شخص، قبل قليل زارني زميل وزميلة من الإمارات في عمل وفوجئت أنهما على علاقة وطيدة بكل من جمعتنا بهم الإسكندرية المقدونية وأجمل ايام الطلب.. مررنا على د. محمد الفاتح إبراهيم وطراوه ونصر هجام وطرينا صديق عبدالهادي وصاحبك صالح سلمان وعجايب زمن الراهب عادل مختار، وغادراني وهما يتباكيا على الزمن السمح ، كل من ورد ذكره ، يا ود مدينه، في قارة (غير) كما لو أن الناس دي كلها - كما قال ودالمكي - أصبحت فتلة في الرياح وثرثرة في الصخب .. أدمعا من الضحك والأسى وسألا الله حسن الختام.
Post: #36 Title: Re: الموجز (آخر زمن !!) Author: محمد المرتضى حامد Date: 06-12-2013, 04:06 PM Parent: #35
Quote: Amal Hassanابداع من وادي عبقر ولكن غفوا احسبها بكائيه او مرثيه قاتمة السواد لا يوجد بها حتى بصيص امل كما يقال يااخي والله احبطونا وقسوتوا علينا اكثر مما نحن فيه كفايه علينا قسوة مكان وزمان ىاخي انفضوا التراب من على السطح وحتلقوا الكان فى دواخلكم وجوارحكم still valid واكتر كمان لك الله ىا وطن
طبعا يا أمال القصيدة ليست محل محاكمة بمعيار الواقع ، لكن أيضا هي تعبير عن إحساس الشاعر بالواقع مستندا على مرجعية كتبت عنها أعلاه، الأماني والرجاءات لايجب أن تحول دون تعبير الشاعر عن إحساسه لحظة ميلاد القصيدة، وأثق أن القصيدة هذه بالذات من أصدق ما قرأت ولا علاقة لها بما قيل عن أجمل الشعر .. أخونا في الله والمشاكل (دكين) كتب منذ مدة قصيرة كلاما جميلا عن الواقع إصبري على قراءته لأنه يبين الأمر عن الواقع بشكل مريح:
Quote: ويتواصل الوضع العبثي في المشهد السوداني..
ناس تخش ابكشرولا وناس يمرقو وناس تخش ابيي وناس يمرقو وناس تخش الخرطوم وناس يمرقو وناس تسرق وناس تموت فطايس وناس تطبل وناس تهلل وناس تكبر وناس تكتب عن خيبة املها في وزير وناس تمدح، وناس ماشة ساي وناس بتوعين نسوان وناس بتوعين عيال وناس تعلن عن عشبة بن علي اليمني في التلزيون وناس تقول اثاثات وناس مبسوطة ساي بلا سبب وناس مغتربة وناس تفرح من مطرة، سفارات ومطارات وكبسيبة وزيطة وزمبريطة.. وساخة وخرة وهمم ميتة وذمم منتهية وغلا وجوع..
واحد سوداني لاقيتو وين ما متذكرو ذاتو، قال لي يازول ماتسمع من طرف..بس شوف براك، الحقيقة هي البتشوفا بي عينك، يعني مثلا تسمع انو في غلا وتسمع انو ماف غلا، تقوم تمشي الدكان وتلقى الحاجات غالية، يلا دي الحقيقة (انو الحاجات غالية لانو انا لقيتا غالية) وضرب لي محدثي مثلا اخر قائلا: تسمع الدولار نزل وتسمع الدولار وصل 700، اها تقوم تجيك سفرة علاج للقاهرة تمشي تشتري دولار تلقاهو 710، يلا دي الحقيقة (انو الدولار ارتفع) وضرب لي مثلا ثالثا فقال ( تسمع بي انو في عصابات في شوارع الخرطوم وتسمع بي انو الامن مستتب، تقوم يوم وانتا ماشي يجوك نفرين يجلدوك يشيلو موباليك، يلا دي الحقيقة انو امن ماف... او فجا تسممع في الراديو انو في هجوم حصل على ابكرشولا تعرف انو ماف سجم امن.. وهكذا ياخ، الحقيقة هي الحاجة البتحصل ماالحاجة الممكن تسمعها من ده ولا داك..
طبعا الكلام ده مفروض يكون ما مدهش لاي زول باعتبار انو مسالة الحقيقة دي مسالة فلسفية واضحة بتنتهي في كونها هي الحاجة القدامك وليست غيرها.. لكن لانو في زمن الانقاذ ده كانت التغيرات تسير خببا نحو العبث وانو العبث لم يسوط الافكار الانسانية والفلسيفة المكتسبة باي نيتشة هكذا خبت عشواء فقامت الاذهان بتاعتنا شوية شوية اعتادت على ما آلت اليه الامور وفقدت براءة المعرفة الفطرية الاولية.. ويبدو انو الراجل اللاقاني ده كان غائيب في صقع ما في العالم، فقد قدم لي لمعرفة الاولية للادمي الغير ملتبسة بمكتسبات المعرفة في زمن الانقاذ.. ولاني كنت في زمة وعي المنقذين من اهل الانقاذ فقد اصابني الدهش من (.........)اجة فكرة الزول حول الحقيقة.. شفتا كيف تغربنا حتى عن انفسنا.. شفتا العبث ده كيف؟؟
ابكرشولا مين يا سماني،
القصص دي بس للفرجة وليست للانفعال.. اتصالح مع قصص الانقاذ دي لحدي مايجي دورك في المجزرة..يامنهم يامن التانين.. وقيل: ومن التانين؟ قيل: التانين ديل ذاتو جزء من العبث لانو ممكن يكون نافع من الماتانيين وعبد الرحيم من التانين والعكس برضو صحيح في فكرة العبث العامة..
