Post: #1 Title: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-11-2007, 09:03 AM Parent: #0
جمعة مباركة يا أمة الأمجاد ويسعد صباحكم بالبخير والبركة ,,,
وياجماعة الخير والله أنا في حاجة محيراني شديد خلاس من ما كنت صغيرة في أوائل القرن الماضي طبعا حتستغربوا في أوائل القرن الماضي دي لكن عشان الشمشرة وتفكيركم ما يمشي لي بعيد وتقولو أتاريها خاتة لينا صورة من سنة دو بقول ليكم يعني الأحداث المريت بيها على الصعيدين العام والخاص خلتني أشعر إني عشت أكتر من مية سنة كدة ! و نرجع للسؤال المحيرني عشان ما أكون إنصرافية كالعادة السؤال هو ليه نحنا من دون خلق الله بنحب الفشخرة والبوبار يعني ما في شعب تفوق علينا في الحكاية دي إلا اللبنانيين تلقى الواحد لابس ساعة رولكس وسايق سيارة همر آخر موديل وقميص من بيير كاردان وعطر من كريستيان لا كروا وساكن في فيلا بي 150 الف درهم وهو ما شغال كمان نحن مع اختلاف بسيط نفس الشيء يعني بتذكر زمان لمن كنا في المرحلة المتوسطة طلع توب إسمه المضغوط وهو زي ما بقولو سيلف ديزاين وكان غالي شوية في زماناته لكن جارتنا كانت مصرة تشتريه وتتبوبر قدام الناس قأمت أمي قالت ليها أولادك أولى من التوب قامت ردت عليها بسرعة وقالت ليها والله ما في أي مشكلة ناكل الشرموط ونلبس المضغوط وفي يوم من الأيام حصلت شكلة بين الجارة دي وجارة تانية مغيوظة من توب المضغوط اللابساه وهي عدمانة التعريفة قامت الجارة الغيرانة قالت ليها هووووووووي يااختي ألزمي حدودك وخلي البوبار وغز الأريال فوق بيت الإيجار أجي يا يمة عاين غز الكوع الفي الجوع وأنا من اليوم داك بقيت أرصد في حركة البوبار وسط المجتمع السوداني وقررت أعمل ماجستير ودكتوراة في هذه الظاهرة التي انتقلت معنا إلى دول المهجر بسبب جهلنا وغبانا يعني هسة لو مشيت السجن المركزي تلقى كل السودانيين الفي السجن سببهم شيكات طايرة لزوم الفشخرة المرة ماشة الإجازة عايزة دهب جديد بالشي الفلاني وتياب آخر موضة عشان تغيظ أهل راجلها وبعدين الراجل اللي لا يهش ولا ينش ينفذ كل الطلبات بحذاقيرها وتبقى سلفية ورا سلفية لامن يقوم البنك أو الجهة المستلمة الشيك توديه آخر عبس وهنا يا جماعة الخير في آلاف البنوك يطاردوك بالليل والنهار ويقلقو نومك وراحتك شي مسجات وشي تلفونات وشي إيميلات يقولو ليك بنديك سلفية عشرة اضعاف الراتب أو ماستر كارد عشرين ضعف الرد و معاه عروض أخرى يسيل لها اللعاب وبعدين أول ما تتأخر عن تسديد أي دفعة يسلموك الشرطة عشان معاهم شيكاتك ,, عشان كدة تلقى السجون مليانة بالمخدوعين والجرايد ياما كتبت وحذرت لكن نحنا السودانيين بنحب الدين والدفع بعدين وبنحب البوبار وغز الدش فوق بيت الإيجار أنا غايتو كل ما أرحل لشقة جديدة بخلي الدش هناك وأجي أركب واحد جديد وفي آخر مرة رحلت فيها قبل سبع سنوات ركبت دش جديد ولما اتذكرت البوبار وغز الدش فوق بيت الإيجار قمت قلعتو طوالي وهديت الرسيفر لصاحبتي وركبت بدله e vision ودة زي التلفون بتركبو ليك شركةالهاتف وبتدفع شهري المهم يا أمة الأمجاد البوبار كتير وخشم بيوت يعني في نسوان لامن يعرسو لأولادهم و لا بناتهم لزوم البوبار ياخدو سلفية ويجيبو ليك سامي المغربي من أمريكا و جمال فرفور من السودان ومعاهم قسمة وفرقتها لزوم رقيص العروس وطبعا قسومة دي عندها طلبات وشروط لازم تنفذ أولها شقة مفروشة لزوم الفرقة المصاحبة لكوكب الشرق وحق التعليم والرقيص بالدولار وهسة باليورو بعد ما البشير لحق الدولار أمات طه وبعدين في نقطة لزوم الشو في أثناء رقيص العروس ولزوم البوبار تجد النقطة مختلفة ومتباينة يعني تقوم واحدة من نسوان ما يسمون بالمجتمع المخملي تنقط بي خاتم سولوتير تجي واحدة من نفس المجتمع تنقط بي غويشة أحفظ مالك وهكذا يكون رزق المجانين على الهبل وبعدين في نوع جديد من البوبار الأيام دي تلقى الواحدة البكون شعرها طويل جدا بتطلعوا في الحفلة بي برة لي توب الحرير الما خمج وتكشف راسها كأنها عايزة ترقص وهاك يا حوامة وسط الناس مع إنها معرسة ومتموم حلوها لاكين لزوم البوبار بالشعر أنا غايتو عشان شعري طولو سنتي متر ونصف بقوم أطبق المثل المصري البقول القرعة بتقول شعر بنت أختي والحمدلله بت أختي شعرها أطول من فستانها وهي كمان بسم الله ما شاء الله حلوة وعسل وبيضا ودي عقدتنا بقوم أقول ليها رايك شنو يا ولاء تجي معاي الحفلة وهي طبعا بت مؤدبة لامن غلط تقوم تقول لي إنت ياخالتو عارفة أنا ما بحب الحفلات ( الله عايزة تفشلني المفعوصة ) أسمعي ياولوية كل صاحباتك الحناكيش جايات هناك بنات د. محاسن و بنات فاروق حامد وبنات وبنات .. خلاص يا خالتو أمري لله حأجي عشانك !! طيب عندي طلب بسيط ,,, شنو يا خالتو ؟ تفكي شعرك يا عبيطة شوية مش لافاه لي كعكة السنة كلها !! خالتو !!! إنتي عارفاني ما بحب أفك شعري ( البت دي مالها متعبة كدي ) ولوية فكيه عشاني إنت شايفة الناس في المناسبات بطلعو أجمل شيء عندهم !! طيب يا خالتو عشان خاطرك ,,, و فعلا نمشي الحفلة ونقعد في الكراسي وكلو شوية أعاين للمعازيم ولي شعر ولاء وفجأة قبل الحفلة ما تبدا والناس يجو كلهم أتلفت وألقى ليك ولاء رجعت لي قديمة ولفت شعرها كعكة و حرمتني من البوبار وغز الدش فوق بيت الإيجار ,, وفتكم بعافية ,,,
Post: #2 Title: Re: البوبار ... وغز الدش فوق بيت الإيجار !!!! Author: طلال عفيفي Date: 05-11-2007, 09:30 AM Parent: #1
الله يعافيكي
والله يا عواطف كتابه لذيذه ...
وحيث ذلك ، تحياتنا لولاء
Post: #3 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-11-2007, 09:41 AM Parent: #2
أخي الحبيب طلال !!!
معزتي ,, وإعجابي الشديد بفنك الجميل ( كتابة ,, تصوير إلخ )
والله يا طلال البوبار في الخليج بقى مرض عديل كدة يعني الواحد عشان مرتو تتبوبر قدام الناس مستعد
يمشي يزور خالتو زي ما بقولو المصريين للواحد البخش السجن ,, شكرا طلال على طلتك البهية ,,,
Post: #4 Title: Re: البوبار ... وغز الدش فوق بيت الإيجار !!!! Author: نهال الطيب Date: 05-11-2007, 10:35 AM Parent: #3
ست عواطف يا حبيبة والله العظيم عاد انا البوبار غايظني وقاطع لي قلبي كيف أنتي عارفة في ناس بتتفشخر بالكذب والله العظيم انا مستغربة يعني يكذبوا عشان يظهروا حتى الظهور اريته لوفي حاجة كويسة غايتو جنس عالم مرة زولة كده حالتها صعبة قالت لي والله انا سمحة جنس سماحة وكان شفتي القشرة الكنت فيها طبعا انا ما عرفت أضحك ولا اعمل شنو قلت ليها والله تمام ربنا يزيدك
مودتي
Post: #5 Title: Re: البوبار ... وغز الدش فوق بيت الإيجار !!!! Author: محمد المختار الزيادى Date: 05-11-2007, 10:58 AM Parent: #4
ربنا يزيدها شنو يا نهال سماحه ولا فشخره وبوبار يمكن العتب علي مرايتها تحياتي
Post: #6 Title: Re: البوبار ... وغز الدش فوق بيت الإيجار !!!! Author: محمد المختار الزيادى Date: 05-11-2007, 10:58 AM Parent: #4
ربنا يزيدها شنو يا نهال سماحه ولا فشخره وبوبار يمكن العتب علي مرايتها تحياتي
Post: #18 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 06:59 AM Parent: #4
نهولة يا أحلى زولة !!!
ودي ,,,
رغم عمرك الصغير عندك الكثير من النماذج المحيرة تصوري إني معجبة جدا بهذه النماذج التي تطرحينها
في المنبر ,,, تصدقي في واحدة ماخدة مقلب في روحها تقول ليك أنا لم كنت في الجامعة كنت بوقف
الحركةعديل كدة وهي ما عنده مسحة من الجمال قلت ليها يعني ما كان في شرطي مرور في شارع
الجامعة !!!
