غايتو المناضلين معصورين عصرة ..

ساعة الضرب أصبح شديد .. زعماؤهم كلهم طشوا وفكوا البيرق ومكانهم ما معروف .. الطش الجبال طش .. والدقش الخلا دقش ..
ناس الحلو وعقار اتشعبطوا في الجبال ، وخليل جوا كاردينه ثوار ليبيا .. والحالة بقت شلش ..

خلوا أبواقهم في المنبر تنبح سسسسسساكت ..
مناضلي التهميش مالاقين راس الخيت .. ومناضلي الجلابة - ناس الصفقة - قاعدين يتلفتوا وصفقتهم بقت تعبانة شديد .. في شلة كضابين كده ملوا البورد دانات كضابية والواحد ما قادر يصنفهم تبع وين .. مناضلي هامش واللاَّ كورَس جلابة !!..
الأسماء أسماء جلابة والحركات بتاعة هامش ..

النضال أصبح أن تكثر من بوستات الكضب ..

الناس اتعصرت شديد ياخ .. الواحد تلقاه قاعد وراء البحار ضاربه الصقط ، ويقول ليك الخرطوم جوة .. حالة يأس وإحباط شديد خلت الناس تهضرب ..

أخونا منير سلام

دي النجيضة

Quote: حالة يأس وإحباط شديد خلت الناس تهضرب

تحياتي و إحترامي

Quote: مناضلي هامش واللاَّ كورَس جلابة !!.. الأسماء أسماء جلابة والحركات بتاعة هامش ..

والله ديل زعلان عليهم شديد

المهم يعارض الكيزان باي طريقة وعايز يغير النظام باي تمن

حتي لو كان بواسطة الزغاوي خليل.
_____

تحياتي يامنير

جيت أرفع الفاتحة في بيت البكا .. أقصد في بوست البكا ده ...


هسي المعصور منو باللّه؟؟!!
(جنس مناحة)

محمدسليمان .. يازول أرفع ساكت .. هو إنت خسران تيلة ؟ مو ضامن قروشك ..
مالك ومال العصر إنت .. المعصورين جماعتك الضاربين الصي ، إنت تدخل مول وتمرق من مول ..
قلت لي زولك جو ساكينو ناس بلحاج؟؟ غايتو خليل ده محظوظ نافعاتنو سكاكاتو من زمن امدرمان ..

بالله عليك الله إنت هسه ما بتخجل؟؟ تحتفي بخليل الشغال مقطوعية يدافع عن القذافي في بلد ما بلده ؟؟ وكمان في الآخر يفك البيرق ؟؟ ما كان يركز شوية ياخ ..

مرحبتين أخي بشير
.. كل عام وانتم بخير ..

Quote: والله ديل زعلان عليهم شديد

ياخي ديل هامشيين أكثر الهامش زاتو ..

مرحبتين أخي أبو الحسين .. كل سنة وانت طيب ..

منير سلامي

أظرف حاجة تعليق لي واحد من دروش حزب الأمة بقول إنو بما إنو عروض الحكومة ليهم (إنبطاح) وعصره وبداية إقتلاع من الجذور ...شفتا ليك زول صلح وشراكة بتكلم عن شريكو قبل الشراكة كدا ؟؟؟

قدر البلد إنو سيسو فيها الدراويش ديل ...الواحد قبل يركب يلولح

الأخ منير .. تحياتي واحترامي
واصل بالله في تعرية هؤلاء
أنا من قرائك ومعجبيك من قبل أن أنضم لهذا المنبر
وأكتر شي بعجبني فيك إنك بتدي في التنك

دم بخير

منير
احييك والله

انت الفيها وعرفت ليهم

امس من شمو ريحة دهب خليل المشى شاد

وقامو يفتحو في البوستات

وهسع لبدو ساي

والمشكلة في واحد طاشي شبكة لسع متخيل ان عقار دخل الدمازين

وباقي ليهو حبه ويجي الخرطوم

وناسك بتاعين الموز قالو بعد ايام حيكونو في الخرطوم

ومن زمان سامعين بقصة الخرطوم والقصر

ومافي واحد قرب ليها

المهم لو عاوزين يجو الخرطوم اول حاجة يكترو من الموز

الأخ صلاح غريبة .. سلامات ..

ياخوي الظاهر إنو الجيش شغال زعط شديد .. لكن شكله كده عاملها غُمُتِّي ..

Quote: ومن زمان سامعين بقصة الخرطوم والقصر ومافي واحد قرب ليها المهم لو عاوزين يجو الخرطوم اول حاجة يكترو من الموز

يازول خرطوم شنو ؟ الشعب السوداني عرف إنو دعاة التهميش ديل أهدافهم عنصرية تعتمد علي الملامح والشبه واللعبة بقت مكشوفة ووالشعب جاهز ليها ..

الأخ محمدجلال سلامات ..
ياخوي نعريهم شنو ، هم أساساً ماشين أمفكو .. نحن شغالين نغتغت ..

والله غايتو الواحد إكتشف إنو المنبر ده فيهو جنس هوس !!!.. مبالغة !!!
..

الأخ أمير سلامات ..
ياخوي أتباع حزب الأمة ديل أغرب ناس .. الإمام في وادي والمأموم في وادي ..
حزب بتاع شريعة شعاره الله أكبر ولله الحمد بينما يتكلم بإسمه - وشايلين الراية - علمانيون ضد الشريعة !!..

أولاد سيدهم داعمين الحكومة في الأمن والجيش بينما بناته في المعارضة مع الحركة الشعبية ..
لعب علي الحبلين ..

