بنات المستقبل !!.. يا الصادق وسيف النصر وناصرجامع تعالوا شوفوا ناسكم .. !!

01:07 AM Dec, 13 2015

سودانيز اون لاين
Munir-a222
مكتبتى
رابط مختصر

أمشوا لناس أنورتاج السر وجلالدونا سجلوا سريع فى مركز البعاعيت عشان يدفنوكم من هسه لغاية سنة ٢٠٥٠ ..



يتبع ...

ياربى نقول سنة ٢٠٥٠ حال الحياة الليبرالية حتكون كيف؟؟ .. وياترى بنات مدرسة بحرى حيصلن مرحلة الحرية دى متين ؟؟

بس طبعاً الكليب رهيب ..

لمن كنا فى الإبتدائى كان عندنا حصص جمباز .. نقلع القمصان ونعمل حركات الجمباز الجماعية فى صفوف .. صف يقيف والآخر يقعد من إصدار صوت شششششش ... ولكن كانت حركات كسولة بطيئة مافيها أى إبداع أو رشاقة .. قارنت ذلك الأداء التعبان مع رقصات هذا الفيديو االبديعة ، وقلت غايتو .. نحن من زمان ورلات ساى ..:)

قبل سنتين تلاتة جستن بيبر ده كان مضحكة ومسخرة بين المراهقين .. ولكنه تغلب على الكراهية والديسلايك لفيديوهاته بالمثابرة والإجتهاد حتى أصبح الآن من نجومهم المفضلة ..

موسيقانا السودانية تحتاج لثورة وتغيير النمط الأوركسترالى الحالى وإبتداع عزف تنفرد فيه الآلات بمداخلات متبادلة ومجادعات مثل النمط بتاع الأغنية دى ..

منير يا حبيب سلامات،

يا اخوى هوى أنا زول خلا ساكت لا بعرف جاستن شنو كده بتاعكم ده و لا غيرو.

بالنسبة للدفن و كده.. 2050 القريبة دى؟ كان ليك يا غالى، انت قايل الأمخاخ كلها زى بعض، فى جماهير محتاجة الف سنة فرمطة فقط غير تنزيل الاوبريتنج سيستيم و البرامج و ادخال الداتا.

أنصح بتحويلهم الى بوست " طائر يشدو على فنن" مع خالنا العزيز يحى قبانى و بقية الكوامر تلاتة شنكل.

لكن كدى خلينى أول أشوف رأى شريكى جلالدونا و بعدين نفيدك بالقرار النهائى.

اخونا منير فاتح بوست ثلاثى الابعاد
بنات الهاى اسكول و بنات بحرى
ثورة موسيقيةو مركز بعاعيت
و الاغرب لما قال

Quote: لمن كنا فى الإبتدائى

دى براها كوم و ابو حسين دوت كوم براهو
النجيضة لى واحدة من مطروحاتو
اول زبون سودانى فى اللستة وديناهو حسب مواعيد فيش و تشبيش المخ للمركز
النتيجة انو مخّو مجمّد طبيعيا
قلنا ليهم يعنى قبلتوهو
قالوا .. لأ ... براهو بقوم بعاتى
و كمان وعدوا بأهدائنا دراسة عن خصائص المخ السودانى

سلامات يا منير
اتفق معاك انو الولد جستن بيبر اتطور كتير..تصدق انو قبل كم اسبوع بس احتفل بغيد ميلادو ال21
طبعا انا عندي تينز زي ما بقولوا و مضطر اتابع غصبا عني :)
بالنسب للمدارس و الحرية فالفيديو خيالي شديد و الدريس كود في المدارس ما اظن يسمح بلبس زي ده
نحن غايتو في الجنوب و الناس هنا محافظين حبة و النصيحة ما عندي فكرة عن ناس نيويورك مثلا او الساحل الغربي
شوف مثلا ده الدريس كود بتاع مدارس المقاطعة حقتنا و هي اقل محافظة من المقاطعات المجاورة:

