Post: #1
Title: نسوي شنو نحن مع بلدنا الفاتحة علي مصراعيها من البحر للمحيط !!؟؟
Author: Munir
Date: 12-02-2015, 11:52 AM
10:52 AM Dec, 02 2015 سودانيز اون لاين
Munir-a222
مكتبتى
رابط مختصر نتصرف كيف ؟؟؟؟ !!!
|
Post: #2
Title: Re: نسوي شنو نحن مع بلدنا الفاتحة علي مصراعيه�
Author: نعمات عماد
Date: 12-02-2015, 12:00 PM
Parent: #1
سلام أستاذ منير أتمنى أن تبحث في موضوع الإشعاع و الحاويات المشعة و بمشاركة المتخصصين و غير المتخصصين .وشكرا لمداخلاتك في بوست "تحري حاويات مشعة...."و شكرا جزيلا .
|
Post: #8
Title: Re: نسوي شنو نحن مع بلدنا الفاتحة علي مصراعيه�
Author: Munir
Date: 12-02-2015, 05:44 PM
Parent: #2
مرحبتين أخت نعمات .. شرّفتي البوست ..زي ما كتبت ليك في البوست بتاعك إنو خلاس البِقت بِقت .. بعدما الشكوك دخلت البطون تاني مافي زوول يقدر يمسح القناعة بتاعة إنو في نفايات مدفونة - مهما نفي النفَّايون :) - عشان كده كدي النشوف شلقامي القال ممكن يوصل الموضوع للوكالة الدولية للطاقة الذرية - في فيننا - وزي ما قلنا إنو إثبات الدفن سيكون خطير وعواقبه وخيمة علي الحكومة ولذلك ستقاتل بعنف لنفي الأمر .. أمبارح باالصدفة - نص الليل - كنت أشاهد برنامج - بيتنا - في الفضائية السودانية وفجأة أشوف ليك د.محمدأحمدحسن الطيب المدير الأسبق لهيئة الطاقة الذرية - قبال محمدصديق - وسأله المذيع راشد - النابه المتألق - عن قصة دفن الننفايات المشعة دي -- طبعاً لو أصلو حصل دفن بيكون في عهد د.محمدأحمدحسن الطيب ده .. فقام د.محمدأحمد حسن الطيب برضو نفي الموضوع تماماً وذكر أن السودان خالي تماماً من الإشعاع .. ولكن كان نفياً حيلو ميت كده .. واللاحظته الآن أنو هناك مؤسسة منفصلة للتحكم في هذه الأشياء كان رئيسها د.مصطفي محمدعثمان والذي إنتي كنتِ جبتي خبر إستقالته قبل فترة ، ولربما حلّ د.محمدأحمدحسن الطيب محله .. وأنا بالجد ماعارف هذه المؤسسة فايدتها شنو، وهي كأنما متغولة علي صلاحيات الهيئة وخاصة في مراقبة الإشعاع - أعتقد أنها هيئة مراقبة شنو كده ماعارف - أعذريني فأن منذ سنين عديدة منفصل تماماً عما يدور هناك؟المهم يا أختي موضوع النفايات ده مستحمي ولن يطمئن الشعب إلاّ بتدخل الوكالة الدولية الIAEA - أو تحصل ثورة - إنتفاضة - تزيح الحكومة وتكشف الحقائق .. لكين قصة وفد برلماني ولجنة برلمانية ووو دي استهبال ساي ..
