أحمد طراوه ...أهلا

أحمد طراوه ...أهلا


01-10-2007, 12:57 PM


  » http://sudaneseonline.com/cgi-bin/sdb/2bb.cgi?seq=msg&board=219&msg=1185371563&rn=83


Post: #1
Title: أحمد طراوه ...أهلا
Author: محمد المرتضى حامد
Date: 01-10-2007, 12:57 PM
Parent: #0

د. أحمد عبدالفتاح محجوب النصري طبيب أمدرماني من نواحي أبوروف سوق الشجرة وطرقات ودالبنا وأماكن كان يمشي فيها ، أحيانا ، قادلا حافي "لزوم الدافوري" و حالق "لزوم زيانة العيد" رغم أنه لم ير الترام ولكنه ، دون شك ، ذرع الطريق الشّاقّي الترام جيئة وذهوبا ، ولاّ أنا غلطان يا أحمد؟ عرفه أهل تلك الناحية وغيرها ب (أحمد طراوة) وهو لقب تسرّب اليه من جدّه لأمه وهي حقيقة علمتها مؤخرا لأني كنت أعتقد أيام الثانوية العامه أن لقب (طراوة) هذا منبعه هدوء حديثه الباسم أو اجادته لعبة كرة القدم ، وقت أن كان في السودان كرة قدم ، وفي زمن السرعة والعجلة والعولمة اكتفى الأحباب بمناداته ب (طراوه) ومن ثم بقي الأسم الرسمي حبيس الوثائق الرسمية التي لاتعبر في معظم الأحايين عنّا وأثق أن السلطات الأمريكية وغيرها كانت ستصر على اسم (طراوة) لو كانت تعرف معني الكلمة لأنه كذلك.
لن أحكي عنه فهو أخي وصديقي وزميلي توكأت عليه وأهش به على خاطري ووجداني ، وفي أمثاله من أحباب ( أرى بقايا العمر وأوهامي ) ، جمعني به صف الدراسة والمودة زمن الثانوية العامه ، وقت أن كنا (طفلين لاشايلين هم لاعارفين بُكره الجايينا)، وجرى بنا قطار الأحترام وعبر بنا سهوبا ووديانا في العليا والجامعة حتى استقر بنا في محطة (مسقط) الجميلة التي غادرها هذا الشقيق الصديق الرفيق ، مؤقتا وفق مناي، الى الساحل الغربي الأمريكي فيما يعرف جغرافيا ب (كاليفورنيا) وبقي التواصل الأثيري بديلا عن لقاءات ما انقطعت ليوم في زمن الأقامة والأرتحال معا. أحمد رجل عام وحق للكل public domain وأثق أن مثله لم يخلق ليبقى حبيس الجغرافيا وخطوط الطول والعرض، فهو بطبعه ، لايحتمل الخصخصة ولا التموضع المستدام ، سخّر علمه ووقته وأدبه وجهده لكل مجتمع تواجد فيه وفي مجتمع هذا المنبر سنسعد بكتاباته مباشرة بعد أن ظل يساهم بالقليل عن طريق الآخرين حتى قام بكري أبوبكر بتسليمه مفتاحا و title deed .

يا طراوه ياجميل يانور الشقايق أملا قلمك من خاطرك .... للقائنا بادر ، اشف الجروح والروح.

أغدا نلقاك؟

Post: #2
Title: Re: أحمد طراوه ...أهلا
Author: الزاكى عبد الحميد
Date: 01-10-2007, 01:13 PM
Parent: #1

أنا سعيد يا صديقي بعودتك التي طال انتظارنا لها ..فبك شرفنا
بمعرفة قامات لا نملك إلا أن نحييهم بالإنحناءة والتجلة..
وأن تأتينا بدكتور طراوة هذه المرة لفرح لا يطال..
حاولت التواصل مع د. طراوة-بعد عودته لأمريكا- بعدة طرق لكني لم أوفق..

و الله أنا سعيد جداً بانضمام هذا الرجل إلى هذا الوطن الاسفيري لأنه إضافة حقيقية
وثنائي خطير مع د. أحمد القرشي...

مرحباً د. طراوة ألف وأهلاً بيك يا زعيم ظرفاء البورد..

الزاكي

Post: #4
Title: Re: أحمد طراوه ...أهلا
Author: محمد المرتضى حامد
Date: 01-10-2007, 03:33 PM
Parent: #2

أستاذي الزاكي الباهي..
بالفعل تواجد أحمد ضروري هنا وأتفق معك أنه يشكل ثنائي (خطير) مع الحبيب د. أحمد القرشي وليتهما يعيدا هنا ما ظلا يطرحانه في النادي بمسقط.
لا شك أن غياب أحمد كان حاضرا بشكل ملفت ومؤثر في الأحتفالات الأخيرة.
يا زمان هل من عوده هل؟
شكرا يا باهي

Post: #3
Title: Re: أحمد طراوه ...أهلا
Author: رأفت ميلاد
Date: 01-10-2007, 01:21 PM
Parent: #1

العزيز محمد المرتضى حامد

تحياتى وكل المودة الصادقة

كنت بصدد إنزال بوسـت عن الدكتور ترووب
الطبيب السـويسرى الذى أفنى شـبابه فى علاج الفقراء
وكان لديه عيادة فى بيت من (الجالوص) فى سـوق الشـجرة
وطرده نميري (شـر طرده) بتهمة التجسس .
قابلته هنا وحكى لى كثيرآ عن السـودان .

سـأنتظر دخول الأخ د. أحمد عبدالفتاح محجوب النصري
وهو من أبناء المنطقة عسى أن يثرى لى الموضوع

تحية صادقة

وفى إنتظار أحمد طراوه

رأفت ميلاد

Post: #5
Title: Re: أحمد طراوه ...أهلا
Author: جمال السنوسي
Date: 01-10-2007, 03:54 PM
Parent: #3

العزيز محمد المرتضى

هذا بالتأكيد د. احمد طراوة خريج الزقازيق يمكن (85 أو 86)

ذو الابتسامة الدائمة مع كل زملاءه وزميلاته بختلف أطيافهم السياسية برغم أنه كان أحمراً ولكنه كان شديد البياض مع كل خصومه في الندوات السياسية

في بدايات التسعينات قابلته وحرمه الزميلة العزيزة (حنان الخطيب) في شارع النيل بالقرب من العمارة الكويتية وكانت تلك آخر عهدي بهما

مرحباً به في هذا الوطن الافتراضي عندما صرنافي كل الأوطان نبحث عن وطن يضمنا..


جمال السنوسي

سؤال :

هل هناك أي معلومة عن د. عبد الرحمن الشنقيطي (زميل أحمد في الجامعة)

Post: #12
Title: Re: أحمد طراوه ...أهلا
Author: محمد المرتضى حامد
Date: 01-10-2007, 04:47 PM
Parent: #5

أخي جمال..
كل سنه وانت مرتاح،

Quote: هذا بالتأكيد د. احمد طراوة خريج الزقازيق يمكن (85 أو 86)

ذو الابتسامة الدائمة مع كل زملاءه وزميلاته بختلف أطيافهم السياسية برغم أنه كان أحمراً ولكنه كان شديد البياض مع كل خصومه في الندوات السياسية


كنت عايز أقول ليك ( ياهو ذاتو) على طول لكن قلت أستأذن قصي همرور (حفظه الله من برد هناك) باعتباره صاحب اللقب ، ثم اقول (ياهو ذاتو).
لك سلامي وشكري ياجمال.

Post: #7
Title: Re: أحمد طراوه ...أهلا
Author: محمد المرتضى حامد
Date: 01-10-2007, 04:11 PM
Parent: #3

رافت العزيز..
ياخي كل سنه وانت طيب تاني.
أسعدني قدومك في مقدم المرحبين بأحمد.
لاشك أن أهل الحي أدرى بشعابه وطراوه ده لو سخا حايوريك يا رأفت انو د. ترووب ده زاره كم مريض وعولج على يديه كم سقيم ومن هواء النيل وأبوروف هب صوبه كم (عليل).
يا (طرواوه)، رأفت الجميل ، مع العليل ، راجيك.

Post: #6
Title: Re: أحمد طراوه ...أهلا
Author: محمد مكى محمد
Date: 01-10-2007, 04:05 PM
Parent: #1

1000 welcome
Dr. Ahmed Trawa.. the nice and the kindest of our district..Beat Elmal...
Greetings to Gamal and Amany And the family
Mohammed

Post: #8
Title: Re: أحمد طراوه ...أهلا
Author: Muna Khugali
Date: 01-10-2007, 04:16 PM
Parent: #6

مرحب بالدكتور أحمـد طـراوة..

مني خـوجلي

Post: #9
Title: Re: أحمد طراوه ...أهلا
Author: Muna Khugali
Date: 01-10-2007, 04:16 PM
Parent: #6

مرحب بالدكتور أحمـد طـراوة..

مني خـوجلي

Post: #11
Title: Re: أحمد طراوه ...أهلا
Author: حيدر حسن ميرغني
Date: 01-10-2007, 04:33 PM
Parent: #9

مرحبا بالدكتور احمد طراوة الزقازيقي الانيق الذي سمعنا عنه الكثير الجميل





وإن ما يا هو برضو مرحب بيهو

Post: #21
Title: Re: أحمد طراوه ...أهلا
Author: محمد المرتضى حامد
Date: 01-10-2007, 07:01 PM
Parent: #11

Quote: مرحبا بالدكتور احمد طراوة الزقازيقي الانيق الذي سمعنا عنه الكثير الجميل


أخي حيدر حسن ..
مدينة الزقازيق وجامعتها الجميلة جمعت شبابا رائعا عرفت منهم الكثيرين / الكثيرات ممن أثروا الحياة الطالبية في مصر وغير مصر بعد تخرجهم في جميع مناحي الحياة ومنهم أخي طراوه ولعله يضيف هنا عن تجربته هناك .
لك شكري ياسيدي.

Post: #20
Title: Re: أحمد طراوه ...أهلا
Author: محمد المرتضى حامد
Date: 01-10-2007, 06:23 PM
Parent: #9

العزيزه منى خوجلي..
كل سنه وانت عافيه وطيبه وسعيده,
شكر يليق بمقامك على ترحيبك بأحمد.
لك معزّتي واحترامي

Post: #18
Title: Re: أحمد طراوه ...أهلا
Author: محمد المرتضى حامد
Date: 01-10-2007, 06:12 PM
Parent: #6

محمد مكي..
أولاد بيت المال وأبوروف وودنوباوي ديل كلهم واحد خارج دار الرياضه امدرمان مهما فعلت أندية الزهره ، أبوروف وبيت المال داخلها زمن البمبان و(ملح) على لسان كاك والسر وسيد الدار المرحوم عبدالوهاب الجعفري عطّر الله ثراه ، ويفتيك في وشائج القربى والجميل المشترك بينهم ، غض النظر عن الأصل والعرق ، العمده فاكهة أمدرمان الهادي نصرالدين. ياسلام يا محمد تلك ديار (كانت قديما ديارا ) وستظل.
شكرا للترحيب وبدوري أرسل سلامي لآل طراوه جميعهم.

Post: #10
Title: Re: أحمد طراوه ...أهلا
Author: nourelhadi awad
Date: 01-10-2007, 04:30 PM
Parent: #1

لست أدري بأيهم أحتفل؟؟؟؟
بعودة الفارس أم قدوم المطر؟؟؟؟
وكلها طراوة
كنت موقنا بعودتك
فالدار دائما ترتجي قاطنيها
عدت وعاد دفء الحكايا
مد يدك
مودتي
نورالهادي

Post: #14
Title: Re: أحمد طراوه ...أهلا
Author: elsawi
Date: 01-10-2007, 05:13 PM
Parent: #10

مرحبا بالأخ الدكتور أحمد طراوة جارنا بأبي روف وزميلنا في الهم والإنسانية، واتمنى ان يطيب له المقام هنا وان يكون قلمه المعطاء وفكره الثاقب إضافة نوعية للمنبر ..

الأخ جمال السنوسي تحياتي
Quote:
هل هناك أي معلومة عن د. عبد الرحمن الشنقيطي (زميل أحمد في الجامعة)
الدكتور عبد الرحمن عبدالكريم الشنقيطي هو عمي (ابن خالة والدي) وهو لم يبرح السودان منذ عودتة من الزقازيق عام 84 وعمل لفترة في مستشفى أم درمان ويعمل الآن في عيادتة الخاصة بمنزلة بابي روف وما زال عزابيا عتيقا، ولكنه طلق السياسة واستراح من همها ..

Post: #30
Title: Re: أحمد طراوه ...أهلا
Author: محمد المرتضى حامد
Date: 01-10-2007, 09:46 PM
Parent: #14

Quote: مرحبا بالأخ الدكتور أحمد طراوة جارنا بأبي روف وزميلنا في الهم والإنسانية، واتمنى ان يطيب له المقام هنا وان يكون قلمه المعطاء وفكره الثاقب إضافة نوعية للمنبر ..


أها يا طراوه ، الصاوي المفيد خلاّ لي شنو؟ في ناس يا أحمد همهم سد نقص الآخرين وما عييت عن اكماله بادر الصاوي اليه. صح لسانك ياصاوي.
لك شكري واحترامي
.

Post: #27
Title: Re: أحمد طراوه ...أهلا
Author: محمد المرتضى حامد
Date: 01-10-2007, 08:59 PM
Parent: #10

حبيبنا النورالهادي ود عوض..
أداري وجهي خجلا حين أقرأ ماتكتب عني.
يانور ..العين، أنت تلبسني ثوبا يكبرني و(دثار خز ناعم الأسلاك منغوم الحفيف) لايشبه حالي وهذا من لطفك وأدبك وكرمك وهذا أيضا حال أهل الفن والجمال.
ماغبت عن المنبر الجميل عامدا لكن سلّم الأولويات أرهق كاهلي وهتكت عتباته كاحلي.
عندماأقنعت الحبيب طراوه بالمجئ الى هذى البقاع كنت واثقا أنه سيجتمع بأناس جميلين مثلك كما معظم أهل البيت ان لم يكونوا جميعهم، فما يجمع الأعضاء هنا أكثر مما يفرقهم وهذا ليس من باب المجاملة. سيسعد بكم أحمد يا نور.
لك الحب المصفّى.

Post: #13
Title: Re: أحمد طراوه ...أهلا
Author: abubakr
Date: 01-10-2007, 05:00 PM
Parent: #1

صديقي المرتضي .. عرفتك اسفيريا وفعلت الكيمياء الاسفيرية فعلتها فتصادقنا وصار اصدقاءك اصدقائي وكبرت شجرة الاصدقاء وتعلمت منهم - اقله ان قاموس الجيب رطانة-عربي ازدادت صفحاتو فعرفت النم والحت وعبور الانهار الجافة .. ويا صديقي احمد طراوة " صديق صديقي صديقي " شفت كيف البربري صار جهبوزا في لغة العراريب هو ملكة الدوبيت والا قوم ابوحريرة وام احمد واللا النصراني رافت والا العراريب المحرب وودشيقوق وودحماد بيقدروا يكتبو بيت شعر زي دة وكمان قربت ابقي قانوني جهبوز هو النصراني عادل سمير بيعرف في الدساتير - دستور يا اسياد- احسن من البرابرة ..
اها يااحمد صديق بربري اسفيري يمكن تحتاج يوم مترجم ...بعدين زولا دييل كلهم اصحابو يرحبو بيهو كيف وليه ...

اها مرحبا ....

Post: #29
Title: Re: أحمد طراوه ...أهلا
Author: محمد المرتضى حامد
Date: 01-10-2007, 09:14 PM
Parent: #13

المهندس أبوبكر سيدأحمد ..
ملك الرطانه..
يا باش يا هاش أهلنا النوبة أصحاب حضارة تحتفي بها القواميس وانت زدت عليها الأنفورميشن تكنولوجي تتويجا لآلاف السنين من الأبداع .
الشياب الذين ذكرتهم جميعهم أصدقاء أفخر بهم ويسعدني أن يكونوا على تواصل مع انسان مثلك اجتمع فيه العلم والأريحية والتواضع. ستضيف اليهم طراوة وستدعو لي.
لك المحبة يا بكري
.

Post: #15
Title: Re: أحمد طراوه ...أهلا
Author: Elmosley
Date: 01-10-2007, 05:15 PM
Parent: #1

أها جاكم كتّاب كتابه
هيع أنا اخوك يا أحمد
ودايما نفحاتك جميله يامحمد
ودعنا نرتشف من رحيق قلمه وخمره حتى الثمالة

Post: #17
Title: Re: أحمد طراوه ...أهلا
Author: عصام دهب
Date: 01-10-2007, 05:38 PM
Parent: #15

مرحباً بالدكتور / أحمد طراوة إضافة حقيقية لهذا المنبر ..
و نحمد الله أن أعزنا به نحن زقازيقاب المنبر ..
حضرنا الزقازيق في العام 1987م ولم نحظى بلقيا د. أحمد لكنا وجدنا صدى سيرته العطرة ..
و حتماً سنفخر بكونه من الزقازيقاب و سنسعد بصحبته هنا ..
حللت أهلاً د. أحمد .

