فــرحــتــان.. اردتـكـم أن تـشـاركـونـي فـيـهـمـا..

الأعزاء الأعضاء والقراء..

تحية وود وتقدير..

خلال شهر تحقق لي ولزميلين هنا أمنية عزيزة.. وهي التصالح والتعاهد على العمل سويا من أجل خلق واقع أفضل لمنبرنا هذا ولسوداننا مستقبلا..
..
حقيقة لم يكن بيني وبين هذين الزميلين أي عداء مباشر.. اللهم إلا تصيد المشاركات والتعليق على أفكار اي واحد فينا بطريقة جعلتنا في النهاية على طرفي نقيض.. وأعداء بقدرة قادر.. وهو وضع لم يريحني وأكثر لم يرحهما ايضا..

الزميل الأول هو الصديق عبدالله (السنجك) الذي أحسب ان معجزة رمضان هي التي فتحت باب الحوار بيننا.. بل امتد للاتصال الذي شرح كل منا وجهة نظره وتشاركنا في ان هدفنا في الانضمام لهذا المكان لم يكن ابدا خلق عداوات.. بل كان الهدف هو التواصل والإثراء لهذه المساحة التي تضمًنا..

الزميل الثاني هو الصديق محمد حسن العمدة.. والذي أحسب ان كل الأمر كان عبارة عن سوء فهم لحادثة معينة ومحاولته آنذاك في معالجة وتقريب وجهات نظر أطراف.. تفهمت دوافعه.. وإن لمت عليه محاولة إظهاري بمظهر المتهم.. ولكن الحمد لله.. اليوم صباحا تلقيت اتصالا من العزيز محمد العمدة وكان اتصالا طويلا.. سمعني.. وسمعته.. وتعاهدنا على المواصلة كزملاء وأصدقاء في مكان يجمعنا وأهل آخرين..

هذه هي الفرحة التي أردتكم مشاركتي فيها.. وهي خطوة اعتبرها هامة وإثبات لمقولة ان اختلاف الرأي لا يفسد للود قضية.. لأننا قطعا لا نتشارك كل الأفكار والرؤى.. ولكننا نتشارك هذا الوطن..




تخريمة: هناك صوت شكر واجب لـ: دكين.. لنا مهدي.. وراوية..
معليش يا راوية ولنا قدمتا دكين لمبادرته الأولى..
يا لنا اتفقت مع العمدة ان تقومي بدفع تكلفة المكالمة الطويلة ..

دمتم جميعا..

تحية طيبة للجميع

ما اجمل الوفاق ....

ان شاء الله دائما متفقين ....

و عقبال البقية

Quote: يا لنا اتفقت مع العمدة ان تقومي بدفع تكلفة المكالمة الطويلة

ده حتدفعوا من (الاتاوه) حقت الاعضاء الجدد

محمد الأمين..

ســـلام..

إذا كان فرقاء السياسة بيعملو في وفاق.. فما بالك بنا نحن..؟


بس الواحد فينا يجاوب على سؤال: لماذا انضم للمنبر..
وبعدها كل شئ حيستعدل..

دمت..

رجاء العزيزة
لماذا كا ما حاولنا اللحاق بعربة من قطار رجاء سبقتنا بمحطات
حاولنا اللجاق بعربة انسانيتك فى البحث عن المفقودين ..
عربة لم شمل الناس فى البورد
عربة استقبال الجميع فى حال زيارتهم
عربة الأنباء الجادة ..
عربة صلة الرحيم
و .. و ... يمتد القطار وتكثر المحطات وفى كل محطة تزداد العربات
حتى خفنا أن لا يكفى العزم ..
وعلى كل حال ..
يكفينا فخرا أن هذا القطار السمح القيافة كانت له وقفة فى محطتنا ..
دام وصالك ..

يعنى العكاز الشايله ده أجدعو

لووووووووول يا كوستاوي..

شايلنك للكبيرة..

تسلم..

معتصم الطاهر..

الوافد القديم..

اها تعرف زي كلامك ده ما بعرف ارد عليهو كلو كلو..

مع اني فصيحة وما بعرف أفوًت حاجة ..



ما أجمل هذا القطار الذي جمع بين أصدقاء وأهل فرقت بهم الهموم والمحن..

ولنعمل جميعنا على الحفاظ على مسيرته..


شكلو كده حيوصلنا للخرتوم ..

العزيزة رجاء

الله يكتر الفرح و المناسبات المفرحة حتي يزول الحزن المعشعش في الوطن
مودة دائمة أن شاء الله و انتوا التلاته قدمتوا نموزج للجميع بأن الخلافات
العارضة لا يجيب أن تنسف الاخاء الذي يربطنا (ببركة) الوطن،،هذا الرحم
الذي انجبنا جميعا،،،

أما بعد،،
يا اختي نحنا معشر الرجال الذين جار عليهم الزمن و لزمهم في عهد الجندر
أن يكونوا جمعيات تتطالب بمساواتهم بالمرأة،،لا يحق لنا أن نذكر متقدمين
علي النساء في صيغة المخاطبة حتي وان جاء من أمرأة،،،
مفروض تكون العدالة كدا،،
الجنتلمان يقدم المرأة في المخاطبة
و الجنتلومون تقدم الرجل
غشونا في الشكليات بس ان شالله
لوووووول

ولكم
جميعا رجاء
والعمدة
والسنجك
ولنا
ودكين
وراوية
تلويحة محبة وتهنئة وعيدية.

