ماذا تفعل عزيزي الرجل لو شاغلتك إمرأة؟؟

أعزائي الرجال في البورد
اريد مشاركتكم في بعض ما يدور في ذلك الرأس.. وهو ماذا تفعل إذا توقفت أمامك عربة وانت ذاهب لعملك وكانت بها إمرأة ودعتك للركوب معها؟ أو ماذا تفعل إذا كنت مارا في الشارع وسمعت مجموعة من الفتيات وهي تلقى عليك بعبارات الغزل وعكس ما يعنيه جسدك أو قصة شعرك أو ملبسك أو مشيتك...الخ؟ بأمانة اريد أن اعرف شعور الرجل وهو في خانة المرأة التي تتعرض للمضايقات التي تكون سخيفة للغاية في احيان كثيرة..
رجاء

افرح كتير فرح شديد
واكاد اطير من الفرح

اللي في البر عوام

بما أننى وسيم و أتمتع بحضور أخاذ فاننى محل اهتمام عدد لا يحصى من النساء لدرجة تعطيل الحركة فى الشارع و تسبيب الأذى الجسيم حين يتشاجرن حول القرب منى و كسب ودى
و بما أن هذا يشبع غرورى فاننى أطلب المزيد منه دون التزام من جانبى أو بذل أى وعود من أى نوع
فتعالين لى أيتها الجميلات المستحيلات كيما نجب تاريخ البكاء و أجيال العبودية

المشكلة يا عادل الرجال ما بيشاغلو عشان دي واحدة جميلة أو غيره، هم بيشاغلو من أجل المشاغلة.. هذا رأيي

الأخت الفاضلة رجاء
طبعا انت تتحدثين عن شي يحدث يوميا في جميع انحاء العالم لدرجة ان صار طبيعيا لحد ما
وتساؤلك بان ماذا تفعل اذا تعرضت لمثل هذا
فحقا لم تعد المعاكسات من جانب الرجل فقط بل كثيرا من النساء يقم بذلك دون اي حياء فالعبد لله تعرض كثيرا لمثل هذا النوع حقيقة
ولكن ذلك الامر يتوقف علي الشخص المعاكس رجلا كان ام امراة فاذا كان من اصحاب الهوي فشبهينا واتلاقينا واذا كان انسان متزن احم احم يعني زي حلاتي كدا فسوف يسير في دربة دون اي التفاتة اليهم ولا اخالك تقفبن لتعطي الدروس والمواعظ
ابيت في غربة لا النفس راضية بها ولا الملتقي من شيمتى كثب

عزيزي ود العمدة

بالطبع لو كانت في إمرأة قبل 100000 سنة وقفت واعطت موعظة لكان الحال تغير، لكن كما ذكرت فلأمر ان الواحد بيمشي لكن الدم بيغلي في عروقه، وكل ما ذهبت لعملي سألت زملائي : هل توقفت لكم عربة اليوم ؟ فيجيب زملائي الرجال لا، ولكن زميلاتي وحتى المتزوجات منهن يشتكين بأن هناك عربة او اثنين توقفت أو ان الرجل الذي بجوارها في البص حاول معاكستها... الخ، وقد قالت لي صديقة ذات مرة وهي بالمناسبة حامل علة وشك الوضوع: هل الرجال اصيبوا بالعمى وما شايفين شكلي كيف؟!! وشاركتها التساؤل
فيما يختص بمعاكسة النساء.. لا اعتقد ان هناك إمرأة ما، هذا ليس دفاعا، تغزلت في رجل بصوت مسموع أمام المارة وبألفاظ وأوصاف يخجل منها الاثنين معا!!

