من منا لم يبك ليلتها؟ بنشيج صوفي صاف تخرج بعده وأنت أصفى وأزهى وأطهر وأصدق ما تكون، هذا المقطع تحديدا يعد ، عندي ، أحد إنجازات البشرية، شئ تود لو يصحبك حتى في البرزخ. تعال فرِّح ليالينا ، والأوكسجين الطبيعي. أغنية تزيل كل أدواء الرئة وتعمل على تنقية الشرايين من شوائب الزمان, بكيت من غير تحس بأي حاجه ، حولك، حاتتعلم. مصيرك،
يا مجدي أنا بسمع الغنوة النوويه دي من الطفوله إلى الكهوله وفي كل مرة بتعمل فيني الدايراهو، ياخ المقطع ده بالذات كنت استمع إليه يوم بُثّت السهره وعندما بكى الزول السمح دا كنت سلفا أكملت نصيبي, __
و فات الكبار و القدرو، و بكرة الريد بدون مواعيد يزورك يا حياة عمري، شئ لله .... تقول يا ريتني لو حبيت زمان من بدري و بكرة.. و التجلي في محاورة العود، مدد يا المرتضى! دا محمد فضل الله ولا الحلنقي؟.. أنا استرق السمع في انتظار تسجيل الدوحة أو لندن.
Post: #7 Title: Re: زول سَمِح .. Author: محمد المرتضى حامد Date: 02-11-2009, 06:18 AM Parent: #4
دا الحلنقي يا سعد.. الحلنقي عندما يجالس الجن بوادي عبقر فيأتيه بأنباء الغيب قائلا: بُُكرا الريد..
المشكلة انه الغنية فيها سبق اصرار و ترصد واضح للعيان. فود الامين لا يكتفي ب" بتتعلم" بل يشدد حتتعلم و يعود وتتعلم ،و اخرى : مصيرك بكرة تتعلم، تقول لي القراية ام دق؟
Post: #8 Title: Re: زول سَمِح .. Author: Emad Abdulla Date: 02-11-2009, 06:43 AM Parent: #6
فلاش باك :
و أنا أزرر الكبَك .. " كبكاً باتا " .. كبكاً بُنياً باتا - كيف أتذكر ربط الكبك و الغنوة التي رفعت علىّ الفاتحة .. و تفاصيل و لا عليك بيها ؟ - في الأوضة الجوانية .. و كركبة الصباحات من هديلات الحمايم و تشة العجين على صاج العواسة ، و الخطوات الداخلة و المارقة .. ثم الراديو الفي شباك البرنده .. و صوتها من صباحات الله يلاوز لي و هي في البرنده .. تستحث أختي : يا بت إتأخرنا .. فأدندن مُنحنحاً مع الباشكاتب .. و هي .. كيتاً تكويني في صنقوعي .. تتجاهلني . أشوف الطرحة متضاري و أشم اللون اللبني .. و طرف شنطتها التي تعلقت " بالكتيف الهادل " تعاني .. من تعاريج ما فار من جسدها السحابة أم مغسة .. فتزهج منها - حبيبتي الزهجية - فتجدعها ورا .. ثم على جنب ترميها .. و ثالثة تأخذها محضونة بين الذين ساهرا بي زمانا .. و أدخلاني في زمرة ( أذايا فيهو و فيهو الطرب و الراح ) .. و ابو اللمين لا يرحم .. و لا يرحم .. و لا يرحم : ح تتعلم .. و تتعلم .. بتتعلم .. و لا حياة لمن تنادي يا أيها البشكوتة الذي سند القلب في الزمان الثانوي عالي و ما تلاه . و إلى يومنا هذا .. فلا حبيبتي تعلمت - زيها زي الحبيبات - .. و لا أنا تُبتُ .
ابو اللمين زول سمح .. أي نعم .. و إنت زول مؤذي يا مرتضى .
Quote: و صوتها من صباحات الله يلاوز لي و هي في البرنده .. تستحث أختي : يا بت إتأخرنا ..
سألتك بالذي خلق جدك من صلصال ترجاني أرجع ليك بهدوء.. سألتك بالله ياعماد.
Post: #47 Title: Re: زول سَمِح .. Author: محمد المرتضى حامد Date: 02-13-2009, 08:39 AM Parent: #8
Quote: و صوتها من صباحات الله يلاوز لي و هي في البرنده .. تستحث أختي : يا بت إتأخرنا ..
عماد الخمجان ، بعضهن لم يكن يُصدرن أي صوت وهن يقفن في الحوش بعد أن يكن طرقن الباب المتاكا على خفيف بطريقة (نحن هنا) يا ناس عماد ، مع الإبقاء على الشنطه السعيده ، الشنطه الأمها داعيا ليها قلقة المصير على الصدر ، نعم يا عماد ، الشنطه بالضبط ما سكنها باليدين الإتنين في وضع كخط دفاع أول زي ماجينو ، يا النور الفي حِليو راحل ، الكلام والإبتسام موجه لأفراد البيت جميعا، صباح الخير يا عم فلان ويا خالتي فلانه ويا .. وأنت الوحيد المستثنى من ندى الصباح ، ( يلقاك الناس فتبسم إلا لي).... الله يرحمك يا سند. رغم السلام والحديث السريع المقتضب إلا أن العيون تتنقل بين ناس الحوش تترقب ظهورك ، الترقب يا عماد يكون عادة بسرعة أغِثني وبزاوية إنحراف قدرها 90 نبضه لإنسان العين ، التوتر المريح يسري بين كل الناس حتى الجدر وكبابي الشاي والبرَّاد وبسكويت ساتي . الجميع يدرك حقيقة الموقف ، لما تظهر أنت يا عمده ستكون آخر من تمر عليه السكانر الكحيله ، تتخطاك كشافات برج السجن في استداراتها لكنها تلتقطك في آخر كسر من الثانية وأنت تغادر الكَتَراز؟ عند مرورك بقربها ربما تتجاهلك عمدا بانتظار أن تبادر أنت بالتحية فتفعل ، والرد ابتسامة مقتضبة أيضا و..( يا بت إتأخرنا ). يا سلام على الشارع وناس الشارع ومافعلوه في قصة بشرى الفاضل يا عماد الكتّاب لامِن مِشاتر. هسه المؤذي منو عليك الله؟
ورا البسمات كتمت دموع..بكيت من غير تحس بيا، هكذا نحت احدهم في جدار سنة اولى ب الخلفي لمدرسة الكلاكلة القبة الابتدائية.. سقط ضحية اخرى للباشكاتب في عمر مبكر جدا! يا اخوانا وين محمد عثمان و معاوية؟
Post: #10 Title: Re: زول سَمِح .. Author: saif addawla Date: 02-11-2009, 07:28 AM Parent: #9
اخي مرتضى حامد
الباشكاتب تفوق على نفسه في هذه الاغنية ، وفي مرة سمعت الحلنقي يقول انه حينما سمعها قال ( انه لم يضع كلمات شجية الى هذا الحد ) لقد اضاف اليها اللحن البديع والصوت النادر للباشكاتب بعدا ادخلها - دون جدال - الى قائمة اغنيات العصر الذي نعيشه ز
التحية لك وانت تتحفنا بهذه الروائع ، مع خالص مودتي
اضافة
في سبعينات وثمانينات لبقرن الماضي كان الشعب السوداني ، كما هو منقسم الى هلال مريخ ، كان ايضا منقسم بين ود الامين ووردي ، وكنا ( مريخاب ) اقصد ( محمد الاميناب )
مولانا سيف الدوله، يا سيف ، أنا أعشق وردي وكل المطربين الذين شكلوا وجداني ، جميعهم بلا استثناء، بس عندي مشكله مع محــمد الأميــن دا ما عارف جذورا وين ، لو قادر أعرف كنت ارتحت ، من عيـال أبجويـل وانت جاي رغم أني لم أدري كنهـها وهي تـلامس أذنـي يوم كانت غضة تتهجى الذبذبات وليس انتهاءا بزاد الشجون. رغم حبي لكل من عاصر محمد الأمين إلا أنه يميتني ويحييني في كل ما انتقاه من كلمات حتى لكأن السر فيه وليس في الكلمات. في بداية التسعينات كانوا يبثون إعلانا لسيارة الفولوكسواجن بالتلفزيون الإنجليزي وكانت صورة السيارة تظهر على الشاشــة ثم تظـهر عبارة تقول ( إنها ليست سيارة) وتختفي ثم تظهر عبارة ( إنها فولوكسواجن) ... اقول لك ( إنه ليس مطربا .. إنه محمد الأمين).
محمدالامين زول سمح ونقطة على السطر. محمد المرتضى وسعد الدين .. انتو بتجيبوا الكلام السمح دا من وين .. نفسي اعرف عماد عبد الله اعتقد انه بيكون رفيق الحلنقي بوادي عبقر يا سلام عليكم
Quote: هكذا نحت احدهم في جدار سنة اولى ب الخلفي لمدرسة الكلاكلة القبة الابتدائية..سقط ضحية اخرى للباشكاتب في عمر مبكر جدا!
يا سعد، هذا بالضبط ما عناه الكابلي حين قال حراسك يا حالم الحيا والفضيله و..(الوعي المبكر والعاطفه النبيله) الوعي المبكر يا سعد أساس في كل هذا الإبداع ، العشق منذ نعومة الخواطر. قل لي بربك مَن مِن الذين يحلقون لدى سماعهم أبواللمين لم يكن عاشقا منذ قبل الفطام فما بالك بتلاميذ الإبتدائية، صدقني يا سعد كنا في الإبتدائية نجيب سرا على سؤال وداللمين : متين عِرف الهوى قلبك. نعم ، ينحت اسمها في الصف الثالث إبتدائي ، بعد أن تعب الفؤاد من النحت ف(طفحت) العمليات إلى الخارج. إلى الجُدُر .. إلى الحِيَط يا سعد وسيقان الشدر.
Post: #14 Title: Re: زول سَمِح .. Author: محمد المرتضى حامد Date: 02-11-2009, 09:35 AM Parent: #5
Quote: أنا اتربيت على وجود ود الامين كخلفية موسيقية اساسية في البيت و اي حتة
إذاً بيتكم لاتعوزه وثيقة تأمين ضد المخاطر والكوارث هي السلامه النفسية ، أدامها المولى عليكم يا سعد.
Quote: يا مجدي أنا بسمع الغنوة النوويه دي من الطفوله إلى الكهوله وفي كل مرة بتعمل فيني الدايراهو،
والله انت اللّخو كان وزنوك هسع يلقوا وزنك ماينص فائف واى ابداع حرفي ونغمي شايل من جسمك جغمة . عشان كده ارخي لي اضانك فيشان تسمع وصية اخو بريدك بالحيل قوم امشى اتكامل الطبيب وقول ليهو كلامي ده :-
حـن يا طبيب واكشف علي وريني مـاسبب الألم اعطف علي وارحم عيني.. قالوا الشفا دونك عدم شوف الدموع ماليات عيني .شوف الألم وين أنكتم أنا يا طبيب قلبي أنجرح بس كيف جراحو بتلتئم العمرو ماضاق يوم فرح ولاحتى في الدنيا أبتسم كيف بس يعود ليهو الفرح .من بعد ما عاش الألم قلبي العذب من زمن يشكي وآهاتو التمن حن ياطبيب داوي القليب العاش حياتو مع الحزن ضمد جراحو ومره سيبو ينساها ويــــلات الشجن
سمح؟ يا سمح
Copy rights reserved
لقيتني كيف؟
Post: #15 Title: Re: زول سَمِح .. Author: محمد أبوالعزائم أبوالريش Date: 02-11-2009, 10:23 AM Parent: #13
منذ أن تعلمت سماع الغُنا والموسيقى، وأنا أسمع (بتتعلّم من الأيام)
وفي كل مرّة أنتظر مقطع (بكرة الريد يزورك .............. ورا البسمات كتمت دموع .. بكيت من غير تحس بي).
لا نحن شفينا ... ولا ود اللمين إستغفر.
لكن قول لي .......... ليه الناس بتتألّم؟
Post: #16 Title: Re: زول سَمِح .. Author: الزاكى عبد الحميد Date: 02-11-2009, 10:36 AM Parent: #15
أغنية تستعذب بها الألم حتى يصبح نشوة من السعادة التي تحلق بك بعيداً..بعيداً.. فيمتزج الألم بالسعادة امتزاجاً "كامل الدسم" فترى من الألوان ما شئت.. وتسمع من النغمات ما شئت.. وتستاف من العبق ما شئت.. فعلاً أغنية أكمل "دسمها الوجداني" ذلك الألم الممتزج بالسعادة.. بسمات وراها دموع وبين هذي وتلك حالة من عدم التوازن الوجداني لا يعلم مدى تداعياتها إلا الله..
Quote: فعلاً أغنية أكمل "دسمها الوجداني" ذلك الألم الممتزج بالسعادة.. بسمات وراها دموع وبين هذي وتلك حالة من عدم التوازن الوجداني لا يعلم مدى تداعياتها إلا الله..
Quote: أغنية تستعذب بها الألم حتى يصبح نشوة من السعادة التي تحلق بك بعيداً..بعيداً..
يا الزاكي الباهي مسألة الألم في أغانينا هي المرادف الطبيعي للنشوة ، يعني أبوعركي في نموذج شيقوق أعلاه بيسأل عن الموضع وهو يعلمه تماما (شوف الألم وين انكتم) وأما السيد خضر بشير فقد اتخذه مرحلة لبلوغ ذرى التوحد وقال (أتلاشى فيك وانسى الألم) من ثم فإن الألم السامعنو ده هو ضرب من الجمال وقد أوجز جبران حين مزج بين الإثنين فقال عن الجمال (هو أُلفة بين الحزن والفرح،...هو قوة تبتدىء في قدس أقداس ذاتك وتنتهي في ما وراء تخيُّلاتك ...إن الجمال نصيب المتألمين ). يعني برضو يا باهي إن الألم نصيب الجميلين. تسلم.
Post: #17 Title: Re: زول سَمِح .. Author: انعام عبد الحفيظ Date: 02-11-2009, 11:18 AM Parent: #15
يا محمد ابوالعزائم ، صدقني يا حبيب هناك حالات لا أمل في شفائهامن هذه العله الجميلة. يعني يا محمد في ناس مولودين وفي الكروموزومز بتاعتم انهم يكتموا الدموع دون أن يحس بهم أحد ، الكون دا منظم بدقة يا محمد ومن نواميسه مسألة الريد كحقيقة تشابه الشمس ودورها في بقاء الحياة مستمره ، الشمس القلآّيه دي بدونا ما بنعيش كلو كلو ، بعدين يا محمد الريد ده الله ما بديهو إلا لمن يرتضيهم من عباده ، القصه ما فوضى ساي . أها لوبتبكي مع اللقطه الفوق دي تأكد إنو المرحومه والدتكم داعيا ليك. ياخ اشكر المولى على النعمه دي.
Post: #38 Title: Re: زول سَمِح .. Author: محمد المرتضى حامد Date: 02-12-2009, 06:24 AM Parent: #13
Quote: والله انت اللّخو كان وزنوك هسع يلقوا وزنك ماينص فائف
الوزن شن بدوربو يا الطيب، يعني لما تسمع : أقابلك وكلي حنيّه وأخاف من نظرتك ليّا ، الوزن يجي من وين تاني؟ الطيب بالله خلِّيكم منطقيين وما تطالبوا الناس بما يخالف قوانين الفيزياء والبيولوجي.