Post: #33
Title: Re: أحمد طراوه ...أهلا
Author: محمد المرتضى حامد
Date: 01-10-2007, 10:24 PM
Parent: #17

Quote: مرحباً بالدكتور / أحمد طراوة إضافة حقيقية لهذا المنبر ..
و نحمد الله أن أعزنا به نحن زقازيقاب المنبر ..
حضرنا الزقازيق في العام 1987م ولم نحظى بلقيا د. أحمد لكنا وجدنا صدى سيرته العطرة ..
و حتماً سنفخر بكونه من الزقازيقاب و سنسعد بصحبته هنا ..
حللت أهلاً د. أحمد .


الدهب عصام..
نعم .. أحمد أعصار جميل يعيد ترتيب الفوضى بمفعول عكسي ويجيب على تساؤل محمود درويش في قصيدته الشهيرة (بيروت خيمتنا الأخيرة) .. هل مرّ المحارب من هنا ؟ نعم مرّ بالزقازيق وخلّف آثارا بحجم أبي سمبل أو تزيد ، كان في قلب العمل العام ولم يتخندق في حزبية ضيقة فصاحب الجميع وتخرج وفي قلبه بكالوريوس المحبة والتواصل وفي قلبه درجة علمية في التطبيب.
شكرا يا عصام على الزيارة ومصطلح (الزقازيقاب). شايف المهندس أبوبكر مبسوط من المصطلح وتخريجات أهله من الحلفاويين.
لك مودتي.

Post: #32
Title: Re: أحمد طراوه ...أهلا
Author: محمد المرتضى حامد
Date: 01-10-2007, 10:04 PM
Parent: #15

Quote: أها جاكم كتّاب كتابه
هيع أنا اخوك يا أحمد
ودايما نفحاتك جميله يامحمد
ودعنا نرتشف من رحيق قلمه وخمره حتى الثمالة


كل ما يأتي من الجميلين جميل.
الفنان الأديب الموصلي مع مرحبيك يا أحمد.
أخي الموصلي.. رغم أن غياب طراوه جسدا عن بقاعنا خلّف شاغرا بحجم الضياع واليتم الا أن وجوده بينكم يترك بعض العزاء ،أو هكذا نمني النفس، فأحمد ظل لصيق الروح لعقود عشنا فيها ليالي كلهاطهر (بلا راح سكارى) ويقيني أنكم أهله وقنديل زيت (يضيئ له في ليالي الشتاء) كما قال نزار.
شكري لك ومحبتي يا راعي الحدائق منذ عهد الرشيد.

Post: #16
Title: Re: أحمد طراوه ...أهلا
Author: محمد ابراهيم قرض
Date: 01-10-2007, 05:32 PM
Parent: #1

هو طراوة ده منتظر شنو ؟؟
الناس كلها فاتحة خياشيمها و قاعدة ..
هلا و مرحبا يا أحمد و شكرا مرتضى ..

Post: #34
Title: Re: أحمد طراوه ...أهلا
Author: محمد المرتضى حامد
Date: 01-10-2007, 10:38 PM
Parent: #16

Quote: هو طراوة ده منتظر شنو ؟؟


د.قرض؟
كل سنه وانت والأسره في أسعد حال .
مش محمد الأمين بيغني (العيد الجاب الناس لينا..) ، يا قرض ، يعني نسيتنا خلاص؟
انت قالوا ليك أنا شفيت من سقمي يا (غزالا) فرّ من اِرم؟ يعني لو صاحبك طراوه ما ظهر كنت حاتواصل في هجرك الطال واستمر؟
تحاياي 1000 مليمول أو مليون سي سي حسب كلامكم العجيب داك وروشتاتكم الهيروغلوفية البتكتبوها انتو وناس طراوه تقول حجر رشيد.
مهرجان مسقط مهرجان ..تعال.
سؤالك محوّل لطراوه.
محبتي يا العزيزّ.

Post: #19
Title: Re: أحمد طراوه ...أهلا
Author: abubakr
Date: 01-10-2007, 06:22 PM
Parent: #1

Quote: نحن زقازيقاب المنبر


وكمان تقولو عني بربري وما بعرف نضم العراريب ؟؟

زقازيقاب : بس بشان اكتبها اصابعيني ورمن ... جبتها من وين دي ..

ات احسن واحد ياعصام ..ات فيك عرق برابرة ..

Post: #22
Title: Re: أحمد طراوه ...أهلا
Author: Fadel Alhillo
Date: 01-10-2007, 07:25 PM
Parent: #1

مرحبا د.احمد طراوه

سعدنا بقدومك , وعساك ان تكون بخير ؟

يأاااااه .. مدة طوبله لم نلتقي !!!

Post: #23
Title: Re: أحمد طراوه ...أهلا
Author: عبدالكريم الامين احمد
Date: 01-10-2007, 07:41 PM
Parent: #22

Quote: مرحبا بالدكتور احمد طراوة الزقازيقي الانيق الذي سمعنا عنه الكثير الجميل

نعم يا اخي ود المرتضي لم ادرس في الزقازيق الا ان اسم الدكتور احمد طراوه وردت سيرته
كثيرا في احاديث الاخوة الزقازقيين بكل خير وحب كبير واعجاب
فمرحب به بيننا..

Post: #24
Title: Re: أحمد طراوه ...أهلا
Author: فاروق حامد محمد
Date: 01-10-2007, 08:06 PM
Parent: #23


حمدالله على سلامتك ياودحامد المرتضى

ونرجو أن تكون عودتك قوية بمثل بدأك

الأستاذ أحمد سليمان المحامي كان أكثر

الناس استعمالا لكلمة طراوة وكان يقول لكل

محبب منه يا طراوة ولقيني ذات يوم أمام

بابا كوستا في السبعينات وكان وزيرا للصتاعة

فوقف عربيته الحكومية وقال لي ماشي وين ياطراوة

وطبعا عمك أحمد مشهور بلبانته التي يلوكها في كل

الأوقات بعد تركه للسجاير فلما وصلته وجدته يمضغ في

لبانته فرددت ( عليك الله هسع طراوة أنا ولا انت يا أبلبانة)

وشاعت هذه المقولة وسط الزملاء الصحفيين وقتهاوصارت مثلا ,,,,

وما دام الدكتور ساكن أبوروف فلابد ان يكون سمعها من

أبوسلمون أو احتمال يكون قريبه.....أو جاره ,,,

الف مراحب بيك يا د.طراوة ولك خالص الود

Post: #48
Title: Re: أحمد طراوه ...أهلا
Author: محمد المرتضى حامد
Date: 01-11-2007, 07:14 PM
Parent: #24

فاروق حامد
أستاذنا الجليل..
كلمة (طراوه) دي كلمة ما بتتشرح بتتحسّ بس ، أحمد سليمان المحامي الله يطراه بالخير يبدو أنه أحس المعنى فعالج به أو أطلقه على عدة مواقف وشخوص التقاهم في خطاه (التي مشاها). عندي واحد صاحبي في مسقط لما تعجبو حاجه يقول ليك بس (همبريب) واستطيع تفهم أستخدامه المصطلح بقراءتي لخلفيته الجغرافية. بالله مش جميل أن يقول الشاعر أرجوك يانسيم روح ليهو بأشواقي صرّح ليهو ، وآخر يقول يانسيم ارجوك روح لها وحييها الخ..يعني حتى الرسول كان نسيما وليس ساعي البريد الصارم ذاك. تعرف يا فاروق سخانتنا المستمره 13 شهر في السنه شهّتنا تلك المعاني أما في ظل برودة الطقس هذه الأيام في امريكا الشمالية العايز يثني على أخوي أحمد ده مفروض يقول ليهو يا (دفاوه).
يا فاروق مسئول من الخير ، شيقوق دا لقى شنو في السودان أم لازال يعبر النهر الجاف الماسكو بيهو أبوبكر؟

Post: #50
Title: Re: أحمد طراوه ...أهلا
Author: فاروق حامد محمد
Date: 01-11-2007, 09:12 PM
Parent: #48

Quote: يا فاروق مسئول من الخير ، شيقوق دا لقى شنو في السودان أم لازال يعبر النهر الجاف الماسكو بيهو أبوبكر؟



ود شيقوق لقى (ركشات) !!!!!!!!!!!!!!

Post: #45
Title: Re: أحمد طراوه ...أهلا
Author: محمد المرتضى حامد
Date: 01-11-2007, 02:32 PM
Parent: #23

Quote: نعم يا اخي ود المرتضي لم ادرس في الزقازيق الا ان اسم الدكتور احمد طراوه وردت سيرته
كثيرا في احاديث الاخوة الزقازقيين بكل خير وحب كبير واعجاب
فمرحب به بيننا..


العزيز عبدالكريم الأمين..
سلامي وعيدك مبارك وحمدالله على السلامة، والله حاسدك على اجازتك (الماخمج).
ياالعزيز ..أخي طراوه كان من أعيان الزقازيق وكما ذكر غيري أنه ترك بصماته على من زامله من الطلبه والطالبات وأيضا على الأحداث ورغم الأختلاف السياسي ( وشخصي الضعيف ممن اختلف معه ) الا انه كان صديق الجميع لأنه كان يدرك أن (التبدّل) هو السمة الغالبة في الشأن السياسي وهذا قانون الحياة (الثابت) . لاشك أن الناس يتحدثون عنه باعجاب لأنه لا يشتم أحدا ولا يهاتر ولا يدعي معرفة بما لايعرف كما أنه يستمع اليك حتى تكمل ما تود قوله ، لكن هذا ليس كل شئ بل هو يضبط موجات ارساله واستقباله حسب مكونات الطرف الآخر سنا وثقافة وجندرة الخ.. وعلى الرغم من أننا أبناء فصل دراسي واحد ونتحاور بحماس الا أن أحمد يناقش ابني الأكبر (أكرم) ابن الرابعة عشر بذات الحماس والأهتمام، لذا الكل راض عنه.
لك محبتي يا كريم وبلغ سلامي لأصحابك حميم وضحيه وأولاد الناظر علي نمر (حسن وحسين) وجميع أصدقائي بطرفك.
لك الموده والأعزاز.

Post: #42
Title: Re: أحمد طراوه ...أهلا
Author: محمد المرتضى حامد
Date: 01-11-2007, 09:38 AM
Parent: #22

الأخ الفاضل الحلو..
لك الشكر على الترحيب وأتمنى على الله أن تستعيدا تواصلكما بعد غياب.
لك الود

Post: #25
Title: Re: أحمد طراوه ...أهلا
Author: علوبه
Date: 01-10-2007, 08:24 PM
Parent: #1



كده بلغة التسجيلات بنكون كسبنا لاعب حريف ورهيف (قلبو)

كده بلغة الكلام بنكون كسبنا قلم نحن فى حوجة له فى زمن قاسى وصعيب

نشكر سيد الحوش ونشكرك يامحمد وننتظرك ياطراوة

Post: #51
Title: Re: أحمد طراوه ...أهلا
Author: محمد المرتضى حامد
Date: 01-11-2007, 11:28 PM
Parent: #25

Quote: كده بلغة التسجيلات بنكون كسبنا لاعب حريف ورهيف (قلبو)

كده بلغة الكلام بنكون كسبنا قلم نحن فى حوجة له فى زمن قاسى وصعيب

نشكر سيد الحوش ونشكرك يامحمد وننتظرك ياطراوة


د.علي الشيخ (علوبه)..
والله والله صورتك مع خاتم مدرسة المظاهر ( الما خدّاعه) أعادتني الى حي المظاهر جوهرة المسالمه وحي العرب بكل تفاصيل الحي الأسطورة الذي لن يتكرر. بتبالغ يا علي ، بالطريقه دي طراوه ود أبوروف حايفكر في العوده الى السودان اليوم قبل الغد. لمن لايعرف ذلك الحي أقول هو المكان الذي يجمع بين حي العرب والمسالمة غرب شارع الشنقيطي وهو الملتقى الذي طاف فيه وحوله كل عباقرة الحقيبة والهلال والمريخ والجابري وابراهيم عوض وميرغني المأمون وخضر الحاوي وابنه الموسيقار الرائع عبداللطيف وكل من أسس للفن قديمه وحديثه وسكنه أخلاط من الناس من مختلف الأديان والأعراق والأيديولوجيات وأفخر أني ولدت فيه وكنت أعتقد أن كل هؤلاء أهل لي لأنهم كانوا كذلك سلوك تجاهي وفي توادهم وتراحمهم وتكاتفهم في أفراحهم واتراحهم وكانت كل البيوت بيتي. هيييييييه . يا علي ، اتمنى أن يجيئ طراوه المؤرخ ليكتب عن عبدالرحمن الريح وسيد عبدالعزيز وحسن عطيه (كسره) وبقية العقد الفريد. ياخي تمنيت لو أني وهبت قدرة السرد الجميل و حكي التأريخ وحبك الرواية ورسم اللوحة بالكلمات لأنقش عن ذلك الحي ( سطورا حلمت بهن بلحم جفوني وفوق رموش العيون) ، داير بوست بعنوان (المسالمه حي العرب) من جامع الكوارته غربا حتي الكنيسة شرفا ومن البربري جنوبا الى مدرسة محمد حسين شمالا. ياخي دي منطقة نووية اشعاعها غطى السودان ، يوتوبيا الزمن الجميل هو ذلك الحي ولاتحسبن قولي ضرب من النوستالجيا غير الرشيده.


أعود لمسألة (رهيف قلبو) اللي فوق دي وأقول ليك كلام قلتو في المنبر ده قبل كده ملخصو انو أي زول قلبو ما رهيف وما بريد ده ما زول طويله معاي. نعم ، طراوه قلبو رهيف وأحسب أنه كلو غشاء تامور pericardium كان أنا ماغلطان ، لذا كان الأعزاء يستعينون بأحمد في نوبات المرض اللعين ولم يكن في حاجة لأن يستخدم الأجهزة الطبية المتوفره في عيادته ليقوم بعملية رسم القلب أو مايعرف بال ECG وعوضا عن ذلك يفيدك مباشرة أنك (مرضان باكي فاقد علاج طبيبي) والسبب (زمنك الخائن) ، الله يطراك بالخير ويشفيك يا بادي محمد الطيب.
يا علي.. حليل زمن الصبا ومناي ( تعود لمسالمتك سالم وعوده سلامه يا مسالم).
محبتي .

Post: #26
Title: Re: أحمد طراوه ...أهلا
Author: Elmoiz Abunura
Date: 01-10-2007, 08:41 PM
Parent: #1

Dear Mohamed
Welcome Dr. Ahmed Tarawa,and
Thanks for introducing Ahmed Tarawa to the forum. My cousin Dr. Yassir Sibeika, and my old friends Dr. Amir Khalil, Dr. Abdelmalik Alhadyyia introduced him to me in Zagazig of 1982.
Iam looking forward for Ahmed's contributions
Regards

Post: #28
Title: Re: أحمد طراوه ...أهلا
Author: Ahmed Yousif Abu Harira
Date: 01-10-2007, 09:05 PM
Parent: #26

أستاذنا محمد المرتضى حامد،

لك التجلة والاحترام ،،،

ومرحبا بالصديق العزيز احمد طراوة

وأحمد طراوة لمن لا يعرفه طبيب وفنان ووسيط اجتماعي أعظم من اي سفارة أو اي نادي...هو بس لحاله امه في ثوب رجل...

أخر عهدي بالدكتور الشاطر والفنان المرهف كانت في مسقط في وقت ما من عام 2001 ، قبل 11 سبتمبر بقليل..

وللدكتور أحمد أحفظ الكثير من الذكريات الجميلة وأجملها على الأطلاق شريط فيديو مع الفنان العملاق بادي محمد الطيب وكان ذلك فيما أذكر في وقت ما من العام الذي تخلقت فيه الألفية الجديدة.. لازم ارجع للشريط علشان اتذكر التاريخ بالضبط...

