رحلة العمر..و مشوار السنين

اسعدنى تماما ان يكون اختيار عنوان هذا البوست من قبل اسرة الاستاذة ممكونة فلها ولاسرتها الميمونة عاطر الثناء واجل التقدير.

بسم الله نبدأ :-

ملء السنابل تنحني بتواضع ... والفارغات رؤوسهن شوامخ

(تعتريني حالة من الانجذاب الى الوطن سائحاً في معيتكم في مستقبل ماضيه الذي استشرفته واعدته نبضاً في وجداني وقلبي وتصورا في ذهني وعقلي رؤية أسعد كثيراً أن أشاطركم حقوق ملكيتها وأعباء التفكر والتدبر فيها وتمثلها والصبر على غرسها وانتظار حصادها ... عِبئان لا يطيقهما إلا الرواد العائدين من (دور) المستقبل لقيادة ظعائنهم إليه ليشاركوا جميعا في تنمية أرضه وأهله الطيبين ليغسلوا عنهم أوضار العجز التي غشت وجه شعبنا الوضئ وتبعث فيه قدرته على التمام من جديد) الدكتور محمد يوسف ابو حريرة

(ولعل الاحتياج الدائم لعمر الطفوله وزمن الصبا والعمر والتجارب والمراحل تاخذ الانسان فى تجوال ملزم وتتشتت فى سماء الكون احاسيس الالفه والامان..وذلك الطهر البراءه...وذكريات الطفوله والدراسه لن تنمحى من خيال الذاكره ابدا..حتى تفاصيل الاشكال قد تغيب الاسماء لكن هنالك اسماء حفرت فى اخاديد الذاكره لن تنمحى..ويبدا الطواف الذى فى اجتراره يمنح دعشات تلك الانسام ويجدد خلايا الروح ويوصل مسافات العمر ليبقى ذلك الارتباط هو حلم الخيال الامانى والاحلام..وكل منا يريد ان يعود الى زمن الطفوله ورفقة الصبا عله يستطيع تعديل واصلاح مدى الرؤيا فى مستقبل عالم مضطرب..لان امان اللحظه وقتها كان قائما على احساس ذلك الامان فى البيت والحله والقريه والطريق والمدرسه ..وكان تلك رياح الزمن الجميل..) عصمت العالم

أعزائي / أهلنا الطيبون كانوا زمان بيعتقوا ليك بت عمك من تتأتى ( المتاتاة هى اول حركة للطفل على رجليه) بقولوا دى من الآن حقت فلان وتانى مافي حد بيقرب ليها وكانت بت عمك دى تحبس معاك الطير في البلدات وتطلع معاك في الحاحاية ( الحاحية لاهلنا الما بيعرفوها راكوبة صغيرة بيعملوها جوة البلاد بعد العيش يلبّن عشان يطلعوا فيها الوليدات والبنيات ويحاحو الطير من العيش اما بالصياح او بالفرطاق والفرطاق بيعملوهو من الزعف يشبه سوط العنج عندما تضربه بيعمل صوت زى الصاقعة بهوّب الطير) وعادة تمشى انت ومعاك اخواتك وبنات عمك حتى المعتوقة ليك لمحاحات الطير وبنكون شايلين لينا مخلاية فيها كسرة حامضة وحلوة معاها زيت وبصلات بس ودى في الخلاء الحاجات دى احلى من البيتزا والكنتاكي ليها طعم لذيذ يا اهلي . مرات أنا بشيل معاى كراس المذاكرة بحب دائما اشيل الاناشيد بتاعة الجغرافيا البتقول :-

في القولد التقيت بالصديّق انعم به من فضل صديق
ووكذلك - من هناك قمت للجفيل ذات الهشاب الناضر الجميل
وطوالى انا بنشد وصوتى حلووو زمان حتى كنت بلحن الأناشيد لاخواني في المدرسة ولا انسى أن اجمل لحن قدمته هو لانشودة ( طائر يشدو على فنن .....)

كنت بحب سورة الفجر وليال عشر والضحى والليل إذا سجى وحفظت سورة الإنسان ذات الإيقاع الجميل قبل أن تدرس و كنت أرتل بصوت عالي وأنا في الحاحاية واخواتي يتلون خلفي و كنّ يحفظن القران بدون مدرسة .

وا حسرة الجيل الذي لم يدرس من تلك المناهج الحلوة . كنا نترنم بالاناشيد في الخلاء بصوت عالي وأخواتي وبنت عمي( معتوقتي) بيشيلوا معاى كورس وهم في الحاحاية والصوت بهوّب الطير وبيطير من الزراعة بيمشى بعيد ويعود تاني تاني .

بعد الدنيا تبقى عصر بنمشى نجمع العنكوليب والتبش والبامية ونشيلها في المخالي ومرات نلقى لينا حميضات قايمات بروس عشان نفرّح الاطفال و يتلقونا مــن طرف الحلة مبسوطين وفرحانين . بس الاطفال كانوا ما بطلعوا من طرف الحلـــــــــــة بعيد لانهم سامعين في الدماسات ( الزمن بين المغرب والعشاء) السوابح والشواطين بيطلعوا .
بطرف حلتنا في عرديبة كبيره من زمن جدودنا الزمااااااااااااااان بسموها المدقة عشان بالليل قالوا بسمعوا الشواطين فيها بيدقوا حاجة زى البن والعرديبة دى انا لحدى هسه ما بقدر امشى تحتها بالليل . وقت الصبان ( انقطاع المطر) ناس حلتنا بتجمعوا بالنهار تحت ظل العرديبة دى وبيتلوا القران وبسوا كنيش كنيش ( بليلة عيش) وبيعملوها كيمان كيمان للاطفال عشان ربنا يجيب المطر.

اها يا اخواني انا كبرت شوية وشامة بت عمى كبرت شوية . انا بقيت في رابعة اولية في السلم التعليمي الزمان ( يا حليل زمن رابعة اولية زمان الخريج منها افهم من حامل شهادة الدكتوراة اليوم وخطاطين الواحد اكان كتب ليك سطر تعاين ليهو يمين وشمال من جماله) . فزت في الامتحان وقالوا بودونى مدينة القويسي (ده اسم مدينة الدندر القديم الموجود الان على خريطة العالم وبتلقوهو في القوقل ايرس حاليا ) وكمان قالوا بسكنوني الداخلية مع اولاد البندر النضاف كانت الداخلية بتجمع اهلنا اولاد قبيلة رفاعة ومعاهم اولاد السوكى وكركوج بلد الشريف محمد الامين وكساب السكن فيها زمان الشاعر اسماعيل حسن ايام كان بيعمل في مشاريع ناس ابو العلاء عندنا هناك . اتحزمت واتلزمت وابوى حاج مضوى اكان عنده عربيه تيمس . قال للسواق دور اها ركبنا انا وابوى وعمى ابو شامة – معتوقتي- بقدام ودورنا . العربية أكان فيها لحافي الجديد وملاية جديدة واشتروا لى اول مرة في حياتي صباعين معجون ابو وردة وزمان كنا في الحلة بنسوك بالشاو والاراك مسواك الرسول (ص) . المسافة كانت كلها عشرة كيلو من حلتنا البردانة لمدينة القويسى وكانت عيون الاهل تزرف الدموع على فراقي وامى اسبوع ما أكلت وخالاتى وعماتي واقفات جنب العربيه يبكن ويعصرن لى بحنية الريال و الشلن في جيوبي والحبوبات الكنت بنــوم معاهن بهبابي الصغير المفروش بالبرش الدقة برضو بيبكن لانى كنت اكثر الاطفال سماعا لحجاويهن واكثرهم رعبا من بعض احاجيهن متل ود النمير وود ام بعلو والدودو وكنت بترسل ليهن في الهجعة للدكان اجيب ليهن زيت المسوحة وجاز اللمبة والكبريته .

السواق زمان كان نضيف ومهندم زى مدير الجامعة اليوم وما بجالس الا الموظفين الكبار . اها دور وانا بعاين ليهو بدور كيف وبعشق كيف وبفرمل كيف واتمنيت لو بقيت سواق كمان . السائق زمان كان ما بدوهو الرخصة الا يشتغل مساعد عربيه عشرة سنوات حتى يتعلم يفك الماكينة ويحل ويربط اى جهاز في العربية وكمان يتعلم كيف يجامل الناس . رخصنا زمان في الخارج ببدلوها طوالى بدون تردد .

اها وصلنا المدينة وقالوا يفطرونى ويودونى الداخلية فطرنا زيييييييييييييين ومشينا على الداخلية . بوابة المدرسة كبيرة ومحروسة وما بخلوك تدخل الا بعد إبراز شهادتك الدخلت بيها . طلعت الشهادة والحارس عاين فيها وعاين لى وعاين في ابوى وعمى وابتسم وقال اتفضلوا معاى . تبعناهو ودانا مكتب المسجل (زمان المدارس الوسطى فيها مسجلين زى الجامعات هسه )

المسجل قرا الاسم ولقيناهو عنده قوائم لتوزيع الطلاب على الداخليات التلاته (الدندر والرهد وعطبرة) ولقيت نفسي في داخلية الرهد و اى داخلية كان عندها رئيس وهو عادة اكبر طالب فيها . المسجل نادى رئيس الداخلية وقال ليهو استلم عندك الطالب ده وقال لابوى وعمى انتظروا هنا ولدكم بيمشى وبيجيكم . مشيت الداخلية و كان في داخلية كل حاجة جاهزة لحافي رجعوهو لاهلي وادونى سرير سمّح مفروش ومعاهو بطانية انجليزية من الصوف ودولاب ملابس ومكتبه . رجعت لابوى وعمى وودعتهم وانا ابكى (كلها عشرة كيلو)

كان من ضمن الطلاب الذين تم قبولهم معى من اهلي اخي ابن عمي دكتور البدرى بابكر احمد (امبلي) والذى لديه مسيرة حياته الخاصة من البادية الى لندن حيث يعمل الان طبيبا للنساء والتوليد ببريطانيا . كنا كابناء قرية واحدة نمثل مجموعة تتميز بثقافة فريدة داخل المسرح المدرسي . كنا نحاول ان ننأى بانفسنا عن ابناء المدينة الذين يقيمون معنا في الداخليات وكان لدينا راى في طريقة حديثهم وملبسهم وسلوكهم . كان هاجسنا الوحيد ان نكون في غرفة واحدة وقد كانت بداية المواجهة مع ادارة الداخلية هو كيفية ايجاد غرفة تجمعنا لوحدنا .

لم تبدا الدراسة وقتها بصورة منتظمة في بداية العام الجديد لان الحشائش كانت تغطى مساحة كبيرة جدا من حرم المدرسة وقد جرت العادة علـــى ان تستنفر طاقات الطلاب للنظافة في بداية العام وكان لايسمح لاى طالب ان يخرج من سور الداخليات الا بعد الحصول على اذن من الرئيس العام للداخليات ولفترة زمنية تحدد من قبل الرئيس . كان همنا في الايام الاولى هو الذهاب الى السوق لشراء ملابسنا وكانت المتعة في الخروج تتمثل في امكانية مقابلة بعض من الاهل الذين ياتون للسوق اما للتسوق او لعلاج مريض في مستشفى المدينة او للحصول على عمال للعمل في مشاريع اهلنا الزراعية ومجموعة من اهلنا تاتي المدينة لشربة عبار او عبارين من المريسة وعادة تعود هذه المجموعة الأخيرة الى القرية في العصريات وكنا نجلس تحت سنطة ظليلة في لحظة عودتهم الى القرية مرورا بمدرستنا لنشاهد هولاء وهم عائدون يترنحون يمينا ويسارا ونجد فيهم ، رغم انهم هكذا ، حنان الأهل وربما يتبدد جزء من مآسي الغربة بمشاهدتهم وربما يكونوا وقتئذ مادة للحديث عنهم إلى أن يتوارون عن أنظارنا .
كنا ننظر لعصافير الخريف تشقشق على اغصان الشجر ونلومها في البقاء هنا في المدينة طالما لديها الحرية والحركة للذهاب الى الريف .

في الساعة الثامنة مساء يوم الجمعة الموافق للأول من يوليو لعام 1969 م رن جرس الصفرة إيذانا بحلول ساعة وجبة العشاء . كنا وقتئذ لابسين( كاجوال) عراقي ساكوبيس شفاف بلون ابيض ناصع و سراويل طويلة وطواقي مطرزة باليد . كان أبناء المدينة يلبسون الأردية والقمصان الجميلة وأحيانا بناطلين مصنوعة من مادة الترلين الأملس خالص . كان هاجسنا هو كيف نتعلم لبس الأردية ورباط الأحزمة بل حتى كيف نكشف عن ساقينا .

كانت وجبة العشاء دسمة للغاية فيها الخبز وفيها العدس وفيها الفول وفيها الجبنة وفيها الطحنية والمربة . حسبناه يوما لاستضافتنا ولكننا أدركنا أخيرا أن الحال ستبقى هكذا . كانت بالفعل لحظة فرحة يبدد سعدها تارة العودة بذاكرتنا للريف وللوالد و الأم كيف لهما ان يجدا من ينش أغنامهما من الصباح الى المدرسيب ( محل تجمع أغنام القرية ) من سيرسلا صباحا لشراء السكر والبن ومن سيجدا ليحمل الماء على ظهر الدابة إلى عمال الزراعة ومن يحمل الكورة (نعومة) وهى مليانه بالسمن النقي لشيخ الطريقة ليعود بها مليانة محاية تكف العين وتدفع الاذى وتفتح الذهن ومن يلحظ ناقتهم الولودة وهى ترعي باطراف القرية ومن يسجل لهم اسماء النساء اللائي يشترين الزعف- تجارتهم الرئيسية منذ اكثر من خمسين عاما وحتى يومنا هذا – ولا يدفعن كل أو بعضا من القيمة ومن ومن ...
بعد العشاء مباشرة عدنا لعنابرنا التي كان تضاء بالفوانيس وقتذاك . كانت حركتنا ليلا مابين العنابر والحمامات لكثرة الثعابين في ذلك الموسم (الدرت) فالارض طينية سوداء عادة يتصدع صطحها محدثا شروخا دافئة تمثل بيئة ممتعة للثعابين لا سيما الوشاش وابي درقة وغيرها من الحيوانات السامة ولهذا كنا نلزم اسرتنا في انتظار الساعة العاشرة مساء حيث يرن جرس النوم ليحرم بعد ذلك اى طالب من التحرك من سريرة الى اى موقع اخر . انتابنا احساس بكراهية للمدرسة وللمدنية وللتمدن وكان كل همنا محاولة الهروب ( الفزيز) من هذه البيئة لنعود لحياتنا الطبيعية في الريف حيث لا قيود على الحركة ولا تحديد لساعة النوم . تعودنا في الريف ان نسهر مع اخواننا نلعب هو لبب وشليل وين راح والرمة الحباسة دقوها في راسها لنعود بعد ذلك للنوم مع حبوباتنا في عناقريب القد الوهيطة .

اشرقت شمسنا رتبنا امورنا و لبسنا الاردية المصنوعة من الكاكي التخين والاقمصة الناصعة البياض كان منظرا ننظر فيه بكثير الحياء والكثير من الالم لكنه داء المدنية الذى صار شرا لابد منه .

رن جرس الطابور ليصطف جميعنا في اربعة اشرطة ترتدى زي واحد الرداء والقميص . كان الطلاب في قمة الانضباط . كان يتوسط الطلاب استاذ طويل القامة يرتدى اجمل الملابس ربما يكون اكبر شخصية شهدتها في حياتي وقتئذ.

بعد التمام انصرفنا بهدوء تام الى الى قاعات الدراسة . كانت مكتملة البنيات . لأي منا كرسيه ودرجه وما بينها مساحات مهولة . كنا نتلفت يمين وشمال داخل القاعة فوجدنا انفسنا محاطين بابناء البندر .

دخل علينا مدير المدرسة احسسنا فية الهيبة والجبروت . حيا الجميع وبدأ حديثه بتقديم خلفية عن المدرسة . احسست فيه شموخا وهو يتحدث عن انجازاتها في السنين الماضية كانت تضاهي كاب الجداد ولم تخرج قط عن قائمة العشر الاوائل من مدارس السودان كافة . حكى لنا كيفية انشائها وعلمنا ان للامبراطور هيلاسلاسي دوره المقدر في تاسيسها قال لنا المدير:

كان هيلاسلاسى من حكماء القارة كان متواضعا يحب مخالطة العامة والبسطاء وكان كثيرا ما يزور الدندر فى رحلاته للصيد ..وفى احدى زياراته للدندر كان مسار موكبه - بالشارع الوحيد بالمدينة - فى طريقه للمجلس الريفى ومن ثم لمنزل الناظر يوسف العجب ويمر الموكب بالمسجد الذى كان مبنيا من القش فاصدر ضابط المجلس توجيهاته بازالة المسجد واعادة بنائه بعد انتهاء الزيارة ، واظن ان الضابط هو الريح الامين، فغضب عبد الماجد فرج - من مواطنى الدندر -غضبة مضرية واستل المسلول مدافعا عن حرمة المسجد وتمت تسوية الموضوع وذلك بان يقوم المجلس بتغطية كل المسجد بقماش الدمورية وزن عشرة واعطت المسجد شكل قبة رائعة الجمال ومنذ تلك اللحظة بدا التنفيذ فى بناء المسجد بالمواد الثابتة . لقد تمت الدعوة لجميع قبائل رفاعة لتناول الغداء مع جلالة الامبراطور فى قرية البردانة (قرية الطيب شيقوق) وكان يوما مشهودا وتبرعت قبائل رفاعة بعدد مائة بعير لجلالته . تاثر الامبراطور تاثيرا كبيرا بهذا التبرع وطلب من الناظر يوسف العجب ان يوافيه باحتياجات المنطقة العاجلة فكان رد الناظر باننا فى حاجة الى مدرسة ومستشفى وتبرع هيلاسلاسى بالمئة ناقة واكمل عليها ما تبقى من اموال وكانت بحق اعظم هدية للمنطقة لم نجدها حتى من حكامنا الوطنيين . والزائر لمدينة الدندر اليوم وفى شمال المدينة وشمال السكة حديد مباشرة يشاهد مبنى المدرسة الوسطى ومبنى المستشفى وكانهما ديدبانات واقفة لحراسة ذلك السهل الخالى من التخوم والمعالم..
لم تكن الثنائية بين المدرسة الوسطى والمستشفي عبثا بالنسبة لي . فالمستشفي هي الوحيدة وما زالت في منطقة لا تقل مساحتها عن دولة الكويت . كانت المستشفى تجاور المدرسة الوسطى وتطل عليها من جهة الشرق والإنداية من السافل لتكتمل أضلاع المثلث بثالثة الاسافي وكان الشارع الرئيسى مملوك على الشيوع بين رواد المستشفي والانداية وعادة يكون دائم الحركة حتى ساعات الصباح و يمر به القاصدون الدواء والمتشوقون للمريسة والارزونا والعسلية ومستلزماتها المرخص بها ....... قبل قوانين سبتمبر 1983. ثمة فئة أخرى من الرومانسيين والرومانسيات الذين يجدون في حرم المستشفى مساحة ارحب للتلاقي والتلاطف فأما أن يكونوا قد رتبوا للتلاقي هنا سلفا أو كان اللقاء مجرد صدفة ، في رحابها ، تصلح أن تكون بادرة لعلاقة قد تكون مستدامة أيا كان الشكل المستدام الذي يتراضى عليه الطرفان ......
كنا نذهب للمدرسة عند الصباح وبعد انتهاء الحصص نعجل الى الصفرة لما بها من طعام لم نجده عند اهلنا الا في مناسبات الاعراس وربما احيانا في السمايات . لم نكن ندري ان حليب البقرة المرئي وسمنة البخسة ( بضم الباء) التى تصنعها امهاتنا ، ولحمة عبد الجليل ، والدواجن التي تلتقط من حب الذرة والسمسم والدخن المشتته في حيشاننا تحتوى على مادة غذائية اجود واصح من الجبنة الهولندية والمربة البلجيكية وما كنا ندري ان وزارة التربية والتعليم بعد التشاور مع وزارة الصحة قد اختارت اغلب اغذية الداخليات لما تحتوية تلك الاغذية من مواد تقلل من عنفوان الرجولة .....

بعد تناول وجبة الغداء يعود اولاد المدينة عادة الى عنابرهم للراحة اما نحن فنذهب للجلوس تحت ظل السنطة المجاور لشارع المستشفي علنا نقابل او نشاهد اى من اهلنا قادما من المستشفى او الانداية . كان الفاصل بين الشارع والمدرسة سور من السلك الشائك ولذا كنا نلحظ حركة المارة ونميز ملامحمهم . وكنا لا نبادر بالسلام على اى عابر الا بعد ان يبادر هو بالاقتراب من السور ومناداتنا وذلك لاننا نعلم بان الطالب وهو مصنف هكذا – ومهما كان الوضع المالي لاسرته - يعنى طالب العلم الذىمن واجب اهله ان يجودوا عليه بعطاياهم عله يتخرج ويرد الجميل في الوقت المناسب .

وقد لاحظنا ان القادمين من الانداية يتميزون بالسخاء الينا اكثر من غيرهم و ادركنا ايضا ان ذلك لم يكن لعدم اتزان في التصرف وانما لان الحياة علمتنا ان كرم وشهامة ومروءة هولاء قد تصل الى حد تنكيس الراية او قلب الصحن ( تنكيس الراية كناية على الجود الفائت حده لدرجة استحواذ كل مافي الانداية والتكرم به لكل من وطأت قدماه تلك البقعة) ( وقلب الصحن كناية على رفض ابي العريس النقطة والنقطة هى الخته في كشف العرس) لقد كانت مجالس البهجة اكثر ثراءا بالادب والشعر ولا غرو فاغلب من صنعوا تاريخنا الادبي والثقافي والفنى قد تشكلوا في تلك المجالس وصاروا اسماءا في حياتنا .

كان الفنان زيدان ابراهيم في اوج سمعته الفنية لا يشدو الا لاسر الراسمالية الوطنية وقتذاك والتي صارت اليوم اثرا بعد عين امثال ابي العلاء وخليل عثمان ومحمد احمد ملاح و وعبد ربه في بورتسودان والنفيدى وهو وقليلون من الذين لم يهزهم ريح التغلبات السياسية ربما لان لديهم اجهزه للانذار المبكر .....

لقدر درجت ادارة مدرسة الدندر الوسطى على اقامة احتفالات لاستقبال الطلاب الجدد على خشبة المسرح وكان لديها من فائض الاموال المخصصة لها ما يكفي لتغطية نفقات دعوة كبار الفنانين السودانيين من الخرطوم الى الدندر . ولا ننسى ان فاتورة الفنان القادم الينا تقدر بمقدار المسافة وما اذا كان الطريق معبدا ام ترابي . وحتى ان كان ترابي فان موسم الرحلة مهم جدا في زيادة او تخفيض تلك المصاريف . فالطريق الينا من الخرطوم تزيد وعورته في اعقاب موسم الخريف مباشرة لكثرة المجاري التى يسببها اثار الجمال او التراكترات ابان موسم الامطار . وليكون الدندر جاذبا لهولاء الفنانين فقد كان الاغراء الذي يقدم من قبل المدرسة هو ، بالاضافة الى المبلغ المهول المتفق حوله ، زيارة حظيرة الدندر التي تعتبر الاكبر من نوعها في العالم من حيث المساحة وطبيعة الحيوان البرى المتواجد آنئذ .

