فـــارس أحـــلام الــبــنــات.. مــن هــو..؟

لا الوسامة ولا الطول ولا المال..

إذن ما هي مواصفات فارس أحلام البنات..؟

لدي سؤال لزميلاتي المتزوجات.. هل هذا الزوج هو فارس أحلامك..؟

وللزميلات الآنسات او "العانسات" كما يحلو للبعض منادتهن.. ما هي مواصفات هذا الفارس..؟

ظل هذا السؤال في رأسي على الدوام.. وكنت أركًبه على أي شخص يعجبني.. ولكني دائما ما أجد بعض الانحرافات - السالبه او الموجبة - يعني ممكن يكون أكثر من تقديراتي..

الصفات الثلاث التي وضعتها في رأس هذا البوست.. هي صفات - شخصيا - متأكدة انها ليست ضمن مقاييس الفتاة في الاختيار الوجداني.. نعم قد تكون مقاييس اختيار "عريس لقطة"..

وهنا يكون السؤال: هل العريس اللقطة هو فارس أحلام البنات..؟

السؤال للزملاء الرجال: هل تثق أنك فارس لأحلام أي بنت..؟ ولماذا..؟

عن نفسي لا أحب الرجل الجبان.. لأن الجبن هو أصل كل فساد..

ملحوظة: الزملاء الرجال.. لا تحتجوا.. فسيكون هناك بوستا عن: أميرة قلب الشباب.. أو المرأة الحلم ..

رجاء
التحية و التقدير

لله في خلقه شئون ، و للنساء في فرسان أحلامهن حديث ذو شجون.
ذات مرة ، و الممرات كثيرة ،، فتاة أهتم لأمرها كثيرا و أحترمها كزميلة ،، فاجأتني بأنها تتمنى فلانا بعلا لها و فارس أحلام. صعقت لإختيارها ،، فقلت لها الحمد لله أنك أخبرتيني ،، فهذا صفته كيت و كيت ، و سيرته بيننا كذا و كذا ،، و فرشت لها ملاية الفارس المغوار بكل صدق.. و لكنها أثناء حديثي الجاد المنفعل ، كانت ترسم إبتسامة واثقة و راسخة و مصممة و ملحة بأنها تريده هو حتى و إن كان ملفه أكثر سوادا من ( أيلول الأسود ) ، هكذا ،، تريده هو و إلا فلا ..
ماذا ترى فيه ؟ هذا هو سر الأنثى مع إحترامي الشديد لهن ،، الأنثى ترى ما لا يراه الآخرين في الرجل أحيانا بغريزة مدفونة فيها ، حتى هي لا تدري كنهه ، و أحيانا تتزوج الرجل رغم التحذيرات من هنا و هناك ،، و بعد الزواج ،، تجدها تلعن اليوم الذي رأته فيه ،، و لكنها سعيدة بأنها تزوجته و أنجبت له البنين و البنات ،، تعيش معه رغم تناقض غريب يطفو على السطح بشكل سافر.
هذه مقدمة لا بد منها.
أنا أرى أن فارس الأحلام له جزئين:
قسم يلبي مطالب المرأة الحياتية ،، و قسم يلبي مطالبها الروحية
فإن إجتمع القسمان في جوف رجل واحد : فهي إمرأة سعيدة ( أمها داعية ليها ).
فإن وجدت نصف قسم من كل قسم ،، فالبعض تستطيع أن تكمل النواقص في مسيرة حياتهما ، و البعض يرضى بما قسم الله ، و البعض تمل و تفارق.
تختلف المقاييس من كل إمرأة لأخرى ،، و تختلف المقاييس بدرجة إختلاف الوعى.
و لكن فارس الأحلام عموما لا يأتي أيامنا هذه راكبا صهوة جواد أبيض يخترق أحلام العذارى ،، و لكنه يأتي عبر تمحيص و تدقيق عميقين ،، أما الفارس ( خبط عشواء ) فذاك أمره في يد الرحمن و يدخلنا في متاهة البطيخة و أخواتها.
أنا شخصيا أرى نفسي جندي عادي في الفرقة المجوقلة لإقتحام أسوار البنات ( ليس تواضعا ) و لكن المرأة مخلوق يحتاج إلى فلسفة خاصة في التعامل معها ،، و زمن الفرسان ولى و أدبر ،، و نحن في زمن آخر يحتاج إلى تسمية أخرى.
أرقدي عافية

أبو جهينة .. فارس أحلام احداهن بالتأكيد

نعم.. هناك أمور لا يمكن تعريفها حينما يتعلق الأمر بالوجدان.. ولكن.. في العموميات.. هناك أوصاف لا يمكن ان تتنازل عنها أي فتاة..

مثلا: الرجل الذي لا يمكن الاعتماد عليه..

في بحثنا عن الشريك الروحي او الزوجي.. دائما ما نقنع انفسنا انه يمكن الارتكان لهذا او لتلك.. بمعنى.. شخص يتقاسم همومك ويشاركك فرحتك وان كانت قليلة او تافهة للبعض.. ويسندك ويقويك في محنتك..

أجد هذه الصفات في أصدقاء لا يمكن التفكير فيهم بطريقة - خاصة - وهذا يسعدني.. ولكن سيكون أجمل ان تجد هذه الصفات في "زولك الخاص" أيضا..

لا أريد ان اسبق الآراء.. ولكن تُلبس البنات دوما "العريس" او الزوج صفة "فارس الأحلام".. باعتبارها ستجد مخرجا للأمر..

..

العزيزة رجاء
يعني في حلاوة أكتر من كده عشان أكون فارس أحلام
والسنينات الطايرات ديل المهر بتاعي

كبسيبة يا وسيم..

أيوه قلنا الوسامة ما شرط .. لكن الشناة برضها ما شرط ..

أنا ده براي فارس احلامن لي حدهن

أفو انا الشافو خلو

كدي شوفي




وفارس احلام مستغامني كمان


*** الغريبه المسأله دي انا الوحيد المنتبه ليها

ياربي البنات ديل مالن عمن ولا مغضوبات

المال والبنون ...زينة الحياة الدنيا


ولو كان الفقر رجلا ....لتزوجته .................وطلقته "زى العادة"

تماضر يا حلم الداعية ليهو أمو..

جملتك تقول الكثير.. وهي تعني بالفعل ان "العريس اللقطة" يمكن ألا يكون فارس أحلام البنات..

انتظر منك زيادة..

تخريمة: واحشاااني موت..

قرمبوز يا فارس بنات الحلة..

أها قول لينا.. البنات ديل شايفات فيك شنو..؟

عشان انحنا زاتنا نشوفو ..

لووووول

عيونه
تاسرنى فى الرجل عيونه

عزيزى جلال من قال انك رجل عادى
لا انت رجل اسر بهدوء صوتك ورزانتك وادبك الجم

رجاء العزيزه ليس هنالك فرسان ولا اميرات ولا يحزنون...

ان تختار عبوديتك احسن لك الف مره من ان يختار لك الناس حريتك

اتفق مع ابو جهينة تماما.....وما تشوفى الضحك ده وتقولى ناس فلان متوافقين

وحاتك يا الغالية بس البيوت صناديق..

وانا زمان كان عندى اربعة نظريات للاسرة وتربية الابناء..وهسع

عندى اربعة وليدات وما عندى نظرية واحدة..

بس السودانيين عادة مابيخوضوا فى الحاجات دى بشفافية بتخاف الناس يفتكروهم

بتكلموا عن امورهم الداخلية ويشيلوا حالهم.

عموما حبة توافق واشياء اساسية فى الراجل مطلوبة..عدم الجبن والبخل مع شوية

ثقافة( وليست تعليم لانو كتيرين ناجحين اكاديميا فاشلين اجتماعيا)بمشى

الحال....والتوفيق من عند الله ومراعاة لشعرة معاوية..وكلو زى ده

سلمتى،،،

صديق الموج يا مريح..

تعرف.. كده انت قصرت المسافة.. يعني الحلم شئ، والواقع شئ تاني..

عجبني حكاية كانت عندك 4 نظريات، والآن عندك 4 أبناء.. اعتقد انو أكيد عندك نظريات ممشي بيها حياتك..

Quote: عموما حبة توافق واشياء اساسية فى الراجل مطلوبة..عدم الجبن والبخل مع شوية ثقافة ( وليست تعليم لانو كتيرين ناجحين اكاديميا فاشلين اجتماعيا) بمشى الحال.... والتوفيق من عند الله ومراعاة لشعرة معاوية..وكلو زى ده.

ده رأي وافي شافي..

للبنات فقط
الحكومة ماقصرت في حق البنات وجابت اتفاق عشان زيادة فرص فارس الاحلام.

لجنة برلمانية مصرية تقترح تحفيز من يتزوج سودانية
طالبت لجنة الشئون العربية بالبرلمان المصري بصرف حوافز ومكافآت للمواطنين المصريين الذين يتزوجون من سودانيات، لتشجيع وحدة وادي النيل وتقوية أواصر الأخوة من البلدين كما كانت في السابق.ووافقت اللجنة على اتفاقية حرية التنقل والاقامة والعمل والتملك بين مصر والسودان.

الخبر المنقول من سودان نايل.
الشعب في شنو والحكومة في شنو

الفارس العزيز الحرفي..

أولا مرحب بيك معنا.. ونتمنى مشاركاتك ما تنقطع..

Quote: للبنات فقط الحكومة ماقصرت في حق البنات وجابت اتفاق عشان زيادة فرص فارس الاحلام. لجنة برلمانية مصرية تقترح تحفيز من يتزوج سودانية طالبت لجنة الشئون العربية بالبرلمان المصري بصرف حوافز ومكافآت للمواطنين المصريين الذين يتزوجون من سودانيات، لتشجيع وحدة وادي النيل وتقوية أواصر الأخوة من البلدين كما كانت في السابق.ووافقت اللجنة على اتفاقية حرية التنقل والاقامة والعمل والتملك بين مصر والسودان. الخبر المنقول من سودان نايل. الشعب في شنو والحكومة في شنو

غايتو انا أول زولة حتستفيد من الاقتراح ده..

شفتا الهنا.. فارس احلام انترناشونال ..

وبالتشريع كمان ..

راوية يا حالمة..

عيونو دي ما بتأكل عيش ..

لا والله بهزر.. أها عيونو بس..؟

يعني لو عيونو جميلة وكذاب وجبان ووصولي ومتردد.. برضو يمشي..؟

العزيزة رجاء

لك كل التحية والود

قد تتضمن اجابتى على سؤالك لنا عن مواصفات فتاة الاحلام بالنسبة لنا وفارس الاحلام بالنسبة للجنس الاخر

لا اثق فى اننى امثل فارس احلام لاى بنت وليس ذلك لاننى لا اثق فى نفسى بل لان الاتجاه العام للفتيات اصبح يتجه صوب المال وامكانية الزواج الفورى وتوفير كل البذخيات والاهتمامات الانصرافية البحته

لقد اصبح الاهتمام بالاخلاق والقيم والوطن مضيعة وقت بالنسبة للفتيات ويطلقن على كل من يحمل هم هذه الاشياء انه غير جادى فى حياته ويريد ان يضيع حياته فى الفراغ وحتى اذا تكونت علاقه قد تنتهى مع اول اشارة من عريس جاهز وحتى لا نخرج من اطار الموضوع المطروح, وبالتاكيد توجد من الفتيات من لهم تقييم حقيقى لفارس الاحلام ولكن ماذكرته هو للاغلب وذلك نتاج طبيعى للتردى الذى نعيشه
فلذلك لا يمكننى الجزم باننى ممكن ان اكون فارسا لاحلام اى بنت


والى ذلك الحين:-

سوف اصنع لى فتاتا
من دمائى
كى تقدسنى وتبكى
عند موتى دون زيف

الواثق العزيز..

مالي أسمع رنة حزن في توصيفك..؟

ولأني أؤمن بأنه لا يصح إلا الصحيح.. فإن موضة وتقليعة "الزواج السهل" حتما ستأخذ وقتها وتزول..

هنالك لحظة صدق داخل أي واحد فينا.. لا يستطيع ان يكذب فيها على نفسه.. هل هو سعيد باختياره..؟ وهل القبول والريدة تأتي بعد الزواج المرتب..؟

عند الاجابة الصادقة على هذه الاسئلة.. سنرى: هل ستزول كل القيم والمشاعر النبيلة..؟

لقد اصبح الواقع مخيفا

ولكن الحزن لا يعنى الانكسار او الاستسلام

فبكل تأكيد يولد بعد كل ليل صباح

الواثق العزيز..

لولا الأمل لما عشنا حتى اليوم..

والجايات أكتر.. قول خير..

خير والف خير:-

تسعين سنة ؟!
ويا السُرَّة
بت عوض الكريم
بصرِك بصير
سمعِك سميع
نضمِك نضيم
بالِك محلُّو
صبي وسليم
تسعين سنة ؟!
وعُودِك أمدَّاً
ما انحنَى
شامخ
بلا البان القديم
تسعين سنَّة !
ومن فِتنتِك
إستغفر الله العظيم .؟!
....
....
جُوكي الرجال
آ السُرَّة
بت عوض الكريم
مِن وين
ووين !
لا الكلُّو طين
أغراكي !
لا السمِح الوسيم!
آ السُرَّة
صددتي المشايخ
والعُمد
مُرساله ليك
ضيعتي بي أنِفة
البشارة
عليهو
كيف قلبك
صَمَد
يا بت
قصاد المغريات
والبشروك بالجنِّة
من فُقراء البلد
أسقوكي بالغفلة
المحايات
ما نفَع
رُتباً كبار
قلتِي له لع
شعراء ومغنِّين
ختَّ فيك
دُوداي غناهُن
ما شفَع !!؟
الجان يجن
والهام يهيم؟!؟
والإنجليزي
أسلَم
عشان
خاطر هواك
ساعة طلعتي
تجيبي
عود السِْيسَبان
إنصيَّدِك
يا السُرَّة
بت عوض الكريم
مرقَنُّو
كرعين الحصان ؟!
والجاك ناط!
كتَّفتي بالليل
في اللمينِي ؟!
معَ الفجر
طلبِك عفُو
وسُترة !!
وعفيتي
سترتي
يا السرة القويِّة
بقت لُو
توبة سوِّية
من هتك العرض!؟
يا بت ها ..
كيف بعد الحسين
ما تاورِك قلبك
على زول
في الأرض ؟!

استاذتنا رجاء ..

كالعاده ..طلعتى لينا بي واحده من المواضيع ...المهممممممممممه ..الغير واضحة الاهمية .. والمابينتبه ليها الا ..شخص مثلك ..اتوقع (برضو كالعادة)للبوست ان يكون من المواضيع المميزة والكثيرة الردود ....

بالنسبة للموضوع ...شايف انو ردو صعب ..كيف يعنى عاوزانى اجاوبك عن سؤالك (هل ترى في نفسك فارس احلام ..؟؟)
سؤال مدرسة ..
بالتالي انا مامعاكم في البوست ده ..لانو رغم محاولتك زج الرجال في الموضوع ..الا انو حيكون بوست حريمى 100%..
ماهو لو في راجل حيرد ليك ..اكيد حيكون (دون جوان) ..لاني طالما بعرف الشي المحبوب في الرجل في نظر الفتاة.. اكيد اي راجل كان اتوفق مع اى بنت هو بيتمناها .لكن عدم معرفتنا بي المطلوب هو البيخلينا نتشوكش ونتفور ونتبهدل ..

انا حنتظر بوستك (اميرة قلب الشباب ..او المراءة الحلم او الحبيبة المثالية ...الخ ..) ..ده ممكن افنجط ليك فيهو تمام ..

بس بالله ماتتاخري ..نزليهو سريع ..طولنا مانظرنا في البورد ده ..

العزيز معتصم..

كيف سؤال هل ترى في نفسك فارس أحلام صعب..؟

بمشاهداتي ارى ان الرجل، أي رجل يرى في نفسه فارس أحلام كل البنيات وليست بنية واحدة فقط.. ويذهب البعض للاعتقاد انه محور اهتمام وعمل الكون.. إشاراته وابتساماته هي رضا.. شفتا كيف..؟

لكن حقيقي فوجئت لما ما وجدت اجابة زي دي هنا.. إلا من قرمبوز ..

الاول خلينا نشوف الفارس وبعدين نفتش ليكم على الأميرة..

انا غايتو يا رجاء دخلت من باب "كن صديقي "
وبعدين اكتشفت انه المدخل دا هو المدخل الناجح
غايتو لحدي
قولي زي عشرين سنة كدا تقريباً
7 قبل الزواج و13 بعده

الاستاذة رجاء

Quote: عموما حبة توافق واشياء اساسية فى الراجل مطلوبة..عدم الجبن والبخل مع شوية ثقافة

أقنعم عليك الله ...قوليهم ..يا صديق ياخى..


قال أحدهم وهو ينتمى الى فصيلة السناقل( جمع تعذيب )ومفردها(سنقل)....ولا أعرف هو أصله سنقل لماذا يصرون على جمعه او طرحه على طاولة المسؤلية ؟
قال
اقلهن مهرا ...أكثرهن ..مطالب .....

عمر الماحي العزيز..

Quote: اقلهن مهرا ...أكثرهن ..مطالب .....

تصدق يا عمر لغاية الآن انا ما عارفة المهر ده بيمشي وين..؟

لأنو لو بيمشي لصرف العرس.. فلا داعي له..
أما لو بيمشي لحساب في البنك.. فهنا يكمن الفرق..

وكمان عندي ملحوظة: كيف واحدة تطلب من زول غريب انو يجيب ليها كيت وكيت..؟ دي غايتو حاجة ما مبلوعة عندي خاااالص..

أماني الحبيبة..

"كن صديقي".. المشكلة انها في كثير من الأحيان تفضل زي ما هي.. لأن النفس تريد: "كن صديقي"، "كن زميلي"، "كن حبيبي"، وممكن "كن زوجي"..

في حالتك المستمرة دي، اعتقد ان المواصفات التي وضعتيها لذلك الفارس وافقت هذا الرفيق الحبيب..

هنيئا لكما..

رجاء
وبينى وبينك مع العولمة ده بقى فى فارس احلام والله العكس
يتحقق الحلم متى عزفت الاوتار الرقيقة لحن أول اللقاء وهذا هو مربط الفرس .
تحياتى

الحبوب بلدي..

