لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟

Post: #1
Title: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 03:09 AM

كنت أدخرها لبنات الدهر وصروفه وللعيال

وقد ذهبت الآن !!!!!!!!!!!

Post: #2
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: مجاهد عبدالله
Date: 11-20-2006, 03:17 AM
Parent: #1

العم الكلس فاروق

سلاماً من الله عليك

Quote: كنت أدخرها لبنات الدهر وصروفه وللعيال

وقد ذهبت الآن !!!!!!!!!!!

ده ربنا ودي حكمتو

الجابه قبل كده بجيبه تاتي

خالص الود

Post: #5
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 03:46 AM
Parent: #2

Quote: العم الكلس فاروق

سلاماً من الله عليك

Quote: كنت أدخرها لبنات الدهر وصروفه وللعيال

وقد ذهبت الآن !!!!!!!!!!!

ده ربنا ودي حكمتو

الجابه قبل كده بجيبه تاتي

خالص الود

ابننا مجاهد

نعم يا ابن أخي فثقتي بالله كبيرة ولا تحدها حدود

Post: #3
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 03:35 AM
Parent: #1

كنت أدخرها كوديعة استثمارية منذ عشرين عاما

وأزيد عليها ما تيسر أسبوعيا وشهريا وسنويا

في مكان قالوا ان ربحه حلال حتى وصلت بأرباحها

الى ضعفيها !!!!!!!

Post: #4
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Adel Sameer Tawfiq
Date: 11-20-2006, 03:36 AM
Parent: #1

الاخ فاروق !
مافاهم .. دا بكى والا قروش ؟!!
البركة فيكم في كل الأحوال ..

Post: #6
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 03:50 AM
Parent: #4

Quote: الاخ فاروق !
مافاهم .. دا بكى والا قروش ؟!!
البركة فيكم في كل الأحوال ..

الله يبارك فيك أخي عادل وما تشوف شر باذن الله

Post: #7
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 04:38 AM
Parent: #6

أصدقائي كلهم مهنيون ... منهم الصحفي والمحامي

والمهندس والمترجم والاداري والقاضي والمصرفي...

والبقية غالبيتهم أطباء وصيادلة كبار ... لا أدري

لماذا معظم أصدقائي من العاملين في المجال الصحي؟؟

من خلال عشرتي الطويلة مع هذه الأغلبية اكتشفت أنهم

من ذوي (الحرص) ولا أزيد !!!!!!!!

استعرضت حياتي كلها فلم أجد اني صادقت يوما أحدا

ممن يسمونهم برجال الأعمال!!!!... أيضا لا أدري لماذا !!!!!

المهم أقنعتني هذه الأغلبية (من أصدقائي) باستثمار مدخراتي

في سوق الأسهم ... وكانوا قد دخلوا قبلي وربحوا ربحا عظيما!!!!!

Post: #8
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 04:46 AM
Parent: #7

عفوا هناك أخبار جديدة

"خفسة" لسوق الأسهم

ونواصل......

Post: #11
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Adel Sameer Tawfiq
Date: 11-20-2006, 05:28 AM
Parent: #7

Quote: استثمار مدخراتي في سوق الأسهم

إنت ماتشاور يافاروق ياخوي عشان تقلل المخاطر وتعرف التعامل في السوق بصورة صحيحة !
الدخول لعالم الأسهم داير ليه معرفة وفهم والا بتروح شمار في بورصة سااااكت !
عادل سمير

Post: #39
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Abdelrahman Elegeil
Date: 11-21-2006, 10:44 AM
Parent: #11

إنت ماتشاور يافاروق ياخوي عشان تقلل المخاطر وتعرف التعامل في السوق بصورة صحيحة !
الدخول لعالم الأسهم داير ليه معرفة وفهم والا بتروح شمار في بورصة سااااكت !

دا الكلام ويا الحبيب وكت دخلت لا تمرق والا انت حازمة بس طول بالك

Post: #9
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Kamal Mahjoob
Date: 11-20-2006, 05:06 AM
Parent: #1

الفاااااااااااااتحة ... البركة فيك وفي عيالك

Post: #10
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Kamal Mahjoob
Date: 11-20-2006, 05:07 AM
Parent: #1

الفاااااااااااااتحة ... البركة فيك وفي عيالك

Post: #12
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 06:29 AM
Parent: #10

الأستاذ كمال محجوب

شكر الله سعيكم وما تشوف شر

Post: #13
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 06:29 AM
Parent: #10

الأستاذ كمال محجوب

شكر الله سعيكم وما تشوف شر

Post: #14
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 06:53 AM
Parent: #13

أخي عادل

هناك مستشارون وAgents يقومون بالعمل ويأخذون نسبتهم عند الربح

Post: #15
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 07:19 AM
Parent: #14

كان أصل المبلغ عام0001977/200 درهم ومع السنين تضاعف مرتين

ولا أنكر اني ربحت خلال السنوات الثلاث الماضية وهاهي الخسارة

قد بلغت 720000 درهم ... ولم يتبق سوى دريهمات معدودة بضعة

ألوف لا تغني ولا تسمن من جوع فلله ما أخذ ولله ما أعطى.......

ووالله الذي لا اله الا هو لست زعلانا ولا نادما ....ولا آسفا.....

فالذي يجئ من الله حياه الله....

وقبل أن يبلغني خبر الخسارة بيوم كنت أعاني من التهاب معوي

اضافة الى هياج القولون العصبي ... ولما علمت الخبر ازداد

القولون هياجا....فجاءت الطوبة على المعطوبة !!!!!!!!!

Post: #16
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 07:29 AM
Parent: #15

أخت وزميلة صحفية (جدعة) خسرت ما يزيد على

75000 درهم ولم تفارقهاالابتسامة قط .........

Post: #17
Title: البركة فيك يا حاج
Author: محمد عمر الفكي
Date: 11-20-2006, 07:32 AM
Parent: #1

يا عم فاروق الجاتك في مالك سامحتك، ومعوضة باذن الله.
رب ضارة نافعة فها نحن نراك تعود للكتابة وان كان السبب نكسة.
والله لو تعرف الحصل علي تعرف انه ما جاتك اي حاجة.
ربنا يعوضك

Post: #18
Title: Re: البركة فيك يا حاج
Author: فاروق حامد محمد
Date: 11-20-2006, 08:00 AM
Parent: #17

كنت مريضا وفي مزاج سيئ جدا خلال الأربعة أيام الماضية

وعليه أعتذر لكل من قابلني أو هاتفني أو تداخلت معه

هنا أو أرسل لي عبر الماسنجر أو الايميل ولم أرد عليه

اذ كنت حقيقة عصبيا ومرهقا وفي حالة نفسية لا تشبهني

I was really in a very bad mood فلكم العتبى حتى ترضوا

والحمدلله على كل حال............

