Post: #23 Title: Re: أجمل تسجيل لهذه الأغنية الإستثنائية.. Author: khaleel Date: 10-25-2011, 11:15 AM Parent: #22
وكيف نضيع احلي ما اهديت يا غالي
Post: #25 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-25-2011, 11:40 AM Parent: #23
الموج
Quote: غناء زى ده بنشم، بنضاق،بنحس
وحياة ربي انت ابو المسانيح ذاتم
Quote: انت ما بتعرف جلابية بيضاء مكوية زى جلابيتك دى؟؟
عليك بباب شريف بجدة - لكن القماش دا ببيعوهو بالدس بس - ما عارف ليش اصلو ....؟
المرتضى
عليك النبي صورة زيدان دى جبتها من وين ؟
Post: #26 Title: Re: أجمل تسجيل لهذه الأغنية الإستثنائية.. Author: Tayseer Elmobarak Date: 10-25-2011, 11:43 AM Parent: #23
يا الله ...
حمدا لله على السلامة ...
Post: #27 Title: Re: أجمل تسجيل لهذه الأغنية الإستثنائية.. Author: mamkouna Date: 10-25-2011, 11:45 AM Parent: #23
لما سألوا بشير عبد الماجد عن مناسبة قصيدة "كنوز محبة" قال ليهم : أسألوا القصيدة...
....
ابقى أسأل عن قلوبنا
Post: #28 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-25-2011, 01:07 PM Parent: #27
Quote: ابقى أسأل عن قلوبنا
والبيسأل ما بيتوه.
يا راويه،
رحم الله صديقنا محمد الفاتح الجزولي القائل في (بين السماء والأرض):
(الله يا طوق النجاة وملجأ المعنى المهوم والفؤاد التائه الأضلاع زاوية الوجيب)
Post: #29 Title: Re: أجمل تسجيل لهذه الأغنية الإستثنائية.. Author: رانيه محمد الشيخ Date: 10-25-2011, 01:15 PM Parent: #28
nice
Post: #30 Title: Re: أجمل تسجيل لهذه الأغنية الإستثنائية.. Author: Osman Musa Date: 10-25-2011, 01:36 PM Parent: #29
دي كنوز محبة ؟؟؟؟ يا ود حامد ياخ دي كل ما في باطن الأرض من درر من اليمن لي الشام . .. يا ود شيقوق السلام مربع وحاتك .
Post: #31 Title: Re: أجمل تسجيل لهذه الأغنية الإستثنائية.. Author: الزاكى عبد الحميد Date: 10-25-2011, 01:50 PM Parent: #29
والله ما عارف أقول شنو! بالجد كدا! مرتضى ازيك ياااخ!
Post: #32 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-25-2011, 02:37 PM Parent: #31
Quote: عليك النبي صورة زيدان دى جبتها من وين ؟
يا الطيب، شرفنا الراحل بإحياء حفل (حنة) شقيقي الرشيد منذ عامين بدارنا المتواضع وهذه الصورة بكاميرا العبد لمولاه.. يعني عندي فيها حق ملكية فكريه وما يجاوره وحذاري (تخمِشا) أصلو إيدك very light
Post: #33 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-25-2011, 02:57 PM
أستاذنا الجميل محمد سني، ذكرتني الوطنيه امدرمان لامن الفيلم يقطع، أرجو أن تكون سمعت التسجيل من الرابط الثاني أو ما أضافه مشكورا طارق جبريل كرابط حفظ. زيدان زول تاني يا أبا السهروردي، مزيل للكدر ومجمِّل لدواخل البشر ، صديقي الفاتح ميرغني قال لي كان أهم لينا من البترول.. لكن لانقل إلا ما يرضي الله..
Post: #34 Title: Re: أجمل تسجيل لهذه الأغنية الإستثنائية.. Author: طارق الكوتش Date: 10-25-2011, 03:04 PM Parent: #33
مرور من اجل السلام و التحية
والتشكرات البنفسجية
على هذه الالحان الندية
Post: #35 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-25-2011, 03:15 PM Parent: #34
عثمان موسى
كيفك ياخ ؟
الشوق ليك ولكل الاهل مطر
Post: #36 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-25-2011, 03:25 PM Parent: #35
Quote: يعني عندي فيها حق ملكية فكريه وما يجاوره وحذاري (تخمِشا) أصلو إيدك very light
بعد إيه ؟؟ علا كان حظرك بيسري بأثر رجعي؟
Post: #37 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-25-2011, 04:00 PM Parent: #36
Quote: مرتضى .. شكيتك علي الله.
جزيت خيرا ، فقد شكوتني لعادل لا يظلم أبدا يا أبا العزائم، عندما كنا في النهود الجميلة (المدينة أقصد) زارنا زيدان بمعية عدد من الفنانين وأقاموا حفلا ساهرا بمسرح سينما النهود ، دون ذكر أسماء بقية الفنانين ، سار الحفل بشكل عادي ، ولكن ما إن ارتقى زيدان المسرح حتى إهتزت جوانب السينما وتزلزلت ب 6.6 درجات على مقياس ريختر حتى شعر بتلك الهزة سكان القرى والبلدات المجاورة كمُركب وأم صِميمة وغبيش وخماس السعاته وصُقع الجمل وفزع أهالي الخوي الغنى ليهم عبدالقادر سالم ( زارعنا في الخوي جنجن خدارا لي) وعندما شدا ب (ماأصلو ريدا أصبح حياتي ) أعلنت حالة الطوارئ في كل غرب حمر وتأهبت حامية الأُضَيَّة كإجراء إحتياطي وإستعداد بالدرجة البرتقالية لما قد تسفر عنه الأغنيات الفلكية..
فقدناك يا عندليب..
فقدناك..
Post: #38 Title: Re: أجمل تسجيل لهذه الأغنية الإستثنائية.. Author: عبد الحافظ خضر Date: 10-25-2011, 04:37 PM Parent: #37
سلامات مرتضي اما هنا فتسيل كنوز المحبة اودية وافلاجا.......
لك المحبة والتحيات دوما
Post: #39 Title: Re: أجمل تسجيل لهذه الأغنية الإستثنائية.. Author: عمر علي حسن Date: 10-25-2011, 04:49 PM Parent: #37
Quote: ومغبون..
صدقني يا طارق بسأل نفسي هل بعد فراق زيدان لسه النيلين بيتلاقوا؟
وددت ان اراهما بعد زيدان .. وبعد الاحزان المترعه علي شطآنهما .. لا بد انهما يتعانقان في حرقة واسي علي فتي العباسية الممتدة جذوره الي رهيد البردي والذي نثر علي السودان كله كنوزا من المحبة والرفق لو نهلنا منها ما اصابتنا فرقة ولا كدر
ياشيخي سابكي مجددا ثم اعود اليك بما ينوء به قلبي المحب لهذا الساحر الفنان .. الذي رحل
غير المتصفح ممكن Google Chrome يا رئيس لانو الاغنيه سمحة متل اقوان سادومبا فى المريخ و التسجيل رائع روعة تمريرات البرنس القاتله ديك ............................. القلب براهو ماااا بنفع
Post: #41 Title: Re: أجمل تسجيل لهذه الأغنية الإستثنائية.. Author: عمر علي حسن Date: 10-25-2011, 07:19 PM Parent: #40
Quote: ممكن Google Chrome يا رئيس
يا كوتش GOOGLE CHROME ده ود منو
عمر علي حسن
Post: #42 Title: Re: أجمل تسجيل لهذه الأغنية الإستثنائية.. Author: سيف الدولة كامل Date: 10-25-2011, 08:02 PM Parent: #41
وجع يا ود المرتضي ,,
زيدان نسمة رقيقة جميلة معتقة عطرت الساحة الفنية بأجمل الالحان .
له الرحمة والمغفرة ,,,, ولك الشكر يا مولانا علي الاختيار الرائع.
Post: #43 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-25-2011, 08:22 PM Parent: #42
طارق الكوتش
Quote: ممكن Google Chrome يا رئيس لانو الاغنيه سمحة متل اقوان سادومبا فى المريخ و التسجيل رائع روعة تمريرات البرنس القاتله ديك ............................. القلب براهو ماااا بنفع
بحس في إستايل كتاباتك لونية مرتضى
قريبك ولا mere coincidence منهجي ؟
Post: #44 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-25-2011, 08:32 PM Parent: #43
Quote: أسعد الله صباحاتكـ وأيامكـ كلها!!
_
والحنان الفي عيونا أصلوا نابع من عيونكـ!!
عارف يا ود الصائم، قبل شويه كان بيتكلم معاي صديقي د. علي عوض يوسف عن مشاهدته على قناة فضائية حفل تأبين تم في العباسية لزيدان ، قال لي أن منظم الحفل حكى أن بعض الأشقاء الجنوبيين ممن غادروا إلى الجنوب عندما بلغهم نبأ رحيل الحبيب زيدان أرسلوا مشاركات ماليه ل (كشف العزاء) عن طريق تحويل أرصدة هاتف لإخوانهم ممن بقوا في الشمال وقد وصلت المساهمات إلى حيث أريد لها.. زيدان ياودالصائم لم يكن مغنيا ولا مطربا بل كان مؤسسة إجتماعية كاسحة جمعت حولها كل السودانيين على اختلاف أعراقهم ومشاربهم السياسية وطوائفهم وهذا ما فشل فيه كل ساسة السودان وأحزابهم بلا استثناء.. أغنية زي (كنوز محبة) لها مفعول نووي ولكن - سبحان الله - مضاد للتشظي وأثر وحدوي يفوق كافة المؤتمرات منذ المستديرة وحتى المستطيرة..
إنت قايل زيدان رحل (جسدا) من هيِّن!!
سمعت بالغبينه يا محمد؟
حكوا ليك عن الفشفاش المهرود و حَش الكبِد والحشا المحروق؟
يحفظك مولاي ..
Post: #45 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-25-2011, 08:38 PM Parent: #44
Quote: زيدان ياودالصائم لم يكن مغنيا ولا مطربا بل كان مؤسسة إجتماعية كاسحة جمعت حولها كل السودانيين على اختلاف أعراقهم ومشاربهم السياسية وطوائفهم وهذا ما فشل فيه كل ساسة السودان وأحزابهم بلا استثناء.. أغنية زي (كنوز محبة) لها مفعول نووي ولكن - سبحان الله - مضاد للتشظي وأثر وحدوي يفوق كافة المؤتمرات منذ المستديرة وحتى المستطيرة..
اصدقك القول اخي المرتضى وتاني ما تزيد عليك النبي
Post: #46 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-26-2011, 05:32 AM Parent: #45
Quote: والنجوم تلمع بعيد تسخر من السهران وحيد
بالله شوف.. أتصورها في مجراتها بنصف إبتسامة أسى وبنصف حزن لما رأت صاحبنا اليتيم(المستجد) في دنيا الأرق.. والله يا الأمير بدر ، تعبير (الليل يبقى ليل) لايفي معنى ظلمات البحر اللجي البعضها فوق بعض وحسب بل الضياع الخرافي الأبدي في نفق الثقوب السوداء .. عارف هنا ، وسيلة الرؤية الوحيدة هي القلب .. (ثم أغمض عينيك حتى تراني).. عشان كده زيدان في التسجيل دا قال إن شاء الله تصل للناس من جوه القلب لجوه القلب .. بالصوره البتعجبني.. بالصوره البتحبوني بيها..
شي صعب ..
صعب ..
Post: #47 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-26-2011, 07:41 AM Parent: #46
Quote: يا ربيـع !
يا ربيــع !
Post: #48 Title: Re: أجمل تسجيل لهذه الأغنية الإستثنائية.. Author: صديق الموج Date: 10-26-2011, 08:00 AM Parent: #47
Quote: عندما كنا في النهود الجميلة (المدينة أقصد)
مولانا!!!!! ياخى دعنا نشكلها كما نحب.. ونقرأها كما نريد... واعفنا من الدخول دهاليز النحويين .. والشسرح المفسد الذى اكره ويمقت الكثيرون ممن مروا من هنا.. وخلينا نعالجها كل حسب اثر كبسولة الفرح التى تخلقت في دواخله من غناء الطروب زيدان.. بالله انتو ناس فى دنيا واللا حور فى جنان؟؟ لاحولالالالالالالالالالالالالالالالالالالا،،،
Post: #49 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-26-2011, 08:22 AM Parent: #48
Quote: واعفنا من الدخول دهاليز النحويين ..
ياخ انت اكبر مسنوح في الدنيا
شوف خمشا كيف ؟ زى الحدية
إسبرنغ إسبرنغ
Summer , spring , autumn
عيييييييييييييك
التصليح لزوم نسيت ونتر
Post: #50 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-26-2011, 08:39 AM Parent: #49
Quote: والمحبة فيها لو ما إنت ما كانت محبة ....
وزيدان عارف الكلام دا كويس يا نصر ، يعرف أن هناك أناسا يمنحون الأشياء معناها، لذا تجده يغني : من بعدِك أنتِ يعيش منو ومين تاني مين يتمنى العمر.. المسأله ببقى مافي ليها داعي ..
كلو كلو..
Post: #51 Title: Re: أجمل تسجيل لهذه الأغنية الإستثنائية.. Author: صديق الموج Date: 10-26-2011, 08:57 AM Parent: #49
Quote: ياخ انت اكبر مسنوح في الدنيا
شوف خمشا كيف ؟ زى الحدية
هسه فى زمتك المسنوح منو فينا؟؟ غايتو جنس غايتوهات!! بس زى ماقال شاغل الدنيا المتنبى: و جــرم جـــرّه ســفــهــاء قــــوم*** فـَـحـَـلّ بـغـيـر جـارمــه الــعــذاب
Post: #52 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-26-2011, 09:19 AM Parent: #51
Quote: غايتو جنس غايتوهات!!
ههههههها جننتها جن - إيمين سيبويه ما بجمعها كدا
Quote: بس زى ماقال شاغل الدنيا المتنبى: و جــرم جـــرّه ســفــهــاء قــــوم*** فـَـحـَـلّ بـغـيـر جـارمــه الــعــذاب
صدق زهير إبن أبي سلمى حين قال :
وإنَّ سفاه الشيخ لا حلم بعَدهُ وإن الفتى بعد السفاهة يحلُمُ
عيييييييييييك خم وصر يا ود الموج
Post: #53 Title: Re: أجمل تسجيل لهذه الأغنية الإستثنائية.. Author: صديق الموج Date: 10-26-2011, 09:28 AM Parent: #52
Quote: صدق زهير إبن أبي سلمى حين قال :
وإنَّ سفاه الشيخ لا حلم بعَدهُ وإن الفتى بعد السفاهة يحلُمُ
عيييييييييييك خم وصر يا ود الموج
ود القبائل ..حبابك
لا اكابر فبنا طمسه لم تستطيع السنون ان تمحها.. يخاويها شوق لبعض نزق ومآرب قضاها الشباب هناك تحبب الينا الاوطان، لا فكاك منهما وما انا براغب،،،
Post: #54 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-26-2011, 09:37 AM Parent: #53
الحبيب ود الموج
Quote: لا اكابر فبنا طمسه لم تستطيع السنون ان تمحها..
ياخ دى في حد ذاتها نعمة من نعم الله علينا
Post: #55 Title: Re: أجمل تسجيل لهذه الأغنية الإستثنائية.. Author: ناصر يوسف Date: 10-26-2011, 09:47 AM Parent: #51
رحم الله
زيدان إبراهيم
رحمةً واسعة
بقدر ما قدم لفنه وبقدر ما قدم لإنسان وطنه من فنٍ راقٍ إستطاع أن يُعلمنا معني الحُب العفيف الطاهر
شكراً علي هذا البهاء هنا
وبالفعل يعتبر هذا التسجيل من أرقي التسجيلات لهذه الأغنية
Post: #56 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-26-2011, 11:08 AM Parent: #55
Quote: مولانا غايتو ماخفت فينا الله..