Post: #62 Title: Re: البوبار ... وغز الدش فوق بيت الإيجار !!!! Author: سيف الدين مصطفى كرار Date: 05-13-2007, 05:33 PM Parent: #3
مجتمعنا السودانى مجتمع يشبه الرمال المتحركة كثير الفوران و التقلبات خاصة
مع تغير الظروف التى تتحكم فى حراك المجتمع ! السياسية و الإجتماعية و كغيره
من مجتمعات العالم الثالث يتأثر كثيرا بما يراه و يسمعه و بعد الثورة التقنية
الأخير و خاصة مجال الميديا و الإتصالات إذدادت درجة التأثر والتقليد الأعمى لبعض
ما يحدث فى مجتمعات لا تشبه مجتمعاتنا فى أى شئ و لكن تظل تؤثر على طريقة لبسنا
وحديثنا و تفكيرنا ! إذا نظرت لناس البوبار الكتار كما قال الفنان كل على حده
غالبا ما تجد العلّة أو مركب النقص واضحا أو مكشوفا و فد تصل بالبعض إلى درجة
مرضية تحتاج العلاج و الدواء !! الظاهرة ليست جديدة و لكنها تتطور مع المستجدات
والأحداث و الموضة فى مختلف الأمور و يبقى البوبار و اضح و عادة تجذب أنظار الناس
و فى بعض الأحيان يكون هذا هو المطلوب إثباته نفسه لأصحاب تلك العادة أنفسهم !!
التواضع صفة جميلة و الكثيرين تنقصهم حتى وإن إمتلكوا كل الأسباب التى تجعلهم
ممن يعتقد البعض ان من حقهم أن يتبوبروا و يتبوبرن (اى بحقهم كما يقال) أما ناس
البوبار الفى الفاضى و التقليد فيجب النظر إليهم و هذا ما يحدث بعين الشفقة فهم
مرضى شفاهم الله, فى النهاية كل هذه الأشياء تنشأ مع الناس و طريقة تربيتهم فمن هناك
تبدأ المشكلة, المغتربون و المهاجرين ذهبوا لمجتمعاتهم الجديدة حاملين معهم بعض
العادات والظواهر الضارة و السيئة معهم و إستثمروا كل الأمكانيات المتاحة و غير
المتاحة فأوصلتهم إلى حيث يصعب الرجوع !! عذرا لقولى هذا ولكن المرأة السودانيه
يسهل عليها جدا أن تتخلى عن مفاهيمها و علمها و خلفياتها و تصبح عبارة عن مقلدة
و مجارية لكل ما هو خطأ و أنا هنا أتحدث عمن تعلمن و عملن و عركن الحياة أما من
لم يحدث معهن ذلك أى من لم ينلن القسط الكافى فلا لوم و لا تثريب وخاصة أنهن لا يعلمن
تماما كيف هى الضغوط و المشاكل التى تصاحب العمل و كسب العيش الكريم فى بلد ما بلدك !
* رافقتنى فى إحدى الرحلات إلى الوطن سيدتان واحدة مقيمة فى الخارج و أخرى جاءت لتجهيز
بنتها للزواج و الأولى المقيمة خارجا كانت أيضا ذاهبة لتزويج بنتها! لن أستطيع أن أحكي هنا عن
تلك الخطط الخيالية لصرف الملايين و كيف أن الأمر لا يعدو كونة ناس فلانة عملو كدة وما عملوا
كده وبقية التفاصيل المملّة فى إختيار الأماكن و الفنانات و الفنانين و عدد المرات التى يجب
أن يحضر فيها أهل العريس إليهم ويوم سد المال و قولة الخير العقد و الحنة و الجرتق و يوم
الصبحية كان واضحا أن تعليمهن و ثقافتهن لا جدال فيهاللأسف الشديد.
Post: #8 Title: Re: البوبار ... وغز الدش فوق بيت الإيجار !!!! Author: نجوان Date: 05-11-2007, 12:42 PM Parent: #7
سلام يا عواطف.. أوافقك الراي..
لكن الغريبة رغم مرضة البوبار دي..still ما بنعرف نلبس أو نلبّس عيالنا.. ناكل.. ولا نعمل أي شئ خاص بالمظهر صح.. الشتارة كما هي.. مع البوبار أو بدونه.. معظم السودانيين والسودانيات بياخدوا زيرو كبير فيما يختص بالمظهر.. ما عارفة دخول السجون ده في إيه بالضبط..
إزدواجية محيّرة.. _________
وعن الدش في بيت الإيجار.. الناس في السابق كانت توّفر لشراء بيت.. قطعة ارض والبُنا.. كما فعل الكثيرون.. لكن الآن التوفير ابعد ما يكون عن تحقيق ولو جزء من الحلم.. لذا إقتنع من إقتنع بمتع الحياة الصغيرة.. من دش.. موبايل.. إنترنت.. وغيرها...
Post: #20 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:17 AM Parent: #8
نجوان يا ست الحسان !!!
مرورك الجميل يسعد الخاطر ,, كل ما ورد في مداخلتك صحيح بنسبة 200% خصوصا في حكاية البهدلة وتواضع
الأحلام والكسل اللي ما ليه أول ولا آخر ,, البوبار والفشخرة نحنا أسيادة لكن في الفارغة وليس
المليانة أمبارح كنا في حفلة عرس وعينك ما تشوفش إلا النور ناس بوبار وناس بهدلة في اللبس والرقاش
البتحتة في الكراسي غايتو ناس الصالة تعبوا معنا ,,, لكي حبي ,, بالمناسبة كباية الشاي الفي ملفك تعدل المزاج ...
Post: #78 Title: Re: البوبار ... وغز الدش فوق بيت الإيجار !!!! Author: ابوعبيدة حسن محمد Date: 05-15-2007, 08:26 AM Parent: #8
Quote:
لكن الغريبة رغم مرضة البوبار دي..still ما بنعرف نلبس أو نلبّس عيالنا.. ناكل.. ولا نعمل أي شئ خاص بالمظهر صح.. الشتارة كما هي.. مع البوبار أو بدونه.. معظم السودانيين والسودانيات بياخدوا زيرو كبير فيما يختص بالمظهر.. ما عارفة دخول السجون ده في إيه بالضبط..
إزدواجية محيّرة..
Post: #11 Title: Re: البوبار ... وغز الدش فوق بيت الإيجار !!!! Author: هاشم أحمد خلف الله Date: 05-11-2007, 12:57 PM Parent: #7
عطوووووووفة كعادتك دائماً تعكسي لنا صورة المجتمع السوداني بكل جوانبه وأتمني أتمني أن يكون هذا
البوست في ميزان حسناتك وأتمني وأتمني أن يتفهم المتداخلين والقارئين لهذا البوست أهمية أن يكون
الإنسان راضي بواقعه وأن لا يقحم نفسه في المتاهات والمتاهات خشم بيوت , زمان أتذكر مثل مصري
بيقول مد رجليك علي قدر لحافك والله هذا المثل فيهو موعظة ما بعدها من موعظة , يعني شنو لو المرة
لبست توب أخر موديل ؟ هل حا يزيد من جمالها الشئي الكثير ولا بس مجرد شوفوني أنا كيف ؟؟ !!!
وحتي لو إفترضنا هذا التوب المكلف كذا ريال زاد في جمالها الكثير أها وبعدين !! ما في النهاية
المسكين الزوج بكره راجيه الإيجار وفاتورة الكهرباء والتلفون وتحويل مصاريف لاهله أو أولاده إذا
كانوا يدرسون في الجامعات في السودان أو خارجه .
العقلانية شئ مهم ومحبب للنفس ومفروض الإنسان قبل أن يقدم علي عمل متهور يراجع حساباته وبعدين
يعمل ما يلزم والله من وراء القصد .
Post: #21 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:30 AM Parent: #11
هشوووووووووووووووومي !!!
يسعد صباحك ,,,
شكرا لمرورك الأنيق وأنت الصادق ,,, البوبار بقى يودي في ستين داهية خصوصا في دول الخليج عشان
رجلينا دايما أطول من لحافنا وناس شوفوني كتار جدا وطبعا في أغلب الأحوال بكون راسهم فاضي جدا
عموما الله يعينا عليهم ,,
Post: #19 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:04 AM Parent: #7
أيموني !!!
معزتي ,,, وخالص شكري لمداخلتك الثرة التي أسعدتني كثير وزي ما قال شاعر أغنية عوض دكام كان جينا
للبوبار تلقى ناسو كتار أما بوبار الأعراس فدة حاجة تانية خالص خليها على الله لو كتبنا عنو حيقولو
علينا حاسدين ,,, شكرا لمرورك الجميل ,,,
Post: #9 Title: Re: البوبار ... وغز الدش فوق بيت الإيجار !!!! Author: Abdelmuhsin Said Date: 05-11-2007, 12:47 PM Parent: #1
هذا.. وسيصل الجثمان
كانت تبكي وتتمرغ بالأرض وتضرب رأسها بالحائط وهي تصيح في إخوانها «لازم تسفروه.. لازم تسفروه.. الليلة قبل باكر... في أقرب طائرة.. لندن القاهرة عمان. لازم يسافر.. لازم يسافر» انتحى بها إخوانها جانباً وقيل لها يجب أن تهدأ ويجب أن تصبر فالوالد في حالة غيبوبة كما أن المستشفى به نزلاء وزوار لا يصح أن يسمعوها وهي تتهم إخوانها بالتقصير في حق والدها. ثم ثانياً ولمزيد من الصراحة إن الوالد -شفاه الله- قد سافر الى لندن أربع مرات وأُجريت له عدد من العمليات في أشهر المستشفيات وعلى يد إختصاصيين عالميين ولكن الآن الوباء قد استشرى وهو في هذا المستشفى الراقي يعيش بالمحاليل الوريدية «الدربات» ولمدة أربعة شهور.. لكنها لم تقتنع وكانت مُصرة على فكرة السفر وأنه أهون عليها أن تموت قبله إذا كان سيموت في هذا المستشفى.