Quote: الأخ منير .. تحياتي واحترامي واصل بالله في تعرية هؤلاء أنا من قرائك ومعجبيك من قبل أن أنضم لهذا المنبر وأكتر شي بعجبني فيك إنك بتدي في التنك

اردم يا منير

وبعدين هو خليل كان جا دارفور وللا ما جا ... حيعمل شنو؟؟؟

وتهليلكم دا يبن انو الزول كان مزنوق شديد

بعدين خبر انو وصل دارفور لسة ما اتاكد لانو المصدر لحد الان

من بيان العدل والمساواة اللي وزعتو لمواقع وصحف عديدة يعني ما شفنا زول محايد اكد المعلومة

Quote: وتهليلكم دا يبن انو الزول كان مزنوق شديد

ياخوي الجوطة بقدوم خليل ده يبين إنو الجماعة دايرين ليهم قشة يتعلقوا فيها بعدما ناس الحلو وعقار إتعصروا لامن جابوا الزيت ..
والمساكين ماعارفين إنو خليل زاتو زيته طالع ، جاي جاري نفسه مقطوع ..
لكين لاحظ أن القايمين بالحملة ما عندهم أي علاقة بالميدان .. القاعد في أمريكا والقاعد في كندا والضارب الهمبريب في أوروبا .. زول فيهم راجل حارة مافي ..

Quote: حتي لو كان بواسطة الزغاوي خليل.

عليك الله يا بشير احمد وريني
الزغاوة عملو ليك شنو ، وبما أني زغاوية
وليك علي حق الزمالة اخلص ليك حقك
منهم

كلامي دا عشان شايفاك مكتر من ذكر الزغاوة
عمال علي بطال
----------------
بعدين الافندي البكتب باسم صلاح غريبة دا
والله عملتها ظاهرة شديد ، ياخي علي
الاقل وقع علي المداخلة زي ما صلاح بوقع
او قول حبوبتي قالت ليكم عشان تتبلع شوية

مثلاً اعمل زيي كدا:-
حواء سليمان والأسرة
بريطانيا/طرابلس/ الدمازين

الأخ ودالباوقة .. تحيات عطرات ..

Quote: غايتو المناضلين معصورين عصرة ..

غايتو كل ما تظهر بعد غيبة أكيد الزومة بتكون مضايقى!
الزومة=الانقاذ
جنى

Quote: غايتو كل ما تظهر بعد غيبة أكيد الزومة بتكون مضايقى! الزومة=الانقاذ

عليك الله ياجني المتضايق منو
خليل حايم بدون باسبورت طبع جوازه تم تمزيقه بواسطة ابناء جلدته في تشادوهو يتخفى
من زنقة الى زنقه ومصيره مصير سيده المجنون
مالك عقار لابس طرحة وهارب ،،،سونكي القوات الاثيوبية في ظهره وبندقية الدفاع الشعبي في وجهه
الحلو صار مسيخا بعد هروبه لانجمة ولاهجمة
الاحزاب شايلة قرعتها وتشحد في الانقاذ تحت شعارات فضفاضة عن الاتفاق على القضايا المصيرية
المظاهرات حضرنا ولم نجدكم كل واحد يلز في الاخر
اولاد زعيم المعارضة والرئيس القادم للسودان شغالين في جهاز امن النظام وفي جيش رمزي البطش والحماية
مناضلين بلاد برة سواسيو
بتاعين الحركة الشعبية مشغولين بعد الدولارات المهاجرة مع حريمهم الى استراليا
عليك الله المزنوق منو

بالله انت مش كوز اطرش
ماشي في الزفة ... طيره مباريه السيرة !
فتح عيونك واقرأ :
لصوص ما قادرين يشكلو حكومة
جاريين وراء الاحزاب للمشاركة .. والاحزاب قالت : يفتح الله !
هربوا من قوات عقار واخلوا مدن وقرى في النيل الازرق
الحلو شوكة حوت في جنوب كردفان
خليل عاد وتحصن بقوات وعتاد لا قبل لهم بها
مني ترك القصر وعاد للميدان مقاتلا
عبدالواحد بقواته موجود في الميدان
الترابي يضحك ويقرقر في منشيتو .. عارف البير وغطاها !!

اركزو للجايكم !

Quote: بالله انت مش كوز اطرش ماشي في الزفة ... طيره مباريه السيرة ! فتح عيونك واقرأ :

ليتني كنت كوز لمااضعت نصف عمري في الوهم الذي تعيش فيه انت الان
في انتظار ثورة العمال وزوال الطبقات تلك المخدرات الفكرية التي هجرها اهلها
او على الاقل كنت بقلب ميت اعمل شيوعي مناضل وامشي اتعايش على فضلات المجتمعات الراسمالية
في استرالياالكولنالية الامبريالية ( الكلام الحفظوكم ليه في الابتدائي)
بعد ان اصبحت جنة الشيوعيين جحيم لايطاق ووهم كبير زي وهمك في خليل (دباب الكيزان)
بطونكم ملوثة ب###### الراسمالية ورؤوسكم ملوثة ب###### الشيوعية
ومنتظر الفرج من لص المخازن ملك عقار او العنصري حرس القذافي خليل
او منى البنشرجي
ديل كل نصيبهم من النضال فنادق خمسة نجوم ولايهمهم ان يحترق الاطفال والمغرر بهم من ابناء جلدتهم
كما حصل في ام درمان وطرابلس والدمازين
خليك منتظر وايدك في الموية الباردة الى ان يدخل خليل في ام درمان

Quote: لكين لاحظ أن القايمين بالحملة ما عندهم أي علاقة بالميدان .. القاعد في أمريكا والقاعد في كندا والضارب الهمبريب في أوروبا .. زول فيهم راجل حارة مافي

و اين انت الان؟ فى الجبال ام النيل الازرق؟