يا موج ، لزيدان - كالأوطان - يد سلفت ودين مستحق ، زيدان بنريدو في غنائه وهذره وروحه الجميلة ، أحبه كل من عمل معه ومن استمع إليه . عندما اختلف مع عمر الشاعر تملك المستمعين شعور كما لو أن هناك أزمة قومية تستدعي التئام مجلس الأمن القومي وإعلان الأحكام العرفية ، شعرنا بأن هذا الثنائي في دواخلنا لايقل عن Xavi وIniesta للحالة الإسبانية في نهائيات المونديال الأخير . كان لابد أن يعودا لبعضهما لأنهما ظاهرة فلكية لاتتكرر كثيرا ، كمرور المذنب هالي بجوار الأرض لايحدث إلا مرة في كل 75 عاما. كانت من الثنائيات الأسطورية في تاريخ فننا السوداني الخصب العجيب.
زيدان يا عزيز لملمنا في مشهد كمشهد مارلون براندو في (القيامة الآن) ، جمع كل المحبين أمامه ليكتبوا على ألواحهم ما تيسر من سيرة (اللهفة والريد والعذاب) وبعده ضاعت الأقلام واندلقت الأحبار وكُسرت الألواح.
Post: #57 Title: Re: أجمل تسجيل لهذه الأغنية الإستثنائية.. Author: طارق الكوتش Date: 10-26-2011, 12:26 PM Parent: #56
Quote: يا كوتش GOOGLE CHROME ده ود منو
بحث يارئيس ثم تحميل ف تثبيت ثم فتح اى موقع من خلاله > سريع وبه كتير من الميزات مقارنه بـ explorer
Post: #58 Title: Re: أجمل تسجيل لهذه الأغنية الإستثنائية.. Author: طارق الكوتش Date: 10-26-2011, 12:56 PM Parent: #57
الطيب شيقوق
Quote: بحس في إستايل كتاباتك لونية مرتضى
قريبك ولا mere coincidence منهجي ؟
ياخ الراجل ده مااااا بتقدر > ظلمتنى ياخ > مرتضى انيق ورائع فى كتاباته للمدى البعيد ..
لكن ذلك الاحساس .... ربما هنالك قليلا من الاهتمامات المشتركة زيدان ... الهلال ... وحاجات تانية حاميانى > لوووووووولز
Post: #59 Title: Re: أجمل تسجيل لهذه الأغنية الإستثنائية.. Author: طارق ميرغني Date: 10-26-2011, 12:59 PM Parent: #57
اخي محمد المرتضي
الاستاذ بشير عبد الماجد لمن لا يعرفه شاعر مجيد ومقل
وهو شقيق وزير الثقافة السابق عبد الباسط عبد الماجد
وهو من ضمن من يعرفون بشعراء الاغنية الواحدة امثال
الطيب محمد سعيد العباسي " يا فتاتي"
عبد العزيز جمال الدين " لو تصدق "
د. عبد الله محمد سليمان " عود لينا يا ليل الفرح "
Post: #60 Title: Re: أجمل تسجيل لهذه الأغنية الإستثنائية.. Author: عمر علي حسن Date: 10-26-2011, 01:55 PM Parent: #59
Quote: بحث يارئيس ثم تحميل ف تثبيت ثم فتح اى موقع من خلاله > سريع
ياكوتش انا كان بعرف قدر ده كنت شاركت بيل جيتس ..
واحد زميلنا بعد ما قرأ ورقه الاسئلة في امتحان الترقي وقف انتباه وحيا وراح طالع .. المراقب لحقه وسأله مالك طالع ؟ فرد عليه بغضب شديد : (نص زايد ربع ليه ؟ انا لو بعرف زي ده كنت أروح جامعة الخرطوم مش اجي عندكم)
نحن يكوتش يادوووووووووووووووووبك نفك الخط
عمر علي حسن
Post: #61 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-26-2011, 01:59 PM Parent: #59
Quote: رحمه الله بقدر ما أمتع وأطرب وبقدر ما قدم لدنيانا من محبة..
وبقدر ما تفعله فينا مثل هذه الأغنية,,
هذه الإغنية دُرَة نادرة من درر زيدان...
عارف يا أيمن ، لم أر فنانا طوال مشواره الفني انتقى كلمات أغنياته بعناية كزيدان ، ربما لحظت أن جل - إن لم يكن كل - أغنياته تنضح تفاؤلا حتى لو تسبب فراق الحبيب بلوعة 3000 ميجاوات أو كان مستوى الحريق من الدرجة الرابعة ، لذا اجتمع الناس حوله في حياته وانفرط عقد المحبين برحيله فهو بحق ( مقياس رسم للتواصل والرحيل) كما قال العزيز شمو.
Post: #62 Title: Re: أجمل تسجيل لهذه الأغنية الإستثنائية.. Author: طارق الكوتش Date: 10-26-2011, 04:52 PM Parent: #61
يارئيس انتو ناس الزمن السمح و الخير و البركه ..... لكن
Quote: (نص زايد ربع ليه ؟ انا لو بعرف زي ده كنت أروح جامعة الخرطوم مش اجي عندكم)
مباالغة
... عليك بالود اكرم عمر على حسن
Post: #63 Title: Re: أجمل تسجيل لهذه الأغنية الإستثنائية.. Author: محمد عبدالرحمن محمد Date: 10-26-2011, 06:01 PM Parent: #62
المرتضى، والله قدرما أقول دي القى غيرا تكورك احتجاجاَ
الله يرحمك يا زيدان
ـ
بالجنبه، وإن كان فيها فكت بعض آخر أوّل رجفت قلِب كان سببا ليه كل العذاب، كلمات، أدتني ياها فِلاني، يطراها الله بالخير، في محطة الباص البودينا المدرسه ـ إييه، دنيا
Post: #64 Title: Re: أجمل تسجيل لهذه الأغنية الإستثنائية.. Author: ناظم ابراهيم Date: 10-26-2011, 07:32 PM Parent: #63
مولانا مساءك خير
اشكرك ياعزيز على اللحن الندى ( فرتق صواميل الروح)
ما اعذب زيدان عليه رضوان الله ورحمته
موسيقى تنقر الروح بخفه
Post: #65 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-26-2011, 09:51 PM Parent: #64
Quote: أوّل رجفت قلِب كان سببا ليه كل العذاب، كلمات، أدتني ياها فِلاني، يطراها الله بالخير، في محطة الباص البودينا المدرسه
انت يا سجم الرماد اتاريك من ولدوك اكان لقيت ليك مقعد فاضي في البص ما بتهبب ليهو ؟
Post: #68 Title: Re: أجمل تسجيل لهذه الأغنية الإستثنائية.. Author: محمد عبدالرحمن محمد Date: 10-26-2011, 11:09 PM Parent: #65
نت يا سجم الرماد اتاريك من ولدوك اكان لقيت ليك مقعد فاضي في البص ما بتهبب ليهو ؟ إت زول عنكوليب ساي جِنِسْ إحساساتنا آب يَقَعِنْلٌك إن حبيت تستعين بصديق، فدونك الشايقي باللنجليزي
ويااا مرتضى الريده انا فاتحلها مية جناح
Post: #66 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-26-2011, 10:13 PM Parent: #64
Quote: كتبها د / بشير عبدالماجد فابدع وراهن عليها بشير عباس وكســبها زيــــدان واهداها لنا ... اغنية لا ينتهى سحرها ابــدا"
يا عبد الدائم أخوي مثل هذه القصائد لايكتبها الشاعر بل هي تكتبه، زي ما قال طارق ميرغني إنو ما كتب غيرها ووالله لو لم يكتب غيرها لكفته، كلمات ولحن وأداء بس مثلث برمودا.. دا ما سحر يا سيدي ديل فتحوا مدرسة لهاروت زاتو ..
سمعت بالريده الفارده جناحا تشتاق للربيع ؟؟ سمعت الربيع قال ليها (خلي من حضنك ضرايا)؟؟
Post: #67 Title: Re: أجمل تسجيل لهذه الأغنية الإستثنائية.. Author: خالد المحرب Date: 10-26-2011, 10:23 PM Parent: #66
ناس امس استثنايين جدا وسودان امس ونيله لم يحصل فيهم اى تغيير غير المرتادين اسمح لى استاذى ان اشرح الارتياد مرتادى النيل كانو يستمتعون به ويضيف اليهم النيل ويخرجوا لنا لحن اوقصيده وانعكست الايه الان مرتادى النيل اصبحو شبه حتى لو كان من ناس امس لان الحابل بالنابل اختلط والعكس صحيح شكرا المرتضى حامد على هذا التميز لكن الله غالب نعمل ايه مع هذا المشروع الذى قال للنيل اسكن ولا تجرى يانيل الحياه بعد الساعه 11 مساء
Post: #69 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-27-2011, 07:50 AM Parent: #67
م ع الرحمن
Quote: ويااا مرتضى الريده انا فاتحلها مية جناح
افرد جناحك وميل حي الربيع يا جميل خلى الشمس تسكب ذهب الاصيل فى النيل ...
المرتضى متابع ولا سارح انت؟
Post: #70 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-27-2011, 09:17 AM Parent: #69
Quote: وكيف نضيع احلي ما اهديت يا غالي
الخليل،
(لم يكن زيدان إبراهيم فنانا عاديا، ولعله الفنان الثاني بعد إبراهيم عوض الذي يتحول إلى نجم وظاهرة فنية واجتماعية، قبل إبراهيم عوض لم يعرف الفنانون ظاهرة النجومية بمعناها ومحتواها الأجنبي، إذ لا يستمع الناس لغناء الفنان فقط، لكنه يتحول لرمز اجتماعي وثقافي، يقلدونه في لبسه وطريقة تصفيف شعره ومشيته وكلامه) هذا بعض مما كتب أخي فيصل محمد صالح عن زيدان ، أذكر جيدا الموجتين الزيدانيتين اللتين عاصرناهما وكل منهما تضارع إيفيرست في ارتفاعها، ( في الليله ديك) ما كانت موجة وحسب بل تسونامي بحاله سأعود إليه أما منتصف الثمانينيات فقد إجتاحت الشباب الموجة الثانية تحمل معها مجموعة من الأغنيات حتى القديم منها وكان شباب الجامعات وغيرهم يتبادلون المعلومة عن مكان الحفل ويكونوا أول من يوقع على دفتر الحضور وزيدان يراقب بابتسامة لاتغيب ولايمكن أن يمر الحفل دون أن يتحفهم ب (ليه ياسمير ما جيتا حجبوك ولا نسيتا) والتي كان يختم الكوبليه فيها بعبارات من عنده يتم تداولها بين الشباب في اليوم التالي وحتى الآن..
دخل السسسينما..
Post: #71 Title: Re: أجمل تسجيل لهذه الأغنية الإستثنائية.. Author: محمد ادم الحسن Date: 10-27-2011, 09:41 AM Parent: #70
محمد المرتضي سلام وكل المتداخلين
ياخي والله كنوز محبة دي أنا كان عندي ليها شريط.. المرحومة المبدعة ليلي المغربي بتلقي فيه شعر الأغنية دي. جاني واحد زيارة وسرق الشريط (إنت عارف طبعاً سرقة السودانيين للأقلام والأشرطة والولاعات ، وكيس الصعود)
ومن ديك أنا ما لميت تاني في الشريط دا. فا بالله عليكم العندو طريقة للتسجيل دا ينزلوا لينا.. نزله الله
مع فائق الشكر مقدماً
Post: #72 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-27-2011, 11:34 AM Parent: #71
Quote: يا الله ...
حمدا لله على السلامة ...
الله يسلمك من كل شر يا تيسير* ، والله يا بت المبارك ، في الواقع تمثل الكتابه عن زيدان كتابة لتاريخ جيلنا في كل مناحي حياته السياسية والإجتماعية والثقافيه ، فصورة زيدان إبراهيم - على أي شكل أتت - تتطابق مع رسم القلب ECG لمعظم مجايلينا، ، ومن خلال عرض الحقبة الزيدانية يمكنك مشاهدة عرض بانورامي فيه كافة تفاصيل يومنا من لحظة تلاوة الشيخ عوض عمر أو صديق أحمد حمدون مفتتحا الإرسال الإذاعي وحتى انتهاء حفل على وش الصباح بعد أن (وفقك الله) بإزالة تعب النهار بشوفةً ترد الروح وابتسامة من عيون الحبيب قُبَّال لملمة الكراسي .. لذا تكون الكتابة عن الرحيل هنا يا تيسير صعبه بالحيل وزي ما قال فادح الروعة أرنست هيمنجواي : “There's nothing to writing. All you do is sit down at a typewriter and open a vein وبتعبير شباب اليومين ديل: ( تبكي بس)..
__ * تيسير عووضه وتيسير المبارك في برنامج واحد؟
يا اخوانا واحد يصحي تيسير النوراني ..
Post: #73 Title: Re: أجمل تسجيل لهذه الأغنية الإستثنائية.. Author: tayseer alnworani Date: 10-27-2011, 01:19 PM Parent: #72
ود المرتضى عودا حميدا مستطاب
كل التيسيرات معاك الله يسر امرك فى كل خطوة تمشيها
والله كنوز محبة زى ما بقولوا ناس الزار دى خيطى عدييل كده
لكن التكنلوجيا دى صعبة خلاص ما خلتنى اسمعها خالص
Quote: يا اخوانا واحد يصحي تيسير النوراني ..
صاحييييييييييييين ومسجليييييييييييين حضور وادى حتلة فى البوست ده
Post: #74 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-27-2011, 04:07 PM Parent: #73
Quote: لما سألوا بشير عبد الماجد عن مناسبة قصيدة "كنوز محبة" قال ليهم : أسألوا القصيدة...
....
ابقى أسأل عن قلوبنا
أسألي بشير عبدالماجد
- وقتها كانت الأحوال هادئة في منطقة العاصمة والخرطوم عموم والناس رضيانه بالبيها والعليها سوى جيوب مقاومة يسارية وتهديدات يمينية بين الفينة والأخرى ، لكن الململة كانت في مهدها ، وفي وسط ذلك الهدوء الحذر يقوم ينفلت عقال الشارع برائعة الشاعر بابكر الطاهر وشاعرية عمر الشاعر الملحن (في الليله ديك) .. لا أريد الكتابة عن الأغنية يا ممكونه لأن كل الممكونين من رصفاء الزمن الأخضر لايحفظون الأغنية وحسب بل يعرفوا السيره الذاتيه لجيران كاتبها وعندهم كم شجره في الشارع وعمر الشاعر زاتو فصيلة دمو شنو وآخر قميص حقو كان مشجَّر كيف، أما زيدان .. زيدان ؟ زيدان أصبح في ألسنة كل السودانيين وبأكبر مما كان عليه زيدان فرنسا في أفئدة حضور الشانزلزيه وهو يدمر فريق البرازيل بهدفي الكروز توماهوك الشهيرين في نهائي مونديال 2002. كثير من الأصحاب وقتذاك كانوا سيقدموا مقترحا لنميري أثناء مروره بشارع ودالبصير في طريقه لبيت الأسرة في ودنوباوي لتغيير النشيد الوطني للبلاد من نحن جند الله جند الوطن إلى (مديت يميني بلا كلام ما قدرت قدامك أقيف) ويبقى مارسليز سوداني جديد ويقفل على كده.
زيدان !! بعد رحيلك مديت يميني ويسراي بلا كلام وما قدرت قدام نعشك أقيف.
