Post: #1
Title: كيف تم تعيين محمد الامين كباشي وزيرا للزراعة في السودان؟
Author: الطيب شيقوق
Date: 04-23-2007, 10:15 PM
Parent: #0
كنت متابعا لبرنامج مع هذا الوزير واصابني الاحباط الشدييييييييد جدا جدا من مستوى رده على الاسئلة الموجهة اليه في برنامج تلفزيونى بتاريخ 23 ابريل 2007 م.
|
Post: #2
Title: Re: كيف تم تعيين محمد الامين كباشي وزيرا للزراعة في السودان؟
Author: ود محجوب
Date: 04-23-2007, 10:50 PM
Parent: #1
| Quote: .كيف تم تعيين محمد الامين كباشي وزيرا للزراعة في السودان؟ |
دا كلام يا ودشيقوق
طيب أجاوبك أنا
تم تعيينه بقرار جمهورى من السيد رئيس الجمهورية.
((دى دايره درس عصر كما يقول الجماعة))
|
Post: #4
Title: Re: كيف تم تعيين محمد الامين كباشي وزيرا للزراعة في السودان؟
Author: محمد عبدالرحمن
Date: 04-23-2007, 11:22 PM
Parent: #2
يالطيب ...تحياتى ..
والله الزول دا محنى محنة ..ماجاوب سؤال واحد ..وماعندو فكرة عن اى
حاجة ..حافظ ليهو كم مصطلح كدا وشغال ترديد ..
والله البلد دى زى ماقال صاحبنا (واطيه ليها عمل ) ..الله يفكها ساكت ..
|
Post: #3
Title: Re: كيف تم تعيين محمد الامين كباشي وزيرا للزراعة في السودان؟
Author: هشام مدنى
Date: 04-23-2007, 11:11 PM
Parent: #1
ما تعين سياسي وكتير بحصل
لكن المحيرنى الــــ الدال الفي ناس في المنبر ده
عملوها لبانه
يا دكتور ويا دكتور
|
Post: #5
Title: Re: كيف تم تعيين محمد الامين كباشي وزيرا للزراعة في السودان؟
Author: الطيب شيقوق
Date: 04-24-2007, 05:14 AM
Parent: #3
الاخوة
ود محجوب
هاشم
مدنى
شكر على المرور
نعم بقرار جمهورى لكنى اعنى اسس ومعايير التعيين
يا اخونا وزير زراعة يسال عن اسباب تدني انتاجية مشروع الجزيرة قال ما عارف آآآآآآآآآآآآآآآآه
|
Post: #6
Title: Re: كيف تم تعيين محمد الامين كباشي وزيرا للزراعة في السودان؟
Author: خالد المحرب
Date: 04-24-2007, 05:43 AM
على الطلاق يالطيب لم اتداخل معك مجامله
ولكن انا الزول ده محيرنى مما كان وزير
للاسكان فى بورتسودان .
لانى سمعت كلامو مع احمد البلال فى البرنامج
بصراحه شى يحير فى سر فى الموضوع دى ما مصارين
بيض بس فى شى تانى .
|
Post: #7
Title: Re: كيف تم تعيين محمد الامين كباشي وزيرا للزراعة في السودان؟
Author: hajhamad
Date: 04-24-2007, 06:16 AM
Parent: #6
الأخ الطيب
تابعت جزء من البرنامج و مع اقتناعي أن التعيين سياسي الا أن من أبجديات مثل هذه اللقاءات أن يقوم الوزير بتحضير نفسه بمعلومات و أرقام أساسية ليكون قادر على تقديم نفسه بصورة جيدة.
اتضح أن الوزير غير ملم ببعض المعلومات الأساسية و ان اجابته يمكن ان تكون اجابات مهتم و ليس اجابات مسئول.
المشاركين واحد بروفيسور و د.مالك حسين و د.عبد اللطيف البوني أظهروا حضور و المام بمشاكل الزراعة ، و استغربت كيف الصحفي البوني يكون ملم بتفاصيل و معلومات اكثر من الوزير نفسه.