Quote: تحقق الحلم متى عزفت الاوتار الرقيقة لحن أول اللقاء وهذا هو مربط الفرس

أسعدني للغاية انه ما زال يوجد هذا الإحساس..

رجوية الصحفية الفاهمة الواعية الراقية
بارك الله فيك على الواحة الحلوة دى

وهاك صفات فارس الاحلام كما وصفتها جدتى لابى ( رحمها الله )
وشوفوا الكلام ده كيف واحكموا .

الرجل المسؤول
الرجل الكريم
الرجل الباشار الما كشار
الرجل العادل والفاضل الما بجادل
الرجل الامين والحنين الما ضنين
الرجل العديل والفضيل الما رزيل
الرجل النضيف والظريف والعفيف
البكرم الجلابة وبحترم النسابة
ود الكرام ان دخل يقول سلام وان مرق يقول سلام
اخو البنات البسند المايل وبتم الناقص
ابو شكلا خايل وابو جيبا مايل
لما الضيف يسلم عليهوا دم الخروف يجرى تحت كرعيهوا
ولسه فى كلام كتير كتير
لما ارجع تانى
اها يا ظريفة ده فارس الاحلام فاين بوجد ؟؟؟

قال طول ووسامة ومال قال
واهم حاجة ما يكون شين زى الجريفاوى ده قايل نفسه فارس احلام .
حلم الجيعان عيش يا الجريفاوى ودام درمان ..
لى عودة
ام وضاح

Quote: الرجل المسؤول الرجل الكريم الرجل الباشار الما كشار الرجل العادل والفاضل الما بجادل الرجل الامين والحنين الما ضنين الرجل العديل والفضيل الما رزيل الرجل النضيف والظريف والعفيف البكرم الجلابة وبحترم النسابة ود الكرام ان دخل يقول سلام وان مرق يقول سلام اخو البنات البسند المايل وبتم الناقص ابو شكلا خايل وابو جيبا مايل لما الضيف يسلم عليهوا دم الخروف يجرى تحت كرعيهوا ولسه فى كلام كتير كتير

الحبيبة آمال..

عليك الله الفضل شنو غير الإسم..؟

العزيزة رجاء
أنا لما قريت عنوان البوست قلت رجاء دي يا ربي شافتني وين عشان توصفني للناس ،،
بس لما قريت الزول بتاع أبوجهينة قلت بس ده أنا ، فلما افل قلت لا أحب الآفلين ،،
بعدين مريت على قرمبوز ، قلت ده بيذكرني ايام الشباب ، وديك أيام حلوة لولا أن الزواج حال بيني وبينها ، ( مش كده يا صديق الموج ؟ ) ثم عرّجت على أم وضاح فوجدتها تصفني بدقة متناهية ،،لكنها أطالت الحكاية وفصلتها تفصيلا ، فلو أنها قالت كلمة واحدة لكانت أجملت ،، لو قالت هو الرجل ( العوير ) ،،
لا تخافي يا رجاء سأخوض في هذا البوست كثيرا ،،

ود قاسم فارس أحلام البنات المحظوظات..

طبعا منتظرة أشوف رأيك..

خاصة انك سبقتني بي بوستين عن نفس المعنى..

رجاء

Quote: إذن ما هي مواصفات فارس أحلام البنات..؟

اذا مشى ......برطع

اذا تكلم .... جعجع

اذا ضحك...... لعلع

اذا زعل .. ...رصّـع

اذا اقبل الليل ولع

اذا اصبح الصبح بلع

Quote: رجاء Quote: إذن ما هي مواصفات فارس أحلام البنات..؟ اذا مشى ......برطع اذا تكلم .... جعجع اذا ضحك...... لعلع اذا زعل .. ...رصّـع اذا اقبل الليل ولع اذا اصبح الصبح بلع -------------------------------------------------------------------------------- بريدك...يا...القرنتية........ .....بريدك سااااااهي.....زندية

سجيمان بالغت...يا اخى ما تزعزع يقين البنيات...وتحبطهم


اصلوا ما بتخلى البوامة حقتك دى...

غايتوا لو يوم زول..انشرق بى بوست ولحق امات طه وطه ولدن زاتو انت المسؤول

وقايلنا زى زمان بقى فيها اف بى اى وغواتناموا وكده..غايتو انا حقى ما عافى

ليك...الله يخليك..سلمت

سيجيمان فارس أحلام أم الخير..

Quote: اذا مشى ...... برطع اذا اقبل الليل ولع اذا اصبح الصبح بلع

لكن ما حصل الوصف..

وتقول لي فارس..؟

أنا غايتو يا رجاء فارس أحلامي، زي ما بتقول ماما في لحظات زهجها الكتيييرة مني عند رفض العرسان، لسه أمو ما ولدتو
بعدين شفتي حتة "رفض العرسان" دي كيف ؟ خطيرة مش
عنوسه و فلهمه على وزن فقر و عنتظة

ندوية الحبيبة..

ماهو شي غير الفلهمة دي جاب العنوسة مافي ..

اما انا فأقول لأمي اني عايزة راجل زيها: ما يسألني ماشة وين وراجعة متين ولا اتأخرتي لييه.. ولا ما تسافري.. وفوق ده لما أرجع البيت في المسا الاقي عشوة معتبرة وهدومي نضيفة ومكوية والبيت يشرح النفس ..

لو قلت ليكم بتجيبوا لى واحد حسب المواصفات
والا دى شمشره منكم ساى

رجا
بنات الزمن دة ما عندهن فارس احلام
أول واحد بدق الباب هو العريس
عليك الله هن لاقيات رجال؟؟

حبيب وفارس أحلام نورة..

اول واحد يدق الباب هو العريس..

لكن هل هو فارس الأحلام ولا هي "عيشة والسلام"..؟

الحبيبة سمايل البهجة..

انتي كدي قولي الأوصاف.. وقولي خير..


ربنا يسهلها علينا وعليك..


لووووووووووووووول

عاد يا رجاء ما بسألك.. ختفتي الموضوع من خشمي.. والله كنت دايره أكتب السؤال ده بالذاااات!


عارفه يا رجاء.. في قصة كتير قاعد يحكيها الوالد في البيت.. ويضحك لما دموعه تجري.. قال واحده عرست ليها واحد غنياااااان.. والله فاتحها عليهو.. أها.. قووووم يا سيد الناس، أخسر قروشك كلها.. وتعال البيت أندب خظّك..اها المرا تعاين ليهو ساااك.. ومغيوظه.. وهو بتكلم معاها كده .. في نص كلامه وشكيته.. عاينت ليهو في عيوناته .. وقالت ليهو "أجيييييييي يا يابا.. هو إنت أحوص!!!"


اها شفته دي بالذااااات.. أنا ما دايراها... ما دايره زول.. لما القروش أو الجاه أو الصحة أو العقل.. .. لما الحاجات دي .. تتشال منّه.. ما يظهر لي كعب... ده من جهته هو.. من جهة تعامله... ما يكون بخيل.. بس دي.. ما بطيقها.. ويقدر نجاحي .. لو انا انسانه ناجحه... يعني يا رجاء انا مرشحه للرئاسة.. مفروض يكون تمام معاه الوضع ده.. ولا كيف عاد ..











شي إضافي... يرضى يغسل العدّة


بنت الحسين

Raja
Faris alahlam lazim yakun
jaibu tegeel
damu khafif
wa balu taweeeeel
hahaha tehiyati le postik al hillu

Faris

ماثيو العزيز..

مرحب بيك..

قلت لي شنو.. جيب تقيل ودم خفيف وبال طويل..؟

دي روشتة خطيييرة.. ينظر في أمرها ..

مريوما الرئيسة القادمة..

مرحب بيك كتييير..

أهلنا المصريين عندهم مثل في قصتك دي: يا واخدة القرد على ماله.. يروح المال ويفضل القرد على حاله..

مواصفاتك التانية أجدها جميلة ونشاركك فيها جميعا.. فرجل لا يقدر نجاح إمرأة هو شخص يستحق إمرأة متخلفة تكمل فيه عقدة نقص ما.. وتطلع عينو ..

رجاء سلام كتييييييييييييييييييير



فارس الاحلام وهم والكمال لله وحده0000 تكوني عايزة حاجة تلقيها
وما تلقي الحاجة التانية 00000000000
صاحبي موسي جادين 000 زمان قال لي البت قالت لي انت أهم زول في حياتي 0000 وانا ما ممكن حياتي تستمر بدونك000وشاء الزمن ان تتزوج
برجل اخر0000000 وان لا يتزوج هو 000تمر السنين وتشتكي له هذه البنت من عمايل زوجها000000000000000
المهم صديقي موسي جادين لم يعر البنت اي اهتمام خصوصا بعد زواجها
وتقدمت به السن 000 فهل يصلح هذا ان يكون فارس بنات هذه الايام

000 موسي يسمع الكاشف ولا يسمع محمود عبد العزيز
ولا يسمع فرفور ولا معتز صباحي00000 ولا عزيز بقالة 00 ولا حنان
باكمبا00
هذا مع ودي

الغالي سوركتي..

لم يكن موسى جادين فارس أحلام تلك الفتاة.. بل كان محطة انتظرت فيها "العريس اللقطة"..

أعرف سيدة اختارت رجلا طالما حلمت به.. وعندما تقدم للزواج منها رفض والدها لأنه كان يراه "هلفوتا".. وبعد الرفض رفضت أي عريس "ليس هلفوت" بمقياس والدها.. وبعد مرور أكثر من 15 عاما تقدم فارس أحلامها مرة أخرى.. وكان قد هاجر وتزوج بأخرى تطييبا لكرامته.. ولكنه انفصل منها لعدم القدرة على واصلة التمثيل بأن الزواج شئ والحب شئ آخر..

المهم هذه المرة وافق والدها.. تعرف لييه..؟ لأنها في نظره أصبحت عانسا ولا يهم ان تتزوج "هلفوتا"..

لم يهمها في الأمر إلا تحقق حلمها.. وفوزها بفارس أحلامها..

والله الحكاية دي جد.. ولو ما الرقابة على المصنفات الفنية اليومين ديل في المنبر كنت جبت الأدلة صوت وصورة كمان ..

تعرفي يا رجا انا زوله بسيطه جدا جدا

وقنوعه خالص خالص

حتى متطلباتي ماكتيره ......خدي عندك مثلا يكون ...

1/ ود ناس وبقدر ومتفهم

2/ بعرف الله تمام ماكمان متعصب لمن يحمي المرقه

3/ غنــــــــــــــــــي جدا جدا جدا

4/ ما نقنــــــــــــــاق وطلباتو ما كتيره

5/ جاهز لتنفيذ كل طلباتي مهما كانت مستحيله

6/ بساعد ( يد بي يد)

7/ امو هديه ورضيه ( لوووووووووووووووول)

8/ مربي ناجح ( بيبي ستر)

9/ هي صحي نسيت يكون متعلم كمان الجهل مصيبه

10/ وجيــــــــــــــــــــــــــة لمن غلط


.....بس

كان عندك زول بالمواصفات دي بس ياهو زااااااااااااااتو زولي

اها في الانتظار يا رجا على احر من الجمر


تحياتي


نوف

الدودو الجمالي
حبيبي الجمالي

الدودو الجمالي
حبيبي الجمالي


يا نمر الخلا
الدودو ما جاء

يا نمر الخلا
الدودو ما جاء

هوبلس عندنا ..؟

يا ربي ده شرف.. ولاااااااااااااااا شرك ..؟

عاد يا نوف ما بسألك...

عيد الميلاد وعرفناه.. سوبرمان نلقاهو ليك وين؟....

قناعتك عينه...حسي يمكن في زول منشن.. يقرا الكلام ده.. بخم عفشه.. ويقول "وانا مالي!"





بنت الحسين

شكلي طبزتها يا مريم ...............

ماقلته في عيد ميلادي افتح نفسي واتمنى ...




غايتو علة مسئوليه رجـــــــــــــــــــــا تحيب لي عريس

وبالمواصفات دي .................

وانت راتك كان عندك جيبيهو


نوف

العزيزة رجاء

جينا نقول سلام ..
وبنجيك صادين كان الله مد في العمر ..

تسلمي

Quote: عيونه تاسرنى فى الرجل عيونه

جنس بكا عليكي يا راوية

العايز أعرفو أنا يا رجاء السؤال ده الجماعة ناس سجيمان ديل بجاوبوا عليهو ليه
والله ناس أم الخير وزولتي.. ورطوا ورطوا.. أحلام مستغانمي أحلام ظلوط سيك سيك معلق فيك

I will be back

خالد يا فارس احلام البنات.. زمااااان

طبعا حكاية التوريطة دي هي زاااتها سبب السؤال..

معتصم العزيز فارس أحلام الكتيرات..

سلاامين.. وفي انتظار عودتك..

مريوما ونوفا..

يا عسل التخريمة في البوست ده بي 50 دولار.. "لأهمية الموضوع" ..


لا خلاص عشان عيد ميلاد نوف سماح المرة دي..

Quote: 1/ ود ناس وبقدر ومتفهم 2/ بعرف الله تمام ماكمان متعصب لمن يحمي المرقه 3/ غنــــــــــــــــــي جدا جدا جدا 4/ ما نقنــــــــــــــاق وطلباتو ما كتيره 5/ جاهز لتنفيذ كل طلباتي مهما كانت مستحيله 6/ بساعد ( يد بي يد) 7/ امو هديه ورضيه ( لوووووووووووووووول) 8/ مربي ناجح ( بيبي ستر) 9/ هي صحي نسيت يكون متعلم كمان الجهل مصيبه 10/ وجيــــــــــــــــــــــــــة لمن غلط

لووووووووووووووول يا نوف ..

يا حبيبة انا كان قدامي زول بي المواصفات دي كلها.. أباصيهو ليك مالي ..

نوفا.. غايتو اوصافك منطقية لدرجة.. يعني جمعتي ما بين العلم والوسامة والمال..

هسع يجوك ناس ود قاسم يقولو ليك كل ده ما حتلاقيهو في راجل.. اتنازلي عن حاجة فيهم ..

حـــــــــــــــــــــرم ..

كان اتنازل من صفه واااحده

الله بدي الجنــــــــــــــــــــــــة...........

لكن تحت تحت سمعته الصفات دي قالو متوفره في ود قاسم نفسه

نوف

الاخت الاستاذه رجاء،،
تحية وود ،،
البنات ديل حيرونا عديل والله ماعرفنانعمل ليهن شنو !! انا غايتو عندي اقتراح نعمل لينا هيئة مواصفات و معايير عالمية لقياس مواصفات فوارس الاحلام زي شهادة ال(ISO ) للجوده ،، لكن المشكلة في الشروط (التعسفية ) يحلوها كيييييييف!؟؟؟؟
غايتو نحن احلامنا ماكبيره في انتظار فارسة الاحلام التجي تخطبنا من اهلنا وتدفع المهر زي اهلنا الهنود،،و اهو حلم في حلم...
وتسلمي،،

شلبي فارس أحلام البنات..

قلت لي في انتظار فارسة الأحلام لما تجي تخطب..؟

كانت عندي فكرة وانا طفلة لما امشي لي مناسبة فرح.. وأشوف "الشيلة" الجاييبا العريس المغترب.. وطبعا انا الحكاية دي ما واقعة لي لي يوم الليلة.. يعني كيف واحد ما بيعرف واحدة يجيب شنطة فيها عطور وملابس وأحذية على ذوقو ويتوقع انها تناسب ذوق ومقاس التي تختارها له امه او مرة الجيران ..

المهم.. فكرتي كانت انني عندما أكبر.. ساغترب وأحضر بشنطة كبيرة بها هدايا للعريس الذي ستختاره امي او مرة الجيران .. وكانت تقلقني مسألة مقاس "الجزمة".. هل هي 42 أو 46 ..

العزيزة رجاء:

من الصعب أن يكون للنساء معيار ثابت في إختيار شريك الحياة، وهذه المعايير قد تتغير عندالفتاة نفسها من وقت لآخر حسب الظروف، سواء كانت هذه الظروف مرتبطة بسن الفتاة من مراحل مختلفة إبتداء من سن المراهقة إلى أن يشاء الله لها بالإرتباط، أو قد ترتبط بالظروف الإقتصادية والوسط الإجتماعي الذي تعيش به الفتاة، المهم إليك هذه الفكاهة عن صعوبة إرضاء الذوق النسائي في هذه الناحية:

يقال أنه تم افتتاح مركز تسوق للأزواج في دالاس حيث يمكن للسيدات الذهاب واختيار زوج من بين مجموعة كبيرة من الرجال
المبنى مكون من خمسة أدوار كلما صعدت للدور الأعلى كان الرجال أفضل في الصفات و المميزات

القاعدة الوحيدة أنك لو فتحت باب أي دور من هذه الأدوار لابد أن تختار زوجا أو تصعد للدور للأعلى
ولا يمكنك الرجوع مرة أخرى .. النزول يكون للخروج بلا عودة فقط

فذهبت صديقتين الى المركز لاختيار زوجين
الدور الأول عليه لافتة تقول
الرجال هنا لديهم وظائف محترمة و يحبون الأطفال
فقالت الفتاتان لبعض: حسنا هذا أفضل من الا يكون لهم وظيفة أو الا يحبوا الأطفال

ولكن لنر ماذا في الدور الأعلى

الدور الثاني عليه لافتة تقول

الرجال هنا لديهم وظائف بمرتبات عالية .. يحبون الأطفال .. و في غاية الوسامة

قالت الفتاتان .. ممممم .. ولكن ماذا في الأعلى؟
الدور الثالث عليه لافتة تقول

الرجال هنا لديهم وظائف بمرتبات كبيرة .. يحبون الأطفال .. في غاية الوسامة و يساعدون في شغل البيت

قالت الفتاتان : وااو .. رائع .. ولكن ماذا قد يكون في الأعلى ؟
الدور الرابع عليه لافتة تقول

الرجال هنا لديهم وظائف بمرتبات كبيرة .. يحبون الأطفال .. في غاية الوسامة و يساعدون في شغل البيت .. و في غاية الرومانسية

قالت الفتاتان : يا الهي .. تخيلي ماذا يكون بانتظارنا في الدور الأعلى

فصعدتا الى الدور الخامس

وجدتا لافتة تقول :

لا رجال هنا و هذا الدور فاضي و موجود فقط لإثبات أنه من المستحيل ارضاء المرأة .. مع السلامة

الحبيبة هنادي..