Quote: 1. The wearing of clothing or accessories which are offensive and could cause the destruction of the operation of the school. Items such as t-shirts or hats may fall in this category if they contain indecent or suggestive language. 2. No undergarments or other tight clothing shall be worn as outer garments. This includes, but is not limited to tank, tube or halter tops; spandex or leotard garments, mesh shirts or midriff tops which causes inappropriate exposure of the skin of the student. Safe, appropriate footwear must also be worn. 3. Shorts that are excessively short or tight, such as but not limited to, physical education type shorts, spandex or leotard type shorts, cut-offs, etc. are not appropriate. 4. Clothing which advocated negative advertisements. 5. Footwear with attached wheels, “heelies” or FLIP FLOPS are prohibited

سلامات ياسيف النصر ..
طبعاً الواحد جابكم فى العنوان كأزوال مهتمين بأمور أمريكا والحداثة والتطور.. فعذراً إن كان ذلك غير موفقاً .. .. وأنا برضو التيينر بتاعى شافنى فاتح شغل سودانى قال لى يابوى إنت مابتعرف الغناء السمح .. قلت ليهو ورينى فقام هو وأخته دلونى على الأغنية دى ...
حقيقة الفيديو عجبنى ولكنه برضو فتح عينى على الواقع ومستقبل ثقافة وذوق الأبناء الذى هو منطلق بسرعة الصاروخ فى دنيا الليبرالية المفتوحة ..
وبالنسبة للدريس كود فالبنات هنا عندهم اللبس ده عادى ــ بببس طبعاً ليس بهذه الألوان التى قُصِد بها هنا أنو الكليب يطلع colorful ـــ

طبعاً كون العيال ينجرفوا تماماً للذوق الأجنبى وينسوا الأصل ، دى معضلة .. أنا غايتو ما قادر أجعل ذوقهم يتجه للفن السودانى ..

الأحباب أنور وجلالدونا الظاهر عليكم مشيتوا مراحل متقدمة فى بعاعيتكم ــ تسجيلات وووـــ أنا فقدت الأثر وما تابعت النهايات ..

لكين أمريكا بتاعتكم دى بلد الإبداع والله .. قصة الموت المؤقت دى ما تستبعدوا تبقى إنجاز مستقبلى ــ
الإنتقال عبر الزمن فكرة طبيعية وقابلة للتطبيق .. وما تنسوا قصة أهل الكهف .. ومثال الرحلة للمستقبل عندك الإسراء والمعراج وو ..
عموماً أريد أن أخوض فى الكلام ده فى بوست الخواطر المتجمد الآن .. بإذن الله ..

البوست ياجلالدونا جينا رمينا ليكم هذا الكرت المستقبلى على الطاولة لنرى مآلات حياة أبنائنا مع هذا التسارع الشديد فى التكنولوجيا وإنتقال الحريات لمراحل قصوى كل يوم ـــ بدون سقف ـــ .. ونتساءل ، هل ستصل بنات مدارسنا لمستوى هذا الرقص وهذه الجرأة يوماً ما ؟؟

بنات حلوات
مالن ديل يا دكتور منير ؟

Quote: بنات حلوات مالن ديل يا دكتور منير ؟

سلامات ياالحبيب طلحة .. مافى كلام طبعاً .. الفيديو مليئ بالموضوعات ـــ الإبداع والجمال وتقدُّم مهارات الرقص .. وإستشراف أجيال المستقبل .. والخلطة الأمريكية ـ بلاك آسيان ـ هسبانك ــ وايت ــ التى أنتجت طفرات فى أسلوب حياة البشرية .. ومن ضمن الموضوعات ، الموسيقى وجستن بيبر وحياة التينرز ... :)
عشان كده قلنا لجماعتنا ألحقوا جمدوا حياتكم الآن، ناو، عشان تشوفوا مآلات الدنيا سنة ٥٠ .. ولأجل تجميد الحياة قلنا ليهم يمشوا للحانوتية أنور وجلالدونا ..:)

ملحوظة: لتحس كل إيقاعات الفيديو ويكون الإستماع 3D تلزمك سماعات الأذن ..

يا منير دحين الايقاع ده ما 7.5 ولا أضانى كعبة

بعدين أنا ما قاعد فى أمريكا، مالك على ياخ انت طالبنى مغسة ولا شنو؟

Quote: يا منير دحين الايقاع ده ما 7.5 ولا أضانى كعبة

هههه يا أنور ..

قلت لى 7.5 ؟؟ دى إلاّ يجى الموصلى يفتى لينا فيها ..


يعنى إنت ما من ناس امريكا؟؟ لو كده أنا داقس ساى .. :) ..