تمت دعوة وجهاء المدينة لحضور ذلك اليوم التشريفي وبالطبع فان المقاعد الامامية للحفل تخصص للناظر يوسف العجب ناظر عموم قبيلة رفاعة الشرق والمقربين اليه الذين اعتاد التشاور معهم في كل كبيرة وصغيرة امثال الحاج محمد عبد الرحيم والحاج فضل الله والعمده حجر جد الاستاذ احمد حماد ادريس الذى يتواصل معنا على دوام بكتاباته عبر هذا المنبر والحا ج الطريفي من قرية نور الجليل وهذا الاخير هو جد الشهيدة التاية ابو عاقلة الطريفي التى اقتالتها رصاصة الامن الاثمة بجامعة الخرطوم في عام 1991 .

استهل الحفل بكلمة من ناظر المدرسة مرحبا فيها بناظر القبيله ورفاقه وجميع الحضور ويكون خطابه بمثابة تقرير سنوى عن انجازات المدرسة خلال العام المنصرم . بعد انتهاء كلمة الناظر تمنح الفرصة لناظر القبيلة ليحيي فيها ناظر المدرسة سليمان محمد احمد المنصور رحمه الله وبقية المعلمين وجميع الحضور وبعد انتهاء كلمة الناظر يغادر الناظر ورفاقه الحفل دون الانتظار لسماع الاغاني ولانهم يعتقدون ان مشهادة الفنان وهو يتمايل تقلل من شانهم .

اعلن المايكرفون بداية الغناء وتقدمت فرقـــة الاوركسترا واخذت تعزف اغنية باب الريده انسد واكثر ما اعجبني فيها المقطع البيقول ( تمر ايام وتتعدى بالصورة الرائعة التي يطوع فيها زيدان صوته) ويقيني ان اغلب ابناء ذلك الجيل تشجيهم هذه الاغنية وتعود بذاكرتهم الى اجمل محطات مسيرة حياتهم .

بعد ذلك ظهر الفنان الشاب الانيق زيدان والذى يوحي لك شكله وتوحي اليك هندمته بانه فنان بكل ما تحمل هذه الكلمة من معنى وقد كان مبتهجا وكانه في دمشق وقاصرينا اعجبه الحضور الذى كان يتمنى ان يشاهد فنانا يسمع صوته على الدوام في الاذاعة ولكن لم يراه الا في هذا الحفل . انحنى زيدان محييا جمهوره وكان التصفيق لا التهليل !! يهز جنبات المدرسة الاربعة .

كنا نحن ابناء الريف اكثر جسارة من ابناء المدينة في اقتحام المواقع الامامية من المسرح بعد ان انصرف الوجهاء وناظر المدرسة . اخذ ابناء المدينة يتمايلون مع الاغنية وهم في كراسيهم وكنا نلحظ ذلك باستغراب . كان طلاب الصف الرابع اكثر انضباطا والصف الثاني والثالث اكثر تهريجا .

بدأ الطلاب الصعود بلا حياء الى حلبة الرقص وكان ابناء السوكى وسنار واقارب المعلمين من الطلاب - الاكثر تمدنا - هم الاكثر ابداعا في فنونه خاصة رقصة رجفة الكتف ( الحت) وكان بعض من الجالسين يصرخون في الراقصين يلا ( حتو ) وحتو تعنى زمان (زيد من ايقاعك الرقصى) ونحن نعاين ساى مبسوطين لكن !!!!! لاننا شعرنا باننا قد بدانا نُحاصر بمفاهيم المدينة .

انتهى الحفل الجميل ولا ندرى كيف الترتيب لراحة الفنان لينام هادئا من كثرة الباعوض هناك الذى لم تق منه حتى الناموسيات لاسيما وان الفنان المبتهج !! يحتاج لاكثر من طلعة للحمام ليلا.


لم يكن ناظر قبيلة رفاعة – يوسف العجب - يولي اهتماما بزيارة اى فنان لمدينة الدندر شانه في ذلك شان بقية زعماء الادارة الاهلية في السودان . كانوا يهتمون بزيارة الروؤساء والسياسين ويصرفون على استضافتهم الغالي والنفيث وينادون لاستقبالهم عمد ومشايخ ووجهاء المنقطة . وكان اكثر العمد نفوذا وقتذاك العمدة محمد بشير ابو جن والعمدة الجعفري عمد قبيلة الحمدة والعمدة حجر عمدة قبيلة القواسمة والعمدة محمد الامين الزلغم عمدة الحلاويين . وكان من الشيوخ الشيخ المقبول و الشيخ عبد الغنى شيقوق شيخ قرية البردانه التى تعتبر اكبر قرى منطقة الدندر ويسكنها ما لا يقل عن 8 الف نسمه ينتمون لجد واحد ولحزب سياسي واحد هو الاتحادي الديموقراطى ويعرف عن هولاء التطرف في مناهضتهم لنظام الادراة الاهلية ويعود هذا الى ارتفاع عدد الخريجين فيها . من هولاء الخريجين دكتور امبلي عبد الله عجب نائب والى ولاية سنار سابقا ومولانا امبلي بابكر احمد رئيس الجهاز القضائي لولاية سنار حاليا ودكتور طه امبلي اختصاصي النساء والتوليد والاستاذ بجامعة امدرمان الاسلامية والباشمهندس ابراهيم احمد البشير شيقوق ( ابراهيم شخصية) ودكتور البدري بابكر الذى يعمل طبيبا ببريطانيا حاليا . يشتهر اهل هذه القرية بالملاحة وسرعة البديهة وتحمّل الشدائد اذ يعمل عدد لا يستهان به من شبابها الذين لم يجدوا حظا في التعليم في الزراعة في موسم الخريف والطوب على شاطي نهر الدندر وكذلك الخروج في مجموعات للعمل في الفحم في منطقة الدماذين لانعدام غابات الطلح والهجليج في منطقتهم .

اما الوجهاء الذين اعتاد الناظر دعوتهم لاستقبال الرؤساء فهم المرحوم مبارك عبد القادر الخبير رجل البر والاحسان وهو رجل حاضر في ذاكرتي بالكثير من المواقف الرائعة . يحضرني ان قاضى المديرية زار مدينة الدندر للوقوف على تشكيل المحكمة الشعبية بالدندر وقد ورد اسم المرحوم مبارك عبد القادر الخبير من ضمن المرشحين لعضوية المحكمة وقد حاول أن يناي بنفسه عن عمل القضاء لانه يعتقد ان ( قاضيان في النار وقاض في الجنه ) وفي وقوله (ص) (لو علمتم ما في القضاء لما قضيتم في بعرة ) . و بعد محاولات مضنية قبل العم مبارك ، على مضض ، ذلك التكليف .

كان القانون الجنائي السوداني المطبق وقتها هو قانون 1925م . ووفقا لاحكام ذلك القانون فان المواقعة الجنسية بين الرجل والمراة الراضيين البالغين وغير المتزوجين لا تعد جريمة ولا يحاسب عليها قانون الا اذا كانت ماسة للحياء العام .

رتب العم مبارك جميع اوراقه ليجلس على كرسي القضاء وكان يظن ، من فرط عفته وبراءته ، ان القضايا التي تنظرها المحكمه هي قضايا نزاعات الاراضى والسرقات والتلف والمشاجرات . لقد نادى حاجب المحكمة على اطراف اول قضية تعرض على العم مبارك الخبير وقد كانت الشاكية امراة والمتهم رجل . وعادة تبدا المحكمة بسؤال الشاكية لعرض قضيتها . ادعت الشاكية انه في يوم كذا حضر اليها المتهم وطلبها في نفسها مقابل مبلغ طراده ( 25 قرش) وبعد الانتهاء طالبته بالمبلغ الا انه تمنع عن السداد . احتار العم مبارك من طبيعة الشكوى وخر ساجدا على طاولة المحكمة واصابعه في اذنيه ولملم جميع اوراقه وغادر المحكمة بلا عودة .

كان الحاج محمد عبد الرحيم لحكمته وادبه ورزانته هو مستشار ناظر القبيلة . يحكى عنه انه عندما قرر النميري الغاء نظام الادارة الاهلية واقالة زعماء القبائل من مناصبهم ان قال للناظر لا تكترث ، سيدي ، لهذا القرار فانت كالوادى ان امطرت السماء وسالت ماؤه فهو وادي وان امسكت السماء ماءها ولم تمطر فهو ايضا هكذا.

كان عمنا يوسف كسلا - طيب الله ثراه - القطب الاتحادي الديموقراطى - اكثر مواطنى الدندر شراسه في مواجه الناظر يوسف العجب غير ان الاخير كان يحبه ويحرص على دعوته في كل المناسبات . والراي عندى هو ان زعماء القبائل هم اكثر حكمة ودبلوماسية مع من يجاهرون بمواجهتهم ومناصحتهم .

مضت عشرون يوما ونحن على عامنا الدراسي وكان اليوم العشرون يوم خميس وهو اول يوم يسمح لنا فيه الخروج لقضاء عطلة نهاية الاسبوع مع اهلنا بعد ان كان الاسبوعان الماضيان من حظ طلاب داخليتي الدندر وعطبرة . كانت تغمرنا الفرحة ونحن نرتب لزيارة اهلنا الذين يقيمون على مسافة عشرة كيلو فقط من مدينة القويسى . كنا اكثر حرصا على عدم اضاعة ثانية في المدينة من الساعات المخصصة لنا لقضائها مع اهلنا في الريف . لم نجد عربة لتقلنا الى اهلنا ولم يكن في وسعنا الانتظار فقررنا السفر على رجلينا بشارع التقاطع وهو اقصر شارع بين المدينة والقرية عصي على العربات لتقاطعه مع نهر الدندر في اكثر من منعطف . وقد كان توقيتنا مناسبا لان مياه نهر الدندر التى تنحدر من الهضبة الاثيوبية كانت وقتئذ داخل حظيرة الدندر على بعد 120 كيلو من القرية وربما يستغرق اسبوعا يمر خلاله بقري الدندر الواقعة على ضفته الشرقية و هذه القري ابقرة ونور الجليل ( قرية الشهيدة التاية ابو عاقلة الطريفي) وام عقرب وود التاي ودبركي والملاسي وام ضهير والتكمبري والدقاق وود دودة وحلة فايدة وود ابو تفه وام دمور والتكينة و عمارة مشايخ الابيضاب حيث القطب الديني الذى يسلك عليهم اهلنا الطريقة القادرية وهي اى العمارة هي البقعة المباركة التى يلتقي في مسيدها جميع سكان هذه القري ايام الاعياد . وقرية ود منصور وحيواء -حيث يوجد اول كبري يربط بين الشرق والغرب -ومنها مدينة الدندر .

اما قرى الدندر الغربية التى يمر عبرها نهر الدندر فهي ابقرة غرب والشبعانة وعبد البنات ودرابة وبيضاء وام نمل وابو هشيم ( وقد كانت خدمات التلفون تصل لهذه القرية من اوائل الخمسينات ) و ابو البنات وحلة بلة وكامراب وخميسة وود بابو ونجم الدين وعمارة ود الصديق وكسيد وكاكوم (دى فيها فلاتى كارب بيكتب للنسوان عشان ما يعرسوا فيهن تاني وانا من ضحاياه ) وقرية اللويسة والبردانة (ام القرى) ثم قرية التكينة ومنها مدينة الدندر .

يخرج مواطنو هذه القري عادة لمشاهدة مياه نهر الدندر وهى منحدرة في طريقها لتلتقي بمياه النيل الازرق في قرية الربوة شرق واد مدنى . وعادة يقل تفاؤل اهل اى قرية ، بخريف وافر الخيرات، عندما تاتيهم مياهه نهارا وهذا سبر توارثوه من الاجداد .

هنالك قرى تابعة لنظارة الدندر ولكنها تقع شمال المدينة اشهرها جهة غرب نهر - ام عرديب والسريفة ( قرية الاستاذ احمد حماد ادريس) والقلة وجليدات واخرى شرقه اشهرها ام حنطور وحدية وطابت حلة الشيخ السماني .

اغلب سكان هذه القري ينتمون الى قبائل رفاعة (القواسمة والحمدة والحلاويين والغلاتيين والعقليين) بالاضافة الى الكواهلة والصواردة والضبانية الذين ينتمى اليهم الشيخ محمود ود زائد الذى تنسب اليه (تومات ود زائد) واحسب انهماهجليجتان معمرتان موجودتان في منطقة شمال شرق القضارف .

خرجنا من الداخلية و لا بد لنا من دخول سوق المدينة لشراء بعض هدايا الاطفال مما وفرناه من الخمس وعشرين قرشا – مصاريفنا لثلاث اسابيع . كنا اكثر ميولا لشراء حلاوة (بلي) لانها تباع بكميات مهولة وباقل تكلفة وترضى اكبر عدد من الاطفال الذين يستقبلونا فرحين بعودتنا اليهم . كان كبارنا من النساء والرجال لا يرجون منا الا عودتنا سالمين واسعادنا لاطفالهم بحلاوة بلي . فمن اعطيت ابنه حبة منها وهرول فرحا لابلاغه بها فقد نلت رضاه بل ربما رضاء كل افراد الاسرة .

بعد شراء حاجياتنا تحركنا راجلين الى القرية . كان الطريق عبارة عن دوداب تصله اشعة الشمس فاترة وربما لا تصله احيانا لانه محمي منها بالاشجار الضخمة التي تتصافح هاماتها في رؤسنا و نمشى فيه وكاننا نمشى داخل الانفاق . كنا نجد حبات اللالوب والنبق متناثرة على الطريق ناكل منها الجزء الذى لم تكن عضته القرود والكاكي (ابلانج) . وما كنا نابه لتجميع شيئ من هذه الثمار لاطفال اهلنا حتى لا نبدد عشمهم في اسعادنا نحن القادمين من المدينة بخيراتهم من هذه الثمار !!


عبرنا نهر الدندر بعد ان قطعنا حوالى الاربعة كيلو مترات من المدينة ولا بد ان نعبره مرة اخري قبالة المشرع الذى كان يرد فيه اهلنا . كانت المسافة بين المشرعين حوالى الست كيلو مترات مشيناها في اقل من ثلاثين دقيقة . وصلنا مشرع القرية الذي كان يلامس خصرها من الجهة الغربية . كانت لنا الكثير من الذكريات والخواطر هنا في هذا المشرع . كنا اكثر تشوقا لسماع جرس الحصة الاخيرة في المدرسة لنخرج منها بكثير من الضجيج . لم يكن هذا الضجيج لدوابنا عبثا لانها تدرك تماما ان وقت سقائها في المشرع قد حان . كنا نخرج من المدرسة منشدين قصائد اليوم وكانت اجمل الاناشيد التى خلدت في ذاكرتي :
بلادى بلادى فداك دمى
وهبت حياتي فدى فاسلمي
غرامك اول ما في الفؤاد
ونجواك اخر ما في دمي
ساحلف باسمك ما قد حييت
تعيش بلادي ويحيي الوطن
وكذلك انشودة ( علمي انت رجائي ......) وقد كنت اكثر ابداعا في اداء مقاطعها التي تقول (لونك الاخضر زرع لونك الاصفر ارض لون الازرق ماء) .

وبعد ان نصل الى بيوتنا نعلق حقائبنا على المسامير المخصصة لها على امينة المنزل ، ان كان من الطوب او الجالوص او شعبة القطية ان كان البيت من النال . كان يمكن ان تقرأ من حجم وشكل الحقيبة الى اي مرحلة دراسية ينتمى التلميذ ، فان كانت مليئة نافخة كراساتها جميع الزوايا وبها براقع من الحبر الازرق فهذا دليل على ان التلميذ في ثالثة اورابعة ويمكن ان يعهد اليه كتابة الرسائل المنمقة كما ويمكن اجلاسه في عنقريب قعدات العرس جوار العريس لتسجيل النقطة ( النقطة هى ما يساهم به كل من اهل القرية لوالد العريس)

كنا بعد الدروس وبعد الغداء نركب الدواب لنسقيها في المشرع وكانت كلابنا هى الاخري الاكثر سعادة وهى تلهث خلفنا للمشرع . كان المشرع مجمع يلتقى فيه اغلب اهل القرية للغسيل و حمل الماء للبيوت وصيد السمك احيانا . كنا بعد الوردة نذهب لالتقاط اجود واحلى ثمار النبق الناضجة والتي تتساقط تحت ظلال اشجار السدر الضخمة التي تنمو على شاطى النهر . كان رعاة الابل من اهل البادية الذين ياتون ايام الضمئ يتركون ابلهم على مناخها ( بفتح الميم) لأن ينجموا في ظل هذه الاشجار يتسامرون بالدوبيت والمسادير الحنينة .

بعد أن تدحرجنا من المدلية ( حافة النهر ) لاحت إلينا مشاهد أهلنا من بعيد ، بعض يغسل في ملابسة واخرون يسقون دوابهم ومجموعة أخرى من الأطفال يلعبون على كثبان الرمال . وبعد أن تقاربت المسافة ، وتعرفوا على وجوهنا صاحوا فرحين بعودتنا. بعض من هولاء الأطفال لم ينتظر لملاقاتنا بل هرول إلى الحلة لإبلاغ الأهل بعودتنا ، واخرون منهم تناولوا منا حقائبنا وهم اكثر تركيزا بعيونهم في وجوهنا التي بدت تأخذ من سمات المدينة .

عندما كنا على مشارف القرية لاحظنا أطفالا آخرين قادمين من داخل الحلة لاستقبالنا مبتهجين بقدومنا بعض منهم حافي القدمين لا يأبه لطعنات الضريسة المسمومة(الضريسة هي نوع من الشوك ينمو نباته جوار القرى)
لم يكن شوقنا لابقارنا واغنامنا وكلابنا اقل شوقا من شوقنا لاهلنا . كنا نسال عن قمرية وحورية وسرية والمنادهيب ( جمع مندهوب وهي العجلة التي اقتربت من سن العشار) . كانت امي الجالسة بجواري في الهباب المفروش بالدقة ( البرش الدقة هو اجمل واغلى انواع البروش المصنوعة من الزعف) قد همست في اذني تذكرني بالعم الرضى والطيب وعبد الغني وابراهيم كبار الحلة وطلبت منى الذهاب اليهم لانهم متلهفون لرؤيتي ولكنهم بسبب العمر يصعب عليهم الوصول الى منزلنا . ذكرتني امي بالعمة زينب وشروقو وفاطمة وام الحسن ولم يكن قد غبن عن بالي لاني لا انسى الكعك والتمر والحلاوة التي يملان بها جيوبي في مناسبات اعياد رمضان والاضحى .
طلّعت العراقي الابيض الجميل من حقيبتي وكذلك السروال الطويل والفنيلة ذات الأخرام المتوازية الاضلاع . خرج من كان معي من الغرفة الى البرندة ليفسوا لى المجال حتى اغيّر ملابسي واحضروا لـــى الجردل مليان موية والطشت والليفة للحمام داخل الغرفة نفسها . تركشت الباب بالعود ، وبعد الحمام اتهندمت كويس وفتحت الباب وعاد من كان في البرندة مرة اخرى ومعهم امي التى احسست ان خوفا علىّ محبوس في احشائها ....... . اخرجت امي فتيل بت السودان من سحارتها ( السحارة هي صندوق من الخشب يستعمل لتخزين الاشياء الخاصة) . وقد تعطرت بها جبرا لخاطرها . ولإظهار شيئ من المدنية طلعت فتيل فلير دمور الاصلي من حقيبتي وقد فاحت رائحته ليتنسمها حتى من كان خارج البيت .

تحركت مع اصدقائي لاسلم على اعمامي وعماتي كبار السن . كنا اينما جلسنا لابد من تناول كباية شربات من الليمون ، الذى قد يكون احيانا معطر ببت السودان نفسها ، لزوم المغالاه فـــي اكرامنا . كان اصدقائي الذين يرافقونى للسلام على الاهل يضحكون ويلعبون وهم يمشون معى بعفوية من بيت لاخر . لم استجب لحركاتهم وضحكاتهم تلك بل صار ينتابني احساس بالسخرية وعدم الرضا من تلك التصرفات ولكنه احساسا ظل حبيسا بدواخلي ..... صحيح انها ملابس المدنية الزائفة .

انصبت على مجموعة من الأسئلة المتكررة من أعمامي وعماتي وكأنهم اتفقوا أن توحد أسئلتهم . كيف يا ولدى المدرسة وبتسكنوا كيف وتنوموا كيف وبأكلوكم شنو في الدوخولية ؟ وبعد هذه الأسئلة يأتي السؤال الصعب - بعد صمت ونظرة الى سقف المنزل ( حيث تعلق تواريب التبش والعشريف وقناديل العنكوليب وربما النجامة والسلوكة وتوابيرهم ( ازيارهم يعنى ) تنقع طق طق طق ) واصابعهم تعبث بالمسبحة مع همس تتحرك فيه الشفتان مع المسبحة للإعداد لذلك السؤال . ( اها يا ولدى نحن كبرنا ومتمنيين نحضر جديدك وجديد بت عمك شامة شن قولك أنت ؟
( أدونى يا عمي مهلة شوية المغرب أبوي ذاتو قال عندو معاى كلام وما عرفتو يمكن كلامك ده)

الطيب

كل سنة وانت كما تحب

في انتظار باقي الذكريات

كتابتك ممتعة

الاخت انعام كتر خيرك شديييييد ونواصل عشان خاطرك الجميل

في الساعة الثامنة مساء يوم الجمعة الموافق للأول من يوليو لعام 1969 م رن جرس الصفرة إيذانا بحلول ساعة وجبة العشاء . كنا وقتئذ لابسين( كاجوال) عراقي ساكوبيس شفاف بلون ابيض ناصع و سراويل طويلة وطواقي مطرزة باليد . كان أبناء المدينة يلبسون الأردية والقمصان الجميلة وأحيانا بناطلين مصنوعة من مادة الترلين الأملس خالص . كان هاجسنا هو كيف نتعلم لبس الأردية ورباط الأحزمة بل حتى كيف نكشف عن ساقينا .

كانت وجبة العشاء دسمة للغاية فيها الخبز وفيها العدس وفيها الفول وفيها الجبنة وفيها الطحنية والمربة . حسبناه يوما لاستضافتنا ولكننا أدركنا أخيرا أن الحال ستبقى هكذا . كانت بالفعل لحظة فرحة يبدد سعدها تارة العودة بذاكرتنا للريف وللوالد و الأم كيف لهما ان يجدا من ينش أغنامهما من الصباح الى المدرسيب ( محل تجمع أغنام القرية ) من سيرسلا صباحا لشراء السكر والبن ومن سيجدا ليحمل الماء على ظهر الدابة إلى عمال الزراعة ومن يحمل الكورة (نعومة) وهى مليانه بالسمن النقي لشيخ الطريقة ليعود بها مليانة محاية تكف العين وتدفع الاذى وتفتح الذهن ومن يلحظ ناقتهم الولودة وهى ترعي باطراف القرية ومن يسجل لهم اسماء النساء اللائي يشترين الزعف- تجارتهم الرئيسية منذ اكثر من خمسين عاما وحتى يومنا هذا – ولا يدفعن كل أو بعضا من القيمة ومن ومن ...

صديقي الطيب شيقوق

كل سنة وانت طيب

تدفق يا صديقي بحديث الذكريات العذب هذا

ونحن نتابع بشغف

Quote: تدفق يا صديقي بحديث الذكريات العذب هذا ونحن نتابع بشغف

تسلمي يا اشراقة عزيزتي تشرق ايامك وايام آل حيمورة دوما بالنماء والخير والسعادة

سنواصل ببركة الله يا الاشراقة بس اديني رضاك قدامي سفر

اطيب المنى

أخي الطيب

هذه الكتابة الممعنة في التفاصيل تدثر مواهب إبداعية
خلاقة..فبالله عليك لا تضن علينا بها أيها الرائع..واصل ..
فالنظر في العواقب تلقيح للعقول..