Post: #40 Title: Re: زول سَمِح .. Author: محمد المرتضى حامد Date: 02-12-2009, 11:48 AM Parent: #13
دون أدنى مغالاة أو تطرف يا المعتصم أقول لك أنه رجل وسيم بكل ما تحمل الكلمة من مضمون ، نحن نرى الإنسان وسيما عندما يبث فينا معاني الجمال ويضخ في خلايانا ما يعدِّل كيميائها، ذلك الذي يُبدِل محتوياتها ماء ورد فيغدو جهازنا العصبي إكليلا من الياسمين . وداللمين يعيد ترتيب عدسة العين وإنسانها ويراجع مسارات الضوء فيها باتجاه القلب فلا نراه إلا جميلا. ما كان من أهل هاروت ليسحرنا لكنه عبقري حقيقي من أولئك الذين يجلون بصرك وسمعك ويكشفون لك ما هو أبعد من الأجساد الفانية التي يقول عنها أهل البصيرة ، وهم لايكذبون ، أنها سجن للأرواح ، فنغادر القفر اليباب إلى مجرات الخشوع. المعتصم ، زولك تب سمح ، سمح لامِن سمح.
Post: #19 Title: Re: زول سَمِح .. Author: هاشم أحمد خلف الله Date: 02-11-2009, 11:31 AM Parent: #1
Quote: من منا لم يبك ليلتها؟ بنشيج صوفي صاف تخرج بعده وأنت أصفى وأزهى وأطهر وأصدق ما تكون، هذا المقطع تحديدا يعد ، عندي ، أحد إنجازات البشرية، شئ تود لو يصحبك حتى في البرزخ. تعال فرِّح ليالينا ، والأوكسجين الطبيعي. أغنية تزيل كل أدواء الرئة وتعمل على تنقية الشرايين من شوائب الزمان, بكيت من غير تحس بأي حاجه ، حولك، حاتتعلم.
دا شنو دا يا مولانــا ..؟ كلامك دا زاتووو مفترض يتلحن ويتغنى اتاشمنت أو وصلة صغيرة بعد الاغنية دي .. والله جد .. أول حاجة الحلقة وقتها ما حضرتها .. كالعادة اتصل علي عمران حسن صالح والرجل أنا بعتبرو المخزن بتاعي لي حاجات محمد الأمين .. يعني لما اكون عايز اتالم من الأيام بقوم طوالي بوصل لي اي وصلة في اي حتة متعلقة بي عمران .. واستمتع بي ابو اللمين .. تتخيل شريط كامل يديك ليهو مكرر فوقو الأغنية دي .. أو تكون راكب معاهو في احلك ظروفك الوجدانية ويشغل ليك الشريط دا وفجأة تمتنعو عن اي كلام في اي حاجة مهمة في الكون دا .. المهم اتصل علي بيحكي لي عن الحلقة .. ما اهتميت شديد لي كلامو أو زي ما بعمل كل مرة لما الحاجة تكون بعيد مني لحدت ما اللم فيها .. الاقدار سمحت انو اقعد للحلقة بعدما اتصلت علي اختي الصغيرة من السودان قالت لي حلقة محمد الأمين بيعيدو فيها في النيل الأزرق .. تتخيل انا افتح التلفزيون اللقاهو يادوبك بيتعلم من الأيام .. تعرف يا مولانـا وإنت بتعاين للملف دا .. شوف زرياب محمد دفع الله بتاع الكمان عاين لي محمد الأمين كيف لانو عارفو في اللحظة دي ح يغني بي دموعو .. اتحداك يا مولانــا كان قدرت تثبت للكمنجات دي وهي بتتالم .. وبتطبطب على محمد الأمين في لحظته.
إنتو عايزين تكتلونا واللا شنو يا مولانــا
Post: #23 Title: Re: زول سَمِح .. Author: الزاكى عبد الحميد Date: 02-11-2009, 12:07 PM Parent: #20
Quote: عسل عديل كده
العسل انت يا ضي القبايل.. لكين زولك دا بجيب حاجات عجيبة وغريبة.. سلمتما..
Quote: عاين لي محمد الأمين كيف لانو عارفو في اللحظة دي ح يغني بي دموعو ..
تمبس ، أول حاجه سلام لعمران بحجم حبه للزول السمح ده ، دي وصيه لازم تصلو، الشي التاني ، زي ما قلت ليك يا علاء المقطع الفوق ده رغم أنه تمانيه دقايق واربعين ثانيه بس لكن لايمكن أن تسمعو دفعه واحده والأطباء ينصحون بذلك ، بعدين ما تسمعو وانت واقف وبرضو ما تكون سايق ، لأنو تحديد الإتجاهات والوجهة الماشي ليها ذاتا ببقى صعب ، وزي ماقلت يا علاء إنو الزول ده بيغني المقطع ده بالذات بدموعو وأهو فعلا بكى بتنخج واضح واضطر الأوركسترا تعيد المقطع كذا مره لتهدأ خواطر السمح ده ويستعيد القدره على إخراج الحروف. بنفس المستوى يا تمبس نحن سمعناه بالدموع مع بدايات الكوبليه وبعدها لا شفنا لاسمعنا. ياخ بعد الأغنيه انتهت جا رجع قعد جنب مقدم الحلقه وبعد تنهيده أعمق من الثقوب السوداء وصمت مسافتو كم سنه ضوئية قال لمضيفه : ياخ الغنيه دي صعبه ، يا تمبس ، رغم أني شاهدت محمد الأمين يغنيها مئات المرات إلا أنها الأولى التي يبكي فيها هذا الجميل ولا أريد أن أعيد لك حكايتي التي فصلتها عن التلبثة التي صاحبت تلك الليلة. أها هسه الكاتل اخوهو منو؟.
في السبعينيات, جريدة الصحافة عملت مسابقة لأحسن غنية سودنية و لقد فازت هذه الغنية. وردي كان في المرتبة التانية برائعته عصافير الخريف _________________________________________ كرمبا: يا الأخو ألبس ليك طاقية ما تخرب علينا السوق
طبعا ياداب تمكنت من (مشاهدة) اليوتيوب المرفق ببكاء الباش و منديله يا اخوانا نقص احد الحواس الخمسة مصيبة..ايش بالك بسمع و شوف زي دا! اقابلك و كلي حنية..و الباش حين يجترحها يرتجف في كلي فنرى ارتجافة الحلنقي و تخالجهما نهنهات تخالطها صدمات كهربائية قدرها اربعمائة ميقاوات و تزيد ليقف عند "و اخاف" يتركك بخيولك الجامحة.. ترى مم يخاف? فيسلمك بهدوء لوديان اهل الطريق بارواحهم المعلقة و الهائمة بين فجاج برزخ العشق.. تقول ربي لم ابهجتني و اشقيتني! ينساب: و اخاف من نظرتك ليا و اخاف.. تااااااني تخاف يا سليل الحلنقة الجميل? مم تخافون هذه المرة? لابد انه فزع عظيم! اخاف شوق العمر كلو يفاجئك يوم في عينيا!.. بس كدا? تحملون شوق العمر كله و تتخوفون المفاجأة عليها! لتأتي ورا البسمـات كـتـمت دموع..بكيت من غير تحس بيا.. يا اخوانا الحلف بالله ما ترك شئ..بس البحلف بيك دا ملكك! متين عرف الهوى قلبك متين صابك بآهاتو (متين) و هذه المتين الأخرى دليل "قسوة" الباش التي استدركها في هذا التسجيل فهوت دمعته ليتداركها بالمنديل متين سهر عيونك ليـــل طويــــل طويـــــلـة ساعاتو (متين) وفي هذا نستبين سبق الاصرار و الترصد آنف الذكر جليا و طويل/ة هذه/ا طولا يحنن و يشفق بالحيل! ..فحين يتمطى بها الباش تتشحتف ارواح و مهج فتنوء بكلكل! و وحاتك لسة ما بتقدر تقاسم قلبي دقاتو وحاتك كنا في جدال و لوم ذات يوم فحلفت: وحاتك! استرقتني ساعتها و أنا الفائر كالتنور خرت كثور ذبيح فذابت ثلوج و انقشعت ضبابات كثر!
Post: #72 Title: Re: زول سَمِح .. Author: محمد المرتضى حامد Date: 02-15-2009, 09:12 AM Parent: #34
يا ابن خالتي أنا ذاتي لابدين لي البيكتبوا الكلام والبيغنّوهو ، زمان كان ضرِب غبينه وساكتين عليهو ومستورين لكن هسه يا كمال أصبح سحلا بشوارع القلب وأرجاء الخاطر ، وقصة الصبر والسُتره دي أصبحت من الماضي ، ما أجمل الوجع المَدَكَّن. سلامي لكل الأحباب طرفكم.
Quote: ولا يستطيع اي زول لملمتي من الشارع الا عيونها تجمعني بابتسامه صغيره وتضعني امام الباب قبل ان تختفي!
أهو شايف يا ابراهيم الزول دا بعد الصولو بتاع العود كان بيتألم بحق وهو يردد آه آه آه كالطعين وبعدها بكى بحرقه ، بكى يا ابراهيم وهو يستحضر (سلمى) فبكى من خلفه كل من ألقى السمع وهو شهيد وحتى هذه اللحظة التي أكتب لك فيها, طبعا يا إبراهيم الرجل دا تحمل الكثير حتى وصل إلى هذه النقطة ، نقطة التجلي ولا أقول الإنهيار ، ما أجمل البكاء يا الخليل ، اللي قلت عليهم اننا انتظرناهم يلملمونا من الشارع ويجمعوا شظايانا بعيونهم لابد أن تكون ذكراهم مصحوبة بأصدق ما نملكه وهو الدموع، الدموع لاتكذب ابدا يا ابراهيم ، نحن عندما نذكر الذين كنا ننتظر أن يلملموا بشتنتنا قبل أن يطوينا فجاج الردى نتمثل اشياء كثيرة واناسا كثيرين وأماكن شالا الزمن من عيوننا وثبّتا في قلوبنا دعما للوجع وكَبرَته للفجيعه الما هظار. أصبحنا يا إبراهيم ننتهز (فرصة) ألم في الظهر أو الكتف لنبكي تاريخا من الأحزان وحقبا من النكسات والفشل المصفّى ممزوجا بأملاح الضياع. ربنا يحسن الخاتمه بس. شوف المقطع القبالو وهو يصدر بيان أقابلك وكُلِّي حِنيَّه. <object width="425" height="344"><param name="movie" value="http://www.youtube.com/v/0NnkeYaj0e0&hl=en&fs=1"&g...;/param><param name="allowFullScreen" value="true"></param><param name="allowscriptaccess" value="always"></param><embed src="http://www.youtube.com/v/0NnkeYaj0e0&hl=en&fs=1"; type="application/x-shockwave-flash" allowscriptaccess="always" allowfullscreen="true" width="425" height="344"></embed></object>
Quote: في السبعينيات, جريدة الصحافة عملت مسابقة لأحسن غنية سودنية و لقد فازت هذه الغنية. وردي كان في المرتبة التانية برائعته عصافير الخريف
كوستاوي الخرده، سبعينيات؟ وكمان استطلاعات صحف ؟ السبعينيات دي حضرتوها إنتو ، نحن ما بنتذكرا ، بالفعل يا نصر ، فازت الأغنية في 1979 على ما أذكر وأيضا في استطلاع لاحق ، كان لابد أن تفوز رغم وجود العتاوله والعماليق وزخم من الأغاني الذرية التي لن يجود التاريخ بمثلها حتى يرث الله الأرض . تسلم يا حبيب.
Post: #41 Title: Re: زول سَمِح .. Author: willeim andrea Date: 02-12-2009, 11:55 AM Parent: #37
الجميل محمد المرتضي.... لي رجعه...
معليش بره الموضوع.... .. ازيك ياراجل ليك وحشه والحقيقه انا مقصر في زيارة بوستات الرائعه ... جميل النيولوك...... ياخي قطع شك بكون شفتك قبل التصحر الحاصل ...... وش مازح ومعتز بيك ...... مابين الاهليه... محمد حسين او المسالمه..... ياخي ده كلها مناطق مشبعه بالذكريات الجميله.... معزتي واحترامي وتقديري لشخصك الكريم الراقي
Post: #43 Title: Re: زول سَمِح .. Author: محمد عثمان Date: 02-12-2009, 04:12 PM Parent: #41
اغنية تاريخ يا ود المرتضى و التاريخ فيه العبر و الحكاايات...
اعدنا الى اياام و زمن جميل لن يتكرر كنت استغرب و نحن صغار عندما اقرا لقاءا مع احد الاعلام الجميع كان يقول اغنيته المفضله بتتعلم من الاياام عند يكون السؤال ما هى اغنيتك المفضلة..؟؟ كنت اسال نفسى دايما ما هى بتتعلم من الاياام و ما هى هذه الاغنية التى يذكرها الجميع..؟؟
الان عرفنا يا ود المرتضى اغنية بتتعلم من الاياام و لم نتعلم من الاياام بعد..
ياخى انت زول سمح برضو و البوست برضو سمح و ضيوفك الحلوين كلهم سمحين..
كنا ، وقتئذ ثلاثة عبدالرحمن عباس ولد ابوالعباس الفوال الأشهر ابوالعباس والعشرة الكرام وعبدالحفيظ حامد نعيم ( شنان ) وأنا نتبارى في حفظ اغنيات وداللمين ، وكانت بتتعلم من الأيام هي مقياس الرسم والمعيار ، وكالعادة كان عبدالرحمن عباس يتفوق علينا وماكنت بلقى حاجة اقولها له سوى ك ياعربي انت يوم بتكتل واحد فينا هسع يا محمد المرتضى انت لن تكتل سواي والمكتولة ما بتسمح الصايحة ، حيث كان بامكاني تفادي هذا الشرك لكن اجلي تحايل علي حتى وداني التوج تعمقت ( تتعلم من الأيام ) وتومتها الأخرى ( وعد النوار ) فينا لأن انبلاج فجرهما زامن أحلى ايام حب عشناها
Quote: يعني لما تسمع : أقابلك وكلي حنيّه وأخاف من نظرتك ليّا ، الوزن يجي من وين تاني؟ الطيب بالله خلِّيكم منطقيين وما تطالبوا الناس بما يخالف قوانين الفيزياء والبيولوجي.
غايتو جنس غايتو
والله يا المرتضى ضحكت نامن اسندت في حديد فضيلي جماع الشايلو معاهو في سيارتو محل ماش بتاع الرجيم والرياضة
فضيلي شيخ العرب لما ينزل معاك ضيف لمدة يوم واحدبس بجي مخمم الشنط وحديد الرياضة وبكون عايز منك تلاتة حاجات
المرتبة الارضية
مساحة تخصص لحديد الرياضة
وزاوية للشنط ( بذكرني زمان المداح لما يجونا من الجزيرة)
بكى حبيبي والله ،بكى الباش و كفكف دمعته بحرفية الموسيقار فخرجت بكرة الريد تريانة بفيض المشاعر و صدق اللحظة. لم يرحم حتى رقة شعوره يا عمدة، عايزه يرحمك؟
Quote: الزول ده إنسان بحجم فنه وفنان بحجم إنسانيته !!
والله يا ناديه كلامك دا عجبني بالحيل، الزول دا كلما أسمعه أحس إنو الدنيا بخير، صوت مضاد للوحشه والتشرد. يا سلام على الملاجئ في كل الأزمان ويا سلام على الضُل.
Quote: بكى حبيبي والله ،بكى الباش و كفكف دمعته بحرفية الموسيقار فخرجت بكرةالريد تريانة بفيض المشاعر و صدق اللحظة. لم يرحم حتى رقة شعوره يا عمدة، عايزه يرحمك؟
يا سعد ، (بُكرا الريد) طلعت بعد عمليات معقده جدا في ال ENT متزامنه مع تشخيص سريع لحالة الصدر النيرانو حرقت آلة العود وبالطبع كان ذلك العرض على الهواء مباشرة وشهده كل الذين يرون ببصيرتهم.
