من ذاكرة الطفولة واللعب ...

..
..
قبل ان تشتعل في عصرنا أهوال الديقيتل والفيديو قيمس والبلي ستيشن ون وتو كمان
ونيو جنريشن قيمس ، والمورتال كومابكت ، والماكسبين ونييد فور سبيد و-الاون لاين- قيمس
وخلافه من الالعاب التي تخلق للطفل علاقة بالكمبيوتر والالكترونيات لا بالناس والطفولة ومشاركة
الحياة والاحتكاك مع الاطفال من عمره . قبلها كُنا نلعب سوياً "سوا بعض" مع بعضانا حتي صارت
الملمات والناس والوجوه والضحك في كياننا من أهم الاحداث أو ربما هي الحدث نفسه .
..
..

فكرت في أن اللعب الجماعي ، هو الطفولة السليمة ذاتها ، اللعب الشعبي يساهم في خلق طفل \إنسان
إجتماعي وذكي ، بإعتبار أن مثل هذه الالعاب الشعبية يمارسها اكثر من شخصين فتساهم في خلق شخصية
إجتماعية قوية تحتمل وتتحمل الناس وترفع من قيمة المنافسة النزيهة وتحببها وتنمي روح تحمل الهزيمة
وتضرب الياس والإنعزال وبداية اللعب من جديد وباستعداد للضحك في كل الاحوال ،علي عكس اللعب الالكتروني
الذي يمنحالاطفال الوحدة والإنطواء وتقتل فيهم المرح والتجارب الخاصة.
.
.
ألحظ ، بالرغم من الاجتياح الهوسي للالعاب الإلكترونية الرقمية وألعاب الكمبيوتر والموبايل
ودخولها البيوت وإنتشار المحلات الا إن الألعاب الشعبية التي اعتدنا أن نمارسها في ساحاتنا
وحاراتناوالميادين ما تزال لها نكهتها وجمالها الخاص.
.
.
العاب الطفولة التي يمرح ويتسلي بها الاطفال متنوعة ومتعددة وتختلف من مكان الي مكان ، من زمن الي زمن
من قريةالي مدينة من بيئة الي بيئة من مساكن زراعية عن عطبرة مثلاً ،ومن رمضان الي الشتاء ومن النهار الي المساء
وتختلف في السن من الخمس سنوات الي عشرة ومن عشرة الي خمستاشر وتختلف "نوعياً" من الاولاد الي البنات وتتشابه وتختلط . نلعب في الفسحات والميادين والشوارع القريبة من بيوتنا. كان في بالنا اللهو وفي أفاقنا رؤي .



يمكن ان نقول ان مثل هذه الالعاب جزء من تراثنا الشعبي ، أصيل ومهم في حياتناالثقافية ، التي
نتركها وراءنا من زماننا للقادمين ، بعد رحيل زمانناعن زمانه ، وهي مثلها مثل كل العادات
والتقاليد التي تنتقل مع الناس من مكان لآخر، ومن ذاكرة الي أخري .
..
..
كُنت في "ونس" مع صديقي سفيان بشير ، قادنا الكلام الي ضؤ الطفولة زكرياتها الحلوة ،الاهازيج واللعب ، فأقترحت عليه فكرة هذا البوست ، التوثيق للالعاب الشعبية ، الالعاب والحكايات الشعبية والاهازيج والاغنيات ، التي كنا نحبها ونمارسها في ايام طفولتنا الحية منها والقديمة ، فتحمس سفيان شديد واخدنا نتذكر في اللعبات والاهازيج برغبة توثيقها وعرضها لغرض كتابة الالعاب وكيفيتها وطرقها وقوانينها ، لعدة اسباب طيبة ، لتفعيل ذاكرتنا ، ولسهولة الكتابة وخفتها بدفع روح التداعي الانساني الحر فيها ، واولاً وأخيراً لنعرف اطفالنا في المهاجر "والقيمس " بطريقة لعبنا ومرحنا ولنقدم لهم شيئاً لحياتهم العادية الخالية من العقد.

