Post: #1
Title: خربشات
Author: shaheen shaheen
Date: 09-23-2006, 05:52 AM
Parent: #0
(1)
صباح نادى
صباح الورد يا وردة
صياح الديك .. ومع صوتو الصباح يبداء
صحيت من نومى صحصحتا
متفائل
وبعطر الامل فوحتا
فتحتا الباب
وفى وش النسيم صحتا
- صباح نادى
اكلم اى زول ماشى
انادى عليك يا بهجة
تردى وانتى مبتهجة
اشوف وشك
يزهزه ابتهاج ذاتى
صباحاتك عسل صافى
صعوبات الحياة سهلة
ينط احباطى للماضى
وامواج الفرح تعلا
صياح الديك .. ومع صوتو الصباح يبداء
صباحك حلبة بالقرفة .
......
شاهين.
|
Post: #2
Title: Re: خربشات
Author: Tragie Mustafa
Date: 09-23-2006, 05:56 AM
Parent: #1
شاهين كيفك
ورمضان كريم
يازول انت جالدوا ولا شنو؟؟؟؟؟
| Quote: صباحك حلبة بالقرفة . |
يازول الناس صايمه تقول لينا حلبه وقرفه
مشتاقين....
تراجي.
|
Post: #3
Title: Re: خربشات
Author: Emad Abdulla
Date: 09-23-2006, 05:23 PM
Parent: #2
يلقى المكان بهناك كامل العدد ..
يقوم يجيني متلب تاني .. 
شاهين يا خوي ..
الله يخليك و يقدرك تزيدنا من جرعات التفاؤل ..
بصوتك السمح و لغتك الجديدة .
يديك العافية .
|
Post: #4
Title: Re: خربشات
Author: محمد سنى دفع الله
Date: 09-23-2006, 05:50 PM
Parent: #3
وينك يا متفائل
ليك زمن ماطليت
أيامك كلهااعياد
وربنا اديك السعادة الحقة
واخلي احباطك من الماصى ونحن معاك
تصوم وتفطر على خير[/purple]
|
Post: #5
Title: Re: خربشات
Author: Yassir Tayfour
Date: 09-23-2006, 08:27 PM
Parent: #4
المبدع شاهين
كل سنة وانت طيب
رمضان كريم
|
Post: #6
Title: Re: خربشات
Author: shaheen shaheen
Date: 09-25-2006, 04:13 AM
Parent: #1
(2)
اشرقتى يا شمس الله فى ضل الحيط
زى لمسة ايدك يا مسيح .. العاطفة فى جواى حيت
وحات العذراء والانجيل
بحب وشم الصليب فى الايد
بحب دهب الصليب فى الجيد
وصوت جرس الكنايس فى الاحد والعيد
وحات سيدى المسيح خليك وما تهاجرى
سحابة صيف وبتعدى
جميل يا لوحة زيتية , ابعادك ثلاثية
مسيحية .. سودانية .. قبطية
بنات اقباط
عصافير زينة فى الشجرات
اخت الايد على القرأن واهتف
- اننى اقسم باسم الله .. بناتكم يا مسيح سمحات .
على الخرطوم مسرة وحزمة من انوار
واقباط فى الشوارع ماشية بالالاف
سحابة صيف وبتعدى , وحتعدى
وحب زاركم وما بعدى
عيال الله .. عشان الله .. ما تهاجروا
وما تهاجرى
انا المسلم على راس الملاء اعلن
- بحبك يا مسيحية .
واكتر ما بحب فيكى
بحب فيكى اعتزازك بالمسيحية .
......
شاهين.
|
Post: #7
Title: Re: خربشات
Author: shaheen shaheen
Date: 09-25-2006, 04:31 AM
Parent: #1
(3)
يا فاطمة
فى زمن الزهايمر .. اذكرينى
والناس بتنسى الناس
ف كيف تنسينى ؟
سيبانى فى طريق مهجور براى
خطواتى ما تحصل سنينى
ف تذكرى الماضى اللى كان
يا فاطمة
ارجوك اذكرينى
..........
..........
