Post: #1
Title: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-05-2006, 03:06 AM
Parent: #0
اهداء :
الى الذى وقف بجوارى , مساندا , منحنى الثقة بالنفس
عبر التشجيع المستمر , تكبد مشاق الاتصال من امريكا
اكثر من مرة , راسلنى عبر الماسنجر .
الى عضو سودانيز اون لاين القدير
(عثمان مالك) .
ارفع قبعتى لك .
كل ما اكتب هنا هدية متواضعة منى اليك .
محبتى واحترامى حتى نلتقى قبل الرحيل الاخير .
...........................................
...........................................
مقدمة :
اقف عاريا تحت دش الماء , زخات الماء الساخن على
الجسد العارى تعيد توازنا نفسيا مفقودا ومرغوبا
تحت الماء اعيد ترتيب حياتى .. ايامى التى مضت
ومغامراتى الفكرية المتعددة .. اشعارى .. شعاراتى
البالية .. ايامى التى ستاتى .. قصاصات روايات لن
تكتمل .. هزائمى الساحقة الماحقة .. انتصارتى القليلة
التافهة .. مشاريعى العاطفية الفاشلة والفاسدة معا ..
مشاريعى التجارية الاشد فشلا .
عاريا تحت الماء , والجسد بداء فى اعلان السنين
خطوات قليلة واصبح فى الخمسين .. لا تحقق ولا تحقيق
الخوف من المجهول شبح يعذبنى .. لا مستقبل شخصى ..
ولا مستقبل جماعى .
الشعر
الشعر
الشعر
هو الذى يغسلنى .. اتوضاء به خمس مرات فى اليوم
الموسيقى والادب والفنون هم ترفيهى الوحيد .. زادى
وذاتى .. طوق نجاتى .. قاربى المطاطى عندما تغرق
السفينة .
فى بداية عقد الاربعينيات ولم اعد اطلب من الدنيا
كثير , فقط راحة البال , لا اكثر ولا اقل .
الشعر
الشعر
الشعر
معادلاتى الكيميائية .. به اواجه واقعكم الكالح
اهرب منه اليه .. اهرب الى الامام .. محلك سر
لن يقدم ولن يؤخر .
لا اهتم ان كان جيدا .. محبوك الصياغة
او كان سيحدث ثورة .. او انقلاب
اكتب لاننى احب الكتابة
الشعر
قرص المهداء
صلواتى
مراهقتى الغبية
جنونى
تذبذبى
قلقى الفكرى والانسانى والعاطفى .
اخرج من تحت دش الماء .. مبللا من راسى الى اخمص قدمى
منتظرا احباطات قادمة .. وهزائم جديدة .. ترسم خطواتى
المبتلة اثارا على الارض .. سريعا ما تجف .. مثلى
واشعارى .. الى فناء .
خطوات واصبح فى الخمسين .. لا تحقق ولا تحقيق .
.......
شاهين .
|
Post: #2
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-05-2006, 03:20 AM
Parent: #1
(1)
...
طوفان الخوف غرق امنى
دسينى فى حضنك دسينى
يمكن فى حضنك خوفى يخاف
ما يرجع تانى يبارينى
جاييك فى نص الليل عصفور
بجناح مكسور
عايزين فى الليل يصطادونى
افتحى شباك حضنك ليا
شافع مهجوم من وسخ الدنيا وغدر الليل
فى الليل يا ليل
عايزين فى ليل يصطادونى
بت يا فاطمة
يا طرحة على الافراح طارحة
محتاج لحضنك .. كلماتك .. ريحة عرقك
محتاج من خوفى تدسينى
اوعك تقفلى شباك حضنك
اوعك يا فاطمة تبيعينى
فى ركن الشارع منتظرين .. عصفور مسكين
افتحى يا فاطمة
افتحى يا فااااطمة ودسينى
........................
........................
أأأأأأأأأأخ .. يا روح القلب اتاخرتى
على حافة شباكين نهدك
اولاد الكلب اصطادونى .
.......
شاهين .
|
Post: #3
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-05-2006, 03:26 AM
Parent: #1
(2)
...