تعرفى يارجاء وبما انك طلبتالصراحة فحتكلم معاك بكل صدق وكمان حااحكى ليك راى بعض الاصدقاء المقربين
لو كنت راكب عربية وواحدة شاغلتنى بعرف واحدة فى الاتنين
اما انها ما عندها موضوع ودايرة تقضى وقت واما فعلا
محتاجة تصل مشوار معين وفى الحالتين بكون داير اعرف
وبتجاوب معاها واشوف اذا فعلا نيتها سليمة وقد احقق
لها ما تصبو اليه سواء كان التوصيل او قضاء وقت برئ
طبعا اما اذا كان نيتا ما سليمة وتسعى لشئ معين فسوف
اسعى للتخلص منهافى اول سانحة دون استفزازها او جرحها
اما اذا كنت ماشى بى رجولى او فى المواصلات العامة
اوداخل اى مرفق عام فسوف اقيف كتيرا عندما تشاغلنى
واحدة واقول ياخى دى فعلا زولة هدفا التعارف او قد
اكون بشبه الزول الراسماهو فى راسها طبعا مع توفر
النية السليمة و90 فى المية من صديقاتى تعارفنا
بالطريقة دى ولا يزال حبل الصداقة الخالصة ممتدا بيننا
كل قصدى يا اختى رجاء انو داير ابين انو الراجل بشاغل
من اجل المشاغلة لكن نادر جدا تجدى ان تقدم امراة على
مشاغلة راجل فقط من اجل المشاغلة لعدة اسباب اولا
الحياة لانه الصفة الغالبة على المراة السودانية وثانيا
عزة النفس وهى الصفة التى تميز المراة السودانية بصفة
خاصة جدا والكثير من الصفات التى تجعلنا نستبعد مجرد
التفكير فى الارتباط بغيركن اخواتى السودانيات
خلاصة قولى عزيزتى رجاء انه اذا شاغلتنى المراة بفكر مية
مرة قبل ان اتجاهلها لعلمى بصعوبة ما اقدمت عليه من
عمل علىنفسها وايضا لشدة وقع التجاهل عليها لكن
من ناحية تانية دا هنا مسبب لى مشكلة فالمراة الامريكية
اذا تعاملتا معاها بنفس الطريقة مرتين المرة التالتة
تجيك تقولك آى لايك يو واي دونت يو كم اوفر تو ماي
هاوس وكلام من هذا القبيل وهذا مخالف للتقاليد التى
نشانا عليها لذلك يصعب علينا التعامل معهن لى عودة
كامل التقديرلك رجاء

شرفتي الديار احيرا يارجاء فمرحبا بك ثانية
منوره
عن سؤالك ابتسم واذهب الي حيث اتجاهي الاصلي

أستاذي الموصلي

سلااامات وتحيات كثيراااات
لقد حييتك أول ما دخلت البورد، وطبعا اعتذرت عن كسلي السنة الفاتت بالرغم من حثك لي على المشاركة
لك التحايا العاطرات ولكل أفراد الأسرة الكريمة

امشي معاها وين ما تمشي

العزيز ود الجيلي

شكرا لصراحتك الجميلة والتي تعكس حقيقي روحك الجميلة، بالمناسبة دي ما مشاغلة وقصدي شريف، المهم هناك مليون طريقة ممكن الرجل والمرأة يتعرفو بيها على بعض لأغراض شريفة أو لأغراض في نفس الفتى أو الفتاة، وعلى كل اظن انو أي واحد بيعرف يميز لكن الشي الذي يغيظ ان يختلط الحابل بالنابل
رجاء

يارجاء ممكن اعلق ولا السؤال للرجال بس ؟

يا بت العباسي سلامات
السؤال متأخر جدا
أنا شغال معاك في مكتب واحد خمسة سنين ... ما شاغلتيني
!جاية تسألي أسة

الأعزاء صفاء وفيصل صالح
طبعا يا صفاء ممكن مشاركتك لأني ما بقدر على كل الآراء الرجالية التي وردت،، النجدة

فيصل العزيز
سؤالي ما متأخر أبدا يمكن دي الفرصة اللي كنت منتظرها ذاتها
مشتاقين كتييييير
دي ما مشاغلة

شكرا يا عسل يارجوية ودي فرصة كويسة علي الاقل الواحدة فينا تعرف الراجل بفكر كيف ومابقصر معاك