لك ودي
الزاكي

Quote: هذه الكتابة الممعنة في التفاصيل تدثر مواهب إبداعية خلاقة..فبالله عليك لا تضن علينا بها أيها الرائع..واصل .. فالنظر في العواقب تلقيح للعقول..

مهلا اخي الزاكي الجميل سنواصل في الرواية . الموضوع برمته سيحال اليك - ان كان لك من الوقت ما يمكن ان تجود بها علينا - لتزيينه بملاحظاتك ونحوك وصرفك وتعابيرك الجميلة وذلك بعد ان يتسنى لي نهو اخر فصوله.

فهى رحلة عمر يا حبيبي الغاية منها المقارنه بين الامس واليوم في شتي ضروب الحياة.

متابعتكم وتقويمكم لى سيكونان دافعا للكتابة .

لك مودتى

ما الذ وجبة عشائكم..

وواصل .. نحن معك.

الطيب أخوي
إزيك وكل سنة وإنت طيب
كلامك جميل
واصل
نحنا متابعين

عادل عبدالرحمن

أخي ود شيقوق
كل سنة وبألف خير
واصل فنحن لك من المتابعون ، حلوة وممتعة مفردات (العامية)التي تكتبها حاول أن تكثر من استخدامها، منتظرين ،ولا تنسى أنت في أول ليلة وأول وجبة عشاء بالداخلية ، أمامك مشوار طويل عن القويسي، وكافة قرى أهلنا حولها، العادات التقاليد، ليتك رجعت قليلا عن البداية قبل القويسي،
لك كل تقديري واحترامي
أخوك
الشفيع

اخي وابن عمى الشفيع ابراهيم

عجبتني بالحيل الشى انت بتشم البوستات دى شم عرفت البوست ده كيف انا عملت مليون بوست بس عجبتك الحاحاية وسنغرت تسمع امانى ما اكتلك بالضحك بس تابع والله حتى عرضتى احكيها ليك .

أخي عادل عبد الرحمن (ابو مازن)

طلتك جميلة ويبدو انو البوست ده ما بتابعوهو الا اولاد وبنات الغلابة الذين وصلوا للتدقيق والوزارات من خلال رحلة لا تختلف عن رحلتي التي انا بصدد الحديث عنها.

لكما مودتى وكل عام وانتما بخير

اخي الطيب
انت ابداعا يتناثر علي الكي بورد
اتابع معك بكل احاسيسي
ولكن اترك لنا قليلا في جلسة القهوة القادمة
فبعد عزيزتنا مني جايين عليك

Quote: يلا يا مني انحنا في انتظارك

اخي دكتور التاج

شكرا لمروركم الجميل

فنجان قهوتكم في البال وهى المساحة التى نستريح في رحابها متى ما كنا في حاجة الى الراحة .

لك مودتى

بعد العشاء مباشرة عدنا لعنابرنا التي كان تضاء بالفوانيس وقتذاك . كانت حركتنا ليلا مابين العنابر والحمامات لكثرة الثعابين في ذلك الموسم (الدرت) فالارض طينية سوداء عادة يتصدع صطحها محدثا شروخا دافئة تمثل بيئة ممتعة للثعابين لا سيما الوشاش وابي درقة وغيرها من الحيوانات السامة ولهذا كنا نلزم اسرتنا في انتظار الساعة العاشرة مساء حيث يرن جرس النوم ليحرم بعد ذلك اى طالب من التحرك من سريرة الى اى موقع اخر . انتابنا احساس بكراهية للمدرسة وللمدنية وللتمدن وكان كل همنا محاولة الهروب ( الفزيز) من هذه البيئة لنعود لحياتنا الطبيعية في الريف حيث لا قيود على الحركة ولا تحديد لساعة النوم . تعودنا في الريف ان نسهر مع اخواننا نلعب هو لبب وشليل وين راح والرمة الحباسة دقوها في راسها لنعود بعد ذلك للنوم مع حبوباتنا في عناقريب القد الوهيطة .

اشرقت شمسنا رتبنا امورنا و لبسنا الاردية المصنوعة من الكاكي التخين والاقمصة الناصعة البياض كان منظرا ننظر فيه بكثير الحياء والكثير من الالم لكنه داء المدنية الذى صار شرا لابد منه .

رن جرس الطابور ليصطف جميعنا في اربعة اشرطة ترتدى زي واحد الرداء والقميص . كان الطلاب في قمة الانضباط . كان يتوسط الطلاب استاذ طويل القامة يرتدى اجمل الملابس ربما يكون اكبر شخصية شهدتها في حياتي وقتئذ.

بعد التمام انصرفنا بهدوء تام الى الى قاعات الدراسة . كانت مكتملة البنيات . لأي منا كرسيه ودرجه وما بينها مساحات مهولة . كنا نتلفت يمين وشمال داخل القاعة فوجدنا انفسنا محاطين بابناء البندر .

دخل علينا مدير المدرسة احسسنا فية الهيبة والجبروت . حيا الجميع وبدأ حديثه بتقديم خلفية عن المدرسة . احسست فيه شموخا وهو يتحدث عن انجازاتها في السنين الماضية كانت تضاهي كاب الجداد ولم تخرج قط عن قائمة العشر الاوائل من مدارس السودان كافة . حكى لنا كيفية انشائها وعلمنا ان للامبراطور هيلاسلاسي دوره المقدر في تاسيسها قال لنا المدير:

كان هيلاسلاسى من حكماء القارة كان متواضعا يحب مخالطة العامة والبسطاء وكان كثيرا ما يزور الدندر فى رحلاته للصيد ..وفى احدى زياراته للدندر كان مسار موكبه - بالشارع الوحيد بالمدينة - فى طريقه للمجلس الريفى ومن ثم لمنزل الناظر يوسف العجب ويمر الموكب بالمسجد الذى كان مبنيا من القش فاصدر ضابط المجلس توجيهاته بازالة المسجد واعادة بنائه بعد انتهاء الزيارة ، واظن ان الضابط هو الريح الامين، فغضب عبد الماجد فرج - من مواطنى الدندر -غضبة مضرية واستل المسلول مدافعا عن حرمة المسجد وتمت تسوية الموضوع وذلك بان يقوم المجلس بتغطية كل المسجد بقماش الدمورية وزن عشرة واعطت المسجد شكل قبة رائعة الجمال ومنذ تلك اللحظة بدا التنفيذ فى بناء المسجد بالمواد الثابتة تمت الدعوة لجميع قبائل رفاعة لتناول الغداء مع جلالة الامبراطور فى قرية البردانة (قرية الطيب شيقوق) وكان يوما مشهودا وتبرعت قبائل رفاعة بعدد مائة بعير لجلالته . تاثر الامبراطور تاثيرا كبيرا بهذا التبرع وطلب من الناظر يوسف العجب ان يوافيه باحتياجات المنطقة العاجلة فكان رد الناظر باننا فى حاجة الى مدرسة ومستشفى وتبرع هيلاسلاسى بالمئة ناقة واكمل عليها ما تبقى من اموال وكانت بحق اعظم هدية للمنطقة لم نجدها حتى من حكامنا الوطنيين . والزائر لمدينة الدندر اليوم وفى شمال المدينة وشمال السكة حديد مباشرة يشاهد مبنى المدرسة الوسطى ومبنى المستشفى وكانهما ديدبانات واقفة لحراسة ذلك السهل الخالى من التخوم والمعالم..


نواصل

سنواصل

أخي الطيب الراوي الموهوب ( ود شيقوق)

هذه الصور الحية في الوصف لحياة البادية الصافية البسيطة وتأثرك بها وإرسالك لنفسك في سرد الرواية على سجيتها مباعدا ما بينها وكل مظاهر التعقيد والتكلف التي نعيشها الآن في المدينه أعاد إلى ذاكرتنا إرتباط الشاعر القدير محمد سعيد العباسي - رحمه الله - ببيئته وعشقه وتعلقه ببادية الكبابيش في قصيدته لمليط:
حياك مليط صوب العارض الغادي وجاد واديك ذا الجنات من واد
فكم جلوت لنا من منظر عجب يشجي الخلي ويروي غلة الصادي
كثبانك العفر ما أبهى مناظرها أنس لذي وحشة رزق لمرتاد
وأعين الماء تجري من جداولها صوارما عرضوها غير إغماد
والورق تهتف والأظلال وارفة والريح تدفع ميادا لمياد
إلى أن قال:
لو إستطعت لأهديت الخلود لها لو كان شئ على الدنيا لإخلاد

وأغلب الظن أنك بهذه الموهبة لسائر في درب الروائي الفذ الطيب صالح أمد الله في عمره لا سيما وان اغلب رواياته موحاة من واقعه وبيئته البسيطة فلتواصل الحديث لتسرد علينا عصارة السنين .

مي ابو قصيصة
مسقط
سلطنة عمان

سيداتي..آنساتي...سادتي...
كانت البداية في البوست الطاعم و الحنين...
*** قدح العيد ***
بتاع أختنا الحلوة أسماء الجنيد ( سوما ) لما بدأ الأخ الطيب شيقوق في سرد ذكرياته بطريقة مشوٌقة و سلسة...كنا نتابعها بكل شغف و فضول...حتى كتب قائلاً أنه بصدد إصدار كتاب عن مشوار حياته و أن..

Quote: عنوان الكتاب سيكون ( مسيرة حياتي من البادية للبورصات) سوف تحكى الرواية عن التعليم ومناهجه بين الامس واليوم وكذلك ضياع الالاف من ابناء الريف لاسباب بيئية واجتماعية واقتصادية سيتطرق الكتاب الى ظاهرة الزواج المبكر ما له وما عليه وتجربتي في التوفيق بين الزواج والدراسة الصراع العائلي بين الاب الصفوي والام المتواضعة فكريا دراسة القانون وممارسة مهنة المحاماة في المناطق النائية وكيفية اعمال النظريات والفلسفات القانونية في قضايات هذه البيئة . ثم تجربتي في العمل السياسي عند ترشحى للانتخابات البرلمانية وسيخصص الفصل الاخير من الكتاب عن الاغتراب

إقترحت عليه حينها أن يبدأ بكتابة بوست منفصل لأن كل نقطة من نقاط الكتاب تحتاج ل بوست منفصل.
إستشارني - شكراً على ثقته - في إختيار إسم للبوست..فإقترحت عدة أسماء..ك..
* مشوار ود شيقوق .
* رجل من زمن الحب.
* رحلتي من المجانية إلى البرلمانية.
* بوست متعدد الأغراض.
* خبرات و تجارب ...في بوست كارب.
* رحلة العمر..و مشوار السنين.
* ود شيقوق..و الدنيا أم شِقوق .

وقع الإختيار على (( رحلة العمر و مشوار السنين )) و ها نحن نتابع بكل شغف و نهَم و فضول.
يللا واصل يا ود شيقوق و أنا متأكدة إنو ده ح يكون بوست كامل الدَسَم..!

العزيز الطيب شيقوق..

عامك بندى قطرات طل خيره الوريفه..ومساحات الحفظ والرحمه والرضا من مدى رب كريم معطاء...


ولعل الاحتياج الدائم لعمر الطفوله وزمن الصبا والعمر والتجارب والمراحل تاخذ الانسان فى تجوال ملزم وتتشتت فى سماء الكون احاسيس الالفه والامان..وذلك الطهر البراءه...وذكريات الطفوله والدراسه لن تنمحى من خيال الذاكره ابدا..حتى تفاصيل الاشكال قد تغيب الاسماء لكن هنالك اسماء حفرت فى اخاديد الذاكره لن تنمحى..ويبدا الطواف الذى فى اجتراره يمنح دعشات تلك الانسام ويجدد خلايا الروح ويوصل مسافات العمر ليبقى ذلك الارتباط هو حلم الخيال الامانى والاحلام..وكل منا يريد ان يعود الى زمن الطفوله ورفقة الصبا عله يستطيع تعديل واصلاح مدى الرؤيا فى مستقبل عالم مضطرب..لان امان اللحظه وقتها كان قائما على احساس ذلك الامان فى البيت والحله والقريه والطريق والمدرسه ..وكان تلك رياح الزمن الجميل..


وكما ردد المغنى...
هل من عوده لى ام هى مستحيله...
العزيز الطيب..
احببت ان اناكف..لكنى استمتعت بكل ملامح الحكى وايقاعات صفائه وانغامه..
لك الاعزاز

Quote: يللا واصل يا ود شيقوق و أنا متأكدة إنو ده ح يكون بوست كامل الدَسَم..!

الاخت ممكونة ازدان البوست بطلتك البهية . اعجبني إحكامك لخارطة طريق هذا البوست ليتسنى للقاري ادراك ان هنالك معنى اخر مبطن خلف كل كلمة او جمله وجدت مكانها في متن هذه الرواية .

ساواصل سرد الرواية وفي بالي ان هنالك اشارات تحكم مرورية ممكونية تراقب ان كانت الرواية تسير في اطار المنظومة المتفق عليها حتى لا نتوه في مسارات تناثر الملل لمتابعينا .

لك ولبعلك الممكون وللاولاد اطيب المنى

كيفك يا أبو عبدالله..؟ كلو تمام؟؟

يا ريت يا سيدي تدينا لمحة عن تاريخ و جغرافية الأماكن الأنت بتتكلم عنها.
يعني موقعها...أقرب المدن إليها..طبيعتها..قبائلها...نوعية سكانها..رعاة..مزارعين..أفندية..إلخ..
و يا ريت تحدد لينا المواسم البتتم فيها الأحداث....يعني صيف...خريف..شتاء..
عشان نقدر نتخيل الصورة كاملة.


عسكري المرور
ممكونة

يا سلام ممكونة اختى فعلا الحاجات دى مهمة جدا ولازم تتابعيني عشان تاليف الكتاب في النهاية لابد يكون ليك فيه دور.

لك عاطر التحايا

Quote: احببت ان اناكف..لكنى استمتعت بكل ملامح الحكى وايقاعات صفائه وانغامه..

اخي الجميل الرائع عصمت العالم
المناكفة بالجميل فن انساني لعطاء سخي آثر صانعوه ان يتواروا تادبا وتواضعا خوفا من الاتهام بالامتنان بما تجود به خواطرهم .

اخترت كلماتك الجميلة يا شقيقي لان تكون تاج يتلالا على جبين هذا البوست . ارجو الاطلاع على مداخلة الاخت ممكونة بغية ادراك المعاني والمقاصد .

لك مودتى مع امنياتي بالتواصل معنا

ارجو الاطلاع مرة اخرى على الافتتاحية

Quote: البوست الطاعم و الحنين...

ممكونه التحيه والإحترام

فى بوست اغانى واغانى (لملاسى) ترددت ان اصف كتابتك بالطعامه والحنيه

ووجدتها هنا بيراعك .

ممكونه إنت ماكننا طعامه وحنيه .

اشكرك على تجميل وتزيين ليالينا بهذه الحروف الانيقه والممتعه فى ان واحد

ما تغيرى الحبر ولا المزاج !!

تحياتى لاحمد وابوهو .

شكرا عميقا شيقوق

شكرا جزيلا ممكووووووووووووونه.

Quote: ممكونه إنت ماكننا طعامه وحنيه . اشكرك على تجميل وتزيين ليالينا بهذه الحروف الانيقه والممتعه فى ان واحد ما تغيرى الحبر ولا المزاج !! تحياتى لاحمد وابوهو .

عليك الله حسي في كلام أطعم و لا أحنٌ من كده؟!!

تسلم يا فارس الحوبَة..و دُخري السنين لينا..
و إن شاء الله ما يتغير المزاج..و لا الكي بورد ..قول آمين.

يالطيب وكت نصيح ونجيض وقادر تكتب متل دة ما لك مدودر عمك فاروق وعامل كانقرو تنط من بكان لبكان ... ابقي هنا وسنبقي معك ومع العراقي الكاجوال .. انا جني الرطان لسبب او اخر ما لبست العراقي الكاجوال وما ولد مدن مية في المية سنة هنا وسنه هناك ومعظمها محطات سكة حديد ....
بعدين زيك من جماعة الداخليات ام يوم عدس وطحنية و لبن رايب ويوم فول وجبنة ومربة ... زمن ...

واصل ...

الأستاذ الطيب شيقوق

كل سنة و إنت طيب

أتابع هذا السرد الممتع ..
عافاك الله

Quote: يالطيب وكت نصيح ونجيض وقادر تكتب متل دة ما لك مدودر عمك فاروق وعامل كانقرو تنط من بكان لبكان

شكرا يا باشمهندس ( انت بالمناسبة ابو منو من الاولا)

لكن احساسي كلامى ده انت بيكون ليك زى كلام الطير في الباقير لانك طولت من السودان وغابت عنك كل معالم ثقافاتنا المحلية . المهم برضه تابع البوست بنعمل عشانك حاجات تصادف هواك ليطيب لك المقام بيننا.

اطيب المنى

Quote: يالطيب وكت نصيح ونجيض وقادر تكتب متل دة ما لك مدودر عمك فاروق وعامل كانقرو تنط من بكان لبكان [/ QUOTE] مرحب بيك يا باش كيفك وكيف الاولاد . انا بكتب في الرواية وكلى اشفاقا عليك من عنت البحث في معاني كلمات ومصطلحات عرب البادية لا سيما وانت غائب عن ثقافتنا السودانية عقود من عمرك . عمى فاروق اصلا حاجة ساهلة ما بطيقها الا يكون فيها دودار كتييييييييير . تحياتي لجميع افراد الاسرة الميامين شيقوق

---

Post: #26 Title: Re: رحلة العمر..و مشوار السنين Author: الطيب شيقوق Date: 10-30-2006, 03:49 AM Parent: #25 Quote: أتابع هذا السرد الممتع .. عافاك الله شكرا يا ابا جهينة على مرورك ونعدكم بالمواصلة انشاء الله الاخ الفارس فارس لك معزتى اطيب المنى

---

Post: #27 Title: Re: رحلة العمر..و مشوار السنين Author: abubakr Date: 10-30-2006, 08:18 AM Parent: #26 Quote: شكرا يا باشمهندس ( انت بالمناسبة ابو منو من الاولا) ياخي انا ابو بكر ... بكر دي قبيلة بحالها نساء ورجالا ومافيها تعنصر ذكوري .. ليه يعني ابو منو من الاولاد؟؟؟ ما لم البنات ؟؟ ده اسمو الامعان في الظلم الاجتماعي وهذه مخالفة قانونية وانسانية؟؟ الواحد حسع سسلط عليك ناس الجندر عشان شغل عرب الشام وفلسطيين والعراق دة ما موجود عندنا في السودان ولا في الباديةالسودانية الانت قت حتتكلم باسمها ؟؟ وكمان زمان كان اسمي ابونطارة قبل اربع عقود وزمن النطارات شوية ؟؟؟

---

Post: #28 Title: Re: رحلة العمر..و مشوار السنين Author: Muna Khugali Date: 10-30-2006, 08:43 AM Parent: #27 الطـيب.. إنت ماقلت أنا البوست دا ماهأفهم كـلامه? أهـو أسه أنا فاهماه شـديد ومجـذوبة لحكاويه شـديد.. بس انت ماتجري بالسرد سريع علشان تفاصيلك الحلوة ماتضيع مننا.. تحياتي.. مني

---

Post: #29 Title: Re: رحلة العمر..و مشوار السنين Author: الطيب شيقوق Date: 10-30-2006, 10:47 AM Parent: #28 الاخت منى خوجلي كتر خيرك على مرورك الجميل نرجو المدوامة على التواصل. معذرة اصدقائي تاخر الحكي لاسباب عملية نواصل شوية :- لم تكن الثنائية بين المدرسة الوسطى والمستشفي عبثا بالنسبة لي . فالمستشفي هي الوحيدة وما زالت في منطقة لا تقل مساحتها عن دولة الكويت . كانت المستشفى تجاور المدرسة الوسطى وتطل عليها من جهة الشرق والإنداية من السافل لتكتمل أضلاع المثلث بثالثة الاسافي وكان الشارع الرئيسى مملوك على الشيوع بين رواد المستشفي والانداية وعادة يكون دائم الحركة حتى ساعات الصباح و يمر به القاصدون الدواء والمتشوقون للمريسة والارزونا والعسلية ومستلزماتها المرخص بها ....... قبل قوانين سبتمبر 1983. ثمة فئة أخرى من الرومانسيين والرومانسيات الذين يجدون في حرم المستشفى مساحة ارحب للتلاقي والتلاطف فأما أن يكونوا قد رتبوا للتلاقي هنا سلفا أو كان اللقاء مجرد صدفة ، في رحابها ، تصلح أن تكون بادرة لعلاقة قد تكون مستدامة أيا كان الشكل المستدام الذي يتراضى عليه الطرفان ...... نواصل

---

Post: #30 Title: Re: رحلة العمر..و مشوار السنين Author: abubakr Date: 10-30-2006, 11:19 AM Parent: #1 يالطيب Quote: ثم تجربتي في العمل السياسي عند ترشحى للانتخابات البرلمانية انت سياسي؟؟ والله بس رشحت نفسك ؟؟

---

Post: #31 Title: Re: رحلة العمر..و مشوار السنين Author: الطيب شيقوق Date: 10-30-2006, 11:33 AM Parent: #30 يا باشمهندس ابو منو دى بتختصر الكتير (يا باشمهندس ابا بكر) ريحنا وحياتك ورينا كبيرهم طيب . مالك يا ارباب مستعجل اصبر لينا بنجيكم للانتخابات ونوريكم العجب . اطيب المنى

---

Post: #32 Title: Re: رحلة العمر..و مشوار السنين Author: الطيب شيقوق Date: 10-30-2006, 12:14 PM Parent: #31 Quote: وأغلب الظن أنك بهذه الموهبة لسائر في درب الروائي الفذ الطيب صالح أمد الله في عمره لا سيما وان اغلب رواياته موحاة من واقعه وبيئته البسيطة فلتواصل الحديث لتسرد علينا عصارة السنين . الاخت الكريمة مى ابو قصيصة اشكرك على مداخلتك الرائعة ولكن شتان ما بيني والعملاقين الطيب صالح والعباسي . انتو يا مى اختى ما تستعجلوا وتحكموا علىّ من هسه خلونى احكي ليكم حبه وتابعوا بس بعد انتهي من كل فصول الرواية بعد ذلك قولوا اى حاجة . ابيات الشعر بتاعة العباسي الرائعة دى كانت زمان مقررة في المنهج الدراسي اوعي تكونى من زمان حافظاها ربنا يوقيك من العين بس لو اصلك حافظاها من زمان . لك اطيب المنى

---

Post: #33 Title: Re: رحلة العمر..و مشوار السنين Author: abubakr Date: 10-30-2006, 01:54 PM Parent: #1 Quote: بنجيكم للانتخابات ونوريكم العجب هو في عجب باقي لسه ؟ واصل

---

Post: #36 Title: Re: رحلة العمر..و مشوار السنين Author: الطيب شيقوق Date: 10-30-2006, 03:14 PM Parent: #33 كنا نذهب للمدرسة عند الصباح وبعد انتهاء الحصص نعجل الى الصفرة لما بها من طعام لم نجده عند اهلنا الا في مناسبات الاعراس وربما احيانا في السمايات . لم نكن ندري ان حليب البقرة المرئي وسمنة البخسة ( بضم الباء) التى تصنعها امهاتنا ، ولحمة عبد الجليل ، والدواجن التي تلتقط من حب الذرة والسمسم والدخن المشتته في حيشاننا تحتوى على مادة غذائية اجود واصح من الجبنة الهولندية والمربة البلجيكية وما كنا ندري ان وزارة التربية والتعليم بعد التشاور مع وزارة الصحة قد اختارت اغلب اغذية الداخليات لما تحتوية تلك الاغذية من مواد تقلل من عنفوان الرجولة ..... بعد تناول وجبة الغداء يعود اولاد المدينة عادة الى عنابرهم للراحة اما نحن فنذهب للجلوس تحت ظل السنطة المجاور لشارع المستشفي علنا نقابل او نشاهد اى من اهلنا قادما من المستشفى او الانداية . كان الفاصل بين الشارع والمدرسة سور من السلك الشائك ولذا كنا نلحظ حركة المارة ونميز ملامحمهم . وكنا لا نبادر بالسلام على اى عابر الا بعد ان يبادر هو بالاقتراب من السور ومناداتنا وذلك لاننا نعلم بان الطالب وهو مصنف هكذا – ومهما كان الوضع المالي لاسرته - يعنى طالب العلم الذىمن واجب اهله ان يجودوا عليه بعطاياهم عله يتخرج ويرد الجميل في الوقت المناسب . وقد لاحظنا ان القادمين من الانداية يتميزون بالسخاء الينا اكثر من غيرهم و ادركنا ايضا ان ذلك لم يكن لعدم اتزان في التصرف وانما لان الحياة علمتنا ان كرم وشهامة ومروءة هولاء قد تصل الى حد تنكيس الراية او قلب الصحن ( تنكيس الراية كناية على الجود الفائت حده لدرجة استحواذ كل مافي الانداية والتكرم به لكل من وطأت قدماه تلك البقعة) ( وقلب الصحن كناية على رفض ابي العريس النقطة والنقطة هى الخته في كشف العرس) لقد كانت مجالس البهجة اكثر ثراءا بالادب والشعر ولا غرو فاغلب من صنعوا تاريخنا الادبي والثقافي والفنى قد تشكلوا في تلك المجالس وصاروا اسماءا في حياتنا . نواصل

---

Post: #37 Title: Re: رحلة العمر..و مشوار السنين Author: abubakr Date: 10-30-2006, 03:19 PM Parent: #36 Quote: وصاروا اسماءا في حياتنا لزومو شنو..كرهنا مساء الجمعة ...