سألها أخوها الأكبر إن كانت تشك إنهم يريدون وفاته لكي يقتسموا ثروته الطائلة بأعجل ما تيسر فردت بأن هذا لم يخطر على بالها لأنهم أصلاً هم المتصرفون في الثروة ومنذ أعوام خلت، تدخل الأخ الثاني وسألها إن لم تكن قد سمعت رأي الطبيب الكبير في الأمر؟ ألم يقل لهم إن الأعمار بيد الله ولكن حالة السيد الوالد قد تأخرت ولا يوجد أي علاج في أي مكان في الدنيا، فقد وصل السرطان المرحلة الثالثة والأخيرة؟؟ أجابت بالإيجاب ولكنها لدهشتهم أضافت «عشان ما في أمل، عشان الحالة تأخرت أنا دايرة السفر ولو كان في أي أمل في حياة الوالد ما كنت طالبت بالسفر» وأضافت قائلة «كمان أنا عارفه حالتو قد لا تقبل السفر وقد يكون فيها مخاطرة كبيرة لكن عشان كده أنا دايرة السفر» فزاد استغرابهم وطالبوها بأن تكون أكثر وضوحاً فقالت لهم «إنتو أصلكم ما فاهمين حاجة من فضلكم اسمعوا كلامي وبس وما حا تندموا بس سفرو الوالد الآن، اليوم قبل بكرة».
أصروا على موقفهم وأصرت على صياحها ومطلبها والحال هكذا نادت أقربهم إليها وانتحت به جانباً وأخذت بصوت خافت تشرح له وجهة نظرها قائلة «يا جماعة لو كان أبوكم مات في الخرطوم هنا حا يكون محسوب عليكم الناس حا يقولوا أولاد التاجر فلان الفلاني يموت زي الناس العاديين في الخرطوم، أولاده قصروا معاهو ما سفروه عشان يتعالج بره» رد عليها بأن
كل الناس عارفين إن والدهم سافر أكثر من مرة للعلاج في الخارج» فقالت له، يا أخي أصلاً إنت ما سمعت في الراديو أو قريت في الجرائد «هذا وسيصل الجثمان غداً في الطائرة القادمة من لندن أو عمان؟؟» فأجابها بالإيجاب وسألها لكن ماذا يعني هذا فقالت «دا يعني أنو في زول عظيم مات، زول مهم مات، هذا يعني أن كل من له معرفة سوف يركب عربته ويذهب للمطار ويعود مع الجثمان الفي الصندوق مش الكفن بتاع الدبلان الى البيت ومنها الى المقابر يا أخي ما سمعت أنو حاج «فلان» داك تبعت جثمانو (150) عربية والله والله أبوي دا تبراهو خمسمية عربية أشكال وألوان والله زول يمشي بي كرعيهو للمقابر ما في.. والله.. والله ناس الحلة حا يتكلموا بجنازتو عشرة سنين لي قدام والله.. والله أكبر كبير في البلد دي حايجيكم في الفراش والله.. والله بعد دا الناس تعاين ليكم وكأنكم من كوكب تاني يا جماعة لازم تعرفوا
تستثمروا وفاة والدكم كويس».
* قال الراوي «والله أنا ما كنت قايل الحكاية وصلت المرحلة دي».
حاطب ليل
عبد اللطيف البوني
Post: #23 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:36 AM Parent: #9
عبدالمحسن !!!
مداخلتك في صميم الموضوع تصدق مرة أذاعوا واحد مات في لندن والمذيع لمن قال ويصل الجثمان من لندن
يوم غد الثلاثاء قامت واحدة بتسمع في النشرة قالت أجش يا يمة حال السرور أريتة يا يمة ميتة الهنا
والمنى ,,, أها رايك شنو في زي دي !!! محبتي ,,,
Post: #10 Title: Re: البوبار ... وغز الدش فوق بيت الإيجار !!!! Author: Elmosley Date: 05-11-2007, 12:55 PM Parent: #1
عواطف ادريس ارجو اضافتي للمعجبين بماتكتبين ===================== نرفض تشويه التراث البوبار وغز الاريل في بيت الايجار
Post: #24 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:38 AM Parent: #10
فنانناالكبير الموصلي هنا !!!
يا لسعدي يا للهنا ,,,
مرورك الأنيق يحمل عبق الياسمين ,,,
أرجو تثبيتي على لاحئة المعجبين بفنك ,,,
البوبار وغز الدش في بيت الإيجار لزوم الحداثة !!!
Post: #12 Title: Re: البوبار ... وغز الدش فوق بيت الإيجار !!!! Author: Abdelmuhsin Said Date: 05-11-2007, 01:28 PM Parent: #1
Post: #26 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:50 AM Parent: #14
سلوم !!!
يا سلام عليك يا رائعة !! كاراكتير في الصميم يار يت كل المعنيين بالموضوع يشفوه !!! تسلمي يا
الحبيبة !!!
Post: #25 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:46 AM Parent: #13
سلوم الحبيبة !!!
سعيدة بمكالمتك الرائعة جدا ,, يسعدلي صباحك ,,
بوبار الحنة والدهب في المناسبات يفقعوا المرارة ولو لاحظتي البتبوبرن دايما أنصاف متعلمات ولا علاقة
لهن بما يدور من أحداث ,, يعني لو قلتي للواحدة وين الفلوجة ولا حديثة حتقول ليك في دارفور ولو
قلت ليها توني بلير رئيس وزراء ياتو دولة حتقول ليك السنغال أو ساحل العاج أما سجن جوانتانامو
فتفتكرو في كوريا الشمالية وعجبي !!
Post: #15 Title: Re: البوبار ... وغز الدش فوق بيت الإيجار !!!! Author: sanaa gaffer Date: 05-11-2007, 05:03 PM Parent: #1
يا عطوفة .. سمعتي اخر اخبار البوبار في بلد الدرهم والريال ؟؟؟!!!...
رهن البازابورطات في محلات الدهب لزوم المرة ما تعير حبة غويشات على خواتم وسوارات عشان تمشي الاجازة وتغيظ القرايب والجارات.. اي والله سمعت والعهدة على الراوي انو الزوج المغلوب على امره بيستلم جوازه من مكان ما شغال ومعاهو قروش الاجازة ... تقوم الزوجة تستلم القروش لزوم شراية التياب ولا ( مؤاخذة ) الشباشب والصواني والكبابي وشيالات الخبيز ( لانو دي مافيها عيرية ) وتستلم جواز راجلها وتمشي لزبونها بتاع الدهب ترهن هوية الراجل البتحدد انتماؤه الضعيف للبلد التعبان قصاد الدهيبات لزوم البوبار ...
لمن سمعت الكلام دة فكرت في حاجة واحدة ... اها كان لا قدر الله جا حرامي واتسلط وسرق الدهيبات العايرنها ... شنو مصير الجواز ؟؟ والزوج ؟؟ والشغل ... وشنو مصيرها هي زاتها ؟؟
غايتو مشكلة السودانيين مع البوبار مشكلة ... بس الله يعين ..
Post: #16 Title: Re: البوبار ... وغز الدش فوق بيت الإيجار !!!! Author: عامر تيتاوى Date: 05-12-2007, 00:12 AM Parent: #15
عواطفنا النبيلة سيرة وانفتحت البوبار ضحاياهو كتار
Post: #28 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:58 AM Parent: #16
عموري !!!
محبتي !!!
دي مش سيرة وانفتحت !! دي سيرة وانفضحت ,,, شكرا على مرورك الزاهي ,,
Post: #27 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 07:56 AM Parent: #15
سنوية الجميلة !!!
محبتي ,,,
نورت المنبر يا نوارة المنبر ,,
حكاية الرهن دي ظاهرة قديمة متجددة وياما حصلت فيها مشاكل وبلاوي وكلو بسبب البوبار وغز الكوع الفي
الجوع والله يا سنوية لو جينا نتكلم عن ظاهرة البوبار في بلد الدرهم والريال دي عايزة ملفات وبعدين
في ظاهرة جديدة وهي استئجارالدهب بنسبة معينة لزوم البوبار مع وضع جواز الزوج رهينة أو رهن الدهب
لدفع الإيجار وهكذا دواليك ,,, شكرا سنوية ليك وحشة !!
Post: #17 Title: Re: البوبار ... وغز الدش فوق بيت الإيجار !!!! Author: Ahmed Hamza Date: 05-12-2007, 01:02 AM Parent: #1
الاخت الفاضلة عواطف
Quote: ولما اتذكرت البوبار وغز الدش فوق بيت الإيجار قمت قلعتو طوالي وهديت الرسيفر لصاحبتي وركبت بدله e vision ودة زي التلفون بتركبو ليك شركةالهاتف وبتدفع شهري
يعني انتي حسه عايزة تقولي انك كريمة وعندك e Vision كمان
Just kidding
طبعا دي مشكلة عويصة لكن اتمني انو اجيالنا الجديدة تكون احسن مننا
لك ودي واحترامي
Post: #22 Title: Re: البوبار ... وغز الدش فوق بيت الإيجار !!!! Author: مجدي عبدالرحيم فضل Date: 05-12-2007, 07:33 AM Parent: #17
أختنا الهابشة موضع كل شكوي ونجوي،، الأستاذة
عواطف بت إدريس،،،
الموضوع جيًد بمقياس الهوائي العالي فوق بيت الإيجاااار،،،
أهديك هذة الكلمات بعنوان :الغـــرَبه :
يوم جيتكم قايل فيكم؟ أنتو لافيكم أمل ولارجاء الهم كاسيكم أقبل وين أحكي الوجعه لوتشوف العين وترجع تقول للناس الغربه كذبه ومقلب كبير يدُوش الراس والقلب كمان يعمه يباس وبالقهر ينـــــــــداس تاني يايمه ماتودري وليدك لبره ناس بره أريتم يتبــرو الغربه هم ولوالريال بيتلم؟ أريتو وليد عزة يتلَم وللوطن ينضم يلقي اللَم يشيل معاكي الهم يسيل الدم يروي أرضك الطيبة جمَ أريت الراحة تطير بغربة الهم نعيش سعادة الفريق بنور لمبه وعيالنا يأكلوا من نخيلك التمره دي الراحة يايمه هناك معاكي بسمع يابه ويمه وحلاة اللمه بالكسرة الشريفة نتحاشي غربة الدراهم الزائفة بتعب وشقي نتعايش في بلدنا الخيره لينا كايس وفي الغربه أجسامنا تتيابس ومصيرنا نرجع ياوطن من تاني وتعود لينا الأماني وجمع حباني ونلاقي الآمال تصافينا وفي كنف عزة تسامرنا وتسامحنا وتبشرنا بفرح العـــــــــــــــــــــــــــوده.