أدهشني رقم أفصح عنه البروفيسور (ضيف خارج الاستديو) الذي قال أن معدل الاستثمارات الضخمة التي دخلت السودان كان نصيب الزراعة فيها فقط 2% و الصناعة 35% و الخدمات 63% !!!!!!!!!!!!!!!!!!!!!!!!!!!!!!!!!!!!!!!!!!!!
بالله موش حاجة تحير مليارات الدولارات التي دخلت لبلد زراعي توجهت نحو قطاع الخدمات.
زي ما ذكر المشاركين في الحلقة لابد من وجود خطط واضحة بميزانية محددة في وقت محدد.
|
Post: #8
Title: Re: كيف تم تعيين محمد الامين كباشي وزيرا للزراعة في السودان؟
Author: معاذ حسن
Date: 04-24-2007, 07:00 AM
Parent: #7
Quote: طيب أجاوبك أنا
تم تعيينه بقرار جمهورى من السيد رئيس الجمهورية.
|
ورئيس الجمهورية دا ذاتو العينو منو؟
المذيع الزبير اجدر بوزارة الزراعة من هذا الوزير.
|
Post: #13
Title: Re: كيف تم تعيين محمد الامين كباشي وزيرا للزراعة في السودان؟
Author: ود محجوب
Date: 04-25-2007, 02:21 PM
Parent: #8
Quote:
ورئيس الجمهورية دا ذاتو العينو منو؟
المذيع الزبير اجدر بوزارة الزراعة من هذا الوزير. |
أخى معاذ حيرتونا فعلا
رئيس الجمهورية جابا بضراعو
ويعين البعجبو
اها عندكم كلام تانى
|
Post: #9
Title: Re: كيف تم تعيين محمد الامين كباشي وزيرا للزراعة في السودان؟
Author: Alshafea Ibrahim
Date: 04-24-2007, 07:05 AM
Parent: #1
يا و د شيقوق
هذا آخر مسمار في نعش الزراعة ، يعني بعدها لا زراعة ولا وزارة، آخر مراحل التدرج في سلم الإنحدار ، مين كان يصدق أن تصبح أجمل بقاع السودان (بركات) بهذا المستوى الحاضر؟ نصف مليون فدان أخضر بالجزيرة الآن أصبحت أفدنة قليلة يزرعها أصحاب المقدرة في التمويل الذاتي لا حبا وطمعا في الزراعة والمحصول ، بل تقربا للسلطان للحصول على مكاسب سياسة رخيصة ؟ وداعا يا زراعة ومرحب بأي وزير ولو كان محمد الأمين كباشي لا فرق بينه وبين سابقه أو لاحقه
دمت
الشفيع
|
Post: #10
Title: Re: كيف تم تعيين محمد الامين كباشي وزيرا للزراعة في السودان؟
Author: Dr. Abdalla Siddig
Date: 04-25-2007, 05:46 AM
Parent: #9
من محاسن الصدف انني قرأت هذا الموضوع قبل الإستماع لإعادة الحلقة صباح اليوم.
وتعليقي علي الحلقة:
مادام هؤلاء هم من يقومون علي امر الزراعة في بلادنا فلا عجب ان تضرب المجاعة
بلادي كل سنه و يموت الناس جوعاً.
كم هي واهية تلك المبررات التي اوردها وزير الزراعة للفشل الزريع في الانتاج الزراعي.
وكم هو جاهل بامور وزارته.(هل يعقل ان لا يعرف وزير زراعه كم تمثل الميزانية المخصصة للزراعه بالنسبة
للميزانية العامة للدولة- عجب والله!!!!!!!!!!!!!!!!!!!!!!!!!!!!!!!!!!!!!!!!!)
و لا اتوقع ان نتقدم قيد انملة في المجال الزراعي اذا كان امثال هؤلاء هم من يديرون الشأن الزراعي
في السودان.
اللهم لا حول و لا قوة الا بك.