Quote: هسع يا محمد المرتضى انت لن تكتل سواي والمكتولة ما بتسمح الصايحة ، حيث كان بامكاني تفادي هذا الشرك لكن اجلي تحايل علي حتى وداني التوج تعمقت ( تتعلم من الأيام ) وتومتها الأخرى ( وعد النوار ) فينا لأن انبلاج فجرهما زامن أحلى ايام حب عشناها
غايتو ماعافي ليك
والله يا ابوساندرا عمرك طويل والشَرَك بتاعي ما بيقبض إلا الناس البكايين وأنا أي زول ما بكاي ما زولي ، وسبق أن كتبت هنا بأن الناس البكايين ديل ربنا حباهم بشبكة عصبية وقدرات وصفات لا تتوفر لغيرهم من البشر ، الناس البكايين ينهمرون ويذوبون لمثل بتتعلم من الأيام ولمثل ( لو وشوش صوت الريح في الباب يسبقنا الشوق قبل العين) ناس آصف بن برخيا اللي نقل عرش بلقيس قبل أن يرتد لسيدي سليمان طرفه) أما التانيين، زي ما قلت سابقا ، ممكن يمروا بأغنيه زي دي دون أن يطرف لهم جفن وكأنهم يستمعون لكشف توزيع الأراضي ، المسأله قِسمه يا أبا ساندرا وأوعك تعفى لي ، بِنروح فيها الإتنين. حذاري.
Post: #73 Title: Re: زول سَمِح .. Author: محمد المرتضى حامد Date: 02-15-2009, 10:24 AM Parent: #43
Quote: الان عرفنا يا ود المرتضى اغنية بتتعلم من الاياام
ولسه يا محمد، بتتعلم وحاتتعلم من الأيام وستعرف الأغنية أكثر بمرور الأيام فأنت ما زلت في بدايات الشباب وكما تفضلت فالتاريخ فيه العِبَر والعَبَرات ولكننا في مسألة الحب يا سيدي كآل بوربون لا نسينا ولا اتعلمنا والحقيقة الثابته يا محمد زي ما قال التجاني لا كملت حكاوينا ولا لقينا البداوينا ، تتذكر؟ القال فيها لزولو : يا مشهيني طعم النوم.
Post: #71 Title: Re: زول سَمِح .. Author: محمد المرتضى حامد Date: 02-15-2009, 08:08 AM Parent: #41
Quote: مابين الاهليه... محمد حسين او المسالمه.....
يا وليم ، المسالمه حي كان أصلا من كوكب آخر ، هو لم ينزل من الجنه كما يقول بعضهم لكنه حتما يجد له أصل خارج درب اللبانه حتى ترابه الذي كان يختلط بأقدامنا في الدافوري كانت له رائحة لاتجدها لا في منطقة أخرى ولا في عطارد، البنات هناك تفوقن على من سمعنا عنهن في الميثولوجيا الإغريقية ، ناس سيد عبدالعزيز وعبيد عبدالرحمن وعبدالرحمن الريح ومجموعة السَحره ديل الكلام الكتبوهو ما بيكتبو زول ينتمي للمجموعة الشمسية. لازم نكون اتلاقينا هناك يا وليم ، المسنجر معاك يا أمير.
يا خليل ، هنالك اشياء يزيدها مرور الزمن قيمة وروعة ولك في علم الآثار مرجع ولا أذكر أشياء أخرى (معتقة) لأن الرأي لايجتمع عليها فهي عند البعض تزيد قيمة وعند آخرين لاقيمة لها قديمها وحديثها، الواحد وأربعين سنه - وهي عمر الأغنية - زادتها جمالا وهذا دليل على أصالة تكوينها، الكلمات جاءت بأسلوب السهل الممتنع (تشق القلوب قبل الجلود)، واللحن مرسل من كوكب آخر وأما الأداء فزي ما إنت شايف ، وداللمين لم يقف عند أسلوب واحد ، هسه بكاهو في اللقطة دي يا خليل أعطى المشهد بعدا خامسا، ربنا يكون في عوننا. تسلم.
Post: #56 Title: Re: زول سَمِح .. Author: محمد المرتضى حامد Date: 02-14-2009, 11:01 AM Parent: #25
Quote: تحس فى صوته بطعم الطمى البكر، بعد خريف فالت وصبى وتغيان
ومرات صوته يجيك مزيج من "نهرة الأبو" و "دعاء الأم"
ومرات كمان، تسمع من صوته ريحة الحبيبة
روحك تضوى وتبق نور
ودمك يتوحد مع شرايين الجنة، ويسيل جداول تكب الطرب فى أزيار الحلة
وهاك يا شراب
فمن شرب منها كان آمنا
ومن شرب منها لا يظمأ ابدا
فى نوع ناس ربنا سواهم عشان يجملو حياة العالمين
أنا لما أسمع حروف اسمك أو بتتعلم أو كلام للحلوة أو وعد النوار
طوالى والله العظيم بحس إنه الملائكة قاعد تسترق السمع
تصير الحيطان فضاءات اللا انتهاء تتجمع ألوان الشفق تتوحد في الحدق تهدأ الأمواج في البحار الجنوب وترتمي رويدا في شواطئ الشمال تفتح شرفات الروح وردهات البطين تؤكسج الدم ويملأ اللون البراح ونسافر نعشق الترحال مع السحابات نحو غابات القرنفل والسنديانات نغتسل بالمطر تبلل مكانات اليباب هو هذا وكل ذاك
أيها الجميل المرتضي كأني اسمع دندتة حسك يلون صدر المكان اينما أنت يطيب المقام كن بخير أيها العزيز
Quote: تصير الحيطان فضاءات اللا انتهاء تتجمع ألوان الشفق تتوحد في الحدق تهدأ الأمواج في البحار الجنوب وترتمي رويدا في شواطئ الشمال تفتح شرفات الروح وردهات البطين تؤكسج الدم ويملأ اللون البراح ونسافر نعشق الترحال مع السحابات نحو غابات القرنفل والسنديانات نغتسل بالمطر تبلل مكانات اليباب هو هذا وكل ذاك
عفوا ان تكرر ماعنيت لربما أن المقام كبيرا والمرور زاهي
Post: #62 Title: Re: زول سَمِح .. Author: الزاكى عبد الحميد Date: 02-14-2009, 01:12 PM Parent: #61
Quote: فقال عن الجمال (هو أُلفة بين الحزن والفرح
إن كان جبران قال ذلك حرفاً فود اللمين أنطق تلك الألفة نغماً يزاوج وجدانياً بين الحزن والفرح فتعشقهما معاً لا مكان لأحدهما دون الآخر في جوة الجوة يا مرتضى.. تسلم يا الحبيب
ياخي ما معقول... بالله شوف الناس الحلوه الرائعه الفوق دي .....عشق للنخاع مخلوط بابداع متناهي ........ وانشاء كلكم دايما فوووووووووووق
Post: #64 Title: Re: زول سَمِح .. Author: Ahmed al Qurashi Date: 02-14-2009, 03:22 PM Parent: #62
الأخ العزيز / محمد المرتضى
اذكر وأنا في مدرسة خورطقت الثانوية في بداية الثمانينات كنت لا أحب أغنية بتتعلم من الأيام لاننى كنت من أنصار الفنان احمد المصطفى حيث اكتسبنا حبه من الوالد أطال الله عمره ، وأحب أن استمع إليه من الإذاعة المدرسية اثتاء الفسحة ولكن كان الطلب على أغنية بتتعلم من الأيام وذات الشجون كثيرا من زملائي الطلاب في ذلك الوقت والذين كانوا يعشقون محمد الأمين وكانت هذه الاغانى طويلة تأخذ كل فترة الفسحة مما لا يتيح لنا الاستماع نحن عشاق احمد المصطفى لإحدى أغانيه ... فتشكل حاجز بيني وبعض اغانى محمد الأمين في تلك الفترة عدا بعض الاغانى الخفيفة مثل الموعد وياحاسدين غرامنا والجريدة والتي لا تزاحمنا كثيرا في فترة البث الاذاعى في االفسحة فنجلس نستمع إليها حتى نحظى بعدها بأغنية لأحمد المصطفى أو عثمان الشفيع بينما نذهب لحالنا في حال بث بتتعلم من الأيام أو ذات الشجون ... ولكنى انتبهت لهذه الاغانى الرائعة أخيرا وندمت على كل دقيقة ابتعدت فيها عن الاستماع لهذه الأغنية من ميكرفون إذاعة مدرسة خورطقت الثانوية ....محمد الأمين قامة وركن من أركان الغناء السوداني له بصمة وإضافة واضحة لمسيرة الغناء ... له التحية والانحناءة وشكرا لك صديقي مرتضى
Post: #66 Title: Re: زول سَمِح .. Author: عبد الله الشيخ Date: 02-14-2009, 05:11 PM Parent: #64
لو وشوش صوت الريح بالباب .. يسبقنا الشوق قبل العينين ..
Post: #81 Title: Re: زول سَمِح .. Author: محمد المرتضى حامد Date: 02-16-2009, 11:18 AM Parent: #79
Quote: شفتو ليكم حب فيهو قانون؟؟؟؟!!!
ممكونه، سؤالك مشروع رغم أني سمعت خوجلي عثمان ، رحمه الله ، يغني درِّسني بس قانون هواك بحفظ حروفو حرف حرف ، كان يؤديها مغني أثيوبي قائلا 0َ(ضرِّسني قانون..) يا ممكونه في أغنية الحب والظروف لما قال الغريبه الساعه جنبك تبدو أقصر من دقيقه كان فضل الله محمد يتحدث عن النظرية النسبية وإنحناء الزمن ومسألة الزمان والمكان في الفيزياء النظرية، لكن خارج تلك التعقيدات كانت تلك ملاحظة في كل حالات المحبين على بساطتهم وشفافيتم ، الزمن يجري بسرعة الضوء عند اللقاء، وبسلحفائية تثير الريبة والشك والقلق حين الإنتظار ، أما الدقيقه وإنت مافي فالحاله مُرَّه ومسيخه بدرجه لا توصف ولا تطاق. سبحان الله.
يا راويه، بيني بينك شوق عمر لانام ولا مدو انحسر دي فيها كلمات من مقام التسونامي ، كلمات لاتصدأ كغيرها مما تغنى به محمد الأمين وفيها يُوجِد الزول السمح دا العذر لزولو حتى لما يغلط ( كلام زعل ما بتقصدو) ، طبعا على ذات المنوال نسج زيدان بيانو وقال تغلطوا إنتو يا أحباب نجيكم نحن بالأعذار، وأنت أدرى بأن سدنة الحقيبة ناس أحمد القرشي ممكن يكتبوا أسفارا في مسألة خطأ الحبيب وما يتبعه من ( سماح) فهوالمغفور له ماتقدم من خطأ وما تأخر ودي حاجه معروفه، معروفه بالحيل.
Quote: وندمت على كل دقيقة ابتعدت فيها عن الاستماع لهذه الأغنية
هو ذاتو قال كدا ، تقول يا ريتني لو حبيت زمان من بدري، تعرف يا أحمد كل شئ بأوانه ومحسوب بقدر، وزي ما القدم ليهو رافع القلب ليهو دافع ، وربما أزف الوقت الذي أصبحت فيه أغنية بتتعلم من الأيام تتوهط في قلبك بعد أن إكتملت الإستعدادات في ذلك الخافق لهذا التِوِهِّط تحت عنوان (الغرام عمل إحتلال) ، زول ما بريد جَد ما بيعرف الأغنيه دي ، وانا يا عزيز ما بتكلم عن الكلمات وهي صريحة في مدلولاتها و لكنني أتحدث عن اللحن والأداء المفندر المابيشبه الغنا نديدو ، الطلوع الشاهق الذي يتخطى قوانين الجاذبية ، في كليب الجزء 2-3 من الأغنية لما قال (اقابلك وكلي حنيه وأخاف ، أخاف من نظرتك ليا) متخطيا الأوركسترا حسيت بخطورة الوضع والباقي إنت عارفو. عقبالك
Post: #91 Title: Re: زول سَمِح .. Author: محمد المرتضى حامد Date: 02-17-2009, 08:08 AM Parent: #61
Quote: عفوا ان تكرر ماعنيت لربما أن المقام كبيرا والمرور زاهي
نور الهادي، سلامات يا عزيز، أرجو أن تتكرر (الأخطاء) محبتي.
Post: #83 Title: الأغاني الكبيرة Author: أحمد طراوه Date: 02-16-2009, 03:15 PM Parent: #1
قال لي مرة عبد الله ود السجانة ( مختص فلوت و فلكلور غنائي ، و بعزف مع العمالقة ديل ) : إنو محمد الامين هو مدرسة (الأغنية الكبيرة )
.. أها ، يا ود حامد ببوستك دا واضح إنو المقصود : كبيرة إلا على المتقين .. و المتقين اصلا يا هم (المُحبين) .. مافي محبة بدون تقوى .. مرجعى العدوية رابعة
سلام للجميع .. مودتي يا زاكي ، واصلة وداد و لينا .. لطفكم ذاك ، ما إنفك يحيطنا بسياجه الرفيعة - الجميلة
شفت يا ود حامد ال ون - تو ، بتاع انعام و ممكونة .. شفنا .. شفنا ! بوستاتك عجيبة لا تصلح الإ للخارجين عن القانون كما قالت البت ( الحديقة - اللماحة ) ا
Post: #85 Title: Re: الأغاني الكبيرة Author: عبدالوهاب علي الحاج Date: 02-16-2009, 06:11 PM Parent: #83
تسلم ياغالي وربي يملاك عافية
Post: #87 Title: Re: الأغاني الكبيرة Author: ناهد بشير الطيب Date: 02-16-2009, 08:13 PM Parent: #85
بالله انت لابد بى جاى يامحمد المرتضى ياخى يملاك ربى عافية ياخى ود اللمين ده نغمة لاى حاجة فى حياتى وتسلم والله كتير
والاغنية شىء
عجيييييييييييب
Post: #88 Title: Re: الأغاني الكبيرة Author: saadeldin abdelrahman Date: 02-17-2009, 02:03 AM Parent: #83
شفت كيف حبك حياتنا..وكيف بدون حبك نكون؟
Post: #89 Title: Re: الأغاني الكبيرة Author: Egbal Elmardi Date: 02-17-2009, 04:36 AM Parent: #88
مرتضى إزيك والمدام وكيف ناس مسقط
مرتضى عليك الله ما تنسى لى حروف إسمك جمال الفال وراحة البال وهجعة زول بعد ترحال
زفاف عاشقين بعد فرقه وسط باقات دعا الطيبين
لحدى ما يقول أقيف وسط البلد وأهتف
برييييدك يا صباح عمرى أنا بريدك ويكون نفسك إنقطع...وتلقى نفسك فى بحور نمارقها لجه أو كما لجه يتدافع بلورها فى إنتشاء
Post: #90 Title: Re: الأغاني الكبيرة Author: مي أبوقصيصه Date: 02-17-2009, 06:04 AM Parent: #88
أو تدري يا صديقي أن من أنبتته أرض الجزيرة الخضراء وارتوت جذوره من مياه سليل الفراديس العذبة ، ورضع من إلفة ومحبة أهل ود مدني الطيبين لا بد أن يكون سمحا ، مرهفا، مبدعا وكثير البكاء أيضا. أما رأيت ود الأمين وهو يسكب روحه في رائعة خليل فرح "ود مدني":
ماله أعياه النضال بدني
روحي ليه مشتهية ود مدني
ليت حظي سمح وأسعدني
طوفه في يوم بي ربوع مدني
كنت أزوره ابويا ود مدني
واشكي ليه الحضري والمدني
جملك الله بثوب العافية
ممنونين على الاتصال والسؤال
Post: #92 Title: Re: الأغاني الكبيرة Author: محمد المرتضى حامد Date: 02-17-2009, 10:42 AM Parent: #90
Quote: لو وشوش صوت الريح بالباب .. يسبقنا الشوق قبل العينين
برضو الحلنقي يا عبدالله .. يا سيدي لما تكون منتظر زولك ، أي حركه في الباب قلبك يغادر الضلوع مصطدما بالباب عائدا إليك إما جزلا أو كسيرا وفي كل الأحوال تكون المسافة بين الباب والعين هي المسافة التي يستحيل قياسها وعليها تعلق أشياء كثيرة وهنا مصطفى سند الخرافي قال : قلبي تعلق بالرتاج أتدُقُ؟ لحظة قربها حانت شراييني ارتوت قلقا وكدت من الهياج أهوي أمزق زركشات ستائري الجذلى وأعصف بالسراج.
