مع عبق العيد ووحشة البعاد قضينا أيام العيد مع رائعة الفنان أبوداؤود - رحمه الله - حليلهم دوام بطراهم .. بأداء عدة فنانين .. أبدأهم به .. وكل عام والجميع بخير ..
الأداء االثاني للفنانة مكارم بشير ... أعذروني يا جماعة - أنا يادوبك طالع من الكهف لأكتشف روعة هذه البنت المجنونة .. ما كنتت عارف عنها أي حاجة - وده لأنو ما عندي غير القناة الفضائية السودانية اليتيمة - لا نيل أزرق لا شروق لا امدرمان - ولولا بوست عزيز بتاع أغاني أغاني كنت حأكون لسة نايم في كهفي ..
الأداء االثالث للفنانة هند الطاهر... دي برضو ما كنت ناقشها .. أنا االظاهر علي فايتاني حاجات كتيرة .. بقيت أي كلام .. لكين بيني وبينكم أنا أساساً من زمان: أي كلام ..
بالجنبة كدة عليك ب Arab TV Box اشتريهو اون لاين سعره حوالي 150 - 200 دولار يشتغل بالنت وبه كل القنوات نعم حتى القنوات المشفرة لو حبيت معلومات عنو برسل ليك تحياتي
ألف مرحب يا خواجة .. وعيدك سعيد .. وشكراً علي إضافة نسرين الهندي .. مرات أنا أقعد أستمع وأستمتع بروائع الغناء القديم الذي يكون قد تعتق وتخمَّر في الوجدان السوداني حتي أصبح الفنانون يتبارون في أدائه .. فأتأمل أداء مختلف الفنانين وأتحسس الإبداعات والإخفاقات حسب وزنة أحاسيسي أنا - والتي بالطبع تتفق مع كثيرين وتختلف مع الكثيرين - فكل إنسان عنده وزنته .. بالنسبة للقنوات - أشكرك علي المعلومة التي حفزتني للنظر في الحصول علي باقي القنوات .. فوجدت أن أسهل طريقة هي برنامج kodi الذي تستطيع به أن تتشبع مما تشاء من الميدييا بما فيها اال live tv ... وفعلاً تمكنت من مشااهدة باقي القنوات السودانية - بث حي - بس المشكلة إنو الوواحد يلقي ليها زمن وعُمُر من وين ...:)
يامنير انت في السياسة اي كلام لكن في ابوداؤد ... انت الكلام ذاتوا
Post: #12 Title: Re: مقارنات غنائية: حليلهم دوام بطراهم Author: دينا خالد Date: 07-23-2015, 09:16 AM Parent: #10
الظلامى منير ... او اهل الكهف ! هكذا الحياة ... وانت بتستمع ل ابو داؤود تصحو فجاة على اصوات ناس مكارم ونسرين ومهند والساتة وهم يرددون فى تمايل وهشك بشك وجوقة موسيقية شترا .. ما كان يردده اب داوود فى ثبات ابو الهول ناقرا على الكبريته فتحتاس !! اى ريح قذفت بى الى هنا ؟ اتركونى نايما لو سمحتوا .... حالتك بلا وضو اى نيل ازرق وامدرمان وشروق وهارمونى وانغام ... حالتك بلا ندى القلعة وانصاف مدنى وعلوية عذاب ... حالتك فى ماوراء المتوسط او الاطلنطى .. لكن تعال شوف النجاض المتنجضنو نحن ! وهكذا الحياة ... او ياهو دا السودان ... عرفتو انكم خليتونا فى الحلة المشدودة فى النار ؟ .... دى مش ياها ذااااتها ابعد من الشر وغنيلوا ؟ قال دوام بطراهم قال ... غشاشيييييين بتطرونا لكن مرة مرة .. فشنو اسمعنا مرة ياخ ..