بالنسبة للمشغالة اذا كانت ظريفة اسعد بها اما عملية الركوب فلا والف لا

العزيز أبو يسرا

ده تعبير حقيقي ليس عن شعور الرجال ولكن النساء ايضا، شفت قاعدين نتبهدل كيف؟

عزيزتنا رجا
هي كدي التشاغل في الاول وساعتا لي كل حادثاً حديث
بس ما تكون شينه
لوووووووووووول

الخواض

سلام، بطل استهبال، يعني لو شاغلتك واحدة شينة ما حتتجاوب؟

والله قصة
ذكرتيني لما كنت في السعودية شاغلتني واحدة و الشارع فاضي
اتخيلي ما قمتا جاري عديل كده وزغتا في اول ملف
يا ختي الحكاية دي هناك بتجيب عشماوي وكده
.......... ....
لكن في السودان ......امانة ما وقع راجل

انزعاج تام
و مواصلة المشوار لمن لا اعرفها
و من اعرفها بتكون بتهزر معاى ساى و لا اعتبرها مشاغلة

المعاكسة هي في الأصل صنعة رجالية
وهي دليل تخلف عاطفي
وعدم احترام لادمية الأنسان
أنا أنزعج كثيرا للمرأة التي تعاكس
ولا أثق فيها

المعاكسة هي في الأصل صنعة رجالية
وهي دليل تخلف عاطفي
وعدم احترام لادمية الأنسان
أنا أنزعج كثيرا للمرأة التي تعاكس
ولا أثق فيها

من الفرحة
ما بنوم الليل



و احتمال تاني يوم
ما امشي الشغل

والله قصة جميلة لكنها
غير واقعية

يعني كيفن بس ؟

الاخت رجاء

ابداء الاعجاب واختيار الطريقة التى تراعى الالتزام تجاه
الزوق و الاحترام والادب للذات وللاخر هو سلوك موجود
فى المجتمع و لا يجد رفضا قاطعا من المجتع.

واختيار لكلمة "مشاغلة" اعطى السؤال مساحة اوسع واريح من
كلمة "معاكسة" المتداولة اكثر.

ان تاتى هذه "المشاغلة" من الرجل هذا هو المسار الطبيعى
ولكن عندما تاتى المراءه دائما تاتى المفارقة والطرافة
ودائما تكون الطف واقرب الى روح الدعابة اللطيفة حتى
اذا كانت هى ردة فعل "لمشاغلة " من الرجل

يحضرنى موقف طريف مماثل لذلك " المشاغلة وردة الفعل" ..كنت
برفقة صديق ووقفت الحافلة المتجه من الثورة "امدرمان" الى
المحطة الوسطى على طريق "الثورة بالنص" صديقى على الباب فى
انتظار نزول بعض الركاب , بينهم حسناء ,وهى فى منتصف الحافلة
قال الصديق هامسا " ديل عيونك ولا واحه.." , ,قالها وهى بعيدة
من باب الحافلة , وعندما وصلت باب الحفلة وكانت قريبة منه نظرت البه وقالت له هامسة " ..واحــه" ..وواصلت نزولها ولكن تعالت صيحات الركاب مطالبة الصديق بركوب الحافلة..والصديق محلقا فى عوالم تلكم الواحه..

لك التحيه

سلام
اولا سعدت لرؤية اخونا ود شاموق

انانزلت بوست مشابه لهذا لكن يخص الرجل
انا مرة كنت في الهند
داخل علي مطعم ايراني
وفجاة وجدت فتاة لم اري مثلها في جمالها حتي اليوم
المهم قلت ليها بدون ما اشعر اخخخخخخخخخخخ من جمالك دا بالعربي