Post: #30 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 08:06 AM Parent: #22
أبوقصي !!!
يا اللي مش زي زي ولا أي أي !!
والله قصيدة من العيار التقيل والعيار الما بصيب بيدوش ,, بتصدق معظم الجنسيات بتكون عندها خطة
محددة للغربة إلا نحنا نقعد نتبوبر ونتفشخر ولما يفنشو الراجل تعال شوف البكا والعويل على نهاية
الخدمة اللي بتمشي للسلفية ,, شكر مجودي مرورك يسعد القلب ويشرح الخاطر !!
Post: #32 Title: Re: البوبار ... وغز الدش فوق بيت الإيجار !!!! Author: ابوحراز Date: 05-12-2007, 08:40 AM Parent: #22
تحية سبق أن كتبت بوستاً بعنوان { فشخرة المراة السودانية } يبدو لي أنه في الأرشيف لكن الذي حيرني في اجازتي الأخيرة للسودان حضرت اربع نساء الى منزلنا وطلبن مني توصيلهن مشوار طبعا { ملح } للأسف لأن السيارة خاصة وهي افراج من السعودية ذاهبات لأركويت وهو نفس الحي الذي نسكن فيه اول ماركبن معي سألتهن : ماشات وين ؟؟ ماشين لي { فايزة بوبار } !!!!! طبعاً ضحكت كثيراً ولأنهن يعرفنني جيداً أنني ساخر فقلت لهن : ليه سميتوها فايزة بوبار ؟؟ فقالت احداهن وهي اكثرهن غلظة لكنها تخاف من سخريتي فقالت لي : لأن زوجها كان بوبار عشان كده سموها فايزة بوبار ؟؟ طيب ياجماعة ليه ماتقولوا ماشين بيت عبد العاطي بوبار !!! الحكاية دي ذكرتني طفل ضرب أخوه الأصغر قالوا ليه : ليه ضربت اخوك الصغير ؟؟ قام قال ليهم : ضربتو والله لأني ماشايفو !!!!
Post: #33 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 09:13 AM Parent: #32
أبوحراز !!!
محبتي ,,,
مداخلتك ظريفة جدا أما حكاية البوبار دي فقصة عجيبة شديد ويبدو إنو ماليها حل أبدا خصوصاوإنو
ناسو بقوا كتار زي ما بتقول الأغنية ! أما فايزة بوبار دي فأكيد بوبارها من النوع التقيل جدا لكن
Post: #29 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 08:02 AM Parent: #17
حمودي !!!
معزتي ,,,
أحسن أقول هديتو ولا أتبوبر وأقول رميتو ؟؟ وبعدين الإي فيشن ليست بوبار يعني لو دخلت أوربت ولا
القنوات المشفرة كان تقول لكن أنا يا دوبك بشوف قناة الجزيرة إذا ما في داعي لناس الشو تايم
وغيرها دي عن ناس البوبار ,, شكرا حمادة على المرور الجميل ,,,
Post: #31 Title: Re: البوبار ... وغز الدش فوق بيت الإيجار !!!! Author: abubakr Date: 05-12-2007, 08:10 AM Parent: #1
يا عواطف
هنالك بوبار سوداني انقاذي جديد : كدة وليدات وواحدين دايما مناطلينم اقصر من المعروف واكمام قمصانن اطول وواحديين كدة لبس عادي وشيشب او شبط او واحد كابس بدلة اي موضة اي حاجة وكرشو طالع وواحد بجلابية بس الطاقية ماها بتاعتنا ووليدات اصغر حالقيين "كاري" دة هسع بقولو عليهو بتاع المارينز ولكن زمانك كانو بقولو عليهو عندنا كاري ( الامريكان اولاد الهرمة سرقو حتي الحلاقة) .. اها نرجع لدييل كلهم البوبار التقيل في الصرف الانقاذي اها يا نازل برج العرب يااوتبلات الليلة فيها كدةو ماهية طاقم اطباء في مستشفي في السودان .. دة هين مع المرسيدسات الاس والا يه وكلها 2006 او 2007 وسيبك من دييل شوفي البي ام دبليو اقلو اكس فايف اما الاند كروزرات وووووو فما عليك .. الواحد فينا تلقاهو راكب عربية جديدة عمرها سبع سنوات وهم عرباتم لسه في الرحم ...والمصيبة انو هم ما زينا مقيميين هنا .. بس للاستعمال في زيارات البزبز .. لكن ما في بزبز زي النعرفو بس تلفونات رومنق بشان الناس تعرف انو صاحبنا في بزنز اتصالات وونسات ورجعات بالفريست كلاص ... وتقولي دش ؟؟ نحن الادشدشنا قاعدين تلاتين سنة نبني الاوتيلات دي ويوم ما تجهز يمنعونا دخولا تاني ؟؟؟...
Post: #34 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 09:22 AM Parent: #31
ابوبكر سيد احمد !!!
محبتي ,,,
عاد البوبار ما عندك ,, بوبارك عيار أربعة وعشرين وليكم حق تتدشدشوا ,, اتحفنا بكل انواع البوبار
اللي عندك لمزيد من تسليط الاضواء على هذه الظاهرة الغريبة ,,,
Post: #35 Title: Re: البوبار ... وغز الدش فوق بيت الإيجار !!!! Author: الطيب شيقوق Date: 05-12-2007, 09:45 AM Parent: #34
Quote: وياجماعة الخير والله أنا في حاجة محيراني شديد خلاس من ما كنت صغيرة في أوائل القرن الماضي طبعا حتستغربوا في أوائل القرن الماضي دي لكن عشان الشمشرة وتفكيركم ما يمشي لي بعيد وتقولو أتاريها خاتة لينا صورة من سنة دو
العواطف سرييييييييييييع سريييييييييييع الغي العبارة دى لانو في ناس كتار بيقروا لحدى هنا وما عندهم نفس طويل يقروا التفسير وطوالى بيقولوا من سنو دو دى ذاتها .
الناس محتاجة لمسكولات بس يا العواطف
Post: #38 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 10:20 AM Parent: #35
ود شيقوق !!!
مشتاقين ,,, وينك يا ريال ؟؟ ليش أشيلها سريع سريع ليس في العمر بقية يا شيخ العرب !!!
Post: #36 Title: Re: البوبار ... وغز الدش فوق بيت الإيجار !!!! Author: abubakr Date: 05-12-2007, 09:55 AM Parent: #1
Quote: الناس محتاجة لمسكولات بس يا العواطف
انت مالك و"الناس" قول "انا الطيب ودشيقوق الحتات محتاج لمسكولات لاني بعمل حفلات حت ومتخصص في التسطيح ولسه ما قدرت اتجاوز مدرسة الدندر في رحلة عمري( عمر؟ واللا جبال الهملايا؟ ما تتجاوز الحته دي) عشان ما تقولو لي عجوز " بالمناسبة مدرسة الدندر لسه في ؟ اخر عهدي بهابداية الالفية الماضية ؟ اها حفلة الخميس طلعت فشنك ؟؟ الفنان ما جاء؟؟؟ما كنت تقول لينا نسال تمبس يرسل ليك واحد بالايميل ؟
Post: #39 Title: Re: البوبار ... وغز الدش فوق بيت الإيجار !!!! Author: الطيب شيقوق Date: 05-12-2007, 10:22 AM Parent: #36
Quote: انت مالك و"الناس" قول "انا الطيب ودشيقوق الحتات محتاج لمسكولات لاني بعمل حفلات حت ومتخصص في التسطيح ولسه ما قدرت اتجاوز مدرسة الدندر في رحلة عمري( عمر؟ واللا جبال الهملايا؟ ما تتجاوز الحته دي) عشان ما تقولو لي عجوز " بالمناسبة مدرسة الدندر لسه في ؟ اخر عهدي بهابداية الالفية الماضية ؟ اها حفلة الخميس طلعت فشنك ؟؟ الفنان ما جاء؟؟؟ما كنت تقول لينا نسال تمبس يرسل ليك واحد بالايميل ؟
حيييييييييييي منك انت يا العسل اتاريك بهنا وما بتكلمي مدرسة الدندر موجودة وآلت الى ما آلت اليه مؤسساتنا التعليمية لا لا جايينا حمد الريح وحنقدم ليك دعوة وجايانا نانسي عجاج وما بنقدم ليك دعوة
Post: #37 Title: Re: البوبار ... وغز الدش فوق بيت الإيجار !!!! Author: abdalla BABIKER Date: 05-12-2007, 10:17 AM Parent: #1
فوق
الاستاذه / عواطف قصصك حلوه وشيقه
الي الامام
ومعاك
Post: #40 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-12-2007, 10:22 AM Parent: #37
عبووووووووودي !!!
مودتي ,,,
كلك ذوق تئبر ألبي !!