---------- الساتة = السادسة اى ان طلال من الحارة السادسة .. اسمها مقاربات وليس مقارنات العربى ذاتو بعاكسكم ؟ كم لبثتوا فى نومكم هذا ؟
Post: #13 Title: Re: مقارنات غنائية: حليلهم دوام بطراهم Author: دينا خالد Date: 07-23-2015, 09:37 AM Parent: #10
اما فى لب الموضوع اذا داير تعمل مقارنات باداء اب داوود فحتما لن ينجح احد ... خليهم يهطرقوا فى هطرقتهم . بمناسبة الاداء الرجولى يا لؤى ناقشنا مرة الكلام دا فافتكر البعض اننا بنقول لى مكارم انو الاداء القوى والثقة بالنفس والحركة الجريءة دى بتاعت رجال بس وعلى الانثى ان تنكسر ونحن ما قصدنا ذلك (سلامات يافردوس جامع) لوووووب .. والاداء الرجولى سمة وليس انتقاص ام كلثوم اداءاها كان رجولى ..،، لحد ما فيروز كذلك ..، والكثيرات من عملاقات الفن العالمى .... موهبتهن وقدراتهن وتمكنهن فاق عنان السماء وبقى اداءهن رجولى .. لازمهن الوصف مع تفردهن ...
MAHJOOP ALI سلامات .. ياخوي أنا معترف أني أي كلام .. لكين إنت درَّاب عديل في السياسة .. ههه ..
بالمناسبة، خليني أختصر ليك مجمل رؤيتي للسياسة .. وأقدر أقول ليك هي مسرح تمثيل وكذب وإحتيال وقتل وسرقة ووو.. كل الشرور - سمِّ ما شئت - .. مافي واحد يجي يعمل لي فيها بتاع كفاح ونضال وحقوق وو.. الوقوف مع الحق ثمنه باهظ لربما يضعك وجهاَ لوجه مع خيار لسجن أبوك أو قتل إبنك لو أجرموا وكنت أنت في سلطة ... ولربما يضع عنقكك في حبل المشنقة لو كنت مسئول سياسي وأخطأت وعجزت عن الإعتراف للشعب بخطئك القاتل .. فممارسة السياسة هي سلوك .. وفي هذا الزمان - وكل الأزمان - ظل السلوك االقويم للمرء أكبر تحدي .. فمن لا يتمكن من تقويم سلوكه وتحصين نفسه من الطمع في السلطة والثروة فهو أكيد سيكون متسلط فاسد وقاتل وو .. لذلك أنا لستت مقتنعاً بكل دعاة الحقوق والمهووسين الذين تحس بهوسهم من كتاباتهم ، والذين إذا دانت لهم سلطة فسيدخلوا في نفس دائرة تصفية الخصوم ويصير التطهير واجب وطني وووووو..
Luai Salah ... كلامك صاح .. الزولة ما نصيحة .. موهوبة شديد .. لكين أنثوية أكتر من كده تتقطع يعني؟ :) .. بس طبعاً البشِّير الكتير غير مألوف من البنات وغير مستساغ .. يقولوا المرأة ما مفروض ترفِّع أباطاتها قدام الرجال - حتي لو في مظاهرات .. :) ..
يا أبوبكر ده كلام حبوباتنا الكبار .. هسه شوف الإنتقاد للحسناء مكارم بشير ده كله من شنو..؟ مو فشان كترة البِشِّير ورفيع اليد .. لكين طبعاَ بِشِّير مكارم ده ليس هو المقصود exactly ، بل المقصودات هن النساء الشكَّالات الواحدة ترفٌّع ضراعاتها في وجه الرجال .. ثم طبعاَ معروف النساء معروفات بالضمضمة .. والضمضمة من الحياء والحياء من الإيمان..
أنا لمن كتبت العبارة عارفها حتجيب هواء .. وقعدت مسردب للرش من دينا خالد - قلت الليلة أنا مرشوش مرشوش .. تقوم تطلع إنت ؟؟ ههه .. قبل شوية كتبت رد علي مداخلتها قبل ردي ليك ده - رش إستباقي-، لكين فجأة قفلت الصفحة بدون قصد والكتابة طارت - أنا طبعاً بكتب بالماوس -..
أها بعد التعريجة دي رأيك شنو في الأغنية بأصوات هؤلاء الفنانين .؟؟.
هههه يا دينا ضحكتيني في المداخلة الأولي والله - الضحكة دي بايتة من أمبارح لأنها كانت طارت مع الرد الراح مني -
Quote: وهكذا الحياة
.. ههه دي من دقنه وافتل له؟؟ ..