نزلت مظاهرة من انوثة على الشوارع فرفشت
شجرة جوافة حوشنا بالضىء فرهدت
يا ضجة فيك روعة جمال
الرملة بالزحمة انتشت
التماثيل خلت المتحف مشت
بكت الرياح من خطوتك
عن سر دلالك للسحابات وشوشت .
.......
شاهين .
|
Post: #4
Title: Re: اعوذ بالله من شياطين شعرك وجنونك (اعمالى الكاملة)
Author: المسافر
Date: 06-05-2006, 03:26 AM
Parent: #1
Quote: خطوات واصبح فى الخمسين .. لا تحقق ولا تحقيق .
|
شاهين يا شاهين
أنت الآن تقف في ناصية مطلة على عشرة شوارع
تسعها حركة المقل
وتتلفت حولها درابزونات العصب البصري
وتظللها بالأحاسيس
خطوات وتصبح على جادة الحي المعمور بسكناتك
دعها تطل على الجميع
فهم في غداة أو رواح
في كل حين لك التفاتة
|
Post: #5
Title: Re: اعوذ بالله من شياطين شعرك وجنونك (اعمالى الكاملة)
Author: Muna Khugali
Date: 06-05-2006, 04:47 AM
Parent: #4
Quote: فى بداية عقد الاربعينيات ولم اعد اطلب من الدنيا
كثير , فقط راحة البال , لا اكثر ولا اقل . |
وبـداية كـده أقـوليك..
راحـة البال كـده مـرة واحـدة يامفتري?
بس ماكـتير علي ربنـا..ونعم بالله
|
Post: #6
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-06-2006, 03:43 AM
Parent: #1
(3)
...
بين كباية قهوة .. وصرخة شافع بال على نفسه
لباسه اتبلبل .. اتذكرتك
والكمسارى بيهرش فينى عشان الباقى .. اتذكرتك
لما النور فى الحلة بيقطع .. والكتاحة تغبر بيتنا .. اتذكرتك
صوت الموية فى الحنفية زى صوت حسك
كنتا بخت السفة صغيرة دون ما تلاحظى .. وانتى بتكرهى ريحة خشمى لما اسف
يعنى خلاص هاجرتى بعدتى فى امريكا
يااااه
كنتى بتكرهى فى الضهرية نمشى كتير
تزعلى مرة .. مرة بتصرخى .. مرة تصهينى
وانا بستهبل واضغط نهدك دون ما اقصد .. (طبعا قاصد يا مستهبل)
حوش جيرنا الفاضى .. فيهو حضنتك
لما بنوه .. اتذكرتك
يوم خمسنا سيجارة بينسون .. طول اليوم قعدتى تكحى
هل تتذكرى ؟؟
انا بتذكر
كنتى قصيرة .. لمن احضن راسك كان بيكون فى بطنى
هل ما زلتى لسه بعيوة ؟ .. ولا طولتى ؟
انا قصرنى الوجع الغالب
هل تتصورى بت يا روعة ؟
رغم قطار العمر الاوغل .. لسه بمارس قلة ادبى
وبعد سنين الغيبة الطالت
هل تتخيلى ؟
لما الباب امبارح دقا .. اتوقعتك .
.......
شاهين .
|
Post: #7
Title: Re: اعوذ بالله من شياطين شعرك وجنونك (اعمالى الكاملة)
Author: Tragie Mustafa
Date: 06-06-2006, 05:27 AM
Parent: #6
شاهين منتظرنك بالمزيد
ولك وحشه يا راجل
وسلملي على الود بليه
اكيد وحشك؟؟؟؟؟
انت واحشنا كمان.
مسافره وبرجع بعد يومين.
لك الود .
تراجي.
|
Post: #8
Title: Re: اعوذ بالله من شياطين شعرك وجنونك (اعمالى الكاملة)
Author: Osman Malik
Date: 06-06-2006, 07:55 AM
Parent: #1
العزيز شاهنا المفدي
وينك إنت, السودان دساك مننا.
هذا ماكنت أخشاه,أن يشغلك اكل العيش عن نثر الدر في هذا الزمن البئيس.
أرجو ان تزول الصدمة سريعا لتعود لنا ناشرا للامل والكلمة الجميلة.