..
..

إذن فهذا البوست دعوة عامة ، لرحلة، ولا أجمل، في ذاكرة الطفولة واللعب .




.

جميل الموضوع يا قرمبوز

اليومين الفاتو فكرت في حاجة قريبة من دي

بتشوفها في البوست الجاي

و اصل يا منقة

فا ضلابي
سلام شديد ليك
كدي يا فاضلابي تعال لينا حبه ياخ
وبي مهله والا اقول ليك امشي خت البنيه
دي هنووووووك وقدم الزول الجمبك ده وتعال
بدل تسوي بوست براك اللعب معانا هنا ده
كل اللعبات الكنت بتحبها زماااااانك

اصلاً نحنا عارفين نفسنا ملهمين وبنلعب لعبات حلوه

أبو السيوف

أنا أصلو ما لاقاني زول مبتسم طواااالي زيك كده
ختيناها و جيناكم
تاني شنو

إبراهيم..وسفيان

سلام..

ومتابعة ذاكرة الطفولة وربما مشاركة قريبا.




يا سفيان بالجد لقيتك والله

Quote: ملهم

نتلاقي في الزقاق.

...

سكج بكج ...

اذكر أنني لم أكن أحب هذه اللعبة كثيراً، شتارة ذايدة مني ولانها اولادية جداً.

سكج بكج كان فيها حفرة بعمق كف اليد كده او يذيد، بختو فيها عود بشكل رأسي
"نصف يختفي داخل الحفرة ونصف يظهر" يقوموا بيضربوهو بالجمبة"من طرفو الظاهر"
فيطير الي اعلي ،يتصلح يعني "قنطرة ، جندلة" اها في الهوا "متجندل" بيدوهو تاني ضربة جامدة
يطير بعيد بعيد فيتصايح الاولاد :
سكج بكج حلو كمنجلو اها يطقو ويطيرو ويضربوهو ويبداء الجري والصياح .

عادة ما تلعب هذه السكج بكج في شارع واسع او ميدان ، وضح اليوم .
فيها جري شديد وحماس غير نهائي.

...
...

شليل ...

شليل وينو ؟
أكلو الدود ،
شليل وين راح ؟
اكلو التمساح؟

في الليل ، علي ضؤ القمر ، نلعب اللعبة الشهيرة ، في ميدان او اي وساع ما .
مطلوب عظم "عضُم" يقف الاولاد في صف في الظلام ويقوم احدهم برمي العظُم بعيداً
عالياً وبقوة ، يغوص في الظلام ، تبداء رحلة البحث ، من يجد شليل ، الرابح ، يحظي بحق رمي العظم مجدداً، وهكذا تستمر .

شليل كانت لعبة بحث جميلة افسدها الشعراء الضائعين وحبسوها ماضاع عنهم ...

قرمبوز في سكج بكج دي
في تأريخ قديم خلاص
لاحظ للأسماء البقولوها

ود الحلو كمانجلو
ود دبلنقة عصيرو منقة

الإتنين ديل منو يا ربي?

هومي،،
الالعاب و اي حاجة،،

لكن بابك الاصفر
و الجهنمية الحمرة ده،،
و السلك الشايك،،
و الكم سبلوقة المرصوصات ديل،،
سون فيني سواة ما يعلمها إلا انا،،

Quote: هومي،، الالعاب و اي حاجة،، لكن بابك الاصفر و الجهنمية الحمرة ده،، و السلك الشايك،، و الكم سبلوقة المرصوصات ديل،، سون فيني سواة ما يعلمها إلا انا،،

الجريفاوى ..القالتو عزوز كوم والزيرين ديك براهن كوم...لاحولة
راجع العب معاك باذن الله،، تسلم

عمو صديق الموج،،

مش براك طالبت بي الانفصال،،
و نسيت العشرة و مشاوير بعد الحفلة في الشارع الطويل داك،،
اها خُم و سصُر،، :P