ما تتخيلي طلعت معاك دور دور عشان نثبت انو مافي مستحيل.. وانو في رجال بمواصفات البنات العادية ومتطلباتهم..

معليش.. خيرها في غيرها..

لا اعرف هل تتغير المواصفات عند الفتاة بتغير الظروف والسن.. ولكني اعرف ان هناك من تتخلى عن حلمها حتى تكتسب لقب "مدام".. وهي بالتأكيد لم تغير مواصفاتها ولا يحزنون.. هي نسفت الفكرة من الأساس..

أسعدتني مشاركتك..

عزيزتي رجاء

يبدو أن كلامي قد فهم على غير محمله، فلا أقصد من قولي بأن المواصفات عند الفتاه تتغير بتغير سنها عملية تقديم التنازلات من جانب الفتاة بقصد الحصول على لقب مدام، بل قصدت من ذلك مسألتي النضج والتطور العقلي المصاحبان لعملية السن ففي سن المراهقة مثلا نجد أن جل هم الفتاة وضع صورة خيالية لفارس احلامها، وغالبأ ماتكون المشاعر في تلك السن عبارة عن نزوة عابرة، وعندما تصل لمرحلة الثانوية العامة تبدأ تفكر بصورة أكثر عقلانية فتستخدم الفتاة عقلهابصورة أكثر من ذي قبل وهكذا في مرحلة الجامعة ومابعدهاإلى أن تصل الفتاة إلى مرحلتي النضج العقلي والعاطفي الذين يختلفان من فتاة لآخري
عزيزتي رجاء
عندي مقولة كنت دوما أقولها لصديقاتي من خلال تجربتي في الحياة: ان الفتاة التي لا تتعجل في أمر الزواج غالباً ما تتوفق في إرتباطهاوإختيارها من تلك التي ترتبط في سن مبكرة، لذلك عزيزتي نجد ان علماء الإجتماع والنفس والأطباء دومالا يحبذون الزواج المبكر للفتاة، وذلك لعدم إكتمال الإستعداد الفيزيولوجي والعاطفي لديها الأمر الذي قد يؤدي في حالات كثيرة لفشل العلاقة والنهاية المأساوية التي غالباًماتحسب نتيجتها لغير صالح الفتاة


ودمتي رجوية

استاذة رجاء ...
دي فاتت علينا .. أبوجهينة وصديق الموج وبقية حبات العقد قالوا كل الممكن يتقال .. لاكين إنتي كشفتي ورقك كلو ..

عموما ننتظر البوست التاني .. عشان نتجدع فيه ..

ياخوانا المهم الاخلاق .. أو كما تقول الاغنية:

ما شرط السماحة كفاي طيبة أخلاقو
ووووب عليا .. العازب نارو حية

حليل أيام زمان

أهل العوض.. فارس أحلام كتيرات اعرف بعضهن ..

الورق لو ما كشفنا نبقى في قلنا وقالو.. نعمل شنو..؟

انا معاك الأخلاق مهمة.. ولكن سماحة شوية ترضى الغرور ما بتضر ..

<<<<<مريييييييييييييييييش يكون مرييييييييييييييييييش<<<<<
على طريقة فتحى البحيرى قلت استطلع آراء بنات جيراننا
99.99% قالوا يكون مريييييييييييييييييييييش
واتتتتكوا على [الياء] دى شديد خلاص
ولا عزاء للمفلسين

يا رجاء

غايتو من زمااااااان وصلت لي شبه قناعة...بأنو البنات ما عندهن فارس احلام...بالمواصفات ....الاستاندرد...زي كريم...ومريش...وخلوق...ومتدين...وومتفهم...ومتعلم...وهلمجرا...

امانه ما لاقني بنات...قادلات مع فراس...سحاحير ومفلسين...لامن تدي ربك العجب...ولارتباك في هذا الفهم...عرست بالصدفة...وحالا حالا حولتها الي صداقة...عشان...ما يقومو يلجموني كفارس...

وكل يوم شادين السرج...فالصديق اولي زي ما قالت ليك الجندرية امسكي في كلامها قوي.

الأخت العزيزة رجاء وجميع المتداخلين تحياتي الحارة وبعد

وكما يقولون الواقع غير الخيال فلربما رسم انسان/انسانة فارس/فارسة أحلام بصورة لا يمكن أن توجد في الواقع وأنا حسب عشرتي لكثير من البشر اناثا ورجالا شيبا وشبابا وأطفالا ورجالا لم أجد يوما ما أنسانا كاملا يصل الى درجة الكمال وطبقت هذه المقاييس على نفسي كذلك وجدت ينطبق على ما ينطبق على الآخرين أنه لا بد من عيب خفي أو بين والمشكلة في العيب الخفي لأنه لن يظهر الا بعد العشرة والمعاشرة أما العيوب الظاهرة فهي بائنة للمختار أما أن يقبل بها أو يرفضها .
المهم خلصت من تجربتي هذه أن أقبل الناس بعلاتهم كما لي مثل هذه العلات ويزيد وأأخذ ما ينفعني وأترك ما يؤذيني. هذا بالنسبة للصداقات والزمالات الطويلة أما عن الزواج فالأمر يختلف أختلافا تاما اذ أن بعض الأمور لا يمكن أن يصبر عليها الانسان طول العمر وبالتالي هنالك أمور لا يمكن تجاوزها ويمكن أن أجملها في الآتي

- الكذب آفة كل مصيبة ولا يمكن لشخصين أن يبنيا حياتهما على الكذب وبالتالي اذا كان شريك الأحلام كذابا فاياك واياه لأنه يمكن أن يفعل كل شئ ويكذب
- الجدية ؛ لا يهم كثيرا ان يكون فارس الأحلام ذا مركز مرموق ولكن لابد أن يكون جادا يأكل من عمل يده لا يعتمد على غيره في كسب عيشه.
- الود : وهذا أمر مهم ولا أتخيل أن يتعايش زوجان دون مودة تذيب ما يأتيهما من خلافات ومرارات.
- الأمانة : وأقصد بها عدم الخيانة في أي شئ
وهنالك من ألأمور الكثيرة ولكن أحيانا نتنازل عن أشياء ولكن لا أتخيلها بأي حال من الأشياء الثلاثة السابقة وبعد ذلك تأتي أمور أخرى :

قد لا تقبل واحدة بالسكير ولكن قد يكون في رأي أخرى بأنها يمكن أن تعدل من حاله.
وحسب تجارب الناس الشخصية فليكن اختيار فارس الأحلام بمشاورة من تثق البنت في صدقهن من أم أخت و غير هذه وكما يقال عينيه أفضل من عين وكثيرا ما تضلل العواطف وتحجب الرؤى ولذلك لا نتر ك العواطف تجرنا دون عقل ولابد من اعمال العقل في الاختيار



الحديث يطول ولكن هي بعض ملاحظات والله من وراء القصد

الفاضل أنور..

حديثك جميل مقنع.. وهو أجمل نصيحة يمكن ان تقدم لفتاة..

لك الشكر وانت تثري الحوار.. وفي انتظار المزيد..

الفارس نزار الملجُم بالصداقة..

اوافقك في ان صفات الفارس تختلف من واحدة للتانية.. ويمكن جدا ان يكون ذلك "الفقران" او"الُسًحار" استوفى تمانية ولا تسعة أعشار المواصفات.. ولكن ان يكون هو "العريس اللقطة" فهذا ما أشك فيه ..

شكلنا كده حنمشي بنصيحة الجندرية..

لوووووووووووووووول لنًو ..

المريُش ده يا عجوز يا حرامي يا كوز انتهازي..

والتلاتة ما ظنيت انهم فرسان أحلام بأي حال ..

رجاء
وسيم وطويل وغني
ثلاثة من كن فيه قطعا ليس سودانيا خالصا‍
راوية
صدقتي

هن يثيروا في الناس حماس
هن يقودوا الزول للجــنون
يجرحنك وهن الأســــــاس


خالدالحاج

Quote: والله ناس أم الخير وزولتي.. ورطوا ورطوا..

العــــــــرس زي الحنة كان ما طبقوا مابمسك
جني

جني فارس أحلام تلاتة على الأقل..

لفتً نظري لشئ مهم للغاية.. وهي:

هل نحلم بالفارس الذي ينتمي لبلدنا وبيئتنا وديننا و.. الخ من الأشياء..؟ ام اننا نضع الصورة ونغير ونبدل فيها حسب البلد والدين والبيئة..

هل بنات وسط وشمال السودان مثلا لا يحلمن إلا بأبناء وسط وشمال السودان..؟

وهل الصبايا من الجنوب لا يحلمن إلا بأبناء الجنوب..؟

هل يمكن ان يكون الحلم "انترناشونال"..؟


كلها أسئلة تحتاج لإجابات..

غايتو انا فارس احلام الكثيرات...
لكن وين هم???

الله يقطع الغربة وايامها...
موضوع العيون دا بجيك راجع ليو تانى...

AnwarKing.....

رجاء ..سلام
عارفة دة موضوع طويييل
بجيك راجعة تاني بمهلة
بس
حابدأ بالأهم وهي صفة بتحمل الكثير من المعاني و تفرعاتها

الإحــــتــــــرام..الإنسان المُحْتَرَمْ

لي بعدين

حنونة الحنونة..

طبعا.. المحترًم والمحترُم يكسب..

انتظر عودتك.. وواحشاني..

الملك انور فارس أحلام الكتيرات رغم الغربة..

غايتو انا شايفة كم حاجة كده تدل على الكلام ده.. أهمها انك نبيل وخدوم وبتعرف تتكلم وين ومتين..

كفاية لغاية كده..

ومنتظرين أمر العيون ده..

اى حاجه الا غسيل العده..انحنا ايدينا انسهكت من الغسيل

بشرى يا فارس احلام البنات البغسلو العدة..

شفت حكاية غسيل العدة وعمل العشا، ومكواة البلوزات، والحاجات دي اسمها "أمر واقع" يعني ما حاجات الناس بتفكر فيها ويكتبوها في اللستة ..

رجــاء ازيك..

اقولها وللتاريخ بأننى دوماً احترم تللك الفتاة التى تضع نموذج معين لفارس احلامها..وتمتلك القوة الكافية للدفاع عن فكرة الانتظار.. حتى لو كلفتها فقدان عدد جيد من العرسان ً ..وان لا تكترث لمقولة (الزمن بقى صعب)..وتعرس اى واحد وخلاص..

عموما يا رجاء لكل من تمتلك وتنتظر ذاك الفارس للزواج منها..ارجو التدقيق فى اخياره كزوج بناء على الروشتة التالية:

(رجال لا يصلحون للزواج.. وانواعهم وكيفية التخلص منهم)

النوع الأول
ابن "ماما" المدلل

صفاته
رقيق ولطيف وناعم بعض الشيء ربما يكون لديه "كرش" صغير من أكل "ماما"
المسبك
يقضي معظم وقت فراغه في البيت


الشيء الذي يشدك إليه في البداية
أنه يحب مشاهدة برامج المرأة و"طبق اليوم" معك


:الشيء المرعب
أنه سبق وشاهد كل هذه الحلقات


علامة الخطر
يقول إنك أنت الفتاة التي كانت تحلم بها والدته طوال عمرها لتكون زوجة
لابنها
ويعرفك عليها في أول لقاء بينكما


لكي تتخلصي منه
اعترفي له أنك تفضلين الرجل الذي ينتقي ملابسه بنفسه ولايعتمد علي
ذوق ماما "البلدي


النوع الثاني
البخيل

صفاته
ثري في أغلب الأحيان لكن لايبدو عليه ذلك
لايظهر في الحفلات والمناسبات إلا إذا كان مدعوا
يتزوج في سن متأخرة


الشيء الذي يشدك إليه في البداية
ذكاؤه وحرصه الشديد علي عمله وعلي مستقبله وطموحه الكبير


الشيء المرعب
أن أمواله تسير في اتجاه واحد: إلي البنك.. وطريق العودة مغلق دائما
للإصلاحات


علامة الخطر
يمرض فجأة يوم ميلادك حتي لايضطر لشراء هدية
يخبرك أصدقاؤه أنه يختفي 10 دقائق في الحمام وقت دفع الحساب في أي
مطعم أو مكان عام


: لكي تتخلصي منه
اخبريه أنك أكثر البنات إسرافا علي وجه الأرض


النوع الثالث
مدمن الرياضة

صفاته
قوي البنيان، جريء، علي استعداد دائم للعب مباراة كرة قدم
للتسلية.يفضل الملابس الرياضية


الشيء الذي يشدك إليه في البداية
مظهره الذي يوحي بالقوة، وهذه الحيوية الشديدة التي يتمتع بها


الشيء المرعب
أنه يقضي معظم وقته في صالة الألعاب الرياضية حيث يبني هذه العضلات
وبقية الوقت أمام المرآة


علامة الخطر
أول مرة يدعوك للعشاء بالخارج سيعتذر لأن وقت العشاء يتضارب مع مباراة
مهمة لفريقه


لكي تتخلصي منه اعرفي فريق الكرة الذي يشجعه وادعي أنك من أكبر مشجعي
الفريق المنافس


النوع الرابع
خبير الموضة

صفاته
أنيق جداً، واثق من نفسه، يعرف آخر صيحات الموضة ومعلوماته في هذا
المجال تفوق معلوماتك


الشيء الذي يشدك إليه في البداية
ملابسه سواء كانت "كاجوال" أورسمية تحمل دائما توقيع بيت أزياء شهير
ألوانه متناسقة، يهتم جدا
بالإكسسوار (الحزام والكرافتة).. باختصار رجل مبهر


الشيء المرعب
أن دولاب ملابسه سيجعل دولابك أنت يبدو فقيراً ويرثي له


علامة الخطر
يفضل "الشوبنج" علي قضاء اليوم معك
وعندما يراك لايكف عن إعطائك النصائح والعناوين اللازمة لتصحيح مظهرك


لكي تتخلصي منه
يكفي سؤال بريء:هل جورجيو أرمانى لاعب كرة قدم؟


النوع الخامس
محب النساء

صفاته
سواء كان غاية في الوسامة أو كان رجلا عاديا.. هناك شيء في هذا الرجل
يجعلك تلتفتين إليه. فهو يعامل النساء كأنهن من ماس، لأنه يحبهن ـ
جميعهن ـ جداً


الشيء الذي يشدك إليه في البداية
يعرف كيف يجامل وكيف يقول كلاما يمس الوتر الحساس في القلب


الشيء المرعب
إنه يستخدم نفس الأسلوب مع كل النساء


علامة الخطر
يناديك باسم فتاة أخري أثناء حديث عاطفي


لكي تتخلصي منه
أخبريه أن والدك الجعلى ذبح زوج أختك الكبرى عندما رآه مع فتاة أخرى
فى مطعم و إتضح
لاحقآ و لكن بعد فوات الأوان أنها شقيقته


النوع السادس
الخيالى

صفاته
هاديء، قليل الكلام، صوت خافت وحديثه بطيء قد لا تلاحظين وجوده وسط أي
تجمع


الشيء الذي يشدك إليه في البداية
شيء غامض يلفه ويثير فضولك فتحاولين اكتشافه
وتغريك رقته وابتسامته الودودة


الشيء المرعب
إنه يتعامل مع الناس حسب الصورة التي رسمها في خياله وليس حسب
شخصياتهم الحقيقية
وطموحه خيالي وغالباً لايسعي لتحقيقه


علامة الخطر
يختفي عادة وقت الغروب ليتأمل الشمس ويعود وعلي وجهه علامات الكآبة


لكي تتخلصي منه
أخبريه أنك من هواة مشاهدة أفلام الحركة"الأكشن".. وأن رياضتك المفضلة
هي المصارعة الحرة


النوع السابع
مشروع المؤلف

صفاته
يرتدي نظارة طبية أنيقة ويحمل دائما صحيفة أو كتابا في يده يستعرض
ثقافته الواسعة
أثناء الحديث ويدعي معرفته العميقة بطبيعة النفس البشرية


الشيء الذي يشدك إليه في البداية
لباقته في الكلام وأفكاره المرتبة وحديثه الجذاب


الشيء المرعب
أنك سوف تعيشين مع فنان متقلب المزاج: لاعشاء في الخارج، لاهدايا في
المناسبات، يقضي
معظم وقته شارداً يبحث عن فكرة جديدة


علامة الخطر
إنه يفتعل شجارا بينكما أو حتي مشهد انفصال ليكتب مشهدا واقعيا في
رواية جديدة


لكي تتخلصي منه أخبريه أن سلسلة "ميكى ماوس" من أجمل الأفلام المقتبسة
أروع الملاحم الأدبية التي قدمت في السينما
فى خلال العشرين قرنآ الماضية


النوع الثامن
مدمن العمل

: صفاته
رجل أعمال بمعني الكلمة: ذكي، طموح، أنيق و"غير متاح" طوال الوقت


الشيء الذي يشدك إليه في البداية
رجل جذاب وناجح ..ماذا تريدين أكثر من ذلك؟


الشيء المرعب
راجعي عبارة "غير متاح" ضمن صفاته وفكري في معانيها المتعددة وتأثيرها
علي حياتك في المستقبل


علامة الخطر
تكتشفين فجأة أن سكرتيرته أصبحت صديقتك المقربة لأنها هي الوحيدة
"المتاحة" "دائما" عندما تطلبينه في المكتب


لكي تتخلصي منه
أخبريه أنك علي استعداد لقضاء عدة ساعات معه في مكتبه كل يوم طالما
أنه لايملك وقتا لرؤيتك ونفذي الاقتراح


النوع التاسع
الوحيد

صفاته
لطيف، رومانسي، ليس له أي أصدقاء يؤمن بأن الشمس تشرق وتغرب كل يوم من
أجلك أنت فقط


الشيء الذي يشدك إليه في البداية
كل هذا الاهتمام لابد أن يحرك مشاعرك كما أنه شخص حساس جداً
كل من حولك يقولون إنه يحتاج فقط لفرصة لكي يقنعك بحبه ويجعلك تحبينه


: الشيء المرعب
أنه فعلاً علي استعداد لكي يفعل أي شيء من أجلك ويحرص علي أن يبقي
بجانبك "طوال" الوقت.. أليس هذا مرعبا؟


: علامة الخطر
أنه يريدك أن تكوني متفرغة له تماماً


: لكي تتخلصي منه
أخبريه أن أجمل أوقاتك هي التي تقضينها وحيدة.. وإنك تقدرين الخصوصية
الفردية


:النوع العاشر
عاشق المساواة

: صفاته
متحمس لحقوق المرأة ، متحدث لبق، يحب الكلام في السياسة، يقدر الدور
المزدوج الذي تلعبه المرأة في المجتمع


الشيءالذي يشدك إليه في البداية
حماسه في الدفاع عن قضايا المرأة وضرورة المساواة في كل شيء بينها
وبين الرجل. يجعلك
تشعرين أنك ستحصلين معه علي كل احترام وتقدير
شيء آخر رائع: أنه لايحب مشاهدة القنوات الرياضية علي الإطلاق


: الشيء المرعب
في هذه العلاقة سوف تحرمين من أشياء كثيرة لن يفعلها هو لأنها ضد
مبادئه مثل أن يفتح لك باب السيارة، يدفع الحساب في مطعم، يرسل لك
زهورا أو حتي يوصلك بسيارته إذا تأخر بك الوقت وأنت في الخارج


: علامة الخطر
سوف يحب أن يترك لك معظم المسئوليات المادية ليساعدك علي الإحساس
بكيانك المستقل


: لكي تتخلصي منه
اخبريه أنك تبحثين عن رجل تعتمدين عليه ماديا ومعنوياً


.................................................................