Post: #96 Title: Re: الأغاني الكبيرة Author: الطيب شيقوق Date: 02-17-2009, 10:59 PM Parent: #92
الزول السمح ما بساهر لهسع بيكون الان ....يهتف ( عطفا ما تحسبها مظاهرات . الكي بورد بتاعي ما بيظهر علامة الشدة على التاء)
Post: #97 Title: Re: الأغاني الكبيرة Author: saadeldin abdelrahman Date: 02-18-2009, 00:46 AM Parent: #96
لو ربنا لطف و قدر ليكم/ن السلامة من الغام "حتتعلم" المضادة للمدرعات و الكائنات المرهفة، فلن تنجو من كثافة النيران الجوية ل"وين حنهرب منو وين" يعني مش كان طرتوا/ن سادتي/سيداتي الكرام ، في كل الحالات ضايعين/ات، نسأل الله السلامة!
Post: #98 Title: Re: الأغاني الكبيرة Author: salma subhi Date: 02-18-2009, 05:23 AM Parent: #92
استاذ محمد المرتضى تحيّة طيبة وعساك بألف خير
هذا البوست به كمّ من المشاعر والكلمات والمعاني الجميلة التي لا تخفى الا على (غير الناطقين بها). يا استاذ محمد... (الريد) ده لكل شخص تعريفه الخاص بيه ولازم يعيشوا حتى يقول ليك هو كده ! يعني ممكن يفسّرو زول على انه حاجة كده تكون ذي (المعلّق بين السماء والأرض ) وفي البيقول ليك هو (الشعور البتغسل معاه كل الأوجاع ) وغيرو يقول هو (الوجع زاتو) لكن الوجع المن النوع اللذيذ! غايتوا بيتهيألي هو حاجة كده عجزت البشرية عن تفسيرها لحد الليلة... ولما غنّى ود الأمين (بكرة الريد بدون مواعيد يزورك ) هسي البرق في السماء بنعرف متين بيجي! مش بيجي فجأة والاّ تتلاقي سحابتين واحدة بتحمل الشحنة الكهربائية السالبة والتانية الشحنة الموجبة لكن هنا طبعاً ( بي حنيّة) وبالتالي تتوّلد شرارة قوية تكون انطلاقة وبداية لما يسمّى ب(الريد)....بعد كده بيجي بعد ضوء الريد ده صوت عالي ( الرعد) والإثنين مع بعض بنسميهم (الصاعقة)....ولو وصل الإنسان الى مرحلة الصاعقة فليرحمه المولى...ياربي ! لمّا ود الأمين قال (وليه الناس بتتألم ) يكون من الصعقة دي! يبقى القصّة (معنى ومعاناة ) لكن بالرغم من ذلك فالألم فيه لذّه! الريد ما كلمة حلوة وبس ..فيه التضحية والإحترام والغفران وفيه لازم الزول يعرف يفرّق انو في خط رفيع بين الحب والتملّك وحاجات كتيرة ..وكل مرة الناس حتتعلم من الأيام وتعرف كيف يكون الريد! ولو قلنا نشوف الحتّة الغنّاها ود الأمين دي كمان عن العذاب والمعاناة في أغنية (عويناتك).... عذابي معاك بريدك قبل ما اعرفك ولو بقدر اشيل من الزمن وقتي بموت في لحظه واوهب ليك عقاب عمري أها شوف صاحبنا ده عذابو انو بريدها قبل ما يعرفا!.. وفي نفس الوقت هذا ليس بأفضل حالاً من (أقابلك وكلي حنيّة وأخاف من نظرتك ليّ)...مرحلة خطرة! أها طيب الحل شنو؟؟؟ والصعوبة وين!! لما غنّى (ورا البسمات كتمت دموع وبكيت من غير تحس بيّ!) دي على وزن..... أبكي وأضحك والحالات واحدة.....أطوي عليها فؤاداً شفّه الألم فإن رأيت دموعي وهي ضاحكة... فالدمع من زحمة الآلام يبتسم
هنا بقى حأقيف شوية!(الدموع ) دي نعمة كبيرة للإنسان وأيّاً كانت أسبابها برضو بتغسل كل الألم المهم انو الطرف التاني يكون عرف الحاصل شنو هنا بقى تتجلّى المعاني الجميلة وفي كلمات بسيطة مثلاً زي السماح بتكون غسلت كل الأوجاع وساعات التفكير الغير مجدي وهنا الدموع أبداً ما ضعف ولا هزيمة بل بالعكس تتحول إلى قيم راقية و سامية وهي ( الانتصار )و( الإحترام).
طوّلنا عليك لكن هذه الأغنية بحق مدرسة وفلسفة من الحياة وأخيراً... لكل حديث عندهن بشاشة ... وكل قتيل بينهن شهيد
كل التقدير لك ولكل زوّارك
Post: #99 Title: Re: الأغاني الكبيرة Author: saadeldin abdelrahman Date: 02-18-2009, 06:54 AM Parent: #98
الواحد لما تكون دمعته قريبة و يعمل حريف و مناور بتحليق منخفض، تلم فيه المضادات الارضية "تشهد الأيام و يشهد الليل و النحيب..عمري كلو عشتو وحدي..وحدي كالغريب" تنشف ريقه و تلحقوا الفاتوا بالشحتفة و النخجي حتى يغفر له ما تقدم من حياة خالية.
Post: #100 Title: Re: الأغاني الكبيرة Author: مي أبوقصيصه Date: 02-18-2009, 09:57 AM Parent: #99
(*)
أو كمثل ما قال أخونا كمال على الزين
Post: #101 Title: Re: الأغاني الكبيرة Author: محمد المرتضى حامد Date: 02-19-2009, 06:55 AM Parent: #83
Quote: بوستاتك عجيبة لا تصلح الإ للخارجين عن القانون كما قالت البت ( الحديقة - اللماحة )
والله يا طراوه ضحكت للتعبير الذي أعادني إلى أيام الخروج عن القانون – نسبيا - حين كان الخروج على القانون بُهارا للحياة الخضراء . كلامك حول الريده والتقوى عجيب وعميق وفي العدوية رابعة لك مرجع ، تلك الصلة تذكرني بما نسب للشيخ العارف بالله قريب الله عندما سمع أحد ( صِيَّع) ذلك الزمان منتشيا من أثر السلاف يغني : ياليل ابقالي شاهد ، فطلبه ودار الحوار المعروف. في الأيام الخضراء كان صاحبك عادل التجاني ، زمن الطلب بالإعدادية يتأمل وعد النار و (يثمِّن) البيت القائل : لو وشوش صوت الريح في الباب يسبقنا الشوق قبل العين. كنت وقتها وأنا أستمع لعبارة (بُكرا الريد) أفسرها حسب الموقف ياترى هل هي وعد أم وعيد. أيام يا أحمد الطبيب الأديب، ربنا يسترك بين الساحلين.
Post: #102 Title: Re: الأغاني الكبيرة Author: saadeldin abdelrahman Date: 02-19-2009, 01:52 PM Parent: #101
آااااااه!
Post: #103 Title: Re: الأغاني الكبيرة Author: محمد المرتضى حامد Date: 02-19-2009, 03:55 PM Parent: #102
عبدالوهاب علي الحاج ، وحياة ابتسامتك ، يا عزيزي ، شرفتنا وشرفت حتى البوستات المجاوره على قول البلابل : نوَّر بيتنا وشارع بيتنا يوم ما جيتنا يا الطلّيت... شايف كيف دنيا الريد عجيبه ؟ بالله انتقالك - في فك التسجيلات الأخيرة - من ناس السياسة لناس الغنا مش خطوه تاريخية وموفقه؟ هسه لو قالوا ليك تقضي ساعه مع أوكامبو ولا مع الكحلاوي حا تختار منو؟؟؟ وطيِّب. هناك ممكن تكون مناضل حتى الساعه 12 ليلا بتوقيت غرينتش وبعد انتهاء المفاوضات ودخول القصر الساعه واحده تبقى خاين واحتمال ظلامي ويمكن أمنجي ، شوفت كيف. ياخ قلنا ليك خليك هنا وبلاش تفارق.
Post: #104 Title: Re: الأغاني الكبيرة Author: محمد المرتضى حامد Date: 02-20-2009, 06:47 AM Parent: #103
Quote: بالله انت لابد بى جاى يامحمد المرتضى
أقبِّل وين يا ناهد؟ يعني لما الغَارات تتوالى على مدينة أين يذهب المساكين؟ الملاجئ بس يابت بشير ،
Quote: ياخى ود اللمين ده نغمة لاى حاجة فى حياتى
بالطبع يا ناهد ، أداء الزول ده من أكثر الأجهزة فاعلية لدوزنة اليوم وإزالة البشتنة وترتيب الفوضى ، كثير من أهل المحبة ذوي الحظوة يوصون بالمداومة على تراتيل من هذا النوع عند اللزوم. والله يا ناهد من أنجع مضادات الياس قوله ( من بعد فرقتنا ديك مين كان بيفتكرك تعود .. مين كان) ، شوفي مافي شئ بعيد على الله
Quote: والاغنية شىء
عجيييييييييييب
دي ما أغنية يا ناهد ، دي وزارة للجمال.
Post: #105 Title: Re: الأغاني الكبيرة Author: saadeldin abdelrahman Date: 02-20-2009, 07:29 AM Parent: #104
مافي عيشة بلاك بتبقى ..مافي نشوة و مافي ريد، بس سلمى دي منو؟
Post: #106 Title: Re: الأغاني الكبيرة Author: محمد المرتضى حامد Date: 02-20-2009, 12:30 PM Parent: #105
Quote: لحدى ما يقول أقيف وسط البلد وأهتف
برييييدك يا صباح عمرى أنا بريدك
دي من باب تبني الشفافية والتحدث بالنعمــة ، الذين يؤمنون بجوهر الحب يهمــهم نـشر تلك الحالة العطريه وإشاعتها بين العباد، الزول البريد مشيتو ذاتا مختلفة يا إقبال، حتى إن كان جسديا في الخلف لكنه في الواقع يتقدم الصفوف (مرفوع الهامة يمشي) يغمره الفخار بما على صدره من أوسمه ونياشين تزين قلبه. شوفي زي عابر الطريق الفات ونام في العيون ارتاح ولما وصل وسط البلد وقف في ميدان عام وهتف برييييدك يا صباح عـــمري دا بيستهدف نشر الفضيله والخضرة ورش الرذاذ المنعش في هجير البشر ، يعني بيقوم بعملـــية صندلة للجو سرعان ما تنعكس على النفوس ، دا زول عارف إنو بيعمل في شي كويس وبيسوي في شنو، كل واحد من الكتبوا الكلام دا درره براها، لكن في رأيي الزول السمح هو البيقدر يلملم الحاجات دي من سيادا ويبث فيها الروح بموسيقاه ويمنحها القدرة على النفاذ إلى الأفئدة، ويسعد بيها حياة الناس. ربنا يجعلا ليهم في ميزان حسناتم
Post: #111 Title: Re: الأغاني الكبيرة Author: محمد المرتضى حامد Date: 02-21-2009, 02:32 PM Parent: #105
Quote: بس سلمى دي منو؟
يا سعد، سلمى دي الجاب سيرتا كوجان بتاع المشاكل دا في مداخلتو في الصفحه السابقة.
Quote: يجعلني أتذكر واجبا قدإختبافي حنايا النسيان.. وصبيه صغيره إسمها سلمي الان هي ام لفريق صغير من الاطفال
قَوَّمتَ نَفَسي ياخ.
Post: #107 Title: Re: الأغاني الكبيرة Author: محمد المرتضى حامد Date: 02-20-2009, 10:02 PM Parent: #102
لو
Quote: آااااااه!
تفيد مجروح.
_________
سعد ، طَمِّنا عليك ياخ.
Post: #108 Title: Re: الأغاني الكبيرة Author: saadeldin abdelrahman Date: 02-20-2009, 10:18 PM Parent: #107
كانت اذنا فؤادي تلتقط يا انة المجروح.. الحبو فيك يا جميل معنى الجمال مشروح، و انا استمع لاثر ال After shock على الباش. يا مرتضى الباش اشبع كل نص جميل لحنا فأنجب اقمارا و كواكب و افلاك و اجسام لم تعرف بعد.
Post: #109 Title: Re: الأغاني الكبيرة Author: salma subhi Date: 02-21-2009, 06:02 AM Parent: #107
استاذ محمد المرتضى اسمح لي أن أكمل حديثي وأدخل من مداخل أخرى ولكن في نفس سياق الموضوع....
الكثير من الناس يصب جُلّ غضبه على الريد وسنينه إن (لم يوفّق أو تعثّر) وقد يسمع من هذا أو ذاك فيصيبه عمى البصر والبصيرة وتصبح العقول ذواهل، في حين انه لو جلس فقط يوماً أمام البحر وتأمّل لعرف لما البحر أحياناً حنون وفي مرات أُخر مجنون ولما الموج يعلو فوقه موج فيسيرجع أكثر تفهما وإحتراماً للكثير...ولو رجعنا الى الشعرالعربي الى عهد (عنترة بن شداد) و(امرؤ القيس) وغيرهم هل قرأنا عن أكثرهم يوماً بانه لعنه مع ان الحظ لم يكن حليفهم بل بالعكس كتبوا في ذلك معلّقات من أروع الأبيات وما زالت باقية حتى اليوم وتدّرس في مادة الأدب العربي..فهم يذكرون صاحبه رحمهم الله بكل جميل وأدب واحترام رغم الصبـابـة والفـكـر وعنترة بن شدّاد قال... ولقد ذكرتك والرماح نواهل.....مني وبيض الهند تقطر من دمي فلننظر فقط الى الموقع الذي ذكره فيها ( والرماح نواهل مني وبيض الهند تقطر من دمي). وهاهو أبو العلاء المعرّي... ولقد ذكرتك يا أمامة بعد ما نزل الدليل إلى التراب يسوفه والعيس تعلن بالحنين إليكمُ ولغامها كالبرس طار نديفه وهواك عندي كالغناء لأنه حسنٌ لديّ ثقيله وخفيفه يعني بشكل عام ...قفا نبكي بذكر حبيب ومنزل مش يقول ليك لعنة الله على كذا وكذا...فسبحان الله!!
