Post: #1
Title: طلقاني تقومي الليلي !!!
Author: عواطف ادريس اسماعيل
Date: 06-01-2007, 09:27 AM
Parent: #0
صبحكم الله بالخير يا أمة الأمجاد, يا معشر العائدين من الحقول بلا أمل والجالسين على الرصيف بلا عمل !
يقول صلى الله عليه وسلم من كان منكم حالفا فليحلف بالله أو يصمت ولكن نحن السودانيين لدينا من الحلايف
ما أنزل الله بها من سلطان ,, لقد بحثت في كل القواميس المحلية والإقليمية والدولية ولم أجد أمة
واحدة تحلف بالحرام ولا الطلاق أو غيره مثلنا لدرجة أن أحد رجال الدين العرب قال لي ذات يوم أن
معظم السودانيات بلا حبال أو مطلقات ولكن يعشن مع أزواجهن دون علم بذلك فقلت له كيف ؟ بعد أن
أخذتني العزة بالإثم فرد لأن أزواجهم يحلفون بالطلاق والحرام عمال على بطال وفي أغلب الأحوال لا
يستجيب لهم الشخص المحلوف عليه فتكون الزوجة طالق وبشهود لكن الزوج كعادة السودانيين لا يبالي .هذا
الحديث ذكرني بمنلوج ألفته معلمتنا في المرحلة المتوسطة على شكل حوار يدور بين رجل أراد أن يطلق
زوجته لأتفه الأسباب وقد إختارت لهجة الشايقية باعتبارها لهجة سهلة ,, لطيفة ومحببة حيث حلف الرجل
على زوجته بالطلاق آمرا إياها بمغادرة البيت اليوم وليس غدا حين يقول :
طلاقاني تقومي الليلي !!!
علي حرماني تقوم الليلي !!
فترد عليه بكل طيب خاطر :
هي نان مطلقني نا في شنو ؟
فيجيب :
إنتي خمجاني تقومي الليلي !!!
العدة وسخاني تقومي الليلي !!!
وإنت طلقاني تقومي الليلي !!!
علي حرماني تقومي الليلي !!!
كان بالترللي تقومي الليلي !!!
كان باللواري تقومي الليلي !!!
لو جانا القطر جاري تقومي الليلي !!!
ورغم صغر سني في ذلك الوقت كنت أستغرب لماذا تقوم هذه المعلمة بنشر ثقافة الطلاق بين طالبات لا
يتعدى عمر الواحدة منهن 12 عاما فسألتها عن السبب فقالت لي ( أريد أن ألفت نظر أولياء الأمور إلى
هذه الظاهرة لأنهم سيحضرون الحفل سيما وأن الظاهرة قد بدأت في التفشى بين السودانيين تدريجيا ومنذ
ذلك الوقت بدأت برصد هذه الظاهرة فوجدتها تزداد يوما بعد يوم لأسباب مختلفة ورغم أن الخلافات
الزوجية التي تفضي إلى الطلاق في السودان ما زالت تعتبر الأقل مقارنة بين الدول العربية الأخرى بيد
أن حليفةالطلاق والحرام التي تؤكد جهلنا وعدم تحضرنا هي الظاهرة الوحيدة التي تنتشر بين مختلف
الأوساط السودانية دون غيرهم من البشر فغيرنا يعرف خطورة هذا النوع من القسم لكننا تعودنا على
السبهلليةوقصر النظر وعدم المبالاة فتجد الزوج مهما كان يحب زوجته ويقدرها يحلف بالطلاق لأتفه
الأسباب رغم علمه أن عقد الزواج عقد مقدس لا يجوز الإستهانة به مع من يسوى ومن لايسوى وهو عند إخوتنا
المسيحيين ميثاق شرف لا يعفيهم منه سوى الموت بينما نحن نتلاعب به في جلسات الكوتشينة وعلى طاولات
الطعام ( على الطلاق ما تقوم وعلي الحرام تتغدوا معانا) أذكر أن صديقتي الأثيوبية تزيتا ذات الجمال
الأخاذ والثقافة العالية كانت تعمل سكرتيرة لمدير سوداني فتوطدت علاقتها بهم لدرجة أنها أحبت شاب
سوداني فقررت الزواج منه لكنها فجأة وبلا مقدمات غيرت رأيها وارتبطت بمواطن إماراتي فسألتها عن
السبب فردت : (السودانيين ما عندهم غير علي الطلاق على الحرام وقد لمست ذلك بنفسي أثناء جلسات
الكوتشينة وهذا في رأي قمة الهبل لذلك من الأفضل لي أن أتزوج بإماراتي يؤمن لي مستقبل أبنائي
ويكفيني شر حليفة الطلاق العبثية) ثم عقبت ضاحكة بالله أيه رايك في الجماعة ديل فقر وحليفة طلاق !!
وفتكم بعافية.
|
Post: #2
Title: Re: طلقاني تقومي الليلي !!!
Author: فاروق حامد محمد
Date: 06-01-2007, 09:45 AM
Parent: #1
Quote: (السودانيين ما عندهم غير علي الطلاق على الحرام وقد لمست ذلك بنفسي أثناء جلسات
الكوتشينة وهذا في رأي قمة الهبل لذلك من الأفضل لي أن أتزوج بإماراتي يؤمن لي مستقبل أبنائي
ويكفيني شر حليفة الطلاق العبثية) ثم عقبت ضاحكة بالله أيه رايك في الجماعة ديل فقر وحليفة طلاق !!
وفتكم بعافية. |
عليّ بالطلاق حبشية جبانة وانتهازية !!!!!
|
Post: #4
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 09:53 AM
Parent: #2
روءة !!!
أبدا والله هي أثيوبية الجنسية لكنها سودانية الهوى وكمان معاها حليفة ؟؟ يعني بنأذن في مالطا !!
|
Post: #59
Title: Re: طلقاني تقومي الليلي !!!
Author: فدوى الشريف
Date: 06-03-2007, 07:52 AM
Parent: #2
| Quote: عليّ بالطلاق حبشية جبانة وانتهازية !!!!! |
الاخ فاروق تحياتي عجبتني منك مع انو عطوفه الولوفه انتقدتها
لكن انت كمان ماتقوم تطبقها في اي حاجه ممكن تجيب ليك خراب بيوت
عطوفه الولوفه سلامات
موضوعك جميل وبصراحه حكاية الحليفه بالطلاق دي
زكرتني خالي فتحة خشموا علي الطلاق اول اتزوج وبنتكلم مع بض كده قال علي الطلاق وفجاة اتذكر انو المره في حبلو
وقف لاحيلو وقام كلامو ماتماه وانا الضحك شرطني عليهو
اتمني اخوانا يبعدوا منها شويه
سلامي لكي ومحبتي
|
Post: #3
Title: Re: طلقاني تقومي الليلي !!!
Author: د.محمد حسن
Date: 06-01-2007, 09:49 AM
Parent: #1
تمددت على اريكة الطبيب النفسي
قالت له
اريد منك حلا
لقد صنف لساني ضمن اسلحة الدمار الشامل
مودتي يا احلى صحفية
|
Post: #5
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 09:58 AM
Parent: #3
حمادة !!!
ودي ,,,
مهما يكن فلا داعي للحليفة ,,, نعم هناك نساء لسانهن أطول منهن ولكن لكل داء دواء إلا الطلاق !!!
مرورك يسعدني ,,,
|
Post: #8
Title: Re: طلقاني تقومي الليلي !!!
Author: فاروق حامد محمد
Date: 06-01-2007, 10:13 AM
Parent: #5
توفة ...!
وفقاً لفتاوى الأزهر الشريف فإن الطلاق
لا يقع إلا إذا كان مقصوداً والحلف بالطلاق
يعتبر لغواً يوجب الكفارة .. صيام ثلاثة أيام
أو إطعام عشرة مساكين ...
ما هو عمر البشير حلف عشرين مرة ومرته قااااااااااااعدة !!!!!
|
Post: #11
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 10:22 AM
Parent: #8
روءة !!!
لو سمحت ما تجيب لينا فتاوي الأزهر البقت عما على بطال عشان تأطر لينا المسألة ,,,عايزين نسبر
أغوار المشكلة مش نجد ليها حلول ملتوية ,,, عشان كدة أحسن ليك تجر الشخيت وتقيف بعيد ,,, بدل
البشتنة ورقاد ا زي ما بقولو ,,,
|
Post: #7
Title: Re: طلقاني تقومي الليلي !!!
Author: هاشم أحمد خلف الله
Date: 06-01-2007, 10:07 AM
Parent: #3
عطوووووووفة يسعد صباحك
والله مسالة علي بالطلاق وحرم دي المفروض تكون إنقرطت من زمان لان الزمن الان تغير ومشاغل الحياة
اصبحت اصعب من ذي قبل , وفي الماضي كان هناك سبب كافي للحلف بالطلاق لان الجهل وعدم التعليم لم
يكن متوفراً , ووقتها كان كل من يحلف بالطلاق يعتبر نفسه راجل ضكران وراجل مرة بالصح وكلمته لازم
تمشي علي الكبير قبل الصغير , وأحياناً اعتبر هذه الحليفة نوع من أنواع الفشخرة وشوفوني كيف !!
وبمرور الوقت أصبحت حليفة الطلاق ( عرف بين السودانيين ) واصبحت تقال عادي زي اكل الزبادي .
انا شخصياً ما بستخدم هذه الكلمة إطلاقاً لا في ونسة ولا مجال عام لاني اعرف مخاطرها ويا ليت قومي
يعلمون .
مشكورة مرة أخري أستاذة عواطف وربنا ما حرمنا من مقالاتك الزي النار دي .
|
Post: #9
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 10:14 AM
Parent: #7
هشومي !!!
ودي ,,,
عارف في واحد زهجان من مرتو عايز يطلقها بأي طريقة لأنها مسكينة وما بترفع أصبع الرفض في يوم من
الأيام قالت ماشة ناس أمها قام قال ليها علي الطلاق كان مشيتي طلقانة وكان قعدتي طلقانة !!! شكرا
على مرورك الزاهي ,,
|
Post: #6
Title: Re: طلقاني تقومي الليلي !!!
Author: وضاحة
Date: 06-01-2007, 10:02 AM
Parent: #1
يا اجمل عاطفة واحساس
مشتاقين
ما تتخيلى بكون سعيدة كيف بموضوعاتك وانا بقرى
غايتوا يا عواطف انا راجلى يحلف على بالطلاق لو بالهظار ما بقعد معه يوم واحد
دا طبعا بعد ادية درس فى الاخلاق .
شكيتون على الله القشار السودانين
|
Post: #10
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 10:19 AM
Parent: #6
وضاحة اللماحة !!!
حب بلا حدود ,,, وشوق بلا نهاية ,,,
والله الرجال ديل فاضحننا في الغربة كل الناس بقلدوهم في حليفة الحرام والطلاق واحدة لبنانية قالت
لي معئولة هيك بتهونو عليهم ؟؟ طبعا درس الأخلاق دة مهم في الحالات دي عشان ما يمشي في الاتجاه
المعاكس ويعرف ما وراء الخبر ,,,
|
Post: #14
Title: Re: طلقاني تقومي الليلي !!!