منير يا أخوى ما تشوف فلسفتى دى، أنا زول خلا و شغال تاجر محاصيل، مستمتع مع الطيبين و الطبيعة الجميلة و مرتاح من الخوتة الكتيرة دى، و النت ده و الله عشان التواصل مع الحبان زيكم.

يا أنور أنا كنت قايلك طافش في ماوراء البحار .. آصلو عهدى بيك متمرد من زمان :) ..

Quote: يا منير دحين الايقاع ده ما 7.5 ولا أضانى كعبة

اضانك كعبة و كمان اضان بعاتى
الايقاع 7/8 يااخ
مالك عايز تحرف البوست
_____
تلاميذ الصف الرابع ثانوى يا منير عندهم قيم ..game>>عجيب خلاس
و جايزتو تفوق ال الفى دولار كاش
فكرة القيم انو بتعرف ناس مجموعتك ام المجموعات الاخرى دى دايرة تحرى و متابعة
المرحلة الاولى بتكون لاعب ضد مجموعات معينة و عليك اكتشافها و قتل اعضائها
القتل بتم بالرش بالماء
فى حال ما يكون لابس ادوات الحماية و هى حاجات بسيطة جدا
كيس النايلون ال بلبسوهو للمطر داك
او كيس نايلون مربوط فى عضل اليد
المهم مرة داخل على شارع البيت شفت لى عربية واقفة و جواها تلاتة شباب تينز
جانى احساس انو لابدين لى بتى
البت عرفتهم و طوالى رسمنا خطّة للظفر بهم
خرجت .. هى ..من الباب الخلفى و طلعت انا قدامن و سقتا العربية لفيت لفة صغيرة كدة و متابع معاها بالتلفون
لغاية ما قالت لى انا ورا عربيتهم تماما
اها جيت بالدرب العديل و قلت ,, سلام يا شباب
نزلو القزاز عشان يردو على
مطمئنين و ما لابسين ادوات الحماية
اديتا الاشارة و طوالى هجمت عليهم
و ظفرت بهم
ألذ ما فى الموضوع
قعدوا يضحكو و دخلو معانا البيت
و براهم سجلو اقرار خروجن من القيم بدون اى خرخرة
و لا زال القيم مستمر
ياخى نحنا كاتلانا الخرخرة دى
هسه عليك الله شوف جنس خرخرة اخونا انور دى
فتح موضوع البعاعيت و طوالى دخلنى شريك معاهو
و هسه ناويى يزوغ من الموضوع

حبيبنا جلالدونا و الله كل شىء و لا زعلك يا جميل، أقصد الايقاع 0.875 ولا تزعل.

أما عن الشراكة فمنير اللخبات هو من افترضها و على كل حال يمكنك فضها – ان وجدت - فى أى وقت اذا كان ده يريحك. و الموضوع كلو تعبير عما يجول فى الخاطر و ونسة بين الحبان.

و تانى أقول ليك كل شىء ولا زعلك يا حبيب.

الحبيب انور الله لا جاب زعل بين الحبايب
و اخونا منير المشدوه بالموسيقى دة
خلينا النبهرو شوية بى جيل الثانويات
البشتغل احسن الشغل بدون مزيكا و قول واحد

اها ده شغل بالكبابى بالصفقة
شوف الشغل التانى ده بى الصفقة فقط

يا منير انت وين يا أخوى؟ تمردى الزمن داك كان قبل العولمة، أما الآن فالوضع قد تغير تماماً و التمرد أصبح عكسى، و المثال زى ما عملت أنا هسه.

وقع ليك يا جميل.

كدى ياجماععة حيلكم شوية .. حتى التوابيت عاوز تختلفوا فيها ؟؟ .. أحبك ياسودان .. :)

غايتو ياجلالدونا الفترة الفاتت دى أخوك داير يفك درب النقاشات السيااسية وقلنا نلحق شبابنا الراح بين الأوتار .. قصة الgame بتاعكم ده نسأل الله ما يتطور للرش بالكلاشات ..:) .. قلت لى الأولاد كانوا قانصين للقتل؟؟ ...

ياأنور حتى مع العولمة شايفك مازلت محتفظ ببصمة التمرد ..