راوية يا عصفورة غربتنا ونسمة صيف المنفى

عهدتك دائماً رسول خير ومحبة ولم يخالجني شك في طيب نواياك ونبل مقاصدك. تزفين لنا في هذا المنتدى أروع الأخبار التي تجمعنا نحن أبناء هذا الوطن وتحرصين بتعليقاتك الصحفية المختصرة والذكية أن تزودينا بآخر ما في خزانتك من سبق صحافي حتى صارت بعض الصحف في الداخل تقتبس من "سودانيز أونلاين" دون تحفظ. وقد صرت مع زميليك وأخويك الأستاذين فائز الشيخ السليك وخضر عطا المنان آذان الوعي بالحدث الوطني لأمتنا في الداخل والخارج. إن مجرد نشرك لهذا الخبر وبهذه الطريقة العفوية دليل على إنسانيتك ونبلك. والسنجك والعمدة مهما كان الإختلاف هما في الختام أخواك وسترك وعونك في الحارة.

السنجك والعمدة: أعطيتما الدليل على أنّ أمتنا في عمار وأنّ كلمة الخير فيها تسبق اعوجاج الدرب. وطبعاً يا عمدة المتلك بشتكوا ليه ويشكوه..ويستحمل..لأنك "عمدة" وكبير القوم كبير بسلوكه وحسن طباعه‘ وقد أكدت ذلك.

دكين والشاعرة لنا مهدي وراوية الراقية..مجلس أجاويد عامر دايماً إن شاء الله.

كستاوي: أيوة..العكاز الفي إيدك دا أجدعوا. هي كمان حصلت؟؟

العزيزة جداُ رجاء
ســـلامات وعلَّك طيبة
أحييك وأحى الشباب السنجك والعمدة
على هذا السلوك الأنيق والمتقدم
وكدة الاخبار الشحمانة ولا بلاش
والتحية موصولة لكل المتداخلين

مبروك يا رجاء وعقبال الثالثه يوم 5 ، قولى آمين ... ولا الضالين آمين

تاج السر..

لا سلام إلا بعد الإعتذار عن بوستك المهين للمريخ العظيم..

صديقي الفاضل منعم..

ألف حمد لله على سلامة طلتكم الباهية..

سلمت..

Quote: يا اختي نحنا معشر الرجال الذين جار عليهم الزمن و لزمهم في عهد الجندر أن يكونوا جمعيات تتطالب بمساواتهم بالمرأة،،لا يحق لنا أن نذكر متقدمين علي النساء في صيغة المخاطبة حتي وان جاء من أمرأة،،، مفروض تكون العدالة كدا،، الجنتلمان يقدم المرأة في المخاطبة و الجنتلومون تقدم الرجل غشونا في الشكليات بس ان شالله لوووووول

رجاء
السنجك
ومحمد حسن العمده
شكرا على هذا النموذج الانسانى


بس خلونى اخرم شوية
نصار ده كلام شنو؟ قلت لى عاوزين تكونوا جمعيات مساواة ولا جمعية ربان البيوت؟ انا قلت ليك الكلام الزى ده بتطفش الناس الحلوة وواعية


استاذ فضيلى

Quote: راوية يا عصفورة غربتنا ونسمة صيف المنفى

انت قاصد صاحبة البوست رجاء ولا انا غلطانه
لكن هن الاتنين نسمات طيبة

الحبيبة إشراقة..

تحية وود..

شكرا ليك انتي على هداياك الجميلة لي مع نصفك الحلو..
الليلة سألتقي بايوب الذي سيزورني في المكتب..

ودي..

رجاء..أشكرك كتير علي هذا البوست..مشكلتنا اننا نبادر بعرض البغضاء و نخفض أصواتنا حياء من المودة..الا أنك تعودت كسر القواعد البالية..
خالد
خالد

شاعرنا واستاذنا وعمدتنا فضيلي جماع


رجاء العباسي

عبد الله السنجك

دكين

راوية

لنا بت مهدي

محمد الامين

معتصم الطاهر

كوستاوي

نصار


نصار الحاج


منعمشون


تاج السر


sign


لكم الانحناء جميعا وما نحن الا ابناء لعزة فلها منا كل الدعاء


استاذي الكبير فضيلي جماع

كلماتك وسام شرف اضعه علي جبيني وانير بها طريقي

وهي اكبر بكثير من شخص مثلي فما انا الا احد حيرانكم نتعلم منكم ونقتدي بكم

فلك مني خالص التجلى والاحترام


واتمنى ان يكون هذا البوست فاتحة خير لحل جميع خلافات اعضاء المنبر الشخصية

وها انا امد يداي بيضاء الى كل مسه مني اذى وبحضرت جنابكم لتكونوا شهودا على ذلك


تخريمات

هسي يا رجاء في داعي للاحراجات دي والله ساعة ما قادر ارد على كلمات النصارين واستاذنا فضيلي وبقية المشاركين

لنا مهدي دي الا تقدمي ليها كشف حساب ولا تعملي جدولة لديونا وفواتيرا

كوستاوي
ياخوي عكازك دا رافعو لي ولا شنو
والله الله ستر بس انا اقول من زمان لابد مالك الاتاري لابد ليك فوق راي

يا ربي في كم زيك تاني

خالص تحياتي وودي لكم جميعا

رجأء والعمـدة والسنجك..
دى روح مسـؤوليـة كبيـرة.. ضربتـم مثلا..

أبو الريش صديقي..

ســـلام وود..

جيتك مخصوص عشان ارد على كلام قريتو اول امبارح.. لقيتك شلتو ..


تخريمة: انتا بتشيل تعليقاتك الحلوة لييه دايما..؟

العزيز خالد sign

تحية وتقدير..

تسلم على كلماتك الراقية..

أستاذي الفاضل فضيلي جمًاع..

تحية وتقدير لمجيئك الكريم ودعمنا بكلماتك المشجعة التي تمثل الكثير..

وها هي فرحة ثالثة في يومي هذا..


بالمناسبة لم انتبه لمناداتك لي بـ راوية إلا عند بوست إشراقة.. وهو أمر أكثر من عادي حتى والدتي تناديني براوية.. وبيني وبينك انا أحب ذلك لأني أحسب ان أخواتي نلن الأسماء الأجمل..