Post: #85 Title: Re: أجمل تسجيل لهذه الأغنية الإستثنائية.. Author: saadeldin abdelrahman Date: 10-29-2011, 12:57 PM Parent: #69
ليلة الخميس الماضية و نحن في قمة جبل حفيت مرورا بالمبزرة و مركز العين، كانت قلوبنا متعلقة بالاسوار الشائكة التى تمثل الحدود بيننا وقتها. ما كان لي سابق علم حينذاك، و ما كنت اعرف انني احتاج فقط جوازي و قليل من الوقت و بعض اصدقاء مغامرين للوصول لحيكم العامر. الجايات اكبر من الرايحات..
الرحمة و المغفرة لهذا الانسان.. و اهازيج شوق ابثها لك و لكل من سأل ، من قلب كلكلة الرؤوم. خالص محبتي..
Post: #75 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-27-2011, 06:57 PM Parent: #29
Quote: nice
شكرا رانيه.
Post: #76 Title: Re: أجمل تسجيل لهذه الأغنية الإستثنائية.. Author: DKEEN Date: 10-27-2011, 09:17 PM Parent: #75
متفق معاك يامرتضى..اصلا دي البسمعا لي زيدان..
بس شفتا من محل بديت بوستك ده.. يآسرني ذاك الليل..
Post: #77 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-28-2011, 02:48 AM Parent: #76
Quote: دي كنوز محبة ؟؟؟؟ يا ود حامد ياخ دي كل ما في باطن الأرض من درر من اليمن لي الشام .
ياها يا عثمان، جزيرة الكنز، مناجم الماس، أو قل إنه المثلث الذهبي ، عندما تكون هناك كلمات ترتقي بالنفس وتخليك تحس إنك تسير على وسادة هوائية وتقوم تصادف ملحن أمو داعيه ليهو وبقلبه يعرف إنو اللحن دا قُد على حُنجرة وحبال صوتيه لزول معين دون خلايق الله في المجموعه الشمسيه ويديها ليهو يغنيها ، أها هنا يحدث ال Big Bang..
ياخ القصيدة واللحن ديل كانا رتقا وفتقهما زيدان وجعل منهما بصوته كائنا حيا يتمطى في وجداننا ويتمدد في العمر ويمشي في شوارع القلب يوزع الأزهار والورود بين المهدودين والمشلهتين والشحادين والمغلوبين بالطول والعرض، يمسح عنهم كآبتهم وفواجعهم ويغسل عنهم الأدران والأحزان وينسيهم الوالي والألم المتوالي، لكن برضو ممكن يقلقل مرهفي القلوب فيهم مستهدفا جهازم العصبي المركزي فتتجافي جنوبهم عن المضاجع، وحتى كان رقدوا تجدهم يتقلبوا في الأسِرَة زي اللقيمات في الصاج و في عز ليل الشتاء يسامرون الأنين يتأوهون مرددين : أحي الحر ..
زيدان من أهل الكرامات يا عثمان ..
Post: #78 Title: Re: أجمل تسجيل لهذه الأغنية الإستثنائية.. Author: Afraa Sanad Date: 10-28-2011, 03:24 AM Parent: #77
والله يا ناس مسقط والخليج حالتكم تحنن، دخلت البوست لقيت رجال عجايز بيقولوا للزمان أرجع يا زمان قلت أكابركم ،، ولكن هيهات بس ناقصين صاحبي دالي الحبوب،، بعدين يا ود شيقوق وود المرتضى قولي أحبك تستبين كهولتي بتاعت أول أمس شكلها ما جابت دخل،،أها يا ود المرتضى وقع ليك كلامي
Post: #79 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-28-2011, 10:00 AM Parent: #78
Quote: والله ما عارف أقول شنو! بالجد كدا! مرتضى ازيك ياااخ!
نعم يا الباهي، كأديب تدرك جيدا أن ما يحتشد بالداخل من مشاعر يتطلب زمنا طويلا ليهدأ أولا ليتم ترتيبه ثانيا ثم التعامل معه ، ظللت لفترة أتأمل ما قاله زيدان عفويا قبل أن يشرع في ترتيل (كنوز محبه القصيدة) ، كلماته كانت تعبر عن فنان فنان ، زيدان كان فنانا أصيلا ، الفنان الحقيقي هو الذي يتمثل الفن في كل حركة وسكنة في حياته العادية ، كان زي الضوء البيتلموا الناس حوله يتسامرون ويبثون أشجانهم ثم يتفرقوا يغمرهم إحساس بالرضا..
قرأت - يا زاكي - أن زيدان لم يقلد أي فنان في بداياته الفنية ، يعني جاء إلى عكاظ الفن والطرب ثم الشهرة بي حقُّو عديل وحفر في الصخر ليعبد طريقا على أرقى المستويات الهندسية والمواصفات العالمية لم يعاني من تشققات أو صدوع ولم تجرفه السيــول حتى مغادرته الفانية ، وبعد أن أصبح رقما يجلس على قمة لاتطالها النسور تغنى لمطربين عاصروه إكراما لهم وبرا بالزمالة ، وبلفتاته تلك ألغى بشكل حاسم وبالبيان العملي مقولة (سمح الغنا في خشم سيدو) .. إستمع إليه يغني (الذكريات) للشفيع مثلا أو (يا خاين) لإبراهيم عوض وغيرهما وتلك هي القوة الحقيقية.
والله يا زاكي ما عارف ليه تغنيه بأغاني الغير يذكرني ب (العفو عند المقدرة) !!
Post: #80 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-28-2011, 02:29 PM Parent: #79
Quote: مرور من اجل السلام و التحية
والتشكرات البنفسجية
على هذه الالحان الندية
تسلم يا كوتش ، بس بالله حكِّم ضميرك جوه الجوه واستفتِ قلبك وراجع يومية الأحوال ودفتر العيادة الخارجية للشعب الســـوداني وشوف زيدان في مسيرتو الفنيه شاف كم زول عيان يندب حظو وبقدرة جالينوس وإرادة المولى شفي على صوته.. ياطارق قيل إن الموسيقى حديث الملائكة واللغة التي لاتحتاج دكشنري وزيدان كان من عماليقها ومن أمهر المعالجين الروحيين الذين جادت بهم المليون ميل معذَّب.. في أعلى حالات الجفاف والجفاء والجدب يجئ صوته مبشرا: باكر بيعود القاش.
له الفردوس بإذن المولى..
Post: #81 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-28-2011, 06:50 PM Parent: #80
Quote: اما هنا فتسيل كنوز المحبة اودية وافلاجا.......
عساها لاتبلغ (قونو) و (فيت)] شكرا مولانا عبدالحافظ على ( الفحص) و (الإفادة) .. يهمني كثيرا أن يستمع كل من يمر بهذا البوست لكلام زيدان قبل القصيدة ويهمني أن يسرِّي النفس بالموسيقى والصوت القادم من السماء لذلك الراحل.. والله يا مولانا نحن مقصرين مع أفذاذنا كتير.. نعم نكرمهم في حياتهم لكن ليس بالقدر المطلوب وبمجرد رحيلهم نجزع لانهيار مأرب..
(وردة واحدة لإنسان على قيد الحياة أفضل من باقة كاملة على قبره)
- قول مأثور-
Post: #82 Title: Re: أجمل تسجيل لهذه الأغنية الإستثنائية.. Author: عماد الشبلي Date: 10-28-2011, 07:19 PM Parent: #81
مرتضي سلام وتحية
فعلا تسجيل جميل
رحم الله العندليب الاسمر
Post: #83 Title: Re: أجمل تسجيل لهذه الأغنية الإستثنائية.. Author: willeim andrea Date: 10-28-2011, 09:25 PM Parent: #82
up
Post: #84 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-29-2011, 11:42 AM Parent: #83
Quote: وددت ان اراهما بعد زيدان .. وبعد الاحزان المترعه علي شطآنهما .. لا بد انهما يتعانقان في حرقة واسي علي فتي العباسية الممتدة جذوره الي رهيد البردي والذي نثر علي السودان كله كنوزا من المحبة والرفق لو نهلنا منها ما اصابتنا فرقة ولا كدر
ياشيخي سابكي مجددا ثم اعود اليك بما ينوء به قلبي المحب لهذا الساحر الفنان .. الذي رحل
عمر علي حسن
صدقني ياأبا أكرم، كلما هوى نجم من سماء بلادنا تصبح مصيبتنا أكبر من أن تحتمل .. نعم ، بعض من التكوين الجيني فينا حبنا لأرض بلادنا غض النظر عما يحدث فيها وتبدل الناس والحال .. لكن حين تهوي أنجم كزيدان والخالدي وهاشم ميرغني وغيرهم يصبح السُرى في صحراء العمر أمرا صعبا ، تاني يا سعادتك با GPRS زاتو مامكن نسافر ، قلَ الزاد وتزايدت الرزايا والأرزاء وتمدد الربع الخالي وانغلق درب (الأربعين) وتكاثر قطاع الطرق .. ود العباسيه ورهيد البردي كان وزارة للريده والتسامح وخفة الروح ، وبحق لا أدري كيف حال ملتقى النيلين وعناقهما الأبدي بعده ومتى سيرفع حال الحداد وكيف هو حال تراب أمدرمان التي عشقته.. غايتو يا سيدي الكريم الحال بقى صعب بالحيل لكننا لانيأس من رحمة المولى ولا نقل إلا ما يرضيه..
Post: #86 Title: Re: أجمل تسجيل لهذه الأغنية الإستثنائية.. Author: د.محمد حسن Date: 10-29-2011, 01:49 PM Parent: #84
اغنية نحلة
تورم الكنكوج
Post: #87 Title: Re: أجمل تسجيل لهذه الأغنية الإستثنائية.. Author: محمد زكريا Date: 10-29-2011, 02:06 PM Parent: #86
ilike
Post: #88 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-29-2011, 03:16 PM Parent: #14
مرتضى
الحق البوست
حاولت تصفح آخر المداخلات ولكن دون جدوى
هل مشكلتي انا ؟ ما اظن لانها ما قابلتني في غيره من البوستات
هل البوست إنفتل ؟ ربما
هكر إتهكر ؟ ربما
Post: #89 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-29-2011, 04:14 PM Parent: #88
Quote: زيدان نسمة رقيقة جميلة معتقة عطرت الساحة الفنية بأجمل الالحان .
سيف الدوله، هسه بالله الأغنيه دي براها مش أهل؟ مش آلة زمن؟ هسه لامن تسمعا في أمريكتكم الهناك ديك مش بتنقلك - كصرح بلقيس - لقلب بلادك الحبيبه وتلقاها فارده يديها عشان تاخدك في حضنها تحت الرذاذ؟ سألتك بالله مش غنيه وطن؟
Post: #90 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-29-2011, 06:09 PM Parent: #89
Quote: Quote
Quote: : عندما كنا في النهود الجميلة (المدينة أقصد)
مولانا!!!!! ياخى دعنا نشكلها كما نحب.. ونقرأها كما نريد... واعفنا من الدخول دهاليز النحويين .. والشسرح المفسد الذى اكره ويمقت الكثيرون ممن مروا من هنا.. وخلينا نعالجها كل حسب اثر كبسولة الفرح التى تخلقت في دواخله من غناء الطروب زيدان.. بالله انتو ناس فى دنيا واللا حور فى جنان؟؟ لاحولالالالالالالالالالالالالالالالالالالا،،،
على رسلك يا هذا .. والله يا ابن معديكرب خشيت أن تصمني العرب بما لم يرد بخاطري فتوخيت الإستثناء وسيلة سيما أن مضارب بني بكري تحتشد هذه الأيام بعلوم التشريح حتى غدا المنبر مرجعا يضارع أجعص Atlas of Pelvic Anatomy and Gynecologic Surgery ..
Post: #91 Title: Re: أجمل تسجيل لهذه الأغنية الإستثنائية.. Author: nazar hussien Date: 10-29-2011, 06:28 PM Parent: #90
Quote: هسه بالله الأغنيه دي براها مش أهل؟ مش آلة زمن؟ هسه لامن تسمعا في أمريكتكم الهناك ديك مش بتنقلك - كصرح بلقيس - لقلب بلادك الحبيبه وتلقاها فارده يديها عشان تاخدك في حضنها تحت الرذاذ؟ سألتك بالله مش غنيه وطن؟
دي أهل وبس يا محمد المرتضي...
دي فيها كل الحنين والحنان...معبأة في كل كلمة وجملة موسيقية بداخلها...