Post: #20
Title: Re: البركة فيك يا حاج
Author: فاروق حامد محمد
Date: 11-20-2006, 08:23 AM
Parent: #18

ابن أخي محمد عمر الفكي

ماأنبلك أيها الأصيل المهذب الرقيق

كل الشكر لك وكل الود

Post: #19
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: بكري الصايغ
Date: 11-20-2006, 08:02 AM
Parent: #1

.... الـزول بـزعـل وبـحـزن لـما يـفقـد نعـمةالعـقل، او فقـد

البصـــر، او فقـد يـديـة فـي حـادث، او كان بـتمـتع بسـمعةطـيبـة وســـط

اهـــل ة وخـســــرهــا،.....لـكن واحـد بزعـل عشــان فلوس ولا امـوال........

" صــحـــي مـرات فقـــدان الاموال شــــيئ حـار " ، ولكـن مـقارنـة مـع

الاشــــياءالاســـــاســـــية الـمذكورة أعـــلاة عـليك تقول:

" ملعــــوووووون ابـو الفلوس وتــروح فـي ســتيـن الف داهيـــة !!".

Post: #21
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: السنجك
Date: 11-20-2006, 09:02 AM
Parent: #19

يااستاذنا فاروق اذكر ان والدتى عندما كنت اتى مهموما من مال ضاع او خساره تقول لى (ياولدى المركب تغرق باحمالها) اى ان تاجر يكون محمل المركب كل بضاعته او سفينه تحمل فوق جوفها المئات من رؤؤس الاموال فى لحظه واحده تغرق ولكن الصبر فقط هو الحل ومادام الصحه فى المال برجع والانسان عندما فى هذه الحالات يفكر فى نعم الله عليه تخيل الصحه دى وانت ماشى فى الشارع ومفلس ثمنها كم والله لو ادوك اموالك دى مضاعفه ماتعوضك والواح ايضل يتخيل انه المساله دى كلها فى الاخر لى تراب ابو مليون دولار والبدون وربنا يطول الاعمار ويااستاذ الجاتك فى مالك سامحتك والبورصه حاجه بطاله مغريه وزى القمار تكسبك اول (لكن هى حلال ) تكسبك فى البدايه وبعدين تشيل الوراء والقدام والحريف يخرج من اول مكسب ويزوغ

اخوك السنجك

Post: #23
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: doma
Date: 11-20-2006, 09:10 AM
Parent: #19

الاخ المحترم فاروق
الجاتك في مالك سامحتك والموت مع الجماعه عرس
نحكي ليك قصه زوجي العزيز طبعا هو بقول لي انت شن خبرك باداره الاموال بس بتعرفي للصرف
اها قبل فتره كدا اشتري ليه اسهم وحارس الكومبيوتر من
يرجع من الشغل والعطلات وما بتناضم شي طباعه وشي حفظ ملفات ويحسب ويجمع والحكايه ماشه لي فوق في ظرف 3 شهور المبلغ ربح 50 في الميه قلت ليهو يا زول بيع الاسهم بتدق الدلجه لانه في ناس ح تكتفي بي ال 50 في الميه دي وتبيع وقروشك ح تبقي ربحهم قال لي انت شن عرفك
بعد اسبوعين كدا حسيت انه ما متابع متل اول سالته يا زول انت اسهمك الحصل عليها شنو ؟؟؟ طبعا قطعه في حشاه اخيرا اعترف انه خسر 30 الف يرو . اها بقت ليهو عظه وعبره انا شخصيا بشوفها متل لعب القمار يعني يا تخرت ولا يخرتوك

Post: #22
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: عبد المنعم سليمان
Date: 11-20-2006, 09:08 AM
Parent: #1

عم فاروق

ازييك والجاتك في مالك سامحتك ..

Quote: والله لو تعرف الحصل علي تعرف انه ما جاتك اي حاجة

والله العظيم يا عم فاروق

وتستمر الحياه

منعم

Post: #24
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الفاتح يوسف جبرا
Date: 11-20-2006, 10:04 AM
Parent: #22

Quote: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟

يا فاروق يا خوى قليلا رايح وكتيرا رايح ..

قاعدين نصرف المرتبات من يوم 27 فى الشهر ..وطبعا الواحد بعد ما يقبض من الجامعة ويجى راجع على البيت بيقوم يغشى الكناتين يسدد ليها .. بتاع البنشر يسدد ليهو .. الجزار يسدد ليهو وكده القروش تكمل يوم 29 بالكتير .. فى سيد دكان جديد ما عارف الحكاية دى قام جا دق ليا الباب يوم واحد فى الشهر قال ليا:
- يا عم الفاتح عاوزين الحساب
-(قمت قلت ليهو)- لكن يا إبنى تجينى يوم واحد
-( قام رد عليا)- يعنى عاوزنى أجيك يوم صفر !!!!!!!

Post: #29
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 07:23 PM
Parent: #24

يا فاروق يا خوى قليلا رايح وكتيرا رايح ..

قاعدين نصرف المرتبات من يوم 27 فى الشهر ..وطبعا الواحد بعد ما يقبض من الجامعة ويجى راجع على البيت بيقوم يغشى الكناتين يسدد ليها .. بتاع البنشر يسدد ليهو .. الجزار يسدد ليهو وكده القروش تكمل يوم 29 بالكتير .. فى سيد دكان جديد ما عارف الحكاية دى قام جا دق ليا الباب يوم واحد فى الشهر قال ليا:
- يا عم الفاتح عاوزين الحساب
-(قمت قلت ليهو)- لكن يا إبنى تجينى يوم واحد
-( قام رد عليا)- يعنى عاوزنى أجيك يوم صفر !!!!!!! الفاتح جبرا

الله يديك الصحة والعافية أخي الفاتح ويخليك لآولادك

ويخلي أولادك ليك ....