---

Post: #39 Title: Re: رحلة العمر..و مشوار السنين Author: الطيب شيقوق Date: 10-30-2006, 03:33 PM Parent: #37 Quote: لزومو شنو..كرهنا مساء الجمعة ... انت صاحي يا ضؤ القبيلة؟ فين الفاروق مالوا ما يجي يحضر الراية منكسة والصحن مقلوب . تحياتي يا باش

---

Post: #40 Title: Re: رحلة العمر..و مشوار السنين Author: abubakr Date: 10-30-2006, 10:11 PM Parent: #1 Quote: فين الفاروق مالوا ما يجي يمكن بيسخن وبيعمل سويدي لزوم الاشواط الجاية

---

Post: #41 Title: Re: رحلة العمر..و مشوار السنين Author: الطيب شيقوق Date: 10-31-2006, 04:30 AM Parent: #40 Quote: يمكن بيسخن وبيعمل سويدي لزوم الاشواط الجاية لا لا يا باش انت بطمئن فينا ساى الزول ده يمكن عيان

---

Post: #42 Title: Re: رحلة العمر..و مشوار السنين Author: Ahmed al Qurashi Date: 10-31-2006, 01:06 PM Parent: #41 الأخ / الطيب شيقوق ما تقولي عوك والله العظيم عترت في هذا البوست الجميل الان...إيه الروعة دى يا الطيب ياخى ذكرتني بارا والطفولة الجميلة التي عشتها في ذلك البلد الجميل بين السواقي والجناين والمزارع وكذلك ذكرتني بمدرسة خور طقت الثانوية ومدينة أم بادر الجميلة التي قضيت فيها فترة من الزمن ياسلام يا الطيب ...استمر اخى فأنت تحكى عنى وعن طفولتي وصباي ...اسلوب ادبى وسرد رائع وممتع .

---

Post: #45 Title: Re: رحلة العمر..و مشوار السنين Author: الطيب شيقوق Date: 10-31-2006, 03:39 PM Parent: #42 عزيزي المرهف دكتور احمد ود القرشي تحياتي الحارة لشخصك الجميل تعتريني لحظة من الفرحة والسعادة سائحاً في معيتكم - كما قال ابو حريرة - في مستقبل ماضيه الذي استشرفته واعدته نبضاً في وجداني وقلبي وتصورا في ذهني وعقلي رؤية أسعد كثيراً أن أشاطركم حقوق ملكيتها وأعباء التفكر والتدبر فيها وتمثلها والصبر على غرسها وانتظار حصادها ... عِبئان لا يطيقهما إلا الرواد العائدين من (دور) المستقبل لقيادة ظعائنهم إليه ليشاركوا جميعا في تنمية أرضه وأهله الطيبين ليغسلوا عنهم أوضار العجز التي غشت وجه شعبنا الوضئ وتبعث فيه قدرته على التمام من جديد. لك معزتى اخوك شيقوق

---

Post: #43 Title: Re: رحلة العمر..و مشوار السنين Author: abubakr Date: 10-31-2006, 01:36 PM Parent: #1 يالطيب الشحتفة دي شنو .. يعني الواحد ينتظرك يوم كامل تقوم تكتب يادوبك عن الفطور والصفرة ؟؟ هو انت صغيروني للدرجة دي خايف تصل حكاية رحلتك بسرعة الي مسقط ..؟؟ مودتي ابوبكر

---

Post: #44 Title: Re: رحلة العمر..و مشوار السنين Author: abubakr Date: 10-31-2006, 01:36 PM Parent: #1 يالطيب الشحتفة دي شنو .. يعني الواحد ينتظرك يوم كامل تقوم تكتب يادوبك عن الفطور والصفرة ؟؟ هو انت صغيروني للدرجة دي خايف تصل حكاية رحلتك بسرعة الي مسقط ..؟؟ مودتي ابوبكر

---

Post: #46 Title: Re: رحلة العمر..و مشوار السنين Author: الطيب شيقوق Date: 10-31-2006, 04:03 PM Parent: #44 Quote: الشحتفة دي شنو .. يعني الواحد ينتظرك يوم كامل تقوم تكتب يادوبك عن الفطور والصفرة ؟؟ الاخ ابو بكر هنالك مقترح من بعض المتداخلين يري ان تكون المواصلة في الرواية مترابطة ولا يتحقق الترابط - حسب تقديره - الا اذا كانت اى مواصلة امتداد للمقدمة الاولى من البوست . عليه ستكون البوستات على ما هي عليه الان ولكن اى موضوع جديد بعمل ليهو بيست فووووووق لترابط مسلسل الرواية. وموضوع الفطور والصفرة تجاوزناهو يا باش وسيخصص الباب الثاني لليوم الذى اتاني ابي وعمى ابو شامة واقترحا على زواج بنت عمى التي اتاها شخص غريب لزواجها. دى بس اوعي تفوتك بس عايزة ليها مهلة شوية لك مودتى

---

Post: #47 Title: Re: رحلة العمر..و مشوار السنين Author: محمد المرتضى حامد Date: 10-31-2006, 04:21 PM Parent: #44 Quote: يالطيب وكت نصيح ونجيض وقادر تكتب متل دة ما لك مدودر عمك فاروق وعامل كانقرو تنط من بكان لبكان والله يا أبوبكر صدقت. ياخ أنا أصلا مابعرف أكتب بوستات وظللت منذ بداية عهدي أقتات على بوستات الآخرين كالطيب وأحمد القرشي وهميم وشخصكم الكريم وآخرين رائعين من أعضاء هذا المنبر ، لكن الطيب ده بالذات الجري وراهو زي المشي ورا سيرة الجن تفتكرا سيرة عريس وتبدا معاها في نص البلد وبعد ماتندمج وتنبسط تلقا روحك في الخلا براك يا في كوشه. انت ابدعت في تشبيه حركته بشعار أستراليا لكن أنا بقول انو حركتو زي (العتّاب) ، عندكم جراد في حلفا ؟ ياخ مشيت معاهو في (مريا) قام فتح ليهو بوست عن (الجيل الثالث من الموبايل) ، لحقتو هناك ووحلت للركب ، خلاّني ياعمده وفتح بوست ناصيه عن عثمان حسين لقيتو بالصدفه قاعد فيهو ومولع رتينه ومعاهو ناس لالا ناس لالا ناس لالا ، أها قبل ما يشفيني من بازرعه وآخد شربه تروي (ثغري الظامئ فقد لاتنفع الذكرى) قام أشّر يمين ولفّا شمال على طريقة رونالدينو ، وبالطبع ملفّات حاده زي دي بتكسّر الركب زي ماقال (علوب) الظريف زير الحفلات الخرطوميه وأشهر الراقصين فيها لما جا طالع من حفله في بدايتا وسأله بعضهم خارج الصيوان : مابدري ياعلوب !! فكان رده : الفنان ده أشتر بكسّر ركبنا ساكت. من ثم يا الطيب أنا بس حاأقرا عن طفولتك وصباك في الدندر وما بعد بعد السلطنه ووالله ما حأأعتّر ليك في اندلاقك واندياحك يلا ادفّق زي مابقولو ناس السايكولوجي بأسلوب التداعي الحر free assocciation method ويأشرطي المرور (ممكونه) والمشاركين هنااعملوا رادار للكانغرو ولو غاب يومين فتشو المنبر بيكون زي ساكن بغداد في كل بلد سوالو (بوستات)..

---

Post: #49 Title: Re: رحلة العمر..و مشوار السنين Author: عصمت العالم Date: 10-31-2006, 04:54 PM Parent: #47 العزيز الرائع الطيب شيقوق.. واصل نحت اللوحه بيراعك الابداع...واعيد الرسم على تلك الالوان الانسجام...واستخرج من عمق القمقم..كل تلك الصور الجمال..اطلق فرشاتك دعها تستدعى كل الزخم المخزون فى اخاديد الذاكره...اعيد الاحياء بدفق من سجايا ذلك الزمن الجميل المضياف...وارجع بالزمن الى تلك الحقب..واجمع وشكل وصور..وغنى اغنية الارض...لاول غيث يرش بقطراته اديم وجهها..فتستبين الاشياء. من وقعهافى عفويه او لا تستبين..من شدة فزعها..وهى ترقب تكدس كل تلك السحب السوداء على ذلك الافق..والبرق يئن بصوت الحشرجه.والرعد يدمدم فى دوى مكتوم...وكلاب الحى تسرع لتجد مخبأ وهى ترى بوادر الخريف فى ثقل تشكلها..وهى تخشى زمزمة الرعد وكهربة البرق وهو يسعى بوهج اشتعاله..فيصرع ابصار الرؤيا العزيز الطيب.. ومع طلب الربط من العزيزه ممكونه...اوصف التداخل العرقى الاثنى .على امتداد المواقع الجغرافيه..وخصائص التنوع اللغوى والثقافى والفطرى..المرتبط بالارض وعلائق الناس..وانسجام الحوجه...وسبل الاعيش المختلفه..وقتها..وضرورة الاحتياج.زوكل ذلك التكافل الاجتماعى من واقع الالفه والتواصل وارسم بقلم الفنان ابعاد اللوحه.وبخ فيها من حرارة انفاسك..واختزان الشوق .لكل تلك الايام الصفاء والطهر والبراءه...دعه يعكس عتق الاصاله.. انا مستمتع غاية الاستمتاع..وساتابع المشوار معكم...فى اعادة الزمن الجميل مرة اخرى فى ذلك البيات الذكريات.. عميق الود والاعزاز

---

Post: #50 Title: Re: رحلة العمر..و مشوار السنين Author: الطيب شيقوق Date: 10-31-2006, 04:59 PM Parent: #47 Quote: والله يا أبوبكر صدقت. ياخ أنا أصلا مابعرف أكتب بوستات وظللت منذ بداية عهدي أقتات على بوستات الآخرين كالطيب وأحمد القرشي وهميم وشخصكم الكريم وآخرين رائعين من أعضاء هذا المنبر ، لكن الطيب ده بالذات الجري وراهو زي المشي ورا سيرة الجن تفتكرا سيرة عريس وتبدا معاها في نص البلد وبعد ماتندمج وتنبسط تلقا روحك في الخلا براك يا في كوشه. انت ابدعت في تشبيه حركته بشعار أستراليا لكن أنا بقول انو حركتو زي (العتّاب) ، عندكم جراد في حلفا ؟ ياخ مشيت معاهو في (مريا) قام فتح ليهو بوست عن (الجيل الثالث من الموبايل) ، لحقتو هناك ووحلت للركب ، خلاّني ياعمده وفتح بوست ناصيه عن عثمان حسين لقيتو بالصدفه قاعد فيهو ومولع رتينه ومعاهو ناس لالا ناس لالا ناس لالا ، أها قبل ما يشفيني من بازرعه وآخد شربه تروي (ثغري الظامئ فقد لاتنفع الذكرى) قام أشّر يمين ولفّا شمال على طريقة رونالدينو ، وبالطبع ملفّات حاده زي دي بتكسّر الركب زي ماقال (علوب) الظريف زير الحفلات الخرطوميه وأشهر الراقصين فيها لما جا طالع من حفله في بدايتا وسأله بعضهم خارج الصيوان : مابدري ياعلوب !! فكان رده : الفنان ده أشتر بكسّر ركبنا ساكت. من ثم يا الطيب أنا بس حاأقرا عن طفولتك وصباك في الدندر وما بعد بعد السلطنه ووالله ما حأأعتّر ليك في اندلاقك واندياحك يلا ادفّق زي مابقولو ناس السايكولوجي بأسلوب التداعي الحر free assocciation method ويأشرطي المرور (ممكونه) والمشاركين هنااعملوا رادار للكانغرو ولو غاب يومين فتشو المنبر بيكون زي ساكن بغداد في كل بلد سوالو (بوستات).. المرتضى في الدندر عندنا الطلح بينشف في الصيف وبتكون فروعه خالية من الخضرة والبرم( البرم هو زهرة الطلح التي يمتصها النحل لصناعة العسل . وافضل غذاء للعتان ( العتان جمع عتود وهوالبهم عبد الجليل ) ويقال في امثالنا للوليد الربيان زى عتود البرمة وكل اولاد المغتربين عتان برمة. المهم الشجرة دى عندما تنشف ينمو فرع مخضر وجميل ليس من جنس الطلح اصلا وانما من نوع اخر اسمه الضلع عنده زهور بنفسجية وجميلة . وبينمو ويشرب من الفروع الناشفة دى . اها شفت مداخلاتك الحلوة دى تشبة الضلع ده عدييييييييل بالعفية

---

Post: #48 Title: Re: رحلة العمر..و مشوار السنين Author: abubakr Date: 10-31-2006, 04:51 PM Parent: #1 عزيزي المرتضي سلام Quote: لكن الطيب ده بالذات الجري وراهو زي المشي ورا سيرة الجن ما "زي" دة هو "زاتو".. يااخي ما شايف كيفن نط من الصفرة والفطور في اول يوميين ليه في مدرسة البندر الي الزواج من بت عمو ومصر علي انة دة مهم لربط الموضوع وطلب الجماهير ؟؟؟ كلام شنو دة ؟ ان خايف يربطنا هنا بدل الموضوع ويطلع في بوست عن البوسنة ...

---

Post: #51 Title: Re: رحلة العمر..و مشوار السنين Author: الطيب شيقوق Date: 11-01-2006, 00:55 AM Parent: #48 يا باش انا قلت ليكم انكم لم تسطيعوا معي صبرا . اعتقادى انك تتحدث عن زواج بعد التخرج من الجامعة ولكن الحقيقة زواجي انا تم خلال ايامي الاولى من دخول تلك المدرسة يعنى لا ينفصل عن ايام الصفرة نفسها . اصبروا لى بس لك مودتى

---

Post: #52 Title: Re: رحلة العمر..و مشوار السنين Author: الطيب شيقوق Date: 11-01-2006, 01:10 AM Parent: #48 يا باش انا قلت ليكم انكم لم تسطيعوا معي صبرا . اعتقادى انك تتحدث عن زواج بعد التخرج من الجامعة ولكن الحقيقة زواجي انا تم خلال ايامي الاولى من دخول تلك المدرسة يعنى لا ينفصل عن ايام الصفرة نفسها . اصبروا لى بس لك مودتى

---

Post: #53 Title: Re: رحلة العمر..و مشوار السنين Author: abubakr Date: 11-01-2006, 01:16 AM Parent: #1 خلاص يالطيب سنتركك وشانك ونعود اليك بعد اسبوع لنري اين وصلت اما حكاية الزواج وانت في ذاك العمر فامر عجيب .. كنت قد بلغت منتصف الثلاثيين حتي رضيت بي زوجتي " كتر خيرها" والا الواحد كان" باير" لليوم

---

Post: #54 Title: Re: رحلة العمر..و مشوار السنين Author: الطيب شيقوق Date: 11-01-2006, 01:26 AM Parent: #53 على الطلاق ما تغيب مننا اسبوع يا باش بتكتلنا بالقريفة ساى

---

Post: #55 Title: Re: رحلة العمر..و مشوار السنين Author: الزاكى عبد الحميد Date: 11-01-2006, 03:15 AM Parent: #54 العزيز الطيب طالبك إجتماع الأمس بتقديم هذه المادة في سياق حديث الذكريات بالنادي فبالله لا تضن عليهم بها.. لك ودي الزاكي

---

Post: #56 Title: Re: رحلة العمر..و مشوار السنين Author: الطيب شيقوق Date: 11-01-2006, 10:10 AM Parent: #55 اخي الزاكي شكرا لدعوتكم لكن يا ابوى الكلام ده عند بعض الناس زى البأذن في مالطة لك مودتى

---

Post: #57 Title: Re: رحلة العمر..و مشوار السنين Author: abubakr Date: 11-01-2006, 10:18 AM Parent: #1 يالطيب Quote: على الطلاق ما تغيب مننا اسبوع يا باش بتكتلنا بالقريفة ساى الطلاق لزومو شنو ..؟؟ انت بس اطلق لسانك واكتب حاجة .. يانا لسع واقفين في محطة الصفرة والفطور وانت نازل سلامات ومراحب لحد ما القطر يفوتك ؟؟

---

Post: #58 Title: Re: رحلة العمر..و مشوار السنين Author: الطيب شيقوق Date: 11-01-2006, 10:50 AM Parent: #57 Quote: الطلاق لزومو شنو ..؟؟ انت بس اطلق لسانك واكتب حاجة .. يانا لسع واقفين في محطة الصفرة والفطور وانت نازل سلامات ومراحب لحد ما القطر يفوتك ؟؟ انت براك ما بتخليني انطلق انا ما عارف انت والفاروق الشابكم في النت ده شنو . انت عارف يا باش الامور اتغيرت كلها زمان اهلنا وقت يحصلوا عمر فاروق وعمرك انت بيكون ولدوا والاولاد خلاص بقوا بيزرعوا براهم وبرعوا براهم وبيمشوا للفواتح بمثلوا الاسرة كلها . اها بعد داك شغل كبارنا بيكون معروف يتحكروا في الدواوين ويلاعبوا شفع اولادهم ويكونوا عندهم مكنسة يحكحكوا ساى في حوش الديوان لابسين عرارق الساكوبيس الجميلة وخاتين حبوب السكرى والحقة بتاعة تبغ الانفوراء مع كراع الهباب . وكان البهائم ما شربن يكلموا الاولاد الصغار يقولوا ليهم امشوا اسقوا البهائم. لكن كبارنا اليوم مصاغرين النت ساااااااااى ما بيحلموا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ انا اقصد حلم النوم لا شيئ بعده . لك مودتى

---

Post: #59 Title: Re: رحلة العمر..و مشوار السنين Author: abubakr Date: 11-01-2006, 11:14 AM Parent: #1 Quote: والفاروق الشابكم في النت ده شنو الشابك النت فينا شنو ؟؟ اها نحن قاعدين وماديين رجلينا وشاسات كثيرة حولينا وفي كل بكان في كل الاتجاهات عشان نتونس ؟؟ يعني كبار زمان ما بيقعدو في راكوبة مفتحوة بالجهات الاربع يناضمو الماشي والجاي و دي راكوبتنا فالجيبكم شنو ؟؟ اها خلينا من دة كلو وبطل الزوقة واكتب وواصل وبطل حكاية الطلاق دي علشان ناخد لينا تعسيلة ونجييك بعدين ..

---

Post: #60 Title: Re: رحلة العمر..و مشوار السنين Author: الطيب شيقوق Date: 11-01-2006, 02:35 PM Parent: #59 Quote: كبار زمان ما بيقعدو في راكوبة مفتحوة بالجهات الاربع يناضمو الماشي والجاي و دي راكوبتنا فالجيبكم شنو ؟؟ وتقول كمان اسبوع ما تخاف الله فينا ده كلام بيعرفوهو شفع النت الهسه ديل حرم ما تمشى انا بواصل وناس كتيرين اتصلوا فيني تلفونيا قالوا اواصل ونزولا لرغبة كبار السن فلا مناص من المواصلة . لك عميق مودتى

---

Post: #61 Title: Re: رحلة العمر..و مشوار السنين Author: الطيب شيقوق Date: 11-01-2006, 02:47 PM Parent: #60 كان الفنان زيدان ابراهيم في اوج سمعته الفنية لا يشدو الا لاسر الراسمالية الوطنية وقتذاك والتي صارت اليوم اثرا بعد عين امثال ابي العلاء وخليل عثمان ومحمد احمد ملاح و وعبد ربه في بورتسودان والنفيدى وهو وقليلون من الذين لم يهزهم ريح التغلبات السياسية ربما لان لديهم اجهزه للانذار المبكر ..... لقدر درجت ادارة مدرسة الدندر الوسطى على اقامة احتفالات لاستقبال الطلاب الجدد على خشبة المسرح وكان لديها من فائض الاموال المخصصة لها ما يكفي لتغطية نفقات دعوة كبار الفنانين السودانيين من الخرطوم الى الدندر . ولا ننسى ان فاتورة الفنان القادم الينا تقدر بمقدار المسافة وما اذا كان الطريق معبدا ام ترابي . وحتى ان كان ترابي فان موسم الرحلة مهم جدا في زيادة او تخفيض تلك المصاريف . فالطريق الينا من الخرطوم تزيد وعورته في اعقاب موسم الخريف مباشرة لكثرة المجاري التى يسببها اثار الجمال او التراكترات ابان موسم الامطار . وليكون الدندر جاذبا لهولاء الفنانين فقد كان الاغراء الذي يقدم من قبل المدرسة هو ، بالاضافة الى المبلغ المهول المتفق حوله ، زيارة حظيرة الدندر التي تعتبر الاكبر من نوعها في العالم من حيث المساحة وطبيعة الحيوان البرى المتواجد آنئذ . نواصل

---

Post: #62 Title: Re: رحلة العمر..و مشوار السنين Author: abubakr Date: 11-01-2006, 04:10 PM Parent: #1 شكيتك لي الله يالطيب .. انتو في مسقط ما عندكم رغيف فرنسي توست للسندوتشات بدل سندوتشات الرول -بتاعة كنتاكي- دي البتكتبها بعد "نواصل" كل 24 ساعة ؟؟ انت كوهين قريبك ؟ Quote: ونزولا لرغبة كبار السن ياخي شنو كبار السن دي ؟؟ انت نسيت انو في شابات معانا هنا ؟؟ الاتيكيت يالطيب !!! مودتي ابوبكر

---

Post: #63 Title: Re: رحلة العمر..و مشوار السنين Author: الطيب شيقوق Date: 11-01-2006, 04:23 PM Parent: #62 Quote: انت نسيت انو في شابات معانا هنا ؟؟ لم اقصد ان ياخذ القوس باريها يا باش . ما تخلى الناس في حالها يا باشمهندس ابو ابوبكر .