Post: #92 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 10-29-2011, 08:16 PM Parent: #91
وصلتني - اخي المرتضى - هذه الرسالة من الاخ سعد ابو نورة وردت اليه من عزيز لديه فضل عدم الكشف عن اسمه
Quote: زيدان إبراهيم والشارلستون والحزن النبيل الحزن الذي عم السودانيين بكافة توجهاتهم الفكرية وأطيافهم السياسية وهم يودعون الفنان زيدان إبراهيم ، يؤكد بأن الفنان الراحل من الصالحين . فقد وحد زيدان السودانيين في فاجعة رحيله بأكثر مما فعلت السياسة ، وذلك لأن تيار الحياة الدفاق الذي بثه صوته الجميل في وجدان الناس وأحاسيسهم قد ارتبط في أذهان الناس بأيام لم يعرفوا فيها ذل وهوان الحياة في زمن الإنقاذ . أيام عرف فيها الناس معنى الوفاء : الوفاء للمحبوب والوفاء للوطن والوفاء للقيم السامية ، التي إندثرت في زمننا هذا . وهي كلها قيم غنى لها زيدان ، لأنه قد كان وفياً : وفياً للشعب السوداني ، وفياً لوطنه ،، وفياً لأمه ، وفياً لمعجبيه . لقد حزنت غاية الحزن لرحيل زيدان إبراهيم ، وإنداحت في داخلي نوستالجيا امتدت طيلة اليوم وامتلكت عقلي وقلبي ، فقد كان زيدان نسمة معطرة لفترة شبابنا في غنائه ، كما قد كان ظاهرة جذبت حوله الكثير من المعجبين الشباب ، الذين طرز وجدانهم بشفافيته التي اقتحمت حياتهم في فترة كانت تموج بالكثير من التحديث والتغيير ، فكانت كلمات أغانيه وألحانه قفزة في سلم الغناء السوداني . كان زيدان ظاهرة بالمعنى الذي مثله (الفيس بريسلي) وفرقة الخنافس بالنسبة للأمريكيين والأوربيين ، فقد كان إعجاب معجبي زيدان يتجاوز إعجابهم بأغانيه لإعجابهم بشخصيته ولطفه وأناقته وأسلوب تصفيف شعره . لقد استوى زيدان في ذلك الوقت نجماً كامل الدسم تدور حول محوره حفلات المسرح وليالي التلفزيون الساهرة وحفلات الغناء في بيوت الأعراس . وتمدد في كل مدينة في السودان أشخاص يرددون آخر أغاني زيدان ، بل إن حفلات الأعراس في العاصمة والأقاليم لم يكن لها أي طعم بدون أغاني زيدان . لقد تزامن تربع زيدان فوق عرش نجوميته مع دخولنا أول مراحل المراهقة في بداية السبعينات ، فمن حيث المجايلة أجد نفسي أنتمي للجيل الذي غنى له زيدان الأغاني التي صاغت مشاعره وشكلت وجدانه .. لقد كانت أغاني مثل (قصر الشوق) و(غربة وشجن) و(وسط الزهور متصور) تفعل فعل السحر في أبناء جيلي .. لقد حلقت بهم هذه الأغاني في سماوات عاطفية تقود مشاعرهم في جميع حالات الفرح واليأس والإحباط .. لقد كانت فترة بداية السبعينات فترة تفتح وحركة وثورة على مستوى العالم ، فهي الفترة التي أعقبت فترة ثورات الشباب في نهاية الستينات في أوروبا وبروز حركات الرفض والهيبيز في قلب المدن الأمريكية والأوربية . ولقد انتقلت هذه الحركات لنا في شكل صرعات الموضة التي غزت شوارع المدن الكبرى في السودان ، حيث بدأ الشباب في لبس الشارلستون والقمصان المشجرة وإطالة شعورهم ، وهي صرعة من صرعات الموضة التي قاومها الكبار ، خصوصاً الآباء ، بكل شراسة . ارتدينا الشارلستون في البداية على استحياء ، وعندما استقوى عود الظاهرة وانتشرت ، كان الشارلستون نفحة من نفحات التحرر التي زامنت أغاني زيدان . زيدان أيضاً بكل وسامته ونبله قد ارتدى الشارلستون وأصبح أيقونة لشباب جيلنا من حيث الوسامة والغناء والنجومية . وإذا كان الجيل الذي سبقنا قد طرب للفنان الكبير (عثمان حسين) في أغنية (الفراش الحائر) ، فإن حيرة أبناء جيلي قد تبددت وهي تطرب لزيدان في أغنيته الشهيرة (فراش القاش) .. وبنفس القدر الذي مثل فيه (عثمان) حسين ثورة في اللحن الموسيقي في أغنية (الفراش الحائر) ، فإن لحن (فراش القاش) قد كان أيضاً ثورة في اللحن والتطريب به إمتلك زيدان قلوب كل جمهور الشباب . هؤلاء الشباب الذين اكتهل عمرهم اليوم في زمن الإنقاذ ، من الذي يداوي نارهم والتياعهم لرحيل زيدان .. داوي ناري والتياعي ، هكذا غنى زيدان ، ولكن لا يداوي نار والتياع معجبي زيدان ، إلا نفس الداء : وداوني بالتي كانت هي الداء ، كما قال الشاعر .. فإن عودة الزمن الجميل الذي برز فيه صوت زيدان الساحر والقيم التي غنى لها هي الداء والدواء ، وهي النسمة الملطفة لعذابات أهل السودان اليوم . أمران شدا انتباهي في زيدان : أولهما حبه ووفائه الشديد لأمه . وثانيهما ما روي عنه بأنه قد اعتزل الناس لفترة ثلاثة أيام بدون أكل وشرب ، حزناً على تنفيذ الحكم على الأستاذ محمود محمد طه . هذان الأمران يدلان على الشفافية المفرطة لزيدان وعلى رهافة الحس الإنساني عنده ، فلا عجب أن العندليب الذي يغرد في صوته ممدود من هذه الشفافية والرهافة الإنسانية . هذا النوع من الحب الإنساني العظيم هو الذي يشغف الفؤاد ويحرق الحشا ، فشخص مثل زيدان لا يمكن أن يعيش بدون أن يغرد ، كما لا يمكن لقيس بن الملوح أن يعيش بدون ليلاه : ذكرتك والحجيج له ضجيج بمكة والقلوب لها وجيج فقلت ونحن في بلد حرام به لله أخلصت القلوب أتوب إليك يا مولاي عما جنيت فقد تكاثرت الذنوب وأما عن هوى ليلى وتركي زيارتها فإني لا أتوب غرد زيدان بالغناء والذي كان حبه الأول والأخير حتى آخر لحظة في حياته ، وتوفى بدون أي حبيبة أو زوجة أو أولاد يسندون ظهره في مستقره الأخير بمقابر الشقلة بالحاج يوسف .. ألا رحم الله الفنان زيدان إبراهيم وأغدق عليه من المنح والعطايا بقدر ما منح من الفرح للشعب السوداني ، وجعل حب كل الشعب السوداني له شفاعة ترقى به المقامات العلا .
احييك اخي اسعد واحيي اخي الكريم الذى تفضل بإرسال هذه المداخلة الينا عبرك
Post: #93 Title: Re: أجمل تسجيل لهذه الأغنية الإستثنائية.. Author: osman righeem Date: 10-29-2011, 08:27 PM Parent: #92
بوست الكلينكس
Post: #94 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-29-2011, 10:27 PM Parent: #93
Quote: رحم الله
زيدان إبراهيم
رحمةً واسعة بقدر مـا قدم لفنه وبقدر ما قدم لإنسان وطنه من فنٍ راقٍ إستطاع أن يُعلمنا معني الحُب العفيف الطاهر
الحب دائما عفيف وطاهر يا ناصر، وزيدان كان بذات المعنى ، كان وزارة للتفاؤل ومضاد حيوي لباكتريا الإحباط ، شوف كيف كان الجمال ينتظم كل أغانيه بلا استثناء، لاقتك غنيه غنّاها ما عجبتك؟ طبعا مافي.. صوته وموسيقاه كانا وما زالا كخطاب ملائكي يأتيك من مصدر تعرفه جيدا ولاتحدده ، صوت (نثرته كفّ البرق حين تلاحق الإيماض وانعتقت شرارات الرعود ) كما قال سند .
خليني من كلام ناس الموسيقى المابعرفو وما عندي فكره عنو وماعايز تكون عندي فكره زاتو، الفنان عندي هو من يوصلني حواف الإسكار حد الترنح ولاتهمني بعدها النوتة ومصطلحات الألتو والسبرانو والتينور ، هسه بادي كان بيعرف الصولفيج شنو؟ لكن لو غني يخليك تِتَكَّل بالحيط ، وزيدان لو شدا وقال (بحبك زي عيوني ولو سألوني ليه بحبك زي عيوني وفي عيوني الألم ) لازم يكون في جيبك مورفين او باسادين لأنو حاتحس الألم الماكِضِب .. بالفعل يا وديوسف ، زيدان راقي .. ومن أهل الحظوة وشيخ طريقه ..
Post: #95 Title: Re: أجمل تسجيل لهذه الأغنية الإستثنائية.. Author: الزاكى عبد الحميد Date: 10-30-2011, 04:32 AM Parent: #94
فوق.. حتى تسكرنا النشوة حد التلاشي.. شكراً مرتضى على كل هذا الجمال الباعث للدهشة بأبعاد ثلاثة
Post: #96 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-30-2011, 09:10 AM Parent: #95
بمناسبة شعراء الأغنية الواحدة يا طارق ، وقائمتهم تطول، عندي إحساس يلازمني منذ يفاعتي إنو أغنية العزيزه لزيدان ، رغم أن فتحي حسين وسعدالدين عملوا فيها تقنية وجدانية وحلقوا بها في ارتفاعات لاتصلها رادارات المستمع العاديه ، لكن إحساسي أنها لزيدان وحقتو عديل كده وما عندي مبرر لكلامي دا لكنها تشبه الراحل رأسيا وروحيا وافقيا وكلما أستمع ل (العزيزة) بسمعا على هذا الأساس ، مش على كيفي؟
Post: #97 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-30-2011, 12:20 PM Parent: #96
Quote: بالجنبه، وإن كان فيها فكت بعض آخر أوّل رجفت قلِب كان سببا ليه كل العذاب، كلمات، أدتني ياها فِلاني، يطراها الله بالخير، في محطة الباص البودينا المدرسه إييه، دنيا
(ليه كل العذاب) والأسئلة الدائرية المشروعة المماثلة كانت من الموجات التي تذكرني بأيام الدوره المدرسية - برضو ما عارف ليه وما تسألني – وعندما أقول أسئلة دائرية أعني أنها بتمشي وتلف وتجي ولاجديد ولا من يهتم .. زي سير العفش في مطار الخرطوم .. التجاني حاج موسى شاعر مرهف ولكنه أعاد ذات السؤال الذي طرحه محجوب سراج في (ليه بتسأل عني تاني) وسيف الدسوقي ( ليه تقول لي انتهينا) ولاتنتهي دائرة (الليهات) حتى جاء من قال (من غير ليه) ، لكن بيني وبينك هي من الأغاني التي توهطت في القلب رغم الماسوشية الحميدة التي تتبدى في قوله:
عذِّب فيني بالـِغ وزيد منو الكتير لو يرضيك أذاي عــــذب يا أمير قالو البهوا دايماً ياما يشوف كتير وشفــت غلاوتي عندك وحبيت الألم
عارف يا محمد ، زيدان كان يعطي الكلمات ألقها غض النظر عن درجة قبول المستمع للقصيدة إذا ما تغنى بها شخص غيره وفي هذا مستوى من السيطرة واحتكار الوجدان بصورة حصرية لاتتأتى إلا للمبدعين ..
قلت لي في محطة باص المدرسه؟ يعني ما من الروضه؟ اللَخَّرَك شنو يا محمد؟
Post: #98 Title: Re: أجمل تسجيل لهذه الأغنية الإستثنائية.. Author: كمال سالم Date: 10-30-2011, 12:32 PM Parent: #97
يبدو أن ليالى الوحده قد قست عليك يابن خالتى !! بدل الجرسه دى ياتمشى كندا ,, ياتجيب ناس كندا لمسقط .
ياضنين الوعد نحن مازلنا منتظرين جيتك للدوحه ,, والله لو عملتها فى إجازة العيد تكون أوفيت ,, إتوكل وأعملها . تحياتى ,,
Post: #99 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-30-2011, 03:18 PM Parent: #98
Quote: اشكرك ياعزيز على اللحن الندى ( فرتق صواميل الروح)
يا ناظم ، الراحل الجميل كل أغانيه ب (تفرتق صواميل الروح) ، ومسألة (الفرتقه) دي هو متخصص فيها .. متفرغ ليها تماما ، زي ما قال أحد الفنانين الرائعين حين سألته المذيعة: هل لديك عمل آخر غير الغناء؟ فأجابها : أبدا .. أنا إتفرغت للناس. أها زيدان إتفرغ للناس في مهمة محددة عنوانها إعادة تنسيق الفوضى أو (الفرتقه) الخلاّقة.
من لمسات حنانك خلاص تمينا دور أيام مرة خالية من طعم السرور كل ما غنى شادي دوبني الشعور واقول يا ريت حبيب لو في الطيف يزور
Post: #100 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-30-2011, 04:30 PM Parent: #99
Quote: نعمل ايه مع هذا المشروع الذى قال للنيل اسكن ولا تجرى يانيل الحياه بعد الساعه 11 مساء
أب احمد ود المحرب، رحم الله العميري والخالدي وعثمان حسين وزيدان وقائمة طويلة من المبدعين الذين كل ما خبا شعاع أحدهم تمددت العتمة في الروح حتى نغدو ،إلى ظلام دامس لأنو يا خالد لايوجد إحلال ولاتوارث أجيال في كل مناحي حياتنا ، البيمشي مافي ليهو بديل، في كل شئ، ولولا نظرية الإستطراق وقانون الجاذبية النيلين كانوا رجعوا لتانا وفيكتوريا تقول لي الساعه 11 ؟ المبدعون الأصائل لايعيشون في زمن الكوليرا وإن عاشوا بالكاد يتنفسون.. الحمد لله أن صمدت كلمات ك ( قسما بحق عينيك يا سمير قلبي) ولم تلحقها يد الملالي ونجا الراحل من مصير كثيرين حين قال ( يا مصدر افراحي و يا وحيي والهامي ) ولم يوصم بالردة. كنا ، يا خالد ، ندندن (لو أحبك أنا العمر كلو برضو شاعر ما كفاني) وكنا سنطالب بزمن إضافي لإنجاز مشروعنا الحضاري ذاك،
أها هسه العمر راح سلفقه ساااي..
Post: #101 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-30-2011, 08:33 PM Parent: #100
Quote: ياخي والله كنوز محبة دي أنا كان عندي ليها شريط.. المرحومة المبدعة ليلي المغربي بتلقي فيه شعر الأغنية دي. جاني واحد زيارة وسرق الشريط (إنت عارف طبعاً سرقة السودانيين للأقلام والأشرطة والولاعات ، وكيس الصعود)
ومن ديك أنا ما لميت تاني في الشريط دا. فا بالله عليكم العندو طريقة للتسجيل دا ينزلوا لينا.. نزله الله
نــــــــــــــــــــــداء
محمد آدم الحسن أرسل النداء أعلاه الذي نرجو أن تمر عليه عيون المعني ولايعرف قدر الفقد إلا من كابده، راح ليك شريط يا محمد؟ أستطيع إدراك فداحة الخطب لفقد تلك الدرر، ياخ ضربت بيتي السيول منذ بضع سنوات ( الإعصار قونو) ولم تترك لي جهاز ولا شريط ولا سيدي ولا نُقُد زاتو ، كل مكتبتي وخطاباتي وإلبوماتي وكنوز محبه لن تتكرر.. عمل لي زهايمر.. إن شاء الله ربنا يجمعك بهذا الشريط يا محمد ولايوجد مستحيل. رحم الله ليلى المغربي وهيام وأسكنهام الجنة.
مودتي.
Post: #102 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-30-2011, 10:22 PM Parent: #101
Quote: والله كنوز محبة زى ما بقولوا ناس الزار دى خيطى عدييل كده
حكاني أخي الصديق الزاكي عبدالحميد أن أحد عباقرتنا (وأسكت عن ذكر الإسم) كان يزامله في العمل ، الزول دا ، ربنا يرحمو ، كان زي ما بيقول المثل لا بيعجبو العجب لا السلام في السخانه، ولم يسبق أن سمعه يمدح إنسانا غض النظر عن المجال وارتفاع سقف الموهبة وشهد الزاكي بعلو كعب صاحبنا في عالم الثقافة والمعرفة واللغات والنقد والشفافيه الجوه الجوه، قال لي ، والحديث ما زال للزاكي ، أن ذلك الزميل استمع مرة لكنوز محبة بصوت زيدان فكان تعليقه: والله يا الزاكي الغنيه دي صاح ، كلمات ولحن وأداء صاح ، وأظنه لم يثن على غيرها ربما حتى رحيله.. والجملة الأخيرة من عندياتي. تقولي لي (خيطك عدييل)؟ دي تميمة عُلِّقت على جيد الحسان والأطفال يا تيسير.. حجاب في ضراع العاشقين من الرجال ال (هدَّهم طول الصراع)..
Post: #103 Title: Re: أجمل تسجيل لهذه الأغنية الإستثنائية.. Author: محمد النيل Date: 10-30-2011, 10:40 PM Parent: #102
Quote: صدقني يا طارق بسأل نفسي هل بعد فراق زيدان لسه النيلين بيتلاقوا؟
وهل هناك أصلا سودان؟؟؟ أسئلة نبيلة
Post: #105 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-31-2011, 08:03 AM Parent: #103
Quote: الرحمة و المغفرة لهذا الانسان.. و اهازيج شوق ابثها لك و لكل من سأل ، من قلب كلكلة الرؤوم. خالص محبتي..
يا سعد.. إنت ما برضك حبيبنا..
Post: #118 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-02-2011, 08:43 PM Parent: #98
Quote: ياضنين الوعد نحن مازلنا منتظرين جيتك للدوحه ,, والله لو عملتها فى إجازة العيد تكون أوفيت ,, إتوكل وأعملها .
الله يا كمال، ضنين الوعد دي ما ياها البترمي في الحوش في بيت ناس عمتك أم سُر، لمَّة الجمعه في بيت يوسف لما كان بيغنوا للبسافر تعود لمسالمتك سالم، ياهو جنس كلامك دا زاتو البيخلي الواحد يقفل النوت بوك ويمشي المطار هسه.. أمير إبن سعادة اللواء عمر علي حسن وعضو المنبر كان عندو بوست قبل كم سنه بعنوان ضنين الوعد.. كدي أمشي شوفو واسمع التسجيل الجابو يومها .. أمشي عليك الله عشان تعيِّد.