من لوحة التذكار
ومن صورتك معاى
من بسمتك .. من توبك الابيض
ومن علبة سجايرك
والمقالات .. نشرة الاخبار
غمزة عيونك
مشيتك زى عسكرى
شلال انوثتك
رقتك
تكشيرة الوش .. يا هزارك وشدتك
..........
..........
يا فاطمة
فى زمن الزهايمر .. والخلعة من وسخ الزمان
عبث الكتابات والكلام
ضجر السياسة
اليأس من هذا الزحام
الهاوية .. والا مكان
فطومة يا زاد الطريق
فطومة يا كتف الرفيق
فطومة يا قشة غريق
ف تذكرى المحروق على نار الحريق
..........
..........
يا فاطمة
فى زمن الزهايمر
اذكر , ويتعبنى التذكر والحنين
فى غابة النسيان اتوه واتذكرك
على صوت تذكر ذكرتك بتذكرك
ريحة سجايرك .. ضحكتك
الله عليك .. مشتاق شديد ل قهوتك
احضن .. اغازل شفتك
الله عليك .
......
شاهين.
|
Post: #8
Title: Re: خربشات
Author: shaheen shaheen
Date: 09-28-2006, 03:51 AM
Parent: #1
(4)
تباشير الخريف هلت
تباشير انكسار لاحت
هدوم العيد .. وريحة بسكويت فاحت
طباشير فى الحيط كتبت
(حضرت اليوم ولم اجدك)
وامبارح ولم اجدك
واول اول امبارح
متين اجدك ؟
وتجدينى ؟
وخايف من مطر ليلك .. يبلل لى هدوم عيدى
مطر شكشك على راسى
صلاة العيد جوار بيتكم
اخوض فى الطين
وكيف اصلك ولا اجدك ؟
اصوم فى العيد ؟
صيام العيد حرام شرعا
ولم اجدك
انوم احلم .. عشان القاك
- يا (احلام) .. يا (احلام) .
كوابيسك بقت اضغاث
(حضرت اليوم ولم اجدك)
..........
..........
تباشير انكسار لاحت
واعشاب الاسى الظهرت
على سرج الحصان رقدت وارتاحت
وعايز اغرق
وسامع النيل بنادينى
- تعال اغرق .
- تعال اركب على الامواج .
انا مجدوع على شأطى
طحالب خضرا فى وشى
كلاب ضخمة .. بتنهش فى لحم فخدى
و دود داخل .. و دود طالع
صقور بدات تحوم حولى
بقيت منفوخ
(حضرت اليوم ولم اجدك)
..........
..........
تباشير انكسار لاحت
وريحة بسكويت فاحت
وغربان الفريق صرخت
على سلك العمود ناحت
..........
..........
تباشير الخريف هلت
واحلام العمر ولت
سدود قدامك اتعلت
قدود .. والدود جيوش بتصفى فى دمك
متين اجدك ؟
وتجدينى ؟
وخايف من مطر ليلك .. يبلل لى هدوم عيدى
(حضرت اليوم ولم اجدك)
(حضرت اليوم ولم اجدك)
(حضرت اليوم ولم اجدك)
وسامع النيل بنادينى .
......
شاهين.
|
Post: #9
Title: Re: خربشات
Author: shaheen shaheen
Date: 10-02-2006, 04:58 AM
Parent: #8
(5)
اهلا وسهلا
انت مين ؟
لما عاينتا فى مراية ما عرفتك
انت مين ؟ يا وش حزين
عاملة ايه فيك السنين ؟
مركب تودى .. التوديك ما بتجيب
انت مين ؟
يا زول مداقش فى دروب الهجرة
فى جيوب البنطلون شايل حنين
دربا بوديك .. والبوديك ما بيجيب
............
............
ضيعتا وشك يا غريب
ضيعتو فى زحمة رصيف
وصرختا فى الوش البديل
- منو انت ؟ انا شايفك كتير .
انت مين ؟
يا الماشى حفيان فى الطريق
شاكيك شوك درب المسير
وين الجناحين شان تطير ؟
لا راحة فى الوطن الاساس
لا راحة فى الوطن البديل
............
