الأسعار والدولار والخدار..

وين وين أنا مالي ،

الخدار مَرَق لودَاري..


ما كنت أعرف معنى تلك (الأغنية) إلا بعد زيارة قصيرة لسوق (الخدار) في بانت..







__

هذا البوست برعاية الطرابلسي.

أرجو أن أجد لديكم العذر ، فمصطلح (الخدار) غير دقيق في ظل وجود الطماطم والجزر والبنجر والبصل الناشف أو الأبيض،
البص الناشف وصل (الربع) ل 17000 جنيه ، نعم قبل 10 يوم تقريبا كان الربع يساوي 14000 جنيه،

أرسل لي أحد الظرفاء رسالة إلكترونية تقول:

( هناك عملية بسيطة ومجربة لإزالة جميع المشاكل والتوتر

هذا التمرين البسيط باستخدام الأصابع، يزيل التوتر بشكل كلي.

لا تقولوا انها تمارين المشي او تمارين الجمباز
هذا هو التمرين الوحيد المختبر بطريقة علمية و القادر على ازالة التوتر) وهي :


+

+

+

+

+

+

وهذا الورق الأخضر ، أعلاه ، الذي يتحرك راسيا وتدور معه الرؤوس أفقيا وتسقط
في حضرته الذمم حضيضيا بلغ سعره اليوم 3350 جنيه للورقه الواحده أم ميه.
شوف ، هسه لو الناس ديل ما كانوا جو ،
كان حدثت توأمة للجنيه مع الدينار اليوغسلافي أيام (الدواس) بين الناتو وصربيا.
لكن ربك ستر وناس كرار أنقذونا..

الله يجازي محنك، يا مولانا!

هذا، رغم محبتي وفائق احترامي!

ولك، في الختام، وافر تحياتي،
(آخر الزمن بقا آخر الكلام إلقاء التحية. الأمور كلها أصبحت مقلوبة!)

تصويب : الورقة الواحدة من فئة المية تساوي 333500 جنيه،
يعني التلاته ورقات يعادلوا مليون جنيه وشويه..

(الِدقة مطلوبه)

_

أرجو أن يصوبني أي تاجر عملة لأني من زمان ردئ في الحساب.



وأشياء أخرى.

سلامات يازول وواصل انت رياضياتك مية المية بس الرداءة فى الرويبضة السياسية
حيدر سلامات ومشاتقون لجكة كان الله هون
الله هونينى

الدكتور الحيدر البدوي الصادق سلامات ياخ،

أتمنى على المولى أن يجازي (مِحَني) ويجازي من تسبب فيها،
وبالطبع (الجزاء من جنس العمل) يا الحبيب،
لا تظنن أن السلام يجب أن يكون في المقدمة دائما ،
مرات السلام بيجي في الآخر ، وهذا هو المبتغى،
ومرات السلام بيكون شماعه يُعلق عليها الفشل ،
ومرات بيكون السلام روتانا..

وحياة ابتسامتك يا حبيب ، وأقسم بالذي سمك السماء بلا عمد ، أنا مبسوط بشوفتك ،
لا أرى سببا وجيها لغياب كتاباتك ومشاركات الجميلين أمثالك مما ترك الساحة لأمثالي
أن يمرحوا كما يشاؤون.

محبتي المغربلة.

إتصل بي البعض مستفسرا عن الصورة التي وردت في المداخله الثالثة وهي
عن التمرين المريح للأعصاب والمزيل للتوتر وقالوا ما ظهرت عندهم صورة التمرين،

غريبه،

هل يخفى القمر في سماهو!!
أهو ننشر تمرين مشابه ، بس ثابت..

الستاذ محمد المرتضى سلامات

Quote: لا تقولوا انها تمارين المشي او تمارين الجمباز هذا هو التمرين الوحيد المختبر بطريقة علمية و القادر على ازالة التوتر) وهي :

ياخى وترت أعصابنا عديل كده وسببت لينا نفسيات

وين وين وين تلقوا زى ده

Quote: سلامات يازول وواصل انت رياضياتك مية المية بس الرداءة فى الرويبضة السياسية

يا هاشم عزيزنا،
مستحيل يكون حسابي صاح رغم أن الوالد ، أمد الله في عمره ، ومنذ يفاعتي ، كان يقول لي : أعمل حسابك،
صدقني ، لايمكنك أن تعمل حسابك لأي شئ أو تخطط لأي شئ في البلد لأن كل الأشياء لاتخضع لأي معيار علمي أو منطقي،
في قصيدته عن تونس الخضراء قال نزار ( أأحاسب امرأة على نسيانها.. ومتى استقام مع النساء حساب) والصحيح
هو ( متى استقام مع "النظام" حساب).

-
(هل في العيون التونسية شاطيء*** ترتاح فوق رماله الأعصاب)

المحترم المرتضى سلام

العجيبة يا اخي ان الطرابلسي ابو ليلي بتاع خدار وبرضو ما رحمو البوعزيزي
بتاع الخدار وخلهو يبيع الخدار " ان في الخدار فتنة كما قال المثل : خداري من العين
بضاري . وبالضرى ان شاء راجل مرا " طيب المسكين ده حيعمل شنو بعد ما بقى
راجل لاكثر من مرا اذا هذا حال الخدار؟
اخشى ان يكون الحل في الحل .

سلامات يا مولانا
زمان في مصر قبضوا واحد من جماعة الأخوان المسلمين في اطار الحرب الازلية
المدورة بينهم و بين الحزب الوطني و نظامه في مصر، و جاء في الحيثيات
أنه يتاجر في الدولار، و نشرت "روز اليوسف" تحريرا لمكالمة تليفونية سجلت
له و هو يٍسأل فيها أحد الأشخاص قائلا: الأخضر النهار ده بكام؟
يظهر أننا برضو أول ما نصحى من الصباح حنسأل عن الأخضر زي صاحبنا ده.

والله عشان مشاكل الخدار دي بقينا نشجّع النيل

أحمد خليل ،
زمان لامن واحد يقول ليهو كلام فارغ ويكونوا المستمعين عايزين يكاووهو بيقولوا ليهو : قرع.
طبعا ناس اللنغاز ممكن يكاووا الزول ويقولوا ليهو : يقطين.
يعني تعريب وأسلمه وكدا ، مش كان صدر قرار إنو المباريات تذاع بإسم اللاعب كاملا بدون ألغام؟
يعني كندوره ووهبه وقله وجكسا مافي ، الكوره عند محمد دفع الله الصادق رافعا لفيصل محمد صالح ومنو للمنذر
أبوالمعالي عبدالرحمن إلخ..
واحد قال إذاعة المباراة بِقَت زي الإستماع لكشف الأراضي.
تصور يا أحمد هسه القطعة أدناه سعرها 3000 جنيه
،


تنبيه : السعر أعلاه لايشمل فردة السفنجة الظاهرة في الصورة والصوره بكاميرتي

Quote: الأخضر النهار ده بكام؟

د . سيف النصر سلامات يا العزيز،
تم التعامل مع الخضرة بمشتقات كثيرة حتى فقدت معناها،
كثير من الأشياء (الخدرا) أصبحت تتناقض مع المضمون الجميل للكلمة،
عموما أهديك الأغنية المصاحبة عساها تخفف من وطء التحريف.
مودتي.