Post: #41 Title: Re: البوبار ... وغز الدش فوق بيت الإيجار !!!! Author: abubakr Date: 05-12-2007, 11:39 AM Parent: #1
Quote: الناس محتاجة لمسكولات بس يا العواطف
انت مالك و"الناس" قول "انا الطيب ودشيقوق الحتات محتاج لمسكولات لاني بعمل حفلات حت ومتخصص في التسطيح ولسه ما قدرت اتجاوز مدرسة الدندر في رحلة عمري( عمر؟ واللا جبال الهملايا؟ ما تتجاوز الحته دي) عشان ما تقولو لي عجوز " بالمناسبة مدرسة الدندر لسه في ؟ اخر عهدي بهابداية الالفية الماضية ؟ اها حفلة الخميس طلعت فشنك ؟؟ الفنان ما جاء؟؟؟ما كنت تقول لينا نسال تمبس يرسل ليك واحد بالايميل ؟
Post: #42 Title: Re: البوبار ... وغز الدش فوق بيت الإيجار !!!! Author: امل احمد عمر Date: 05-12-2007, 05:19 PM Parent: #1
ست عواطف تحايا بعمق مواضيعك ..
انتي عارفة انو البوبار مرتبط بالشمار ارتباط وثيق ..
اقول ليك كيف ..
المتبوبرين (من يمارسون البوبار) هم مادة الشمشارين (الذين يمارسون الشمشرة) و ويتنافس المتبوبرين فيما بينهم حول منو بالبكون صاحب السبق الشماري عند الشمشارين
مشكلتي زي ما قالت لي امي لو ختو لي الشمار في طرفي بدفقو ..
ولو مشيت حفلة بعمل زي ولاء بت اختك (مع فارق بسيط شعري ما طويل زيها)
لكن بقول الخصلة دي لالالا ما في داعي ليها .. الميك اب اخففو شوية ..
شفتي كيف لا لميت في ديل ولا ديل .. والزي كدي بقول ليهم (ناس قريحتي راحت) ..
هاكى الحفلة دى فى الخرطوم السجمانة الفقرانة الرمدانة
وبعد تكملى (اللعبة) بمناسبة القرن السابق أرح أمدرمان بيت المال وشوفى التمرد دة
وأنسى كل الشيكات الطايرة
سلام
Post: #45 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-13-2007, 06:21 AM Parent: #43
ود ميلاد يا سليل الأمجاد !!!
وينك يا ريال ؟ طبعا الخليجيين بقلبو الجيم يا وبدل دجاجة بقولو دياية وريال بدل رجال !! وينة
بدل جنة !! محن !!
ليك وحشة ,, بتصدق الشيكات الطايرة بقت مشكلة كبيرة لمن طلعوا ليها قرار ,, شكرا ريري على حفلاتك
الجميلة ,,
سلام !
Post: #44 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-13-2007, 06:12 AM Parent: #42
أمموووووووول يا أجمل زول !!!
محبتي بعمق حنيتك وطيبة قلبك وبراءة تصرفاتك ,,,
شكرا على مداخلتك اللطيفة لكن في خبرية عايزة أزفها ليك وهي إنو ولاء إتحجبت قبل سنتين وريحتنامن
طلباتنا غير المنطقية في نظرها ,,, البت دي فريدة في عصرها شاطرة لدرجة قف ,, أمها عايزاها تقرا
برة في كندا مثلا لكن رفضت ودخلت مامون حميدة رغم إنها عاشت 16 سنة في الإمارات ولم تزر السودان في
حياتها سوى مرة واحدة تصوري !!
Post: #46 Title: Re: البوبار ... وغز الدش فوق بيت الإيجار !!!! Author: الطيب شيقوق Date: 05-13-2007, 07:29 AM Parent: #44
Quote: ليش أشيلها سريع سريع ليس في العمر بقية يا شيخ العرب !!!
حاشاك يا العواطف لديك الكثير منه لنشهد فيه بدايات جديدة
Post: #47 Title: Re: البوبار ... وغز الدش فوق بيت الإيجار !!!! Author: وصال عالم Date: 05-13-2007, 07:38 AM Parent: #46
بسم الله الرحمن الرحيم
الأستاذة عواطف عجبنا
تأسرني الكتابات والتي تكون عن واقع حقيقي ومعاش ..ولا بد من معرفة السبب وتشريحه لأن
هذا مرض مستشري ...
نشكرك بوست جميل
تسلمي
وصال عالم
Post: #51 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-13-2007, 10:28 AM Parent: #47
وصال عالم !!!
و ماأجمل هذا الإسم ,,
يسعد مساك يا وصال بكل خير ,,, مرورك الأنيق يسعد الخاطر ,, شكرا لكلماتك الرقيقة ,,
Post: #50 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-13-2007, 10:26 AM Parent: #46
أخي الحبيب إبن شيقوق !!!
تسلم الكلك ذوق ,,,
Post: #48 Title: Re: البوبار ... وغز الدش فوق بيت الإيجار !!!! Author: شادية الطيب Date: 05-13-2007, 08:05 AM Parent: #1
عطوفة الكاملات وصوفا طبعا عنوان البوست ذكرني بصديقة عزيزة اسمها طيبة كانت كل كلمة والتانية تقول لينا (أجي شوف البوبار وغز الاريل في بيت الايجار ) بجيك راجعة
Post: #52 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-13-2007, 10:31 AM Parent: #48
شادية !!!
الزهرة النادية ,,,
ربنا يسعدك ,,,
في إنتظارك ,,, ما تتأخري ,,,
Post: #49 Title: Re: البوبار ... وغز الدش فوق بيت الإيجار !!!! Author: امل احمد عمر Date: 05-13-2007, 08:27 AM Parent: #1
تسلمي يا حبيبة ..
ولاء وارتباطها بالسودان رغم سنوات الغربة
خلاني احكي ليك عن اخوي الضغير وهو ليهو 16 سنة برضو ما شاف
السودان وطلع منو هو عمر 9 شهور ولو سمعتيهو وهو بتكلم
بس كلام الحبوبات والتقول عمرو ما طلع من السودان ...
ربنا يوفق ولاء ..
Post: #53 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-13-2007, 10:33 AM Parent: #49
أمول !!!
شكرا حبيبة القسا على المداخلة الطيبة وربنا يوفق الجميع ,, مع تحياتي لود الحبوبات ,,
Post: #54 Title: Re: البوبار ... وغز الدش فوق بيت الإيجار !!!! Author: mamkouna Date: 05-13-2007, 10:56 AM Parent: #1
كيفك يا عطوفة.. و الله مشتاقين. يا ستي كمان البوبار الشديد و مانع..هو بوبار المتعلمين و أنصاف المتعلمين ! تلقي الواحد خالف رجلو و بيرمي ليهو في كلمتين هو قايلهم إنجليزي..لكن هم أقرب للهيروغليفي !!! و زي ديل دايرين ليهم بوست براهو عان نحصر طرائفهم. دا غير ناس الإفتاءات.. يعني تلقي الواحد - بسم الله ما شاء الله - مهندس..لكن ممكن ببساطة يفتي ليك في الطب ! أو طبيب..لكن ممكن يفتي ليك في الفَلَك ! أو مُحاسب..لكن ممكن يفتي ليك في الفيزياء النووية ..!! و طبعاً..معروف..إنو all of the above ..ممكن يفتوا في السياسة ك خبراء إستراتيجيين و ناشطين مُش عارف إيه..و غيرها من الألقاب البقينا نسمعها في الفضائيات و الأسافير! و هلمٌ جرا!
* بالمناسبة دي قالوا واحد مشى زيارة ل مستشفى..بعد إنتهاء مواعيد الزيارة.. لمن حارس الباب رفض يدخٌلوا..قال ليهو إنت ما عارف أنا منو؟ ياخي أنا راجل عندي ماجيستير! الحارس قال ليهو: والله الليلة ما تدخل.. أكان عندك ماجستير ..و لا دوسنتاريا... !!!
Post: #57 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-13-2007, 11:43 AM Parent: #54
ممكونة الحنونة !!!
محبتي ,,,
بسعد جدا ببوستاتك ومداخلاتك لما تحمله من مواعظ وعبر ,, زمان عندنا مديرة مدرسة رانكر كدة وعايزة
تتفلسف وتقول إنها متابعة الأخبار الخارجية وبتعرف الرؤساء قامت قالت إنتو النبي أنور السادات دة
ما ياهو حافظ الأسد ؟؟؟
Post: #55 Title: Re: البوبار ... وغز الدش فوق بيت الإيجار !!!! Author: شادية الطيب Date: 05-13-2007, 11:01 AM Parent: #1
عندنا هنا البوبار مش كتير لأنه الظروف الاقتصادية للمغترب بقت اسوأ من ظروف السودان بس في السودان بقينا نسمع حاجات تشيب الراس وآخر ما سمعته انه واحدة عملت كرامة الطلوع من الحبس بوفيه مفتوح في صالة مغلقة في فندق !!!! واحدة زوجها مات قبل اربعة شهور تعمل كرامة الطلوع بوفيه مفتوح ؟؟ اها رايك شنو يا الغالية وزمان سمعت بالملايات البثبتوا فيها جنيهات الدهب دي قبل سنوات طويلة وبقى حتى اعياد الميلاد يعملوا ليها حفلات في صالات الفنادق والفنان والعشاء من نفس الفندق وكلام كتيييير
Post: #58 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-13-2007, 11:51 AM Parent: #55
شدوية !!!
لكن ما ضحكتيني لامن وقعت من الكرسي وعايزة أتكسر إنتي في دة ولا الطلقوها ولمن استلمت ورقتها عملت
حفلة بمحمد الأمين لا حكت ولا بقت وجابوها في الصحف العربية ومن يومها عينك ما تشوف إلا النور كل
النسوان في الخليج قلدوها وفي محل بتاع كروت دعوة وزهور إتخصص في المناسبات الزي دي ولو شفتي
الكروت عينة أها رايك شنو؟
Post: #56 Title: Re: البوبار ... وغز الدش فوق بيت الإيجار !!!! Author: abubakr Date: 05-13-2007, 11:15 AM Parent: #1
Quote: تلقي الواحد خالف رجلو و بيرمي ليهو في كلمتين هو قايلهم إنجليزي..لكن هم أقرب للهيروغليفي !!!
