ما هذا يا الطيب مدثر ..

ما هذا يا الطيب مدثر ..


07-23-2013, 03:19 PM


  » http://sudaneseonline.com/cgi-bin/sdb/2bb.cgi?seq=msg&board=219&msg=1398701855&rn=62


Post: #1
Title: ما هذا يا الطيب مدثر ..
Author: محمد المرتضى حامد
Date: 07-23-2013, 03:19 PM
Parent: #0








Post: #2
Title: Re: ما هذا يا الطيب مدثر ..
Author: محمد المرتضى حامد
Date: 07-23-2013, 03:23 PM
Parent: #1




بمثل هذا الأداء ، اليُنسي الوقار ، تدخلنا دائرة الإدمان وتحشرنا في زمرة المدمنين..



Post: #3
Title: Re: ما هذا يا الطيب مدثر ..
Author: يحي قباني
Date: 07-23-2013, 03:29 PM
Parent: #2

هههههههههههههههه

كلامك ما وقع الواطة يا مني ...

قلتليها محمد المرتضي كان في منتدي الطيب مدثر في المكتبة ...

قالت لي معناتها داير يفتح بوست ...

قلت ليها رأيك شنو نفتح واحد سريع و نبوظ عليهو القصة ...

يا سلام عليك يا مولانا ... وعلي المغني السمح ....

علي فكرة اول امس نزلت مجموعة جديدة و حصرية بعد مانت مرقت ...

اديها معاك طلة ...

Post: #6
Title: Re: ما هذا يا الطيب مدثر ..
Author: دينا خالد
Date: 07-23-2013, 03:41 PM
Parent: #3

التضى يا خوى قالوا الخير بخيير والشر بغيير !
شفت الصوت دا بقى رويان كيف ؟











ــــــــــــــــــــــــــــــ
يا تضى فى حوامتك فى المكتبة دى ما بتلقى لى كيف يكون الاصل صورة ؟
الرسول فيك ...

Post: #11
Title: Re: ما هذا يا الطيب مدثر ..
Author: محمد المرتضى حامد
Date: 07-23-2013, 05:16 PM
Parent: #3

متنازع بين الإحتفاء بمبارك المغربي ورمضان زايد والباذخ المدثر يا يحيى ،


أشتاق في صمتي وأحب في همسي
وأعود إن عدتي الي معبدي القدسي
حيث الهوى السامي يسمو بأفكاري
وتطيب أيامي من نبع إيثاري


بالله - زي ما قال عماد عبدالله - هسه الواحد يمشي وين ويسوي شنو؟


-

نعم ،
كنت أتجول في حديقة www.sudanesesongs.net وهجعة في كرمة الطيب ،
بالله التكنولوجيا دي دحرت التجوال السري الجميل ومغازلة الجميلات بعيدا عن العيون والأسماع؟
الجميلات أعني بها الأغاني..




وبالطبع الجميلات..


Post: #4
Title: Re: ما هذا يا الطيب مدثر ..
Author: Muna Khugali
Date: 07-23-2013, 03:30 PM
Parent: #2


وإنت كمان؟؟


.....

Post: #5
Title: Re: ما هذا يا الطيب مدثر ..
Author: محمد المرتضى حامد
Date: 07-23-2013, 03:30 PM
Parent: #2



على الرغم من إنحيازي المكشوف للشامخ رمضان زايد إلا أنني لم أستطع
مقاومة أداء الطيب لهذه الأغنية المُشِعَّة وأسلوبه الذي يغسل ما يعلق بالنفس
من أدران..


Post: #7
Title: Re: ما هذا يا الطيب مدثر ..
Author: Osman Musa
Date: 07-23-2013, 03:46 PM
Parent: #5

وأنا ليتني جنيت .
ياخ ماعندك ليهو تلفون ولا FAX
عشان الزول يحاول يهديهو من اللعب بي ال FIRE و بي الكهرباء .
عليك الله كان عندك ليهو أي طريقة أتصال وريني PLEASE .
..
والله يا محمد بسمع فيه والبطين الايمن حقي بنتح زي الطاقيني دابي .
..
غايتو يوم بتكتل ليك زول بين التلفزيون وجك الحلومر والدرب التحت . وهههههههههها

...

Post: #12
Title: Re: ما هذا يا الطيب مدثر ..
Author: محمد المرتضى حامد
Date: 07-23-2013, 05:58 PM
Parent: #7

Quote: شفت الصوت دا بقى رويان كيف ؟

هو نفسه وزارة للري،

دندون يا دونادوني،

من أصعب الأشياء عندنا مسألة المفاضلة والإختيار ، وفي حالة الطيب
يتجلى هذا القول لأنني بقيت وقتا غير قليل أفاضل بين أغان لأنتخب واحدة بصوته أستهل بها هذا البوست ،
وهذا ليس مرجعه لشئ إلا لأن الطيب لايؤدي الأغنية وإنما يبثها تحت أنسجة شعورك
ومعه تحسين أنك أنت من كتب الكلمات أو هو المقصود بالمعاني ، حالة من استعارة الوجدان غريبة..







ــــــــــــــــــــــــــــــ
Quote: يا تضى فى حوامتك فى المكتبة دى ما بتلقى لى كيف يكون الاصل صورة ؟
الرسول فيك ...


الصل ما ببقى صوره يا دندن لكن الرسول بعِزو..

الصورة (الأصل) ..


Post: #22
Title: Re: ما هذا يا الطيب مدثر ..
Author: Gaafar Ismail
Date: 07-24-2013, 04:01 AM
Parent: #12



Quote: من أصعب الأشياء عندنا مسألة المفاضلة والإختيار ، وفي حالة الطيب
يتجلى هذا القول لأنني بقيت وقتا غير قليل أفاضل بين أغان لأنتخب واحدة بصوته أستهل بها هذا البوست ،
وهذا ليس مرجعه لشئ إلا لأن الطيب لايؤدي الأغنية وإنما يبثها تحت أنسجة شعورك
ومعه تحسين أنك أنت من كتب الكلمات أو هو المقصود بالمعاني ، حالة من استعارة الوجدان غريبة.


أخي الحبيب مولانا الأستاذ محمد المرتضى
رمضان كريم وكل سنة وانت تنعم والأسرة الكريمة بالصحة والعافية والسعادة

أنت تؤكد دائما ما أفوله لأصحابي بأنك مؤشر الجمال في هذا المنبر

يحفظك الله ذخرا للجمال والبهجة والإبداع

تحياتي ومحبتي

Post: #72
Title: Re: ما هذا يا الطيب مدثر ..
Author: ناهد محمد الحسن
Date: 07-28-2013, 05:47 PM
Parent: #12

فوق..رمضان كريم للجميع

Post: #8
Title: Re: ما هذا يا الطيب مدثر ..
Author: ALGARADABI
Date: 07-23-2013, 03:47 PM
Parent: #5

أنا شخصياً الزول ده عندي أكتر من سبب يجعلني أحبه

Post: #9
Title: Re: ما هذا يا الطيب مدثر ..
Author: usama Babiker
Date: 07-23-2013, 04:16 PM
Parent: #8

Quote: على الرغم من إنحيازي المكشوف للشامخ رمضان زايد إلا أنني لم أستطع
مقاومة أداء الطيب لهذه الأغنية المُشِعَّة وأسلوبه الذي يغسل ما يعلق بالنفس
من أدران..

عارف يامحمد المرتضى الطيب مدثر ده هو سلطان الطرب السوداني دون منازع ...

تصوم وتفطر علي خير ..

Post: #10
Title: Re: ما هذا يا الطيب مدثر ..
Author: يحي قباني
Date: 07-23-2013, 04:16 PM
Parent: #8

Quote: بمثل هذا الأداء ، اليُنسي الوقار ، تدخلنا دائرة الإدمان وتحشرنا في زمرة المدمنين..

في الانتظار يا مولانا ...

ما في زول غيرك حيجيه الكلام عن الزول الملان فن الاسمو الطيب مدثر ده ...

وعارف يا مرتضي ... الطيب مدثر بقي من القليلين الفضلوا الممكن يبرزوا محاسن المَغْنَي القديم ...

انا لو علي ... اصدر قرار بحبس الطيب مدثر داخل استوديو ...