مرة أخرى مليون مرحب بالدكتور/ أحمد طراوة


وخمسمائة مليون مرحب بالاستاذ الكبيبر محمد المرتضى حامد

Post: #31
Title: Re: أحمد طراوه ...أهلا
Author: احمد حماد ادريس
Date: 01-10-2007, 09:52 PM
Parent: #28

الاخ / محمد المرتضى حامد --كل عام وانت بالف خير --من كتر الغيبات حتما سياتى بالغنائم والدرر وقالت العرب استبشر خيرا ان تاخر رسولك --وه انت تعود متابطا الدكتور احمد طرواة --مرحبا بالدكتور وحبابك عشرة بلا كشرة وحبابك مية ما تنقص ولا وقية وحبابك الف ما ينقص ولا حرف مرحب احمد بين اهلك تشيلك العينييين وكان تعبن بشيلك القلب--

شىء مؤسف ان احمد موجود فى بلاد اليانكى ونخن احوالنا الصحية فى الحضيض يا رب اعد لنا طيورنا المهاجرة الى ديرتهم ليعمروها وينشرون فيها الرخاء والنماء والحياة --والتحية للجميع

Post: #61
Title: Re: أحمد طراوه ...أهلا
Author: محمد المرتضى حامد
Date: 01-12-2007, 05:49 PM
Parent: #31

أحمد حماد ادريس..
Quote: مرحبا بالدكتور وحبابك عشرة بلا كشرة وحبابك مية ما تنقص ولا وقية وحبابك الف ما ينقص ولا حرف مرحب احمد بين اهلك تشيلك العينييين وكان تعبن بشيلك القلب--

شىء مؤسف ان احمد موجود فى بلاد اليانكى ونخن احوالنا الصحية فى الحضيض يا رب اعد لنا طيورنا المهاجرة الى ديرتهم ليعمروها وينشرون فيها الرخاء والنماء والحياة --والتحية للجميع


الله يخليك على كلامك السمح ده ، تعرف يا ود حماد أنا مندهش انو حتى الآن مافي عزيز من المرحبين اللي هنا كلهم دخل ايدو فاضيه، كل له ذكريات وشجون ان كانت مع أحمد أو صحابه ، وعندما قدمته كنت أدرك أنه (منتشر) في الأطلس بشكل كبير ومع كل أنواع البشر على اختلاف مشاربهم ، أحمد كان (مشاربهم) دي ماعجبتك قول لي عووك باقي أنا مع التعب مرات بفوِّت. أما ياحبيب عودة الطيور المهاجرة دي مسألة تتناقض فيها الأماني مع قانون الحراك الأجتماعي اللي بيعرفوه أهل الأنثربولوجي فالأنسان ، وأنت خبير أقتصاد ، عرف الهجرات طلبا للرزق والأمن بشكل أساسي منذ قبل هجرة الحبيب المصطفى الى المدينة وأصحابه الى أثيوبيا التي كان فيها ملك لايظلم (نجاشي) والشاهد جعفر بن عبدالمطلب ولم يعد من أسباب الهجرة ما كان يتغنى به بعض العاربة في العصر الجاهلي في مسألة المحبه وكده أو ماتغنى به بعض المغنيين الكومبارس من قماش (حنِّي علي أنا يا تتي بهاجر ليك وين ما كنتى). عليه فأنا وأنت وطراوه وغيرنا نحلم بالعودة مع كل زفرة وتتناقص الزفرات وسنظل نتمنى حتى يقضي الله أمرا كان مفعولا اما بتغيير الأسباب أو اكتمال الزفرات. أظن أن المرحوم الكد قال : ان المغتربين يبنون بيوتا ليشيّعيوا منها.
الله يديك طول العمر

Post: #60
Title: Re: أحمد طراوه ...أهلا
Author: محمد المرتضى حامد
Date: 01-12-2007, 05:12 PM
Parent: #28

أحمد يوسف أبوحريره..
Quote: وأحمد طراوة لمن لا يعرفه طبيب وفنان ووسيط اجتماعي أعظم من اي سفارة أو اي نادي...هو بس لحاله امه في ثوب رجل...

أخر عهدي بالدكتور الشاطر والفنان المرهف كانت في مسقط في وقت ما من عام 2001 ، قبل 11 سبتمبر بقليل..

وللدكتور أحمد أحفظ الكثير من الذكريات الجميلة وأجملها على الأطلاق شريط فيديو مع الفنان العملاق بادي محمد الطيب وكان ذلك فيما أذكر في وقت ما من العام الذي تخلقت فيه الألفية الجديدة.. لازم ارجع للشريط علشان اتذكر التاريخ بالضبط...

مرة أخرى مليون مرحب بالدكتور/ أحمد طراوة


صدقت والله أنه بعثه دبلوماسية متحركة. أما ذكريات الشيخ طه (بادي محمد الطيب) وطراوه وأحمد القرشي في مسقط حين شرفنا قائد الأسطول بحضور دام شهورا سقانا فيها كؤوس مترعات من عهد الرشيد، تلك حقبة لن يتخطاها طراوة في هذا المنبر . شايف مديونيتك للمرحبين بقت قدر شنو يا طراوه ؟
شكرا يا أحمد على ترحيبك وثناءك وبحق أقول ان شخصي لايستأهل كل ذلك لكنه كرمك وطيب سجاياك.
لك مودتي ومحبتي.

Post: #58
Title: Re: أحمد طراوه ...أهلا
Author: محمد المرتضى حامد
Date: 01-12-2007, 12:25 PM
Parent: #26

El Moiz Abu Nura
ياسيدي لك تحياتي وتهاني بالأعياد كلها.
ياسلام يا معز انت بتعرف ياسر شبيكه وعبدالملك الهديه وأمير خليل ، ياسلام ياخ ، هؤلاء أناس يذكر الأدب والتهذيب كلما ذُكِروا. جميعم كان من أهل العمل العام أيام الطلب في أرض الكنانة التي مابخلت علينا بجامعاتها ويحزنني أنهم ، حد علمي ، ما زالوا في الدياسبورا الغريبة التي أنزفت السودان حد الترنح.
تحاياي الباسمه لك يا غالي.

Post: #35
Title: Re: أحمد طراوه ...أهلا
Author: raheel
Date: 01-10-2007, 10:39 PM
Parent: #1


هلا ومرحبا باهل مسقط د/ احمد طراوة واستاذنا محمد المرتضى
حفلة الشاى دى احتفاء واحتفال ياجماعة ماتزعلو كبايتين واحدة للدكتور وواحدة للاستاذ مافى زول اجئ اتسلبط

Post: #36
Title: Re: أحمد طراوه ...أهلا
Author: نادية عثمان
Date: 01-11-2007, 00:15 AM
Parent: #35

الف الف اهلا ومرحبا بك اخى أحمد طراوة

Post: #37
Title: Re: أحمد طراوه ...أهلا
Author: Kostawi
Date: 01-11-2007, 00:43 AM
Parent: #36

Quote: الاستاذ الكبيبر محمد المرتضى حامد


يا جماعة كدي روقواو إنمهلوا, أيه دي قصة يا أستاذ و يا كبير,
أستاذ دي بنبلعا ناشفة, لكن كبير دي كمان كتيرة شويه!!!

طراوة و مرتضى ديل أولاد في عمر الزهور و الشباب و ما شافو أي حاجة في الدنيا دي و ما حجوا كمان!

الشاب جدا و الظريف جدا و الأخو جدا محمد المرتضى حامد
لك كل الود و التحايا و للأسرة الكريمة عاطر الأماني و العوافي

وكل عام و أنتم بخير


و مرحب بالأخ و الصديق أحمد طراوة ولأسرته كل التحايا و الأمنيات الطيبة


بعد كده يامحمد أنا حا أزرد ليك محمد الفاتح و أجرو حفيان لسودانيزأون لاين

حا يفضل لينا مستر جوافة و عادل التجاني.

أنا حا أكون الألفة في مهرجان التوثيق للجيميين العالمي (Sudaneseonline)

لكما ودي

Post: #38
Title: Re: أحمد طراوه ...أهلا
Author: Sabri Elshareef
Date: 01-11-2007, 00:59 AM
Parent: #1

يا للسعادة محمد المرتضي

الدكتور احمد اضافة للتنوير والوعي وهو منذ زمن يعمل من اجل الانسان والانسانية

واتمني ان يطيب له المقام للحوار والعمل من اجل نشر قيم الحرية والقيم النبيلة

الحركة الطلابية بمصر لها ارث عتيق من اسامة الكاشف وحنان كرار

وامنة الكارب ويوسف بشير الي اسامة مامون وكيان اسيوط

لا انسي فاكهة مصر كمال قسم الله ومعاوية الوكيل وعبد الملك الهدية ومحجوب جلي ومحمد
الامام وعلاء السيد وضياء وخالد عبد النور وعبد الحليم حسن ومحمد جعفر وامل الخاتم

والقائمة تطول وتطول

مرحب بالدكتور احمد طراوة

وهو من الدائرة الجنوبية التي كان جنوبيا هواها كما قال الفيتوري

دائرة الوعي ابوروف وبيت المال

ننتظر حضرة الاخ احمد طراوة والشكر لمجمد المرتضي الذي قدم الينا احد الوجوه التي يحتاجها البورد الان


صبري الشريف

Post: #39
Title: Re: أحمد طراوه ...أهلا
Author: م. سيد احمد قدورة
Date: 01-11-2007, 02:44 AM
Parent: #38

اخى احمد طراوه
احييك من ابوروف من ملعب البلى قدام حوش ناس بت الفكى فى ود البنا.
وهنا يلزمنى أن اقف برهة للأترحم على اخونا طارق على الذى رحل عنا منذ اعوام عديده ولكننا ما زلنا نعتصر حزنا على فراقه.
رحمه الله رحمة واسعه وأسكنه فسيح جناته.
أخى أحمد منذ سنين عددا لم نلتقى.
أنا الان عدت الى وطنى وعقبالك.
ومرحبا بك عضوا بيننا.

Post: #40
Title: Re: أحمد طراوه ...أهلا
Author: mohmmed said ahmed
Date: 01-11-2007, 06:12 AM
Parent: #39

الف مرحب بالصديق
احمد طراوة
واكيد دا مكسب
ونحن فى انتظار كتاباته العميقة والجميلة

Post: #71
Title: Re: أحمد طراوه ...أهلا
Author: محمد المرتضى حامد
Date: 01-13-2007, 07:20 PM
Parent: #40

mohmmed said ahmed
Quote: الف مرحب بالصديق
احمد طراوة
واكيد دا مكسب
ونحن فى انتظار كتاباته العميقة والجميلة


ومرحبا بك أخي محمد ولننتظر الكتابة (العميقة الجميلة)

لك الشكر والتجله.

Post: #41
Title: Re: أحمد طراوه ...أهلا
Author: شكرى سليمان ماطوس
Date: 01-11-2007, 07:04 AM
Parent: #1


Quote:
هو طراوة ده منتظر شنو ؟؟
الناس كلها فاتحة خياشيمها و قاعدة ..
]


التحية لك ود المرتضى ،،، حسى بأن سلالم الأولويات هدت الحيل و جابت الخرف ......
إن أسعفتك الذاكرة !!! كانت لنا ايام فى كثير من البقاع ،،،

(أواخر 1979 ّ ---- بدايات 1980)
فى حى ود ارو والأهلية : أبعث التحايا للمهندس : عصام عبدالصمد، د.عمر أرو ، أحمد (أخو التومات)، عادل القرد(كما يحلو لنا)، أحمد التجانى، د.عادل التجانى على ..... وآخرين.+.+.+

فى الزقازيق: مرسال شوق لناس (لكـــوز) وتحايا عطرة طارق دفع الله عبدالعزيز، محمد جبارة سليمان، مشعل ، صلاح خالد، د.أحمد محجوب ، حيدر أحمد عمر + + + + + + + + +

ده أصعب إمتحان أخضع ليه ّذاكرتى ،، والنتيجة الفشل..... سمات الأوجه تتراءا ولكن الأسماء خانتنا...

لأحمد طراوة نشرع كل الأبواب ترحاباً ،،، عشمنا نفحات ذكرى من الزمن الذى ولى ....
وليت الشباب يعود يومأً



Post: #43
Title: Re: أحمد طراوه ...أهلا
Author: محمد ابراهيم قرض
Date: 01-11-2007, 10:32 AM
Parent: #1

Quote: مش محمد الأمين بيغني (العيد الجاب الناس لينا..) ، يا قرض ، يعني نسيتنا خلاص؟
انت قالوا ليك أنا شفيت من سقمي يا (غزالا) فرّ من اِرم؟ يعني لو صاحبك طراوه ما ظهر كنت حاتواصل في هجرك الطال واستمر؟
تحاياي 1000 مليمول أو مليون سي سي حسب كلامكم العجيب داك وروشتاتكم الهيروغلوفية البتكتبوها انتو وناس طراوه تقول حجر رشيد.
مهرجان مسقط مهرجان ..تعال.


و أنا أقدر يامرتضى ..
بالمقاييس الانسانية و الاجتماعية محمد المرتضى
رجل يتطوف حوله ناس السلطنة زرافات و وحدانا ..
و محمد قرض ليس بإستثناء .. بس القدم ليهو رافع
يا مرتضى .... لك الود و المحبة ...

Post: #44
Title: Re: أحمد طراوه ...أهلا
Author: Abdul Monim Khaleefa
Date: 01-11-2007, 12:45 PM
Parent: #43

مرحباً بالصديق الدكتور أحمد طراوة عضواً مشاركاً في المنبر العام لسودانيزأونلاين .. والتهنئة للأخ المهندس / بكري أبو بكر وللأعضاء وللقراء بذلك ، وعليهم أن يتهيأوا لتلقي فيض دافق من الفن والأدب والسياسة والتاريخ والذكريات والطرافة والظرف المكمل . وأثق في أن بوستاته المرتقبة ستكون واحة ظليلة ينشدها كل من ترهقه المعارك المنبرية الساخنة ، ومن تحبطه مسارات الأحداث العامة .

يتمتع الدكتور طراوة بسعة الأفق والسماحة والحلم وقبول الرأي الآخر .. وهو محصن ضد الانفعال ؛ ويتقبل أكثر الآراء معارضة واستفزازاً بهدوء عجيب .. ويتجاوب معها بموضوعية مدهشة .. وبذلك يكسب معارضيه بيسر .

لو لم يذكر الأخ مرتضى أن د. طراوة لم يحضر الطرماج ، أو لم يشر معاصروه في جامعة الزقازيق إلي سنوات دراسته ، لحسبته خريج كلية غردون .. ومن جيل الرئيس الأزهري والسيد/ الصديق المهدي ، والسيد/ عبد الله خليل ، والسيد / خلف الله خالد ، والأمير نقد الله ( الوالد ) !! وذلك لأنه عندما يتحدث عن أي من هؤلاء الرموز ورفاقهم يتحدث حديث الثقاة ، ويسترسل في تفاصيل مذهلة غير موجودة في المصادر المعروفة .

لا أود أن أحرم القراء من المفاجآت المرتقبة ، لكن فقط أقول لهم أنهم موعودون بموائد حافلة بالأصناف الطيبة والشهية المستمدة من خلفيات واهتمامات د. طراوة المتعددة والمتنوعة ؛ حيث أن د. أحمد طراوة هو عتيق ، وأبو صلاح ، وسيد عبد العزيز ، وإبراهيم عبد الجليل ، والأمي ، وبادي ، وحدباي ، ومبارك حسن بركات ؛ وهو أحمد القرشي ، والشيخ قريب الله ؛ وهو خضر بشير ، وابراهيم عوض ، ومصطفى سيد أحمد ؛ وهو برعي ، وصديق منزول ، وعبد الخير ، وترنة ؛ وهو حسن الطاهر زروق ، وقاسم أمين ؛ وهو مبارك زروق ، وعم أزرق ، ومحمد توفيق ، وعبد المحمود أبو ؛ وهو موريس سدرة ، وأحمد نجيب ؛ وهو التيجاني علي ، وأحمد داوود ؛ وهو الخليفة حمد كمبال ، والخليفة النور ؛ وهو الشيخ قريب الله ، وشيخ البرعي ، وشيخ الصامت ؛ وهو علي المك ، وخالد الكد ، وهو أبو موزة ، وعبد الكريم الزعيم ؛ وهو حاج نقد الله ، وهريدي ؛ وهو سينا ، والهادي نصر الدين ؛ وهو شاندو ، وبتوك ؛ وهو جون قرنق ، ودريج ، وبولاد ، وعبد العزيز خالد ، وعبد العزيز الحلو ، وبازرعة ؛ وهو دكتور حليم ، ودكتور داؤود ، ودكتور علي فضل ؛ وهو محجوب محمد صالح ، والطيب زين العابدين .. وهو عبد الفتاح محجوب ، وهو التقدم، والوعي ، والاستنارة ؛ وهو التنوع والوحدة ؛ وهو السودان الجديد .

قدم الدكتور طراوة للنادي السوداني بمسقط إسهامات ثرة ؛ بل هو أحد الذين أعطوا هذا النادي شخصيته المميزة والمحترمة . ولا تزال أصداء ليلة الأغنية السودانية التي نظمها وأشرف عليها ( في إطار احتفالات الاستقلال قبل عامين ) تتردد حية في الأذهان ، خاصة مع تقديمه الراقي والممتع الذي شاركته فيه الطفلة الموهوبة لونا الزاكي عبد الحميد ( ربنا يحفظها ) للمبدعة الأستاذة / إلهام عبد الخالق ، التي أطربت الجميع بشدوها الصداح وإنشادها العذب لأغنيات الخليل ( والذي وثقته الأخت عشة بت فاطنة ونقلته للمنبر في حينه).
وعن الطرافة والظرف يكفي أن أذكر أن د. طراوة كان قد قدم بالنادي السوداني بمسقط محاضرة عن " ظرفاء أم درمان " امتدت لثلاث ساعات !

أتوقع أن تثري هذه الخلفيات العريضة المنبر العام ، وتضيف إليه الكثير من عناصر المتعة والجاذبية .. حديث الدكتور طراوة دائماً مشوق وعذب وذو شجون .. وأتوقع أن تكون كتاباته بنفس أسلوبه الجذاب والفريد في الكلام والرواية الشفاهية .