Author: jini
Date: 06-01-2007, 10:30 AM
Parent: #10
| Quote: صبحكم الله بالخير يا أمة الأمجاد, |
بقت امة الركشة حليلك يا النايمة على حيلك!
الواحد لا يملك غير مرتو دايراهو يحلف بى شنو!
يحلف بى ابو النوم!
جنى
|
Post: #16
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 10:35 AM
Parent: #14
جني !!!
والله الجنون فنون فعلا أمة الرقشة لأنو الأمجاد كبيرة على هيك رجالة ,,, وبعدين إنت شايفني ولا شنو ؟
لأني فعلا نايمة علي حيلي من كترة الشغل لدرجة إني بقيت زي أم العروس الدقيقهاكملان ,, يعني بس مافي
حليفة غير اللعب بالمرة والنار أحلف ياخي بي بناتك الحلوات ديل ,,, مودتي ,,,
|
Post: #17
Title: Re: طلقاني تقومي الليلي !!!
Author: فاروق حامد محمد
Date: 06-01-2007, 10:37 AM
Parent: #10
Quote: لو سمحت ما تجيب لينا فتاوي الأزهر البقت عما على بطال عشان تأطر لينا المسألة ,,,عايزين نسبر
أغوار المشكلة مش نجد ليها حلول ملتوية ,,, عشان كدة أحسن ليك تجر الشخيت وتقيف بعيد ,,, بدل
البشتنة ورقاد ا زي ما بقولو ,,, |
جني وجن البشتنة خليك من رقاد الوا.....
وعليه : انسحبنا وجرينا الشخيت !!!!
|
Post: #19
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 10:42 AM
Parent: #17
روءة يا ود العز !!!
كيفن عاد ترقد فوق ا وتخلي سراير النيكل الماخمج ومخدات ريش النعام ,,, تحياتي للغالية أم
ناصر ولو سمعتها قالت في يوم من الأيام إنك حلفت بي حرام ولا طلاق عاد يا ويلك وسواد ليلك مش
تجرالشخيت وتقيف بعيد عاد بس أقرا الفاتحة على روحك وودع ميرغني عبدالباسط ,,,
|
Post: #12
Title: Re: طلقاني تقومي الليلي !!!
Author: عادل جبارة
Date: 06-01-2007, 10:25 AM
Parent: #6
الأخت عواطف
أولا بالتبادي لا أقول أعود والعود أحمد ..
فوالله دائما حاضر في مواضيعك الإجتماعية الشيقة
واستمتع بالنقاش وأحيانا المناكفات هنا وهناك ..
ثانيا هذا الموضوع الذي طرحتيه في غاية الأهمية
ويحتاج لنقاش اجتماعي وشرعي .. ولنبدأ بالأبناء
داخل البيوت كيف نعلمهم ثقافة الحياة ومفهوم
الشراكة والأحترام المتبادل وتقديس الحياة الزوجية
وفقه الزواج والطلاق .. كل ذلك لا يتأتى إلا بعد أن
يكون الأباء قد تشربوا بالعلم وهذا أصبح متاحا الآن ،
وإذا انحينا بالآئمة عل زمان آبائناوأجدادنا في
تكريس مفهوم الحليفة بالطلاق على أنها تعتبر قمة
الرجولة وعنوان الصدق في القول والجدية في الفعل
فذلك كان بسبب نقص في المعلومة الشرعية وكيفية
تطبيقها على أرض الواقع إضافة لسوء تقدير الأثر
النفسي لدى الزوجة وقلة الأهتمام به.. وهذا المنحى
يجعلنا نتأنى قليلا في وصف مجمل الماضي بأنه أفضل
من الحاضر بل نتجاوزه لتفضيله على المستقبل نفسه
وذلك اجحاف لتطور العلم والثقافة فليس الماضي كله
حسنا كما أنه ليس سيئا بالجملة بل فيه هذا وذاك
وواجبنا المراجعة والدراسة والتنقيح بعيدا عن المكابرة
التي لا تجدي ولا تسمن ولا تغني عن جوع ..
موضوع موفق ومفيد كما هي دائما مواضيعك ... شكرا عواطف
عادل جبارة
|
Post: #15
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 10:31 AM
Parent: #12
عدوووولي !!!
ليك وحشة أرجو أن لا تحرمنا من تحليلك الموضوعي العلمي الهادف ,, شكرا على مرورك الرائع ورنا
يهنيك يا جبار الكسور , فكل ما ذكرته صحيحا ...
|
Post: #13
Title: Re: طلقاني تقومي الليلي !!!
Author: الشفيع عوض شوشتا
Date: 06-01-2007, 10:27 AM
Parent: #6
Quote: أذكر أن صديقتي الأثيوبية تزيتا ذات الجمال
الأخاذ والثقافة العالية كانت تعمل سكرتيرة لمدير سوداني فتوطدت علاقتها بهم لدرجة أنها أحبت شاب
سوداني فقررت الزواج منه لكنها فجأة وبلا مقدمات غيرت رأيها وارتبطت بمواطن إماراتي فسألتها عن
السبب فردت : (السودانيين ما عندهم غير علي الطلاق على الحرام وقد لمست ذلك بنفسي أثناء جلسات
الكوتشينة وهذا في رأي قمة الهبل لذلك من الأفضل لي أن أتزوج بإماراتي يؤمن لي مستقبل أبنائي
ويكفيني شر حليفة الطلاق العبثية) ثم عقبت ضاحكة بالله أيه رايك في الجماعة ديل فقر وحليفة طلاق !! |
فعلا الافضل لها الزواج من اماراتي لتأمين مستقبلها ومستقبل ابنائها ...
اما خوفها من حليفة الطلاق العبثية .. محض افتراء و (حنك بيش) ...
..
العافية
|
Post: #18
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 10:38 AM
Parent: #13
الشفيع ود عوض !!!
محبتي ,,,
أبدا والله ما حنك هي فعلا عايزة إنسان يحترمها ويقدر الحياة الزوجية لكن لسوء حظها كل الناس
البتعرفهم ما عندهم غير علي الطلاق علي الحرام ولمن تقلدهم تموت من الضحك ,, شكر على العبور ,,,
|
Post: #20
Title: Re: طلقاني تقومي الليلي !!!
Author: فيصل نوبي
Date: 06-01-2007, 11:02 AM
Parent: #18
| Quote: السودانيين ما عندهم غير علي الطلاق على الحرام وقد لمست ذلك بنفسي أثناء جلسات الكوتشينة |
و صاحبتك دي وصلت لحد جلسات الكوتشينة ؟
طيب الفاضل ليها شنو ؟
|
Post: #21
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 11:10 AM
Parent: #20
فيصل !!!
محبتي ,,,
جلسات الكوتشينة دي بتكون رجال وعوائلهم يعني لمة في حديقة أو في بيت وليس كما يتخيل البعض عشان
كدة عرفت كلو حاجة عننا وهي بت مؤدبة جدا ,, شكرا على المرور ,,
|
Post: #22
Title: Re: طلقاني تقومي الليلي !!!
Author: فيصل نوبي
Date: 06-01-2007, 11:38 AM
Parent: #21
سلام تاني...
| Quote: جلسات الكوتشينة دي بتكون رجال |
و التانية بيسموها لمات عوائل .
ارتبطت بالاذهان كده
بعدين وين الاسرة اللي بترضي انه اثيوبية تكون حايمة في وسطها كصديقة ؟*
المفهوم ده و خاصة عند نسائنا ارتبط زي ما بتسميها انتي ( خطافة الرجالة )
تحياتي.
__
مع كامل إحترامي للاخوات الاثيوبيات.
|
Post: #24
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 11:51 AM
Parent: #22
فيصل !!!
ليس هذا هو الموضوع الذي طرحت البوست من أجله أرجو أن نتحدث عن الشيئ الأساسي ,, ثانيا لا أعرف
التسميات إضافة إلى ذلك لا اود الخوض في حكاية أثيوبية وسودانية ففي كل جنس الصالح والطالح خصوصا
وأن الأخت المعنية أصبحت زوجة وأم أولاد ,,
|
Post: #23
Title: Re: طلقاني تقومي الليلي !!!
Author: Muna Khugali
Date: 06-01-2007, 11:42 AM
Parent: #21
ان كا ن قاللي بطلقك..
أنا ياني القايلالو..
ايه بسم الله..
هو الداير قعاد معاك منو يالمطروش!
وبس اقبل منو وافوت...
توفي..جمعتك طلقاني
|
Post: #25
Title: Re: طلقاني تقومي الليلي !!!
Author: عواطف ادريس اسماعيل
Date: 06-01-2007, 11:54 AM
Parent: #23
موني !!!!
سعيدة بدخولك الجميل ,,, ووجهك الحلو ,,
ضحكتيني بتصدقي الشايقي داك ما فضل ليه إلا يقول لي مرتو الشبكة عطلاني تقومي الليلي سوداتيل خسراني
تقوم الليلة ,, موبايلك سوداني تقومي الليلي ,,, شكرا حبيبة على المرور ,,,
|
Post: #26
Title: Re: طلقاني تقومي الليلي !!!
Author: نوسة
Date: 06-01-2007, 12:21 PM
Parent: #25
حبيبتي عواطف
كيف أحوالك؟؟؟
إتخيلي صحي أغلب السودانيين جنهم حلايف ،، و بطريقة مزعجة جداً ،، خصوصاً الواحد لمن يلح عليك تعمل حاجة إنت ما دايرها
يعنى زمان في الشارقة عندنا أصحابنا كلما نمشي نزورهم ،، و نكون مارقين بالليل يقوم سيد البيت و يحلف بالطلاقات و أغلظ الإيمانات إننا ما نمشي ،، و أنا عارفة دة من ريدتو لينا ،، بس الموضوع بيكون مزعج ،، و أهو "بنضطر" نقعد عشان الحليفة ما تمشي على مرتو ..
بس في النهاية جبرنا إنو نخفف كراعنا منهم برغم مودتهم في قلبنا ...
و كان على عمر البشير
| Quote: ما هو عمر البشير حلف عشرين مرة ومرته قااااااااااااعدة !!!!! |
مرتاتو قصدك يا أخوى؟؟؟
بس كمان السودانيين تعليمتهم على الحليفة بتجيهم من هم شباب قبل الزواج ،، و الواحد لسانو بيمشي عليها زى العجب  ،، و دة كلو من مصاقرة السماسرة و التجار في السوق...
مفروض نعمل حملة "معاً ضد الحلائف"
لك الود
|
Post: #37
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:21 AM
Parent: #26
نوسة !!!
وحشتيني ,,, وشتيني ,,,
إزيك يازهرة نادية ,,, والله كلامك صاح 200% وعشان كدة لازم نقوم بحملة إعلامية ضد حليفة الطلاق والحرام
لأنها بتودي في ستين داهية تصوري هنا في أبوظبي طوالي تعتبر سارية المقعول وما فيش يمة أرحميني
وياما نسوان إنفصلن عن أزواجن بسبب الحليفة البايخة واللي ماليها طعم دي ,, شكرا نوسة الننوسة ,,
|
Post: #27
Title: Re: طلقاني تقومي الليلي !!!