*وقفة أخرى *!! ومواصلة لحديثي العام عن هذا الموضوع ...ليه بعض الناس ممكن تمشي لي بعيييييييد!! فهذا الحديث أيضاً لو الناس فكرت فيه من زوايا تانية وبتفكير إيجابى آخر حتجد جوانب أكثر نُبلاً وطُهراً وإشراقاً....فالأمر لا يقتصر على عنوان واحد وورؤيا وحيدة بل يصّب في قالب آخر جميل الا وهو ( حب الرجل لزوجته )...ويقول الله عزّ وجل في كتابه الكريم..{وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجاً لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لَآيَاتٍ لِّقَوْمٍ يَتَفَكَّرُونَ} اية 21 سورة الروم ...(لقوم يتفكرون) فيها دعوة للتدبّر والتفكّر لجميل الدلالات والمعاني...وأيضاً لنا في رسول الله ( صلى الله عليه وسلّم) قدوة وأسوة حسنة....وبعدين معروف الزول التفكيرو بيمشي لي بعيد بيدخل في كذا خانة منها..( من راقب الناس مات همّاً)...وقال الشاعر من راقب الناس لم يظفر بحاجته....وفاز بالطيبات الفاتك اللهج وكذلك (إن بعد الظنّ إثم) فيسهو عن الحقيقة وما هلكت الدول ولا الممالك ولا هتكت الأعراض بغير النمائم والكذب وسوء الظنّ والله تعالى في كتابه الكريم يقول (وَيْلٌ لِكُلِّ هُمَزَةٍ لُمَزَةٍ) آية (1) سورة الهمزة. وعن القالب الجميل الذي ذكرت ساتوقف مع بعض أبيات لقصيدة ( بلقيس ) للشاعر نزار قبّاني وهي من أروع ما قال في زوجته بلقيسُ .. يا كَنْزَاً خُرَافيّاً .. ويا رُمْحَاً عِرَاقيّاً .. وغابَةَ خَيْزُرَانْ .. يا مَنْ تحدَّيتِ النجُومَ ترفُّعاً .. مِنْ أينَ جئتِ بكلِّ هذا العُنْفُوانْ ؟ بلقيسُ .. أيتها الصديقةُ .. والرفيقةُ .. والرقيقةُ مثلَ زَهْرةِ أُقْحُوَانْ .. بلقيسُ .. يا عِطْرَاً بذاكرتي .. ويا قبراً يسافرُ في الغمام .. بلقيس.. ليستْ هذهِ مرثيَّةً لكنْ .. على العَرَبِ السلامْ
وأخيراً.... ما عالج الناس مثل الحب من سقـــم و لا بـرى مـثـلـه عـظـمــا ًو لا جــســداً
تحّياتي
Post: #110 Title: Re: الأغاني الكبيرة Author: محمد المرتضى حامد Date: 02-21-2009, 08:26 AM Parent: #109
Quote: أو تدري يا صديقي أن من أنبتته أرض الجزيرة الخضراء وارتوت جذوره من مياه سليل الفراديس العذبة ، ورضع من إلفة ومحبة أهل ود مدني الطيبين لا بد أن يكون سمحا ، مرهفا، مبدعا وكثير البكاء أيضا
يا سلام على ودمدني وناس مدني وابوي الحضري والمدني ، زمان لما كنا سغار يا مي كنت فاكر إنها كلمة ضد عسكري ، بحق وحقيق أهلها يتدفقون إبداعا ولا يجوز لي التحدث عنهم أو إيراد مجرد نماذج لأني سأكون من الظالمين إن لم أعدد كل رموزها وحتى شوارعها رغم أن تجاوز الكاشف في هذا المنحنى يستوجب سجود السهو إن لم يعتبر جنحة وإساءة للأدب ، الشعراء الأصائل الذين كتبوا روائع ترتج لها الأضلع قبل المسامع وبعضهم لايقرأ ولا يكتب حرفا ، شوفي بالله ناس ما فَكَّت الحرف تتمتع بهذا القدر العالي من المعرفة والثقافة والفلسفة وناس نالت أعلى الدرجات العلمية و (تتمرغ) في الأمية ، الله قادر يا مي. لا أدري لماذا ينتابني إحساس بأن ثمة علاقة خفية وحبل سري بين ودمدني والمسالمة فهما رفدتا الشعب السوداني المجيد بعباقرة ، كنت عايز أقول (كوكبة ) لكن خلّيتا لأنو الكلمة دي مسّخا واحد من قضاة طوارئ جعفر نميري ، عباقرة يعني عباقرة جد جد على رأسهم البنات السمحات والشعراء والفنانين وبتاعين الكوره وإداريين وتكنوقراط ( كيف تكنوقراط دي؟) وناس قطن ظل يغيث مليون ميل موجَّع سنين عددا، يا سلام على بانت وودازرق والحي اللاتيني السوداني ، وظهرت لي محبه في مدني شارع القبه ، الناس البكايين ديل ، زي ما قُلتي ، لازم تظهر من مَنقَدُم شراره تحرقنا بي نارا ، ناس أبواللمين الشايلين الجمر السمح ديل ، ولولا أن ودمدني هي ودمدني لما ابتدرتِ الحديث عنها قبل الخرطوم وبربر أبوقصيصه كأنك ترددين مع أرسلان:
وأبيتُ أُشرك فيك في دين الهوى ...... وأكون للتوحيــــــــــــد أول مدّعِ وتظلُ تشرُد بي لغيرك صبـــــوة ....... هي من سجــونك في المحـــل الأمنــعِ
تسلمي
Post: #112 Title: Re: الأغاني الكبيرة Author: saadeldin abdelrahman Date: 02-21-2009, 03:49 PM Parent: #110
لا زلت اذكرهن، حين عاد الباشكاتب في 94 و تلقفه الجمهور باحتفاء في نادي الضباط فاكتظ لآخره بل كان الزحام بامتداد الشارع. كان نصيبنا أن نتقرفص ارضا قبالة المسرح الذي شع سحرا و لحنا و كان الفلوت و طائر الاحلام و حلم الاماسي ثم: قلنا ما مكن .. و لما تدفق: اقل حاجة تخلي سفرك حتى لو اسبوع اقلو ، التفت الى العتبة خلفي ،لارى البنات دفن وجوهن في الطرح و كانت اخاديد الدموع المشربة بالكحل، حي ووب!
Post: #113 Title: Re: الأغاني الكبيرة Author: مي أبوقصيصه Date: 02-21-2009, 05:19 PM Parent: #112
أشكرك أيها الأستاذ الصديق الأديب على هذي الكلمات الرقيقات في حق مدينة ود مدني.
و سلِم القرطاس والقلم الذي مجَّد قبة أبونا الشيخ ودمدني السني .
الآن فقط أدركت أن ذاك الصمت الطويل ، الذي أعقب مداخلتي، لم يكن عبثا بل كان "فوق راي".
مدني المحفورة في ذاكرتي هي العراقة والأصالةهي نادي الخريجين ونادي الجزيرة والنشيشيبة والمدبغة ومدارس مدني الثانوية بنين وبنات وجامعة الجزيرة وسينما "الخواجة" والحي السوداني وجزيرة الفيل والحديقة الطبيعية "أم بارونا" وحديقة البلدية وصيدلية آل بحيري ومشروع الجزيرة ومركز الأبحاث الزراعية ، جلها معالم خضراء تنبعث منها رائحة الطين المرتوي بماء النيل الأزرق.
ليت شعري، مدني في ذاكرتي هي الأطباء الإستشاريين والأختصاصيين بمستشفى ود مدني : د/ حسن حسين النعيم،د/ صلاح عبد الرحمن على طه ، ود/ صلاح طه، ود/ هادي الزين النحاس ود/عوض محمد أحمد المشهور بعوض القون وآخرهم العالم الأديب الذي واراه الثرى في الأسبوع الماضي د/ بشرى عمر أحمد أخصائي الأمراض الجلدية(رحمهم الله جميعا) ود/ عباس رمزي ، د/ حافظ الشاذلي ، د/ عثمان الناير ود/ محمد عجلاوي ، والجراح د/ ميرغني سنهوري(أطال الله عمرهم وأبقاهم).
نحن والله نظل مفتونين بكل شبر في ربوع هذا المليون ميل موجع ومسكونين بحبه وحب من يحبه.
ولك صادق الإعزاز
Post: #114 Title: Re: الأغاني الكبيرة Author: saadeldin abdelrahman Date: 02-22-2009, 05:33 AM Parent: #113
يا أخوانا عمدة دا غيابو مريب!
Post: #115 Title: Re: الأغاني الكبيرة Author: محمد المرتضى حامد Date: 02-22-2009, 07:05 AM Parent: #114
Quote: يا أخوانا عمدة دا غيابو مريب!
نستأذن أختنا سلمى صبحي لرفع هذا البوست متسائلين عن غياب عماد محمد عبدالله (عمده) وطارق أبوعبيده (خدر).
Post: #116 Title: Re: الأغاني الكبيرة Author: محمد المرتضى حامد Date: 02-22-2009, 11:21 AM Parent: #115
Quote: هذا البوست به كمّ من المشاعر والكلمات والمعاني الجميلة التي لا تخفى الا على (غير الناطقين بها).
عجبني التعبير يا سلمى، حِتَة ( غير الناطقين بها )، شوفي الزول دا عمل عزف منفرد على العود في حفل خمسينية وردي ، برضو وردي بكى ، بداها ليهو ب (بشوف في شخصك أحلامي) وعرّج على ( لو بهمسه) ، أذكر أنه في ذات الحفل تغنى أبواللمين ووردي ب (لو بهمسة) والإتنين اشتغلو دويتو وغرّزوا في منطقة خوفي منك خوفي تنساني و تنساها الليالي فسكر السمار والخمار والجدران وستائر المسرح ، ياخ تلفزيوني لي هسه حردان ، وأعتقد إنك عارفه إنو تلك الجزئية من الأغنية ، جزئية خوفي منك ، منعت بقرار من الوكالة الدولية للطاقة الذرية باعتبار أن الإشعاع الصادر منها يزيد على 360 ملي ريم في الثانيه مش في السنه، عنوان القرار كان رفقا يا حبيبي. يا سلمى الكلام في الريده وعنها صعب ، تعايني السلك العريان تفتكريهو فاضي تلحقي تمسكيهو ... كل من عليها فان.
Post: #117 Title: Re: الأغاني الكبيرة Author: محمد المرتضى حامد Date: 02-23-2009, 07:27 PM Parent: #116
Post: #118 Title: Re: الأغاني الكبيرة Author: saadeldin abdelrahman Date: 02-26-2009, 07:02 AM Parent: #114
*
Post: #119 Title: Re: الأغاني الكبيرة Author: saadeldin abdelrahman Date: 02-26-2009, 01:08 PM Parent: #118
Quote: ياخ تلفزيوني لي هسه حردان ، وأعتقد إنك عارفه إنو تلك الجزئية من الأغنية ، جزئية خوفي منك ، منعت بقرار من الوكالة الدولية للطاقة الذرية باعتبار أن الإشعاع الصادر منها يزيد على 360 ملي ريم في الثانيه مش في السنه، عنوان القرار كان رفقا يا حبيبي. يا سلمى الكلام في الريده وعنها صعب ، تعايني السلك العريان تفتكريهو فاضي تلحقي تمسكيهو ... كل من عليها فان.
يضحك نهارك يا مرتضى أوكما قال ابن خالد
يا اخوانا! مافي طريقة تجازفوا لينا "بتتعلم" دي.. بصورة نقدر نخليها في الموبايل? فيديو..اوديو اي حاجة ان شاء الله بس المقطع الموجود بصدر البوست اخوكم مغرووووووض و كلنا حيجي يوم و ننغرض الغرضة المنيلة دي
و بكرا الريـــد وأنا ما مذاكر ابـكي ليكم يعني? حالة سعبة!
Post: #120 Title: Re: الأغاني الكبيرة Author: محمد المرتضى حامد Date: 02-26-2009, 04:35 PM Parent: #119
Quote: و بكرا الريـــد وأنا ما مذاكر
ياخي بُعد الشر عليك، والله يا سعد في امتحان الحب نتمنى ليك بُكرا تنجح وبعد بُكرا تعيد.
Post: #121 Title: Re: الأغاني الكبيرة Author: saadeldin abdelrahman Date: 02-27-2009, 01:39 AM Parent: #120
يا مرتضى عليك الله تحليق الباشكاتب العمودي دا ما يخوف? تعرف مرات -جبانة كدا- بقول دكين ده معاه حق و عاطفيته اقتصادية جدا مالو و مال النشيج و العذاب ده!.. "من طرف" دا خيار الخواف ربا عيالو/ضاير قليبو الاسلم.. ارجع لي: تقول يا ريتني لو حبيت زمان من بدري!! يعني الباشكاتب دا يقص ليك بالدو زاتو..والله الا تبقى حاوي! اغرب حاجة يا مولانا انه في دخلتي الاولى لبوستينا العملته ساساقة دا جيت واقع اعشى و بدون ما اشاهد أو اسمع اليوتيوب المرفق ..و المـقـطع الوحيد الخطر لي هو بكرا الريد..لاجده هو فيما بعد! "انا لله" أو كما صاح عمدة.
Post: #122 Title: Re: الأغاني الكبيرة Author: محمد المرتضى حامد Date: 02-27-2009, 01:52 PM Parent: #121
Quote: "من طرف" دا خيار الخواف ربا عيالو/ضاير قليبو الاسلم..
خذها مني، يا سعد ، المثل البيقول الخواف ربا عيالو ده مثل اتضح عدم صحته من حيث الشكل والمضمون والرواية، إطلب الموت توهب لك الحياة ، هكذا يقولون ، لكن كمان ما لدرجة التهور يا سعد. أما الجزئية الخاصة بمبدأ التقية فهي لاتجدي في حالات التسونامي ، يومها لاعاصم من الماء يا سعد، صدقني ، حين ياتي الطوفان ، وظني أنه أتاك ، لامركب ترسيك على (جُودِي) بس تسال الله حسن الخاتمة.
Post: #123 Title: Re: الأغاني الكبيرة Author: محمد المرتضى حامد Date: 02-27-2009, 10:44 PM Parent: #122
الهيئة العامة للسماحه في الزمن السمح ويتوسط الصورة - كخير الأمور - السيد الرئيس التنفيذي
Post: #124 Title: Re: الأغاني الكبيرة Author: محمد المرتضى حامد Date: 02-28-2009, 08:26 PM Parent: #123
ويا سعد ، زي ما قال الكاشف في (غصبا عنك يلفت نظرك) ، مهما تحاول تاخد حذرك تصبح عاشق غصبا عنك ، قلت لك لاعاصم يومها من الماء.
Post: #125 Title: Re: الأغاني الكبيرة Author: الرشيد شلال Date: 02-28-2009, 10:23 PM Parent: #124
سلام الشيخ سيدى ود مرتضى ، هى اول مداخلة فى هذا البوست من المرهف هشام حفتى تنقل عبرها بجمال بقدر شفافية هشام وباسلوب ممتع حيث افاض وقال :-
قبل أربعة وخمسة سنين كان لي حبيب من شوفتو طولنا إعتبرته عابر طريق عاش الحب والظروف لأنه عاين من الشباك حتى زادت الشجون لديه من كثرة قراءة الجريدة سألته هل ممكن أشوفك بكرة في الموعد أجابني يا أسمر جميل لازم تتعلم من الأيام حتى لا يقولوا متألم شوية. يا حاسدين غرامنا . دي أول مرة أعمل مداخلة في المنبر العام عن طريق أحد الأخوان والمرة دي شعرت بأنه يجب أن أدلو بدلوي لأنو الزول ده سمح ولزيز وممتع ومؤلم وحلو و..و..و.. بإختصار الزول ده دافي ممطر ليلاً وصباحاً وحار وجاف برضو ليلاً وصباحاً في أغاني الواحد بيسمعها سنين وسنين ولا يمل ولا يسأم في أغاني الواحد يسمعها ويعيد سماعها مرة ومرتين وتنتهي ويعيد سماعها للمرة المليون لحدي ما الشريط يبوظ ويلحق الديناصور في أغاني الواحد يسمعها ويتمنى أن لا تنتهي في أغاني الواحد يسمعها لحدي ما شعر جلدو يقوم زي أبوالقنفد لا تعرف نفسك بردان ولا حران ولا جعان ولا عطشان ولا زهجان ولا فرحان. في أغنية عم عبد الرحيم مثلاً للراحل المقيم مصطفى بكيت بي سبب إحساسي بي ألم عم عبد الرحيم أما في هذه الأغنية فرشت عديل كده. الألم مختلف في الإثنين من حيث الكم والحجم واللون والرائحة حتى الدمعة مختلفة ومن تذوق طعم الدمعة يعرف تماماً أن طعمها مر زي موية الملح وفي الحالتين موية الملح دي كان طعمها مختلف. كان عندنا دكان في بيتنا مرة طلعت أشتري حاجة لقيت أغنية لودالأمين شغالة في الرادي بتاع صاحب الدكان وكان ودالأمين يقول (بريدك قبل ما أعرفك) جات واحدة جنوبية عاوزة تشتري وسمعت المقطع ده قامت طوالي قالت (والله ودالأمين ده كداب كدب .. كيف يأني بريدك قبل ما أأرفك .. وووه .. ما مأكولة أسلو) يعني الجنوبية دي لو كانت سمعت الأغنية دي كان قالت شنو ؟ يمكن كانت مشت حفظت جدول الضرب عشان تتعلم من الأيام وتعرف إنو الريد فيهو ضرب وقسمة وقتل كمان. ويا ريت بعد ده كلو إحنا زاتو نتعلم ... وما أعتقد إنو حنتعلم لأنو العلم القاصدو ود الأمين ده صعب علينا كلنا لا دبلوم يحلك ولا ماستر ينجدك. كان حبيت تتألم وكان إنجرحت تتألم وكان عرست تتألم وكان طلقت تتألم كان قعدت ساكت تتألم كان سمعت ودالأمين تتألم يعني نعمل شنو؟ وزي ما قال الحاج مزكر لي صاحبو منوفلي (كان حبيت تنجرح وكان زرعت أردب تجيب نص أردب وطوالي رافعين شعار تحب إنت ويخش غيرك ودايماً حقوقنا العاطفية مهضومة). الغريبة إنو ودالأمين بيقول (مصيرك بكرة تتعلم) ولمن بكرة يجي تسمعو تاني يقول ليك (مصيرك بكرة تتعلم) طيب بكرة ما جا وبعد بكرة زاتو جا وبما إنو الأغنية عمرها 31 سنة يعني مرت 11315 بكرة والحال ياهو نفس الحال .. جنس بلادة. حتى ودالأمين زاتو .. هل هو إتعلم .. ما أظن إنو إتعلم لأنو لو كان إتعلم ما كان بكى براهو عملا في نفسو وفينا الله يديهو الصحة والعافية ويطول عمرو وعمركم قولوا آمين هشام عبد الغفار علي الصغير
لك التحية ايها العزيز هشام ومتعك الله بالصحة والعافية – سيدى ود مرتضى لى عودة خاصة فى مداخلة اخرى . كل الود والاحترام
Post: #126 Title: Re: الأغاني الكبيرة Author: saadeldin abdelrahman Date: 02-28-2009, 11:52 PM Parent: #125
يا هشام ذكرتنا الحلاق المعلق على مرايته: بكرا الحلاقة مجان!