---

Post: #64 Title: Re: رحلة العمر..و مشوار السنين Author: abubakr Date: 11-01-2006, 11:28 PM Parent: #1 يالطيب ما تكتب...الانا والمتداخليين كتبناه اكثر مما كتبته انت... وين فاروق ؟

---

Post: #65 Title: Re: رحلة العمر..و مشوار السنين Author: الطيب شيقوق Date: 11-02-2006, 00:25 AM Parent: #64 Quote: وين فاروق ؟ الزول ده سمع ولا جابوهو ليهو .

---

Post: #66 Title: Re: رحلة العمر..و مشوار السنين Author: abubakr Date: 11-02-2006, 01:07 AM Parent: #65

---

Post: #67 Title: Re: رحلة العمر..و مشوار السنين Author: الطيب شيقوق Date: 11-02-2006, 04:44 AM Parent: #66 Quote: ده شنو يالطيب... لا حولا .. شكرا ليك يا باش . طبعا بيني وبين قرض لم نتقابل قط في حياتنا الا عبر هذه المساحة الاسفيرية . كتر خيرك انت اديتني اللنك انا ما كنت عارف . انا رديت بزعل وهو اتصل هاتفيا وقال لى انا عامله للطرفة لكن حاسي من كتابتك انك زعلت واعتذر شديد ومصر يتصل ببكرى ابو بكر لشطب البوست. تعال ساى نحن ما دابنا وداب قهوة ما سمعت الفينا يا باش اذا ذبحوا العشار مودعات فلا من بذلك ولا كلام تحياتي لك والفاروق

---

Post: #68 Title: Re: رحلة العمر..و مشوار السنين Author: الطيب شيقوق Date: 11-02-2006, 12:44 PM Parent: #67 اخي وابن قريتي احمد حماد يكتب يحدث يا الطيب فى تقلبات الحياة ان تفترق عن صديق عزيز قريب للنفس ثم تلتقى به بعد اعوام وتبحث فيه عن ذلك الشخص القديم الذى عرفناه فلا تستبينه نكون قد تغيرنا او يكون هو قد تغير ولكن النتيجة واحدة وهى الفجيعة والاسى وخيبة الامل وها نحن وبعد طول غياب وعلى درب الذكريات العطرات التقينا .. لم اعرف ولم يعرفنى غير شخص واحد فى البرنسة المتجهة من سنجة الى الدندر قلت لنفسى لاباس سيتغير الحال حتما حين نصل ..وتغير الحال فعلا ولكن نحو الاسوا ..سائق العربة سالنى فى جفاء واضح الى اين يا افندينا ..استفزنى السؤال واهاننى وسكت مضطرا ثم اخذت اقول له يمين ..شمال..الى ان وصلت ..وفى المساء خرجت اتمشى كل الذين قابلتهم لم اعرفهم ولم يعرفنى واحد منهم كانوا جميعا يتصرفون باطمئنان وهدوء لا يتوفر الا عند الشخص المستقر فى داره وبلده..اوشكت ان اوقف واحدا منهم واساله انت من وين وجيت هنا بتين ..ويا ليتنى فعلت ..خجلت من هذه الفكرة..ثم لمحت من بعد احد الشيوخ من مواطنى البلد القدامى فهرعت اليه..اعانقه واحتضنه حيانى بحرارة وهو يقول اهلا بابنى الطيب ..اولادك ازيهم..واحترت هل اصحح له معلوماته هل اقل له ان الطيب اخى وانه توفى منذ سنوات وانه ليس لدى اولاد لكى اطمئنه عليهم ..فارقته وانا الطيب بعد ان استمعت لكل نصائحه عن الاطفال وضرورة الصبر عليهم والاكثار منهم..هذه هى الدندر اذن امى الرؤوم التى كنت اعرف كل حجر فيها كل شيخ كل امراة وطفل وبصدرى دوما اشواق لا تحد..مضى زمان وانا خارج السودان كانت كلمة السودان تعنى الصعيد وكان العكس تماما صحيحا حتى وعندما عدت للسودان كنت ولا ازال اعتبر وجودى فى العاصمة فترة اغتراب مؤقتة تنتهى بان اعود الى قواعدى فى مراتع الصبا و دهليز الذكريات ولكن يبدو ان قواعدى تلك لم يعد لها وجود.... قابلت عكاشة طه احد اصدقاء الطفولة بادرنى بالهجوم قائلا صرتم مثل السياح تاتون الينا لمدة يوم او يومين فى العام ثم تهربون الى العاصمة ومن ثم الى خارج السودان ..المتنى كلماته ودفعتنى لان اصر على القيام بجولة كاملة حول احياء المدينة للتعرف على المواطنين الجدد وعلى الشوارع الجديدة والبيوت الجديدة ..حدثنى عكاشة عن ظهور حى جديد اطلقوا عليه اسم زندية اى انهم تحدوا السلطات والقانون واستقروا فيها هؤلاء البسطاء برهنوا حقيقتين الاولى عجز المسئولين فى المنطقة والثانية مقدرتهم على العيش فى امن وحرية بعيدا عن عالم الرخص والرشاوى والتصديقات والعطاءات وقد قالها عكاشة فى اسى بالغ ..يبدو انه ليس للمقهورين فى هذه البلاد من تعبير عن انفسهم سوى زنودهم..سالت عكاشة هل تعرف نصر الدين السبيد مرجان قال لم اسمع به ..قلت له هذا انجح ضابط مجلس فى تاريخ السودان وتدرج الى عضو فى البرلمان وكانت جماهير بحرى تهتف الدائرة لمين الدائرة لنصر الدين..واصبح وزبرا فيما بعد .يا ليته يا عكاشة راى اهل زندية صدقنى سيكون سعيدا بهم ..قلت لعكاشة هل تصدق ان نصر لم يصدق فى حياته كشك قط لاحد..وقد حياه عكير الدامر.. نصر الدين عجيب مشرع بقيت للواردة ورتعت القبائل الكانت مزعزعة شاردة اعداك ضلوا لحشاهم نارك هاردا تفتح فى البيارات مثل البيبسى كولا الباردة فى الدندر يا الطيب رايت الشلك والنوير والدينكا اولاد قبائل سحقتهم المدن الشمالية واذابتهم وحولت اعتزازهم القبلى الى اسماء باهتة بدلا من اسمائهم الاصلية المرتبطة بتاريخهم وثقافتهم وتحولوا الى ..لمبة وبعشوم وقربة وحكومة..الخ .. سمعنا طبل ورقص واصوات عالية .قلت ما الخطب قال لى عكاشة انهم ناس الجو..قلت له وما الجو قال لى انهم ناس الانادى الراقية انداية حاجة رقية..اقتربنا من مصدر الصوت لمشاهدة الرقص ..انهم النوبة يرقصون فى الحلبة ويشربون المريسة ..توجست صاحبة الدار خيفة منا حينما رات وجهى الغريب ومرتديا البنطلون ولكن عكاشة طمنها انه ولدنا ود حماد كان ابوه من زبائنك القدامى وكذلك عمه كنان وزنقر طبعا قبل الوفاة عليهم رحمة الله جميعا ..قال لها عكاشة يا دينارية لاتخافى من الافندية هؤلاء كاعجاز النخل الخاوية انهم كالطرور لايصمدون تذروهم الرياح فى لمحة عين..اطمانت دينارية وحكت لنا قصتها مع احد الافندية وهو ضابط الصحة بمجلس الدندر حيث داهمها ذات يوم واغلق اندايتها ..ذهبت اليه فى المجلس وسخرت منه امام زملائه قائلة انت تقفل اندايتى انا..انت قايل نفسك ضابط نيشان ولا ضابط ميدان ..ما انت ضابط ضبان..فخجل الضابط واعتذر واعاد اليها رخصتها واصرت ان نشرب عبار وانصرفنا .. وكما قال عكاشة مررت بكل الاحياء كالسائح ..وكالسائح هرعت لاحجز مقعد فى البرنسة المسافرة الى سنجة ومن ثم الخرطوم والى ما وراء البحر وها انا كالسائح كتبت ذكريات وانطباعات اناجى فيها بلدتى بهجة النظر واى منظر فيها لايسر انظر الربى انظر الضحى انظر الشجر.... احمد حماد ادريس -- الدمام..

---

Post: #69 Title: Re: رحلة العمر..و مشوار السنين Author: abubakr Date: 11-02-2006, 01:03 PM Parent: #1 يا خلق الله "حماد " دة حيكتب لينا بالمراسلة لحد متين .. دة زول كتاب والطيب جنبو تلميذ.. يالطيب عايزين نقدم طلب لبكري عشان حماد يدخل معانا الفضاء الاسفيري ... صدقني حتكون انت اول المستفيدين لا نو حينقذك من ورطتك الدخلت نفسك فيها ويكتب عن الرحلة الانت ما قادر تفوت المحطة الاولي فيها ...

---

Post: #70 Title: Re: رحلة العمر..و مشوار السنين Author: الطيب شيقوق Date: 11-02-2006, 01:17 PM Parent: #69 يا باشمهندس ابا بكر كيفك اول احمد حماد ده محتاج لبوست براهو يكون عنه وبس هو من حليلة مش حلة كمان جنبنا بعدين عندما اخدونا في الوسطى ما كان بيمشى مع اى زول تلقاهو براهو انا حرم لحدى هسه بتذكر الرداء الكاكي الجميل الكان بيلبسه . ومن اهلنا عرب الدندر بس العاجبني فيهو عندما يجي الامتحان نحن كنا 600 طالب دفعه واحدة وهي دفعة اولاد نميري المشهورة واحمد اكان بيجى الاول من ال 600 عشان كده نحن كنا نجى جنبه وبنحبه شديييييييد لانه قائد قطارا اكاديميا يركب على ظهره ابناء البندر . كلامك والله صاح احمد ده اكان عملتو ليهو عضوية بوستي ده يشرب ما يروى بيعرف اى حاجة في الدنيا هو طبعا قرا اقتصاد جامعة الخرطوم والان في الدمام . انا اتصلت بالاخ قرض وجبرت خاطره يا باش والبينا صافية لبن لك مودتى

---

Post: #71 Title: Re: رحلة العمر..و مشوار السنين Author: abubakr Date: 11-02-2006, 02:01 PM Parent: #70 Quote: انا اتصلت بالاخ قرض وجبرت خاطره يا باش والبينا صافية لبن ومتين الحفلة تعزم ناس مسقط كلهم جبر خاطر ملح ساي ؟؟؟

---

Post: #72 Title: Re: رحلة العمر..و مشوار السنين Author: soma Date: 11-02-2006, 03:13 PM Parent: #71 ياااااااااااااا كل الجمال ده فاتنى انا كنت وين ؟؟ متابعه بى دهشة يا سلام عليك ود عمى ود شيقوق قمة فى الروعة وجمال سرد لا استطيع التعبير عنه سهل ممتنع متعك الله بالصحة والعافيه .. وواصل نحن متابعين بشغف *** تخريمة ممكونه يا معطونه جمال وروعة كنتى انتى البداية والمشجعه الاساسى للبوست الجميل ده يديك العافيه يا ست البنيات لى حدهن انتى واسرتك الكريمه لكم الود جميعا وشكرا لكل هذا الجمال

---

Post: #73 Title: Re: رحلة العمر..و مشوار السنين Author: الطيب شيقوق Date: 11-02-2006, 04:23 PM Parent: #72 Quote: ياااااااااااااا كل الجمال ده فاتنى انا كنت وين ؟؟ متابعه بى دهشة يا سلام عليك ود عمى ود شيقوق قمة فى الروعة وجمال سرد لا استطيع التعبير عنه سهل ممتنع متعك الله بالصحة والعافيه .. وواصل نحن متابعين بشغف *** سوما اختى طلتك تسر القلب وكفى تابعي لو عندك وقت عليك الله

---

Post: #75 Title: Re: رحلة العمر..و مشوار السنين Author: الطيب شيقوق Date: 11-03-2006, 03:19 AM Parent: #73 تمت دعوة وجهاء المدينة لحضور ذلك اليوم التشريفي وبالطبع فان المقاعد الامامية للحفل تخصص للناظر يوسف العجب ناظر عموم قبيلة رفاعة الشرق والمقربين اليه الذين اعتاد التشاور معهم في كل كبيرة وصغيرة امثال الحاج محمد عبد الرحيم والحاج فضل الله والعمده حجر جد الاستاذ احمد حماد ادريس الذى يتواصل معنا على دوام بكتاباته عبر هذا المنبر والحا ج الطريفي من قرية نور الجليل وهذا الاخير هو جد الشهيدة التاية ابو عاقلة الطريفي التى اقتالتها رصاصة الامن بجامعة الخرطوم في عام 1991 . استهل الحفل بكلمة من ناظر المدرسة مرحبا فيها بناظر القبيله ورفاقه وجميع الحضور ويكون خطابه بمثابة تقرير سنوى عن انجازات المدرسة خلال العام المنصرم . بعد انتهاء كلمة الناظر تمنح الفرصة لناظر القبيلة ليحيي فيها ناظر المدرسة سليمان محمد احمد المنصور رحمه الله وبقية المعلمين وجميع الحضور وبعد انتهاء كلمة الناظر يغادر الناظر ورفاقه الحفل دون الانتظار لسماع الاغاني ولانهم يعتقدون ان مشهادة الفنان وهو يتمايل تقلل من شانهم . اعلن المايكرفون بداية الغناء وتقدمت فرقـــة الاوركسترا واخذت تعزف اغنية باب الريده انسد واكثر ما اعجبني فيها المقطع البيقول ( تمر ايام وتتعدى بالصورة الرائعة التي يطوع فيها زيدان صوته) ويقيني ان اغلب ابناء ذلك الجيل تشجيهم هذه الاغنية وتعود بذاكرتهم الى اجمل محطات مسيرة حياتهم . بعد ذلك ظهر الفنان الشاب الانيق زيدان والذى يوحي لك شكله وتوحي اليك هندمته بانه فنان بكل ما تحمل هذه الكلمة من معنى وقد كان مبتهجا وكانه في دمشق وقاصرينا اعجبه الحضور الذى كان يتمنى ان يشاهد فنانا يسمع صوته على الدوام في الاذاعة ولكن لم يراه الا في هذا الحفل . انحنى زيدان محييا جمهوره وكان التصفيق لا التهليل !! يهز جنبات المدرسة الاربعة . كنا نحن ابناء الريف اكثر جسارة من ابناء المدينة في اقتحام المواقع الامامية من المسرح بعد ان انصرف الوجهاء وناظر المدرسة . اخذ ابناء المدينة يتمايلون مع الاغنية وهم في كراسيهم وكنا نلحظ ذلك باستغراب . كان طلاب الصف الرابع اكثر انضباطا والصف الثاني والثالث اكثر تهريجا . بدأ الطلاب الصعود بلا حياء الى حلبة الرقص وكان ابناء السوكى وسنار واقارب المعلمين من الطلاب - الاكثر تمدنا - هم الاكثر ابداعا في فنونه خاصة رقصة رجفة الكتف ( الحت) وكان بعضا من الجالسين يصرخون في الراقصين يلا ( حتو ) وحتو تعنى زمان (زيد من ايقاعك الرقصى) ونحن نعاين ساى مبسوطين لكن !!!!! لاننا شعرنا باننا قد بدانا نُحاصر بمفاهيم المدينة . انتهى الحفل الجميل ولا ندرى كيف الترتيب لراحة الفنان لينام هادئا من كثرة الباعوض هناك الذى لم تق منه حتى الناموسيات لاسيما وان الفنان المبتهج !! يحتاج لاكثر من طلعة للحمام ليلا. نواصل

---

Post: #74 Title: Re: رحلة العمر..و مشوار السنين Author: abubakr Date: 11-03-2006, 02:18 AM Parent: #1 يالطيب بطل شغل المطيباتية ده وكمل رحلتك ومشوارك ؟؟ مرة مستعيين بصديق ومرة بابن عمك ومرة مقضيها شكر وترحيب.. ياخي انت مشوارك انتهي تحت شدرة السنط الكنت مسطح تحتها بعد فطور الحيكومة وما عرف تقول شنو؟؟ قال رحلة قال ؟؟ دي هلاويس نومة الضحي تحت الشدرة ؟؟هوي اصح جرس الحصة ضرب ...

---

Post: #76 Title: Re: رحلة العمر..و مشوار السنين Author: abubakr Date: 11-03-2006, 04:55 AM Parent: #1 Quote: تمت دعوة وجهاء المدينة لحضور ذلك اليوم التشريفي المناسبة شنو ؟؟ انت ما قت الحلقة الجاية زواجك من بت عمك جيت طلعت لينا من باب الريدة الما بنسد... كانغرو شنو انت " يويو " ؟؟

---

Post: #77 Title: Re: رحلة العمر..و مشوار السنين Author: الطيب شيقوق Date: 11-03-2006, 07:00 AM Parent: #76 Quote: انت ما قت الحلقة الجاية زواجك من بت عمك جيت طلعت لينا من باب الريدة الما بنسد... قلنا ليكم بوست قرض السائب داك اكتبوا لى فيهو وانا بتضرع على راحتى في بطانة ابو على وحسان دى البقت ممنوع الاقتراب والتعليق فيها.

---

Post: #78 Title: Re: رحلة العمر..و مشوار السنين Author: abubakr Date: 11-03-2006, 07:41 AM Parent: #1 Quote: ممنوع الاقتراب والتعليق فيها. عشم ابليس في الجنة

---

Post: #79 Title: Re: رحلة العمر..و مشوار السنين Author: الطيب شيقوق Date: 11-03-2006, 08:01 AM Parent: #78 Ladies & Gentelment I am now in the process of reviewing a contract between Muscat Stocks Market and Dow Jones for establishing MSM`s co-branded index All the best CC Eng- Abu Baker Journalist Faruq Muna Khughali Dr. Garad Ala Eldeen Hemora Ahmed Hamad Idris Soma Sara Hamza Inaam Abdul Hafez

---

Post: #80 Title: Re: رحلة العمر..و مشوار السنين Author: abubakr Date: 11-03-2006, 10:10 AM Parent: #1 يالطيب .. انت المدرسة كانت في الدندر والا في نيوكاسل ؟؟ الرشوة لزوما شنو كمان اسهم بورصة ضاربة تعال هنا بدييك شوية من اسهمي في (...) واشوف شن تسوي ؟؟ ما دايرين الا قصتك بعد شدرة السنط ؟؟

---

Post: #81 Title: Re: رحلة العمر..و مشوار السنين Author: محمد ابراهيم قرض Date: 11-03-2006, 02:36 PM Parent: #1 الطيب .. أنا هنا بصفة مراقب .. ممكن ؟؟!!!

---

Post: #82 Title: Re: رحلة العمر..و مشوار السنين Author: الطيب شيقوق Date: 11-03-2006, 03:13 PM Parent: #81 نحن قلنا للجماعة تعليقاتكم ومداخلاتكم تكون في البوست المطلوق بتاع الحزن النبيل . بس انتى ما تخلي حد يعمل مداخلة هنا . They may intrupt the chain of thinking

---

Post: #83 Title: Re: رحلة العمر..و مشوار السنين Author: abubakr Date: 11-03-2006, 03:19 PM Parent: #82 Quote: They may intrupt the chain of thinking يالطيب .. ما تخليك في نضمك بالعربي البتعرفو !! الفلهمة لزومها شنو "جين اوف ثنكنغ " قال ؟يعني "حبل (سلبة) افكار".. انت اصلك حاوي رابط افكارك بحبل ...؟؟

---

Post: #84 Title: Re: رحلة العمر..و مشوار السنين Author: محمد المرتضى حامد Date: 11-03-2006, 05:16 PM Parent: #83 Quote: كانغرو شنو انت " يويو " ؟؟ روعه يا أبوبكر والله ضحكت من نخاع العظام

---

Post: #85 Title: Re: رحلة العمر..و مشوار السنين Author: فاروق حامد محمد Date: 11-03-2006, 07:42 PM Parent: #84 Quote: بعد ذلك ظهر الفنان الشاب الانيق زيدان والذى يوحي لك شكله وتوحي اليك هندمته بانه فنان بكل ما تحمل هذه الكلمة من معنى وقد كان مبتهجا وكانه في دمشق وقاصرينا اعجبه الحضور الذى كان يتمنى ان يشاهد فنانا يسمع صوته على الدوام في الاذاعة ولكن لم يراه الا في هذا الحفل . انحنى زيدان محييا جمهوره وكان التصفيق لا التهليل !! يهز جنبات المدرسة الاربعة . كنا نحن ابناء الريف اكثر جسارة من ابناء المدينة في اقتحام المواقع الامامية من المسرح بعد ان انصرف الوجهاء وناظر المدرسة . اخذ ابناء المدينة يتمايلون مع الاغنية وهم في كراسيهم وكنا نلحظ ذلك باستغراب . كان طلاب الصف الرابع اكثر انضباطا والصف الثاني والثالث اكثر تهريجا . بدأ الطلاب الصعود بلا حياء الى حلبة الرقص وكان ابناء السوكى وسنار واقارب المعلمين من الطلاب - الاكثر تمدنا - هم الاكثر ابداعا في فنونه خاصة رقصة رجفة الكتف ( الحت) وكان بعضا من الجالسين يصرخون في الراقصين يلا ( حتو ) وحتو تعنى زمان (زيد من ايقاعك الرقصى) ونحن نعاين ساى مبسوطين لكن !!!!! لاننا شعرنا باننا قد بدانا نُحاصر بمفاهيم المدينة . الطيب ما تزيد لينا حبة كده في زيدان والحت ده !!!!!!!!!!!!!!!!!!!!! انت يا الطيب عبدالعزيز داؤد دحين الزمن داك ما كان حي ؟؟؟؟؟؟؟؟؟؟؟؟؟

---

Post: #86 Title: Re: رحلة العمر..و مشوار السنين Author: abubakr Date: 11-04-2006, 00:45 AM Parent: #1 Quote: انت يا الطيب عبدالعزيز داؤد دحين الزمن داك ما كان حي ؟؟؟؟؟؟؟؟؟؟؟؟؟ كان حي ..بس ما عايز يجيب سيرتو لانو ما كان بيخليهم" يحتو " وبعدين الحمدلله انو الطيب وجماعة" الحت" ما حصلو ندي القلعة ونانسي عجرم اكانو "اتفتتو"

---

Post: #87 Title: Re: رحلة العمر..و مشوار السنين Author: الطيب شيقوق Date: 11-04-2006, 03:48 AM Parent: #86 فاروق وكان بعض فاعل مرفوع بالضمة مش كان بعضا وردت سهوا شكرا ليك بصلحها اصبر لي بكتر ليك من الحت وزيدان ابو بكر هي ندى القلعة اكان زمان غنت الناس بحتوا وبس ؟

---

Post: #88 Title: Re: رحلة العمر..و مشوار السنين Author: munswor almophtah Date: 11-04-2006, 04:25 AM Parent: #87 والله شق السرد علم يا ود شيقوق عرفنا عن ديار آل العجب وعربانهم ووقفنا على بعض لبنات التكوين وبعض عراميس الشده وقدرات التلصص لمعرفة أحوال السواقين والمعلمين والعمال وهيلاسلاسى واصل نشيدك وخليك حريف نحن بنعاين بعيونا............................ السلام والرحمه منصور