دمت
|
Post: #9
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-07-2006, 04:07 AM
Parent: #1
الاعزاء الاصدقاء
1/ الاستاذ المسافر(من اين والى اين ؟)
2/ الاستاذة منى خوجلى (نسمة صيف سودانيز اون لاين)
3/ الاستاذة تراجى مصطفى (المناضلة ونجم السياسة القادم بقوة)
4/ الاستاذ عثمان مالك (كل الحب والتقدير احمله لك )
شكرا لكم على المرور والتعليق والتشجيع .
خالص حبى لكم.
|
Post: #11
Title: Re: اعوذ بالله من شياطين شعرك وجنونك (اعمالى الكاملة)
Author: nashaat elemam
Date: 06-07-2006, 04:38 AM
Parent: #9
شاهين..
يا أيها النسر الذي يحلق عالياً
دم بخير.. وواصل في هذا التحليق الوسيم
|
Post: #10
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-07-2006, 04:12 AM
Parent: #1
(4)
...
بتسكر والشمس تضحك على حالك
بعد سكرك بتطرش فى حطام ذاتك
وبين كتبك تدس المك
وتبكى على الرصيف وطنك
بتدفع فى فواتيره
منو البدفع تمن كفنك ؟
وتبكى على الرصيف ماشى
تدوس الحسكنيت ماشى
مكسر فى عضم ركبك
كسر عضم الحلم قاسى .
.......
شاهين .
|
Post: #12
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-08-2006, 05:00 AM
Parent: #1
شكرا استاذ/ نشات الامام
شكرا جزيلا على الكلام الحلو .
|
Post: #13
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-08-2006, 05:12 AM
Parent: #1
(5)
...
اشرقتى يا شمس الله فى ضل الحيط
زى لمسة ايدك يا مسيح العاطفة فى جواى حيت
وحاة العذراء والانجيل
بحب وشم الصليب فى الايد
بحب دهب الصليب فى الجيد
وصوت جرس الكنايس فى الاحد والعيد
وحاة سيدى المسيح خليك وما تهاجرى
سحابة صيف وبتعدى
جميل يا لوحة زيتية .. ابعادك ثلاثية
مسيحية .. سودانية .. قبطية
بنات اقباط .. عصافير زينة فى الشجرات
اخت الايد على القرأن واهتف
(اننى اقسم باسم الله .. بناتكم يا مسيح سمحات)
على الخرطوم مسرة وحزمة من انوار
واقباط فى الشوارع ماشية بالالاف
سحابة صيف وبتعدى وحتعدى
وحب زاركم وما بعدى
انا المسلم على راس الملاء اعلن
(بحبك يا مسيحية)
واكتر ما بحب فيكى
بحب فيكى اعتزازك بالمسيحية .
......
شاهين.
|
Post: #14
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-10-2006, 04:55 AM
Parent: #1
(6)
فى الحب انا زيك زول اهبل
اهبل جدا
ورومانسى وزول حساس خالص
خالص جدا
الزيى وزيك يا وردة فى الزمن القاسى
ده زول اهبل وعوير جدا .. جدا , جدا
فيروزة شاطى احلامى
نتعاور فى الوطن الاهبل
اهبل جدا
نحلم ب بكرة وعارفنو
حيكون اكعب من امبارح
اكعب جدا .. نتعب منه
نلعب بالمنطق .. حد نصله صارم جدا
جدا , جدا
شافع يا شافعة يا عضاضة
يا السارقة حلاوة لبان منى
بسرق من جيبك تفاحة
واديك كرملة ومصاصة
وبطوطحك فى المرجيحة كمان
ما العيد بكرة
يوم بكرة بعيد عننا جدا
جدا , جدا
وبريدك انا بالجد جدا
اهبل متخلف عقليا
يا عويرة وفيروزة شاطى
نتحدى المنطق والواقع
ده الواقع فى بلدنا السمحة
اسود جدا
جدا , جدا
......
شاهين.
|
Post: #15
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-11-2006, 07:01 AM
Parent: #1
(7)
يا عمى بياع الوشوش
الدنيا عيد .. والعيد سعيد
ما عندى ليك يا عم قروش
بدلنى هاك وشى الاليف
ادينى وش شيطان مخيف
عايز اعيش بين الوحوش
العندو وشين بستريح
والعندو خمسة بكون مريح
ما قدرت
فى الريح .. بنكسر .
......