الإحساس بالنغم يتغير مع الحال والحال متغير كما غيوم السماء .ومرتبط بالزمان والمكان : أحياناَ غناء قديم، أحياناَ غناء حديث، أحياناً فن شرقي - سمعتي موسيقي شعبية صينية؟ جربي - أحياناً فن غربي ، أحياناً عربي، أحياناً أفريقي، أحياناً طمبور، وأحياناَ مديح .. أحياناً أمواج بحر، أحياناً شقشقة طيور أحياناً أصوات الصراصير والضفادع في حقول ساكنة بالليل .. وإلخ.. بحور متلاطمة الأمواج من الألحان والأنغام تزدحم بها دنيانا - نعمة لا نهائية من الخالق البديع - الحمدلله.. قبل فترة بدأنا نسمع صياح ديك كده عند أحد الجيران في هذه البلاد التي لا تسمع فيها ديكة ولا جداد ولا حمير ولا كلاب .. فاستغربنا وقلنا أكيد واحد من سكرجية البلجيك ديل ناوي يضحي بالديك .. والطائر المسكين عرف إنو في سودانيين في الجوار فأراد أن يقول عوووووك .. شفتي معاناة الطيور؟
قلتي لي أبوالهول؟ - هسه ده مدح واللاّ ذم؟ واللاّ مدح بما يشبه الذم؟؟ نعم المرحوم أبوداؤود نغَّام ومجيد في أدائه وقاعد ينغِّم الكلمات كلمة كلمة بمزاج عجيب وبديع ، إلاّ أني لا أحس بالشجن في صوته كما أحسه في الأصوات المعطونة بالأشجان مثل الطيب عبدالله وعثمان حسين - معليش بس الناس وزناتها مختلفة -.. فعماد الغناء : التطريب والتشجين .. التطريب : عندما تكون منتشي فتنطط وتبتهج وتبشِّر وتتباشر- لاحظي حرف الطاء المشترك في طرب ونطيط ههه - وده غالباً يكون في جماعة .... والشجون تتفجر في حالات الأشواق والبعاد والهجران والأحزان ووو المشاعر في هذه الحالات بتكون نبيلة ونضيفة مغسلة بالدموع .. وده بيكون في حالة إنفراد وكتَّامي .. جبتي سيرة النجاض؟؟ .. إنتي شفتي حاجة؟؟ نحن الحمدلله نجضنا وحلتنا حرقت زمان .. ماتشوفي العالم القاعدة تتفاصح هنا ديل - عاملين فيها قاشرين بالبِدل والكرفتات -.. ديل كلهم أساساً غبش ومهمشين إتنجضوا لامن زيتهم طلع ، وأسع روحهم طالعة برضو في ما وراء البحار والمحيطات لكين ضاربين الهم بالفرح .. إنتو لسع ما استويتوا - لازماكم شوية نار - وin the mean time حنظل دوام طارينكم .. - المعاناة سيم سيم بس فايتنكم بالصبر -
عزيزى ابوبكر تحياتى مداخلتى ورائى حول الموهوبة مكارم ليس جندرى ولكن من طريقة ادائها وانفعالها يميل الى الاداء الرجولى بالنسبة لموضوع احتلال المنبر ارجو ان نطلق الاحكام على كل من لا يتفق معك فى الراى
وبمناسبة الساتة ده .. أذكر مرة بالصدفة حضرت في فضائيتنا اليتيمة برنامج مع هذا الشاب - واستغربت من طريقة غنائه البناتية ولم أستسغها بتاتاً البتة .. ما عارف كيف أصبح مشهور وكمان مطرب شبَّاك .. !! ..
حقيقة راجعت هذه العبارة ولقيتها ما دقيقة .. فهناك إختلاف في المعاناة - إختلاف نوع - لا يمكن مقاربة النجاض بين الداخل والخارج .. آسف يا دينا خالد علي إعتبار التساوي في النجاض (دي كانت مكاواة).. لكين حقو أنا أكون منصف - وده لا ينفي أننا برضو زمان أخدنا حصتنا - في الغربة هناك أسباب الإنشراح الثلاثة : الماء بكثرة والخضرة المنتشرة والوجه الحسن شديد .. أساسيات الحياة العصرية متاحة من غير إنقطاع - موية ونور ما تشيل هم - لا أستطيع أن أنكر ذلك .. ولكن ثم لكن أين الأهل أين الأصحاب أين الأحباب .. الحليلهم دوام بطراهم ..
يتبع ..