وذي ماشايف العبث ليس له حدود يمكن من خلالها حصر المصطلحات والتعريفات وحد الفوضى..
دي مسالة قد تمتد سياسيا فلا يُعرف من العدو ومن الصديق على مستوى القيادات ( قوش، نافع، مبارك الفاضل، الحلو، اركيمناوي..الى اخر القيادات التي تبدلت والذين مابدلوا تبديلا) .. والعبث قد يمتد موضعيا فلاتعرف من وين تبدى حرابتك ووين تقيف، من حلايب ولا الفشقة ولا ابكرشولا ولا ابيي ولا بري الدرايسة ولا كافوري ولا المنشية.. وهي ايضا قد تمتد اقتصاديا فلا تعرف راس الجنية من كريعنو ولا سوق المواسير من سوق النخاسة من سوق الخرفان من سوق عُـشبة بن عليى اليمني.. وهي قد تمتد اخلاقيا فلا تفرز فساد البيض من فساد المحاليل الطبية من فساد البرلمانيين من اخلاق اهل السودان من اقرارات الذمة من بيع الذمة قرابات الوزيرة الفلانية من زنا المحارم من استخدام الكوندوم من زواج ارامل الشهدا من رشاوي البوليس .. العبث مسالة متكامكة في كونها عبثية، لايحدها في عبثها حدوت، ويمكن في ظلها وظلالها حدوث اي شي، يعني عادي ممكن تفك ليك عنقريب ومافي زول يقول لا..
اتخيل فجاة في عنقريب مادي وقع من الدعاية بتاعة حافظ للتحويلات المالية الفي اعلى يسار البورد دي مع انو الدعاية مسالة مامادية...هل تتخيل انو انا ممكن استغرب مثلا؟؟
اهو ده بقى مايمسى بمحصلة الفعل العبثي النهائي..
اتمنى انك تصل النقطة دي سالم ..وتحاول تستمع بالقدر الذي يتكشف لك من مشهد العبث المتاح..
التعديل لحذف بعض ما لايتصل من كلام دكين بالموضوع..
Post: #37 Title: Re: الموجز (آخر زمن !!) Author: محمد المرتضى حامد Date: 06-12-2013, 11:29 PM Parent: #36
عزيزنا محمد سلامات جد يا محمد مافي شاعر في الدنيا بخلي الحروف تقيف بب و تتمحن وتناهد وتندهش وتضج من الحاصل خلافو . وبخليها علي كيفو . وبي طريقتو الرسامة . الكتبابي يا محمد طيبتو وتفكيرو وشعرو من الحجم المعدوم بين العالمين . ربنا يديه لينا العافية ويطول عمرو
أمين يا عثمان حقيقة ، عبدالقادر بيوقف الكلمات على امشاطا لامن تتاوق للقلب من نفاج العيون..
Post: #38 Title: Re: الموجز (آخر زمن !!) Author: محمد المرتضى حامد Date: 06-13-2013, 11:29 AM Parent: #37
Quote: عمتنا فاطنة بت شيقوق دى لو عايز تبكيها قول ليها بس الدنيا دي يا عمتي فاطنة ما فيها خير
هسه ويييييييييييييين اخوك الرضي ووييييييييييييييين اخوك البشير ووييييييييييييييييين اختك الزيتون
لو تميت ليها الرابعة بتسمع سكليها في السماء
يا الطيب، عمتك فاطنه ربما تتعايش مع سلسلة وييييين دي ومع التغيُّر التدريجي غير المرئي لتبدل الأحوال وربما تتصالح معه بعد حين لكن بالنسبة لأمثالك ، من حملوا صورة محددة وخرجوا بها ولم تعد موجودة في الواقع ، ف (السكلي) أعلى.
الماتوا استراحوا يا الطيب وكثيرا ما نسمع ونشاهد أشياء ونقول : الحمد لله المرحوم لم يعش حتى هذا اليوم، قلت ليك الكتيابي ، أصالة عن نفسه ونيابة عنا ، سأل الله حسن الختام وما علينا إلا نقول آمييين...