شاهين.
|
Post: #16
Title: Re: اعوذ بالله من شياطين شعرك وجنونك (اعمالى الكاملة)
Author: ادريس خليفة علم الهدي
Date: 06-11-2006, 07:09 AM
Parent: #15
الجميل شاهين
متعك الله بالصحة والعافية ..
وزيدنا من ابداعاتك
ولي قدام
|
Post: #17
Title: Re: اعوذ بالله من شياطين شعرك وجنونك (اعمالى الكاملة)
Author: فيصل محمد خليل
Date: 06-11-2006, 07:36 AM
Parent: #16
الزعيم شاهينوف
مسكاقنا
انت القلم و السيف
فيصل محمد خليل
|
Post: #18
Title: Re: اعوذ بالله من شياطين شعرك وجنونك (اعمالى الكاملة)
Author: محمد سنى دفع الله
Date: 06-11-2006, 07:45 AM
Parent: #17
بتكتب متين ياشاهين
بالليل وولادغش الرحمان
ومعاك شياطين الجن والأنس والالمعاك شفوت الشعر والنثر
كده كمل النشوف أخرك
|
Post: #19
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-12-2006, 05:19 AM
Parent: #1
الاستاذ الحبيب / ود الخليفة .. ادريس
لك الشكر حتى ينتهى الشكر
شكرا .
|
Post: #20
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-12-2006, 05:49 AM
Parent: #1
الاستاذ/ فيصل محمد خليل
ابن تهراقا العظيم
تعظيم سلام .
|
Post: #21
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-12-2006, 05:51 AM
Parent: #1
استاذنا/ السنى
لك الود يا حبيب
وكل الابداع يا مبدع
وستظل اعمالك محفورة فى البال .
|
Post: #22
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-20-2006, 04:27 AM
Parent: #1
(
...
سنة واحدة بس .. والاربعين حيدق على ابواب مدينتك
افتح الباب الكبير
سنة واحدة بس .. شمسك خلاص بدات تميل نحو المغيب
سنة واحدة بس .. اكوام قزاز مكسور
وبحثك عن بصير يجبر كسور
يا (دون كيشوت) العظيم
ضيعتا عمرك يا غبى
(انا بعتقد .. انا بفتكر)
(الم الكتابة المؤلمة .. وعى الجماهير لو تعى)
امشى اتلهى
شوف ليك فكى
يمكن حجابه يرجع العمر اللى ضاع
وتبداء صاح
وتنتهى .. مثل الجميع ما بيشتهى
والاربعين جاييك جرى
ود يا غبى .
......
شاهين.
|
Post: #23
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-22-2006, 07:04 AM
Parent: #1
(9)
...
اشمعنى من كل البنات اخترتا فاطمة ؟
وعلى الرصيف بتعدى الاف البنات
اشمعنى انت على الرصيف مستنى فاطمة ؟
خبطك زمانك فى وشيك
اشمعنى لما صرختا منه
صرختا فااااطمة
وكتار خلاص الفارقوك
خلوك بدون قشة غريق
اشمعنى فى حرق الحشاء
حرقت حشاءك ست البنات
الست فاطمة
ما الحكمة من سفرك براك
من غير كتب , وبدون شنط
دون زاد , ودون الست فاطمة
ما المعنى من عبث الحياة ؟
وكتار خلاص على صدرهم ياما بكيت
اشمعنى لما بتبكى هسعا
اشمعنى بس بتحن ل فاطمة .
......
شاهين.
|
Post: #24
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-24-2006, 03:12 AM
Parent: #1
(10)
....
عام جديد .. وجرح قديم
ذكريات .. وغبار كثيف
كل عام زى كل عام .. لا جديد
عام جديد زى القديم
كل عام وانتى بخير
وكل عام وانا فى انتظار
فى محطات خالية من ركاب جداد
نفس الملامح والوشوش
نفس الكلام
نفس الشوارع والبيوت
نفس احتياجى اليكى
نفس الاشتهاء
عام جديد
والهجر طال
العمر ضاع
الشعر شاب
ضيعنى فيكى سراب لقاء .. ولا لقاء
فى كل عام نفس الوداع
اتسرسبت قدرة صمودك يا احتمال
فى كل عام .. اتشابهت ليك الهزايم والضياع
الفرق ايه ؟
بين بكرة .. او بعد بكرة .. وبعد بعده
الفرق ايه ؟
تكرار لئيم
نفس السؤال السرمدى .. زى كل عام , لا جواب
فمتى الرحيل ؟
لمتين تأجل فى قرار الانتحار ؟
فى اى عام ؟
ود يا جبان .