Post: #23 Title: Re: مقارنات غنائية: حليلهم دوام بطراهم Author: محمد الكامل عبد الحليم Date: 07-24-2015, 08:06 PM Parent: #22
تحية طيبة يا منير (المتأمل)...من الصورة يمكن استنباط ذلك...او الشجون التي تدلقها في حزمة اغنيات أو معاني حروف اسفيرية....يبدو يا صديقي(عنوة واقتدارا مني)ان كيميائنا السودانية معطونة باشجان ازلية تستثيرها المشاعر الغزلية...ده كوم....والكوم الاخر حياتنا الاغترابية الجادة اكثر من اللازم كابناءءرعاة وترابلة وافندية...
خروجك من الكهف ضروري....وما تنسي في برزخ راجينا...(دا وكتو؟ )
وكل سنة تجدد فيها مساماتك بعطر الصندل(المستني)
Post: #24 Title: Re: مقارنات غنائية: حليلهم دوام بطراهم Author: محمد على طه الملك Date: 07-25-2015, 07:54 PM Parent: #23
يا منير كل سنة أنت وزوارك طيبين .. أأقول ليك أحسن عود لكهفك الميمون .. تلفزيون تشيف يتيوب ما تشيف؟ معقول بس ياخي دلالة لغتك ذاتا من كم لبثنا زي ما قالت بتنا دينا .. المسألة حقو ما ننظر ليها من زاوية حادة .. يعني النظرة مفروض تكون شاملة صوت وشجن ونغم وأداء وموسيقى .. والسؤال حقو يكون أين الاضافة المتميزة للمؤدي ؟ أي عمل ما تحس فيه إضافة تجديدية ترمم دون تبديل وتحسن بدون تغيير اعتبره بيع موية في حارة سقاي.. من هنا بقوليك بعد أبو داؤد الباقين مع احترامي زحهم من وشي بس هند الطاهر لا.. ليه ؟ راجع شغلها على ضوء معيار الاضافة .. أهديك ( المقاربات) دي عشان تكون اب تو ديت وتقيف على معيار الاضافة البقصدها في اجتهاد الود الاسمو الجزار دا.. مرغني المامون واحمد حسن جمعة :
آهلاان أستاذنا المخضرم محمدعلي الملك .. كل سنة وإنت طيب .. ياخي اليوتيوب دي يشوفوا فيها شنو ويخلوا شنو .. بعدين ياخي أنا ذكرت التلفزيون لأنه يعني مشاهدة الكسل والريموت كنترول من بعيد وأنت مستلقي علي الأريكة بعد يوم طويل - قال أريكة قال -ههه الدنيا أصبحت فيها زحمة ميديا قدر الجبال بينما عمرنا كله أصبح قطرة في محيط .. لا لاحقين نشتغل ولا لاحقين نشاهد ولا لاحقين ننوم .. ياخ مرات الواحد يقعد ينط من عثمان حسين للطيب عبدالله تلقي الليل روّح وأبواب الصباح فتّحت .. في النصف الأول من التسعينات كانت تقنية ملفات الميديا علي الزيرو .. أي كليب بتاع صوت لا يتعدي عدة ثواني وتلقاه ملف قدر الضربة - إلي أن دخلت تقنية الmp3 وعملت ثورة .. وهسه جات اليوتيوب دي كمان فتحت أبواب الأثير إلي مالانهاية - فبدأت كمان بفيديوهات قصيرة ثم تطورت لفيديوهات تلقي الفيديو الواحد مدته عشرة ساعات - لاقاك فيديو عشرة ساعات ده واللاّ أجيب ليك واحد؟-.. ده جنون .. نحن نسوي شنو؟ إلاّ الواحد يستمع بسرعة البرق .. ويخيل لي مستقبلاً ممكن تشغيل الفيديو بالسريع جداً - دمج زمني - ويتطور الإحساس بالصوت ليواكب سرعة الفيديو فيتمكن الإنسان من مشاهدة ١٠٠ ساعة في دقيقة واحدة - كل شئ ممكن - .. أديك مثال بسيط وأقول مثلاً الإنسان العابد الصالح ممكن يسبِّح مليون تسبيحة في الثانية وذلك عندما يسبح بسرعة القلب وليس اللسان :) .. وسرعة القلب لا نهائية - ده غير سرعة العقل - ههه .. باب المعجزات فاتح علي مصراعيه ..