الأمريكان ديل (مع احترامى للجميع و بدون تعميم) ممكن يعملو أى حاجة فى أى حتة و لأى سبب. عشان كده ختيناهم.

Quote: ياأنور حتى مع العولمة شايفك مازلت محتفظ ببصمة التمرد

يا منير هو أيام الدنيا كانت بى خيرها أنا كنت بتمرد لمن هسه، ما تحمد الله الما عملت لى عملية انتحاريه (طبعاً الكلام ده ونسه ساى عشان ما يجى واحد يتهمنى بان هناك داعشى صغير ينمو فى داخلى أو كبير قد تخرج و انخرط)

Quote: (طبعاً الكلام ده ونسه ساى عشان ما يجى واحد يتهمنى بان هناك داعشى صغير ينمو فى داخلى أو كبير قد تخرج و انخرط)

هههه .. الزمن ده مامضمون .. أخير الزوول يوضِّح مواقفه .. بكرة بكرة يجوا يعكشوك وما تقدر تدافع عن نفسك ..

منير يا حبيب ياخ شكرا علي البوست الجميل، إستراحة محاربين ههههه
ياخ انا مسطح، بوست البعاعيت دا ما شفتو و الله

يا منير بالله شوف لعبهم كيف و لعبنا كيف
اني أمنت بالله ههههههههههههههههههه

عاطر التحايا للجميييييع . واختص المنير .

غايتو يا المنير حقارتك ما شفتها يعني فقط ( بنات المستقبل )
يعني بنات المستقبل تشوف اولاد المستقبل ما تشوف ههههه.

خلوا الشباب تعيش حياتها انتوا دايرين تعيشوا الشباب حياتكم يعني
في حياتكم ما لبستوا الشارلستون وما ما عملتوا القجة هههههههه؟

وما تنسي يا المنير .. ( هذه هي الحياة ) ...

Quote: طبعاً كون العيال ينجرفوا تماماً للذوق الأجنبى وينسوا الأصل ، دى معضلة .. أنا غايتو ما قادر أجعل ذوقهم يتجه للفن السودانى ..

للأسف ما حتقدر نهائي ولا تتعب روحك ذاتوا :)

خاصة وانت قاعد برا السودان! يأخي أنا إستغربت في آخر
زيارة لي للسودان لأنوا لقيت ليك كل الأجيال الجديدة دي بسمعوا
ليك الفن العربي والغربي فقط!

النقلة التكنلوجية الخرافية الحصلت في الالفية دي وسهولة
الحصول على المعلومة حيغير حاجات ومسلمات كتيرة ومابقت
على الذوق الفني براهوا! غايتوا أمسك الخشب :) تحياتي

الفرعون الأسود أحمد عالم .. نوّرت البوست ..
الواحد عشان يغرس الوطن الأصل فى وجدان االشفع بكل ألوانه و أنغامه لازم ينزلهم البلد من هم صغار وبصورة منتظمة بدون إنقطاع .. دى أعتقد ساهلة لمغتربى الخليج ـــــ البلد جدعة حجر ، كما أن الدول العربية محافظة زى السودان ... لكين ناس الدول االغربية مشكلتهم مشكلة ..

المشكلة إنو تأثير الوالدين فى الذوق الفنى والثقافى ضعيف على الأبناء فى هذا البحر المتلاطم الأمواج من الميديا االغربية الجبارة العاتية ... هسه أنا بدلاً عن أن أجرجر الأولاد لوردى وعثمان حسين وأولاد حاج الماحى جرونى هم لهذا الفيديو .. !!! ..

بس هناك حيلة فعالة لغرس السودان فى ذاكرة اللأبناء .. ألا وهى إنك لمن تكون سايقهم فى العربية لازم تشغِّل ليهم أنغام سودانية بصورة مستمرة لدرجة الملل .. فإذا استمريت فى ذلك فترة طويلة ستنطبع ليهم بقوة فى الذاكرة ..

منى عمسيب الودودة .. شكراً على الطلّّة البهية .. لكين قبضتينى بالثابتة .. نزلت البوست وما كنت قايل حتجينى واحدة من بنات حوة ناطة لى وتجيب لى سيرة الجندرة بالصورة الخانقة دى ... ههه .. أعفوا لى نمط التفكير الذكورى الذى يخاف على مستقبل البنات ويخلى الأولاد ماشين على حل شعرهم ..
بعدين بالجد الزول الفضول محرِّقه : مستقبل الشباب كيف سنة خمسين إذا كان الأمورات ديل من هسه وصلوا قريب لسقف الليبرالية ..
عشان ده قلنا للجماعة أمشوا مركز البعاعيت ....