لكن يا الفاتح يوم صفر دا انت قايلو مافي ؟؟؟

يوم صفر دا بجي مرة في الشهر وبكون دايما يوم (أربحا)

Post: #25
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: abubakr
Date: 11-20-2006, 11:31 AM
Parent: #1

يا رفيقي .. ما اول امبارح كنت اخر انبساط والا كان تغطية لزوم انو نسايبك البرابرة ما يتكدرو ؟؟؟ ياسلام عليك ؟؟ انا والحمدلله لا علاقة لي مطلقا مع اية مال وبرييك ايفن اخر الشهر ولما سويت بيزنس خاص - تغطية لهواية كانت بتصرف كل الماهية - حصل لي زي حالة عمكم فاروق ..الشريك المواطن وكان عسكري اتصل بي يوم العصر وانا كنت متاخر شوية في البيت قائلا " خلاص استوليت علي الشركة واغراضك لميناها في بوكس عشان تشيلها " وهكذا راحت .. وواحد صاحبي شاف حالتي النكد مشي لصاحبو المحامي الكبير وكانت قصة نهايتها انو المحكم اتصل بعدسنوات مبشرا بانني كسبان القضية والمحامي اتصل بعد عقد من الزمان مبشرا بانني انتصرت ولما سالنا عن البيزات طلعت 10% من جزء من الاصل قلنا مالو! ولكن الطامة كانت في اجابة المحامي عندما سالناه " حنقبض متيين ؟ " قال تقبض شنو "كفاك النصر المعنوي " وانا منذ ذلك الزمان شيكاتي كلها علي حساب النصر المعنوي واها رجعت بناء زي زمان ( اوعك تقول انو شركتنا هي سبب مصيبتك مع الاسهم ؟)
وقصة الطف انو بعد ما شريكي الانقلابي استولي علي الشركة بقيت مفلسا بلا عمل ولكن اصابتني الدهشة وما زلت فاغرا فا هي حتي اليوم حينما اتاني يومي قريبا محترما وهو يكاد ينفجر من الضحك وسالته فعلمت ان جماعة من البرابرة اجتمعو في مكان ما وكان حديثهم عن اغني عشرة من اندنا في الخليج فطلع سيادتنا الاول ..؟ وما زالت زوجتي سامية مبسوطة بالصيت وتصرف من شيكاتو ...
والان وانا اعمل في اعمار( ما تقول هي سبب بلاك نحن بس بنبني ونبيع اما الاسهم دي ما عندنا صلة بيها ) يصر كثيريين من الذين ياتون الي حيث اعمل للاستشارة عن اية من الوحدات يشترونها ويصروون علي ان يشتروا مثل الفيلل والشقق الانا اشتريتها لانو اكيد انا نقيت الاحسن ؟؟؟ وانا نقاني الفقر..!
فيارفيقي انبسط .. تطير البيزات ..

Post: #26
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 05:06 PM
Parent: #25

Quote: الاخ المحترم فاروق
الجاتك في مالك سامحتك والموت مع الجماعه عرس
نحكي ليك قصه زوجي العزيز طبعا هو بقول لي انت شن خبرك باداره الاموال بس بتعرفي للصرف
اها قبل فتره كدا اشتري ليه اسهم وحارس الكومبيوتر من
يرجع من الشغل والعطلات وما بتناضم شي طباعه وشي حفظ ملفات ويحسب ويجمع والحكايه ماشه لي فوق في ظرف 3 شهور المبلغ ربح 50 في الميه قلت ليهو يا زول بيع الاسهم بتدق الدلجه لانه في ناس ح تكتفي بي ال 50 في الميه دي وتبيع وقروشك ح تبقي ربحهم قال لي انت شن عرفك
بعد اسبوعين كدا حسيت انه ما متابع متل اول سالته يا زول انت اسهمك الحصل عليها شنو ؟؟؟ طبعا قطعه في حشاه اخيرا اعترف انه خسر 30 الف يرو . اها بقت ليهو عظه وعبره انا شخصيا بشوفها متل لعب القمار يعني يا تخرت ولا يخرتوك

معليش يا جماعة أرد على أختي دوما في الأول لأنه Ladies first

ولأنه كلامها شميت فيه ريحة اخواتي (الله يحفظها ويحفظهن) تصدقي

خيتي دوما حكاية زوجك هي حكايتي ذاااااتها فقد ربحت أكثر من50 يالماية

وكنت أريد الانسحاب نهائيا ولكن أولاد الحلال الله يديهم العافية مرقوني

من أبوظبي وقالوا خلينا نشوف السوق السعودي الأيام دي ماشي كويس

وافقتهم باعتبارهم خبراء وربحوني ... وحياتك شهر بس والحصل حصل ...

لكني يشهد الله ما زعلان ولا ندمان وزي ما بقولوا الجاتك في مالك سامحتك ...

شكرا لك أيها الأخت النبيلة وربنا يغطي عليك وعلى وليداتك وعلى زوجك "المصون"

أحوك/فاروق

Post: #27
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: محمد مكى محمد
Date: 11-20-2006, 06:42 PM
Parent: #1

ااستاذنا العزيز فاروق
كفارة والجاتك في مالك سامحتك، ومعوضة باذن الله.
المهم الصحة والعافية،إن بقت ،الباقي هين..
انا شلت كل تعب الغربة وديتو السودان ..وحاتك فى ظرف شهرين عدمونى نفاخ النار.وأهو الواحد يبدا من جديد.
تحياتى وودى
محمد مكى

Post: #28
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-20-2006, 07:12 PM
Parent: #27

Quote: ااستاذنا العزيز فاروق
كفارة والجاتك في مالك سامحتك، ومعوضة باذن الله.
المهم الصحة والعافية،إن بقت ،الباقي هين..
انا شلت كل تعب الغربة وديتو السودان ..وحاتك فى ظرف شهرين عدمونى نفاخ النار.وأهو الواحد يبدا من جديد.
تحياتى وودى
محمد مكى

أستاذ محمد

والله زعلت ليك أكتر من ما زعلت لنفسي

تصدق معظم المغتربين يشيلوا شقا عمرهم

يمشوا السودان يعملوا مشاريع صغيرة كبيرة

بعد شهرين تلاتة يلموا ليك فيهم حرامية الجبايات

وهاك يادمغة الجريح ودمغة العضير ودمغة الغريق

ودمغة الشوق كبي ورسوم البنايات الوقعت ورسوم الهنايات

الجبناها ليكم ورسوم "ماهو انت كويس وماشي" وآخر موضة

الرسوم الجديدة - حسب الفاتح يوسف جبرا- هو رسوم (تفتيحة)

ورسوم الدقسة جاية في السكة ... اسأل عمو الفاتح جبرا

اخصائي واستشاري الدمغ والرسوم والهنايات.....ولا يهمك

يا محمد أخوي والبركة في صحتك .......