اما الازيار،،

فناشفات ساااي ناس هومي ما عندهم خرطوش،،
اسع ما تخجلو ساكنين في وددورو٭ لصق البحر و ازياركن ناشفات،،
مضيعين وكتكم كلو في الكمبلت و الما بعرفو شنو،،

Quote: عمو صديق الموج،، مش براك طالبت بي الانفصال،، و نسيت العشرة و مشاوير بعد الحفلة في الشارع الطويل داك،، اها خُم و سصُر،،

سوميتا ..انت جنيتى كلام السكر ما بتعرفى،،،،

تعالي يا سوميتا نلعب (( حِجلَة )).
نَبَنِت الحِجلَة ..و نجيب البُلاطة و ننط ب رِجِل واحدة لغاية ما الحَجَر يخُش (( المِيس ))
(( البتموت ) تطلع بره و ما دايرين (( خرخرة ))..!

--------------------------------

حلييييييييييييييييييلنا من اللعب و الحِجلة يا إبراهيم..
مع ((هشاشة العظام)) الحاصلة دي...خلاص دخلنا (( المِيس )) !!!

لكن انا عايزه العب اريكا ..عميه؟
خلاص..بلعب معاكم حجله بس بعد ما أمسح ركبتي بدوا الرطوبة
الله يقلعوا المرض ومعاه……الكبر!

ممكونة ،،
إلزيك،،

حليل الحجلة و اياما،،
الحجلة دي يلا ذكرتني بي بنات جيرانا،،
ماريا و الشام،، محل ما تبقن سلام يغشاكن،،
بالله ما اصل البيت و ادخل الشنطة و سريع،
يا بيت ناس لشام جاك اللعب،،


تقريباً الحجلة من اللعبات البسيطة اللعبتها و إتمردغت بي ترابها،،
و خرخرت و مرات مرات بكون غشيت فيها،،

اما تاني فيخربني،،
و كان جني حجلة القلوب ديك،، و حجرها حصاية البلحة،،
دي فيها جنس زمزغة كمان،،
يا زولة بي بكاها عديل،،

كان نفسي اتعلم ام الحُفر،، اصلو اصلو ابت لي،،
ـــــــــــ

من اللعبات اللاقتني في اي مكان مشيت ليهو،،
يا سوفي و هومي،،هادي الحجلة و صفرجت،، :S

بي حبة تطورات،، بس الفكرة هي الفكرة،،

يا سلام على أيام الطفولة ,واللعب

طب تحية نضيفه ونقية
الطفولة واللعب
زمن مافيهو هم اكبر من اننا نلعب في اي وكت وما بنحسب حساب لاي حاجة
عمرنا ما سالنا لقينا اللعبات دي وين او القبلينا عرفوها كيف بس
وعمرنا ما فكرنا انو في ناس بتلعب نفس لعباتنا

كبرنا وعرفنا انو العبات منتشره انتشار شديد وانو في اطفال في قارة اسيا بيلعبوا نفس اللعابنا

أيام الطفولة يا ابراهيم كنت بحب ألعب كورة

دي كانت لعبتي المفضلة

لو أولاد الحلة منعوني ألعب معاهم , كنت بقعد أتفرج في لعبهم وأنا بقول في ( عقل بالي ) : ليه يا ربنا ماخلقتني ولد

عوضتني ( عجلتي ) الحنينة عن الإحساس بالإحباط دا , يا سلام يا ابراهيم على ركوب العجلة
والإحساس بأنك طير ..أجمل بالنسبة لي من كل الألعاب

ولمن الكهرباء تقطع , دا بالنسبة لي حدث جميل بنتظره بفارغ الصبر
لأن كل أولاد وبنات الحلة بيطلعوا يلعبوا في الشارع لعبة كنا بنسميها وقتها ( دس دس )

نهولة النحاس ،
كيف يافـردة .
أسه البنات ديل بكون إسمهم منو؟
مستعد أدفع نُص عمري وأعرف !
لكن شنطهم تُقال عليهم رسمي وشعبي،
ده شنو ده اصلوا ؟ بقرو جيلوجيا ديل ؟ بحلاتهم دي ،
الصورة دي لذيذة لذاذة أم درمان القديمة وشارع المدارس
والتدريب ومدرسة بشير العبادي . ياخ دي حاجة سمحة خلاس بي غُبارهاده، يسلم شبابك يانهال .
شوفي بعدما عدلت فيهاوحفظتها عشان أرفعها سميتها شنو ؟ سميتها ، بنات نهال ! يا سلااام،

ياخ بنات نهال دي عاملة ذي بنات نعش ...