و اجباره علي غناء كل القديم بصوته للحفاظ علي ارثنا الفني ...

كفاية بهدلة من شباب اليومين ديل ...

سوق البوست يا مولانا ... فانت ربُان ماهر لمثل هذه البوستات ...

Post: #13
Title: Re: ما هذا يا الطيب مدثر ..
Author: عماد شمت
Date: 07-23-2013, 06:09 PM
Parent: #10



عشان خاطر كل الجميلين وخاطرك الغالي يامحمد المرتضي

ولحبيبنا الطيب مدثر وكل من يمر بهذه الواحه الجميله

ورحم الله الكبير رمضان زايد وكل من فقدناهم من المبدعيين دعوتي لهم بان يمجعهم الله في جنات الفردوس

ورمضانكم كريم

Post: #16
Title: Re: ما هذا يا الطيب مدثر ..
Author: سامى عبد المطلب
Date: 07-23-2013, 07:07 PM
Parent: #13

يا سلااااام عليك يا مولانا يا سلااااااااام
شكراً على اشراكنا معك فى الشرب من نبع الطيب مدثر الصافى ....

Post: #36
Title: Re: ما هذا يا الطيب مدثر ..
Author: محمد المرتضى حامد
Date: 07-24-2013, 07:13 PM
Parent: #13



شكرا يا ود شمت على الصورة..
كما أشرت في ردي على دينا خالد أعلاه فقد سبق وافترعت بوست للأغنية
في الرابط أعلاه لأنها أغنية تشرح في صدق من هو حسن الزبير ، غشيت قبره
شآبيب الرحمة، أغنية ، لو لم يكتبها حسن الزبير لكتبها حسن الزبير..

يا عماد ، البصر دون البصائر والأصل ما ببقا صوره..

تسلم.


Post: #34
Title: Re: ما هذا يا الطيب مدثر ..
Author: محمد المرتضى حامد
Date: 07-24-2013, 05:13 PM
Parent: #10

Quote: الطيب مدثر بقي من القليلين الفضلوا الممكن يبرزوا محاسن المَغْنَي القديم ...


لا شك يا يحيى ،
مررت بمكتبتكم العامرة فوجدت تسجيلات صوتية لأغان ما كنت أتوقع أن الطيب
غناها منها (رسائل) الجابري و (خلي العيش حرام) وما شابههما من مفاعلات
الطرب الذري..


Post: #14
Title: Re: ما هذا يا الطيب مدثر ..
Author: محمد المرتضى حامد
Date: 07-23-2013, 06:42 PM
Parent: #8



Quote: وإنت كمان؟؟


ليتني زهر..


Post: #15
Title: Re: ما هذا يا الطيب مدثر ..
Author: الطيب شيقوق
Date: 07-23-2013, 07:04 PM
Parent: #14

Quote: ما في زول غيرك حيجيه الكلام عن الزول الملان فن الاسمو الطيب مدثر ده ...

وعارف يا مرتضي ... الطيب مدثر بقي من القليلين الفضلوا الممكن يبرزوا محاسن المَغْنَي القديم ...

انا لو علي ... اصدر قرار بحبس الطيب مدثر داخل استوديو ...

و اجباره علي غناء كل القديم بصوته للحفاظ علي ارثنا الفني



ابصم معاك بالعشرة يا قباني

الطيب حضور وفن وادب

المرتضى دا - يا قباني - عمرو ما بتلهم ليهو فنانا ني

Post: #17
Title: Re: ما هذا يا الطيب مدثر ..
Author: محمد المرتضى حامد
Date: 07-23-2013, 08:02 PM
Parent: #8

Quote: والله يا محمد بسمع فيه والبطين الايمن حقي بنتح زي الطاقيني دابي .



في هذا التسجيل يا عثمان ، وتحديدا ما جرى من ألعاب نارية بين الدقيقة 4:44 وحتى 5:15 ، شئ يدعو للإنجذاب وفقا
للمعتقدات الهندية القديمة ، يعني أي زول يمر بي أثناء تلك الثواني المضيئة المسكرة يمكنه أن يعرف معني الغيبوبة
الصاحية..

أنا ليتني عودُ في صدرك الحاني
دنياي تغريدُ من عذب ألحاني
والفن محبوب في قلب فنانِ
من خفقة القلب تنساق أوتاري
بالشعر والحب كالشهد والنار



في ظني اللايخيب أن هذا ما جعل الطيب يضحك طربا..

الشهد والنار..

خمج..

Post: #18
Title: Re: ما هذا يا الطيب مدثر ..
Author: Ahmed al Qurashi
Date: 07-23-2013, 09:12 PM
Parent: #17

أغنية أحاسيس أو حديث الحب هي من كلمات الشاعر عبدالرحمن الريح ولقد تغنى بها إبراهيم إدريس ود المقرن ثم إبراهيم عبدالجليل ولقد اعجبنى كثيرا أداء الفنان الطيب مدثر لهذه الأغنية

اتمنى ان نستمع لها هنا بصوته

بى حبي فيك اصرّح....... والتصريح يكون بعض أحيان مجرّح
حديث واحد يبكى ......... وحديث واحــــــد يفرح
**************
حديث الحب ملوّن ......... واحد منه ظاهر والآخر مدون
في صفحة فؤادي ........... من الآمـــــال مــكـــــون
حبيب يوم سعدي يطلع
بقربك منّى اســــمع
أشوفك ولى يرجع .......... عقلي الدوام مسرّح
*********
حديث الحب جواهر .......وباقات من أزاهر
تغنى به الطبيعة ........... على لحن المزاهر
تفهم منّه كلمه .............. بمعنى الحب تجاهر
تسمع منه نغمه ............ مع الأفلاك تساهر
تعلّم كيف تهوى
حبيب للحب يسوى
بعيد عن كل دعوه ....... كلامه وشكله مفرح
********
كلام الناس دعوه ........ خداع لا تسمعوه
يحسدوك في حبيبك ..... ومنك يمنعوه
إذا حاولت وده
نحوك يبدى صدّه
يخالك انت ضده
يحب بعدك قريبك .............. ويتغير حــــبيبك
يكون في الحب نصيبك ..... وحيد تمسى وتصبح



Post: #19
Title: Re: ما هذا يا الطيب مدثر ..
Author: خالد علي محجوب المنسي
Date: 07-23-2013, 09:47 PM
Parent: #18

ب
Quote: مثل هذا الأداء ، اليُنسي الوقار ، تدخلنا دائرة الإدمان وتحشرنا في زمرة المدمنين..


الجميل ودالمرتضى
وكيف الوقار مع الكلمة التي تدغدغ المشاعر
قلو مرت بوقار يكون أثؤها قد لا أصاب من المشاعر شيئَ

وليني طير أنــــــا

غايتو بي أختصار كدي يا مرتضى انا الكلمة الحلوة ..... والدلوكا حقتنا لما تهبق بخلوني معلق بين السماء والارض
وبنجذب إنجذابة درويش في حلقة أبونا الشيخ وما بكون واعي بقول شنو وبعمل في شنو ؟
اسأل منى خوجلي دي حية الله بينا ههههههههههههه
مايسنعني ودشيقوق هسي يجيني ناطي زي العبلاج

تحياتي مرتضى يا حلو

Post: #20
Title: Re: ما هذا يا الطيب مدثر ..
Author: khaleel
Date: 07-23-2013, 09:53 PM
Parent: #19





في رمضان اكيد كفة رمضان ارجح

Post: #21
Title: Re: ما هذا يا الطيب مدثر ..
Author: امجد الجميعابى
Date: 07-24-2013, 01:29 AM
Parent: #20


Post: #23
Title: Re: ما هذا يا الطيب مدثر ..
Author: Hisham Osman
Date: 07-24-2013, 04:26 AM
Parent: #18

Quote: أغنية أحاسيس أو حديث الحب هي من كلمات الشاعر عبدالرحمن الريح

الشائع عن الاغنية انها من كلمات مبارك المغربي وهي بالفعل تحمل
بصمته ومنسوجه علي مقاسه وتبدو بعيدة كل البعد عن طريقة
عبدالرحمن الريح...