Author: ماجدة عوض خوجلى
Date: 06-01-2007, 12:44 PM
Parent: #1
عطوف حبيبى
ازيك مشتاقين
عارفه عطوف بتصدقى صاحبتك دى بس ربنا داير يرميها فى شر اعمالا ذى مابيقولو صحيح ومعاك انه حكايه الطلاق
والحليفه بيه فى العندو معنى او الماعندو ماظريفه لكن بعد ده كله بالتاكيد هم احسن من التانيين الف مرة تتخيلى عطوف انا بطول الزمن ومعاشرتى لجنسيات مختلفه الواحد شاف العجب لوقارتنى ده مع حكايه الحليفه بالطلاق
دى هتلقى انه حتى مافى مقارنه انا طبعا مامعاهم فى البيعملو فيه لكن بس الحق يقال بعد الحاصل ده كله هماحسن
بكتير عارفه عطوف يكفى انهم بيفظو احترام للاهل وبيعملو حساب للنسب وفى احلك الظرؤوف كرامتم فوق كل شى طبعا فى شواذ وسيئين على المستوى العام هم بخير برضو ما ننسي انه فى نساء فظيعات شديد والله حبيبه فى حكايات لواتحكت عن الرجال من الجنسيات التانيه دى مابتتصدق غايتو بس صاحبتك دى نتمنى ان تكون بخير لكنها لم تكن موفقه .
تحياتى حبيبه
|
Post: #39
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:30 AM
Parent: #28
د. مصطفى !!!
مرورك يسعدني و اختياراتك الموفقة شعرا وغناء لها دور هام في دعم البوستات فلك منا كل الحب
والود ,,, لا عدمناك يا دوك ,,, أبق معنا ,,
|
Post: #38
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:25 AM
Parent: #27
مجودة !!!
يا أمرة وحشتينا ,,, نورتي ليالينا !!!
معك في كل ما ذكرته وطالما نحن المكارم أسسنا ساساها علينا أن نكملها حتى النهاية وبعدين عشان
الحليفة السخيفة دي قد تدخل الواحد في مكان ضيق جدا لا يستطيع الخروج منه فيندم ندم السواد
والرماد نرجو الإبتعاد عنها ولا مو هيك ؟ ,,, محبتي ,,
|
Post: #56
Title: Re: طلقاني تقومي الليلي !!!
Author: عواطف ادريس اسماعيل
Date: 06-03-2007, 04:57 AM
Parent: #27
مجودة !!!
ليك وحشة يا حبيبة القسا,,,
أولا آسفة عشان الرد الكتبتو ليك أتاريه إتمسح وأنا ماجايبة خبر شوفتي العجلة من الشيطان بدل
أعمل كليك على أضف رد عملتو على إمسح وجريت جري فلك العتبى حتى ترضي ,, وفعلا زي ما قلت السودانيين
أحسن ناس في حكاية إحترام أهل الزوجة بصفة عامة والنسيبة على وجه الخصوص بس لو خلو حكاية الحليفة
الما ليها معنى دي يكون كويس باقي الحاجات ساهلة بتتعالج ,, شكرا على مرورك الأنيق ,, إبقي معنا
رأيك يهمني ,,,
|
Post: #29
Title: Re: طلقاني تقومي الليلي !!!
Author: abubakr
Date: 06-01-2007, 01:30 PM
Parent: #1
Quote: لدرجة أن أحد رجال الدين العرب قال لي ذات يوم أن
معظم السودانيات بلا حبال أو مطلقات ولكن يعشن مع أزواجهن دون علم بذلك فقلت له كيف ؟ بعد أن
أخذتني العزة بالإثم فرد لأن أزواجهم يحلفون بالطلاق والحرام عمال على بطال وفي أغلب الأحوال لا
يستجيب لهم الشخص المحلوف عليه فتكون الزوجة طالق وبشهود لكن الزوج كعادة السودانيين لا يبالي . |
يا عواطف ... مع اني لست رجل دين ولا عربي لكن برضو قت نفس الكلام دة في نفسي ولناس اخريين ؟ بعدين ليه الحليفة ب"الطلاق" وكمان ب"التلاتة " لتاكيد فعل او نفيه ؟ الا يكفي النفي حاف ؟ ولماذا ؟ وجدت اناس لم يتزوجو يحلفون بالطلاق ؟ عادة ؟ هل الرجل الذي يحلف بالطلاق ولا يفي ما وعد يعود الي زوجته كان شيئا لم يكن ؟ اين حدود الحلف بالطلاق وعدم الايفاء به ؟ ارجو الا نتجاوز هذا فالامر سيان بين الحاكم والمحكوم في بلادنا في خصوص الحلفان والطلاق العشوائي ؟؟
عموما مع خالص ودي لا احب اطلاقا الحلفان هكذا وترديد "علي بالطلاق" دون قيد او شرط يزعجني و يشككني في اشياء كثيرة خاصة بمجتمعنا الممعن في ذكوريته والذي يجعل من امر اهم علاقة انسانية بين الرجل والمراة امر حلفان لا يوفي به ؟؟ ويبقي ما قاله رجل الدين عن السودانيين الذين يحلفون بالطلاق دون ايفاء امرا يجب ان ننتبه اليه ولا ناخذه الا بماخذ الجد والا تحوم شكوك في علاقاتنا الاهم ؟
|
Post: #30
Title: Re: طلقاني تقومي الليلي !!!
Author: Munir
Date: 06-01-2007, 02:30 PM
Parent: #29
تحياتي أخت عواطف .. وموضوع مهم للغاية !..
هذه السبهللية في حليفة الطلاق والحرام خطرة جدآ .. وفعلآ كلام رجل الدين ذاك يجب اخذه في الاعتبار بجدية .. يعني الواحد إذا هاينة عليهو زوجته يفكر في أولاده ويتأمل في فداحة أن يكونوا المساكين جارين قدامو ببراءة ويكونوا نصهم اولاد حرام وهو لا يدري .. والزوجة المسكينة تلقاها تعبانة ومجتهدة تفرك في الملاح وما عارفةإنها مطلقة مية مرة !!!.. لا حول ولا قوة إلا بالله !!..
أها دي زاتها الظاهر من الكلمات البتهوي بصاحبها في جهنم 70 خريفآ وهو لا يلقي لها بالآ .. وأكيد دي من الحاجات الجايبة للسودان البلاء ..!!!
أنا غايتو لا أثق كثيرآ في من يكثر في الحليفة أيآ كانت ..
والواحد حقو يحرص جدآ أن لا يحلف أي حليفة لا بالطلاق ولا بالله .. لا في الفارغة ولا في المليانة .. إلا اضطرارآ ..
القضية دي مفروض تقوم حملة قومية ضدها في الاذاعة والتلفزيون والصحف لبيان خطورتها حتي ينتبه لها الناس ..
|
Post: #41
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:47 AM
Parent: #30
منير عندنا !! يا مرحبا !!!
والله يا منير كلامك كلام عقل شديد ,, كيف يرضى الواحد على نفسه موقف زي دة ؟ وكيف يلاقي ربه وهو مطلق
مرتو خمسين مرة وقاعد معاها وجايب منها أولاد كمان هل الناس وصلت إلى هذا المستوى من اللامبالاة ؟
ولماذا نحن من دون خلق الله نحلف بالطلاق والحرام رغم أن الناس البحلفو كتير زي ما قلت كلهم كذابين
ونصابين ونصهم قاعد في السوق العربي وسعد قشرة أما المتعلمين ديل كمان ما عندهم عذر ,,, شكرا
منير ابق معنا ,,,
|
Post: #40
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:42 AM
Parent: #29
ود سيد أحمد !!!
مودتي واحترامي وكم أنا أعلم جيدا أن هناك العديد من العادات السودانية التي تزعجك حد الغضب ولكن
ماذا نفعل مع أمة الحلفان تصور إتصل بي الأخ الصادق من جمارك الحدود ليقول إن منطقته عن بكرة أبيها
لا تحلف بشيء سوى الطلاق وفي ذات يوم من الأيام والجد جالس في مجلس أخذ إبن بنته السبحة وبدأ يعد
لجده عدد المرات التي يحلف فيها بالطلاق فطلعت 99 مرة فقال لجده جدي أنت حلفت بالطلاق 99 مرة أرجو
أن تكمل 100 فقال الجد علي بالطلاق ماني مكملهم !!! وعجبي !
|
Post: #31
Title: Re: طلقاني تقومي الليلي !!!
Author: amira abdelrahman
Date: 06-01-2007, 02:45 PM
Parent: #1
بحب أقرأ بوستاتك ..دائما عسل ..زيك كدة..
أعجبني تعليق مني خوجلي
ان كا ن قاللي بطلقك..
أنا ياني القايلالو..
ايه بسم الله..
هو الداير قعاد معاك منو يالمطروش!
وبس اقبل منو وافوت...
|
Post: #32
Title: Re: طلقاني تقومي الليلي !!!
Author: علاء الدين حيموره
Date: 06-01-2007, 03:23 PM
Parent: #31
الاستاذة / عواطف
تحية طيبة
قالوا ليه ما قلنا ليك الزولة الا تديها العين الحمرا
قال ليهم اديتا العين الحمرا لكن كبت لي فيها قطرة
....
|
Post: #43
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:52 AM
Parent: #32
علاوي !!!
وحياة بتك العسل دي العين الحمرا لا بتقدم ولا بتأخر إذا فقد البيت المقومات الأساسية ,, ودي ,,
|
Post: #76
Title: Re: طلقاني تقومي الليلي !!!
Author: magdi elmahi
Date: 06-05-2007, 08:30 PM
Parent: #43
طفطف
دئما عندك كبسولات السعادة
ايه رائك فى حريم بيحلفن بالطلاق
وطبعا بعض الرجال بيروها حاجه تملى الفم
الواحد يدق سدروا ويملى خشموا فى
الفارقه والمليانة مالقى غير حبيبتى دى المسكينه فى صمت خشمة
ولك عبق التحايا
مجدى (ابو وضاحة)
|
Post: #77
Title: Re: طلقاني تقومي الليلي !!!
Author: عواطف ادريس اسماعيل
Date: 06-06-2007, 05:31 AM
Parent: #76
مجودي !!!
تحياتي لك ولوضاحة ,,,
بيني بينك ديل حريم مسترجلات لكن ياربي طلاقن دة بكون واقع ولا كلام حريم برضو ؟ ودي ,,
|
Post: #85
Title: Re: طلقاني تقومي الليلي !!!
Author: Asma Abdel Halim
Date: 06-06-2007, 10:37 AM
Parent: #43
|
Post: #99
Title: Re: طلقاني تقومي الليلي !!!
Author: magdi elmahi
Date: 06-07-2007, 09:41 AM
Parent: #43
طفطف
مافى ليكى طيارة وان شاءالله بالحماره تقومى الليلى
عندك شهد بطعم بوستاتك
وخارج حدود الهم
بعض الرجال يحلفوا بالطلاق كنوع من الرجالة
مالقى الا المسكينة دى .