|
Post: #3
Title: Re: نسوي شنو نحن مع بلدنا الفاتحة علي مصراعيه�
Author: Munir
Date: 12-02-2015, 12:01 PM
Parent: #1
في تصفحي للفيسبوك قرأت هذا التعليق ..| Quote: Bder Altaibسلام عليكم ورحمة الله تعالى وبركاته الاخوه فى صفحة القوات المسلحه وكاتب المقال لكم منى التحايا ،،، ماتقولوا لى وزارة الداخليه ولا اى سلطه انا ياساده اعمل فى منطقه حدوديه مع اثيوبيا وارتريا لا اريد ان اقسم ولكن اجزم بان الذين يدخلون السودان يوميا من منفذ اللقدى وحمداييت يتعدى ال٥٠٠ فرد بغرض العمل فى الزراعه مع العلم بان الموسم الزراعى فاشل ولانحتاج هذا الكم من العمال واغلب هذا العدد يتسلل مشيا على الاقدام لداخل المدن والقرى الحدوديه ومن ثم يتوزعوا فى باقى بقاع السودان ولا ننسى ان اثيوبيا اعلنت ان عندها فجوه غذائيه كبيره فى عدد من اقاليمها معناها ان عدد النازحين سيزداد فياساده فى محلية ريفى ودالحليو وهى اكبر محليات ولاية كسلا شكل الشارع العام اثيوبى اكثر من هو سودانى القهاوى حبش وحبشيات المطاعم كذلك فى مرات كثيره تحس بالغربه جوه بلدك مع العلم اذا اى مواطن سودانى فكر فى دخول اثيوبيا يسألوهو سؤال منكر ونكير ،،، فلماذا نترك اراضينا مستباحه للاجانب والى متى ؟؟؟؟؟؟ لانهم هم من اسباب الضنك الذى نعيشه جردوا الارض من الغطاء النباتى بالقطع الجائر للاشجار للبناء والطبخ ودخلوا المدن فشاركونا فى المواصلات وزاحمونا فى الايجارات واستفادوا من دعم الكهرباء والدقيق معنا ولا يقدمون للبلد اى شئ بل يستنزفوا عملة الصعبه بتحويلاتهم الى اسرهم فالى متى سنكون نحن هكذا ولا حول ولا قوة الا بالله |
|
Post: #4
Title: Re: نسوي شنو نحن مع بلدنا الفاتحة علي مصراعيه�
Author: Munir
Date: 12-02-2015, 01:04 PM
Parent: #3
في هذه الفوضي الحدودية - فاتحين علي ١٠٠ مليون مصري من الشمال ، و١٠٠ مليون أثيووبي من االشرق، زائداً البلف المحلوج من الجنوب، والماسورة المكسورة من الغرب - قصتنا بايظة إذا حاولنا تقنين وحصر وتوزيع الموارد والسلع الإستراتيجية وتوفير السكن والترحيلات ووو ..
|
Post: #5
Title: Re: نسوي شنو نحن مع بلدنا الفاتحة علي مصراعيه�
Author: Arif Nashed
Date: 12-02-2015, 01:26 PM
Parent: #4
كما لاتنسي البلد ملجأ لكل الارهابين الفارين من بلدانهم ..
|
Post: #6
Title: Re: نسوي شنو نحن مع بلدنا الفاتحة علي مصراعيه�
Author: Munir
Date: 12-02-2015, 01:35 PM
Parent: #5
عارف ناشد .. وكذلك ملجأ آمن لكل مجرم أو قاتل هارب من العدالة في بلده ..
|
Post: #7
Title: Re: نسوي شنو نحن مع بلدنا الفاتحة علي مصراعيه�
Author: قسم الفضيل مضوي محمد
Date: 12-02-2015, 04:29 PM
Parent: #6
بتذكر قبل فترة قريت تعليق على سفر وزير سوداني بعقد عمل في السعودية ... التعليق بيقول (بالله آخر واحد يطلع من البلد دي يطفي معاه النور ويخت المفتاح تحت كبري توتي) ...يا اخي ما دام كتير من الناس هجت والباقيين مفكرين في المخارجة ... اها البلد دي تقعد خرابة وينعق فيها البوم ولا كيف ؟؟؟بعرف واحد قريبنا شغال اعمال حرة في السودان ... شغالين معاه 10 من الجنسية الحبشية... يومية الواحد قبل سنتين كانت 50 الف بالقديم ...بحكي لي قريبنا الشغال في مجال المقاولات وقال فيه مصري كان هنا السنة الفاتت واشتغل في مجال المقاولات ... في سنة واحدة عمل حوالي 200 مليون بالقديم ... وكان مشى مصر نهائي ولكن بعد فترة دق عليه المصري وقال يا عمي أنا جاي (راقع) ...ملخص كلامي ما دام ان معظمنا ما مقتنع بالسودان وبالاستقرار فيه ... ليه ما نخلي غيرنا يجي ويعمر ويبني ... وزي ما نحن عاجبانا بلاد غيرنا فأكيد غيرنا معجبين ببلدنا ...وهكذا الحياة :)تحياتي يا منير ...
|
Post: #9
Title: Re: نسوي شنو نحن مع بلدنا الفاتحة علي مصراعيه�
Author: Munir
Date: 12-02-2015, 05:59 PM
Parent: #7
قسم االفضيل كيفنك ..ياخي كتلت لي الموضوع في مهده ههههه .. خلاس نخليها جايطة هردبيسة ومافي داعي لوزارة داخلية زاتو .. ياخي والله وزارة الداخلية دي زاتها مهزلة ماعادية .. البلد فاتحة من البحر للمحيط ومن المتوسط للبحيرات والأجانب داخخلين ومارقين علي كيفهم وتقوم الوزارة تفرض علي المواطن تأشيرة خروج - عشان خاطر الرسوم المالية - يعني زي الحارس الذي مفروض يحمي البيت يقوم يخلي الباب فاتح للحرامية والمجرمين، ويفرض الإقامة الجبرية علي سيد البيت ويدفعه قروش علي الدخلة والمرقة .. !!!!البلد دي ما بتمشي لقدام ..