Post: #24
Title: Re: ما هذا يا الطيب مدثر ..
Author: صديق الموج
Date: 07-24-2013, 06:41 AM
Parent: #23

عافى ليك يا محمد المرتضى وعافى لصديقى ود ام نعيم ده
غايتو تفطرو الزول لا ايده لا كراعه
انى امنت بالابداع حين يسكن الفنان،،،

Post: #25
Title: Re: ما هذا يا الطيب مدثر ..
Author: محمد المرتضى حامد
Date: 07-24-2013, 08:40 AM
Parent: #24

شيخنا أحمد البدوي ،
لعلك لم تلحظ تعليقي أعلاه الذي أبنت فيه انحيازي لرمضان زايد بصورة عامة فقد عرفنا منه أن الزمن يساوي المسافة على السرعة قبل
أن نعرفها في الفصل الدراسي، وأتبعت تعليقي ذاك بأن الطيب أغراني بالإستماع إليها مرات عدة بصوته الندي ( أو "الرويان " وفقا لدينا خالد)
عندما انضم إلى حداة قوافل الأماني بأن يكون زهرا في خدها الندي، ويا مولاي ، بعض الناس يثبت عدم صدق مقولة (سمح الغنا في خشم سيدو)
ولا أقول أن الطيب ألغاها في ( ليتني زهر) لكن ودمدثر إذا أدى أغاني الغير فإنه يطربك على قراءته الخاصة ، هسه (شوف) العزيزة رائعة سعد الدين
التي أوردها الجميعابي و(شوف) المواعيد ال لسه حزنانه بتنادي ، إستمعت إليها من صاحبها فتحي حسين وآخرين ولكن عندما يغنيها الطيب فإنه لا
يصوِّر لك ببساطة كيف تنتحب الأماسي في أسى ما اعتيادي ، بل يدخلك كهف الأسى ونفق الوحشة نفسه ويتركك وحيدا على حواف المأساة و شفير الدموع .

لن أتركك قبل أن أحيي أخي الصديق زميل المنبر المهندس محمد عثمان الذي سبق وأن كان له بوست مائز في أداء رمضان زايد للأغنية ذاتها..

انا ليتنى زهر...رمضان زايد




Post: #26
Title: Re: ما هذا يا الطيب مدثر ..
Author: محمد المرتضى حامد
Date: 07-24-2013, 10:07 AM
Parent: #25

مودتنا وأستاذنا جعفر إسماعيل ،

طابت أيامك جميعها، عودة لما اقتبسته بشأن إجادة الطيب أداء أغنيات الغير ، وأغانيه بداهة ،
أقول أنني كانت وما زلت تعجبني أغنية العطبراوي ( صابر معاك) وهي من الأغنيات التي لا يسعدني البتة أن يغنيها غيره وأرى في ذلك – إن حدث - تخريبا
للممتلكات العامة أيا كان المتعدي، لكن الطيب قام بأداء تلك الأغنية ، وبدت لي النتيجة كتحفة صانها أثري ماهر وتولى تلميعها وعرَضَها في الهواء الطلق
على الملهوفين المتطرفين من عبدة الفن والتاريخ والآثار والسمار عِوضا عن إيداعها مرة أخرى في صندوق زجاجي صامت بارد ..
وبهذا يُصنَّف الطيب على أنه من دعاة تأميم وتأمين الثروات القومية ومن معارضي الخصخصة الما بنريدا كلو كلو..
كلو كلو..

Post: #27
Title: Re: ما هذا يا الطيب مدثر ..
Author: محمد المرتضى حامد
Date: 07-24-2013, 11:12 AM
Parent: #8

أنا شخصياً الزول ده عندي أكتر من سبب يجعلني أحبه



ALGARADABI

أعي جيدا ما تعنيه و I know where you're coming from

Post: #28
Title: Re: ما هذا يا الطيب مدثر ..
Author: محمد عبد الماجد الصايم
Date: 07-24-2013, 11:16 AM
Parent: #27

فعلا يا سعادتكـ .. ما هذا!!

Post: #29
Title: Re: ما هذا يا الطيب مدثر ..
Author: د.محمد حسن
Date: 07-24-2013, 11:26 AM
Parent: #28

المرتضى الشاه
ولانك عارف اخوك بموت في الطرب البدخل الزول تحت التربيزة
اغيزك حبتين
في ليلة من ليالي الرياض الندية كنا ثلاثة
انا ومالك خدر والطيب مدثر
خرجنا من استراحة الساعة الواحدة المتجهة الى الثانية صباح
تيممنا صوب منزلي
ثلاثتنا
جلسنا في الصالون
واخرجنا الاعواد
وكنا خمسة
انا والطيب ومالك
وعودين
وبدا الغناء ينثال
فصرنا
ستة
انا ومالك والطيب
وعودين
والطرب
علي اليمين ايلشاه هذا الفتى الطيب بلل الليل بانداء الطرب حتى ما بعد الرابعة فجرا
وعندها صرنا سبعة
انا ومالك والطيب
وعودين
وطرب
وآذان

ومشتاقين

Post: #30
Title: Re: ما هذا يا الطيب مدثر ..
Author: الطيب عثمان يوسف
Date: 07-24-2013, 11:56 AM
Parent: #29

Quote: شفت الصوت دا بقـى رويان كيف ؟


*** أوســكاااار ...


















Post: #31
Title: Re: ما هذا يا الطيب مدثر ..
Author: Osman Musa
Date: 07-24-2013, 02:11 PM
Parent: #30

لابد يا محمد .
لابد تسمعو وتطش معاو في الأغنية
هو العمر باقي فيو شنو ياخ ؟؟؟؟؟؟؟؟؟
وقار .. وقار .. وقار . حدو متين الوقار ده ؟؟
أنت عارف يا محمد ؟ ياخ عمك بيل كلينتون ده ما فاز الا بعد ما نزل للشعب وبي الساكسفون
في مدينة مينفس ورأح عازف ليهم أغنية حتي الطيف رحل خلاني للفنان الشايقي القديم كلارك هاريسون .
مصطفي مدثر ياخ يجبر أي زول حجه سبعة حجات يترك وقارو في كوع باب الحراز ويتحزم ويصفق .
والله يا محمد كان حسبتهم ليك أعمامنا الدوبوا في الباخرة بعد العودة من مكة المكرمة حتندهش .
تحية مربعة للجميل المدثر .

Post: #32
Title: Re: ما هذا يا الطيب مدثر ..
Author: محمد المرتضى حامد
Date: 07-24-2013, 03:12 PM
Parent: #31


------------------------------------ ( عارف يامحمد المرتضى الطيب مدثر ده هو سلطان الطرب السوداني دون منازع ... )

يا أسامه ،
الطرب - وهو جمال محض - يتصل بحالة المتلقي الداخلية وحالة الطقس في القلب إلى حد كبير ، إذا كنت كريم النفس صحيحها وتوفرت
الظروف المناخية المواتية في الفؤاد فأنت حتما معرض لشعشعة تصحي فيك الإنسان الإنسان.. وكما يقال يا بركه - Beauty is in the eye of the beholder
ربما لاتدري أن أول ما قدمني للطيب أغنية من أغانيه الخاصة ، كانت شفرة التعريف به ، ومن مزاياه أنه لم يرتقِ السلم على درج شاده غيره،
جاب حقو براهو ، وهذه حالة ظللنا نفتقدها في معظم المغنين المتأخرين ، فمنذ الصحوة التي قادها شباب جميل في نهاية سبعينيات القرن المنصرم
من أمثال عبدالعزيز المبارك ومجذوب وخوجلي وهاشم ميرغني وغيرهم ، أصبح الإبداع قصرا على قلة من المطربين،
الطيب يدغدغني في كثير من أغانيه ويصادر دواخلي في حضرته بعملية Hypnosis يؤجر عليها ، فقط أتمنى عليه أن يسجل إبداعاته
ومنها أغنية (غيرة) وأخواتها ويتيحها للكافة كإعانات لطالبي اللجوء العاطفي وعابري الأثير والمؤلفة قلوبهم ،
ربنا قادر يا أسامه ، بيعمل توازن بيئي دقيق ، فكلما ولج البلد شيطان خرج من رحم الأرض فنان..