: همسة أخيرة مهمة

.. اذا تخلصت منهم كلهم ستنعمين بالحرية التى تطلبينها

........ و لكنك

!!! قد لا تجدى من تتزوجينه



آآ وقبل ما ننسي
أهم واحد
وهو المفلس إي الزي والزيكم




المفلس

صفاته
يحب دائمآ الحديث عن أن القناعة كنز لا يفنى
و أن السعادة قد تكون فى قطية لا فى قصر

علاماته
جيوب بناطلينه لها مقددة

ما يشدك إليه أول مرة
مظهره المتقشف


علامة الخطر
كل مرة عازمك فول


: كيف تتخلصين منه
أطلبى منه أن يكون شهر عسلكما فى هونولولو

قد لا يطول الانتظار..

مودتى

الولـــيد

زميلتي وصديقتي العزيزة رجاء
هذا الموضوع يمثل في لبه تحقيقا صحفيا ذكيا تثار من خلاله قضية في غاية الأهمية تتمثل في مناقشة تحوّلات عميقة يشهدها المجتمع السوداني.
أخال أن ظاهرة الاغتراب وثقافة (المغتربين) علاوة على الثقافة الاستهلاكية التي استشرت وتغلغلت في مفاصل المجتمع السوداني - بفضل الانقاذ - ألقت بظلال واضحة على أساليب الأختيار وفرضت ثقافة جديدة على تفكير نسبة مقدرة من الفتيات السودانيات هذا بالاضافة طبعا لاشكالات السودان القائمة (الاقتصاد /الحرب/الجهل) ما خلّف واقعا تمليه في الغالب اتجاهات التفكير المجتمعي (تحديدا الأمهات والعمات والخالات..الخ) في اتجاه تكريس فهم استهلاكي لمؤسسة الزواج.وهنا لابد من الاشارة إلى وجود فتيات سودانيات بنسب مقدرة فضلّن مقاييس أخرى مختلفة وبإرادة حرة عكست بجلاء حجم وعيهن الحياتي والوجودي.
من هذا المنطلق، أعتقد بأن المقياس الأول حاليا هو حجم ثراء العريس "فارس الأحلام" غض النظر عن صفاته الأخرى.ولنا أن نسأل هل تلقى المسؤولية على الفتيات أم المجتمع أم أدواء السودان؟؟
على مستوى التجربة الشخصية،أرى أنني لم أمثل فارسا لأحلام أيا من الفتيات الا فيما ندر، ولاحظت خلال فترة دراستي الجامعية أن أشتغالي بالسياسة كان ينظر إليه من قبل نسبة عالية من معارفي وقريباتي وزميلاتي على أنه عبث ما بعده عبث ومخاطرة لا يمكن أن يشاركن فيها.وأعتقد جازما أن هذا السبب - اضافة للفقر طبعا- كان عاملا رئيسا في فقداني صفة فارس الأحلام، بل على النقيض، كنت "شيطان الأحلام".ولكي أكون منصفا وصادقا مع الذات وأمينا معها، كانت خطيبتي الحالية نموذجا لما أتمناه فعلا في فتاة أحلامي, فقد مثلت لها _ ويا للغرابة- فارسا للأحلام، على الرغم من ظروفي البائسة كلها، وكوني طالب يحصل بالكاد على قوت يومه، ومطارد من قبل السلطات الأمنية، ولا مستقبل واضح له على الأرجح ، ولن يحصل على أي وظيفة داخل السودان.أختارت "نجلاء" بصلابة أن تكون معي ، محاربة للظروف كلها، وممثلة دعما لا نهائيالي .وأرد لها من بعد الله ووالدي عليه الرحمة ووالدتي الفضل في اصابتي أي نجاح .

فارس أحلام نجلاء والبنيات لي حدهن الفاضل خالد..

تحدثت عن نقطة "الثراء" واهميتها في اختيار الفتيات لـ "العريس".. وهي تقريبا نقطة الاتفاق والاختلاف معا..

وتجدني اتساءل.. كم هو مقدار الثروة التي يمكن ان تجعلني سعيدة..؟ وهل هي بالجنيه ام الدينار ام الدولار ام اليورو..؟
وهل يمكن ان تكون أصول ثابتة وأسهم في شركات ام اكتفي بالأموال السائلة والودائع البنكية..؟
وهل سأعيش مثل "تايكونات" المال العالميين..؟ اقضي الصيف في الكاريبي والشتاء في سان تروبيز وأمتلك اليخوت والسيارات الفارهة ام أكتفي بسيارة تكون موضة البلد..؟

وهل.. وهل.. وهل..؟؟!!!!

لأنه لا يمكن ان يكون الثراء بأي حال: كم غويشة على كم سوار وانسيال + 50 كيلو وزن إضافة..

لأنه حينما ينوى الانسان بيع نفسه.. يجب ان يكون التمن غااااااااااااالي..

تحيتي لنجلاء في تمسكها بفارسها.. وبها تطمئن قلوبنا جميعا..

والله ابدااااااااااااع يا ولي ..


قطعتها للجكس الهنا (ناس رجاء) في راسهم


قلت لي

Quote: يناديك باسم فتاة أخري أثناء حديث عاطفي

... حرم حصلت لى قبل كده

سلاماات
الموضوع ده بيختلف تماما من فتاة لاخرى , بس اكيد فى مقاييس عامة
انا بصراحة زوله واقعية جدا جدا , و بصراحة كمان ما بحب المثاليات اللى فوق العاده , و دهح يكون واضح فى مقايييس و مواصفات (اسم النبى صاينو و حارصوا ) على راى المصريين
لازم يكون طموح , لانى عملت جاده طوال حياتى و اتوقع ان تكون حياتى لها قيمة لبلدى لشعبى او حتى لاسرتى I wan to make deference
يكون( فى امل) انو يكون غنى فى المستقبل , ما ضرورى يكون غنى عند الزواج . بس لازم يكون متعلم بصورة كويسه و مجتهد فى عملو و جادى فيه , و اى زول بالمواصفات دى اكيد فى امل انو فى يوم من الايام يكون غنى
متفهم , يعنى ممكن (يحاول يفهم ) و جهة نظرى فى موضوع معين حتى لو ما اقتنع بيها
يكون متدين (من غير تعصب ). و التدين معناها انه عارف بكل ما اوصى به الله و رسوله الكريم من الخلق الطيب مثل الكرم و بر الوالدين و اكرام الزوجه و مساعدة الضعيف و الصدق وووو
لازم يكون مثقف بس نظيف ,لان كل المثقفاتيه فى السودان لابسين بناطلين الجنز و حالتهم صعبة

و اكيد ح ارجع تانى

الحبيبة الغااالية سمارت هي..

تعرفي انتي بتتكلمي بلسان عدد مقدر من البنات..؟

عجبتني مواصفاتك وطلباتك.. وفي انتظار عودتك الثرية..

سامو ازيك...

بالرجوع الى بروفايلك اتضح انك married ..

فياخى آخر خمسة كلمات فى كلامك ممكن تشوتم لى فى مسنجر داخلى كده
(ما تخاف من الحرب القايمة)..
كمان لو ام الاولاد ما عضو يبقى الله شافك..

طبعا الدنيا لسه صباح هنا وانا منتظر آخر النهار
الله يستر..


لك مودتى..

سامو..

مييين قال ليك.. انت ما بتعرف انو كل ما وجدت مشكلة بندوًر على حلها..

وليد طه فارس أحلام ناس بعرفهم ..

شكرا لحديثك المشجع عن اهمية التمسك بمبدأ "ضل حيطة ولا ضل راجل..."

واقول ليك كمان مع تصنيفاتك دي شنو:

لازم تعرف برج الزول القدامك.. لأنو من السهولة ان تجذب مواليد برج "السرطان" الرجال.. بس تكلمهم عن امهم واسرتهم وتديهم شويتين اهتمام اسري وتلاقيهم يقولو ليك "شبيك لبيك"..

عموما يا شباب بقية الأبراج معانا.. العايز يعرف زولو منو ..؟

رجــاء ازيك...
لكن عليك الله مش تستاهل اكون فارس احلامها ?..


زمان يا رجاء جدنا "ابكر"-تشديد مع الضم- كان معرس اربعة
نسوان..كان كل ما يمشى مكان حتى لو عزاء لازم يجيب معاهو واحدة..
ورغم كده كان فارس احلام خامسة غير ان الشريعة حالت بينها وبين ما
تشتهى..

المهم يا ستى البنية ديك انا متمسك بيها وجاييها بحصانى الابيض..



كلميها سمح ؟

راجع ليك فى قصة الابراج دى

مودتى

رجاء ازيك
ما عارفة مواضيعك دي بالذات بتصادف نص الاسبوع
الواحد عايز يكتب ليك باسهاب
[ اسهاب دي كيف ?]

دايرة كلام جد
انور الطيب قال ليكي الزبدة,بس خليني ارتبهم حسب اولوياتي :

الصدق
ناس عندي وعملت وسويت
لازم يجيب شهادة موثقة من شخصين عن كل معلومة يقدمها

الامانة
الخيانة دي كلمة سقطت من قاموسه ولا يعرف حتى معناها


يحمل درجة علمية وصنعة محددة في الحياة
الجماعة الوارثين ولا بتاعين الخبطات والصفقات ما بامن ليهم
يا واخد القرد على ماله,يروح المال ويفضل القرد على حاله

الحب
ما اجمل ان تزوجي شخص تحبيه
لاكن في حقيقة واضحة ان المراة يمكن ان تعايش مع رجل يحبها وتقدم له الاحترم التقدير او الامتنان طول الوقت .
النقطة حاختار رجل يحبني اكثر مما احبه باميال تقدري حتى تقولي سنوات ضوئية [كناية عن الطول]

واخر نقطة رغم اهميتها وما تضحكي
[القيافة]
يعني لو لقيتي لي شاب سوداني تحت 37 بيلبس بدلة كل يوم وهو ماشي الشغل حانبسط منك جدا

اما عن احلام البنات
فصحي راوية دي و جيبي ورقة وقلب واكتبي عشان باندودث بكري ما حيكفيني

تحياتي
زولة123

Quote: دايرة كلام جد انور الطيب قال ليكي الزبدة,بس خليني ارتبهم حسب اولوياتي : الصدق ناس عندي وعملت وسويت لازم يجيب شهادة موثقة من شخصين عن كل معلومة يقدمها الامانة الخيانة دي كلمة سقطت من قاموسه ولا يعرف حتى معناها يحمل درجة علمية وصنعة محددة في الحياة الجماعة الوارثين ولا بتاعين الخبطات والصفقات ما بامن ليهم يا واخد القرد على ماله,يروح المال ويفضل القرد على حاله الحب ما اجمل ان تزوجي شخص تحبيه لاكن في حقيقة واضحة ان المراة يمكن ان تعايش مع رجل يحبها وتقدم له الاحترم التقدير او الامتنان طول الوقت . النقطة حاختار رجل يحبني اكثر مما احبه باميال تقدري حتى تقولي سنوات ضوئية [كناية عن الطول] واخر نقطة رغم اهميتها وما تضحكي [القيافة] يعني لو لقيتي لي شاب سوداني تحت 37 بيلبس بدلة كل يوم وهو ماشي الشغل حانبسط منك جدا

زولا العسل..

بداية اعتذر ليك على حكاية أول الأسبوع دي.. خلاص تاني حأبرمج مع الويك ايند ..

وفعلا الزبدة في كلام الفاضل أنور..

الشهود هنا لازم يكونو: قلبك، وعقلك.. اوعي تسمعي كلام شاهد خارجي..

الخيانة دي لازم تفهيهو من البداية انو لو "بصً" برة.. انتي برضو ممكن "تبصًي".. دي حاجة حتأدبو ليك ..

حكاية منو يحب منو أكتر دي مشكلة.. يعني وبصراحة انا ما بتخيل اكون بريد لي زول اكتر مما يريدني واكون مطمًنة.. او اخلي زول يريدني ساااكت وانا ما ببادلو قدر ده.. حرااام..
عشان كده لازم الريدة تكون متسااااوية.. او مرات كتيرة عند ده وشوية عند التاني.. والعكس..

أما فيما يتعلق بالبدلة للشاب أقل من 37 سنة للشغل.. فدي بجد حاجة مستحييييلة.. أقول ليك.. قميص أبيض وبنطلون أوليف وكرفتة مناسبة كيف.. بيخارجو ..؟

العزيزة رجاء

قالت عبلة : يا عنترررر يا عنتررر وينك يا حبيبى العزيز ؟
رد عليها : انا هنا يا عبلة , لقد ذهبت الى الصحراء للصيد , لانى فارس الصحراء يا عبلة .
هىىىى , فارس الصحراء الليلة اللاندكروزر يا خوى .
بعدين شوف انا حكاية فارس مفلس دى ما بتخارج معاى .


فليس بالحب وحده يحيا الانسان يا رجاء , اعتقد انو فارس احلام الانثى فى نظرى هو الشخص المتوافق نسبياً من حيث المال او الوسامة او المركز المهنى , واعتقد اى امرأة بتحلم بزول يكون قريب من هذا النسبى , وطبعاً فى حاجات بتعتبر تكميلية يعنى بعد الزواج ممكن تحسم , فكثير من النساء اليوم لهن مطلق الحرية فى الاختيار يعنى ما زى زمان انو البنت قاعدة فى البيت وابوها يجيب ليها زولاً للزواج .

لكن برضو فى بنات اتزوجن من ردود افعال , يعنى ضربن بحكاية فارس الاحلام دى الحيطة , مثلاً تكون فى وحدة رسمت خريطة طريقا من خلال زميل رأت فيه مواصفات الفارس المغوار ذو الابعاد الهلامية الذى نادراً ما يوجد وفجأة جرت سيول جرفت مبنى الاحلام بعيداً عن الذاكرة , دة نوع من ردة فعل ... فالسؤال هنا هل المرأة يمكن ان تعيش مع شخص لم تر فيه صفات فارسها ؟ وطبعاً زى ما قلت هى اتزوجتو .

اما بالنسبة للرجل فأنا راجع

الفاتح فارس أحلام البنات الأمهن داعية ليهن..

سؤالك عن: هل المرأة يمكن ان تعيش مع شخص لم تر فيه صفات فارسها؟

نعم.. والدليل على ذلك حبوباتنا وبعض أمهاتنا وبعض صديقاتنا يعشن "قانعات" بما "قسم" لها..

وسؤالي: هل تراود هذه المرأة في أي لحظة من لحظات حياتها فكرة كيف كانت يمكن ان تكون بدون هذه القناعة..؟ وهل "تزجر" قلبها وروحها حينما يسألانها عن الهيام والوجد والفارس الذي لم يظهر..؟

فوق

Quote: جنس بكا عليكي يا راوية

خالد يا عزيزى عندنا غير البكا نحنا ........ لوووول
تحت الرمش حنين وحنان .....

Quote: يعني لو لقيتي لي شاب سوداني تحت 37 بيلبس بدلة كل يوم وهو ماشي الشغل حانبسط منك جدا

زوله عندى طلبك تدفعى كم
حتسالينى وانت لى ما اخدتيه لروحك حا اقول ليك
وش فقر تقولى ايه

رجاء
ما لقيت أبلغ من الصورة دي

As for Sudanese girls I'ven't met one in 6 years so I've no clue. For here rich and have a good job (good credit history) first then physical muscular appearance and not being stiff (good dancer, smooth) is important, and also good communication skills (7annako saneen).

الفارس أحمد الشريف..

اولا مرحب بيك.. ولو سمحت شيل الدغششة دي من صورتك عشان "الجكس" يشوفو هم بيتكلمو مع منو ..

قلت أوصاف فعلا بتبين انك ما عايش في السودان.. ده لو واحدة ساااكت قالت نفسها في زول بيعرف "الاتيكيت" وعندو "بريستيج" تقوم الدنيا.. انت تقول بيعرف يرقص كمان ..

قبيل سألت "جني".. هل الصفات تكون محلية ولا عالمية..؟

عموما أوصافك دي لي زول بيحب الحياة.. وحتما سيسعد شريكته ويلوُن ليها أيامها ..

Quote: اولا مرحب بيك.. ولو سمحت شيل الدغششة دي من صورتك عشان "الجكس" يشوفو هم بيتكلمو مع منو

On your order, the photo is changed. Me 2 months ago. I hope chicks will not run away |oooo|o ):



With best wishes.

الفارس أحمد الشريف..

أيوه كده ..

شكرا يا ذوق..

Bilmunasaba 3idana kimiya min alfursan hina http://sudstudents.com waallahi kullahum jahzeen tab |ooo| khidma bas li alchicks wa rabana yajzi.

يا حنونة..