لك الود والشكر..

العزيز نصار الحاج..

ولك انت ملايين التحايا والسؤال عن غيابك..

والحمد لله في البوست الجابك..

سلمت..

نصار يا عزيز..

في كل أحوالي أحمد لله..

والحمد لله على زوال الزعل.. والعقبى للباقين..

..

اها قلتا لينا عايز شنو..؟
شايفة إشراقة قامت بالواجب ..

بالمناسبة عجبتني شديد "الجنتلمون" .. يا جنتل..

ودي..

العزيزة رجاء
تعرفي انا مسميك شنو ؟
السمحة ام عكازا مضبب
عارفة ليه ؟
لأنو حقك ما بتخلي ، وحق الناس بتردي
وبيني وبينكم
فرحت بالحتة دي
منك والسنجك والعمدة
لانه اولا ده دليل كبير جدا علي وعيكم العالي، وزي ما قلتي اختلاف الرأي لا يفسد للود قضية ، والنفوس كان اطايبت المنبر الحر بشيل حرطومية .
و تاني حاجة ، انحنا ما بننكر دور حزب الامة التاريخي ، اها كده عشمنا زاد في العمدة وجيله انو يقوموا يطوروا لينا حزب الامة ده، عشان يرجع يحتل موقعه في المجتمع السوداني .
وتالت حاجة ، البفرحكم بفرحني
ويا عازة قومي كفاك نوم
مف الود لكم جميعا

أريد أن أجعل خاتمة يومي هذا الخبر السار‘ لكن وجب التعليق العاجل في شيئين:

أولهما إعتذار عن خطأ غير مقصود في مناداة الصحفية العظيمة رجاء باسم أختها..ويا بنات العباسي سماح!! وتلقاك يا راوية نمت على الخط..مش؟؟ ألف عذر يا رجاء.

الشيء الثاني كان لابد من رد التحية بأحسن منها للعمدة‘ فقد أثبت أنّ مقامه بينناالزعامة التي يفرش لها عالي الهمة هدومه لقومه لأجل النصح والتفاكر. كبرت في نظري أنت والسنجك وأختكم رجاء. أوافقك الرأي لتكن هذه بداية لمساجلات مسئولة وجادة.

ولكم محبتي.

الأستاذ الفاضل فضيلي جماع..

تحايا وود..
أكرر ايضا انه من دواعي سروري تشريفكم لنا.. ومناداتكم بالأسم المحبب..

دمت..

جعل الله ايامنا
كلها غبطة...
وافعمنا
بحر سماحة ...

رجاء كم انت جميلة


......

دمتى عزيزتى

الحبيبة صفاء..

تحية وود..

كل ما أشوفك وحمائمك الرسالة.. بشعر بإطمئنان ما عادي..

دمتي..

العزيز عصام الدين..

ســـلام..

شكرا على التسمية.. واعترف انني اغضب بسهولة.. ولكني أسامح على مهل..

شفتا كيف ..؟

تحياتي..

اختي العزيزة رجاء
اسعد جدا لسعادتك وافرح جدا لفرحك وانشالله دوما دربك اخضر وجميل

السنجك والعمدة
حكمة الشيوخ في نضارة الشباب

تخريمة بس

السنجك والعمدة
حكمة الشيوخ في نضارة الشباب


تولوس الحبيب مالك يا خوي عاوز تقوم ناس علي هسي كلام استاذنا فضيلي دا شيلني هم

العزيز محمد..

ســــلام..

تسلم وألف حمد لله على الطلة..

رب ضارة نافعة ..... و الله من وراء القصد.... و طبعآ كما تفضلتمو قلتم إختلاف الرأي لا يفسد للود قضية بل ينمي الأفكار و ينعش الأذهان بغض النظر عن تخالف الأنفس و رغباتها.

العزيز تولي..

تحية وتقدير..

تسلم..

بالمناسبة قريت من يومين بوست.. وقدر ما فتشتو (سلًقط ملًقط) ما لقيتو.. بتاع زواجك في الصيف من بوردابية..

لغاية ما ألقاه.. ألف مبروك ليكم الاتنين..

بيـــــــــــان


جمال هوبفول






أبنوسي

العزيز أمير..

ســـلام..

و..

كـــدراويـــة


الــهــكـــرز

ويمكن الجنجويد كمان ..

رجويه

مبروك علي الفرحتين

لكن التالته ضاعت عليك والرابع ضايعه في طريق التالته

المهم ربنا يكتر افراحك ويخليك

عزيزتي رجاء
أحب هذه الروح جدا

.... لي حد سنة 90 كنا نتعامل بصدق وتجرد مع هذه المقولة الجميلة الحقيقية (فقط للذين يؤمنون بها )
ما أطول عليك
فوجئنا ببعض الأخوة يستهدفون موتنا ببساطة لا لشيء سوى اختلاف الرأي
وكان ماكان على طول وعرض وعمق خمسة عشر عاما من الخصومة التي لانحبها ولامفر منها
وهنا
على هذا المنبر الجميل
دخلنا وفي قلوبنا محبة (للعمل)
وكان ما كان أيضا
أنت بريئة
هؤلاء السياسيون
وأصحاب الطموح السياسي
ليس لهم ود ولا رأي ولا قضية
تخريمة : تحياتي لك ولل(أخوين) السنجل والعمدة ولا أعنيهما بالتحديد كما هو واضح
بيد أن في القلب الأسى
وإشفاقي عليك من طيبتك

العزيز البحيري..

تحية تقدير..

أسعدتني مشاركتك.. وكلامك الدرر..

إطمئن.. قد اكون طيبة.. ولكني لست بساذجة..