Post: #33
Title: Re: ما هذا يا الطيب مدثر ..
Author: Ahmed al Qurashi
Date: 07-24-2013, 05:11 PM
Parent: #32

Quote: الشائع عن الاغنية انها من كلمات مبارك المغربي وهي بالفعل تحمل
بصمته ومنسوجه علي مقاسه وتبدو بعيدة كل البعد عن طريقة
عبدالرحمن الريح..



الأخ العزيز / هشام أمين

سلامات

الاغنية هي للشاعر عبدالرحمن الريح ولقد وردت في ديوانه الروائع الحبيبة من أغاني الحقيبة

وأغاني الاوركسترا الحديثة الطبعة الاولى سنة 1996

ولدي تسجيل لبرنامج اذاعي قدمه الشاعر الدكتور عزالدين هلالي استضاف فيه الشاعر الكبير عبدالرحمن الريح

ولقد تحدث عن هذه الاغنية وقال ان اول من تغنى بها هو ابراهيم ادريس ود المقرن ولقد ابدى اعجابه بها الفنان ابراهيم عبدالجليل

وطلب ان يتغنى بها فسمح له عبدالرحمن الريح بذلك .

لك كل الود







Post: #35
Title: Re: ما هذا يا الطيب مدثر ..
Author: علي محمد الفكي
Date: 07-24-2013, 05:41 PM
Parent: #33

مولانا محمد المرتضى يا جميل
رمضان كريم
والله بهذا الاختيار الانيق اخذتنا وحلقت بنا فوق النجوم وطوفت بنا عبر مدارات الطرب الشفيف والنغم الجميل الذي يدغدغ الوجدان ... وهيجت فينا الذكرى ( ودي نشكيك فيها على منو ) ..
فقلوبنا لاتحتمل ..
الطيب مدثر صوت نقي وعذب ومموسق يغوص في شغاف القلب .. وهو جزء من سيرة الخالدين ..
لك خالص الشكر على اختيارك الباذخ

Post: #37
Title: Re: ما هذا يا الطيب مدثر ..
Author: محمد المرتضى حامد
Date: 07-24-2013, 10:45 PM
Parent: #35

Quote: شكراً على اشراكنا معك فى الشرب من نبع الطيب مدثر الصافى ....

العطبراوي يا سامي طرح أسئلة ما كان ينتظر عليها إجابة لأنها كانت حرضحال
ومنفستو كتب بحبر اللوم.. كنا نعيش مع الأداء الفردوسي لتلك الأغنية أيام تهجي
أبجدية العشق ونحن أسعد ما نكون بها في كافة عناصرها، وكنا نعتقد أن الشاعر
عمل اسكاننق لخاطرنا ثم كتب القصيدة وبالتالي الموضوع دا حقنا ، وأن كل من يحاول
التصنت معنا سيلحقه شهابا رصدا ، مش مرات بجيك شعور إنو الأغنية دي مفروض
تسمعا براك إن شالله يغنوها ليك بتردد أقل من 20 هيرتز، من هنا جاء رفضي للإستماع
إليها إلا من العطبراوي لأنه وحده يملك باسويرد البعد الثالث للغنيه..
لكن ، سبحان الله ، اتضح إنو الطيب عندو بعد رابع ليها .. كدي أسمعو وهو يطرح الأسئلة :
من كم سنه يا ستنا..

تتذكر العرض الجوي لسرب الميج زمان؟




من كم سنة ما قلتى لى
أخبارك إيه مالك مشيت من حيَّنا
لا جيتى مارة علينا يوم
زرتينا يا جارة الهنا
ولا قلتى أسأل عليهو
الزول قريبنا ومننا
؟



أصلو العلي ما مر يوم بخيال بشر..

غايتو



Post: #38
Title: Re: ما هذا يا الطيب مدثر ..
Author: محمد المرتضى حامد
Date: 07-25-2013, 07:31 AM
Parent: #37

Quote: الطيب حضور وفن وادب


شيقوق سلام،
لا أشك أن هذه بعض الأسباب التي لم يفصح عنها القرضابي،
أيضا يا شيقا الطيب - ناحية الغناء - يجوِّد ويتقن وهذا أمر
نفتقده في كثير من المؤدين (الأندروس ) هذه الأيام..



-

ست البنات
يا ست عذابنا وكلنا
مخلوقة انتى تعيشى فوق
وتكونى فوق ما جنبنا
ما ست سماحة وست جمال
ما زى بناتنا وزينا
.


(تاج السر عباس)


تقول لي المطر شال البردانه..
البردانه بتشيلا قلوبنا ياخ..

Post: #39
Title: Re: ما هذا يا الطيب مدثر ..
Author: عبدالرحيم أبراهيم العبيد
Date: 07-25-2013, 08:06 AM
Parent: #38

عندما
يتحدث
ويتغني
المبدعــــــــون
ما علينا الا الانصـــات
شكرا مولانا
شكرا للجميع
ورمضان كريم وكل عام والجميع بالف خير
وهل من مزيد

Post: #40
Title: Re: ما هذا يا الطيب مدثر ..
Author: الطيب شيقوق
Date: 07-25-2013, 10:48 AM
Parent: #38

Quote: ست البنات
يا ست عذابنا وكلنا
مخلوقة انتى تعيشى فوق
وتكونى فوق ما جنبنا
ما ست سماحة وست جمال
ما زى بناتنا وزينا


يا مرتضى ياخ القصيدة دي لا تجزأ ولا تبعّض لازم تلهمها القارئي كووووووووولها بدون شحتفة وكدا

بالله اقرا الابداع دا وهو متكامل :



صابر معاك صبرا طويل كاتم العلى
واصلوا العلى ما مرّ يوم بخيال بشر
لو قلتى قيس والله قيس بالنسبة لى
ما شاف عذاب لا ضاق ألم
لا قاسى مر
من كم سنة يا ستنا من كم سنة
عايش براى زى الغريب
وايامى فيها الضنا
من كم سنة قلبى الحزين
زى اليتيم
لا شاف حنان لا ضاق هناء
من كم سنة ما قلتى لى
اخبارك آيه مالك مشيت من حينا
ولا جيتى مارة علينا يوم
زرتينا يا جارة الهناء
ولا قلتى يوم أسأل عليه
الزول قريبنا ومننا
السمحة يا ست البنات
يا ست عذابنا وكلنا
مخلوقة انتى تعيشى فوق
وتكونى فوق ما جنبنا
ما ست سماحة وست جمال
ما زى بناتنا وزينا
تعبانه ليه ؟ ما تسألى
مجبور عليك أسأل أنا
صابر معاك صبرا طويل كاتم العلى



Quote: تقول لي المطر شال البردانه..
البردانه بتشيلا قلوبنا ياخ..


دا اكان نفطيها طلع صاح يا ابا اكرم .

Post: #41
Title: Re: ما هذا يا الطيب مدثر ..
Author: محمد المرتضى حامد
Date: 07-25-2013, 12:06 PM
Parent: #40

------أغنية أحاسيس أو حديث الحب هي من كلمات الشاعر عبدالرحمن الريح ولقد تغنى بها إبراهيم إدريس ود المقرن ثم إبراهيم عبدالجليل ولقد اعجبنى كثيرا أداء الفنان الطيب مدثر لهذه الأغنية ---------

أها يا ودالقرشي، أغنية حديث الحب دي هناك مواصفات محددة لمن يستمع إليها،
الطيب - وفقا لتجربتي - ينتقي ما يمكن أن يشارك به من أغنيات وفقا للحضور، يعني بيعمل معاينه للناس
ليحدد ببوصلته الجوه الجوه ما يطربه وينعشهم ،
لكنه في كل الأحوال لايغني للذين يستمعون بأرجلهم ..