---

Post: #89 Title: Re: رحلة العمر..و مشوار السنين Author: الطيب شيقوق Date: 11-04-2006, 06:31 AM Parent: #88 Quote: والله شق السرد علم يا ود شيقوق عرفنا عن ديار آل العجب وعربانهم ووقفنا على بعض لبنات التكوين وبعض عراميس الشده وقدرات التلصص لمعرفة أحوال السواقين والمعلمين والعمال وهيلاسلاسى واصل نشيدك وخليك حريف نحن بنعاين بعيونا............................ اخي منصور يا مراحب وكتر خيرك على مرورك وحنواصل بس كونوا معانا . لك مودتى شيقوق

---

Post: #92 Title: Re: رحلة العمر..و مشوار السنين .. من صنع نساج حاذق!! Author: ابوبكر يوسف إبراهيم Date: 11-04-2006, 09:12 AM Parent: #89 أخي العزيز والحبيب الطيب لك مني كل الود تعودت أن أمر على كل بوست بعد أن أقرأ من الذين مروا عليه حتى تنفتح شهيتي للمداخلة .. فرأيت كل مشايخي وأصدقائي وأخواني وأبنائي مدمني قراءة الثمن قد دخلوا .. منصور .. أبوبكر .. محمد المرتضى.. شهاب الفاتح .. إنعام عبد الحفيظ ..أحمد القرشي .. عصمت وأبوجهينة ومني خوجلي هذا على سبيل المثال لا الحصر .. إستمتعت كثيراً وأنا لست غريباً عن تلك الديار .. ولكني كنت معكم في ذاك العشاء وآن لي أن أقول: كان عايّ أن أتهيب التعليق أو المداخلة فقد أبت نفسي إلا أن أتناول صاحب البوست بالحديث والتقديم له بالثناء وتركت من الأخوة الذين ذكرت أن يبدأوا حتى لا يقول البعض: صديقان يتقارضان الحفاوة ، ويتبادلان التحايا ،على رؤوس الأشهاد!! ولكن لم أرض لنفسي هذا التهيب المصنوع ، فإني لا أتحدث عن غائب ، ولا أحكم على مفقود إن جاز لي الحكم ، فهذا البوست الذي أتحدث عنه هو بين أعين القراء ، يحكم له أو عليه ، ويشركني فيما أرى أو يخالفني إلى رأيٍ سواه!! ثمّ إني أقول فيما خلص لي من قراءة ‘ لا أبغي بذلك قضاء ولا حكماً يجب له ما يجب في الأقضية والأحكام من تجردٍ في الميول ، وتجانفٍ عن دواعي التأثير. قرأت هذه الفصول جميعاً فإذا بها على إختلافها تشيع فيها من روح الكاتب ‘ روحٌ واحدة ومقدرة على فن تصوير البيئة وهنا ينسجم إستغراق الكاتب في بيئته التي يحبها ولا يتنكر لها حتى في أدق تفاصيلها المستغرقة في محليتها وفطرتها.. في بارا الجميلة والركابية وأخالني أسمع من مطربنا عبدالرحمن عبدالله أهازيجه بحب تلك البقاع الكردفانية الثرة بتقالديها المتوارثة وفخر أهلها بموروثهم الفطري ، فكأنما يفصح لنا عن هويته وصورته في فخر واعتزاز غير متأثر بقشور المدنية، ويفصح لنا عن خصائص مجتمعه في دائرته الضيقة ثم يكسو كل هذا حلةً قشيبة .. إن هذا النوع من الكتابة هو ما يطلق عليه أدب التراجم وفضل الطيب هذه البوستات كفضل النسّاج الحاذق يحيل الخيوط على منواله ثوباً أنيق الوشي جميل الطراز .. أحسنت.. وننتظر ما سيأتي أخوك ابوبكر يوسف

---

Post: #90 Title: Re: رحلة العمر..و مشوار السنين Author: abubakr Date: 11-04-2006, 07:43 AM Parent: #1 Quote: وحنواصل بس كونوا معانا . يكونو معاك وين مع نطيطك دة؟ ما انت سويتها زي لعبة الشوالات باقي لي كل اللعيبة حيتشنكلو يقعو وانت براك بتصل الميس ...

---

Post: #91 Title: Re: رحلة العمر..و مشوار السنين Author: الطيب شيقوق Date: 11-04-2006, 07:57 AM Parent: #90 Quote: وانت براك بتصل الميس ... انت عارف يا باش السودان ده كان زمان جميل وحلو رغم تباعد المسافات وغياب ادوات الاتصال برضه بتجد مصطلحات مشتركة (تصل الميس) يا سلام يا باش انا قايلك رطاني . انت اصلك العشرين سنه دى شي فاتك فيها مافي الا ندى القلعة وثقافة تضبح الصحفيين .

---

Post: #93 Title: Re: رحلة العمر..و مشوار السنين Author: abubakr Date: 11-04-2006, 10:14 AM Parent: #1 ابوبكر يوسف العزيز ( يالطيب ان قفلتها بالعزيز علشان ما تلخبت) Quote: أتناول صاحب البوست بالحديث والتقديم له بالثناء يوم ما قدمنا ليه الشكر ابتدء ينطط بينا من بوست الي بوست وفي نهايتا عايزنا ن"حت" معاه ... خليهو كده بدون ثناء عشان مانلقي نفسنا في رولر كوستر اصلو دوخنا ..

---

Post: #94 Title: Re: رحلة العمر..و مشوار السنين Author: الطيب شيقوق Date: 11-04-2006, 10:37 AM Parent: #93 Quote: إستمتعت كثيراً وأنا لست غريباً عن تلك الديار .. ولكني كنت معكم في ذاك العشاء وآن لي أن أقول: كان عايّ أن أتهيب التعليق أو المداخلة فقد أبت نفسي إلا أن أتناول صاحب البوست بالحديث والتقديم له بالثناء وتركت من الأخوة الذين ذكرت أن يبدأوا حتى لا يقول البعض: صديقان يتقارضان الحفاوة ، ويتبادلان التحايا ،على رؤوس الأشهاد!! ولكن لم أرض لنفسي هذا التهيب المصنوع ، فإني لا أتحدث عن غائب ، ولا أحكم على مفقود إن جاز لي الحكم ، فهذا البوست الذي أتحدث عنه هو بين أعين القراء ، يحكم له أو عليه ، ويشركني فيما أرى أو يخالفني إلى رأيٍ سواه!! ثمّ إني أقول فيما خلص لي من قراءة ‘ لا أبغي بذلك قضاء ولا حكماً يجب له ما يجب في الأقضية والأحكام من تجردٍ في الميول ، وتجانفٍ عن دواعي التأثير. لله درك اخي ابو بكر استحي ان اكون في قامة من يستطيع الرد على من يملك ادوات هذا الابداع البلاغي اعذرني يا حبيبي ولك منى عاطر الثناء شيقوق

---

Post: #95 Title: Re: رحلة العمر..و مشوار السنين Author: الطيب شيقوق Date: 11-04-2006, 12:20 PM Parent: #94 لم يكن ناظر قبيلة رفاعة – يوسف العجب - يولي اهتماما بزيارة اى فنان لمدينة الدندر شانه في ذلك شان بقية زعماء الادارة الاهلية في السودان . كانوا يهتمون بزيارة الروؤساء والسياسين ويصرفون على استضافتهم الغالي والنفيث وينادون لاستقبالهم عمد ومشايخ ووجهاء المنطقة . وكان اكثر العمد نفوذا وقتذاك العمدة محمد بشير ابو جن والعمدة الجعفري عمد قبيلة الحمدة والعمدة حجر عمدة قبيلة القواسمة والعمدة محمد الامين الزلغم عمدة الحلاويين . وكان من الشيوخ الشيخ المقبول و الشيخ عبد الغنى شيقوق شيخ قرية البردانه التى تعتبر اكبر قرى منطقة الدندر ويسكنها ما لا يقل عن 8 الف نسمه ينتمون لجد واحد ولحزب سياسي واحد هو الاتحادي الديموقراطى ويعرف عن هولاء التطرف في مناهضتهم لنظام الادراة الاهلية ويعود هذا الى ارتفاع عدد الخريجين فيها . من هولاء الخريجين دكتور امبلي عبد الله عجب نائب والى ولاية سنار سابقا ومولانا امبلي بابكر احمد رئيس الجهاز القضائي لولاية سنار حاليا ودكتور طه امبلي اختصاصي النساء والتوليد والاستاذ بجامعة امدرمان الاسلامية والباشمهندس ابراهيم احمد البشير شيقوق ( ابراهيم شخصية) ودكتور البدري بابكر الذى يعمل طبيبا ببريطانيا حاليا . يشتهر اهل هذه القرية بالملاحة وسرعة البديهة وتحمّل الشدائد اذ يعمل عدد لا يستهان به من شبابها الذين لم يجدوا حظا في التعليم في الزراعة في موسم الخريف والطوب على شاطي نهر الدندر وكذلك الخروج في مجموعات للعمل في الفحم في منطقة الدماذين لانعدام غابات الطلح والهجليج في منطقتهم . كان الحاج محمد عبد الرحيم لحكمته وادبه ورزانته هو مستشار ناظر القبيلة . يحكى عنه انه عندما قرر النميري الغاء نظام الادارة الاهلية واقالة زعماء القبائل من مناصبهم ان قال للناظر لا تكترث سيدي لهذا القرار فانت كالوادى ان امطرت السماء وسالت ماؤك فانت وادي وان امسكت السماء ماءها ولم تمطر فانت ايضا هكذا. اما الوجهاء الذين اعتاد الناظر دعوتهم لاستقبال الرؤساء فهم المرحوم مبارك عبد القادر الخبير رجل البر والاحسان وهو رجل حاضر في ذاكرتي بالكثير من المواقف الرائعة . يحضرني ان قاضى المديرية زار مدينة الدندر للوقوف على تشكيل المحكمة الشعبية بالدندر وقد ورد اسم المرحوم مبارك عبد القادر الخبير من ضمن المرشحين لعضوية المحكمة وقد حاول أن يناي بنفسه عن عمل القضاء لانه يعتقد ان ( قاضيان في النار وقاض في الجنه ) وفي وقوله (ص) (لو علمتم ما في القضاء لما قضيتم في بعرة ) . و بعد محاولات مضنية قبل العم مبارك ، على مضض ، ذلك التكليف . كان القانون الجنائي السوداني المطبق وقتها هو قانون 1925م . ووفقا لاحكام ذلك القانون فان المواقعة الجنسية بين الرجل والمراة الراضيين البالغين وغير المتزوجين لا تعد جريمة ولا يحاسب عليها قانون الا اذا كانت ماسة للحياء العام . رتب العم مبارك جميع اوراقه ليجلس على كرسي القضاء وكان يظن ، من فرط عفته وبراءته ، ان القضايا التي تنظرها المحكمه هي قضايا نزاعات الاراضى والسرقات والتلف والمشاجرات . لقد نادى حاجب المحكمة على اطراف اول قضية تعرض على العم مبارك الخبير وقد كانت الشاكية امراة والمتهم رجل . وعادة تبدا المحكمة بسؤال الشاكية لعرض قضيتها . ادعت الشاكية انه في يوم كذا حضر اليها المتهم وطلبها في نفسها مقابل مبلغ طراده ( 25 قرش) وبعد الانتهاء طالبته بالمبلغ الا انه تمنّع عن السداد . احتار العم مبارك من طبيعة الشكوى وخر ساجدا على طاولة المحكمة واصابعه في اذنيه ولملم جميع اوراقه وغادر المحكمة بلا عودة . كان الحاج محمد عبد الرحيم لحكمته وادبه ورزانته هو مستشار ناظر القبيلة . يحكى عنه انه عندما قرر النميري الغاء نظام الادارة الاهلية واقالة زعماء القبائل من مناصبهم ان قال للناظر لا تكترث سيدي لهذا القرار فانت كالوادى ان امطرت السماء وسالت ماؤك فانت وادي وان امسكت السماء ماءها ولم تمطر فانت ايضا هكذا. كان عمنا يوسف كسلا - طيب الله ثراه - القطب الاتحادي الديموقراطى - اكثر مواطنى الدندر شراسه في مواجه الناظر يوسف العجب غير ان الاخير كان يحبه ويحرص على دعوته في كل المناسبات . والراي عندى هو ان زعماء القبائل هم اكثر حكمة ودبلوماسية مع من يجاهرون بمواجهتهم ومناصحتهم . نواصل

---

Post: #96 Title: Re: رحلة العمر..و مشوار السنين Author: الطيب شيقوق Date: 11-05-2006, 02:53 AM Parent: #95 Quote: يوم ما قدمنا ليه الشكر ابتدء ينطط بينا من بوست الي بوست وفي نهايتا عايزنا ن"حت" معاه ... خليهو كده بدون ثناء عشان مانلقي نفسنا في رولر كوستر اصلو دوخنا .. شنو رولر كوستر يا باش بقيت لينا زى المرتضى عندما تجى تقرا في مداخلاته الا تكون شائل قاموسك معاك .

---

Post: #97 Title: Re: رحلة العمر..و مشوار السنين Author: abubakr Date: 11-05-2006, 04:32 AM Parent: #1 يالطيب Quote: رولر كوستر الرولر كوستر ياهو المزلقان الانت مزحلق خلق الله فوقو من لوري التيمس الي شدرة السنط الي زواجك من بت عمك الما عارفيين الماذون سوي فيهو شنو للحت مع غنا زيدان للناظر العجب.. اجعص ثيم بارك في الدنيا ما فيهو رولر كوستر زي بتاعك ... قال رحلة ومشوار و كلو يوم مزحلقنا

---

Post: #98 Title: Re: رحلة العمر..و مشوار السنين Author: الطيب شيقوق Date: 11-05-2006, 05:57 AM Parent: #97 Quote: الرولر كوستر ياهو المزلقان الانت مزحلق خلق الله فوقو من لوري التيمس الي شدرة السنط الي زواجك من بت عمك الما عارفيين الماذون سوي فيهو شنو للحت مع غنا زيدان للناظر العجب.. اجعص ثيم بارك في الدنيا ما فيهو رولر كوستر زي بتاعك ... قال رحلة ومشوار و كلو يوم مزحلقنا الله يمسخك ابو بكر كتلتني بالضحك عليك الله ما تطل علينا بهنا خليك مع قرض هناك

---

Post: #99 Title: Re: رحلة العمر..و مشوار السنين Author: abubakr Date: 11-05-2006, 11:28 AM Parent: #98 Quote: الله يمسخك ابو بكر كتلتني بالضحك عليك الله ما تطل علينا بهنا خليك مع قرض هناك هناك خليت الدفعة " رافت" وهو حيقوم باللازم .. يعني توزيع مهمات ...انا قاعد ليك هني النشوف اخرتا ..انا اشتريت لي زحلاقات لزم المزلاقانات بتاعتك

---

Post: #100 Title: Re: رحلة العمر..و مشوار السنين Author: الطيب شيقوق Date: 11-05-2006, 05:13 PM Parent: #99 كان الحاج محمد عبد الرحيم لحكمته وادبه ورزانته هو مستشار ناظر القبيلة . يحكى عنه انه عندما قرر النميري الغاء نظام الادارة الاهلية واقالة زعماء القبائل من مناصبهم ان قال للناظر لا تكترث سيدي لهذا القرار فانت كالوادى ان امطرت السماء وسالت ماؤه فهو وادي وان امسكت السماء ماءها ولم تمطر فهو ايضا هكذا. كان عمنا يوسف كسلا - طيب الله ثراه - القطب الاتحادي الديموقراطى - اكثر مواطنى الدندر شراسه في مواجه الناظر يوسف العجب غير ان الاخير كان يحبه ويحرص على دعوته في كل المناسبات . والراي عندى هو ان زعماء القبائل هم اكثر حكمة ودبلوماسية مع من يجاهرون بمواجهتهم ومناصحتهم . مضت عشرون يوما ونحن على عامنا الدراسي وكان اليوم العشرون يوم خميس وهو اول يوم يسمح لنا فيه الخروج لقضاء عطلة نهاية الاسبوع مع اهلنا بعد ان كان الاسبوعان الماضيان من حظ طلاب داخليتي الدندر وعطبرة . كانت تغمرنا الفرحة ونحن نرتب لزيارة اهلنا الذين يقيمون على مسافة عشرة كيلو فقط من مدينة القويسى . كنا اكثر حرصا على عدم اضاعة ثانية في المدينة من الساعات المخصصة لنا لقضائها مع اهلنا في الريف . لم نجد عربة لتقلنا الى اهلنا ولم يكن في وسعنا الانتظار فقررنا السفر على رجلينا بشارع التقاطع وهو اقصر شارع بين المدينة والقرية عصي على العربات لتقاطعه مع نهر الدندر في اكثر من منعطف . وقد كان توقيتنا مناسبا لان مياه نهر الدندر التى تنحدر من الهضبة الاثيوبية كانت وقتئذ داخل حظيرة الدندر على بعد 120 كيلو من القرية وربما يستغرق اسبوعا يمر خلاله بقري الدندر الواقعة على ضفته الشرقية و هذه القري ابقرة ونور الجليل ( قرية الشهيدة التاية ابو عاقلة الطريفي) وام عقرب وود التاي ودبركي والملاسي وام ضهير والتكمبري والدقاق وود دودة وحلة فايدة وود ابو تفه وام دمور والتكينة و عمارة مشايخ الابيضاب حيث القطب الديني الذى يسلك عليهم اهلنا الطريقة القادرية وهي اى العمارة هي البقعة المباركة التى يلتقي في مسيدها جميع سكان هذه القري ايام الاعياد . وقرية ود منصور وحيواء -حيث يوجد اول كبري يربط بين الشرق والغرب -ومنها مدينة الدندر . اما قرى الدندر الغربية التى يمر عبرها نهر الدندر فهي ابقرة غرب والشبعانة وعبد البنات ودرابة وبيضاء وام نمل وابو هشيم ( وقد كانت خدمات التلفون تصل لهذه القرية من اوائل الخمسينات ) و ابو البنات وحلة بلة وكامراب وخميسة وود بابو ونجم الدين وعمارة ود الصديق وكسيد وكاكوم (دى فيها فلاتى كارب بيكتب للنسوان عشان ما يعرسوا فيهن تاني وانا من ضحاياه ) وقرية اللويسة والبردانة (ام القرى) ثم قرية التكينة ومنها مدينة الدندر . يخرج مواطنو هذه القري عادة لمشاهدة مياه نهر الدندر وهى منحدرة في طريقها لتلتقي بمياه النيل الازرق في قرية الربوة شرق واد مدنى . وعادة يقل تفاؤل اهل اى قرية ، بخريف وافر الخيرات، عندما تاتيهم مياهه نهارا وهذا سبر توارثوه من الاجداد . هنالك قرى تابعة لنظارة الدندر ولكنها تقع شمال المدينة اشهرها - غرب النهر - ام عرديب والسريفة ( قرية الاستاذ احمد حماد ادريس) والقلة وجليدات واخرى شرقه اشهرها ام حنطور وحدية وطابت حلة الشيخ السماني . اغلب سكان هذه القري ينتمون الى قبائل رفاعة (القواسمة والحمدة والحلاويين والغلاتيين والعقليين) بالاضافة الى الكواهلة . نواصل نواصل

---

Post: #101 Title: Re: رحلة العمر..و مشوار السنين Author: mamkouna Date: 11-06-2006, 08:16 AM Parent: #1 Quote: وكاكوم (دى فيها فلاتى كارب بيكتب للنسوان عشان ما يعرسوا فيهن تاني) ياربي كاكوم دي... على بُعد كم ساعة من بطن بيتي؟؟!!!

---

Post: #102 Title: Re: رحلة العمر..و مشوار السنين Author: الطيب شيقوق Date: 11-06-2006, 10:19 AM Parent: #101 Quote: ياربي كاكوم دي... على بُعد كم ساعة من بطن بيتي؟؟!!! اها عشان كده انتى بتقولى لى احكى لينا بتفاصيل وانا خايف من دى ذاتها وخايف الناس تمل التفاصيل . انتى حاشاك الممكون ما برفع عينو لغيرك انسانة هدية ورضية . كل عام وانت بخير وما تطولي مننا كده شفقنا عليك

---

Post: #103 Title: Re: رحلة العمر..و مشوار السنين Author: الطيب شيقوق Date: 11-07-2006, 00:42 AM Parent: #102 نواصل

---

Post: #104 Title: Re: رحلة العمر..و مشوار السنين Author: الطيب شيقوق Date: 11-07-2006, 11:06 AM Parent: #103 نواصل

---

Post: #105 Title: Re: رحلة العمر..و مشوار السنين Author: abubakr Date: 11-07-2006, 11:41 AM Parent: #104 Quote: نواصل تواصل" طناش" مش كدة ؟؟

---

Post: #106 Title: Re: رحلة العمر..و مشوار السنين Author: الطيب شيقوق Date: 11-08-2006, 06:07 AM Parent: #105 Quote: تواصل" طناش" مش كدة ؟؟ خاف الله فيني خليني اتقدل . مودتى

---

Post: #107 Title: Re: رحلة العمر..و مشوار السنين Author: الطيب شيقوق Date: 11-08-2006, 11:59 AM Parent: #106 خرجنا من الداخلية و لا بد لنا من دخول سوق المدينة لشراء بعض هدايا الاطفال مما وفرناه من الخمس وعشرين قرشا – مصاريفنا لثلاث اسابيع . كنا اكثر ميولا لشراء حلاوة (بلي) لانها تباع بكميات مهولة وباقل تكلفة وترضى اكبر عدد من الاطفال الذين يستقبلونا فرحين بعودتنا اليهم . كان كبارنا من النساء والرجال لا يرجون منا الا عودتنا سالمين واسعادنا لاطفالهم بالبلي . فمن اعطيت ابنه حبة منها وهرول فرحا لابلاغه بها فقد نلت رضاه بل ربما رضاء كل افراد الاسرة . بعد شراء حاجياتنا تحركنا راجلين الى القرية . كان الطريق عبارة عن دوداب تصله اشعة الشمس فاترة وربما لا تصله احيانا لانه محمي منها بالاشجار الضخمة التي تتصافح هاماتها في رؤسنا و نمشى فيه وكاننا نمشى داخل الانفاق . كنا نجد حبات اللالوب والنبق متناثرة على الطريق ناكل منها الجزء الذى لم تكن عضته القرود والككاكي (ابلانج) . وما كنا نابه لتجميع شيئ من هذه الثمار لاطفال اهلنا حتى لا نبدد عشمهم في اسعادنا نحن القادمين من المدينة بخيراتهم من هذه الثمار !! عبرنا نهر الدندر بعد ان قطعنا حوالى الاربعة كيلو مترات من المدينة ولا بد ان نعبره مرة اخري قبالة المشرع الذى كان يرد فيه اهلنا . كنا نسارع الخطى لما بنا من شوق ولهفة لملاقاة اهلنا . نواصل

---

Post: #108 Title: Re: رحلة العمر..و مشوار السنين Author: abubakr Date: 11-08-2006, 01:39 PM Parent: #1 الطيب ..دي رحلة واللا حصة عبدالله الطيب في الن او تو الكنا بنحضرها معزوميين من ناس كلية الاداب نطلع منها طرش دوداب والككاكي (ابلانج) اشرح الذي تحته خط.. وبطل حركاتك واكتب عربي للناطقيين بغيرها جني الرطان

---

Post: #109 Title: Re: رحلة العمر..و مشوار السنين Author: الطيب شيقوق Date: 11-08-2006, 02:14 PM Parent: #108 Quote: اشرح الذي تحته خط.. وبطل حركاتك واكتب عربي للناطقيين بغيرها ياخي عليك الرسول تختاني انت بتقتلني بالضحك الجماعة جونى جاريين قالوا مالك تضحك براك ياخي انا خصصت ليك بوست كامل حق قرض وحزنه النبيل بهناك تااااااااااانى تبراني بهنا . انت عارف في ناس بيتصلوا فيني هاتفيا يصحونى من النوم بيقولوا لى قوم يقمقم عصبك امشى اقرا ابو بكر قال شنو في رحلة عمرك . واحدين قالوا لى الزول ده مش رطاني منكم انتو ذاتكم لكن بيتخفى .