وهي طبعا ماتت بالضحك وطلعت بحرينية هندية
وقالت لي عادي ومشيت علي كدة
لكن هو شعور مرات في لحظات غير عادية يكون هو تعبير عن شي لحظي
لكن لو كان بنية دا بقي عادي في السودان
برضو انا رجعت بعد تسع سنين غربة ولقيت السودان كلوا بتكلم بكلمات لها معني واضح ومعني اخر هو المقصود
وكنت زي المخبول
وحصلت لي من بنات في الشارع وانا ما عرفت بقصدوا شنو
لكن بتاع الدكان قال لي ياخي البنات شاغلوك وانت ولا يهمك قلت يا ريت لو فهمت كان رديت ليهم
مرات بيكون كززة ساي منهن عشان كدا بنخاف من جنس دا
وفي انواع عايزة تفكها فيك من الصباح وديل بتاعات البري النضيف
زي في الحافلة يبدا الموضوع بالجريدة اي موضوع
وتعال شوف الموضوع يمشي الي غزل صريح وسريع
صراحة المشاغلة بقت ظاهرة في السودان وعادية
لانوا زاتوا ما في شباب كمية بسيطة

الاخت رجاء - اللي كنت قايلك راجل اسمه راجا
والله أعتقد إنو حايكون شعور عظيم
يخلي الواحد يزيد شبرين
أذكر حينما كنا طلابا
قالت لي زميلة
ما تنعصروا علينا عشان نمشي بالليل نتوحوح ونقول والله عصرني فلان
طبعا يحب ألا يحكم بهذه المقولة لأن تلك الزميلة - جزاهاالله خير
لم تكن مقياسا للبت التي يجب أن يفخر الواحد بأنها شاغلته

أرد لها الصاع صاعين ووووووبسسس على شرط تكون فى مستوى حبيبتى

أنا شخصيا لو شاغلتني واحده أولا حأعرف طوالي إنه نظرها مطشش وللا يمكن تكون عميانه عدييل..تانيا حأكلم المدام تروح تشاكلها وتقول ليها:عيب...نحن رجالنا متربين وما بعرفوا الحاجت دي

حسب المزاج

أنا 70 % سرحان .. 10 % واعي ... 9 % مزاج سيئ ...11 % مزاج كويس

و الحركة دي دائما بتحصل معاي ...

لكن ما أظن انها شيئ في صالح البت .. لسبب : الراجل بيحب البت الصعبة المنال .. لكن لما البت تجري وراء الراجل هو بيبعد و بتكون كأنها بتحاول تمسك بي ظلها
وصية للبنات :
لو في زول عجبك اهتمي بي مظهرك و اتقيفي قدامو و ما تتكلمي كتير لما تلاقيهو لأننا بنحب البنات الغامضات .. و ما تبادري .. خليهو هو يبادر دائما .. و الا ما حتحصلي عليهو

بالنسبة لي لما تشاغلني بت .. اما : ببتسم و بكمل طريقي .. أو بشاغلها بي طريقة رقيقة غير جارحة .. أما فكرة الركوب معاها فدي بحتاج أقرأ عيونها الأول عشان أفهم سبب الدعوة ...

مودك

الاخت رجاء
السلام عليكم ورحمة الله وبركاته
لو قالت لى اركب اقول ليها انا ماشى قريب
اما اذا شاغلتنى فارد عليها من باب الزوق
شكرا ومعاها من جنس ماقالت وفى حدود

تعتمد على شكل المشاغله والمكان

لكن من تجربه لومجموعه من البنات

اخير تكب الزوغه

اقول ليها

بالله عليك كلميها

تلك العافصة ليا

كم انالطيف و بتحب

بزغغغغغغغغغغغغغغغغغغغغغغغغغغغغغغغغغغغغرد

;كحلووووووش هي اعمل حسابك قبل شوية انت خطبت خلاس بدينا
من حس ي في المشاغلة اكلم سارة . سوري رجوية ما دقيت الباب

هى حركه ما كويسه
كمان من باب الكرم السودانى الاصيل ارد ليها
وامكن تكون هى نفسها زهجانه وعايزه تفرق شويه
ولا ما فى واحد معبرا
المهم الواحد يرفع معنويتا حبا كده

عزيزتي رجاء

فعلا الأمر مريب وقد اصاب بالدهشة للوهلة الاولى نظرا لكون الحادثة فريدة من نوعها خاصة اننا نحن الرجال قد اعتدنا على القيام بمثل هذه الامور

ولكن دعيني اسألك بصراحة ..