Post: #42
Title: Re: ما هذا يا الطيب مدثر ..
Author: محمد المرتضى حامد
Date: 07-25-2013, 01:12 PM
Parent: #41

غايتو بي أختصار كدي يا مرتضى انا الكلمة الحلوة ..... والدلوكا حقتنا لما تهبق بخلوني معلق بين السماء والارض
وبنجذب إنجذابة درويش في حلقة أبونا الشيخ وما بكون واعي بقول شنو وبعمل في شنو ؟


خالد حبيبنا المامنسي وما منظور ينسانا،
أسمعني زين،
أي أداء لايُسكرك ويجعلك تتمرّغ في شجنك وتتوهّج في بدنك – كما قال الفيتوري - ويمزج أعضاك إجمالي
ويخليك ما تعرف شمالك من يمينك هو إهدار للوقت وإساءة استعمال للأذن وتبديد للموارد ،
لاتضع وقتك في أي أداء لا يجعلك ( تتألق حينا ، ثم ترنّق ثم تموت ) ..
إنت قايل العمر دا أردب سمسم لامن نبعزقو مع أنصاف الموهوبين..

Post: #43
Title: Re: ما هذا يا الطيب مدثر ..
Author: محمد المرتضى حامد
Date: 07-25-2013, 02:52 PM
Parent: #42

(في رمضان اكيد كفة رمضان ارجح )

ال khaleel يا فراهيدي،
كما ترى فإنني أمَّنت على ريادة رمضان في شأن (ليتني زهر) ،
نحن يا خلي حين تطربنا الأغاني نستصحب أمكنة وأزمنة وشخوص وذكريات بعينها، لذا ارتبطت (ليتني زهر) في ذاكرتي بأيام ندية
كان رمضان زايد فيها أحد مراكز البهجة ونافورة للفرح بروحه الحلوة .. مش كده وبس، كنتيجة لهذه الأذن النوستالجية امتنعت عن
الإستماع لأي أغنية أو مطرب جاء في ربع القرن الأخير إلا من رحم ربي واصطفى خاطري..

ربما هذا سبب تعليق الفيسبوكابي (بائع التبش) أدناه..

Post: #44
Title: Re: ما هذا يا الطيب مدثر ..
Author: محمد المرتضى حامد
Date: 07-25-2013, 05:30 PM
Parent: #43


(تاني ما بندم عليك وما براعي المابراعو..)

يا أمجد يا جميعابي،
كانت تلك خاتمة القرار الجمهوري الذي أصبح متداولا في دوائر الشباب في الخرطوم
هذه الأيام في وقت ظننا فيه أنهم - بسبب فرق الجمكسين - إلتفتوا إلى الخارج إلى غير رجعة،
أغنية (القرار) و (أعطف علي يا ريم) من الأغاني التي استقطبت آذان الكثيرين
مؤخرا وبالفعل يعيد الطيب إلينا الطرب القديم ليذهب الظمأ وتبتل العروق..

شكرا يا عزيز على (العزيزة)..


Post: #45
Title: Re: ما هذا يا الطيب مدثر ..
Author: محمد المرتضى حامد
Date: 07-25-2013, 06:43 PM
Parent: #44

Quote: عافى ليك يا محمد المرتضى وعافى لصديقى ود ام نعيم ده
غايتو تفطرو الزول لا ايده لا كراعه
انى امنت بالابداع حين يسكن الفنان،،،

حبيبك يانى انا حبيبك
حبيب قلبى البهاتيبك
ما تهتم بالعزال
وسيبك منهم سيبك

يامنشرى فى الاعصاب
وساكن فى السمع والشم
تعال لو صدت الأبواب
تعال ادخل مسارب الدم
ماتستنى منى حباب
ولا تكتب حضرت ولم

حبيبك ومن مجاذيبك
حبيب قلبى البهاتيبك
ماتهتم للعزال
سيبك منهم سيبك

فِرُّو حضورك الوضاح
تقوم بينا المحنه شدر
وبيك تتسامح الأرواح
ينوم موج البحر فى البر
يرك عصفورك الصداح
لا عاذل يقولك كر
ولافى مصيبه بتصيبك

حبيب قلبى البهاتيبك
ماتهتمه للعزال
وسيبك منهم سيبك


شايف يا موج محور الطيب - أزهري محمد علي؟
شايف الزول السمح لما يتشتت و(يَنشر) في الأعصاب ؟

تاني ما تكتب (حضرت ولم)..

تسلم..

Post: #46
Title: Re: ما هذا يا الطيب مدثر ..
Author: الطيب مدثر
Date: 07-25-2013, 08:42 PM
Parent: #45

تحية عطره من أعماقي الأخ الصديق مولانا محمد المرتضي لك الحب والاحترام والتقدير
وكل عام والجميع بخير ورمضان.كريم
أنا شاكر لك ولكل من تداخل فيما قلته عني من كلمات هي دافع وحافز اتمني أن أترجمه في تقديم ما يرضي جميع
من يتابع ما اقدمه من فن أملا أن أكون دائماً عند حسن الظن
لا يفوتني في هذا الشهر أن نترحم علي شاعرنا الراحل الأستاذ مبارك المغربي والأستاذ رمضان زايد
وتمنياتي بالصحة ،العافية لأستاذي عبدالله عربي الذي شارك في صياغة هذا اللحن الرائع والاروع طبعا هو أداء الفنان رمضان زايد
هذه الأغنية من الأغنيات التي اشترك في تلحينها أكثر من ملحن وهم الأساتذة عبدالله عربي متعه الله بالصحة والعافية
والمبدع الراحل برعي محمد دفع الله والفنان رمضان زايد وهذا هو نتاج الورش الفنية التي أمتعتنا بالكثير من الألحان
الجميلة والرصينة

لك مني ولكل القراء وآلمتداخلين الاحترام والتقدير
وسوف نتواصل بمشيئة الله

Post: #67
Title: Re: ما هذا يا الطيب مدثر ..
Author: محمد المرتضى حامد
Date: 07-27-2013, 09:57 PM
Parent: #40

Quote: يا مرتضى ياخ القصيدة دي لا تجزأ ولا تبعّض لازم تلهمها القارئي كووووووووولها بدون شحتفة وكدا

بالله اقرا الابداع دا وهو متكامل :


شيقوق،

قصيده زي دي مستحيل اسمعا دفعه واحده،

يا الطيب بيت زي:


ما سِت سماحة وست جمال

ما زى بناتنا وزيَّنا


ممكن تتسحَّر بيهو وتحس الإرتواء حتى مغرب يومك التالي أو ربما مغرب العمر زاتو..


كلام زي دا أكثر فعالية من أي Pacemaker ، وما تنسى يا بركه ، نحن
القليل من الجمال بيكفينا لانتظام الضغط والنبض ومستوى الجلكوز في الدم..


Post: #58
Title: Re: ما هذا يا الطيب مدثر ..
Author: محمد المرتضى حامد
Date: 07-27-2013, 10:04 AM
Parent: #33

Quote: Quote:
Quote: شفت الصوت دا بقـى رويان كيف ؟



*** أوســكاااار ...


فوَّتناها لدينا خالد وقلنا ليها الزول دا وزير للري ويغني ( تطيب ايامي من نبع إيثاري)
تقوم تَلحِّقا للقراء بالأحمر يا الطيب عثمان؟ ههههه..
أها ، جا عاطف عمر وفاتك إنت ودينا خالد والقطر بقا فيهو مفتش ..
في كل الأحوال بنقول للأحباب تستاهلو وكل بعيد ندعوه يجي (يدخل مسارب الدم)....

مودتي..

Post: #64
Title: Re: ما هذا يا الطيب مدثر ..
Author: صديق عبد الجبار
Date: 07-27-2013, 01:43 PM
Parent: #33

قبل ما تاخد قرارك ... كنت تتريث شوية

http://youtu.be/ia918mxMDdw

Post: #69
Title: Re: ما هذا يا الطيب مدثر ..
Author: محمد المرتضى حامد
Date: 07-28-2013, 11:48 AM
Parent: #64

(قبل ما تاخد قرارك ... كنت تتريث شوية )



شكرا يا صديق على الأغنية..
فيها نصح وعِبر تفيد الكثيرين..

Post: #47
Title: Re: ما هذا يا الطيب مدثر ..
Author: عاطف عمر
Date: 07-25-2013, 10:33 PM
Parent: #1

Quote: ما هذا يا الطيب مدثر ..

Quote: بمثل هذا الأداء ، اليُنسي الوقار ، تدخلنا دائرة الإدمان وتحشرنا في زمرة المدمنين..

