Post: #1
Title: ودشيقوق من مستشار قانونى فى البورصه لى راعى ابل هكذا حال الدنيا
Author: خالد المحرب
Date: 11-19-2008, 12:14 PM
Parent: #0
بعد غيبه فى اجازه الى السودان كان هناك العريبى ودشيقوق مستمتع اخر حلاوه مع ام عبدالله مو جايب خبر مالى ايدو تب من السوق بعد العوده .. لكن حضر ودشيقوق ووجد الاقتصاد مفقوع فى العالم وطبيعى المساله انعكست على البورصه وسوق الاسهم ضرب الدلجه صاحبنا بقا يتلفت . وفى اتصال هاتفى بينى وبينه كان يشتكى من عدم الشغل ... انا اقترحت عليه انو يرجع لى قديمتو ويجينا فى السعوديه عندى صاحبى محتاج لى راعى ابل وراتبه كويس جدا قالى بفكر وبرد عليك انا فى انتظار الرد ....
|
Post: #2
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: عماد محمود علي
Date: 11-19-2008, 12:23 PM
Parent: #1
الرجل الشهم ابن البطاحين ود المحرب ....
تحياتي وأشواقي لك بلا حدود ...
| Quote: ويجينا فى السعوديه عندى صاحبى محتاج لى راعى ابل وراتبه كويس جدا قالى بفكر وبرد عليك انا فى انتظار الرد |
يا اخوي الله يسهل عليك ... مالك علينا ياخي الزول ده هناااااك في كترابته دي مامريحنا كمان عايز تجيبوا لينا في السهلة دي ... ياخي ده بخلي عجانا يقوم ... الله يرضى عليك خليهو في سجم رماده داااك الممسوخ ولا أقول ليك قولا خلي يرجع السوداااان إن كان نرتاح من سجمه ورماده ده ... قال يجي السعودية قال .... الله يرضى عليك ياود المحرب أن كان تجيب سيرته ساااكت خليك منه هو بي شحمه ولحمة .
غايتو إن كان جاء النشوف لينا بلاداً تاااني نمشي نشوفها ..
|
Post: #3
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: الطيب شيقوق
Date: 11-19-2008, 01:01 PM
Parent: #2
ود المحرب المسنوح
الله يجازي محنك يا المحرب والله يغطس حجرك يا عماد العريس -
ابقوا صاحيين واعلموا ان البورصات ما انشئت اصلا الا لأن تطال جميع ما نملك من اصول وخدمات وخبرات . الاتجاه للرعي هذا لا يعني الفكاك من البورصات البورصات دخلت بيوتنا والبورصات لحست عقولنا والبورصات وصلت بخسنا( من بخسة الروب) والبورصات هبشت مرائسنا و ....... (صاحبك الاصهم) البخليك تقول هييييييييييييييييييييييييييييع .
الان يا الشقي شركات تربية الحيوانات صارت مدرجة في البورصات واصبح للحيوان تاثيره في حركة المؤشر فكلما كان رعاة البقر التي تمثل اصولا لشركات مدرجة ناجحين كلما افضى ذلك الى ارتفاع حركة المؤشر والعكس ودونك يا عسل شركة الروابي السعودية .
هيييييييييع جاييك تاني
|
Post: #4
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: عماد محمود علي
Date: 11-19-2008, 01:54 PM
Parent: #3
| Quote: هيييييييييع جاييك تاني |
يحلنا الله تااااني .. الله يجازي محنك ياود المحرب ... خلاص خم وصر ... تاني يحلك الحله بله ... أنا غايتو ماشي اشوف لي بوست تاااااني إضارا بيهو .
ياالممسوخ ما تسمع كلام ود المحرب ده وخليك في بورصاتك ديك والبعيد عن النظر قريب من القلب أوعك تجي الرياض .... مسنوح .
|
Post: #5
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: فيصل محمد خليل
Date: 11-19-2008, 02:10 PM
Parent: #4
كتب المسنوح شيقا
| Quote: الان يا الشقي شركات تربية الحيوانات صارت مدرجة في البورصات واصبح للحيوان تاثيره في |
تاثيرك واضح
مع حياتي لاهل الدار
|
Post: #6
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: الطيب شيقوق
Date: 11-19-2008, 03:08 PM
Parent: #5
Quote: يحلنا الله تااااني .. الله يجازي محنك ياود المحرب ... خلاص خم وصر ... تاني يحلك الحله بله ... أنا غايتو ماشي اشوف لي بوست تاااااني إضارا بيهو .