وبكم ايها الاصدقاء اعرف أين أنا.. وماذا سأفعل..

تحياتي لسماء القادمة الجديدة وشقيقتيها وهويدا..

صديقي عباس..

ســـلام..

الفرحتين والتالتة والرابعة والخامسة كمان مبروكين علينا..

يا سمرا يا واضحة
نشاركك الفرحتين

العزيز محمد سر الختم..

تحايا وتقدير ومودة..

شكرا لكلماتك التي تشجعني دوما في هذا المكان.. وعلى مشاركتك الفرحة..

دمت..

رجاء العباسي كتبت:

Quote: يا لنا اتفقت مع العمدة ان تقومي بدفع تكلفة المكالمة الطويلة

ومحمد حسن العمدة كتب:

Quote: لنا مهدي دي الا تقدمي ليها كشف حساب ولا تعملي جدولة لديونا وفواتيرا

أما لنا مهدي فتكتب:

Quote: دى تلقوها عند الغافل!!

هوي يا ناس مبروك

فرحكم ده ما فيه حبة حلاوة؟؟؟

ولا اقولكم ...

جيبو شاي !!
جيبو شاي !!

العزيزة رجاء والاخوة/ت

هذه هى العقلانية والخيرة التى يجب ان يتعامل
بها كل أعضاء البورد والتحية لك أخت رجاء والاخوة السنجك ومحمذ على
الموقف الشجاع وعقبال الاخوة من منهم على سوء تفاهم
مع الاخر .

مبروك يا رجاء..والصلحابيين اجمعين

الظاهر عليك صمتى ..لانه للصائم فرحتان

عقبال "اللى بالى بالك"

تماضر الحبيبة..

تحية وود..

هو داب صيام.. لووووووووووووووول

بالمناسبة احتمال لوووووول دي تتحرًم في التيرم التاني للمنبر..

عقبال "اللى بالى بالك"

دي بقى دايرة صيام الدهر البيقولوه زاااتو ..

العزيز أحمد ساطور..

تحية وتقدير..

تسلم لكلامك الجميل..

المسافر العزيز..

ســـــلام..

حأعمل ليك شغل البكش ..

هو في حلاوة أكتر من الفرحة دي..


بجد.. تستاهلو الأكتر من الحلاوة يا المسافر..

لنًو الحبيبة..

برضو ما حتحلًك..

لوووووووووووووووول

دة اصطقصاض دة
وان شاء الله المكالمة كانت كم ساعة؟؟؟
وشكلكم حرفا موقتين على اول الشهر كمان!!
لاكين انطمنك اتى وود العمدة مرتبى صرفتو يوم 25 و كمل يوم 27

Quote: ولنعمل جميعنا على الحفاظ على مسيرته.. شكلو كده حيوصلنا للخرتوم ..

اكيد قطار فى معيته ..
أنت .. بكل تفاصيل فجاءتك ..
السنجك .. ود العمدة ..
استاذ فضيلى .. ومن ماثله ..
محطته الخرطوم ..

العزيزة رجــــاء ..

نفرح لفرحك ..
ونتمنى لك السعادة دوماً ..
وكذلك أن يعم السلام كل أرجاء من حولنا ..



مودتي ..

معتصم العزيز..

ســــــــلام..

تسلم يا راقي على كلامك الراقي..

واتمنى معاك ان يعم السلام بحق..

دمت..

معتصم العزيز..

يا الله متين نشوف الخرتوم..

أدعو انه يكون قريب..

الاخت رجاء
تحية طيبة
الكل فرح بانتهاء الخلافات بينكم وكما يقولون اختلاف الراى لا يفسد الود
مع تحياتي
علي محمد علي المشهور ب علوبا Alouba

التحايا للجميع
جنتلمونات وجناتلة! - علي تسمية الاخ علاء نصـّار ..

العزيزة ،،
الاخت الصحفية المحترمة / رجاء العباسي

نشاركك الفرحتين بالتصافي مع الاخوين : العمدة والسنجك ، بعدما شاب العلائق بعض كدر
وقد حالفك التوفيق بالاستشـهاد بالمقولة المشهورة ( إختلاف الرأي لا يفســد للود قضية ) ، وأيضا تعقيبك :بأن يتسائل كل منـّا : لماذا اشترك في المنبر الحر ؟ .. ويقيني أنّ المقولين
كافيتان لتوجيه أيّ منـّا صوب الوجهة الصحيحة في تعاطيه مع " الآخرين! " ليدحض مقولة المفكر
الوجودي ســــارتر ( الجحيم هو الآخرون ) ..

نتمنـّي أن يتواصل خيط التصافي هذا لينضم في سلكه عديدين من أعضاء وعضوات المنبر الحر الذين يدور ، وقد دار بالفعل بينهم " عطر منشم " .. ولنا رجـــاء في العزيزة رجــاء أن يتواصل إسهامها في هذا الجانب ..

تخريمة رجائية ،،
أحيي فيها أديبنا الكبير ، الاستاذ/ فضيلي جمـّاع ، وأقول له ، كم نحن سعداء بأن توفـّر لنا
في هذا المنتدي العامر ، مجالسة وانتداء مجالسكم العامرة ..

كما أحيي الصديق الرائع " المسافر " ..

ولكم التحايا والود جميعا ،،/

العزيز محمد أبو جودة..

سلام وتقدير..

أسعدتني كلماتك وما حملته من رجاء في واقع اجمل هنا..

ولنعمل جميعا من أجل ذلك..

ما اجملكم فى زحمة الغبار
الكتمان الريشو طار
ازيحو عنا غيوم التتار
فالنشهد جميعنا انكم ابرار

فالتدم يا وطن المحبة ساحة نرتشف فيها معانى السمو

شكرا لكم مرتين

الصديق الفاتح..

ســــلام..

بعد قولك.. مافي قول تاني..