يا سيدي جاييكم الدوحه كان الله مد في العمر وصاحبك محمد سني وعدني بعرض آخر للعرس.. عرس الزين ، ما تقوم تفهمني غلط وتقول إبن خالتك أصبح مسياري التوجه..
Post: #104 Title: Re: أجمل تسجيل لهذه الأغنية الإستثنائية.. Author: محمد عبدالرحمن محمد Date: 10-31-2011, 01:29 AM Parent: #97
Quote: قلت لي في محطة باص المدرسه؟ يعني ما من الروضه؟ اللَخَّرَك شنو يا محمد؟
يمين آمرتضى ما اتأخرت بس دي رجفه ـ رَخترا ٧ ما بين المدرسه والخلوه ـ قال روضه قال ـ كان دبيب نملً في نقىً يتهيل
ـ كنوز زيدان الخلاها لينا تكفينا شر السؤال لامن سيد الِوداعة يشيلا
شكراً مكرر يا المرتضى علي كل بوستاتك المهدئة
Post: #106 Title: Re: أجمل تسجيل لهذه الأغنية الإستثنائية.. Author: الزاكى عبد الحميد Date: 10-31-2011, 08:37 AM Parent: #104
Quote: والجملة الأخيرة من عندياتي.
ولم يجانبك الصواب-كعهدي بك دوماً- فيما ذهبت إليه يا صديقي.. فالرجل رحمه الله قال بالحرف الواحد: ما ظنيت يا الزاكي أمدرمان تجيب زي دا تاني.. وكان رحمه الله ينسب كل جميل في السودان لأمدرمان لسبب يعرفه..
Post: #107 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-31-2011, 04:05 PM Parent: #106
Quote: متفق معاك يامرتضى..اصلا دي البسمعا لي زيدان..
بس شفتا من محل بديت بوستك ده.. يآسرني ذاك الليل..
دكين عشا البايتات ، والضيفان كمان، أنت أدرى بأن احتفائنا بجل أغنياتنا مرجِعه بشكل أساس إلى حالة شكلتها عناصر كثيرة على رأسها عنصري الزمان والمكان والذكريات - هسه إتلقى قلت لي يا ود يا نوستالجيك - لكن يا دكين هذا لايقدح في أننا نعجب لأغنيات أخرى في المرة الأولى لسماعها إذا ما توفر لها PIN CODE المرور من صمام الشريان التاجي والباسويرد البيفتح وجداننا - ياخ كلمة (وجدان) دي شاملة وخطيره بشكل !! من ثم يا عشا البايتا ت ، كل ما جاء به زيدان صادف فترة عبقرية في حياتنا حين كانت لنا حياة شلالية في منابعها وقبل أن يسير النهر إلى حتفه الينتهي في الملح الأجاج ويسمونه حياءا مصب ، زمن كنا لاشايلين هم لاعارفين بكرا الجايينا، حين كان كل شئ أخضر ، الناس والبيوت والقلب وشوارع المدارس ووشوشة ابتسامات البنات وحقائبهن الضاحكات مضمومة إلى الصدور طلبا للجوء السياسي. إنت قايل ريدتنا لزيدان جات من هيِّن؟ هي شخصنة للزمكان ممعنة في صدقيتها وغياب الراحلين عن تلك الصورة الوجدانية يماثل إزالة ابتسامة الموناليزا من لوحتها المعلقة بين السماء والأرض في اللوفر، أترى سينادونها (الجيوكندا) إن فعلوا؟ يا دكين ، ظللنا نحلم بأننا حتما نعود إلى هناك بكل مافي هناك من زيدان وأمدرمان وألحان وأجندة – يا وجعي - لم يبق منها إلا غبائن النفس ومسخرة الوعود..
ليت السفائن لا تقاظي راكبيها من سفار أو ليت أن الأرض كالأفق العريض ، بلا بحار ما زلت أحسب يا نقود ، أعدكن و أستزيد ، ما زلت أنقض ، يا نقود ، بكن من مدد اغترابي ما زلت أوقد بالتماعتكن نافذتي و بابي في الضفة الأخرى هناك . فحدثيني يا نقود متى أعود ، متى أعود ؟
(السيَّاب)
Post: #108 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 10-31-2011, 09:45 PM Parent: #107
Quote: والله يا ناس مسقط والخليج حالتكم تحنن، دخلت البوست لقيت رجال عجايز بيقولوا للزمان أرجع يا زمان قلت أكابركم ،، ولكن هيهات بس ناقصين صاحبي دالي الحبوب،، بعدين يا ود شيقوق وود المرتضى قولي أحبك تستبين كهولتي بتاعت أول أمس شكلها ما جابت دخل،،أها يا ود المرتضى وقع ليك كلامي
يا سلام يا عفراء، بالله مش بالجد حالتنا تحنن وزي ما قال ودالرضي في هوى الخلخال ( ياحبيبي البي حنن اليابالي) ، بالله مش (هرمنا) حتى بمفهوم الجزيره ؟ بس ما قلنا للزمان (إرجِع) لأننا نؤمن بأن لاشئ يعود إلى حاله ، ولا نؤمن بما يرد في الدعايات إياها ، وشكرا ل (المكابره) وقد ابلغت رسالتك إلى الصاحب المشترك الشاب دالي الحبوب وقال ليك تاني ما تقولي إنتهينا ، نحن في عز الشباب كما تغنى أبناء حي العرب البررة سيف الدسوقي وإبراهيم عوض وودالحاوي..
طبعا يا عفراء موضوع شيقوق داك ربما يكون – كما تقولين - ما جايب حقو لكن كلامك هناك برضو يعوزه السند ومبني على فرضيه خاطئة مضمونها أن من تقول للرجل أحبك (حا يمسكا ليها لامن تموت) وأنا قلت ليك غلطانه يا عفراء ، يجب أن تقولها ويجب أن يمسكها ليها لامن يموت أو تموت هي وإلا يبقى زول جاحد ساي.. أها سالفة (تستبين كهولتي وتزداد وسامتي) الغلط فيها شنو؟ يا عفراء الزول البيقول للتاني أنا بحبك وبحلف بك وانا ناري بيصادر منو مخازن أسلحتو كلها ويخليهو زي باب العزيزية.
يا عفراء إتصلحي معانا بالله ، أنت تقولين أن ناس مسقط والخليج حالتم تحنن لأنهم بيحبوا لي هسه ، وهذا وصف حميد لكنه يعني - بمفهوم المخالفة عند الشافعية - أن الذين لايعيشون في المنطقة المعنية لايعرفون الحب ، وفي ظني أن هؤلاء يستحقون الشفقة والتعاطف و محتاجين رعاية خاصة وسيصف لهم ناس السايكاتري أغنية قصيرة الموجة من نوع نانا يا نانا ثم برجاك برجاك في محل يومداك يا ولد مع 5 ملجم غزل عند اللزوم ولا أوصيهم قط ب (كنوز محبه) لأنها أوفردوز بتلحقم أمات طه أوربما يمرون بها مرور الكرام باعتبارها لامعنى لها وكأنها تصريح والي أو وزير إتحادي .
هسه سافرتي بينا من نجوم تلمع بعيد تسخر من السهران وحيد ومرقتينا في أم طرقاعراض ومول غير يا عفراء..
Post: #109 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-01-2011, 07:12 AM Parent: #108
Quote: فعلا تسجيل جميل
رحم الله العندليب الاسمر
وأنت تدرك يا شبلي أني عنيت الراحل وليس التقنيات التي توفرت للتسجيل وحين يكون الفنان قائدا موهوبا العازف الكعب زاتو بيبقى كويس فالنهر العظيم يبث حالة من الجزالة والنشاط في الروافد والفروع معا ، عشان كدا أي أوركسترا يغني فيها زيدان حتى لو كانت ملخبته بتنتظم تلقائيا فيما يشبه شعارات قادة التظاهر الموهبين أو التراتيل الكنسية وتجد الآلات الموسيقية في حالة غزل متبادل وتفاؤل لايخفى على أذن فالطبول ينتظمها العنفوان والحبور وتبقى الكمنجات في حالة زغردة بسقف السرور. هل سمعت حوار البيزجيتار مع بقية الأوركسترا في ( ما أصلو ريدا أصبح حياتي) الذي انتهى بقرار (أبقى راهب ليها واعبدا)!!
قادر الله.
Post: #110 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-01-2011, 11:26 AM Parent: #109
Quote: اغنية نحلة
لمن يتذوق الشهد يا دكتور، شوف الزول دا صادق مع نفسو قدر شنو، من بدري حاولت المدرسة الثانوية تخييره بين الفن وبين حصص علوم الدنيا لم يتردد كثيرا في أن يختار علم لاهوت من نوع خاص وعلاج ما لاتعالجه قلاكسو وأسترا زينيكا، ببساطة إختار النجـــــــــــــــاح.. هسه يا محمد في كم سوداني أنجز رسالة دكتوراه قاعده في الدرج وشوف (كنوز محبه قاعده وين) !! كم مليون قلب شايل الزول دا وأغانيه . كنوز محبة وأخواتها ينضِّفوا الشوارع والأحياء والمدن .. عرفت الفرق وين؟ كم من حامل لأعلى الدرجات العلمية من أرقى جامعات العالم لم يقدم للناس سوى الخراب والدمار والخيانة والفواجع والنحيب .. لكن زيدان ، ياكا شايف براك.. النجاح خشوم بيوت يا بركه..
Post: #111 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-01-2011, 03:18 PM Parent: #110
و(الليل يبقى ليل) دي قطع شك لم تمر دون تأمل .. هذا ظني يا محمد ، لذا لم تحبس إعجابك وقلت آي لايك. الليل يبقى ليل - كما ذكرت أعلاه - شئ يشبه حال سيدنا يونس في بطن الحوت، الضُلمه الماخمج.. لكن كلام زيدان زاتو قصيدة..
شكرا أستاذ محمد زكريا،
Post: #112 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 11-01-2011, 08:18 PM Parent: #111
Quote: من بدري حاولت المدرسة الثانوية تخييره بين الفن وبين حصص علوم الدنيا لم يتردد كثيرا في أن يختار علم لاهوت من نوع خاص وعلاج ما لاتعالجه قلاكسو وأسترا زينيكا، ببساطة إختار النجـــــــــــــــاح.. هسه يا محمد في كم سوداني أنجز رسالة دكتوراه قاعده في الدرج وشوف (كنوز محبه قاعده وين) !! كم مليون قلب شايل الزول دا وأغانيه . كنوز محبة وأخواتها ينضِّفوا الشوارع والأحياء والمدن .. عرفت الفرق وين؟ كم من حامل لأعلى الدرجات العلمية من أرقى جامعات العالم لم يقدم للناس سوى الخراب والدمار والخيانة والفواجع والنحيب .. لكن زيدان ، ياكا شايف براك.. النجاح خشوم بيوت يا بركه..
والله النجاح خشم بيوت
Post: #113 Title: Re: أجمل تسجيل لهذه الأغنية الإستثنائية.. Author: عفاف أبو حريرة Date: 11-02-2011, 03:02 AM Parent: #112
Quote: وزيدان عارف الكلام دا كويس يا نصر ، يعرف أن هناك أناسا يمنحون الأشياء معناها،
وانت يامولانا من هولا الناس تعرف تغوص في كبد الحياه وتطلع كل اوجاعنا كانك صياد من البحر تجيب كل النفايث ومن البر ممكن تصيد غزلان يقلبك تستمتع بيها ولا تبكي عليها
الله يمتعك بالعافيه كن كما انت وحمض لينا كل صور الحياه الجميله الحولينا كتير مننا بقي لا بشوف ولا حتي بحس
Post: #114 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-02-2011, 10:31 AM Parent: #113
Quote: دي أهل وبس يا محمد المرتضي...
دي فيها كل الحنين والحنان...معبأة في كل كلمة وجملة موسيقية بداخلها...
نِزار، عارفك سيد وجعه في المقيم في الشرايين ، زيدان كان جسما أثيريا وروحا معطَّرة ومعطِّرة، مُريح للنفس ، راحة تماثل إحساسك عندما تبذل لمن يحتاجك، بتعرف فضل الزاد؟ دا ياهو الكان بيعمل فيهو زيدان بس في ماعون بلون وعبق الياسمين .. ما حدث أن تلك الروح انعتقت من إسار الجسد الفاني المُعَد ليناسب الحياة الأرضية فقط كما قال ابن سيرين ، ذهب الجسد بعد أن ترك لنا حضنا دفيئا وأغان بمثابة ممرات آمنة نعبر بها حين يشتد القصف والإرعاد..
أهو هسه بكتب ليك عن زيدان يا نزار وتساقط رذاذ المطر في مسقط، شايف إنحياز الجمال المكشوف للجمال؟
Post: #116 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-02-2011, 02:31 PM Parent: #114
Quote: بوست الكلينكس
والله يا ريِّس رغيم جميل ذكرتنا زمن الدموع بتتشاف (خلف الرموش مكبوته بحسره وضياع)؟ عارف يا أبا رغيم، لم تعد الأشياء كما كانت مع الفيسبوك والموبايل والإسكايب، الرموش أصبحت - كما الإبتسامة - صناعية ولاتوجد خلفها دموع .. حتى الأطفال نضبت غددهم الدمعية..
يعني يا مولاي نتأسى ونحزن وننوح ونبكي بالتيمم..
Post: #117 Title: Re: أجمل تسجيل لهذه الأغنية الإستثنائية.. Author: Alsa7afa_30 Date: 11-02-2011, 04:21 PM Parent: #116
رحم الله زيدان ..
تحياتي أ. محمد المرتضى ..
و كل عام و الجميع بخير ..
. .
Post: #119 Title: Re: أجمل تسجيل لهذه الأغنية الإستثنائية.. Author: saadeldin abdelrahman Date: 11-03-2011, 00:39 AM Parent: #117
يا مولانا، الصحافة هذا واحد من ناسنا و ما أتى به الا الشديد القوي بالله ضاعف ليهو الجرعة :)
Post: #120 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-03-2011, 09:22 AM Parent: #119
Quote: Quote: صدقني يا طارق بسأل نفسي هل بعد فراق زيدان لسه النيلين بيتلاقوا؟
وهل هناك أصلا سودان؟؟؟ أسئلة نبيلة
السودان المكان هو السودان الإنسان يا النيل، الإنسان هو الذي يمنح المكان ألقه وأثره في النفس، زمان يا محمد ، لامن كنا شباب ، كنا نمر ببيوت عادية في المبنى لكنها سامقة في المعنى حتى تحس – رغم أنها بعض من الفريق – لكأنها في السماك الأعلى ، أها زي البيوت دي بتكون مسكونه بناس جميلين، بيوت نيِّرة وناسا ما بقدر أقول ليك ما يصدر منهم من إشعاع حميد بيساوي كم ملي ريم في الثانية، تتصور حتى لو كانت الجدر مصنوعة من الطين حاتقول : بالله شوف الرخام الإيطالي دا صقيل كيف وقيافه، بيوت يتوارى قصر باكنجهام أمام بهائها خجلا. أنسيت قول الشاعر وما حب الديار شغفن قلبي ولكن حب من سكن الديارا.
زيدان ونفر كريم من الماضي والحاضر هم من جعل المكان عبقريا حتى غدا النيل في دواخلنا رديفا للكوثر وأمدرمان وغيرها هي (عدن) التي ورد ذكرها في القرآن وسفر التكوين وكان النيل أحد أنهرها . فيا محمد تساؤلي منبعه أن زيدان كان يستفز العشاق ويحرض دواخلهم للتلاقي وقد وصلك المعنى فمكان زيدان للنيلين يماثل مكان ناظم الغزالي لدجلة والفرات..