............
مكتوب عليك الاندهاش
مقسومة ليك سكة سفر
شنطك مستفة للرحيل
موعود تكون فى الغربة يا بحار .. غريب
يا غربة الوطن الاساس
يا غربة فى الوطن البديل
............
............
وشك صرخ فيك
- انت مين ؟ .
رديت
- غريب .. داير استريح .
وشك قفل باب وشو فى وشك
وبقيت براك
انسان وحيد .. مهجوم من الامطار .. حزين
موعود تكون فى الغربة يا بحار .. هجين .
......
شاهين.
|
Post: #10
Title: Re: خربشات
Author: shaheen shaheen
Date: 10-02-2006, 05:00 AM
Parent: #1
شكرا استاذة/ تراجى
تحياتى
|
Post: #11
Title: Re: خربشات
Author: shaheen shaheen
Date: 10-02-2006, 05:01 AM
Parent: #1
سلامات استاذ/ عماد
شكرا ليك .
|
Post: #12
Title: Re: خربشات
Author: shaheen shaheen
Date: 10-02-2006, 05:03 AM
Parent: #1
عاطر الود استاذ/ ود السنى
|
Post: #13
Title: Re: خربشات
Author: shaheen shaheen
Date: 10-02-2006, 05:05 AM
Parent: #1
ابنى العزيز / ياسر
كل الحب حتى تستغيث .
|
Post: #14
Title: Re: خربشات
Author: مجاهد عبد الرحمن
Date: 10-02-2006, 06:44 AM
Parent: #13
مسيحية
جميلة البت
وقبطية
تقيد في قلبي جذوة ريد
وتوقد فيهو نار حية
مسيحية
وقبطية
سقاها النيل محاسن أم در
كساها الكون عقود الدر
جمال محياها جد يندر
صباح الفال وعيدية
ويا شاهين
بتمرق من مشاعرك وين
سيوف الحسن ليك بتصيب
وقلبك في المودة أمين
يحب ذات الهلال و صليب
نواصل....
محبتي وإعجابي بقاموسكم الكتابي المميز
|
Post: #15
Title: Re: خربشات
Author: مجاهد عبد الرحمن
Date: 10-03-2006, 07:22 AM
Parent: #14
لأجل هذا الألق فلنحافظ عليه في الصدارة
لنا عودة
|
Post: #16
Title: Re: خربشات
Author: shaheen shaheen
Date: 10-06-2006, 02:21 PM
Parent: #1
شكرا كتير استاذ/ مجاهد
القصيدة حلوة شديد
الف شكر حبيب
تحياتى .
|
Post: #17
Title: Re: خربشات
Author: النصرى أمين
Date: 10-06-2006, 02:32 PM
Parent: #1
شاعرنا شاهين
والله ما قاعد ادخل بوستات الشعر اﻻ بوستاتك
شعرك بنزل زى موية الزير البارده بعد الدافورى الساخن
مبالغه عديل
|
Post: #18
Title: Re: خربشات
Author: shaheen shaheen
Date: 10-06-2006, 02:38 PM
Parent: #1
(6)
سين سلام
تعظيم سلام
ويا سلام لو ينقلب هذا السلام قفة ملاح
صمتا سلاح
بارودك الملعون يكون
شارع ظلط .. كبريت وكباية لبن مع بسكويت
كفاك اقيف
كفاية دم .. هم وغم
مليون من الاميال براح
تكفى الجميع وبارتياح
فجأة السلام لو ينقلب
فدان قطن .. فدان قمح
شفخانة فى كل القرى
وبنات مدارس متمخطرين .. حاضنين على النهد الشنط
افتح شبابيك للهواء
دايرين نعيش
نأكل سمك .. نشرب عصير
ونخمس الشاى التقيل
تحت الشجر يحلو السمر
نقعد ونضحك نستريح
افتح شبابيك للهواء
وطن الجميع وللجميع
للمؤمنيين والملحدين والنص دين
عايزين وظايف نشتغل
يمكن بنات عايزة العرس .. تلقى العريس
صمتا رصاص .. ملعون ابوك
ملعون ابو الحرب الضروس
ملعونة يا كل الجيوش
ولتحيا نبتة حب خجول
مع طلعة الشمس الضحوك
شاقة الارض .. زى نبتة الفول الصبوح
هذا السلام لو ينقلب
انسانة حلوة مشعة بالبهجات
بترش على رمل الطريق افراح
صمتا عفن اتراح قبيح
نقعد ونضحك نستريح
هيا انقلب .. هيا انقلب
وليحيا بينا الحب .. ولتحيا الحياة
وليسقط الموت .. المقابر .. والدمار
وليسقط الموت .. المقابر .. والدمار
عايزين نعيش
مليون من الاميال براح
تكفى الجميع وبارتياح .