Post: #30
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: نصار
Date: 11-20-2006, 08:17 PM
Parent: #1

العزيز فاروق

قولت لي ما زعلان و الخبر تاور عليك المصران؟؟؟
يا اخوي لك أن تفخر بأنك كنت من اصحاف الالوف
في البورصات الاقليمية المتعاملة بدورها بالعالمية
و انه العولمة دقيت فيها طوبات و ما سيرها هذا
الا من اموالك التي كانت
زي واحد قريبنا في الشمالية (دي بمناسبة مركب حبوبة السنجك)
زولنا عند دكيكين في الحلة الشرق مننا بجي يبضع في الغرب
اها يوم في نص البحر مركبة اتقلبت و من ضمن الحاجات كان عنده
فيها شوال سكر زولك عام للضفة الشرقية و بارا البحر يضوق في
مويته و يقول لي هنا حلو... شوالو اظنو طعم النيل للبحر الابيض
المتوسط... الله يخدر ضراعك و معوضة ان شاء الله
نحنا اصلو القروش دي لا بندورا و لا بتدورنا.. احسن كدا
ما شايف البهدله المبهدلاها للكيزان دي؟

Post: #31
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: هشام هباني
Date: 11-20-2006, 08:44 PM
Parent: #30

استاذي الباسل فاروق

(وقل لن يصيبنا الا ما كتب الله لنا)
فالامر مقدر والمال (عارية) والزارعة الله في الحجر بتقوم!!
وكان للوليدات( الله ما شق حنكا ضيعو)!

تسلم يا امير واهم حاجة الصحة والمال بمشي وبجي!

واما ان سالت عن اخبارنا نحن التكاسة في امريكا حتما ستهون عليك المصيبة..فوالله لا نملك الا رزق اليوم ولا اسهم ولا ارصدة غير القناعة والصبر ونحن نجاهد في ارزاق من بين
خشوم التماسيح في مهنة هي اخطر المهن في العالم.. ويمكن في لحظات ان يقبض عزرائيل روحك برصاصة ثمنها يقل عن عشر الدولار يطلقها علي راسك متهور يطمع في دولار ليحتسي به
علبة جعة!!

هباني

Post: #32
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Yassir Tayfour
Date: 11-20-2006, 09:52 PM
Parent: #31

أستاذنا فاروق
ضغطت على (reply)
وما عرفت أكتب ليك شنو
بالرغم من مشاطرتى لك الحزن،
غير الله يعوضك فى مالك
وينعم عليك والأسرة بالصحة والعافية؛
والمال بعد ذهاب المال مكتسب
كن بخير

Post: #33
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: عواطف ادريس اسماعيل
Date: 11-21-2006, 00:45 AM
Parent: #1

العزيز فاروق

لله ما اعطى ولله ما أخذ عموما إنت احسن بكثير من أصحاب الملايين الذين تم إدخالهم في الطب النفسي

وأنا عارفة إنك أدها وأدود لو عايز نعمل ليك كشف ما عندنا مانع ولو عايز نعمل ليك ( ختة) يعني

صندوق كمان ما عندنا مانع المهم ما تحصل ليك انتكاسة بعد الشجاعة دي .

Post: #34
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Kamal Mahjoob
Date: 11-21-2006, 03:02 AM
Parent: #33

شيخ فاروق
لغاية أمس كنت بفتكر الموضوع بسيط لكن الليلة لما جيت راجع ولقيت الردود والتضامن الإجتماعي المكثف من الإخوة الأعضاء حسيت بي وجعك ... فوجعك يا هو وجعنا وإنت احسن عارف قروشك دي راحت وين ،،، أنا للآن ما عارف قروشي بتضيع وين ... ولو كانت بتتجمع كنت أنا وصلاح إدريس في سرج واحد وكنت ح أنافسو في الهلال والفنانين ،، بس كنت ح أتفادى قصة مصنع الشفاء دي وأهمل لي مصنع حلويات (خاصة حلاوة بقرة) فأصغر بناتي يتحبها.
وكان للآن ما رفعت الفراش بحاول أصلك عشان أواسيك واشوف بالمرة نفسي فيك ... جبر الله كسرك مرة تانية وعوضك خير مما فقدت وزوجك بكرا مثنى وثلاث ورباع عشان يقضوا على الباقي في الجيب ,, ووهب لك من البنين والبنات ... ولا حول ولا قوة إلا بالله .. وإنا لله وإنا إليه راجعون... ولا نامت أعين الجبناء .. ولا للبورصة ولا للغلاء ولا لل.......
بس لو كنت عملت ليك شوية قروش وربحت في الأسهم دي ما كنا استمتعنا بكتاباتك وكنت مشيت عملت ليك كرش وجلابية ملونة وعمة وشال مخطط وشوية جضوم منفوخة زي كورة الشراب ... وهلمجرا

Post: #35
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-21-2006, 05:42 AM
Parent: #34

Quote: المهم أقنعتني هذه الأغلبية (من أصدقائي) باستثمار مدخراتي

في سوق الأسهم ... وكانوا قد دخلوا قبلي وربحوا ربحا عظيما!!!!!

بس في سوق الاسهم ده

اما جبت مالا فرح ام سوميت
واما حلقن فيك الصقور ما جيت

مودتى

Post: #36
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-21-2006, 06:46 AM
Parent: #35

Quote: بس في سوق الاسهم ده

اما جبت مالا فرح ام سوميت
واما حلقن فيك الصقور ما جيت

الطيب اخوي

لا أراكم الله مكروها في بورصة لديكم

أحس انك تعيش هذه الأيام غارقا في المرحلة

الدوبيتية !!!!!![/B]

Post: #37
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-21-2006, 07:06 AM
Parent: #36

Quote: الدوبيتية !!!!!!

الله يمسخك يا الفاروق كتلتني بالضحك

Post: #40
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-21-2006, 03:44 PM
Parent: #34

وكان للآن ما رفعت الفراش بحاول أصلك عشان أواسيك واشوف بالمرة نفسي فيك ... جبر الله كسرك مرة تانية وعوضك خير مما فقدت وزوجك بكرا مثنى وثلاث ورباع عشان يقضوا على الباقي في الجيب ,, ووهب لك من البنين والبنات ... ولا حول ولا قوة إلا بالله .. وإنا لله وإنا إليه راجعون... ولا نامت أعين الجبناء .. ولا للبورصة ولا للغلاء ولا

الحبيب كمال محجوب

انت بدعائك (مثنى وثلاث ورباع) عايز تقضي على قروشي

الإنقرضت ولا عايز تقضي علي أنا ذاتي ...

وبما ان الدعاء جميل فلا يسعنا إلا أن نقول آمين لي ولك

ولصديقنا الجميل أبي ساندرا ... حسع يجي منطط عويناتو

خايف من رشيدة ومن البنات !!!!!!!!