بنلقاها بكثرة غند التجار ليه؟؟؟
|
Post: #42
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:50 AM
Parent: #31
أمورة !!!
مجبتي يا ست البنات !!!
شكرا على كلماتك الطيبة و منى دايما تعليقاتها لذيذة زيها وإنت يارايعة ما عاش من يقول ليك كدة !!
|
Post: #33
Title: Re: طلقاني تقومي الليلي !!!
Author: abubakr
Date: 06-01-2007, 05:15 PM
Parent: #1
Quote:
القضية دي مفروض تقوم حملة قومية ضدها في الاذاعة والتلفزيون والصحف لبيان خطورتها حتي ينتبه لها الناس ..
|
|
Post: #34
Title: Re: طلقاني تقومي الليلي !!!
Author: محمد مختار جعفر
Date: 06-01-2007, 08:38 PM
Parent: #33
أستاذة / عواطف .. تحية وسـلام ..
حقيقة ، البسوه السودانيين كتير ، وفى حاجات شينه بالحيل ،
وقد تحدثتى أنت عن بعضها .. وصراحة هناك الكثير من الممارسات
والعادات الشينه ، يأخذونها علينا غير السودانيين وكم من تصرفات تجعلنا
نستحى ونتوارى خجلا منها ، وياويلك لو حاولت أن تنبه أحدا بدر منه
تصرفا غير لائق ... ، يسمعك كلاما تندم على توجيهك له ..
فى بلاد الغربة التصرف السييء من الفرد يحسب على الكل ،
والتصرف الحسن يحسب لصاحبه !!!! ، .. هذا ما عايشناه سنين عددا
.. الحلفان بالطلاق وغيره وغيره كثير .. بس نقول سترك يا رب ...
لك التحية .. ونشوفك فى الجمعة الجايه يا عواطف جمعة ...
محمد مختار جعفر
|
Post: #45
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:57 AM
Parent: #34
ود مختار !!!
والفكر إحتار والله ما عارفين نحارب شنو في الغربة ( السفة) رغم إنها قالو أخطر من السجاير لأنها
بتمشي للمعدة مباشرة ولا (البهدلة) البتخلي أحسن زول يسقط في المعاينة ولا الكلام بالصوت العالي
رجالا ونساء وكأننا عايشين في غابة ولا حضور المناسبات بدون دعوة وإحراج أهل الفرح مع ناس الفندق
ولا أيه ولا أيه يا حمادة أريد الإجابة !!!
|
Post: #44
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 06:53 AM
Parent: #33
نؤيد وبشدة يا أبو البنات !!!
|
Post: #78
Title: Re: طلقاني تقومي الليلي !!!
Author: عواطف ادريس اسماعيل
Date: 06-06-2007, 05:33 AM
Parent: #33
تسلم يالحبيب !!!
مودتي ,,,
|
Post: #35
Title: Re: طلقاني تقومي الليلي !!!
Author: حافظ العشا
Date: 06-01-2007, 11:31 PM
Parent: #1
Quote: وهو عند إخوتنا
المسيحيين ميثاق شرف لا يعفيهم منه سوى الموت |
تحياتي الرائعة عواطف
شدتني هذه الجملة مع انو الموضوع عموما جميل جدا
حسب معرفتي المسيحيين بصفة عامة لا يلجأوؤن للزواج كثيرا
بل تجدين عندهم علاقات الصداقة(boy friend) اكثر من العلاقات
الزوجية وهي العلاقة الوحيدة التي اقر ت بها الاديان السماوية
وسبب عدم اقبالهم على الارتباط بالزواج هو ماورد في الموضوع
الذي اثرتيه وهو ميثاق الشرف لانهم يعلمون ولديهم قناعات
واعتقاد بان الزواج هو ارتباط يعني لهم الالتزام والصدق
وليس هنالك مجال للدخول في علاقات اخرى والفرد منهم يحاسب
نفسه قبل ان يحاسبه الاخر ويعرفون معنى ميثاق الشرف
وللاسف هذه اخلاق اتى بها ديننا الحنيف ومفروض علينا كمسلمين
ان نكون غدوة لهم ولكن في زمننا هذا انقلبت الاية ظلوا هم
ملتزمين بمبادئهم ويعملون بها تحت كل الظروف ونحن نجد المبررات
لكي نشذ في افعالنا ونأتي بكل ماهو قبيح .
للاسف الشديد استاذة عواطف اصبح ميثاق الشرف في ايامنا هذه
مجرد كلمة للتداول ليس غير واصبحت الخيانات الزوجية امر
طبيعي مما اكثر من حالات الطلاق وانقلبت الاية عندنا بمعنى
انو علاقات الصداقة عندنا تاتي بعد الزواج وليس قبله
كما هو عند المسحيين وهو الامر اصبح سببا لدمار كثير
من العلاقات الزوجية مع ان الكل يعلم بان ابغض الحلال
عند الله هو الطلاق طبعا هذا لاينفي ان هنالك من هو على
خلق وملتزم ولديه مبادي في هذه الحياة ولكن كثرت النوعية
الاخرى واصبحت لافتة للانظار واصبح عدم المبالاة شي طبيعي
نسال الله الهداية لنا ولهم واشكرك استاذة عواطف مرة اخرى
على هذا البوست الرائع وفي انتظارك دائما.
|
Post: #46
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 07:02 AM
Parent: #35
ود العشا !!!
والله صددق من سماك بهذا الإسم ,,, ربنا يحفظك يا حافظ أسهبت فأصبت كبد الحقيقة بطريقة سلسلة ومقنعة
فشكرا لمرورك الجميل ونسأل الله الهداية للجميع ,,, مرة أخرى لك ألف شكر فلا يفتى ومالك في المدينة.
|
Post: #36
Title: Re: طلقاني تقومي الليلي !!!
Author: حافظ العشا
Date: 06-02-2007, 00:37 AM
Parent: #1
الاستاذة عواطف
معذرة لخروجي قليلا عن الموضوع
ولكن موضوعك اثار في اشياء
كنت بصدد تنزيل بوست عنها
فكنت انت السباقة دائما
في مناقشة بعض المشاكل الاجتماعية
المهمة والتي تحتاج منا الى وقفة
ومحاولة علاجها.
معذرة مرة اخرى وسوف ارد مرة
ثانية على هذا البوست ببوست منفصل
لك الود والتحية - ودالعشا
|
Post: #47
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 07:04 AM
Parent: #36
ود العشا والحشا !!!
ودي ,,,
لم تخرج عن الموضوع لقد تناولته من عدة جوانب مقارنة بالإخوة الميسحيين وهذا هو المطلوب إذا فلا
داعي للإعتذار شكرا على مرورك الأنيق ,, أبق معنا رأيك يهمنا !!
|
Post: #48
Title: Re: طلقاني تقومي الليلي !!!
Author: Kamal Karrar
Date: 06-02-2007, 07:19 AM
Parent: #1
عطوفة أنا معاك في عدم جواز الحليفة بالطلاق..
لأنو من كان حالفاٍ (وده شرط) جوابه فليحلف بالله أو ليصمت
ده تعليم المصطفى (عليه أفضل الصلاة والسلام)
لكن يا عطفطف ده كلو كوم.... والسوداني المدير هو المسئول
لأنو يا كان يعرسها.. ولو متزوج.. كان يباصيها...
ولو ما عايز يباصيها.... كان يعكس ليها ما خفي من صفات
الزوج السوداني... ويوريها فعلا إنو الحلافين بالطلاق ما هم
إلا شريحة من الزمن الغابر... وما عاد ليهم وجود أساسي
طبعا دي ما مسئولية المدير.. بس فور ذا سيك في جوك..
الذ حاجة شفت قبل كده مرة من أهلي الجعليين تحلف بالطلاق..
|
Post: #51
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 08:43 AM
Parent: #48
كيمو !!!
وينك يا ريال ليك وحشة ,,, والله السكرتيرة دي من شدة ما طيبة وبت قبايل عندي شغالتي هربت مرة
وأولادي صغار بيبيهات كدة كانت تجي تقعد لي معاهم ويوم شافت الشغالة في حفلة مغيره لون شعرها
بألأحمر ولابسة نضارة كبيرة لزوم التخفي وهي كانت فلبينية حلوة شديد وطويلة طول ما عادي يعني عاملة
لي مشكلة في الحتة ولما الشرطة قبضتها في يوم ما في نايت كلوب ومشينا نستلمها قام الضابط قال
لينا هاي شغالة ولا ممثلة وفعلا لولا هذه الأثيوبية ما كان عرفنا الممثلة أقصد الشغالة طارت وين يعني
فعلا السودانيين ضاعت منهم بت لقطة بحليفة الطلاق والحرام وطبعا الجعليين دايما بتجوعلو وبحلفو
بالطلاق والحرام وقد سرت العدوى إلى القبائل الأخرى ,, ودي ,,
|
Post: #49
Title: Re: طلقاني تقومي الليلي !!!
Author: Ehab Eltayeb
Date: 06-02-2007, 08:03 AM
Parent: #1
عواطف والمتداخلين سلام..
وشكرا علي السرد لهذه المشكله والظاهرة السالبة في مجتمعنا
ودي ما بحلوها الا كل مرة تأدب راجلها وتوقفه من الحليفة...
الشئ المؤسف عندي صاحبي لما يقول علي الطلاق بعرفه انه كذاب...
| Quote: لي معئولة هيك بتهونو عليهم ؟ |
والله كلام اللبنانيه ضحكني شديد
في واحد لما يجوه ضيوف بحلف عليهم طلاق طوالي اشربو ولا ياكلو حاجة...
مره جوهو ضيوف واحد فيهم حلف انهم ماكلين وشاربين وما عايزين اي حاجة ...
هو طالع من الحمام والدنيا برد قال ليهم علي الطلاق تستحمو كلكم,,,,
|
Post: #52
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 08:50 AM
Parent: #49
هوبي !!!
ودي ,,,
والله إنت اللي ضحكتني بحليفة الطلاق والحمام في البرد مرة واحد عريس جديد حلف على صاحبو يتغدى معاه
ويبدو إنو صاحبو حاسدو على العرسة المالاقيها فحلف ما يتغدى طوالي قام العريس مشى قفل باب الشارع
وجاب سكين من المطبخ وقال ليه علي الطلاق لو ما تغديت حأضبجك بالسكين دي طبعا صاحبنا خاف على
رويحتو قام طوالي اتغدى وأكل التحلية وشرب الشاى وكسح ,,,
|
Post: #50
Title: Re: طلقاني تقومي الليلي !!!
Author: د.محمد حسن
Date: 06-02-2007, 08:17 AM
Parent: #1
الجميلة بلا حدود عواطف
قبل الزواج كنت كثيرا ما احلف بالطلاق
ولما عقدت وانا لسة جدييييييييييييييييد كانت معانا شقيقتي في زيارة من السودان
كنا بنتغدى
ومودة طلبت منها انها تاكل زيادة فقالت شبعت
ختيت ليها حاجة جنبها وبدون ما اشعر قلت ليها علي الطلاق تاكلي دي
قالت لي ابيت
والله يا عواطف في اللحظة ديك راسي تححححححححححححح انفتح
وهي ضحكت علي
واكلت
ومن ديك
وعيك
تاني بالغلط ما بحلف بيها
تخريمة
( قصة حقيقية)
قالت ليه
شوف نحن هسة مخطوبين
بعد العرس
انا لما ازعل بهيج
وبكورك
وبشاكلك
ابقى راجل طلقني
مودتي
|
Post: #53
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 08:57 AM
Parent: #50
حمودي !!!