هل صادفك انتي موقف مثل هذا مع مجموعة من الفتيات


شكرا

خال العيال

بفصل.....

لو شاغلتني بكلم ليها أبوي

!!!!!!!!!!! قال ابوي قال

لما اصدق انها شاغلتني بتكون هي


قنعت ووصلت مشوارها واذا راكبة عربية بيكون ناس المرور
عملوا ليها مخالفة وبقت في الطريقة البتخارجا

ويكون المشاغلة راحت في الهواء ساكت

ووالله الاتنين حصلو جد جد الاولي في السودان
والتانية هنا

يا رجاء
ازيك
والله انا لي كم يوم مبوزة
ربنا يديك قدر الضحك الضحكني ليه بوستك دا
وفيهو رودود تضحك الواحدة سنة

الأعزاء في البورد

سلااام، وسعدت كثيرا بردودكم التي تعكس كما من البحث عما هو غريب، وبالمناسبة يا خال العيال دائما ما نتناقش انا وصديقاتي في هذا الموضوع ولكن حتى اللحظة لم نجربه، بالرغم من أنني اسعى لمعرفة رد فعل الرجل لأني أعرف رد فعلي وبنات جنسي، وهو شعور عظيم بالمهانة ،
العزيزة الجندرية سعدت أكثر لكسر دور الدبرسة والتبويز،، نحن في الخدمة.. رجاء

والله ياجماعة شفت شماسيات امريكا وبنات الثانويات بشاغلوا الاولاد القيافة ويصرخوا لغاية ما الاولاد كرعينهم يتلخبتوا فى المشية


لكن اعملوا زى ىسيا التلب، ممثلة سودانية

كانت وهى فى طريقها للمعهد كل صباح ومسا بتضطر تجى ماشة بى رجال النوع البشاغلوا ديل،
فلما عرفت انه كل ما تمر لازم يشاغلوها

بفت تجى ماشة بجنبهم بثقة شديدة وترفه يدها وتقول ليكم بصوت واثق تماما:


الســـــــــــــلامو عليكم


بس وقفوا حكاية المشاغلة وبقت تمر عادى

يعنى اعملوا حركة ضربنى بكى وسبقنى اشتكى بتاعة آسيا التلب دى

وطالما جبتو سيرة المشاغلة،

اكتر مشاغلة سغيلة فى الدنيا دى بتاعة الحواجبين،
هى بتاعة اهل عوض كدة، ناس ببيعوا العدة والعراريق،
تتلفت عليه ، تـــــــــح يقطع فيك براق
وبقولوا ليها كدة
قطع فيها براق
اغغغغغغغغغغغغغغغغغغ
تغيظ لشكل؟؟؟
براق؟؟؟

اها فى ناس بستعملوا البراق دة زاتو بمنشات العربية، ومعاها بورى سريع كدة، ديل سواقين الحافلات وكدة


كدى اقرا باقى الكلام بتاعكم اشوف فى زول اتكلم عن انواع المشاغلة وخلفياتها الثقافية ولا لا؟؟؟

بعدين بجى اواصل

العزيزه بنت العباسى
تحياتى واحترامى

بعيداً عن المثالية المصطنعه اعتقد بان الجميع يعجبه ان يقول له كلمة حلوه وهذا او ما نشعر به عند المشاغله ولكن الفرق لدي انها من من تصدر المشاغله ..
اما عن شخصى ببتسم فقط بس ما بواصل فى ابتسامتى يعنى رد اعتبار فقط واحترام لمشاعرها
ولكن حينما تكون المشاغله من الحبيبه او لنقل من الزوجه فوقع المشاغله مختلف تماماًوالمشاغله من هب ودب بتسبب لى الضيق الى حد ماء ..