ممكونة ...سلام بوبار بالهيروغليفي ؟؟ ده بوبار اثري ؟؟ يعني هسع خوفو بوبر علي منقرع في الاهرامات بالهيروغليفي ؟؟ انا غايتو ببوبر بالرطانة ..
- أصلو المرة لمن تكون على وش ولادة لازم راجلها يشتري ليها دهب!!
* ليه !! علاقة الدهب بالولادة شنو؟ - كيف يعني علاقته شنو !! دي عادات وتقاليد وانت عارف بس ما تعمل لي حركات!! * والله أنا بعرف إنو المرة لمن تكون على وش ولادة بتبدأ تجهز احتياجات المولود القادم وتجهز نفسها والراجل ببدا يفكر في النوم الحيطير منو لمدة سنتين على الأقل ده!! أما دهب ولم يعد ما سمعنا .. - ما تحاول تتهرب أنا من العرس ما غيرت دهبي والناس يقولو علي شنو!! * الناس لو حيقولوا عليك حاجة حيقولها بي واراك .. أهون ليك شنو إنو أتدين قروش واشتري ليك دهب ولا تخلي الناس يقولوا كلام فارغ ما بنتهي . وبعدين ياخي انتي الدهب ده بتشتري عشان شنو مش عشان تتزيني لي بيه ولا عشان الناس وتتبوبري؟ (سؤال محرج!!) - انت عارف مكانتك عندي !! لكن يرضيك يقولوا إنو راجلها ما بشتري ليها دهب !! شكلو كنجوز!! وبعدين أنا الدهب ده بلبسوا مع نسوان زي حصل شفتني لبست دهب ومشيت بيه شارع الرقة أتشرشح! * يا حلوة أجيبها ليك من الآخر لأنو حنكك سنين انتي ... أنا هسع ما عندي قروش لي دهب .. خلينا بس نخلص من موضوع الولادة دي وبعد تطلعي بالسلامة كدة تمشي تشتري. - تعرف الحاجة دي ممكن تأثر في الولادة!! يعني المرة كان ما نفسيا مرتاحة ممكن تحصل حاجة للجنين وبعدين ياخي يمكن أموت في الولادة !!! ترضى أموت وأنا متضايقة!! * الموت حق! مش ممكن أنا أكون ماشي أجيب الدهب ده أتلحس!! على العموم أنا شكلي كدة حأفصل خلاص ... أها طيب الدهب ده بكون في حدود كم كدة...؟ - والله ما عارفة (طبعا الخائنة عارفة أسعار الدهب أكثر من جوع بطنها) لكن هو بس ست صغير كدة سلسلة وأربعة غويشات ومعاهم خاتم!! * خلاص نمشي نسأل بكرة عشان نشوف حنلغي ياتو بند مؤقتا!!
والله أنا تعبت من الكتابة !!! لكن في النهاية أنا اتحنكت حنك السنين واشترت الدهب وأول ما خلاص ضمنت قالت لي تاني لو فكرت في ولادة خليك قدرها وخليك عارف إنو بجي معاها دهب!! ودهب صبري معها وقلت ليها تاني ولادة مافي نجيبه جاهز وبالأقساط أوإيجار منتهي بالتمليك Ren to Purchase وكدة.
يا عواطف موضوعك لذيذ وطريقة كتابتك تنتمي للمدرسة الشمارية ... وبمناسبة البوبار عندي ليك محل بتاع دهب الجمل (مضروب) في سوق مرشد ما يخرش المية ... غشيت بيه المدام لمدة 6 شهور!! بس اتكشفت وعوضتها عن وزن المضروب ذهباً.
الجميلة عواطف سلامات غايتو البوبار عند النسوان لكن نحنا برة الموضوع صدقي امبارح المرة قالت لي دايرة عفش الولادة من المحاميد اخوك فرترب قام علي حيلو قلتي شنو؟ يعني ماسمعتني؟ قلت بلحيل لكن هسي انت ما راميكي جمل غايتو ان لميتي في حق السماية زيك مافي تسلمي
تحسبو لعب ؟؟ الولادة بتكلف أكتر من العرس خليك زي أمير وجيبو جاهز من السوق لا دهب لاسماية وخلي
النسوان الراجيات المناسبة دي عشان يتبوبرن يبلطن البحر ,,, شكرا على المرور الزاهي ,,
Post: #61 Title: Re: البوبار ... وغز الدش فوق بيت الإيجار !!!! Author: almulaomar Date: 05-13-2007, 03:55 PM Parent: #1
مدخل عقاري: كانت العبارة أو المثل في عصور قد خلت يقرأ كالتالي "البوبار والتلاجة في بيت الإيجار" وكان التفسير العملي والمنطقي للمثل أن شراء البيت أقل تكلفة من شراء تلاجه ، أما الآن فكلكم عارفين ، ناهيك عن أن التلاجة أصبحت من ضرورات الحياة ولم تعد ترفاً. وبتحوير المثل ووضع الدش أو فلنكن أكثر دقة غز الدش في بيت الإيجار أجد أيضاً أن أى رسيفر ديجتال أو عادي مضاف إليه التوصيلات والطبق كلها لا تساوي إيجار شهر واحد والأمر كذلك تنتفي حالة البوبار من غز الدش في بيوت الإيجار شعبية كانت أو تلك التي تم إلغاء الحيشان فيها وأصبحت الأوضه في خشم الأوضه والحمام جمب سرير النوم. الإنسان المستهلك أو الذي يقلد هو في الغالب ضعيف مفتون بإنسان يحسب في قرارة نفسه أنه أقوي منه ويظل الهامش بين ضعفه وقوة من يفتتن ثابت هذا إذا لم يزيد ، وهو يشبه في أحسن الأحوال ذلكم التمثال الذي يوضع في كبوت العربية ، فمهما سارت العربية وأسرعت في مسيرها تظل خلف التمثال. والأمر كذلك نجد أننا لا نحسن الإبداع وأن تقليدنا عادة ما يكون في القشور فالحضارة عند الكثير منا والتقدم والرقي هو بنطال جينز ناصل وقصة شعر وتي شيرت إلى آخره لكن المضمون أجوف وفارغ. الكثير من السودانيين المغتربين في دول الخليج خاصة أصبحوا فاكنها في نفوسهم فقط بعد أن كانوا ذات مرة فاكنها فينا نحن الغبش ، فأنكشف أمرهم وعرف سرهم وما بقي هناك شئ يفنجطون به علينا ، فلقد عرفنا أن هناك نوع من أنواع الدهب الرخيص بي ملاليم معدودة وأن هناك ساعات تباع بالكيلو وشعر للسماحة يتم إستعارته وأحزمة للتخصير وإخفاء الإنبعجات والنتوءات في الجسم البشري المتورم وأن الحناء يمكن أن تكون بألوان معينة وأن لون عدسات العين يمكن تغييره وأن الرموش لا حاجة لأن يتغني لها الناس "أرخي الرمش فوق الرمش" بعد أن أصبح بإستطاعة أى واحدة صلعاء الرموش أن ترخي الرمش كما الليل أرخي سدوله بفضل الإستعارة. المسألة إذن أصبحت مشكلة بين بقاء المغترب وإستمراريته في غربته ما بقي حياً وبين عودته النهائية الغير طوعية للوطن ، فإذا عاد بصفة نهائية سوف تتكشف كل الأمور وتنتهي الفنجطة وينقلب السحر على الساحر ومن علمه السحر ، يعني بإختصار لم تعد هالة المغترب كما كانت ذات مرة وإنتهى سحر المغتربين في سوادهم الأعظم بل الكثير منهم بحاجة إلى دفره حتى يتمكن من العودة إلى مهجره أو دولة إغترابه. ويا ريت الواحد يكون طبيعي وبلاش حكاية النفخه الكضابه دي لأنو في النهاية الأوراق كلها إتكشفت والإنسان حتى لو لم يحالفه التوفيق في تحقيق حلم أو مشروع معين من غربته ما يتغير ويتبدل ويعيش ليهو في توب ما توبو لأنو المسألة دي بتنسحب عليهو هو أولاً وأخيراً فقد تضحك وتسحر الناس لبعض الوقت لكين بالضرورة ليس كل الوقت.