.. يا مولانا لا ملاذ من الماء و لا عاصم الا البنا حين غنى: قوللو يا المكحول طبيعي غير ثماد، يا الفريعك شال ثماره وخصره ماد، يا المحجب في الغرف ذات العماد، لو سهم عينيك صدف راسي الجماد.. غير شك دك الحجارة و همدا!
Post: #129 Title: Re: الأغاني الكبيرة Author: محمد المرتضى حامد Date: 03-01-2009, 12:47 PM Parent: #125
الأغنية يا الرشيد وحفتي ليها 41 سنه وليس 31 ولكني أعلم أنها كانت مكتوبة قبل مليار عام ونيف ، إذا عملنا تنويم مغنطيسي استرجاعي للحلنقي ومحمد الأمين (ريقريشن هيبنوزس) ستجدا أنهما مرا بتلك الأغنية في حيواتهما السابقة على اثينا كأقرب محطة زمنيا. بُكرا الريد دي لاتحسب بالتقويم الجريجوري وحساب أهل الأرض البسيط دا ، القصة أكبر من كدا وما تدخلونا في مشاكل بتصنيفنا ضمن الصابئين والعياذ بالله.
Post: #131 Title: Re: الأغاني الكبيرة Author: saadeldin abdelrahman Date: 03-01-2009, 04:58 PM Parent: #129
ان نجوت في تلك يا مولانا ، يحلك الله في : بريدك قبل ما اعرفك!
Post: #134 Title: Re: الأغاني الكبيرة Author: محمد المرتضى حامد Date: 03-02-2009, 10:00 AM Parent: #131
Quote: ان نجوت في تلك يا مولانا ، يحلك الله في : بريدك قبل ما اعرفك!
الحِته دي يا سعد كتبت عنها سابقا في بوست الأخ دكين ( النداء الأخير) وقلت أن الأصل فينا أننا في حالة عشق مستدام غض النظر عن توفر المريود ذاتو. ليس بالضرورة أن يكون هنالك شخص في الأرض تحبه لتعيش الحب يا سعد.. كلامي كان ما وقع ليك ناغمني بالطاقه أو النفاج، الناس الشهادتم عربيه يمتنعون.
Post: #127 Title: Re: الأغاني الكبيرة Author: محمد المرتضى حامد Date: 03-01-2009, 08:05 AM Parent: #119
Quote: مافي طريقة تجازفوا لينا "بتتعلم" دي..
يا سعد الأغنية دي الإستماع إليها بحد ذاته مجازفة. لفترة طويلة كنت أتعجب لإستعمال بعضهم كلمة مجازفة لكن مؤخرا ( رسّوها) لي ، يا ناس الآي تي شوفوا لينا مقترح سعد دا.
Post: #128 Title: Re: الأغاني الكبيرة Author: د.محمد حسن Date: 03-01-2009, 08:48 AM Parent: #127
كنا
عصبة رمى بها الزمان في شقة بالطابق الخامس في عمائر يسمى صاحبها لاكوظ
نتعاطى الكلية نهارا
والهارت والويست ليلا في حالى غياب الجراد وقمل الخشب
وحينما يفتلنا الحنين وكثيرا ما فتلنا الحنين ننتجاذب طرب ذلك الزمان الحالي
وذات ليلة لعبت خمر الطرب برؤوسنا فاذا باحد المخمورين طربا ينزلق تحت الكنبة والكرسي وهو يتاوه فصار مثلا للانجذاب وسمي الشيخ البطاح
Post: #130 Title: Re: الأغاني الكبيرة Author: محمد المرتضى حامد Date: 03-01-2009, 04:46 PM Parent: #128
Quote: في حالى غياب الجراد وقمل الخشب ،
وأين الحصحاصة والفورتسيلا يا ابن معديكرب؟ ألا رحم الله البطّاح والليالي المِلاح . ما زلت أذكر المهندس طه حسين كلما سمعت أبواللمين فهو في شيعته رافضي متطرف. سلامات يا حماده.
Post: #132 Title: Re: الأغاني الكبيرة Author: سوسن عبد الله Date: 03-01-2009, 05:48 PM Parent: #130
يا سلام على الكلام السمح والجميل ود الأمين الله يديهو العافية عشان يتحفنا كمان وكمان
Quote: الهيئة العامة للسماحه
(وش ضاحك)
Post: #133 Title: Re: الأغاني الكبيرة Author: محمد المرتضى حامد Date: 03-01-2009, 10:22 PM Parent: #132
سوسن عبدالله، كيفك، في نوع من الشعر الواحد بيشوفو زي الونسه ، لكن الزول السمح ده بيديهو وصف تاني يعني كلامو في زاد الشجون ( كنت بحتاج ليك بشده وانت عني بعيد مافي عيشه بلاك بتبقى ومافي نشوه ومافي ريد ) كلام زي دا بيتسمع إبتداءا من نخاع العظام باتجاه الخارج نحو السطح، زي التسخين بالمايكرويف ، الزول يلقى جسمو في درجة الحراره العاديه 37 لكن القلب والعُضام نار الله الموقده ، قولي ربنا يحفظ عبادو بس.
Post: #135 Title: Re: الأغاني الكبيرة Author: الطيب شيقوق Date: 03-02-2009, 10:03 AM Parent: #133
Quote: زي التسخين بالمايكرويف
هيييييييييييع حكي ملون ومدغلب زي حلاوة مولد
Post: #136 Title: Re: الأغاني الكبيرة Author: محمد المرتضى حامد Date: 03-02-2009, 02:16 PM Parent: #135
يا الطيب، سؤال وداللمين في زاد الشجون ما زال ينتظر جوابا لن يأتي العشق كالليل الذي هو مدركنا وإن خِلنا المنتأى عنه واسع كما قال الشاعر أها ، وين حا نهرب منو وين؟
___ ملون ومدغلب وحلاوة مولد!!! جاتك حاجه من السودان يا شيقا؟
Post: #137 Title: Re: الأغاني الكبيرة Author: محمد المرتضى حامد Date: 03-02-2009, 10:47 PM Parent: #136
بعدما قال للسمحه عويناتك ترع لولي وبحار ياقوت قام الزول ده الليله أسمعنا يا قريب ومني بعيد متى دهري بيك يجود، الجميل في سهرة الليلة ، في القناة الرسميه السودانية ، إنو لأول مرة أشاهد عازفة للكمنجة في أوركسترا التلفزيون ويبدو إنها عارفه بتسوي في شنو ، ربنا يحفظا. عيب سهرة الليلة إنها (إلزاميه) ، سد مروي وكدا ، يعني زي كورة الليلة واكل الإسبتاليه، لكن تجاوزنا ذلك وسَكَتنا عندما قال أبواللمين : خايفاك بُكرا تتوجع وأتوجع أنا.
Post: #138 Title: Re: الأغاني الكبيرة Author: الطيب شيقوق Date: 03-02-2009, 10:53 PM Parent: #137
Quote: جاتك حاجه من السودان يا شيقا؟
الحطب السمح كمان شقيق يا المرتضى
Post: #139 Title: Re: الأغاني الكبيرة Author: محمد المرتضى حامد Date: 03-02-2009, 11:37 PM Parent: #138
يا الطيب ، بالجد المولد والحمصيه والفوليه والسمسميه عبدالله ما جاب منهم حاجه؟
Post: #140 Title: Re: الأغاني الكبيرة Author: الطيب شيقوق Date: 03-03-2009, 00:12 AM Parent: #139
Quote: بالجد المولد والحمصيه والفوليه والسمسميه عبدالله ما جاب منهم حاجه؟
جاية في الطريق عبد الله جاب الدكوة الطاعمة سريعة النهمة البتتلافاك ساعةالضيق خاصة لو كنت عزابي تتناولها سريع وتهبر لبوستيك
Post: #141 Title: Re: الأغاني الكبيرة Author: saadeldin abdelrahman Date: 03-03-2009, 03:28 AM Parent: #140
لو بقدر اشيل من الزمن وقتي..بموت في لحظة و اوهب ليك عقاب عمري. الا قاتل الله المايكرويف!
Post: #142 Title: Re: الأغاني الكبيرة Author: محمد المرتضى حامد Date: 03-06-2009, 10:53 AM Parent: #141
معليش يا سعد ، دورنا ينحصر في الكتابة والبكاء، و(مسح) الحروف والدموع دور حصري لبكري والهكر. برضو بُكرا الريد.
Post: #143 Title: Re: الأغاني الكبيرة Author: saadeldin abdelrahman Date: 03-06-2009, 01:16 PM Parent: #142
يا مرتضى، في عودتي السنة الفاتت بعد 13 سنة.. كل خطوة كنت بقدل (رجع البلد) و قبل ما الشتاء يكتمل كنت حادف سريري في الحوش و ليل طويل لايقاسمني فيه الا بعض المكالمات و الركشات و نهيق حمار بعيييييد أو نباح كلب في الحلة - لاحظت نقصان عدد الكلاب و الغنم- و بعد السنين المرة يادوب العيون سهرن هجد.. كنت اغوص عائدا في الزمان و المكان اجدد عهد وفاء.. بلدنا حلوة و ناسا حنان، ربنا يحميهم و يغطيهم.
Post: #144 Title: وين ح نهرب منو وين؟ Author: انعام عبد الحفيظ Date: 03-06-2009, 02:47 PM Parent: #142
Quote: أها ، وين حا نهرب منو وين؟
الهروب ليكون منه وإليه!!!
ــــــــــ تحياتي محمد المرتضى وسعد والمتداخلون
دائماً ما أرجع لهذه الواحة الوريفة
Post: #147 Title: Re: وين ح نهرب منو وين؟ Author: محمد المرتضى حامد Date: 03-08-2009, 11:57 AM Parent: #144
Quote: الهروب ليكون منه وإليه!!!
(وهل يأبق الإنسان من ملك ربه فيخرج من أرض له وسماء؟) سلامات يا إنعام وحمدا لله على السلامة،
Post: #145 Title: Re: الأغاني الكبيرة Author: محمد المرتضى حامد Date: 03-07-2009, 12:44 PM Parent: #141
Quote: لو بقدر اشيل من الزمن وقتي..بموت في لحظة و اوهب ليك عقاب عمري. الا قاتل الله المايكرويف!
قلت ليك يا سعد ، قبل التهكير الأخير ، إنو روي عن سيدنا آدم إنو عُرضت عليه ذريته التي ستعمر الأرض من بعده ومن بينهم الأنبياء بأسمائهم ، قيل أنه أعجب بحفيده سيدنا داؤود عليه السلام وسأل عن عمره فقيل له أنه سيعيش لأربعين فحزن والتمس أن يمنح مثلها خصما على عمره هو وتم له ذلك ، والله أعلم ، برضو سيد خليفه عندو غنيه كنا بنسمعا لما كنا سغار سناً بيقول فيها ، يشيل من عمري أنا ويديك الله يخليك. نعم هي الأغنية التي يقول فيها يا حبيب طبعك ما زي زمان وين حِنِّية قلب الفنان الخ.. يعني مسألة عملية تسوية الأعمار بأدجسمنت سريع هي بعض من السيرة الدينية والأشعار الدنيوية زي ناس ياجميل يا مدلل اللي قال للحبيب ( أهدي ليك الروح وانت بيها ما تقبل أكون محروم).. أعيش محروم. محروم.
Post: #146 Title: Re: الأغاني الكبيرة Author: Ahmed al Qurashi Date: 03-07-2009, 09:00 PM Parent: #145
Quote: جاية في الطريق عبد الله جاب الدكوة الطاعمة سريعة النهمة البتتلافاك ساعةالضيق خاصة لو كنت عزابي تتناولها سريع وتهبر لبوستيك
يا شيقوق الدكوه دى مع الطماطم ولا ام فتفت .... حرام عليك بوست بتاع بتتعلم من الايام داير تقلبوا لينا تُكل
Post: #148 Title: Re: الأغاني الكبيرة Author: saadeldin abdelrahman Date: 03-09-2009, 00:41 AM Parent: #146
تعــــال فـــرح لياليـنـا سمعت المقطعين الآخرين من علوم الأيام لا الباش لم يغنيها يامولانا كان يضوع .. ذاااااب عدييييييل!
Post: #149 Title: Re: الأغاني الكبيرة Author: محمد المرتضى حامد Date: 03-09-2009, 10:12 AM Parent: #148
نعم يا سعد، الباش ذاب في (تعال فرِّح ليالينا) لكن أنا عايزك تراجع لما قال ( أقابلك وكُلِّي) حِنيَّه ، عليك الله أرجع ليها في الرابط أدناه اللي جبتو ليك تاني ، فور إيز أوف ريفرنس ، وحكِّم ضميرك وارجع لي. عودا ل (تعال فرِّح ليالينا) ، يا سعد ، (الحِته) دي - زي ما كان بيقولوا بنات وأولاد الجبهة الديمقراطية في الجامعه - الحِتّه دي فيها صدق سقفه لايُرى ، في ناس يا سعد تغدو الليالي في غيابهم كوالح مسهدات ، تنتظر مجيئهم لكي تحتفل خلاياك وتندلع الكرنفالات في أحياء القلب وكل الشوارع الممتدة بين الفؤاد والقفص الصدري والكبد والعيون ( مناطق العمليات) ، البصر يقدح فتيل المشاكل والرحلة تكملها البصيرة،
Post: #150 Title: Re: الأغاني الكبيرة Author: محمد المرتضى حامد Date: 03-09-2009, 03:17 PM Parent: #149
عفوا يا سعد، رابط الأغنية موجود في اليوتيوب إلا أن الرابط نفسه عَلِق به موضوع آخر رأيت معه ألا أورده رغم أن ناقل الكُفر ليس بكافر كما يقولون. مودتي. أحمد القرشي ، صاحبك في الأصل ما كان عايز يعمل البوست (تُكُل) ، كان عايز يرميهو في حُفره. تأبط شرا.