التحية والترحيب مرة أخرى بالأخ د. طراوة ، والتهنئة للأخ المهندس / بكري أبو بكر ، وللأخوة الأعضاء بهذا الكسب ، والشكر للأخ العزيز الأستاذ / محمد المرتضى حامد (المهدي للقراء الدرر الغوالي !).

عبد المنعم خليفة

* حاشية
لا يعرف د. طراوة فجوة الأجيال ، بل هو يخترق الأجيال المختلفة بسهولة ويسر .. فقد كان صديقي .. ولكنه الآن صديق أصغر أبنائي ( وذلك للتمويه عند محاولات التعرف على عمره الحقيقي ، والذي سيظل سراً !) .

Post: #46
Title: Re: أحمد طراوه ...أهلا
Author: سمية الحسن طلحة
Date: 01-11-2007, 02:35 PM
Parent: #44

ا لتحية لك محمد المرتضى
على هذا الدفق السخي المترف بالإبداع
أقل مايقال فى حق كل كريم ماقيل فى الرشيد:ـ
خليفة الله إن الجود أودية
أحلك الله منها حيث تجتمع
إن أخلف الغيث لم تخلف انامله
أو ضاق أمر ذكرناه فيتسع
نرحب معك بالرجل الحاوية د.طراوة الذى تجد بداخله كل الموسوعات
طب، أدب،سياسة،فن وتاريخ شامل...والذى عرفناه على منبر النادى الثقافى
السودانى بمسقط فقد كان الدينمو المحرك لكل نشاط وكان شعلة لاتنطفىْ
نهنىء أنفسنا بوجوده هنا شمس تشرق فتمحو الدجنة وبدر يتلألأ فيتسامر عشاق
الكلمة الراقية بكل سمو وعظمة.
والشكر أجزله للمهندس بكرى أبوبكر
سمية الحسن طلحة



Post: #47
Title: Re: أحمد طراوه ...أهلا
Author: ست البنات
Date: 01-11-2007, 02:50 PM
Parent: #1

أهلا بالأضافة الأخ طراوة -

ويا ريت محمد طراوة كمان يطل !

ست البنات .

Post: #49
Title: Re: أحمد طراوه ...أهلا
Author: abubakr
Date: 01-11-2007, 07:50 PM
Parent: #1

بعض ممن حولي في العمل او غيره يدعون بانني Resourceful يعني بعرف حاجات شوية اكتر من الشوية وكثيرا ما انفي ذلك لانني متاكد بانني جاهل والعاقل من عرف جهله .. ومن فترة قصيرة اي بعد ان تحسنت لغتي العربية الاسفيرية بعض الشئ وصرت الاوع الفطاحل العراريب والمستعريبين اكتشفت اني لا بعرف حاجة وجاهل دي ذاتها لو قابلتني فيس تو فيس لركبتني تيمس عم ودشيقوق المغرز في ضفة النهر الجاف ....يا جماعة كلكم طلعتو بتعرفو احمد طراوة او سمعتو عنو كثير الا البربري انا وخلتوني قد السمسمة واصغر ...ملعون ابو الغربة والقعدة مع العراريب الغير عرريبنا .. الواحد يعرف كل الزلنطحية العرريب الغير عرريبنا وما يعرف عرريبنا .. يااحمد طراوة البربري"انا" متاسف كتير كتير لانو ما عرفك من قبل ولولا المرتضي كنت ساكون سادرا في جهلي فانت كما قرات خسران الما بعرفك وما عرفك فبالله عليك طل علينا فالذي بقي اقل بكثير من الذي مضي من اعمارنا ( اكتر من نصف العمر قضيناه في عراقيب صحراء تابط شرا ) ....

Post: #52
Title: Re: أحمد طراوه ...أهلا
Author: سمية الحسن طلحة
Date: 01-11-2007, 11:39 PM
Parent: #49

المرتضى
يقينى انك كريم ولاترد سائل
لذا سمحت لنفسى بالرد هنا
ففى دارك اناس لايمكن تخطيهم.
Quote: كلكم طلعتو بتعرفو احمد طراوة او سمعتو عنو كثير الا البربري انا وخلتوني قد السمسمة واصغر

أبوبكر
انت ماقلت بتعرف الدستور! طيب شنو الجابك بى هناقبلنا وبدون علمنا؟ كنا على الأقل أديناك معلومة
تنافس بيها.
Quote: ( اكتر من نصف العمر قضيناه في عراقيب صحراء تابط شرا ) ....

ياخوى الزول ده أختاهو...انت عاجبك الإسم ولا شنو؟

Post: #54
Title: Re: أحمد طراوه ...أهلا
Author: Saifeldin Gibreel
Date: 01-12-2007, 00:05 AM
Parent: #52

100 مليون مرحب بالصديق الدكتور احمد طرأوة هذا الرجل الشفيف والذى كم تمنيت انضمامه لهذا المنبر منذ فترو طويلة فكم كنت اردد مقولة سيدنا عمر ابن الخطاب فى عصره ! اللهم انصر المنبر بدكتور احمد طراوة وهاشم محمد صالح بالطبع دكتور احمد اضافة ثرة للمنبر فدكتور احمد اديب وباحث فى التراث فى شتى مجالاته قبل ان يكون طبيبآ ، كما اتمنى ان ينضم الينا الاخ الاستاذ هاشم محمد صالح فى القريب العاجل انشاءلله واسرة احمد بها الكثير من المبدعين فشقيقه الاخ الباشمهندس جمال طرأوة ايضآ من الذين لهم دور كبير فى العمل العام ولا انسى صديقى اللدود ايضآ محمد عبدالفتاح فلهم منى كل الحب والتحايا.

Post: #55
Title: Re: أحمد طراوه ...أهلا
Author: abubakr
Date: 01-12-2007, 06:45 AM
Parent: #52

Quote: ياخوى الزول ده أختاهو...انت عاجبك الإسم ولا شنو؟


لانو الاسم عاجبني مما انا صغيرانا جيت الصحراء بتاعتو افتش عليهو ؟؟وبعدين ما لقيت اي واحد سمع عنو تب ؟؟ الناس لقيتها مشغولة بالبيزات و العمارات الطوال والسيارات .. اها قت الراجل ما عندو نسل في ا
دي ويمكن نسلو رحل شرقا الي بلاد النهر الجاف بعدين لقيت الهمباته هنا وبس عرفت انو هم ذاتم جدهم تابط شرا ..ودحين اها مصنقر معاكم ...اختاهو كيف يعني اختاكم كيف ؟؟ دة كلام اربعيين سنة وانا افتش عليهو وماني عارف هم فركة كعب من الخرتوم واقوم اركب التيارة واجي بلادا كلها عراقيب ( الحين بقت عمارات .. ما انا كما ن بنيت معاهم لحد ما ضهري اتكسر ) وما القاهوو وكت عايز اسوي جائزة شعر نبطي للبلقاهو وبعدين ود شيقوق جاني مهبت همبتة اصلية ودحين هو في رحلة الي مضارب بني التيمس و"لما يرجع بالسلامة" قال حيدينا باقي ورثتي الهمبتا جدكم تابط زمانك من اهلناالنوبة والاحباش الجابو الفيلة والعاج والسلاح وقام تابط اتسرسب بالليل وفي الضلمة ولقط العاج وانا بدور العاج بتاع اهلي ...
دة كلام ...

Post: #53
Title: Re: أحمد طراوه ...أهلا
Author: شكرى سليمان ماطوس
Date: 01-11-2007, 11:55 PM
Parent: #1


Quote: هو طراوة ده منتظر شنو ؟؟
الناس كلها فاتحة خياشيمها و قاعدة ..

.




لسع ما وصل ؟؟؟؟

Post: #56
Title: Re: أحمد طراوه ...أهلا
Author: فاروق حامد محمد
Date: 01-12-2007, 08:04 AM
Parent: #53

Quote: لسع ما وصل ؟؟؟؟



محمد المرتضى حامد(طراوة)



دخلت المنبر أبحث عن طراوة

فوجدت طراوة قد أسرف في الغلاوة

فلو كنت أصبو رفدا من مادر(1)

لجاءني مادر بكيس من حلاوة...

أو كنت أؤمل من شيقوق(2) بذلا

لجاءتني نوقه باذخة العطايا

أو كنت أرجو من (مرتضاي) عطية..

لوصلت عيره بالبخور وبالهدايا....

أو كنت أرجو من هند وصلا .....

لأطفأ رضابها الآن جوى الحنايا

فاظهر عليك أمان الله أحمدا

فصحارانا لظى .... تنتظر الطراوة

وعليك سلام الله من كل منبرنا....

وأشواق حرّة تبعث في قركم كل (الدفاوة)



1 ـ "مادر" أعرابي تضرب به العرب المثل في البخل والشح

2 ـ صديقنا القانوني الطيب بن شيقوق (مثال الكرم) عندنا

لكننا نمازحه بوصفه بالبخل فيكذبنا بجزيل نواله....


مع كل الحب وأخلص الود

أخوك/فاروق (النار)

Post: #57
Title: Re: أحمد طراوه ...أهلا
Author: yasiko
Date: 01-12-2007, 08:07 AM
Parent: #1

Quote: توكأت عليه وأهش به على خاطري ووجداني

مرحب بـ"سحارة" الأدب والفن الرجل الأديب الذي ضل طريقه إلى كلية الطب
لا أنسى تعرفت عليه قبل سنتين في رأس السنة فأضاع علي الحفلة كلها
وأنا استمع لحديثة هن الأدب وحقيبة الفن
كل الكلام الذي قيل فيه لا يفيه حقه ولكن لعبت بي عبارتك أعلاه
نحن الآن موعودون بجمعية "نقرزان" أخرى في هذا المنبر
اسمحوا لي أن أهدي له ما يستهويه من كلمات في الأغنية أدناه
شكراً يا ود المرتضى على هدية رأس السنة هذه




Post: #59
Title: Re: أحمد طراوه ...أهلا
Author: شكرى سليمان ماطوس
Date: 01-12-2007, 03:07 PM
Parent: #1


........ .........
بدر حسنك لاح والقلوب مالو * لهواك وشوق قلبى عماره
يـا فريع ياسمين متكـــــى فى رمالووو * قولى عاشقك وين ضاعت آماله
شعره حاكـى الغيم، حاجبو هلا لوو * بريق بسمه ...
مافى مانع لو... ...... أبقى جوز تفاح صدره دودالووو
الجوهر الفردى الما إتلقى مثاله * قلبى ليه يلين و قلبو يقسالووو
...
الشادن المكحول قلبى بصفالوو *أخشى من لحظو و من رمى نبالووووو
....
البدر لـو غاب يضوى فى بدالــــــوووووو

___________________________________________________




يـــاللإبداع ،،، يـــا للتميز ،،،،،
يــــا للروعة ،،،،، يــا للجمــــال ....


Yasiko لو شكرت ود المرتضى لهدية رأس السنة .....
أسمح لى أن نشكرك على هذه التحفة وهى هدية كل السنة....


Post: #62
Title: Re: أحمد طراوه ...أهلا
Author: فاروق حامد محمد
Date: 01-12-2007, 06:28 PM
Parent: #59


ياسيكو والله زي ما قال اخونا شكري

لاندري والله كيف نشكرك على هذه التحف

الرائعة الخالدة خاصة الأغنية الأولى

"..... فاح لي كبريته ..........

.... وكبدي كالبنزين ...

.... قادحة كبريته .........

.... أصله هاكاني ......



.... عني ما بريته ........

.... ياجرح غوّر ...........

.... ان شاء الله ما بريته ...."

ياسيكو الله يفتح عليك وعلى والديك ....


وعلى المرتضى وأحمد طراوة وعلى والديهم

دنيا وآخرة......

Post: #63
Title: Re: أحمد طراوه ...أهلا
Author: فاروق حامد محمد
Date: 01-12-2007, 06:28 PM
Parent: #59


ياسيكو والله زي ما قال اخونا شكري

لاندري والله كيف نشكرك على هذه التحف

الرائعة الخالدة خاصة الأغنية الأولى

"..... فاح لي كبريته ..........

.... وكبدي كالبنزين ...

.... قادحة كبريته .........

.... أصله هاكاني ......



.... عني ما بريته ........

.... ياجرح غوّر ...........

.... ان شاء الله ما بريته ...."

ياسيكو الله يفتح عليك وعلى والديك ....


وعلى المرتضى وأحمد طراوة وعلى والديهم

دنيا وآخرة......

Post: #64
Title: Re: أحمد طراوه ...أهلا
Author: محمد المرتضى حامد
Date: 01-12-2007, 09:11 PM
Parent: #63

Raheel
Quote: هلا ومرحبا باهل مسقط د/ احمد طراوة واستاذنا محمد المرتضى
حفلة الشاى دى احتفاء واحتفال ياجماعة ماتزعلو كبايتين واحدة للدكتور وواحدة للاستاذ مافى زول اجئ اتسلبط


هسه أنا مجهجه وما عارف أقول (راحيل) تلك التي تسربت الينا من التاريخ في مهبط الأنبياء أم (رحيل) وهو حال لازمني منذ طفولتي وحتى اشعار آخر؟
حفل الشاي الأسفيري أغمضت عيني كيما يتجسد في مخيلتي واقعا ، اوعي تقوليها(تنزيله في أرض الواقع ) اللي هلكونا بيها ناس الجرايد والوسائط الأعلامية عن الأتفاقيات اللي ما ليها حد وماليها قيف دي. كل الأشياء خيال وخيال حفلك جميل ، من نعم الله عليّ أن حرمناالمصون ليست من رواد المنبر والا كان قالت لي قول ل Raheel ( الطقم ) الرائع ده من وين. أكيد مافي زول حايتسلبط لأنو حفلتك كفّت الناس كلّهم يا بركه.
شكرا لما غمرتيني به أو غمرتنيه من بهاء يا ( Raheel) فلك ما يرضيك مني.
ياطراوه .. أها شن قولك؟

Post: #66
Title: Re: أحمد طراوه ...أهلا
Author: محمد المرتضى حامد
Date: 01-12-2007, 09:44 PM
Parent: #64

Sabri El Sharif
Quote: الدكتور احمد اضافة للتنوير والوعي وهو منذ زمن يعمل من اجل الانسان والانسانية

واتمني ان يطيب له المقام للحوار والعمل من اجل نشر قيم الحرية والقيم النبيلة

الحركة الطلابية بمصر لها ارث عتيق


بحق نحن أمس ما نكون ل (القيم النبيله) ولغة التسامح والحب والجمال والفضيلة ، هلكت بعيرنا المعارك التي أتت على القائم والنائم والأخضر فاليابس والعاري و (اللابس). نعم ،أحمد طراوه يعمل منذ زمن لنشر ما قلت ونتاج جهده ملموس في كل مكان زاره ، وفي هدوء لكأنه يتمثّل مقولة أن الأواني الفارغة تحدث جلبة أكثر، وعندما يرحل يترك أثر الياسمين ساعة العصر تجاه المغيب في بيوتنا.
على ذِكر معاوية الوكيل الجميل ، زارنا في مسقط قادما من بلد الضباب ليصدح في حفل زفاف أحد أصدقائه منذ الأسكندرية ابن عمي أحمدالمصطفى عبدالوهاب فاشجانا وأعاد الينا رئاتنا فعرفنا، بعد غياب، أنه مازال في الدنيا عنصرا كيميائيايسمى الأوكسجين. في الأسبوع المنصرم التقيته في دبي التي أتاها من البحرين ، هو معاويه لم يتغير رغم أنه ، وياللغرابة، جاور المدعو توني بلير سنين عددا.
صبري .. اين ياوصلي .. لاتضيع فقلبي بنار البعاد مصلي.
لك الحب.

Post: #65
Title: Re: أحمد طراوه ...أهلا
Author: abubakr
Date: 01-12-2007, 09:35 PM
Parent: #1

لود المرتضي :

حاشية:

رحيل او ارهيلة عند النوبيين ؟؟ كلما اطالع اسم هذه الشابة الانيقة اتعجب فالاسم غاب حتي عن منطقتنا النوبية-كغياب نبرا ونباري الا فيما ندر- الذي اشتهرت فيه رحيلات او ارهيلات ..هذا الاسم الكثير الاستعمال عند قوم موسي بقي بعد موسي في افريقيا - المنطقة النوبية ( بالله ما في واحد ينط ويقول انو الرطانة كانو يهود .. دية قضية منتهية وبقي من اثرهم بعض حتي بدايات القرن الماضي )

Post: #67
Title: Re: أحمد طراوه ...أهلا
Author: محمد المرتضى حامد
Date: 01-12-2007, 09:54 PM
Parent: #65

الأستاذه نادية عثمان..
أعلم ما بك من حزن ورغم ذلك (تقفين على كتف الجرح) لترينا كما قال أحدهم وهذا مصدر اعجاب الخلق بنبلك .
ثنائي صادق على ترحيبك بشقيقي أحمد.
مناي لك بفرح تستأهلينه .

Post: #68
Title: Re: أحمد طراوه ...أهلا
Author: محمد المرتضى حامد
Date: 01-12-2007, 10:38 PM
Parent: #67

كوستاوي نصرالدين عبدالحفيظ .. هجّام مكي باي نايت.
Quote: يا جماعة كدي روقواو إنمهلوا, أيه دي قصة يا أستاذ و يا كبير,
أستاذ دي بنبلعا ناشفة, لكن كبير دي كمان كتيرة شويه!!!