عمر رحلتنا كان ايام وكل فرح قصد دارنا رحل بطيف من الأحلام ونحن هنا الأمل غابت نجومه الحلوه في الأوهام
Post: #121 Title: Re: أجمل تسجيل لهذه الأغنية الإستثنائية.. Author: nazar hussien Date: 11-03-2011, 09:57 AM Parent: #120
يا مولانا...
كنت بتابع في حفل تأبينه بالعباسية واستوقفتني كلمة وزير الثقافة السموأل خلف الله عن زيدان وبكيت وما هماني شيء...
وقررررربت ابقي مؤتمر وطني...لأن وزير ثقافته قد شهد لزيدان
هل رأيتم الرجال والنساء والأطفال يبكون...كما بكوا زيدان
Post: #130 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-04-2011, 06:13 PM Parent: #121
Quote: هل رأيتم الرجال والنساء والأطفال يبكون...كما بكوا زيدان
ربما هناك سوابق حدثت أثناء غيابنا عن أرض الوطن جسدا.. لكن قلة هم الذين بكى عليهم الشعب بكل شرائحه وفئاته العمرية يا نزار.. وفقا لذاكرتي منذ رحيل عبدالناصر لم يحدث ذلك..
Post: #122 Title: Re: أجمل تسجيل لهذه الأغنية الإستثنائية.. Author: الرشيد شلال Date: 11-03-2011, 10:03 AM Parent: #120
لك التحية سيدى ود مرتضى كان زيدان ابراهيم رمزا للتواضع والبساطة والشفافية والجمال كان يمتلك روحا تدثرت بالنقاء والسماحة والحب لن يجود الزمان بمثله قريبا فالتفرد نادر وتكراره صعبا ليس لنا الا ماترك من خلود لحن وكلمات واداء حملها بصوته الدافئ له الرحمة والمغفرة سائلين الله ان يسكنه فسيح جناته - انا لله وانا اليه راجعون - صدق الله العظيم - سيدى ود مرتضى لك شلالا من الشكر وانت تبحر بنا عبر بحارا من الحب والشفافية والجمال ( زيدان) لاتتوقف اخى الحبيب ، لقد افتقدك الجميع وافتقدنا مثل هذه السياحة مودتى وشلالا من الشكر
Post: #124 Title: Re: أجمل تسجيل لهذه الأغنية الإستثنائية.. Author: محمد ابراهيم قرض Date: 11-03-2011, 12:33 PM Parent: #120
ناظم ابراهيم ... يا أعز عزيز ... زيدان دوما يبدع حينما يغني لإبراهيم عوض .. . محمد المرتضى ...
أتى على جيلنا حين من الدهر كان يطلق فيه العنان لشعر رأسه (خنفس) ، ويتعمد أن يستطيل بنطاله من الأسفل (شارلستون) .. والفنانين من جيلنا ليسوا بإستثناء في ذلك وكأنهم يوثقون لتلكم الظاهرة ... للموضة سلطان غريب وعجيب يا مرتضى لكن مادخل ذاك بذلك ؟؟ باين خرفنا يا مرتضى !!
Post: #134 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-05-2011, 10:43 AM Parent: #124
مكرر
Post: #128 Title: Re: أجمل تسجيل لهذه الأغنية الإستثنائية.. Author: محمد الكامل عبد الحليم Date: 11-04-2011, 11:17 AM Parent: #120
تحية الي سعادة المستشار والمتداخلين...من ظل المطر ياتي رحيل الطيور الي مكامن الدفء والرزاز...يرحل زيدان حاملا غيثارته وكل اشجانه واحزانه لكنه يترك لنا( كنوز محبة)...نصطاد بها عصافير الاشواق وتمتلئ سلالنا ببريق الدهشة والام الرحيل وصوت خافت من بعيد...(الحنان الفي قلوبنا اصله نابع من عيونك)...هل تبقي شيء من الدن؟ هل عادت الشوارع ماطرة بالحانك يا زيدان..ام غشاها موج فوقه امواج من الدمع وصرير رياح ياتي من بعيد حاملا التذكار....
انت ما اهديتها لينا...كيف تضيع احلي ما اهديت يا غالي...كيف...
الي صديقي ..منور في عليائه..حيث كان يطيب لنا العزف والغناء...في حضور شاعر الاغنية استاذنا بشير عبد الماجد...
Post: #137 Title: Re: أجمل تسجيل لهذه الأغنية الإستثنائية.. Author: عبدالله الشقليني Date: 11-05-2011, 05:21 PM Parent: #120
سيدي لا اعرف كيف أشكرك ... فقد أسعدتني فوق ما كنتُ أحسب ألف شكر لكَ
Post: #158 Title: Re: أجمل تسجيل لهذه الأغنية الإستثنائية.. Author: tayseer alnworani Date: 11-16-2011, 12:58 PM Parent: #120
ود المرتضى كل سنة وانت طيب يا صديقى وتعود الايام وامانينيا محققة ما ظهر منها وما بطن
Post: #126 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-03-2011, 09:23 PM Parent: #125
تسلمي يا أم احمد،
هو نفسه كان لسان حال الكثيرين منا ، كأنه كان يقرأ ما يلوب في الخاطر فينتقي من القصيد ما يغنينا عن روايات بحالها ثم يدفق عليه ألحانه ويقدمه لنا بصوت لايأتيه الباطل من بين نبراته ولا من مستوياته علوا وانخفاضا، نعم يعبِّر عنا بالضبط ، قلت ليك الزول دا يا عفاف كان عندو إسكانر للصدور لاتخطئ نتائجه.. يا سيدتي زيدان رفيق الجميع ، وصاحب الناس ديل كلهم ، قعد معاهم في غرفهم ومكتباتهم وهم يستذكرون دروسهم ، كتب رسائل عشقهم وهو رقم مستدام في وسائل مواصلاتهم وتفاصيل قراهم ولواعجهم ومدنهم ورفيق ليلهم يناجيهم فيأتيه صداهم : يا ليل البعد ما بتتعب أنا تعبت أقيف نرتاح كفاي وكفاك ..
تعِب زيدان ورحل وتركنا لليل موحش ما بجبر الخاطر
Post: #127 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-04-2011, 11:03 AM Parent: #126
Quote: رحم الله زيدان ..
صحافة - 30 ، نسأل الله أن يتقبل الدعاء، وهذا الرجل الصالح زيدان إبراهيم يذكرني بما جاء في الأثر أن النفوس جُبِلت على حب من أحسن إليها، وبُغض من أساء إليها ، وزيدان أحسن إلينا فأحببناه ، بالله يا حسام سمعت زول عندو رأي غير كدا؟ ياخ الذين لم يجيزوا صوته في بداياته غنى ليهم بالي مشغول وبين وبينك والأيام لامن آمنوا ، وعندما غنى ماهو عارف قدمو المفارق أحسوا بأسى الدنيا كلها في أدائه، شرح ليهم بغنائه الحاصل شنو، فأجازوهو وأخطروا NASA رسميا بميلاد مركبة فضاء جديدة في 1963 ، قريبات دي شفت السودانيين في حالة صدمه وجزع ورفض لخبر رحيل مثلما حدث في حالة زيدان؟ كل واحد/ة كان سيد الفراش وسيد وجعة ، كلنا كان ينتظر أن يعزيه المعزون في فقده ، ياخ (إذا أحب الله عبدا حبب الناس فيه) عشان كدا كتيرين بعد رحيله ذرفوا مخزونهم من الدموع وأرسلوا برقياتهم المعزية للنفس وقالوا أنهم في أعلى درجات الجزع لكنهم لايقولوا إلا ما يرضي الله ، كأني بالمحبين اجتمعوا وأصدروا إعلانا كان ختامه :
من لمسات حنانك خلاص تمينا دور أيام مرة خالية من طعم السرور كل ما غنى شادي دوبنا الشعور.
وأمنية شخصيـة يا زيدان يا ريت لو في الطـيــف تزور
Post: #129 Title: Re: أجمل تسجيل لهذه الأغنية الإستثنائية.. Author: saadeldin abdelrahman Date: 11-04-2011, 01:44 PM Parent: #127
أحب كده زاتو!
Post: #131 Title: Re: أجمل تسجيل لهذه الأغنية الإستثنائية.. Author: الفاتح ميرغني Date: 11-04-2011, 07:29 PM Parent: #129
Quote: صديقي الفاتح ميرغني قال لي كان أهم لينا من البترول..
كل سنة وأنت طيب يا محمد المرتضى أ خونا عبدالكريم كيكي كان بقول في بوستات كده محتاجة لروح قدس عشان تخشها، ووحي عشان تكتب فيها! تابعت البوست ده وغلبني كلو كلو أكتب حاجة عن زيدان.زيدان ما كان بغني زيدان كان بغرد، وكان كلامو غير، على حد تعبيرك. زيدان كا ن لمن يقول " لو أحبك انا عمري كلو " تطمئن القلوب الرواجف. .! زيدان كان متخصص في فتح إنسداد الشرايين والأوعية الدموية عشان الدم ينساب باريحية من الاذين الايسر،وعشان كلمة " بحبك" تطلع " دويتو" من وجدان جميل بثينة وإبن الزريح.زيدان كان بيعمل ده كلو من غير جراحة أو مبضع، عشان كده فرحة الشعب السوداني بيهو كانت أكبر من الفرحة بإكتشاف البترول. البترول ممكن يكون نقمة لكن زيدان نغمة، نغمة من مزمار آل داؤود. البترول ممكن الناس تستوردو لكن زيدان ده يجيبو من وين؟ زيدان كان "عجيب في معانيه إذا ادركت معناه"! محبتي
Post: #132 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 11-04-2011, 08:52 PM Parent: #131
Quote: البترول ممكن الناس تستوردو لكن زيدان ده يجيبو من وين؟
Post: #133 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-04-2011, 09:33 PM Parent: #132
(باب الريده إنسدَ).. وعشان أوضح ليك خطورة الكلام القالو التجاني حاج موسى دا على الصحة يا شلال لازم أقول ليك إنو مصطلح الريده دا عندنا نحن السودانيين إختراع حقنا برانا ، شئ خالص وخال من الشوائب وعنده معنى دقيق وشامل وخاص فيه صدق وعاطفه من عيار يقاس بالقلب بس ، عندي دايمن شعور يا رشيد إنو الريده دي قاعده بين الفؤاد والحجاب الحاجز مع شعاع ماري بالرقبه تجاه أسفل الأذنين ، والريده يا مولاي لامن تغيب عن الزول بيبقى قاعد في السَهَله ساي ، أها لامن باب الريده ينسد معناتو الفؤاد أصبح مجرد طلمبة ضخ وفَلتَره لاغير، يؤدي وظائف ميكانيكية محضة ، وعِوضا عن ترميمه في حضن وعيادة الحبيب ممكن توديهو أي ورشه في المنطقه الصناعيه للجلخ ولحام الستالين والسمكره عند ناس كمال بُنقُز .. يعني القلب المابريد دا باختصار أخير عدمو، هسه مع ناسك المتصوفة مش بتقولوا للمداومين ممن يتوفروا على الصالحين والأولياء مريدين؟ شوف بالله الكلمة دي بتشرح فسيولوجيا علاقات الجمال كيف؟ أها يا شلال ، لامن باب الريدا ينسد البايباس زاتو لابينفع لا بسوي شئ.. بس ترجا سيد الوداعه يشيل وديعتو..
Post: #135 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-05-2011, 10:50 AM Parent: #133
Quote: ناظم ابراهيم ... يا أعز عزيز ... زيدان دوما يبدع حينما يغني لإبراهيم عوض ..
د. قرض سلامات يا عزيز دنيانا، في إحدى المداخلات في الصفحة الأولى عرضت لموضوع تغني زيدان لبعض الفنانين ، ولاشك عندي أنه تغنى بها إعجابا كإنسان ولحظت أنه معجب بكثير من أغاني إبراهيم عوض الأسطوري وعثمان الشفيع وآخرين من زملائه ، وكثيرا ما كان يدخلني في حيرة المفاضلة (يا ربي هسي الأحلى ياتو "نسخة") لكنه لم يكن مقلدا فخاتم زيدان على النسخة مسجل في قلوبنا قبل ال WIPO زاتا.
Quote: للموضة سلطان غريب وعجيب يا مرتضى لكن مادخل ذاك بذلك ؟؟ باين خرفنا يا مرتضى !!
الموضه هي طبيعة التجدد والتجديد يا دكتور لكن لامن يقوم واحد نجم تحبه الجماهير بصورة لاكابح معها فما يرتديه سيصبح ساريا ونافذا من تاريخ نشره في الجريدة الرسمية للمعجبين وبأثر فوري ، ليست الملابس وحسب بل أسلوب تصفيف الشعر والكلمات ولغة الجسد كمان . قلت ليك زيدان بالآفرو والشارلستون وحركة اليدين كان كمن ينثر الحَب على الطيور والحُب علينا ويرش ماءا على الزهور ، كلها أصبحت موضه.. ياخي في طقاطيقه الصغيرة الظريفة زاتا كان ملهما .. لامن غنى يا حاجه دُقِّي لينا كاروشا أصيب السودان كله بالأرتكاريا.. وبعثت وزارة الصحة في طلب المزيد من ال Antihistamine
Post: #136 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-05-2011, 03:57 PM Parent: #135
Quote: من ظل المطر ياتي رحيل الطيور الي مكامن الدفء والرزاز...يرحل زيدان حاملا غيثارته وكل اشجانه واحزانه لكنه يترك لنا( كنوز محبة)...نصطاد بها عصافير الاشواق وتمتلئ سلالنا ببريق الدهشة والام الرحيل وصوت خافت من بعيد...(الحنان الفي قلوبنا اصله نابع من عيونك)...هل تبقي شيء من الدن؟ هل عادت الشوارع ماطرة بالحانك يا زيدان..ام غشاها موج فوقه امواج من الدمع وصرير رياح ياتي من بعيد حاملا التذكار....
انت ما اهديتها لينا...كيف تضيع احلي ما اهديت يا غالي...كيف...
الي صديقي ..منور في عليائه..حيث كان يطيب لنا العزف والغناء...في حضور شاعر الاغنية استاذنا بشير عبد الماجد...
الكلام الأخير دا يا محمدالكامل جد مؤثر.. عندما يجمعني مكان أو حدث أو شخص أو أي شئ ما بعزيز ويرحل هذا الأخير تصبح لتلك (الأشياء) قيمة ومعنى مختلف . كنوز محبه التي جمعتك بالراحل (مُنَوَّر) ستبقى فيك بعضا من دعاء مستجاب بإذن الله.. هي المحبة يا محمد تعلو على كل كنز في الدنيا ، شوف زي ترنمك بها مع الراحل وشاعرها والتفاصيل الصغيرة ، أليست عندك (الآن) أعز من أي كنز؟ شوف الحياة دي قصيره كيف.. بسرعه السمحين يمروا كالبرق الخاطف ويرحلوا.. رحم الله منور وزيدان وكل من أهدانا ريده ولو لحظات في حياته.. محبتي.. كل سنه وانت طيب..
Post: #138 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-05-2011, 09:27 PM Parent: #136
Quote: زيدان كان "عجيب في معانيه إذا ادركت معناه"!