ياخي ليه نزح ليك مكارم دي من وشك؟ البت دي عندها موهبة رهيبة .. وما يميز أداءها أنها تتفنن في اللحن وتتعرج به طالع نازل - بتعديل في الأصل - بدون أن يفلت منها .. فتظل محتفظة بالتحكم الكامل فيه .. ومن إبداعات الفنان أن يغني اللحن الواحد بعدة ألوان .. الحتة دي قاعد يبهرني بيها فناني بتاع الطمبور المفضل صديق أحمد .. فكنت أجد الأغنية الواحدة يغنيها بعدة طرق من شريط لآخر ومن حفلة لأخري، فتحس بأنه كأنما يجدّد الأغنية في كل مرة يغنيها .... الفرق بين مكارم بشير وهندالطاهر أن مكارم لها قدرة علي تنويع اللحن وأدائه بطريقتها فتضيف ما تشاء من كسرات ونغمات بدون أن تخل باللحن - لاحظ حتي الفرقة الموسيقية متكيفة من تمكنها في الأداء - .. أما هندالطاهر - ودي أول مرة أسمعها - فإن صوتها متميز ويتصف بالنداوة والعمق .. لكن أداؤها ملتزم بالتقليدية ، فهي من النوع الذي لا يجرؤ علي إضافة تنغيم للحن الأصلي ، ليست مثل مكارم التي ذكرت أنها تذوِّق اللحن الأصلي من عندها مع كامل المحافظة عليه ..
بالنسبة للنماذج التي أتيت بها - الله يرحم الثنائي ميرغني المأمون وأحمدحسن جمعة ونادر خضر ويرحمنا - أما الشاب الجزار فأأقدر أقول صوته حنين - وهو في الأغنية دي جضمها - لكني لا أحب طريقة غنائه المناحية - كما ذكر مرة يحي قباني - التي أري أنها أصبحت تقليعة جديدة لا تشبه غناءنا التقليدي - هو أساساَ الناس بدأت تتخلي عن السلم الخماسي ، وكمان الجزار ده كمان طلع بيهو برة الظلط عديل كده - الشئ ده ملاحظ في دعايات التلفزيون، إذ إنك إن لم تكن عيونك علي الشاشة وجات دعاية تفتكر إنك بتشاهد قناة غير سودانية .. فالتلفزيون إتبهدل بأغاني الدعايات الجزارية دي .. فأصبح التلفزيون مسخاً..
الأخ محمد الكامل عبد الحليم سلامات وبارك الله أيامك .. ومرحباً بالصداقة والخوة يا ودالبلد .. التأمُل لذيذ ياخي .. تصدق حتي الآن بتأمل و أضحك في الزول الهلابي داك القال إنو المريخاب ديل كلهم هلالاب ههه..
الشجون غذاء الروح .. وفعلاَ بالنسبة للمتغرِّب والمهاجر ليس هناك شئ محسوس يربطه بالبلد سوي الغناء المشجون والأصوات المشحونة بالشجن - تأمل أغنية أرض الحبيب للفنان الطيب عبدالله مثلاً ، وخاصة عندما يقول شوقي ليك طال شوقي ليك طال -.. تبكِّي مش؟ .. أو عثمان حسين عندما يصل لمقطع: كل طائر مرتحل عبَر البحر حملته أشواقي الدفيقة .. شجون متدفقة .. الشجن برضو فيهو العذاب ..لكنه طبعاً مختلف نوعاً من نجاض حَلة ناس دينا المشدودة .. تعبير (حلة مشدودة) ده والله أبدعت فيهو.. يجعلك تبتسم من طرافته وفي نفس الوقت يغرس غصة في حلقك ..
Post: #27 Title: Re: مقارنات غنائية: حليلهم دوام بطراهم Author: عبيد الطيب Date: 07-26-2015, 11:25 AM Parent: #25
الأخ منير سلااام كل عام أنت وضيوفك بخير وأيَّامكم دايما بيض أجمل مافي مكارم موهبتها وهي بتغني بدون تكلف والأجمل كمان بتمسك المايق بي إيدها العسرة يعني هي من اللائي "بتلفحَنْ عُسر" و ربنا أداها موهبتين جمال الصوت واللَّيد العَسْرة ياخ عافية وفهيمة ومكارم من أجمل الأصوات عافية حسن ، تعرف تختار الكلمات، وتعرف تتقن غناها فهيمة من أجمل الأصوات، ليتها تختار الكلمات بعناية وتجد الملحِّن الماهر، وياريت كمان تجوّد وتثابر معزتي
الأخ عبيد الطيب مرحباً وسهلا .. تعود عليك الأيام بالصحة والسلام ..