اللهم لا نسألك رد القضاء ولكن نسألك اللطف فيه
|
Post: #11
Title: Re: كيف تم تعيين محمد الامين كباشي وزيرا للزراعة في السودان؟
Author: عبده عبدا لحميد جاد الله
Date: 04-25-2007, 07:30 AM
Parent: #10
العزيز ود شيقوق
تحية طيبة
تابعت برنامج الخط الساخن حقيقة شيئ يدعو للآسف ،هذا الوزير يبدو بعيد جداًَ(كم سنة ضوئية) من وزارته غير مرتب في افكاره ما ملم بما يدور داخل اضابير الوزارة،لم يذكر أي خطة حالية او مستقبلية،على العموم الزراعة عليها الف سلام.
كسرة:
يا جماعة النفرة دي شنو؟الوزير برددها كثير يعني ذي الخطة الخمسية والعشرية وكلام الجغرافيا الزمان داك ،ولا زي اوهام الجماعة البكور ،يوم الخدمة...
|
Post: #12
Title: Re: كيف تم تعيين محمد الامين كباشي وزيرا للزراعة في السودان؟
Author: الطيب شيقوق
Date: 04-25-2007, 07:32 AM
Parent: #10
يا اخوانا كلكم هل يعقل وزير يسأل عن اهم مشروع زراعي في السودان ( مشروع الجزيرة ) وعن اسباب تدنى الانتاجية يجاوب بقوله ( والله لا ادري الاسباب) سبحان الله
وهل تصدق ان احد المتداخلين واعتقد هو نقابي ذكر ان احد المزارعين انتج 81 جوال ذرة وان الجباية اخذت 80 جوال والباقي ليهو جوال قال ليهم حرم تشيلهو دمعة اعلام .
اين قرارات رئيس الجمهورية باعفاء الزراعة من الجبايات ؟
|
Post: #14
Title: Re: كيف تم تعيين محمد الامين كباشي وزيرا للزراعة في السودان؟
Author: محمد الأمين موسى
Date: 04-25-2007, 03:41 PM
Parent: #12
الأخ الطيب وبقية الإخوة الكرام.. ليه كدة يا جماعة! إنتو عمركم ما شاهدتو برنامج الكاميرا الخفية؟؟
|
Post: #15
Title: Re: كيف تم تعيين محمد الامين كباشي وزيرا للزراعة في السودان؟
Author: abubakr
Date: 04-25-2007, 04:14 PM
Parent: #1
يا عرريب ودشيقوق انا كنت ناوي اسامحك واخليك تسرح وتمرح وتحت وتسطح كام يوم لكن ما اتخيلت انك كمان حتسرح وتسعل سعال زي دة ؟ كتكوتة بس ؟ شنو يعني وزير زراعة في بلد حتي القراصة بجيبو ليها قمح من استراليا ؟ .. سعوالاتك زي نهرك الجاف ..
|
Post: #16
Title: Re: كيف تم تعيين محمد الامين كباشي وزيرا للزراعة في السودان؟
Author: Ahmed al Qurashi
Date: 04-25-2007, 04:35 PM
Parent: #15
الاخ / الطيب شيقوق
انت البوديك تتابع برامج زى ديه شنو ؟ والغريبه يالطيب انت احسنت الظن فى هولاء الناس ديل يعنى عاوزهم يجيبوا ليك وزير بيعرف حاجه بالغت والله عديل .... كل الذين على دست الحكم من هذه العينة لا تستغرب يالطيب اخوى .
|
Post: #17
Title: Re: كيف تم تعيين محمد الامين كباشي وزيرا للزراعة في السودان؟
Author: فاروق حامد محمد
Date: 04-25-2007, 05:32 PM
Parent: #16
Quote: بصراحه شى يحير فى سر فى الموضوع دى ما مصارين
بيض بس فى شى تانى . |
ود المحرب ... تصدق أنا ذاتي قلت كده !!!!!!!
ــــــــــــــــ
ود شيقوق ..
تابعت البرنامج مثلك وقد أصابتني الدهشة حتى الرعشة!
من تسطح الكباشي !!!!!!! الذي يبدو أنه قد مرت عليه
مليون كراكة نمرة تلاتة حتى تسطح أفقيا وعاموديا وكانت
النتيجة جهلا بحجم مليون فدان غير قابلة للزراعة !!!!!