طراوة و مرتضى ديل أولاد في عمر الزهور و الشباب و ما شافو أي حاجة في الدنيا دي و ما حجوا كمان!


والله يا نصر أضحكتني لما قريت (قصة) عمر الزهور دي وكمان (شباب ما شافو حاجة في الدنيا دي وما حجّوا كمان).

أولا : بكلامك ده عايز تقدِّم السبت.
تانيا: عمر الزهور دي الا تكون قاصد بيها زهور بلاستك زي اللي كان ناس الفاتح بشير ومحمد بشير (معركه) بركبّوها في العجلات الفونيكس والفوريفر ويقول بعضهم عنها (لزوم الكشب).

تالتا: نحن ماشفنا حاجه لسه؟ يعني حانشوفا وين الحاجة دي ؟الا اذا كنت مع الشعراء تنشد : عشرون عاما يا كتاب الهوى ومازلت في الصفحة الأولى. بالله يانصر اللي حدث في العالم من 1973 وانت جاي خلاّ لينا حاجه نشوفا تاني ، زمان الثنائي الوطني كانوا بيقولوا : يامايو .. يا مايو وريتنا جديد ما كان على بال ، أها جات الأحزاب والأنقاذ وورّونا مالا عين رأت ولاأذن سمعت ولا خطر بعقل الثنائي الوطني. السنين الفينا دي بتشيّب الأطفال ، دي من عيار تلاته أربعه يوم واليوم بقي لي سنه.

يا نصر أنا حجّيت و (أكرم) على كتفي وربنا يقبل ، قول آمين، وما باقي لي الا العلاج في مصر، أما طراوه فكان بصدد الحج لولا أن المنادي ما ناداه.
د.محمد الفاتح ما أظن يجي عضو هنا لأنو ما بيقدر على الحسكنيت والضريسا اللي قلت لي عليها أول ما جيت جديد في المنبر.
د.عادل التيجاني عمل (أبونيه) بلغة بصات الشركه أو (اشتراك) بلغة الترام الأسكندراني ، كل يوم في بلد والمركز أبوظبي. ياهو عادل.

سلام كتير للشباب واحد واحد وطراوه ده قريبك داري عليهو هناك رغم انو زي ما قال استاذنا عبدالمنعم خليفة (محصن ضد الأنفعالات ) وأزيد عليها بوليت آند ووتر بروف.
ياخي مشتاقين يانصر وربي يحفظك وأسرتك وأتمنى لو نلتقي قريبا.
لك حبي.

Post: #69
Title: Re: أحمد طراوه ...أهلا
Author: محمد المرتضى حامد
Date: 01-13-2007, 10:10 AM
Parent: #68

م.سيد أحمد قدوره..
كل سنه وانت طيب..
Quote: اخى احمد طراوه
احييك من ابوروف من ملعب البلى قدام حوش ناس بت الفكى فى ود البنا.


تعرف يا قدوره دي احتمال تكون الملاعب اللي قصدا الشاعر وقال (لو سار فيها سليمان لسار بترجمان).
طراوه ما قلت لي عن حكاية (البلي) دي.. لكن أهو ناس (ضرّاب كوريا) ظهروا.
ويا قدوره تحاياي لك وأنت في قلب الوطن وكلنا نغني .. يا زمان هل من عوده هل.
لك شكري.

Post: #70
Title: Re: أحمد طراوه ...أهلا
Author: شكرى سليمان ماطوس
Date: 01-13-2007, 02:03 PM
Parent: #69


Author: محمد المرتضى حامد:
Quote: ويا قدوره تحاياي لك وأنت في قلب الوطن وكلنا نغني .. يا زمان هل من عوده هل.
لك شكري.


ليه يعنى ؟؟؟؟






Post: #72
Title: Re: أحمد طراوه ...أهلا
Author: محمد المرتضى حامد
Date: 01-13-2007, 09:25 PM
Parent: #70

شكرى سليمان ماطوس

Quote: لك شكري.



ليه يعنى ؟؟؟؟


والله ياشكري بالغت عديل في دي. اضطررت للرد عليها قيل ما أرد على كل مداخلاتك السمحه أعلاه.
تعرف رددت على أحدهم وكتبت في الختام (لك شكري) قمت مسحتها وعملتها (لك الشكر).
جاييك تاني يا أمير بس دي ما قدرت أنتظر عليها طويل.
معزتي

Post: #73
Title: Re: أحمد طراوه ...أهلا
Author: شكرى سليمان ماطوس
Date: 01-14-2007, 07:12 AM
Parent: #1



ليــنا كم يوم فى إنتظار طراوة ،،،،،
(د. طراوة ما ماشة مع لسانى - أصلى دقة قديمة)....


وهو بستاهل الإنتظار و ياريت لو جاب معاه مالك (شعيرية) و محمد الفاتح،،
الأمنية دى بتعنى إنى حأرجع شاب من جديد ،،،

شعيرية : آخر مرة قابلته قبل أكثر من 18 سنة فى كبرى ود نوباوى ويا هو ذاتو ما (إتغير)،،
محمد الفاتح : بعد أكثر من 20 سنة، كانت أجمل صدفة فى الشارقة أواخر (2004)،،

العجيب المقابلتين فى محلات فول :
1) شعيرية سهرة فول فى بنابر الجان (رحمه الله) معانا د. عبدالحليم برقدار (خال الأولاد)،،،
2)ود الفاتح فى كافتيرياالسودان بالشارقة (عضة فول) وصاحبها نسيبه برضو على ماأعتقد...

- - - - - - - - - - - - - - - - - - - - - - - - - - - - - - -

ود المرتضى ( صاحب البيت) قال ننتظره لغاية ما يرجع !!!!
الناس فى البوستات بقولو أهى قعدة .. أنا حأشذ و أقول أهى رقدة ،،

سنوات الغربة خلتنا مصلحجية ،، رقدة فى البوست ب (ناقص) - 25 سنة سنة مش بطالة،،،،

أصلو مقابلة عادل التجانى (أبو شاسا: يا السين قبل الشين او بالعكس) ما جابت حاجة،،،
عادل بطبعه رزين وسنوات الغرب ( لندن + أمريكا) وقروش الصناديق (جمع صندوق الكويت + صندوق أبوظبى)
زادو السبكة شوية.....

شخررررررر شخرررررررر ززززززز...........


حاشية: محمد (المرتضى + الفاتح) = أسماء مركبة ،،،،
إعراب: (ود) منصوب بالفتحة الظاهرة على آخره،،،
لخبة شديدة (حساب وعربى) = بطيخ ،، ما سيرة حليم برقدار جات فى النص ،،،


(لسع ما وصل / ـوا)


شخررررررر شخرررررررر ززززززز...........

Post: #74
Title: Re: أحمد طراوه ...أهلا
Author: الزاكى عبد الحميد
Date: 01-14-2007, 09:33 AM
Parent: #73

Quote: الطفلة الموهوبة لونا الزاكي عبد الحميد ( ربنا يحفظها )


تعرف عزيزي منعم

أن د. طراوة اكتشف موهبة لينة في وقت مبكر جدا
وهي ممتنة ليه كثير..وكذلك نحن..

د. طراوة موسوعة وما ذكرته يا صديقي عنه
هو خلاصة منتقاة لابداعات هذا الرجل الموسوعي المعرفة

لك الشكر وللأستاذ مرتضى كل الود

Post: #76
Title: Re: أحمد طراوه ...أهلا
Author: محمد المرتضى حامد
Date: 01-14-2007, 01:35 PM
Parent: #74

أستاذي الجليل عبدالمنعم خليفه,
لا شك أني عاجز عن أي اضافة لكلماتك الوفيرة عن أحمد والمستنده الى معاصرة امتدت لعقد من الزمان في العمل الثقافي والأجتماعي بمسقط.
ان قدرة احمد على التواصل مع كافة الفئات العمرية ، غض النظر عن الجندر ، ميزة لاتتوفر كثيرا ومما لاشك فيه أن مايجمعه بأبنكم عمار ليس حالا فيه صنعة سيما أن عمار نفسه ورغم حداثة سنه يهتم بأمور اعتقدت أنها ولّت أو لم تعد ضمن أجندة أبنائنا ، يعني يا منعم ممكن يكون في شاب في ثانويات هذه الأيام يكتب أشعار عن جيفارا ؟ كما قلت سابقا طراوه كان يهتم بمواهب الكثيرين ومناقشتهم في ابداعاتهم دون تبخيس لما يعتقد أنها اهتمامات سطحية عند بعضهم حتى لو كانت بريتني سبيرز أو ديبورتيفولاكارونيا وفي ذات الوقت أجده مع الأباء يتوجع مع ودالرضي وأبوصلاح وعبيد عبدالرحمن وعلي محمود التنقاري وكأنه قدم لتوه من حي القلعة زمن الجمال، بالطبع افتقدناه ، كخاصه، في حديث لاعلاقة له بهذا أو ذاك يتمثل في حوار متجدد ولم يكتمل حول الداروينية والأستنساخ والموت والله ...
يا أحمد أنسى أمريكا دي وتعال فرّح ليالينا ولاّ عايزني أستلف كلام ابن زيدون هنا؟
لك معزتي ياأستانا منعم.

Post: #75
Title: Re: أحمد طراوه ...أهلا
Author: شكرى سليمان ماطوس
Date: 01-14-2007, 12:46 PM
Parent: #1

يــا ناس الـحـــــــلــــة ،،،،،،هـــــوى ...
يــا ناس الـحـــــــلــــة ،،،،،،هـــــوى ...
يــا ناس الـحـــــــلــــة ،،،،،،هـــــوى ...
يــا ناس الـحـــــــلــــة ،،،،،،هـــــوى ...



طـــــــــــــــــــــراوة وصــــــــــــــــــل !!!!!!
طـــــــــــــــــــــراوة وصــــــــــــــــــل !!!!!


هاكـــــــــــــــم الرابط أمســـــــــــكــــــــــــو .......


بين الرمال مذبوح .. رحم الله ابوصلاح




نشوفكم

Post: #77
Title: Re: أحمد طراوه ...أهلا
Author: محمد المرتضى حامد
Date: 01-14-2007, 02:39 PM
Parent: #75

سميه طلحه..

Quote: خليفة الله إن الجود أودية
أحلك الله منها حيث تجتمع
إن أخلف الغيث لم تخلف انامله
أو ضاق أمر ذكرناه فيتسع
نرحب معك بالرجل الحاوية د.طراوة الذى تجد بداخله كل الموسوعات
طب، أدب،سياسة،فن وتاريخ شامل...والذى عرفناه على منبر النادى الثقافى
السودانى بمسقط فقد كان الدينمو المحرك لكل نشاط وكان شعلة لاتنطفىْ
نهنىء أنفسنا بوجوده هنا شمس تشرق فتمحو الدجنة وبدر يتلألأ في تسامر عشاق
الكلمة الراقية بكل سمو وعظمة.
والشكر أجزله للمهندس بكرى أبوبكر
سمية الحسن طلحة


شكرا يا سميه وهذا الذي قلتِه في حق أحمد مجاز وما قلته عني فيه نظر وليتني كنت كبعض الذي تذكرين ، النادي الثقافي كنت أنت وطراوه وودالقرشي والزاكي ومنعم خليفه ومحمد سعيد شلي وصلاح دهب وآخرين كثر من محركي أجنحته الثقافيه فحلّقنا معكم على ارتفاعات عاليه حتى أشهدتمونا ، كما قال الجميل ودالمكي ، تراجع البصر وجهشة الضوء وأهداب الملائك المبللات بالتقوى وبالمطر. لابد نعود ، وقريبا باذن المولى.
لك الود وسلامي للزبير وعمر.

Post: #78
Title: Re: أحمد طراوه ...أهلا
Author: محمد المرتضى حامد
Date: 01-14-2007, 03:24 PM
Parent: #77

ست البنات

Quote: أهلا بالأضافة الأخ طراوة -

ويا ريت محمد طراوة كمان يطل !

ست البنات .


شكرا على الترحيب يا ست البنات.

يا محمد طراوه بالله طل.

مسئوله من الخير .. محمد طراوه ده منو؟ يا راجل أظهر ولك الأمان.

لك احترامي يا ست البنات.

Post: #79
Title: Re: أحمد طراوه ...أهلا
Author: محمد المرتضى حامد
Date: 01-14-2007, 09:20 PM
Parent: #78

سيف الدين جبريل
Quote: 100 مليون مرحب بالصديق الدكتور احمد طرأوة هذا الرجل الشفيف والذى كم تمنيت انضمامه لهذا المنبر منذ فترو طويلة فكم كنت اردد مقولة سيدنا عمر ابن الخطاب فى عصره ! اللهم انصر المنبر بدكتور احمد طراوة وهاشم محمد صالح بالطبع دكتور احمد اضافة ثرة للمنبر فدكتور احمد اديب وباحث فى التراث فى شتى مجالاته قبل ان يكون طبيبآ ، كما اتمنى ان ينضم الينا الاخ الاستاذ هاشم محمد صالح فى القريب العاجل انشاءلله واسرة احمد بها الكثير من المبدعين فشقيقه الاخ الباشمهندس جمال طرأوة ايضآ من الذين لهم دور كبير فى العمل العام ولا انسى صديقى اللدود ايضآ محمد عبدالفتاح فلهم منى كل الحب والتحايا.


بدءا شكري لك على الترحيب بالطراوه الجنبك.
ثانيا بحق كانت دعوة الرسول الكريم اللهم أنصر الأسلام بأحد العمرين ونُصر الأسلام بألفاروق. كنت أتمنى أن يعطر بكري المنبر بكلا الأحمدين ، ودالقرشي وطراوه وها هما بيننا يعملان على اشاعة التواد والتراحم ونبش الجميل من تراثنا في زمن غلب عليه ، الى حين ، نبش من نوع ردئ نسميه في الدارجه (نبيشه)، سيذهب الزبد جفاء ويبقى ماينفع الناس باذن الله فالأحمدين من خيرة عمال الصحه وأمهر عمال النظافة وتنسيق الورود ولاشك الشكر لبكري (مفتش الصحه) موصول ومعه نتمنى على الله أن يدوم التراحم بيننا جميعا .
ثالثا أشكرك على الدعم اللوجستي للبرلوم طراوه وما بوصيك على الباقي.
رابع جمال طراوه ده جيبو براك.. كان لمّيت فيهو.
مودتي.

Post: #80
Title: Re: أحمد طراوه ...أهلا
Author: abubakr
Date: 01-15-2007, 02:06 AM
Parent: #1

سؤال:
احمد طراوة هل يقرب لجمال طراوة ؟
جمال زميل منتديات منذ اوائل التسعينات والان هنا في دبي و نتقابل تلفونيا كعادة معظمنا المشغوليين دائما ..
جمال هو صاحب درب الانتفاضة -النسخة الاولي -الذي شاركته ادراتها في ذاك الزمان

Post: #81
Title: Re: أحمد طراوه ...أهلا
Author: محمد المرتضى حامد
Date: 01-15-2007, 10:31 AM
Parent: #80

Quote: سؤال:
احمد طراوة هل يقرب لجمال طراوة ؟


ياباشمهندس
كيفك..
ماعندي حل غير أرسل ليك صورة حديثه لأحمد بغرض المضاهاة لو جمال أمامك. نعم لأحمد شقيق أسمه جمال وبالفعل كان في دبي قادما من الولايات المتحده التي يقيم فيها مع بقية الأسرة. على العموم يا عزيزي ما أظن ممكن يكون في تشابه في الأسم واللقب لهذا الحد وبالتالي ياهو زولك.
يا أحمد ، أرجو أن تتصل بالدكتور محمد الفاتح ابراهيم.
شكرا أبوبكر.

Post: #82
Title: Re: أحمد طراوه ...أهلا
Author: محمد المرتضى حامد
Date: 01-15-2007, 11:24 AM
Parent: #81

yasiko

يا ياسين..
Quote: مرحب بـ"سحارة" الأدب والفن الرجل الأديب الذي ضل طريقه إلى كلية الطب
لا أنسى تعرفت عليه قبل سنتين في رأس السنة فأضاع علي الحفلة كلها
وأنا استمع لحديثة عن الأدب وحقيبة الفن
كل الكلام الذي قيل فيه لا يفيه حقه ولكن لعبت بي عبارتك أعلاه
نحن الآن موعودون بجمعية "نقرزان" أخرى في هذا المنبر
اسمحوا لي أن أهدي له ما يستهويه من كلمات في الأغنية أدناه
شكراً يا ود المرتضى على هدية رأس السنة هذه


طراوه من مؤسسي جمعية النقرزان بمسقط ومعه أحمد حسن جمعه ، عفوا، أحمد القرشي. أما فيما يخص مقولتك أنو فوّت عليك حفلة (راس) السنه عايز أقول ليك نحن فوت علينا حفلات السنه كلها ، والله ده يفوِّت عليك الفرض والنافله بحديثه العذب.

شكرا ياسين على ماظللت تعطِّر به بوستات الترحيب من موسيقى وأغان وفِّقت في اختيارها يا فنان.
جميل ياياسيكوّ.