.
.

قُلت لي "عقل بالك " والله كان تكوني ولد
كان تكرهي عقل بالك ده ، ياخ الاولاد ديل عندهم عضلات في أحاسيسهم . تجي نتبدل
لكن والله يانهال "دس ، دس" لعبة أساسية ، لعبة أطفال العالمين ، مرة شفت فيلم هندي فيه مشهد
شُفع لاعبين دس دس ، المصريين بسموها "أُستغماية" وهنا في الارياف بقولو ليها "دسوسية"
أو"ابو الغميض" ،أنا كنت مُذكر إسمها بالانجليزي لكن أسه نسيتو ، بس إنت خليك في عجلتك
دي يحدي ما اتذكرو ليك وأعملي حسابك العجلة لا تقع بيك .

إيهاب عربي :

ظاهر عليك انك كنت طفل
ميال للالعاب الفردية من باشمهندس دي .
ومن طلب العُلاء سهر الليالي ، جميل زيارتك
واتفرجت في نايلوف واستمتع بيه ، شايفك وين أنا؟

ذكريات جميلة أيام الطفولة.

شخصيا كنت أميل للألعاب الفردية

سلامات ياناس .
سلامات سلامات سلامات
سلامات سلامات سلامـات حتي يسعد البال ...
.

* فا دلابي :

فعلاً مُلاحظتك زكية ولماحة ، الالعاب قديمة جداً ، تأريخ ، وفيها قصص وحكايات عمران، أسه عمي علي بياع الزيت ده منو ؟ الساق مرتو وداها البيت ، بعدين اسه عليك الله في زول بعرف الجَبة الوقعت في البير دي حقت منو ، فعلاً الموضوعة لذيذة والبحث عنها ممتع ، بس عندي ليك سؤال "والهول ضرب التلفون " دي معناتا شنو ؟ واصل وتعال ، اتذكر واكتب وساعدنا ياخ . موش انت كُنت طفل ، وبعد مابقيت رسام عالمي موش لعبت مع الاطفال وعلمتهم وعلموك ، يلا في إنتظارك ...


عزة سلمي :

أخوك ما صواَار لكن التواضع كاتلو ،شفت الحنان ده ، الصورة دي قدامها كان في كوم بتاع رملة ،
وفي زول بقعد فيه بتكلم في التلفون بالليل طواللي ، الجيران إفتكرهو مجنونه ، وفي كلب كل مرة
بجي ، عرفتيها ولا لسه . وقدامها الباب الاصفر ابو تلاتة ضلف ده كُنا بنلعب البلي وكورة شُراب
وفلفلت ونجري ونجري ونجري سبق سبق ونرجع تاني .
عزة ، أكتر لعبة كنت بتحبيها ، بتاعة الريدةالريدة الريدة ، صاح ولاماصاح ، عاودي ياعزوز .

صديق الموج :

قريت كلامك اتخيلت انو يكون في طفل يقول لاصحابو "راجع العب معاكم بإذن الله"!! ياخ دي كان حتكون حاجة عجيبة . ومضجكة جداً ، مُشتاقين ياخال وينك؟ معناتا حننتظرك تجي تورينا لعبات الكنتو بتلعبوها في زمن المهدية والخليفة عبدالله التعايشي .