يا ود شيقوق "المغصة" ليس في الكباشي وانما في الكبش الذي
يحكم السودان منذ 18 "غاما" ....
خليك مع النسيبة وقوانين البورصة ولبن الجمال !!!!!
|
Post: #18
Title: Re: كيف تم تعيين محمد الامين كباشي وزيرا للزراعة في السودان؟
Author: Mamoun Ahmed
Date: 04-25-2007, 07:11 PM
Parent: #1
صدقوني كنت عايز انزل بوست
بنفي الفكره
لاني استغربت ان يكون وزير الزراعه بهذه العقليه
المذيع فاهم اكتر منو
وبدفرو دفير
ولمن يتكلم
الغفير ممكن يرد احسن منه
عجيب والله
|
Post: #19
Title: Re: كيف تم تعيين محمد الامين كباشي وزيرا للزراعة في السودان؟
Author: الطيب شيقوق
Date: 04-25-2007, 10:38 PM
Parent: #18
ابو بكر
ود الامين
فاروق
ود القرشى
اقول ليكم شنو يعني ؟
والله محتار
|
Post: #20
Title: Re: كيف تم تعيين محمد الامين كباشي وزيرا للزراعة في السودان؟
Author: فاروق حامد محمد
Date: 04-25-2007, 11:34 PM
Parent: #19
محتار في شنو (بلكنة شايقية)
الموضوع واااااااااضح جدا !!!!!
" هيك رئيس بدو هيك وزير "
|
Post: #21
Title: Re: كيف تم تعيين محمد الامين كباشي وزيرا للزراعة في السودان؟
Author: أحمد الشايقي
Date: 04-26-2007, 00:38 AM
Parent: #1
الاخ الأستاذ الطيب شيقوق,
قال علي نور شـاعـر المؤتـمـر,
كـل إمـرئ يحتـل في السـودان غـيـر مكـانـه
الرأي عنـد دخـيلـه والمـال عـنـد بخـيـلـه
والـسـيـف عـنـد جـبـانـه,
اعملوا حسابكم كلامكم دا بيضـمـن ترقيـة لسـعادة الوزيـر
أحـمـد الشـايقي
|
Post: #22
Title: Re: كيف تم تعيين محمد الامين كباشي وزيرا للزراعة في السودان؟
Author: الطيب شيقوق
Date: 04-26-2007, 05:22 AM
Parent: #21
Quote: محتار في شنو (بلكنة شايقية)
الموضوع واااااااااضح جدا !!!!!
" هيك رئيس بدو هيك وزير " |
الفارووووووووووق ابعد من بوستي ده اوع تسيسو لى .
الفاروق - سبحان الله - حضرت حلقة لسعادة السفير بشير البكري وكان من ضمن المشاركين على شمو و السفير عمر عبد الماجد .
يا الله كانت اروع حلقة . كانت ككتاب ممتع استلقيت على سريرك لقراءته وانساك نفسك كما نسى مقدم البرنامج البروفيسير على شمو ذاااااااااااااااااتو وبقية ضيوفه .
قارن وحياتك بين رجال في قامة البكري وهذا الوزير
|
Post: #23
Title: Re: كيف تم تعيين محمد الامين كباشي وزيرا للزراعة في السودان؟
Author: الطيب شيقوق
Date: 04-26-2007, 05:28 AM
Parent: #22
Quote: قال علي نور شـاعـر المؤتـمـر,
كـل إمـرئ يحتـل في السـودان غـيـر مكـانـه
الرأي عنـد دخـيلـه والمـال عـنـد بخـيـلـه
والـسـيـف عـنـد جـبـانـه,
اعملوا حسابكم كلامكم دا بيضـمـن ترقيـة لسـعادة الوزيـر |
استاذي الجميل / احمد الشايقي
عليك الله انسى الوزير ده ووريني رايك في الحلقة التلفزيونية التى استضيف فيها السفير بشير البكري . امان يا السودان ما فيك رجال . صحيح كما تفضلت -اخي احمد - كل امرئي يحتل في السودان غير مكانه .
|
|