Post: #83
Title: Re: أحمد طراوه ...أهلا
Author: abubakr
Date: 01-15-2007, 12:37 PM
Parent: #81

يالمرتضي ...
حدوته.. صاحبك طلع قصة ..
اتصلت بجمال اليوم فقال ياهو ذاتو اخوه احمد لكن المثير ان احمد دة ووفقا لوصف جمال خطب واحدة بت عمي ....

حكاية ....

مودتي
ابوبكر

Post: #84
Title: Re: أحمد طراوه ...أهلا
Author: شكرى سليمان ماطوس
Date: 01-15-2007, 12:39 PM
Parent: #1


ود المرتضى قال:
Quote: والله ياشكري بالغت عديل في دي. اضطررت للرد عليها قيل ما أرد على كل مداخلاتك السمحه أعلاه.
تعرف رددت على أحدهم وكتبت في الختام (لك شكري) قمت مسحتها وعملتها (لك الشكر).

جاييك تاني يا أمير بس دي ما قدرت أنتظر عليها طويل.

معزتي


طويل دى يعنى شنو وكم عندكم يا ناس السلطنة ؟؟؟؟



تخريمة:
إنت وراء الكواليس قاعد بتسوى فى شنو يا ود المرتضى ؟؟ الصورة ورسلناها،، وكمان فوقهاالمناسبة....

إيه رأيك جانى (مس كوول) ظنيتو يا من CIA or UN ؟؟؟؟ 0141662 تم الباقى براك،،،

كان غلبك قول الروووووب ،،،




إن عدتم عدنــــــــــــــــــــــــــــا

Post: #86
Title: Re: أحمد طراوه ...أهلا
Author: osama elkhawad
Date: 01-16-2007, 02:09 AM
Parent: #84

مرحبا بالاستاذ:
أحمد طراوة
وقد تعرفت عليه قبل سنوات من خلال المرحوم ابن عمتي خالد الخضر ،
والذي كان معجبا باحمد طراوة ككادر جماهيري .
و بعد تلك السنوات التقيت احمد طراوة،
والذي ضمن نقاش قال ان سودانيزاونلاين تمثل اكبر تجربة للديمقراطية السودانية.
و ارجو ان يصححني احمد في ايراد هذا الاستشهاد.
مرحبا بالاستاذ:
احمد طرواة
المشاء

Post: #90
Title: Re: أحمد طراوه ...أهلا
Author: محمد المرتضى حامد
Date: 01-17-2007, 11:15 PM
Parent: #86

الأستاذ المشاء..
سلامي وتحاياي ..

Quote: والذي ضمن نقاش قال ان سودانيزاونلاين تمثل اكبر تجربة للديمقراطية السودانية.


شكرا على تشريفك هذه المساحة وأتمنى أن تستمر (التجربة) التي أوردتها على لسان أحمد رغم أن مضمون الديمقراطية الحقة، حتى في مرحلة التجربة ، يختلف بعض الشئ عن الممارسة الجارية هنا لكن تصح المقولة اذا اختزلنا معنى الديمقراطية (كما عرّفها شُرّاح القانون الدستوري) في أنها اتاحة الفرصة لأهل الكومبيوتر أن يقولوا مايريدون. والله يا أستاذ اسامه الملايين ممن لايعرفون تشغيل هذا الجهاز لم يقولوا كلمتهم بعد.

مسئول من الخير يا طراوه ، انت كلام (خضر) ده صحي؟
لك الود يا مشاء.

Post: #89
Title: Re: أحمد طراوه ...أهلا
Author: محمد المرتضى حامد
Date: 01-16-2007, 10:52 PM
Parent: #90

الأستاذه مي..
تحيه طيبه..
أحمد ظل يشارك بكتاباته الشيقه من خلالي وبالفعل ألححت عليه أن يشارك بعضوية كامله وتكرم بكري أبوبكر ومنحه (خط دولي مباشر) دون المرور بعامل الكُبّانية محمد المرتضى وكما ترين فان كتابته المباشرة تأتي (طازجة من المزرعة) رغم أنها في كل الأحوال جميلة ولكن يقلل من ألقها مرورها بي وبأسمي فتصبح كجوهرة ملفوفة في ورقي متواضع الجودة.
شكرا يا مي ونتمنى أن يبقى التواصل.

Post: #87
Title: Re: أحمد طراوه ...أهلا
Author: أحمد طراوه
Date: 01-16-2007, 05:50 AM
Parent: #1

... ولهان اروح و اغدو .. و لرؤية المنبر و ناسو صار دايما قلبي يهفو .. لكن انعكاس الاحوال حموني , و والله ما كنت اعلم ما المنابر و فعلها حتي رماني بالهوى منبركم .. شكرا على ترحابكم يا سلوى و يا موصلي واسامة و مي و اكرر مودتي و ولائي و بيعتي لكل من رحب بي يوم حديثنا ذاك عن سرور , و ود الرضي , و ابوصلاح .. و بالحق يا شكري نحنا كنا في جماعة النقرزان و كلما جاء ذكر ود الرضي نقول قول المقنع الكندي : ان الذي بيننا و بين ود الرضي لمختلف جدا ! فهو من قال ايضا في وصف ليلاه وهي فوق السباتة و على ضوء الرتينة ترقص في عرس نواحي شرق النيل : تيهي فوق العز و النفل .. يا ليلى قول حسادك أفل .. ثم اتى بعبارات شيقة عالية المقام باثر الفتنة و الجمال على شاكلة ( الجميع لله ابتهل .. فكري عن تعبيره انقفل .. المهل يا ليلي المهل . . ) حتى يصل عند ذلك التعبير الذي جرى و استقر قولا بين الركبان : ورى عينة الغيث الهطل .. يا الخريف العقب المحل .. ظل الراحل قمندان الغناء السوداني الفريق ابراهيم احمد عبد الكريم , مستوقفا و باستمرار عند جزالة خيال الشيخ محمد ود الرضى , و الذي صارت المرأة عنده خريف بحاله !!

Post: #88
Title: Re: أحمد طراوه ...أهلا
Author: شكرى سليمان ماطوس
Date: 01-16-2007, 06:33 AM
Parent: #87

طراوة ،،، صباحك خير ،،،(الدنيا مقلوبة ،،، مش كروية)...

يارهيف ،،، خفف الوزن علينا شوية ،،،، أمبارح طيرت النوم بـ (الطابق البوخة) ،،،،
الكلام المقعدالمرصوص زى جالوص بيتنا بضيعنا فى زحمة الهندسة و جفاف ارقامهـــا ....

قال نفط ، بترول غاز و تخطيط ......

هاكم النفط ، البترول الغاز و التخطيط ده:


تيهي فوق العز و النفل
يا ليلي قـــول حسادك أفل

بوبح المخضوب و انصقل
حاكى ظبي الريل الوقل
يا سلام هاتيك المقل
ما رآهن عاقل عقل

العشاني و هاج من سكن
و العيون لا أشعر بكن
............





بوبح المخضوب و انصقل ،،،،، بوبح المخضوب و انصقل
بوبح المخضوب و انصقل ،،،،، بوبح المخضوب و انصقل
بوبح المخضوب و انصقل ،،،،، بوبح المخضوب و انصقل

Post: #91
Title: Re: أحمد طراوه ...أهلا
Author: HAYDER GASIM
Date: 01-18-2007, 05:08 AM
Parent: #88

طراوة ...

لن أحسن ذكر هذا الإسم ... إلا فى سياقه الإجتماعي الذي عليه إطلعت ... فقد كان زماننا غير هذا ... وكان موعدنا مصر وكان الهم سودانيا ... وكانت { السياسة } هي المشروع , فى مصر كانت الزقازيق ... وفى السياسة السودانية كانت الجبهة الديمقراطية { يسأل الحزب عن سر المهنة } ... لكن ... لن أنسى فرح { الزملاء } ولما جاؤوا بطراوة على الخط ... ولا أدري أين كان { موضوعيا } ... لكن كنت آنها { جغرافيا } فى الإسكندرية ... ذات الثدي والصدع ... وكل المحسنات الحضارية والساحلية ... إلتقيت طراوة ... ولابد ... إستذكارات أبو نورة داعمة للإتجاه الذي ضربت ... حيث المعية الإجتماعية فى أخذها و { طراوتها } إستنجبت من ذاكرتي جل الرهط ... نعم ... كان هناك أمير الخليفة , وعبد الملك الهدية { لم أستطع توقيع ياسر شبيكة ... وإن الإحترام } ... فعلى ظلال اللوحة الزقازيقية آنها أضيف عبد الرحمن الشنقيطي , عواطف أبو زيد , عمر عوض , نعمات كوكو , فاتن فضل , عثمان تميم الدار , الفاتح محي الدين , منتصر الطيب , عفراء ورهط ثوري أشم ... لهم العافية وسعد الطالع .

يظل خيالي صحيحا ... ما ظل أحمد طراوة متأبطا تينك الإنطباعات الألمعات ... فى الهدؤ والإبتسام وضالع الكلام .

أحييه ... أخ غربة وإسفير ... أبتدئه من حيث لا ينتهي ... سوداني الهوى والتكوير ... أنتهيه من حيث يأذن القلب بالإستنباض .


مع الود ... بلا ... حدود .


شكرا ... من أعز ... المرتضى ,

على هذا الظفر ... نعمت .

فأنت دوما تفرحنا ... بالأماجد .

Post: #92
Title: Re: أحمد طراوه ...أهلا
Author: Ahmed al Qurashi
Date: 01-18-2007, 03:09 PM
Parent: #91

كان ذلك في بداية التسعينات وفى دار الغناء الشعبي وكلنا آذانا صاغية للمبدع بادي محمد الطيب ...هذا الفنان الرائع وإبداعه المتفرد جمعني بأحمد طراوة ...وجدت عنده في ذلك الوقت اهتماما باغانى الحقيبة وعشقا لها فكانت هذه أرضية مشتركة جمعتنا في ذلك الوقت .. وتوثقت علاقتي به في سلطنة عمان في مدينة مسقط الجميلة وكل يوم اكتشف فيه صفة وميزة جميلة فتزداد وتتوثق العلاقة به حيث امتدت إلى الجوانب الإنسانية والاجتماعية فهو إنسان يؤثرك حديثه وتمتعك مفرداته وتعجبك أخلاقه وتفتنك ثقافته ....اشتركنا معا في تقديم العديد من الندوات عن الفن السوداني عموما وعن أغنية الحقيبة وأظنها كانت ناجحة ومفيدة بشهادة الكثيرين فكانت النواة لجمعية النقرزان بالنادي السوداني بمسقط وهى من بنات أفكار احمد طراوة ....كان يهتم بالتفاصيل كثيرا خاصة في المحاضرات حتى موقع جلوس المتحدثين وطريقة وضع الكراسي حول المسرح مما يساعد كثيرا على نجاح المحاضرات ...دائما يدهشنا بالأفكار النيرة والمفيدة والجديدة ...افتقده النادي السوداني كثيرا بعد سفره إلى أمريكا ..كنا نتحدث الساعات الطوال عن اغانى الحقيبة ونتبادل المعلومات والأشرطة والكتب ...كان له الدور الكبير في إنجاح زيارة بادي محمد الطيب إلى سلطنة عمان عام 2000 ...مازلنا نتذكر الجلسات الغنائية بمنزل محمد المرتضى ومحاولات وبروفات الأستاذ بادي محمد الطيب للغناء بالاورغن ..كان احمد طراوة فاكهة هذه الجلسات ... كنا نتقابل أيضا كل أربعاء في النادي السوداني وكل جمعة في منزل محمد المرتضى لتناول الغداء لم تكن هذه الجلسات عادية وإنما ندوات في شتى ضروب المعرفة والثقافة استفدنا من أفكار هولاء المبدعين كثيرا ....شكرا لك محمد المرتضى لهذه الهدية القيمة وشكرا للرائع بكرى ابوبكر وأسف للتأخير وذلك لأسباب خارجة عن الإرادة ومنها سفري إلى السودان... واهلا ومرحبا بالمبدع الرائع الفنان الدكتور احمد عبدالفتاح .

Post: #94
Title: Re: أحمد طراوه ...أهلا
Author: محمد المرتضى حامد
Date: 01-18-2007, 11:02 PM
Parent: #92

أحمد القرشي..
حمدالله على سلامتك.
بجيك صاد.

Post: #93
Title: Re: أحمد طراوه ...أهلا
Author: مرتضي عباس
Date: 01-18-2007, 07:07 PM
Parent: #1

محمد المرتضي اسمح لي اولا ان اشكرك علي الترحيب بي من قبل و اهلا و سهلا با الدكتور احمد عبدالفتاحِ او كما يحلو لك احمد طراوة اقامة طيبة في رحاب المنتدي يا دكتور

Post: #95
Title: Re: أحمد طراوه ...أهلا
Author: محمد المرتضى حامد
Date: 01-19-2007, 03:54 PM
Parent: #93

مرتضى عباس ..
سلامي ياخ كثير وانشالله الدار رحّبت بيك.
طبعا يامرتضى كل من عرفت من أعضاء جدد ظل لأيام يغني مع كابلي ( نوم عيني البقا لي سهر).
شكرا يا عزيز على الترحيب بطراوه.

Post: #96
Title: Re: أحمد طراوه ...أهلا
Author: TahaElham
Date: 01-19-2007, 04:44 PM
Parent: #95

الف مرحب بالدكتور الفنان الجميل احمد طراوة
و مليون شكرا للاستاذ محمد المرتضي حامد علي مفاجأته الجميلة

و التحية لكل المتداخليين
لن تنسي مسقط اسهامات الدكتور الفنية الراقية و اعمال جماعة النقرزان و تجربتها الفذة في توثيق تجربة الغناء السوداني
مبادرات الدكتور طراوة في مسقط جعلت من تاريخ الغناء السوداني مهرجانا للمعرفة و التعلم و مشروعا للتفكير و حافزا لتفجير الطاقات في كافة قطاعات الجالية
تقبل يا احمد تحيات الجميع الهام و جعفر و استاذ ابوزيد و تحيات كل المشتغليين بالغناء هنا في مسقط
نفتقدك هذه الايام بشدة فالايام هنا مهرجان الاستقلال
و مازلنا نتحرك في اطار ارثكم الجليل
تسلم يا طراوة

طه جعفر الخليفة

Post: #97
Title: طراوة حقيقي ... طراوة .......
Author: فاروق حامد محمد
Date: 01-20-2007, 08:26 AM
Parent: #1

يا مرتضى

يا خي طراوة ده لهسع ما كشّ كشه كله !!!!!!!!

ألكعه ياخي !!!!!!!

Post: #98
Title: Re: طراوة حقيقي ... طراوة .......
Author: محمد المرتضى حامد
Date: 01-20-2007, 10:53 PM
Parent: #97

الأحباب (جعفر) والهام ثم طه..
طبعا يا طه ابننا جعفر ده بياخد من مساحاتكم تدريجيا في (الأجتماعيات والنادي) ربنا يحفظه.
لاشك أنكم أكثر من يفتقد أحمد في هذه الأيام التي تجتهدون فيها لأخراج أسبوع الأستقلال في النادي وفي الليلة (السخناء) يفتقد الطراوة.
أحمد ، رغم بعده الجغرافي ، يتابع على الهاتف والبريد الألكتروني فعاليات احتفالات الأستقلال .
شكرا يا طه وتمنياتي لك وأختي الهام بالتوفبق في جهدك المضاعف لأنجاح البرنامج.

Post: #99
Title: Re: طراوة حقيقي ... طراوة .......
Author: محمد المرتضى حامد
Date: 01-22-2007, 09:28 AM
Parent: #97

Quote: يا مرتضى

يا خي طراوة ده لهسع ما كشّ كشه كله !!!!!!!!

ألكعه ياخي !!!!!!!


أبوناصر سلام.
ياسيدي الراجل ده كتب 2 (بوست) لكنه يمر بظروف استثنائية هذه الأيام. عندما أقول (أستثنائية ) فأنا أعنى ما أقول.
شكرا يا ودود

Post: #100
Title: Re: طراوة حقيقي ... طراوة .......
Author: محمد المرتضى حامد
Date: 01-24-2007, 11:07 PM
Parent: #99

أحمد...
التهاني مجددا..
أعلم بمشغولياتك ولكن .. ننتظر.
سلامي

Post: #101
Title: Re: طراوة حقيقي ... طراوة .......
Author: Imad Khalifa
Date: 01-25-2007, 02:05 AM
Parent: #100

الاخ/ محمد المرتضى
نرحب معك بالانسان المرهف د.أحمد طراوة آملا أن يطيب له المقام.
وشكرا لك بعز المنبر بالأحمدين.
وبما انك تنثر الجمال في هذا المكان
آمل أن يكون ترحيبك القادم بالصديق د. الحاج سالم مصطفى.