دة اسمه كلام يا راجل هسة إنت الأمرك منو تشرشح المغتربين كدي وتقول فاكينها فوق روحهم ؟ أمانة ما
اتلومت يالمامور يا ود الهنا والسرور ورغم كدي مداخلتك سمحة بلحيل وبتسر البال شديد إنشاءالله
الجماعة يتعظو شوية ويخلو البوبار وجديع المساند في صالونات الإيجار عارف جديع المساند في ا
دي موضة جديدة قاعد تذكرني العبارة الفاكينها فينا الأيام دي ( مسخرة ورقاد واطة ) ما عارفة معناها
شنو معزتي ,,
Post: #63 Title: Re: البوبار ... وغز الدش فوق بيت الإيجار !!!! Author: walid taha Date: 05-13-2007, 07:17 PM Parent: #1
أُستاذة عواطف تحية كبيرة الموضوع بلا شك يحكى واقع حقيقى لا ينكره إلا كل مكابر ..وما يحدث الآن فى السودان اصبح ظاهرة وليست حالات بعينها . لعلك قرأتى بوست كان يتحدث عن "سد مال فى الهلتون" وحقيقة كنت بين مصدق ومكذب لكن حسب المصادر يمكن ان يحدث هذا الشئ عااااادى واكتر من كده كمان!!!!! صدقاً لكلامك - وهذا حدث فى حينا بالتحديد- كان هنالك زواج لاحد الشباب فى الحى ولمن يكن قد إغترب هذا العريس ولم تحدثه نفسه بالاغتراب الى عهد قريب. المهم فى الامر كان لذلك العريس اخت (مغتربة) لسنوات طويلة ولعلها كانت تنتظر تلك المناسبة على احر من الجمر حتى تخرج بما عندها ، وإذا بها تخرج (رزمة) من الريالات السعودية (وتنقط) بيها على راس الغناية والعريس فى حدث غير مسبوق فى الحى كان من شأنه ان يحدث ضجة كبيرة والحضور ما بين مستاء ومبهور او (مخلوع) وهو يرى المنظر...طبعا كانت الفئة واحد ريال ربما حتى لا يكون حجم المجازفة كبير لذلك فضلت فئة واحد ريال فهى تفى بالغرض والناس الطبيبين لا يدرون اذا كانت ريال او مائة ريال ..المهم فى الامر انها (نقطت) بالريال وخلاص يا بختها لبعض المشاغل لم استطع الجلوس كثيرا فى هذه المناسبة ولكنى سمعت (تحت تحت) انها (لقطتهم) بعد ذلك والله اعلم هذه صورة ربما تتكرر فى نواحى كثيرة لا نعلمها فى المليون ميل مربع لكن تظل علامة الاستفهام والتعجب كبريين لماذا ترى!!!!@ ؟؟؟ $$$$$$ وهل البوبار فعلاً (فك زِرار)؟
Post: #64 Title: Re: البوبار ... وغز الدش فوق بيت الإيجار !!!! Author: tasneem Date: 05-13-2007, 07:37 PM Parent: #63
الاخت عواطف تحياتي انحنا البوبار عندنا من نوع تاني ما زيكم يا ناس الخليج ديل ناس الدول المتطورة لازم يكون بوبارم مختلف ولا ما كدا
الواحدة تقول ليك اليومين ديل قررت امشي السودان عشان كدا لازم اوقف الرجيم و الرياضة بكل انواعها وامر علي الخليج عشان اشتري لي حبة دهب لانه في اجازتي الفاتت اهلي قالوا لي وينوا دهبك ولحمك ماشوفتي مغتربات الخليج ديل بجن مجيهات وسمان كيف عشان كدا المرة دي قررت اتخلف واكون ذي مغتربات السعودية
البوبار عندنا هنا علي العز القديم حق السودان لانه معظم الناس الهنا الخواجات اللة يديهم العافية ما قصروا معاهم مدنهم بيوت من 3 طوابق و Back yard الماخمج ذو النجيلة والذهور المتفتحة يعني لو عاوزة تتبوبر الا ترسل صورها لناس السودان الما عارفين انه البيت السمح دا من عرق الخواجات وجبينم
وجاياك تاني لتكملة البوبار
Post: #65 Title: Re: البوبار ... وغز الدش فوق بيت الإيجار !!!! Author: bent-elassied Date: 05-13-2007, 08:05 PM Parent: #64
الحبيبه عواطف
والمواضيع الشيقه
رايك شنو في البوبار ... وغز الدش فوق راكوبه القصب
قالو مره في ناس اشترو دش عشان يعلقو عالي في راس البيت وماعندهم تلفزيون
تسلملي ها الصورة الحلوة ,, ليك وحشة والله الليلة كنت عايزة أعمل بوست وأقول وين بت الأسيد ؟؟ لكن
الحمد لله ظهر القمر وبان ,, ياختي الفشخرة نوع من أنواع البوبار وغز الدش بدون تلفزيون وهنا كان
شفت قبل يومين كان في عرس وتعالي شوفي الفشخرة بت عم البوبار الله يعينا يا حبيبة القسا على
الجاهلين والجاهلات .
Post: #72 Title: Re: البوبار ... وغز الدش فوق بيت الإيجار !!!! Author: محمد فرح Date: 05-14-2007, 01:37 PM Parent: #65
البوبار يسببه عدم إقتناع الفرد بواقعه المعاش ,, وبدلاً من العمل لخلق واقع أفضل له بواسطة الجد والعمل والحفر في الصخر والحجر نجده يحاول أن يتشبه بطبقة الـ(لوردات) بكل ماأوتي من قوه كما نجده يكثر من الـ(حكحكه) بالناس المرطبين والناس الهاي عسي ولعل يناله غيض من فيض وهو لايعلم أن مباراة اللوردات لن تزيد إلا من شقائه وحسرته .... فعلاً هذه المشكله أخت عواطف كبيره جداً وتزداد عند النساء بشكل أكبر من الرجال ... وهناك كثير من النماذج لأناس تلقي الواحد داك يالموبايل الماخمج وداك يااللبس والريحه وتلقي جيبه مافيهو أكتر من ألف جنيه ...
الله يصلح الحال
وفي البورد ده كان جينا للبوبار بنلقى ناسو كتااااااااار
مؤونة عشرة أعوام من الود
Post: #74 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-15-2007, 06:36 AM Parent: #72
أخي الحبيب محمد فرح !!!
معزتي ,,,
فعلا البوبار مشكلة أو مرض اجتماعي خطير يجب اجتثاثه من جذوره من أجمل مجتمع معافى ,, شكرا على
أمانة ما ضحكتني يا وليد ضحك السواد والرماد لكن ما تقول لي أخت العريس ما عينة كان بدل ريالات
تعملهم يورو عشان الصيت ولا الغنى ,, شكرا يا وليد بوبارك شرط عديل كدة !
Post: #73 Title: Re: البوبار ... وغز الدش فوق بيت الإيجار !!!! Author: بدرالدين يعقوب Date: 05-14-2007, 02:34 PM Parent: #1
عطفطف
بوبارك في السلك (البوبار وغز الدش في بيت الايجار )
الدش زاتو بقي انواع كان في الملك والايجار - دشكم لو مافيه اء ار تي او اوربت يبقي دش حمام
ومويته قاطعه.
وفي الخرطوم محل الطيارة بتنزل وتقوم ومحل الرئيس بنوم ومل الفانتا والليمون ومحل الجكس الحنون
لو العرس مافيه فطور عريس وفيه حنة عريس وعروس بكون بوبار فاضي ذي دش حمام ناس( سليمان
العتودوالفاتح) في بيت حاج زكريا الفكي.
فتك بعافيه ياعطوفي
Post: #75 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-15-2007, 06:40 AM Parent: #73
بييييييييييييبي !!!
تحية صادقة ,,,
فينك ياواد إنشاء الله مافي عوجة ,, اسعدني مرورك الجميل بمناسبة فطور العريس شفت أم العروس اللي
ختت 100 جنيه دهب مع الفطور أريتها ام السرور ,,,
Post: #77 Title: Re: البوبار ... وغز الدش فوق بيت الإيجار !!!! Author: الطيب شيقوق Date: 05-15-2007, 07:34 AM Parent: #75
العواطف
شايفك زعلانه اليوم عايزك تبتسمى شوية عشان تبدعي
زمان انا كنت الوحيد في حلتنا اللابس ساعة جابها لى ابوى وقت حج زمااان . وكنت عاوج يدى بيها وبمشى بيها تكاجي يعنى بنتكى بيها تكية وبعاين للزمن كل دقيقة - وبعد كبرت شوية وقربت ألحق بقيت اسبرس السجارة وبعد كبرت شوية بقيت اشترى السجارة براى وادسها ليوم الحفلة ووقت الحفلة تبدأ اجى شايل سجارتي في جيب الساعة القدامي ولما اشوف البنيات الحلوات اقوم اطلع ليك السجارة والكبريته واولعها ليك قدامهن واكون واقف على طولى لكن حاكر كراع في كراع ( متخيله الوقفه يا العواطف) دى كانت زمان بتجنن البنات -
بدون لف ودوران وبكل صراحة وريني اللوحة دى كيف كان تاثيرها زماااااان على البنات سيبي دعايات اليوم ( التدخين ضار بالصحة)
بمشى بعود تاني
Post: #82 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-15-2007, 11:18 AM Parent: #77
ودشيقوق !!!
الغالي تمر السوق ,,,
والله حكايتك فيلم عديل كدة عندو أبطال وبطلات أتاريك زي ما بتقول أم كلثوم لسة فاكر ؟؟ وقفة تشبه
لوحة الموناليزا وطبعا البلوم يكون كلو مروسك يا شيطان وإنت عامل لي فيها مهم !! شكرا على الوقفة
والسيجارة القبل الحفلة ,,
Post: #76 Title: Re: البوبار ... وغز الدش فوق بيت الإيجار !!!! Author: منصوري Date: 05-15-2007, 07:34 AM Parent: #1
كتابة رصينة ومقدرة خلابة على استلال العادات الضارة وبلورتها بصورة محكمة تنم عن موهبة كبيرة.. ونفس تحب الخير... لاتضيعي هذه الموهبة..ومدي قلمك في كل عادة ضارة لاقتلاعها..ووسعي نشاطك في الجرايد السيارة وغيرها..معزتي.. صديق منصوري
Post: #83 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-15-2007, 11:23 AM Parent: #76
منصوري !!!
ربنا ينصرك دنيا وأخرى ,,,
كلماتك المموسقة شرف أتمنى أن أستحق ولو كلمة واحدة منها,,, شكرا على مرورك الرقيق رقة مشاعرك
الطيبة ,, معزني ,,
Post: #79 Title: Re: البوبار ... وغز الدش فوق بيت الإيجار !!!! Author: عبد الدائم سيد أحمد Date: 05-15-2007, 09:17 AM Parent: #1
Quote: قسمة وفرقتها لزوم رقيص العروس
الـلـول الـلـول يا الـبـيـتـك تـانى دور يا عواطف
*** عندنا جارتنا بوبارة ومن شدة بوبارا عندها بت اسمها هويدا شكلها مش ولا بد ، وكل ما تجى مناسبة توقف بتها فى نص الدايرة وتقول ليها ارقصى ، والام البوبارة تزح تمشى وصت الحريم بصوت عالى : هويدا ماشاء الله ، يا هويدا لكيييين ما بسحروك .
لكن خسارة ما عرفت ألبس شنو عشان الناس كلهم بقولو لي عاملة عدسات ولا شنو وهاك يا إحباط يعني
أجيب عدسات سود لزوم البوبار والتغير ولا أطير وين ؟؟
Post: #80 Title: Re: البوبار ... وغز الدش فوق بيت الإيجار !!!! Author: Raja Date: 05-15-2007, 09:24 AM Parent: #1
الحبيبة عواطف..