ديل غايتو ما نحنا ..

ديل الرقصو على السلم.. لا حلمو بفارس ولا لقو العريس اللقطة..

يعني تنازلوا عن حلمهن.. ودفنوا روحهن حيات..

أيه رأيك في القراية الفلسفية دي ..؟

Quote: ديل الرقصو على السلم.. لا حلمو بفارس ولا لقو العريس اللقطة.. يعني تنازلوا عن حلمهن.. ودفنوا روحهن حيات..

رجوية
دة كلام صحيح مية المية
لكن..... طبعآ الخت الصورة زول/ة خبيث/ة جدآ
معناها...مافي راجل كامل...وانا طبعآاتفق مع هذا الرأي لكن ما قادرة داخل نفسي أتقبله...كلنا ننظر للكمال..وهو لله وحده
THERE IS NO PERFECT MAN

ممكن يكون في إنسان مناسب لكن ما مكمل.....
Mr. RIGHT AND RIGHT ONLY

اها للحديث بقية..جاياك تاني

لا لا يا رجاء
ما بيخارجوا


راوية وش السعد
يامانت كريم يااااااارب
يعني في امل
اها, وبيلمع الجزمة كمان?



تحياتي زولة123

زولا العسل..

انتي ما شفتي احمد سعيد تحت ولا شنو..؟

ده جاك في النص عدييل كده.. يعني البدلة ما كل يوم.. لكن في ..

وغايتو من ناحية باقي الصفات شاوري ود قاسم ..

كل يوم,كل يوم
صيفا وشتاء
عارفة قصة البدل في المقابلات الرسمية وحفلات الاعراس ما بيقصروا فيها
بس شوفيهم تاني يوم, القميص بيبرا والحالةصعبة
بالمناسبة في شعب تاني غيرنا بيلبسوا القميص برا البنطلون ?
انا شكلي حقلب ليك وستك نقد ازياء

نسيت اعلق لندى

Quote: زي ما بتقول ماما في لحظات زهجها الكتيييرة مني عند رفض العرسان،

صااااااادقة ياختي,صادقة

زولة123

زولا العسل..

تصدقي فاهمة حكاية البدلة والقميص البي برة.. لكن بعد بحث لقيت لازم تركزي في فئة موظفين البنوك او شركات الكمبيوتر ولا دكتور حضًر في ايرلندا..

لووووووووووول

اعتقد ان الحديث عن المواصافات دا غير مجدى...
لانو الشئ الجميل او البنشوفو جميل... جميل فى وقته ومكانه...
غايتو انا شايف اجمل اسلوب او وسيلة لاختيار فارس/مهرة الاحلام بالوضوح والصراحة...
اعتقد انو معظمنا يطلب اكثر من المتاح بكثير...
عن نفسى انا زول مليح بالحيل... وبتحبا بعد فترة وجيزة...
لكن...
لدى طباعى المنفرة لمقاييس الاتى لاقيتوم فى حياتى... كنت شايفها ما اخطاء فى البداية... لكن تعلمت انو الموضوع ما بيمشى كدا...
المهم انو اخطائى دى لا اخاف ان اعلنها ومن البداية بقولها عشان اشوف مقدار التوافق...
ولى هسع بفتش...
انور وكدا...
AnwarKing

سلامات يا رجاء و باقى الأخوات
كويس انكم جبتو سيرة موضوع العرس و (فتيان الأحلام) و ليس فرسان ، لأنو زمن الفرسان دة يختى ولى زماااااان .
انا اول شى قبل ما تقرو (بروفايلى) متزوجة و عندى تلاتة بنات (فى عين العدو) ، يعنى بحاول انصح نصيحة اتمنى انكن تاخدنها فى الأعتبار.
اول صفة فى الراجل المفروض يعنى ترضى بيهو البت او (تختارو) عشان ما تزعلن يعنى !! انو يكون كالتالى:

* الراجل البيحترم الصغير قبل الكبير ،لأنو البيحترم غيرو اكيد ح يحترم مرتو و روحو كمان.

* الراجل الوقور و لكن بلا تطرف ، يعنى ما يكون جادى اكتر من اللآزم و كمان ( منفقه) بالضحك و التكشم طول اليوم.

* يكون حتى لو ما عندو قروش ، صاحب شهادة اكاديمية ممكن تأهلو لى كدة فى المستقبل ، لأنو والله حتة الماديات دى مهمة خااااااالص و ما فى داعى نغش نفسنا .

* ان يكون (غير متزوج ) و دى اهم شى لأنو قصة زواج رجال النسوان دى شايفاها بقت موضة ( وانا طبعا ما ممكن واحدة تفكر انها تعاين لى راجلى عشان ما اقدقد ليها عيونها) ، ولكن البنات بقن يقعدن لمن خلالالالالالالالالالالالالالالالاص القطر يصفر ، و تقوم بعد داك تكابس فى رجالنا .

* الراجل البيكون عندو (كبير) عشان لمن تحصل حاجة لا قدر الله يكون عندو ناس ممكن الواحدة ترجع ليهم و ما يقل ادبو عليها

* و باقى الحاجات ليكن انتن يا لبنات:
اول حاجة قصة المهر دى كلام فارغ ، يعنى انا ما شايفاها غير انها بترخص البت( كلما زاد سعرها فى مهرها كلما قلت قيمتها الفعلية عند من سيتزوجها) غايتو دى عن تجربة لأنو انا واخواتى الأتنين امى رفضت تاخد فينا مهر و قالت انها ما عارضة بناتها للبيع و كان قررت (تبيعنا) فمهرنا اموال الدنيا كلها ما بتسدو( ام ناصحة و الله الله يديها طولة العمر)

ان تكونى مستعدة على تقديم تنازلات بسيطة ، من غير ما تحسبيها تنازلات ، و لكن الراجل بيحب يحس انو محور حياتك بكل معنى الكلمة ، منو تبدأ الحياتو و عندو تنتهى ، يعنى الحتة دى ما صعب علينا اننا ننولها ليهو ، موش كدة ؟؟؟

قصة الصداقات القديمة و الزمالات (الرجالية) دى الرجال ما بيحبوها الأ طبعا لو كان اصلو من نفس مكان عملك او دراستك يعنى بيعرفهم قبلك الزملاء دى ، لكن دى اكتر حاجة ممكن تخلق مشاكل بين الأزواج ، يعنى ختوها فى عين الأعتبار.


تانى غايتو ما عندى شى اضيفو اسى ، لكن لو اتذكرت شى ح ارجع اقولو تانى

انا جائى يامامى...
عشان افتش فتاة احلامى..
بعقلى واقلامى
وطولى وهندامى
عشرة سنين مرة امامى
فى القراية واكل الطعامى
ما لقيت فتاة احلامى
كل بنات الحى الامامى
راحن لناس مجدى وحسامى
وانا ايش اعمل يامامى
بنات النت زى الاحلامى
واحدات عاوزات وسامة وطول اقدامى
وتانيات فلوس واوتار وانغامى
وينك ياحلام مستنغامى
وبنات الفضائات لكن القيام
انا مروق يامامى
باكل فى يامال الشام
ولابس هندامى
وحسابى فى البنك نامى

أحمد صديق فتى احلام كل بنات حيًكم.. انا متأكدة ..

قلت لي حسابك في البنك متنامي ..؟

قدر شنو كده.. وفائدة البنك البتتحسب كم..؟ وفي ودائع ولا حساب جاري بس..؟ وأخبار الكريدت كارد شنو..؟ أوعى تقول لينا ما عندك "القولدن" ..

الحبيبة نوسة..

شرفتي البوست بكلامك الفاهم الواضح.. وعجبني حكاية "المكابسة" على الرجال المعرسين دي ..

عموما اطمًني.. البتعرس ليها راجل عندو مرة واحدة معناها هي واحدة ناقصة بتمها واحدة تانية.. والحاسة انها ناقصة ممكن تعمل أي حاجة..

وبنتظر رجعتك تاني..

الملك الفارس أنور..

بوافقك تمام انو الصفات ما لازم تنطبق 100%.. لكن لا يمكن ان تتنازل كمان عن أكتر من 13%..

ما تسألني 13% لييه ..

عجبني تفاعلك مع الموضوع.. وانا فوق كتبت ليك صفات - شخصيا - اراها فيك.. يالله قول لينا طباعك الشينة شنو ..؟

* الراجل البيكون عندو (كبير) عشان لمن تحصل حاجة لا قدر الله يكون عندو ناس ممكن الواحدة ترجع ليهم و ما يقل ادبو عليها

نوسة والله كلامك زي العسل 0000 لكن لو الراجل ابوهو وأموا ميتين

يعمل شنوا؟

سوركتي..

كبير الراجل في نظري اخلاقه.. لا أم ولا أبو ولا خال ولا عم..

رافس أحلام البنات

الفارس العزيز بدر الدين..

انت كده بتكفي العين وتقنُع البنيات.. لكن بي معرفتي بيك.. خلينا ساكتين ساكت ..

زى العجب حسه الشنا وينها



بدر الدين ما ترفس النعمه

الغالية راوية سلام

Quote: زى العجب حسه الشنا وينها

طيب ليه في ناس بقولوا البورد دا فيهو بعاعيت؟؟؟
البعاعيت عن العين بعاعيت عن القلب

رجاء لو تسمحى خليك اكثر دقة .........؟؟


انا بلبس بدلة بس ما كل يوم ....

أحمد سعيد..

نفهم شنو هسع ..؟

شكلك كده عايز تعمل لينا مشكلة.. زولا صديقة واخت وكل حاجة.. لكن لغاية البدلة وتقيف ..

فارس الاحلام هو: الشاب الذي يستطيع اقناع البنت باستطاعته اشباع وتحقيق كل رغباتها حتي لو كان لا يستطيع....
لا تسالني ما هي تلك الرغبات لانني لا ادري لكن استطيع تحقيقها

فلسفه اليوم: اذا لم تجد من تحب ...فحب من تجد

player

عادل فارس أحلام عدد لا بأس به من "الجكس"..

كلامك ده ياهو زاااتو "القسمة والنصيب" لي يوم الليلة ما عارفاهم شنو بالضبط بالضبط..

يعني الزول يكيًف نفسه على "الموجود" ولا كيف..؟

طيب إذا وجد لاحقا شيئا أفضل.. يعمل شنو ..؟

حكمة هسع وبعدين وبكرة كمان: إذا لم تجد من تحب.. فلا تحب ساكت والسلام..

رجاء سلامات

انا غايتو كنت فارس احلام (عشة) لغاية يوم عشرين اطناشر السنة الفاتت بعد داك اللقب اختلف

شوية بقيت واقع احلامها - حسب ذمتها- اذن اجيب علي سؤالك بالآتي

فارس احلام البنات هو من يستطيع المحافظة علي اللقب لأطول فترة بعد الزواج ويؤخذ في الاعتبار رأي

الزوجة فقط ....


و عشة برة الموضوع دا من فضلكم

عمر العريس فارس احلام "عشة" سابقا وحاليا ومستقبلا ان شاء الكريم..

مطلوب منك أوصاف للحاجات الكنت وما زلت تمثلها عشان نتنوًر وكده ..

تحياتي للعروسة التي حققت حلمها بالفوز بفارس أحلامها..

Quote: نسيت اعلق لندى Quote: زي ما بتقول ماما في لحظات زهجها الكتيييرة مني عند رفض العرسان، صااااااادقة ياختي,صادقة

يا زوله يعني مكدباني؟ ما كان العشم
بعدين خلينا نقول كده، امكن نجيب دخل
و يا حنينة بااااالغتي في الصوره، خوفتينا و صدقي يا زوله دي الحتبقى علينا و قال مواصفات قال

ندوية..

غايتو لو استلفتي نضاراتي ديل هسع.. حتلاقي ليك كان فارس كان تلاتة دخلو هنا ..

3asha once said

I decided not to spend too much time looking for Mr.Right
Cause I will end up looking for Mr. Right Now

Quote: مطلوب منك أوصاف للحاجات الكنت وما زلت تمثلها عشان نتنوًر وكده ..

و الله انا لغاية هسة متحير في السؤال دا

طبعا أي واحد ممكن يكون مهذب - محترم - سمييع - بعيد النظر - متفاهم - وناس - قادر علي

ان يتخاطب مع كل الفئات العمرية - طموح - مثقف و أشياء أخري مفيدة


والمحيرني يوم واحد ما سمعت عشة قالت لي الكلام دا.



احد أخواني يا رجاء له عبارة يرددها كثيرا

(الراجل ياعمر يا خوي ما بعيبو الا جيبو)

و الغريبة دي برضو يا رجاء اخوك تعبان فيها عشان كدة انا حا احول الميكروفون لي عشة...

عمر..

المصيبة انو Mr. Right ما بيجي إلا في الـ Wrong time أو Wrong place..

ودي المعادلة الأبت تتوزن لي ولي بنات كتيريين ..

مشتاقين نسمع ونقرأ رأي عشة.. مرحب بيها..

وبالمناسبة دي.. كمًل باقي حاجاتك الحلوة.. ورشحها لنيل عضوية المنبر ..

يا رجاء اسمعى القصه دى وهى قصه حقيقيه حصلت لاحد اصدقاي بتوع امريكا
قال لى انو ذهب للسودان فى زياره لاول مره ,,,,,,,,,اصرت الاسره على تزويجه ,,,,,و بعد مجابده وافق على المبدا,,,,,و بدا البحث على العروس,,,,,عرضت عليه احدى اخواته و احده من بنات الحى ,,,,وافق صديقى ولكنه يريد التحدث معها اولا.

تم تجهيز حفل تعارف صغيرفى المنزل,,لكن المفاجاه لم تكن نفس الفتاه و لكن اخرى تحمل نفس الاسم,,,يقول صديقى ان تلك اللحظات من احرج اللحظات فى حياته,,,,كانو وحدهم فى صالون البيت,كانت الفتاه امامه (مكسوفه لصعوبة الموقف)فهى متدينه و من اسره متدينه جدا.

فكر صاحبى للخروج من هذا الموقف,,,قال لتطفيش العروس انه سكير و مدمن و لا يستطيع ترك الخمر و عليها ان تقبل بهذا الوضع,,,,,لدهشته وافقت و ردت عليه بانها تعرف كيف تجعله يترك الخمر,,,,,,عندها قال صديقى "انا برضو بشرب بنقو و لا استطيع تركه",,,,مره اخرى فاجاته بقولها(ما فى مشكله,,انا بعرف اعالجك),,شعر صاحبنا انو مورط مورط,,و رمى باخر اسلحته وقال(بس حاجه اخيره انا مدمن قمار و قروشى كلها مضيعه فى الكازينو و مكنات القمار و تزاكر اليانصيب),,,سكتت الفتاه فتره طويله,,,,وردت(انت يا خوي محتاج شغل كتير خلاص,,انا ما عارفه بقدر اعمل الحاجات دى كلها و لا لا!!!لكن خير اى شى بصلح)
نهايه القصه متروك لخيالكم

لووووووووووووول يا النصري..

لكن صاحبك يستاهل.. ما بعرف يقول: انو "مرتبط" ..

وهاك القصة دي، بما انه الشئ بالشئ يذكر..

قالو في واحد مغترب أخد اجازة 5 يوم مشى فيها لي السودان عشان يعرًس.. وطبعا اليوم الأول كان استقبالات وأهل وكده.. وفي اليوم التاني قعدن معاهو امو وخالاتو عشان يعرضن ليهو المرشحات.. وفي اليوم التالت وافق على واحدة من المرشحات وقابلها.. وفي اليوم الرابع عملوا عقد عديييل كده "لا خطوبة ولا جوطة".. وفي اليوم الخامس بقى مسافر طبعا.. أها قوومي يا عروس الغفلة افتحي في البكا وما تسكتي.. واتحيروا الناس يسكتوها كيف.. قام العريس قعد يهديها ويحنسها.. ويوعدها انو قريييب حيجي راجع ياخدها معاهو..
ولما غلبو يسكتها قال ليها: يا 000.. هي عرفة من متين ..؟

المهم.. ما قلت لينا يا ذوق.. المواصفات شنو ..؟

رجاء

شكرا علي تعليقك و موضوعك اللطيف


النصري


و الله صاحبك مصيبتو مصيبة .. دا تعرف الا يتصل بصديق

سلامات يا رجاء ( رجوية) انا باحب ادلع الناس و خصوصا الأصغر منى

اها جيتك صادة يختى لكن بعد ما نفسى انقطع من شغل البيت الما بيخلص ، اووووووووووووووووف

قلت ليك و الله قصة رجال النسوان دى انا مزعلانى زعل شديد ، بالرغم انها يعنى حاصلة فى اسرتنا ، يعنى اخوى (بعيد عنك) معرس فى مرتو ، و اولاد خيلانى واحد ورا التانى عرسوا فى نسوانهم ، و اولاد خالة راجلى برضو مسكو عرسو فى نسوانم ( يختى الناس جنو و الله ) و انا طبعا دايما بلوم الراجل البيمشى يعاين ورا بيتو ، و ديل باين اكتشفو بعد سنوااااااااااااات زواج انهم لسة ما لقو ( فتوات) احلامهم ، ههههههههههههه ، حلوة فتوات دى ، موش كدة؟؟؟؟

ولكنى كمان ما بعفى المرة او البت البترضى ليها بى راجل واحدة تانية ، عشان هى مثلا بارت و لا بس كدة ساااكت غيظة فى مرتو

اسى خليتينى اطلع من قصة فتيان الأحلام لى دبيل الرجال مالك ؟؟ دة وقتو ياخى !!!!!