......
شاهين.
|
Post: #25
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-24-2006, 03:18 AM
Parent: #1
(11)
....
وكده كده يا الترلة
ده عامل فيها شاعر
لكن هو ما شاعر
ده زول مجروح مشاعر
زمانو الفيهو داعر
وعامل ليا طاهر
تعالوا اتغدوا بكرة .. طهور صاحب مشاعر
معاك يا تمرجى ابرة ؟
وقطنة عشان نزيف ؟
اطار الصورة زيف
وقال انا ود شريف
وايه فايدة كتابتو ؟
ومين البيقراء .. مين ؟
وكل الناس بتضحك وماشية الى الجحيم
وقاطرة قندرانى .. وسواقا لئيم
تعالوا اتغدوا بكرة .
......
شاهين.
|
Post: #26
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-25-2006, 05:23 AM
Parent: #1
(12)
.....
بين (لا) و (نعم)
اخترتا (لا)
مسكين خلاص
كم الف زول مشى فى طريق ال(لا) وتاه
كم الف زول مشى فى طريق ال(لا) رجع
اخترتا (لا) ؟
مبروك عليك
شلتا الوجع
(لا) كلمة زى موس فى اللحم
(لا) صوت كمنجة منشزة فى انغام (نعم)
لا .. لا .. لا .. لا
يا كلمة حبينى
قوينى .. دفينى
خلى التحدى الفيك .. يكبر يكون فينى .
......
شاهين.
|
Post: #27
Title: Re: اعوذ بالله من شياطين شعرك وجنونك (اعمالى الكاملة)
Author: فيصل محمد خليل
Date: 06-25-2006, 05:37 AM
Parent: #26
العملاق شاهين
مسكاقنا
فيصل محمد خليل
|
Post: #28
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-26-2006, 04:09 AM
Parent: #1
hi
استاذنا/ فيصل
شكرا على التحية يا ابن وادى حلفا العظيم والعظيمة
تحياتى .
|
Post: #29
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-26-2006, 04:18 AM
Parent: #1
(13)
....
يا ولد .. كل فردة من بلد
مدد .. مدد .. مدد
ماركسى لو مركست
كوز خطير لو اسلمت
كاس طويل حين مغربت
مدد .. مدد .. مدد
ضد وضد الضد
وصاحب الضد اذا درجة مناخ اتغيرت
كل كرت فى ايده قاشى
(اتحادى) , (امة) ماشى
(بعثى) ممكن
(جبهة) جبهة .. المهم صالح معاشى
يا ولد
عسكرى لو عسكرت
ثورجى ان ثورجت
ديك كبير يوم بيضت
يا زعيم يا زئبقى
دولة سيادتك زئبقت
ضم كراعك انتباه
سيجة سياستك صفرجت
واجرى ضلك .. سخنت
مدد .. مدد .. مدد
......
شاهين.
|
Post: #30
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-26-2006, 04:26 AM
Parent: #1
(14)
....
ومساء الخير يا زميل يا جميل
يا اصيل فى الزمن الوجعو كتير
وبديع .. زول مابى يبيع
وبشيل
شيال ان نخوا الشيالين
معجون من طين الاستفهام
مجنون ب بكرة وما هو ات
وعنيد احلام
احلام اكبر من سنه ونضارته
وجيبه الفاضى من الاموال
درويش فى كلامه الدرابات
مدمن بومبان
و زبون معروف فى المعتقلات
بيعشى حبيبته سياسة و فول
ويحلى بموية وكيس تمباك
مليان اصرار
واصر يصر .. بقى ملحاح
شغال كى ياتى علينا صباح
وصباح الخير على شجرة نيم
قصوها تطول
متفائل مؤمن انو الليل بيزول .
......
شاهين.
|
Post: #31
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-27-2006, 04:12 AM
Parent: #1
(15)
....