ممكونة ، ومني خوجلي :
البنات ، البنات ، البنات . إنتو الحجلة دي جايه من طائر الحجلة داك بتاع القصص ولا من حجل الثُقيفي ولا قاطعنها من رأسكم ، عندي بت خالتي إسمها لمياء سألتها من الحجلة دي قالت لي دي طيرة أُنثي ، لامن تجيب البيض والكتاكيت بتنطط بالطريقة دي وكانو عندها ساق واحدة ، عشان ماتعمل صوت والناس يحسو بيها ويدهمو عُشها واطفالها، القصة مترابطة لكن لمياء دي عندها الخيال ! بلاهي افيدونا في الحكاية دي !
بعدين الحجلة دي ليه بقت بتاعة البنات ؟
السبب شنو ، مامكن الاولاد يلعبوها عادي ،
ما نطيط وتوازن ، يكون من شنو ؟
تاني هام يامُني وممكونةوصابرة علي العظام،اريكة عمياء دي
انا مامتذكرها كلو كلو ! كدي احكوي لينا بيها؟
والله غايتو مُني دي بتكون كانت بت حلوة حلاة ...


سفيال الجريفاوي :

موش اللعبة بتاع الشوالات البلعبها ولد الأسييون
دي كان إسمها "حَرت " كدي ياسفيان فوقك النبي
توريني حرت دي قوانينها وطريقتها كيف ؟
أسه تلقاها في أُستراليا إسمها الكانغر المستعجل .

إنت يا سفيان ؟
زمان كُنت طفل؟
ولمن كُنت طفل كان لقبك شنو؟ قبل سوفي بقصد

الاسئلة دي مهُمة يا خونا ...

الحجلة و أم الحفر و صج صج و الكمبليتة و صفرجت
والعرائس التي أهداها لي أبي وأمي و للآن أحتفظ بها
العجلة و للآن أحتفظ بها
إضافة للزحلقانية و الدوّخانية في بيتنا و إلى الآن موجودين و ألعب بهما أو فيهما لا أدري
وألعاب الملاهي للآن تستهويني و خاصة بيت الرعب

Quote: إذن فهذا البوست دعوة عامة ، لرحلة، ولا أجمل، في ذاكرة الطفولة واللعب .

موضوع كله شجن و ذكريات يا جريفاوي

ممكن العب معاكم؟
الغريبة الموضوع دا لينا فترة متذكرنو انا وصاحبتي نون
وكمان إكتشفنا إنو اللعبات خاصة الفيها مقاطع بتتغني نصها بختلف من منطقة لأخري
موضوع لذيذ شديد

سالي

.


تسلية يا أُمي تسلية تسلية تسلية ...

(اللين ، ، الميس ، الجكو ، الضراب ، نظر ، جوز خسار ...)
مفردات من لعب "البلي" لعُبة لمهارة التنشين الاكثر شهرة بين الأولاد ...
والبلي عادة ما يُصنع من القزاز "الزُجاج" الملون باحجام كروية مختلفة
وصغيرة .يمتلك اللاعب ضراب "جُلة" كبيرة نسبياً بالمقارنة مع "البلي" .
يقف الاولاد في خط متوازيقرابة "الميس" وهو شكل يُخطط علي الارض في شكل مُثلث عادةً ،
حدود مرسومة تُضع بداخلهاحبات البلي المُتنافس عليها . يلقي الاولاد من عنده بالجُلل
"الضرابات" باتجاه "اللين" ، واللين :خط مستقيم لتحديد اللاعب الاول الذي سيحظي بضربة
البداية ، من يحصد اكبر عدد منالبلي رابح ، من يقع ضرابه في "الميس" يلعب "نظر" من
أعلي ليُسقط جُلة الحديد رأسياً دون ان يكسر قزاز البليه، ومن يصطاده لاعب اخر بالضراب يخرج
، ومن "يخرخر" ويبكي لن يلعب قريباًً ...
.
.
فيها قوانين حاكمة ، وخطط ، وتكتيكات وتركيز ومهارة عالية ونظر.
في حالة عدم توفر بلي القزاز يمكن اللعب ببلي "الفريت" والفريت هو
بلي من أغطية البيبسي والفرات والجنجر والليموناتة المسطحة.
و"بلي" الفرات يُُلعب فقط للتسلية .
.
.
كانت أُمي دائماً ماتمنعني من لعب البلي بالقروش لانو "حرام" ، قمار عديل ياإبراهيم وبدخلك النار!
وكُنت أمشيها كاذباً ً : لا لا بنلعب تسلية بس . كنت كثيراً ما اربح وكثيرا ماأخسر ولكن في كل الاحوال
كانت لي "حُفرة" خاصة أدسُ فيها "البلي" حتي لا تحدد أُمي ان كنت العب التسلية ام الخرت ؟ مرة من
المرات سمعتني وانا العب مع هشام جارنا اوقول له مُستهزياً:يازول انا تسلية ما بلعب معاك خرت بس
نحن شُفع ياخ عشان نلعب تسلية .