معزتي ,,
والله أختك دي عفارم عليها عفيت منها طيرتك من حليفة الطلاق طيرة أبو ريش من أبو دريش بس ختتك في
فجة ضيقة يعني كنت حتعمل شنو لو أبت تاكل ؟ وكمان البتشاكل وبتكورك وبتقول ليه أبقى راجل طلقني
دى واحدة لذيذة وباقية على بيتها والعشرة في نسوان الكلمة والتانية طلقني !!بيت أبوي بشيلني ,,
أنا عندي أهل ما مقطوعة من شجرة ولمن تمشي بيت أبوها بعد ساعة واحدة تضرب ليه تلفون تقول ليه
الأولاد ما مرتاحين عايزين يرجعوا البيت أنا لو كنت في محلو باخد الأولاد وبخليها في بيت أبوها !!!
|
Post: #54
Title: Re: طلقاني تقومي الليلي !!!
Author: Isa
Date: 06-02-2007, 09:38 AM
Parent: #1
الأسـتاذة عـواطف،، سـلام، ومشـكورة على كل ما تطـرحيه للنقاش هنا،، في الحقيقة ورغـم إتفاقي معاكي ومعاكم بأنو الحليفة الكتيرة عادة مش جميلة زي عادات (وثقافات) تانية كتيرة عـندنا،، لكن برضو بتفق مع رأي آخـر هنا إنو حليفة الطـلاق دي تعتبر من لغـو (أو لهـو) الحـديث،، فالطـلاق يقـع عـندما يطلق الرجـل زوجـته بكـلام واضـح العـبارة والمعـنى بقولوا ليها هـي ومـش في جلسة كوشتية ولاّ في الكـرين أو سـوق المواشي،، عشان كـدة كان برضو دار جـدل حـول صحة الطـلاق بال SMS !،.. بعـدين الحليفة أو القسـم معـروف إنو الزول بحلف بشـي بعـّزو أو بحبو أو بقدسّو عـديل،، مش بي (أبغـض الحـلال) زي ما بوصف الطـلاق، عشان كدة قالوا (فليحلف بالله)، وأنا القـدامك دا كان حلفت ليك بي أبوي يبقى صدقيني طـوالي! وحتى الحليفة بالله قالوا بتستوجب الكفارة في حال عـدم الوفاء بها ومش خـراب البيوت،، أقصد إنو لو زول حلف بالطلاق ولاّ بالحـرام (أنا لي يوم الليلة بالمناسبة ما عارف شنو يعني عليّ الحـرام دي)،، بقـول الحلف الزي دا ما بتترتب عليهـو اي نتايج لأنو أصلاً كـلام ما عـندو معنى، وبالنسبة لي الحلف بالطـلاق دا برضـو زي لامن زول يقـول عليّ القسـم ولاّ علىّ الحليفة! في النهاية ما عليهو أي حاجة في راي! لا قسم ولا حليفة ولا نعمة.. بعـدين قبل ما أجيب ليك (الغـنية بتاعة الشايقية دي) لأنها عـندي، أحكـي ليك قصة جدنا واحـد وحبوبتنا،، كانوا الله يرحمـهم عايشين أجمل حياة مع بعـض وما كان عـندهم أطفال إلى أن توفوا،، مـرة وفي واحـدة من شكـلاتهم المتواصلة قال ليها: يا ولية أنا طلقتك خمسة وعشـرين مرة وانتي ما دايرة تنحلي مني،، فقاطعته: أسـكت يا كضاب.. سـبعة بس!تحـياتي لكم..
|
Post: #55
Title: Re: طلقاني تقومي الليلي !!!
Author: عواطف ادريس اسماعيل
Date: 06-02-2007, 09:48 AM
Parent: #54
عيسى !!!
ودي ,,,
مشكور على الكلام الرصين جدا بس عايزة أقول ليك يا ودأمي الحرام دة أخير منو الطلاق رغم إنو
الحليفة دي يضربو بيها دي لكن برضو حكاية لغو كلام وما لغو كلام دي فيها قولان عشان كدة الواحد أخير
يكون في السيف سايد ولا شنو ,,, لكن جدك وحبوبتك ديل عينة !! بس لا تثريب عليهم ,,, شكرا على
العبور ,,
|
Post: #57
Title: Re: طلقاني تقومي الليلي !!!
Author: الطيب شيقوق
Date: 06-03-2007, 06:23 AM
Parent: #55
الفارووووووووق
| Quote: عليّ بالطلاق حبشية جبانة وانتهازية !!!!! |
وعلى الطلاق انا السمحة ام ولدى - يا العواطف - قالت لى ما بحس بعظمتى عندك الا وقت اشوف حسمك للامور بحليفتك بى
اها يا العواطف ما عادت الشغلانة Objective هي Subjective يعنى الشغلانية ذاتية اكثر من كونها موضوعية .
الفارووووووق الحبشية دى تكون مني يا سعادتك ؟
|
Post: #58
Title: Re: طلقاني تقومي الليلي !!!
Author: salma subhi
Date: 06-03-2007, 07:27 AM
Parent: #57
عطوفه يا عطوفه والله مشتاقييييييييين والشوق شديييييييد
علي بالطلاق دي جملة متهيألي تضاف مع شروط عقد الزواج وتختم في الورقة من كثر استعمالها...نفتقد كشعب سوداني النواحي التوعوية لمثل تلك القضية الخطيرة يا عواطف والأخطر ان هذا الواقع بينعكس على الأطفال والأبناء بمختلف الأعمار... على نفسيا تهم بالذات والمعروف ان أكثر الأبناء بيعتبروا الأب أو الأم قدوة فلما يشوف الأب كل مرة..طالق...علي بالطلاق ..أكيد سوف تنتقل اليه عدوى الطلاق وقد يصيح في المستقبل ضحية زواج فاشل....فهل نلومهم أو نعاتبهم؟؟؟
مودتي
|
Post: #60
Title: Re: طلقاني تقومي الليلي !!!
Author: salma subhi
Date: 06-03-2007, 07:57 AM
Parent: #58
شوفي ده يا عواطف
|
Post: #62
Title: Re: طلقاني تقومي الليلي !!!
Author: عواطف ادريس اسماعيل
Date: 06-03-2007, 08:35 AM
Parent: #60
سوسو !!!
الراجل دة يمكن عندو سبب يطلق بيه مرتو لكن السودانيين مالم ؟؟
|
Post: #63
Title: Re: طلقاني تقومي الليلي !!!
Author: رأفت ميلاد
Date: 06-03-2007, 08:50 AM
Parent: #60
سلام يا عواطف وليك وحشة
Quote: لا يجوز الإستهانة به مع من يسوى ومن لايسوى وهو عند إخوتنا
المسيحيين ميثاق شرف لا يعفيهم منه سوى الموت |
والدى الله يرحمه كان بحلف بالطلاق كتير كعادة . طبعآ تقديرآ تُلبى طلباته و دعواته . يوم واحد صاحبه قال ليه ياخوى فكنا إنتو لا عندكم طلاق ولا حاجة . رد الوالد وقال ليه على الطلاق طلاقنا أقوى من طلاقكم دى محاكم وفتاوى وجرى لامن تحفى ماهو ساهل زيكم كدة .
عواطف بجدية كدة Quote: أحد رجال الدين العرب قال لي ذات يوم أن
معظم السودانيات بلا حبال أو مطلقات ولكن يعشن مع أزواجهن دون علم بذلك |
الكلام ده ما داخل لى راس . يعنى واحد يحلف فى كشتينة أو لدعوة غدا مرتو تبقى طالق ؟
أعتقد عندما يحرم الرجل نفسه على زوجته يجب أن يكون يعنى ذلك بكل المقاييس وهو حق للمرأة والرجل إذا كان عن إقتناع بإنتهاء العلاقة .
ولا أعتقد الخالق (الغفور الرحيم) قاعد لينا على الواحدة .
كما ذكرتى إنها عادة وليست معنى مقصود لدى السودانيين . فد تكون عادة سيئة وعلها ذنب ولكن ليس الى حد القول | Quote: معظم السودانيات بلا حبال |
ده كلام شنو يا عربي يا زنخ
كان تديه على راسو المقفل ولا يجب أن يرمى الناس بهذه السهولة
(عديها لى عنصرية ضد العرب)
عندى إبن عمى قسيس كاثوليكى كان قاعد فى مجلس مع زملائه فى بنك النيلين سابقآ . وكان واحد يحكى فى قصة مثيرة . كان إبنى متابعه بإندهاش وإهمام ويقاطعو دايمآ ( عليك النبى ؟؟!) . ولما كترت المسألة قال له زميله (يا أبونا إنت جبهجى ولا شنو )
فهذه الأشياء من طبائع البشر وعداتهم المو سيئة كانت أم جيدة ولا أعتقد إنها الطريق لجهنم
قال بلا حبال قال . ما هى دى الفتاوى الغتست خبرنا .
مودتى
|
Post: #68
Title: Re: طلقاني تقومي الليلي !!!
Author: عواطف ادريس اسماعيل
Date: 06-03-2007, 10:37 AM
Parent: #63
ريري !!!
مساك الله بالخير ,,,
والله أبوك ربنا يحفظو بوظ على البوست بتاعي يعني أنا أستشهدت بيكم كناس عاقلين تقوم تقول لي أبوي
كان بحلف بالطلاق عمال على بطال ؟؟ الله يسامحه لكن صحي طلاقكم عاد ما بي مرقان الروح لامن الواحد
يغير رايه ويقول ما عايز أطلق عشان كدي نسوانكم خاتات بطيخة صيفي ونايمات قفا ,,,
والله يا رأفت الراجل دة ما عنصري ولا حاجة بس عايز ينبه لمسألة حليفة الطلاق والإستهانة بحدود الله
وما يرفضه الشارع من ممارسات خاطئة لا أكثر عموما شكرا يا بعد عمري على الطلة البهية ,..
|
Post: #61
Title: Re: طلقاني تقومي الليلي !!!
Author: عواطف ادريس اسماعيل
Date: 06-03-2007, 08:33 AM
Parent: #58
سلوم يا الخاتية اللوم !!!
محبتي من جوة قلبي ,,,
عارفة أنا أحترم مداخلاتك جدا لما فيها من توزان في الفكرة والطرح الموضوعي ,, ما عارفة ليه بحس
إنك مهتمة بالشأن الإجتماعي بصورة أكبر من سنوات عمرك القليلة جدا مقارنة بحجم تفكيرك العميق ,,,
شكراسلمى كلما ذكرتيه هو عين الحق تسلمي ياغالية يا بنت الغالين ,,,
|
Post: #64
Title: Re: طلقاني تقومي الليلي !!!
Author: عبد الدائم سيد أحمد
Date: 06-03-2007, 09:01 AM
Parent: #1
عطوفة الولوفة ..