لا أغالي ولا أعُد نفسي منحازا لحي ولدت فيه إذا قلت لك أنه حي كوادي عبقر، شوف يا الفاتح ، حي العرب والمسالمه تقريبا 4 كيلومتر مربع يفصل بينهما شارع الشنقيطي (ش دنقلا سابقا) من حي السوق جنوبا إلى مقابر البكري شمالا، المنطقه دي أخطر منطقة في تاريخ السودان الحديث لأنو في عالم الرياضه تأسس فيهاالمريخ والهلال،أما الشعراء والأدباء والمسرحيين والمطربين فالقائمه تطول ولو قلت أحسبهم هنا سأقضي عطلة العيد في الكيبورد . زيدان رغم أنه سكن حي العباسية لكن حي العرب كان كعبة الفن وهو الذي دفع به إلى عالم الفن بمعناه العريض مذ كان طالبا في مدرسة حي العرب الوسطى والتي انتقل منها إلى الأهلية الثانوية بأمدرمان كما علمت ، لذا تجد أن عماليق الحي كانوا من مقربيه فهم يعرفون أنه (عجيب في معانيه) وموهبته وروحه التي تتماهى مع كيانه. بالطبع كانت هناك كوكبة من الموهوبين شاركت في دعم موهبة زيدان الأصيلة موسيقيا ومنهم أحمد زاهر وودالحاوي وعمر الشاعر ومن الشعراء عوض أحمد خليفه والتجاني حاج موسى ، وهؤلاء، ومعهم مجموعة أخرى عاصرتهم أو سبقتهم ، كانوا يمثلون مجلس إدارة الدهشة والإبداع وأخرجوا فنانين لن يتكرروا ، وفي وسط هؤلاء العماليق يطلع أبو الزوز الخطير المثير . صدقني يا الفاتح ، رغم أن البلاتيني إبرهيم عوض تغنى لصديقه الطاهر إبراهيم بأغنية (يا خاين) لكنني أحببتها عند زيدان الذي تحلو في حنجرته وتأخذ معنى مختلفا لدرجة إنو هسه لو داير تثني علي قول لي : (يا خاين)..
Post: #139 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-06-2011, 00:40 AM Parent: #138
Quote: أسعدتني فوق ما كنتُ أحسب ألف شكر لكَ
أستاذي الشقليني، الناس القالوا كلامهم هنا ديل - وأنت منهم أيها الأديب - هم الذين أسعدوني بكلام عن إنسان أراه الأمين العام لهيئة الفرح والتفاؤل في كل كلمة شدا بها ، هسه يا شقليني لامن أتذكر الراحل المقيم يقول (عدت يا عيدي بدون زهور) أحس بالحزن في ثيابي وطاولتي وألم يكاد يذيب هذه الشاشة التي أخاطبك من خلالها.. أول مره ، يا عبدالله ، يمر علينا عيد وزيدان ليس بيننا. فعلا : وين سمرنا وين البدور ..
غابوا عني..
Post: #140 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 11-09-2011, 08:30 AM Parent: #139
Post: #141 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-09-2011, 12:22 PM Parent: #140
يا الطيب (نضال) القاصدا دي منو؟ على أية حال لوكنت قاصد نضال الحاج فهي ربما الشاعرة الواعدة الوحيدة التي إذا حضرت في الشاشة لا ألتفت حتى تنتهي من نثر رذاذها المعطر.. نضال الحاج موهوبه،
قلت ليك موهوبه..
Post: #142 Title: Re: أجمل تسجيل لهذه الأغنية الإستثنائية.. Author: الزاكى عبد الحميد Date: 11-09-2011, 02:39 PM Parent: #141
مرتضى كل سنة وانت طيب وجعل الله أيامك كلها سعيدة ومزدانة بالجمال الذي تحب.. الاستمتاع بهذا الطرب الجميل في هذه اللحظات التي يداعب فيها الرذاذ أجواء المدينة هو جمال لا يوصف.. فالشكر لك من قبل ومن بعد..
Post: #143 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-10-2011, 01:54 PM Parent: #142
شكرا يا الباهي .. كل سنه وانت طيب .. الرذاذ والمطر يعيدا توازن كيمياء الإنسان (الإنسان ) وكذا زيدان، ياخ التركة التي خلفها دي تفك أي حصار يضربه الزمن على الأنفس .. راجيها تعطف وتحن للندا.. ذخائر وعساكر..
Post: #144 Title: Re: أجمل تسجيل لهذه الأغنية الإستثنائية.. Author: سفيان بشير نابرى Date: 11-10-2011, 02:37 PM Parent: #143
أتابع بامتنان يفوق الحد كل حروفكم هنا يا مرتضى لكن أنا فقير من الحروف يا صاحبي في وسط هذا الغياب لم اذهب لسرادق العزاء لكني اتلصص صوته في نعي المريدين و ارجع بيّ من محبته ما يعجز الوصف عنه .
اجمل ما قراته عن زيدان بقلم الكاتب و القاص (عادل القصاص)
Quote: (دمعنة)
هذا النّص عبارة عن اعادة انتاج كتابية لبعض وقائع وردت خلال حوارات، للدقة ونسات لي مع الصديق يوسف درع عن علاقته بزيدان ابراهيم. كان يوسف درع، المعروف أحيانا ب "يوسف القصيّر" أو "يوسف الصغيّر"، يعمل سبّاكا في السودان، ويمارس الغناء في نطاق جدّ محدود. عقب قدومه الى أستراليا، واصل امتهان السّباكة في مدينة ملبورن. كما عرف أيضا بمساهماته الغنائية في عدد من مناسبات الجالية السودانية في المدينة، أحيانا في غيرها من المدن الأسترالية. له منّي، لأجل زيدان، دمعة ودندنة. عادل القصّاص
سنّار، المبتدأ بعد أن لفظت مؤخرتي مقاعد الدراسة باحدى مدارس سنّارالابتدائية، عملت "صبي محل" لدى صائغ مشهور بسوق سنّار. كان معلّمي الصائغ – الى جانب براعته في مهنته – حاذقا في العشق أيضا. وعلي الرغم من أنّ الحظّ بخل عليّ برؤية عشيقتة، الّا أنّني كنت أتعرّف على حضورها من خلال البهاء الفريد الذي كان يجلو وجهه اذ تعانق أذنيه، عبرالسمّاعة السوداء السميكة لهاتف المحل، صوت العشيقة. ياطالما شاركت معلّمي في حبّ تلك الحبيبة لا لشئ الّا لأنّ الصائغ كثيرا ما كان يهيئ وجدانه، بنوع خاص من الوضوء، يتمثّل في تشغيل شريط كاسيت لزيدان ابراهيم قبل المهامسة الهاتفية معها. ثمّ ما تلبث عقيرة زيدان أن تتحوّل الي خلفية رقراقة وخافتة قليلا أثناء المهامسة، فالى نسائم، عطور وأضواء راقصة بعدها.
كان من اللافت كذلك أن معلّمي الصائغ كثيرا ما أفسح السماعة لأذنيّ حبيبته كي تتمرّغا في صوت زيدان دونما اشراف من فمه أو مزاحمة من أذنيه. لقد كان معلّمي عاشقا حاذقا، كما كان صائغا بارعا.
ألآن أفكّر في أنّه ما كان من الممكن أن يصير هكذا – في الحقلين – بغيرما معونة جليلة من أغاني زيدان.
الشّقلة، خبر أوّل خلال احدى سنوات النصف الثاني من ثمانينيات القرن الفائت، ذهبت لزيارة أقرباء لي في الشّقلة، التي كانت وقتها ضمن الأحياء التي يطلق عليها مصطلح "السكن العشوائي". أمّونة، احدى قريباتي هناك، كانت ملمّة بأعجابي بزيدان ابراهيم. فأرادت أن تعطّر حفاوتها بزيارتي بمفاجأة – وقد كان لها ذلك:
- يوسف، انت عارف انّو زيدان ابراهيم حيجي يسكن جنبنا هنا؟ - زيدان منو؟! - زيدان ابرهيم - تقصدي زيدان ابراهيم الفنان؟ - أيوه زيدان ابراهيم الفنان - ويسكن وين؟ - في البيت الجنبنا ده...يعني حيكون جارنا طوّالي - انت خرّفتي ولا شنو يا أمونة؟ شنو البخلّي زيدان بجلالة قدرو يخلّي العباسية ويجي جنبكم بيجاي؟ - انت ما عارف انّو بيتو بتاع العباسية بيت ايجار..وصاحب البيت رافع فيهو قضية عشان يطلّعو؟ - أيوه عارف...لكن حتى لو طلع من البيت داك، شنو البخليهو يجي هنا؟ - ومالها "هنا"؟ - لا، العفو يا أمّونة...بس يعني الحتّة دي ما مخططة وما فيها مواسير مويه اتوصّلت وما فيها خدمات أساسية تانية كتيرة...يعني هسّه انتي ذاتك يا أمّونة كان لقيتي سكن في المايقوما أو الحاج يوسف المخططة ديك وبي مواسيرها – مع انها ناشفة من عدم الموية – مش أحسن ليك من "الحتة أم حجّا للصهريج دي"؟...ده شي، والشي التاني أنا البتقولي ده زاتو ماداخل لي في راسي وبفتكرو اشاعة ساكت أو في واحد تاني اسمو زيدان، أو زيدان ابرهيم تاني، باني البيت ده وحيجي يسكن فيهو...يعني مافي زول تاني اسمو زيدان ابرهيم الّا زيدان ابراهيم؟ - زيدان تاني شنو يا يوسف؟ يا هو زيدان ابراهيم الواحد ده... وأنا شفتو، وكمان قابلتو، أكتر من مرة لمّن كان بيجي يتفقّد بيتو ده! وكان مكضّبني أمشي أسأل محمد زيدان! - محمّد منو؟ - محمّد زيدان، الزول الهسّه ساكن في بيت زيدان - وده ولدو كمان؟ - ياخي ولدو شنو؟ دا واحد معجب بي زيدان ومقعّدو حارس ليهو البيت لحدّي ما يرحل - واسمو محمّد زيدان... والله صدفة عجيبة! - ولا صدفة ولاحاجة...نحنا ناس الحلة السمّيناه محمّد زيدان عشان ساكن في بيت زيدان...وكمان ما كنا عارفين اسم أبوه...وبيني بينك، ما كنا محتاجين نعرف ليهو اسم أبو...وحتى لو كنا عارفين أبوه، برضو حنقوليهو محمد زيدان - والله تمام...كان كده حأمشي أزوره بعد شوّيتين...وأخش بيت زيدان للدنيا والزمان!
وبالطبع لم انتظر حتّى تمضي الشوّيتين ولا حتى شويّة واحدة. كان بيتا ذا مساحة واسعة (قلّصت فيما بعد، عقب مجئ التخطيط العمراني للمنطقة) وقد شيّدت جدرانه بالطوب الأحمر، بينما عرشت غرفه بالزنك، غير أن فتحات نوافذه كانت خالية من النوافذ وقد غطّت بقطع من الخيش. تلقّفني محمّد زيدان بحرارة. وبعد أن غمرني بآيات الترحيب، لم يستطع التحكّم في شغفه باسماعي بعضا من أدآته العنيدة لأغاني زيدان بالاضافة الى محاولاته المستميتة في العزف على العود. وفيما تواترت زياراتي اليه بعد ذلك – آملا طبعا في مصادفة تجمعني بزيدان – تحوّلت زياراتي الى بيت أمّونة الى شبه غشوات.
للاعراب فيما كان الصادق المهدي مهموما بالتنقيب عن رفاة عمّه الهادي ونقلها الى ما ينبغي أن يكون محلّا لرد الاعتبار، كان الأمر القضائي المحتوم باخلاء منزل العباسيّة ينهش روح زيدان ابراهيم.
الشّقلة، خبر ثان في المرة الوحيدة التي حاولت أن أحضّ قدميّ على شئ من الديموقراطية، بالذهاب الى بيت أمّونة أوّلا، هتفت الأخيرة في وجهي بوجه مفعم بالبشارة:
وبعد دقائق، بعثت أمّونة بابنها الى صالون زيدان حاملا اليّ طاقيّتي، حلقة من المفاتيح ونظّارتي الشمسية، كما لفت انتباهي الي مزقة في كم قميصي تسبّب فيها نتوء في الباب الخارجي لبيت أمّونة.
الشّقلة، خبر ثالث خلال زيارة تالية اليه، سألني زيدان:
- انت شغّال شنو يايوسف؟ - سبّاك - ياسلام! انت كان كدا ما وقعت لي في جرح!...تعرف، الخرطوش الأسود التخين بتاع ماسورة الحوش مقطوع أو ما موصّل كويس...ولمّا المويه تجي بالليل بنصبح نلقى الواطة كلها مبلولة...تقدر تعمل ليهو حاجة؟ - أيوه، طبعا ياأستاذ..ده خرطوش البوليسين..تصليحو ما صعب
وبعد أن عدّلت وأعدت احكام توصيلة خرطوش البوليسين، قلت لزيدان:
- بالمناسبة أنا عندي هواية الغنا ياأستاذ..وناوي استمر فيها..ممكن تنصحني بي حاجة تنفعني في المجال ده؟ - الغنا احساس يايوسف
لم يزد على ذلك أية جملة اضافية. أزعم أنّ تأمّلي المستمر في مقولته تلك أعانني كثيرا، ليس في تطوير علاقتي بالغناء فحسب، وانّما بأشياء أو ممارسات أخرى كقيادة السيارة، الطعام، ومهنة السّباكة التي ما أزال منخرطا فيها.
للاعراب كان باب بيته بالشّقلة مفتوحا دائما. لم يكن يغلق الباب الخارجي ليلا حتى يتيح لعدد غير قليل من جيرانه، وغير جيرانه كذلك، ممن لم تكن شبكة المواسيرقد وصلتهم بعد، من المجيئ لأخذ مؤونتهم من الماء، الذي لم يكن يسري في مواسير بيت زيدان الّا ليلا.
ملبورن، خبر رابع قبيل ستة أو سبعة شهور من وفاته، قالت لي أمّونة عبر الهاتف:
- زيدان قال لي: (أمّونة، انت وين قريبكم السبّاك، "يوسف الصغيّر" داك؟..لي سنين ودنين ما شفتو) - قلت ليهو (يوسف ليهو زمن في استراليا) -قال لي: (عليك الله أدّيني تلفونوه عشان أتصّل بيهو)
ملبورن، خبر خامس في هاتف تال، علمت من أمّونة بأن زيدان سافر الى القاهرة، برفقة عبدالله الكردفاني، للعلاج. طلبت اليها أن تجيئني برقم هاتف له أو للكردفاني أو لأي مرافق آخر له في القاهرة لأنني أردت الاطمئنان على صحته كما كنت أرغب في أن ارسل اليه مبلغا متواضعا من المال. قبل أن تتمكّن أمّونة من الحصول على مثل ذلك الرقم، علمت بأنّ زيدان قد فارق "دنيا المحبّة" من وسائل الاعلام. فهاتفت أمّونة. وكان من بين أسئلتي الأخيرة لها:
- انت هسّه وين ياأمّونة؟ - في بيت البكا طبعا..البكا ما بكانا يايوسف.
للاعراب أؤمن بأنّ العدّ التنازلي لحياة زيدان بدأ لحظة أن أرغم على انتزاع جسده من العبّاسية.
Post: #145 Title: Re: أجمل تسجيل لهذه الأغنية الإستثنائية! .. Author: Hadeer Alzain Date: 11-10-2011, 05:01 PM Parent: #144
Quote: أتابع بامتنان يفوق الحد كل حروفكم هنا يا مرتضى لكن أنا فقير من الحروف يا صاحبي
والله يا مولانا أنا زي أخوي ود نابري دا .. فقيرة وعدمانة من الحروف والكلمة أمام هذا الوفاء والإحتفاء الجميل برجل يستحق الإحتفاء وأمام هذا الجمال الباذخ، كما وكنا نتابع بإمتنان أيضآ..!
ثم يا الله ! ما زال حزني ثاقب على رحيلك الكبير يا مايكل جاكسو(نا)
ما عندي غير أقول ليك شكرآ يا مولانا يا كنوز محبة على كنوز محبة!