|
Post: #10
Title: Re: نسوي شنو نحن مع بلدنا الفاتحة علي مصراعيه�
Author: Munir
Date: 12-02-2015, 06:15 PM
Parent: #9
لقيت هذه الصور في الفيس لعمال اليومية في مصر تحت عنوان (عمال اليومية/ علي باب الله) .. إنكربوا ساي .. الجماعة ديل قريباً ياهم الكاسحين جنوباً - | Quote: افتكر وانت نازل شغلك ومتكدر وقرفان ان فيه واحد ممكن يقعد القعدة دى لغاية العصر ويروح لبيته مش معاه حق لقمة كويسة لعياله .. |
  
|
Post: #11
Title: Re: نسوي شنو نحن مع بلدنا الفاتحة علي مصراعيه�
Author: قسم الفضيل مضوي محمد
Date: 12-02-2015, 08:27 PM
Parent: #10
يا منير ... احكي ليك طرفتين حكوهم أعضاء معانا هنا ...الأولى ... احد الأخوة الأعضاء وقال كان شغل بنيان في السودان وكان عندهم نقص في العمالة ... فواحد قال ليهم فلان داك ما شغال امشوا كلموه وقولوا ليه تعال اشتغل معانا باليومية ونديك 40 الف ...صاحبنا قال ليهم انا بي 40 ما بشتغل ... بشتغل بي 80 ... قالوا ليه طيب تعال اشتغل بي 40 ...لما تلقى أبو 80 امشي ليه ... قال ليهم لا بقعد عاطل كدة لما القى اليومية أبو 80 ...التانية...حكى واحد من الأعضاء وقال كان عنده تشطيب في بيته المهم قالوا ليه فلان داك زول خطير في عمل الديكور وزول امين جدا ...المهم قابلوا الراجل ووروهو الشغل واتفقوا معاه على الاتعاب ... صاحب العمل قال ليه بديك نص الاتفاق وبعد تخلص نديك الباقي ...قام الوسيط قال ليه يأخي ما تريح بالك وحاسبه كامل والزول دا مضمون ... صاحب العمل فعلا حاسبه كامل يوم الخميس وقال ليه خلاص ببدا الشغل يوم الاحد ...المهم الراجل شال القروش واختفى ... دقوا عليه تلفون وقالوا ليه وين انت يا يا زول؟؟؟صاحبك قال ليهم انا مشيت مناطق تنقيب الدهب هههههأهلنا في السودان بقوا يدوروا على اقصر الطرق للغنى ...وحاليا في ازمة عمالة سودانية ومعظم الجماعة كبسوا ليك التنقيب ...فالعمالة الأجنبية مهمة لسد الثغرة الكبيرة دي في سوق العمل ...بعدين دا حراك اجتماعي عالمي لابد منه لحكمة يعلمها الله ... معليش للبري الشديد ...
|
Post: #12
Title: Re: نسوي شنو نحن مع بلدنا الفاتحة علي مصراعيه�
Author: Munir
Date: 12-02-2015, 09:40 PM
Parent: #11
زولك الراجي ال٨٠ ألف ده بيكون عنده مغترب زيك كده بيصرف عليه .. لو كانت الحياة قرصته زي المصريين الفي الصور ديل ما كان قعد عاطل ..بتاع الدهب ده قريت قصته وكمان علقنا ليهو -المحصلة ، إذن، كما قلت نخليها مطلوقة وندع الأقدار تفعل ما تشاء .. وحتي لو أمكن إلغاء الحدود .. عندنا صديقنا ما عنده شغلة بالسياسة - فكان زمن محادثات السلام مع جون قرنق - وجون قرنق كان مصر علي إلغاء الحدود إلغاء الحدود إلغاء الحدود (حدود الشريعة وقوانين سبتمبر).. إكتشفنا في الآخر إنو صاحبنا ده كان مفتكرها الحدود الجغرافية بين السودان وجيرانه .. إذن الآن الآن حان الأوان لإلغاء االحدود - :)
|
Post: #13
Title: Re: نسوي شنو نحن مع بلدنا الفاتحة علي مصراعيه�
Author: أحمد الشايقي
Date: 12-02-2015, 10:27 PM
Parent: #12
| Quote: ولذلك ستقاتل بعنف لنفي الأمر .. |
وكمان الموضوع جاب ليهو روهينقـاسلام يا منير وشكرا لذكر اسمي في بوست الاعضاء القدامى
|
Post: #14
Title: Re: نسوي شنو نحن مع بلدنا الفاتحة علي مصراعيه�
Author: Munir
Date: 12-02-2015, 10:41 PM
Parent: #13
أخي أحمدالشايقي مرحبتين .. ياساتر .. روهينقـا دي شنو كمان ..؟؟::::::العفو ياخي وكتر خيرك كنتَ ما مقصِّر معاي في نقاشات زمان ..
|
|