وبعيداً عن كل شئ: الأغنية جميلة والرقصات تظهر مدى قدرة الإنسان على تنفيذ حركات جسدية معقدة ما أظن هاشم بدرالدين بتاع الكراتيه زاتو يقدر عليها ..

آمنّا بالله ياناصر.... ياخى بالغت بلعبة الكفوف دى .... قوّمت علينا وجع الضرس :).!!

منير يا جميل،

Quote: عشان ده قلنا للجماعة أمشوا مركز البعاعيت ....

بالله أرخى حكاية مركز البعاعيت كاملى الدسم دى شوية، لسه فى زمن و موضوعهم فى حكم الغيب و طويل، لكن أنا جاييكم قريب ان شاء الله بى بوست عن اسبيرات البعاعيت الاتركبت سلفاً و شغالة تش.


تخيل واحد يصحى الصباح يعاين لى نفسو فى المرايا يلقى نفسو لابس وش بعاتى؟؟!! موقفو من الأمم المتحدة يكون شنو

المرة دى ما بدخل أى شريك فى الموضوع بجضمو براى، يا صابت يا خابت. بس عليك الله كلم المهدى المنتظر ما يجى يبرينى و يغالطنى فى الموضوع

عاجبك كده يا منير .. اها شاتونى للصالح و تقرأ البعاتى العام
و كمان فيها مرايات كمان .. غايتو .. شن اسو .. حكم القوى على الضعيف
_________
قبل اسبوعين يا منير الاولاد شبكونى انت اصلك ما قاعد تفسحنا
و النصيحة لى الله عمرى ما فكرت فى الحتة دى و سايبا لى الست امهم
اها عشان الحتة دى قلت ليهم خلاص بوديكم جيروم .. AZ ـjerome عليك الله قوقلا ماب تجيك حاجة .. ناسا ما اسفيريين
و دى مدينة بتاعت اشباح و بعاعيت و ناسا شردو خلوها
و خاتّى فى بالى يخافو و ارتاح من قصة فسّحنا دى
عليك امان الله ضربو لى اولاد خالاتن التلاتة
و اولاد خيلانن الاتنين و المصيبة كلهم قالو ماشين
ياخى زمان كنا نخاف من الضلمة خلى البعاتى
تصدق وديتم و جواى السؤال الطبيعى الفارض نفسو
هسه لو لمّا فينا بعاتى اسوّى شنو
اها ده ما الموضوع .. نهارية و عدّت
قالو فى اجازة تص السنة يجو تانى و يقعدو تلاتة يوم
فى الفندق داك
عاينت لى للفندق تصدّق دخلتنى خوفه لله فى الله
ده يقعدو فيهو فلّيل كيفن
غايتو جيل اخير تموت و تمشى تخليهو .. مجّمد مخك لى شنو
ما يا هو زى ما بقولو .. العينة باينة

ياجلالدونا أخوى أطفال الزمن ده ما عندهم خوف من بعاتى أو سحّار .. وهى التخاويف الإتربينا بيها ..
لاحظ فقط أفلام الكرتون فى قنوات كرتون نتويرك وغيرها، وشوف الشخصيات الشيطانية التى إعتاد الأطفال عليها ـــ عيون فوق للراس وإضنين حُمارية ـــ أشكال عجيبة تفرق كتير من ناس عمك تنقو المسالمة الإتعودنا عليها ..
فحذار أن تخوفهم زى ما كان زمان بيخوفونا بالبعاعيت والسحاحير ..

بعدين زاتو الزمن ده مع الكهارب النورها ضارب والليل البقى نهار ، الخوف من الظلام إنتهى .. زمان فى البلد كدى اليقولولك أمش جيب لك شئ من الأوضة اللافوق ...هههه ..