الله ينوِّر عليك .. فات علي أن أشير أن مكارم بشير لا تنافسها إلاّ عافية حسن ..
Post: #29 Title: Re: مقارنات غنائية: حليلهم دوام بطراهم Author: محمد على طه الملك Date: 07-26-2015, 01:46 PM Parent: #28
عافية حسن حته وااحدة ! بالعكس يا منير انا شايف أداء مكارك هو الغاطس في التقليدية .. مع احترامي لأذواق معجبيها المقارنة مع هند منعدمة .. ما عارف ليه بتذكر فرفور لما (أشوفا مش اسمعا ) بتغني .. بالجد اجتهادات الجزار تستحق الدعم والمؤازة كدا تابع الزول دا .. بس وكت دارقتني بقباني ماعندي غير أقول دي أضان متعبوب على هندستا.. ياخي دقيقة: انت (منير) دي قاعد تصرفا كيف في سوق الفلامش اللبلجيك؟
ما تظلم البنت يا الملك .. أدعوك للإستماع بدون رأي إستباقي لأغنية تواهة هذه التي ذكرَت أنها من كلماتها وألحانها .. ثم تاني الزولة دي بالإضافة للغناء فهي أيضاً ذكرت أنها رسامة ورسوماتها معلقة في مدارس الإبتدائي والثانوي الدرست فيها .. وذلك يعني أنها متعددة المواهب ياخي ..
قصدك بتصريف منير التشابه بين إسمي وعبارة مِنير - مقابل Mr. - في اللغة الفلامية ؟؟ ههه ده طبعاً عامل لي لخبطة - مرات أجي ماشي جنب إثنين بيتكلموا مع بعض ، فيقوم واحد يقول للتاني منير وأقعد أنا أتلفّت زي العوير هههه ..
Post: #31 Title: Re: مقارنات غنائية: حليلهم دوام بطراهم Author: محمد على طه الملك Date: 07-27-2015, 00:30 AM Parent: #30
يا منير أنا ما بقول أنها ما فنانة أو شاعرة .. بس نحن هنا بناقش موضوع المقاربات ؤ دا موضوع مختلف عن جهدها الخاص.. في موضوع اسمك تصدق دا الاتوقعتو هههه.
البنية الأسمها هند الطاهر صوتها فيهو كتمة ما حلوة ...
الرجل الراقي الأنيق يحي قباني .. شكراً علي المرور - .. بالله كلِّم لينا الملك ده .. القال البت زي فرفور ودينا خالد القالت هشك بشك .. قالوا لولا إختلاف الآراء لبارت السلع .. قلت لي صوت هند فيهو كتمة ؟؟ .. أنا شايفه عمق في الصوت ..
Post: #34 Title: Re: مقارنات غنائية: حليلهم دوام بطراهم Author: الحاج حمد الحاج Date: 07-28-2015, 10:23 AM Parent: #33
صديقي العزيز منير كل عام و انت و الاسرة الكريمة بخير و ربنا يحقق الامنيات و نرجع جميعا نقضي باقي العمر في الوطن العزيز و تعيد موش في الشعبية في الزومة عديييل..السنة دي نحن القراااب للخرطوم غنينا (حليلهم دوام بطراهم) خلي الانت القطعت بحرين..ياخي هيجت فينا ذكريات العيد في الشعبية لكن ان شاء الله الخروف في الضحية نضبحو في طرف ميدان الصداقة..البت مكارم دي ما هينة جضمت الشغلانة كويس و خليكم من رفع الايدين دي.
Quote: قصدك بتصريف منير التشابه بين إسمي وعبارة مِنير - مقابل Mr. - في اللغة الفلامية ؟؟ ههه ده طبعاً عامل لي لخبطة - مرات أجي ماشي جنب إثنين بيتكلموا مع بعض ، فيقوم واحد يقول للتاني منير وأقعد أنا أتلفّت زي العوير هههه ..
في زياراتي الاولى لي مكة كنت لما اسمع حاج و الحاج بتلفت زي العوير لكن هسع لو زوجتي معاي في مكة و كوركت لي ما بهببو ليها!!!!!
يا دكتور اغاني و اغاني استمتعنا بيها خلال رمضان رغم انو ( فقط) مكارم بشير و طه سليمان و حسين الصادق القدموا مستوى رائع اما الباقين ما كان في داعي لوجودهم باستثناء عصام محمد نور و الذي نزل مستواه عن السنوات السابقة (يعني ما بطال)