Post: #38
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Ishraga Haimoura
Date: 11-21-2006, 08:18 AM
Parent: #1

يازول أحمد الله

شيتاً يختى العافية دي أصله ما فيه مشكلة

بس إنت قول الحمد لله

Quote: هناك مستشارون وAgents يقومون بالعمل ويأخذون نسبتهم عند الربح

إنت بس ديل تمسك في رقبتهم قوي

Post: #41
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: abubakr
Date: 11-21-2006, 04:00 PM
Parent: #1

يا رفيقي...
تصور من كترة خلافاتي مع الفلوس لم اشعر بفقدكم العظيم ولكن بنية طيوبة رقيقة اتصلت في اليوم وصوتها حزين وقالت لي " ما عندك تلفون السيد فاروق ؟ " قت ليها "فاروق منو ؟ " قت يمكن راجل ناريمان قام جانا بعاتي .. قالت " صحبك المسكين التحويشة العمر بتاعتو راحت ؟ " قت ليها " اوع تكوني قاصدة الشيبة ابوناصر .. قصدك فاروق حامد بتاع سوق المناخ " قالت "ايوه " اهو رسلت ليها تلفونك اس ام اس ... البنية قطعت قلبي .. ياخي زعلانة عليك "صدج" وقدر ما قت ليها دة تمساح دميرة وما بهزو شي برضو زعلانة ...
ياخي البيزات تطير .. بالله شفت جنس المؤازرة دي ؟ المشكلة انو ما عندي 700 الف اروح بيهم سوق دبي المالي بكرة واضيعهم في اسهم شركة لوجستيك واجي مكابرك...

مودتي
الرفيق جني رطان

Post: #42
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-21-2006, 05:24 PM
Parent: #41

Quote: اروح بيهم سوق دبي المالي بكرة واضيعهم في اسهم شركة لوجستيك واجي مكابرك...

والله تقابل الاسهم ترجع السودان سمين وعريان

Post: #43
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-21-2006, 06:02 PM
Parent: #42

[B
Quote: ] يا رفيقي...
تصور من كترة خلافاتي مع الفلوس لم اشعر بفقدكم العظيم ولكن بنية طيوبة رقيقة اتصلت

في اليوم وصوتها حزين وقالت لي " ما عندك تلفون السيد فاروق ؟ " قت ليها "فاروق

منو ؟ " قت يمكن راجل ناريمان قام جانا بعاتي .. قالت " صحبك المسكين التحويشة العمر بتاعتو راحت ؟ " قت ليها " اوع تكوني قاصدة الشيبة ابوناصر .. قصدك فاروق حامد بتاع سوق المناخ " قالت "ايوه " اهو رسلت ليها تلفونك اس ام اس ... البنية قطعت قلبي .. ياخي زعلانة عليك "صدج"

أبوبكر

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Post: #44
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Adel Sameer Tawfiq
Date: 11-21-2006, 06:13 PM
Parent: #1

بالمناسبة ياأخوانا الأستاذ الطيب شيقوق هو المستشار القانوني لسوق مسقط للأوراق المالية !!
ماتكلموا أخونا فاروق !!

Post: #45
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-21-2006, 06:23 PM
Parent: #44

Quote: بالمناسبة ياأخوانا الأستاذ الطيب شيقوق هو المستشار القانوني لسوق مسقط للأوراق المالية !!
ماتكلموا أخونا فاروق !!

يعني يا عادل أخوي كان كلمنا حياخد ماهيته من وين ؟!!!!!!!!!

Post: #46
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: abubakr
Date: 11-21-2006, 11:12 PM
Parent: #45

Quote: يعني يا عادل أخوي كان كلمنا حياخد ماهيته من وين ؟!!!!!!!!!

اها واحد ؟؟ شايف القروش راحت وين ؟؟

Post: #47
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-22-2006, 02:03 AM
Parent: #46

Quote: يازول أحمد الله

شيتاً يختى العافية دي أصله ما فيه مشكلة

بس إنت قول الحمد لله

هناك مستشارون وAgents يقومون بالعمل ويأخذون نسبتهم عند الربح

إنت بس ديل تمسك في رقبتهم قوي .... "اشراق حيمورة"
الأخت النبيلة إشراق

أشكرك على إحساسك الرائع بالآخرين وربنا يديكم الصحة

والعافية أنت وأسرتك الكريمة.... لكن باقيلك الجماعة

عندهم رقبة يتمسكوا بيها ؟؟؟ولله الحمد من قبل ومن بعد...

Post: #48
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: Adel Sameer Tawfiq
Date: 11-22-2006, 02:31 AM
Parent: #45

Quote: يعني يا عادل أخوي كان كلمنا حياخد ماهيته من وين ؟!!!!!!!!!

بالمناسبة يافاروق..أنا ظااااااطي..المستشار القانوني لسوق البحرين للاوراق المالية !! أها رايك شنو ؟!

Post: #49
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-22-2006, 03:06 AM
Parent: #48

Quote: بالمناسبة يافاروق..أنا ظااااااطي..المستشار القانوني لسوق البحرين للاوراق المالية !! أها رايك شنو ؟!

غايته يا عادل أخوي إلا تعملوا ليكم حاجز صد للدعاء

والله الناس بتدعو عليكم جنس دعاء ..غايته الله يغطي

عليكم انت والطيب أخوي ... ما تنسختو (أكتر منة كده)

Post: #50
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: أبو الحسين
Date: 11-22-2006, 03:15 AM
Parent: #1

Quote: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟

والجاتَك في مالك سامحتك يا فاروق يا اخوي...

Post: #51
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-22-2006, 05:33 AM
Parent: #50

Quote: عليكم انت والطيب أخوي ... ما تنسختو (أكتر منة كده)

البوديك تباري بالهرف شنو - انا ذاتي ضاحك عليكم يا ناس (البندر) هو الواحد لو بيعرف الضانية الواحدة بتلد مرتين في السنة وربما المرتين يكونوا اربعة خرفان ( غير امهم) وربما سته لانو الضانية المكلوفة قد تلد 3 في بركة واحدة شنو الموديكم على وول استريت وداوجونز ونيكاى طبعا الاخير ده من اميز المؤشرات العالمية ؟؟؟؟؟؟

قول للمستشار القانوني عادل سمير مستشارين البورصات زى ابل الرحيل شايلة السقى وعطشانة.