ازيك ، وازيدك كمان على صفة الكسل البوصفوها لينا الخليجيين ذادو
ليها صفة الطلاق فى كل شى ، قالوا لي فى واحد سودانى مرتو
دقت الباب ، الراجل من شدة كسلو ما داير يقوم يفتح ليها
الباب قال ليها روحى يا شيخة انتى طلقانة .
وا عجبي !!
|
Post: #69
Title: Re: طلقاني تقومي الليلي !!!
Author: عواطف ادريس اسماعيل
Date: 06-03-2007, 10:47 AM
Parent: #64
عبدو !!!
محبتي ,,,
الل يجازي محنك والله ضحكتني كالعادة لكن الكسل دة عاد خلي ساكت واحدة صاحبتي أخوهامن شدة ما كسلان
قال الأكل دة لو عملوه حبوب مالم حبة الفطور وحبة الغدا وحبة العشا وكان بكسل من الحمام وغسيل
الهدوم قال المفروض يعملو ملابس ديسبوزابل زي الكلنس والحمام دة عاد المفروض يلغوه ويجيبو حاجة
الواحد يبلعها يبقى نضيف زي الفل قالو ليه يا محمد علي حتتزوج متين قال لمن ألقى لي مرة جاهزة
بأولادها !!!
|
Post: #65
Title: Re: طلقاني تقومي الليلي !!!
Author: محمد المختار الزيادى
Date: 06-03-2007, 09:06 AM
Parent: #1
عواطف اختى سلامات
شكرا لك وانت تمنحين المواضيع الاجتماعية طعما ولون
اذا كان الطلاق ابغض الحلال عند الله لماذا نحلف به بهذه الطريقة المبتذلة
دون مراعاة للجوانب الدينية والاخلاقية؟؟؟؟؟؟؟؟؟؟؟؟؟؟؟
ودون مراعاة لكبرياء الزوجة خاصة عندما يقع الفأس فى الراس
ويطلق زوجته لانه حلف الا يحدث هذا الشئ فيحدث الشئ نتيجة لاختلاف
فى الاراء او نتيجة لا صرار اعمى
وياتى لها بكل وقاحة يخبرها انها طالق لانه حلف بالطلاق لاخيه رافضاله
ان يتزوج فلانة او علانه على سبيل المثال
احترم كبريا~ها اذا رفضت العودة
لانه رجل لا يحترم حتى ابغض الحلال
عند الله
ويحلف به
تحياتى للمرة الثانية
وبصراحة كده الصحف السودانية تحتاج لقلم كقلمك هذا او فلنقل كيبورد
ككيبوردك
امتعينا بها على صفحات الجرائد السودانية ولو فى كل جمعة
تحياتى
ودام الود
مخو
|
Post: #67
Title: Re: طلقاني تقومي الليلي !!!
Author: كمال الدين بخيت اسماعيل
Date: 06-03-2007, 10:16 AM
Parent: #65
العزيزه عطوفه...
انها محنه كاريثيه....ربنا يكون في العون....
|
Post: #71
Title: Re: طلقاني تقومي الليلي !!!
Author: عواطف ادريس اسماعيل
Date: 06-03-2007, 10:58 AM
Parent: #67
كيمو الحبيب !!!
عاد نحنا كوارثنا ما عينة كان اجتماعية كان طبيعية ,, ربنا يستر !!
|
Post: #70
Title: Re: طلقاني تقومي الليلي !!!
Author: عواطف ادريس اسماعيل
Date: 06-03-2007, 10:54 AM
Parent: #65
حمادة !!!
ودي ,,,
كم يسعدني قلمك الجاد وشعورك النبيل تجاه مجتمعك و إرادتك السامية لتغيير مجتمعنا إلى مجتمع راق
كغيلاه من المجتمعات كل هذه الصفات الجميلة تدفعني إلا المزيد فبكم أبدو أكثر قوة وشجاعة لطرح
العديد من المواضيع ومعكم يصبح المنبر واحة جميلة ممهورة بالمشاعر النبيلة ,,, شكرا حمودي قد
أصبت كبد الحقيقة فكن معنا ,,,
|
Post: #66
Title: Re: طلقاني تقومي الليلي !!!
Author: هند محمد
Date: 06-03-2007, 10:02 AM
Parent: #1
سلامات عواطف
حقيقى أثرت نقطة فى غاية الاهمية ..وشئ من الاشياء المنكرة عند السودانين
متداول بشدة دون الانتباه الى امكانية وقوع الطلاق فعلا ودخولهم فى الاثم..
مشكورة على الموضوع الحيوى ودعواتنا بصلاح الحال ..تسلمى
|
Post: #72
Title: Re: طلقاني تقومي الليلي !!!
Author: عواطف ادريس اسماعيل
Date: 06-03-2007, 11:04 AM
Parent: #66
هند يا حلوة يا ست البنات !!!
محبني ,,,
والله كلامك صحيح رغم إنو في بعض الناس قالو دة مجرد كلام ولا يوقع الطلاق لكن في أبوظبي بعرف حالات
كتيرة جدا وقع عليها الطلاق بسبب الحليفة ومافي داعي لذكر الأسماء لكن هنا الناس جادين شوية في
حكاية تطبيق الشريعة الإسلامية ,, حرام يعني حرام وطلاق يعني طلاق لكن نحنا كلو شي عندنا مخالف وأشتر
وربنا يكون في العون شكرا هند مرورك أسعدني ,,
|
Post: #73
Title: Re: طلقاني تقومي الليلي !!!
Author: محمد المختار الزيادى
Date: 06-04-2007, 10:44 AM
Parent: #72
Quote: وبصراحة كده الصحف السودانية تحتاج لقلم كقلمك هذا او فلنقل كيبورد
ككيبوردك
امتعينا بها على صفحات الجرائد السودانية ولو فى كل جمعة |
??????????????????????
??????????????????????
|
Post: #74
Title: Re: طلقاني تقومي الليلي !!!
Author: عواطف ادريس اسماعيل
Date: 06-04-2007, 11:53 AM
Parent: #73
حمادة !!!
يا صاحب السبق والريادة ,, ربنا يسعدك ومن الشر يبعدك ,,, يهنيك و يعليك فوق المابيك ويجعلك في
كل خطوة سلامة ,,,
|
Post: #75
Title: Re: طلقاني تقومي الليلي !!!
Author: walid taha
Date: 06-05-2007, 07:10 PM
Parent: #1
أُستاذة عواطف إزيّك
الزاوج علاقة مقدسة بلا شك وهذه القداسة تفرض على كل ذى عقل النظر إليها بعين الإعتبار ....
الحلف بالطلاق كثير جداً فى مجتمعنا السوداني ولكنه قد لا يصل الى طور الظاهرة حسب إعتقادى وبالطبع هذا لا يخفى حقيقة انه على جانب كبير من الخطورة كما تفضلتى...لكن لاننا درجنا فى مجتمعنا ان نطلق هذه الكلمة وقتماشئنااصبحنا لا ننظر اليها من جانب شرعى واصبحت مثلها مثل اى امر عادى..
Quote: (اوهذا في رأي قمة الهبل لذلك من الأفضل لي أن أتزوج بإماراتي يؤمن لي مستقبل أبنائي
ويكفيني شر حليفة الطلاق العبثية) ثم عقبت ضاحكة بالله أيه رايك في الجماعة ديل فقر وحليفة طلاق !! |
هذه الاثيوبية أعتقد انها لم توفق فى الحكم على الرجل السوداني !! رغم ان الاثيوبين اكثر الشعوب إلتصاقاً بنا وبثقافة مجتمعنا فهل رأت مطارت الخليج تعج بسودانيات مطلقات ذاهبات غير عائدات ؟!! ام رأتهم يفترشون الرصيف حتى يصيبها الخوف وتفضل الزواج من إماراتى بدلاً عن السوداني!!
صديقتك دى يا استاذة شكلهابياااااااااااااعة
قال يأمن لى مستقبل اولادى قال
تخريمة يا استاذة:
واحد زار صاحبو وصاحبو قال ليهو : (علىّ الطلاق تقعد نشرب شاى)
قال ليهو(يا زول انت لاقى المرة دى واقعةولا شنو؟)
دمتى،،
|
Post: #79
Title: Re: طلقاني تقومي الليلي !!!
Author: عواطف ادريس اسماعيل
Date: 06-06-2007, 05:53 AM
Parent: #75
الحبيب وليد !!!
ودي ,,,
شكرا على مرورك الأنيق و بالفعل أن كلمة علي بالطلاق أصبحت عادة سائدة لكنها عادة غير جميلة لأنها
تقلل من قدر الزوجة حتى ولو كانت غير مقصودة أما الأثيوبية هي فعلا قد خسرت رجلا لا يقدر بثمن فالفلوس
ليست كل شيء ومع ذلك ربما خافت من الطلاق وجهجهة العيال بين أديس والخرطوم ,,,
|
Post: #80
Title: Re: طلقاني تقومي الليلي !!!
Author: مجدي عبدالرحيم فضل
Date: 06-06-2007, 06:18 AM
Parent: #79
أستاذة/ عطووووووفه سلالالالالالالالام
بطلآقه دي جااية من طلآقة اللغة ما طلاق ناس ودمحمد
فعلا دي حاجه معلقه فينا السودانيين وأنا واحد من
ديل زمان قبل الزواج وتأسي باهلي العرب بحلف ساكت
عمال علي بطال وكانت الحاجه بتقولي ياولد بتبقي علي
لسانك ومن يوم مارسلت سد المال وعقدة لساني ذاتو عقدتوا
مع العقد ومن ديك وعيًييك فراق الطريفي لجمله وحتي الآن
وكانت معاها حاجات كتيره ومنها السجائر والتدخين برضو
آفة يجب أن تسلطي قلمك حياله وتسلمي علي هال الموضوع
وجماعتنا الخليجيين ديل كمان عندهم عادات كتيره بطاله
أديهم حقهم كمان عشان يعرفوا أننا بنسبقهم في أجتماعيات كتيرة
عمرهم ما يحصلونا فيها بي طلاقنه ده في خصال ما موجوده إلافينا
ومأصلة من قلب الخلق الإسلامية النبيله وتسلمي وكل إناء بمافيه
ينضح وما يقعدوا لنا علي الحتتين ديل وبالله أعكسي عاداتم الغير
عربية ولا أسلامية في المعاملات وبس نأخذ الكفيل مثال وهضم حقوق
المكفولين والمعامله الغير كريمة لبعض العمالات في بلد الريال
الرياله اليركبواليها مناديل قولي آآآآآآآمين وبنعود ليكم.
،،،،أبوقصي،،،،
|
Post: #84
Title: Re: طلقاني تقومي الليلي !!!
Author: عواطف ادريس اسماعيل
Date: 06-06-2007, 10:06 AM
Parent: #80
أبو قصي يا سمح الزي !!!