---

Post: #110 Title: الككاكي..جمع كَكُو؟؟ Author: mamkouna Date: 11-08-2006, 03:05 PM Parent: #108 Quote: دوداب والككاكي (ابلانج) اشرح الذي تحته خط.. وبطل حركاتك واكتب عربي للناطقيين بغيرها أُثني!

---

Post: #111 Title: Re: الككاكي..جمع كَكُو؟؟ Author: الطيب شيقوق Date: 11-08-2006, 04:20 PM Parent: #110 ممكونة اختى ازيك وازاى الممكون والاولاد Quote: اشرح الذي تحته خط.. وبطل حركاتك واكتب عربي للناطقيين بغيرها الدوداب يا اخونا هو الشارع الوسط الاشجار او الحشائش الكثيفة وبيكون ممر لا يسع الا شخص واحد وكمان ممكن يكون في الصقيعة بدون شجر وحشائش لو كان سريتيك . والسريتيك هو دريب الغنم ماشة المرعي وهى بقياده كبيرة العمر فيهن او كبير العمر حسب مقتضى الحال بشرط ان تكون الغنم ماشة في شريط واحد وعلى اثر قائد الركب . واجمل الدودابات دوداب جداد الوادي في الخلاء. عربي البطانة قال في بنتا جميلة عاجباهو : الخلاني بدودابو ادبالو هو عارفني لا من جنسو لا ببقالو اما الككاكي فهي جمع ككو وهو من فصيلة القرده لكنه صغير وما بعضى . والابلانج هو الاسم الذى يطلقه ابناء المدن المجاورة للريف على الككاكي نفسها .

---

Post: #112 Title: Re: الككاكي..جمع كَكُو؟؟ Author: الطيب شيقوق Date: 11-09-2006, 00:36 AM Parent: #111 Quote: للناطقيين بغيرها يحضرني يا ابو بكر اخوى ان الدكتور عبد الله الطيب قد مرّ يوما على معهد اللغة العربية للناطقين بغيرها . كان اسم المعهد وقتئذ ( معهد اللغة العربية لغير الناطقين بها) شعر بعدم استحسان للاسم من ناحية لغوية فنادى على مدير المعهد وطلب منه استبداله بمعهد اللغة العربية للناطقين بغيرها وقد كان . مودتي

---

Post: #113 Title: Re: الككاكي..جمع كَكُو؟؟ Author: فاروق حامد محمد Date: 11-09-2006, 01:34 AM Parent: #112 [ Quote: B] وكسيد وكاكوم (دى فيها فلاتى كارب بيكتب للنسوان عشان ما يعرسوا فيهن تاني وانا من ضحاياه ) طيب مش كان تقول لينا م ...و مكتوب من الأول !!!!!!!!!!!

---

Post: #114 Title: Re: رحلة العمر..و مشوار السنين Author: abubakr Date: 11-09-2006, 01:48 AM Parent: #1 يالطيب Quote: عبرنا نهر الدندر كانو معاك السحر ة ؟؟طالما بقيت فرعون وبتعبر الانهار .. شوف الجاييك ( موسي وعصايتو )؟؟ ات في رحلتك دي ماشفت " سهيل" وكت ما كان عندك بوصلة ؟؟ بالمناسبة الغرض من الرحلة والمشوار كان شنو ؟؟ تفطر في الصفرة والا تشتري حلاوة" بلي" ؟؟ والا تحت مع زيدان ؟؟ حدد ...

---

Post: #115 Title: Re: رحلة العمر..و مشوار السنين Author: الطيب شيقوق Date: 11-09-2006, 04:16 AM Parent: #114 Quote: كانو معاك السحر ة ؟؟طالما بقيت فرعون وبتعبر الانهار .. شوف الجاييك ( موسي وعصايتو )؟؟ ات في رحلتك دي ماشفت " سهيل" وكت ما كان عندك بوصلة ؟؟ بالمناسبة الغرض من الرحلة والمشوار كان شنو ؟؟ تفطر في الصفرة والا تشتري حلاوة" بلي" ؟؟ والا تحت مع زيدان ؟؟ حدد ... لا لا نهر الدند بيكون فاضى في الوقت داك ما فيهوش ميّة . الغرض من الرحلة زيارة روتينية يسمح بها من قبل ادارة المدرسة كل 21 يوم وما تستعجل عشان اوريك انا ايام كنت عريس في المدرسة كيف كانت بت عمي بتحسب ال 21 يوم دى بالثانية ( ما بتخليني انت ربنا سلطك على الله يصرفك منى )

---

Post: #116 Title: Re: رحلة العمر..و مشوار السنين Author: abubakr Date: 11-09-2006, 05:50 AM Parent: #1 Quote: بتحسب ال 21 يوم دى بالثانية ا2 يوم شهر عند ناس السجون مش كدة ؟؟ Quote: الغرض من الرحلة ايه حكايتك مع الرحلات انت بقعدتك في مسقط فاكر نفسك "احمد بن ماجد " ( قول ما بتعرفو عشان العمانيين يعملو منك هريس ؟؟

---

Post: #117 Title: Re: رحلة العمر..و مشوار السنين Author: الطيب شيقوق Date: 11-09-2006, 06:27 AM Parent: #116 ( قول ما بتعرفو عشان العمانيين يعملو منك هريس ؟؟ احمد ده هو فرمالتهم والله اكان عملت ليهو مقص بعيد بكيجاب يجيب خبره . نسيتو ابو خرز ابو خرز ( هو القدح الماكن بجيبوهو الشيوخ للمحبين والمداح في المسيد وعادة عنده اربعة مقابض للعتالة . واحد من اهلنا حكى لى قال لي والله يا الطيب ولدى مشينا مسيد الشيخ وجابوا لينا ابو خرز مليان عصيدة ببوخها وكنا جعانين واكلنا زييييين لما قمنا الواحد قام شايل قلفة ( القلفة هى ما تحملة الرجل عند وطئها تراب مبلول وهنا كناية على الشبعة السيدها لحدى راحاتو عرقت وقام شايل قلفة )

---

Post: #118 Title: Re: رحلة العمر..و مشوار السنين Author: abubakr Date: 11-09-2006, 08:23 AM Parent: #117 يالطيب Quote: زييييين لما قمنا الواحد قام شايل قلفة ( القلفة هى ما تحملة الرجل عند وطئها تراب مبلول وهنا كناية على الشبعة السيدها لحدى راحاتو عرقت وقام شايل قلفة ) ده كلام تقولو والواحد معزوم دينر الليلة في ريزورت باب الشمس ... ماهو بشان كدي نحن بتقيف طوابير نلتقط قطعة من السمبوسة والكافيار وووو كل المشهيات في السلف سيرفز ..ميزة تكون طباخ ابن طباخ زي جني الرطان الشيف انو مافي خمج وكلو شغل شيف ( ما سمعت بشيف اسامة وشيف رمزي والاخير دة يوم وقف الحركة في تقاطع جنب الميديا سيتي وهو ماشي لللاستوديو يصور وانا ماشي للمكتب برضو جنب الميديا سيتي-شايف مش عبرنا نهرا بتاعتك التقول تمساح - صاحبنا كان في سيارة بيييييضضضضا وطوييييييلة ونحن المطلع راسة يتاوق والرافع يدو " هاي شيف ؟؟" وواحدات " يقبرني شو مزيون " وواحدات " ياعمري ياشف رمزي المعكرونة بالبشملي بيحطولها ملح ؟ "" اها ياللطيب وحلتك ام اضنيين البيشلوها عتالة دي يلقوليها شف من وين ؟؟؟ قال القلفة قال ؟؟؟؟ شوف مهما خمجت وجبت امثلتك بتاعة القلفة دية برضو وراك نشوف رحلتك دي البقت زي قروانة المساجيين كلها قدود حتوصلنا وين ؟؟

---

Post: #119 Title: Re: رحلة العمر..و مشوار السنين Author: الطيب شيقوق Date: 11-09-2006, 11:29 AM Parent: #118 Quote: ده كلام تقولو والواحد معزوم دينر الليلة في ريزورت باب الشمس ... ماهو بشان كدي نحن بتقيف طوابير نلتقط قطعة من السمبوسة والكافيار وووو كل المشهيات في السلف سيرفز بالله يا ناس حلفا قادر الله من تك للمفك ومن المخلاية الفيها اللقيمة والبصلة للسلف سيرفز .

---

Post: #120 Title: Re: رحلة العمر..و مشوار السنين Author: abubakr Date: 11-09-2006, 01:35 PM Parent: #119 Quote: بالله يا ناس حلفا قادر الله من تك للمفك ومن المخلاية الفيها اللقيمة والبصلة للسلف سيرفز . اها في دي طبظت ساي ... اندنا الوجبات توكل طازجة وساخنة وتتواجد في كل مكان بين المدرسة والبيت بحيث لا تحتاج لحمل زوادة وبالتالي لمخلاية ولا لعبور الانهار واللقيمات دي للفقراء وابن السبيل ...ولا عندنا حلل باضنيين .. فاست فود !!

---

Post: #121 Title: Re: رحلة العمر..و مشوار السنين Author: الطيب شيقوق Date: 11-09-2006, 06:04 PM Parent: #120 Quote: وبالتالي لمخلاية ولا لعبور الانهار واللقيمات دي للفقراء وابن السبيل ...ولا عندنا حلل باضنيين .. فاست فود !! ووووووووووووب منك . انت ابو بكر عندك كم كمبيوتر في البيت ماشي حد من الاولاد بيقول ليك ادينا سحبة.

---

Post: #122 Title: Re: رحلة العمر..و مشوار السنين Author: abubakr Date: 11-09-2006, 06:15 PM Parent: #121 يالطيب Quote: ووووووووووووب منك . انت ابو بكر عندك كم كمبيوتر في البيت ماشي حد من الاولاد بيقول ليك ادينا سحبة. من سنه 79 وانت لسه بتعبر الانهار الجافة وانا هوايتي الكمبيوترات وفي سنوات ودرت شغل الهندسة و فتحت دكان - مش زي بتاع قراونة الطحنية - كمبيوتر ودة كان قبل عشريين سنة ولكن كنت فاتحو هواية عشان كدة رجعت اشتغل بناء تاني ... وبالتالي وزي الرحلات والمشاوير هوايتك وعندك منها كتير فانا ما بستغني علي 3 علي الاقل لي انا بالاضافة الي البيشيلوها في كف اليد البدي اي و كل القادكيتز والقيزموز والكوميونيكترز ...بعدين الكمبيوترات ما بقت ارخص من قروانة الطحنية ...

---

Post: #123 Title: Re: رحلة العمر..و مشوار السنين Author: الطيب شيقوق Date: 11-10-2006, 00:28 AM Parent: #122 Quote: من سنه 79 وانت لسه بتعبر الانهار الجافة وانا هوايتي الكمبيوترات وفي سنوات ودرت شغل الهندسة و فتحت دكان - مش زي بتاع قراونة الطحنية - كمبيوتر ودة كان قبل عشريين سنة ولكن كنت فاتحو هواية عشان كدة رجعت اشتغل بناء تاني انا بقول ليك بتستعجل عايزك تنتظر احكى ليك رحلة العمر والقروانة التي انتجت شباب تخرج من احدث كليات تقنية المعلومات وهم الان اداريو لمحلات تقنيات المعلومات بام درمان بالاسم التجاري (Shaigoog Center for Computer Science ) وشباب اخرون يشرفون الان على برامج رحلاتكم الجوية وحاجات تشيب راسك يا باش

---

Post: #124 Title: Re: رحلة العمر..و مشوار السنين Author: abubakr Date: 11-10-2006, 01:29 AM Parent: #123 يالطيب ال ITزيو زي اي تكنولوجيا اخري ...نحن في الجانب الاخرُُ مستعمليين للتكنولوجيا وليس لدينا اسهام في تطور التكنولوجيا فكما لدينا مهندسون وميكانيكية لديهم اماكن لاصلاح المركبات والمعدات الميكانيكية لدينا كذلك محلات لخريجي ما يسمي بعلوم الكمبيوتر لبيعها او كتابة برنامج بلغةمن لغات الكومبيوتر لم نكتشفها او نطورها -امر جد متاح وربما لايحتاج الي دراسة - او نستعمل برامج غرافيك لتصميم ملصقات او صفحات .. الخ ... نحن في الطرف المتلقيEnd User وبالتالي هذا ليس انجازا بل استعمالا لانجاز .. ما يحدث في انفوسيس في الهند و بينانق وسايبرجايا في ماليزيا وفي هونق كونق وتايبي وشينزن وشنغهاي واماكن اخري عديدة في الصين من تطوير واختراع في مجالات الكمبيوتر هو المهم ....ارجو ان ننظر الي موقعنا تماما ليس في استعمالات الاشياء ولكن في خلقها وتطويرها وتلك امور لا تحتاج الا الي ادارة دولة وجامعات مسؤلة ورجال صناعة لهم فكر ورؤية واضحة عن مستقبل بلادهم ومكانها في العالم .. كثرة الجراجات او معارض السيارات او معارض بيع الاثاث مثلها مثل كثرة محلات بيع الكمبيوترات او ما يطلقه البعض تطوير المواقع الاليكترونية ..الخ كلها خدمات شرائية وليست اختراعية او تطويرية .. خدمات استهلاكية في عالم لا يزدهر فيه الا الصانع وليس المستعمل المستهلك ...العقول في السودان او في الهند(معقل تطوير الكمبيوتر وبرامجه في العالم اليوم ) لا تختلف ولكن الادارة تختلف جدا .... طلعتنا من موضوع رحلتك وزواجك دون السن القانونية واهو دي مشكلة نشوفلها حل وخليك من التكنلوجيا ز.انت مالك ومالها ...

---

Post: #125 Title: Re: رحلة العمر..و مشوار السنين Author: فاروق حامد محمد Date: 11-10-2006, 02:47 AM Parent: #124 Quote: الغرض من الرحلة زيارة روتينية يسمح بها من قبل ادارة المدرسة كل 21 يوم وما تستعجل عشان اوريك انا ايام كنت عريس في المدرسة كيف كانت بت عمي بتحسب ال 21 يوم دى بالثانية ( ما بتخليني انت ربنا سلطك على الله يصرفك منى ) ات يا بن شيقوق في الابتدائي كنت بتعرف العرس !!!!!!!!!؟؟؟؟؟؟؟؟ شديتك فوق الله !!!!!!!!!!!!!!!!!!!!!!!!!!!!!!!!!!!!!!!

---

Post: #126 Title: Re: رحلة العمر..و مشوار السنين Author: فاروق حامد محمد Date: 11-10-2006, 02:54 AM Parent: #125 Quote: ايام كنت عريس في المدرسة كيف كانت بت عمي بتحسب ال 21 يوم دى بالثانية ( ما بتخليني انت ربنا سلطك على الله يصرفك منى ) هذا يعني انك دخلت الابتدائي وقد اخضر شاربك وبلغت الحلم قبل ذلك سنين عددا!!!!!!!!!!!!!!!!!!!!!!!

---

Post: #127 Title: Re: رحلة العمر..و مشوار السنين Author: الطيب شيقوق Date: 11-10-2006, 03:55 AM عبرنا نهر الدندر بعد ان قطعنا حوالى الاربعة كيلو مترات من المدينة ولا بد ان نعبره مرة اخري قبالة المشرع الذى كان يرد فيه اهلنا . كانت المسافة بين المشرعين حوالى الست كيلو مترات مشيناها في اقل من ثلاثين دقيقة . وصلنا مشرع القرية الذي كان يلامس خصرها من الجهة الغربية . كانت لنا الكثير من الذكريات والخواطر هنا في هذا المشرع . كنا اكثر تشوقا لسماع جرس الحصة الاخيرة في المدرسة لنخرج منها بكثير من الضجيج . لم يكن هذا الضجيج لدوابنا عبثا لانها تدرك تماما ان وقت سقائها في المشرع قد حان . كنا نخرج من المدرسة منشدين قصائد اليوم وكانت اجمل الاناشيد التى خلدت في ذاكرتي : بلادى بلادى فداك دمى وهبت حياتي فدا فاسلمي غرامك اول ما في الفؤاد ونجواك اخر ما في دمي ساحلف باسمك ما قد حييت تعيش بلادي ويحيي الوطن وكذلك انشودة ( علمي انت رجائي ......) وقد كنت اكثر ابداعا في اداء مقاطعها التي تقول (لونك الاخضر زرع لونك الاصفر ارض لون الازرق ماء) . وبعد ان نصل الى بيوتنا نعلق حقائبنا على المسامير المخصصة لها على امينة المنزل ، ان كان من الطوب او الجالوص او شعبة القطية ان كان البيت من النال . كان يمكن ان تقرأ من حجم وشكل الحقيبة الى اي مرحلة دراسية ينتمى التلميذ ، فان كانت مليئة نافخة كراساتها جميع الزوايا وبها براقع من الحبر الازرق فهذا دليل على ان التلميذ في ثالثة اورابعة ويمكن ان يعهد اليه كتابة الرسائل المنمقة كما ويمكن اجلاسه في عنقريب قعدات العرس جوار العريس لتسجيل النقطة ( النقطة هى ما يساهم به كل من اهل القرية لوالد العريس) كنا بعد الدروس وبعد الغداء نركب الدواب لنسقيها في المشرع وكانت كلابنا هى الاخري الاكثر سعادة وهى تلهث خلفنا للمشرع . كان المشرع مجمع يلتقى فيه اغلب اهل القرية للغسيل و حمل الماء للبيوت وصيد السمك احيانا . كنا بعد الوردة نذهب لالتقاط اجود واحلى ثمار النبق الناضجة والتي تتساقط تحت ظلال اشجار السدر الضخمة التي تنمو على شاطى النهر . كان رعاة الابل من اهل البادية الذين ياتون ايام الضمئ يتركون ابلهم على مناخها ( بفتح الميم) لأن ينجموا في ظل هذه الاشجار يتسامرون بالدوبيت والمسادير الحنينة . نواصل

---

Post: #128 Title: Re: رحلة العمر..و مشوار السنين Author: الطيب شيقوق Date: 11-10-2006, 04:09 AM Quote: هذا يعني انك دخلت الابتدائي وقد اخضر شاربك وبلغت الحلم قبل ذلك سنين عددا!!!!!!!!!!!!!!!!!!!!!!! الفاروق اخوى لا تحقمنا وحياتك ( تاني حلف طلاق مافي من بوست غازي سليمان الحذر فيهو ابو بكر من الحلف بالطلاق ) لا تقحمنا في ماهية الحب لانو ده موضوع استحى الكتابة عنه لانسان في قامتك . The issue is very debatable انت اعمل لينا بوست خاص للحديث فيه عن علاقة الحب بالجنس بس ابعدنا من افكار فرويد

---

Post: #129 Title: Re: رحلة العمر..و مشوار السنين Author: abubakr Date: 11-10-2006, 04:56 AM Parent: #1 يالطيب انت عجب مش الطيب Quote: ماهية الحب لانو ده موضوع استحى الكتابة عنه لانسان في قامتك . تكتب عن الخمج والقلفة وتستحي الكتابةعن الحب ؟؟؟ وقامة فاروق مالها ومال حياءك وحبك عاملة ليك فزاعة طير تطير حب الكدايس الفي قلبك ؟؟ شنو يالرهيف ؟ روح اعبر نهرك الناشف ؟؟ طب مسمنو نهر ليه مدام ناشف ومدام ناشف لزمها شنو " عبرنا النهر" .. واطة ناشفة سميتها نهر كيف؟ ... انا حسه عايز اعرف منو الخجلان من التاني ؟؟

---

Post: #130 Title: Re: رحلة العمر..و مشوار السنين Author: الطيب شيقوق Date: 11-10-2006, 06:47 AM Parent: #129 Quote: تكتب عن الخمج والقلفة وتستحي الكتابةعن الحب ؟؟؟ وقامة فاروق مالها ومال حياءك وحبك عاملة ليك فزاعة طير تطير حب الكدايس الفي قلبك ؟؟ شنو يالرهيف ؟ روح اعبر نهرك الناشف ؟؟ طب مسمنو نهر ليه مدام ناشف ومدام ناشف لزمها شنو " عبرنا النهر" .. واطة ناشفة سميتها نهر كيف؟ ... انا حسه عايز اعرف منو الخجلان من التاني ؟؟ شكيت على الله انت القلفة مشيت بها هنااااااااااااك لكتاب آسيا ......لا لا القلفة هنا بتعنى الطين الذي تحملة الراحات ( الراحات هى مواطئ القدمين) عندما تكون الارض مبتلة . الفاروق ما بخجل ابو بكر اخوى انت ما قريت بوستو الجديد بتاع ال ....... الزول ده مالك ما ناصحتو بالطريقة دي الحريم سيتفرقن ايدى سبأ من المنبر.

---

Post: #131 Title: Re: رحلة العمر..و مشوار السنين Author: فاروق حامد محمد Date: 11-10-2006, 06:52 AM Parent: #130 Quote: الفاروق ما بخجل ابو بكر اخوى انت ما قريت بوستو الجديد بتاع ال ....... الزول ده مالك ما ناصحتو بالطريقة دي الحريم سيتفرقن ايدى سبأ من المنبر . لا أعتقد يا الطيب !!!!!!!!!!! ـــــــــــــــــــــــــــــــــ

---

Post: #132 Title: Re: رحلة العمر..و مشوار السنين Author: الطيب شيقوق Date: 11-10-2006, 07:34 AM Parent: #131 Quote: لا أعتقد يا الطيب !!!!!!!!!!! ـــــــــــــــــــــــــــــــــ عليك الله الفاروق اخوى الصنديد اكان في واحدة عملت مداخلة في البوست بتاعك بالعنوان ( الفلاني) ناديني سريع اشوف شن بتقول .

---

Post: #133 Title: Re: رحلة العمر..و مشوار السنين Author: abubakr Date: 11-10-2006, 08:13 AM Parent: #132 Quote: عليك الله الفاروق اخوى الصنديد اكان في واحدة عملت مداخلة في البوست بتاعك بالعنوان ( الفلاني) ناديني سريع اشوف شن بتقول الفارووق ده انت قايلو ما بشوف كيفن تقولو ناديني سريع وانت اصلا حتكون هناك .؟ مانت في كل المداخلات موجود ماعدا حقتك السجمانة" رحلة العمر..و مشوار السنين"

---

Post: #134 Title: Re: رحلة العمر..و مشوار السنين Author: الطيب شيقوق Date: 11-10-2006, 10:38 AM Parent: #133 Quote: كيفن تقولو شغال جوكر؟ ابقى على رطانتكم يا اخوى .