Post: #151 Title: Re: الأغاني الكبيرة Author: حيدر امين Date: 03-09-2009, 08:34 PM Parent: #150
اقو ليها عيـــونك ... زى سواد قــــدرى ... لاحولـــــه مكحله عمرى من بدرى ولو اقدر اسافــــر ..... فى بريق لحظك .. و ما ارجع تقول لى ... خايفاك بكره تتوجع آه ... تتـــــــوجع
استغفر الله
شوف جنس الكلام السمح البوجع ده يا مرتضى
Post: #152 Title: Re: الأغاني الكبيرة Author: محمد المرتضى حامد Date: 03-10-2009, 12:09 PM
دا يا حيدر تجديد للبيعة مع المريود بس بحروف مكندشه ، يعني المرحوم عمر البنا لما قال إيه الحياة غير ليمك من بُعدك أصبح حظي زي لون هضليمك يا نعيم الدنيا كان قاصد المعنى ذاتو بس المشبه به في الأولى كان الشعر الأسود الفاحم في (الهضليم) ، وهو ذكر النعام ، وفي الأخرى ، أي قصيدة عويناتك للشاعر د. مبارك بشير إن اسعفتني الذاكرة الخؤون ، كان المشبه به القدر الكالح . والله يا حيدر بالفعل لون الهضليم لما تعاين فيهو بتغرق في سوادو، طبعا الجزئية دي تناولها الشعراء كثيرا وفي البال قصة إتعكر صفاي وبياضي أصبح حالك والحال العلي يا ريتو لو يوحالك ( يوحى إليك) وهي قصيدة أرضها من ذات الإقليم. عموما لو فتحنا باب الحظ العاثر مقروءا مع الظُلمة فلن ننتهي قبل العام القادم ، رغم أني أرى أن التعميم مخل ، فاللون الأسود في كثير من المواضع سماحتو بتودي الآخره عديل والأبيض أحيانا يكون صنو المرض ومن علاماته. بالله ما تغيب.
Post: #153 Title: Re: الأغاني الكبيرة Author: حيدر امين Date: 03-10-2009, 10:26 PM Parent: #152
مــاهو باين فى العـــيون وين حنهرب منو ... ويــن؟؟ الهوى ... البعث الليـالى الحــالمه .. فى ذات الشجون
انت عارف يا احمد اخوى التكل دا ذاتو ماعون السماحة ومحل الضربة الاولى للسماحة . انت مسكين يا اللخو ما عارف جميع افلام السماحة so to speak تبدأ من التكل مع مراعاة ان ينأى الطرفان عن بعض ال items التي قد تفسد السماحة .
اخوك شيقا
خبرة 35 عام داخل اضابير السماحة
هييييييييييييييييييع
Post: #155 Title: Re: الأغاني الكبيرة Author: حنين للبلد Date: 03-10-2009, 10:40 PM Parent: #154
محمد المرتضى ذكرتنا ايام الشباب....هييييييييي يلا حسن الختام على قول وهبة...
بوست يوجع..
Post: #156 Title: Re: الأغاني الكبيرة Author: Alsa7afa_30 Date: 03-10-2009, 10:56 PM Parent: #155
أ.محمد المرتضى
سلامات و تحايا
ليس لدي ما أقوله بعد قراءة هذا البوست
و لكن إليكم هذه
شايف عماد عبد الله زاغ من هنا !!!!
إن شاء الله يكون بخير بس ...
Post: #160 Title: Re: الأغاني الكبيرة Author: محمد المرتضى حامد Date: 03-12-2009, 09:56 AM Parent: #156
Quote: و لكن إليكم هذه
و(هذه) استنطقت القلم يا صحافة 30، صورة تكفي عن مقالات طوال وهي ملخص كل ما كتبته وما لم أستطع، يا حسام أتيت بموجز الفيديو الذي استهللت به هذه المساحة، عماد عبدالله الحكّاي الأصل فيه الإختفاء لذا أسميته (الوناس الخناس)، شكري ليك على الصورة من القلب فقد جمّلت المساحة.
Post: #159 Title: Re: الأغاني الكبيرة Author: محمد المرتضى حامد Date: 03-11-2009, 05:07 PM Parent: #155
Quote: محمد المرتضى ذكرتنا ايام الشباب
تعرفي ، عندي ليك خبر أهمْ جايبو بي أشواق شديدةْ أسمعي وطاوعيني مرّة أيوة، ما تخليك عنيدهْ عايز أقول لكْ ليه أقول لكْ ما بقولكْ مش مخير ساعة مرت ساعة واكتر والوقت روّح تأخر زى عنادك عايز اعاند لكن يظهر ما حا أقدر امرى لله كنت عايز اقول، زي ما قال أحمد ناجي إنت لسا شباب بدري. يا حنين
Quote: بوست يوجع..
والحاله لسا ماعرضنا لحليفة الزول ده في (وحياة ابتسامتك) ، جهِّزي ال pain killer
Post: #158 Title: Re: الأغاني الكبيرة Author: محمد المرتضى حامد Date: 03-11-2009, 12:28 PM Parent: #154
Quote: انت عارف يا احمد اخوى التكل دا ذاتو ماعون السماحة ومحل الضربة الاولى للسماحة
تعرف يا شيقا ، يبدو لي انك من الجماعه اللي بيمشو يجيبو الصينية من المطبخ في المناسبات ، الغدا والشاي والقهوه إلخ..، ويكحل بزاوية 45 درجة، يا اخوانا الجَبَنه ما خِلست ؟ بُن حبشي يا شيقا ، ويجيك صوت يخترق سرعة الصوت ذاتو ، دقيقه دقيقه دقيقه هاك الفناجين النضيفه دي في الأول.. عملنا ليها المِستِكه وعملنا ليك الذبحه ، مع بسمه بتطوِّل عُمـُر. شقي يا شيقا. شقي ومجنون.
Post: #157 Title: Re: الأغاني الكبيرة Author: محمد المرتضى حامد Date: 03-11-2009, 08:13 AM Parent: #153
حيدر ، (يا معاين من الشباك)
Quote: الزول السمح ده قصتو مع العيون شنو؟؟
هو براهو؟ طبعا الزول دا عجبتو (بدور القلعة) بالتحديد عشان أبوصلاح قال: العيون النوركن بِجهرا غير جمالكن مين السهَّرا. لكن معاهو حق يا حيدر، فهذا الرجل الجميل شأنه شأن معظم الشفيفين، ( طبعا شفيفين دي هلكوا بعيرها في المنبر دا) رجل هدمت أسواره وقلاعه العيون، والعيون يا العزيز تتراوح بين "الكاتيوشا" و"التوبل إم" ، ورغم أن الكاتيوشا لها تأثيرها المعروف لكن "التوبل إم" يا حيدر عابر للغارات وله قدرة عاليه على اختراق جميع منظومات الدفاع الجوي، ساحق ماحق ، آثاره التدميرية الله لا ورّاك ليها ، ولاّ أقول ليك ، الله يسعدك بيها وتقابلني. تسلم.
Post: #161 Title: Re: الأغاني الكبيرة Author: ماجدة عوض خوجلى Date: 03-12-2009, 02:27 PM Parent: #157
عارف يامحمد المرتضى اخر حفله عامة وكانت اول حفله احضرا لمحمدالامين كانت فى دار الاوبرا المصريه فى2007 وتمانيه وتحديدا اغسطس طبعا بسمع ليهو لكن بقصد مباشر .. والله يامحمدالمرتضى رجعت سنيين وسنيين لى ورا ولاول مرة اشوف اهلنا المصريين مستمتعين بغنى سودانى وقادرين يفهمو البيتغنى شنو تخيل بالرغم من انى سمعت اغانى ليهو كتيرة فى شرايط لكنى اكتشفت انى مااستمعت ليهو كويس .. والله يامحمد انا كنت مقررة انى مااقعد كتير فى الحفله احضر لى بس اغنيه او اتنين والسبب انى كنت مغادرة القاهرة تانى يوم لكن لقيت نفسى نسيت ليك السفر وابوسنين السفر وحضرتها للنهايه والله مافضل لى الا امشى اوصلو محل مانازل والنتيجة كانت فاتتنى الطيارة عديل لكن والله ماندمت ..ياخى ده انسان جميل بشكل خرافى وبيختار كلمات اغانى بتشبهو .. معنى على حسب تخيلى كلمات الاغانى البيغنيها دى تحديدا مااظن كانت ممكن تنجح لو فى زول تانى هو الغناها .. اغنيو دى من احب اغانية الى قلبى واظنها هى بتكون السبب وحياة ابتسامتك ياحبيبى وحياة عينيك قلبى حاذرك ومن زمان سائل عليــك كلو لمسه فى خيالى عن جمالك هى فيك قبل ماشوفك كنت فاكر الريد مستحيل كنت هايم فى طريق خـــالى طويـــل لليلى دون الناس كللو ااهات ولويل تشهد الايام ويشهد الليل والنحيب قلبى عاشق ودربى خـــالى من حبيب لكن ياحــــبــــيــــبــــــــى من يوم ماشفتك قلبى للدنيا ابتسم اشرقت دنياى وفارق دربى الــهم فى انتـــــظــــــــــــارك ياحبيى رايح ارعاك بى حنـــانى القى فى قربك سعادتى وانــــسى تعذيبى وهوانى يبغرو العشــاق من هوانا فرحة الــريد والامانى ياحبيبى عشت لليـــا وعشت ليك هــاك عهدى وهات ايـــديـــك وحيــاة غرامى اهدى عمـــــرى وروحى ليك انــــا روحى ليــك تســـلم يارب من كل شـــر ...
Post: #162 Title: Re: الأغاني الكبيرة Author: الطيب شيقوق Date: 03-12-2009, 07:37 PM Parent: #161
Quote: مع بسمه بتطوِّل عُمـُر.
نان دي ما البسمة البتنشف الريق وتخليك تبلع في ريقك وتعتر في العتبة وماك بتفرز بين الضيف الداخل ومارق
Post: #163 Title: Re: الأغاني الكبيرة Author: Magdi Ahmed Elsheikh Date: 03-13-2009, 01:46 PM Parent: #162
Quote: في نوع من الشعر الواحد بيشوفو زي الونسه ، لكن الزول السمح ده بيديهو وصف تاني يعني كلامو في زاد الشجون ( كنت بحتاج ليك بشده وانت عني بعيد مافي عيشه بلاك بتبقى ومافي نشوه ومافي ريد ) كلام زي دا بيتسمع إبتداءا من نخاع العظام باتجاه الخارج نحو السطح، زي التسخين بالمايكرويف ، الزول يلقى جسمو في درجة الحراره العاديه 37 لكن القلب والعُضام نار الله الموقده ، قولي ربنا يحفظ عبادو بس.
شكرا ليك يامحمد...!!
Post: #167 Title: Re: الأغاني الكبيرة Author: محمد المرتضى حامد Date: 03-14-2009, 01:54 PM Parent: #163
د. مجدي، الشكر مبذول لك أنك كنت أول من أتى زائرا هذه المساحة، أتمنى على المولى دوام الود والتواصل، عفوا ، أحيانا نمد أرجلنا إلى ما بعد (اللحاف) ونُجري تشبيهات طبية على سبيل الترويح وليس طلبا لها لحد ذاتها ، يعني نتغول على تخصصاتكم ، المهم بالله مشّوها لينا ، يعني كان كررنا مقولة ودالرضي وقلنا : جدله مملوخه وفي معالق الجوف موسو مجلوخه ، مشّوها لينا واعتبروها نتائجا لأفعال السمحات في ال gastrointestinal tract. تسلم يا حبيب.
Post: #165 Title: Re: الأغاني الكبيرة Author: محمد المرتضى حامد Date: 03-14-2009, 10:26 AM Parent: #162
Quote: Quote: مع بسمه بتطوِّل عُمـُر.
نان دي ما البسمة البتنشف الريق وتخليك تبلع في ريقك وتعتر في العتبة وماك بتفرز بين الضيف الداخل ومارق
يا شيقا ، شابكنا هيييع هيييع ، هسه بسمه نشّفَت ريقك وخلَّتك تزازي؟ ذكّرتني بادي رحمة الله عليه في غنية العبادي لما قال في (شيخ ريّا): (صيَّح سرور وتلاهو اللمين وضلّت قلــوب العالمــين عاقلنا، يلزمني اليمين ما عارف شمالو من اليمين) تاني حذاري تقول هيييع يا الطيب ، حوا والده ، البسمه البطوِّل عمر والنظره البتذوِّب حجر دي ما خرافه، يحفظك مولاي من الليزر ومن قاما وبيتا وتحت الحمراء وفوق البنفسجيه.
Post: #164 Title: Re: الأغاني الكبيرة Author: محمد المرتضى حامد Date: 03-13-2009, 05:12 PM Parent: #161
Quote: لكن لقيت نفسى نسيت ليك السفر وابوسنين السفر وحضرتها للنهايه والله مافضل لى الا امشى اوصلو محل مانازل والنتيجة كانت فاتتنى الطيارة عديل لكن والله ماندمت
العزيزة ماجدة، لاشك أنك اتخذت القرار الصحيح ، الطائرات ملحوقة ولا أظن أن أيا من مئات الرحلات تركت في نفسك أثرا أو ذكرى إن لم تكن صاحبتها حادثة بعينها وذهبت كلها طي النسان ، لكن الرحلة التي (وفقك) المولى بعدم اللحاق بها لن تنسى فقد اكتسبت مساحتها في الذاكرة بسبب الزول السمح ، ووالله لو كنتِ لحقت بتلك الرحلة لكان شأنك شأن قوم موسى ممن يستبدلون الذي هو أدنى بالذي هو خير . أغنية وحياة ابتسامتك تحديدا ، للراحل محد علي جباره، من الأغنيات التي يعتقد كل من يستمع إليها أنها كتبت له ومن ثم يتبنى علاقة شخصية معها وعندما يبدأ الزول دا في تأديتها يعتقد صادقا أن محمد الأمين قال ليهو يا فلان تعال داير أقول ليك كلام بيني وبينك ... وبين حبيبي بالطبع. عندي إحساس صادق يا ماجده إنو ناس أمريكا اللاتينية وسكان التبت وحضارة الأنكا وبعض قبائل الإسكيمو مظلومين لأنهم ما سمعوا الغنيه دي وبالذات من غرق من قارة أتلانتس الراحو فيها ساكت وناس التايتانك كمان ، أسال الله تعالى أن يعينهم على حالة النقص تلك ويجعلها لهم كفارة عن ذنوبهم ويعوضهم عنها خيرا. وحياة ابتسامتك؟ لا حول ولا قوة إلا بالله. غايتو ، زي ما قالت حنين ربنا يدينا حسن الخاتمة.
Post: #166 Title: Re: الأغاني الكبيرة Author: saadeldin abdelrahman Date: 03-14-2009, 11:22 AM Parent: #164
يا مولانا الماجدة خالتو اكيد سمعت قلنا ما ممكن تسافر و هي محظوظة طبعا انه القرار كان بيدها.. جيرانا كان عندهم حفل زواج احياه الباشكاتب وين.. في الكلاكلة القبة و هو اصلا قلما تجده في مناسبة متين..قبل يوم من امتحانات الشهادة الابتدائية! الحاجة الله يطول عمرها بالعافية وهي تعلم حبي للزول السمح صرحت: تكمل مراجعتك بدري و تجي تحضر ليك فاصل واحد و بعدها على سريرك! لم تجدي اي اعتراضات أو "تسويات" معها.. قمت بالمطلوب و شهدت فاصلا به هواي تستبعدوا و قالوا متألم شوية و اغنية او اتنين غيرهن..و مع انه قضيت باقي ليلي دون الناس و انا ملقي السمع الا أنني دخلت تلك الامتحانات و سكينة غريبة تغمرني يا غالي ليـــك هـويـنـا
Post: #168 Title: Re: الأغاني الكبيرة Author: الطيب شيقوق Date: 03-14-2009, 03:01 PM Parent: #166
Quote: gastrointestinal tract
وجع - 16
اهلك بالحيل قروك آآآ جني
Post: #169 Title: Re: الأغاني الكبيرة Author: محمد المرتضى حامد Date: 03-15-2009, 08:58 AM Parent: #166
Quote: و شهدت فاصلا به هواي تستبعدوا و قالوا متألم شوية
صدقني يا سعد لو كان الغنيتين ديل فاتوك وقعدت للمذاكره ما كان نجحت. زمان لما أبو اللمين يغني أغنيته الحوارية عويناتك ، أقوليها تقول لي أقول ليها إلخ...، وسعد يعزف على الكيبورد وبعد الفاتح حسين يخُج الليد جيتار يقوم سعد (يمسح) مفاتيح الكيبورد من الشمال لليمن برشاقه في صوت يشبه إنهيار بناية من مليون طابق ، ترجع البيت وأنت تتجشأ نغم وتتمدد في سرير الحوش الضاربو الهمبريب بعيدا عن حائط السور خشية توالي الإنهيارات.