مرورك يسعدني وطلة قصي البهية تفرحني فشكرا على كل حال والحمد لله إنك عقدت لسانك من يوم ما عقدت
وكمان خليت السجاير والله كدة إنت فل وعال العال ربنا يسعدك بعدين إنت عارفة الدنيا كلها قاعدة
لينا على الواحدة ونص فما بالك بالخليجيين بس بيتي وبينك علي الطلاق دي شينة جدا ولا موهيك تئبر
ألبي ؟
|
Post: #81
Title: Re: طلقاني تقومي الليلي !!!
Author: salma subhi
Date: 06-06-2007, 06:45 AM
Parent: #79
عواطف الليلة قلت أبادر أصبح عليك
صباح الخير
المعروف عندنا بعض القبائل في السودان بتثبت كرمها بحليفة الطلاق ذي الجعليين مثلاً نحكي ليك القصة دي قريتها.... قال ليك في جعليين زاروا ليهم واحد من أولاد أختهم عايش في البندر ( خرطومي يعني) ، اتونسوا معاه حبه كده لانه لافين على الأهل، ولما قاموا مشايين،، فصاحبنا بقى (يحنس) فيهم عشان يقعدوا (يا جماعة عليكم الله تقعدوا،، طيب صلوا على النبي،، ياخوان ما تجبروا خاطرنا،،، عليكم الله ) بس ما حلف عليهم طلاق،، فرفضوا كله كله يقعدوا،، لما طلعوا واحد منهم قال " شوف الراجل النّي ده عليك الله !!! بخلان علينا بمرته الشينة أم ضقاليم دي؟...كان سمحة مالو ؟؟ ماكان نبقى ليه ذاتوا سبب يشوف ليه واحده تانية" لكن نزل من عينا....بالمناسبة يا عطوفة ( المرة قريبتهم الحالة كمان).
ومودتي عطوفه
|
Post: #82
Title: Re: طلقاني تقومي الليلي !!!
Author: مجدي عبدالرحيم فضل
Date: 06-06-2007, 06:54 AM
Parent: #81
Quote: " شوف الراجل النّي ده عليك الله !!! بخلان علينا بمرته الشينة أم ضقاليم دي؟...كان سمحة مالو ؟؟ ماكان نبقى ليه ذاتوا سبب يشوف ليه واحده تانية" لكن نزل من عينا.
|
والله ضحكتيني وزكرتني بالكرم الجعلي المشلخ T
تسلمي سلمي وصاحبة الدار عطوفه الواحد بقي يتجنب
حوش الطلاق ده داير اربي عيالي بعيد من الطلاق.
|
Post: #83
Title: Re: طلقاني تقومي الليلي !!!
Author: عواطف ادريس اسماعيل
Date: 06-06-2007, 09:28 AM
Parent: #81
سلومي !!!
ياحلوة ياست البنات يا متعة للروح والنظر ,,
شكرا على مرورك الجميل ,, كالعادة ضحكتيني لمن قلت ياربي الناس حيقولو علي شنو ؟؟ الحالة ديل
أهلها يعني لو كانو أغراب كان الحصل شنو ؟ تصدقي لو حلف عليهم طلاق ما كانو حيعزو الحليفة لأنها ما
سمحة و عشان كدة هو ما حلف لأنهم عارفهم كويس ,,, ودي
|
Post: #86
Title: Re: طلقاني تقومي الليلي !!!
Author: Asma Abdel Halim
Date: 06-06-2007, 11:04 AM
Parent: #83
عواطف إزيك
أبيخ ليك الونسة الظريفة دى
القانون السودانى عارف ناسه قام سد الباب
حالات عدم وقوع الطلاق
130- لا يقع الطلاق:-
(أ) المعلق على فعل شئ، أو تركه، إلا بالنية.
(ب) بالحنث فى يمين الطلاق، أو الحرام.
(ج) المقترن بالعدد لفظاً، أو كتابة، أو إشارة إلا طلقة واحدة رجعية.
|
Post: #87
Title: Re: طلقاني تقومي الليلي !!!
Author: محمد المختار الزيادى
Date: 06-06-2007, 11:20 AM
Parent: #86
Quote: عواطف إزيك
أبيخ ليك الونسة الظريفة دى
القانون السودانى عارف ناسه قام سد الباب
حالات عدم وقوع الطلاق
130- لا يقع الطلاق:-
(أ) المعلق على فعل شئ، أو تركه، إلا بالنية.
(ب) بالحنث فى يمين الطلاق، أو الحرام.
(ج) المقترن بالعدد لفظاً، أو كتابة، أو إشارة إلا طلقة واحدة رجعية |
تحياتى استاذه اسماء
المجتمع لا يعمل بالقانون فى كثير من الحالات وهذه مرحلة متقدمة جدا نسبة للجهل واشياء اخرى .
لا ينكر احد ان هناك حالات طلاق وقعت بسبب الحليفة
وكم من بيوت آمنة مطمئنة تشتت بسبب (على الطلاق)
اعتقد ان هذا المشكلة الاجتماعية موجودة وعلينا مناقشتها من هذه ةالناحية اى انها موجودة
الامثلة كثيرة جدا ويستطيع اى عضو فى هذا البورد ان يأتى لنا بمثال حقيقى
تحياتى ودام الود
مخو
|
Post: #88
Title: Re: طلقاني تقومي الليلي !!!
Author: Asma Abdel Halim
Date: 06-07-2007, 04:28 AM
Parent: #87
| Quote: اعتقد ان هذا المشكلة الاجتماعية موجودة وعلينا مناقشتها من هذه ةالناحية اى انها موجودة |
الأستاذ محمد المختار الزيادى
إذا اردنا معالجة المشكلة فعلينامناقشتها من جميع النواحى
من خلال مشاركتى فى برامج نشر الوعى وجدت أن القانون يشكل أحد أعمدة الوعى لدى الناس
والمشاكل لا تحل بحصرها تحت عنوان واحد. القانون لم يأت من فراغ بل من ممارسات الناس وطرق حياتهم لذا نراه متطورا بتطورهم ومتخلفا بتخلفهم.
هل يضيرنا أن نشيع بين الناس القانون؟ إجابتى لا بل أنه يسهل مهامنا وحياتنا. أفتح صفحة أى صحيفة وأقرا إعلانات محاكم الأحوال الشخصية وغيرها لترى أن القانون والمحاكم ما عادا من أوجه "العيب" فى مجتمعنا. معظم البيوت التى تهدمت كان يمكن إنقاذها لو علم الحالف أن حلفه هذا لا يساوى شيئا
وتقبل فائق الإحترام
أسماء
|
Post: #92
Title: Re: طلقاني تقومي الليلي !!!
Author: عواطف ادريس اسماعيل
Date: 06-07-2007, 05:04 AM
Parent: #88
حبيبتي أسماء !!!
معزتي ,,,
الهدف من هذا البوست هو محاربة عادة قبيحةيمارسها معظمالسودانيين وبما أن الطلاق أمر اهتز له عرش
الرحمن فلماذا يكون جزء من ممارساتنا اليومية ولماذا يستهين الإنسان برباط مقدس في البتسوى
والمابتسوى وإذا كان الطلاق لا يقع في القانون السوداني لعدم وجود النية فهناك دول عربية أخرى يعيش
فيها سودانيون عندما يحلفون يطبق عليهم القانون ,,, مودتي ,,,
|
Post: #90
Title: Re: طلقاني تقومي الليلي !!!
Author: عواطف ادريس اسماعيل
Date: 06-07-2007, 04:56 AM
Parent: #87
حمودي !!!
صباحك فل يا سيد الكل ,,,
وأنا كمان شخصيا أعرف واحد قال لزوجته تحرمي علي علي لو فعلت كذا وكذا وعندما نكص وعده وقع
الطلاق بأمر المحكمة التي اعتبرت التحريم أسوأ من الطلاق ورفضت زوجته الرجوع إليه !!!
|
Post: #89
Title: Re: طلقاني تقومي الليلي !!!
Author: عواطف ادريس اسماعيل
Date: 06-07-2007, 04:52 AM
Parent: #86
أسوما فتيل المايقوما !!!
شرفتي وآنستي ,,,
حاشاك من البياخة لكن كان كدي من الليلة حليفة الطلاق حتكون عمال على بطال طالما دة راي القانون
السوداني ,,, شكرا على مرورك الحلو ,,,
|
Post: #91
Title: Re: طلقاني تقومي الليلي !!!
Author: abubakr
Date: 06-07-2007, 04:59 AM
Parent: #1
اسماء... كويس الجيتي .. انا حكاية الحلفان والطلاقات دي ما بريدها وبغتاظ من اصدقائي الذين يستعملونها كثيرا وعموما المجتمع القروي الذي اتيت منه ليس فيه من هذا شئ او حسب علمي .. في مداخلتك اعلاه اتيت بامر هام كان محيرني لضعف في معلوماتي المتعلقة بقانون الاحوال الشخصية والقانون عموما والان ارجو لو عند ك وقت (وانا عارف انو اصعب حاجة عندك انو يكون عندك باقي وقت) ان توسعي شرحك للاتي لانو جد مهم :
Quote: حالات عدم وقوع الطلاق
130- لا يقع الطلاق:-
(أ) المعلق على فعل شئ، أو تركه، إلا بالنية.
(ب) بالحنث فى يمين الطلاق، أو الحرام.
(ج) المقترن بالعدد لفظاً، أو كتابة، أو إشارة إلا طلقة واحدة رجعية |
كيف تثبت النية ؟؟
|
Post: #93
Title: Re: طلقاني تقومي الليلي !!!
Author: صديق الموج
Date: 06-07-2007, 05:23 AM
Parent: #1
عواطف اول شى نستبعد حلال وحرام وشرعى ومدنى لان كل ده
اجتهاد يقبل الصاح والغلط....
طيب انتو خلو برى وسجمى وكر ونحن نخلى
ماكلام جرى على اللسان وماقادرين نخليه
وانا بفتكر قمة الاحترام للمرة والتقدير لها والزول بحلف
بالاشياء البحبها..يعنى ما بقول وتربة الشهيد الزبير مثلا
ولا بقول طلقانه مرت جيرانا....
عواطف بالله حكاية على الطلاق دى انتى عارفاها تمومة كلام ساكت احيانا
واحيانا من العشم ..لكن حكاية بنحبكم دى مافيها شك
انتو حبونا وقدرو ظروفنا واتعاملوا معانا بلا
تشكيك واتاخرت مالك وضحكت مع منو واحلفو بالحرام
ياللات والعزى على كيفكم مادام لغو وكلام خارم بارم
ساكت ....بعدين الحبشية ما عارفه الائمة قالوا شنو
متحيلة دايره ليها امارتى مرتاح ساكت ...
عواطف الموضوع ده اكثر من عادى ولايضيركن ولانتضرر منه
نحن دحين خلونا نتونس ما تصعبوا الدنيا اكثر من ماهى
صعبه...على الطلاق بهظر ساكت،،،،
|
Post: #94
Title: Re: طلقاني تقومي الليلي !!!
Author: عواطف ادريس اسماعيل
Date: 06-07-2007, 05:34 AM
Parent: #93
صديق !!!