تحياتي

عماد خليفة

Post: #102
Title: Re: طراوة حقيقي ... طراوة .......
Author: عبد المنعم سيد احمد
Date: 01-25-2007, 02:50 AM
Parent: #101

مرحبا بالدكتور
احمد طراوة
لمزيد من التواصل
ياهلا

Post: #108
Title: Re: طراوة حقيقي ... طراوة .......
Author: محمد المرتضى حامد
Date: 01-26-2007, 02:00 PM
Parent: #102

عبدالمنع سيدأحمد،
تحياتي وشكري لترحيبك بأحمد .
أدام الله التواصل والود.

Post: #103
Title: Re: طراوة حقيقي ... طراوة .......
Author: محمد المرتضى حامد
Date: 01-25-2007, 03:11 PM
Parent: #101

الأخ عماد..
التحايا والشكر يا سيدي.
الأخ الدكتور الحاج سالم غادرنا الى دولة الأمارات العربية المتحدة ولكن ذلك لايعني البتة انقطاعه عن السلطنة فالرجل له الكثير من الأحباب والأصدقاء ، أما في شأن عضويته التي ستكون نصرا لقبيلة الأدب هنا فهي مرهونة بشيئين ، مشيئة المولى ثم الرغبة ، وكما يقول أخي صديق عبدالهادي ( القلم) ليهو رافع.
لك مودتي يا عمده.

Post: #104
Title: Re: طراوة حقيقي ... طراوة .......
Author: tmbis
Date: 01-25-2007, 03:42 PM
Parent: #103

يامــولانا المرتضى..
ترحيب خاص بالدكتور ( طراوة ) ، وكل ( الهمبريب ) البجي منك يامولانا عارفو بنعشنا قدر كيف
بعدين حكاية طراوة الاسم شكلها مسالة متوارثة في الجينات الامدرمانية .. لانو اختلفت علي ( الطراوات ) لما لقيت الاسم في العنوان .. وقلت معقولة ده يكون صاحبي طراوة ود حلتي وصديق شلة الدافوري القديمة ؟؟
إن شاء الله ايامكم دائما طراوة يا مولانــا

Post: #105
Title: Re: طراوة حقيقي ... طراوة .......
Author: soma
Date: 01-25-2007, 10:49 PM
Parent: #104

يااااااااااااسلام عليك يا ود المرتضى
دائما تأتى بالجميل ..انا كنت وين يا ناس ؟ فاتنى كرنفال الفرح ده ...
لكن جد دى بالغت فيها ..
قدرت عليه كيف الزول الجميل ده ؟؟
دكتور احمد والله فقدناك بكل ما تحمل الكلمة دى من معانى
ذكراك مرسومه فى كل زاوية فى مسقط ..
النادى ..بيت ناس مرتضى .. بيت الشيخ
بيت ود الجنيد .. نتاوق كل مره وراخين اضانا نسمع بى رجعتك تانى
ليك الشوق ايها الجميل النبيل محكر فى الوجدان طلتك مكسب لحوش بكرى
اعضاء وزوار...
حبابك شرفتنا ونورتنا .. يلا فى انتظار ابداعاتك البتشبهك براك

محمد المرتضى ..ان شاء الله يوم شكرك ما يجى يا يابا ..

Post: #111
Title: Re: طراوة حقيقي ... طراوة .......
Author: محمد المرتضى حامد
Date: 01-27-2007, 01:14 PM
Parent: #105

Quote: لكن جد دى بالغت فيها ..
قدرت عليه كيف الزول الجميل ده ؟؟
دكتور احمد والله فقدناك بكل ما تحمل الكلمة دى من معانى
ذكراك مرسومه فى كل زاوية فى مسقط ..


Soma

أهلا يابركه ..
طبعا يا أسماء مرورك بحد ذاته نسيم ، نعم ، بيذكرني كلام القال ( عمّا قريب الهمبريب يفتح شبايك الحبيب) وهو دوما همبريب طبيعي لاعلاقة له بالماركات المعروفة اللي بتجيب هواء (بارد) وانتي عارفه الفرق بين الهواء البارد بفعل الفريون الجاي من ال split unit والطبيعي الجاي من القلب.

طراوه بحق أضاف الكثير وكان ضمن أركان الفعل الثقافي في مسقط الذي بذلت فيه أنت أيضا جهدا لا يخفى من خلال المشاركات في النادي والأعداد لها مع طراوه وغيره بمنزلكم العامر بكم دوما.

أحمد ما (قدرت عليه) لكنني ( انحزت اليه) فأصبح بيننا.
لك مودتي ياعزيزه.

Post: #109
Title: Re: طراوة حقيقي ... طراوة .......
Author: محمد المرتضى حامد
Date: 01-26-2007, 11:45 PM
Parent: #104

تمبس حبيب الجماهير..
ياخي أولا حمدالله على السلامه وشفّقتنا عليك.
أنا ما عارف طراوه فردتك في الدافوري ده ياتو لكن لاشك أمدرمان الطراوه حارساها.
شكري لكلماتك وثق انك ستستمتع بهمبريب من الرجل الهادئ الباسم المتسامح ده.
صاحبك عاصم عندو حاجه لابوداؤود في السي دي اياه دايرنك تطربنا بيها هنا ..
(أنسيت أنّك في شعوري وفي دمي) ؟ قال : يا ملهمي يا يا ملهمي.
محبتي يا علاء.

Post: #118
Title: Re: طراوة حقيقي ... طراوة .......
Author: الرشيد شلال
Date: 01-29-2007, 09:38 PM
Parent: #109

التحية لك ايها المرهف طراوة ، ومرحبا بك مكملا للثنائية ( ودالقرشى ، طراوة ) ثنائى مسقط ، نأمل ان نستمتع بك محلقا بنا فى سماوات الفن والمعرفة ، لك التحية مجددا ولك يامرتضى ايها المتدثر بجمال الابداع المخفى داخلك 0

Post: #120
Title: Re: طراوة حقيقي ... طراوة .......
Author: محمد المرتضى حامد
Date: 01-30-2007, 09:56 PM
Parent: #118

Quote: التحية لك ايها المرهف طراوة ، ومرحبا بك مكملا للثنائية ( ودالقرشى ، طراوة ) ثنائى مسقط


الرشيد ...الشلال الصوفي الأديب..
شوف بالله الأيام يا رشيد، بالفعل كان أحمد القرشي يثري ليالي النادي بمحاضرات لا يأتيها الملل من بين يديها ولا من خلفها وبصحبته طراوه بتعليقاته ومداخلاته، ولو حضرت متأخرا فالجزاء التمتع واقفا لأن الكراسي حجزها من دأب على امتاع النفس بثنائي مسقط . اليوم ودالقرشي في جزيرة مصيره وطراوه في كاليفورنيا ، من كان يظن أن الأحمدين سيتباعدا ، جغرافيا، بهذا المستوى حتى تجمعهما الأسافير.
يا زمان هل من عوده هل.

Post: #135
Title: Re: طراوة حقيقي ... طراوة .......
Author: كمال قسم الله
Date: 02-03-2007, 04:54 PM
Parent: #101

مرحبا بالرجل العريق

والصديق العزيز ، الذى يحسن التعامل والتفاعل مع الناس ، بالقدره على كشف ما هو مشترك بينهم .

كان ولازال نقطة التقاءنا وموضع ثقتنا منذ الحرب البارده ، تفرقنا أيدى سبأ ولكن هناك الكثير الذى يجمعنا ، فلنتجاوز الخلافات والأختلافات ، دون ان نلغيها ، فلندفع الى امتحانها بالممارسه الحيه .

مرحبا بك ايها الصديق العزيز ، صديق الزمن الجميل

تحياتى لحنان الخطيب



Post: #125
Title: Re: طراوة حقيقي ... طراوة .......
Author: عمار يس النور
Date: 01-31-2007, 07:06 AM
Parent: #100

حذف للتكرار

Post: #134
Title: Re: طراوة حقيقي ... طراوة .......
Author: كمال قسم الله
Date: 02-03-2007, 04:43 PM
Parent: #100

مرحبا بالرجل العريق

والصديق العزيز ، الذى يحسن التعامل والتفاعل مع الناس ، بالقدره على كشف ما هو مشترك بينهم .

كان ولازال نقطة التقاءنا وموضع ثقتنا منذ الحرب البارده ، تفرقنا أيدى سبأ ولكن هناك الكثير الذى يجمعنا ، فلنتجاوز الخلافات والأختلافات ، دون ان نلغيها ، فلندفع الى امتحانها بالممارسه الحيه .

مرحبا بك ايها الصديق العزيز ، صديق الزمن الجميل

تحياتى لحنان الخطيب

Post: #106
Title: Re: أحمد طراوه ...أهلا
Author: nourelhadi awad
Date: 01-25-2007, 11:24 PM
Parent: #1

هي الطلة
والتحية
علني في فضائكم هذا البهي اقتبس بعض فكرة
لعل قافيتي الشرود واللون المكابر تعودني

هي الطلة
ولكم كل المودة

Post: #119
Title: Re: أحمد طراوه ...أهلا
Author: محمد المرتضى حامد
Date: 01-30-2007, 10:26 AM
Parent: #106

Quote: هي الطلة
والتحية
علني في فضائكم هذا البهي اقتبس بعض فكرة
لعل قافيتي الشرود واللون المكابر تعودني

هي الطلة


يا نور العين..
بطلّتك تنزاح هموم كثر فداوم..

Post: #107
Title: Re: أحمد طراوه ...أهلا
Author: معتصم عبدالرحيم
Date: 01-25-2007, 11:27 PM
Parent: #1

د.احمد الزول الرهيف

أهــــلاً

مسقط والسودانيون في مسقط انت فقدلهم

البركة في هذا المنتدي الذى قرّب كل بعيد



معتصم عبدالرحيم

مسقط سابقاً - دبي

Post: #112
Title: Re: أحمد طراوه ...أهلا
Author: محمد المرتضى حامد
Date: 01-27-2007, 11:46 PM
Parent: #107

Quote: د.احمد الزول الرهيف

أهــــلاً

مسقط والسودانيون في مسقط انت فقدلهم

البركة في هذا المنتدي الذى قرّب كل بعيد



معتصم عبدالرحيم

مسقط سابقاً - دبي


معتصم..
آخر سطر ده بيذكرني ( ناس معزّتنا رحلو خلونا ، وانت ماش..)
شكرا يا أمير على طرقك بابنا وسؤالك عن أحمد ( أهو نحن في الأخر سوا) ما بعيدين .
لك مودتي

Post: #110
Title: Re: أحمد طراوه ...أهلا
Author: abubakr
Date: 01-27-2007, 06:01 AM
Parent: #1

يا تمبس ت وين ؟؟؟

Quote: معقولة ده يكون صاحبي طراوة ود حلتي وصديق شلة الدافوري القديمة ؟؟


في جمال طراوة اخو احمد طراوة الاصغر منو هنا في دبي ولكن زولا مشغول زي كل ناس دبي - الا انالاني ما بنوم بالنهار ولا بالليل "سقد" - وهو زول دافوري لانو كنا بنلعب دافوري سياسة في المنتديات زمانك في التسعينات ..؟
بعدين احمد طراوة دة وينو يالمرتضي ؟ هو مش دكتور وبيقابل كل المرضي ؟ واللا دكتور نفساوي عندو ناس مخسوس ؟؟ وخايف زباينو يعرفو انو هنا يقومو يجوهو ؟

عموما يا تمبس ات وين ؟؟؟

Post: #113
Title: Re: أحمد طراوه ...أهلا
Author: الطيب شيقوق
Date: 01-28-2007, 10:53 AM
Parent: #110

يا اهلا يا المرتضى يا جميل

حسبنا عطاءك موسميا ولكننا وجدناك تمطرنا بخيراتك في كل المواسم فكان وكان وكان من الاجلاء الذين مثلوا اضافة حقيقة لهذا المنبر فبالامس كان ود القرشى الذى مثل نقلة نوعية في هذه المساحة الاسفيرية فابدع في شعر الحقيبة وهاهو الدكتور محمد يوسف ابو حريرة الذى يقدم لنا منهجا متفردا وخارطة طريق لتخرجنا من هذا النفق المظلم .

فانت اليوم تقدم لنا درة من درر الادب والطب فالدكتور احمد طرواة لا شك ان وجوده معنا يمثل نقلة نوعية لهذا المنبر فمرحب به بيننا ونامل ان نجد من زمنه ما يسعدنا به في رحاب هذا المنبر .




Post: #114
Title: Re: أحمد طراوه ...أهلا
Author: محمد المرتضى حامد
Date: 01-28-2007, 09:51 PM
Parent: #113

طيّبنا يا ودشيقوق..
ياخي ليك وحشه ، لما عدت للكتابة ، بعد انقطاع ، ظننتك عدت الى مسقط بعد هجعة في السودان.

صاحبك طراوه في حال مختلف هذه الأيام ولاشك سيعاود الكتابة ، كما وعد ، قريبا وأتمنى ألا يطول غيابه.

نحن راجينك لتحكي كل ما رأيت وسمعت وتنفست في السودان.
لك محبة يا عزيز.

Post: #115
Title: Re: أحمد طراوه ...أهلا
Author: عمر ادريس محمد
Date: 01-29-2007, 02:27 AM
Parent: #1

أحمد طراوه ...أهلا

وسهلا...ومليون مرحب

شكرا الاستاذ محمد المرتضى

د. احمد طراوة ..كنز واضافة نوعية

لهذا المكان الجميل

حداث ,ووناس ,وزول حارة ..وهذا يكفى المسيرة

حتى نهايات الكلام

لكما التحية وكل العافية

Post: #116
Title: Re: أحمد طراوه ...أهلا
Author: محمد المرتضى حامد
Date: 01-29-2007, 01:34 PM
Parent: #115

Quote: د. احمد طراوة ..كنز واضافة نوعية

لهذا المكان الجميل

حداثوناس ,وزول حارة ..وهذا يكفى المسيرة


أخي عمر ادريس..
اختلفت و أحمد في الشأن السياسي حين جمعتنا الجامعة الا أن مسيرة تمددت من الصف الخامس ابتدائي وحتى الجامعة وأمدرمانيتنا وعشرات الأهتمامات المشتركه كانت وقودا يحرق كل الخلافات السياسية الكذوب وكنا نعي ذلك تماما وأراد الله أن يتصل المسير في عمان فاكتشف كل منا أن الحياة أعمق من (رأس المال) أو (الدعوة والداعية) أو حتى ميثاق العمل الوطني وغيرها من عناوين ويقيني أن ما بين بني الأنسان من مساحات التقاء أعظم بكثير من ما بينهم من اختلاف وهذه عقيدتي وما يؤمن به أحمد الونّاس الما وسواس الحدّاث الما خنّاس.

شكرا يا عمر لحروفك الضاجّه بالثناء

Post: #117
Title: Re: أحمد طراوه ...أهلا
Author: معتصم عبدالرحيم
Date: 01-29-2007, 06:28 PM
Parent: #1



Quote: آخر سطر ده بيذكرني ( ناس معزّتنا رحلو خلونا ، وانت ماش..)



الاستاذ القدير ود حامد

مسقط الجميلة ,مسقط اللوحة الجميلة التي مازادها السودانيون الا جمالاً وبهاء.

ودكتور طراوة والكثيرين هم في الحقيقة نجوم تلألأت في سماء ذلك البلد الطّيب,
لانقول أفلت ولكن نؤمن انها سطعت ولمعت في غير حاضرتنا, وهاهو بين الفينة والاخري يأتينا بصيص ضؤها ويكفينا.


استاذنا القدير ود حامد لك تقديري وكل بورداب عمان .وأخص الراوي القدير ودالدندر,والعزيز ودالقرشى ملك الحقيبة.

ولك تحية خاصة ياطراوة يامن جمعت كل هذا الألق حولك.