---

Post: #135 Title: Re: رحلة العمر..و مشوار السنين Author: KalamSakit Date: 11-10-2006, 04:07 PM Parent: #1 عزيزي ( المحامي ولا الفحامي ) الطيب شيقوق - المحترم زي ما قال ليك أخونا د. أحمد القرشي ، عترت لي سيرتك الشيقة دي وقلت فرصة طيبة أكون أحد المتابعين ليهامع خالص تحياتي ( زميل ســـكـن عزابة ســابق ) مسقط

---

Post: #136 Title: Re: رحلة العمر..و مشوار السنين Author: الطيب شيقوق Date: 11-10-2006, 04:29 PM Parent: #135 Quote: عزيزي ( المحامي ولا الفحامي ) عزيزي كلام ساكت - انت كلامك مليان وكتر خيرك على مرورك - والفحامى ولا المحامي حتكون واحدة من فصول هذه الرواية تابع بس واسمعنا اى كلام وان كان ساكت . لك ودى يا باش (ان صدق ظني)

---

Post: #137 Title: Re: رحلة العمر..و مشوار السنين Author: abubakr Date: 11-10-2006, 05:02 PM Parent: #1 Quote: شغال جوكر؟ ابقى على رطانتكم يا اخوى . الرطانة مالها ؟؟ لا فيها "فحامي " ولا "قلفة" كلام غنا بس ؟؟ وبعدين ايه حكاية سكن العزابة ؟ ات ما قت زوجوك وات في اللفة ؟ ات كت عزابي قبل اللفة ؟ عجيبة .. نهرا ما فيهو ماء و قروانة طحنية وحلاوة بلي وحلة باربع اضين ...؟؟ الحكاية شنو .. ؟ رحلتك دي في وادي العطرون اصلو عندهم سجن ماكن هناك وحلل كبيرة للملاح ال"اورديحي (تموت عشان تعرف دي شنو؟؟ اسال مولانا سمير ؟)" والطحنية مشهورة جدا لزوم الزيارة ؟

---

Post: #138 Title: Re: رحلة العمر..و مشوار السنين Author: الطيب شيقوق Date: 11-10-2006, 05:11 PM Parent: #137 Quote: الرطانة مالها ؟؟ لا فيها "فحامي " ولا "قلفة" كلام غنا بس ؟؟ وبعدين ايه حكاية سكن العزابة ؟ ات ما قت زوجوك وات في اللفة ؟ ات كت عزابي قبل اللفة ؟ عجيبة .. نهرا ما فيهو ماء و قروانة طحنية وحلاوة بلي وحلة باربع اضين ...؟؟ الحكاية شنو .. ؟ رحلتك دي في وادي العطرون اصلو عندهم سجن ماكن هناك وحلل كبيرة للملاح ال"اورديحي (تموت عشان تعرف دي شنو؟؟ اسال مولانا سمير ؟)" والطحنية مشهورة جدا لزوم الزيارة ؟ والله انا اشتكيك انت والفاروق لبكري عشان يلحقكم تراجى سريع الفاروق يعلق في الدودار وانت تعلق في القلفة ( ليك حق الايام دى بتقرأ في كتاب مقدم جدا) خصمتك بالله تختاني يا زول خليني انجم في رحلة عمري ومشوار سنيني براى

---

Post: #139 Title: Re: رحلة العمر..و مشوار السنين Author: abubakr Date: 11-10-2006, 05:18 PM Parent: #1 Quote: خصمتك بالله تختاني يا زول خليني انجم في رحلة عمري ومشوار سنيني براى انت رحلتك دي فيها بنج عشان تنجم ؟ كيفن في رحلة ومشوار وبتعبر نهرا ناشفا وتنجم ؟ كيف يعني ؟؟؟

---

Post: #140 Title: Re: رحلة العمر..و مشوار السنين Author: الطيب شيقوق Date: 11-11-2006, 02:13 AM Parent: #139 عبرنا نهر الدندر بعد ان قطعنا حوالى الاربعة كيلو مترات من المدينة ولا بد ان نعبره مرة اخري قبالة المشرع الذى كان يرد فيه اهلنا . كانت المسافة بين المشرعين حوالى الست كيلو مترات مشيناها في اقل من ثلاثين دقيقة . وصلنا مشرع القرية الذي كان يلامس خصرها من الجهة الغربية . كانت لنا الكثير من الذكريات والخواطر هنا في هذا المشرع . كنا اكثر تشوقا لسماع جرس الحصة الاخيرة في المدرسة لنخرج منها بكثير من الضجيج . لم يكن هذا الضجيج لدوابنا عبثا لانها تدرك تماما ان وقت سقائها في المشرع قد حان . كنا نخرج من المدرسة منشدين قصائد اليوم وكانت اجمل الاناشيد التى خلدت في ذاكرتي : بلادى بلادى فداك دمى وهبت حياتي فدى فاسلمي غرامك اول ما في الفؤاد ونجواك اخر ما في دمي ساحلف باسمك ما قد حييت تعيش بلادي ويحيي الوطن وكذلك انشودة ( علمي انت رجائي ......) وقد كنت اكثر ابداعا في اداء مقاطعها التي تقول (لونك الاخضر زرع لونك الاصفر ارض لون الازرق ماء) . وبعد ان نصل الى بيوتنا نعلق حقائبنا على المسامير المخصصة لها على امينة المنزل ، ان كان من الطوب او الجالوص او شعبة القطية ان كان البيت من النال . كان يمكن ان تقرأ من حجم وشكل الحقيبة الى اي مرحلة دراسية ينتمى التلميذ ، فان كانت مليئة نافخة كراساتها جميع الزوايا وبها براقع من الحبر الازرق فهذا دليل على ان التلميذ في ثالثة اورابعة ويمكن ان يعهد اليه كتابة الرسائل المنمقة كما ويمكن اجلاسه في عنقريب قعدات العرس جوار العريس لتسجيل النقطة ( النقطة هى ما يساهم به كل من اهل القرية لوالد العريس) كنا بعد الدروس وبعد الغداء نركب الدواب لنسقيها في المشرع وكانت كلابنا هى الاخري الاكثر سعادة وهى تلهث خلفنا للمشرع . كان المشرع مجمع يلتقى فيه اغلب اهل القرية للغسيل و حمل الماء للبيوت وصيد السمك احيانا . كنا بعد الوردة نذهب لالتقاط اجود واحلى ثمار النبق الناضجة والتي تتساقط تحت ظلال اشجار السدر الضخمة التي تنمو على شاطى النهر . كان رعاة الابل من اهل البادية الذين ياتون ايام الضمئ يتركون ابلهم على مناخها ( بفتح الميم) لأن ينجموا في ظل هذه الاشجار يتسامرون بالدوبيت والمسادير الحنينة . نواصل

---

Post: #141 Title: Re: رحلة العمر..و مشوار السنين Author: الطيب شيقوق Date: 11-11-2006, 02:46 AM Parent: #140 Quote: الأخ الطيب شيقوق : السلام عليكم ورحمة الله وبركاته لقد فتقت في ذاكرتي خيران ومسارب لذكريات موغلة في القدم أنا الآن مطوطح في حاحاية لكن ليست كتلك التي كنا مثلك نجلس عليها بالفرطوق لمناحاة الطير أنا مطوطح في ناطحة سحاب في قلب طوكيو أها جاييك في الكلام لان حديثك الثر قادني الي ذات المشاهد والصور في طفولتي وهي في مكان لايبعد عن الأمكنة التي تصورها بهذا السرد الخرافي الذي يمسك الأنفاس ويجعلها مبهورة وخاصة أولئك الذين لم يعايشوا الحياة بهذا الزخم والعناق الحميم لمفاصلها أنا بهاءالدين الهادي خير السيد من كساب الجعليين واسماعيل حسن دا ولدو وليد دفعتي في كساب الابتدائية سنة 1969 وحتي 1974 كل هذه المشاهد ليست غريبة علي وأظن كثيرون من أبناء كساب درسوا معك ولي ذكريات عطرة بأم عرديب مع ابناء عمي العوض عثمان ( ترزي قديم ) قدم الدمورية وعراقي الساكوبيس حقك يمكن هو الذي خاطه لك عموما سرني التعرف عليك وسرني أكثر التصاقك بأهلنا الغبش الذين لا زالوا علي اتحاديتهم ولا زالوا علي حالهم مع قليل تطور والله يجازي الحكومات عموما هذه خواطر سقتها في عجلة انا محاضر في المعهد العربي الاسلامي بطوكيو ( لغة عربية ) ومترجم أها رأيك شنو محاحاة الطير ودق العيش ولم البتاب للمطامير ما نفع ؟؟ لولا ما غرسه أهلنا فينا من شمم وكبرياء لما كنا كما نحن الآن فالحمد لله أولا وربنا يقدرنا نقدم لأهلنا بقدر ما قدموا لنا اذ وهبونا الحياة العريضة الكريمة فما نحن الآن الا لما غرسوا أمس دمت ودام فرحك ودام الحياة هنيئة لك موبايل : 00818050106533 e.mail : [email protected] bahahadi"hotmail.com ملحوظة : لآ املك عضوية في سودانيز اونلاين والاكنت تداخلت معك بما يثري رغم ان الكثير مكن طلاب في حنتوب الثانوية في الفترة من 1985وحتي 1991 بكثرة في المنتدي لك شكري بهاءالدين الهادي خير السيد كساب الجعليين

---

Post: #142 Title: Re: رحلة العمر..و مشوار السنين Author: الطيب شيقوق Date: 11-11-2006, 09:41 AM Parent: #141 Quote: أنا مطوطح في ناطحة سحاب في قلب طوكيو ربنا يحفظ ويخليك يا بهاء خليك معانا ومرحب باى من ابناء اهلنا الغلابة الذين استطاعوا بعزمهم الانتقال من حاحاية الطير لحاحايات طوكيو وغيرها من مدن العالم . لك مودتى

---

Post: #143 Title: Re: رحلة العمر..و مشوار السنين Author: الطيب شيقوق Date: 11-11-2006, 04:33 PM Parent: #142 Quote: ال ITزيو زي اي تكنولوجيا اخري ...نحن في الجانب الاخرُُ مستعمليين للتكنولوجيا وليس لدينا اسهام في تطور التكنولوجيا فكما لدينا مهندسون وميكانيكية لديهم اماكن لاصلاح المركبات والمعدات الميكانيكية لدينا كذلك محلات لخريجي ما يسمي بعلوم الكمبيوتر لبيعها او كتابة برنامج بلغةمن لغات الكومبيوتر لم نكتشفها او نطورها اخي ابو بكر ما يدرسه المهندسون او الاطباء او القانونيون جميعها نظريات تمخضت عن اكتشافات علمية لافراد او مؤسسات . ولا يقدح في كون المتخصص في هذه العلوم كونه لم يستحدث الجديد في هذا المجال او ذاك . مودتى

---

Post: #144 Title: Re: رحلة العمر..و مشوار السنين Author: الطيب شيقوق Date: 11-12-2006, 07:01 AM Parent: #143 بعد أن تدحرجنا من المدلية ( حافة النهر ) لاحت إلينا مشاهد أهلنا من بعيد ، بعض يغسل في ملابسة واخرون يسقون دوابهم ومجموعة أخرى من الأطفال يلعبون على كثبان الرمال . وبعد أن تقاربت المسافة ، وتعرفوا على وجوهنا صاحوا فرحين بعودتنا. بعض من هولاء الأطفال لم ينتظر لملاقاتنا بل هرول إلى الحلة لإبلاغ الأهل بعودتنا ، واخرون منهم تناولوا منا حقائبنا وهم اكثر تركيزا بعيونهم في وجوهنا التي بدت تأخذ من سمات المدينة . عندما كنا على مشارف القرية لاحظنا أطفالا آخرين قادمين من داخل الحلة لاستقبالنا مبتهجين بقدومنا بعض منهم حافي القدمين لا يأبه لطعنات الضريسة المسمومة(الضريسة هي نوع من الشوك ينمو نباته جوار القرى)

---

Post: #145 Title: Re: رحلة العمر..و مشوار السنين Author: الطيب شيقوق Date: 11-13-2006, 01:54 AM Parent: #144 نواصل

---

Post: #146 Title: Re: رحلة العمر..و مشوار السنين Author: الطيب شيقوق Date: 11-13-2006, 01:32 PM Parent: #145 نواصل

---

Post: #147 Title: Re: رحلة العمر..و مشوار السنين Author: الطيب شيقوق Date: 11-13-2006, 05:01 PM Parent: #146 لم يكن شوقنا لابقارنا واغنامنا وكلابنا اقل شوقا من شوقنا لاهلنا . كنا نسال عن قمرية وحورية وسرية والمنادهيب ( جمع مندهوب وهي العجلة التي اقتربت من سن العشار) . كانت امي الجالسة بجواري في الهباب المفروش بالدقة ( البرش الدقة هو اجمل واغلى انواع البروش المصنوعة من الزعف) قد همست في اذني تذكرني بالعم الرضى والطيب وعبد الغني وابراهيم كبار الحلة وطلبت منى الذهاب اليهم لانهم متلهفون لرؤيتي ولكنهم بسبب العمر يصعب عليهم الوصول الى منزلنا . ذكرتني امي بالعمة زينب وشروقو وفاطمة وام الحسن ولم يكن قد غبن عن بالي لاني لا انسى الكعك والتمر والحلاوة التي يملان بها جيوبي في مناسبات اعياد رمضان والاضحى . نواصل

---

Post: #148 Title: عودة الغائب يا ود شيقوق Author: احمد حماد ادريس Date: 11-14-2006, 06:02 AM Parent: #1 كنت اخاف الغربة واخشى الموت جوعا ان تركت مراتع الصبا ..كانت انفاسى تضيق كلما مرت بخاطرى فكرة الهجرة فانا المجبول على شعر واغانى تساوى فى مرحها وحزنها بين الغربة والموت ..اغانى تشرح لك كيف يموت الغريب ولا يجد من يبكيه ويسير خلف جنازته ..وتراثنا يزن منزلة الانسان بكثرة مشيعي جنازته وهى اخر الاثار التى تظل فى ذاكرة الاحياء ..وعندما اراد مبغضو الفكى صاحب الراى المستنير ابراهيم التحفى الحط من قدره قالوا لم يتبع جنازته سوى خمسة انفار مع انه مات ببلاده..بما اننى كثير الضحك ولاننا متشائمون لا ياتينا الضحك والفرح الا قبل الفواجع ففسرنا دموع المكثر للضحك انه يموت غريبا.. كنت واثقا وثقتى ليس فى محلها اننى سوف اعود بعد غربة طارئة لا تزيد عن شهور عدة ولكنها امتدت لعشرين عاما بل تزيد حصلت خلالها على جوازى سفر لدولتين احداهما بالصدفة والذلة والاخر بقوة القانونلان جواز سفرى السودانى لم يقبله غير موظف البريد برئاسة بلدية مقديشو عندما ذهبت اليه لاستلام طرد قادم من الخليج يحتوى على سمة دخول لكن صاحب البريد لم يتركنى وغرورى فقال لى بعد ان انجز ما اريد ..جوازك مزور.. بعد غياب مدة طويلة عدت الى قريتى الحبيبة التى لاتشبه تلك الواقعة على المنحنى فى النيل ولا هى جيكور السياب التى صارت بشناشيلها وشجرها ونهرها نافذة الامل فى احلك ساعات الياس والاحباط..ولا هى ياسانيا بوليانا التى كانت بالنسبة لتولستوى الجنة الارضية الموعودة التى اصبحت اشهر من موسكو عند الروس وعند اهل الادب بمثابة تامحج الذى لابد من زيارته لكل من يصل الى تلك الاصقاع النائية واخر ما تبقى من يوتوبيا الخيال.. دخلت القرية ذات اصيل غائم وساد هرج ومرج وصخب وتجمع حولى خلق كثير ..تسائلت من هم هؤلاء ..قيل لى انهم اهلك ..ومن هى هذه السيدة صاحوا انها امك..اجابوا جميعا ودهشتهم تسيل على قامتى .روحى تموع تحت تساؤلاتهم ولا يبدو ان هناك مكانا اخرا بوسعى انتحل الحنبن اليه ..انا فى البيت الان كما يزعمون والرحلة انتهت يكررون امام حيرتى ها انت عدت اخيرا ..كنت فى مركز اهتمامهم مشدودا الى مراقبة وجوههم المزدحمة امامى وسط صالة تضيق بهم ..عيون بكثرة مرعبة تتفرس فى وجهى..اراغب ثيابا غريبة اراها فى باحة البيت الخلفية عبر الشباك تتدلى من حبل الغسيل فى هواء ساكن..اشرت الى الحبل وقلت لتوامى هل لى ان اذهب الى هناك لكنه تجاهل رغبتى مفضلا الانسياق وراء حديثهم فى الاحتفاء بعودتى..يحتشدون امامى رجالا وصبيانا وامهات وزوجات وفتيات ..رجل كبير السن يجلس على عتبات البيت مشغولا بمسبحة غليظة الحرز يستنطقها بايقاع رتيب..يجلس توامى السعيد بعودتى ملتصقا بى ..هو الفتى اليافع الذى رافقنى امام اعينهم مجيبا على تساؤلاتهم بدلا عنى ..قيل لى انه توامى وهو اصغر منى يعقود بنصف قرن..نصف حياة..نصف ذاكرة..هل جرب الغياب ..كنت غائبا حين مات ابى ..اخبرونى بالنبا فولر وصولى ..كنت اؤدى غيابى بعيدا عنهم لاعوام بمثابرة جندى فولاذى الطاعة..لم اعد قادرا على ادراك موقع الاهمية فى عودتى ..فى حضورى المتاخر..هزا ضخم يخيم على روحى وتعتمل فيها سخرية مهرج متبرم استنفد المفارقات جميعها.. قطرات الماء تتساقط من القمصان الندية المنزلية اردان سائبة تنزف قطرات من دم ابيض ..ايقاع المسبحة يستولى على الصمت احيانا ويجزءه الى مقاطع متعاقبة..لم يكن العجوز الجالس على العتبة ينظر الى ربما كان يتامل اشياء اختلطت مع الخرز بين اصابعه..اردت ان اسالهم من هذا الرجل ولكننى سرعان ما امتنعت خشيت ان اثير زوابع اخرى من الدهشة وشفقة عليه من الم يثيره السؤال.. امى التى عجزت عن التعرف عليهاتنتحب محاطة باحفاد لا اعرف عنهم شيئا ..اختى مشغولة باستقبال الوافدين ..كانت تتحاشى النظر الى وتتلقى التهانى بعودتى سالما ..وهى تردد لنفسها سالما..سالما وهو بلا ذاكرة ولا حنين وعينان تحرجان الاحتفال ..اريد ان المس الملابس المنثورة على الحبل ان اقف قريبا منها واستقبل القطرات المتساقطة براحة يدى واشم الصابون .. ادركت امى سريعا..كما لاح لى انها كانت تنتظر ابنا اخر يشعله الشوق وليس مهرجا بلا ذرة من الحنين يجلس امامهممشغولا لايكتم سخريته..شغلت نفسها بتلقى التبريكات ومداراة احفادها من عيون السحارين .. هل انت توامى سالته فاشاح بوجهه بعيدا عنى ..ثم همس لى بغضب دع هذا الى وقت اخر ..لا يريد الاجابة ولا يحفل بوجودى مشدودا الى جدية الاحتفال ..لكزنى بكوعه واوما لى بالكف عن الابتسام ..اختى تطلق الزغاريد وتتحاشى النظر الى..الهواء ساكن والقمصان تتدلى من حبل الغسيل .

---

Post: #149 Title: Re: عودة الغائب يا ود شيقوق Author: الطيب شيقوق Date: 11-14-2006, 06:18 AM Parent: #148 لله درك يا ابن حماد لهذا الحكي المترع بالابداع الروائي . نتطلع لقراءة المزيد من ابداعك مودتى

---

Post: #150 Title: Re: عودة الغائب يا ود شيقوق Author: الطيب شيقوق Date: 11-14-2006, 02:31 PM Parent: #149 أخرجت العراقي الابيض الجميل من حقيبتي وكذلك السروال الطويل والفنيلة ذات الأخرام المتوازية الاضلاع . خرج من كان معي من الغرفة الى البرندة ليفسوا لى المجال حتى اغيّر ملابسي واحضروا لـــى الجردل مليان موية والطشت والليفة للحمام داخل الغرفة نفسها . تركشت الباب بالعود ، وبعد الحمام اتهندمت كويس وفتحت الباب وعاد من كان في البرندة مرة اخرى ومعهم امي التى احسست ان خوفا علىّ محبوس في احشائها ....... . اخرجت امي فتيل بت السودان من سحارتها ( السحارة هي صندوق من الخشب يستعمل لتخزين الاشياء الخاصة) . وقد تعطرت بها جبرا لخاطرها . ولإظهار شيئ من المدنية طلعت فتيل فلير دمور الاصلي من حقيبتي وقد فاحت رائحته ليتنسمها حتى من كان خارج البيت . تحركت مع اصدقائي لاسلم على اعمامي وعماتي كبار السن . كنا اينما جلسنا لابد من تناول كباية شربات من الليمون ، الذى قد يكون احيانا معطر ببت السودان نفسها ، لزوم المغالاه فـــي اكرامنا . كان اصدقائي الذين يرافقونى للسلام على الاهل يضحكون ويلعبون وهم يمشون معى بعفوية من بيت لاخر . لم استجب لحركاتهم وضحكاتهم تلك بل صار ينتابني احساس بالسخرية وعدم الرضا من تلك التصرفات ولكنه احساسا ظل حبيسا بدواخلي ..... صحيح انها ملابس المدنية الزائفة . نواصل

---

Post: #151 Title: Re: عودة الغائب يا ود شيقوق Author: الطيب شيقوق Date: 11-16-2006, 00:34 AM Parent: #150 نواصل

---

Post: #152 Title: Re: عودة الغائب يا ود شيقوق Author: الطيب شيقوق Date: 11-16-2006, 05:25 AM Parent: #151 انصبت على مجموعة من الأسئلة المتكررة من أعمامي وعماتي وكأنهم اتفقوا أن توحد أسئلتهم . كيف يا ولدى المدرسة وبتسكنوا كيف وتنوموا كيف وبأكلوكم شنو في الدوخولية ؟ وبعد هذه الأسئلة يأتي السؤال الصعب - بعد صمت ونظرة الى سقف المنزل ( حيث تعلق تواريب التبش والعشريف وقناديل العنكوليب وربما النجامة والسلوكة وتوابيرهم ( ازيارهم يعنى ) تنقع طق طق طق ) واصابعهم تعبث بالمسبحة مع همس تتحرك فيه الشفتان مع المسبحة للإعداد لذلك السؤال . ( اها يا ولدى نحن كبرنا ومتمنيين نحضر جديدك وجديد بت عمك شامة شن قولك إنت؟ (نعم يا عمى قبيل ابوى قال لى عندنا معاك مفاكرة بعد صلاة المغرب يمكن يكون كلامكن ده) كان هذا هو ردى الذى وجد قبولا بارتياح منهم جميعا وكانهم شعروا بالتزام والدى بما تعهد لهم به سرا حول هذا الموضوع .

---

Post: #153 Title: Re: عودة الغائب يا ود شيقوق Author: الطيب شيقوق Date: 11-18-2006, 07:00 AM Parent: #152 نواصل

---

Post: #154 Title: Re: عودة الغائب يا ود شيقوق Author: الطيب شيقوق Date: 12-19-2006, 09:58 AM Parent: #153 سلام لنواصل المشوار

---

Post: #155 Title: Re: عودة الغائب يا ود شيقوق Author: الطيب شيقوق Date: 02-07-2007, 11:04 AM Parent: #154 سنواصل بعد عودتي