......
شاهين.
|
Post: #19
Title: Re: خربشات
Author: shaheen shaheen
Date: 10-07-2006, 04:50 PM
Parent: #1
(7)
عام جديد .. جرح قديم
ذكريات .. غبار كثيف
كل عام زى كل عام .. لا جديد
عام جديد زى القديم
كل عام وانتى بخير
وكل عام وانا فى انتظار
فى محطات خالية من ركاب جداد
نفس الملامح والوشوش
نفس الكلام
نفس الشوارع والبيوت
نفس احتياجى اليك .. نفس الاشتهاء
عام جديد والهجر طال
العمر ضاع .. والشعر شاب
ضيعنى فيك سراب لقاء
ولا لقاء
اتسرسبت قدرة صمودك يا احتمال
حتى الهزايم والضياع
زى كل عام
الفرق ايه ؟ بين بكرة , او بعد بكرة
وبعد بعده
الفرق ايه ؟
تكرار لئيم
نفس السؤال السرمدى
ولا جواب
فمتى الرحيل ؟
لمتين تأجل فى قرار الانتحار ؟
فى اى عام ؟
ود يا جبان .. زى كل عام .
......
شاهين.
|
Post: #20
Title: Re: خربشات
Author: shaheen shaheen
Date: 10-07-2006, 05:46 PM
Parent: #1
استاذ/ النصرى
انعشتنى كلماتك .. فى غاية الشكر والامتنان .
|
Post: #21
Title: Re: خربشات
Author: shaheen shaheen
Date: 10-08-2006, 02:36 AM
Parent: #1
(
فى الحب انا زيك , زول اهبل
اهبل جدا
ورومانسى وزول حساس خالص
خالص جدا
الزيى وزيك يا وردة
فى الزمن القاسى , ده زول اهبل وعوير جدا
جدا , جدا
فيروزة شأطى احلامى
نتعاور فى الوطن الاهبل
اهبل جدا
نحلم ب بكرة وعارفنو
حيكون اكعب من امبارح
اكعب جدا
نتعب منه
نلعب بالمنطق حد نصله , صارم جدا
جدا , جدا
شافع يا شافعة يا عضاضة
يا السارقة حلاوة لبان منى
بسرق من جيبك تفاحة
واديك كرملة ومصاصة
وبطوطحك فى المرجيحة كمان
ما العيد بكرة
يوم بكرة بعيد عننا جدا
جدا , جدا
وبريدك انا بالجد جدا
اهبل متخلف عقليا
يا عويرة وفيروزة شأطى
نتحدى المنطق والواقع
ده الواقع فى بلدنا السمحة
اسود جدا
جدا , جدا
......
شاهين.
|
Post: #22
Title: Re: خربشات
Author: shaheen shaheen
Date: 10-08-2006, 09:06 AM
Parent: #1
(9)
اكبر منى ب سنتين
انا كنتا فى خامسة ابتدائى
وانتى فى سادسة ابتدائى
عايدة السنة
وظهرتى ك الشيطانة يا شيطانة
فى نص الطريق
بين بيت ابوى والمدرسة
- يا حلبى يا ود يا سمح , عندك مجلات (ميكى) ؟ .
اندهشتا من السؤال !
مشروع مثقف من زمان
..........
..........