وتحايا للغائبة العزيزة تيسير عووضة

Quote: ياخى وترت أعصابنا عديل كده وسببت لينا نفسيات

يا حسن ، روق واصبر شويه ،
واهدي لي لحظات هنيّه، وبعدها شوف وزير ماليتنا قال بعد الإنفصال حا يوفر لينا كل شئ،
تاني اللخدر دا كان لقيتو واقع ما تعاين ليهو،
هييييع زي ما بيقول ودشيقوق.
قال لونو زرعي قال..

فاتني أن أشكر الموقع المائز www.sudanesesongs.net على الأغنية الجميلة بصوت الشفيع وخوجلي،
لا أحبذ التعديل فهو يجعل المداخلة كباب السياره المسمكر بحرفية متدنية وطلاء مغاير..
زي مكاتب الحكومة ..

مولانامحمد
سلام

Quote: وهذا الورق الأخضر ، أعلاه ، الذي يتحرك راسيا وتدور معه الرؤوس أفقيا وتسقط في حضرته الذمم حضيضي

حشرت الذمم يامولانا بين ارقام الدينار فلن تجدها حتي وان وجدت الخدار .

بالله ياطماطم الخضاري هل بصلنا بحالنا داري اغنية طالعة جديدة لتعرف الناس قيمة الخدار ساعة الشدة .

يامولانا انت مامودرن لية الناس بتاكل خضار مجمد بطلت اكل خداركم الكلة جراثيم ودا علي وزن جداد مجمد .

يا مولانا سلام ..

الله يكن فى العون..
امسكو فى يالطيف .. يالطيف .. يالطيف




____________
والله حالة تحنن

Quote: والله عشان مشاكل الخدار دي بقينا نشجّع النيل

حبيبنا وحبيبا، قسما دي لامن بهناك،

يبدو أن هجر البعض للمريخ كان بسبب أزمة الطماطم في رمضان الأخير،

سألت أحد الباعة: إنتو ليه رفعتو الأسعار وكل الخدار غير مستورد ويُزرع في محيط العاصمة
فأجابني أن الدولار زاد والزيت والسكر والجزلين ووو حتى كاد يصل إى مؤشر الناسداك وانتهى
بحديثه إلى : الحاجات دي كلها "إتطوَّرَت" دايرنا نقعد نتفرج ساي؟ ياخ السمك في النيل
زاد تقول لي شنو ما عارف؟

طبعن يا حبيب نوره لو استمرت زيادة السمك حا تشجع الشاطئ..

Quote: الكوره عند محمد دفع الله الصادق رافعا لفيصل محمد صالح ومنو للمنذر أبوالمعالي عبدالرحمن إلخ ..

الأصوب أن تستبدل "الخ .." ب "الذي طوح بها في المدرجات"

محمد المرتضى يا حبيب
كيفك والشوق شديد ليكم
اها انت كتبت

Quote: أرجو أن يصوبني أي تاجر عملة لأني من زمان ردئ في الحساب.

وكتب متداخل

Quote: الأصوب أن تستبدل "الخ .." ب "الذي طوح بها في المدرجات"

عموما البوست موفق وجميل (او جمئل) حسب الإتفاق

فعلا البوست جميل وهادف وبيهبش في حتات صعبة بالحيل

اما ما اماتني ضحكا الجدعة العملا حبيب نورا دي

Quote: والله عشان مشاكل الخدار دي بقينا نشجّع النيل

كااااااااااااااااااااك دي ما يفهومها الا اولاد قلبا

Quote: اما ما اماتني ضحكا الجدعة العملا حبيب نورا دي

يا الخير ،
حبيب نورا مليون مره قلنا ليهو بتطفش علينا ناس الشهادات العربيه وسستر اسكول وسان لويس وسان سواها ، لكن ما داير يسمع،
هسه يشغِّل ليك خدر بشير وقوم يا ملاك،
شكرا على كلماتك لكن يا الخير والله المسألة لم تعد محتملة ،
هسه ممكن تتخيل إنو حزمة الملوخيه (الخُدره) التحت دي بتلاته ألف؟
يعني المساكين يتجنبوها هي والطماطم بس يغنوا ( لاخدره لا أحمر ألوان محاسنك زي ما هي)

يرجى التدقيق فالربطة المعنية هي التي في قبضة سيد الخدار فقط وليس كل الخدره الظاهره في الصوره

Quote: .زمان لامن واحد يقول ليهو كلام فارغ ويكونوا المستمعين عايزين يكاووهو بيقولوا ليهو : قرع.

دا ياااا تضى زمن الخدار كان سيد الموقف ..
هسه بقوا يقولوا ليهو يا بيض









ــــــــــــــــــــ
الاصوب ان تستبدل (القرع) بـ (البيض)
وح تقعد تستبدل كدا لما تفوتك الثورة
الحق الركب يا رجل وواكب بالله
وخليك حريص انت القائد وانت الرئيص
واااااااااااااصل ..

Quote: Quote: الكوره عند محمد دفع الله الصادق رافعا لفيصل محمد صالح ومنو للمنذر أبوالمعالي عبدالرحمن إلخ .. Quote: الأصوب أن تستبدل "الخ .." ب "الذي طوح بها في المدرجات"

يا حسين ، صاحبك المنذر أديهو يومين تلاته ، شوفو لو ما ختَّاها في التمانيات..

Quote: يامولانا انت مامودرن لية الناس بتاكل خضار مجمد بطلت اكل خداركم الكلة جراثيم ودا علي وزن جداد مجمد .

يا يوسف ،
بالطبع كافة أنواع المأكولات ( خضار ، لحمه ، رغيف إلخ ..) يتم بيعها في
الهواء الطلق أو المَكَتّح في السهله كدا، سألت أحد الباعه وهو يعرض اللحمة وتراب
اليوم كلو مردوم فيها والضبان تنِشو نش عشان تعرف اللحمه ضاني ولا حماري،
، قلت ليهو ياخ الحاجات دي ما صحيه ، قال لي ( وهو يحكي البرق مبتسما: ياأنت يا ذا
وعمدا لايسمِّيني ) إنت قايل طَعَامة شيَّتنا دي جايه من هيِّن؟
هسه يا يوسف في أطعم من شية قندهار؟
قال جداد مجمد وsterilized meat قال.