سلمت..

رجاء الحبيبة
انا جيت جارية ابارك
لمن قربت اعتر في عتبة البوست
لقيته صلح!!!!
لاكن برضو مبروك
وعقبال اللي في بالي

تحياتي
زولة123

لووووووووووووول يا زولا يا عسل ..

الفرحة اللي بالي بالك وااااااااااحدة ما اتنين ..

سلمتي يا حبيبة..

العزيزة الأخت رجاء

هو فعلاً خبر مفرح

ليتنا جميعاً نعمل على تعميق ثقافة الإختلاف في وجهات النظر ( بمحبة ) و الإلتقاء بلا تبعية إلا للحقيقة .

و بعدين أنتم كبارنا ( قدرا ً) و قد أتينا( نحن البرالمة ) عالمكم الرائع هذا نتعلم منكم و نطور أنفسنا


أدام الله الأفراح

معزتي للجميع

العزيز عاطف..

تحية وتقدير..

كلماتك تبعث الأمل في ذلك الواقع المرجو في هذه المساحة الوطن..

مقدمك مكسب لا شك..

سلمت..

انتي الفرحة الكبيرة يا رجاء...
والشكر لكم فى كل المساعي الحميدة...
السنجك وود العمدة ناس أصيلين...
وربنا يديم المحبة بين الناس أجمعين...

أنور

أنًو الغالي..

حمد لله مليون على العودة..

وتشكر سيدي على دعمك..


تخريمة: أنــًو تصغير محبب لأنور.. وكنا ننادي به إبن خال عزيز..

اي حاجه فيها تجمييييييييع بين اثنين او ثلاثه بتفرح


ربنا يجمعنا جميعا في السودان


رجاء الطيبة

محمد حسن صاحب الوجه الصبوح

عبدالله السجنك يكفي انك سنجك

الوسطاء دكين لنا مهدي راوية ربنا يجعلها في ميزان الحسانات

حسي دي يعلقو فيها كيف حمدلاسلامة ولا يا سلام يا رجاء لمن نسالم نبقى اي حاجة حلوة ..لا لا احسن اتماسخ واقول ليكم: ختيتو يا ناس البورد ، ختوا العمد والمشايخ .. -بايخة مش- تعرفي احسن اقول كل سنة وانتو طيبين وبالمحبة عامرين تكموا الدور وتفرهدو البورد ، غايتو دي اختيارت اسفيرية وعلى المتخاصمين الاختيار ..واخر واحدة كويتو البحر في صرتو !! اقصد والله فرحتوا خلق الله وسلام للاجاويد والحبيبة راوية ..

الحبيبة عشة..

تحية وود..

جيًتك بس أجمل تعليق..

بطمًن شديد لما أعرف انو في زولة رائعة زيك ده شعورها..

تحياتي وحبي للمعاك في الصورة.. عرفت انو البنوتة اسمها سارية..؟

ودي..

محمد حسن العمدة

Quote: كوستاوي ياخوي عكازك دا رافعو لي ولا شنو والله الله ستر بس انا اقول من زمان لابد مالك الاتاري لابد ليك فوق راي يا ربي في كم زيك تاني

يا أخوي ما تشوف الجعجعه دي أخوك لو قلت ليه هو بقع واطه
أنا بس مندهش في الطريقه الراقيه
Wa Alcivilized
لفض الخلافات
عشان كده
انا بكن ليكم احترام شديد

Thax

الأخت الحبيبه رجاء,

ما أروعك يا رجاء ......لك كل المحبه و الاحترام ........
انك انسانة تتمتعين بوعي عالي و مسئولية .... و شكرا جزيلا لك علي ذلك......
وتحياتي و احتراماتي للأخوان عبد الله السنجك و محمد حسن العمدة.....
مع مودتي,
مها

الحبيبة مها..

تسلمي عزيزتي على حضورك ومشاركتنا الفرحة..

لقد كان لي فرحة ثالثة..

ودي..

الصديق عبدالله..

ســــلام..

شكرا على هذا الشعور الجميل الذي أسعدني بحق..

رجاء
سلامات

بوست رائع وجميل وعساه يكون درساً وعبرةً لكل من صارت الخلافات بينهم سبباً للسب والشتائم وبذئ القول ، وليسود مثل هذا الجو بيننا جميعاً كيفما كانت خلافاتنا .. وآمل أن يكون معدياً عدوَى إيجابيّة .. التحية لك وللأخوين المحترمين السنجك ومحمّد حسن العمدة .


كل الوُد

رجاء

مبروك عليك الفرحتين .. و هما فعلا جديرتان بأن نشاركك الإحتفال بهما ..
في إنتظار التالتة ( لأنها تابتة ) ..

رجاء
ود العمدة
السنجك

و الله خجلتونا عديل كدة

يعنى الواحد من بكرة يفتش على الناس
المتخاصم معاهم و لا شنو

شكرا لكم على هذا الدرس الجميل الراقى

الاخت رجاء العباسي هذا هو ديدن الشجعان وبهذا البوست قد لامستى اشياء كثيرة يجب ان نعيها, لذلك اتمنى ان يشمل هذه المناجاة زميلة البورد الدكتورة نجاة (بيان) واتمنى ان تكون صفحة جديدة ومن هذا المنطلق اناشد الدكتورة بيان لفتح صفحة جديدة دونما ان نرجع للماضى، حتى نساهم بأثراء الحوار فى هذا الوطن الصفير. مع تحياتى

سيف الدين جبريل

سيف الدين العزيز..

تحية وتقدير..

أسعدتني كلماتك..

تعليقي: It takes tow to dance TANGO

العزيز محمد أشرف..

ســـلام..

عندي سؤال: هو في زول متخاصم معاك انتا ده..؟

لا أصدق..

سلمت ايها العزيز..