بل ماهذا يا مولانا ؟؟
يا دووووووبك سوف ( تدخل دائرة الإدمان وتحشر في زمرة المدمنين ) ؟؟؟
أيجوز هذا وأنت المتوج رباناً لسفينة الإبداع ؟؟

أنكون قد سبقناك إلى محراب ذاك الفتى إدماناً وتكسيراً ؟؟

أى والله المعبود بالحق

أحببناه
وأدمناه
واللى كان كان

ولم يتركنا - سامحه الله - في حالنا
بل و ( طنبجها ) وصاهرنا في ( منالنا )

دا يقولوا عليهو شنو ؟؟

Post: #48
Title: Re: ما هذا يا الطيب مدثر ..
Author: محمد المرتضى حامد
Date: 07-25-2013, 11:31 PM
Parent: #47

Quote: الشائع عن الاغنية انها من كلمات مبارك المغربي وهي بالفعل تحمل
بصمته ومنسوجه علي مقاسه وتبدو بعيدة كل البعد عن طريقة
عبدالرحمن الريح...



عزيزنا هشام،

أشوفك ولى يرجع ...عقلي الدوام مسرّح

وأشكر لك اهتمامك بحديث الحب ولولاك و د.القرشي لما عرفت أن الأغنية للشاعر
الفنان صاحب القصائد الماسية ود حي العرب عبدالرحمن الريح..


Post: #50
Title: Re: ما هذا يا الطيب مدثر ..
Author: محمد المرتضى حامد
Date: 07-26-2013, 00:09 AM
Parent: #48

Quote:
استمعت لها فى تسجيل خاص ل(خوجلى عثمان) ومعه تكاد ان تنساق كل اوتارك مع خفقات قلبه ,
والتى تراها بوضوح وصفاء وهو يدندن (انا ليتنى عود فى صدرك الحانى) هنا تعجز عن ادراك ماهو
العود او الصدر او الوتر!!

التماهي..
دي حقيقه يا Balal Balal
رحم الله خوجلي النجم الذي خبا بعد التماع.. حظنا كعب والحمدلله ..
خوجلي عثمان إذا تغنى بأغاني الغير لايكون لديهم خيار غير (يحردوها) عديل ، واستطيع
تصور الإلتباس الذي حدث لك في تبين مايجري أهو أنين أم رنين هل المصدر الوتر أم الصدر
(يدك الممدودة أم يدي الممدودة) ..
يا عزيزي في تلك اللحظات تتعطل خاصية البصر وتبقى فقط البصيرة..


Post: #49
Title: Re: ما هذا يا الطيب مدثر ..
Author: الطيب مدثر
Date: 07-26-2013, 00:04 AM
Parent: #47

بل و (طنبجها ) وصاهرنا في ( منالنا)
دا يقولوا عليهو شنو ؟؟




يا عاطف انت البقولو عليك شنو طنبجتها وكشفت سر الإبداع سريع جداً

تحياتي

Post: #51
Title: Re: ما هذا يا الطيب مدثر ..
Author: محمد المرتضى حامد
Date: 07-26-2013, 08:43 AM
Parent: #49

Quote: RA Zena Awad Elmagzoub · Academie Minerva Groningen
هذا بوست كامل الدسم...

هل أتاك حديث الطرب وصِرتِ إلى ما صرنا إليه؟
شكرا الأخت Ra Zena

Post: #52
Title: Re: ما هذا يا الطيب مدثر ..
Author: د.محمد حسن
Date: 07-26-2013, 11:39 AM
Parent: #49

Quote: تحياتي


وتحياتي ليك يا فنان ولاخونا خضر مالك
كل عام وانتم بخير

Post: #53
Title: Re: ما هذا يا الطيب مدثر ..
Author: Osman Musa
Date: 07-26-2013, 03:14 PM
Parent: #52

ها ناس ها .
الطيب مدثر بي حالو في المنبر ؟؟؟؟؟؟؟؟
والله دي أجمل هدية في العام 2013 .
ياخ أنت نحن نفرش ليك السجاد الاحمر من كوع المنبر لا حدو .
يديك العافية
ولك التحيات المربعة .

Post: #54
Title: Re: ما هذا يا الطيب مدثر ..
Author: محمد المرتضى حامد
Date: 07-26-2013, 05:47 PM
Parent: #53

Quote: فعلا يا سعادتكـ .. ما هذا!!


عبدالرحمن الريح الذري إبن الحي الذري ، حي العرب ( مفاعل بوشهر) قال مخاطبا محبوبته:
ياخ الزهور صاحية وانت نايم!!
قام رمضان حسن شال البيان دا وقراهو على قوى الشعب العامل ومن يومها صارت الأغنية
ضمن ثرواتنا طويلة التيلة ..
شوف يا ودالصايم، لامن تلاقي أفراد الفرقة الموسيقية مبتسمين خفيفين جزلين والكمنجات في حالة
فرح والبيزجيتار يؤكد وجوده في الخلف كوزير دفاع للأوركسترا في مشاوراته مع الطبول ،
والحضور مافي شئ مقعدهم في كراسيهم إلا بقية وقار قابل للإنهيار ، هنا فقط تعرف إنو المطرب
نجَّض شغلو وقبقب الناس وقلى قلوبم قلي..
الطيب مدثر في سالفة مداعبة النسائم وحكاية من قام ثمل من مرقده ، قدم مهرجانا على إيقاع
الريقي يحسده عليه دهاقنة الكاريبيان وصعاليك الغناء في جمايكا وسانتالوتشيا ..
بالله شوف مثلث برمودا في النوته دي :..




Post: #55
Title: Re: ما هذا يا الطيب مدثر ..
Author: Osman Musa
Date: 07-26-2013, 06:35 PM
Parent: #54

يا محمد المرتضي ياخ هي الزهور صاحية ونحن ننوم ؟
ياخ أنشاءالله ننوم السهر .
..
عاين .
قالوا وأحد زهجان من أرتفاع سعر الفيتريتا قام قال لبتاع الفيتريتا ياخ أنشاءالله سد الألفية يجي ويشيلكم ويخمكم زأتو .
ياخ البخلي الزهور صاحية وبعض الناس متجدعين شنو ؟
مبالغة يا مدثر

Post: #56
Title: Re: ما هذا يا الطيب مدثر ..
Author: عمر علي حسن
Date: 07-26-2013, 08:47 PM
Parent: #55

Quote:
لك مني ولكل القراء وآلمتداخلين الاحترام والتقدير

هذه فوق البيعه !!

ولأني جالس القرفصاء .. اصغي فقط .. ولا اجد سندا من لسان اخرسه الطرب .. فقد اعتبرت نفسي من الفئة الاولي لاقتنص لنفس شيئا من
فيض هذا الاحترام والتقدير .. يستحقه العاجز مثلي الا عن الاستماع والاستمتاع ... وليأجرنا الله علي علي فقدنا القدرة علي التداخل ...

هنا بحر لا تخوض فيه الحجارة

عمر علي حسن

Post: #57
Title: Re: ما هذا يا الطيب مدثر ..
Author: محمد المرتضى حامد
Date: 07-26-2013, 10:42 PM
Parent: #55

Quote: ولانك عارف اخوك بموت في الطرب البدخل الزول تحت التربيزة
اغيزك حبتين

يا دوك..

سهره مع الطيب لامن البيّاح بيَّح ، وفقا لروايتك التي صورت فيها ما حدث بإيجاز وإتقان ، لا
يسعني إلا أن أقول لك يا محمد إنها (سعادة الكُبُر)..
لكن يا حبيبنا كان ذلك منذ سنوات فما بالك إن مررت بتجربتين مماثلتين منذ أسابيع..
أوفر دوز ، مش كدا؟

عارف يا محمد ، مثل هذه اللحظات يجب أن تتحاشاها إذا لم تكن ضمن ( رفقة آمنة) طلبا للسترة،
لأنو ببساطه شديده ممكن في بعض حالات الخَدَر والتنويم المغنطيسي تهستر والناس تشيل حالك ،
ول أقول ليك ، خليهم يقولوا زي ما الناس يقولوا و( سِيبك منهم سيبك)..
هذا يذكرني بما سبق أن أشرت إليه هنا بما روي كثيرا عن عمنا الراحل العظيم مختار عباس وهو صديق معروف
للراحل أبوداؤود وعلي المك كما تعلم ، بأنه في قمة طربه لغناء أبوداؤود كان بيشرِّط جلابيتو ، وكان إذا
طلب أحدهم أغنية كمساء الخير يكون رد أبوداؤود : ما عندي مانع ، بس قبل الغنا شوفو لمختار دا
عراقي قديم..
طبعا أمثالنا لا يسمعوا من الطيب ( لوموهو اللاهي) إلا في قسم الطوارئ أو جنب الإسعاف..


