مافي داعي للجقلبة !!..الانتخابات ستفوز بها الأحزاب الكبري وللطفيليات الرماد !! ..

الأحزاب الكبري : الاتحادي و الأمة ـ زائداً الجبهةااسلامية هي التي لها جماهير لا تتزعزع ولا تغيرها السنون .. لأنها تمثل الوجدان الراسخ كالجبال لعموم السودانيين رعاة ومزارعين ..
مهما حاولت الاحزاب الطفيلية ذات الحناجر الكبيرة التخريب والتشكيك فأنها لن تستطيع تغيير قناعات الجماهير مهما جاطت وتوارت وراء سراويل النساء .. لا انقلاب حيقدروا عليه ولا جلب التدخل الأجنبي سيفيد ..
دعاوي التزييف والتزوير لا يعدو أن يكون جقلبة لا طائل من ورائها ..
دايرين تحول ديمقراطي؟ أهو جابوه ليكم توش لغاية خشم الباب !!!! .. خرخرة المصريين دي لزومها شنو؟..
دايرين تتكلموا مع المستنيرين؟ أهو الكيزان اكتسحوا قلاع الاستنارة في الجامعات عن بكرة ابيها !! ..

احزاب النضال الزائف تعلم أن ليس لها حظ من تأييد الجماهير وجربت ذلك عقب كل ثورة جماهيرية .. لذلك نري الآن منسوبيها يستميتون في التشكيك في أي شئ ويحاولون جهدهم لابطال أي تحول ديمقراطي سلمي .. ويعتمدون في ذلك علي القوي الغربية التي ظلت دائمآ تدعم تخريب أي انتخابات في أي بلد لا تأتي لهم باِمعات يأتمرون بأمرهم كما حدث سابقاً في الجزائر وفلسطين وحديثاً في زمبابوي ..


الحركة الشعبية تعلم أن ليس لها جماهير شمالية سوي بعض الذين يريدون التسلق علي أكتافها كمااللبلاب .. وتعرف أن هذا اللبلاب يستعملها كدرقة ليحارب معاركه بها من وراء حجاب .. لذلك فانها يممت شطر جنوبها وستنفض الطفيليات من فوق ظهرها عاجلاً أو آجلاً ..

منير
اولا كل سنه وانت طيب

انا مبسوط انو كيبوردك مافيهو الالف المقصورة
عشان كده الاحزاب الكبرى بقت الاحزاب (الكبري) في عنوانك
يعني جات من الله
تحياتي وتمنياتي لكم بالهزيمة بالرغم من!!!

الأخ الموصلي .. كل سنة إنت والأسرة بألف خير ..

Quote: انا مبسوط انو كيبوردك مافيهو الالف المقصورة عشان كده الاحزاب الكبرى بقت الاحزاب (الكبري) في عنوانك يعني جات من الله تحياتي وتمنياتي لكم بالهزيمة بالرغم من!!!

تصدق النقطتين التحت الياء ديل اصلو ما شفتهم إلا بتنبيهك ده؟؟ . أخوك شغال بـ virtual keyboard وقد غيرت الـvirtual القديم بواحد تاني .. وأهو زي ما شايف كلها كتابة بالماوس ..

إلا قول لي.. إنت زعلان مالك؟!!!! والله أنا كنت قايلك أحزاب كبري ياخ !!.. يا خسارة ظني فيك !!..

وانت طيب
ياسيدي
كدي راجع كلامي وكلامك وشوف الزعلان منو؟
المهم عندي انو تكون ديموقراطية نضيفه
خاليه
من ال
99.9%
بتاعة الانظمة الدكتاتوريه

Quote: المهم عندي انو تكون ديموقراطية نضيفه خاليه من ال 99.9% بتاعة الانظمة الدكتاتوريه

الموصلي تحياتي ..
العافية درجات ياخي .. خلينا أولآ نمسك في تلابيب العملية الانتخابية ولتكن أول خطوة للتدرج في التحول السلمي لخيارات الناس .. لأن الحل الآخر هو التنازع العنيف إلي أجل غير مسمي .. أو الاعتماد علي التدخل الاجنبي العنيف برضو علي نهج العرقنة والافغنة ..

إنتو كمعارضين قاعدين في الباردة بعيدين عن الدواس ما ظنيت يمسكم الضرر كما يمس القابضين علي الجمر المسحوقين بالداخل بإستماتتكم في التحريض علي البلد واستماتة الحكومة في التشبث بالحكم .. طيب لمن قالوا خلاص نعمل انتخابات الفرفرة لزومها شنو؟؟..
لن يمسكم الضرر بالخارج وانتم تنعمون بالسلام مع أولادكم إذا البلد كركبت.. كل ما ستفعلونه هو إشعال الأسافير بالزعيق والشكوي والأناشيد المستهلكة !! ..

إذا كنتوا من هسة عاوزين تشككوا وتخرخروا وتهيئوا الجو لتخريب الانتخابات كما ظل يفعل في الآونة الأخيرة المعارضون في كينيا وزيمبابوي وغيرها فمعناها انكم ما ناوين تجيبوها البر ..

تفتكر يامنير البعد عن البلد والنيل والاهل والصحاب
ثمن بخس؟؟؟
ياله من ثمن غالي
المهم ربنا يوفق كل السودانيين في الخروج من هذا النفق الضيق
ويهديم جميعا الي مصلحة البلاد
ويجعل السودان مستقرا لالاف السنين
حتي ينعم احفادنا بالرفاهية
نحن فات علينا الفوات

يا موصلي الناس بتموت في زوارق الموت عشان تعبر لجنان الغرب .. وفرق كبير بين شراب الموية العكرانة وبين موية القزايز ..

كلام موية نيل وما ادراك ده كلام استهلاكي، وكثير من يقول لها انعل ابوكي بلد حالما يديها ضهره ..