أبو جهينة الغالي..

تحية وود وتقدير..

عارفة روحي متلومة معاك كتير.. لأنه من المفترض ان تكون أولى رسائل المسينجر لشخصك..

تسلم.. وانا زاتي في انتظار التالتة.. قول يا رب.. السنة الجديدة تجيبها لينا..

تحياتي..

لؤي الغالي..

حمد لله مليون على السلامة.. والعودة لقواعدك سالما..

تسلم سيدي على كلامك العاقل..

تحياتي..

الاخت رجاء

كم يسرنى ان ارى ( وفاقا)
أي وفاق

لان الحياة لا تتحمل الخلاف والاختلاف

و نتمنى ان يثمر هذه الوافق عن عطاء أكثر

وبالمناسبة انا حاكون بالقاهرة يوم 25 ديسمبر ولمدة 3 ايام
لمناسبة زواج

وسنلتقى هذه المرة

لكم ...

رجاء ... ود العمدة ...السنجك

....
دمتم دوما كم عهدناكم
.....
ناجى

الملك ناجي..

ياااااااااااااااااا

شكرا ليك انتا على الغنية الجميلة..

سلمت..

الصديق صلاح..

مرحب بيك في القاهرة.. واتمنى ان نلتقي..

شكرا لكلماتك الجميلة..

الكبيرات والكبار

درس نتعلم منه كيف يصنع الحب

معكم قلبا وروحا
أبحجل

أبو حجل العزيز..

مرحب بيك تاني وتالت ورابع وخامس..

الكبيرة نظرتك الما بتشوف إلا الشئ الكبير..

ودي..

الاخت رجاء

المعذره بحس بنفسي غريبه وسطكم لكن حبيت اشارك
الف مبروك ما افرحك ,بل الف مبروك احساسك بالالم لسوء الفهم الكان حاصل
فهذا يدل علي يقظه ضمير متناهيه .

سلام

رجـا
انتي الرجـا والمرتجـا العمرو ما خيّب رجـا
عجبنا وسرّ بالنا كمان

حبيب نورا العزيز..

تحايا عاطرة عطر أي كلمة بتكتبها هنا..

تسلم على شعورك الجميل الصادق..

تحياتي..

الحبيبة سلمى النصري..

تحية وود..

المعذره بحس بنفسي غريبه وسطكم لكن حبيت اشارك

كده حتخلينا ننزعل تاني..

ليه ما بتشاركي في المواضيع..؟

انتظرت مشاركتك اكتر من مرة.. وكل ما ألمح اسمك في قائمة الموجودين أهلل في انتظارها..

فلا تحرمينا..

لك الود ايتها الراقية..

رجاء المحبوبة

كيف أحوالك

هذا نتاج نقاء السريرة وصفاء النفس ورقة الشعور ورقي التربية

ليس سهلا الترقي فوق الصغائر والانتصار على الأمارة بالسوء


لكن مع ذلك

أنا عدادي حاسب فرحة واحدة حتى الان


امكن لو اتصلنا نعرف التانية

صــــح؟

الجميع لكم التحية على هذا النموذج الراقي
وحقاً أختلاف وجهات النظر لا تفسد للود قضية

كسرة بسيطة:

Quote: واخر واحدة كويتو البحر في صرتو

والله يا عشة بنت فاطنة مثلك ده عجبني بالحيل..

وراق الغالي..

حمد لله على سلامة رجوعك من البلد السمح..

ومشاركتك الفرحة تفرحنا..

دمت..

غايتو ود العمدة بنبارك ليك فيهو

لكن السنجك ده حسب عرفتي الا نديهو سنة كدة ونجي نبارك ليك كان الله هون ومد في العمر.

عقبال الباقيين

أبو آمنة العزيز..

لووووووووووووول .. قلتا لي السنجك فيه قولان..

تعرف يومداك كتب لي مسينجر لما رجًعوه.. لما رديت ليهو قلت ليهو هسع لو في زول عرف اني بكتب ليك حيقول رجاء دي جنًت ..

تسلم يا عزيز..

الصديق أحمد الشايقي..

تحية ومودة..

تكرم سيدي على كلامك الطيب..

وانتظر مكالمتك لمعرفة الفرحة التانية..

دمت..

ما يفرحك ويسعدك دون شك يفرحنا ويسعدنا وما تصالحكم إلا تصالح مع النفس أولاً وتباع سبيل الحوار ، أتمنى على الله الأماني بأن يزيل الغل والبغض والكراهية من قلوبنا وأن ننتبصر في أمورنا كلها وأن نكون دائماً على وفاق وتفاق وأن نختلف كأمر لا بد منه على أن نتأدب بأدب الإختلاف.
سعدت إيما سعادة بهذا التقارب والوفاق ومزيداً من الحوار لإزالة كل الأمور العالقة وكل الخصومات ، كل الحب لكي أختي رجاء ولكل أعضاء المنبر الحر.

تخريمة:
مش ملاحظه إنو بدر الدين شنا إختفي تضامنا مع غياب أخونا أهل العوض

الأخـــوان ..
السنجـــك ..
ود العمــدة .. رجــــاء ..

أخبار سعيده ومفرحه .. أن يعم السلام العالم

اكاد اجزم ان كل من هم هنا من طينة سودانية خالصة بداخلهم كل الصفات الانسانية .. لكن اختلاف وجهات النظر وسؤ الفهم دائما..ما يولد العداوة والكراهية ..
هل تعلمنا من هذه الفرحة ؟؟

تخريمة
تحياتي للجنة المساعي الحميدة

دكين أول مرة يعمل حاجه كويسه .. ( كدي نمشي عليهو اظنو يكون عيان )

تمبو الغالي..

لوووووووووووووول

قلتا لي دكين مالو..؟
المهم طمًنًا..