يا ساتر سمعتنا أُمي ...
سمعتنا أمي فصاحت فيّ وهي تسرع خطاها نحوي وعينها علي قرصة شديدة في أُذني :
خرَت ! قُلت شنو! أنا ماكلمتك ياولد كمان تقول ليه قدام عيني وسمع اضاني خَرت !
فارتجفت وما كان بيدي الا ان اطلق قدماي للريح جارياً مابين طشت العدة وجردل الغسيل
فطبلية الأكل فالغرف والشبابيك وتحت الأسرة وانا اصيح متوسلاً :



تسلية يااُمي تسلية تسلية تسلية...



.

.
.

شفع شفع
حليل الشفع وزمنا الشفع

.
.

"اصلوا كبرنا خلاص"
ـــــ

بوستكــ سمح يا قرمبا





بجيك تانى

الجريفاوي....

صدى الأيام السالفة...

متعة، متعة، متعة!!


لك المحبة

Quote: صديق الموج : قريت كلامك اتخيلت انو يكون في طفل يقول لاصحابو "راجع العب معاكم بإذن الله"!! ياخ دي كان حتكون حاجة عجيبة . ومضجكة جداً ، مُشتاقين ياخال وينك؟ معناتا حننتظرك تجي تورينا لعبات الكنتو بتلعبوها في زمن المهدية والخليفة عبدالله التعايشي .

زكرتنى يا جريفاوى مرة بنلعب انا والنور عنقرة وود النجومى وحسان بن ثابت
وتانى ياربى معانا منو‘، معانا الحطئية يا الزمخشرى غايتو واحد فيهم
الجريفاوى انت قايلنى انا مواليد متين ما تشوف الشيب ده والله انا سجيمان قدامى فى المدرسة
وصاحبك كمال خليل برضو دفعتى..شوف العجائز وين والله كان ما القدر مفروض يكون بنلعب انا وسوميتا حجلة ..نحن من ما قمنا ماما جابت لينا بلى استيشن،،،

شوفو يا قرمبوز و سفيان
انتو اسه الفي البوست دا كلكم ناس خرطوم ساكت ،
و عارفكم ما حتجيبو خبر لي العاب القرويين ( المهمشين ) .
فكان عندنا لعبة اسمها ( الشد ) ، ما عارف لعبتوها وللا لأ .
لكن هي حاجة كدا بين المعركة و لعب الاولاد ، بتتكون اللعبة من فريقين متساويين في القوة و العدد ، و ( ميس ) يوضع فيه الهدوم و المراكيب .
اول خطوة في اللعبة هي ( المزاملة ) ، يقوم فيها كل ولدين متساويين في القوة بالمزاملة ، فيمشوا
بعيد شوية و يختار كل واحد منهم عبارة او اسم معين يعبر عنه زي ( الحصان ينط بحرين او الدلوكة تدق شهرين ) ، ( الجمل او الحصان ) ، ( باص ابوزيد او باص التوفيق ) ، و هكذا .
بعد ما يختار كل واحد منهم ما يعبر عنه يرجعوا لي الميس البيكون قاعدين فيهو رؤساء الفريقين و يبدأ الزملا بعبارة ( الروس الروس ) ، فيرد الرؤساء بـ ( كلكم تيوس ) ، واحد من الولدين يقول ( الحصان ينط بحرين لي الدلوكة تدق شهرين ) ، يقوم واحد من الرؤساء يختار عبارة او اسم ، مثلا يختار ( الحصان ينط بحرين ) و دا معناهو انو الولد الاختار عبارة الحصان ينط بحرين حيكون ضمن فريقه ، و يكون الولد الاختار عبارة الدلوكة تدق شهرين ضمن الفريق التاني ، و كدا لغاية ما تنتهي المزاملات بين الاولاد كلهم ، و يتكون عندنا فريقين متساويين في القوة و العدد .