سلامات أنور ... ياخى عندى ليك إقتراح .. كدى خلى جلالدونا فى البعاعيت وحاول إنت شوف لينا إكسير الشباب .. يعنى بدل نقفز للمستقبل رجِّعوا لينا العداد لوراء .. لأنو حقيقة هناك حقيقة مرعبة شديد ، وهى إنك لو كسرت رقبتك ما بتقدر ترجِّع الثوانى القريت فيها المداخلة دى.. تأمّل العجز الكامل عن إستعادة ثانية واحدة من الماضى .. !!! راكبين قطر الزمن بدون فرامل ..

ـــ دايرين بدل تصحى تلقى نفسك بعاتى، تلقاك صبى تمنتاشرى ــــ ..

غالى و الطلب رخيص يا حبيبنا منير، نرجعو ليك أربعة سنين عاشهم الحب مش شباب تمنتاشر و بس، لكن بعدين لو حصل ليهو حادث و لا مرض و فقد عضو من جسمو، محتاج اسبير ولا لأ؟ المشروع متكامل يا زعيم بس خلى أخونا حاتم ابراهيم (المهدى المنتظر) و المستنيرين يبعدو منى

و جلالدونا بخيت و سعيد عليهو موضوع البعاعيت اصلاً هو المفروض من الأول كان يتكلم عن الموضوع ده موش أنا، ياخ ده ساكن تلاتة كيلو من مركز البعاعيت، و كمان طلع لينا بحكاية جيروم دى، وأنا برضو سمعت انو ساكن جمب المخرج بتاع The Walking Dead

موضوع أصول أبحاث التجميد و اعادة الحياة ده أساساً فايدتو فى اطالة فترة الشباب (يعنى عشان ما نكرتب و يبقى منظرنا شين أنا و انت و جلالدونا) و كمان برضو اطالة عمر الأعضاء(اسبيرات البعاعيت) قبل زرعها للمرضى.

أتمنى انو الجيل الجديد اضافة الى اهتمامتو زى موضوع البوست ده كمان يتولى مسؤولية التطور العلمى و تطوير مثل هذه الأبحاث.

الاخ منير ... وضيوفك .. سلام

اسمع اغنية أديل دي .... بطاااله خلاث ...
تخليك في عالم تااني ...




ودي واحده عربية بتقلد فيها ... (برضو بطااله ....)



عاالم بطاااله ....

في الاخبار الليلة الولد ده في تينسي في كاونتي ريفية اتسجن 48 ساعة عشان جا المدرسة
sagging ، الموضوع طبعا عامل ضجة ما بين مؤيد و معارض. و احتمال برضو
ناس العنصرية يخشوا في الموضوع باعتبار الولد اسود.
القصة اساسا انو ما سمع كلام ضابط المدرسة و قعد يعاكس و ما داير يرفع البنطلون
لغاية ما جابوا ليهو ناس الشرطة.
الـsagging طبعا روجوا ليهو ناس الهيب هوب بقوة.

يعنى ياسيف نحن نقعد لجنس ده؟؟ .. هسه أنا ده قايلو صورة زول رابط الحزام بالقلبة ومطلِّع بطنه .. أتاري الصورة مقلوبة .. :)

الأخ محمدمجيدو العزيز .. حباب الطلة .. إيه الرومانسية دى ياخ :) .. طعمت البوست بالاغنية الجميلة ـــ
بالجد لو قارنّنا حالنا فى التكنولوجيا الدقيقة مع العالم المتطور نلقى أننا كسيحين .. ولو قارنّاهو بتكنولوجيا الإنشاءات الضخمة نقول نحن أجيالنا السابقة كانت نايمة وين.. وحتى لو جينا للنغم والألحان نلقى الفرق شاسع .. وزى ما أشرت أنا فى الفيديو أنو مهارات الرقص زاتها تطورت بصورة رهيبة ــ فى العالم كله مالاقتنى حركات متقنة ومعقدة زى عفاريت أمريكا ديل ..