ياخ البلديه دي حقو يبيعوها قطع استثماريه.

Quote: الله يكن فى العون.. امسكو فى يالطيف .. يالطيف .. يالطيف

ونعم بالله يا عوض،
الحمد لله نحن ماسكين في يا لطيف وسنبقى لكن الجماعه ماسكين في اللخدر شديد ،
الواحد منهم تقول ليهو السلام عليكم ، يقول ليك : الليله زايد،
لا تعرفو البحر لاتعرفو السكر ول الدَغِت..

ياخ تصدق كيلو الضان وصل 24000 جنيه؟
الضان يا عوض،
الضان مذكر الضانايه ،
الخروف (السمح) ال C-Class, C 43 AMG, powered by a 4.3 L V8
وارِد شتوتجارت عبر كونيكشن النهود مرورا بصُقع الجمل.
بنص مليون جنيه يا عوض..

أحمد العربي سلام،
سيد الخدار الإشترينا منو دار بيني وبينه الحوار التالي:
- رُبطة الرِجله دي بي كم ؟
- ألفين،
- ليه ياخ أصلها ربطة (عُنغ) الهندي عزالدين؟
- نظامنا كده
- بس ياخ رُبطتك دي سغيره ،
- خير الخدار ما قل ودل،
- ياخ دي سغيره شديد تقول كاتبا ملاسي،
- لكن مركَّزه يا خال،
- ما بتنقِّصنا شويه؟
- حا تنقصوا براكم، مش اللنغاز دي في ، إن شاء الله تنقصوا براكم.

صورة (الرُبطه) ومعها (أناملي الحيرى تداعب "وجعة السعر") والجزر عامل (يا ليل أبقالي شاهد)

ربطة الرجلة عاوزة ليها تمويل اصغر ...........

Quote: ربطة الرجلة عاوزة ليها تمويل اصغر ...........

أو (نبلع مما نقلع)













-
لاتوجد منطقة وسطى مابين السطلة والزار.

.

خدارى......

البى حالى .....

ما هو دارى....

جافانى!!!!

.

:) بانت وخداري والخدره و النيل بتاع متيم نوره




في برواز



الشفيع وخوجلي الله يرحمهم








الله يستر علينا كلنا

:) :) :)




الله يمتعك يالحبيب زي ما بتمتعنا دايما


بهيك

بوستات


ومعزتي الاكيده

يا أيمن،
الكتاحه لما تجي التونسيه ذاتا ما بتقوم من المدرج،
إنت قايل ركوب التونسية دا متاح لأي بن علي؟
بس المشكله إنو أهل البوعزيزي ناس عندهم لياقة للجري والتظاهر،
أما ناسنا فلم يعد لديهم طاقة تكفيهم مظاهرتين ورا بعض،
مش قالوا أيام مجاعة 1984 الجريو شِدّة ما بقى تعبان كان داير يهوهو يتَكِل في الصريف؟
أها هسه السواد الأعظم بقى هلكان والباقي تكفلت به الملاريا،
الناس تجيب لياقه من وين؟

جالون البنزين =8.5
رطل السكر =1.8
علبة الصلصة=5.0
زيت الطعام 2لتر=30.0
كيلو الضان=24.0
كيلو العجالى=15.0
رطل اللبن=1.5
ربع البصل=17.0

والكلام دا بالجنيه الجديد،
ياخ شِدّة نحن ما حالنا شلش ناس البنزرتي لو شافونا حايحتاروا إنهم هم عملوا المظاهرات ليه!!

ود المرتضى ..
سلام تانى

Quote: جالون البنزين =8.5 رطل السكر =1.8 علبة الصلصة=5.0 زيت الطعام 2لتر=30.0 كيلو الضان=24.0 كيلو العجالى=15.0 رطل اللبن=1.5 ربع البصل=17.0

اها مادام حايم فى السوق قدر دا وتخلع
فينا الصباح الصباح .. شوف لينا معاك
اسعار (حبال المشانق) .. باقى الحبال
بندورم قرييييييييب .. عذل القلااااد
القلاد يا محمد

احيييييييي انا..

Quote: إنت قايل طَعَامة شيَّتنا دي جايه من هيِّن؟

طول فترتي في عمان ما ضقت للشيه طعم

تاري السبب ما عندها التتبيله الموجودة في تربيزة جزارينا

عشان كده عرفت السبب الخلا زميلنا الدكتور قدوره يرفض غسيل اللحمه

في احدى ميزات الأطباء بحجة انها بتمسخ

تعدل للتكرار

سعادة المستشار ود المرتضي

احييك بقيمة (طرادة) الزمن الجميل طرادة الجوع والعطش والهم و(حاجات تانية حامياني)
وقول لودهاشم والمدام تلفونكم ميت عديل وحاولت لاكثر من مية مرة مع تحياتي لكل الناس السمحين العندكم!

ناظر هباني

Quote: احييك بقيمة (طرادة) الزمن الجميل طرادة الجوع والعطش والهم و(حاجات تانية حامياني)

الحامياك دي فيها تنزّل البيرق للمصعة الملح ؟

عزيزنا ودشيقوق

والله ال

Quote: الحامياك دي فيها تنزّل البيرق للمصعة الملح ؟

وزيد في الخير الحامينا اكتر من كده.............مع تحياتي لصديقى بطرفكم على ود عرمان.

السيد

محمد المرتضى حامد

Quote: تصويب : الورقة الواحدة من فئة المية تساوي 333500 جنيه، يعني التلاته ورقات يعادلوا مليون جنيه وشويه.. (الِدقة مطلوبه)

طيب ياصاحب الخدار

اذا رسلت ثلاث ورقات خدار من ابو ميه

بجيبوا لى اى نوع من الخدار

الخدار مرق لى ودارى

Quote: طيب ياصاحب الخدار اذا رسلت ثلاث ورقات خدار من ابو ميه بجيبوا لى اى نوع من الخدار الخدار مرق لى ودارى

مبارك كنه سلامات،
زي ما شايف ، حديثي ينصب حول الخدار وليس المخدر رغم إنو الموضوع كلو خدار ونباتات ..
صدقني ، الخدار العادي الببيعوهو الخدرجيه زاتو بقا يودِّر..
الله يخدِّر ضراعك

الأستاذ محمد المرتضى
مافي داعي الشعب ياكل خدار.. خليه ياكل كيك وبسكويت
وبعدين الأصفار دي زالت من زمان من العملة السودانية.. بلاش تخوف الناس بيها
فضل البكور...