Post: #59
Title: Re: ما هذا يا الطيب مدثر ..
Author: محمد المرتضى حامد
Date: 07-27-2013, 10:42 AM
Parent: #57

الأعزاء Aiman Awad

Alwia Saeed

بالحيل ، الطيب ومصطفى السني ، ضمن قلة من الموهوبين المجددين المجوِّدين ، أصبحوا من موزعي
أسطوانات الأوكسجين في زمن التلوث وتسرب الكاربون دايو ومونوكسايد من حولنا والإستماع إليهم
أنجع أثرا من غرف الإنعاش ..


Post: #60
Title: Re: ما هذا يا الطيب مدثر ..
Author: عبيد الطيب
Date: 07-27-2013, 10:45 AM
Parent: #57

Quote: أسمعني زين،
أي أداء لايُسكرك ويجعلك تتمرّغ في شجنك وتتوهّج في بدنك – كما قال الفيتوري - ويمزج أعضاك إجمالي
ويخليك ما تعرف شمالك من يمينك هو إهدار للوقت وإساءة استعمال للأذن وتبديد للموارد ،
لاتضع وقتك في أي أداء لا يجعلك ( تتألق حينا ، ثم ترنّق ثم تموت ) ..
إنت قايل العمر دا أردب سمسم لامن نبعزقو مع أنصاف الموهوبين.



والله صدقت يا سماحة المستشار
عندي صاحبي أعجب بصوت والدي في مديح المصطفي صلوات ربي وسلامه عليه
وكان يتردد علي الوالد كثيرا للإستمتاع بأ مداح ليلي وتخميسات القوم
اها مرة سمعني أدندن ولاحظ الفرق والبون الشاسع مابين صوتي والوالد
فخاطبني قائلا " ياخي كان داير تبر والدك وكان بتحب الرسول محبة صادقة
عليك الله ما تمدحو بي صوتك دي جهرا..........!

ياخي الطيب مدثر ......
فناّن طروب وتتفجر ينابيع الشّجن الدفين من شراينه
واظنه هدية السماء لنا بعد هذه الأصوات "الشُتر" وتنابلة الطرب "البو"

بوست جميل بجمال صوت الطيب مدثر
محبتي

Post: #61
Title: Re: ما هذا يا الطيب مدثر ..
Author: محمد المرتضى حامد
Date: 07-27-2013, 01:07 PM
Parent: #60

Quote:
وقار .. وقار .. وقار . حدو متين الوقار ده ؟؟
أنت عارف يا محمد ؟ ياخ عمك بيل كلينتون ده ما فاز الا بعد ما نزل للشعب وبي الساكسفون
في مدينة مينفس وراح عازف ليهم أغنية حتي الطيف رحل خلاني للفنان الشايقي القديم كلارك هاريسون *.

يا عثمان ،
ناسكم اليانكيز ديل انتخبوا ريقان لأنو ممثل ، تخيل إنو الحاجه الوحيده التي أقدرها للمدعو كلينتون
عزفه للساكس ولعل الناس حمدوا له تلك الموهبة ( لا شك عندو مواهب تانيه معروفة ..) ،
طبعا بعض أحبابنا الأحباش قاموا بعمليات مونتاج للقطات عزفه للساكس على نغمات إثيوبية حتى يخال
إليك أن العزف ل Yared Tefera
.. ياخ الشعب اليوناني لم يحب سياسية أكثر من وزيرة ثقافته الممثلة القيافه وفايته الناس مسافه الراحلة
أماليا ماريا (ميلينا ميركوري) التي قدمت لليونان أضعاف ما قدمه رجالها المِصرصرين وشوشم ومركِّبين أزبلايت
وعاملين جادين وكدا..

الذين يطربون للفن والجمال يا عثمان أناس أصحاء يتبنون ويتجاوبون مع دواخلهم بشفافية وهذه قمة الصدقية
وأعلى قمم الوقار..
إنت قايل شنو..




*
بالمناسبه ،أغنية الطيف للسمح الراحل محمد كرم الله دي يا ود موسى أيام المدرسة كان ممكن أدك ليها أجعص حصه..


Post: #62
Title: Re: ما هذا يا الطيب مدثر ..
Author: د.محمد حسن
Date: 07-27-2013, 01:22 PM
Parent: #61

Quote: فما بالك إن مررت بتجربتين مماثلتين منذ أسابيع..
أوفر دوز ، مش كدا؟


I C U
مع سبق الاصرار والترصد

Post: #63
Title: Re: ما هذا يا الطيب مدثر ..
Author: Osman Musa
Date: 07-27-2013, 01:38 PM
Parent: #61

تتذكر يا محمد أيام عصر المحكمة لكلينتون ؟
تتذكر عصر المحلفين والتسجيلات وكلام الشهود ؟
تتذكر الوعلة مونيا والدمع الاتشتت و أريرررررررريا . ؟؟؟
يا محمد ديك الأيام مافي شيء نفع الرئيس خلاف عزفو للسكسفون وحبو للجمال .
زولك عفريت يا محمد قدر يعرف يهبش الشعب وين .
الشعب محتاج هامبيرقر وعزف الجميلة ومستحيلة .
الشعب محتاج يحلم بحاجات كويسة .
مالو ومال كوابيس المحاكم .
عزفو وحب الناس وطيبتو دي الحاجات النفعنو والحتنفعو بعد موتو . والبتخلي الناس تقيف معاو .

Post: #65
Title: Re: ما هذا يا الطيب مدثر ..
Author: محمد المرتضى حامد
Date: 07-27-2013, 04:04 PM
Parent: #63

Quote: الطيب مدثر صوت نقي وعذب ومموسق يغوص في شغاف القلب

إنها الموهبة الصقيلة المتبوعة بتجويد وإخلاص مصفى،
إضافة إلى الصوت المائز فإن الطيب محب للموسيقى لذا تجده ملحن ناجح
لأغانيه الخاصة، ورغم أنه له من الملحنين الشوامخ نفر كريم منهم القامة
الراحل برعي محمد دفع الله وسليمان ابوداؤود وعمر الشاعر واللواء أبوقرون
ود. عبدالماجد خليفة ود. يوسف حسن الصديق إلا أن معظم أغانيه من ألحانه،
الخاصة ، لذا تلحظ فيها اتفاقا بين الصوت واللحن وتحالف وانسجام من الوريد إلى الوريد ..
الطيب يلحن ويؤدي ويَطرب ويُطرب متمثلا في ذلك قول العباسي :

لنا الكؤوس ونحن المنتشون بها ....منا السقاة ومنا الصادح الشادي

شكرا على كلامك الطيب عني وعن الطيب

Post: #66
Title: Re: ما هذا يا الطيب مدثر ..
Author: محمد المرتضى حامد
Date: 07-27-2013, 08:15 PM
Parent: #65

بحسب دقايق الليل .. أنا والنجم زملان
تابع هواك ومجافى .. الأهل والخلان
يا العالي صدرك .. ومال ضميرك الهزلان
لو عينى تنظر خدك .. إن متّ ما زعلان


يا عبدالرحيم،
ذات زيارة للراحل بادي مع د. أحمد القرشي في منزله بالعباسية ، تقدم نحونا إبن أخته
(عباس) ليكرمنا بما تيسر إلا أن بادي بادره : ياخ ديل ما بيكرموهم إلا بالغنا،
واعتدل الشيخ طه في جلسته وغنى لنا بصوت لن يتكرر ( مرضان باكي فاقد ) ،
أها والله في زيارتك لهذا البوست قلت أكرمك بأبيات المدهش أبوصلاح بصوت
هذا الشاب الصداح..

http://www.youtube.com/watch?v=AbV9792Bmko[/B][/green][/center]

Post: #68
Title: Re: ما هذا يا الطيب مدثر ..
Author: محمد المرتضى حامد
Date: 07-28-2013, 07:29 AM
Parent: #66

Quote: هذه الأغنية من الأغنيات التي اشترك في تلحينها أكثر من ملحن وهم الأساتذة عبدالله عربي متعه الله بالصحة والعافية
والمبدع الراحل برعي محمد دفع الله والفنان رمضان زايد وهذا هو نتاج الورش الفنية التي أمتعتنا بالكثير من الألحان
الجميلة والرصينة



عزيزنا الطيب،
كان لابد أن تكون تلك عناصر هذا العمل الجميل المتكامل، المغربي وبرعي وعربي ورمضان زايد
وجود أي منهم كفيل بالتبشير بعمل بعلو السحاب فما بالك بمؤتمر القمـة الفني هذا ،
برعي محمد دفع الله - عليه الرحمة - لو وجد في بقعة أخرى من الأرض لاحتُفي به بما يزيد
على موتزارت ، ما أن يضع ألحانه على حروف ، حتى لو كانت محدودة الجمال ، تجدها اهتزت
وربت وأنبتت كل فرح بهيج..