وبدات علاقتنا المريبة
اديها (ميكى)
اخد (سمير)
تدينى (ميكى)
تاخد (سمير)
وبدات جوابات الغرام
بين المجلات فى الظهور
وبداء اللهيب
تحضنى فى نص الطريق
وانا مندهش !
وتبوسنى فى الخشم الصغير
وانا مندهش !
وتخت ايديا على صدرها الناهد صغير
- اضغط هنا .
واضغط هناك , وانا مندهش !
وتفح فحيح
- اوعك تكلم زول .
مشروع مثقف من زمان
..........
..........
ايام تشيل .. ايام تخت
ايام تسر .. ايام تضر
فى الاربعين
وهى اكبر منى ب سنتين
لقيتا فى حفلة عرس
اتغيرت .. اتبهدلت
وسمعتا قالوا اطلقت
واخوها مات
شقت زحام الحفلة جات
مدت ايديها فى صوت حزين
- يا حلبى يا ود يا سمح , عندك مجلات (ميكى) ؟ .
بين الضحك نزلت دموع
وبكت
بكت شديد
وحضنتها
يا (ميكى) عيد ليها الصبا
يا (ميكى) عيد ليها الصبا
يا (ميكى) عيد ليها الصبا
خليها ترجع بت صغيرة
مليانة ب قلة ادب , ب شيطنة
يا (ميكى) وحيات الرسول
ما تخلى اقدام السنين
تطلع عليها وتهرسا
يا (ميكى) أأأأأأأأأخ .
......
شاهين.
|
Post: #23
Title: Re: خربشات
Author: abubakr
Date: 10-08-2006, 09:18 AM
Parent: #1
ياقريبي .. شكرا ..خرجت بمفرداتك البديعة بنا من دوائر الحزن التي تلف كلام غالب شعرائنا .. انك تبعث بحرفك بهجة
وصباحك ندي
مودتي
ابوبكر سيد احمد
|
Post: #24
Title: Re: خربشات
Author: shaheen shaheen
Date: 10-08-2006, 04:04 PM
Parent: #1
شكرا استاذ/ ابوبكر
عاطر التحايا
|
Post: #25
Title: Re: خربشات
Author: shaheen shaheen
Date: 10-14-2006, 01:09 PM
Parent: #24
(10)
لورى الشمالية .. اوعك من الرملة
ما بين هذا وذاك
بين ضحكة والدمعة
محبوبتى شايقية
مروية , نيلية
ك الطفلة فى الروضة
ترضع صباع ايدها
سيدى الحسن سيدها
تصطاد سمك فى الليل
اصطاد فساتينها
وثمار بساتينها
وتعوم على جسمى
اغرق
اناديها
تغسل مناديلها .. واشوف قناديلها
تخجل تضاريها
افتح , اغوص فيها
اغسل عليك شبقى
- ضيعتا لى شبطى .
- شكلك ح تفضحنى .
- ود عمى بضبحنى .
بين لا , كفاية , خلاص
الليل بيسترنا
بس من كلام الناس , يا ربى استرنا
والذنب ما ذنبى
عسلك وما بيكمل
لما الشمس تطلع
بتمنى لو ترحل
شان ليل جديد يظهر
تصطاد سمك فى الليل .. اصطاد فساتينها .
......
شاهين.
|
Post: #26
Title: Re: خربشات
Author: shaheen shaheen
Date: 10-26-2006, 08:06 AM
Parent: #1
(11)
نزلت مظاهرة من انوثة على الشوارع فرفشت
شجرة جوافة بيتنا بالضىء فرهدت
يا ضجة فيك روعة جمال
الرملة بالزحمة انتشت
التماثيل خلت المتحف مشت
بكت الرياح من خطوتك
عن سر دلالك للسحابات وشوشت
......
شاهين.
|
Post: #27
Title: Re: خربشات
Author: شهاب الفاتح عثمان
Date: 10-26-2006, 09:24 AM
Parent: #26
سحابة صيف وبتعدى
جميل يا لوحة زيتية , ابعادك ثلاثية
كل عام و انت بخير.
وواصل الاظافر الخربشة.
متابعين..
د.شهاب الفاتح. كوالالمبور.
|
|