ودى

Post: #52
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-22-2006, 07:12 AM
Parent: #51

Quote: البوديك تباري بالهرف شنو - انا ذاتي ضاحك عليكم يا ناس (البندر) هو الواحد لو

بيعرف الضانية الواحدة بتلد مرتين في السنة وربما المرتين يكونوا اربعة خرفان ( غير

امهم) وربما سته لانو الضانية المكلوفة قد تلد 3 في بركة واحدة شنو الموديكم على وول

استريت وداوجونز ونيكاى طبعا الاخير ده من اميز المؤشرات العالمية ؟؟؟؟؟؟

قول للمستشار القانوني عادل سمير مستشارين البورصات زى ابل الرحيل شايلة السقى

وعطشانة.... ودى

الطيب أخوي

قت لي ناس بندر ...... ســـمــح

بعدين الضانية دي مش هي (الخروفة)!!!!!!!!!!!!!

طيب اذا (الخروفة) بتلد في السنة 6 خروفات يبقى ده أعظم

استثمار في العالم .. ليس هناك استثمار في العالم يعطيك

عائد 600 في المائة الا المخدرات والعياذ بالله و"الخروفات"!!!!! علي الطلاق

ما أستثمر تاني إلا في "الخروفات"....

وما دام بقينا ناس بهم ساااااأأاي علي الطلاق تاني مافي حليفة إلا بالطلاق

مودتي.....

Post: #53
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-22-2006, 07:23 AM
Parent: #52

الطيب أخوي

Quote: قت لي ناس بندر ...... ســـمــح

بعدين الضانية دي مش هي (الخروفة)!!!!!!!!!!!!!

طيب اذا (الخروفة) بتلد في السنة 6 خروفات يبقى ده أعظم

استثمار في العالم .. ليس هناك استثمار في العالم يعطيك

عائد 600 في المائة الا المخدرات والعياذ بالله و"الخروفات"!!!!! علي الطلاق

ما أستثمر تاني إلا في "الخروفات"....

وما دام بقينا ناس بهم ساااااأأاي علي الطلاق تاني مافي حليفة إلا بالطلاق

مودتي.....

ناس سوق مسقط سمعوا الضحكة كلهم وجونى قالوا لى انت قايل روحك في البطانة . قلت ليهم البطانة افضل منكم بيني وبينكم ورقة اتفاق اكان ما مالى عينكم شوفوا ليكم ضكر او انتاية غيرى تملا عينكم انا بتكامل خروفاتي الولادات ديل ساااااااااااااي - قالوا لى شكيناك على الله انت داير لك سبب بس .

Post: #54
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-22-2006, 09:38 AM
Parent: #53

Quote: ناس سوق مسقط سمعوا الضحكة كلهم وجونى قالوا لى انت قايل روحك في البطانة . قلت ليهم البطانة افضل منكم بيني وبينكم ورقة اتفاق اكان ما مالى عينكم شوفوا ليكم ضكر او انتاية غيرى تملا عينكم انا بتكامل خروفاتي الولادات ديل ساااااااااااااي - قالوا لى شكيناك على الله انت داير لك سبب بس .

الطيب أخوي

صنفتنا ناس بندر ,,,,, قلنا ســمــح

عملنا ليك حناكيش عدييييييييل كده وسمينا

ليك النعجة خروفة عشان تضحك ضحكتك الحلوة دي !!!

أدام الله عليك نعمة الابتسام والضحك المزقزق

Post: #55
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: abubakr
Date: 11-22-2006, 10:09 AM
Parent: #1

ياعم فاروق ات ما بتوب
Quote: ما أستثمر تاني إلا في "الخروفات"....

يضحك عليك العريبي دية-ودشيقوق- ؟؟ اكان الخروفات البحبهن الطيب بسون بيزات شن جابو سوق الاسهم وكمان في الجزيرة العربية ..؟؟
اوعك من ناس ديل ؟؟ بيحلفو طلاق ساي لحد ما ميدان سعد قشرة حلف بالطلاق تاني ما يخلي خروفات تتباعن فيهو ....؟؟؟

Post: #56
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-22-2006, 10:35 AM
Parent: #55

Quote: يضحك عليك العريبي دية-ودشيقوق- ؟؟

الشئ ما بتخليني ادودروا ليك على الخلاء شوية نشوف مخلايتو فيها شنو للضان .

إت هسه جيت تحامي ليهو انا من امس عرفت في سرارة لكن بعيدة بينك وبينه يا بكري

دحين في عزاء في المنبر الحقوهو ما تتلوموا وما تفرزوا تغشوا القوم و عكاكيزكم المضببة في إبطيكم وتتقدموا قدااااااااام لحدى نفسكم يبقى مع نفس اهل الميت وتصيحوا بصوت عالي (الفاتحة الفاتحة) ما تسووها فاتحت الهوين نيّة ومرخية .

Post: #57
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-22-2006, 12:23 PM
Parent: #56

Quote: وتتقدموا قدااااااااام لحدى نفسكم يبقى مع نفس اهل الميت وتصيحوا بصوت عالي (الفاتحة الفاتحة) ما تسووها فاتحت الهوين نيّة ومرخية .

أخواني الطيب وأبوبكر

انتو ما عايزين تخشو بوست أرشحني أنـــــــــا ملكا ليه

البوست عامله ليكم مخسوس

الطيب ذكرتني عمنا الجموعي الجا يعزي وباب بيت العزا

قصير ... وهو بكورك قبل ما يصل الباب الفاتحة ..الفاتحة.. ولما

وصل الباب ما حنى راسه ..فدقسه دقسة شينه خلاس .. الضربة حارقاه

شديد لكن ما قادر يمسك راسه فلما دخل كان شبه دايخ قال ليهم الفاتحة

وهوبعاين لأهل العزا في عيونهم .. الفاتحة الت .... الحيين على الميتين

Post: #58
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-22-2006, 01:12 PM
Parent: #57

Quote: الت ....

وووووووووووووووب ووووووووووب وووووووووووووووووووووب ووووووووووووووووووووووووب يا الفاروق الله يمسخك

بوستيك بتاع الترشيح بذكرني مساجد انصار السنة الببنوها مكايدة ومضاررة جنب مساجد اهلنا في السودان ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

Post: #59
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-22-2006, 02:12 PM
Parent: #58

Quote: بوستيك بتاع الترشيح بذكرني مساجد انصار السنة الببنوها مكايدة ومضاررة جنب مساجد اهلنا في السودان ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

طيب ما تخش تقول كلمتين حلوين ... ان شاء الله تقول أنا

Post: #60
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-22-2006, 06:38 PM
Parent: #59

Quote: والجاتَك في مالك سامحتك يا فاروق يا اخوي...

كل الشكر لك يا ابوالحسين على نبلك واحساسك الرائع بالآخرين ...

لك كل الود

Post: #61
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-23-2006, 00:18 AM
Parent: #60

Quote: طيب ما تخش تقول كلمتين حلوين ... ان شاء الله تقول أنا

انا كان مشيت بترشح ذاتي يا الفاروق .