اها النقول ليك طيب ، انا من زمان كنت عارفة انى ما ممكن ارتبط لى بى واحد يكون بيدخن ، شوفتى لو الدنيا كان فضت من الرجال كنت ما ح اتنازل من المبدأ دة ، و الحمد لله اهو ربنا حقق لى الأمنية دى

لأنو السجاير دة دايما مرتبط لى بعدم اتزان الشخصية و عصبيتها ، لأنو وسيلة تفريغ لمن تبقى عادة مضرة تضر كل الحول المدخن ، ياخى انا مالى و مال كدة ؟؟؟

الصدق و الرقى الأخلاقى مهم جدا !! هو طيب الما مهم شنو ؟؟ اى حاجة و الله مهمة .
الراجل النضيييييييييف ، الكرعينو ما مشققة ، القيافة ، ما ضرورى يكون وسييييييييم لكن مهم يكون انيق ، صوتو ما عالى عشان ما يقد ليك طبلة اضانك

والله عاد اقول شنو !! حاجات كتييييرة انا كنت شايفاها من الأساسيات ، و لكنى برضو يعنى فى النهاية حبيت و لد خالى و اتزوجنا و عايشين الحمد لله فى تبات و نبات و خلفنا البنات لكن مافى صبيان و كدة يعنى ، هىهىهىهىهىهىهى


والله ربنا يوفقكم ان شاء الله يعنى

ويا اخوى عبد الرحمن سوركتى
الكبير ما الأم و الأبو بس ، برضو ام البنت و اهلها برضو كبار ، حتى اخو البت مفروض يكون فى مكانة ( الكبير) و صحى زى ما قالت رجاء الزول مفروض يكون كبير بى عقلو و قلبو قبل اسرتو .

لكن برضو احساس الراجل انو البت دى وراها ناس بيخليهو ما (يتلكك) و يكون قاعد على الهبشة ، اصلو الرجال يا اخوى بقوا ما بيتحملو الهبشة ، برى من كدة ......

نوسة الحبيبة..

غايتو الشغلانة محمداكي محمداكي.. انظري حولك ..

انا دايما ما بعيب على الراجل حكاية التدبيل لأن العيب ما منو هو.. من البنت البترضى انها تكون نص او تلت او ربع.. وتشترك مع أخرى او أخريات لجعل راجل واحد مبسوط..

رجاء عباسي يا بت أهلنا
أنا جيت متأخر و قريت جزء من الردودو أعتذر لو مكرور
الأحلام -برأيي- غير الواقع و العروسة ممكن تكون منتظرة زول و توافق على غيرو, حسب السوق لوووول و قد وقفت شاهدآ على بــيــــع كثير ألوم فيه مرة البنات و مرات الأولاد!!لذا لا تعميم.
إن قام الرجل بتوفير العيش الكريم و تبسم ضاحكآ من قولها فهو عندي فارس في هذاالزمن الأشتر...و لأن العيش الكريم شيء نسبي فأوضح بأن المقصود السكن العادي و الأكل الإعتيادي و حق الدكتور و لبستين جديدات في السنة كفاية و عطر من تركيب محلي خير من لا شيء.
*أها الفسحة ما لازم في القاهرة أو سوريا ممكن كسلا أو بورتسودان بالبص أسبوع كل سنتين أحسن من مافي...الخميسات لزيارة الأهل تغيير مهبب جدآ أحسن منو ساعتين في حديقة عامة مع آيسكريم رخيييييس برضو ح تشوفوهو طاعم....همبوكة للولد و {بت أم لعاب} للبت أخير من الطناش و الإعتذار و الكضب, يعني على قول راوية بالريدة بتحل.
*التركيز في ردي كان على أن تظل فارس أحلام بعد الزواج, حسب حالة المشتبه به الإجتماعية

العزيزة رجاء

نحن غايتو نتفرج علي كل هذه الفروسية ونضحك وننخمد بهدؤ

عشان العيال نايميين

لو لقيتو ليكم فارسة انتحارية ادوني خبر

اسعد محي الدين فارس

Quote: اسعد محي الدين فارس

اسعد غيرته last name متين ماكان (ابراهيم )

وبعدين تتخمد ليه ماتحكي لينا باعتبار ما كـــــــــــــان

اقلو نستفيد من تجارب غيرنا .........

لك الود

نوف

أسعد الفارس المكسر ليهو 3 هنا في المنبر.. وما خفي كان أكتر ..

مرحب بيك كتيير..

انت بس أفصح شويتين وقول "الفي ألبك".. وبعدين نشوف ...


بالمناسية: الأستاذ محي الدين فارس هو الوالد..؟

العزيزة رجاء

لا والله يا رجاء استعرت الاسم للدلالة علي الفروسية الكانت زمان .

بالله هم تلاتة بس

تعرفي لو قدرتي تعرفي منو اخر واحدة فيهم اديها خبر وشرطي الوحيد انها

تكون انتحارية وغير متجندرة . ما عدا ذلك سهل مهما كان.

ولك ودي

ملاحظة اخيرة : ايه طلباتك من الاغاني اليوم.

أسعد..

قلت لي نركز ليك في الأخرانية..؟ مالن الاتنين الأوائل ..؟

لو جبت لينا "أنا عايش" بتاعت عمرو دياب، ولا "بعمري كلو" لوائل كفوري تكون كمًلت لينا البوست..

رجاء

لأنو ما في اتنين اولانيات

وائل كفوري هدية ليك ولكل زوارك

وربنا يسعد الجميع

تعرفي المشكلة مش فارس ولا فارسة

المشكلة كيف تتحق السعادة ؟؟؟

الطيب بشير فارس أحلام كم واحدة كدة ..؟

مرحب بيك..

شايفاك بتقول لينا الموضوع بعد ما يصبح أمر واقع الفارس بيكون راكب حصان بتاع "حلاوة المولد" .. لأنو حسب ما شفت.. الفارس قبل ما "يتورط" بيفسح في الهيلتون والمطاعم الـ 7 نجوم والعطور بتكون وارد باريس او من السوق الحر ولازم الرسمة تكون 100% وإلا جكس زي ناس زولا وراوية ونوف ومريوما وندوية ديل ينطوا ..

غايتو انا من أول امبارح حاولت أكتب لستة بالأوصاف ما قدرتا.. لأني عايزاة لي زول زي سيدني بواتييه في الإحساس والرقة، وزي أحمد رمزي في الشقاوة والبهدلة في الحب، وزي "...." معانا هنا في الرسيان والتقل، وزي السلطان حسن بلقيه في الغنى ..

شكلها الشغلانة ما دايرة فارس واحد ..

ملاحظتى الأولى قبل الخوض فى التفاصيل...ان البوستات ذات الطابع الاجتماعى هى التى تحظى بإهتمام الزوار والمعلقين...ه
سوف ادلى بدلوى فى هذا الموضوع الشيق...وبالطبع رأيى قابل للخطأ والصواب...وهذا التنوية مهم...لأننى بصراحة خائف –وما تفهمى دة جُبن يا رجاء- من بنى (جندر)....!ه

المرأه دائما تبحث عن (الفارس) الذى يوفر لها الأمان..والمرأة بطبيعتها هى رمز للحياة...ه
والأمان لا يمثل الحماية الجسدية فحسب..لكنة يشمل توفير الطعام والشراب والملبس...والسكن....ه
وفى القرون الماضية...حين كان ذلك الأمان لا يتوفر إلا بالضُراع....كان الفارس محط إعجاب الحسان هو الذى يتمتع بالقوة الجسدية والبأس:

بسأل عن عَلِى الفارس البقود تسعين
هو اللِّدر العَلَى ضهروا الخبوب والطين
ما ياكل الضعيف...ما بسولب المسكين
إلا شيمة الأسد أب مَسِكةً هين

وقد بذل الرجال فى الزمن الماضى جهودا جبارة لأبراز قوة بأسهم من أجل الفوز برضاء الحسان....فكان الحبيب يقف أمامهم محبوبتة ويقوم بتجريح جسدة...وكان الشباب إذا تنافسوا على حسناء يقومون بعملية المباطنة...وهى أن يضرب كل واحد غريمة بصوت العنج على بطنة...والذى (يركز) حتى النهاية هو من يفوز بقلب تلك الحسناء....!ه
وكانت هناك عادة الجلد فى الحفلات...إذ يقوم العريس بجلد الرجال بالسوط حتى تسيل الدماء من جلودهم...ه

وبعد دخول الإنجليز...إستاطاعت الدولة أن (تقهم) ذلك المفهوم...وصار توفير الأمان مسألة (تخصصية) تتم بواسطة القوات النظامية....وظهرت صورة جديدة لفارس الأحلام...وهم الأفندية....ومسألة (الأفندة) تلك لا تتم إلا بعد أن ينال المرء قسطا من التعليم...فغنت الحسان:

طالب فى مدرستو..ه
وأنا كان ما عرَّستو...ه
تمسكنى مَغَسْتو....ه

وحكى لى ابى انة ذهب لاحدى الحفلات...وعندما دقت الدلوكة...وتدافع الرجال ليأخذوا نصيبهم من الجلد...قام أحد المتحمسين وهتف أمام الملأ: الأفندية يجوا مع النسوان بى جاى......وما كان من ابى حينها إلا وأن خلع لبس الأفندية...وذهب عاريا ليأخذ نصيبة من الجلد...وما زالت اثار السيطان على جسدة حتى اليوم.....!ه
وتمثل تلك الحادثة وما شابهها الفترة الإنتقالية فى النظرة الى فارس الأحلام......ونحمد الله كثيرا بإنتصار صورة الرجل (المدنى) على صورة الرجل (اللدر)...فحكاية الجَلْد –تلك- لا يوجد لدينا وقتٌ كاف لها ...!ه

وفى منتصف السبعينات بدأت تظهر صورة المغترب...الذى يأتى محملا بالشنط...وغنت الحسان:

الدكتور أنا ما دايرا
والضابط انا ما دايرا
.......................
المغترب أنا دة الدايرا....!ه

وفى نهاية المداخلة...ما زلت أسأل: إنتن يا بنات المنبر الحُر....شِن بتدورن....؟؟؟!!!!!!!!!!!!ه

واااااااااو مكي الفارس البيستفز البنات معانا..؟

اولا لازم أرحب بيك ترحيب خااص.. نسبة لزيارتكم التاريخية لأحد بوستاتنا المتواضعة..

ثانيا.. نعم أتفق معك ان البوستات الاجتماعية هي "البريمو" في المنبر.. ولا يفتى ومالك في المدينة.. مالك ده انت يعني..

تالتا.. برضو اتفق معاك في تقسيم مراحل الفوارس في حياة بلادنا.. ولكن في المقابل كان لازم نتذكر برضو تقسيمات النساء اللائي كن ينتظرن وينتظرن ليقبلن في النهاية بالمقسوم.. واللائي غيًرن هذه الصورة لنساء يمكن ان يقلن "لا".. لتتغير في فترة لاحقة لنساء يمكن ان يقلن "لا" وهن يقصدن "نعم".. إلى ان وصلنا لفترتنا الحالية التي اختلط فيها الحابل بالنابل.. واصبحت مجهودات الصحوة والاستيقاظ التي تقوم بها فئة مقدرة تضيع "بخيابة" بنات يريدن اكلها "سهلة".. وتتواصل المراحل..

سألتنا سؤال واضح وصريح ماذا نريد نحن بنات المنبر..؟

سأجيب عن نفسي وأترك للأخريات الرد على سؤالك..

أريد معاملة متساوية جميلة لا أحس فيها بارهاب او تهديد عندما اختلف مع رجل ليقول لي يا ... و... من الأوصاف تابع بوستي السابق..

أريد رجلا يعرف اني زول زيي زيو.. بفكر وبحس وبحتاج..

أريد رجلا بوقار وحنان أبي، ونبل وجمال ونقاء أخي بهاء الدين، وبخفة روح وحيوية شقيقي الآخر محمد الأمين..

شفت الحكاية بسيطة كيف..؟

Salam mn Tani....
I'll stay forever in this post unless I found My........... dear Raja...

Dear Nusa...

Quote: اها النقول ليك طيب ، انا من زمان كنت عارفة انى ما ممكن ارتبط لى بى واحد يكون بيدخن ، شوفتى لو الدنيا كان فضت من الرجال كنت ما ح اتنازل من المبدأ دة ، و الحمد لله اهو ربنا حقق لى الأمنية دى

You are right & count di ya Raja m3ak....

Dear Nusa...

Quote: لأنو السجاير دة دايما مرتبط لى بعدم اتزان الشخصية و عصبيتها ، لأنو وسيلة تفريغ لمن تبقى عادة مضرة تضر كل الحول المدخن ، ياخى انا مالى و مال كدة ؟؟؟

You are not right
I'll be back...
AnwarKing

الملك الفارس انور..

مرحب بيك.. وعندي وصية من صديقة متصفحة.. قالت لي غايتو انور ده حيفوز في النهاية لأنو "فارس" جد جد ..

وتصدق برضو بدر الدين أسهموا عند المتصفحات عالية جدا..

غايتو انا كنت باخد 20 دولار في التخريمات في بوستاتي.. لكن لو في "سبوبة" في البوست ده حنعمل ليك تصريفة تانية ..

راجين رجعتك..

العزيزة رجاء
التحية ليك قدرالخيال الساكن فى الافق

واحسرتااااه على الارتباط من دون رغبة , طبعاً انا قصدت من سؤالى عن هل من الممكن ان تتزوج فتاة من شخص لم تر فيه صفات فارسا , طبعاً ممكن لكن قصدى استمرارية التواصل غير ممكنة فى الزمن دة بالتحديد , بالنسبة لزمان طبعاً فى مغص وارهاب داخلى يجتاح قلب المرأة فى كل برهة تتذكر فيها حبيب القلب .... لكن دة ما بيمنع من وضع مساحيق التواصل , واعتقد انو المسحوق دة بيكون خوفاً من مجهول ما او سداد لفاتورة الاهل المغصة .
هسع نحن عايزين من النساء شنو ؟ يورونا مواصفات تكون نسبية او وسطية بالنسبة لفارسهن واعتقد معظم النساء فارس احلامهن قريب من بعض , وعشان كمان نحن نقوم نساعد فى حلول يمكن تكون جذرية للتواصل .

طيب سؤال تانى ..
اذا تفاجأت المرأة بعد ان تزوجت من فارسها بالتحديد بدخول حاجات ما كانت متوقعاها .... ردة الفعل بتكون شتو ؟
طبعاً انا بكتب وبتذكر فى فيلم { محامى خُلع } هانى رمزى لما واحدة قالت ليهو زوجى كنت بحبو وبعدما تزوجتو لقيتو بيشخر كثير جداً فى الليل وحمانى النوم !! ... وعايزة الطلاق ...

طبعاً هانى قال اذا كانت دى زوجتو مش يشخر وبس { ح يشترى شخارة بالكهرباء }

وتسلمى يا اصيلة

لحدى ما ارجع وكت الرجال يجى

الفارس الفاتح..

Quote: اذا تفاجأت المرأة بعد ان تزوجت من فارسها بالتحديد بدخول حاجات ما كانت متوقعاها .... ردة الفعل بتكون شنو ؟

إذا كانت الحاجات دي كبييييرة لا يمكن إصلاحها كما اعلنت عروس صاحب "النصري" .. فهناك تصرفين:

تسكت وتقفل خشمها.. وده الغالب.. لأنو بت الناس لازم تعمل كده ..

أو توقف المأساة حالا.. لأنو الأمين مع نفسه أمين مع الناس التانيين ..

الاخت رجاء

انا غايتو طويل وفكري في طويل دي يعني لحدي ما تصلي لي اخر مرحله من الطول

واسمر

وسيم

وبث

العاوزه تتفضل

عباس فارس أحلام الجكس الهلالابي بث..

نسيت أهم وصف عندك.. هلالابي.. ورينا نعمل ليك شنو مع الجكس المريخابي ..


اوعى تقول لي كمان بتشجع البرازيل.. لأنو بصراحة حيكون استحالة بي جد ..

رجاء

Quote: لكن صاحبك يستاهل.. ما بعرف يقول: انو "مرتبط" ..

اوداير أكمل تعليمي أو إغترابي أو عزوبيتي.....

Quote: عيونه تاسرنى فى الرجل عيونه

ولكل عشاق العيون

تسلم يااسعد

بالمناسبه صافي يالبن

شكرا رواية ودة من زوقك واصالة طبعك

باقي زولة واحدة

عشان الواحد الليلة ينوم مرتاح

الأميرة راوية والفرسان خالد وجني وأسعد..

شكرا لكم لجعل هذا البوست حيا..

ولاحظوا كده انا مطنشة حكاية التخريمات..

البوست ده كان جاب لي ثروة ..


دمتوا.. ولمواصلة كثير من الجمال..

عارفه يا استاذه رجاء ملاحظ في البوست ده مافي زول جاب سيره البقنـــــــيه كدا الواحد عندو امل... هاهاها

Bilmunasaba aha 3indana kimiya min alfursan hina http://sudstudents.com/students.php?id=2&year=2003 wallahi kullahum jahzeen tab |ooo|naggo sakit bas mat tag3o fi alum2ariseen (kullahum zai khamsa walla arb3a nas alsaf alwara 94-98 ) khidma bas li alchicks wo kida.



with best wishes

مساء الخير يارجوية
البوست دا غالبنى اتنين صفر
لمن اجى اراجع النتائج اقول ليك بالإضافة للحاجات ديك واهم حاجة زول صادق وحنّين

الملكة الحبيبة المتوجة في قلوب كل الفوارس..


في انتظارك يا غالية..

الفارس الحمامة....


وينك يا راجل.. الاختفاء لييه..؟

غايتو بالغتا.. "بقنية" و "فارس أحلام".. في جملة مفيدة واحدة ....


انتظر عودتك لتقول لنا ما هي الصفات.. عشان نشوفك في البوست التاني ..

اها الكلام بدا يخش حوش قلبى... جد جد...
عارفة يا رجاء ...ماخد كلامك جادى والعشرين دولار مدفوعة ومعاها بوسة على الجبين...

بعدين يا احمد الشريف شنو خاتين لينا صور العزابة ناس القوصى الشينين ديل واسامى الجكس بس...
يعنى دايرين هناك وهنا ولا شنو???

والى الامام
AnwarKing

al3aziz Anwar,
Aha algousi jab akhoho kaman ba3ad shoyia kida bannazil sorto m3 alajama3a |0000| ibgo 3alik itnain Gousi musaibtak kabira (itto kulluku 3alia walla aih) |000|. ba3dain yakhi aljama3a ma galu alshaghalana ma bi elshakil wo kida ya3ni. Aha a6amminak algousi da wo nas alsaf algidam dail ma dakhleen fi almo6o3 li anno ma7joozeen min badri, aha ma gassarta ma3ak.