كنوز محـبة كلمات بشير عبد الماجد ألحان بشير عباس
لما تشتاق للمشاعر تملأ دنياك بي عبيرا لما تشتاق للعواطف تنسجم تلبس حريرا
أبقي أسأل عن قلوبنا تلقي فيها كنوز محبة تلقي فيها بحور حنان و تلقي فيها الشوق يغرد و تلقي فيها الريدة فاردا جناحا تشتاق للربيع
و يا ربيع آهـ يا ربيع
لما تقسو عليك ليالي الوحدة والليل يبقي ليل و النجوم تلمع بعيد تسخر من السهران وحيد برضو أسأل عن قلوبنا تلقي فيها كنوز محبة تلقي فيها بحور حنان و تلقي فيها الشوق يغرد تلقي فيها الريدة فاردة جناحا تشتاق للربيع
إنت ما برضك حبيبنا والحنان الفي قلوبنا أصلوا ما نابع من عيونا والمحبة الفيها لو ما إنت ما كانت محبة كل أشواقنا ومشاعرنا وأحساسينا النبيلة إنت ما أهديتا لينا ليه تضيع أحلى ما أهديت ياغالي
_
Post: #146 Title: Re: أجمل تسجيل لهذه الأغنية الإستثنائية! .. Author: Hadeer Alzain Date: 11-10-2011, 05:29 PM Parent: #145
لو سمحت لي يا مولانا بوضع بعض من صور راحلنا زيدان أثناء التعافي بالقاهرة وبعض من صور الرحيل المر (للذكرى والتاريخ) ..!
شكرآ لك
زيدان ابراهيم .. دنيا المحبة
_
Post: #147 Title: Re: أجمل تسجيل لهذه الأغنية الإستثنائية! .. Author: Hadeer Alzain Date: 11-10-2011, 05:43 PM Parent: #146
الراحل زيدان ابراهيم - السودانيون يودعون محبوبهم
_
Post: #148 Title: Re: أجمل تسجيل لهذه الأغنية الإستثنائية! .. Author: الطيب شيقوق Date: 11-10-2011, 07:24 PM Parent: #147
Quote: قلت ليك موهوبه..
وش كيف لكن؟ حاسي معاها نهيرة وحمرة عين
Post: #149 Title: Re: أجمل تسجيل لهذه الأغنية الإستثنائية! .. Author: محمد حيدر Date: 11-11-2011, 07:16 AM Parent: #148
الاعزاء
Post: #150 Title: Re: أجمل تسجيل لهذه الأغنية الإستثنائية! .. Author: محمد حيدر Date: 11-11-2011, 08:13 AM Parent: #149
الاعزاء
إنسان إستثنائي يقدم فرح خرافي
رحمك الله أبوالزوز
Post: #151 Title: Re: أجمل تسجيل لهذه الأغنية الإستثنائية! .. Author: هند محمد Date: 11-11-2011, 07:38 PM Parent: #150
Post: #164 Title: Re: أجمل تسجيل لهذه الأغنية الإستثنائية! .. Author: محمد المرتضى حامد Date: 11-18-2011, 05:29 PM Parent: #146
شكرا يا هدير على رفدك المساحة بالصور والفيديو.. بالطبع هناك أشياء تحتاج مني وقتا طويلا لاستيعابها..
Post: #152 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-12-2011, 10:50 AM Parent: #144
Quote: - انت هسّه وين ياأمّونة؟ - في بيت البكا طبعا..البكا ما بكانا يايوسف.
يا سلام على أمونه يا سفيان .. يا سلام على عادل.. يا سلام على زيدان .. وعليك يا سفيان ..
Post: #153 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-13-2011, 12:13 PM Parent: #152
Quote: والله يا مولانا أنا زي أخوي ود نابري دا .. فقيرة وعدمانة من الحروف والكلمة أمام هذا الوفاء والإحتفاء الجميل برجل يستحق الإحتفاء وأمام هذا الجمال الباذخ، كما وكنا نتابع بإمتنان أيضآ..!
ثم يا الله ! ما زال حزني ثاقب على رحيلك الكبير يا مايكل جاكسو(نا)
ما عندي غير أقول ليك شكرآ يا مولانا يا كنوز محبة على كنـوز محبة!
هدير.. رفيقة القراءات المضادة للنوم والكتب المناوئة للأرفف، كنت من أوائل الوجوه التي قفزت إلى وجهي يوم الرحيل ، ما انتظرت مرورك بهذه المساحة لتكتبي عن زيدان لعلمي أنك تحتاجين ألف عام تجئ لاستيعاب أن الأرض التي ستعودين إليها لم يعد صاحب (كنـوز محبة) على ظهرها.. وأنت ممن رسم لوحة عودتهم الجواهري ب:
شَمَمْتُ تُرْبَكِ أَسْتافُ الصِّبا مَرِحاً
والشَّمْلُ مُؤْتَلِفاً، والعِقْدُ مُؤْتَلِقا
وسِرْتُ قَصْدَكِ لا كالمُشْتَهي بَلَداً
لكنْ كَمَنْ يَتَشَهّى وَجْهَ مَن عَشِقا
حاشاك فقر الكلمات يا بت الزين... لكن ما يحتشد في الفؤاد أثقل من أن ترفعه الأقلام أو تطيقه أرصفة التعبير.. مشية زيدان خلَّفت في القلب ما تنوء به الجبال فتركناه للزمن وفعل الذاريات.. حاشاك قصور المفردة والعبارة وأنت الهدير لكنه الصمت بعدة لغات كما يقولون..
Post: #154 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-14-2011, 10:34 PM Parent: #153
Quote: ربنا يجعل سيرة زيدان على كل لسان .
وبذكره يستحيل الإنسان إنسانا.. كان هذا دعاء هدير يا محمد حيدر .. في هذه اللحظات أتابع في قناة جديدة تسمى أمدرمان حلقة بعنوان (أولاد زيدان) رغم وجود التجاني وعمر الشاعر وآخرين حاولوا تقليده إلا أن غيابه تسبب في فشل التقليد نفسه.. التقليد الذي كان ممكنا نوعا ما في حضوره .. أقول ليك زي شنو يعني .. زي لامن تكوني بترسم في بورتريه لزول قاعد قدامك ويقوم يمشي .. تاني ترسم من خيالك .. وزي ما بيغني عزيزنا الطيب مدثر ( الأصل ما بِبقَى صورة).. والعكس برضو صحيح يا محمد..
Post: #155 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-15-2011, 12:16 PM Parent: #144
Quote: لم اذهب لسرادق العزاء لكني اتلصص صوته في نعي المريدين و ارجع بيّ من محبته ما يعجز الوصف عنه .
سفيان
Post: #156 Title: Re: أجمل تسجيل لهذه الأغنية الإستثنائية.. Author: محمد حيدر Date: 11-16-2011, 01:28 AM Parent: #155
الاعزاء
مولانا محمد المرتضي أحمد إقترح بعض الإخوه في بوست حفل تأبين الراحل المقيم زيدان إبراهيم بنيويورك أن يلبس الإخوه الموسيقيين المشاركين تي شيرت بصوره المغفور له الراحل المقيم زيدان إبراهيم أثناء التأبين كنوع من التخليد لذكراه الحلوه و عطره و بعض الاخوه إقترح هذه الصوره الفائقه الجمال
و عشان
Quote: شرفنا الراحل بإحياء حفل (حنة) شقيقي الرشيد منذ عامين بدارنا المتواضع وهذه الصورة بكاميرا العبد لمولاه.. يعني عندي فيها حق ملكية فكريه وما يجاوره وحذاري (تخمِشا) أصلو إيدك very light
نقترح موافقتك علي هذا الاقتراح و لك كامل حقوق الملكيه
Post: #157 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-16-2011, 09:50 AM Parent: #156
Quote: نقترح موافقتك علي هذا الاقتراح و لك كامل حقوق الملكيه
شكرا أستاذ محمد حيدر، بالطبع لامانع لدي في استخدام الصورة فقط إحفظوا حق موقعكم (سودانيزأونلاين) .. زيدان أضاء حياتنا بكل جميل وصورته تبعث السكينة وقيم أخرى أين نشرت.. لك الود وبلغ عني كل المؤبنين والقائمين على الحفل بنيويورك .. إحتفائكم بزيدان في الأرض الجديدة يؤكد على أنه ما زال هناك وفاء في الدنيا..
في الفؤاد ترعاك العناية..
Post: #159 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-16-2011, 11:33 PM Parent: #157
Quote: انت مابرضك حبيبنايازيدان والحنان الفي قلوبنا أصلو نابع من عيونك والمحبة لو فيها لو ما انت ماكانت محبة كل اشواقنا ومشاعرنا واحاسيسنا النبيلة انت ما اهديتا لينا كيف نضيع أحلى ما أهديت ياغالي ؟
شكرا لمساحة الجمال برغم الشجن
يا هند ، إحدى الأخوا ت كانت تحكي بحزن ، بل بأسى أصدق ما يكون ، عن الوضع العام للأغنية السودانية بعد زيدان وقالت لي : والله الزول دا مشى وشال معاهو الفن والفنانين كلهم، قلت لها – متحفظا على غلوائها وتطرفها في التعبير – ثمة بعض الرائعين مازالوا بيننا ، أمد الله في أعمارهم ، قالت لي أنها كانت تتعامل مع أغنيات زيدان كفرض العين وماعداه فرض كفاية إن لم يكن دون ذلك والأسباب الأساس في هذا الإحساس متعددة من ضمنها (نوعية) الكلمات وتفرد الموسيقى وشئ خفي في صوت زيدان وشخص زيدان الذي فرد جناحيه وجمع تحتهما كل الفئات العمرية والمستويات الثقافية والإجتماعية والسياسية والإثنيات بصورة غير مسبوقة.. الناس كلها بتريدو ومنحازه ليهو بصورة مكشوفة.. وهذه ظاهرة بحت نادرة في مجتمعنا السوداني لأنو رغم ما نبديه من حفاوة بمبدعينا لكن برضو مرات بنكجن ولو السالب من سلوكيات أولئك المبدعين ، بس زيدان استثناء ، أي حاجه بقولا أو بيعملا بتعجبنا وهذا حال عين الرضا . والله كلام أختنا دا مقنع بالنسبة لي لكن برضو زيدان فيهو سحر عصي على التفسير.. حاجه ما عارفا جايه من وين بالضبط.. يا هند سمعتي ليك بي زول يتراد على بياض؟
Post: #160 Title: Re: أجمل تسجيل لهذه الأغنية الإستثنائية.. Author: Manal Awad Khugali Date: 11-17-2011, 08:30 AM Parent: #159
Quote: الأصل ما بِبقَى صورة
سلام كتيييير يا مولانا
Post: #161 Title: Re: أجمل تسجيل لهذه الأغنية الإستثنائية.. Author: الطيب شيقوق Date: 11-17-2011, 09:54 AM Parent: #160
Quote: يا هند سمعتي ليك بي زول يتراد على بياض؟
ياخ قول تبارك الله
انا ذاتي بقول تبارك الله ليك انت آآآآآآآآآآ اللخو
Post: #163 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-18-2011, 01:45 AM Parent: #161
Quote: Quote: الأصل ما بِبقَى صورة
نهائي يا منال..
نهائي..
Post: #167 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-20-2011, 04:23 PM Parent: #161
Quote: Quote: يا هند سمعتي ليك بي زول يتراد على بياض؟
Quote: ياخ قول تبارك الله
شيقوق كل سنه وانت طيب، فاتني اللقاء الذي هاتفتني لأجله، عارف يا الطيب .. في السودان لو بقيت حاوي ما ممكن تسوي نص الدايرو، عموما أسعفني بعض الأصدقاء بدرر مجرد مشاهدتها والإستماع إليها تحتاج عمرا جديدا، يا حليلنا فيها الفانية ، مافيش طلبات تمديد .. سمعت ( ياسلام على ريدي الخلاّك بقيت سيدي) ؟ برضو تتصدق؟
رحم الله زيدان وبرضو معك أقول: تبارك الله..
Post: #165 Title: Re: أجمل تسجيل لهذه الأغنية الإستثنائية.. Author: هند محمد Date: 11-18-2011, 06:49 PM Parent: #159
Post: #166 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-19-2011, 01:12 AM Parent: #165
هيثم لبيب .. خطير.. كنت أظن أنني أعرف كل ما غنى زيدان .. أهو مجرد إدعاء من شخص ما شايف عوجة ذاكرته.. إلتقيت عضو المنبر هيثم لبيب وود المهدي برفقة د. أحمد القرشي .. أسمعني هذا المرجع أغنية بعنوان (صافينا) وأخرى بعنوان (مشاعر) غناهما زيدان - بحسب كلام زيدان نفسه - في بداية مشواره الفني ومن التسجيل كان صوت زيدان جد مختلف .. شوف يا هيثم ، هنالك بعض الجرائم التي تتصل بأمن الدولة يشكل عدم التبليغ عنها في حد ذاته جريمة..
أهو حذرتك..
Post: #168 Title: Re: أجمل تسجيل لهذه الأغنية الإستثنائية.. Author: Haitham Labib Date: 11-28-2011, 02:36 PM Parent: #166
Quote: هيثم لبيب .. خطير.. كنت أظن أنني أعرف كل ما غنى زيدان .. أهو مجرد إدعاء من شخص ما شايف عوجة ذاكرته.. إلتقيت عضو المنبر هيثم لبيب وود المهدي برفقة د. أحمد القرشي .. أسمعني هذا المرجع أغنية بعنوان (صافينا) وأخرى بعنوان (مشاعر) غناهما زيدان - بحسب كلام زيدان نفسه - في بداية مشواره الفني ومن التسجيل كان صوت زيدان جد مختلف .. شوف يا هيثم ، هنالك بعض الجرائم التي تتصل بأمن الدولة يشكل عدم التبليغ عنها في حد ذاته جريمة..
أهو حذرتك..
يا أستاذنا والله البوست ده بفتش ليهو من جاتني ورقة الحضور والتبليغ من الدكتور أحمد ولكن ... مع ناس السودان الداك وقع وكسر مخروقتو ... وداك أصابعينو واجعاهو .... والنت الفاصل غايتو حالة تخليك تقول فاصل ونواصل .. أها أنشاء الله بنزله ليكم تباعاُ بهنا . ولك وللأخوة المتداخلين العذر على التأخير .. شرطة .. ما فاصلة .. لكن البلاغ حقك ده بخلي أوكامبو يتدخل ... بالغت فوقه يا أستاذنا .. من هسه أنت المحامي بتاعي ومن غير أتعاب أكان عجبك ..
Post: #169 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-28-2011, 08:21 PM Parent: #168
Quote: مع ناس السودان الداك وقع وكسر مخروقتو ... وداك أصابعينو واجعاهو .... والنت الفاصل غايتو حالة تخليك تقول فاصل ونواصل .. أها أنشاء الله بنزله ليكم تباعاُ بهنا . ولك وللأخوة المتداخلين العذر على التأخير .. شرطة .. ما فاصلة ..
زولك ما جا لسه يا هيثم مع إني إشتريت المخزن واحد تيرا بايت، ياخ والله حرام كل تلك الدرر تكون قاعده والناس تتشابا للهوا وتجيها كتاتيح سواق الركشا جقلب وحرامي الهبوب تلب.. أنتظر تنزيل الأغنيتين.. الباقي علي ..
بالمناسبه، لو انتظرت ريثما تتوقف المخروقات عن التِكِسِّر والدافنه ياك الماجاي تاني..
أهو كلَّمتك..
Post: #170 Title: Re: أجمل تسجيل لهذه الأغنية الإستثنائية.. Author: محمد المرتضى حامد Date: 11-29-2011, 07:17 AM Parent: #169