Post: #170 Title: Re: الأغاني الكبيرة Author: محمد أحمد الخضر Date: 03-15-2009, 09:24 AM Parent: #169
يا محمدالمرتضى ياخوي أنا جنس كلامكم دا ما بقدر عليهو دا داير ليهو نفس طويل ونحن نفسنا اتقطع من زمان. أنا بس خلوني اعاين بي عيوني واستمتع بهذا الحكي الجميل. عندك مانع؟!
Post: #171 Title: Re: الأغاني الكبيرة Author: الطيب شيقوق Date: 03-15-2009, 09:40 AM Parent: #170
ود الخضر
Quote: أنا بس خلوني اعاين بي عيوني واستمتع بهذا الحكي الجميل.
حكي المرتضى علا تجيهو صاري مختار الصحاح اوالمصباح المنير في اباطك . وكان جفل بيك صوب الكلام الطبي بحشرك في ال ICU توووووووش
Post: #172 Title: Re: الأغاني الكبيرة Author: محمد أحمد الخضر Date: 03-15-2009, 11:13 AM Parent: #171
Post: #173 Title: Re: الأغاني الكبيرة Author: محمد المرتضى حامد Date: 03-15-2009, 12:48 PM Parent: #170
Quote: دا داير ليهو نفس طويل ونحن نفسنا اتقطع من زمان.
أستاذنا الجليل الجميل ودالخدر، يا سيدي بزيارتك بيتنا نوّر كلو زينه زي ما غنَّى إبراهيم عوض عبدالمجيد ربيب المسالمه وحي العرب. يا عزيزي إنت الشباب ذاتو لكن قبلنا عذرك الديبلوماسي في ردَّك الأساسي ( شايف اثر الهبوط على لغتنا؟ ولو جيتني بعد سنه حا تلاقيني نسيت "يا نديمي" وقاعد أغني سي سي في سي سي في وريدي الرئيسي والله ما حاتعرف إنك في المنبر ولا في شفخانه). إنت نَفَسَك ما بِنقَطِع من بوستاتنا السغيره دي لكن قول مشغــول بسباق اختراق الضاحيه عن طرائف التدريس الذي يزحف نحو أرقام المنبر القياسية، والرحلات الجميله في السيب. مودتي يا سيدي.
Post: #174 Title: Re: الأغاني الكبيرة Author: الطيب شيقوق Date: 03-15-2009, 05:05 PM Parent: #173
ود الخضر
Quote: يحفظك مولاي من الليزر ومن قاما وبيتا وتحت الحمراء
قال سهل ممتنع : هسع دى اكان قالوا ليك احيلها لدائرة الاختصاص في مدرستك بتوديها على وين التربية الاسلامية ولا الفيزياء ولا الاحياء ولا الجغرافيا؟
Post: #178 Title: Re: الأغاني الكبيرة Author: محمد المرتضى حامد Date: 03-16-2009, 11:26 AM Parent: #174
كلام للحلوه من هاشم صديق لما شفتك ليلِى ضَّو وبَقَّ نور
ونرجس الجنه المفرهد
رفّ بى جِنحَات عطور
وغنَّى فارسِك
خَتَّ صورتِك فى الإطار
فى الليالى نَجِم يِلالى
ونسمه فى وهج النهار
وقال فى وَصفِك لما بنتى
أحلى مِنِّك . برضُه إنتِى
وما فى غيرِك زول معانا
حتى كان يا سمحه غِبتى
ومَرّه جَالَن الف خَاطِر
بى عيون عقلى المسَاهر
فجأه عينيكِ الحبيبه
!قالو سارح وين مِسَافِر؟
عِشتَ قولِن شيل وصَفقَه
وقُلت بس يا ريتنى القى
همسه فى حُلم الأميره
أو سَبَايب فى الضفيرة
أو عِقيد فى تِبرِ جيدها
أو قليب فى راحة ايدها
يا زمان أسمعنى واكتب:
البَرِيدها وريدها سِيدى
وريدِى سِيدَها
الزمان لوحتى بالغ
ما أظِن فى زول يعيدها.
يا حَلاتِك
مره همسه .. ومره نَسمَهومره هَلّت نَجْمه غابت
ومره صَحْوَة غمزه نامت
ومره ضحكه تَرَضِّى شوقنا
ومره كلمه تضِّوى فوقنا
ولمّا نسرح فيكِ قَادلَه
زى ملايكه علينا نازله
بَس نغنى:
يا حلاتكُم يا أهَلنَا
يا مصابيحنا ونجومنا
الضّاويَه فى واحات زَمَنَّا
خمَج
Post: #175 Title: Re: الأغاني الكبيرة Author: سوسن عبد الله Date: 03-15-2009, 05:28 PM Parent: #173
هلا ...
Quote: سوسن عبدالله، كيفك، في نوع من الشعر الواحد بيشوفو زي الونسه ، لكن الزول السمح ده بيديهو وصف تاني يعني كلامو في زاد الشجون ( كنت بحتاج ليك بشده وانت عني بعيد مافي عيشه بلاك بتبقى ومافي نشوه ومافي ريد ) كلام زي دا بيتسمع إبتداءا من نخاع العظام باتجاه الخارج نحو السطح، زي التسخين بالمايكرويف ، الزول يلقى جسمو في درجة الحراره العاديه 37 لكن القلب والعُضام نار الله الموقده ، قولي ربنا يحفظ عبادو بس.
تعرف بالذات أغنية زاد الشجون حفظتهابنفس طريقة أداء ود الأمين وانا طفلة لما كان الوالد (الله يديهو الصحة والعافية ويطول في عمره) يستمع للأغاني السمحة دي كنا وقتها بمدني الجميلة... يااااه .. زمن.
Post: #176 Title: Re: الأغاني الكبيرة Author: محمد أحمد الخضر Date: 03-15-2009, 07:52 PM Parent: #175
Quote: يحفظك مولاي من الليزر ومن قاما وبيتا وتحت الحمراء
شيقوق: قمت على جنك ات البوديك للحاجات دي شنو؟! أشرح لي تحت الحمراء دي تكون كيف؟!
Post: #177 Title: Re: الأغاني الكبيرة Author: الطيب شيقوق Date: 03-15-2009, 08:31 PM Parent: #176
الخضر
Quote: أشرح لي تحت الحمراء دي تكون كيف؟!
اشرح ليك شنو ؟ بتتحودب بعمتك الماكنة دى الزي عمة الفنان خلف الله حمد وكمان تقول السهل الممتنع .
التحت الحمراء خبرها بتلقاهو عند فيسل هليل الما عندو قشة مرة
Post: #179 Title: Re: الأغاني الكبيرة Author: محمد المرتضى حامد Date: 03-17-2009, 01:20 PM Parent: #177
لما شفتك ليلي ضوا وبقا نور يا سلام
Post: #180 Title: Re: الأغاني الكبيرة Author: saadeldin abdelrahman Date: 03-17-2009, 01:40 PM Parent: #179
دحين يا اخوانا مولانا دا ما موذي؟ يا مرتضانا أنا ماشي اتحالف مع عمدة نقاضيك بتهمة الاذى الجسيم. عايز افت ليك صاحبي حمور كمان قال ما بطيق غنا الباش، خالتو قالت ليهو ذوقك بتاع عنقالة ..لوووول عفيت منها و رثيت لصاحبي!
Post: #181 Title: Re: الأغاني الكبيرة Author: saadeldin abdelrahman Date: 03-17-2009, 02:51 PM Parent: #180
هاشم صديق زاتو ما نصيح، يكون مخاوي؟ ليلي ضو و بق نور! دا ما زولنا ابفانوس البظهر للناس في الخلاء داك.. شفت الصاغ محمود : في مسايرو نجمي ضال؟ و في الصباح يحمد القوم السرى.
Post: #182 Title: Re: الأغاني الكبيرة Author: الطيب شيقوق Date: 03-17-2009, 04:47 PM Parent: #181
المرتضى
اهلنا الحبش كلهم سمحين صاح؟
Post: #185 Title: Re: الأغاني الكبيرة Author: محمد المرتضى حامد Date: 03-17-2009, 07:26 PM Parent: #182
Quote: اهلنا الحبش كلهم سمحين صاح؟
يا الطيب ، سألتك بالله ما تجيب لي مشاكل، الحبش ديل لا سمحين لا بيعرفوا يرقصو ولا الزغني بتاعم طاعم وأنجيرتم ذاتا مسيخه، وغناهمل لا يطرب ولا الإسكِستا بتاعتم ظريفه ولا شهقتم بتودي الآخره وقهوتم ما بتنشرب. وأديس ذاتا كلها كتاتيح وحر وعرق. خلاس ارتحتا؟
سعد، بالله شغِّل لينا (أسمر جميل فتان).
Post: #183 Title: Re: الأغاني الكبيرة Author: محمد المرتضى حامد Date: 03-17-2009, 04:55 PM Parent: #180
هاشم صديق يا سعد زول شاعر بالباب عديييل ، عندما تقرأ أشعاره ينتابك أنه كتب في اللوح المحفوظ شاعرا، هنالك شعراء تقرأ لهم وتحس أنهم سعوا للشعر لكن هاشم تأتيه القصيدة (منقادة تجرجر حروفها), في همسة شوق قال:
بريدك كلمه كان رفّت يِهش ثغر النجوم ويسطعَ ولما ينادى همس الشوق يقيف كل الزمن ويسمع
شوف الكلام البيشخِّت حواشي الكبد دا، وبعدين يا سعد ، الزمن مش يقيف ويسمع وبس، أبدا ، القصة ما بالبساطه دي ، في رواية أخرى يسمع ويرجع، وعلى قراءة إبن مريود ، يركع.
Post: #184 Title: Re: الأغاني الكبيرة Author: saadeldin abdelrahman Date: 03-17-2009, 05:24 PM Parent: #183
هاشم شاعر مولود بقوافيه وخلجانه و انواءه.. الملحمة عمدته في الموضع الكلاسيك للشاعر كلسان "شعب" و ليس قبيلة فقط.. مصطفى غنى ليه برضو كم قصيدة.. تعجبني جدا "كرهت تفاهة الثوار".. عيونك ديل عيون اهلي حنان زي نغمة في مقطع؟ الليلة لا حولا!
Post: #187 Title: Re: الأغاني الكبيرة Author: محمد المرتضى حامد Date: 03-18-2009, 10:44 AM Parent: #184
Quote: هاشم شاعر مولود بقوافيه وخلجانه و انواءه.. الملحمة عمدته في الموضع الكلاسيك للشاعر كلسان "شعب" و ليس قبيلة فقط..
كلام سمح يا سعد، سمح بالحيل،
وقال:
بحبك ومافى غيرك نور يهِل ويغمرُ طريق الشوف وما فى بَلَاك نور بِسْطَع ولا فرحاً يسوقنى يطوف
إتخيل الفرح يسوقك من إيدك يلف بيك الدنيا، تنظيم العرض بين طيات السحاب.
كرنفالات الريو.
Post: #186 Title: معقول لكن!!! Author: انعام عبد الحفيظ Date: 03-17-2009, 10:28 PM Parent: #1
لقيت الأغنية بتاعت السهرة دي عند إستريو سجلها لي في شريط
ما قدرت اسمعها كلها مره واحده إتخيلوا بسمع فيها شوية شوية !!!
Quote: ما قدرت اسمعها كلها مره واحده إتخيلوا بسمع فيها شوية شوية !!!
تصرف لا تعوزه الحكمه يا إنعام، سبق وأن ذكرت أعلاه بأن أغاني أبواللمين يُنصح بالإستماع إليها على جرعات، الإستماع إلى أغنية زي بتتعلم من الأيام دفعة واحدة بيعتبر overdose غير محسوب العواقب. هذا ما ورد في النشرة المرفقة.
أخي الأصغر أحمد لما كان طفل و يادوبك بمشي و رجليه ما شايلاه حتى، يقيف قدام الاستريو و يأشر بصباعه على مكان الشريط صائحا: هبيبي..هبيبي! فأفهم انه الأخ بطالب ب" يا حاسدين غرامنا" لكي يرقص على انغامها بساقيه المكلوجتين. طفلنا الحب طفل من نار .. طفل بيعيش اغرب اطوار.. يضحك الحان..يبكي اشعار.. يإمر الناس يمشوا مشوار ، اربعة سنين!
شوف الناس لما تستصحب حقيقة الخلق من جهة وتتبحر في علوم الأديان واللاهوت ، يخال لي أن الشاعر أخذ هذا المضمون من الزرادشتية أو الأزيدية الذين يرون أن العالم تحكمه قوتان هما الخير والشر والأولى أصلها نار الضياء التي يولد منها الحب وأما الثانية فيولد منها الكذب والأوبئة والرذيلة ، والعياذ بالله. أها الطفل المن نار دا كلام في العقائد مافي داعي نمشي فيهو بعيد لأن الجان نفسه خلق من مارج من نار، يعني من لهب مختلط بدخان أسود والله أعلم. قلت ليك شغِّل لي (أسمر).
في ذات الفترة التي فازت فيها أغنية بتتعلم من الأيام بالمركز الأول ، وهي 1979 ، إن لم تخني الذاكرة ، كانت أغنية يا حاسدين غرامنا هي الأغنية الأشهر في الحفلات بلا منازع ، رغم أنو واحد من ناس مدني برضو اكتسح الساحة ، مع الفارق ، وهو عبدالعزيز المبارك بأحلى جاره وأخواتها من الأغنيات الراقصة التي يؤديها بعد أن يكون الجميع شبع بكاءا من ( ما كنت عارف) والتي كانت تبثها الإذاعة المدرسية بما يشبه الإنذار بما سيؤول إليه الحال بعد الإمتحانات. _______
أخوك السغير البيشابي للشريط دا يا سعد أيضا ينطبق عليه وصف ( الوعي المبكر والعاطفه النبيله).
عيونو نعسانة.. فتاكة فتانة.. و قامته كالبانة يتهادى لو يخطر. اضف لما سبق، الانجيرا الكثيرة من مسببات ال Reflux كما ان سكر الجبنة قد يعبث بنسبة الجلكوز في الدم.
Quote: الحبش ديل لا سمحين لا بيعرفوا يرقصو ولا الزغني بتاعم طاعم وأنجيرتم ذاتا مسيخه، وغناهمل لا يطرب ولا الإسكِستا بتاعتم ظريفه ولا شهقتم بتودي الآخره وقهوتم ما بتنشرب. وأديس ذاتا كلها كتاتيح وحر وعرق.
صاح ما سمحين ولا شهقتهم بتسل الروح
ما سمحين؟؟؟؟؟؟؟؟؟؟؟
الزاكي عبد الحميد قال يا الطيب انت بوستيك بتاع الحبش عدد قرائه 4000 - قال لي انا براي متصفحو 100 غير نوع المرتضى البيجي بتاوق مسارقة ويلف على بوست زول سمح .
"