ياالممسوخ ما تسمع كلام ود المحرب ده وخليك في بورصاتك ديك والبعيد عن النظر قريب من القلب أوعك تجي الرياض .... مسنوح . |
بورصات شنو آآآآآآآ المرمد انا خلاص جهزت العراقي والسروال والسديري والطاقية الحمراء وخلصت التاشيرة امشى اندفس ليك جوووووة الحجاج في مكة وعيييييييييك يا الخلاء جاك بلاء .
ووقت اعطش اب احمد قااااااااااعد بتلافاني زى صقر الكواهلة اب نية ساهلة
ود الخليل السجم
انا ساهل امشى انت ابقى طباخ
|
Post: #7
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: خالد المحرب
Date: 11-19-2008, 04:40 PM
Parent: #6
اللنقيب ود شيقوق الخيمه جاهزه فى برارى نجد والفحل يهدر يحشر.. والبدوى قال الزول تمام قت ليه زول اصلا راعى وعندو خبره ...
|
Post: #9
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: معاذ حسن
Date: 11-19-2008, 04:55 PM
Parent: #7
ود المحرب
عساك بخير وعافية
العربي دا نجيض ما بتجيهو عوجة
انا قبل كدا عملت بوست واقترحت فيهو تغيير مهن البورداب
ومن ضمن ما دار اقتراح (ما مني انا) بان تترك يا خالد المحرب الاغتراب
وتستغل الكاريزما البلدية التي تتمتع بها وتفتح محل في السوق العربي
والقروش تجيك جارية جري
أها ما رديت علي الزول دا.
|
Post: #8
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: أبوبكر أبوالقاسم
Date: 11-19-2008, 04:50 PM
Parent: #1
| Quote: عندى صاحبى محتاج لى راعى ابل وراتبه كويس جدا قالى بفكر وبرد عليك انا فى انتظار الرد |
ود المحرب سلامات
يعنى يرجع تانى "للصُرار " و " المُتْرار" ؟
هيييييييييييييييييييييع حقتو.
|
Post: #10
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: طلعت الطيب
Date: 11-19-2008, 05:04 PM
الاخ خالد
تحية طيبة
نتمنى للاخ الطيب استقرار فى العمل
لا اعرفه شخصيا ولكن من خلال كتاباته هنا ، من الواضح جدا انه انسان متمكن
واعتقد انه اضافة حقيقية اينما حلّ.
له كل التقدير وصادق الامنيات
|
Post: #11
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: الطيب شيقوق
Date: 11-19-2008, 05:24 PM
Parent: #10
اها يا اللخو كدى قنب في الواطة دى احكي لي
| Quote: اللنقيب ود شيقوق الخيمه جاهزه فى برارى نجد والفحل يهدر يحشر.. والبدوى قال الزول تمام قت ليه زول اصلا راعى وعندو خبره ... |
زولك ده بخليني اجي بحجباتي ؟
زولك ده بجيب لي الشاى الحب عشان اشرب الشاى السبارس ساااااااى عشان يغطس حجري يلحقني .....؟
وحاة الرسول انا غشيم يقوم يفاصحنى اشقو ليك من من تحت لا فوق اجيب ليكم وعيييييييك بالضهاري حقات السعودية .
|
Post: #12
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: الطيب شيقوق
Date: 11-19-2008, 05:35 PM
Parent: #11
بكري
| Quote: يعنى يرجع تانى "للصُرار " و " المُتْرار" ؟ |
كييييييييف شن عندى غيرهن وفيسولي برجع الشاورما ولا هيك؟
عليك الرسول تصور دعوة الجمعة وتنزلها هنا خلي ود المحرب يشوف اخوهو بتجدع كيف مع الهمل في الفنادق.
الود السمح طلعت الطيب
Quote: نتمنى للاخ الطيب استقرار فى العمل
لا اعرفه شخصيا ولكن من خلال كتاباته هنا ، من الواضح جدا انه انسان متمكن
واعتقد انه اضافة حقيقية اينما حلّ.
له كل التقدير وصادق الامنيات |
اخوك والله اكان مسك الرسن وركب الحوية ابشر بالخير برضو اضافة حقيقية -
اسم طلعت دا وحياة الرسول بيكون ما بفرز الضانية من المعزاية
|
Post: #13
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: أبوبكر أبوالقاسم
Date: 11-19-2008, 06:04 PM
Parent: #1
Quote:
عليك الرسول تصور دعوة الجمعة وتنزلها هنا خلي ود المحرب يشوف اخوهو بتجدع كيف مع الهمل في الفنادق.
|
كويس إنك متذكر.