مبااااااااااااااااااااااااااااااااااااااااااااااااااااااااااااااااااااااااااااااااااااالغة يا منير
يا خي سمعته ومشيت شغلته من التلفزيون (هاي ديفنيشن) مع (سرونديد فويس)

يا خي الود دا مبدع عديل كدا

والله يا منير ما طالبني حليفة

كلامك دا اتناقشت فيهو مع محمد ود ابو عركي لأنه اتخرج انتاج موسيقى

وهو مؤمن إننا ممكن ندهش العالم دا كله

هاك شوف دي في خرطومنا

دي ود مدني
نفس الاغنية

سلامات الصادق ..
تشكر على الزيارة .. طبعاً الواحد من ناس النغم السودانى دوماً وأحياناً نشوف العالم الخارجى عامل كيف .. لكين لمن الولد قال لى إنت مابتعرف الغناء السمح إكتشفت إنو فى gap فجوة لازم أتصرف معاها .. وكماان أشاروا لى للأغنية دى ... طبعاً الواحد عاوز يأقلمهم على الذوق السودانى لكين كلام أحمد عالم ده ما مطمئن كلو كلو ..
فيا أخى مقامات الفن مختلفة فيما بين فنوننا والفن الغربى المنفتح لنهايات االتطريب ... طبعاً أنا مرة إجتهدت ساى وقسّمت الغناء لنوعين .. نوع للتطريب ونوع للشجن ... التطريب يجعلك تقوم تعرض وتبشِّر وتتباشر ، بينما غناء الشجون يجعلك تستكين و تهدأ وتستسلم للذكرى واالأحزان واالحنان والأشواق وربما الدموع ... ونحن فى السودان والعالم الشرقى عموماً فنوننا يطغى عليها التشجين ... بينما الغربب أطلق العنان لغناء التطريب ... والتطريب يحتاج لنزع ثوب الحياء كما يتضح فى هذا الفيديو .. قارن الأداء الراقص فى الفيديو مع الفيديوهات الجبتها إنت .. فالرقصات فى فيديو جستن بيبر متعوب فيها ويمكن عشان يصلوا لمرحلة الإتقان الجماعى ده يكونوا تدربوا عليه شهور .. ليس متل ناسنا القاعدين يتمايلوا ميلات خجولة وكسولة ومملة ومافى ليها داعى زاتو.. يمكن الزول كان يحس بشئ جديد لو كان الرقص بقى بالجلاليب ساى .. فالجلاليب يمكن التلويح بها بحركات جذابة ـــ مثلاً أنا تعجبنى أفلام االكونفو التى تحكى عن االصين القديمة بالزى القديم االفضفاض بتاع معابد شاولين أكثر من أفلام المدن ؛ وذلك لأن اللبس الفضفاض يعطى الحركات بعد ثالث ـــ

البوست عبارة عن دعوة للنظر من داخل قطار الليبرالية السريع ال نحن مشمعين فيهو إلى الخارج عبر النافذة عشان نشوف محطتنا وين .. إستدلالاً بليبراالية هؤلاء االفتيات اللاتى مللن حجرات الدراسة وأطلقن العنان للfun .. ونقوم نشوف هل فى يوم من الأيام بنات مدارسنا ممكن يصللن هذه المرحلة ممن الجرأة والأريحية الجماعية؟؟ ..

تعرف يالصادق .. من الصعب للفن السودانى إنو يخترق العالمية لعدة أسباب ــ أولها طبعاً اللغة ـــ دى براها تمثل ٦٠ فى المية من حايط الصد ... ثانياً الحياء و التحفّظ فى الأداء ..
مثلاً عندك الفنان الوحيد الذى تشبه موسيقاه الآلات الغربية هو شرحبيل أحمد .. ولكن شرحبيل ظل جامداً فى موسيقى الجاز بتاعة الستينات .. زائداً ثوب الحياء الذى يتلحفه، زائداً السلم الخماسى المحلى ضعيف الإنتتشار ، بالإضافة لبساطة الألحان..
طبعاً العامل الكبير هو ضعف الدعاية واالإعلام ــ اللهم إلاّ مع أخواننا الأفارقة ..
الهجيج والتطريب الشديد داير التحرر والرقص الصارخ و ده مافى ليهو طريقة .. ولو حصل يوصف بالغناء الهابط ..
لو فِرقة بنات نفذوا الرقصات بتاعة الفيديو ده إلاّ الكرباج ياباهم :) ..
يعنى هسه رقص الشباب والشابات فى فيدوهاتك دى تعتبر بمقاييسنا متتحررة ، ولكن تقارنها بالقاهرات بتاعاتى ديل تلقى الفرق ١٠٠ سنة ..

ده غنانا ..

نحن خلونا فى نمط الأشجان .. ما بنقدر على النطيط ...

شجن بس ..

ـــ الله يرحمك يانادر خضر ـــ