Wallahi ya Anwar alchicks alshaif asamihu da kollo mo3aris ya makhtoub wo rafid modo3 alsoar wo galu hum asasan ma mu7tagin soar, ya3ni bisra7a kida akhwannak la lamin la hina wala hinak ba3eed 3annak aha shofta alwar6a di. Aha yaman mafi tariga illa naji nazza7imkum fi chicksakum bas a3fo laina wa al3afo 3ind almagdira min shiyam alkiram alziyak.

العزيزالاخ جدا احمد عون الشريف قاسم...
طبعا مجرد ذكر اسمك كامل دى دعاية مجانية وكدا اكيد حا ترفع اسهمك هنا وابقا مالى شبكتك بس...
يا زول انتو ناس امريكا ديل بتخويفونا عديل كدا...
الواحد زى الحديه يجى كف يلفح اجمل زهرة فى الجامعة و يحير الشباب كلو...
لووووووول... يا ما بتجيك عوجة تب انتا مشكلتك فى الاعلام ظالمك شوية...
اكتب بالكى بورد العربى يا مان الجامعات اتعربت فى السودان

...

Al3aziz Anwar,

Quote: طبعا مجرد ذكر اسمك كامل دى دعاية مجانية وكدا اكيد حا ترفع اسهمك هنا وابقا مالى شبكتك بس...

Yakhi mashkour alif 3la aldi3aya almajaniya , lakin ma galu alasami bigat ma bitakil 3aish alyam di wa alchicks biga ma sha3al baiha kateer, aha ya man shoflaina 6ariga tanyia wo kida.

Quote: يا زول انتو ناس امريكا ديل بتخويفونا عديل كدا... الواحد زى الحديه يجى كف يلفح اجمل زهرة فى الجامعة و يحير الشباب كلو...

nas america dail li7go nas alkhaleej walla shino, ghaito balagho ma3akum |000000000| . wallahi bas ni7na ya 7abib ma 3indana 6ariga narga3 gareeb agalaha arba3a sineen kida, aha na3mal shino, sa7bak laiho sana bifattish malagi alada wo kul aliginaho 6ala3 ma fi mazaj ya3ni bisara7a kida faris "bani khaiban" |oooo|. Lo 3indak laina takoon 3amlta fina ma3rof, sa7bak min sifato anno manazzam shadeed wo ma bi7ib alkhrmaja, sa7bak bardu geek ya3ni alga3da fi alcomputer bitkoon zai 10 sa3at 3la alagal,ba3dain bi7ib alriada jiddan wo sabba7 mahir, ya3ni alchicks 7iakhod laiho kam jakka kidda, bardu sa7bak momkin yikon romancy jiddan wagt allizoom bas ma daiman. bardu ba7ib inni atfassa7 kateer bardu sa7bak momkin yisa3id fi altabeekh shoiya kidda aslo akhdna fiho korsat (bas mafi shahr al3asal ). Aha kul aldairo wa7da takoon bas fi almazaj ya3ni wo tagdar tista7mal kul alsifat almuhabbiba di .

Quote: لووووووول... يا ما بتجيك عوجة تب انتا مشكلتك فى الاعلام ظالمك شوية... اكتب بالكى بورد العربى يا مان الجامعات اتعربت فى السودان

wallahi ali3lam da katilna 3adeel yaman bas albaraka feek alkey board al3arabi ma basbor 3aliho, sa7bak bi7b yikon abu saree3.

Bilmunasaba tani ma 7aktib gareeb ya man sa7bak dakhil project kabeer, aha fi aman illah.

Quote: وتصدق برضو بدر الدين أسهموا عند المتصفحات عالية جدا..

شكري وتقديري للمتصفحات والمتصفحين

فارس أحلام المتصفحات

الاخت الغالية رجاء بت العباسى:-

اولا لك التهنئة على تجاوزك العكننات التى حزنت جدا ان اراك تدفعين( بضم الدال) و تندفعين اليها,

وها انت الان تودين اكثر بهاءا بمواضيعيك الخفيفة والنشيطة و التى لا تقل اهمية عن اي موضوعات اخري, وان غلب عليها الطابع الخفيف.

اجابة مباشرة على سؤالك فى اعتقادي انه اي شاب هو مؤهل لان يكون فارس لاحلام شابة ما اذا لم يحمل اي صفة من الصفات التى يحملها شخصى الضعيف, وهى

1- اننى غير مرتب

2- غير لبق فى الحديث الى الجنس الاخر

3- امارس بعض مما تعلمته من عمليات التحليل النفسى مع محدثتى

4-اتحدث كثيرا فى اغلب الاحوال, وطبعا حسب كتاب Woman from Mars Men from Venous على الرجل ان يتحلى بقدرة فائقة على الاستماع الى شريكته حتى يعطى دفعات من التجديد للحب, الكتاب يتحدث عن احياء المشاعر بالنسبة للمتزوجين.

5- منغمس فى القضايا السياسية الى اخمص قدماي

6- ادخن احيانا, حسب المزاج

7- لا احب التاطير, والملاحقة مثل اسئلة الى اين ذاهب ومتى ستعود ومع من ستكون فهى تحسسنى باننى ما زلت غير مسؤل عن تصرفاتى

8- فاشل جدا فى ابتداع لحظات للفرح فى اوقات السام والرتابة,

9- ميال للحديث فى المجرد و قليلا ما اتحدث فيما هو مادي محسوس

10- لا اكترث كثيرا الى هندامى و لبسى بل اري المبالغة فى الاهتمام فى هذا الامر هى تاكيد على الفراغ الذهنى

11 - لا تجذبنى المرأة التى تقضى وفت طويل فى مكياجها كما لا تشدنى المراة عاشقة الميك اب وهذا ما لا تحبه معظم النساء فهن يعتقدن فى ذلك تجاهل وعدم تقدير

باختصار لمن اراد ان يكون فارسا لا حلام اي فتاة او امراة فلابد له ان يكون على النقيض مما هو فى بكري الجاك ان استطاع الى ذلك سبيلا, وعليه اعلن هنا انا الموقع ادناه اننى وبكامل قواي العقلية و بكل اختياري الرشيد اننى لا امثل فارس احلام لاي امرأة عاذب كانت متزوجة ام مطلقة , ولهذا السبب يبدو اننى اخذت شاكوش قبل اعوام ولم يتسنى لى معرفة اسباب فشلى الا بعد اكتشفت اننى لا احمل اي من الصفات التى تؤهلنى لاكون فارسا لاحلام اي بائسة, ولكنها حتما تؤهلنى لاكون بطلا فى رواية جيدة لو عرف كاتبها رسم الشخصيات و كيفية توظيف حركتها.


وفتشوا يا بنات على زول نغيض من ما احمل اكيد حتكونى سعيدات

اما مسالة العيون دي فبرضو ما ادونا ليها تاهيل خلقى اها نعمل شنو يا راوية نبكى بس مش

بكري الجاك

الاخ العزيز جدا بكرى الجاك... والله انتا تستاهل اكثر من المتاح بكثير...
ودعنى اتفق معاك فى بعض نقاط الخلل المعشعشة فى اخوك واقتبس منك الاتى
1- اننى غير مرتب
:-لاكن بحب الناس المرتبين... واكون مدين بالكثير للزولة البترتبنى دى...
3- امارس بعض مما تعلمته من عمليات التحليل النفسى مع محدثتى...

4-اتحدث كثيرا فى اغلب الاحوال:-
لكن بعتقد لانو طبيعة السودانيات انهم كتومات مع الطرف الاخر ودونك امهاتنا فى البيوت مع ابهاتنا... خصوصا لو الابن/ة عامل/ة حاجة ما بتعجب الاب...

10- لا اكترث كثيرا الى هندامى و لبسى ...:-
لكن بتكيف جدا لما القى زول/ة قاشر/ة... وبرضو واكون مدين بالكثير للزولة البترتبنى دى...

وعكسك تماما يا بكرى فى:-
8- فاشل جدا فى ابتداع لحظات للفرح فى اوقات السام والرتابة...
2- غير لبق فى الحديث الى الجنس الاخر

6- ادخن احيانا, حسب المزاج
11 - لا تجذبنى المرأة التى تقضى وفت طويل فى مكياجها

Quote: حسب كتاب Woman from Mars Men from Venous على الرجل ان يتحلى بقدرة فائقة على الاستماع الى شريكته حتى يعطى دفعات من التجديد للحب, الكتاب يتحدث عن احياء المشاعر بالنسبة للمتزوجين.

ما قريت الكتاب دا لكن مرجعى الوحيد فى التعامل هو سجيتى التى تخيب ظنى فى معظم الاحوال...

مسالة العيون:-
ورثت عن امى عليها رحمة الله عيون مكحلة طبيعي...
بتظهر زى الورد لما اكون مجهد او مساهر... ودا طبعا كل ايامى ماشة كدا...
وبجيكم تانى...
AnwarKing

صديقي بكري فارس بنات شرق ووسط أفريقيا ..

مرحب بيك انت نفسك.. ولييه الاختفاء..؟

لفتا نظري لحاجة مهمة.. وهي حكاية التدخين.. حسب خبرتي المحدودة.. لا اعتقد ان انه يمثل شرطا لاستبعاد فارس الاحلام.. ما شفتا عروس صاحب النصري "الكوزة" رضت بي شنو ..؟

اما حكاية غير لبق في الحديث دي.. ما عارفة بتعني شنو..؟ يعني هل حديثك جاف وما بتعرف نوع الكلام الدقاق البياكلو بيهو الاولاد رؤوس البنات ؟ ام انك تتعمد ذلك..؟
وما تنسى اني اتونستا معاك.. شكلك كده عايز تكفي العين ..

عموما اتفق معاك انو اي شاب يمكن ان يمثل فتى احلام صبية ما.. تكفي نظرة بس حوالينا..

عاد يا أنور وأحمد الشريف عملتوها ظااااااهره.... ما شديد كده يعني.. شايفاكم فرشتوا واطه وقعدتوا تاكلوا في التسالي.. وده يشكي لي ده.. رجاء زاتها حردت ليكم البوست...

غايته الختا أغنية ماجدة الرومي ده .. هو فارس الفرسان (حتى لو كانت رجاء)... لأنه الأغنية دي بالذااااااااااااااات... يعني بالتحديد كده.. يعني بصورة محددة جداً.. بتقعدني بي إقامة لمدة خمسة سنين...


زحوا لي شويه يا أنو وأحمد... وأدوني حبة فول.. حبوبتكم مافيها سنون للتسالي..

بالمناسبة يا أحمد الشريف.. إحنا أولاد أهل... وما تسألني كيف... الحاجة قالت كده... تفاصيل أوفى في نشرة الأخبار الما معروفه الساعة كم...

يا جماعة سامعين الزوله دي بتقول شنو...
من أنت!...
وسحر في عينيك (يا راوية)...
يزف العمر لأمنية
لكأنك من قمر تأتي من نجمة صبح ذهبية...

لااااااااااااااااا حوله.. ده منو الكتب الكلمات دي!!!


بنت الحسين

اكذب لو قلتا لك ما فارش الكورة فى الواطة يا مريم ...
لكن يا مريم انا واحمد (قريبك) دا اولاد هنا عشان كدا فارشين هنا...
-
بعدين يا مريم المفروض تغتنموا الفرصة دى وتمدحونا... عسى ولعل الموضوع بتاع الصراحة والوضوح وتقوية العلاقات الاجتماعية بين السودانيين جديا يمشى خطوة الى الامام...
معظمنا بجى هنا عشان يقول بس... مافى زول داير يسمع...
غايتو انا راقد سلطة ومستنى....
Ahmed ...aha COUNT++ lo jaak zool tani 7a akhod 100$ in advance
LOOOOOOOOOOOOOOOOLz...
Allah yekhliki ya Raja wa taslemi kateeeeeeeeeeeeeeeeeeeeerz...
AnwarKing

Quote: بالمناسبة يا أحمد الشريف.. إحنا أولاد أهل... وما تسألني كيف... الحاجة قالت كده... تفاصيل أوفى في نشرة الأخبار الما معروفه الساعة كم...

salam marriam bit ahali, wallahi as3ad khabar asma3o fi alboard. Slami lil 7aja wa fi intizar almazeed.

Quote: عاد يا أنور وأحمد الشريف عملتوها ظااااااهره.... ما شديد كده يعني.. شايفاكم فرشتوا واطه وقعدتوا تاكلوا في التسالي.. وده يشكي لي ده.. رجاء زاتها حردت ليكم البوست...

wallahi ya marriam alpost bas min rogto alwa7id ma saddag gulna natakkil showyia ana wa akhoi anwar da. Aha lakin khalas akhdna ga3datna wo shiribna jabanatna wo raogna akhir roga, ba3ad da fotakum bi3afia bas anwar da shaklu ga3id mahu gaim. Aha guli li Raja kattar khaira wo barak allah feeha wo khaliha ta3fi laina wo ma ta7rad .

Anwar, wallahi shaklak kida 7ataghna min warai yaman gulta li 100 3adeel lakin wallahi ma kateera 3alaik taslam

fi aman illah

الأميرة مريوما بت الحسين، والفارسان أنور وأحمد الشريف..


أتابع وبمتعة مشاركاتكم التي نوًرت هذا البوست..

سعدت بمعرفة ان أحمد نجل الفاضل د. عون الشريف ..

وسعدت بالجانب الحلو الذي كان يخفيه أنور عنًا..

وسعدت بحضور مريم الجميل الحي..

ولمزيد من المتابعة والحضور..

رجويه حبيبتى

بوستك عسل شديد زيك كده والله

خلي نفسى تتفتح شويه كده وحضرى ليكى ورقتين تلاته, اربعه خمسه كده ومعاهم كم قلم لحدى ما اجى اوريك مواصفات فتى احلامى

فتكم بعافيه



وفى امان الله

لا اله الا الله

"بوني" الحبيبة الجميلة بي جوة وبره..

حضرتا "باكيت" بتاع ورق "A 4" و4 أقلام..

فلا تتأخري.. لأن فارس أحلامك أكيد يستاهل..

العزيزه رجاء

مثلما للبنات ( فوارس أحلام ) ، فلمنوت ( شجيرات أحلام ) !!!
و ما بين الفارس و الشجرة تاريخٌ ( منوتي ) أكثر روعةً و حيويه !!!

فالنساء عند منوت يتوزعن - مصنفاتٍ - بين أمهات أشجار بلاد المليون ميلٍ و شجرةٍ و إنسانٍ ( مربع ) !!!
فمنهن - بدون ترتيب منهجي تقيمي تفضيلي - : السيسبان و النيم و البان و التبلدي و الباباي و القرض و الطلح و الدليب و المانجو و الجوافه و الموز و القضيم و الليون و البرتقال و اللالوب و الحراز و القشطه و الخريم و الأناناس و الأراك و ... ، و الليمون ثم النخيل .
و المرأةُ النخلةُ - عند منوت - هي الأولى باهتمامه ، لأنها : " تُرمى بالحجر ، فتلقي التمر !! " . و لكنّ الأكثر حضوراً و حميميةً و قرباً لمنوت هي شجرة ( اِمرأة ) الليمون ، لأنها : " تعرف متين تبقى المطر ، و تفهم متين تصبح حريق !! " .
أما فارس أحلام النساء أعتقد أنه :
" نجيض مُو هش ..
بطانة الخير ..
بشوش و خدوم ..
كريماً جود ، و جود أروش ، خريف الدّالي و المزموم ..
سريع النّمه مُو مُنكش ..
يكفّي الناس عموم و عموم .. يكفكف دمعت المحروم ... !!!

أليس كذلك ؟

الفارس الليموني الذي يذكرني دوما بفرسان زمن جميل..

ولأني مثلك أخالف داروين ونظريته.. فعندي ان أصل الإنسان شجرة..

لا أجد ما أضيفه على جمال وصفك، وامنيتي بأن أكون شجرة ليمون..

لك كل الود الليموني..

رجوية
وكما قال المطر فان رمد القبح فى الايام الماضية قد اعمى بصيرة الروح فينا وبصر القلب
كما تامرت على ظروف امتحانات واخرى شخصية....

ولكنى ساعود
دى طوبتى

عزيزتي رجاء
تحياتي

-راجل يكون وناس وحكاي
-وديع وحنين ولبق
-قيافة وفايت الناس مسافة انيقوالاناقة ماشرط يكون لابس بدلة
ذي ما فالت زولة ولكن يكون في تناسق في اللبس


في الايام الفاتت كنت في جلسة مع نساء من اجيال ودفع مختلفة ودار
الحديث عن الرجال القيافة في السودان وعندهم شعبية وسط الجنس اللطيف السوداني ويظهر انه النساء ديل معظمهم
كانوا في جامعة الخرطوم ايام عصرها الذهبي

ومن هذه الشخصيات الكانت ليها شنة ورنه دكتور زهير بتاع الاثار
والمرحوم د عمر بليل -الجميعابي-محمد الحسن الامين بتاع نقطة نظام
في الجمعية التاسيسية-الفنان عبدالعزيز المبارك وبرضو الصادق المهدي ونميري كانوا من ضمن المزكورين.

كالعادة مواضيعك دسمة وممتعة ذي ود قاسم

تقديري واحترامي

الحبيبة الغالية تسنيم..

مرحب بيك.. جميل حضورك ومشاركتك بهذا الرأي الدوغري..

.. غايتو انتي وزولا حتعقًدوا لينا المسالة..

البدلة دي طلب قاسي شوية ..

غايتو مهم الترتيب وكفاية قميص كم طويل أو قصير وكرفتة ..

انتظر ردك..


وشكرا لرايك في البوست.. وود قاسم ده حاجة كبيرة.. بختي..

الأميرة الغالية والراقية هلولة..

يااااااااااااااااه..

كل ده غياب..؟


لا نطيق انتظار الوقت "وفرقه".. في العودة والمشاركة.. التي أعرف مسبقا انها قيًمة..


ليك وحشة يا غالية..

رجاء العزيزة

نحن منتظرين السؤال التانى

عن "فارسة" الأحلام

وك "قولة خير" كده، أنا برضه زى راوية

والباقى لمن يجى السؤال بكمله ليك

أبو ذر المطر فارس أحلام زولة أمها داعية ليها ..

البوست التاني ملحوق..

نريد ان نعرف رأيك في صفات الفارس..

وفي الانتظار..

الفرسان والأميرات الجميلين..


أأسف للغياب نسبة لعطل في جهاز المنزل.. ولنواصل بذات الحب والنشاط..