لك الشكر أيضا على تولي مسؤولية إمتاع الناس في الزمن العبوس..


Post: #70
Title: Re: ما هذا يا الطيب مدثر ..
Author: عماد شمت
Date: 07-28-2013, 01:16 PM
Parent: #68

الطيب رمضانك كريم وتصوم وتفطر علي خير

ياخي المرة دي خليك مع محبيك ومعجيبك مش تعمل ليك مداخلة واحد وتمشي وما تجي ذي هلال رمضان

وبالله تحياتي للاولاد وامهم وكل ناس نادي جنوب ولو لاقيت ناس المركز برضو تحياتي لجميع الاخوان

لكم جميعا مودتي وتحياتي مع امنياتي الطيبه للجميع دوام العافيه

Post: #71
Title: Re: ما هذا يا الطيب مدثر ..
Author: محمد المرتضى حامد
Date: 07-28-2013, 05:33 PM
Parent: #70

Quote: يا دووووووبك سوف ( تدخل دائرة الإدمان وتحشر في زمرة المدمنين ) ؟؟؟
أيجوز هذا وأنت المتوج رباناً لسفينة الإبداع ؟؟

أنكون قد سبقناك إلى محراب ذاك الفتى إدماناً وتكسيراً ؟؟

لاشك في ريادتك مواطن الجمال قبلي يا عاطف ، ولا أدري حقيقة تاريخ تعرفي إلى الطيب
كفنان قبل أن أتعرف إليه كإنسان وما إذا كان ذلك قبل عقد أو قرن أو في عهد الرشيد،
لكن لو كنت من المؤمنين بالتقمص كنت سأزعم أني التقيت به في إحدى حيواتي السابقة
في أثينا القديمة في حضرة أبولو، وربما يرجع السبب في عدم دقة التاريخ إنو الواحد
يا عاطف ، في الغربه تحديدا ، يصاب بحالة تشويش في أجهزة قياس الزمن، صدقني لا أعرف
متى حدثت لي الأشياء الجميلة وهذا ليس المهم لكن ما يهم هو أثر تلك الأشياء
علي الآن ،
نسأله تعالى – في جانب الفن - أن يديم علينا نعمة الإدمان ، أنتم السابقون..

صاحبك ودمدثر دا أنا عارفو ما ترككم في حالكم وعارفو (طمبجا) للكثيرين ونيابة عنهم
أقول ربنا يسامحو ..

والله يا عاطف من محاسن هذا البوست إنه جابك لينا بعد غياب....
مودتي ..

Post: #73
Title: Re: ما هذا يا الطيب مدثر ..
Author: محمد المرتضى حامد
Date: 07-28-2013, 11:49 PM
Parent: #71

Quote: ولأني جالس القرفصاء .. اصغي فقط .. ولا اجد سندا من لسان اخرسه الطرب .. فقد اعتبرت نفسي من الفئة الاولي لاقتنص لنفس شيئا من
فيض هذا الاحترام والتقدير .. يستحقه العاجز مثلي الا عن الاستماع والاستمتاع ... وليأجرنا الله علي علي فقدنا القدرة علي التداخل ...

هنا بحر لا تخوض فيه الحجارة

لا والله ما أنت بعاجز ولا حرفك قُد من حجر، كم نهلنا من سلسبيل حديثك وكم حكيت لنا
عن أمكنة (من ألف ليلتها للآن يعبق عطر التلاحين) ، نحن يا أبا أمير ، على قلة الزاد
وأنيميا المفردة ، نحاول أن نشرك الأحباب في ما نحسه جميلا عساهم يصححوا مسار الروح
فينا لو انحرف ، ويا مولاي لايكتمل فينا الطرب إلا إذا أسكر عارفيه وأهله وأقطابه
وبعدها يُؤذَن لنا بهِزة الطرب،
يا سعادتك، كلما زادت مساحات الجمال تقلصت أفدنة الكراهية والبلوى وأكوام الغبائن الغلبت ناسا ،
لذا نحتفي بناس زي الطيب ، فهم من وقت لآخر يخرجونا من عقلنا البارد البليـد المنحوت من ضجر ،
وكما قال الجواهري العظيم ، يغسلوا الهم في ثغرٍ وفي حبب ويُلبِسوا العقلَ أزياءَ المجانينِ ..


Post: #74
Title: Re: ما هذا يا الطيب مدثر ..
Author: محمد المرتضى حامد
Date: 07-29-2013, 09:31 AM
Parent: #68

Quote: عندي صاحبي أعجب بصوت والدي في مديح المصطفي صلوات ربي وسلامه عليه
وكان يتردد علي الوالد كثيرا للإستمتاع بأ مداح ليلي وتخميسات القوم
اها مرة سمعني أدندن ولاحظ الفرق والبون الشاسع مابين صوتي والوالد
فخاطبني قائلا " ياخي كان داير تبر والدك وكان بتحب الرسول محبة صادقة
عليك الله ما تمدحو بي صوتك دي جهرا..........!




شكرا يا عبيد على انتزاع الضحكة ..
شوف يا حبيبنا .. بالنسبه للمدح تحديدا ما كنت من أنصاره لأنه كان يذكرني
بنهار الجمعة والراديو وأنني قطع شك لم أنجز الواجب المدرسي وأنت أدرى أن حصة الحساب
ولدت معنا على أنها أول حصه يوم السبت ، ومنذ تلك الفترة ارتبط لي صوت الطار بقرب المحاسبة
للإهمال في الفروض ونهاية الويك إند وهذا ما لم يحبب لي المدائح وأدبها وقتها، لكن تبدل الحال
بالطبع ، ومنذ مدة زارنا طبيب شاب أنشدنا قصيدة في مدح المصطفى بعنوان (حنين الجذع)،
والله والله يا عبيد الزول لجمال صوته وعمق معاني قصيدته بشتن الواقف والقاعد ، لم يتمالك أي مستمع
نفسه فأبكى بصوته وكلماته كل من حباه المولى قلبا سليما..
ياخ الدموع دي قاسم مشترك في كل المشاعر ومعروف أنها من المطهرات للروح قبل المحاجر...

صلى عليك الله يا حبيبنا المصطفى وسلم..

Post: #75
Title: Re: ما هذا يا الطيب مدثر ..
Author: محمد المرتضى حامد
Date: 07-29-2013, 10:35 PM
Parent: #74

-
Quote: فوق..رمضان كريم للجميع


ناهد ..

لما شفتك زاهية صورتك في جمالا
من عواطفك زايدة نورتك وباقا مالا
شفنا نيران في خدودك والنسيم ميل بعودك
مين بقدر يفوت حدودك والسروف خيرات جدودك


(العديل والزين) من أغاني السيره التي تولى الطيب - بكل هدوء - إيصالها
إلى أسماعنا بالطريقة التي ينبغي أن تؤدى بها لتتفق مع الفرح وأماني
الأخيار الطيبة التي حفلت بها الأغنية فانتشت بها كل الفئات العمرية هنا،

طرب رأسي وأفقي ..
ورمضان كريم ..


http://www.youtube.com/watch?v=lLoAvuHcYxk

-