تسلم لمشاركة الفرحة..

الصديق الملا عمر..

تحايا وتقدير..

تعرف ان مشاركتك لوحدها عيد..

أشعر بإطمئنان وان المنبر لا يزال بخير عندما ألمح أسمك في بوست.. كاتبا أو مشاركا..



تخريمة: البدري الغالي كلنا ننتظره.. وباقي لي لما يجي يلاقي الزحمة الحاصلة دي.. حيحتاج لدليل وخريطة..

ودي..

وها أنت تطفئين واحدة من الجمر القابع والجاثم على صدر البورد وتبدلين لهيب نيران الكلمة بعطر وزهر ونسمة وبسمة وغنوة ورقصة وتدملين جراحا ماكان لها أن تحفر في أعماق القلب لولا النفس الأمارة بالسوء وترسمين خطوط واضحة الشرائح لاتمذج الأبيض بالأسود وتطلقين العنان لفرح قادم حتما بعد الأحزان وسلام أبيض ناصع خالي من أدران لك الأخت رجاء العباسي والأخوان محمد الحسن العمدة وعبدالله السنجك كل التحية والتقدير ومعاً سويا لسلام عام .


عامر الأمير

العزيز عامر الأمير..

مرحبا بك في المنبر الوطن..

ومرحب بيك مشاركا في الفرحتين..

أسعدتني كلماتك الراقية ايما سعادة..

ونهنئ انفسنا بانضمامك مرة تانية..

رجاء ...









يالانسانيتك .... المفرطة ..

والله انتى زولة (جميلة) خلاص ..

رجاء والعمدة والسنجك
لكم التحية والتقدير
هذا هو الجو المفعم بالأخاء والمشاعر النبيلة التي يجب أن تسود المنبر

العزيز حبيب بلدو..

ســـلام وتحايا..

تكرم على المرور ومشاركتنا الفرحة.. وعلى كلماتك الجميلة..

الصديق معتصم..

تحايا وود..

تسلم لمشاركتك الفرحة..

دمت..

الرجاء
مبروك
"لكن اوع تحاولي تصالحيني"
تحياتي لكم جميعاً

الاعزاء الضيوف

شكرا كتير للمشاركه والروح الطيبه

اليقرا كلامك كدة يقول عايزة تقفلي البوست يا راوية وتنهي المولد اللطيف دا. بيني بينك أنا افتكرتو خلص من يومداك..جيت قبل شوية لقيت عجاج الحفلة سادّي الحوش.

الله يكتر ليالي الفرح !

استاذ فضيلي

تحيه وسلام

انا لي كم يوم ما عارفه ادخل اكتب شنو

في النهايه اهتديت لي اني اعمل من ناس البيت واشكر الجميع




وانت مرحب بيك في اي مكان وطول الوقت

العزيز الفاضل ياسيكو..

ســــلام وتحايا..

تكرم سيدي على مرورك وكلامك..

العزيزة رجاء... صاحبة البوست.

الاعزاء السنجك ومحمد حسن العمدة.

والاعزاء دكين ولنا وراوية.

لكم الحب جميعا وشكرا لكم.

لا صوت يعلوا فوق صوت الحب الصادق .

الاخت
رجاء...والله انا اول يوم اشوف البوست دا ولما شفته على طول دخلت وكنت قايل الاحباء وصلوا والفرح تم..الاحباء هم راوية وراوية الغائبة ثلاثة سنوات...
لكن القاك مصالحة لى اسهل اتنين فى البورد....والله لو كنت عارف مخاصمنك كان قدتهم من اضنينهم وجبتهم ليك من زمان....شوف قلة الادب كمان...على ملكة البورد...

اولا:- عبدالله(السنجك)..زميل دراسة ...ايام كنا فى الهند سكن فى حينا ..وكان بلقانى مزوى فى مقهى كونارك خاتى امامى كبابة الشاى...قال ممكن نتعرف ياشاب قلت ليه ايوة..ومن يومها صار مستمع جيد لاشعارى...وعن طريقه تعرفت على تؤامه محمد عبد الحى (الساحر) تيمان برقو الما بتفرقو..ارقام لا تتطاول عليها كانو فى دار الاتحاد بونا..والان موجودين معاى فى الرياض...للان لم التقى بهم حتى اللحظة....

ثانيا:-محمد حسن العمدة.. ود الخرطوم2 ..خريج جامعة الجزيرة..مقيم فى الطائف .. عضو حزب الامة اللامع ..عرفته من هذا البورد...من بوست نضارة الشباب فى حكمة الشيوخ...لووووووول
وانا صاحب ذلك البوست الذى هاج وماج فى البورد...ومرات اضحك وبراى واقول والله ياحمد انت لو ما كنت شاعر...عنوان البوست دا بقول انك شاعر.....لوووووووووووووووووووووووووووووول
لم التقى به الا على الهوت ميل ماسنجر..وصوته الذى يداهمنى على هاتفى فى ساعة الزهجة كانه يقول لى اريد ان اداعبك حبتين...
ثالا:- مبروك يارجاء هذا المكسب البوردى .وهذان الرجلان الفلتة...رجل شبابى حزب امة...واخر وشبابى قومى.....والله حاسدك
وعقبان نفرج معاك تانىىىىىىىىىىىىىىىىىىىىىىى
احمد

الصديق أحمد صديق ولد المكان الجميل الأسمو أبقوتة..

تحية وسلام..

انا من زمان سامعة طشاش طشاش انو السنجك والساحر ديل شخصيات وهمية .. لكن صديقنا متولي الشريف أكد لي انهم ناس زيي زيك كده وزملاء دراسة.. وكمان شنو انهم من الطف خلق الله.. طبعا ما قدرتا أبلع الحكاية الأخيرة دي كلو كلو وخاصة اني بقرا ليهم طوالي كلام بيقول انهم ناس قاعدين بعكاكيز زي بتاعة عمنا قرجة ديك ..