Post: #62
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-23-2006, 01:04 AM
Parent: #61

Quote: ( ما تقول هي سبب بلاك نحن بس بنبني ونبيع اما الاسهم دي ما عندنا صلة بيها )

يا سلام على منو دى هو نحن الجابنا نتعلم البورصات غير حركات اولاد البندر شنو . إنتو قايلين نحن لسه بنصرصر في غنمنا ونملح في ابلنا ونتلقى عجولنا ما يرضعن في العصريات . هو يا باش نحن بقينا بنعرف ال Insider trading and the insiders` information as well

انت طالما موظف في هذه الشركة ليك علاقة مباشرة بالورقة المالية لانك بتعرف اسرارها كلها متى يشتروها ومتى يبيعوها .

الفاروق الزول خماك حاسب

Post: #63
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-23-2006, 01:56 AM
Parent: #62

Quote: انا كان مشيت بترشح ذاتي يا الفاروق .

والله أنا عايزك تترشح ... على الأقل أنت رجل سوي وشيخ

عرب وودبلد وليس مريضا بعقد تضخم الذات والنرجسية وهاكم

شوفوني.... وبتحب أم عيالك لغاية حسع رغم انك متزوج من

خمسين سنة وخاطب من أيام الحكم الذاتي عندما كان شيخ أبوسن

وزيرا للشؤون الاجتماعية... وطلعت فريد كان ملازم ....

Post: #64
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-23-2006, 03:14 AM
Parent: #63

Quote: والله أنا عايزك تترشح ... على الأقل أنت رجل سوي وشيخ

عرب وودبلد وليس مريضا بعقد تضخم الذات والنرجسية وهاكم

شوفوني.... وبتحب أم عيالك لغاية حسع رغم انك متزوج من

الفاروق اخوى هى لكن عرسوها لى ابوى وعمى زمااااااااااااااااان وهدية ورضية وعاشت معاى وعشت معاها زمنا ده كلوووو يا الفاروق وجابت لي عشرة 7 اولاد و3 بنوت هسه ما بتعرف الابو من الولد الحمد لله . واولادها نجاض فيهم الديزاينر بتاع الكمبيوتر وفاتح لو محل في في ام درمان بصلح لاولاد البندر الحاسوب وفيهم ضابط العمليات الجوية في سودانير بيضع البلانس لطيران ناس البندر عشان يحوموا في الدنيا ام بناين قش وفيهم ثلاثة غير ديل واحد علوم جامعة الخرطوم وواحدة كمبيوتر علوم التقانة وواحد ادراة اعمال في جامعة السودان والحمد لله .
بتاعة ادارة الاعمال دى دخلت جديدة ومستهبلة ( الله يكفيها شر اولاد البندر) وعاجباها الكليمة بتاعة بنات البندر البيقولن بلهجة البندر ( انا بقرأ ادارة اعمال ) وقالت لى انا يا ابوى حالفة الحق ليك حد الكليمة البتفلهمن بيها دى .

والله يا الفاروق العرب رحلتهم انا من البادية وبنيت ليهم في ام درمان بعد شهر من رحلوا البندر جيت لقيت اولاد البندر واقفين صف في بيتي شايلين حديد قلت ليهم ده شنو قالوا ديل اولاد الحى جايين للحاج ولدك يصلح ليهم البلي استيشنات بتاعاتهم ووووووووب الله يكفيهم العين والحاج عمره 10 سنة شوف من تك للمفك .

زمان الفاروق كنت محامي في السوكى وفي سكرتيرة حبتني شدييييد وانا حبيتها شديييييد وام اولادى سمعت بالكلام ده وجات بعكازها للمكتب وانا بعاين سااااااااااااى قالت للسكرتيرة انا سامعة بامورك او عاك امشى العبي بعيد من النار الطيب ده انا مش حبيتو انا ربيتو بضراعي ده لحدى بقى الطيب المحامي الحلو العجبك ده .

بواصل ليك محنها يا الفاروق خليك معاى

Post: #65
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-23-2006, 03:37 AM
Parent: #64

Quote: زمان الفاروق كنت محامي في السوكى وفي سكرتيرة حبتني شدييييد وانا حبيتها شديييييد وام اولادى سمعت بالكلام ده وجات بعكازها للمكتب وانا بعاين سااااااااااااى قالت للسكرتيرة انا سامعة بامورك او عاك امشى العبي بعيد من النار الطيب ده انا مش حبيتو انا ربيتو بضراعي ده لحدى بقى الطيب المحامي الحلو العجبك ده .

ما خلاس يا الطيب تبنا بقينا ناس استثمارات بهم و(خراريف) زي مابقولوا

الشوام والحليفة بعد ده طلق وحرم سااااااااااااي لي الله !!!!!!!

أها علي بالطلاق مرتك دي أضكر مرة وحرم إت ألذ سوداني في التاريخ ,,,,,

Post: #66
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-23-2006, 04:06 AM
Parent: #65

Quote: أها علي بالطلاق مرتك دي أضكر مرة وحرم إت ألذ سوداني في التاريخ ,,,,,

لا حرم حواء والدة يا اخوى

كنا في القرية وايام كنت محامي بمشى وبجيها كل خميس . يا زول رحلتها المدينة هى عربية طويلة وفارعة والعرب كلهم بينزلوا عندها عندما يجوا للدكتور وناس المدينة بتفرجوا ساى في الضيوف البيجوا بيت الطيب والواحد يدرع رسن الجمل في عمود الكهرباء والجمل بمد رقبته بياكل الجهنمى والفايكس بتاع ناس المرتضى الحكيت ليك عنو زمان والناس بيجوا بيشكوا لى عربك ضرونا الله يضرهم يا الطيب . ومرة طلع واحد من الجيران نبز العرب ما فرق معاهم كتير النبز ده . اها قام قال للعربي انشاء بهائمك بابي دميعة يعدمها الواحدة . والله الفاروق يا اخوى العربي الحي كله ما حجزوا سالي سكينو وجاري وره زول البندر الناس كلها تتفرج في ضيف الطيب .

Post: #67
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: أبوبكر حسن خليفة حسن
Date: 11-24-2006, 07:33 AM
Parent: #1

عمنا الأستاذ فاروق ...
معوضين إن شاء الله .