الناظر ود هباني

ههههههههههههها والله ما مكيفني علا الخدار المرقك من لجة السياسة وجابك لبوستات العنكوليب

Quote: وزيد في الخير الحامينا اكتر من كده.............

لالالالالالالالا يا اللخو انت من زمن العطايا ؟

ادوات العصر صارت ابتسامات بس

كدا يعزموك ويكرموك ويعطروك ويودوك تصلي الجمعة بالجلابية والملفحة ويجيبوك راجع للغداء بالقرع بالليمون والطماطم والشطة الخضراء وعيييييييييييييييييييك يا ود هباني

Quote: الاصوب ان تستبدل (القرع) بـ (البيض) وح تقعد تستبدل كدا لما تفوتك الثورة الحق الركب يا رجل وواكب بالله وخليك حريص انت القائد وانت الرئيص واااااااااااااصل ..

أبدا يا دندن ، (قرع) كانت تعليقا تلقائيا على ما لن يتحقق أما (بيض) الحالية،
كما أظن ، فهي تطلق على الكلام والناس اللي ما عندهم طعم ولا لون ولا رائحة ، ناس كده لاتعرفيهم
باسمين ولا ممتعضين ، مرتاحين ولا ساخطين ، ماشين ولا جايين ، منتبهين ولا متلشين..
غايتو..
بس تاني ما تجيبي سيرة الرئيص حتى لو كان مخلوع أو مخضوض أو ملسوع أو واقف في الصف وعندو لوَّايه،
أنا زول مسكين وبمشي ملاصق الحيطه زي غنم الإشلاق واساسق بطرابيز الخدار وأغني زي أبوعمه داك سيبني في ضل الَجزُر.
إنتي عارفه إنو عارف صبري أطول صبُر وما تسمعي سالفة ثومه إنما للصبر حدود..
دا غنا قرع ساي..

سنة سنة حبيبي قدلة قدلة

اى فطان اخليك تنوم تصبح تلقى البوست كووووووولو سنن وقدلات

وياسيـــدي
أرخي أضانك الخدرانة بي التصفيق
من المخدوع زمان وزمان
ولسع جعان
وما فتح وفكَّ الريق
وبكرة التاج بقع من فوق
وبي الكرعين قسم بنداس
وكان طفرتا الحيطة ولا جريت
برضو محال تلقى خلاص

سوتو كريت في القرض
ولقينا في جلدنا نحن ( دا شنو دا بي الكربون )

الأيد الطايلة تجيب المافي
ديل إختفو اللقمة كان حفّت
من جنحين الملك إن رفت
وسيدها يموت بي الفاق

بهم شنو من غلاء الأسعار وكان بقى الربع بصل ولا البصل ربع وبي 100 دولار برضو بقولوا الحلة بصل وبقطعوا في الحلة ربع ونحن تنقّطع مصارينا جوع

التصوف أخير نلبس مرقوع ونأكل مدروش ونسوي في التصوف
ونريح البنا والبناول الطين
البنا طبعاً الفي يدو القلم والبناول الطين ديل جندهم في الأرض
( أصحاب الفايدة والترخيص والإستيراد والتصدير )

مشتاقين يا ود المرتضى
تحياتي ومودتي

ود المرتضى سلام

في اخر رواية ان المواطن السوداني مش ماشي ملاصق للحيطة

وانما وانما شايل الحيطة وماشي في امان الله والحيط الحيط

وىل رب نوصل البيت

يا مولانا البيكـ يزول ياخي
قول آمين
السطر الفوق ده بعد المداخلة التالته ، الشفتها لامن نزلت النضم ده
حندكت روحي شوية قلت ليها : ياخي خلي الناس يكتروا شوية فوق النضم الأخدر ده
كترة الناس ولمَته بتصلِح القعدة
أها جيت صادي قبال شوية ، بعد نص الليل رووووح
ويقوم يهاجمني خوجلي الما " بغبى " عودو
قبال ينضم عرفت معاهو الشفيع
وغلبني ما أرد قبال أشوف " باقيكـ " شنو ؟؟
زول بيصوِر قرع في إجازتو ؟؟
إنَا لله يا " عملاة " عماد
تعليق حبيب نورة ودينا خالد بيذكرنا بالخير اللسه ما كِمِل ، أدوكـ من الآخـــر
معليش لو انقلب سخرية " من الزمن الكعب " بس بيجي اليوم " اليتوهط " فيهو اليستاهل " الوهييط "
ويرجِع تمن الخدرة والجزر البقى يخص بيوت ويفوت بيوت






______________________________________
خطكـ الأخدر غلبني أرد بيهو تضامناً من " الخدار " الرووووَح

النطمبجه
ان شاء الله يرجعوكـ السوق :)
ما شغلتي بيكـ











الصور من مكتبنا عشان ما تتعكلتو فيني

Quote: خدارى...... البى حالى ..... ما هو دارى.... جافانى!!!!

إنه مسرح اللامعقول والتراجيديا بالباميا،
تصور أن يقف المسكين عاجزا تجري عليه مقولة ( العين بصيره واليد مقطوعة من خلاف) أمام (دَكّة)
الخدار والفواكه ينظر إليها رافلة في ألوان طيفها وهو يدندن :

أظهر أمام عيوني لا تبقى متواري
أنا جارك البريدك أوعك تخون جواري

بينما ينشد سرا: حتى الدوم رحل خلاني ما طيّب لي خاطر.


جنابو عبدالحفيظ سلامات يا غايب عن عيني مع إنك في قلبي.

الناس البيعرفو الأكل لازم تكون عندهم كوسه ، الحقيقه منظرا عجبني رغم حزني على تنحي العجور لصالح الخيار ..

عليك الله شكِّر لي كاميرتي الماخفيه في جولتها ( تتصورون).