وهذه الخرطوم داعرة
تفتش فى ظلام الليل عن رجل
ليعطيها الرغيف وبعض اقراص الدواء
ما وجدت على الطرقات من رجل سوى الخصيان
فحول البلدة البلهاء قد تابوا عن العصيان
وتفرغوا للصبية الغلمان
استمنوا , وناموا فى امان الله
داعرة تفتش فى ظلام الليل
عن رفقة الليل البهيم
ما وجدت سوى الشرطى
يفتش عن من يهدد امن دولتنا العريقة
ويبحث فى عيون الناس عن ثمن الرغيف , وبعض اكواب الحليب
..............................................
..............................................
هذه الخرطوم قد شاخت
وترهل الثديين من ايدى الرجال
ما زالت تمارس ازدواج الازدواج
فى الليل عاهرة
فى الصبح بائعة لكوب الشاى
فى الظهر تبكى فى الصلاة
قتلتنا امراة الفراش بنصل هذا الازدواج
هذه الخرطوم ما زالت تمارس فتح ارجلها العجوز
من سوف يحتضن العجوز ؟
بعد انتهاء القذف فى اللحم العجوز
من سوف يعطيها الحنان ؟
بعد انكماش اللحم فى اللحم العجوز
من سوف يعطيها الامان ؟
.............................................
.............................................
هذه الخرطوم قالت ذات مرة
(قبل ان نزنى سويا)
- ابنى هناك سيعود من خلف الغيوم محلقا
- سيعود ممتطيا جواد , حاملا درع البطولة
- ونطير للدير البعيدة , واتوب من وسخ الدعارة والرجال
وبكت على صدرى طويلا
وبكيت فى سرى طويلا
مسكينة يا هذه الخرطوم
الفارس المغوار اسطورة
كالغول , والعنقاء , والخل الوفى
الفارس المغوار , لم ياتى , ولن ياتى , ولا ياتى
فدعى الخيال ونامى فى امان الله بين احضان الرجال
............................................
............................................
وخرجت ابكى للشوارع
فوجدت خصيانا يتلذذون بخصيهم فى ظل حائط بيتنا
وجلست بينهم نخطط للهروب الى بلاد الثلج
وان لم نستطع
فالى بلاد النفط
وان لم نستطع
فالى الجحيم .. الى الجحيم
زمن البطولات انتهى
والفارس المغوار اسطورة
.........................................
.........................................
(ملحوظة هامة)
داهمتنا الشرطة اثناء النقاش
وصادروا كل النقود
وبعض اكياس الصعوط
وحدثونا عن وطن .
......
شاهين.
|
Post: #32
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 06-27-2006, 04:23 AM
Parent: #1
(16)
....
اذا كان ممكن القى مساحات منك اكتر
واذا كان ممكن تحبى الاحلام فيكى وتكبر
بس لو اقدر
ارسم لوحتنا ب لون اصفر
وابدل لون شمسك اخضر
اقدر ؟
لو تقدرى راح اقدر
ادخل مملكتك كالقيصر
يا زهرة عبادة شمسى
حلقى فى سمائى كما النورس
نورس ابيض
فى خضم خضم اعاصيرى
اعزفى الحانك فى جسدى
اغرفى من جسدك فى جسدى
جسدى اسمر
شاطى لنوارس يا نورس
انا بتمناك .. زهرة لوتس , ياسمينة . قرنفلة
او نورس
ورينى حدودك فى الاطلس شان احتلاك
القى مساحات منك اكتر .. وابدل لون قمرك احمر
اذا كان ممكن ؟
......
شاهين.
|
Post: #33
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 07-08-2006, 05:10 AM
Parent: #1
(17)
....
يا صوتنا شالوا السوط سكتا
فترك المشى وعبث الاذان فى مالطا
اتجهجنا فى بلد الله
حتى الصوت خذلنا .
......
شاهين.
|
Post: #34
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 07-10-2006, 05:17 AM
Parent: #1
(1
....
(الى اسماء محمود محمد طه)
.........................
أأأأأأه ممدودة محروقة وبتحرق
داود نبى
موسى نبى
عيسى نبى
ومحمد المعصوم نبى
وكل من ليهو نبى .. يقراء صلاتو على النبى
بوذا حكيم .. (محمود) حكيم
ما الفرق ما بين الصعود الى السماء بمشنقة او بالصليب
عيسى نبى .. ( محمود) حكيم
(محمود) رضى الله عنه وعن بنيه
...........................