لكن.. الحمد لله عرفت ان عبدالله "السنجك" شخص مثل ما وصفه متولي تماما وأنت هنا.. واستعجبت لتضييع كل هذا الوقت لمعرفة ذلك.. وأطمع كمان في معرفة محمد عبدالحي "الساحر" شفتا الطمع ده ..؟

شكرا ليك ولكلماتك الجميلة في حق اصدقاءك.. ودمت لنا..

سوركتي الغالي..

تحية وود وتقدير..

تسلم يا عزيز.. يا شريك الفرح وقسيم الهم..

دمت..

العزيزة رجاء والاخوة المشاركين تحياتي

اترك كلمات الاغنية دي تعبر عن اللحظة دي

دا اهداء فرح يا رجاء

When it's love you give
I'll be a man of good faith.
then in love you live.
I'll make a stand. I won't break.
I'll be the rock you can build on,
be there when you're old,
to have and to hold.
When there's love inside
I swear I'll always be strong.
then there's a reason why.
I'll prove to you we belong.
I'll be the wal that protects you
from the wind and the rain,
from the hurt and pain.

Let's make it all for one and all for love.
Let the one you hold be the one you want,
the one you need,
'cause when it's all for onee it's one for all.
When there's someone that should know
then just let your feelings show
and make it all for one and all for love.

When it's love you make
I'll be the fire in your night.
then it's love you take.
I will defend, I will fight.
I'll be there when you need me.
When honor's at stake,
this vow I will make:

that it's all for one and all for love.
Let the one be the one you want,
the one you need,
'cause when it's all for one it's one for all.
When there's someone that should know
then just let your feelings show
and make it all for one and all for love.

Don't lay our love to rest
'cause we could stand up to you test.
We got everything and more than we had planned,
more than the rivers that run the land.
We've got it all in our hands.

Now it's all for one and all for love.
It's all for love.
Let the one you hold be the one you want,
the one you need,
'cause when it's all for one it's one for all.
It's one for all.
When there's someone that should know
then just let your feelings show.
When there's someone that you want,
when there's someone that you need
let's make it all, all for one and all for love.
*******
wish you
Love

رجـاء

خدر الغالي..

حمد لله على السلامة..

قطعت قلب البنية وقلوبنا معاك..

وتسلم للصورة الحلوة العندك دي..

شكرا ليك يا عبدالله على الأغنية الكلماتها جميلة بجد..

وعلى كل بوستاتك بعد رمضان..

ربما تأخيري مبرر
رجاء
وددت ان يكون تعليقي وتهنئي فيما يتمناه الكل
ولكن عند روجوعي للبروفايل وجدت خطأ مطبعي
نرجو تصحيححه
وبرضو بقول مبروك وانشاء الله نراك دائما فرحانه

الأخ ايمو..

ســـلام..

وشكرا ليك مشاركة الفرحة..

البروفايل مش النوع بس المتغير.. الحالة الاجتماعية والإيميل برضو..

وأظن ان الجميع يعرف ان البروفايل لا يقول اي شئ..

تحياتي..

ويعم الفرح الجميـــــــع

http://www.sudaniyat.net/forum/up/frhana.ra

الله يفرحك واحبك واحب البحبوك..وفرى ضراعك للبلد..كما عهدناك سامقة باسقة لك طلع
نضيد....الله يخليك،،،

شُوركت

طبعا الحركة دي اتعلمتها من راوية وهى عاملة فيها ناس البيت
يعني ذنبكم على جنبكم
رجوية ..
دمتي رجوية العسل
والله يخليك ويخلي قلبك الكبير

الملكة الحنينة..

وجودك هنا تاني في المنبر أكبر فرحة..

ما تتخيلي كل يوم الصباح بفرح قدر شنو وانا أتابع مشاركاتك الراقية..



تخريمة: صورتك ما حصلت..

الموج الغالي..

وليك وحشة وافتقاد كبيييييييير..

والفرحتين بقو تلاتة بطلتك وشريفك وكلامك الصادق..

ودي..

خال فاطمة العزيز..

شكرا للهدية ولمشاركة الفرح..

تسلم..

رجاء الغالية الجميلة

تــ1000ــحية ليك وللرائعين المعاك
كم أتمنى أن يجتمع كل هذا المنبر في فرحة واحدة وليست فرحتان

التحية ليك يا استاذة رجاء
و الاحترام و التقدير لك و السنجك و محمد حسن العمدة
من النادر في هذا البورد ان تسود هذه الروح الجميلة
و احترام الاخرين رغم الاختلاف في و جهات النظر
بالمناسبة الابتسامة الجميلة تعبر عن روح جميلة

العزيز عصام وداعة..

تسلم على كلماتك وشعورك الجميل.. الذي يؤكد ان ما نجتمع عليه هنا هو خير..

والابتسامة ايضا تعني انحناءة تستقيم بها الأمور..

دمت..

كبسيبة الوسيم..

تسلم على مشاركة الفرحة.. وربنا يحقق كل الأماني..

رجاء..
عندما تشرق الشمس كوني اكثر روعه
وحضورا حتي الائتلاق......
وعندما يكون عظيم للقاء توهجا كوني
عطا يملا المكان سلاما









ويظل التواصل عبر طفل المعرفة

وحيد العزيز..

أسعدني وجودك ومشاركتك لهذا الفرح..

شكرا لنظمك الراقي..

ودي..

العزيزة رجاء
فرحتك في هذه المناسبه
بكل الصدق تعبر عن اصالتك وعظمتك
ما اعظمكم بنات بلدي

الفاضل العزيز..

تشكر على كلماتك ومشاركتك للفرحتين..

ومرحبا بك في المنبر الوطن..