صحيت الصباح , وانا مبسوطة انو انا داكة الدوام الليلة , بمزاج جبت حبيبة قلبى كباية الشاى ومعاها شابورة الرشاقة –فى رحلة رشاقة أن شاءالله ح تنتهى فى القبر ولاعزاء لأى أى زول أوفر ويت- خلال الحدث البهيج بتاع شراب الشاى دة , رصيت لى زى تلتمية مهمة منها ترتيب دولابى الـ كل ماافتح ابوابو تقع هدومى فى الارض وتتوسل , أشيل الريموت دة مرة فى حياتى براااى " بابا مابديك أىىىىىىىىىى فرصة معاهو لما يرجع وعليك التأقلم مع الـ بى بى سى -الشروق-الجزيرة-السودان وبالعكس ولو غيّر بجيب ليك الجزيرة الرياضية , فى غياب بابا , نشاهد براعم ونرقص مع زيد والعلوم زى العجب , وتتبسم مع أحمد وهيا ولا على مزاجك
إذا ربنا رحمك, من بابا والشباب ديل , تجيك ماما تفتح ليك ساهور ولو بااااالغت النيل الأزرق, قلت بس خلاص الليلة يوم ندى "على وزن الليلة يوم الرجال"
وبعد ماانتهى من الإستمتاع بالريموت , أقوم اعمل لى برنامج تجميلى , لكن تأتى الرياح بسفن الخُدرة على صمة خشمك
سمعت صوت أمى وهى بتنادى : ياندى لو مشيتى جبتى لينا "خُدرة" فركناها والله يكون كويس , طوالى حسيت أنو أحلامى الفوق دى ح تنهار على الرغم من بساطتها
فكرت بسرعة فى حلول, أتذكرت أنو الأخت الكبرى برة بيتها , أتصلت عليا بسرعة وبكل لطف الدنيا على غير العادة " بالله يارشا مرى جيبى لينا معاك خُدرة " طوالى ردت : أيوا والله أحمد ذاتو قال عايز "خُدرة" وأحمد دة ياكرام يبلغ من العمر 4 سنوات وشوية مولود فى البلد دى , شاف السودان وهو عمرو سنتين , لكن يعشق اللغاويس بكل اشكالها (خُدرة مفروكة, بامية مفروكة, ملاح تقلية وقراصة" ومُصر أنو يشيل معاهو ملاح تقلية وقراصة المدرسة , فتأملوا (بتاعت ملاسى ديك)
بعد زمن سمعت تلفونى يرن , لقيت الأخت الكبرى على الطرف التانى :ة ياندى مافى خُدرة فى كارفور ودة ماموسمها "طبعا دى حسب إفادات المغربى مسئول الخُضار فى كارفور – طبعاً رشا وقفت حوالى العشرة دقايق عشان تفهم بقول ليا فى شنو و فى نهاية الأمر وصلت لأنو مافى ودة ماموسمها " دة طبعا بعد تخريجات من رشا لكلام المغربى (ويقولو ليك نحن عرب وجلابة ويحزنون).
أمشى اى مكان تانى ! أمشى وين ياجماعة وكارفور دة لبن الطير فيو-
بدأت إقتراحات ماما, أمشى المدينة , لو مالقيتى أمشى جاينت , ولا أقول ليك أمشى التخفيضات راسك عديييييل , أجيب الراس العديل من وين بس؟!
أتوكلت وبديت رحلة البحث عن العزيزة , دخلت حوالى 4 سوبرماركتات "والله ماعرفت أجمعا ليكم كيف" وكنت أرجع خاسئة حسيرة , كل الموظفين والكاشيرات يردوا على بالنفى , والظريف فيهم يقول لى دة ما موسم "ملووكية" لكن ياشباب البقنع الأم منو؟! ونحن جايين من بلد "الملوكية" دى ممكن اى زول يزرعا فى بيتو, ممكن تجيبا من أى جزُر فى طرف الحِلة .
دخلت سوبر ماركت , مشيت جهة الخُضار , شفتا ليك ربطة خُدرة وحيييدة , والله فرحت فرح كأنى شفت الملاك, أشتريتها وجرى على الكاشير كأنو ح يجى زول يقلعا منى , لما دخلت البيت , وبفرح مديتا لأمى , قالت لى : هيا ياندى لكن دى صحن مابتسوويهو؟! أها ياأخوانا؟ الحل؟ قالت لى : من الأول قلت ليك أمشى التخفيضات, آآآخ , فكرت فى زحمة الشارع لكن مابيدى شىء, صليت العصر ومرقت , حاولت فى الطريق أطلع من موود "الخُدرة" دة شغلت مايكل بلوتون وسمعت miss you now –ضحت براااى وقلت مايكل دة برضو بتكون امو رسلتو ومالقى المرسال – دخلت التخفيضات , مكان الخُدرة خاااااااااالى, جمبها خُضار يشبهها شديد, ناديت الهندى : رفيق هادا ملوكية؟ لالا ماما هادا مافى ملوكية, ملوكية مافى؟ فى فى ماما, وقال لى تعالى معاى, ساقنى ليك مستودع الخضار , مجموعة من الهنود يقطعو ويرصو ويعبو , من تحت تربيزة كبيييرة مرق شوال , طلع لى منو ربطة كبيرة خُدرة , جرى على الكاشير عشان أصل البيت بسرعة , وانا جمب الكاشير لاقتنى زولة صاحبتنا ممكن عادى نسميها أم الكلام, سالتنى وحكيت ليا انا جيت لى شنو, وبرضو لاهماها شىء حكت لى عن كل شىء الجو, الأسعار, السودان, الدوامات وانا أتململ وأعاين لربطة الخدرة , فكتنى بعد ما قرربت أبكى .
وصلت البيت قريب العشا, وفرحانة أنى ح اضرب خُدرة بكسرة زى العجب, ماما أحبطتنى أيما إحباط , حسة مافى سكة فرك ياندى الدنيا ليلت , بكرة أن شاءالله.
______________________________________

دة خُدرة الست الوالدة "الخدرا" يامولانا , لكن أظنها لو رجعت "الخرتوم" حى تبقى عليها وعلى نفس الحكايا.

سلامو للخدار ,لـ الدولار سلام خسوسى وليك وكل المتداخلين.

يا ندى ياخي أنا داكي الدوام والملوكية ومايكل بولتون عشان أجي أشوف خداري الفوق ده خلى زول يفطر فجراً ويكتب لي معلقة اعجاب في الصور ؟
أجي القاكـ عاملة ليكـ مولد بوست لذيذ حاشراهو في وسط خدار مولانا ده ؟ :)
تشيلي نقتكـ دي كلها وتمشي تعملي عنوان كبير بره هناكـ بعد ما تضغطي موضوع جديد وخلينا نتفسح معاكـ فيهو
بالمناسبة ما سمعتي بـ ملوكية " لذيذ " ولا " مونتانا " ، حاجات جااااااااااهزة بس ما تتأملي شكلة شديد يعني لكن بتدي نفس الطعم واللون وعليكـ برز صنوايت كمرافق أساسي
ملوخيىة مفروكة ؟ وكسره ؟
ياخي جو الرياض ده الليلة ما في طريقة غير حاجات حاااااااااااااارة وغالباً قراصة قمح ، اللغاويس دي ياها البتدفي يا قول حسن صالح أبوي :)
بالمناسبة كان قلت انكـ " لخيتي " المفروكة دي بالليل كان قلت " عُشرة " البنقالة أثرت عليكم
المصريين طبعاً باقي الغداء برشوهو عااااااادي
هههههههههههه



___________
يا مولانا احتلينا النِقَة

Quote: ياخي جو الرياض ده الليلة ما في طريقة غير حاجات حاااااااااااااارة وغالباً قراصة قمح

هنا برضو مبالغة, الصباح لكو قضيتو وأنا بفكر فى شاى بلقيمات :-), غايتو ساعة كدة الله يسامحنى فى قروشا

Quote: بالمناسبة كان قلت انكـ " لخيتي " المفروكة دي بالليل كان قلت " عُشرة " البنقالة أثرت عليكم

بعد تعبى دة كلو كنت عايزة الخها , لكن ظروفا قست عليا:) ياعمران.