بعد المزاملة ما تنتهي تُرمى القرعة عشان ما يتحدد الفريق المهاجم للميس ، و الفريق المدافع عن الميس .
يتحدد ( العركة ) من الفريق المهاجم و العركة هو اللاعب الحيوصل الميس بدون ما يقع او يفلت اصابع رجليهو من ايدو .

تبدا الجولة الاولي من اللعب بي مسك كل لاعب اصابع رجله اليمين بيدو الشمال بقوة و يشتغل برجل واحدة طول فترة اللعب ، و يحاول قتل اكبر عدد من الفريق المنافس ( خاصة العركة ) ، و يموت اللاعب و يطلع من اللعبة لما يقع في الارض او يفلت اصابع رجله من ايدو . تنتهي الجولة بموت العركة ، و تبدأ جولة جديدة بعركة جديد .
تحرز الاهداف بعدد مرات وصول العركة للميس ، و بعد ما يموت العركة الاول يُختار عركة تاني لغاية ما يموت و يطلع برة و يجي عركة غيرو لغاية ما كل فرد من الفريق يبقي عركة . و بعدها يتحول الفريق المدافع لي مهاجم للميس و يختار العركة بتاعو و يهاجم الميس و يحرز الاهداف بنفس الطريقة .
و الفريق الفايز هو الفريق العركاتو يصلو الميس اكتر من التاني .

يستمر تبادل الهجوم و الدفاع بين الفريقين لغاية ما الدنيا تمغرب و البهايم تشبع ، فيجي وقت الرجوع للحلة ، و تبتدئ العاب الليل زي ناس لعبة ( الرِمة و الحرّاس ) و لعبة ( .... النملة ) .

سلام للجميع في فسحة اللعب

امانة ما لعابين

ياجماعة تعالو اوريكم انا في البلي ده عاجبني شنو رغم انو كلو حلو ابتداً من لون البلي والاشكال الجواهو وفي واحد صغار وفي واحد كبار هسي شوفو كلمة (قلووز) دي بلاي مش قلووز جدجد والتخطيط والرسم المحكم للقوانين ده والالتزام الصارم بيهم بس انا كان عاجباني كلمة حرية واهزوجته (فكو ادي حريتو) ودي حركه عجيبة جداً وبتتعمل بي طريقة حلوه وهي لما (الجله) تطقش رجل المنافس التاني بيقوم صاحب (الجلة) ياخد جلتو ويقبضه في حتت (الركبه) من الداخل ويقبض ساق الرِجل علي فخذو وينفض الرجل شديد علي اساس انو الجُلة تطير في ابعد مكان (شكل النفضة زي رفسة الحيوان بالخلف) وطبعا نقطة (حرية) دى بيتعمدوها غالباً الحرفه شديد والخرخارين ايوة الحريف لما خلاص (يخرت) كل البلي ويفضل بليتين او تلاته بيتعمد بي حرفنه شديده انو يخلي جلتو تطقش رجل منافسو ايوة بي حرفة شديد لانو قانون اللعبة دي لو قبضك متعمد حركة تطقش رجل خصمك ما بيرحمك وبيرجع منك الخرتو كلو وهنا بتكون حرفنتك انك (تضربه موزه) ايوة يعني تخلي عندك خيال (جامد) وحسابات دقيقة انو تدخل طرف تالت طرف (جماد) وبي حركة متوازنه كانك ما قاصده عشان الجُلة تتحرك من طرف يدك للطرف التانى ومن هناك علي رجل الخصم شفتو كيف ؟؟!! اها طيب هو حريف يبقي خرخار كيف ؟؟ اها شوفو اسم غير الخرخره للتصرف ده ؟؟ هو نحنا زمان تفكيرنا ده ما ما بعرف يفكر ابعد من الضحك .