دخولنا نحن الفقراء مع هوامير السوق أشبه بدخول معركة بسيوف من خشب مع الإمبراطورية الأمريكية , وإن كنا لسنا بإرهابيين ؟! غير أن البعوضة قد تدمي مقلة الأسد !! كما أن ضئالتنا في السوق قد تصبح لنا مصدر قوة من حيث يصعب رويتنا بالعين المجردة , مما يسهل علينا الدخول والخروج وقت ما نريد .. يعني المضاربة ما في متلها مكسب قليل أو خسارة قليلة في وقت ذبذبة السوق وعدم استقراره . وقد اتضح جليا بمراجعة الأعوام القليلة الماضية للسوق السعودي مثلا ان ضعف الاستقرار لضعف الشفافية في الإدارة وجشع صناع السوق والكم الهائل من الخوف إن لم نقل الغباء الذي يتمتع به المضارب والمستثمر العادي في السوق السعودي , وهوامير السوق نجحوا لئن صغار السوق يستجيبوا لضغوطات الكبار دون أدنى مقاومة وعلى طوووووول ... ودي المسألة النفسية البعول عليها الكبار , وفي الحقيقة لم يكتشفوا ـ إلى الآن ـ طريقة أنجع وأسرع لشفط ممتلكات الصغار تضاهي هذا الاكتشاف ؟! شفت عالمنا قذر في معظم ضروب الحياة وإلى أي درجة ...
أنا ما عارف محافظكم كيف تدار ؟! إن كانت هي قيمة أسهم انهارت فيجب عليكم الحفاظ على عدد الأسهم , فحتما سوق تعود ... وأقولك كما هو دارج لدينا هذه الأيام ( الله أفك تعليقتك وتعليقت كل متعلق !! )

أبوبكر

Post: #68
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: abubakr
Date: 11-24-2006, 08:07 AM
Parent: #1

اها الفاروق والطيب ..وزعتوني لشغل السياسة ومنو يبقي رئيس ؟؟ومرضبيين بجاي مع قصص حب السكرتيرات والعربات الفارهة الطويلة ؟؟ يالفارووق ماهم ناس الطيب كجورات سوق الاسهم هم السحبو دراهمك الانت فاتح بيها ماتم ولا ماتم الشيعة بي هنا فيها كل حاجة صلوات ودعوات وملاعب وسوق وزواج ...
ات بتصدق كلام العريبي دة ؟؟ سكرتيرة شنو الما عندها نظر تحب ليها ابوعشرة؟

يافاروق اها المرة دي شوية اسهم وراحت المرة الجاية لو باريت ناس سوق المناخ والاسهم وناس الطيب حاجات كتير بتروح وانا لازم اسجل زيارة الي ابوظبي عشان انور ام ناصر عن قعدتك الطويلة ملصق في شاشه الكومبيوتر دي ؟؟
قال سكرتيرة تحبني قال....
دحين ابوعشرة يجيبو ليه خرتوشات من وين؟ دي صناعة انتهت ...

Post: #69
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-24-2006, 09:54 AM
Parent: #68

الأبكرات والطيبون أصبروا لي بجيكم المرة بدور الكمبيوتر

واللاي نهرة الجعلي حارة حرورية الله لا ضوقكم ليها

Post: #70
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: abubakr
Date: 11-24-2006, 10:22 AM
Parent: #69

يالفاروق ما سمعت برامي الحدق الكان منصف جدا يسال العريب اي العينيين يوجه اليهما نشابه ؟؟؟ اننا جد منصفيين

ومن الانصاف دعوتكم الي:
من مدونتي : عن المكتوبجي وحلاق القرية - تفاديا للمطبات

من مدونتي : عن المكتوبجي وحلاق القرية - تفاديا للمطبات

Post: #71
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-24-2006, 10:58 AM
Parent: #70

Quote: ات بتصدق كلام العريبي دة ؟؟ سكرتيرة شنو الما عندها نظر تحب ليها ابوعشرة؟

وووووووووووووب دى مفاهيم سادت ثم بادت عمرك كلوووووووو في الهملة متغرب ما تستاهل الفات عليك كتير حت بقيت (راجل المرة حلوووووووووووووووو حلاة) ما بتعرفها

شوفوا يا اخونا من اليوم ده اى راجل بتشاركو المرة او الوليدات في الكمبيوتر ما يجينا . رجعوا النسوان اهلن ابقوا عذابة زي كده لا نمشى الفير ولا كلفور ومحل ماشى تدرع عمتك وتقلع في ثواني مش يعملوا ليك تحكحك ومكياجات تضيع ليك زمن يكتّبك 10 بوستات .

Post: #72
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: abubakr
Date: 11-24-2006, 11:04 AM
Parent: #1

Quote: وووووووووووووب دى مفاهيم سادت ثم بادت عمرك كلوووووووو في الهملة متغرب ما تستاهل الفات عليك كتير حت بقيت (راجل المرة حلوووووووووووووووو حلاة) ما بتعرفها

اكان حت زي دة .. اها طرفنا منو خليناهو ليك ...

Post: #73
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-24-2006, 12:13 PM
Parent: #72

Quote:
يافاروق اها المرة دي شوية اسهم وراحت المرة الجاية لو باريت ناس سوق المناخ والاسهم وناس الطيب حاجات كتير بتروح وانا لازم اسجل زيارة الي ابوظبي عشان انور ام ناصر عن قعدتك الطويلة ملصق في شاشه الكومبيوتر دي ؟؟

الفتنة نائمة لعن الله من أيقظها

والفتان ربنا حيدخلوا النار

Post: #74
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: الطيب شيقوق
Date: 11-24-2006, 12:56 PM
Parent: #73

الفاروق عليك الله الحق بت طلحة شوف شكرها ليك كيف وحالفة تقطع فيك قصيدة الحقها هناك في بوست اهل الفضل والاحسان .

Post: #75
Title: Re: لله ما أعطى ولله ما أخذ !!!!!!!!!!!!!! ؟؟؟؟؟؟؟؟؟؟؟؟
Author: فاروق حامد محمد
Date: 11-24-2006, 03:56 PM
Parent: #74

Quote: أنا ما عارف محافظكم كيف تدار ؟! إن كانت هي قيمة أسهم انهارت فيجب عليكم الحفاظ على عدد الأسهم , فحتما سوق تعود ... وأقولك كما هو دارج لدينا هذه الأيام ( الله أفك تعليقتك وتعليقت كل متعلق !! )

أبوبكر

ابن أخي أبوبكر حسن خليفة

برغم انهيار أسعار الأسهم عندنا في الامارات

الا إن الضربة جاءتني من عندكم من السعودية

فقد ضارب موكلي في الأسهم السعودية... والله لولا

إن هناك قبلة المسلمين والحرمين الشريفين ومثوى

الرسول صلى الله عليه وسلم لقاطعت المملكة كلها...!!!