...........................
(جمهورى) يا الطالع السماء
جيب لى معاك شجرة
فى ضلها اتكلم .. اقنع واتدقا
او جيب معاك نبقة .. الفقرا بارونى
احسن تجيب بقرة .. تحلب وتسقينى لبن الحكم يا حكيم .. الجهلاء خذلونى
............................
............................
(محمودنا) شن القول .. دين الله دين محمول .. حمال وجوه ووجوه
من اسمو كان الزين
من اسمو كان الشين
دهب السكوت لمتين ؟ .. فضة كلامك ماس
تمن الكلام الراس .. يا الفة فى الكراس .. اكتبنى هرجلتا
................................
................................
سكك الكلام خطرة
والزول ده راجل جد
هو الجرجر السلبة .. ما السلبة هى البتجر
سلبة مشانقكم وهبت حياتو الجد
والزول ده راجل جد
...............................
...............................
تعظيم سلام يا بوم .. قاضى السجم والشؤم
دين الله دين محمول
والعسكرى السكران .. اصبح امام مختوم
ترزية القانون .. هذا البتاع مسطول
يا بنقو يا افيون
سبتمبر الملعون .. نص كم قوانينك
خيم الطؤارى وين ؟ .. ملعون ابو سنينك
هذا او الطوفان
ذل الرجال ذلة .. قطع الفقير خسة .. فضح النساء علة
سلخانة الجبهة .. صمت الرجال مذموم
لما الرجال بتنوم .. (محمود) بيصرخ لااااااااااااا
شان الرجالة تقوم
....................................
....................................
جزار بنى خيبان
تشريعك التعبان
كرسى الحكم هلكان
شوف ليك صمغ ولبان
يا قاضى يا فاضى .. دم البشر غالى
دين مين ؟ يا ود يا ظريف .. شافع يدين عالم
دين كيف ؟ يا قاضى ضليع .. قطع اليدين ووعيد
معذور رئيسكم جد .. دخل الديانة جديد
داير العبيد تخضع .. لحكم نار وحديد
......................................
......................................
عيسى ولد مريم
(محمود) ولد فاطنة
عيسى نبى .. (محمود) حكيم
(محمود) رضى الله عنه وعن بنيه
ويهوذا لعنة الله فيو
(محمود) حبيب الله .. حبيبى يا حبيب
عاشق جمال عقلك
كتب فكرك
نهايتك لما تنزل من سماء الله .. لتبداء من جديد
بوذا حكيم .
......
شاهين.
|
Post: #35
Title: Re: اعوذ بالله من شياطين شعرك وجنونك (اعمالى الكاملة)
Author: shaheen shaheen
Date: 07-11-2006, 05:40 AM
Parent: #1
(19)
....
أهى ديك البت النطت جوه جينيتك سرقت
أهى ديك الدخلت سطح بحيرة نفسك سبحت
اتحدت عمق البير الفيك .. من شعرها مدت حبلها نزلت
أهى ديك القاعدة على الكرسى
البت الابسة ايشارب اخضر
الماسكة فى يدها كباية
بتهزر وبتحكى حكاية
وتمر قدامك مخصوص
بتخلى حزن قلبك يضحك
الله بختك .. الظاهر انها بتحبك
أهى ديك البت البتحبك
من خوف العالم بتدسك
الشالت من كتفك وجعك
والختت عطرها فى حجرك
الله بختك .
......
شاهين.
|
Post: #36
Title: Re: اعوذ بالله من شياطين شعرك وجنونك (اعمالى الكاملة)
Author: Yassir Tayfour
Date: 11-17-2006, 01:01 AM
Parent: #35
شاهين
لقد طال غيابك
أتمنى ان تكون بخير
Quote:
يا عمى بياع الوشوش
الدنيا عيد .. والعيد سعيد
ما عندى ليك يا عم قروش
بدلنى هاك وشى الاليف
ادينى وش شيطان مخيف
عايز اعيش بين الوحوش
العندو وشين بستريح
والعندو خمسة بكون مريح
ما قدرت
فى الريح .. بنكسر .
......
شاهين. |
|
|