______________________
قلت لى أشيل نقتى وأبقى مارقة؟

Quote: هسه لو الناس ديل ما كانوا جو

من يوم ما قريت الكلمات الــ 7 ديل
و أنا فى حالة سرحاااان
عشت سنوات و شهور و أيام و لا فى الخيال

Quote: هسه لو الناس ديل ما كانوا جو ،

لحظات الفرح كانت جميلة
لكن الحزن على حاجات لا يمكن أن ترجع كان شديد و مؤلم ....


الله يجازى الكان السبب

-------------
سلام و د المرتضى و تحياتنا عبركم لأمدرمان و ناسها

كدى خلى الخدار ده و أمشى شوف لينا سمك عوضية (ياحليل السكى)






ش

Quote: الله يستر علينا كلنا

آمين يا أندريه،
من خشمك ولباب السما،
الحاله سعبه والسوق كعب يا وليم،
زمان كان عندنا جار شايقي كلما يمشي البلد يجيب لينا شوال بلح fresh ،
كنت يوميا أزور المخزن وأعطن لي دستة بلحات في كورة لبن ، زمن طويل
ما كنا بنشتري بلح ، بعدما جارنا هاجر بقيت من الزائرين المستدامين
لسوق الملجه والتِشاشة وكافة منافذ بيع البلح ،
في جولتي الأخيرة ( يتخدرون) مررت على باعة البهارات والبلح وساءني
كثيرا أن أجد المعروض يحتشد بالسوس ويتناقص كما ونوعا ولحظت
أن القنديله والبركاوي تراجعا تاركين الساحة للشمار.
لعن الله الشمار.

(طشت) البلح الأول مسوس والتاني والتالت فاضيين في المساطب الشعبية والشمار يتسيد المنصة الرئيسة و(باغات) الزيت كمراقبين من الفيفا بعيدين شويه تفاديا لعطس الجماهير.

Quote: احييك بقيمة (طرادة) الزمن الجميل طرادة الجوع والعطش والهم و(حاجات تانية حامياني)

والله يا الناظر تحيتك غاليه تب..
زمان الطراده ( غشيت قبرها شآبيب الرحمة) كانت تسد ألف فرقه،
في صباحات أيام الثانوية كنا نبني عليها جدول اليوم من الفول للفول
وما بينهما من متشابهات. هسه البطيخه الواردة صورتها أدناه ب 14000
اي والله قال لي 14000 ولم يطرف له جفن، في 1979اشترى ثلاثة من خؤولتي
3 سيارات كرولا على الزيرو من الكرين بقيمة 12600جنيه فقط لاغير.
إطناشر ألف وستمية جنيه يا عمده.
(الحاجات التانيه الحامياك) دي شايف تكفل بها شيقوق ولا يفتى والمسنوح في البوست.
مودتي يا أبا نضال وتحايا شخصية لأحمد.

الكبيره ال XXLالتي تشبه مفاعل ديمونه دي ب 14000 جنيه

Quote: الكبيره ال XXLالتي تشبه مفاعل ديمونه دي ب 14000 جنيه

ههههههههههههههههههههههها

يا اخي انت شايل ليك قنطار سناحة في ضهرك وحايم بيهو

والله يا ود المرتضى طرادة ود هباني زكرتني انا ذاتي بايام الثانوي

حيث قضينا ايام الابتدائي بقرشين والثانوي العام بخمسة قروش

والثانوي بالطرادة وكانت بتكفي وتوفي وتزيد يا الله يا لها من

ايام .
غايتو كتر الغلب يعلم البكا

يا Rummana شرفتي بوست الخدار وزي ما بقول المثل الخدره لمراحا

Quote: مافي داعي الشعب ياكل خدار.. خليه ياكل كيك وبسكويت وبعدين الأصفار دي زالت من زمان من العملة السودانية.. بلاش تخوف الناس بيها فضل البكور...

ربما سُقتِ هذا الحديث وتفضلتِ به على سبيل الدعابة والسخرية ، لكن هذا بالضبط ما يفعله هؤلاء القوم
لأن الشعب - في معظمه - لم يعد قادرا على التعامل مع الخدار ،
يا رمانه من يستمع إلى أحاديث منظريهم في المقابلات التلفزيزنية والصحفية يسكنه شعور بأنهم على
قناعة بأنهم ولدوا كي يحكموا وحين ينطقوا لابد أن نسمع ونطيع ، وأن الله اصطفاهم دون غيرهم من عباده عشان
يسووا في البسووا فيهو دا ، ومبررات الكوارث جاهزة في الرف..
السودان ده حقهم براهم وهم يتفضلون علينا بأن يحكمونا وأن الحقوق منحة منهم يجب أن نشكرهم
عليها ، فبهم بدأ التاريخ وبهم سينتهي وبزوالهم لن يزول السودان وحسب بل ستزول مجرة درب التبانة.
هم الذين أدخلوا الإسلام إلى السودان وهم الذين يعرفون مراد الشعب خير من الشعب ( لذا انقلبوا على
من انتخبهم الشعب ) وهم من...
عارفه ، لو بُُعثت ماري أنطوانيت صاحبة المقولة إياها ، قسما عظما تِتمحَّن وتخُت الخمسه في اللتنين
وتقول ليهم (بتبالغوا.. . يا جماعه صحّوا لويس السادس عشر يشوف الحاصل دا..) .

خلينا ننوم يا رمانه..

بس الشعب قال خداري ما بخلي..