ودي ,,,
عارف يا صديق لي يومين كدة قافلة معاي للآخر الليلة غايتو ضحكتني جنس ضحك ما عادي وبعدين معاك !هسة
بالذمة سجمي وبري يايمة وكر علي ديل في أحلى منهن عارف ديل زي تئبرني وتئبر ألبي عند اللبنانيات
أما على الطلاق دي طالما بقت مشكوك فيها أخير تخلوها وتبتكرو ليكم حليفة جديدة مثلا تقول علي
بالصيام تلاتة أيام أو علي بمشاهدة الفضائية السودانية عشرة يوم وبعدين بيني بينك هسة الحبشية
أخدت جواز الإمارات وبقت مواطنة يعني لو كان عرست السوداني كان حتاخد شنو غير إعصار جونو ؟؟
|
Post: #95
Title: Re: طلقاني تقومي الليلي !!!
Author: ابوبكر يوسف إبراهيم
Date: 06-07-2007, 07:37 AM
Parent: #94
الأخت الحبيبة عواطف
لك خالص التحايا والود
حقيقة أن المرأة عزيزة وغالية عند الرجل السوداني بالذات وموضوع الحليفة بالطلاق هو موروث وعرف
منذ عهد قديم حينما كانت الأمية متفشية والوعي الإجتماعي محدود وقاصر إلا على القلة .. في تلك
كانت الرجال يعددون لأن التعدد كان من مظاهر الفحولة والرجولة والجاه والقدرة المادية .. المرأة
بعض من أدوات الوجاهة.. كانت حليفة الطلاق تدخل لتأكيد الصدقية في البيع والشراء ، لتأكيد أن
قرار (سي السيد) كالقضاء نازل لا محالة ، بصراحة إمتهان لكرامة المرأة . قال: الحبيب المصطفي في الحديث الشريف ما معناه : (إثنان جدهن جد وهزلهن جد)الحديث.
صون كرامة الزوجة في إحترامها وأعرف صديق لي كان كثير الحلفان بالطلاق حتى قبل أن يتزوج وعندما تزوج قلنا له أحفظ لسانك الآن تزوجت وأن حلفان الطلاق حتى ولو بالمزاح يقع فقال لنا لدي المخرج فنادي على عروسه أمامنا وحلف بالطلاق قائلاً لها( على الطلاق ما بيننا طلاق حتى أموت) وذلك حتى يبطل حلفانه بأي طلاق مستقبلاً يعني ( طلاقه فشنك)بعد هذا الحلفان!! فكرة مش كده!!
|
Post: #96
Title: Re: طلقاني تقومي الليلي !!!
Author: عواطف ادريس اسماعيل
Date: 06-07-2007, 07:56 AM
Parent: #95
أخي الحبيب د. أبوبكر !!!
ودي ,,,
افتقدت قلمك الشفيف ورأيك الثاقب ,, حمدلله على السلامة ونورت البوست ,,,
فعلا كلامك معقول ومنطقي جدا فهزل الطلاق وجده يقع تحت بند الجد ولا مزاح فيه وإن ثبت حسن النية أما
صاحبك فوالله شخصية لطيفة جدا وقد وجد لنفسه مخرجا سلسا ومرضيا ,, أخي أبوبكر لا فض فوك كم أنت رائع
كما عهدناك ,, شكرا على المرور الجميل ,,,
|
Post: #97
Title: Re: طلقاني تقومي الليلي !!!
Author: EMU إيمو
Date: 06-07-2007, 08:26 AM
Parent: #96
عواطف حبابك
لدي بحث منه جزئية تتحدث عن التلوث البيئ
ربما ضمنت فيه عنصر الطلاق وضرره على البيئة
نسبة الحلف وأشكاله في السودان تختلف من منطقة لأخرى
مجتمع الجزارين وتجار الجملة على رأس القائمة وخاصة ما يطلق عليهم الجلابة أو البحاره في بيئة معينة، ثم يأتي أصحاب المهن الأدبية والأطباء والمهندسين على زيل القائمة
|
Post: #98
Title: Re: طلقاني تقومي الليلي !!!
Author: عواطف ادريس اسماعيل
Date: 06-07-2007, 09:17 AM
Parent: #97
إيمو عندنا ؟؟؟
يا مرحبا !!!
هل تقصد تأثير البيئة على حالات وقوع الطلاق أم العكس بيني وبينك نحنا بقينا نعمل البيئة شماعة
والحليفة وسيلة وليست غاية ,,, زفعلا زي ما قلت الجلابة هم الأكثر حلفانا بالطلاق يليهم التجار
خصوصا بتوع السوق العربي وسعد قشرة ,, شكرا إيمو على العبور ,, ودي .
|
Post: #100
Title: Re: طلقاني تقومي الليلي !!!
Author: Asma Abdel Halim
Date: 06-08-2007, 03:13 PM
Parent: #98
ابوبكر سلام
عندنا ثلاث حالات
(أ) المعلق على فعل شئ، أو تركه، إلا بالنية.
مثلا لو قال الزوج لزوجته لو ذهبت لبيت جارتك فأنت طالق، الطلاق هنا معلق على ذهاب الزوجة لجارتها. الزوج إما أن يكون جادا وينوى فعلا تطليق الزوجة أو يكون قاضدا تخويفها بالطلاق كوسيلة منع فإذا طلعت مرة تمام ومشت فى الحالة الأولى يقع الطلاق وفى الثانية لا يقع وهذه يا سيدى يعلمها سى السيد دون غيره
(ب) بالحنث فى يمين الطلاق، أو الحرام.
فا الحالة دى قول أم الوليدات الما خمج قاعدة فوق عديلها وأخونا صديق الموج متوسط أصحابه وهاك يا على الطلاق وعلى الحرام مع الونسة والضحك. هذا قسم لا علاقة له بالزوجة بل كما قال صديق الموج كلام يجرى على اللسان فليس من مصلحة الأسرة أن يقع طلاق كلما حرت الونسة او الشكلة.
(ج) المقترن بالعدد لفظاً، أو كتابة، أو إشارة إلا طلقة واحدة رجعية
هنا عندنا برضه عادة ّذميمة عند الرجال الواحد يروح مطلق ثلاثة طلقات فى جملة واحدة. بالرغم من قوله "طلقانة بالثلاثة" فإن الطلاق يقع طلقة واحدة
أما إذا تعدد باللفظ بفوله طالق طالق طالق فأن الطلاق يقع ثلاثا إلا إذا قصد منه التأكيد حسب المادة أدناه
الطلاق المتتابع
131- يقع الطلاق المتتابع طلقة واحدة، إذا قصد به التأكيد، وإلا فيقع بعدده.
ممن يقع الطلاق
132- يقع الطلاق من الزوج، أو من وكيله، أو من الزوجة، إن ملكها الزوج أمر نفسها.
وبما أن الأمر كذلك يا عواطف وأخواتى المتداخلات عليكن بالمادة 132 وأملكن أمر أنفسكن
شايفات كيف الواحد متاح ليه فى القانون يزوغ من طلاق نطقه بلسانه. يعنى فى الحالة الاولى لو الواحدة مشت بيت الجيران عشان الطلاق يقع ممكن براحة يكون العذر والله ماكان عندى نية طلاق
مع تحياتى
|
Post: #101
Title: Re: طلقاني تقومي الليلي !!!
Author: abubakr
Date: 06-08-2007, 04:55 PM
تحياتي اسماء
| Quote: والله ماكان عندى نية طلاق |
يعني برضو حيزوغ ويواصل في "طلقاني" ...
انا حقيقة لا اعرف لماذا الرجل السوداني من دون خلق الله هو الذي اشتهر بهذا "الحلفان بالطلاق "؟
لماذا القانون اتي بهذا الشكل والذي يبدو لي متسامحا او متحيزا للرجل ... الغرامات المادية (ياودالموج) هي انجع اسلوب في هذه الحالة ؟ يعني لازم قانون يفرض غرامات مالية لكل من يحلف بالطلاق ثم ينفي النية ..غرامة طالما هو حلف بها..حتي لا يكون الطلاق مضغة في الافواه فيستصغر امره البشر فتضعف الروابط وتكثر الطلاقات حقيقة .؟؟
|
Post: #102
Title: Re: طلقاني تقومي الليلي !!!
Author: عواطف ادريس اسماعيل
Date: 06-09-2007, 06:01 AM
Parent: #101
والله يا ود سيد احمد مهما توفرت النية الحسنة أنا برضو بعتبرو نوع من الاستهتار وعدم الحضارة
والغريبة إنو في ناس فاهمين جدا في المنبر دة وبيأيدوا الحكاية دي باعتبارها موروث سوداني !!
|
Post: #103
Title: Re: طلقاني تقومي الليلي !!!
Author: Asma Abdel Halim
Date: 06-10-2007, 05:45 AM
Parent: #102
| Quote: لماذا القانون اتي بهذا الشكل والذي يبدو لي متسامحا او متحيزا للرجل |
يا عزيزى أبو بكر
القانون ده معمول أساسا لخدمة الرجل المرأة واردة فيه لتوضيح ما يراد للرجل.
لكن ما تقول لى مسألة الغرامات المادية دى عبقرية.
أسماء
|
Post: #104
Title: Re: طلقاني تقومي الليلي !!!
Author: عواطف ادريس اسماعيل
Date: 06-10-2007, 05:56 AM
Parent: #103
أسومي !!!
ودي ,,,
أعجبتني عبارة القانون دة معمول اساسا لخدمة الرجل المرأة ورادة فيه لتوضيح ما يراد للرجل !!!
|
Post: #105
Title: Re: طلقاني تقومي الليلي !!!
Author: EMU إيمو
Date: 06-10-2007, 07:00 AM
Parent: #104
عواطف تحياتي
إليك التحولات الميكروبية لعنصر الطلاق وأثرها السلبي على البيئة الحياتية:
يعتبر عنصر الطلاق من العناصر المهمة التي يحتاجها الكائن الحي وخاصة الكائن
الحي الراقي (الإنسان) ويجب ان لا تزيد الجرعة عن طلقة واحده في العمر، حيث بعدها
يصير الكائن الحي الأنثى مكتسب مناعه دائمه بسببها تستغر الحياة وتتزن البيئة
أما إذا زادت الجرعة وفاتت الحد الأقصى جرعتين يحدث التفكك الأسري وتدخل عوامل
التعرية في صياغة عناصر جديدة بسبب التفتت والتحلل في رابطة الحياة الزوجية
ومن أهم المركبات الجديدة ثاني أكسيد الإنفصال ، وينطلق جزء منه (الغاز) إلى الهواء
الجوي لضمان الحياة بالتكاثر وهو الرجل للبحث عن زرة جديدة .
والمتبقي من تفتت المركب الزوجي يبقى في شكل عناصر متطفله أو متسوله وهكذا يكون
تضررت البيئة نسأل الله ان يحفظها
فائق مودتي
|
Post: #106
Title: Re: طلقاني تقومي الليلي !!!
Author: عواطف ادريس اسماعيل
Date: 06-10-2007, 07:39 AM
Parent: #105
أخي الحبيب إيمو !!!
مودتي ,,,
شكرا على هذه المداخلة اللطيفة وليحفظ الله الحياة الأسرية للجميع ويمنحها الاستقراروالسعادة بدون
طلقة واحدةأو إثنين ,,,
|
|