سلامات ومودة..
كل ما اسمع كلمة بوبار بتذكر حكاية قريبنا الولده خطب واحدة أهلها (فشخارين) وأمها من النوع البيحيًر داك.. المهم يا ستي قريبنا إتفق على مهر محدد. قوومي يا أم العروس زيديهو 3 اضعاف. وده عشان قريبنا بسم الله ما شا الله من رجال الأعمال المعروفين ومعروفة تجارتهم المؤسسة من الأربعينيات مش زي رجال أعمال الزمن ده.. الولد جا كلم أبوه.. وقال ليه أم العروس ملت البلد إن المهر (كذا).. وسد المال كان معمول في الهيلتون.. ومافي طريقة أم العروس تتفضح قدام المعازيم العرفو بالمبلغ وجايين عشان يتأكدو صحي ولا كضب.. ... قريبي راجل حقاني.. قام فعلا خت المبلغ المعلن عنه (بواسطة أم العروس) قدام الناس.. لكنه قعد حرس القروش لغاية نهاية الحفلة وشال باقي قروشه وساب المبلغ الأولاني المتفق عليه..
اللذيذ الناس نقشت الموضوع.. وعرفو إنو الراجل قاعد حارس قروشو.. وتسمعي الحفلة كلها: المهر قالو (كذا) لكن عشان أم العروس قالت (كذا) جابوهو ليها وحيشيلو الباقي ..
يعني أم العروس عايزة تحرجه إتحرجت هي..
Post: #81 Title: Re: البوبار ... وغز الدش فوق بيت الإيجار !!!! Author: حليمة محمد عبد الرحمن Date: 05-15-2007, 10:19 AM Parent: #80
بوبار البسطاء
محطة بوبارية رقم (1) والله يا عواطف البوابير (من البوبار) كتيرة خلاس.. واحدة زميلتنا كانت في كلية العلوم.. والان محاضرة باحدي الجامعات كنا ساكنين مع بعض في بحر العرب في سنة البرلم.. كانت لها نفخات بوبارية لطيفة جدا.. كانت تقول حينما تتحدث عن السماحة:ـ والله يا اخوانا انا كان شعري دا طال وبقي غزر شوية وعيوني دا بقت واسعة ورموشي غزيرة وساقيني بقت مليانة ووشي دا قصر شوية( وشها كان اطول مقاس) وملابسي دي اتحسنت شوية.. زول واحد بحصلني مافي..
محطة بوبارية رقم (2)
حكي زميل لي.. ان احدى الاسر حينما عزمت نسابتها اجتهدت غاية الاجتهاد في ان تظهر بمظهر يفوق مقدرتها المالية كثيرا.. فاحضروا من بين الاشياء التي احضروها تفاحا. وقد كان عزيزا انذاك.. التفاح لم يكن للاستهلاك... وانما للعرض فقط..!! زميلنا قال روحو حرقتو.. يعاين في التفاح الموضوع امامه ولم يقدم له.. واخيرا قرر زميلنا ان يبادر من تلقاء نفسه وياخد تفاحة.. وذلك ليتذوق التفاح للمرة الاولي في حياته.. قام تووووووووووش شال تفاحة وعايز يقضمها.. قبال ما تصل خشمه صاحت فيه احد البنات الصغار بعصبية..
هوي هوي ختها ختها.. هي كان جابوها للاكل كان استنتك لهسع.. هي لكن جبتوها لشنو؟ تساءل. ردت البت: امي قالت جبناها عشان نختها في الطربيزة بس وبعدين بنرجعها تاني السوق ونجيب قروشنا.. في تلك اللحظة حضرت امي البت التي يبدو انها احرجت كثيرا.. واصرت على زميلي انو يضوق التفاح، فاحضرت سكينا وقسمتها على اربعة قطع ناولته واحدة منها وغضبها المكتوم ولسان حالها يقول للبت.. استني..!! المهم زميلنا ولا هماهو ضرب الربع بتاعه ووصل الى خلاصة مفادها ان التفاح دا كضبة كبيرة "والله التفاح دا العاملين ليهو هيلمانة دا .. كلام فاضي.. طعمه زي الطرور"..
محطة بوبارية رقم (3)
اعترف بانه كان هناك في كلية الاداب شاب طويل وعريض بس حنكووووووووووش للطيش كان مسميني حنان.. ما بعرف ليه اسم حليمة دا ما عاجبو.. ومصاحب واحد زميلي، من الجزيرة. زميلي بتاع الجزيرة دا كان بيحكي انو الجامعة دي تعتبر رفاهية بالنسبة له لانو لمايرجع الجزيرة، بدروشوهو في الحواشة لما روحو تطلع.. المهم الحنكوش دا في مرة من ذات المرارير(المرات)، جمع اربعة وعشرين بنطلون وقال they are out of date وتخلص منهم. بعدين فت خفس ابو ظبي شوبينغ كم يوم كدا.. جاب ضعفهن وجاء.. زميلي بتاع الجزيرة دا عندو بنطلونين بس ، عشان يقفل بيهن السنة كلها.. الحنكوش عزم الاغبش ليمون بزنس الما خمج داك.. وطبعا ما خمج عشان حاجتين.. الليمون في عضمو والمين رود وتوابعه الحناكيش.. معلوم ان المين رود كنا ما بندخلو الا لما النور يقطع في الجامعة.... الصباحية صابحنا الاغبش لبس بنطلون جديد.. في المساء لبس البنطلون التاني والاخير.. في اليوم التاني شك بنطلون صباح اليوم السابق وجاء مارق.. الحنكوش طوالي وقفو وقال ليهو اسمع ياخي الكلام دا ما بصح في شنو الماب بصح؟ تساءل.. لازم تغير البنطلون دا؟ دا موش لبستو امبارح؟ كيف تمشي بيهو الليلة تاني؟ ياخ الكلام دا ما بجي.. المهم البنطلون بجي ما بجي .. بفوت ما بقعد.. صاحبنا .. زهج ومرق كيس تمباكو و دردم سفة ماكنة وهطها في شفته السفلي قال ليهو اسمع يا زول هوي.. انا البناطلين ديل ذاتهن كان ضاقن علي في ناس هناك كتار راجينهن فاتحين خشومهم.. فاسمع انا والله الليمون دا ذاتو بضوقو مرة في الشهر ولا ووكتين اعزمني عليهو زول.. وما عندي امكانية اعزمك كل يوم والتاني .. ولا اعزم بنياتك ديل الشفتهن هناك.. دحين يا اخوي انا الخالتني معاك العوضة دي (الاودة).. تجي تنوم وتقوم.. سريرك دا بتلقاهو.. سريري دا كمان داير القاهو فاضي.. ويكون في علمك انا ملايتي دي ما بغيرها لما تتشرط.. ما تجي تقول لي نجيب ملايات زي بعض ونغير الملايات كل يومين تلاتة.. كدا بنكون اصحاب بس بعيدا عن البناطلين والاشياء الذكرتها ليك.. غير كدا امش الادارة غير عوضتك (اودتك).. فاهم؟
ده انا ميزانيتي بوبار اليومين الفاتن ديل خاربها لي..
البوبار ناسو كتاااااار
وكذلك درجاتو مودتي
Post: #85 Title: Re: البوبار ... وغز الدش فوق بيت الإيجار !!!! Author: الطيب شيقوق Date: 05-15-2007, 11:35 AM Parent: #81
Quote: الغالي تمر السوق ,,,
هسع يا العواطف دحين هسع انا لو قلت عواطف الغالية تمر السوق مش اى واحد في المنبر ده بيجي جاري وجارّي عكازو المضبب ؟.
دنيا والله !!!! لكم غفور رحيم ولنا شديد العقاب .
Post: #88 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-15-2007, 11:49 AM Parent: #85
نحنا يا ود شيقوق في هذا المنبر كلنا إخوان والمنبر بقى بلدنا بدل ييي ولا شنو رايك يا لكلك ذوق ؟
ما عاش من يجيب ليك العكاز المضبضب وبعدين أنا كلامي أصلو كدي ما بقدر أغيرو لو المنبر وقف على
طولو ونده لي رسولو ,, الأعمال بالنيات !!!
Post: #87 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-15-2007, 11:45 AM Parent: #81
حليمة العظيمة !!!
محبتي ,,,
أعجبتني محطاتك البوبارية يا راقية عشان كدة لما تفتحي لينا بنشعر بوحشة وشوق شديد .. كان معنا في الجامعة حنان إبراهيم مالك ولمن دخلت إقتصاد أبوها جاب ليها مفتاح العربيةوكانت مرسيدس هدية الدخول للجامعة نط واحد قال لمن تعمل الدكتوراة حيجيب ليها شنو ؟؟ وطبعا نحنا المساكين كان ليناالله وعيشةالسوق نمشي برجلينا من شارع الجامعة يوم الإجازة لغاية المحطة ومن المحطة لي محطة وهكذا دوليك ,, شكرا حنان على العبور الأنيق ,,,
Post: #86 Title: Re: البوبار ... وغز الدش فوق بيت الإيجار !!!! Author: عواطف ادريس اسماعيل Date: 05-15-2007, 11:37 AM Parent: #80
رجوية !!!
كيفك يا حبيبة القسا ,,,
عاد ما البوبار عندك ,, قصة فعلا تستحق الوقفة عندها ,, عموما يا ست الحبايب إحنا أمهات أولاد وقصتك
دي عملت لينا مخارج كويسة مش أقعد وأحرس وبس أنتظر لآخر معزوم وعينك ما تشوف إلا النور أشيل 299
مليون وأخلي ليهم واحد مليون فقط عشان يتبوبرو تاني وكان ما عجبهم ولدي وعندي أيه رايك في الحماة
!
..!!