حرية دي زاتها عندها طريقة تانيه اها شن قولكم ايوة الطريقة التانية ابداع بس ما بتطفش بعييييييييد شديد ايوا بذات الخطاء الحريف والخرخار داك بس المرة دي ما بتقبض الجُلة بي بطن ركبتك بتقبضه بين (حنكك ورقبتك) ايوة في حتت الخرزه عديل او كمان تخته في خشمك وتقبض قميصك او (فنيلتك) بيدينك وتشدو/ها لي قدام وتفك الجلة (كان من الرقبة او الخشم) في وضع يسمح ليها تدردق علي القميص او الفنله الشدايها بيديك ولما تصل نص القميص بالضبط بتساعدها بي نفضه لي قداااااااااااام شديد عشان تطير هنااااااااااااااااك .
فكو ادي حريتو
فكو ادي حريتو
فكو ادي حريتو

في "شنقت" تربط كرة شراب بحبل في عمود نور، وترسم خط، وتضرب الشراب، لو لف
في الخط ولا فوقو، تبقا شنقت "لعبة بااايخة"

في تاني كمبلت، وعندها أسامي كتيرة، حقت الإتنين البيكونو في طرفين وفي النص في
زول وإنتا بتحاول تفلقو بشراب "أبيخ"

.


حمد القروي ود الارياف ،
سلامات يا حبيب ديل موشإنتو ؟ هناك ولا شئ تاني .

...
...

شدت دي لعبة صعبة خلاس .بتعلم الناس الدفر والغتاتة ...

يا جماعة عليكم الله خلو الكضب

عارف ليه؟

لأنو لعب (الأولاد) زمان كان فيهو كمية بتاعت عوارة كده

حتى اسألوا صديق الموج قولو ليهو (حرّينا) دى لزومها شنو؟؟؟

بوست ظريف يا جريفاوى

تحياتى

حمد (لبد)

Quote: شوفو يا قرمبوز و سفيان انتو اسه الفي البوست دا كلكم ناس خرطوم ساكت ، و عارفكم ما حتجيبو خبر لي العاب القرويين ( المهمشين )

ياحمد بطل ذاكرة القرويين دي لانو مافي مدينة اصلاً في هذه الديار

Quote: فكان عندنا لعبة اسمها ( الشد ) ، ما عارف لعبتوها وللا لأ .

ايوة لعبناها بس اسمك ده مختلف من اسمنا (حبه) كده واحتمال كبير انت تكون ما لعبته عشان كده غلطان في اسمه .
اسمها (شدت) أو (شاديت) وهي يا كريم الروح بالضبط بذات الاوصاف التي قلتها بس الاختلاف في انو ماسميته انت ب

Quote: ( المزاملة )

في حقيقة الاسم ( التسامي) شفته كيف علو روح اللعب ونقاء المدخل وصفاء الكلمات !!! ايوا التسامي أو المسأماه ودي زي ما قلته انت بتجي المجموعة العايزه تلعب وكل اتنين بيختارو بعضهم وبيمشو يتسامو يعني انا اقبضك من يدك واقوليك :- ساميني واساميك وبيحصل الكلام القلتو انت ده .

شفته كيف !

وبالفعل يا صاحب كان لكل لعبه زمنها بالضبط .

شفته القرية والريف عندنا غالط كيف

إبراهيم ياخي إنت واحد من أهم الناس في دنيتي دي

و أنا بريدك شديد خلاص

عليكم الله.. عليكم الله.. عليكم الله ...أدخلوا هنا!

البلي .. إن كان العنقريب لا يشرح فمن باب أولى ألا يشرح البلي!