Post: #39 Title: Re: الموجز (آخر زمن !!) Author: Osman Musa Date: 06-14-2013, 01:17 AM Parent: #38
قلت بر آمن بديت احلم الملم قدرتي الباقية واشد ساعد على المقداف تلوح لي مدن عينيك وترفع لي منارة بسمتك سارية بديت احلم كل ما الريح تطارد الموج أزيد إصرار واحلف بيك أغير سكة التيار أقول يا أنتي يا اغرق تلوح لي مدن عينيك تلوح لي أخاف الضفة ترجع بيك قبل الحق أخاف غيم المنى الشايل تسوقو الريح ويتفرق أخاف ..أخاف ..أخاف واشد ساعد على المجداف واجيك بقدرتي الباقية حطام إنسان موسم بشقى الدنيا مقسم قلبو في الأحزان اجيك فنان اشد اوتارى واحكي ليك حكاية إنسان وهب لسكتك نفسو رسم صورتك على حسو ربط ساعد على المجداف وقال يا آنت يا اغرق أخاف ..أخاف .. أخاف أخاف غيم المنى الشايل تسوقوا الريح ويتفرق ألاقيك يا أماني سراب مواهبي عليه تدفق أخاف ..أخاف .. أخاف ... يا محمد يا أخوي نحن في غربتنا البعيدة دي عايشين بي ده النوع من الشعر ال 1000 MG . وأقولك سر يا محمد : شعر شيخنا الكتيابي هو شعر الشاعر الوحيد البتحس وأنت بتسمع فيه زي البتشربو . تحس بي طعمو في خشمك وتحس بي همبريبو في فشفاشك . والله العظيم يا محمد أنا بخاف علي الكتيابي لما يكتب . الرجل جد بكتب بي قلبو . والله العظيم لحظة أكون بتكلم معاهو في التلفون بكون في قمة الفرحة ده شاعر محترم وعظيم و ما ساهل . له التحية والمحبة المربعة .
Post: #40 Title: Re: الموجز (آخر زمن !!) Author: محمد المرتضى حامد Date: 06-14-2013, 10:19 AM Parent: #39
الزول القال جنس الكلام ده :
لمحتك .. قلت بر آمن .. بديت أحلم .. ألملم قدرتي الباقيه و أشد ساعد علي المجداف تلوح لي مدن عينيك وترفع لي منارة بسمتك سارية وبديت أحلم
وعاش ... وشاف زمنا الملامحة معكره ده ...
بيقول شنو غير ( آخر زمن ) ... ______________________ الكتيابي زول صعب يا مولانا ...
والله صعب يا باش مهندس عبدالقادر صعب ، بالذات في خطابه بالذات للناس العارفين ما يعنيه من صور وأحوال. والله يا يحيى مرات الواحد يتساءل : هل نحن نحن؟
تاني مبروك لبلسم
Post: #41 Title: Re: الموجز (آخر زمن !!) Author: محمد حيدر المشرف Date: 06-14-2013, 11:14 AM Parent: #40
تعرف يا مولانا !!
ويتهموك كمان بالنوستالجيا !! لاكن .. في تلك الدروب يا محمد .. كانت الحياة تمضي بأحلامنا علي نحو شديد الإلفة وحميم جدا .. أنا وانت والأصدقاء .. الناس .. الشارع .. البيوت كل الأشياء .. الحبيبة .. أولاد الحله .. أسياد الدكان واللبن والحمار .. شارع النيل .. ساعة البلدية .. كوبري أمدرمان .. سوق المورده .. الأغاني .. استاد المريخ و .. تفاصيلٌ تبدو وكأن الله أنزل بها سلطانا خاصا بتلك الأرض .. سلطانا عامرا بالود والشغف الحياتي العنيف .. تدهشك غنية جديدة لمصطفي .. لمحتك وقلت آآآآآمن .. بديت أحلم والأحلام كانت تبدو منطقية جدا كما الأغاني .. وطن بالفيهو نتساوى .. نحلم نقرأ نتدواي .. والناس ما كانوا طيبين ولا حاجه .. كانوا فقط أكثر أنسنة و .. مرحمنين ولهم مذاق وطعم ورائحة .. وكذلك الحياة, كان لها طعم ولون ونكهة ورائحة .. تدخل استاد المريخ عشان بس تشوف سطوة سامي عزالدين في الميدان .. ومتعة الكوره لمن يختها في سدرو ويرفع راسو .. وانت راجع منتشي .. تلقاك هي تشب قدامك كل القصائد والغنا .. من لدن الدوش ومحمد سعد دياب والكتيابي لي سيد عبدالعزيز وعبدالعزيز محمد داؤود وعبدالعزيز المبارك وعبدالعزيز العميري وحتي الشاب الجديد محمود عبدالعزيز !!
ياااا حليلها هي .. ويا حليلنا نحنا يا مولانا ..
غايتو هترشة بتاعت زول نوستالجي ساي يا ( عمك ) ..
Post: #42 Title: Re: الموجز (آخر زمن !!) Author: عبيد الطيب Date: 06-15-2013, 04:35 AM Parent: #41
Quote: من لدن الدوش ومحمد سعد دياب والكتيابي لي سيد عبدالعزيز وعبدالعزيز محمد داؤود وعبدالعزيز المبارك وعبدالعزيز العميري وحتي الشاب الجديد محمود عبدالعزيز !!