معنصم العربي

مسقط سابقا
دبي حاليا






Post: #121
Title: Re: أحمد طراوه ...أهلا
Author: أحمد طراوه
Date: 01-31-2007, 03:16 AM
Parent: #1

.. يا فاروق .. مودتي , و ولائي , و صادق بيعتي اجددها و اكررها لكم ان انتم منحتموني صبركم و عفوكم , و صدق ود المرتضى الذى ظل يشيل امرى دون ان يميل حين قال انني امر بظرف استثنائى غالبا سياخذنى حتى نهاية مارس ، و حسبى قول الراحل على المك يوم ان ادلهمت امامه السوانح فقال : ليت لي بساط الريح ! و شكرا يا ود القرشي انت و الزاكي عبد الحميد , و الحاج سالم ، و الشيخ قريب الله و كمال عبد الغفار , و ابوزيد سيد الكمان ، و كل اهل الفن بمسقط , انتم اهل الوفرة و الشعور ، لو بتجرى الايام تدور , و فائنا ثابت صادق طهور ، وانت من لفت انظارنا مبكرا لكلمات عبد الرحمن الريح : الحب للروح ما للاجسام .. بس خلي قلبك ارق من النسام .. صدرك عالي و ثغرك بسام , ثم لاح لي بريق باليل يا طه جعفر في سماء الساحل الغربي الامريكي عند مدينة اوكلاند .. ذكرني لياليكم التي شابهت ليالي العاقب محمد الحسن عند تلك الصخرة بالغة الدلالة و مجهولة الموقع , و تظل الهام عبد الخالق بصوتها السبرانو ، و حضورها الرومانسي على خشبة المسرح اثيرة لدينا نحن عاشقي كلمات الياس فرحات ، تلك الكلمات التي جرت مجرى الدم في العروق داخل فناء نادى الجالية بمسقط : سافرى مصحوبة عند الصباح بالسلامة .. و اذكرى شوق فوادي ذى الجراح وهياما .. وداثما ما اشاهد ليلة الاغنية الوطنية تلك , و ارصد اثر قول الراحل ابو امنة حامد الذى رقص عليه اطفال مسقط مجسديين قومية و تنوع و وحدة فلكلورنا و ثقافتنا و وحدة اصلنا و منتهانا : في سنكات بنعشق بت سمراء و ابية , عاشت جوة قلبي احلى هدندوية .. بنحب من بلدنا ما برة البلد ، هزتني يومها و طوحت بي اختلاجات جميل النفس الهدندوى محمد بيرق زوج المبدعة عشة بت فاطمة , و يعجبني يا طه جعفر الصغير و هو يقفز الى دكة المسرح ممسكا بأمه علي نحو ملائكي قائلا لها : ماما ارح البيت خلاص .. بينما الهام قد وصلت الى ذلك المقطع الذي لا يخلو من حكمة و معنى : خبريها كيف ذياك الغرام صار صدا ، ستٍَُُحب ، وتحب , و تجافا .. يا عروس الروضة يا ذات الجناح يا حمامة ! يا منسوبي قبيلة الايقاع و الكلمة المقفاة و السلم الخماسى في لونه السوداني , اعتبروني مثل الرجل رقيق الحال عبد المنعم عبد الحى و الذي وصف حاله قائلا : و انا ما زلت أهيى زينتي و اعد مفتخر الثياب آملا لقياك الحبيب يصدنى زهو الشباب .

Post: #122
Title: Re: أحمد طراوه ...أهلا
Author: أحمد طراوه
Date: 01-31-2007, 04:52 AM
Parent: #121

.. لكم جميعكم صفائى و افضل ما لدى من قول : عماد بيركلي صديقى , بنت الجنيد ام مؤيد الذى ظل يبادلني لطف بلطف و هو ما انفك صغيرا سلامى لود الجنيد و محمد سامى و كل من آزرونا و جعلوا نشاط النقرزان ممكنا , المعتصم , عمر ادريس عاشق بادي .. هل اتاكم يا عمر و معتصم حديث الكوكب النضاح .. قمرة تقطر خمرة و حارسها الفضاح .. لو تحيجنا محاسن الشمس للإيضاح .. ما بتحيجنا محاسن محيها الوضاح , الرشيد شلال ذاب وجدا فى دروب السالكين و قال لهم قول محمود و الحلاج : اقتلوني فقد تؤجرون اما انا فسارتاح , شيقوق لك منى اقوالا صحاح: جيتك بأمتثال صحبى المتمم كيفى .. ابراهيم ثبات عقلي و دركتى و سيفى ! مودتي و تقديرى لكم جميعا من ذكرتهم و من لم اذكرهم و هم في القلب .. مكانة اسبانيا في قلب لوركا .. او لنقل مكانة الرشيم الاخضر في الخديد الانضر الذى هو سبب الامي و الام اخرين الله وحده يعرفهم !

Post: #123
Title: Re: أحمد طراوه ...أهلا
Author: Kostawi
Date: 01-31-2007, 05:44 AM
Parent: #122

Ahmed Tarawa, my friend.
Welcome to SDB

I am very happy to see you here.

I tried many times to influence the members of "Darb alintifada" to join SDB many years ago but they refused. They describe it as "irresponsible group of people that talk about nonsense” Glad to see you on board.

Haggam
"

Post: #124
Title: Re: أحمد طراوه ...أهلا
Author: احمد العربي
Date: 01-31-2007, 06:17 AM
Parent: #123

النجم دوما
احمد طراوه
الجميل محمد المرتضى
سماء مسقط ودفء طرقاتها
لكم الود الخالص

Post: #126
Title: Re: أحمد طراوه ...أهلا
Author: عمار يس النور
Date: 01-31-2007, 07:25 AM
Parent: #124

الأستاذ محمد المرتضى حامد


كنت أنتظر من سيقوم بتقديم نسيبي و شقيق زوجتي العزيزة أماني عبد الفتاح محجوب النصري (أماني طراوة) للمنبر و الحمد لله أن كان ذلك بأفضل المنبريين كتابة و أجملهم تعبيرا و طراوة كلمات، فكان أروع تقديم للكتور أحمد طراوة.

عندما ذهبت أول مرة لأتعرف عليه في عيادته بحي المسالمة قبل أن أتقدم لخطبة زوجتي العزيزة؛ كنت أعتقد بأنني سوف أجد ذلك الطبيب المنشغل بعالمه ووقته عن الاخرين و لكنني وجدت نفسي أمام شخص يتحدث بهدؤ و دقة و رزانة تبعث الطمأنينة و الحيرة في نفس الوقت. الدكتور أحمد طراوة لا يستعجل الكلام بل ينتقي مفرداته بعناية خاصة حتى تحسب نفسك مع فيلسوف و ليس طبيبا، تساعده في ذلك ثقافته الواسعة في شتى المناحي الحياتية و العلمية.
سبقته إلى مسقط في عام 1995 و سبقني فيها بشهرته ، و غادرتها في عام 1997 و عندما عدت إليها زيارة مرة أخرى في عام 2000 و جدته شعلة مجتمع السودانيين هناك، فهو طبيب لكل أسرة و صديق للجميع. و في النادي السوداني بمسقط الذي تركته في حداثة ولادته كان الدكتور أحمد طراوة من ألمع الشخصيات و كانت ندوته الإسبوعية (كل أربعاء على ما أذكر) في فن غناء الحقيبة مع صديقه الدكتور أحمد القرشي، كانت من أمتع سهرات السودانيين في مسقط.

تحياتي لك أستاذي محمد المرتضى حامد و أنت تقدم د. أحمد طراوة للمنبر و هنيئا للمنبر بهذه الطراوة.


عمار يس النور

Post: #131
Title: Re: أحمد طراوه ...أهلا
Author: محمد المرتضى حامد
Date: 02-02-2007, 01:00 AM
Parent: #126

أخوي عمار..
الشاب الجميل أخي عاصم البنا ، وهو صديق طراوة والأسرة ، في خانة نجم الدين ، عندو أغنية اسمها (هسّه فيك انا شن اسو)، وانت بعد الكلام اللي قلتو عن أحمد أنا شن أقول. أكتر حاجه عجبتني في كلامك السمح يا عمار قصة زيارتك ليهو في العيادة في المسالمة لما جيت (تاخد) أماني بت ود محجوب وطبعا أحمد حكى لي القصة دي زمان في معرض حديث عنك نسج قماشه من خيوط المودة والمحبة ليس بسبب النسب ولكن لأنك أنت كنت ومازلت كذلك.
ربنا يديم المحبة يا عمار ، أحمد يعلم جيدا أن ( معرفة الرجال كنز) وأن المصاهرة الكريمة والحميمية في الأسرة بمثابة ال assets للشركة واعذرني على التشبيه التجاري لكن الكيانات المحترمة تنمو بأصولها وحسن أدارتها وذات الحال ينسحب على صداقة الأفذاذ وطراوه لايتهاون ولايتردد في هذا الأتجاه . تعرف يا عمار في أصحاب من النوع اللي بتجيهو بانبساط ويتمم كيفك ، اذا غاب عنك تحس أن بك اعاقة وزي الما قادر تمشى كويس وامكانية الشفاء والبرء بعد داك في يد الخالق والزمن.
أشكرك على كلامك عني ناحية تقديمي لأحمد ووالله والله أنا مقصِّر في كلامي عنو ، ياخ ده كلام أقولو عن زول أنا وهو كنا فريق واحد بتاع ping pong ونحن أطفال في الأهلية جنب بيت أزهري وكان هو يسمي الثنائي (مهدي وجرجس) ، لاحظ الأستنارة المبكرة في التسميه. أها هسّه أنا أعاني اعاقة ونقَص كيفي وقلّ منامي ، وفي حاجه تانيه يا عمار ، طراوه ده شايل دفتر أدوائي في راسو وحافظ روشتاتي زي جزء عمّ وفي كثير من الأحيان يفاضل بين المناسب لي من جرعات هل هي (الزانتاك) ولاّ ( يانسيم ارجوك) . ياعمار الزمن كسر خاطرنا وخلآنا في تشهُّدنا نقول : أين يا وصلي.
سلِّم لي على أختى الأماني العذبه.

Post: #130
Title: Re: أحمد طراوه ...أهلا
Author: محمد المرتضى حامد
Date: 02-01-2007, 12:15 PM
Parent: #124

Quote: النجم دوما
احمد طراوه
الجميل محمد المرتضى
سماء مسقط ودفء طرقاتها
لكم الود الخالص


النجم المستدام الفنان أحمد العربي.
لك يا عزيز جزيل شكري على ترحيب بألأحمد .
مش حا تجي لأسبوع الأستقلال عندنا يا أحمد؟ كلها 3 ساعات سياقة من مكانك.
سننتظر.

Post: #127
Title: Re: أحمد طراوه ...أهلا
Author: محمد المرتضى حامد
Date: 01-31-2007, 02:41 PM
Parent: #123

Quote: Ahmed Tarawa, my friend.
Welcome to SDB

I am very happy to see you hear.

I tried many times to influence the members of "Darb alintifada" to join SDB many years ago but they refused. They describe it as "irresponsible group of people that talk about nonsense” Glad to see you on board.

Haggam
"


نصر يا هجّام...
( ماي فريند) حاف كده؟ هو انتو خليتو لينا حاجه؟
سلامي للأسرة كثير وربنا يجمعنا تاني .
محبتي

Post: #128
Title: Re: أحمد طراوه ...أهلا
Author: AlRa7mabi
Date: 01-31-2007, 08:36 PM
Parent: #1

أستاذ/ محمد المرتضي

هل ممكن تتخيل زول ساكن الخوير يكتب رسالة لي زول ساكن روي .. ولكنها أحوال العشق .. ترسم الخطاوى لي ( دروباً ) غير منظورة .. فللحقيبة عشق يا مرتضي .. نعم أورد مقتطفات من رسالة بعثت بها لأحمد طراوه .. لما كان للقلب أحكامو .. فتأمّل ..


الأخ/ د. أحمد .. وجماعة ( النقرزان ) الحالمة

تأمّل ما قاله الشاعر عصام عيسى رجب .. في إفتتاحيته لديوانه الرائع ( الخروج قبل الأخير ) قال عن أصدقائه .. كان إذا مال قلبه للسقوط ذكّروه سيرة في الضياءات فتأد .. فكم من قلوب للسقوط تميل .. ولكنكم تذكّروها سيرة جميلة عطرة فتتئد وتستقيم

د. أحمد هل جربّت الكتابة لشخص لا تعرفه معرفة القرب .. ولكنه منكوي بوجد السحر الذي ( يندس ) بين وريد الحرف وشريان اللحن ... فهو أنا ، فأرجو إن اقتحمت سكونك هكذا أن تصفح ، لا تجمعنا المعرفة .. ولكن يقرّبنا الهم والإهتمام الواحد .. ربما!!

سؤال ربما بإجابته تتفكك رموز .. هل هذه الجماعة الحالمة الوادعة والمحبة و ( المحبوبة ) معنية فقط بحقبة الحقيبة والتي شكّلت وجدان أمة بأثرها .. وما زال رحيقها ينثر في أنفاسنا الهوى وفي ألستنا الشهد أم أن ( النقرزان ) – وهذا ما أعتقده – مهمومة بكل وتر تموسق فأنّ أنين الموجوع وكل صوت همس .. همس المحب الكتوم ..
...
...

تعرف أستاذ محمد المرتضى ، الرسالة كانت طويلة وكنت ( بستدرج ) فيهو عشان يتناول كل المدارسة الفنية التي أعقبت الحقيبة ، وبتحيّز واضح لمدرسة مصطفى سيد أحمد ، فكان هم الرجل أكبر مما تصورت ، فقد أرفقت رقم تلفوني بالرسالة ، وجاءني صوته هامسا حالما كما – تعرفونه – فتواصلت ( النقرزة والنقرشة ) لكل المراحل .. وقدم لي الرجل دعوة مفتوحة للإنضمام لتلك الكوكبة ، ولكنه لا يعرف أنا بشتري بس ما ببيع ..

ها .. أخيراً ظهر الرجل ، ربما هكذا دوما يتبادر للذهن أنه لن يؤوب ولكنه .. عاد الحبيب المنتظر ..

تحياتي

عبدالرحمن





Post: #132
Title: Re: أحمد طراوه ...أهلا
Author: محمد المرتضى حامد
Date: 02-02-2007, 10:00 PM
Parent: #128

Quote: تأمّل ما قاله الشاعر عصام عيسى رجب .. في إفتتاحيته لديوانه الرائع ( الخروج قبل الأخير ) قال عن أصدقائه .. كان إذا مال قلبه للسقوط ذكّروه سيرة في الضياءات فتأد .. فكم من قلوب للسقوط تميل .. ولكنكم تذكّروها سيرة جميلة عطرة فتتئد وتستقيم


الرحمابي يا عبدالرحمن..
المسافة بين (روي) و(الخوير) لاتحسب بالكيلومترات العشر ولا بالزمن المنقضي لطي تلك المسافة، أنت أدرى مني بأن هناك من يبعد عنك آلاف الفراسخ جغرافيا وهو أقرب اليك من حبل الوتين، وهناك من هو على مرمى حجر وبينك وبينه مابين الثرى والثريا. يا عبدالرحمن لاشك عندي أن الأنسان عبارة عن شبكة اتصالات (استقبال وارسال) قمة في التطور والتعقيد وأن من يصادقوننا ويصدقوننا هم من ضبطت أجهزة استقبالهم عل موجات ارسالنا والعكس صحيح بشكل أكثر كثافة من غيرهم كما يقول أهل الفيزياء والميتافيزياء أما من نحبهم من جوه الجوه فهولاء لنا معهم حالة تلبثة لم يقدر على تحليلها علماء الزمان ، أحبابنا يارحمابي حباهم المولى بجلاء بصري وسمعي حتى نكاد أن نناديهم : يا سارية .. الجبل.
النقرزان غاب حداتها وضلت من ثم قوافلنا في عتامير الدياسبورا ولكن الى حين ، وين ياعبدالرحمن لما كان أحمد القرشي يقعد يشرح ليك:
يا الامرضنى وما طبانى ......في خديدك يلوح نور رباني
نيران أشواقك لاهبانى .......واسهام ألحاظك ناشبانى
ومن ضمن الحاله التاعبانى .....مهضوم كشحك صدرك باني
يتهادى يميل خصرك فريع باني
أحيييا من زمنى الخاين.

Post: #129
Title: Re: أحمد طراوه ...أهلا
Author: Hololy
Date: 01-31-2007, 11:10 PM
Parent: #1



....افتح ....ذراعيك ....للقادمين.....

....فالخيّريين قالوا .....

....الخير علي قدوم الواردين ......

.....يا..... وطـــــــنــي........



.........

....الله يكتّّّّّّر من واردينك ....يا ود حامد....(ما الدومه).؟؟؟؟؟


....و يقلل من الغرباء .... فكثرتهم مؤذيه.....

..........

Post: #133
Title: Re: أحمد طراوه ...أهلا
Author: محمد المرتضى حامد
Date: 02-03-2007, 10:49 AM
Parent: #129

Quote: ....افتح ....ذراعيك ....للقادمين.....

....فالخيّريين قالوا .....

....الخير علي قدوم الواردين ......

.....يا..... وطـــــــنــي........



.........

....الله يكتّّّّّّر من واردينك ....يا ود حامد....(ما الدومه).؟؟؟؟؟


....و يقلل من الغرباء .... فكثرتهم مؤذيه.....

..........

Hololy
شكرا على كلماتك الرقيقات..
تعرف يا سيدي هذا الوطن الجميل السودان فيه الكثير من الجمال والمَرَدةالذين لو أتيح لهم الخروج من القمقم لأدهشوا العالم بفعلهم وسحرهم ، ان أحمد وغيره ممن شرّفوني بتقديمهم ، أناس خبرتهم فهم لايتكلمون الا بما يفيد وان أحسّوا أن الصمت أبلغ لاذوا به. في صدد مقولتك (أن كثرة الغرباء مؤذية ) أدرك تماما تعريفك لل (الغرباء) وهم الغرباء عن الأدب والألتزام بكل ما يمكن أن يكون رفدا موجبا لهذه المساحة وأتفق معك في أن أولى مظاهر الأيذاء تتبدى في أن كثير من الرائعين دعوتهم لهذا المكان ولكنهم آثروا (القراءة) لبعض ما يكتب وظني أنهم يخشون بعض الأقلام التي قد تنحرف عن جادة الأمر لدوافع غير موضوعية لكن هذا مبرر غير كاف فهذه الحياة ملأى بالنقائص ولسنا من أهل التمام وأعاننا الله على عيوبنا ما بان منها وما انستر.
لك محبتي واحترامي ورد الله غربتنا يا العزيز.