ذكرنى نشيل مخالينا معانا.
|
Post: #14
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: خالد أحمد شطة
Date: 11-19-2008, 06:54 PM
Parent: #13
الحبيب ود المحرب
سلام ياغالي
صاحبناودشيقون انشاء اللة ركيب وشديد
وكان عرج على أم بادر ماينسا الباصور والطاف والرقبية والفروه الصندلية
والحقاب وكمان رسانت القد عشان يبهر بدوى نجد
تخريمة
البراق القبلي فوق أهلي فوق أبلي
ياحمد أحلبلي لبن أمشوك طايبلي
لك ودي
شطة
|
Post: #15
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: الشامي الحبر عبدالوهاب
Date: 11-19-2008, 10:51 PM
Parent: #14
تحياتي يا اخ خالد
بس اؤكد لك اذاود شيقوق جاء راعي ابل
فالمهنة دي حتقسي علي ناس كثيرين تاني
لانو حيضع ليها اسس جديدة اعقدها علي الناس ساكت
وحيبقي الموِّرد الوحيد للرعاة وتحت تحت حيتنافسوا
عليها كثيرين لانها حتتحول لمهنة ذات مردود اقتصادي
سريع وانا شخصيا يا اخ خالد من دلوقت اوسطك في الموضوع دا
تحياتي للمبدع ودشيقوق فهو رجل تختو في اي جرح ابرأ
|
Post: #16
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: الطيب شيقوق
Date: 11-20-2008, 07:43 AM
Parent: #15
العزيز خالد شطة
Quote: صاحبناودشيقون انشاء اللة ركيب وشديد
وكان عرج على أم بادر ماينسا الباصور والطاف والرقبية والفروه الصندلية
والحقاب وكمان رسانت القد عشان يبهر بدوى نجد |
دحين عرب السعودية ديل عندهم رواغة للمحلات المخرفة ولا بقعد مصنقر اكلفها تمر وبرسيم يعني دفيرة وعقيلة بس
عندهم البرنجي البتنتكي بيهو ولابس الفتيقة في راسك من الشمس ؟
Quote: تخريمة
البراق القبلي فوق أهلي فوق أبلي
ياحمد أحلبلي لبن أمشوك طايبلي
|
احب لبن ام شوق ذاتو والله يا خالدحلات جرار
الاخ الشامي ود الحبر عبدالوهاب
Quote: بس اؤكد لك اذاود شيقوق جاء راعي ابل
فالمهنة دي حتقسي علي ناس كثيرين تاني
لانو حيضع ليها اسس جديدة اعقدها علي الناس ساكت
وحيبقي الموِّرد الوحيد للرعاة وتحت تحت حيتنافسوا
عليها كثيرين لانها حتتحول لمهنة ذات مردود اقتصادي
سريع وانا شخصيا يا اخ خالد من دلوقت اوسطك في الموضوع دا |
والله يا الشامي اخوى مافي استثمار مربح زى السعية . انت تعلم انو الضانية المكلوفة كويس بتلد في السنة مرتين ؟ طيب تخيل لو عندك 100 ضانية خلال سنة بتكون كم ؟ وهل تعلم في مناطق كتيرة في السودان انت ما بتصرف عليها خلاف مصاريف الرعاة والعلاج فقط . وهل تعلم انو الضانية السمحة ممكن تلد 3 في ولدة واحدة.
| Quote: تحياتي للمبدع ودشيقوق فهو رجل تختو في اي جرح ابرأ |
لك منى اطيب الاماني
وينك ود المحرب اب شنبا كليقى؟
|
Post: #17
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: ممدوح أبارو
Date: 11-21-2008, 08:40 AM
Parent: #16
| Quote: ودشيقوق من مستشار قانونى فى البورصه لى راعى ابل هكذا حال الدنيا |
كـــــــ!!!!!!!!!!!!!!!كــــــ
وبس
|
Post: #18
Title: Re: ودشيقوق من مستشار قانونى فى البورصه لى راعى ابل هكذا حال الدنيا
Author: الطيب شيقوق
Date: 11-21-2008, 12:02 PM
Parent: #17
جاييكم يا ابارو المسنوح
url=http://www.up.3rbfnon.net] [/url]
|
|