Quote: ( أصحاب الفايدة والترخيص والإستيراد والتصدير )

خالد المامنسي،
ياخ أحل الله البيع وحرم الربا،
بس زي ما قلت بعد تجهيز رخص الإستيراد والتصدير،
أما الوظائف العليا والوسيطه في الشركات المبغبغه فالولاء،
الولاء يا خالد ،
خير من استأجرت القوي الأمين،
والقوة يا خالد - وفقا لمفهوم البعض - هي قوة (الضهر) والأمانة يا سيدي أهم عناصرها الولاء،
هي لله..
ياخ ما تنحرف بالبوست إلى السياسة ،
هسه يقوموا يحسبونا (مكنه معارضه) ودفع أمامي ودفع بالدولار وكلام نحن ما قدرو..
..

Quote: زول بيصوِر قرع في إجازتو ؟؟ إنَا لله يا " عملاة " عماد تعليق حبيب نورة ودينا خالد بيذكرنا بالخير اللسه ما كِمِل ، أدوكـ من الآخـــر معليش لو انقلب سخرية " من الزمن الكعب " بس بيجي اليوم " اليتوهط " فيهو اليستاهل " الوهييط " ويرجِع تمن الخدرة والجزر البقى يخص بيوت ويفوت بيوت

والله الصور عندك يا عمران،
بصلتك قِشرتا وقعت من الشاشه في الطربيزه،
حقيقة كلام السمحين هنا بيقول الدنيا لسه فيها خير،
لا أشك أبدا إنو ( بيجي اليوم " اليتوهط " فيهو اليستاهل " الوهييط " لأنو دا قانون الحياة فهي تعطي بقدر ما تأخذ وتأخذ بقدر ما تعطي.
(بيرجِع تمن الخدرة والجزر البقى يخص بيوت ويفوت بيوت ) صح لسانك، وأتمنى اليوم داك يجي قبال ما نتوسد البارده،
تسلم يا العزيز

Quote: يا اخي انت شايل ليك قنطار سناحة في ضهرك وحايم بيهو

قول (مساخه) يا شيقا ، بتكون منطقي أكتر،
مش الشاعر* قال من عاشر نظاما 21 عاما صار مثله؟











_
*
الشاعر بغبينه..

Quote: كدى خلى الخدار ده و أمشى شوف لينا سمك عوضية (ياحليل السكى)

عزيزي شكري،
طوَّلت الغيبه،
في عطلتي الأخيرة إتصلت بصديقين واحد مرتاح والتاني مغترب على فترتين متفاوتتين وفي المرتين جاءني الرد : أنا هسه في عوضيه أسماك ، صدقني يا شكري ، رغم إنو المحل المذكور معروف للكثيرين إلا إني ما كنت عارفو ، بعدها سمعت عنه وعن صاحبته الكثير وهو في مجمله كلام طيب من عينة ( سمك لايُضاهى في طعامه) و ( صاحبة المحل إنسانه بسيطه وزولة خير وأنها امرأة محسنة وعصامية الخ..) ويبدو أن المحل له شهرة واسعة كما علمت ، لكن يا شكري - بعيدا عن الطيبة والإحسان ، لايمكن للمواطن البسيط أن يرتاد أي مطعم معروف يقدم بروتين حيواني لأن الفاتورة تقص الضهر ، حتى إن زاره المساكين فهذا يتم مرة في الشهر خلافا لما كان عليه الحال أيام (السكي) فقد كان السمك المقلي وقتها في متناول الجميع وتدريجيا بدأ عشاق السمك في التناقص كنتيجة طبيعية لزيادة سعره في بلد يمر به أطول أنهار العالم..

عقبال الكجيك..

Quote: سلامو للخدار ,لـ الدولار سلام خسوسى

الله يسلمك من كل شر يا ندى،
أهو إنتي الوحيده العارفه إنو قصدي شريف وموضوعي خدره وبس،
شوفي الفوق ديل أولوا كلامي عن الخدار كل حسب (مزاجه) وحالته النفسية،
الله يكفينا شر السياسيين ،
تكتب عن الدولار اللخدر والشمار اللخدر وتونس الخضراء يقولوا ليك إنت قاصد أكتوبر الأخضر،
يجيبوا ليك الكلام في صمّة خشمك..
من ميزات ما جرى إنو تاني مافي زوج حا (يورِّق الخُدره)..

إن شاء الله صحتك كويسه.

Quote: يا حسن ، روق واصبر شويه ، واهدي لي لحظات هنيّه، وبعدها شوف وزير ماليتنا قال بعد الإنفصال حا يوفر لينا كل شئ، تاني اللخدر دا كان لقيتو واقع ما تعاين ليهو، هييييع زي ما بيقول ودشيقوق. قال لونو زرعي قال..

حيوفر من وين يا المرتضى ؟ والله علا من مساككة اهلنا العرب الرحّل وسط اللعوت لزوم تحصيل القطعان منهم

Quote: حيوفر من وين يا المرتضى ؟ والله علا من مساككة اهلنا العرب الرحّل وسط اللعوت لزوم تحصيل القطعان منهم

في أيام نميري كان في واحد لا أذكر إسمه ولعله (بابكر) أو ابوبكر، ويبدو انه كان من الصوفية وله اهتمامات لاهوتية،
الزول ده تم تعيينه كمسؤول عن بيت مال المسلمين على ما أظن وقال للنميري ، رحمه الله ، إن الزكاة على الأنعام والزروع
تكفي بيت المال ، وأبروف والزهره ، وعليك يا جعفر إيقاف الضرائب وستجني من الزكاة أضعاف ما تحصده من الضرائب وهذه
الأخيرة أصلا حرام - حسب ما قيل وقتها - أها يا سيدي جعفر عمل بالنصيحة والميزانية كوَّعت وتم طرد الزول بغضبة نميرية
معروفة ولم نسمع عنه بعدها..
المهم هسه ممكن تقترح على الوزير العسل دا موضوع بنت لبون القلتو وخليهو يمشي يساسك القطعان ، لو وجدها، وسط اللعوت
والموليتا ، صدقني أرنب ما يلقاهو ويرجع بجلابيتو مطرزه ضريسا..
ممكن تقترح عليهم يسجِّلوا (النفطي) للفريق (الغومي) ويطعِّموهو ب (غازي) ويسموا الفريق (مزيج برنت)..

يامولانا

سلامات كدا

من زمااااان في غنية خدارية عاجبني وأها جات مناسبتها

بتقول كلماتها :

الخدار خداري ياناس

خداري

ومن العين بداري

ياناس خداري !!

سمعتها ؟!

Quote: من زمااااان في غنية خدارية عاجبني وأها جات مناسبتها بتقول كلماتها : الخدار خداري ياناس خداري ومن العين بداري ياناس خداري !! سمعتها ؟!