تحية لأنور كينج، أحمد الشريف، الفاتح وبدرالدين فارس أحلام المتصفحات..

دعوة إلى الفرسان: لؤي والغايب أساسي..

ولكل الفرسان للمشاركة..

في انتظاركم..

تحية لكل الجميلات اللائي شاركن وسيشاركن.. أفتقد أوت كوست ومريم الطيب وعالية وعشة بنات فاطنة ويمنى..

أستاذة رجاء .. تحية طيبة طِيب صندل مركبك النوحى هذا والذى أتمنى ان يبحر لمرساه دون ان تتسبب "عضلاتنا المتورمة" و"ملابسناالرجالية المنتقاة بإتقان" فى إغراقه ..
أشكرك لدعوتك ، وكنت قد مررت مراراً أمام باب بوستك هذا دون أن أدلف إلى الداخل ، ليس متجاهلاً ولكن لقناعات قد يطول الحديث عنها هنا إضافةً لكونها قد تصبح معولاً لهدم أحلام بريئة قد لايكون مستحيلاً تحقيقها وإن كنت أشك ، فالبحث عن إبرة فى كومة قش أراه قد يأتى بنتيجة أسرع من نتيجة البحث عن فارس أحلام فى مجتمعنا "الرجالى" هذا ، وصورة الأخت حنينة قد تقول الكثير الذى قد لاتقوله الكلمات .
كنت كلما رأيت عنوان البوست هذا أتذكر كلمات أغاثا كريستى :
(على كل فتاة أن تحلم بعالم آثار كفتى أحلام لها ، فهو الوحيد من الرجال الذى ربما يهتم بها مع الأيام).
وكلمات الشاعرة الصينية غابرييلاّ ميسترال :
(الرجال يعشقون الجميلات من النساء وذلك لأن أبصار الرجال أقوى من عقولهم).

الفارس النبيل لؤي..


نوًرت البوست.. وشكرا للإستجابة الجميلة..

بالرغم من امتلاكك لكثير من صفات ذلك الفارس.. إلا انني أقرأ شجنا في اسطرك،، تقودني "فلسفتي" لإعتباره تجربة أو تجارب غير حلوة..

انتظر تفنيدك لهذه الفلسفة..

Quote: الفرسان والأميرات الجميلين.. أأسف للغياب نسبة لعطل في جهاز المنزل.. ولنواصل بذات الحب والنشاط.. تحية لأنور كينج، أحمد الشريف، الفاتح وبدرالدين فارس أحلام المتصفحات.. دعوة إلى الفرسان: لؤي والغايب أساسي.. ولكل الفرسان للمشاركة.. في انتظاركم.. تحية لكل الجميلات اللائي شاركن وسيشاركن.. أفتقد أوت كوست ومريم الطيب وعالية وعشة بنات فاطنة ويمنى..

Quote: تحية لكل الجميلات اللائي شاركن وسيشاركن.. أفتقد أوت كوست ومريم الطيب وعالية وعشة بنات فاطنة ويمنى..

hehehe...
ana zati I miss them
liki 100000 ta7ia ya Raja...
I'm lil bit busy nowadays, lakin absheri bel khier al Post da ma bi yasel al 3rd page insha'allah, UNLESS ana algaha
AnwarKing

[B]
رجاء العزيزه .....رجعنالك

عايز احكى ليك حكاية قريبتنا ..وهى جد جد كانت ترمى فى الشوك

وزى خلقنا دى ما كانت بتعاين ليها كله كله..ونحن مقطعنوا فى حشانا

يعنى لم نتطاول ومحترمين نفسنا لكن البتقدم كلو شابكانا ده نحيف

ده عنده كرش ده ماراقى ده اهلوا صعبين ده بخيل ده قبيح ده معقد

وكيمان العرسان رتل اثر فوج وقريبتى تصد فيهم زى الجراد..اخيرا

انحسر ذلك المد وصار المتقدمون بمواصفات اقل من السابقين..وهى

ترفض قبول احدهم...لان بعضهم لم يكن وقتها يتجرأ ليسلم عليهاوخوف

الشماته ايضا يعشعش فيها وانحسرت كيمان العرسان والتى كانت

افواج من اللاهثين والمكسرين على القوام السمهرى الملفوف والعيون

الغزاليةوانا اكتفيت منذ ان كانت تصد العرسان فقط بالسلام وشوية

شعرة معاويةمع طريقتى الخاصة فى المزاح..وقد كفانى ذلك من كل ما

هو مرغوب وفىناس حاسدنى كمان على الحته دى واخيرا سألتها عن

اخبار العرسان فردت والله يا صديق المواصفات اضمحلت الى ذكر ومسلم

فقط وحتى ده ما لامين فوقو.....

دحين يا رجاء البقول ليك فى فرسان وحاتك كضاب كما انه لا توجد

اميرات.

صديق الفارس الممتطي الموج..

Quote: فردت والله يا صديق المواصفات اضمحلت الى ذكر ومسلم فقط وحتى ده ما لامين فوقو.....

تعرف عندي صاحبة لذيييذة.. ومن الثانوي العام مجننانا عايزة تعرس عايزة تعرس.. وكانت بتجي تحكي لينا في المدرسة عن أخبار المتقدمين..

وبالمناسبة ما كان عندها أي مواصفات أو شروط غير شروط قريبتكم دي..

يوم قالت لينا رفضت عريس عشان احتارت ما عرفت تبدأ تصلحو من وين ..؟

--

قريبتكم ما بحسدها في شروطها لأن الشرط الأول صعب التنازل عنه .. والتاني فيه "فتوى" ..

الملك الفارس أنور..

مشيت لقيت البوست في ذيل الصفحة التانية ...

قلتا خلاص لقيت مرادك ..


تحياتي...

ابدا بس واقف خشم الباب اتاوق ومستني الكتوت يجي طاللى...
.................

Quote: وللزميلات الآنسات او "العانسات" كما يحلو للبعض منادتهن.. ما هي مواصفات هذا الفارس..؟

?????????????????????????????????

AnwarKing

كُر علي يا أنور أخوي...
سمح كدي مادامت رجا دي ما برّدت ليك بطن.. قول لي أنا مواصفاتك شنو.. انا بفتش ليك....

يا رجا إلا يدوك ليها عدي.. الزول ده بفتش



بنت الحسين

Quote: وكيمان العرسان رتل اثر فوج وقريبتى تصد فيهم زى الجراد

تخريمه سغيره يا رجاء...بس رتلن اثر فوج ...دي عجبتني عجب يا صديق الموج...

وزي ما قلت ليك يا رجاء امسكي في عاجباني الصداقة...
والغنية زاتا فيها ود الناس دا البدورني وبدورو....

فراس الاحلام هم الاصدقاء من الجندرين ...والله مش كده يا الجندريه
بس ما يبقو قرايب...صداقة القرايب ....قلبها الي فروسية...صعب....فالاصدقاء البعاد وخاصة من جندرين مختلفين يظل هامش الاكتشاف الجميل موجود...بعكس الاقرباء...ديك بيكونو حافظين بعض

رجويه الحبيبه

سلامات وشوقنا بحر

تشكرى للبوست الظريف

انا حأقول ليكى مواصفات فتى احلامى واليبدو اننا حننتظر لحدى ما نبقى ذى النسوان القاعدات فى صوره حنينه

امى كانت تستغرب حين ارفض كل من يتقدم لى وتقول لى
'العزال عزال' ورغم اننى سألتها ميه مره عن معنى هذه الكلمه الا اننى فى كل مره انسى معناها, الخرف تقولى شنو يابتى

المهم يا حبيبه مواصفاتى تنقسم لجزئين

اشياء ثابته لا اقبل التفاوض فيها
اشياء افضلها ولكنها قابله للتفاوض


* الاشياء الثابته والتى لا اقبل التفاوض فيها:-

ان يكون ملتذم دينيا واخلاقيا بدون تعصب, يعنى ليس الالتذام بالفروض الدينيه فقط, بل ينجلى ذلك واضحا فى تعاملاته, من بر للوالدين, الاحسان للناس, الصدق, الوفاء بالكلمه الخ...

ان لا يدخن او يشرب الخمر او يسف صعود, هولاء الثلاثه اكرههم كره العمى ولا اتخيل نفسى زوجه لاحد يستخدم اى من هولاء

ان لا يأكل نون حلال ميت- الشرط ده خاص بالناس القاعدين فى الدول الغير مسلمه, لأن هناك من يتساهل فى هذه المواضيع وانا لا اتساهل فيها

ان لا يكون بتاع حفلات ورقيص, لا احب الرجل الجادى طول الوقت لكننا لن نتفق اذا واحد بحب الحفلات والرقيص فيها والاخر لا, لا مانع عندى للذهاب لمناسبات الاهل والاصدقاء لكن لا يكون مدمن حفلات

لا يكون لديه صديقات من الجنس الاخر

يكون مهموما بقضايا المسلمين ويحدث نفسه بالجهاد(على الاقل)

يحافظ على الفرائض والسنن ولا يضيع صلاه من اجل ونسه او اى شئ اخر

لايكون مدمن اغانى, يعنى لو عايذ يستمع ليها هو حر, بس مايكون مدمنهااو مشغلها طول الوقت او يجبرنى للأستماع اليها

يعرف اننى لا اجامل فى الدين, يعنى مايقول لى يخلى اخوه او ابن خالتو او قريبه يكون فى البيت وهو غير موجود, فأنا لن اسمح لاى احد غيرمحرم بالدخول للبيت فى غيابه حتى لو كان اخوه

يحترمنى ويحترم اهلى ولا يسئ اليهم

يحرص على تربيه اطفاله بطريقه اسلاميه

لا يمنعنى من ارضاء طموحى بعلم دينى او دنيوى ولا يتخد قرارات فرديه ويتم اى شئ بينا بالتفاهم وليس بفرض الشئ

ان يعيننى فى دينى ودنياى

ان يكون مسؤلا وقادرا على فتح بيت واعاله اسره ويكون على قدر من التعليم

اشياء افضلهاولكن يمكن التفاوض حولها


ان يكون العمر بين30-39 عاما( هذه قابله للتفاوض يعنى لو كان واحد فى مقام الشيخ الشهيد احمد يسن مثلا وعمرو 70 سنه مافى مانع برضو

يساعد فى غسيل العده وما يطلب منى اقطع بصل ولا توم ويجيب اللحمه جاهذه من الدكان مقطعه لشرايح صغيره

ان يكون رومانسى, ويتفهم اننى احب المرح, اتعابط, اجرى والعب, يعنى مايقول لى انتى خلاص بقيتى مره كبيره بطلى هباله

ان يكون اطول منى

لاعلاقه له بالسياسه مطلقا, ولا ينتمى لأى حزب سياسى او حزب دينى, والا يكون حكومه ولا معارضه

الا يكون كثير الكلام خصوصا لما مايكون عندى مزاج اتكلم
الا يقرأ الجريده وانا اتحدث معه ولا يكون كثير الانتقاد

الا يكون بخيلا وهذا شرط اساسى

الا يكون احمقا لانى حمقاء بطبعى ولا يشاركنى صفه العناد

ان ياخدنى على قد عقلى, ويكون رقيقا وحنونا

ان يهتم بهندامه ولكن لا يتستخدم كريمات لتنعيم جسمه
ولا يهتم بها لدرجه العباطه فخير الامور اوسطها

الا يكون جادى شديد طوال الوقت

الا يقول لى كل شويه انتى المرأه وانا الرجل لأنى اردى عارفه الحاحه ده

لو ازكرت حاجه تانيه بجيكى, لو لقيتى مواصفاتى كلمينى ارسل ليكى ماى سيفي وصوره باسبورت

شفتى طلباتى بسيطه كيف؟




تحياتى


وفى امان الله

لا اله الا الله

فـــارس أحـــلام الــبــنــات.. مــن هــو..؟

التجاني المشرف . صـــاح !!

Quote: التجاني المشرف . صـــاح !!

لقد كان بالفعل فارس لأحلام فتاة..

خدر الله يجازي محنك.. كنتا حتخليني اضيف كلمة تانية ..

Quote: لاعلاقه له بالسياسه مطلقا, ولا ينتمى لأى حزب سياسى او حزب دينى, والا يكون حكومه ولا معارضه الا يكون كثير الكلام خصوصا لما مايكون عندى مزاج اتكلم الا يقرأ الجريده وانا اتحدث معه ولا يكون كثير الانتقاد

كان تقولي ما يكون سوداني!

والله يا بنت الأحفاد... ما عندي تعبير إلا...

"إبقي أقبليني" (أبقى قابليني)


مع محبتي
بنت الحسين

الأميرة الحبيبة "بوني"..

طبعا عجبتني حكاية شروط غير قابلة للتفاوض بشانها، وأخرى يمكن..

دلوقتي يجيك صديق الموج يقول ليك قريبتهم في النهاية بقت على: ذكر، ومسلم ..

لما فكرت اقارن بي شروطك "النوع الأول" وشروطي.. وجدت انني اتفق معك في:

Quote: يحترمنى ويحترم اهلى ولا يسئ اليهم يحرص على تربيه اطفاله بطريقه اسلاميه.. لا يمنعنى من ارضاء طموحى بعلم دينى او دنيوى ولا يتخد قرارات فرديه ويتم اى شئ بينا بالتفاهم وليس بفرض الشئ. ان يعيننى فى دينى ودنياى.. ان يكون مسؤلا وقادرا على فتح بيت واعاله اسره ويكون على قدر من التعليم

مع بعض التعديلات ذات الخط العريض..

وأيضا:

Quote: او يشرب الخمر او يسف صعود

أنا غايتو عندي لو بيشرب "ماريجوانا" أحسن من يسف دي ..

أما حكاية العمر دي.. غايتو ما مشكلة.. زي ما ممكن يكون فوق الخمسين.. برضو ممكن يكون بين 25 و29 ..

باقي شروطك ما حصلت.. فعلا بسيطة ..

مريم

قلتى كده!

يعنى كل السودانيين عندهم دخل بالسياسه وكلامهم كتير وبتكلم معاكى وهو بقرأ فى الجريده

احبطينى


يعنى نشوف لينا انجليذى ولا شنو؟

مودتى


وفى امان الله

لا اله الا الله

كما ذكرت لك
لا أريد أن أكون فارساً لوحدي
بل أريدها أن تكون فارسة هي ايضاً
أحتاج لإنسانة لأروضها وتروضني
وأعرف تماماً أن الجياد ليس بإمكانها ان تروض الجياد
لكننا سنروض بعضنا بالكلمة
وبالحب وبالأمل وبالتعايش
سأمنحها فصيلة دمي لتنصهر مع فصيلة دمها
لتكون فصيلة واحدة وحلم واحد
لا اعتقد أنني أحمل ولو ربع قطرة من مواصفات فارس الأحلام التي تتمناها كل إمراة
لكن اثق تماما أن المراة التي سترتبط بي ستخلق مني فارساً
مثلما أنني سأخلق منها إمراة جميلة وواثقة من نفسها
كم اتمنى أن اكون فارساً للكلمة
وفارساً للحق والحرية والإنسانية
وفارساً للمرح وفاكهة تغذي كل فرسان وفارسات البورد
لقد إنتهى زمن فارس الأحلام
عندما كان عنتر يشق الصحاري في منتصف الليل
ليلاقي عبلة
تشاء الصدف أن أذهب خصيصاً الى منطقة تسمى عيون الجواء
حيث كان ياتي عنتر بالقرب من صخرة تقبع هناك
فعلاً تحمل رائحة شجاعة عنتر ورحيق عبلة
تالمت كثيراً أن عنتر لم يحضر عصر الموبايل والأنترنت
وإلا لكفى نفسه شر القتال والترحال والتلصص ليلاً ٍ
الفارس في نظري أختي رجاء
هو ذلك الرجل الغير معقد
لا ذلك الرجل الذي يسعى بكل حواسه لأن يمتلك إمراة جميلة ولكن سرعان مايتحقق له ذلك يغير منها لدرجة البكاء فيحرمها حتى الهواء
والفارس هو الذي يترجل من صهوته ليعانق محبوبته وزوجته في أمس اللحظات التي تحتاجه اليها
الفارس ذلك الرجل الذي يحمي بيته وعائلته
وفوق هذا وذاك وطنه وأخته وجارته وصديقته

Quote: هو ذلك الرجل الغير معقد لا ذلك الرجل الذي يسعى بكل حواسه لأن يمتلك إمراة جميلة ولكن سرعان مايتحقق له ذلك يغير منها لدرجة البكاء فيحرمها حتى الهواء

Quote: والفارس هو الذي يترجل من صهوته ليعانق محبوبته وزوجته في أمس اللحظات التي تحتاجه اليها

Quote: الفارس ذلك الرجل الذي يحمي بيته وعائلته وفوق هذا وذاك وطنه وأخته وجارته وصديقته

عارف يا ابوحراز
قلت كتير من الدايرة اقوله


رجاء...

تصدقي بحضر في لستة الصفات لغاية الليلة؟؟؟
كل يوم بتذكر حاجة اختها
شكلي حاعملها في حلقات مسلسلة عندك بي جاي
بجيك تاني

غايتو باندودث بكري الله يكون في عونه

Quote: لا أريد أن أكون فارساً لوحدي بل أريدها أن تكون فارسة هي ايضاً أحتاج لإنسانة لأروضها وتروضني وأعرف تماماً أن الجياد ليس بإمكانها ان تروض الجياد لكننا سنروض بعضنا بالكلمة وبالحب وبالأمل وبالتعايش سأمنحها فصيلة دمي لتنصهر مع فصيلة دمها لتكون فصيلة واحدة وحلم واحد لا اعتقد أنني أحمل ولو ربع قطرة من مواصفات فارس الأحلام التي تتمناها كل إمراة لكن اثق تماما أن المراة التي سترتبط بي ستخلق مني فارساً مثلما أنني سأخلق منها إمراة جميلة وواثقة من نفسها كم اتمنى أن اكون فارساً للكلمة وفارساً للحق والحرية والإنسانية وفارساً للمرح وفاكهة تغذي كل فرسان وفارسات البورد

الفارس عثمان.. فارس أحلام أي فتاة..

أعكس الضمير المذكر للمؤنث..

وده الكمال زاااااتو..