يطرشني يا ناديه،
لكن - وكما كتبت من قبل - حكى لنا صديقنا الأمين مبارك أن أغنية (خداري ما بخلي) كتبها خُدُرجي أثناء كشّة قامت بها البلدية في سوق الخدار بأمدرمان ، أما كلماتك التي تفضلت بإيرادها ( خداري ومن العين بداري) فظني أن (العين) المقصودة هي عين الحسود وأن الخدرجي قام بتحصين المعروض منها.
مازلت من أكثر المعجبين ب (قام يتعزز الليمون) البالغنا في ريدو،
شوفي ، محمد سلام غناها في السبعينيات وأظنه الآن سينتقل بالغناء والغزل إلى البصل.

مودتي يا عزيزة..

الموز المدغمس دا إسمو (الإستفتاء) والكيلو 2500، طبعا حايطلع توب نسائي بنفس الإسم

Quote: عارفه ، لو بُُعثت ماري أنطوانيت صاحبة المقولة إياها ، قسما عظما تِتمحَّن وتخُت الخمسه في اللتنين وتقول ليهم (بتبالغوا.. . يا جماعه صحّوا لويس السادس عشر يشوف الحاصل دا..) .

يخدر ضراعك يامولانا

تحياتى

العزيزة مهيره،
لك الشكر على المرور ،
كلو هين ، قلبي على (نعناع الجنينه المسقي في حيضانو) .
تسلمي.

عقب ورشة عمل بعنوان توسيع المظلة الضريبية، والصحيح ( يعني توسيع الهاويه أمام الشعب)
صرح أحد المسؤولين بأنهم سيوسعون المظلة الضريبية لتشمل نشاطات وسلع لم تكن ضمن المظلة وذلك
لسد العجز الذي سيتسبب فيه خروج البترول من الميزانية بعد الإنفصال.

بعد دا أنسوا أي خدار..

.

محمد المرتضى أريتك طيب يابا

في حاجة كدة لفتت نظري

صورك دي كللللللها ضبانة كدي راكة يا كافي البلا مافي!

حليلك يا ضبان بلدي

أو كقول المغني:

حتى (الضبان) رحل ما طيبلي خاطر

مع الاعتذار للأغنية

Quote: سألت أحد الباعة: إنتو ليه رفعتو الأسعار وكل الخدار غير مستورد ويُزرع في محيط العاصمة فأجابني أن الدولار زاد والزيت والسكر والجزلين ووو

مولانا محمد.....سلام

كمال سينا عليه الرحمه قال:
فى راجل كده قاعد جنب البحر فى ابوروف لو جاء عود شايلو البحر هو بعوم يجيبو يعمل
منو كرعين عناقريب والا بمبر وببيعو وعايش على كده..المهم يوم جاءه زول من اهله قال
ليه عليك الله دينى عشرة الف جنيه بالقديم.
قالو الزول قال ليه والله ما بتعز عليك لكن حرم دى من 11 سبتمبر لى هسه ما دخلناها..
تقولى بتاع الخدار ما يربط روحو بناسداك..
لكن يامحمد اخوى مادام البصل بقى ب17000 الناس ديل ما يطبخو بالتفاح؟؟

تخريمه:
عبير خيرى انت قايله الضبان ده عوير يرك فى خداركم ده عشان يتسمم..
بعدين الناس زمان كانو بنشوه هسه بقى يزيدو بيه اللحم فى الملاح..
الضبان بقى ما برك خايف على عميرو ده،،،

Quote: لكن يامحمد اخوى مادام البصل بقى ب17000 الناس ديل ما يطبخو بالتفاح؟؟

الموج أنطوانيت ..
عارف يا صديق التناقضات بلغت أوجها في البلد ، إذا لم تستطع الحكومة كبح جماح سعار الأسعار ولجم الوسطاء فعليها أن تفتح باب الإستيراد للخدار بدون أي قيود سوى القيود الصحيه عشان نشوف البيحصل شنو ، يا موج سعر الطماطم في دوله خليجية يبلغ عشر قيمته في السودان مع الفارق في دخل الفرد في البلدين .
قلت ليك الوالي قال في شأن الأسعار(الحشاش يملا شبكتو) يعني كازياس في مباراة البرشا الأخيرة..







_

غايتو سوق مدغمس بشكل!!

عبير،
ألفين سلام،
يحرص الباعة على إبقاء المعروض نظيفا لامعا جاذبا لاستقطاب الجيوب وما حوت ، ولهم في ذلك وسائل تتعدد وأدوات كثيره منها المَنَشَّات وبخور نافذ يضاهي بمبان الإحتياطي المركزي وفي كثير من الحالات يقومون ب (رش) المعروض وبالتغني له كما تسمعين أو كما قال الكابلي ( الموز روى قايم سوا يا ناس قلبي إنكوى) ، لكن يا عبير ملاحظتك في محلها فالضبان بيمشي لأماكن أخرى ولايقترب من الخضار والبهارات ، أما مسألة إنو هاجر رحل خلاني دي ما وارده ..
ما وارده كلو كلو وكان مكذباني أسألي الجزُر المجاور أو أسألي العنبه الراميه جنبو..
No way

(أحسن ليهم يتعاونوا معانا لأنهم على الأقل خمسه سنوات ما حايقدروا يعملوا ليهم خط أنابيب)

تصريح لأحد (المسئولين) والمُخَاطَب معروف ..

(خلِّي في حُضنَك ضرايا) والمخاطب برضو معروف..

اللخدر لونو زرعي..

تم التعديل إلى (دولاري) ما بخلي ..

ولا عزاء للشاعر..

مولانا مرتضى ..

لعلها أضغاث (جرسة مغتربين) ألمت بكم ،
كتداعيات حتمية للزلزال الذي ضرب
مؤخرا أهلنا في اليابان .. فلا تثريب عليكم ...

أما نحن ، من اندبغ جلدنا قرضا حسنا ، فلم نعد
نبالي أو نكترث ... عجورا كان أم خيارا ...
دولارا كان أم شيكا سياحيا ...

يعني تبلد لا ساحل له ... ولو أدركت أن
هذا التبلد يصيبنا حتى في المخادع، لعلم
معاليكم فداحة المصاب ..

دحين أنفد بجلدك ، وهو غير قابل للدباغة مدني !!!

Quote: يعني تبلد لا ساحل له ... ولو أدركت أن هذا التبلد يصيبنا حتى في المخادع، لعلم معاليكم فداحة المصاب ..

د. قرض،
ياخي بعد الشر عليك،
ياخ دي صورة قاتمة مكفهرة لئيمة،
يا محمد أنا ما انقطعت من السودان كلو كلو والصور الفوق دي ..
جبتها بضراعي ، وكان ما بخاف الكضب الدولار دا زاتو بتاع Son of the Mountain
رغم اختلاف لون الأصابع .